အပိုင်း ၁၇၃

Chapter 173

: ခဏနေရင် တွဲဖက်ဂီတကို အသံသွင်းရဦးမှာနော်

ဟယ်ရှောင်းက ခိုင်မာပြီး ဆုံးဖြတ်ချက် ပြတ်သားသည့် ကိုယ်ရည်ကိုယ်သွေး ရှိကာ ကိုယ့်ကံတရားကိုယ် ထိန်းချုပ်ရာ၌လည်း ကျင့်သားရနေခဲ့လေသည်။ သူက ဘဝတစ်ဝက်ကို ဖျားနာမှုကြောင့် အိပ်ရာပေါ် လဲနေရင်း ကုန်ဆုံးခဲ့ရသည်။ လွန်ခဲ့သည့် နှစ်နှစ်အစောပိုင်းကတည်းက သူ့စျာပနပွဲအတွက် ကိုယ်တိုင် အသေးစိတ် အစီအစဥ်ချထားပြီးသားဖြစ်၏။ သူက စျာပနအခမ်းအနားအတွက် ပန်းများ စီစဥ်ရာတွင် ယွီထိုက်ယွဲ့ အနှစ်သက်ဆုံး ပန်းများဖြစ်သည့် ပျိုနီပန်းများကိုသာ အသုံးပြုရန် လူဝီဆန်အား ထပ်ကာထပ်ကာ ညွှန်ကြားခဲ့သည်။ 

စျာပန အခမ်းအနားနေ့တွင် ယွီနျန်က စျာပနအဝတ်အစားများ လဲလှယ်ကာ ဟယ်ရှောင်း၏ တစ်ဦးတည်းသော သားအဖြစ် အောက်မေ့ဖွယ်ခန်းမထဲ ရပ်နေရင်း ဧည့်သည်များ လက်ခံနေရသည်။ သတင်းကြားကြသောအခါ နိုင်ငံအရပ်ရပ်မှ လူချမ်းသာ စီးပွားရေးလုပ်ငန်းရှင်များနှင့် နာမည်ကျော်များစွာက လာရောက် အရိုအသေပေးကြသည်။ ယွီနျန်က ဧည့်သည်များ၏ စကားများထံမှ ဟယ်ရှောင်း၏ ကြီးကျယ်ခမ်းနားပြီး အစီအစဥ်မကျ ဖြစ်ခဲ့သော ဘဝဇာတ်ကြောင်းကို ခပ်ရေးရေး ခန့်မှန်းနိုင်ခဲ့သည်။ 

ဆံပင်များ ဖြူဖွေးနေသည့် လူကြီးတစ်ယောက်က ယွီနျန်နှင့် လက်ဆွဲနှုတ်ဆက်လာပြီးနောက် သူ့ကို အသေအချာ ကြည့်ရှုစစ်ဆေးလာခဲ့သည်။ အဆုံးတွင် သူ သက်ပြင်းချလိုက်သည်။ 

"မင်းအဖေ... မစ္စတာဟယ်ရှောင်းကို ငါတို့လို မိတ်ဆွေဟောင်းတွေနဲ့ ပြိုင်ဘက်တွေက ပင်လယ်ပြင်ရဲ့ ဘုရင်ကြီးလို့ ညွှန်းဆိုကြတယ်... အခုတလောနှစ်တွေမှာ သူက လူတွေရဲ့အမြင်ကို သိပ်မပေါ်လာတော့ဘူး... ဒီကမ္ဘာကြီးနဲ့ ဘဝအတွက် စိတ်အားထက်သန်မှုတွေ ပျောက်ဆုံးနေပြီးတော့ သေခြင်းတရားကိုပဲ စောင့်မျှော်နေခဲ့တာ... ဒါပေမယ့် လွန်ခဲ့တဲ့ ရက်အနည်းငယ်လောက်က ငါတို့ကို ဖုန်းခေါ်လာပြီး မင်းကို ရှာတွေ့ပြီလို့ ပြောလာတယ်... သူပြောရင်းနဲ့ ဘဝသက်တမ်းတစ်ဝက်လောက်ထိ ရှင်သန်ခဲ့တဲ့သူက ငိုချတော့တာပဲ" 

ယွီနျန်၏ မျက်လုံးများ၌မျက်ရည်ဝဲလာသည်။ 

ထိုလူကြီးက ထပ်မပြောတော့။ 

"မင်းအဖေရဲ့ စကားလုံးတွေကို ငှားပြောရရင် သူက ဒီတစ်ကြိမ်မှာ ပြီးပြည့်စုံတဲ့ ဘဝကို နေထိုင်ခဲ့ရပြီပေါ့... ငါ့ရဲ့ ထပ်တူဝမ်းနည်းမှုတွေကို ကျေးဇူးပြုပြီး လက်ခံပေးပါ"

ယွီနျန်က စိတ်ရင်းဖြင့် ဦးညွှတ်ကာ ဆို့နင့်နေသည့် အသံဖြင့် ပြောလိုက်သည်။ 

"လာရောက်ပေးလို့ ကျေးဇူးတင်ပါတယ်"

စျာပနပွဲက သုံးရက်လုံးလုံး ကြာမြင့်ခဲ့သည်။ ထပ်တူ ဝမ်းနည်းကြေကွဲမှုများ လက်ခံနေစဥ် ယွီနျန်က လာရောက်သူများနှင့် စကားပြောနေခဲ့သည်။ တဖြည်းဖြည်းနှင့် သိလာရသည်မှာ ဟယ်ရှောင်း၏ မိဘများမှာ သူငယ်စဥ်ကတည်းက ရန်သူများထံမှ အသတ်ခံလိုက်ရပြီး မိသားစု၏ ချမ်းသာကြွယ်ဝမှုများလည်း အလုခံလိုက်ရသည်။ သူ အသက်ကြီးလာသည်နှင့် လက်စားပြန်ချေရန် အကွက်ကျကျ စီစဥ်ခဲ့ပြီး တဖြည်းဖြည်းနှင့် သူ့ကိုယ်ပိုင်လက်များဖြင့် စီရင်ခဲ့သော်လည်း ထိုလုပ်ငန်းစဥ်အတွင်း ဒဏ်ရာများလည်း ရရှိခဲ့သည်။ သူ့ကျန်းမာရေးက လျင်မြန်စွာ ဆုတ်ယုတ်လာခဲ့ပြီး ဆေးဝါးများကြောင့် ဖြစ်လာသည့် ထိခိုက်မှုများကြောင့် ပြန်မသက်သာလာနိုင်တော့ပေ။ ဤနှစ်များအတွင်း သူ့ခန္ဓါကိုယ်က တဖြည်းဖြည်း အားနည်းလာကာ ဘယ်တော့မှ ကျန်းမာရေး ပြန်ကောင်းမလာနိုင်တော့ပေ။ 

ယွီနျန်မှာလည်း ဟယ်ရှောင်းက သူမတူသော ထူးချွန်မှုများ ရှိနေပြီး ခိုင်မာသော စိတ်ဆုံးဖြတ်ချက်များ ရှိကြောင်း သိရှိခဲ့ရသည်။ သူက သင်္ဘောရာချီ စုဆောင်းကာ မဆက်မပြတ် ရွက်လွှင့်ခဲ့ပြီး ရေကြောင်းအစီအစဥ်များကို ကျယ်ပြောလှသော ပင်လယ်သမုဒ္ဒရာထက် ဖြန့်ကျက်ခဲ့သည်။ သူက ပင်လယ်များကို သိမ်းပိုက်ရန် ရည်ရွယ်ချက်များကို သိုလှောင်ထားခဲ့သော်လည်း ကျန်းမာရေးအခြေအနေများကြောင့် အိပ်ရာထက်တွင်သာ တစ်ချိန်လုံး ကန့်သတ်ခံထားရလေသည်။ 

တတိယနေ့ နေ့လည်ပိုင်းတွင် လာရောက်သူဦးရေက သိသာထင်ရှားစွာ လျော့ကျလာခဲ့သည်။ လူဝီဆန်၏ မျက်လုံးများက နီရဲနေပြီး ယွီနျန်အတွက် နေ့လည်ခင်း လက်ဖက်ရည်တစ်ခွက် ယူလာပေးရင်း ပြောလိုက်သည်။

 "သခင်လေး... ကျေးဇူးပြုပြီး တစ်ခုခု စားပါဦး"

ယွီနျန်က တောင်းပန်ဟန်ဖြင့် ခေါင်းယမ်းပြလိုက်သည်။ "ကျွန်တော်တကယ် စားချင်စိတ် မရှိလို့ပါ"

သူက ညတွင်လည်း ကောင်းကောင်း မအိပ်နိုင်ဘဲ နေ့ခင်းပိုင်းတွင်လည်း အနားယူရန် အချိန်မရှိပေ။ ယွီနျန်က သိသိသာသာ အလေးချိန်ကျဆင်းသွားပြီး သူ့အဝတ်များက ကိုယ်ပေါ်ပွယောင်းယောင်း ဖြစ်နေကာ မေးပိုချွန်လာသလိုပင်။ သို့သော်ငြား မျက်လုံးများက တောက်ပနေခဲ့သည်။ သူ ညင်သာစွာ ပြောလိုက်သည်။

 "ကိုယ့်ကိုယ်ကိုယ် အရမ်းကြီး အပင်ပန်းမခံပါနဲ့... သေချာအနားယူပါဦး"

ထိုစကားကို ကြားသောအခါ လူဝီဆန် ခေါင်းငြိမ့်ပြလိုက်ပြီး ယွီနျန်ဘေးတွင် ဝင်ရပ်လိုက်သည်။ သူ့ကိုယ်သူ တောင့်ခံထားရင်းဖြင့် နောက်ထပ် စကားစမြည် ပြောလာခဲ့သည်။ 

"ကျွန်တော် ငယ်ငယ်တုန်းက နိမ့်ကျနေတဲ့အချိန်မှာ ဆရာက ရွှံ့ထဲက ဆွဲထုတ်ပေးခဲ့ပြီးတော့ ခေါင်းမော့ရင်ကော့ပြီး နေနိုင်အောင် လုပ်ပေးခဲ့တယ်...ဒီကျေးဇူးတရားကို တစ်ဘဝလုံး မှတ်မိနေမှာပါ" 

သူ့အကြည့်များက ဟယ်ရှောင်း၏ ဓါတ်ပုံထက်သို့ တစ်ခဏမျှ ကျရောက်သွားပြီးနောက် ဆက်ပြောလိုက်သည်။

 "ကျွန်တော် အပြင်ဘက်က ဧည့်သည်တွေကို သွားနှုတ်ဆက်လိုက်ဦးမယ်"

ငါးရက်မြောက်နေ့တွင် ဟယ်ရှောင်း၏ နောက်ဆုံးဆန္ဒအတိုင်း ယွီနျန်က ဟယ်ရှောင်း၏ အရိုးပြာအိုးကို ကိုယ်တိုင်သယ်ကာ ပင်လယ်ဘက်သို့ ထွက်လာခဲ့သည်။ သင်္ဘောဦးစွန်းတွင် ရပ်ကာ ပင်လယ်လေနုအေးလေးများကို မျက်နှာမူရင်းဖြင့် ပြာများကို ပင်လယ်ထဲသို့ ကျဲချလိုက်သည်။ လူဝီဆန်က အနက်ရောင် အနောက်တိုင်း ဝတ်စုံကို ဝတ်ဆင်ထားပြီး မျက်လုံးထောင့်မှ မျက်ရည်စများကို သုတ်နေခဲ့သည်။

သင်္ဘောဦးစွန်းမှ ပြန်ရောက်လာသောအခါ ယွီနျန်က ပင်လယ်မျက်နှာပြင်ထက်မှ မငြိမ်မသက်ဖြစ်နေသော လှိုင်းကြက်ခွပ်များကို ကြည့်နေမိခဲ့သည်။ အရိုးပြာများမှာ ချက်ချင်းဆိုသလို ပျောက်ကွယ်သွားပြီး အနီးအနားမှသည် မသိနိုင်သော အကွာအဝေးထိ သယ်ဆောင်ခံသွားခဲ့ရလေသည်။ 

ပင်လယ်စင်ယော်များက ဆူညံစွာအော်ဟစ်လာခဲ့သည်။ ယွီနျန်က လှိုင်းလုံးလေးများကို တစ်ခဏမျှ စိုက်ကြည့်နေခဲ့လေသည်။ သူ တိတ်တဆိတ် လှည့်ကာ သူ့ခေါင်းကို ရွှယ်ယုံ၏ ပုခုံးထက်သို့ နှစ်မြှုပ်ထားလိုက်သညိ။ 

ရွှယ်ယုံ လက်မြှောက်၍ သူ့ကို ပွေ့ဖက်ပေးလာခဲ့သည်။

ထိုအခိုက် လွန်ခဲ့သည့် နှစ်ရက်အတွင်း နိုင်ငံထဲရှိ အဓိကအွန်လိုင်းဖိုရမ်များ၌ တက်ကြွလှုပ်ရှားစွာ ပေါက်ကွဲထွက်နေကြသည်။ ထိုအခမ်းအနားနှင့် ပတ်သက်သည့် ပိုစ့်များစွာက ဟုမ်းပေ့ချ်များထက် နေရာယူထားလေသည်။ 

“နိုင်ငံတကာ သတင်းကို တွေ့ပြီးကြပြီလား... အခု အတည်ပြုသွားပြီ... ယွီနျန်ကို ဆင်းရဲတယ်တို့ လေးစားစရာ နောက်ခံမရှိဘူးတို့ အဖေနာမည်အတပ်မခံရတဲ့ တရားမဝင်သားတို့ ဆိုပြီး စော်ကားမော်ကား ပြောခဲ့ကြတဲ့သူတွေ.... မျက်နှာတွေ ယောင်ကိုင်းမနေကြဘူးလား အခု[Link]”

[လင့်ခ်ကို မနှိပ်ကြည့်ဘဲနဲ့ ထင်ရာမြင်ရာ ဝေဖန်ကြမဲ့ ဦးနှောက်မရှိတဲ့ haterလေးတွေအတွက် ဒီမှာ screenshotနော်... ကြည့်ပြီးမှ ဝေဖန်ဖို့ သတိရ... အနည်းဆုံးတော့ လူသားတွေရဲ့ ဥာဏ်ရည်လေးတော့ ရှိကြပေါ့... အိုကေ]

[သောက်ကျိုးနဲ... ယွီနျန်က သင်္ဘောဘုရင်ကြီးရဲ့ သားအရင်းတဲ့လား... ဘယ်လောက်တောင် မှော်ဆန်လိုက်တဲ့ အမှန်တရားလဲလို့... လွန်ခဲ့တဲ့ ရက်တွေတုန်းက ယွီနျန်ကို ယွီကျုးရှန်းရဲ့ တရားမဝင်သားလို့ အခိုင်အမာ ပြောခဲ့တဲ့သူတွေကို ပါးစပ်ပိတ်ခိုင်းလိုက်တာပဲဟေ့... ယွီကျူးရှန်းမှာ မိန်းမနဲ့ ကလေးတွေ ဘယ်လောက်တောင်ရှိလဲ ဆိုတာ ရေတောင်မရေနိုင်ဘူး.... ပြီးရင်အမွေလုပွဲ အရှုပ်အထွေးကြီးက ရှိသေး.... သင်္ဘောဘုရင်ကြီးက ဆန့်ကျင်ဘက်ပဲနော်... လူထုအချက်အလက်တွေမှာ သူ့မှာအရှုပ်တော်ပုံ တစ်ခုမှ မရှိဘဲ တစ်ဘဝလုံး သန့်သန့်ရှင်းရှင်းနေခဲ့တာလို့ ပြောကြတယ်... သူက အင်တာဗျူးတစ်ခုမှာ တစ်ဘဝလုံး အမျိုးသမီးတစ်ယောက်ကိုပဲ ချစ်ခဲ့ဖူးတယ်လို့ ပြောခဲ့တယ်... အခု ကြည့်ရတာ အဲ့ဒီအမျိုးသမီးက ယွီထိုက်ယွဲ့ ဖြစ်နေပုံပဲ... ဟုတ်တယ်မလား... ဒါက ထာဝရချစ်ခြင်းမျိုးပဲ] 

[နိုင်ငံခြား ဝက်ဘ်ဆိုက်တွေက သတင်းတွေ တွေ့ကြပြီးပြီလား... သင်္ဘောဘုရင်ကြီး ကွယ်လွန်သွားတော့ နိုင်ငံရေးသမားတွေ အာဏာရှင်ကြီးတွေ စျာပနကို လာတက်ကြတယ်... နျန်နျန်အတွက် အရမ်းခက်ခဲနေမှာပဲ... ပုံထဲမှာ ကြည့်ရတာ အရမ်းပိန်သွားတာ... အစကတည်းက မျက်နှာလေးက သေးနေပြီးသားကို... အခုကတော့ ရင်ကွဲစရာပဲ QAQ.]

[ယွီနျန်က သင်္ဘောဘုရင်ကြီးရဲ့ ပိုင်ဆိုင်မှုတွေ အများကြီး အမွေရခဲ့တာတဲ့... နိုင်ငံခြားသတင်းတွေမှာ မြင်သာထင်သာ ရှိတဲ့ တန်ဖိုးကြီး ပစ္စည်းတွေ စာရင်းထုတ်ထားတာ... ပြောကြတာ ခေါင်းတွေပါ မူးလောက်နီးပါးတဲ့... ငါလည်း ရူးသွားတော့မယ်ထင်တယ်... အား... haterတွေ ကျေးဇူးပြုပြီး ရပ်ပေးကြနော်... နင်တို့ ဆက်ပြီး မုန်းနေရင် နျန်နျန် မပျော်တော့ဘဲ ဒီလောကထဲမှာ ဆက်မနေတော့ရင် ဘယ်လို လုပ်ကြမလဲ... စိုးရိမ်နေပြီ]

ယွီနျန်မှာ လူကိုယ်တိုင်က တိုင်းပြည်ထဲတွင် မရှိပါသော်လည်း ဆက်နွယ်နေသည့် အကြောင်းအရာ သုံးခုက တစ်ခုပြီးတစ်ခု ရေပန်းစားလာသည်။ #ယွီနျန်ကမှာစားရတဲ့အစားအသောက်တွေမတတ်နိုင်ဘူး#က ထပ်ပေါ်လာပြီး ရေပန်းစားလာပြန်သည်။ ထိုခေါင်းစဥ်အောက်တွင် လူများစွာက "မှာစားရတာ မတတ်နိုင်တဲ့ ကောင်လေး ဘာဖြစ်သွားတာလဲ... သူ့ကို အဖေခေါ်ဖို့ အချိန်ရှိသေးလား" ဟူသည့် မှတ်ချက်များ ချန်ထားခဲ့ကြသည်။ 

သို့သော်ငြား သိပ်မကြာမီ နောက်ထပ် ခေါင်းစဥ်တစ်ခုက လူအများ၏ စိတ်ဝင်စားမှုကို ရရှိသွားခဲ့သည်။ 

[#ရွှယ်ယုံယွီနျန်# လေဒီတို့... မှန်ဘီလူး ကောက်ကိုင်လိုက်ကြ... သတင်းတွေက ထုတ်လာတဲ့ ဓါတ်ပုံတွေထဲမှာ စျာပနအခမ်းအနားမှာ ယွီနျန်နောက်က ရပ်နေတဲ့သူ... နောက်ခံရဲ့ ညာဘက်မှာလေ... အဲ့ဒါ ဥက္ကဌရွှယ်ကြီး မဟုတ်ဘူးလား... ငါဘယ်လောက်ပဲ ကြည့်ကြည့် သူလို့ပဲ ထင်တယ်... နေစမ်းပါဦး... ဥက္ကဌရွှယ်က ယွီနျန့်အဖေရဲ့ စျာပနကို တက်ခဲ့တာလား... မဟုတ်ရင် တစ်ချိန်လုံး ယွီနျန့်ဘေးမှာ ရှိနေပေးခဲ့တာလား]

[#ရွှယ်ယုံယွီနျန်# ကြည့်ရတာ သတိထားမိတာ ငါတစ်ယောက်တည်း မဟုတ်ဘူးပဲ... နျန်နျန်နဲ့ ဥက္ကဌရွှယ်တို့က တကယ့်ဘဝမှာ သူငယ်ချင်းကောင်းတွေ မဟုတ်ဘူးလား... အခမ်းအနားမှာ နျန်နျန်ကို အဖော်လုပ်ပေးတာ ပုံမှန်ပါပဲ... ငါလည်း သိပ်နားမလည်ပေမယ့် ယွီနျန်ကို လုံးဝ အပုပ်ချနေတတ်တဲ့ ဥက္ကဌရွှယ်ကြီးက ဘယ်လိုများ ရုတ်တရက် ပြောင်းလဲသွားပါလိမ့်]

[#ရွှယ်ယုံယွီနျန်#အား... မျက်ရည်တွေပေါက်ကွဲထွက်နေပြီ... အရမ်း နှလုံးသားနွေးထွေးတာပဲ... နျန်နျန်ရဲ့ အခက်ခဲဆုံး အချိန်တွေမှာ ဥက္ကဌရွှယ်က သူ့ဘေးမှာ ရှိနေပေးခဲ့တယ်....QAQ ငါထပ်ပြီး အချစ်ကို ယုံကြည်သွားပြီ]

စျာပနအခမ်းအနားပြီး၍ ဟယ်ရှောင်း၏ ကိစ္စများကို သင့်တော်စွာ စီမံပြီးသွားသောအခါ ယွီနျန်က နိုဝင်ဘာအစောပိုင်းသို့ ရောက်လာပြီဖြစ်ကြောင်း ရုတ်တရက် အမှတ်ရသွားသည်။ နျင်းမြို့သို့ ပြန်လာသောအခါ သစ်ရွက်များစွာ ကျဆင်းနေသည်ကို တွေ့ခဲ့ရပြီး အသီး ကျိုးတို့ကျဲတဲနှင့် ပြောင်ရှင်းနေသော သစ်ကိုင်းများကိုသာ ချန်ထားခဲ့သည်။ ခေါင်းထက်မှ ကောင်းကင်ကြီးမှာလည်း သစ်ကိုင်းများကြောင့် အစိတ်အပိုင်းများ ကွဲပြားသွားပြီး အပိုင်းပိုင်းကွဲနေသော မှန်တစ်ချပ်လို ဖြစ်နေသည်။ တစ်ပတ်မျှ မိုးဖွဲဖွဲလေးများ အဆက်မပြတ် ရွာနေခဲ့သော်လည်း ယခုတွင် နေထွက်မည့်အရိပ်အယောင်လေးများလည်း ရှိနေသော်ငြား ကျဆင်းနေသော အပူချိန်ကို ထိန်းထားရန် နောက်ကျနေလေပြီ။ တစ်ရက်ပြီးတစ်ရက် ပိုပိုအေးလာခဲ့သည်။ 

ယွီနျန်က maskတပ်ထားရင်း ကော်ဖီဆိုင်လေးတစ်ခုသို့ ဝင်ကာ ကော်ဖီပူပူ ခုနစ်ခွက်မှာထားသည်။ ကောင်တာတွင် ရှိနေသူမှာ လျှာထိုးဦးထုပ်ဆောင်းထားသည့် မိန်းမငယ်လေး တစ်ယောက် ဖြစ်သည်။ သူမက ယွီနျန်ကို ပြန်အမ်းငွေ ပြန်ပေးလာရင်း တီးတိုးပြောလိုက်သည်။

 "ကျွန်မရဲ့ လုပ်ဖော်ကိုင်ဖက်တွေရော ဒီဆိုင်ရဲ့ စားသုံးသူတွေကပါ အားလုံး ရှင့်သီချင်းတွေကို အရမ်း အရမ်း သဘောကျကြတာလေ... သတင်းထဲမှာ ရှင် ခက်ခဲရတဲ့အချိန်တွေ ဖြတ်သန်းနေရတာလို့ တွေ့လိုက်တယ်.... ကျေးဇူးပြုပြီး ကိုယ့်ကိုယ်ကိုယ် ဂရုစိုက်ပြီးတော့ ဖြေသိမ့်လိုက်ပါ"

ပြောပြီးနောက် သူမက ပြန်အမ်းငွေထဲတွင် ချိုချဥ်နှစ်လုံး ထပ်ထည့်လိုက်ပြီး အကြွေစေ့များနှင့်အတူ ယွီနျန်ထံ အပြုံးတောက်တောက်လေးဖြင့် ကမ်းပေးလိုက်သည်။ 

ယွီနျန်က ပြန်အမ်းငွေနှင့် ချိုချဥ်ကို ယူကာ အားတက်သရော ပြန်ဖြေလိုက်သည်။ "ကျေးဇူးပါ"

ကော်ဖီပူပူများကို အသံသွင်း စတူဒီယိုသို့ ယူလာရင်းဖြင့် ယွီနျန်က ခွက်များကို ဝန်ထမ်းများထံ ကမ်းပေးလိုက်ပြီး ကျန်နှစ်ခွက်ကို မကြာသေးခင်ကမှ ရောက်ရှိလာသည့် မုန့်ယွမ်နှင့် ရှစ်ရော့ထံ ပေးလိုက်သည်။ 

မုန့်ယွမ်က ကော်ဖီခွက်ကို လှမ်းယူလိုက်သော်လည်း သောက်ချင်စိတ်မရှိပေ။ သူက ယွီနျန်အား စိတ်ပူပန်မှုဖြင့် ကြည့်လိုက်သည်။ 

"ရက်နည်းနည်းလောက်နဲ့ ဘာလို့ ဝိတ်တွေများကြီး ကျသွားရတာလဲ... နှစ်ရက်လောက်တောင် အနားမယူတော့ဘူးလား... မင်းဖုန်းခေါ်လာတော့ ငါအံ့သြသွားတာ"

ယွီနျန် စိတ်သောက ရောက်နေပြီး အလုပ်များနေမည်ကို သိနေသည့် မုန့်ယွမ်က အလုပ်နှင့် ပတ်သက်သော ကိစ္စများဖြင့် အနှောက်အယှက်မပေးခဲ့ပေ။ ယွီနျန်အား မနက်ပိုင်း နျင်းမြို့ကို ပြန်လာပြီးနောက် အလုပ်မစခင်အထိ အနားယူဦးမည်ဟု တွေးခဲ့သည်။ သို့သော်လည်း နေ့ခင်းပိုင်းမှာပင် အသံစသွင်းတော့မည်ဟု မထင်ထားခဲ့ပေ။ 

ယွီနျန် ခေါင်းငြိမ့်ပြလိုက်ပြီး ကော်ဖီခွက်ကို ကိုင်ထားရင်း အနွေးဓါတ်ရရန် ကြိုးပမ်းလိုက်သည်။

 "အိမ်မှာဆိုရင်တောင် အိပ်လို့ မပျော်ဘူး... ကျွန်တော် အလုပ်ကောင်းကောင်း လုပ်ရမယ်လို့ တွေးမိတယ်... အစ်ကိုမုန့်... ကျွန်တော် လုံ့လရှိလို့ ပျော်နေသင့်တယ်နော်"

“မင်း ဒီလိုမျိုး ဖြစ်နေတာကို တွေ့ရတာ မပျော်ဘူးကွ... မင်းကိုယ်မင်း မှန်ထဲကို ကြည့်မိသေးရဲ့လား... မေးတောင် ချွန်လို့နေပြီ" ယွီနျန်၏ ယိုင်နဲ့နဲ့ ပုံစံနှင့် ခပ်ယဲ့ယဲ့ အပြုံးကို တွေ့နေရသည့် မုန့်ယွမ်က သူ့အတွက် စိတ်မကောင်း မဖြစ်ဘဲ မနေနိုင်တော့ပေ။ သူ သက်ပြင်းချမိသွားသည်။ "မီဒီယာတွေ အများကြီးက မင်းကို အင်တာဗျူးချင်နေကြတာကို မင်းက အားလုံး ဖြုတ်ချလိုက်တာလေ... လျှောက်သွားမနေနဲ့ဦး... သတင်းထောက်တွေ မင်းကို တွေ့သွားရင် သေချာ ပေါက် စိတ်ရှုပ်စရာ ကောင်းသွားမှာ" 

ယွီနျန် နားလည်သည့်ဟန် ခေါင်းငြိမ့်ပြလိုက်သည်။

မုန့်ယွမ် ဆက်ပြောလိုက်သည်။ 

"ဒီအချိန်ကို အယ်လ်ဘမ်အပေါ်မှာပဲ စိတ်နှစ်ထားပြီး မင်းရဲ့ စိတ်ခံစားချက်တွေ သက်သာသွားအောင် လုပ်ကြတာပေါ့... နျင်းမြို့ရဲ့ အပူချိန်က သိသိသာသာ ကျလာနေတာ... ဒါကြောင့်မို့ နွေးနွေးထွေးထွေး ဝတ်ဖို့ သတိရ" 

သူက ဤအချိန်များတွင် အခြားသူ၏ နှစ်သိမ့်ပေးမှုမျ

ားက အကျိုးသက်ရောက်မှု အကန့်အသတ်သာ ရှိကြောင်း သိနေသည်။ သူက ယွီနျန်၏ ပုခုံးကို ပုတ်ကာ တိတ်ဆိတ်သွားခဲ့သည်။