အပိုင်း ၁၈၂ (End)

Chapter 182 [END]

ခင်ဗျားနဲ့ တွေ့ရတာ ကျွန်တော့်ဘဝရဲ့ အလှပဆုံးအရာပဲ ဖြစ်မယ်

ဖိုရမ်ပိုစ့်၏ ခေါင်းစဥ်မှာ "ငါတို့လွဲသွားခဲ့တဲ့ ချိုမြိန်မှုတွေကို ရေတွက်ကြမယ်"ဟူ၏။

[ဥက္ကဌရွှယ်နဲ့ ယွီနျန်တို့ လူသိရှင်ကြားချပြလိုက်ပြီ... စီနီယာအဆင့် နျန်ကော်လေးနဲ့ အသစ်ဝင်လာတဲ့ ယုံယွီဖန်တစ်ယောက်အနေနဲ့ မှန်ဘီလူးနဲ့ မိုက်ခရိုစကုပ်တွေ သယ်ပြီး အချိုတွေ လိုက်ရှာခဲ့ပါတယ်... သတိပြုရန်: အချိုဓါတ်မြင့်မားစွာ ပါဝင်သည်...

'သဘာဝရဲ့သံစဥ်' ဒုတိယseason ရိုက်ကူးခဲ့တုန်းက ယွီနျန်က ရှားမင်ရှီကို ကလပ်မှာ သီချင်းဆိုကြဖို့ ဖိတ်ခေါ်ခဲ့ပြီးတော့ ကလပ်ပိုင်ရှင်က အခန်းတစ်ခုလုံးရဲ့ ကျသင့်ငွေကို လျှော့ပေးခဲ့တယ်... စုံစမ်းမှုတွေအရ ကလပ်က ဥက္ကဌရွှယ်ရဲ ပိုင်ဆိုင်မှုအောက်မှ ရှိနေတာပါတဲ့... ကဲ...မချိုဘူးလား...

ရှင်းယောင်အင်တာတိန်းမန့်ရဲ့ အတွင်းလူတစ်ယောက်က သတင်းပေးချက်အရ ယွီနျန် ကုမ္ပဏီထဲ ဝင်လာပြီးတဲ့နောက် ဥက္ကဌရွှယ် ရှင်းယောင်ကို လာလည်တဲ့အကြိမ်ရေလည်း မိုးလောက်ထိ မြင့်လာတယ်တဲ့...

ယွီနျန်ရဲ့ လူသစ်ကာလအတွင်း တိုက်ရိုက်ထုတ်လွှင့်မှုလုပ်တဲ့အကြိမ်တိုင်း 'နျန်နျန်ယုံယွီ'ဆိုတဲ့ IDက သူ့ကို စုစုပေါင်း ယွမ်ကိုးသောင်းကိုးထောင် ကျသင့်တဲ့ စိန်တုံးပေါင်း 999ခု လက်ဆောင်ပေးတယ်... ဒါက ဖြစ်နိုင်တာ နှင်းဆီပေါင်း 999ခုနဲ့ မညီမျှဘူးလား... ကျိုးကြောင်းသင့်တဲ့ ကောက်ချက်ချမှုအရ ဒါတွေက ဥက္ကဌရွှယ်ဆီက ဖြစ်နိုင်တယ်တဲ့... livestreamတစ်ခုအတွင်းမှာဆို ယွီနျန်က သူ့နာမည်ကို ခေါ်ခဲ့ပြီးတော့ ကိုယ့်ကိုယ်ကိုယ် ဂရုစိုက်ဖို့တောင် ပြောခဲ့သေးတယ်နော်...

ရှုရွှမ်းရဲ့ ကိစ္စမှာတုန်းက ဆေးကုသမှုမှတ်တမ်းအစစ်တွေကို တင်ပေးခဲ့တဲ့ ဒုတိယမျိုးဆက်သူဌေးသားက ခုနကပဲ ဝေ့ပေါ်မှာ ပိုစ့်တင်ခဲ့တယ်... သူ့ကို လာနှုတ်ဆက်ပြီးတော့ ဆေးမှတ်တမ်းတွေ တင်ခိုင်းတာ ဥက္ကဌရွှယ်ပဲတဲ့...

ဥက္ကဌရွှယ် ဝေ့ပေါ်မှာ ပထမဆုံးအကြိမ် giveawayပိုစ့်ပြန်တင်တုန်းကလည်း ယွီနျန် 'သဘာဝရဲ့ သံစဥ်'မှာ ပထမဆုရတဲ့အချိန်ပဲနော်... 

ယွီနျန်ရဲ့ ကြော်ငြာမှာ သုံးတဲ့ အကန့်အသတ်ထုတ် မြေခွေးမြီးအစစ်ကိုလည်း ဥက္ကဌရွှယ် ဝယ်သွားတာပဲ... ယွီနျန် ဝတ်ခဲ့တဲ့ တောတွင်းစတိုင်အဝတ်အစားတွေကို ဥက္ကဌရွှယ်ကပဲ ဝယ်ထုတ်သွားတာ... ဖြစ်နိုင်တာက စုံတွဲပစ္စည်းတွေဆို ငါပဲပိုင်ရမယ်ဆိုတာများလား... စုံတွဲနာရီတွေကလည်း တိုက်ဆိုင်တာမဟုတ်ပါ... အဲ့ဒါတွေက အချစ်နဲ့ စုံတွဲဆိုတာကို ကိုယ်စားပြုတဲ့ နာရီတွေပါနော်...

ဥက္ကဌရွှယ်က အပူလှိုင်းတွေဖန်တီးဖို့ trending topic ဒုတိယနေရာကို တစ်ခါ ဝယ်ခဲ့ဖူးတယ်တဲ့... အခုပြန်ကြည့်ရင် ဒီလိုရဲတင်းတဲ့ လှုပ်ရှားမှုတွေက ယွီနျန်ကို ရည်ရွယ်တာ ဖြစ်နိုင်တယ်... 

ဧပြီလ 20ရက်နေ့က ရသစုံရှိုးတစ်ခုမှာ လူတစ်ယောက်ကို သဘောကျရတာက ဘယ်လိုခံစားချက်မျိုးလဲလို့ မေးတော့ ယွီနျန်က "အိမ်ပြန်ရတဲ့အခါ မခွဲချင်တဲ့ ခံစားချက်ပါ"လို့ ဖြေခဲ့တယ်... ချိုမြနေတာပဲ...

ယွီနျန်ရဲ့ အယ်လ်ဘမ်တွေ ကောင်းကောင်း ရောင်းထွက်သွားတော့ လျှို့ဝှက်ဆန်းကြယ်တဲ့ အမည်မသိလူတစ်ယောက်က အလွန်အမင်းချဲ့ကားတဲ့ supportမျိုး လုပ်ပေးခဲ့တယ်... အယ်လ်ဘမ်ကာဗာကို လေယာဥ်ပေါ်မှာ ဆွဲခဲ့တာ ဥက္ကဌရွှယ် လုပ်ခိုင်းတာပါတဲ့... မီးရှုးမီးပန်းတွေပါတဲ့ LED supportကလည်း ဥက္ကဌရွှယ် လုပ်ပေးတာပဲ... "မပျော်မရွှင်မဖြစ်ပါနဲ့... ယွီနျန်"လို့ LEDနံရံမှာ ရေးပေးတာလည်း ဥက္ကဌရွှယ် လုပ်တာပဲ...(မှတ်ချက်: အဲ့ဒီအဆောက်အအုံတွေက ဥက္ကဌရွှယ် ပိုင်တာတွေပဲ)

ဥက္ကဌရွှယ်က ယွီနျန်ရဲ့ အာလူးဟင်းကို အာလူးတွေလှီးတာ မလှဘူးလို့ ဝေဖန်လိုက်တယ်... ကြည့်ရတာ ယွီနျန်ကြွားထားတဲ့ အာလူးချောင်းဟင်းက ဥက္ကဌရွှယ် လုပ်ထားတာ ဖြစ်နေတဲ့ပုံပဲ...

ကျင်းမြို့ငလျင်မှာ ယွီနျန် ပိတ်မိနေတုန်းက ဥက္ကဌရွှယ်က အခင်းနေရာကို ချက်ချင်းပြေးသွားခဲ့တာတဲ့...

ထန်းရှောင်ခယ် တစ်ခါက ယွီနျန်ကို 'သီချင်းဆိုပါရစေ' ဒိုင်လူကြီး နေရာကနေ ထုတ်ဖို့ လာဘ်ထိုးခဲ့ဖူးတယ်တဲ့... ပေါက်ကြားလာတဲ့ အတွင်းသတင်းတွေအရ ဥက္ကဌရွှယ်က ရင်းနှီးမြှုပ်နှံငွေကို နှစ်ဆတိုး ထည့်ပြီးတော့ ထန်းရှောင်ခယ်ကို ထုတ်ခိုင်းလိုက်တယ်ဆိုပဲ... နောက်ပိုင်း ထန်းရှောင်ခယ် ယွီနျန်ကို ကားနဲ့တိုက်ဖို့လုပ်တော့ စောင့်ကြည့်ကင်မရာတွေထဲမှာ ပြထားတာက ဥက္ကဌရွှယ်က ယွီနျန်ကို ကယ်တင်ဖို့အတွက် သူ့ကိုယ်သူ ကြားဝင်ခံဖို့ လုပ်ခဲ့တာတဲ့....

ရွှေထင်းရှူး ဆုပေးပွဲမှာ ကျေးဇူးတင်စကားပြောတော့ ယွီနျန်က လက်စွပ်ကို နမ်းပြပြီး သူ့အချစ်ကို စကားချိုချိုလေးတွေနဲ့ ဝန်ခံခဲ့သေးတယ်လေ... ဥက္ကဌရွှယ် ကြားဖို့ပေါ့... သူတို့ ဝေ့ပေါ်မှာ ဝန်ခံတော့ ချစ်စကား ချိုချိုလေးတွေ အချင်းချင်း ကြားနိုင်အောင် ပြောခဲ့ကြသေးတယ်"]]]

[စံပြုလောက်စရာပိုစ့်ပဲလေ... ဒီနှစ်ယောက်က ချိုမြလွန်းနေလို့ ငါမေ့လဲကျတော့မယ်... အား... အားလုံး အချိုတွေချည်းပဲ... ပြီးတော့ နျန်နျန်က သူသဘောကျရတဲ့သူက သကြားခဲလေးတွေလိုပဲလို့ မပြောခဲ့ဘူးလား... သကြားခဲလေးတွေ စားတယ်... သကြားခဲလေးတွေ... အပြင်ဘက်မှာ အေးစက်ပြီး အတွင်းမှာ ချိုမြနေတာလေ]

[ဒါလုံးဝ မနာလိုဖြစ်ချင်စရာပဲမလား... ငါရှောက်သီးပင်အောက်မှာ အထိုင်ချနေပါပြီ... တစ်ယောက်ထဲ သွေးကျိန်လွှာ ရေးလိုက်မယ်... ချက်ချင်းလက်ထပ်လိုက်ကြ... ချိုမြနေတာ အရမ်းနော်... ငါ ထန်းရှောင်ခယ် နျန်နျန်ကို ကားနဲ့တိုက်ဖို့လုပ်တဲ့ စောင့်ကြည့်မှတ်တမ်းကို ထပ်ကြည့်လိုက်တယ်... ဥက္ကဌရွှယ်က နျန်နျန့်ကို ကာကွယ်ပေးဖို့ အတွက် သူ့ဘဝကို ရင်းလိုက်ဖို့ တစ်စက္ကန့်လေးတောင် တုံ့ဆိုင်းမနေဘူးနော်... ငါအစက နျန်နျန် တစ်ယောက်ယောက်နဲ့ တွဲနေပြီကြားတော့ ဖန်အဖြစ်ကနေ ထွက်ပြီး ဂီတပရိတ်သတ်စစ်စစ် တစ်ယောက်လုပ်ဖို့ တွေးနေခဲ့တာ... ဒီဟာကို မြင်ပြီးသွားရင် ဘယ်သူက တောင့်ခံနိုင်မှာလဲလို့...QAQ]

[ငါ့အာရုံစိုက်တာဒါပဲ... ရွှယ်ယုံက မိသားစုစီးပွားရေးလုပ်ငန်းကြီးကို ထိန်းချူပ်နေတဲ့အချိန်မှာ ယွီနျန်ကတော့ သင်္ဘောဘုရင်ကြီး ဟယ်ရှောင်းနဲ့ ချင်းရှန်းယွီမိသားစုရဲ့ ပိုင်ဆိုင်မှုတွေ အမွေရထားတယ်... သူတို့နှစ်ယောက် အတူတွဲသွားကြတဲ့အခါ သူတို့နှစ်ဦးပေါင်းရဲ့ စီးပွားရေးအင်အားကတော့... ထိတ်လန့်ဖွယ်ရာပဲ]

[ငါတို့ရဲ့ ဥက္ကဌရွှယ်ကြီးက ဘလက်ဖန်တွေကို အောင်အောင်မြင်မြင် ထိုးဖောက်နိုင်ခဲ့ရုံတင်မကဘူး သူတို့ရဲ့ ခေါင်းဆောင်ကြီးပါ ဖြစ်နေသေးတယ်... အခု သူတို့ရဲ့ ဖြစ်တည်မှုအစစ်အမှန်ကို ဖော်ထုတ်ခံလိုက်ရပြီဆိုတော့ ဘလက်ဖန်တွေ နေရာမှာတင် ပေါက်ကွဲနေကြလောက်တယ်... ဟားဟား... ဥက္ကဌရွှယ်က သူမတူတဲ့ နည်းလမ်းရှိနေတာပဲ... အများကြီး ပေးပြီးတော့ သာမန်လူတွေ စဥ်းစားရဲတာထက် ပိုပြီးတော့ ကိစ္စတွေကို ရဲရဲရင့်ရင့် လုပ်ဆောင်သွားတယ်]

မုန့်ယွမ်က ကွန်မန့်များကို နောက်တစ်ခေါက် ပြန်ဖတ်လိုက်ပြီးနောက် သက်ပြင်းချလိုက်သည်။

 "ဒီပိုစ့်ကို ဖတ်ပြီးသွားတော့ ငါမသိသေးတဲ့အရာတွေ ရှိသေးပါလားဆိုပြီး နားလည်သွားတယ်" 

သူက မောက်စ့်ကို ပြန်နှိပ်လိုက်သည်။ 

"ဒီမှာလည်း ရှိသေးတယ်... အချို့ဖန်တွေက မျက်စိလျှင်ကြတော့... ပွဲတစ်ခုမှာ မင်းဝတ်ထားတဲ့ လက်ကြယ်သီးတစ်စုံက ဥက္ကရွှယ် တက်ရောက်ခဲ့တဲ့ လေလံပွဲတစ်ခုမှာ ယွမ်နှစ်သန်းနဲ့ လေလံအောင်ခဲ့တာတဲ့လေ" သူ ယွီနျန်ကို လှည့်ကြည့်လိုက်သည်။ 

"ဥက္ကဌရွှယ် မင်းကို ဒီလက်ကြယ်သီးတွေ ပေးခဲ့တာ ဟုတ်လား မဟုတ်လား ဖြေ" 

ယွီနျန် ထိုစကားကို ကြားသောအခါ မနေနိုင်တော့ဘဲ ရယ်မောလိုက်သည်။

 "ဟုတ်ပါတယ်... ဒါပေမယ့် ရွှယ်ယုံ ကျွန်တော့်ကို ပေးတော့ လက်ကြယ်သီးတွေက ယွမ်နှစ်ရာပဲ ကျတာလို့ ပြောခဲ့တာ"

မုန့်ယွမ် အံ့အားတသင့် ပြောလိုက်သည်။ 

"ဒါက လူချမ်းသာတွေရဲ့ ကစားနည်းတွေလား"

ယွီနျန်က အပြုံးလေးတစ်ခုဖြင့် ထပ်ပြောလိုက်သည်။ "ရွှယ်ယုံမသိပေမယ့် ကျွန်တော်လည်း အဲ့ဒီလေလံပွဲကို တက်ခဲ့တာလေ"

"ဟုတ်ပါပြီ"

 မုန့်ယွမ်က မျက်နှာသေလုပ်ကာ ဆိုလိုက်သည်။ 

"ဒီလိုပျော်စရာမျိုးက မင်းတို့လို လူချမ်းသာတွေပဲ ရှိကြတာပါ"

တစ်နာရီအကြာ ဝေ့ပေါ်က ပုံမှန်အခြေအနေသို့ ပြန်ရောက်လာခဲ့သည်။ သိပ်မကြာခင် #ဝေ့ပေါ်ဆာဗာကျသွား#နှင့် #ရွှယ်ယုံကအင်အားအများကြီးစိုက်ထုတ်ထားတာ# ဟူသည့် ခေါင်းစဥ်နှစ်ခုလုံး ရေပန်းစားလာသည်။ ဖန်များ၊ စပ်စုတတ်သူများနှင့် ဖြတ်သွားဖြတ်လာများက ရှေ့မျက်နှာစာတွင် စုဝေးလာကြပြီး ခံစားချက်မျိုးစုံ ဖော်ပြလာကြသည်။ ထို့နောက် သူတို့၏ စိတ်အာရုံများကို #ရွှယ်ယုံကအင်အားအများကြီးစိုက်ထုတ်ထားတာ# ပေါ်တွင် ပုံအပ်လိုက်ကြပြီး ပိုစ့်များစွာ ထွက်ပေါ်လာလေတော့သည်။ 

[ဟားဟားဟား... ဥက္ကဌရွှယ်ရဲ့ ဒီလိုဘက်ခြမ်းကို မထင်ထားဘူး...

[ချစ်သူကောင်လေးက လေးလေးနက်နက် အပုပ်ချနေရင်းနဲ့ မတော်တဆ antifanခေါင်းဆောင် ဖြစ်လာတယ်... ယွီနျန်ကို ဝေဖန်ဖို့အတွက် ဥက္ကဌရွှယ်ရဲ့ ဝေ့ပေါ်အောက်မှာ နေ့တိုင်း လာစောင့်နေတတ်ကြတဲ့ မလိုမုန်းထားသူတွေက အခုတော့ လူမှားပြီး ယုံမိသွားပြီလို့ ပြောနေကြပြီ... ကြမ်းပေါ် လှိမ့်ပြီး ရီနေရတာပဲဟေ့]

[အခြားရှုထောင့်ကနေကြည့်ရင် ယွီနျန်ကပဲ ဥက္ကဌရွှယ်ရဲ့ မိုင်သုံးထောင်လောက်ထိ နှင်းတွေဖုံးနေတဲ့ ဝေ့ပေါ်မှာ တစ်ခုတည်းသော အရောင်အဆင်းလေးပဲ... ချိုမြနေပြန်ပြီ... ဒါရွက်လွှင့်နေတဲ့ ဒီCPလေးက ဘာလို့ ဒီလောက်ထိ ချိုမြိန်နေရတာလဲ]

[ဒီနှစ်ယောက် လူသိရှင်ကြားဝန်ခံပြီးကတည်းက ငါတွေ့သမျှ အရာရာတိုင်း သကြားအုပ်ထားသလိုပဲ... 'လူပျိုလှည့်တေး'ကို နောက်တစ်ခေါက် ထပ်နားထောင်မယ်... ငါ သကြားတွေကို စိတ်လိုလက်ရ ထပ်ထည့်ပေးနေပါပြီ]

ထိုကိစ္စက မတ်လအဆုံးထိ ရက်ပေါင်းများစွာတိုင် အွန်လိုင်း ဆွေးနွေးမှုများ၌ လွှမ်းမိုးထားခဲ့သည်။ ခြံဝင်းထဲတွင် သစ်တော်သီးပန်းပွင့်များ ပွင့်လန်းလာပြီး ကြွေကျလာချိန် ထိုပြင်းပြသော ဆန္ဒများကို ဘေးပို့ထားလိုက်ကြသည်။ 

ရွှယ်ယုံ ရောက်လာသောအခါ ယွီနျန်က အဝတ်များ စီစဥ်နေဆဲသာ ဖြစ်သည်။ ရာသီဥတုက ပူနွေးလာသဖြင့် စီနျင်းအိမ်တော်တွင် သိမ်းဆည်းထားသော အဝတ်ပါးများကို Star River Bayအိမ်ရှိရာသို့ ယူလာရန် စီစဥ်ထားသည်။ 

“နွေဦးရောက်တော့မှာနော်... အရင်တုန်းက သုံးတဲ့ မင်သွေးတုံးက လေးလွန်းလို့ ဒီလုံဝေလေ့ မင်သွေးကျောက်တုံးနဲ့ ပြောင်းဖို့ စီစဥ်ထားတယ်"

 ယွီနျန်က ဝါးတိမ်ပုံစံ ထွင်းထားသည် အနက်ရောင်မင်သွေးကျောက်တုံးကို သစ်သားသေတ္တာလေးထဲတွင် မင်တုံးများနှင့်အတူ ရောထည့်လိုက်သည်။ သူက လုပ်ရင်းကိုင်ရင်းဖြင့် ရွှယ်ယုံနှင့် စကားပြောနေခဲ့သည်။ "ဘိုးဘိုးက ဒီမင်သွေးကျောက်တုံးကို တကယ်သဘောကျတာ... ကြမ်းတမ်းတဲ့ စုတ်ချက်တွေ မချန်ထားခဲ့သလို မင်တွေလည်း မစွန်းစေဘူးတဲ့... ပြောကာမှ ပြတိုက်ကိစ္စနဲ့ အလုပ်ရှုပ်နေတော့ လက်ရေးလှ ကောင်းကောင်း မကျင့်ရတာကြာပြီ... ခင်ဗျား ကျွန်တော့်ကို ကြီးကြပ်ပေးရမယ်"

ရွှယ်ယုံက မင်သွေးကျောက်တုံးပါသည့် သေတ္တာကို ယူကာ ပြန်ဖြေလိုက်သည်။ 

"ရတာပေါ့"

“ကျွန်တော့်အစ်မက အယ်လ်ဘမ်အသစ် ထုတ်တော့မယ်... သူက ကျွန်တော့်ကို အယ်လ်ဘမ် ထုတ်မဲ့ ပွဲအခမ်းအနားကို တက်စေချင်တယ်တဲ့... ဟိုနှစ်ရက်က ခင်ဗျား ဝယ်ပေးထားတဲ့ ဝတ်စုံ ဝတ်ဖို့ စီစဥ်ထားတယ်... နက်ခ်တိုင်ညှပ်အသစ်နဲ့ လက်ကြယ်သီးရောလေ...”

အရာအားလုံး ထုပ်ပိုးပြီးသွားသောအခါ ယွီနျန်က စီနျင်းအိမ်တော်တံခါးဝကို သော့ခတ်လိုက်ပြီး ရွှယ်ယုံနှင့်အတူ ကားထဲသို့ ဝင်လိုက်သည်။ ကားဘီးများ စလှိမ့်လာသောအခါ လမ်း၏ ဘေးနှစ်ဖက်၌ အရိပ်ကျပင်များ၏ စိမ်းစိုနေသော အကိုင်းအခက်များကို ဖြတ်ကျော်သွားခဲ့ပြီး လမ်းချိုးလေးအချို့ကို ချိူးကာ ချင်းရှန်းပြတိုက်၏ ဆောက်လုပ်ရေးလုပ်ငန်းခွင်သို့ ရောက်ရှိလာခဲ့ကြသည်။ ဘေးတွင် 'နှစ်တစ်ထောင်က ပြန်မလာတော့ဘူး... ချင်းရှန်းပဲ ကျန်ရစ်နေမယ်'ဟု ရေးထွင်းထားသည့် ကျောက်တုံး တစ်ခု ရှိနေသည်။

ကားက ရှေ့ဆက်သွားနေပြီး နေရောင်နှင့် သစ်ပင်ရိပ်လေးများ ရောယှက်နေသည့် မရေမတွက်နိုင်သော နေပြောက်ကွက်လေးများကို တွေ့မြင်နေရသည်။ ယွီနျန်က ရွှယ်ယုံ၏ လက်ကို ကိုင်လိုက်ပြီး တစ်ဖက်လူ လှည့်ကြည့်လာသည်ကိုမြင်သောအခါ အပြုံးလေးတစ်ခုဖြင့် "ရွှယ်ယုံ"ဟု ခေါ်လိုက်သည်။ 

"ဟင်"

“ခင်ဗျားနဲ့ တွေ့ရတာ ကျွန်တော့်ဘဝရဲ့ အလှပဆုံးအရာပဲ ဖြစ်မယ်”

ရွှယ်ယုံ၏ နားရွက်များထက် ခပ်ရဲရဲ ဖြစ်သွားပြီး ကြယ်ပွင့်လေးများလို တလက်လက်ဖြာနေသည့် ယွီနျန်၏ မျက်လုံးများထံ ကြည့်လိုက်မိသည်။ သူ အားတက်သရော ပြန်ဖြေလိုက်သည်။ 

"ကိုယ်လည်းအတူတူပဲ" 

——————ပြီးပါပြီ——————

Extra 3 ပိုင်းစာကျန်ပါမယ်ရှင် 😘