MM Story Teller

အပိုင်း၂၈၇

Viewers 67k

🍵Chapter 287

ကျောင်းသားများက ယဥ်ကျေးမှူဌာန၏ ဒါရိုက်တာကိုယ်တိုင် ရောက်လာပြီး လမ်းညွှန်ပြသမည့်အကြောင်း သိလိုက်ရသောအခါ အလွန်အမင်း စိတ်လှုပ်ရှားလာကြလေသည်။

သူတို့အားလုံးက မနက်ဖြန်တွင် ယဥ်ကျေးမှုဌာန၏ ဒါရိုက်တာကို ပြသရမည် ဖြစ်သည့်အတွက် နောက်ဆုံး အစမ်းလေ့ကျင့်မှုပြီးနောက် ပြန်အနားယူခဲ့ကြပြီး မနက်ဖြန်အတွက် ပြင်ဆင်ကြသည်။

နောက်တစ်နေ့တွင်...

ဖျော်ဖြေမှုတွင် ပါဝင်ကြမည့် ကျောင်းသားများက အတန်းများ ပြီးနောက် အစမ်းလေ့ကျင့်ရန် ရောက်လာခဲ့ကြသည်။ အစမ်းလေ့ကျင့်ခန်းထဲတွင် လူအပိုတစ်ယောက် ရှိနေနှင့်လေပြီ။ ထိုအချိန်တွင် ချန်ချိုက်ရှင်းက သူမ၏ လက်ကို ဆွဲယမ်းကာ ကလေးတစ်ယောက်သဖွယ် ပြုမူနေခဲ့သည်။

"ဒေါ်လေး... နောက်ကျရင် သမီးကို လမ်းညွှန်ပေးရမယ်နော်... သမီး ကောင်းကောင်း မလုပ်နိုင်ရင် သေသေချာချာ ထောက်ပြပေးရမယ်"

ဒါရိုက်တာချန်က သူမ၏ ခေါင်းလေးကို ဖွကာ ချစ်ခင်တွယ်တာစွာဖြင့် ပြောလိုက်သည်။

"ဒေါ်လေး သမီးကို မျက်လုံးသေချာဖွင့်ပြီး ကြည့်ပေးမယ်... ဟုတ်ပြီလား"

ချန်ချိုက်ရှင်းက တောက်ပစွာ ပြုံးရယ်လာခဲ့သည်။ "ဒါဆိုရင်တော့ သမီး စိတ်ချသွားပြီ"

အခြားသူများ ဝင်လာသောအခါ ချန်ချိုက်ရှင်းကို မနာလိုမှုများဖြင့် ကြည့်လိုက်ကြသည်။

ချန်ချိုက်ချင်းက ဒေါင်းမတစ်ကောင်ကဲ့သို့ ရင်ကော့ကာဖြင့် လူတိုင်းကို မိတ်ဆက်ပေးလိုက်သည်။

"ဒါငါ့အဒေါ်လေ... ယဥ်ကျေးမှုအဖွဲ့ရဲ့ ဒါရိုက်တာပေါ့... ဒေါ်လေး... ဒါက သမီးရဲ့ အတန်းဖော်တွေလေ"

ဒါရိုက်တာချန်က လူတိုင်းကို ခင်မင်ရင်းနှီးပြီး အနည်းငယ် လေးနက်သော အမူအယာဖြင့် နှုတ်ဆက်လိုက်ရာ လူတိုင်း အပျော်လွန်သွားကြသည်။

ထုံရွှယ်လူက ထိုဒါရိုက်တာချန်ကို မသိပေ။ ထိုဒါရိုက်တာချန်က သူမထွက်သွားပြီးမှ ယဥ်ကျေးမှုဌာနကို ပြောင်းလာခြင်းဖြစ်သည်။ သူမက အနောက်မြောက်ပိုင်းစစ်တပ်မှ ပြောင်းရွှေ့လာခဲ့သည်ဟုလည်း ကြားထားသည်။

ဒါရိုက်တာချန်က လူအုပ်ကို ဝေ့ဝဲကြည့်လိုက်ပြီး ရုတ်တရက် ပြောလာသည်။

"အတန်းဖော်တို့ ကောင်းကောင်း ဖျော်ဖြေရမယ်နော်... ဒီတစ်ခါက မင်းတို့ကို လာပြီး ကြပ်မတ်ပေးတာအပြင် မင်းတို့ထဲကနေ ရုပ်ရှင်ရိုက်ကူးဖို့ သင့်တော်တဲ့လူအချို့ကို ရွေးချယ်သွားမှာပါ"

ထိုစကားကို ကြားသောအခါ လူတိုင်း ကြက်သေသေသွားကြပြီး ချန်ချိုက်ရှင်းသည်ပင် ကြောင်အသွားရသည်။

"ဒေါ်လေး.... ဒါက ဘယ်လိုမျိုးလဲ... ဘာလို့ သမီးကို ကြိုမပြောရတာလဲ"

ဒါရိုက်တာချန် ပြောလိုက်သည်။ သမီးရဲ့ဦးလေးက ခေတ်သစ်ရဲ့ ကောလိပ်ကျောင်းသားတွေအကြောင်း ရုပ်ရှင်ရိုက်ကူးတော့မှာလေ... အဓိကက ကောလိပ်ဝင်ခွင့် စာမေးပွဲတွေ ပြန်ကျင်းပပြီးတဲ့နောက် ကျောင်းသားတွေရဲ့ ပုံစံအသစ်တွေအကြောင်းပေါ့... ဒါပေမယ့် သင့်တော်တဲ့သူကို ရှာမတွေ့သေးဘူး... ဒီနေ့ မင်းတို့ကို လာကြီးကြပ်ပေးရမယ်ဆိုတာ သိတော့ ဒေါ်လေးကို သူ့အစား သင့်တော်တဲ့သူတွေ ရှာပေးပါလို့ ပြောလိုက်တာ... ဒါပြီးရင် သူ့ရုပ်ရှင်ထဲ ထည့်သုံးပေးမှာပေါ့"

လူတိုင်းက အုတ်အုတ်သဲသဲ ဖြစ်သွားကြသည်။

"ဘုရားရေ... ငါတို့ ရုပ်ရှင် ရိုက်ရမယ်ဆို အရွေးခံရရင် နာမည်ကြီး သရုပ်ဆောင် ဖြစ်လာနိုင်တာပေါ့"

"ဒါဆို အရွေးခံရမှ ဖြစ်မယ်... ဒါရိုက်တာချန် ရွေးချင်တာ ဘယ်လို ဇာတ်ကောင်မျိုးလဲ မသိဘူးနော်"

ချန်ချိုက်ရှင်း၏ ပါးပြင်ထက် စိတ်လှုပ်ရှားမှုများကြောင့် သွေးရောင်လွှမ်းလာသည်။

"ဒေါ်လေး... ဦးလေး ရွေးမယ့်ဇာတ်ကောင်က ဘယ်လိုမျိုးလဲဟင်"

ဒါရိုက်တာချန် ပြောလိုက်သည်။ "ဇာတ်ကောင်တွေ အများကြီးပဲ... မင်းတို့သာ ကောင်းကောင်းသာ ဖျော်ဖြေနိုင်ခဲ့ရင် အမျိုးသား ဇာတ်လိုက်နဲ့ အမျိုးသမီး ဇာတ်လိုက်နေရာတွေပါ အရွေးခံရနိုင်တယ်"

လူတိုင်းက ထိုအကြောင်းကို ကြားလိုက်ကြသောအခါ ထပ်ပြီး စိတ်တက်ကြွသွားကြပြန်သည်။

လူတိုင်းက ပရော်ဖက်ရှင်နယ် သရုပ်ဆောင်များ မဟုတ်ကြသော်လည်း ရုပ်ရှင်နယ်ပယ်သို့ ဝင်ရောက်ရန် အရွေးခံရမည်ဆိုပါက အောင်မြင်မည့်လမ်းကြောင်းပေါ် ရောက်နေပြီဟု အဓိပ္ပါယ် ရပေသည်။

ထုံရွှယ်လူမှ လွဲ၍ လူတိုင်း စိတ်လှုပ်ရှားနေကြသည်။

ထုံရွှယ်လူက နာမည်ကျော် တစ်ယောက် ဖြစ်ရမည်ကို စိတ်မဝင်စားပေ။ သူမ၏ ရည်မှန်းချက်က အလွန် ရှင်းလင်းသည်။

သူမက အတန်းများကျော်တက်ကာ ဘွဲ့စောစောယူပြီးနောက် ပြုပြင်ပြောင်းလဲရေးဟူသည့် လှိုင်းလုံးကြီးကို မှီကာ စီးပွားရေးတစ်ခု တည်ထောင်၍ ငွေအမြောက်အများရှာပြီး သူဌေးမကြီး တစ်ယောက်ဖြစ်လာရန်ပင်။

ထုံရွှယ်လူ တည်ငြိမ်နေသည်ကို ကြည့်ကာ ဒါရိုက်တာချင်မှာ မထိန်းထားနိုင်တော့ဘဲ သူမကို ခဏခဏ ထပ်ကြည့်မိသွားသည်။

ချန်ချိုက်ရှင်းက သူမအဒေါ်၏ အကြည့်များ ထုံရွှယ်လူအပေါ်တွင် ကျရောက်နေသည်ကို ကြည့်နေရင်း မျက်ခုံးကျုံ့လိုက်သည်။ သူမက ခြေတစ်လှမ်း တိုးကာ သူမအဒေါ်၏ အကြည့်များကို ပိတ်ဆို့လိုက်ပြီးနောက် ပြောလိုက်သည်။

"ဒေါ်လေး... ကျွန်မတို့ အခု စလို့ရပြီလား"

ဒါရိုက်တာချန် အကြည့်ပြန်ရုပ်လိုက်သည်။

"စကြတာပေါ့"

ချန်ချိုက်ရှင်းက ချက်ချင်းဆိုသလို လူတိုင်းကို စင်ပေါ်သို့ ဦးဆောင်ခေါ်လာကာ အခြားသော ကိစ္စရပ်များ စီစဥ်ပြီးနောက် စတင်ကြောင်း ကြေညာလိုက်သည်။

ထုံရွှယ်လူ၏ အာရုံများက ချန်ချိုက်ရှင်းအပေါ်တွင် မဟုတ်ဘဲ ကောင်းမင်အပေါ် ကျရောက်နေသည်။

ကောင်းမင်၏ စိတ်ပိုင်းဆိုင်ရာ အခြေအနေမှာ ယနေ့တွင် အတော်လေး ထူးဆန်းနေကြောင်း တွေ့လိုက်ရပြီး သူမက အလွန် စိတ်လှုပ်ရှားနေပုံပေါ်သည်။

သူမက နှလုံးသားထဲတွင် တိတ်တဆိတ် အဆက်မပြတ် နိုးနိုးကြားကြား ရှိနေပြီး နောက်ပိုင်းတွင် အကာအကွယ် ယူထားရမည်ဟု သူမကိုယ်သူမ ပြောနေမိသည်။

ထုံရွှယ်လူက စာအုပ်ထဲကို မကူးပြောင်းစဥ်က အော်စကာ ဘုရင်မအဖြစ် လူသိများပေသည်။ သူမသာ ဆန္ဒရှိနေသရွေ့ သူမ၏ လုပ်ဆောင်မှုများက အလွန် ပရော်ဖက်ရှင်နယ် ကျခြင်းမျိုး မရှိသည့်တိုင် လက်ရှိတွင် လေ့ကျင့်ထားခြင်း မရှိသည့် အတန်းသားများထက် ပို၍ ပရော်ဖက်ရှင်နယ် ကျပေသည်။

သူမတွင် ပြောစကားများစွာ မရသည့်တိုင် သူမ၏ အသံအနေအထား၊ မျက်နှာအမူအယာများမှာ ချောမွေ့နေပြီး ချက်ချင်းဆိုသလို ဒါရိုက်တာချန်၏ အာရုံကို ဆွဲဆောင်နိုင်သွားသည်။

ပို၍ အရေးကြီးသော အချက်မှာ သူမက အလွန် လှပနေပြီး မီးခိုးရောင် အဝတ်အစားများ ဝတ်ကာ အဘွားကြီးတစ်ယောက်ကဲ့သို့ တမင်သက်သက် ဝတ်ဆင်ထားသည့်တိုင် သူမ၏ အလှအပများကို ဖုံးကွယ်မထားနိုင်ခဲ့ပေ။

ဒါရိုက်တာချန်မှာ ထုံရွှယ်လူက ယခင်က သူမ မြင်ဖူးခဲ့သော သရုပ်ဆောင်များထက်ပင် ပိုလှသည်ဟု ခံစားရသည်။ ထို့ကဲ့သို့သော မျိုးစေ့ကောင်းလေးက သရုပ်ဆောင် ဖြစ်မလာသည်မှာ နှမျောစရာကောင်းလှသည်။

သူမ၏ တူမ ချန်ချိုက်ရှင်းသည်ကား သူမက အလေးအနက် သရုပ်ဆောင်နေပါသော်လည်း ကောင်းကောင်း သရုပ်ဆောင်နိုင်သည်ဟု ပြောရန် ခက်ပေသည်။

တစ်ဖက်တွင် သူမက အလွန်အမင်း ကြိုးစားနေသဖြင့် သူမ၏ မျက်နှာအမူအယာများက အလွန်အမင်း ချဲ့ကားနေပြီး ဟန်ဆောင်နေသည့်ပုံပေါ်ကာ ရှီအာကဲ့သို့ သရုပ်ဆောင်နေခြင်း မဟုတ်ဘဲ အပေါက်ဆိုးဆိုး မိန်းမကြီး တစ်ယောက်ကဲ့သို့ ဖြစ်နေသည်။

ဒါရိုက်တာချန်က အကြည့်များကို ထုံရွှယ်လူထံ ပြန်ပို့လိုက်ပြီး သဘောတွေ့သွားသည့်ဟန် ခေါင်းငြိမ့်လိုက်သည်။

ချန်ချိုက်ရှင်းက သူမ၏ အဒေါ်ကိုသာ အာရုံစိုက်နေလေရာ အဒေါ်ဖြစ်သူ၏ မျက်လုံးများ ထုံရွှယ်လူအပေါ် အချိန်နှင့်အမျှ ကျရောက်နေသည်ကို တွေ့သောအခါ နှလုံးသားထဲတွင် နမိတ်မကောင်းသည့် ခံစားချက်များ ရလာသည်။

သူမက ကြိုးကြိုးစားစား သရုပ်ဆောင်နေပြီး အသံကလည်း ပိုပို၍ ကျယ်လာကာ သူမ၏ လှုပ်ရှားမှုများက အလွန်အမင်း ချဲ့ကား၍ လာနေသည်။ မူလတွင် သူမက ၎င်းကို အသုံးပြုပြီး သူမအဒေါ်၏ အာရုံကို ဆွဲဆောင်ချင်ခဲ့ပါသော်လည်း အကျိုးရလဒ်က ပြောင်းပြန် ဖြစ်သွားလိမ့်မည်ဟု မထင်ထားခဲ့ပေ။

ချန်ချိုက်ရှင်းက ကြည့်လေလေ ပိုပို၍ စိုးရိမ်ပူပန်လာလေလေ ဖြစ်နေပြီး ရုတ်တရက်ဆိုသလို နှလုံးသားထက် ရက်စက်ကြမ်းကြုတ်လာပြီး သူမဘေးမှ ထုံရွှယ်လူထံ ခြေလှမ်းလိုက်သည်။

ထုံရွှယ်လူက သူမ၏ ခြေထောက်ကို သတိမပြုမိသဖြင့် ခလုတ်တိုက်ကာ ရှေ့သို့ လဲကျသွားလေသည်။

သူမ၏ ခြေချင်းဝတ်ထက် စူးရှသည့် နာကျင်မှုတစ်ခု ပေါ်ပေါက်လာပြီး ကြမ်းပေါ်တွင် ထိုင်ချကာ အသက်ပြင်းပြင်း ရှူလိုက်သည်။

လူတိုင်းက ချက်ချင်း ရပ်သွားကြသည်။ "ကျောင်းသူထုံ... အဆင်ပြေရဲ့လား"

ထုံရွှယ်လူက သူမ၏ ခြေချင်းဝတ်ကို ထိကာ ပြောလိုက်သည်။ "ကျွန်မရဲ့ ခြေချင်းဝတ်က အရမ်းနာနေတယ်"

ချန်ချိုက်ရှင်းက စိတ်ပူချင်ယောင်ဆောင်လိုက်သည်။ "ဘယ်လိုလုပ်ရမလဲ အတန်းဖော်ထုံ... ရှင်ထနိုင်ရဲ့လား"

ထုံရွှယ်လူက သူမကို ခြေထိုးခံလိုက်သူမှာ ချန်ချိုက်ရှင်းဖြစ်ကြောင်း ဖော်ထုတ်ချင်လိုက်ပါသော်လည်း ရုတ်တရက်ဆိုသလို စိတ်လှုပ်ရှားနေသည့် ကောင်းမင်ကို လှမ်းကြည့်လိုက်သည်။

သူမက နှုတ်ခမ်းဖျားတွင် ရောက်လာသည့် စကားလုံးများကို ချက်ချင်းမျိုချလိုက်လေသည်။

"ကျွန်မကို ထိုင်ဖို့ ကူညီပေးပါဦး"

လူတိုင်းက သူမ အနားယူနိုင်ရန်အတွက် စင်ဘေးသို့ ခေါ်ပေးသွားကြသည်။

"ကျောင်းသူထုံ... ရှင့်မျက်နှာက နည်းနည်း ဖျော့နေသလိုပဲ... ကျောင်းဆေးခန်းကို သွားဖို့ မလိုတာ သေချာလား"

ထုံရွှယ်လူ လက်ခါပြလိုက်သည်။ "မလိုပါဘူး... ကျွန်မ ဒီမှာ ခဏလောက် နားလိုက်မယ်လေ"

သူမက ထိုကဲ့သို့ ထွက်မသွားနိုင်... ဤနေရာမှာသာ နေကာ ကောင်းမင် လုပ်ချင်နေသည့် အရာကို ကြည့်ချင်နေသေးသည်။

လူတိုင်းက သူမ အဆင်မပြေ ဖြစ်သွားသည်ကို တွေ့သောအခါ စင်ပေါ်သို့ ပြန်တက်လာကြပြီး နောက်လာမည့် ဖျော်ဖြေမှုအကြောင်း ဆွေးနွေးနေကြသည်။

"အခု ဘာလုပ်ကြမလဲ... လူမပြည့်ရင် အစမ်းလေ့ကျင့်မှု လုပ်လို့မရတော့ဘူးလား"

ချန်ချိုက်ရှင်းက ရင်ဘတ်ကို ကော့ကာ ပြောလာသည်။ "ကျွန်မက ဇာတ်ညွှန်းတစ်ခုလုံး မှတ်ထားတာလေ... ကျွန်မကိုယ်တိုင် ဇာတ်ကောင်နှစ်နေရာ သရုပ်ဆောင်နိုင်ပါတယ်... ကျောင်းသူထုံ သရုပ်ဆောင်မယ့် အန်တီဝမ်နေရာက သိပ်မများဘူး... ကျွန်မ ယာယီ အစားထိုးလိုက်ပါ့မယ်"

ချန်ချိုက်ရှင်းက သူမ၏ အဒေါ်ဖြစ်သူအား သူမနှင့် ပတ်သက်ပြီး သေချာသိသွားစေချင်သဖြင့် ထုံရွှယ်လူ၏ ဇာတ်ကောင်ကို ယူရန် ဆုံးဖြတ်လိုက်ခြင်း ဖြစ်သည်။

ထုံရွှယ်လူ၏ ဇာတ်ညွှန်းကို မည်သူကမှ ကျက်မထားကြပေ။ ဒါရိုက်တာချန်ကလည်း ယနေ့ရောက်လာသည် ဖြစ်ရာ လူတိုင်းက တွေးကြည့်လိုက်ပြီးနောက် ဤနည်းလမ်းတစ်ခုသာ ရှိပေတော့သည်ဟု ခံစားလိုက်ရသည်။

ဒါရိုက်တာချန်က သူမ၏ တူမကို အေးစက်စက် စိုက်ကြည့်လိုက်သော်ငြား စကားတစ်ခွန်းမှ ပြောမလာခဲ့ပေ။

အခြားသူများ မမြင်လောက်သော်ငြား သူမကတော့ တွေ့ခဲ့သည်။ ထုံရွှယ်လူကို တမင်တကာ ခြေထိုးခံလိုက်သူမှာ သူမ၏ တူမသာ ဖြစ်ပေသည်။

ငယ်စဥ်ကလေးဘဝကတည်းက ကြည့်ရှုစောက်ရှောက်ပေးလာသည့် တူမဖြစ်သူ ချန်ချိုက်ရှင်းမှာ သူမ၏ အမြင်တွင် သဘောကောင်းကာ တက်ကြွသူဖြစ်သော်လည်း ထိုကဲ့သို့သော ကိစ္စမျိုး လုပ်ဆောင်လာလိမ့်မည်ဟု တစ်ခါမှပင် ထင်မထားခဲ့ပေ။

လူကြားထဲ ပြောမကောင်း၍သာ ငြိမ်နေလိုက်ခြင်းဖြစ်သည်။ မဟုတ်လျှင် တူမဖြစ်သူကို မှတ်မှတ်ရရ ဖြစ်အောင် သေချာပေါက် ဆုံးမပေးလိုက်မည်ပင်။

ချန်ချိုက်ရှင်းက အဒေါ် ဖြစ်သူ၏ မျက်နှာထက် ထူးဆန်းနေသည်ကို သတိမပြုမိဘဲ စတင်၍ ပြင်းပြင်းထန်ထန် သရုပ်ဆောင်လေတော့သည်။

ထုံရွှယ်လူ၏ မျက်လုံးများက တဖြည်းဖြည်း ဖျော့တော့လာသည့် ကောင်းမင်၏ မျက်နှာထက်တွင်သာ အဆက်မပြတ် ရောက်ရှိနေခဲ့သည်။

ချန်ချိုက်ရှင်း သူမ၏ ဇာတ်ကောင်နေရာတွင် ဝင်ယူလိုက်သောအခါ ကောင်းမင်၏ လက်များက ရုတ်တရက် တုန်ယင်သွားလေသည်။

ထုံရွှယ်လူက သူမ၏ နှလုံးသားထဲတွင် တစ်ခုခုက ထူးဆန်းနေကြောင်း ခံစားလိုက်ရသည်။

သို့သော်ငြား သူမ မပြောနိုင်ခင်မှာပင် မတော်တဆတစ်ခု ဖြစ်သွားသည်။

"ချွတ်" ဟူသည့် အသံကြားလိုက်ရပြီး မကြာခင်မှာပင် စတိတ်စင်ထက်မှ မီးဆိုင်းပန်းကြီး၏ ကြိုးများက ရုတ်တရက် ပြတ်ထွက်သွားကာ မီးဆိုင်းပန်းကြီး ပြုတ်ကျလာပြီး ချန်ချိုက်ရှင်း၏ ခေါင်းကို ရိုက်မိသွားသည်။

ချန်ချိုက်ရှင်းက အော်ဟစ်လိုက်ပြီးနောက် သွေးများအိုင်လျက် လဲကျသွားလေသည်။

မတော်တဆမှုက လျှပ်တပြက် ဖြစ်သွားသဖြင့် လူတိုင်းမှာ ထိုမြင်ကွင်းကြောင့် ကြောက်လန့်သွားကြတော့သည်။

Prev Next