MM Story Teller

အပိုင်း၂၉၂

Viewers 67k

🍵Chapter 292

ထုံရွှယ်လူက ထိုအချက်မှ စရန် စီစဥ်ထားသည်။

နှစ်ရက်တာ စုံစမ်းစစ်ဆေးမှုများ ပြီးနောက် အချို့သော အတန်းဖော်များထံမှ အကြမ်းဖျဥ်း သတင်းများ ရခဲ့သည်။

အတန်းနှင့် ကိုယ်ပိုင်စာကြည့်ချိန်များအပြင် ကောင်းမင်က ရေကြည်အိုင် ရှိသည့် နေရာသို့ သွားတတ်ကြောင်း သိခဲ့ရသည်။ ထိုရေကန် တည်ရှိသည့် နေရာက အနည်းငယ် ဝေးလံခေါင်ဖျားလှသဖြင့် အတန်းဖော်များစွာက ထိုနေရာသို့ သိပ်မသွားကြပေ။

သို့သော်လည်း ကောင်းမင်က ထိုနေရာသို့ တစ်ယောက်တည်း မကြာခဏ သွားလေ့ရှိသည်မှာ ထူးဆန်းနေသည်။

ထုံရွှယ်လူ ထိုအကြောင်းကို သိလိုက်ရသောအခါ ကျန်းပိုင်ဟွေ့ကို ခေါ်၍ ရေကန် ရှိရာသို့ အပြေးရောက်လာခဲ့သည်။

ကျန်းပိုင်ဟွေ့: "ရွှယ်လူ ဒီနေရာမှာ ကောင်းမင်ရဲ့ ဒိုင်ယာရီ ရှိတာ သေချာလား"

ထုံရွှယ်လူ ခေါင်းယမ်းပြလိုက်သည်။ "မသေချာဘူး... ဒါပေမယ့် ငါ ကြိုးစားကြည့်ချင်လို့"

အကောင်းဆုံး ကြိုးစားပြီး ရှာလို့မှ ရှာမတွေ့ရင် ဘုရားသခင်က ရှစ်ကျွင်းမင်နဲ့ အခြားသူတွေကို ကူညီနေတယ်လို့ပဲ ပြောရတော့မှာပဲ...

ထုံရွှယ်လူနှင့် ကျန်းပိုင်ဟွေ့တို့က ရေကန်အနီးအနားတစ်ဝိုက် အသေအကြေ ရှာဖွေကြသည်။

နေရာက အတော်လေး ကျယ်ပြောလှသည်ကြောင့် နှစ်ယောက်သား ခါးနာသည်အထိ ရှာလိုက်ကြသော်လည်း မည်သည်ကိုမှ ရှာမတွေ့ကြပေ။

မကြာခင် မနက်ခင်းတစ်ခုလုံး ကုန်ဆုံးသွားသည်။

ထုံရွှယ်လူ ထရပ်ကာ သူမ၏ ခါးကို နှိပ်လိုက်သည်။ "အရင်ဆုံး ထမင်းသွားစားကြမယ်... ပြီးမှ ပြန်လာရှာကြတာပေါ့"

ကျန်းပိုင်ဟွေ့က ပင်ပန်းနေသော်ငြား မကျေမနပ် ဖြစ်မနေပေ။ သို့သော်ငြား သူမ၏ လက်ကို ဆွဲယူကာ ပြောလိုက်သည်။ "ကတိပေးနော်... ငါတို့ တစ်ခုခု ရှာတွေ့ရင် ငါ့ကို တစ်ဝကြီး ကျွေးမွေးရမယ်"

ထုံရွှယ်လူ ပြုံး၍ ခေါင်းငြိမ့်ပြလိုက်သည်။ "မပူနဲ့... အသုံးဝင်တာ ရှာတွေ့တွေ့ မတွေ့တွေ့ ငါ့ရဲ့ ကတိကို မဖောက်ဘူး"

အစပိုင်းတွင် သူမက ကျန်းပိုင်ဟွေ့အပေါ် သတိထားနေခဲ့သော်လည်း နောက်ပိုင်းတွင် သူမက အတွေးဆိုးများ မရှိဘဲ သူမကိုပင် အကြိမ်များစွာ ကူညီပေးခဲ့ကြောင်း တွေ့ခဲ့ရသည်။

သူမက တဖြည်းဖြည်းဖြင့် သတိထားမှုများ လျှော့ချလာခဲ့လေသည်။

နှစ်ယောက်သားက ထမင်းစားဆောင်သို့ သွားကြမည်အပြု ထုံရွှယ်လူတစ်ယောက် ကျောက်တုံးတစ်ခု၏ ဦးတည်ရာက အခြားကျောက်တုံးများနှင့် ကွဲပြားနေကြောင်း ရုတ်တရက် သတိပြုမိသွားသည်။

"ခဏလေး"

ထုံရွှယ်လူ လက်ကို ဆွဲဖြုတ်ကာ ကျောက်တုံးရှိရာသို့ လျှောက်သွားလိုက်သည်။

သေသေချာချာ စစ်ဆေးကြည့်သောအခါ အနည်းငယ် ထူးဆန်းနေသည်။ ကျောက်တုံးကို ရွှေ့လိုက်သောအခါ အောက်တွင် မြေကို တူးဆွထားကြောင်း ပေါ်လွင်သွားသည်။

ထုံရွှယ်လူ၏ ဦးနှောက်ထဲတွင် ရုတ်တရက်ဆိုသလို အလင်းတန်းတစ်ခု ဖြတ်ပြေးသွားပြီး သစ်ကိုင်းတစ်ခုကို အလျင်အမြန် ရှာကာ စတင်တူးထုတ်လေတော့သည်။

ကျန်းပိုင်ဟွေ့က အဘယ်ကြောင့် သူမ ရုတ်တရက် မြေကို တူးထုတ်နေသည်ကို နားမလည်ခဲ့ပေ။ "ဘာတွေ တူးနေတာလဲ... တစ်ခုခု ရှိလို့လား"

ထုံရွှယ်လူ ပြန်မဖြေပေ။ တစ်ခဏအကြာ သစ်ကိုင်းက ခပ်မာမာ အရာဝတ္ထုတစ်ခုကို ထိမိသွားသဖြင့် သူမအပျော်လွန်သွားပြီး ဆက်တူးလေတော့သည်။

မကြာခင် မြေကြီးများ တူးထုတ်ပြီးသွားသောအခါ သံသေတ္တာလေး တစ်ခု ပေါ်လာသည်။

သံသေတ္တာလေးကို ဖွင့်ကြည့်လိုက်ရာ အထဲတွင် ဒိုင်ယာရီတစ်ခု ရှိနေသည်။

ဒိုင်ယာရီကို ဖွင့်ကြည့်လိုက်သောအခါ ရှစ်ကျွင်းမင်၏ အမည် ထွက်ပေါ်လာ၏။

ထုံရွှယ်လူ၏ မျက်လုံးများ ဝင်းလက်သွားလေသည်။

မတိုင်မီက သက်သေမတွေ့ရဘဲ ရှစ်မိသားစု ထိုအခွင့်အရေးကို အသုံးချကာ အမြင့်တက်လာမည်ကို စိုးရိမ်နေခဲ့ရသည်။

သူမက ထိုသက်သေအသစ်မှာ အလွန်ပင် အင်အားကြီးလှမည်ဟု မထင်ထားခဲ့ပေ။

ကြိုးကြိုးစားစား လုပ်ခဲ့တဲ့အတွက် တန်ကြေးပဲ...

ဒိုင်ယာရီထဲတွင် ကောင်းမင်နှင့် ရှစ်ကျွင်းမင်တို့အကြား နေ့စဥ် ပြောဆိုဆက်သွယ်မှုများစွာ ပါဝင်ပြီး နှစ်ယောက်သားက ရည်းစားစာ တစ်စောင်ကို သုံးကာ ထုံရွှယ်လူအား အပုပ်ချရန် ကြံစည်ခဲ့ကြသည့်အကြောင်းများ အပြင် ရှစ်ကျွင်းမင်က နောက်ပိုင်းတွင် အပြစ်များအားလုံး သူမအပေါ် ပုံချခဲ့ပုံများနှင့် ရှစ်ကျွင်းမင် နေ့တိုင်း သူမကို ရိုက်နှက်ခဲ့သည့်အကြောင်းများလည်း ပါဝင်ပေသည်။ သူက သူမသာ ခေါင်းငုံ့ခံနေသရွေ့ သူမနှင့် ဆက်ဆံရေးတစ်ခု တည်ဆောက်မည် ဖြစ်ပြီး ဘွဲ့ရပြီးသည်နှင့် လက်ထပ်ကြမည်ဟုလည်း ကတိပေးထားခဲ့သည်။

ပြစ်မှု ကျုးလွန်စဥ်က ကြိုးကို မည်သို့ ဖြတ်ခဲ့ပုံအသေးစိတ်ကိုလည်း ရေးသားထားခဲ့သည့်အပြင် ရှစ်ကျွင်းမင်က သူမအား ဒိုင်ယာရီ မရေးရန် ပြောခဲ့ပုံများနှင့် သူမက မထိန်းနိုင်ခဲ့ကြောင်းလည်း ပါဝင်သည်။

ရှစ်ကျွမ်းမင်မှာ သူတို့နှစ်ယောက်၏ အချစ်ရေးကိစ္စများကို ဒိုင်ယာရီ စာအုပ်ပေါ်တွင် ရေးသားထားပြီး နောက်ကျလျှင် သူ့အတွက် ချိန်းခြောက်လာနိုင်သည့် သက်သေတစ်ခု ဖြစ်လာမည်ကို စိုးရိမ်နေခဲ့ပုံရသည်။ ထို့ကြောင့် သူက ကောင်းမင်ကို ဒိုင်ယာရီ ရေးသည့် အလေ့အကျင့်ကို စွန့်လွှတ်ရန် တတ်နိုင်သမျှ နည်းလမ်းပေါင်းစုံကို သုံး၍ ဖြောင်းဖျခဲ့သည်။

ကောင်းမင် လက်ခံခဲ့သော်လည်း သူမက ဒိုင်ယာရီ ရေးသည့်အကျင့်ကို မူလတန်းကတည်းက ရှိလာခဲ့ခြင်း ဖြစ်သည်။ သူမက မကျေနပ်ချက်များ နာကျင်မှုများကို ဒိုင်ယာရီထဲတွင် ပေါက်ကွဲထုတ်လေ့ရှိသည်။ သူမသာ ပေါက်ကွဲမထုတ်ရလျှင် အလွယ်တကူ ပြိုလဲကျသွားနိုင်သည်။

ရုန်းကန်ရပြီးနောက် ကောင်းမင်တစ်ယောက် ထိုအကြံကို ရရှိလာခဲ့သည်။ တစ်ဖက်တွင် ရှစ်ကျွင်းမင်ကို ဖုံးကွယ်ထားနိုင်ပြီး အခြားတစ်ဖက်တွင် ရေကန်ရှိရာသို့ ရောက်လာကာ ဒိုင်ယာရီ ရေးသည်။ စာရေးပြီးသွားသောအခါ တွင်းတူး၍ မြှုပ်ထားခဲ့သည်။

ရှစ်ကျွင်းမင်က ကောင်းမင်တစ်ယောက် သူ့ဆန္ဒကို ဆန့်ကျင်ကာ သေလမ်းရှာပေးထားမည်ကို ထင်ထားလိမ့်မည် မဟုတ်ပေ။

ကျန်းပိုင်ဟွေ့က ဒိုင်ယာရီ ဖတ်ပြီးသွားသောအခါ ပါးစပ် ကျယ်ကျယ်ဟလာပြီး ကြောက်လန့်တုန်လှုပ်သွားသည်။

"ကောင်းမင်က တကယ်ကြီး စိတ်ကျန်းမာရေးချို့တဲ့နေတာပဲ... ရှစ်မျိုးရိုးက ဒီလောက်ဆိုးတာတောင် တွဲနေသေးတယ်"

"ယောကျ်ားတစ်ယောက်ကသာ ငါ့ကို လှောင်ပြောင်စော်ကားပြီး သိက္ခါချရဲရင် သူ့ခေါင်းကို ထုခွဲပစ်လိုက်မှာ"

ထုံရွှယ်လူက နှုတ်ခမ်းထောင့်လေးများကို တွန့်ကွေးလိုက်သော်လည်း စကားတစ်ခွန်းမှ ပြောမလာခဲ့ပေ။

ကောင်းမင်က PUA စီကနေ အဖမ်းခံလိုက်ရတယ်... သူမ တကယ်ကြီး ထင်မထားတာ...

သူမက ကောင်းမင်အား အချစ်စိတ်မွှန်နေသူဟုသာ တွေးထားခဲ့ခြင်းဖြစ်သည်။ အဆုံးတွင် နှစ်ယောက်သားက ကောင်းမင် အချစ်စိတ်မွှန်နေ၍သာ တွဲနေကြခြင်း ဖြစ်မည်ဟု ထင်မထားခဲ့သော်လည်း ရှစ်ကျွင်းမင်က ကောင်းမင်ကို PUAစိတ်ဖြင့် ထိန်းချုပ်နေမည်ဟု ထင်မထားခဲ့ပေ။

PUA အပြည့်အစုံ(Pick-upArtist)မှာ အစပိုင်းတွင် ပြောဆိုဆက်သွယ်ရေး အရည်အချင်းများကို ရည်ညွှန်းပြီး နောက်ပိုင်းတွင် ချွတ်ယွင်းချက်များကို အသုံးချရာမှ စိတ်ခံစားချက်များကို ထိန်းချုပ်မှုနှင့် စိတ်ပိုင်းဆိုင်ရာ ခြယ်လှယ်မှုများကို ဖြစ်ပေါ်လာစေခြင်း ဖြစ်သည်။

PUA ယောကျ်ားများမှာ အစပိုင်းတွင် မိန်းကလေးများ အပေါ် ကောင်းမွန်ပြီး တည်ငြိမ်သည့် ဆက်ဆံရေးတစ်ခုကို တည်ဆောက်လိုက်သည်နှင့် တစ်ဖက်လူကို ရူးသွပ်စွာ ဖိနှိပ်လာတတ်ကြသည်။ သူတို့က မိန်းကလေးများ ပြုလုပ်လာသည့် အမှားအယွင်းများကို ကိစ္စအကြီးကြီးများအဖြစ် ပုံကြီးချဲ့ကာ မိန်းကလေးများကို သူတို့အတွက် အပြစ်ရှိစိတ်များ အပြစ်ဝင်စိတ်များ ပေါ်ပေါက်လာစေပြီးနောက် တစ်ဖက်လူကို ထိန်းချုပ်မည့် ရည်ရွယ်ချက် ပြည့်မြောက်အောင် လုပ်ဆောင်တတ်ကြသည်။

သေချာပေါက်ပင် ရှစ်ကျွင်းမင်က အချိန်ခရီးသွားသူလည်း မဟုတ်သလို ပြန်လည်မွေးဖွားလာသူလည်း မဟုတ်ပေ။ အခြားသူများ၏ စိတ်ခံစားချက်များကို ထိန်းချုပ်ခြင်းမှာ အချိန်အကြာကြီး ကတည်းက ရှိခဲ့သည်ဟု ဆိုရပေမည်။ သို့သော်လည်း ယခင်က လူအများက ၎င်းကို သဘောမပေါက်ခဲ့ကြပေ။

ယခုလိုပင် သူမက ကျန်းပိုင်ဟွေ့ကို PUAအကြောင်း ရှင်းမပြနိုင်ဘဲ PUA ရရှိခဲ့သူများမှာ တုံးအသူများ မဟုတ်ကြဘဲ စိတ်ခံစားချက်များ အထိန်းချုပ်ခံရပြီး ကူကယ်ရာမဲ့လုပ်ကြရခြင်းသာ ဖြစ်သည်ဟု ရှင်းပြနိုင်ရန်ကား အဝေးကြီးသာပင်။

ကျန်းပိုင်ဟွေ့က သူမဘာသာ ပြောနေသည်။

"ဒီမှာ ရေးထားတာကို ကြည့်စမ်းပါဦး... သူက ကြိုးကို မဖြတ်ခင် မီးဆိုင်း ကျလာမဲ့အချိန်ကို တိတိကျကျ တွက်ချက်ဖို့ ကြိုးကို မဖြတ်ခင် လက်တွေ့စမ်းသပ်ချက်တောင် လုပ်ခဲ့သေးတယ်... ပြီးတော့ မီးဆိုင်းက နင့်ခေါင်းကို အတိအကျ ထိသွားဖို့ နင်အစမ်းလေ့ကျင့်မယ့်အချိန်ကို ပေါင်းစပ်လိုက်တယ်... သူက သိသိသာသာကြီး ဒီလောက် ဥာဏ်ကောင်းနေတာပဲကို ဒီဥာဏ်ကောင်းတာကို ကောင်းတဲ့နေရာမှာ အသုံးမချဘူး"

ထုံရွှယ်လူ ထိုအချက်ကို ထောက်ခံလိုက်သည်။ "နင်ပြောတာ မှန်တယ်... သူသာ သူ့စိတ်တွေကို မှန်ကန်တဲ့နေရာမှာ ထားလိုက်ရင် သေတဲ့အထိ အဖြစ်ဆိုးသွားရမှာ မဟုတ်ဘူး... ဒိုင်ယာရီကို ဌာနမှုးဆီ သွားပေးကြရအောင်"

ကျန်းပိုင်ဟွေ့က ခေါင်းငြိမ့်ပြလိုက်ပြီး နှစ်ယောက်လုံးက ဌာနရုံးခန်းရှိရာသို့ အတူတကွ သွားလိုက်ကြသည်။

ဒိုင်ယာရီကို မြင်ပြီးနောက် ဌာနမှုးမှာ ကမ္ဘာကြီးအပေါ် မြင်သည့်အမြင်များ ပြောင်းလဲသွားသည်ဟု ခံစားလိုက်ရသည်။

ဌာနမှူးက ပြောလိုက်သည်။ "ဒါကို ရေကန်ဘေးမှာ ရှာတွေ့တာလား... ဒါပေမယ့် ရေကန်မှာ ဒိုင်ယာရီ သွားရှာဖို့ ဘယ်လိုအကြံရခဲ့တာလဲ"

ထုံရွှယ်လူ: "ကျွန်မလည်း ကောင်းမင်ကို ရေကန်ဘေးမှာ ဒိုင်ယာရီ ဖွက်ထားမယ်လို့ မသိခဲ့ပါဘူး... ဒါပေမယ့် လူတွေ အများကြီးက ကောင်းမင် ရေကန်ဘက်ကို တစ်ယောက်တည်း ခဏခဏသွားတယ်လို့ ပြောတာ ကြားတာနဲ့ သဲလွန်စတစ်ခုခုများ ရှိမလားသွားကြည့်တာ... သက်သေရခဲ့မယ်လို့ မထင်ထားဘူး"

သဘာဝကျကျပင် သူမက အခြားသူများအား ထွက်ဆိုချက်ထဲတွင် မြင်ခဲ့ရသည်ဟု မပြောနိုင်ပေ။

ဌာနမှုးက သူမကို တစ်ချက်ကြည့်လိုက်သည်။ "ရဲဌာနက ရဲဘော်တွေတောင် အဲ့ဒီနေရာမှာ ရှာခဲ့ကြတာ ဘာတစ်ခုမှ မတွေ့ခဲ့ရဘူး... မင်းက တကယ်ကံကောင်းတာပဲ"

ပြောပြီးနောက် သူက ရဲဌာနကို ဖုန်းဆက်ခေါ်လိုက်သည်။ လုံခြုံရေးဌာနမှ ရဲဘော်များက တစ်နာရီ မကြာခင်မှာပင် ရောက်ရှိလာကြသည်။

ဒိုင်ယာရီ ဖတ်ပြီးနောက် ရဲအရာရှိများက ကောင်းမင်၏ လေ့ကျင့်ခန်းစာအုပ်ကို ထုတ်ယူကာ လက်ရေးများကို သေသေချာချာ ယှဥ်ကြည့်လိုက်ပြီး ဒိုင်ယာရီမှာ အမှန်ပင် ကောင်းမင်၏ ပစ္စည်းဖြစ်ကြောင်း အတည်ပြုနိုင်ခဲ့သည်။

ရဲအရာရှိများမှာ ကိစ္စများကို ထိုသို့ ပြောင်းလဲသွားမည်ဟု ထင်မထားကြပေ။

"မင်း ဒီသက်သေကို အချိန်ကိုက် ရှာတွေ့ခဲ့တာပဲ... ဒီလို သက်သေသာ မရှိရင် လူယုတ်မာကောင်ကို သူရဲကောင်းလို ဆက်ဆံမိတော့မလို့"

ဤနှစ်ရက်အတွင်း သက်သေအသစ် မရှိသဖြင့် ဤအမှုကိုသာ ပိတ်လိုက်ပါက ရှစ်ကျွင်းမင်ကို သူ့ကိုယ်သူ စတေးကာ အများသူငှာကို ကယ်ဆယ်သည့် ရဲရင့်သူ အဖြစ် သတ်မှတ်ခံရမည် ဖြစ်သည်။ ထိုကိစ္စမျိုးသာ ဖြစ်လာခဲ့ပါက အခြေအနေက လုံးဝ ပြောင်းပြန် ဖြစ်သွားရပေတော့မည်။

ထုံရွှယ်လူက အလိုက်သင့် ပြောလိုက်သည်။ "ကြည့်ရတာ ကံကြမ္မာကြောင့် ဖြစ်မှာပါ... သက်သေရှာဖို့ အရမ်းနောက်မကျသွားသေးပါဘူး"

ကျန်းပိုင်ဟွေ့က သိလိုစိတ်ပြင်းစွာဖြင့် မေးလိုက်သည်။ "ရဲဘော်တို့... ရှစ်ကျွင်းမင်က ရွှယ်လူ့ကို လုပ်ကြံဖို့ ကောင်းမင်ကို အကြိမ်အများကြီး တွန်းအားပေးခဲ့တာဆိုတော့ သေဒဏ်ပေးခံရနိုင်လား"

ရဲအရာရှိက ပြောလိုက်သည်။ "ဒါကတော့ ကောင်းမင်ရဲ့ သေဆုံးမှုက သူနဲ့ ပတ်သက်နေမနေပေါ် မူတည်တယ်"

ကောင်းမင်၏ သေဆုံးမှုက မတော်တဆမှုသာ ဖြစ်ခဲ့ပါက ဤဒိုင်ယာရီ ရှိထားလျှင်ပင် ရှစ်ကျွင်းမင်အား သေဒဏ်ပေးရန် မဖြစ်နိုင်ပေ။ အများဆုံးရှိလှ နှစ်ပေါင်းများစွာ အကျဥ်းကျခံရရုံသာ ဖြစ်သည်။

သူက လက်ရှိတွင် လုံးဝ အကြောသေနေလေရာ သူ့ကိုသာ ထောင်ချထားလိုက်ပါက ပြည်သူ့လုံခြုံရေး ဗျူရိုအတွက် ဒုက္ခများသွားစေနိုင်သည်။

ကျန်းပိုင်ဟွေ့က ဆက်မေးချင်နေသေးသော်လည်း ထုံရွှယ်လူထံမှ ဆွဲခေါ်ခံလိုက်ရသည်။ "ငါတို့အခုထိ မစားရသေးဘူးလေ... မြန်မြန် သွားရအောင်"

ကျန်းပိုင်ဟွေ့၏ အာရုံများက ချက်ချင်း ပြောင်းသွားလေသည်။ "နင်မပြောရင် ငါမေ့တော့မလို့ပဲ... နင်လည်း ပြောရော ငါ့ဗိုက်က ဒရမ်လို မြည်လာတော့တာပဲ... မြန်မြန် လျှောက်ပြီး သွားစားကြမယ်"

ထုံရွှယ်လူက သူမကို ရုံးခန်းထဲမှ ဆွဲခေါ်လာခဲ့ပြီးနောက် ပြောလိုက်သည်။ "နေ့လည်စာလွန်နေပြီ... ငါနင့်ကို အပြင်က အစိုးရပိုင်စားသောက်ဆိုင်မှာ စားဖို့ ဖိတ်မယ်လေ"

ကျန်းပိုင်ဟွေ့၏ မျက်လုံးများ ပြူးကျယ်သွားသည်။ "ဒါကို သုံးပြီး ငါ့ကို လာချွေးမသိပ်နဲ့နော်... ငါပြောမယ် ငါလက်မခံနိုင်ဘူးနော်... ငါက နင်ချက်တာပဲ စားချင်တာ"

ထုံရွှယ်လူက တည်ငြိမ်စွာ ရယ်မောလိုက်သည်။ "ဒါပေါ့ ဘယ်ဟုတ်မလဲ... ငါဒီတစ်ကြိမ် စားဖို့ဖိတ်မယ်... နောက်တစ်ခါကျမှ ကိုယ့်ဘာသာ ချက်ကျွေးမယ်လေ... ဒါဆိုရင် ရပြီလား"

ကျန်းပိုင်ဟွေ့က သူမ၏ ဗိုက်လေးကို ထိလိုက်သည်။ "ဒါလည်း အဆင်ပြေတာပါပဲ"

နှစ်ယောက်သားက လမ်းလျှောက်လာခဲ့ကြပြီး ထုံရွှယ်လူက ကောင်းမင် ခုန်ချခဲ့သည့် နေရာကို ပြန်လှည့်ကြည့်လိုက်မိသည်။

Prev Next