MM Story Teller

အပိုင်း၃၁၇

Viewers 67k

🍵Chapter 317

ထိုအချိန်တွင် ကျောင်းထဲ၌ ရှောင်းမျန်မျန်နှင့် ဝေ့ကျူးကျူးတို့က ကုပ်ချောင်းကုပ်ချောင်းဖြင့် ထောင့်လေးတွင် ပုန်းနေခဲ့ကြသည်။

ဝေ့ကျူးကျူးက ရုတ်တရက်ဆိုသလို အိတ်ထဲမှ ဖန်ဘူးလေး ထုတ်လာခဲ့ပြီး နေရောင်အောက်တွင် ထုတ်ကြည့်၍ ပြောလိုက်သည်။ "မျန်မျန်... ကြည့်"

ရှောင်းမျန်မျန် ကြည့်လိုက်ရာ ဖန်ဘူးလေးထဲတွင် ပိုးကောင် လေးငါးကောင် ခုန်ပေါက်နေသည်ကို တွေ့လိုက်ရသည်။ "မမကျူးကျူး... ဒါ သန်းတွေလား"

ဝေ့ကျူးကျူး ခေါင်းငြိမ့်ပြလိုက်သည်။ "ဟုတ်တယ်.. ငါတို့အတန်းထဲက သန်းဘုရင်မရဲ့ ဆံပင်ပေါ်က ယူလာတာ"

ရှောင်းမျန်မျန်က သူမကို လေးစားမှုအပြည့်ဖြင့် ကြည့်လိုက်သည်။ "သမီးတို့ အဲ့ဒီတစ်ယောက်ရဲ့ ဆံပင်ထဲကို သန်းတွေ တကယ် ထည့်လိုက်မလို့လား... ဆရာမတွေ သိရင် သမီးတို့ကို သေချာပေါက် ဆူမှာ"

ဝေ့ကျူးကျူးက သူမ၏ ရင်ဘတ်ကို ပုတ်လိုက်သည်။ "မပူနဲ့... ငါနင့်ကို ကာထားပေးမယ်"

ရှောင်းမျန်မျန် ချက်ချင်းဆိုသလို စိတ်အေးသွားသည်။ "ဟုတ်ပြီလေ.. ဒါဆို သွားကြမယ်"

နှစ်ယောက်သားက ထောင့်လေးတွင် ပုန်းနေကြပြီး အတော်ကြာကြာ စောင့်ဆိုင်းနေပြီးမှ ဆယ်ကျော်သက်အရွယ် ကောင်မလေးတစ်ယောက် စာသင်ခန်းထဲမှ ထွက်လာသည်ကို တွေ့လိုက်ရသည်။

သူမက လျှောက်လာနေရင်း ဂုဏ်ယူဝံ့ကြွားစွာ ပြောလိုက်သည်။ "အဲ့ဒီရှောင်းမျန်မျန်က အနိုင်ကျင့်ရလွယ်ပါတယ်လို့ ငါပြောသားပဲ... ငါ သူ့ကို တွန်းလိုက်တာတောင် မော့မကြည့်ရဲဘူး... မနက်ဖြန်ကျရင်လည်း ငါနင့်ကို ခေါ်ပြီး သူ့ကို သွားဆူဦးမယ်"

"ရှင်းရွေ့... နင်က တကယ်မိုက်လိုက်တာ" မိန်းကလေးတစ်ယောက်က မြှောက်ပင့်လာသည်။

ရှစ်ရှင်းရွေ့မှာ ကြက်ဖကြီးတစ်ကောင်လိုပင် ဂုဏ်ယူဝံ့ကြွားစွာဖြင့် ရင်ကော့ထားသည်။ "မလုံလောက်သေးဘူး... နင်နောက်ဆို ငါ့စကားကို နားထောင်နေသရွေ့ ငါနင့်ကို ကာပေးထားမယ်"

သူတို့ စကားပြော၍ ပြီးပြီးချင်းမှာပင် ဝေ့ကျူးကျူးနှင့် ရှောင်းမျန်မျန်တို့က ထောင့်တစ်နေရာမှ ပြေးထွက်လာခဲ့ကြသည်။

ဝေ့ကျူးကျူးက ရှစ်ရှင်းရွေ့ကို ကန်ကာ သူမအောက်တွင် ဖိချထားလိုက်ပြီး ရှောင်းမျန်မျန်ကို မျက်စပစ်ပြလိုက်သည်။

ရှောင်းမျန်မျန်မှာ အတော်လေး စိတ်လှုပ်ရှားနေသော်ငြား ပုလင်းအဖုံးကို ခပ်မြန်မြန် ဖွင့်ကာ ရှစ်ရှင်းရွေ့၏ ခေါင်းထက်သို့ လောင်းချလိုက်သည်။

ပုလင်းထဲမှ သန်းများက သူမ၏ ဆံပင်ထဲသို့ ခုန်ဝင်ပျောက်ကွယ်သွားကြလေသည်။

ရှစ်ရှင်းရွေ့က ဒေါသတကြီး ရုန်းကန်နေပြီး အော်ဟစ်လာသည်။ "ဝေ့ကျူးကျူး... ရှောင်းမျန်မျန် လွှတ်ပေးစမ်း"

ဝေ့ကျူးကျူးက သူမ၏ အရေပြားအပိုင်းလေးတစ်ခုကို ဆွဲယူကာ အားဖြင့် လိမ်ဆွဲလိုက်သည်။ "ရှစ်ရှင်းရွေ့... မျန်မျန့်ကို အနိုင်ကျင့်ရဲရင် ငါနင့်ကို ကြမ်းပြင်ပေါ် လဲကျတဲ့အထိ ရိုက်ပစ်လိုက်မယ်"

ဝေ့ကျူးကျူးနှင့် ရှောင်းမျန်မျန်တို့ ထွက်လာသည်နှင့် ရှစ်ရှင်းရွေ့ဘေးတွင် ရပ်နေကြသည့် မိန်းကလေးနှစ်ယောက်လည်း ထွက်ပြေးသွားကြသဖြင့် ရှောင်းမျန်မျန် သူမ၏ ဆံပင်ထဲသို့ သန်းများ ထည့်လိုက်သည့်ကိစ္စကို မည်သူမှ မတွေ့ခဲ့ကြပေ။

ရှစ်ရှင်းရွေ့က နာကျင်မှုကြောင့် ကျယ်လောင်စွာ အော်ဟစ်လိုက်ပြီး ရှောင်းမျန်မျန်၏ လှုပ်ရှားမှုများကို လုံးဝ သတိမထားမိခဲ့ပေ။ "ဝေ့ကျူးကျူး... ငါ့ကို လွှတ်ပေး... အား.... ငါ့အမေနဲ့ တိုင်ပြောမယ်"

ဝေ့ကျုးကျူးက ရှောင်းမျန်မျန်အတွက် တရားမျှတမှု ပြန်ယူလိုခြင်းသာ ဖြစ်ပြီး ရန်ဖြစ်ရသည်ကို သဘောမကျပေ။ သူမ ထရပ်ကာ ပြောလိုက်သည်။ "နင် ဆရာမကို တိုင်ရဲရင် ငါလည်း ဆရာမကို နင် မျန်မျန့်ကို အနိုင်ကျင့်ခဲ့တယ်ဆိုပြီး သွားတိုင်လိုက်မှာ"

ပြောပြီးနောက် ရှောင်းမျန်မျန်၏ လက်ကို ဆွဲကာ ပြေးထွက်သွားသည်။

ရှောင်းမျန်မျန်နှင့် ဝေ့ကျူးကျူးတို့က အချိန်အတော်ကြာ ပြေးလာခဲ့ပြီးမှ ရပ်လိုက်ကြသည်။ နှစ်ယောက်သား မောဟိုက်နေသော်ငြား အလွန်ပျော်ရွှင်နေကြပေသည်။

ရှောင်းမျန်မျန်: "မမကျူးကျူး... မမက အရမ်းမိုက်တာပဲ... သူ ဆရာမကို သွားမတိုင်လောက်ပါဘူးနော်"

ဝေ့ကျူးကျူး အာမခံပေးလိုက်သည်။ "သူ မလုပ်ရဲပါဘူး... စကားမစပ် ရှစ်ရှင်းရွေ့ကို ရင်းနှီးနေတယ်လို့ မထင်ဘူးလား... ငါသူ့ကို တစ်နေရာရာမှာ တွေ့ဖူးနေတယ်လို့ အမြဲတမ်း ခံစားနေရတာ... ဒါပေမယ့် မမှတ်မိဘူး"

"သမီးလည်း တူတူပဲ" ရှောင်းမျန်မျန်လေးက ခေါင်းတဆတ်ဆတ် ငြိမ့်ပြလိုက်ပြီး ရုတ်တရက် ပြောလိုက်သည်။ "မှတ်မိပြီ... သူက လမုန့်လေး ကိုက်တာခံလိုက်ရတဲ့သူနဲ့ မတူဘူးလား"

လမုန့်လေး အကိုက်ခံလိုက်ရသူမှာ ရှစ်ရှိုးနန်ဖြစ်သည်။

ဝေ့ကျူးကျူးနှင့် ရှောင်းမျန်မျန်တို့က သူ့နာမည်ကို မသိခဲ့သည်ကြောင့်သာ။

သို့သော်လည်း ရှောင်းမျန်မျန် ပြောလိုက်သည့်အတွက် ဝေ့ကျူးကျူးလည်း မှတ်မိသွားသည်။ "ဟုတ်သား... ရှစ်ရှင်းရွေ့က အဲ့လူနဲ့ တော်တော်တူတယ်... ဒါပေမယ့် သူမျက်လုံးတွေက နင့်ခဲအိုနဲ့ နည်းနည်းဆင်တယ်လို့ တွေးမိနေတာ"

ရှောင်းမျန်မျန် မျက်မှောင်ကြုတ်လိုက်သည်။ "ဘယ်လို ဖြစ်နိုင်မှာလဲ.... သမီးရဲ့ ခဲအိုက အရမ်းကြည့်ကောင်းတာကို... ရှစ်ရှင်းရွေ့က ရုပ်ဆိုးမကြီး"

ရှစ်ရှင်းရွေ့က သူမကို အနိုင်ကျင့်ခဲ့ပြီးတော့ ရုပ်လည်း အရမ်းဆိုးတာကို ဘယ်လိုလုပ်ပြီး သူမရဲ့ ခဲအိုနဲ့ ယှဥ်နိုင်မှာလဲ...

ဝေ့ကျူးကျူးက တစ်ခဏမျှ တွေးလိုက်ပြီးနောက် ခေါင်းငြိမ့်လိုက်သည်။ "နင်ပြောတာမှန်တယ် ရှစ်ရှင်းရွေ့က ရုပ်ဆိုးမကြီး... အိမ်ပြန်ပြီး ညစာစားရအောင်"

ရှောင်းမျန်မျန်လေးက ခေါင်းလေးကို တဆတ်ဆတ် ငြိမ့်ပြလိုက်သည်။ "အင်း... ဒီနေ့ သမီးမမ ချက်မှာလေ... သမီးတို့အိမ်လိုက်ပြီး စားပါလား"

"ကောင်းတာပေါ့"

ကလေးမလေး နှစ်ယောက်သားက လက်ချင်းတွဲကာ အိမ်ပြန်သွားခဲ့ကြသည်။

ရှစ်ရှင်းရွေ့ ထရပ်လိုက်သောအခါ သူမ၏ လက် နာကျင်နေသည်ကို တွေ့လိုက်ရလေသည်။

ထို့နောက် တဝါးဝါး ငိုကြွေးလေတော့သည်။

🍵

ထုံရွှယ်လူမှာ မင်္ဂလာပွဲအားလပ်ရက်အတွင်း ဆိုင်အလုပ်များ ရှုပ်မနေခဲ့ပေ။ သူမနှင့် ဝမ်ရူကွေ့တို့က ဤရက်များအတွင်း ဟိုဟိုသည်သည် လျှောက်သွားခဲ့ကြသည်။

တမြန်နေ့က မဟာတံတိုင်းပေါ်သို့ တက်ခဲ့ကြပြီး မနေ့ကတွင်မူ တားမြစ်မြို့တော်နှင့် ပြတိုက်များသို့ သွားလည်ခဲ့ကြသည်။ ပေကျင်းအနှံ့ လျှောက်သွားခဲ့ကြသည်ဟု ဆိုရမည်ပင်။

ထုံရွှယ်လူသည်လည်း ပြည်တွင်းခရီးစဥ်အတိုလေး သွားရမည်လားဟု စဥ်းစားခဲ့သေးသော်လည်း အချိန်က အလွန်အလျင်လိုနေသဖြင့် အပျော်ခရီးမထွက်သည်က ပိုကောင်းသေးသည်။

လူနှစ်ယောက် အတူရှိနေသ၍ မည်သည့်နေရာတွင် ရှိနေပါစေ ကိစ္စမရှိပေ။

ယနေ့တွင် သူတို့က အပြင်မထွက်ဘဲ အိမ်ထဲမှာသာ နေခဲ့ကြပြီး သစ်ပင်ပန်းမာန်များ ရေလောင်းပေါင်းသင်ပြီးနောက် အတူတူ ဟင်းချက်ခဲ့ကြကာ အရသာရှိသော ဟင်းပွဲများကို စားပွဲအပြည့် ချက်ပြုတ်ခဲ့ကြသည်။

ဝက်အူများကို ဆားကြမ်းနှင့် ဆန်မှုန့်တို့ဖြင့် ပွတ်သပ်ဆေးကြောထားသဖြင့် သန့်ရှင်းကာ ညှီနံ့ကင်းသည့်အပြင် ငရုတ်သီး၊ ဂျင်း၊ ကြက်သွန်ဖြု၊ ကြက်သွန်မြိတ်တို့ဖြင့် မွှေကြော်ကြော်ထားသည်။

ပြင်ဆင်ထားသော ဝက်အူများမှာ ခပ်စပ်စပ်ဖြစ်နေပြီး အရသာက မြူးကြွနေကာ ကြွပ်ဆတ်၍ အရသာရှိလှသည်။ ဝါးလေလေ အရသာပိုထွက်လေလေပါပင်။

ဗိုလ်မှုးရှောင်းမှာ ထိုဟင်းပွဲကို အထူးနှစ်ခြိုက်လှပြီး ဝိုင်တစ်ခွက်သောက်ကာ ဝက်အူတစ်ဖတ် စားကာဖြင့် ပျော်မွေ့နေလေသည်။

ဝက်အူများအပြင် ထုံရွှယ်လူက ဝက်သားပေါင်းကိုလည်း ပြုလုပ်ထားသေးသည်။

ဝက်သားကို ခပ်ရှည်ရှည် အချောင်းများအဖြစ်လှီးကာ ဆောစ့်ထဲတွင် စိမ်ထားရသည်။ ပြီးနောက် ဆန်ကို အဝါရောင်သန်းသည်အထိ လှော်ပေးရသည်။ ပြီးနောက် လေးညှင်း၊ နာနတ်ပွင့်၊ သစ်ကြံပိုးခေါက်တို့ကို ထည့်ကာ ဆက်လှော်ပေးရသည်။ လှော်ပြီးသွားသောအခါ အစပ်ငါးမျိုး ဆန်ခေါက်ဆွဲလုပ်ရန် ဆန်များကို အမှုန့်များဖြစ်အောင် ကြိတ်ချေပေးရလေသည်။

ထို့နောက် အရသာစိမ်ထားသော ဝက်သားကို အရသာငါးမျိုး ဆန်ခေါက်ဆွဲနှင့်အတူ အညီအမျှ သုတ်လိမ်းပေးရပြီး လင်ဗန်းပေါ်တွင် ဖြတ်ထားသော ရွှေဖရုံသီးကို တင်ကာ ဝက်သားကို အပေါ်တွင် ထားလိုက်ပြီးနောက် ပေါင်းခံအိုးထဲတွင် ထည့်ပေါင်းပေးရသည်။

မိနစ်အနည်းငယ်အတွင်းမှာပင် ရေများ ဆူပွက်လာပြီး ပေါင်းခုံအိုး၏ အငွေ့ထွက်ပေါက်မှာ မွှေးရနံ့လေးများ သင်းပျံ့လာကာ မီးဖိုချောင်တစ်ခုလုံး ဖုံးလွှမ်းသွားလေသည်။

ဝက်သားပေါင်းက နူးညံ့ကာ မွှေးကြိုင်နေပြီး ခပ်အိအိဖြစ်နေကာ အဆီပြည့်နေသော်လည်း အီဆိမ့်မနေပေ။ အပြင်ဘက်ရှိ ဆန်ခေါက်ဆွဲအလွှာက အရသာကို ပို၍ ကောင်းမွန်စေကာ ပါးစပ်ဖျားထဲတွင် မွှေးရနံ့များ ပြည့်အီသွားသဖြင့် လူတိုင်း ဗိုက်ဆာသွားရလေသည်။

မစ္စတာဝမ်နှင့် ဦးလေးဇုန်းတို့က အသားပေါင်းကို ပိုအရသာတွေ့ကြသည့်အတွက် ဗိုလ်မှူးရှောင်းက သူတို့ကို အရသာမခံတတ်လေခြင်းဟု ပြက်ရယ်ပြုလိုက်သည်။

သို့သော်ငြား အဘိုးကြီးဝမ်သည်လည်း သူ့ကို လွယ်လွယ်နှင့် အနိုင်ပိုင်းသွားမည်ကို ကြည့်မနေနိုင်လေရာ အစားကောင်းအသောက်ကောင်းများ စားနေရင်း အငြင်းပွားနေကြသဖြင့် လွန်စွာ သက်ဝင်စည်ကားနေလေသည်။

ဝမ်ရူကွေ့က ငါး စားရသည်ကို သဘောကျသည့်အတွက် စားပွဲပေါ်တွင် ငါးဟင်းကလည်း မပါမဖြစ် ပါရပေမည်။

ထုံရွှယ်လူက ငါးကို နှစ်ဖက်လုံးတွင် ရွှေအိုရောင်သန်းသည်အထိ ကြော်ကာ အရသာ သင်းပျံ့လာစေရန် ဝိုင်တစ်ခွက် လောင်းထည့်လိုက်သည်။ ဝိုင်နှင့် ငါးတို့ ပေါင်းစပ်ရာမှ ဖြစ်လာသည့် အနံ့အရသာလေး လျှံတက်လာကာ မီးခိုးများနှင့်အတူ မြင့်တက်လာခဲ့လေသည်။

ရုတ်တရက်ဆိုသလို တောင်တန်းပေါ်မှ ယူဆောင်လာခဲ့သည့် နွေဦးရေလေးကိုလည်း လောင်းထည့်လိုက်သေးသည်။ ရေဆူလာသောအခါ အရသာရှိသော ငါးစွပ်ပြုတ်တစ်အိုး အသင့်ဖြစ်လာလေပြီ။ ဖြူပျစ်ပျစ် ငါးစွပ်ပြုတ်က အနံ့လေးများ သင်းပျံ့လာနေပြီး ကြက်သွန်မြိတ်လေးများကို နုပ်နုပ်စင်းကာ ဖြူးလိုက်သည်။ အရောင်နှင့် အနံ့အသက်တို့မှာ စားချင်စဖွယ်ပါပင်။

အားလက်ရက်များက အလျင်အမြန် ကုန်ဆုံးလာနေသဖြင့် သူမနှင့် ခွဲခွာရတော့မည့်အတွေးများက သူ့ကို မချိမဆန့် ဖြစ်လာစေသည်။

သို့သော်လည်း ထိုအခိုက်တွင် အရသာသင်းသင်းလေးကို အနံ့ခံမိသွားသဖြင့် ဗိုက်တစ်ခုလုံး ဆာလောင်လာခဲ့သည်။ သူက သူမအတွက် တစ်ခွက်ထည့်ပေးလိုက်ပြီးနောက် သူ့ကိုယ်သူအတွက်လည်း တစ်ခွက် ခပ်ထည့်လိုက်သည်။

နွေဦးရေက ချိုမြနေပြီး ၎င်းနှင့် ပြုလုပ်ထားသည့် ငါးဟင်းရည်က သာမန် ရေပိုက်ခေါင်းမှ ထွက်လာသည့် ရေနှင့် ပြုလုပ်ထားသည့် ငါးဟင်းရည်ထက် ပို၍ အရသာရှိသည်။

ဗိုလ်မှူးရှောင်းတစ်ယောက် ဝက်အူတစ်ဖတ်စားလိုက် ဝိုင်သောက်လိုက် လုပ်နေသည်ကို မြင်သောအခါ မစ္စတာဝမ်သည်လည်း ရုတ်တရက် အယ်လ်ကိုဟော စွဲလမ်းလာလေသည်။

"ရှောင်ဇုန်း... ငါ့ကိုလည်း ဝိုင်တစ်ခွက် ငှဲ့ပေး... ဒီနေ့ ငါ စိတ်ကောင်းဝင်နေတယ်... အတူတူသောက်ကြစို့"

သို့သော်ငြား ဦးလေးဇုန်း ပြန်ဖြေရန် အချိန်မရလိုက်သေးခင်မှာပင် ဝမ်ရူကွေ့၏ စကားကို နားထောင်လိုက်ရသည်။ "ဦးလေးဇုန်း... အဘိုးရဲ့ စကားကို နားထောင်မနေနဲ့နော်... သူသောက်လို့မရဘူးလို့ ဆရာဝန် ပြောထားပြီးသား"

အဘိုးဝမ်မှာ ရုတ်တရက် ဒေါသထွက်ရလွန်း၍ မုတ်ဆိတ်မွေးများကို ခါယမ်းလိုက်ပြီး ငြင်းခုံလိုက်သည်။ "တစ်ခွက်လောက် မရရင်လည်း တစ်ဝက်လောက်တော့ သောက်ခိုင်းမှပေါ့"

ဝမ်ရူကွေ့: "အဘိုး... ဆရာဝန်က တစ်ငုံလေးတောင် မရဘူးလို့ ပြောထားတာနော်"

အဘိုးဝမ်၏ မျက်နှာက ပို၍ ကြည့်ရဆိုးလှပြီး ပုပ်နေသော သခွားသီးကဲ့သို့ ရှုံ့တွလာသည်။ "ကျေးဇူးမသိတတ်တဲ့ မြေး"

ထုံရွှယ်လူက သူ့အတွက် ဟင်းများ ထည့်ပေးလိုက်ပြီးနောက် ပြောလိုက်သည်။ "ဘိုးဘိုး... ရူကွေ့က ဘိုးဘိုး ကျန်းမာရေး ကောင်းဖို့အတွက် မသောက်ခိုင်းတာပါ... အသီးအရွက်တွေ ပိုစားသင့်တယ်"

အဘိုးဝမ်၏ မျက်နှာက တစ်စက္ကန့်အတွင်း ပြောင်းလဲသွားပြီး အသီးအရွက်စိမ်းများကို ကောက်ယူကာ ပြောလိုက်သည်။ "ငါ့မြေးနဲ့ မြေးချွေးမက ငါ့ကို ကောင်းကောင်း ဆက်ဆံပေးကြတာပဲ"

ဝမ်ရူကွေ့: "..."

ဦးလေးဇုန်း: "..."

ဗိုလ်မှူးရှောင်းမှာ ထုံရွှယ်လူ မစ္စတာဝမ်အတွက် အသီးအရွက်များ ထည့်ပေးလိုက်သည်ကို မြင်သောအခါ သူမကို မျှော်လင့်တကြီးဖြင့် ကြည့်လာခဲ့သည်။

ထုံရွယ်လူလည်း သူ့အတွက် အသီးအရွက်များ အလျင်အမြန် ထည့်ပေးလိုက်သည်။

ဝေ့ကျူးကျူးက စားပွဲပေါ်တွင် ဖြစ်ပျက်နေသမျှကို လစ်လျူရှုထားပြီး ပွဲတော်တည်နေသည်မှာ လျှာကိုပင် ကိုက်မိလုနီးပါးပင်။

သူမ ထမင်း နှစ်ပန်းကန်လုံး အပြောင်ရှင်း စားသောက်ပြီးသွားခဲ့သည်ကို တွေ့လိုက်ရသည့် ထုံကျားရှင်းက စိတ်ထဲတွင် နာကျင်သွားလေသည်။

လူပျိုကြီး လုပ်တာပဲ မှန်တယ်... ဝေ့ကျူးကျူးလို ဇနီးမျိုးနဲ့ လက်ထပ်ရရင် သူ သေချာပေါက် ဆင်းရဲသွားတော့မှာ...

စားသောက်ပြီးနောက် ရှောင်းမျန်မျန်က အစ်မဖြစ်သူ၏ လက်ကို လာကိုင်၍ မေးလိုက်သည်။ "မမ.. သန်းကို မကုသရင် သေသွားနိုင်လား"

ထုံရွှယ်လူ တန့်သွားပြီးနောက် သူမ၏ ခေါင်းကို ကြည့်လိုက်သည်။ "ဘာလို့လဲ... မျန်မျန်က သန်းတွေ ထပ်ကျနေပြန်ပြီလား"

လွန်ခဲ့သည့် နှစ်နှစ်ကျော်က သန်းကျခဲ့သည့် အဖြစ်ကို တွေးမိသွားသောအခါ ကြက်သီးများ တဖြန်းဖြန်း ထလာခဲ့သည်။

ရှောင်းမျန်မျန် ခေါင်းယမ်းပြလိုက်သည်။ "သမီး မဟုတ်ပါဘူး... မမကျူးကျူးရဲ့ အတန်းထဲက လူတစ်ချို့က သန်းတွေကျနေလို့ မေးကြည့်တာ"

ထုံရွှယ်လူ ထိုစကားများကို ကြားလိုက်ရချိန်တွင် ပို၍ စိတ်ပူလာခဲ့သည်။ သူမလေးကို အလင်းရောင်ထဲသို့ ဆွဲယူကာ ဆံပင်များကို ဖွကြည့်လိုက်သည်။ အသေအချာ စစ်ဆေးကြည့်ပြီးနောက် သူမ၏ ခေါင်းထက်၌ သန်းများ မရှိကြောင်း တွေ့လိုက်ရမှသာ စိတ်သက်သာရာရသွားခဲ့လေသည်။

"သန်းတွေက လူကို မသေစေပါဘူး... ဒါပေမယ့် အရမ်း ယားတာ... ယားလို့ ကုတ်လိုက်ရင် ဦးရေပြားကို သွေးတွေပါ ထွက်စေနိုင်သေးတယ်... ဒါကြောင့် သန်းရှိရင် ချက်ချင်းကုသဖို့လိုတယ်"

ရှောင်းမျန်မျန်လေးမှာ သန်းများက လူကို မသေစေနိုင်သည့်အကြောင်း ကြားလိုက်ရပါမှ ဘဝင်ကျသွားသည်။ "သိပါပြီ... ဒါဆို သမီး မမကျူးကျူးနဲ့ တွေ့ရင် ပြောပြလိုက်မယ်နော်"

ထုံရွှယ်လူမှာ သူမ၏ အပြုအမူ သေးသေးလေးကို မရိပ်မိခဲ့ပေ။ "နေပါဦး... မမလည်း ကျူးကျူးကို တွေ့မှ အဲ့ဒီအတန်းဖော်တွေနဲ့ နီးနီးကပ်ကပ် မနေဖို့ ပြောရဦးမယ်... မဟုတ်ရင် ထပ်ကူးလာနေမှ"

"ဟုတ်... မမ"

ဝမ်နှင့် ရှောင်းမိသားစုတို့ သဟဇာတ ဖြစ်နေကြသော်လည်း ရှစ်ရှင်းရွေ့မှာမူ လမ်းတလျှောက် ငိုရင်း အိမ်ပြန်လာခဲ့သည်။

ဘေးအိမ်မှ သူမကို ကြည့်ရှူစောင့်ရှောက်ပေးနေသည့် သွေးဝေးဆွေမျိုးတစ်ယောက်ဖြစ်သော အန်တီလင်းမှာ သူမ ငိုပြီး ပြန်လာသည်ကို မြင်သောအခါ ချက်ချင်း လာမေးလေသည်။ "ဘာဖြစ်လာတာလဲ ရှင်းရွေ့... ချော်လဲလာတာလား"

ရှစ်ရှင်းရွေ့က သူမကို စိတ်မရှည်လက်မရှည် ကြည့်လိုက်သည်။ "မဟုတ်ဘူး"

အန်တီလင်း: "မဟုတ်ရင် ဘာဖြစ်ခဲ့တာလဲ... အတန်းဖော်တွေနဲ ရန်ဖြစ်ခဲ့တာလား"

ရှစ်ရှင်းရွေ့မှာ ထိုမေးခွန်းကို ဒေါသတကြီး ဖြစ်သွားလေသည်။ "ဘာလို့ ဒီလောက် အရစ်ရှည်နေတာလဲ... ဗိုက်ဆာနေပြီ... ထမင်းစားမယ်"

အန်တီလင်းမှာ ဒေါသထွက်ရလွန်းသဖြင့် စိတ်မရှည်လက်မရှည် ဖြစ်သွားသည်။ "နင့်မိဘတွေက နင့်ကို စောင့်ရှောက်ဖို့ ငါ့ဆီအပ်ထားခဲ့တာ... ငါနင့်ကို စောင့်ရှောက်ပေးရမှာ အမှန်ပဲ... မဟုတ်ရင် နင့်မိဘတွေ ပြန်လာတဲ့အခါ ငါဘယ်လို ရှင်းပြပေးရမှာလဲ"

ရှစ်ရှင်းရွေ့ ခါးထောက်လိုက်ပြီးနောက် သူမကို တည့်တည့်စိုက်ကြည့်လိုက်သည်။ "ကျွန်မကို စောင့်ရှောက်ဖို့ ဘယ်သူက ပြောလို့လဲ... အန်တီက ကျွန်မကို စောင့်ရှောက်ပေးဖို့ ကျွန်မ မိဘတွေဆီက ပိုက်ဆံယူထားတာလေ... ဆူညံပူညံတွေ လာမလုပ်နဲ့"

အန်တီလင်းမှာ ဒေါသတကြီး ဖြစ်သွားပြီး ရင်ဘတ်သည်ပင် နိမ့်ချည်မြင့်ချည် ဖြစ်သွားရသည်။

Prev Next