MM Story Teller

Ch-71

Viewers 8k

၇၀ခုနှစ်များတွင် ကလေးများပြုစုပျိုးထောင်ခြင်း

အပိုင်း (၇၁)

ရေးဖြေစာမေးပွဲ၊ နှုတ်ဖြေစာမေးပွဲနှင့် အင်တာဗျူးတို့၏ ရလဒ်များအားလုံး ထွက်လာခဲ့ပြီဖြစ်သည်။

ချင်းရို့ ရေဒီယိုအသံလွှင့်ဌာနသို့ သွားရောက်သတင်းပို့သည့်အခါ ဝင်ခွင့်ရတဲ့ တခြားအမျိုးသမီးတစ်ယောက်ကိုပါ တွေ့လိုက်ရသည်။ ထို့နေ့တုန်းက စောင့်ဆိုင်းခန်းတွင် ကြောက်လန့်တုန်ယင်နေခဲ့တဲ့ အစက်အပြောက်အင်္ကျီဝတ်ထားတဲ့ ဝမ်လိချွမ်းလို့ခေါ်တဲ့ ထိုအမျိုးသမီးကလွှဲ၍ တခြားသူမဟုတ်ပါချေ။

ဝမ်လိချွမ်းက ချင်းရို့ကို မြင်သည့်အခါ ရှက်ပြုံးလေးနှင့် "ငါ ဘယ်လိုများ ဝင်ခွင့်ရလိုက်သွားလဲ မသိပါဘူးဟယ်၊ ကံကောင်းသွားတာနေမယ်"

"ငါ ဝင်လာတုန်းက တံခါးကို တွန်းဖွင့်ပြီးတော့ ပြေးလာလုမတတ်ဖြစ်တော့မလို့လေ"

ဒီအမျိုးသမီးက ဒရာမာကွင်းပဲဟ!

ချင်းရို့လည်း ရှက်ရွံ့စွာ ပြုံးလျက် "ငါရောပဲဟယ်၊ ကောင်းကင်က ပေါင်မုန့်တစ်လုံး ပြုတ်ကျလာပြီးတော့ ငါ့ခေါင်းကို ထိသွားတဲ့အတိုင်းပဲ။ စာမေးပွဲမှာ ပထမနေရာကိုတောင် ရခဲ့တယ်လေ"

ဝမ်လိချွမ်း: "…"

သူတို့နှစ်ယောက်က မြို့ထဲရှိ ရေဒီယိုအသံလွှင့်ဌာနကို သွားလိုက်ကြပြီး ကြေညာသူအဖွဲ့တွင် လူသစ်များဖြစ်လာကြ၏။ သူတို့နှစ်ဦးအပါအဝင် ကြေညာသူအုပ်စုမှာ အမျိုးသမီး ၄ဦး၊ အမျိုးသား ၂ဦး စုစုပေါင်း ၆ယောက်ရှိပေသည်။

ယခုအချိန်တွင် ထုတ်လွှင့်ချိန်ကို နံနက်ပိုင်း၊ မွန်းလွှဲပိုင်း နဲ့ ညနေပိုင်း ဟူ၍ အချိန်သုံးပိုင်း ခွဲထားပြီး၊ နံနက် ၅း၀၀ မှ ၈း၀၀ နာရီအထိ၊ နေ့လည် ၁၀း၅၀ မှ ၂း၃၀အထိ၊ ညနေ ၅း၃၀ မှ ၁၁ နာရီအထိ ထုတ်လွှင့်မည်ဖြစ်သည်။

ပရိုဂရမ်၏ အကြောင်းအရာမှာလည်း ကွဲပြားပေသည်။ ထုတ်လွှင့်မှုတစ်ခုချင်းစီ၏ အစတွင် သံပြိုင်သီချင်း ထုတ်လွှင့်မည်ဖြစ်ပြီး၊ နံနက်ခင်းတွင် ရေဒီယိုကျွမ်းဘားအားကစား၊ မာ့က်စ်-လီနင်ဝါဒီတို့၏ အတွေးအမြင်များ၊ သတင်းများ၊ သတင်းစာမှ ကောက်နုတ်ချက်များ၊ ကျေးလက်ဒေသများသို့ ထုတ်လွှင့်မှုများ၊ အလုပ်သမားများ...အစရှိသည်တို့အပြင် မိုးလေဝသခန့်မှန်းချက်များနှင့် စာပေအစီအစဉ်များအပြင် China Central Radio၏ အစီအစဉ်များကို ပြန်လည်ထုတ်လွှင့်ပေးလေသည်။

နေ့စဥ်ထုတ်လွှင့်မှုများအပြင် မြို့တော်ရှိ ညီလာခံများကဲ့သို့သော အဓိကပွဲများကို တိုက်ရိုက်ထုတ်လွှင့်ခြင်းအတွက် ကြေငြာသူများထံတွင်လည်း တာဝန်ရှိပေသည်။

ချင်းရို့က အသံကောင်းသူဖြစ်သလို သီချင်းလည်းဆိုဖူးသူမို့ မွန်းလွှဲပိုင်း ရေဒီယိုအကြိုအစီအစဉ်၊ မိုးလေဝသခန့်မှန်းချက်နှင့် စာပေအစီအစဉ် ဟူ၍ ပရိုဂရမ်နှစ်ခုအတွက် တာဝန်ကျခဲ့သည်။

မနက်ပိုင်း၊ မွန်းလွှဲပိုင်း နဲ့ ညနေပိုင်း အစီအစဉ်များဟာ အခြေခံအားဖြင့် အတူတူပင်ဖြစ်သည်။ တစ်နေ့လျှင် မိုးလေဝသခန့်မှန်းချက် လေးကြိမ်ထုတ်လွှင့်ရ၏ - နံနက်ခင်းတစ်ကြိမ်၊ နေ့လည်ပိုင်းတစ်ကြိမ်၊ ညနေခင်းတစ်ကြိမ် နဲ့ ထုတ်လွှင့်မှုအဆုံးသတ်တွင် နောက်ဆုံးတစ်ကြိမ်ဖြစ်ပေသည်။

အချိန်တစ်ချိန်စီတိုင်းတွင် စာပေနှင့် အနုပညာအစီအစဉ်များနဲ့ သတင်းအစီအစဉ်များလည်း ရှိပါသည်။ လူတိုင်းလူတိုင်းက နေ့စဉ် မတူညီတဲ့ အချိန်များတွင် ရေဒီယိုနားထောင်သောကြောင့်သာ။

နေ့လယ်ပိုင်းအစီအစဥ်မှာ ၁၀:၅၀တွင် စတင်ထုတ်လွှင့်ပေသည်။ ချင်းရို့ ပြင်ဆင်ရန်အတွက် ၁၀နာရီမတိုင်မီ ရေဒီယိုအသံလွှင့်ဌာနသို့ ရောက်ရှိရန်သာ လိုအပ်သလို ထုတ်လွှင့်မှုမှာ နေ့လည် ၂း၃၀တွင် ပြီးဆုံးမည်ဖြစ်၍ ၃း၀၀ - ၃း၃၀ ဝန်းကျင်တွင် သူမ အိမ်ပြန်နိုင်ပြီဖြစ်သည်။ ၄င်းမှာ တစ်ပတ်လျှင် တစ်ကြိမ် အလှည့်ကျ ပြုလုပ်မည်ပင်။

ချင်းရို့မှာ ဤအလုပ်လုပ်ချိန်အတွက် အလွန်ကျေနပ်နေခဲ့၏။ သူမ နောက်ကျမှ အိပ်ရာထနိုင်ပေမယ့် နေ့လယ်ခင်း တစ်ရေး မအိပ်နိုင်တော့ပေ။ အချိန်ကို ရွှေ့ဆိုင်းရတော့မှာပေါ့လေ။ အသံလွှင့်ဌာနကနေ အိမ်ပြန်ရောက်ဖို့ ၁၀မိနစ်ကနေ မိနစ်၂၀ ကြာတယ်ဆိုတော့ သူမ ပြန်ရောက်ရင် အိပ်လို့ရတာပဲ။

အလုပ်ချိန်က ဘယ်လောက်တောင် ကောင်းလိုက်သလဲနော်။

ဝမ်လိချွမ်းက ချင်းရို့ကို မကျေမနပ် ကြည့်နေခဲ့၏။ သူမ ဝင်ခွင့်အောင်ခဲ့သော်လည်း နံနက်ခင်းအစီအစဥ်ကို တာဝန်ကျခဲ့သည်။

သူတို့နှစ်ယောက်က အသစ်လေးတွေဖြစ်၍ နံနက်ခင်း နဲ့ နေ့လယ်ပိုင်းကိုသာ ရွေးချယ်ခွင့်ရခဲ့လေသည်။ အတွင်းရေးမှူးက ချင်းရို့ကို အရင်ရွေးခိုင်းသည့်အခါ သူမက "နေ့လည်ပိုင်း" လို့ ပြောလိုက်၏။

ထို့ကြောင့် ဝမ်လိချွမ်းလည်း နံနက်ခင်းအစီအစဉ်ကိုသာ ရွေးချယ်နိုင်ခဲ့လေသည်။ နံနက်ခင်း ထုတ်လွှင့်ချိန်မှာ ၅နာရီမှာ စတင်မည်ဖြစ်၍ သူမ ၄နာရီကတည်းက ပြင်ဆင်ရမည်ဖြစ်သည်။ အနာဂတ်မှာ သူမကတော့ ကြက်တွေထက်တောင် ပိုစောစောထရတော့မှာပဲ!

သူမက ချင်းရို့နှင့် ပြောင်းချင်ပေမယ့် ချင်းရို့က ငြင်းဆိုလိုက်၏။

"အစ်မချင်းရို့ နင် ဘာလို့ ငါ့ကို ခွင့်မပြုတာလဲ? မနက်ဆို ငါ အိမ်မှာ လုပ်စရာတွေရှိတယ်။ ငါ့အမေက ခါးနာတတ်လို့ သူမကို ပြုစုဖို့ အိပ်ရာထရမယ်။ မနက်တိုင်း ငါက…"

ချင်းရို့: "…"

"ကြေညာသူ စာမေးပွဲဖြေတုန်းက မနက်အလုပ်ဆင်းရမယ်လို့ နင် မတွေးထားဘူးလား?"

ဝမ်လိချွမ်း: "ဒီလောက်စောမယ်လို့ မမျှော်လင့်ထားမိဘူး"

"အစ်မချင်းရို့ ကျေးဇူးပြုပြီး ငါ့ကိုကူညီပါနော်"

ချင်းရို့မှာ သနားစာနာစိတ်လုံးဝမရှိပါဘူးနော်။ ပထမဆုံးအနေနဲ့ သူမက ဒီအမျိုးသမီးကို မယုံသလို သူမရဲ့နှလုံးသားမှာလည်း သံမဏိလို မာကြောစွာဖြင့် "နင် ဒီအလုပ်အခွင့်အလမ်းကို မလိုအပ်ရင် အဲ့ဒီနေ့က နင်နဲ့ စကားပြောခဲ့တဲ့ လူတွေလိုမျိုး တခြားသူတွေကို ပေးနိုင်တယ်လေ"

"နင်က စာမေးပွဲမှာ ဒုတိယနေရာကို ရခဲ့တာဆိုတော့ အရမ်းတော်တာပဲဟာ။ စောစောထစရာမလိုတဲ့ တခြားအလုပ်ကို ရှာနိုင်မှာပဲ၊ နင့် အရည်အချင်းကို ငါ ယုံပါတယ်နော်"

ချင်းရို့က သူမရဲ့ပခုံးကို ပုတ်လိုက်ပြီးနောက် ပျော်ရွှင်စွာ စက်ဘီးစီးရင်း အိမ်ပြန်ခဲ့သည်။

သူမကို ဘယ်သူက ပထမနေရာ ရစေခဲ့တာလဲနော်။

***

ချင်းရို့ ကြေညာသူအဖြစ် ဝင်ခွင့်ရသွားပြီဆိုတဲ့အကြောင်းမှာ မိသားစုခြံဝင်းတစ်ခုလုံး သတင်းပျံ့နှံ့သွားသဖြင့် လူတိုင်းက သူမအား ချီးကျူးဂုဏ်ပြုကြလေ၏။ ချင်းရို့လည်း အုန်းသီးကောက်ညှင်းကိတ်အချို့ ပြုလုပ်ကာ အိမ်နီးချင်းများစွာထံ ပို့ပေးခဲ့ပါသည်။ ဥပမာဆိုရသော် ဘေးအိမ်က ကျန်းမိသားစုပေါ့။

နောက်ဆုံးမှာတော့ ချင်းရို့က အလုပ်တစ်ခုရသွားပြီဖြစ်၍ နေ့တိုင်း အိမ်မှာ လက်ဖက်ရည် သောက်တော့မှာမဟုတ်လို့ သူ့ဇနီးကို စိတ်အနှောင့်အယှက်မပေးနိုင်တော့ဘူးလို့ မစ္စတာကျန်း တွေးနေမိရင်း လွန်စွာ ပျော်ရွှင်နေခဲ့၏။ သူ့ရဲ့ ကောင်းမွန်တဲ့ နေ့ရက်တွေ ပြန်စတော့မှာပဲ။

ရဲဘော်ရှောင်ချင်း အလုပ်များပါစေကွာ!

"ရှောင်ရင်ရေ စားကြည့်ပါဦး၊ ရှောင်ချင်းလုပ်ထားတဲ့ ကိတ်က တကယ်ကောင်းတယ်ကွာ"

ဟွမ်ရှင်းရင်က သူ့လောက်မပျော်ပါချေ။ ရှောင်ချင်းက ကြေညာသူဖြစ်သွားတော့ သူမတို့ကျောင်းမှာ ဆရာမ မဖြစ်တော့ဘူးပေါ့။

တကယ့်ကို စိတ်ပျက်စရာပဲ။

ချင်းရို့ကို အဆင့်ပိုနိမ့်တဲ့ တရုတ်ဘာသာစကားဆရာမဖြစ်လာပြီး ဆိုးသွမ်းတဲ့ကလေးတွေကြောင့် စိတ်တိုဒေါသထွက်ကာ ငိုယိုတာကို သူမ မြင်ချင်ခဲ့တာလေ။

နောက်ပြီးတော့ ဘေးအိမ်က တူလေးနှစ်ယောက်လည်း အရမ်းထူးဆန်းကြတာပဲ... ဟွမ်ရှင်းရင်က သူတို့ကို ဘယ်လိုဖော်ပြရမှန်းမသိတော့ချေ။

တစ်ယောက်က တိတ်ဆိတ်လွန်းတယ်... နောက်တစ်ယောက်ကတော့... ပြောဖို့ခက်လိုက်တာ။

တစ်ခုတည်းသောအားသာချက်မှာ သူက အကောင်းမြင်စိတ်ရှိပြီး ငိုရတာ မကြိုက်သူပင်။ သူမကတော့ အဲ့ဒီကလေးလေး ငိုတာကို တစ်ခါမှ မမြင်ဖူးသလို ကလေးငယ်က ချင်းရို့ကျွေးသမျှကို စားတတ်သည်။

ဟွမ်ရှင်းရင်: "…"

ဟွမ်ရှင်းရင်မှာ သူ့သားနဲ့ အတန်းထဲက လူဆိုးကောင်လေးတွေအကြောင်း တွေးမိသွားရင်း သူမဟာ ဘာလို့များ သူမကို စိတ်သက်သာရာရစေမယ့် ကလေးတွေနဲ့ မဆုံရတာလဲလို့ စဥ်းစားနေမိလျက်။

ဟွမ်ရှင်းရင် ပိုလို့တောင် လက်မခံနိုင်တဲ့အရာမှာ ဘေးအိမ်က ရှောင်ချာကျင်းဟာ အလုပ်လုပ်နေပြီဖြစ်တာတောင်မှ မနက်တိုင်း ခြံထဲမှာ လက်ဖက်ရည်သောက်နေတုန်းပဲ!

သူမ ကျောင်းကပြန်လာချိန်မှာလည်း သူမက နေ့လည်ခင်း လက်ဖက်ရည်သောက်နေသေးတယ်။ လက်ဖက်ရည်သောက်ရုံသာမက ရုရှားဝတ္ထုတွေတောင် ဖတ်နေသေးတယ်ဟ!

လုယန် စောစောပြန်လာရင် သူ မြန်မြန်ရေချိုးပြီး သန့်ရှင်းတဲ့အင်္ကျီ ဝတ်လိမ့်မယ်။ သူတို့လင်မယားနှစ်ယောက်က ပင်လယ်ပြာရောင်ရှပ်အင်္ကျီ ဝတ်ဆင်ထားကြပြီးတော့ ကောက်ရိုးထီးအောက်မှာ ဝတ္ထုတွေ ဖတ်ကြလိမ့်မယ်။ ချင်းရို့က မသိတဲ့စကားလုံးတွေ့ရင် လုယန်ကို မေးတဲ့အခါ သူက ရှင်းပြပေးလိမ့်မယ်။ ပြီးရင် သူတို့နှစ်ယောက်သား စကားစမြည်ပြောကြလိမ့်မယ်။

လူငယ်စုံတွဲက တစ်ယောက်နဲ့ တစ်ယောက် ပျော်ရွှင်စွာ ပြုံးကြည့်နေကြပြီး ဘေးအိမ်မှ ဟွမ်ရှင်းရင်ကို တွေ့တဲ့အခါ နှုတ်ဆက်ဖို့ အစပြုပေမည်။

"မင်္ဂလာပါ မရီး"

ဟွမ်ရှင်းရင်: "…"

ဒါဟာ အဆုံးမရှိနိုင်တော့ဘူးလား?!

Thanks for reading!

Prev Next