MM Story Teller

Ch-73

Viewers 8k

၇၀ခုနှစ်များတွင် ကလေးများပြုစုပျိုးထောင်ခြင်း

အပိုင်း (၇၃)

ကြေငြာသူဖြစ်လာပြီးနောက် ချင်းရို့ရဲ့ နေ့ရက်များဟာ ယခင်ကထက် ပိုမိုအလုပ်များလာခဲ့ရ၏။ သူမ မနက်အိပ်ရာထပြီးနောက် ကြက်ကလေးတွေကို အစာကျွေးပြီး အပင်တွေကို ရေလောင်းရသည်။ နံနက်စာ စားပြီးတဲ့အခါ ကလေးနှစ်ယောက်ကို ကျောင်းပို့ကာ ခြံကို သန့်ရှင်းသေသပ်စေပြီးမှ ကောက်ရိုးထီးအောက်မှာထိုင်၍ လက်ဖက်ရည်ပူပူလေး သောက်နေလျက် စာမူတွေကို လှန်ကြည့်နေခဲ့သည်။

ချင်းရို့ အလုပ်စဝင်ခါစက မရင်းနှီးတဲ့အရာများစွာ ရှိခဲ့ပေမယ့် ကံကောင်းထောက်မစွာဖြင့် ဤခေတ်ကာလ၏ ရုပ်သံလွှင့်လုပ်ငန်းမှာ တကယ်ပင် ရိုးရှင်းလှသည်။

ချင်းရို့က ပိုမိုခေတ်မီတဲ့နေရာကနေ လာခဲ့သူမို့ ဒီလိုစက်ကိရိယာဟောင်းတွေနဲ့ ရင်ဆိုင်ကြုံတွေ့ရသည့်အခါ သင်ယူရတာ လွယ်ကူမြန်ဆန်နေခဲ့သည်။

- သူမက စက်ကိရိယာအမှားတွေကိုတောင် ကူရှာပေးနိုင်ခဲ့ပါသေးတယ်။

ဒါတွေဟာ လက်တွေ့အရည်အချင်းတွေပဲဖြစ်လေရဲ့!

ဝန်ထမ်းတွေအားလုံးက သူမကို "ထက်မြက်ပြီးတော့ အံ့သြစရာကောင်းလိုက်တာ!" လို့ ချီးကျူးကြလေသည်။

"ရှောင်ချင်းက အရည်အချင်းရှိလွန်းတယ်နော်၊ ထူးချွန်တဲ့ကြေငြာသူတစ်ယောက်ပဲ။ သူမရဲ့ စာပေအစီအစဉ်က အရမ်းကောင်းသလို ပထမဆုံးအကြိမ် ထုတ်လွှင့်မှုကလည်း တုံ့ပြန်မှုအရမ်းကောင်းတယ်"

သူမနှင့် နှိုင်းယှဥ်ပါက ဝမ်လိချွမ်းမှာ မနည်းအမှီလိုက်ဖို့ရာ ရုန်းကန်နေရလျက်။

မူလကတော့ ဝမ်လိချွမ်းဟာ သူမရဲ့ ထက်မြက်တဲ့ အရည်အချင်းတွေကိုသုံးပြီး ချင်းရို့ကို ကျော်တက်ရန် တွေးထားခဲ့သဖြင့် သူမ စစချင်းရောက်လာတာနဲ့ ကျိုးနွံတဲ့ စကားများစွာ ပြောခဲ့ကာ "ငါက ချင်းရို့နဲ့ မယှဥ်နိုင်ပါဘူးဟာ" "ချင်းရို့က အရမ်းတော်တာလေ။ သူမက စာမေးပွဲမှာ ပထမနေရာရခဲ့တာ"

"သူမက သူမရဲ့ အရည်အချင်းပေါ် မူတည်ပြီး ဝင်ခဲ့တာလေ၊ ငါကတော့ ကံကောင်းသွားလို့ပါပဲဟယ်၊ ကံအကောင်းလွန်သွားခဲ့တာပါပဲ"

အစပိုင်းတွင်မူ အသံလွှင့်ရုံရှိ လူများက သူမကို နှစ်သိမ့်ပေးခဲ့ကြ၏။ "ကံကောင်းရုံနဲ့ ဘယ်လိုလုပ်ပြီး ဝင်နိုင်မှာလဲဟယ်။ နင်က အရည်အချင်းရှိလို့ပဲပေါ့"

ရလဒ်က နောက်မှလာသည်ပင်။

ဝမ်လိချွမ်းက တခြားသူတွေ သီးသန့်ပြောတာကို ကြားခဲ့ရသည်မှာ

"သူမက တကယ်ပဲ သူမရဲ့ အရည်အချင်းနဲ့ ဝင်လာတာ ဟုတ်ပုံမရဘူးနော်"

"အေးလေ အေးလေ၊ ရှောင်ချင်းက အရမ်းတော်ပြီး စိတ်ချရတဲ့ အရည်အချင်းလည်းရှိပါ့ဟယ်။ ပြီးတော့ သူ့သဘောထားကလည်း လေးနက်နေတာပဲနော်"

"တချို့လူတွေက တစ်ကြိမ်လောက် ကံကို အားကိုးနိုင်ပေမယ့် အချိန်တိုင်း ကံကောင်းနေဖို့ဆိုတာ မဖြစ်နိုင်ဘူးလေ"

"အဲဒါက…"

"အဲဒီနေ့က သူမက ခြေချော်ပြီး ကံကောင်းခြင်းကို နင်းမိသွားတာနေမှာပေါ့ဟယ်"

ဝမ်လိချွမ်းရဲ့ မျက်နှာမှာ အရုပ်ဆိုးလာလျက်။ အဲဒါက သူ့ခြေထောက်ပေါ်သူ ကျောက်တုံးပစ်ချမိသည့်နှယ်။

အရင်တုန်းကတော့ ဝမ်လိချွမ်းက သူ့ထက်နိမ့်ကျတဲ့ လူတွေရှေ့မှာ တမင်တကာ ကျိုးနွံဟန်ဆောင်ရတာကို သဘောကျသလို သူတို့ ဒီလိုပြောကြတာကိုလည်း နှစ်ခြိုက်၍ပင် - "မဖြစ်နိုင်လိုက်တာ၊ နင်က ငါ့ထက် အများကြီးသာတာကို။ နင်က ဒီလိုပြောနေရင်တော့ ငါက ဘယ်လိုနေရမှာလဲဟာ?"

ဒီလိုနဲ့ပဲ ဝမ်လိချွမ်းဟာ ရှင်းပြလို့မရတဲ့ ကျေနပ်မှုကို ရပေလိမ့်မည်။

သူမဟာ ရည်ရွယ်ချက်ရှိရှိ အရည်အချင်းမပြည့်မီသလို ဟန်ဆောင်ရတာကိုလည်း နှစ်ခြိုက်သူပင်။ အမှန်တကယ်တော့ သူမက အမြဲပြင်ဆင်ထားပြီးသားဖြစ်သလို အရေးအကြီးဆုံး အခိုက်အတန့်တွေမှာသာ လူတွေရဲ့အထင်ကြီးမှုကို ရယူဖို့အတွက် အသုံးပြုပေမည်။

နောက်ဆုံးတွင်မူ သူမဟာ ကံကောင်းလို့ပါပဲဆိုပြီး ပေါ့ပေါ့ပါးပါး ပြောပေလိမ့်မည်။

- သို့သော် တစ်ယောက်ယောက်က အမှန်ပင် သူမထက် ပိုတော်လာတဲ့အခါမှာတော့ သူမကိုယ်သူမ တမင်တကာ နှိမ့်ချထားတဲ့ စကားတွေဟာ တကယ့်အဖြစ်မှန် ဖြစ်လာချေပြီ။

ဝမ်လိချွမ်း ကူကယ်ရာမဲ့သလို ခံစားနေရသလို ဒေါသအလွန်ထွက်နေရလျက်။

ချင်းရို့က ရှီရှန်းယီလို့ခေါ်တဲ့ အယ်ဒီတာနှင့် အစီရင်ခံအဖွဲ့မှ မိန်းကလေးတစ်ဦးနှင့် တွေ့ဆုံခဲ့ရသည်။ သူမက အလွန်ရည်မွန်သူတစ်ယောက်ပင်။ ချင်းရို့က သူမရေးတဲ့ စာပေဆောင်းပါးတွေကို နှစ်ခြိုက်သဖြင့် သူမနဲ့ ဆက်သွယ်ခဲ့ပေသည်။

မထင်မှတ်စွာပင် သူတို့နှစ်ယောက်စလုံး ဆက်ဆံကြသည့်အခါ အဆင်ပြေကြသဖြင့် ပျော်ရွှင်စွာ စကားစမြည်ပြောကြလေ၏။ ရှီရှန်းယီဟာ အေးတိအေးစက်နဲ့ ပေါင်းလို့သင်းလို့မကောင်းတဲ့ မိန်းကလေးမျိုး မဟုတ်ကြောင်း ချင်းရို့ သိခဲ့ရသည်။ စာရေးခြင်းကို ဝါသနာပါသူအများစုကဲ့သို့ပင် သူမသည်လည်း ရုရှားဝတ္ထုကို ဖတ်ရတာ နှစ်ခြိုက်သလို ဝတ္ထုများစွာကိုလည်း စုဆောင်းခဲ့ပါသည်။

ချင်းရို့က သူမကို သစ်သီးလက်ဖက်ရည် မျှဝေပေးခဲ့သလို ရှီရှန်းယီကလည်း သူမစုဆောင်းထားတဲ့ ဝတ္ထုတွေကို ငှားရမ်းပေးပြီး သူမအတွက် စာပေလက်ရေးစာမူများပင် ရေးသားပေးခဲ့သည်။

ချင်းရို့က ဤခေတ်ကာလရဲ့ နာမည်ကြီးဝတ္ထုများနှင့် သိပ်မရင်းနှီးသဖြင့် ဘယ်ဇာတ်လမ်းတွေကောင်းသလဲဆိုတာကို သူမမသိသောကြောင့် ရှီရှန်းယီက သူမအား အသေးစိတ်ပြောပြပေးခဲ့သည်။

ရှရှန်းယိ အကြံပြုထားပေးတဲ့ ဝတ္ထုတွေဟာ တကယ့်ကို ကောင်းမွန်လှ၏။ သည့်အပြင် ယခုအချိန်၌ အခြားသော ဖျော်ဖြေရေးလှုပ်ရှားမှုတွေ၊ မိုဘိုင်းလ်ဖုန်းတွေ၊ ကွန်ပျူတာတွေ မရှိသေးသည့်အတွက် ချင်းရို့လည်း လက်ဖက်ရည်သောက်၍ ဝတ္ထုဖတ်နေရပါတော့သည်။

ချင်းရို့က ကောက်ရိုးထီးအောက်မှာ ထိုင်ကာ ရုရှားဝတ္ထုတွေဖတ်နေစဥ် လုယန် ပြန်လာတဲ့အခါ သူသည်လည်း သူမနှင့်အတူတူ လာဖတ်မည်ဖြစ်သလို သူတို့နှစ်ယောက်ဟာ ဇာတ်ကြောင်းအကြောင်းကို အတူတူ ဆွေးနွေးကြမည်ပင်။

ထိုအချိန်တွင် လုယန်၏ ရုရှားဘာသာစကားမှာ အမှန်တကယ်ကောင်းမွန်ကြောင်း သူမတွေ့ရှိခဲ့ရသည်။ သူက ကျွမ်းကျင်ရုံသာမက ကောင်းကောင်းလည်း ပြောတတ်ပေသည်။ သင်္ဘောပေါ်မှာ တာဝန်ထမ်းဆောင်ခဲ့ဖူးတဲ့ သင်္ဘောပြုပြင်တဲ့ နိုင်ငံခြားသားမာစတာတစ်ဦးထံမှ သင်ယူခဲ့ရကြောင်း သူပြောပြခဲ့သည်။

ဟုတ်တာပေါ့၊ သင်္ဘောပြုပြင်သူတော့ မဟုတ်ပါဘူး။ အင်ဂျင်နီယာတစ်ယောက်ပေါ့။

ချင်းရို့မှာ သူ့အချစ်ကို ဖော်ပြလိမ့်မယ်လို့ တိတ်တဆိတ် မျှော်လင့်ထားခဲ့သော်လည်း အနှီရိုးဖြောင့်လွန်းသူကတော့ ဒီလိုအချစ်ဇာတ်လမ်းမျိုးကို နားလည်ပုံမပေါ်ပါချေ။

သံမဏိလိုနှလုံးသားနဲ့လူပဲ။

ဇာတ်ကြောင်းကို သူနှင့် ဆွေးနွေးသောအခါတွင် သူက ဇာတ်ကြောင်းကိုသာ အမှန်တကယ် လေးလေးနက်နက် ဆွေးနွေးခဲ့သည်။

ချင်းရို့: "…"

ဒီလူက အချစ်အကြောင်းကို ဘယ်လိုပြောရမယ်မှန်းမသိတဲ့ လူမျိုးဖြစ်နိုင်လေရဲ့။

တိုက်ဆိုင်မှုတစ်ခုပါပဲလေ၊ သူမလည်း ဘာမှမတတ်နိုင်ဘူးပေါ့။ မျှော်လင့်ချက်မရှိတော့ပါဘူး။

ချင်းရို့က အမှန်တကယ်ကို ကယ်တင်ချင်ခဲ့သဖြင့် သူမက ရှီရှန်းယီဆီက "Jane Eyre" မိတ္တူကို ငှားရမ်းကာ လုယန်နဲ့ ဆွေးနွေးကြည့်ဖို့ စီစဥ်ထားခဲ့သည်။

(T/N: Jane Eyreဆိုတဲ့စာအုပ်က English စာရေးသူ Charlotte Bronte ရေးသားခဲ့ပြီးတော့ ၁၈၄၇ခုနှစ်မှာ ထုတ်ဝေခဲ့တာပါ။ ဇာတ်လမ်းရဲ့ main pointကတော့ "morality"လို့ ဆိုထားပါတယ်။ စာအုပ်ကတော့ မိန်းကလေးJaneအကြောင်း သူ့ရဲ့ ဘဝအကြောင်း ရေးသားထားတာပါ။ ရုပ်ရှင်လည်းရှိပါတယ်နော်။

စာအုပ်ကတော့ ကျွန်မလည်း မဖတ်ဖူးပါဘူးနော်။ g o o gleမှာ ရှာကြည့်လို့ရတယ်နော်)

ထို့အပြင် ချင်းရို့မှာလည်း လုယန်ကို ပြောပြချင်နေတာကြာပြီဖြစ်တဲ့ စကားတစ်ခွန်းရှိနေခဲ့၏။

သူမပြောချင်တာက - အရင်တုန်းက ကျွန်မပြောခဲ့တဲ့ အတူတူနေထိုင်ရုံပဲ(Living together)ဆိုတဲ့စကားကို ပြန်ရုပ်သိမ်းချင်တယ်။

"လုယန် ဒီမှာကြည့်လိုက်၊ ဒီစာအုပ်ထဲက မင်းသမီးက ပေါင်းသင်းဆက်ဆံရေး သိပ်ကောင်းတာပဲနော်၊ ကြည့်ပါဦး ကျွန်မဆို သိပ်မကောင်းဘူးလေ..."

လုယန်က သူမကို ပြုံးပြုံးလေး ကြည့်လျက် "ဘယ်သူပြောတာလဲကွာ? မင်းက အရမ်းကောင်းတာ သိသာနေတာပဲကို"

"ကျွန်မက ဆက်ဆံရေး အရမ်းကောင်းတယ်? ကျွန်မဆိုလိုတာက အချစ်အကြောင်းပြောဖို့ဆို သိပ်မတော်ဘူးလေ"

"မင်းက အရမ်းတော်ပါတယ်ကွာ။ မင်းက ကိုယ်နဲ့ အတူတူနေချင်တယ်လို့ ပြောခဲ့တယ်လေ။ အဲဒါက အလှပဆုံး အချစ်ဇာတ်လမ်းပဲ မဟုတ်ဘူးလား"

ချင်းရို့: "…"

ဒါကို ဖြေတောင်မဖြေနိုင်တော့ဘူးဟေ့။

Thanks for reading!

Prev Next