အပိုင်း၃၂၀

🍵Chapter 320

ရှစ်ရှင်း‌ရွေ့သည် မုန့်ဖိုးနှင့် အ၀တ်အစားအသစ်ရသောကြောင့် သူမ၏ ယားယံသောဦးရေပြားအကြောင်း မေ့သွားခဲ့သည်။

 ချန်ရှို့ယွင်မှာ မောပန်းကာ ဒေါသဖြစ်နေပြီး လုပ်စရာများစွာရှိသဖြင့် ရှစ်ရှင်းရွေ့က စကားပြောသည့်အခါ ဦးရေပြားကို အဆက်မပြတ် ကုတ်နေသည်ကို သတိမထားမိပေ။

ထို့ကြောင့် ရလဒ်အနေဖြင့် ရှစ်ရှင်းရွေ့၏ ဦးခေါင်းမှ သန်းပြဿနာကို လျစ်လျူရှုမိသွားလေသည်။

သူတို့နှစ်ဦးသည် အထည်ရောင်းသည့် စီးပွားရေးလုပ်ငန်းထဲသို့ မဝင်မီ တစ်ရက်သာလျှင်  အနားယူခဲ့သည်။ ဆီ‌ပေခံအထည်စကြီးတစ်ခုကို ယူကာ ဈေးဘေးရှိ လမ်းဘေးတွင် ဖြန့်ခင်းလိုက်ပြီး အဝတ်အစားများကို ခင်းကျင်းသည်။

နိုင်ငံ၏ ပထမဆုံး အထူးစီးပွားရေးဇုန်အဖြစ် ရှန်းကျန့်မြို့သည် ၎င်း၏ ပထဝီဝင် အားသာချက်များနှင့်အတူ အရှိန်အဟုန်ဖြင့် ဖွံ့ဖြိုးတိုးတက်ခဲ့သည်။ ရှန်းကျန့်မြို့မှ ချန်ရှို့ယွင်နှင့် ရှစ်ရှိးနန်တို့  ပြန်သယ်ခဲ့ကြသောအ၀တ်အစားများသည် ခေတ်ဆန်လွန်းသဖြင့် ပေကျင်းတွင် မည်သူမျှ မမြင်ဖူးကြပေ။

ထို့ကြောင့် ခင်းကျင်းပြီးသည်နှင့် လူများစွာသည် ဈေးမေးရန် လျင်မြန်စွာ ဝိုင်းအုံလာကြသည်။

" ဒီအပေါ်၀တ်က တစ်ထည်ကို ရှစ်ယွမ်နဲ့ စကတ်က ဆယ့်ငါးယွမ် "

" ဘာလို့ ဒီလောက်ဈေးကြီးရတာလဲ "

"အစ်မ၊ ကျွန်မ အဝတ်တွေကို ကြည့် ကြည့်ပါ။ အရောင်တွေ အရမ်းတောက်ပပြီး စတိုင်ကလည်း ထူးခြားတယ်။ ပေကျင်းတစ်မြို့လုံးမှာ ဒီအထည်တွေကို ရောင်းချတဲ့ နောက်တစ်ဆိုင် ရှာတွေ့မှာမဟုတ်ဘူးနော်။ ပြီးတော့ ကျွန်မက  အထည်လက်မှတ်ခွဲတမ်းတွေကိုတောင် မတောင်းဘူး "

ဈေးမေးသည့် အမျိုးသမီးသည် အထည်လက်မှတ်များ ပေးစရာမလိုကြောင်းကြားသောအခါ ပို၍ပင် စိတ်၀င်စားလာသည်။ ပို၍ အရေးကြီးသည်မှာ အ၀တ်အစားများသည်  အနက်ရောင် သို့မဟုတ် မီးခိုးရောင်ရှိသော ကုန်တိုက်ရှိအ၀တ်အထည်များနှင့် မတူဘဲ အမှန်တကယ် အလွန်လှပသည်။ တခါတရံတွင်  တောက်ပြောင်သော အရောင်အသွေး အနည်းငယ်ရှိသည့် ၀တ်စုံများရှိသော်လည်း ခင်းကျင်းမပြသမီ ရောင်းကုန်သွားကြသည်။

သူမ တုံ့ဆိုင်းနေချိန်မှာပဲ ခေတ်မီသည့် အဝတ်အစားများကို ၀တ်ထားသည့် အမျိုးသမီးတစ်ယောက် လမ်းလျှောက်လာပြီး စကတ်နှစ်ထည်ကို ကောက်ယူလိုက်သည်။ " ဒီစကတ်နှစ်ထည်က ဘယ်လောက်လဲ "

ချန်ရှို့ယွင်က ချက်ချင်းပြုံးပြီးပြောသည်။ " အနီရောင်က ဆယ့်ငါးယွမ်၊ အပြာရောင်က ဆယ့်ရှစ်ယွမ် ""

အမျိုးသမီးသည် စကတ်နှစ်ထည်ကို  သူမ၏ ခန္ဓာကိုယ်ပေါ် ကပ်ကြည့်လိုက်ပြီး အလွန်ကျေနပ်ပုံရလေသည်။

ချန်ရှို့ယွင်က " ဒီမိန်းကလေးက ခန္ဓာကိုယ်အချိုးအစားအရမ်းလှတယ်။ ဒီစကတ်နှစ်ထည်ကို ဝတ်လိုက်တဲ့အခါ ကမ္ဘာမြေပေါ်ကို ဆင်းသက်လာတဲ့ နတ်သမီးတစ်ယောက်လို  လူတွေကို အကြည့်မလွှဲနိုင်အောင် ဖြစ်စေတယ် "

လူတိုင်းက စကားလုံးလှလှလေးများ ကြားရသည်ကို နှစ်သက်ကြသည်။

ထိုအမျိုးသမီးက ၀မ်းသာပီတိဖြစ်သွားပြီး စကတ်နှစ်ထည်အတွက် ကျသင့်ငွေကို လှမ်းပေးသည်။ " ဒီနှစ်ထည်ကို ကျွန်မယူမယ်။  ရှင် ဒီနေရာမှာ ဘယ်အချိန်ထိရှိမှာလဲ။ နောက်မှ ထပ်ဝယ်ဖို့ ကျွန်မ ညီမတွေနဲ့ လုပ်ဖော်ကိုင်ဖက်တွေကို ခေါ်လာမယ် "

ချန်ရှို့ယွင်၏အပြုံးမှာ နက်ရှိုင်းလာသည်။ " မမှောင်ခင်အချိန်ထိ ရှိနေမှာပါ။ ဒါပေမဲ့ ဒီတစ်ခါ ကျွန်မတို့ အထည်အများကြီး ယူမလာခဲ့ဘူး။ ရှင် လိုချင်ရင် မြန်မြန်လာခဲ့မှဖြစ်မယ်။ ဒါတွေက ရက်အနည်းငယ်အတွင်း ရောင်းကုန်သွားလိမ့်မယ် "

ထိုစကားကို ကြားပြီးသည့်နောက် ပထမအမျိုးသမီးသည် တုံ့ဆိုင်းမနေတော့ဘဲ စကတ်နှစ်ထည်ကို အမြန်ဝယ်ယူလိုက်လေသည်။

အ၀တ်အထည်လေးခု တစ်ပြိုင်နက်ရောင်းထွက်သွားခဲ့ပြီး အမျိုးသမီးနှစ်ဦး ထွက်သွားသောအခါ လင်မယားနှစ်ယောက်သည် ပါးစပ်မပိတ်နိုင်လောက်အောင် ဝမ်းသာသွားကြသည်။

ရှစ်ရှိုးနန်က ပိုက်ဆံရေတွက်ရင်း သူမကို ကြည့်လိုက်သည်။ " မဆိုးဘူး။ မင်းက စီးပွားရေးမှာတော်မယ်လို့ မထင်ထားဘူး "

ချန်ရှို့ယွင်က ရေတစ်ငုံသောက်လိုက်ပြီး " ဒါက ဘဝရဲ့ဖိအားတွေကြောင့်ပါပဲ "

ယခင်အချိန်သာဖြစ်လျှင် သူမ၏ မာနကိုနှိမ့်ချ၍ ပြုံးရွှင်ကာ တစ်ပါးသူအား ချီးကျူးရန် မဆိုနှင့် လမ်းပေါ်၌ အ၀တ်အစားများကို ဘယ်သောအခါမှ ရောင်းချမည်မဟုတ်ပေ။ သို့သော် ဤတစ်ကြိမ် သူမ ရှန်းကျန့်သို့ သွားခဲ့သည့်အခါတွင် သူမ သက်ရောက်မှု ကြီးကြီးမားမား ခံစားခဲ့လိုက်ရသည်။

သူမ၏အချစ်ဆုံးသူငယ်ချင်းက စီးပွားရေးလုပ်ငန်း၌ နေ့စဥ် ငွေအမြောက်အများရှာဖွေနေနိုင်သည်ကို တွေ့ခဲ့ရပြီး ရှန်းကျန့်တစ်ခုလုံးသည် တက်ကြွမှုဖြင့် ပြည့်နှက်‌နေသည်။ ယောက်ျားလေးသာမက မိန်းကလေးများသည်ပင် အလုပ်ကြိုးစားကြသည်။ သူမက တခြားသူများ၏ စီးပွားရေးလုပ်ပုံကို ဂရုတစိုက်  မှတ်သားခဲ့ပြီး စိတ်ထဲမှာပင် အတုယူကာ ပြောဆိုခဲ့သည်။

အခြားသူများလုပ်နိုင်လျှင် ချန်ရှို့ယွင်ဟူသည့် သူမလည်း လုပ်နိုင်မည်က သေချာသည်။

ရှစ်ရှိုးနန်က သူမကို ထပ်ချီးကျူးလိုသော်လည်း မကြာခင်မှာပင် တစ်စုံတစ်ယောက်က အဝတ်အစာများ ဝယ်ယူရန် ရောက်ရှိလာသည်။

ချန်ရှို့ယွင် ပြောခဲ့သည့်အတိုင်း အထည်များသည် နှစ်ရက်သုံးရက်အတွင်း ရောင်းကုန်သွားခဲ့သည်။ ဤအကြိမ်သည် သူမတို့၏ ပထမဆုံးအကြိမ်အ၀တ်အစားများရောင်းချခြင်းဖြစ်ပြီး အလွန်အကျွံ လက်ကား မယူခဲ့ဝံ့‌ချေ။ ထို့ကြောင့် ရောင်းကုန်ပြီးနောက် ရှန်းကျန့်သို့ လက်ကားယူရန် တစ်ဖန် ပြန်သွားရသည်။

ဤတစ်ကြိမ်တွင် အဝတ်အစားများ ထပ်မံရောင်းချရန် စီစဉ်ခဲ့ကြသောကြောင့်  အန်တီလင်းအား ထပ်မံ အကူအညီတောင်းရန်မှတပါး ရွေးချယ်စရာမရှိပေ။

အန်တီလင်းသည် မူလက ငြင်းဆိုလို‌သော်လည်း ချန်ရှို့ယွင်က ရှစ်ရှင်းရွေ့ကို ထိန်းကျောင်းသည့် စရိတ်အဖြစ် ပြီးခဲ့သည့်အကြိမ်ကထက် ဆယ်ယွမ် ပိုပေးလိုက်သည်။ သူမသည် ဆယ်ယွမ်ကို ကြည့်လိုက်ပြီး မငြင်းဆိုနိုင်တော့ချေ။

🍵

ချန်ရှို့ယွင်၏လုပ်ငန်းသည် အရှိန်အဟုန်နှင့် တိုးတက်နေသလို ထုံရွှယ်လူ၏ လုပ်ငန်းသည်လည်း အရှိန်အဟုန်ဖြင့် တိုးမြင့်လာခဲ့သည်။

မင်္ဂလာရှိသည့်နေ့တစ်‌နေ့ကို ရွေးချယ်ကာ သူမ၏ " လူဝေ့ကျိုက်"ကို ဖွင့်လှစ်သည်။

မဖွင့်လှစ်မီတွင် သူမသည် လူမှုဆက်ဆံရေးကောင်းမွန်သောကြောင့် ကျောင်းရှိ သူမ၏အတန်းဖော်ဟောင်းများကို ဤအကြောင်းပြောပြခဲ့သည်။ ထို့အပြင် လူတိုင်းသည် သူမ၏ ဟိုတယ်မန်နေဂျာအဖြစ် ယခင် အလုပ်အ‌တွေ့အကြုံများအကြောင်း ကြားခဲ့ဖူးကြသောကြောင့် သူမ၏ ဟင်းလျာများကို မမြည်းစမ်းဖူးသည့် သူများက မြည်းစမ်းကြည့်လိုနေကြသည်။

ထို့ကြောင့် ဖွင့်ပွဲနေ့တွင် လူတော်တော်များများ လာရောက်အားပေးကြလေသည်။

ဂယက်ရိုက်စေရန်အတွက် ထုံရွှယ်လူ သည် သုံးရက်ကြာ ပရိုမိုရှင်းတစ်ခု ပြုလုပ်ပေးပြီး ငါးယွမ်မှစတင်၍ ၀ယ်ယူစားသုံးခြင်းများအတွက် ဆယ်ရာခိုင်နှုန်း လျော့ဈေးပေးလေသည်။

ယနေ့ခေတ်တွင် ကုန်တိုက်စတိုးဆိုင်များ၌ ဈေး၀ယ်ခြင်းဖြစ်စေ သို့မဟုတ် နိုင်ငံပိုင်စားသောက်ဆိုင်များ၌ စားသုံးခြင်းဖြစ်‌စေ ကုန်ပစ္စည်းများမရရှိနိုင်သည့်အခြေအနေမှလွဲ၍ လျှော့ဈေးပေးသည်ကို တစ်ခါမျှ မကြားခဲ့ဖူးကြချေ။

လူတိုင်းက လျှော့စျေးရှိသည်ကို ကြားလိုက်ရသည့်အခါ အလွန်ဆန်းသစ်ပြီး မ၀ယ်ယူလျှင် ဆုံးရှုံးမှုဖြစ်သည်ဟု ထင်မြင်ကြသည်။ ထို့ကြောင့် လူတိုင်းက အနည်းငယ်ဝယ်ယူရန် လာရောက်ကြပြီး သူတို့ တစ်ဦးယောက်ယောက်တည်း အကုန်မစားနိုင်သည်ကို သဘောပေါက်သွားကြသည့်အခါ အတန်းဖော်တော်တော်များများက အတူတူ ငွေပေးချေကာ စားသုံးကြသည်။

'လူဝေ့ကျိုက်' တွင် မာလာထန်း ရောင်းချခြင်းအပြင်  မည်ဟူမျှ မြည်းစမ်းဖူးခြင်းမရှိသေးသော ကြက်ခြေထောက်နှပ်များ၊ ကြက်တောင်ပံနှပ်များ၊ ဘဲသားနှပ်များနှင့် ကြက်လည်ချောင်းနှပ်ဟင်းများကဲ့သို့  အစားအစာမျိုးစုံကိုလည်း ရောင်းချသည်။

အရသာများက ထူးကဲပြီး မွှေးပျံ့ကာ ဝါး၍ကောင်းသည့် အနေအထားရှိ‌ပေသည်။ ထို့‌အပြင်  စားသုံးသူများသည် ဟင်းပွဲအားလုံးအား အနည်းငယ်မျှစီ ဝယ်ယူခွင့်ရှိသောကြောင့် လူတိုင်းမှာတတ်နိုင်သမျှ ဟင်းလျာအားလုံးကို မြည်းစမ်းကြည့်နိုင်‌လေသည်။

ထုံရွှယ်လူ၏ ဟင်းချက်ကျွမ်းကျင်မှုမှာ  မငြင်းဆိုနိုင်ပေ။ သူမသည် တုန်းဖန်းဟိုတယ်ကို တစ်လခွဲမပြည့်ခင်အတွင်း ပြန်လည်ရှင်သန်စေခဲ့ပြီး သူမ၏ အချက်အပြုတ်လက်ရာကို လူတိုင်းက အသိအမှတ်ပြုခဲ့သည်မှာ ကြာခဲ့လေပြီ။

မြည်းစမ်းကြည့်ရန် ရောက်ရှိလာသည့်ကျောင်းသားများသည် အဆုံးမရှိ ချီးမွမ်းစကားဆိုခဲ့ကြပြီး စကားများမှာ နှုတ်ဖျားမှ အလျင်အမြန် ပျံ့နှံ့သွားလေသည်။

အနီးနားရှိလူများသည် ဤနေရာ၌ ဆိုင်ဖွင့်သည်ကို သိသောအခါ ညစာအတွက် ဟင်းလျာအချို့ လာရောက်၀ယ်ယူကြသည်။

အချုပ်အားဖြင့်ဆိုရသော် လုပ်ငန်းသည် အောင်မြင်လေသည်။

စားသောက်ဆိုင်သည် စဖွင့်လှစ်ခြင်းဖြစ်သောကြောင့် ထုံရွှယ်လူ သည် လွန်ခဲ့သောသုံးရက်အတွင်း လူကိုယ်တိုင်လာရောက်ကူညီပြီး မောင်နှမနှစ်ယောက်ဖြစ်သည့် ကောင်းချွန်းယွီနှင့် ကောင်းဝေ့ဖျင်တို့ကိုပါ အတူခေါ်ဆောင်လာသည်။

ကောင်းချွန်းယွီသည် ဉာဏ်ကောင်းသူဖြစ်ပြီး အချိန်တိုအတွင်း အရာများစွာကို သင်ယူနိုင်သည်။ ထို့အပြင် သူမသည် တက်ကြွကာ စိတ်အားထက်သန်သည့် ကိုယ်ရည်ကိုယ်သွေးရှိပြီး အရောင်းသမားတစ်ဦးဖြစ်ရန် အလွန်သင့်လျော်သည်။

ကောင်းဝေ့ဖျင်သည်  အတော်လေး  တစ်သီးတစ်သန့်ဆန်သူဖြစ်ပြီး ဉာဏ်မထက်သော်လည်း စိတ်ဓာတ်ကောင်းရှိပြီး အခက်အခဲများကို ကြံ့ကြံ့ခံကာ အလုပ်ကို ကြိုးကြိုးစားစားလုပ်တတ်ပြီး လမ်းညွှန်မှုများကို နာခံတတ်သူဖြစ်သည်။ ထုံရွှယ်လူက သူ့အား  အလွန်စိတ်တိုင်းကျ‌လေသည်။

ပထမနေ့ ဆိုင်ပိတ်ပြီး အရောင်းစာရင်းအား ရေတွက်သည့်အခါ ရောင်းချရမှုပမာဏမှာ ယွမ်လေးရာ ကျော်လွန်နေသဖြင့် သူတို့ အံ့ဩကြလေသည်။

ကောင်းချွန်းယွီမှာ အံ့သြလွန်း၍ ပါးစပ် ကျယ်ကျယ်ဖွင့်ဟလျက် " ဝေါင်း၊ ဟင်းလျာတိုင်းက ယွမ်နည်းနည်းပဲ ကုန်ကျတာကို ထည့်စဉ်းစားမယ်ဆိုရင် ရောင်းရငွေက ဒီလောက်ထိများလိမ့်မယ်လို့ မမျှော်လင့်ထားဘူး"

တုန်းဖန်းဟိုတယ်၏ ပျမ်းမျှ တစ်နေ့တာ ရောင်းရငွေသည် ဤမျှခန့် မများသည်ကို သိထားရမည်။

ထုံရွှယ်လူက ပြုံးလိုက်သည်။ " ရှင်တို့ စိတ်ပိုင်းဆိုင်ရာ ပြင်ဆင်ထားရမယ်။ ပထမသုံးရက်ပြီးရင် ဒီလောက်ထိရှိတော့မှာ မဟုတ်ဘူး "

ကောင်းချွန်းယွီသည် ခေတ္တမျှ စဉ်းစားပြီး နားလည်သည်ဟု ခေါင်းညိတ်ပြသည်။

ပထမ သုံးရက်အတွင်း လူအများသည် စူးစမ်းချင်စိတ်များ‌ကြောင့် သို့မဟုတ် ထုံရွှယ်လူကို အားပေးရန် လာရောက်ခဲ့ကြသည်။ ထို့အပြင် လျှော့စျေးများလည်းရှိနေသောကြောင့် စားသုံးသူအများအပြားကို ဆွဲ‌ဆောင်နိုင်ခဲ့သည်။ သို့သော်ငြား လျှော့စျေးကာလပြီးဆုံးသွားလျှင် စားသုံးသူပမာဏသည် ကျဆင်းသွားမည်ဖြစ်သည်။ ထို့အပြင် ယခုခေတ်တွင် လူများက မချမ်းသာကြသည့်အတွက် နေ့စဥ်‌နေ့တိုင်း အပြင်ထွက် စားသောက်ရန်မှာ မဖြစ်နိုင်ချေ။

ထုံရွှယ်လူက ပြုံး၍ ပြောသည်။ " ဒါပေမဲ့ ဒါက ယာယီပါပဲ။ အခု နိုင်ငံက စီးပွားရေး ဖွံ့ဖြိုးတိုးတက်ဖို့ကို အာရုံစိုက်နေတော့ လူတွေရဲ့ လူနေမှုအဆင့်အတန်းက ပိုကောင်းလာပြီး ပစ္စည်းတွေဝယ်ဖို့ တတ်နိုင်သူတွေ  များပြားလာလိမ့်မယ် " 

ကောင်းချွန်းယွီက ခေါင်းညိတ်ကာ သဘောတူသည်။ 

" မန်နေဂျာထုံပြောတာ ဟုတ်တယ်။ လက်တွေ့မှာလည်းလွန်ခဲ့တဲ့ နှစ်နှစ်လောက်ကနဲ့ လူတိုင်းရဲ့ဘဝတွေက မတူတော့ဘူး " 

အတိတ်ကာလ၌ဆိုလျှင် မည်သူမှ ဤကဲ့သို့ ပေါ်ပေါ်ထင်ထင် မရောင်း၀ံ့ခဲ့ကြ‌ သော်လည်း ယခုမူ လမ်းများပေါ်မှာ ရောင်းချ‌နေသူများကို အခါအားလျော်စွာ မြင်နိုင်ပေသည်။ 

ထုံရွှယ်လူက ၎င်းတို့ကို အားပေးလိုက်သည်။ " ရှင်တို့တွေ ကောင်းကောင်းလုပ်နိုင်ခဲ့ကြပါတယ်။ ဒီတစ်ဆိုင်လည်ပတ်နိုင်သွားတဲ့အခါ ဒုတိယနဲ့ တတိယဆိုင် ထပ်ပြီးဖွင့်မယ်။ ပြီးရင် ရှင့်ကို မန်နေဂျာရာထူးတိုးပေးပြီး တခြားသူ‌တွေကို သင်ကြားပေးစေမယ် " 

မောင်နှမများဖြစ်ကြသော ကောင်းချွန်းယွီနှင့် ကောင်းဝေ့ဖျင်တို့ အံ့အားသင့်သွားကြသည်။

ကောင်းချွန်းယွီ၏မျက်နှာက ချက်ချင်းဆိုသလို လင်းထိန်သွားသည်။ " ကျေးဇူးတင်ပါတယ် မန်နေဂျာထုံ၊ ကျွန်မတို့  သေချာပေါက် အလုပ်ကြိုးစားပါ့မယ် "

ကောင်းဝေ့ဖျင်က ယုံကြည်မှုချို့တဲ့စွာဖြင့်  " မန်နေဂျာဖြစ်လာမယ်။ ကျွန်တော် မလုပ်နိုင်မှာ စိုး...."

သို့သော် စကားမဆုံးခင်မှာပင် ကောင်းချွန်းယွီက သူ့ကို အပြင်းအထန်ရိုက်လိုက်ပြီး  ပါးစပ်ပိတ်ရန် အရိပ်အမြွက်ပြလိုက်သည်။

အခြားသူများ တစ်သက်မှာ တစ်ခါပင် မမျှော်လင့်နိုင်သည့် ဤကဲ့သို့အခွင့်အရေးမျိုးကို သူက လိုလိုလားလား လက်လွှတ်လိုနေပေသည်။ ဤမျှလောက် မိုက်မဲသည့်လူကို တစ်ခါမှမတွေ့ဖူးဘူး။

ဆိုင်မဖွင့်ခင်တွင် ထုံရွှယ်လူက ယခုလိုပြောလာမည်ဆိုလျှင် သူမ ယုံကြည်မည် မဟုတ်။ သို့သော် ပြီးခဲ့သည့်ရက်အနည်းငယ်အတွင်း အရောင်းအ၀ယ်ကို ကြည့်လျှင် သူမ မယုံကြည်ဘဲ မနေနိုင်ချေ။

စားသောက်ဆိုင်၏ အလှဆင်ခြင်းမှာ ပြီးပြည့်စုံခြင်းမရှိသေး။ ထို့အပြင် ပုဂ္ဂလိကစက်မှုလုပ်ငန်းနှင့် အသေးစားစီးပွားရေးလုပ်ငန်းများအတွက် လုပ်ငန်းလိုင်စင်လည်း မရရှိ‌သေးပေ။ တန့်ဟုန်၏ နှုတ်ထွက်မှုသည်လည်း တစ်လခန့် အချိန်ယူရမည်ဖြစ်သောကြောင့် ဆိုင်ဖွင့်ချိန်မှာ နှောင့်နှေးနေရသည်။

ထို့အပြင် စားသောက်ဆိုင်မဖွင့်လှစ်နိုင်သေးသောကြောင့် ထုံရွှယ်လူက သူမ အလုပ်ခန့်အပ်ခဲ့သည့် အခြားငါးဦးကို ကောင်းချွန်းယွီ၏ စီမံခန့်ခွဲမှုအောက်တွင် ဆိုင်သို့ အလှည့်ကျသွား‌စေပြီး ကူညီကာ သင်ယူစေသည်။

ထို့အပြင် သူမသည် စားဖိုမှူးတစ်ဦး သို့မဟုတ် နှစ်ယောက် ရှာဖွေရန် တန့်ဟုန်အား အကူအညီတောင်းထားခဲ့သည်။ အဘယ့်ကြောင့်ဆိုသော် စားသောက်ဆိုင်ဖွင့်ပြီးနောက်တွင် သူမ တစ်ဦးတည်းသာ စားဖိုမှူးအဖြစ်ရှိ‌နေခြင်းက မလောက်ငှပေ။

ထုံရွှယ်လူ မျှော်မှန်းထားသည့်အတိုင်း သုံးရက်ကြာပြီးသည့်နောက်တွင် " လူဝေ့ကျိုက် " ၏ စီးပွားရေးသည် ထိုသုံးရက်ကဲ့သို့မဟုတ်သော်လည်း အဆင်ပြေပြေလည်ပတ်နေသည်။

ချန်ချိုက်ရှင်းသည် "လူဝေ့ကျိုက်"ထံမှ မည်သည်ကိုမှ မ၀ယ်ယူသော်လည်း ထုံရွှယ်လူ၏ လှုပ်ရှားမှုတိုင်းကို အမြဲတမ်း အာရုံစိုက်နေသည်။

" လူဝေ့ကျိုက် " အမှန်တကယ် အောင်မြင်သည်ကို မြင်သည့်အခါ ချန်ချိုက်ရှင်းသည် အလွန်မပျော်မရွှင်ဖြစ်သွားသည်။ " တချို့လူတွေက ရွှံ့တွေလိုပဲ နံရံမှာ မြံမြဲမနေနိုင်ကြဘူး။ သင့်တင့်လျောက်ပတ်တဲ့ အလုပ်မှာ ကောင်းကောင်း၀င်မလုပ်ကြဘဲ စီးပွားရေးနယ်ပယ်ထဲ ၀င်ချင်ကြတယ်။ အနာဂတ်မှာ သေချာပေါက် နောင်တရလိမ့်မယ် "

အခန်းဖော်များက သူမ၏ စကားကို ကြားသည့်အခါ ပြန်မဖြေဘဲ တစ်ယောက်ကိုတစ်ယောက် ကြည့်လိုက်ကြသည်။

ချန်ချိုက်ရှင်းသည် နိုင်ငံခြားရေး၀န်ကြီးဌာနတွင် အလုပ်သင်ဖြစ်ခွင့် ဆုံးရှုံးသွားခဲ့ကတည်းက ထုံရွှယ်လူအား  ပို၍ပင်မုန်းတီးလာခဲ့သည်။ သို့သော် သူမမိသားစုက သူမကို သတိပေးထားကြသောကြောင့် ထုံရွှယ်လူကို ထပ်မံပစ်မှတ်မထား၀ံ့ပေ။

" လူဝေ့ကျိုက် " မဖွင့်လှစ်ခင်တွင် သူမက ဆိုင်ပိတ်သွားရရန် စိတ်ထဲ၌ နေ့စဉ် ကျိန်ဆဲနေခဲ့သည်။ ထိုမှသာ အချိန်ကျလာသည့်အခါ တစ်ကျောင်းလုံး၏  ရှေ့၌ ထုံရွှယ်လူကို  ပျက်ရယ်ပြုနိုင်မည်ဖြစ်သည်။ သို့သော်ငြား မမျှော်လင့်စွာ လူဝေ့ကျိုက်က အောင်မြင်သွားခဲ့သဖြင့် သူမ မျက်နှာကို ဖြတ်ရိုက်ခံရသလို ခံစားရသည်။

ထိုအကြောင်းကို သူမ ပိုတွေးလေလေ၊ မလိုမလားဖြစ်လေလေပင်။

ချန်ချိုက်ရှင်း၏  မကျေမချမ်းဖြစ်မှုများကို ထုံရွှယ်လူက မသိ‌ချေ။ သူမသည် အမေရိကန်တွင်ရှိသော ရှဲ့ကွမ်းခွန်ထံ စာတစ်စောင်ရေးသားပြီး သူမအတွက် လျှပ်စစ်မီးဖိုတစ်ခု ဝယ်ယူပေးရန် ဖြစ်နိုင်သည်၊မဖြစ်နိုင်သည်ကို မေးမြန်းသည်။

ကမ္ဘာ့ပထမဆုံး လျှပ်စစ်မီးဖိုကို ၁၉၅၇ ခုနှစ်တွင် ဂျာမနီ၌ စတင်ထုတ်လုပ်ခဲ့ပြီး ၁၉၇၂  ခုနှစ်တွင် အမေရိကန်ပြည်ထောင်စု၌  စတင်ထုတ်လုပ်ခဲ့သည်။ ယခု ၁၉၈၀ ခုနှစ်များအစောပိုင်းတွင် လျှပ်စစ်မီးဖိုသည် ဥရောပ၊ အမေရိကန်ပြည်ထောင်စုနှင့် ဂျပန်နိုင်ငံတို့တွင် အလွန်ရေပန်းစားနေသည်။

သို့သော် တရုတ်နိုင်ငံ၌ လျှပ်စစ်မီးဖိုများကို မရရှိနိုင်သေးချေ။

နောက်ပိုင်းတွင် သူမသည် မာလာထန်းအတွက် လျှပ်စစ်မီးဖိုကို အသုံးပြုလိုပြီး အဆင်ပြေဆုံးနှင့် ဘေးကင်းအလုံခြုံစုံရွေးချယ်မှုဖြစ်သည်။ ကျောက်မီးသွေး သို့မဟုတ် အရက်အသုံးပြုခြင်းတွင် အထူးသဖြင့်  ကျောက်မီးသွေးမှာအဆိပ်သင့်လွယ်ပေသည်။

စာရေးပြီးသည့်အခါ နိုင်ငံခြားရေး၀န်ကြီးဌာနမှ ဝန်ထမ်းများဆီသို့ ပို့ဆောင်လိုက်သည်။

ယခုအချိန်တွင် ပြည်တွင်းပြည်ပ ဆက်သွယ်ရေး လမ်းကြောင်းများမှာ တင်းကြပ်မှုများရှိနေဆဲဖြစ်ပြီး ပြည်ပသို့ ပို့ဆောင်သည့် စာလွှာများသည် မပို့မီ စစ်ဆေးရေးဂိတ်အဆင့်များစွာ ဖြတ်သန်းရန် လိုအပ်သည်။

လျှပ်စစ်မီးဖိုကို ပြန်ပို့ပေးရန်မှာ  မလွယ်ကူချေ။ ထို့‌‌ကြောင့် ထုံရွှယ်လူက တခြားနည်းလမ်းမရှိလျှင်  ညွှန်ကြားချက်စာအုပ်ကို သူမအတွက်  ကြိုးစားယူလာပေးရန် စာထဲ၌ တောင်းဆိုရေးထားခဲ့သည်။

၀မ်ရူကွေ့၌ လမ်းညွှန်ချက်စာအုပ်ကို ကြည့်ရှုကာ ထုတ်လုပ်ပေးနိုင်မည့် သူငယ်ချင်းများ ရှိ၊မရှိကို သူမ သိချင်သည်။ ထိုသို့ဆိုလျှင် သူမတို့သည် ပြည်တွင်း၌ လျှပ်စစ်မီးဖိုး ပထမဆုံးထုတ်လုပ်သူများဖြစ်လာပြီး ထိုအရာက အခြား၀င်ငွေရလမ်းကြောင်းတစ်ခုဖြစ်လာပေမည်။

ရှဲ့ကွမ်းခွန်ထံမှ ပြန်စာမရမီ ကျန်းပိုင်ဟွေ့၏ မင်္ဂလာဆောင်နေ့သို့ ရောက်ရှိလာသည်။

သဘောတူထားသည့်အတိုင်း ကျန်းပိုင်ဟွေ့ တွင် အလှပြင်ပစ္စည်းများတစ်ခုမှမရှိသောကြောင့် ထုံရွှယ်လူက သူမအတွက် မိတ်ကပ်လိမ်းပေးရန် သွားခဲ့ပြီး ပစ္စည်းတစ်စုံစာကိုလည်း လက်ဖွဲ့အဖြစ် ယူလာသည်။

ကျန်းပိုင်ဟွေ့သည် အလှပြင်ပစ္စည်းများကို လက်ခံရရှိသည့်အခါ ဝမ်းသာအားရဖြင့် ထုံရွှယ်လူကို တင်းတင်းကြပ်ကြပ် ပွေ့ဖက်သည်။ " ရွှယ်လူ ၊ ငါ အရမ်းပျော်တာပဲ ။ ကျေးဇူးအရမ်းတင်ပါတယ်၊ ဒီလက်ဆောင်ကို  အရမ်းကြိုက်တယ် "

ထုံရွှယ်လူက ပြုံးလိုက်ပြီး " နင်ကြိုက်လို့ ၀မ်းသာပါတယ်။ မြန်မြန်ထိုင်။ သတို့သားက နင့်ကို ခေါ်ဖို့ မကြာခင် ရောက်လာတော့မှာဆိုတော့ ငါ မြန်မြန် နင့်ကို မိတ်ကပ်လိမ်းပေးရမှာ "

ထိုအခါ ကျန်းပိုင်ဟွေ့က မြန်မြန်ထိုင်လိုက်ပြီး " ဟုတ်သား စကားမစပ် ၊ နင့်မှာအချိန်ရှိတဲ့အခါ  ငါ့ကို မိတ်ကပ်လိမ်းနည်း သင်ပေးပါဦး။ နိုင်ငံခြားက အမျိုးသမီးတွေ အလုပ်သွားတဲ့အခါ မိတ်ကပ်လိမ်းကြတယ်လို့ ကြားဖူးတယ် "

ထုံရွှယ်လူ က ခေါင်းညိတ်ပြီး " ရတယ်။ မိတ်ကပ်လိမ်းရတာ မခက်ပါဘူး၊ နည်းနည်းလောက် လေ့ကျင့်ဖို့ပဲ လိုအပ်တယ် "

ကျန်းပိုင်ဟွေ့တွင် မျက်နှာအသားအရေ ကောင်းမွန်ကာ သွင်ပြင်လက္ခဏာများကလည်း ထင်ရှားသည်။ ထုံရွှယ်လူ သည် သူမ၏ မျက်နှာပုံစံနှင့် လိုက်ဖက်သည့် ကျက်သရေရှိကာ အဆင့်အတန်းမြင့်ပြီး ဆွဲဆောင်မှုအနည်းငယ်ပါ၀င်သောအသွင်အပြင်ကို လိမ်းခြယ်ပေးသည်။ 

မိတ်ကပ်လိမ်းခြယ်ပြီးသည့်အခါမှာ ကျန်းပိုင်ဟွေ့ သည် မှန်ထဲ၌ ကြည့်လိုက်ပြီး သူမကိုယ်သူမ မမှတ်မိနိုင်လုနီးပါးဖြစ်လေသည်။ " အိုး ၊ ငါ တကယ် ဒီလောက်တောင်လှတာလား "

ကျန်းပိုင်ဟွေ့၏ ၀မ်းကွဲများသည် ထုံရွှယ်လူ၏  မိတ်ကပ်လိမ်းခြယ်‌ပေးသည့်စွမ်းရည်ကို မျက်မြင်တွေ့ခဲ့ရပြီး  လူတိုင်းက မချီးကျူးဘဲ မနေနိုင်ကာ ထပ်တလဲလဲ ချီးမွန်းကြသည်။

" ရဲဘော်ထုံ ရဲ့ မိတ်ကပ်လိမ်းခြယ်ပုံက အရမ်းမိုက်တာပဲ၊ ကျွန်မဖြင့် နားတောင်  နားမလည်နိုင်ဘူး "

" ငါရောပဲ၊ ဒါပေမယ့် ပိုင်ဟွေ့ ရဲ့ မိတ်ကပ်က တကယ်လှတယ်။ သူမရဲ့ အနာဂတ်ခင်ပွန်း ရောက်လာတဲ့အခါ သူ က သေချာပေါက် ညှို့ယူဖမ်းစားခံရလိုက်လိမ့်မယ် "

တစ်ခန်းလုံး ရယ်မောကြပြီး ကျန်းပိုင်ဟွေ့မှာ ရှက်သွေးဖြာကာ သူမ ဝမ်းကွဲကို စိုက်ကြည့်လိုက်သည်။

များမကြာမီ ကျန်းပိုင်ဟွေ့၏မိခင်ရောက်ရှိလာပြီး သူမက  ကျန်းပိုင်ဟွေ့ဘယ်လောက်လှပသည်ကို မြင်သောအခါ ထပ်ခါတလဲလဲ ချီးမွန်းလေသည်။