အပိုင်း ၉၁ ( Little White Face 19 )

အဘယ့်ကြောင့် လမ်းတစ်လျှောက်လုံးတွင် ဇွန်ဘီများ အနည်းငယ်သာ ရှိကြောင်း ချွီယောင်ဖုန်းသည်လည်း နားမလည်နိုင်ပေ။

သူသည် တက္ကသိုလ်မြို့တော် အခြေစိုက်စခန်းက ဇွန်ဘီများကို ရှင်းလင်းနေကြောင်း သတိပြုမိသော်လည်း ဤကိစ္စကို သူ တစ်ခါမှ မလုပ်ဖူးခဲ့ချေ။

အဆုံး၌မူ ဘာဖြစ်နေမှန်း သူ မသိတော့။ လွန်ခဲ့သော ရက်အနည်းငယ်အတွင်း သူ၏ အခြေစိုက်စခန်း အနားတွင် ဇွန်ဘီများ ပိုနည်းလာသည်။ ယခု တက္ကသိုလ်မြို့တော် အခြေစိုက်စခန်း၏ ပတ်ဝန်းကျင်တွင် ဇွန်ဘီများ ပို၍ပင် နည်းပါးနေသေးသည်။

ဇွန်ဘီတွေ ဘယ်မှာလဲ? သူတို့ ဘယ်သွားကြတာလဲ?

ပျက်စီးယိုယွင်းနေသော မြို့ကြီးကား တိတ်ဆိတ်နေပြီး လူနေရပ်ကွက်များနှင့် နေအိမ်များကို ထိန်းသိမ်းထားခြင်းမရှိဘဲ တိုက်ခိုက်မှုများကြောင့် အနည်းနှင့်အများ ထိခိုက်ထားမှုများ အားလုံး ဟောင်းနွမ်းပြာနှမ်းနေလျက် တွေ့မြင်သူတိုင်းကို တုန်လှုပ်စေ‌သည်။ သို့သော် လူတိုင်းက ဤမြင်ကွင်းမျိုးကို မမုန်းတီးကြပေ။

ဘာလို့လဲဆိုတော့ အနီးအနားမှာ သွားလာနေတဲ့ ဇွန်ဘီတွေ လုံးဝ မရှိလို့ပဲ!

S မြို့ကြီး အခြေစိုက်စခန်းမှ လာသူများမှာ သိသိသာသာပင် အနည်းငယ် ရွှင်မြူးပြီး စိတ်ရှုပ်ထွေးသွားကြသည်။

ချွီယောင်ဖုန်းသည် ဤရက်များအတွင်း S မြို့ကြီး အခြေစိုက်စခန်းမှ ဤလူများ၏ စိတ်နေသဘောထားကို သိရှိထားသဖြင့် ချက်ချင်း ပြောလိုက်သည် : " ဇွန်ဘီတွေက လူ‌သားတိုင်းရဲ့ ရန်သူတွေပဲ။ ငါတို့ ဇွန်ဘီတွေကို ရှင်းလင်းနေကြတယ်။ ပြီးတော့ တက္ကသိုလ်မြို့တော် အခြေစိုက်စခန်းနဲ့ကြားမှာ ငါတို့ အထူးလမ်းတစ်လမ်း ရှင်းလင်းနေတာ... "

တက္ကသိုလ်မြို့တော် အခြေစိုက်စခန်းမှ လူများ၏ ဤသို့ဆောင်ရွက်ခြင်းမှာ အနည်းငယ် မိုက်မဲသည်ဟု သူ ထင်ခဲ့ဖူးသည် – ပစ္စည်းစုဆောင်းတဲ့အချိန်မှာ သူတို့ ဇွန်ဘီတွေကို သတ်ရမယ်ဆိုရင်တောင် ဘာလို့ သူတို့က ဇွန်ဘီတွေကို ရှင်းလင်းဖို့ အပြင်ထွက်ကြတာလဲ?

အကယ်၍ သူသာ တက္ကသိုလ်မြို့တော် အခြေစိုက်စခန်းရဲ့ စွမ်းအားရှင် ဆိုရင် ဇွန်ဘီသတ်ဖို့ သူ့ကို အတင်းဖိအားပေးတဲ့ ခေါင်းဆောင်တွေကြောင့် သူ စိတ်အနှောင့်အယှက်ဖြစ်လိမ့်မှာပဲ!

ရလဒ်ကတော့... စခန်းကြီးက လူတွေလည်း တကယ်ကြီး ဒီလိုလုပ်ကြတယ်!

S မြို့ကြီး အခြေစိုက်စခန်းသည် တရားဝင် ဖွဲ့စည်းထားသော ဘေးကင်းသည့် အခြေစိုက်စခန်းဖြစ်သည်။ အခြေစိုက်စခန်းတစ်ခုလုံးသည် အလွန်ကြီးမားပြီး လူသန်းပေါင်းများစွာ နေထိုင်လျက်ရှိကာ အင်အားကြီးမားသော စွမ်းအားရှင်များစွာနှင့် နာမည်ကြီးသိပ္ပံပညာရှင်များကို စုစည်းထားလေသည်။ 

သူတို့တွင် အားကောင်းသည့် အပူလက်နက်များ ပိုင်ဆိုင်သည့် စစ်တပ်တစ်တပ်လည်း ရှိပြီး သူတို့၏ အခြေစိုက်စခန်းမှ ခေါင်းဆောင်များသည်လည်း လူစု၍ ဇွန်ဘီများကို သတ်ဖြတ်ပြီး လမ်းရှင်းပေလိမ့်မည်။

S မြို့ကြီး အခြေစိုက်စခန်းသည် H မြို့ကြီးသို့ ဤအကြိမ် လာရောက်ရာတွင် စုစု‌ပေါင်း လူငါးဦး ရှိသည်။ ရေစွမ်းအားရှင်တစ်ဦး၊ လေစွမ်းအားရှင်တစ်ဦး၊ မီးစွမ်းအားရှင်တစ်ဦး၊ မြေစွမ်းအားရှင်တစ်ဦးနှင့် လျှပ်စီးစွမ်းအားရှင်တို့ ဖြစ်ကြသည်။ လူတိုင်းက ချွီယောင်ဖုန်းထက် ပိုမိုသန်မာသည်။

ဤလူများထဲတွင် ရှောက်ကွမ်ချွင် ဟူသော မြေစွမ်းအားရှင် ရှိသည်။ သူသည် ကမ္ဘာမပျက်ခင်က စစ်သား ဖြစ်ခဲ့ပြီး ကမ္ဘာပျက်ပြီးနောက်လည်း စစ်သား ဖြစ်သောကြောင့် သူ့စိတ်က အလွန်ကြမ်းတမ်းပေသည်။

သို့သော် ဤအချိန်တွင် ပတ်ဝန်းကျင်မြင်ကွင်းများကို မြင်တွေ့ရသောအခါ အမြဲတစေ စိတ်ဆိုးနေလေ့ရှိသူက စိတ်အခြေအနေ တိုးတက်ကောင်းမွန်သွားသည်။ ချွီယောင်ဖုန်း၏ စကားများကို ကြားသော် သူက ချီးပင်ချီးကျူးလိုက်သည် : " မင်း အလုပ်ကောင်းကောင်း လုပ်ခဲ့တယ်။ "

" တကယ်တော့ ငါ ဘာမှမလုပ်ခဲ့ပါဘူး။ " ချွီယောင်ဖုန်းက ရိုးရိုးကုပ်ကုပ်ဖြင့် ပြောသည်။

" မဟုတ်ဘူး။ မင်း အများကြီး လုပ်ခဲ့တယ်။ " ရှောက်ကွမ်ချွင်က ‌ဆိုသည်။

သူတို့ ဤတစ်ကြိမ် ထွက်လာသောအခါ လမ်းတစ်လျှောက်တွင် အခြေစိုက်စခန်းငယ်များစွာကို တွေ့ခဲ့သည်။

ထိုအခြေစိုက်စခန်းများကို တာဝန်ယူထားသူများတွင် အများစုက မကောင်းကြဘဲ သာမန်လူများကို လူသားများအဖြစ် မဆက်ဆံကြပေ။ ဆန့်ကျင်ဘက်အားဖြင့် ကောင်းကင်နဂါး အခြေစိုက်စခန်းသည် ကြည်လင်သော စမ်းချောင်းများထဲ၌ ပါဝင်သည် – ကောင်းကင်နဂါး အခြေစိုက်စခန်းမှ စွမ်းအားရှင်များ၏ အဆင့်အတန်းက မြင့်မားသော်ငြား အနည်းဆုံးတော့ သာမန်လူများက အသက်ရှင်နိုင်နေသေးသည်။

သူတို့သည် ချွီယောင်ဖုန်းကို အမြင်ကြည်ပြီး ယခု ချွီယောင်ဖုန်း ပြောသမျှကို သဘာဝကျစွာပင် သူတို့ ယုံကြည်ကြသည်။

ဤချွီယောင်ဖုန်းက လူကောင်း ဖြစ်သော်ငြား တက္ကသိုလ်မြို့တော် အခြေစိုက်စခန်းကတော့ သိပ်မကောင်းချေ။ အထူးသဖြင့် ကျိုးဝမ်ရှိူ့ပင်။

သူက ချွီယောင်ဖုန်းရဲ့ ရိက္ခာတွေကို လုယူပြီး ချွီယောင်ဖုန်းရဲ့ ညီမကို ရိုက်တယ်။ ဘာလို့ ဒီလူက အရမ်းရူးနေတာလဲ?

စကားစမြည်ပြောနေကြစဉ် သူတို့သည် တက္ကသိုလ်မြို့တော် အခြေစိုက်စခန်း၏ အနီးအနားသို့ ရောက်ရှိလာကြသည်။

တက္ကသိုလ်မြို့တော် အခြေစိုက်စခန်းအနားသို့ သူတို့ ရောက်သည်နှင့် သူတို့သည် မနှစ်မြို့ဖွယ် အနံ့အသက်ကို ရှူမိလိုက်ကြပြီး တစ်ချိန်တည်းမှာပင် သာမန်လူတချို့က မြို့အပြင်ဘက်တွင် ဝင်ထွက်သွားလာလျက် အလုပ်လုပ်နေကြသည်ကို တွေ့လိုက်ရသည်။

မီးရှို့ရန် ပစ္စည်းများ မလုံလောက်သောကြောင့် ဇွန်ဘီများကို မီးရှို့ခြင်းအား မီးစွမ်းအားရှင်များ ဆောင်ရွက်သည်။

ဇွန်ဘီများကို မြှုပ်နှံရန် အသုံးပြုသည့် တွင်းများကို မြေစွမ်းအားရှင်များက တူးပေးသည်။

သန့်ရှင်းရေးကိုပင် ရေစွမ်းအားရှင်များ ဆောင်ရွက်သည်။

…

အတိုချုပ်ပြောရလျှင် လွန်ခဲ့သော နှစ်ရက်မှစ၍ ဆောင်ရွက်ရသော ဇွန်ဘီသတ်ခြင်းနှင့် ဇွန်ဘီမြှုပ်နှံခြင်းတို့ကြောင့် စွမ်းအားရှင်များအားလုံး ပင်ပန်းနေပြီး ယနေ့တွင် သူတို့သည် စုပေါင်းအားလပ်ရက်အဖြစ် သတ်မှတ်ထားကြသည်။

မည်သို့ပင်ဖြစ်စေ ယခုအခါ သူတို့၏စခန်း အနီးအနား၌ ဇွန်ဘီတစ်ကောင်ပင် မရှိချေ။

စခန်းမှ သာမန်လူများသည် ဤသည်နှင့်ပတ်သက်၍ ပြဿနာမရှိပေ။ တချို့စွမ်းအားရှင်များသည် ကျားဝမ်ဟန်ကဲ့သို့ မကောင်းမွန်သော်ငြား စွမ်းအားရှင်အများစုသည် သူတို့ကို ကာကွယ်ပေးသူများ ဖြစ်ကြပြီး သူတို့ အလွန်ကျေးဇူးတင်ကြသည်။

ဤအချိန်တွင် စွမ်းအားရှင်များမှာ အနားယူနေကြ၏။ သူတို့သည် တံတိုင်းကို စတင်ပြုပြင်ပြီး ကင်းမျှော်စင်များကို တည်ဆောက်ကြကာ အလားတူများကိုလည်း ဆောင်ရွက်နေကြသည်။ အသက်ပိုကြီးသော ပရော်ဖက်ဆာအချို့သည် အသေးစိတ်ပုံစံများနှင့် တံတိုင်းကို ပြောင်းလဲရန်အတွက် ပြင်ဆင်ကြ၏။

" အခု ဒီတံတိုင်းကို မြေစွမ်းအားရှင်တွေက တိုက်ရိုက်ဖြိုချပစ်နိုင်တယ်... ဒါ မကောင်းဘူး! ငါတို့ တိုးတက်မှုအချို့ကို ပြုလုပ်သင့်တယ်... "

စွမ်းအားရှင်များသည် တစ်ယောက်ကို တစ်ယောက် အာရုံခံနိုင်ကြသည်။ သေချာတာပေါ့၊ ယန်ကျင်းဇီကဲ့သို့ အတော်လေး အားနည်းသူများဆိုလျှင် လျစ်လျူရှုခံရပေလိမ့်မည်။

S မြို့ကြီး အခြေစိုက်စခန်းမှ လူများသည် ရောက်လာလာချင်း သူတို့သည် မြို့အပြင်ဘက်တွင် စွမ်းအားရှင်တစ်ဦးပင် မရှိသည်ကို တွေ့လိုက်ရပြီး အနည်းငယ် မကျေမနပ် ဖြစ်သွားကြသည်။ သူတို့သည် အခြေစိုက်စခန်း၏ ပျက်စီးနေမှုများ၊ အပြင်ဘက်ရှိ အလွန်နံသော အနံ့အသက်များနှင့် နံရံတံတိုင်းများ၏ မညီညာမှုများကို တွေ့ရသောအခါ ထင်မြင်ချက်ဟာ ပိုမိုဆိုးရွားသွားလေသည်။

ဤအချိန်တွင် မြို့အပြင်ဘက်ရှိ သာမန်လူများသည်လည်း ဤအသင်းကို တွေ့သွားပြီး ချက်ချင်း သတိရှိသွားကြသည် : " မင်းတို့က ဘယ်သူလဲ? "

လူတစ်ယောက် စကားပြောပြီးသည်နှင့်တပြိုင်နက် တခြားသူက ကားထဲမှ လူတစ်ယောက်ကို မှတ်မိသွားသည် : " သူတို့က ကောင်းကင်နဂါး အခြေစိုက်စခန်းကပဲ! "

" ကောင်းကင်နဂါး အခြေစိုက်စခန်းက လူတွေ လာရဲကြသေးတာလား? "

" သူတို့ကို တားကြ! "

…...

တက္ကသိုလ်မြို့တော် အခြေစိုက်စခန်းမှ လူများသည် ကောင်းကင်နဂါး အခြေစိုက်စခန်းမှ လူများကို တွေ့ရသောအခါ မျက်နှာမကောင်းကြပေ။

သူတို့ကိုယ်တိုင်တွင် ထောက်ပံ့ပစ္စည်းများစွာ မရှိသော်လည်း သူတို့သည် ယခင်က ကောင်းကင်နဂါး အခြေစိုက်စခန်းအတွက် တချို့တလေကို သိမ်းဆည်းပေးထားခဲ့ကြသည်။ အဲ့ပစ္စည်းတွေက ကောင်းကင်နဂါး အခြေစိုက်စခန်းအတွက် လုံလုံလောက်လောက် ပြည့်စုံခဲ့တယ်! ဒါပေမယ့် ကောင်းကင်နဂါး အခြေစိုက်စခန်းရဲ့ လူတွေ ဘာလုပ်ခဲ့ကြသလဲ?

သူတို့က ယန်ကျင်းဇီကို တကယ် ပြန်ပေးဆွဲသွားကြတယ်!

ယန်ကျင်းဇီသာ ဤလူများကြောင့် အမှန်တကယ် ပြန်ပေးဆွဲခံလိုက်ရလျှင်... သူတို့ရဲ့စခန်းက ပွဲသိမ်းသွားမှာ!

ကံကောင်းထောက်မစွာဖြင့် သူတို့၏ ဥက္ကဌက အရည်အချင်းရှိသူ ဖြစ်နေခဲ့သည်။

" ငါတို့ကို မောင်းထုတ်ရအောင် မင်းတို့က ဘယ်သူတွေလဲ? " ချွီယောင်ဖုန်းက ကားပေါ်မှ ဆင်းလာသည်။

" ငါတို့ မင်းကို မကြိုဆိုဘူး။ " တက္ကသိုလ်မြို့တော် အခြေစိုက်စခန်းမှ လူက ပြောသည်။

" ငါလည်း ဒီကိုမလာချင်ပါဘူး! ဒါပေမယ့် ကျိုးဝမ်ရှိူ့က ငါတို့စခန်းရဲ့ ရိက္ခာတွေကို လုယူသွားပြီး ငါ့ညီမကို ဒဏ်ရာရစေခဲ့တယ်။ ငါ သူ့ကို ရှင်းပြချက် လာတောင်းတာ! " ချွီယောင်ဖုန်းက ကျယ်လောင်စွာပြောသည်။

" ဘယ်သူက မင်းတို့ကို ယန်ကျင်းဇီကို ပြန်ပေးဆွဲခိုင်းလို့လဲ? ခံရတာ ထိုက်တန်တယ်! "

" ဘာပြန်ပေးဆွဲတာလဲ? အဲ့ယန်ကျင်းဇီက ငါ့ညီမနဲ့ စိတ်လိုလက်ရ လိုက်လာတာ သိသာတယ်! ဟုတ်တယ်မလား ဝမ်ဝမ်? " ချွီယောင်ဖုန်းက သူ့ညီမကို ကြည့်လိုက်သည်။

ချွီဝမ်ဝမ်က ခေါင်းကို ဖြည်းညှင်းစွာ လှည့်လာသည် : " ဟာ? "

ချွီယောင်ဖုန်း : " ...... "

ချွီယောင်ဖုန်းက ဆက်ပြောသည် : " ငါ့မှာ သက်သေ ရှိတယ်။ ဒါက ယန်ကျင်းဇီ ငါ့ညီမအတွက် ရေးပေးတဲ့ ရည်းစားစာပဲ! "

ချွီယောင်ဖုန်းအနားရှိ စွမ်းအားရှင်များစွာကလည်း ဝင်ပြောကြသည် : " ယန်ကျင်းဇီက ဝမ်ဝမ်ကို ဖြားယောင်းပြီး သူ(မ)ရဲ့ ခံစားချက်တွေကို လှည့်စားသွားတယ်။ မင်းတို့ ဒီကိစ္စကို ရှင်းပြရမယ်! "

" ပြီးတော့ ကျိုးဝမ်ရှိူ့၊ ယန်ကျင်းဇီက ငါတို့နဲ့ စိတ်လိုလက်ရ လိုက်လာတာမှန်း သိသာတယ်။ ဘာကို ပြန်ပေးဆွဲတယ်လို့ ပြောနေတာလဲ? ငါတို့ရဲ့ ရိက္ခာတွေကို ယူသွားရအောင် သူက ဘယ်သူလဲ? "

" ပြီးတော့ သူက တိုက်ခိုက်ပြီး ဝမ်ဝမ့်ကို အရူးဖြစ်စေခဲ့တယ်! " 

ချွီဝမ်ဝမ်က ခေါင်းလှည့်လာပြန်သည်။ " ယန်ကျင်းဇီက သူ့သဘောနဲ့သူ ငါ့နောက်လိုက်လာတာ။ "

ချွီယောင်ဖုန်း : " ...... " ညီမလေး၊ မင်း တုံ့ပြန်တာ တကယ် နှေးလွန်းတယ်!

" ငါ့ညီမ ပြောတာ မင်းတို့ ကြားတယ်နော်! " ချွီယောင်ဖုန်းက ဆိုသည်။

" သူ ပြောတော့ ဘာဖြစ်လဲ? မင်းတို့ပဲ မင်းတို့ ပြောချင်တာ ဘာမဆို ပြောလို့ရတာမျိုးမှ မဟုတ်တာ! " တက္ကသိုလ်မြို့တော် အခြေစိုက်စခန်းမှ လူများက လှောင်ပြောင်လိုက်သည်။

" ငါ့ညီမက တုံးတယ်။ သူ လိမ်မပြောနိုင်ဘူး! " ချွီယောင်ဖုန်းက ပြောသည်။

နှစ်ဘက် အငြင်းပွားကြတော့သည်။

ရှောက်ကွမ်ချွင်က လူများ ရန်ဖြစ်ကြခြင်းကို နားထောင်ရသည်အား မနှစ်သက်ဘဲ ချက်ချင်း ဝင်ပြောလာသည် : " မင်းတို့ရဲ့ ဥက္ကဌနဲ့ ယန်ကျင်းဇီလို့ခေါ်တဲ့ အဲ့လူကို ထွက်လာခိုင်းလိုက်ပါ။ အချင်းချင်း စကားပြိုင်ပြောရုံနဲ့ အဆင်ပြေမှာမို့လို့လား? "

သူ ထိုသို့ပြောပြီးသည်နှင့် ချွီဝမ်ဝမ်က ပြော၏ : " ငါ မတုံးပါဘူး။ "

ချွီယောင်ဖုန်း : " ... " အိုကေ၊ ညီမလေး၊ မင်းက မတုံးပါဘူး။ ဒါပေမယ့် မင်းရဲ့ တုံ့ပြန်မှုက နှေးလွန်းတယ်!

ရှောက်ကွမ်ချွင်သည် ကျိုးဝမ်ရှိူ့ကို ခေါ်ထုတ်ပြီး ရှင်းရှင်းလင်းလင်း ပြောကြခြင်းသည် အကောင်းဆုံး နည်းလမ်းဟု ခံစားမိသည်။

သူသည် ကောင်းကင်နဂါး အခြေစိုက်စခန်းကို ပိုနှစ်သက်ပြီး ချွီဝမ်ဝမ် ဟူသော အရူးမလေးက လိမ်ပြောလိမ့်မည်မဟုတ်ဟု ခံစားရဆဲဖြစ်သော်ငြား သူသည် ကျိုးဝမ်ရှိူ့ကို ရှင်းပြရန် အခွင့်အရေး ပေးသင့်သေးသည်။

သို့သော် တက္ကသိုလ်မြို့တော် အခြေစိုက်စခန်းမှ လူများက မဝယ်ကြပေ : " ဘာလို့ ငါတို့က မင်းစကား နားထောင်ရမှာလဲ? " 

" မကြာသေးခင်ကမှ ဥက္ကဌက အနားယူဖို့ ခွင့်ယူထားတယ်။ အဲ့ဒါကြောင့် သူ့မှာ မင်းတို့ကို ဂရုစိုက်ဖို့ အချိန်မရှိဘူး။ "

သူတို့ စကားပြောနေစဉ် လုပ်စရာမရှိသော စွမ်းအားရှင်တချို့က လှည့်ပတ်ပြေးရန် ထွက်လာကြသည် : " ဒီမှာ ဘာဖြစ်နေတာလဲ? "

" ကောင်းကင်နဂါး အခြေစိုက်စခန်းက လူတွေက ရှင်းပြချက် တောင်းဆိုဖို့ ဒီကိုရောက်နေတယ်လို့ ပြောနေကြတယ်! " ကောင်းကင်နဂါး အခြေစိုက်စခန်းကို တားမြစ်နေသော သာမန်လူများက ချက်ချင်း ပြောကြ၏။

" ဘာပြောစေချင်တာလဲ? ထွက်သွား! " ဤတက္ကသိုလ်မြို့တော် အခြေစိုက်စခန်းမှ စွမ်းအားရှင်များသည် ကောင်းကင်နဂါး အခြေစိုက်စခန်းမှ လူများကို မုန်းတီးလွန်းသဖြင့် လေသံကောင်းကောင်းဖြင့်ပင် မပြောကြချေ။

ချွီယောင်ဖုန်းသည် သူ မှားမှန်း သိသော်ငြား တစ်စုံတစ်ယောက်က သူ့ကို မျက်နှာသာမပေးသောအခါ စိတ်ဆိုးလာဆဲဖြစ်သည်။ S မြို့ကြီး အခြေစိုက်စခန်းမှ လူများသည်လည်း စိတ်ဆိုးသွားကြသည်။

ရှောက်ကွမ်ချွင်က ‌ဆိုသည် : " မင်းတို့စခန်းက အရမ်းဗိုလ်ကျလွန်းတာပဲလား? "

" ငါတို့က အရမ်းဗိုလ်ကျတယ်။ အဲ့တော့ ဘာဖြစ်သလဲ? " တက္ကသိုလ်မြို့တော် အခြေစိုက်စခန်းမှ စွမ်းအားရှင်သည် ရှောက်ကွမ်ချွင်ကို စိုက်ကြည့်နေသည်။

သူတို့သည် ကောင်းကင်နဂါး အခြေစိုက်စခန်းမှ လူများ ကျားဝမ်ဟန်နှင့် အဆက်အသွယ်ရှိကြောင်း တွေ့ရှိထားပြီး ယခုအခါ သူတို့သည် ဤလူများကို အထူးမုန်းတီးနေကြသည်။

S မြို့ကြီး အခြေစိုက်စခန်းမှ လူအများအပြားသည် အချင်းချင်း ကြည့်လိုက်ကြပြီး နောက်ဆုံးတွင် ဆုံးဖြတ်ချက်ချလိုက်ကြ၏။

သူတို့သည် အကျိုးအကြောင်းမသင့်ဘဲ ဗိုလ်ကျတတ်သော စခန်းများစွာကို တွေ့လာခဲ့ရသည်။ သူတို့သည် ဤအခြေအနေမျိုးကို အမြဲလိုလို ကြုံရတတ်သည်...

ရှောက်ကွမ်ချွင်သည် စွမ်းအားရှင်များ၏ ခေါင်းဆောင်ကို တိုက်ရိုက်ဖမ်းဆွဲလိုက်သည် : " ငါ့ကို မင်းတို့ရဲ့ ဥက္ကဌနဲ့ တွေ့ဖို့ ခေါ်သွားစမ်း! "

သူ ဤသို့လုပ်လိုက်သည်နှင့် S မြို့ကြီး အခြေစိုက်စခန်းမှ တခြားသူများသည်လည်း ဤသို့လုပ်လိုက်ကြပြီး တစ်ခါတည်းနှင့် တက္ကသိုလ်မြို့တော် အခြေစိုက်စခန်း၏ စွမ်းအားရှင်များစွာကို ဖမ်းထိန်းထားနိုင်လိုက်သည်။

သာမန်အားဖြင့် ဤကဲ့သို့သော အချိန်များတွင် ဤစွမ်းအားရှင်များသည် သူတို့ကို ခေါင်းဆောင်နှင့် တွေ့ရန် ခေါ်သွားသင့်သည်။

သို့သော် တက္ကသိုလ်မြို့တော် အခြေစိုက်စခန်းကတော့ မတူပေ။

ဖမ်းဆီးခံရသော စွမ်းအားရှင်များမှာ လူငယ်များ ဖြစ်ကြသည်။ ဤအခိုက်အတန့်တွင် သူတို့က လုံးဝ မကြောက်ကြသည့်အပြင် အံ့ဩဖို့ကောင်းနေပုံရသည် : " စဉ်းတောင် မစဉ်းစားနဲ့! မင်းတို့ ငါ့ကို သတ်ရင်တောင် ငါ မင်းတို့ကို ခေါ်မသွားဘူး! "

၎င်းတင်မကဘဲ ဤအချိန်တွင် တက္ကသိုလ်မြို့တော် အခြေစိုက်စခန်း၏ အချက်ပေးသံက မြည်လာသည်။ တစ်ချိန်တည်းမှာပဲ လူတစ်ယောက်က သူတို့ကို တိုက်ရိုက်တိုက်ခိုက်လာတယ်!

အမှန်တော့ တက္ကသိုလ်မြို့တော် အခြေစိုက်စခန်းမှ လူများသည် ယခင်က ဤကဲ့သို့မဟုတ်ချေ။ သို့သော် သူတို့သည် ကျားဝမ်ဟန် ဇွန်ဘီများကို ခေါ်လာ၍ မြို့ကို ဝိုင်းရံထားမှုကို တွေ့ကြုံထားခါစဖြစ်သည်။

ကျားဝမ်ဟန်နှင့် ကောင်းကင်နဂါး အခြေစိုက်စခန်းမှ လူများနှင့် အလွန်ရင်းနှီးသည်။ အခု သူတို့ အရှေ့က ဒီလူတွေကလည်း ကျားဝမ်ဟန်ရဲ့ ကြံရာပါတွေလို့ သူတို့ ခံစားရတယ်!

S မြို့ကြီး အခြေစိုက်စခန်းမှ လူများအားလုံး အံ့ဩသွားကြသည်။ ဒါပေမယ့် အခု ဒီလိုတွေဖြစ်ကုန်မှတော့ သူတို့ ရွေးချယ်စရာ မရှိတော့ဘဲ တိုက်ခိုက်ရပြီ!

အဆုံးမူကား ၎င်းသည် လူပေါင်းစုံတိုက်ပွဲ ဖြစ်သည်။ တက္ကသိုလ်မြို့တော် အခြေစိုက်စခန်းသည် အပူလက်နက်များကို မသုံးရဲဘဲ S မြို့ကြီး အခြေစိုက်စခန်းမှ လူများသည် တက္ကသိုလ်မြို့တော် အခြေစိုက်စခန်းမှ ငယ်ရွယ်သော စွမ်းအားရှင်များကို မထိခိုက်စေချင်ပေ။ နှစ်ဘက်က ခက်ခက်ခဲခဲ တိုက်ခိုက်ကြသည်။

သာမန်လူများကို စွမ်းရည်နိုးကြားပေးနိုင်သည်ဟု ယန်ကျင်းဇီ ပြောပြီးနောက် ကျိုးဝမ်ရှိူ့က ဤကိစ္စ မဆောင်ရွက်ခင် ယန်ကျင်းဇီ ပိုမိုကောင်းမွန်လာသည်ကို စောင့်ဆိုင်းရန် စဉ်းစားနေသော်လည်း ယန်ကျင်းဇီက ကျိုးဝမ်ရှိူ့ကို တံခါးအပြင်သို့ အတင်းခေါ်ထုတ်‌နေသည် : " ဝမ်ရှိူ့၊ ငါ တကယ် အဆင်ပြေနေပါပြီဆို! "

ယန်ကျင်းဇီသည် စွမ်းရည်ပြသရန် ရည်ရွယ်ထားသည်။ တစ်ချိန်တည်းမှာပဲ သူက မျက်နှာဖြူလေး ဆိုရင်တောင် အစွမ်းထက်တဲ့ မျက်နှာဖြူလေး ဆိုတာ ကျိုးဝမ်ရှိူ့ သိစေရမယ်!

ရလဒ်အနေဖြင့် သူတို့သည် စမ်းသပ်ရန် တစ်စုံတစ်ဦးကို တွေ့ရှိရုံသာ ရှိသေးသည်။ အခြေစိုက်စခန်းတွင် အချက်ပေးသံ ထွက်ပေါ်လာခဲ့သည်။

တစ်စုံတစ်ယောက်က လာရောက်တင်ပြသည်။ " ဥက္ကဌ! ကောင်းကင်နဂါး အခြေစိုက်စခန်းက လူတွေ လာတိုက်နေကြတယ်! " 

ကျိုးဝမ်ရှိူ့သည် ကောင်းကင်နဂါး အခြေစိုက်စခန်းမှ လူများအကြောင်း စဉ်းစားနေခဲ့သည်။

စစချင်း အဲ့လူတွေက ယန်ကျင်းဇီကို ပြန်ပေးဆွဲခဲ့တယ်!

ဒါပေမယ့် သူတို့က ရောက်လာရဲတယ်... သူတို့က အတင့်ရဲလိုက်တာ!

" ငါ ချက်ချင်း သွားကြည့်လိုက်မယ်။ " ကျိုးဝမ်ရှိူ့သည် စကားပြောပြီးသည်နှင့် ထွက်သွားတော့မလို့ပင်။ ခြေလှမ်းအနည်းငယ် လျှောက်ပြီးနောက် သူက ရပ်သွားပြီး သတင်းလာပို့သူ၏ မော်တော်ဆိုင်ကယ်ကို ဆွဲယူလိုက်သည်။ သူသည် မော်တော်ဆိုင်ကယ်ပေါ်တွင် ထိုင်လိုက်ပြီး ယန်ကျင်းဇီကို ကြည့်လိုက်သည် : " ကျင်းဇီ လာ! "

အခု သူ ယန်ကျင်းဇီကို မထားခဲ့ရဲတော့ဘူး!

ယန်ကျင်းဇီသည် ကျိုးဝမ်ရှိူ့၏နောက်တွင် ထိုင်ပြီး ကျိုးဝမ်ရှိူ့နှင့်အတူ တိုက်ပွဲဖြစ်ရာသို့ သွားရောက်ခဲ့သည်။

မော်တော်ဆိုင်ကယ်ကို ပြင်းပြင်းထန်ထန် ဘရိတ်အုပ်လိုက်ပြီး ကျိုးဝမ်ရှိူ့က ရုတ်ချည်း မတ်တပ်ရပ်ကာ ယန်ကျင်းဇီ ဆင်းရန် ဦးစွာကူညီပြီးမှ တိုက်ပွဲမြေပြင်သို့ အမြန်ပြေးသွားသည်။

ကျိုးဝမ်ရှိူ့ရဲ့ အသွင်အပြင်က အလွန်ချောမောတယ်!

ယန်ကျင်းဇီသည် မော်တော်ဆိုင်ကယ်ကို မှီ၍ တိုက်ပွဲမြေပြင်ကို မျက်မှောင်ကြုံ့လျက် ကြည့်နေသည်။

ကျိုးဝမ်ရှိူ့နှင့် တိုက်ခိုက်နေသူများထဲတွင် သူ ကူးပြောင်းလာခါစ၌ ကျိုးဝမ်ရှိူ့၏ အင်အားနှင့် အားဆင်တူသော လူများစွာ ရှိသည်။

ယခု ကျိုးဝမ်ရှိူ့၏ ခွန်အားသည် ပိုမိုအားကောင်းလာသည်။ ဒါပေမယ့် ဒီလူတွေက အရမ်းများလွန်းတယ်!

သူတို့ ဘယ်ကလာတာလဲ? သူတို့ ဒီမှာ ဘာလုပ်နေတာလဲ?

နေဦး! သူတို့နဲ့ တိုက်ခိုက်ရင် သူ့ရဲ့ ဝမ်ရှိူ့ အနိုင်ကျင့်ခံရလိမ့်မယ်!

ယန်ကျင်းဇီသည် ကောင်းမွန်စွာ အနားယူထားခဲ့ပြီး သူ၏ စိတ်ဝိညာဉ်စွမ်းအားသည် အကောင်းဆုံးအခြေအနေတွင် ရှိနေသည်။ ထို့ကြောင့် သူသည် သူ၏ စိတ်ဝိညာဉ်စွမ်းအားကို ထုတ်သုံးရန် မတွန့်ဆုတ်ဘဲ မြေစွမ်းအားရှင်၏ တိုက်ခိုက်မှုကို အနားရှိ ရေစွမ်းအားရှင်ထံသို့ ရွှေ့ပြောင်းလိုက်ပြီး ရေစွမ်းအားရှင်၏ တိုက်ခိုက်မှုကို မီးစွမ်းအားရှင်အပေါ် အသုံးပြုလိုက်သည်... 

တိုက်ပွဲဟာ ရုတ်တရက် ဖရိုဖရဲဖြစ်သွားသည်။ S မြို့ကြီး အခြေစိုက်စခန်းက ရောက်လာတဲ့ လူတွေအားလုံး သူတို့ရဲ့ ကိုယ်ပိုင်စွမ်းရည်တွေနဲ့ ပြန်တိုက်ခံလိုက်ရတယ်! 

သူတို့အားလုံး ကြောင်အပြီး ဆွံ့အသွားကြသည် – သောက်ကျိုးနည်း ဘာဖြစ်တာလဲ?

ကျိုးဝမ်ရှိူ့လည်း အနည်းငယ် စိတ်ရှုပ်သွားသည် – ယန်ကျင်းဇီ လုပ်တာလား? သူ အဆင်ပြေရဲ့လား?

ယန်ကျင်းဇီသည် ဤအချိန်မှသာ လျှောက်လှမ်းခဲ့ပြီး တစ်ချိန်တည်းတွင် သူ၏ စိတ်စွမ်းအားကို အသုံးပြု၍ ထိုလူများကို ဖိနှိပ်ခဲ့သည်။

လွန်ခဲ့သော ရက်အနည်းငယ်က သူသည် ဇွန်ဘီများနှင့် ရင်ဆိုင်ခဲ့ရပြီး စိတ်ဝိညာဉ်စွမ်းအားကို လက်လွတ်စပယ် မသုံးရဲခဲ့သော်ငြား ယခု အဆင်ပြေသွားပြီဖြစ်သည်... ယန်ကျင်းဇီသည် မျက်မှောင်ကြုံ့လျက် ထိုလူများကို ကြည့်လိုက်သည် : " မင်းတို့က ဘယ်သူလဲ၊ ဘာလိုချင်တာလဲ? "

S မြို့ကြီး အခြေစိုက်စခန်းမှ လူများသည် သူတို့အပေါ်ရှိ ကြီးမားသော ဖိအားကို ခံစားနေရပြီး ခဏတာ မလှုပ်ရှားဝံ့ကြဘဲ ယန်ကျင်းဇီကို ကြောက်လန့်တကြား ကြည့်နေကြသည် – အားကောင်းလိုက်တဲ့ ဖိအား... ဒီလူက တကယ် သန်မာလွန်းတယ်!

သို့သော် သူတို့သည် အရှုံးပေးရန် အလျင်အမြန် ငြင်းဆိုကြသည်... ရှောက်ကွမ်ချွင်က ဖိအားကို ခုခံပြီး အံကြိတ်လျက် ဆိုသည် : " မင်းက ကျိုးဝမ်ရှိူ့လား? မင်းက သန်မာတယ် ဆိုရင်တောင်မှ တခြားလူတွေရဲ့ ရိက္ခာတွေကို မလုယူသင့်ဘူး! ငါတို့က S မြို့ကြီး အခြေစိုက်စခန်းက ဖြစ်ပြီး တရားမျှတမှု

ကို ထိန်းသိမ်းဖို့ ဒီကိုလာတာ။ မင်း ယန်ကျင်းဇီလို့ခေါ်တဲ့ မျက်နှာဖြူလေးကိုလည်း ခေါ်လိုက်။ တချို့ကိစ္စတွေကို သေချာရှင်းရမယ်! "

ဘေးလူများ : " ... "

ယန်ကျင်းဇီ : " ... ငါက ကျိုးဝမ်ရှိူ့ မဟုတ်ဘူး။ ငါက ယန်ကျင်းဇီ။ "