အပိုင်း ၉၂ ( Little White Face 20 )

မြင်ကွင်းကား ခဏတာ လွန်စွာကသိကအောက်ဖြစ်သွား၏။

သို့သော်ငြား ဤလူများသည် S မြို့ကြီး အခြေစိုက်စခန်းမှ လာကြပြီး သူတို့က တိုက်ခိုက်သောအခါ သက်ညှာကြကာ တက္ကသိုလ်မြို့တော် အခြေစိုက်စခန်းမှ လူများကို မထိခိုက်စေခဲ့ကြပေ။

ကျိုးဝမ်ရှိူ့သည် သူတို့ကို အနီးအနားရှိ အစည်းအဝေးခန်းသို့ ခေါ်သွားသည်။

ဤအစည်းအဝေးခန်းကို ကွင်းဆင်းရုံးမှ အစည်းအဝေးများအတွက် အမြဲအသုံးပြုခဲ့ပြီး အထဲတွင် လူဒါဇင်ချီ ထိုင်နိုင်သော ညီလာခံစားပွဲ ရှိသည်။

ယန်ကျင်းဇီနှင့် ကျိုးဝမ်ရှိူ့တို့သည် တစ်ဖက်စွန်းတွင် ထိုင်ကြပြီး S မြို့ကြီး အခြေစိုက်စခန်းမှ လူများသည် တစ်ဖက်ခြမ်းတွင် ထိုင်ကြကာ တက္ကသိုလ်မြို့တော် အခြေစိုက်စခန်းမှ လူများက တခြားတစ်ဖက်ခြမ်းတွင် ထိုင်ကြသည်။ ကောင်းကင်နဂါး အခြေစိုက်စခန်းမှ လူများကား တခြားတစ်ဖက်စွန်းတွင်သာ မတ်တပ်ရပ်နိုင်ကြသည်။

ရှောက်ကွမ်ချွင်နှင့် S မြို့ကြီး အခြေစိုက်စခန်းမှ တခြားသူများသည် ယခုအခါ တချို့ကို ခန့်မှန်းမိပြီးဖြစ်ကာ သူတို့ကို ချွီယောင်ဖုန်း လှည့်စားလိုက်ပြီဟု ထင်နေကြ၏။

သူတို့ မြင်လိုက်သည်ကိုပင် ထည့်မတွက်နှင့်။

ဤတက္ကသိုလ်မြို့တော် အခြေစိုက်စခန်းသည် အပြင်ဘက်တွင် ယိုယွင်းပြိုကျနေသော်ငြား အတွင်းပိုင်းတွင်တော့ အမှန်တကယ်ပင် အလွန်ကောင်းမွန်စွာ တည်ဆောက်ထားသည်။ သာမန်လူအများအပြားသည် သွားလာနေကြပြီး သူတို့၏ မျက်နှာများပေါ်တွင် အသက်ကင်းမဲ့မှုများ မရှိဘဲ အားလုံးက မျှော်လင့်ချက်များဖြင့် ပြည့်နှက်နေကြပုံ‌ပေါ်သည်။

ဤအခြေစိုက်စခန်း၏ ခေါင်းဆောင်က လက်အောက်ငယ်သားများအပေါ် ကောင်းမွန်သည်မှာ သိသာလေသည်။

တကယ်တော့ ယခင်အဖြစ်အပျက်များကို စဉ်းစားကြည့်သောအခါ... ဤအခြေစိုက်စခန်းမှ သာမန်လူများနှင့် စွမ်းအားရှင်များတွင် ဤစခန်းနှင့် ပိုင်ဆိုင်ပတ်သက်သော ခံစားချက် ရှိပြီး စခန်းအတွက် အလုပ်ကြိုးစားလုပ်ရန် ဆန္ဒရှိကြသည်။ ဤသည်နှင့်ပင် ဤစခန်းက ကောင်းမွန်ကြောင်း သက်သေပြရန် လုံလောက်သည်။

ပိုအရေးကြီးသည်မှာ... မဖြောင့်မမှန်သော ခေါင်းဆောင် ကျိုးဝမ်ရှိူ့ကို စွဲလန်းစေပြီး သူ့ညီမကိုလည်း ဖြားယောင်းခဲ့သည် ဆိုသော ချွီယောင်ဖုန်း၏ စကားများထဲမှ မျက်နှာဖြူလေးဟာ အမှန်တကယ်၌ အလွန်သန်မာနေသည်...

ချွီယောင်ဖုန်း တခြားဘာထပ်ပြောပြော သူ့ကို ဘယ်လိုလုပ် ယုံနိုင်ပါတော့မလဲ?

" ဥက္ကဌ၊ မစ္စတာယန်၊ ဘာသောက်ချင်ပါသလဲ? " ချန်ရှုရှင်းက မေးသည်။

ယန်ကျင်းဇီက ဆိုသည် : " လက်ဖက်စိမ်း။ မင်း လုပ်စရာမလိုဘူး။ ငါ့ကို ခွက်တစ်ခွက်နဲ့ လက်ဖက်ရွက်တွေပဲ ပေးပါ။ "

ချန်ရှုရှင်းသည် ချက်ချင်းပင် လက်ဖက်ရည်ခွက်ကို ယန်ကျင်းဇီထံသို့ ယူလာပြီး နောက်ထပ်သော ရေခွက်အနည်းငယ်ကို လောင်းထည့်လိုက်သည်။ သူ(မ)၏ အခြေစိုက်စခန်းမှ လူတိုင်းအတွက် တစ်ခွက်စီကို ပေးပြီး သူ(မ)အတွက် တစ်ခွက်ယူကာ ရှောက်ကွမ်ချွင်နှင့် မျက်နှာချင်းဆိုင်တွင် ဝင်ထိုင်လိုက်၏။

သေချာတာပေါ့၊ သူ(မ)သည် ရှောက်ကွမ်ချွင်နှင့် တခြားသူများအတွက် ရေမထည့်ပေးပေ။ ဒီလူတွေက ပြဿနာရှာဖို့ ရောက်လာပြီး သူ(မ) ရေထည့်ပေးတာကို မျှော်လင့်နေသေးတာလား? အိပ်မက်ဆက်မက်နေလိုက်!

ရှောက်ကွမ်ချွင်နှင့် တခြားသူများသည် S မြို့ကြီး အခြေစိုက်စခန်းတွင် ရှိသောအခါ သူတို့သည် အစွမ်းထက် စွမ်းအားရှင်များ ဖြစ်ကြသဖြင့် လေးစားခံကြရသည်။ S မြို့ကြီး အခြေစိုက်စခန်းမှ ထွက်လာပြီးနောက် သူတို့သည် သူတို့ကို အလေးအနက် မထားသော မသိနားမလည် အခြေစိုက်စခန်းငယ်တချို့နှင့် ကြုံတွေ့ခဲ့ရသော်ငြား အချိန်အများစုတွင် သူတို့သည် လေးစားခံရပြီး ပိုမိုကောင်းမွန်စွာ သိနားမလည်လာနိုင်သူများကိုမူ သူတို့ ရိုက်နှက်ခဲ့ကြသည်။

ယခု သူတို့ အလွန်လျစ်လျူရှုခံရသဖြင့် အမှန်တကယ် မပျော်မရွှင် ဖြစ်မိသော်လည်း သူတို့ မပြသဝံ့ပေ။

ယန်ကျင်းဇီက အလွန်သန်မာလွန်းသည်။

ထို့အပြင် ယနေ့ကိစ္စမှာလည်း သူတို့၏ အမှား ဖြစ်သည်။ သူတို့သည် အခြေအနေကို မှားသိပြီး တခြားလူများကို အထင်လွဲမိခြင်း ဖြစ်နိုင်သည်။

ရှောက်ကွမ်ချွင်သည် ဒေါသကို မျိုသိပ်ပြီး ကျိုးဝမ်ရှိူ့ဘက်သို့ လှည့်လိုက်သည်။ " ‌တောင်းပန်ပါတယ်။ ငါတို့က အခြေအနေကို အရင်ဆုံး သေသေချာချာ မသိဘဲ စိတ်လက်မာန်ပါလုပ်မိတယ်။ " သူသည် မတုံးအပေ။ သူ့ကို ချွီယောင်ဖုန်း အသုံးချသွားကြောင်း သူ သိသည်။

ကျိုးဝမ်ရှိူ့သည် ရှောက်ကွမ်ချွင်၏ စကားများကို ကြားပြီးနောက် ယန်ကျင်းဇီကို ကြည့်လိုက်သည် – အခု ဒီကိစ္စကို... ယန်ကျင်းဇီ ဘာလုပ်ဖို့ ရည်ရွယ်ထားသလဲ?

ကျိုးဝမ်ရှိူ့၏ အပြုအမူကြောင့် တခြားလူများလည်း ယန်ကျင်းဇီကို ကြည့်လိုက်ကြပြီး ဤအကြည့်က လူတိုင်းကို စိတ်ရှုပ်ထွေးသွားစေသည်။

ယန်ကျင်းဇီသည် လက်ဖက်စိမ်းရည် ပြုလုပ်နေသည်။

သူသည် လက်တစ်ဖက်ဖြင့် ရေလုံးငယ်တစ်လုံး၊ ‌တခြားလက်တစ်ဖက်ဖြင့် မီးတောက်ငယ်တစ်ခုကို ဖန်တီးလိုက်ပြီးနောက် ရေလုံးငယ်ကို မီးတောက်ထဲ ထည့်၍ အပူပေးလိုက်သည်။

တကယ်ကြီး သူ့မှာ စွမ်းရည်နှစ်ခု ရှိတယ်!

S မြို့ကြီး အခြေစိုက်စခန်းသည် အလွန်ကြီးမားသော အခြေစိုက်စခန်းတစ်ခု ဖြစ်သော်လည်း စွမ်းရည်နှစ်ခုရှိသူ တစ်ဦးသာ ရှိသည်။ ဒီယန်ကျင်းဇီမှာ စွမ်းရည်နှစ်ခု တကယ်ရှိနေတာလား?

သူတို့ ဤသို့တွေးနေစဉ် ယန်ကျင်းဇီက ရေခွက်ထဲသို့ ရေနွေးလုံးလေးကို ထည့်လိုက်သည်အား တွေ့လိုက်ရသည်။

ထိုမျှတင်မကဘဲ သူသည် သူ့လက်ချောင်းများကို လှုပ်လိုက်ပြီး လေပြင်းတစ်ချက် တိုက်ခတ်သွားကာ... လက်ဖက်ရွက်အနည်းငယ်ဟာ သူ့ဘေးတွင် လွင့်ပါးသွားပြီး ခွက်ထဲသို့ ပြုတ်ကျသွားသည်။

လေစွမ်းအင်! သူ့မှာ လေစွမ်းအင် ရှိတယ်!

အဓိကက သူ့မှာ စွမ်းအားတွေ ရှိမှန်းတောင် သူတို့ မခံစားမိတာပဲ!

အဆင့်ကွာခြားချက်က အရမ်းများနေလွန်းလို့များလား?

ရှောက်ကွမ်ချွင်သည် အလွန်သန်မာသည်ဟု ယခင်က အမြဲခံစားခဲ့ရသော်ငြား ဤအခိုက်အတန့်တွင် သူသည် ရေတွင်းအောက်ခြေမှ ဖားတစ်ကောင်သာ ဖြစ်ကြောင်း ရုတ်တရက် နားလည်သွားသည်။

ယန်ကျင်းဇီသည် စွမ်းရည်သုံးမျိုးနှင့် ကျိုနှပ်ထားသော လက်ဖက်ရည်ကို ကျိုးဝမ်ရှိူ့ထံသို့ ပို့လိုက်ပြီး သူ့စွမ်းရည်များကို တိတ်တဆိတ် ပြန်လည်သိုလှောင်ပြီးနောက် ဒုတိယမြောက်ခွက်ကို ယူကာ ယခင်နည်းအတိုင်း ပြုလုပ်သည်။

ဤသို့ပြုလုပ်နေစဉ် သူက မေးသည် : " မင်းတို့ ငါ့ကို ဘာလို့ ကြည့်နေတာလဲ? ငါက မျက်နှာဖြူလေးတစ်ယောက်ပဲ။ မင်းတို့ ငါ့ကို အာရုံစိုက်စရာ မလိုပါဘူး။ " 

S မြို့ကြီး အခြေစိုက်စခန်းမှ လူများ : " ... " မင်းက မျက်နှာဖြူလေးပဲ ဆိုရင် မင်း အနိုင်ပိုင်းလိုက်တဲ့ ငါတို့က ဘာတွေလဲ?

တက္ကသိုလ်မြို့တော် အခြေစိုက်စခန်းမှ လူများ : " ... " ယန်ကျင်းဇီက အံ့ဩစရာပင်။ ယခင်က သူသည် ဇွန်ဘီများကို ချက်ချင်း သေစေနိုင်သော စွမ်းရည်ကို အသုံးပြုခဲ့ပြီး တခြားသူများ၏ တိုက်ခိုက်မှုများကိုလည်း ထိန်းချုပ်နိုင်ခဲ့သည်။ ယခုအခါ သာမန် သဘာဝလွန်စွမ်းရည် သုံးမျိုး ပေါ်ပေါက်လာသည်။ တကယ်ပဲ ဒီမကောင်းဆိုးဝါးက ဘယ်နေရာက ရောက်လာတာလဲ?

ချွီယောင်ဖုန်း : " ... " ဒီယန်ကျင်းဇီက ကလူမြှူတတ်တဲ့ မျက်နှာဖြူလေးတစ်ယောက်ပဲလို့ သူတို့ မပြောခဲ့ဘူးလား? ဘာလို့ ဒီလိုဖြစ်နေတာလဲ?

ချွီယောင်ဖုန်းသည် ယန်ကျင်းဇီနှင့် အနည်းငယ်ဝေးသော ညီလာခံစားပွဲ၏ တခြားတစ်ဖက်စွန်းတွင် မတ်တပ်ရပ်နေပြီး သူ့ဘေးရှိ လူကို တံတောင်ဖြင့် တွက်ကာ ခပ်တိုးတိုး မေးလိုက်သည်။ " အဲ့လူက တကယ်ပဲ ယန်ကျင်းဇီလား? "

သူ တွန်းလိုက်သူမှာ နောက်ဆုံးအကြိမ်၌ တက္ကသိုလ်မြို့တော် အခြေစိုက်စခန်းသို့ ရောက်လာသူ ဖြစ်သည်။ သူသည် ဘာဖြစ်နေမှန်း နားမလည်နိုင်သောကြောင့် နာကျင်စွာ ခေါင်းညိတ်လိုက်သည်။

ချွီယောင်ဖုန်း : " ... " ယန်ကျင်းဇီက အလွန်အစွမ်းထက်သည်။ သူ့ညီမက ယန်ကျင်းဇီနှင့် ငြိခဲ့သည်။ ဘာလို့များ ယန်ကျင်းဇီကို ကောင်းကင်နဂါး အခြေစိုက်စခန်းစီကို တန်းမခေါ်လာခဲ့တာလဲဟ!

ယန်ကျင်းဇီသာ သူ့ယောက်ဖ ဆိုရင် သူ ဘာကြောက်စရာလိုလဲ?

ဤသို့တွေးနေစဉ် ချွီယောင်ဖုန်းသည် ယန်ကျင်းဇီကို ကြည့်လိုက်သည်။ ရလဒ်ကား သူသည် ယန်ကျင်းဇီ၏ အဓိပ္ပာယ်ပါပါ အကြည့်နှင့် တွေ့ဆုံမိပြီး ရုတ်တရက် ထိတ်လန့်သွားရသည်။

ဤအချိန်တွင် ယန်ကျင်းဇီသည် ထပ်ပြုံးလိုက်ပြီး ကျိုးဝမ်ရှိူ့ကို ကြည့်လိုက်သည် : " ဝမ်ရှိူ့၊ သောက်လို့ ကောင်းလား? " သူသည် တမင်ကာ အစွမ်းပြခဲ့ပြီး S မြို့ကြီး အခြေစိုက်စခန်းမှ လူများကို စိတ်ငြိမ်သက်စေကာ သူတို့ကို ကျိုးဝမ်ရှိူ့အား အလေးထားစေခဲ့သည်။ ယခု သူတို့ စိတ်ငြိမ်‌သွားပြီးဖြစ်ရာ... မျက်နှာဖြူလေးတစ်ဦး ပြုမူသင့်သည့်အတိုင်း သူ ပြုမူသင့်သည်။

ကျိုးဝမ်ရှိူ့သည် ယန်ကျင်းဇီထံမှ သဘာဝလွန် စွမ်းရည်များကို နိုးထစေနိုင်မှုအား ကြားထားခဲ့သောကြောင့် ဤအခိုက်အတန့်တွင် သူသည် တခြားသူများလောက် မအံ့ဩတော့ပေ။ သူသည် လက်ဖက်ရည်သောက်ပြီး ပြောလိုက်သည်။ " ကောင်းတယ်။ "

" ဒါဆို အခုကစပြီး မင်းအတွက် နေ့တိုင်း လက်ဖက်ရည်နှပ်ပေးမယ်။ " ယန်ကျင်းဇီက ကျိုးဝမ်ရှိူ့ကို ပြုံးပြသည်။

ကျိုးဝမ်ရှိူ့၏ နှလုံးခုန်သံမှာ ပိုမြန်လာသည် : " ကောင်းပြီ။ "

" နေ့လည်စာ ဘာစားချင်လဲ။ မင်းအတွက် ငါလုပ်ပေးမယ်။ " ယန်ကျင်းဇီက ထပ်မေးသည်။

" အကုန် အဆင်ပြေတယ်။ " ကျိုးဝမ်ရှိူ့သည် လူအများအပြား ရှိနေသဖြင့် ဤအကြောင်းများ ပြောခြင်းမှာ မကောင်းဟု ခံစားမိသည်... ဒါပေမယ့် ယန်ကျင်းဇီက မေးခွန်းမေးနေတာ သူ ဖြေရမယ်လေ ဟုတ်တယ်မလား?

ရလဒ်ကား လူတိုင်းသည် သူတို့နှစ်ယောက် အမှန်တကယ် နေ့လည်စာအကြောင်း ဆွေးနွေးနေကြသည်ကို တွေ့လိုက်ရသည်။

အံ့သြစရာအကောင်းဆုံးကတော့ ယန်ကျင်းဇီက... တကယ်ပဲ နေ့လည်စာချက်ဖို့ စီစဉ်နေတာလား?

S မြို့ကြီး အခြေစိုက်စခန်းမှ လူများသည် အချင်းချင်း ကြည့်လိုက်ကြသည်။ ယခင် အဖြစ်အပျက် မရှိခဲ့လျှင် ဤအခြေအနေကို ကြည့်ရုံဖြင့်... ဒီယန်ကျင်းဇီက လူတွေကို ရိုးတွင်းခြင်ဆီထဲအထိ စွဲလန်းစေနိုင်တဲ့ လူနဲ့ တကယ်တူတယ်။ 

သူ့ရဲ့ ရုပ်ရည်က... အရမ်းကြည့်ကောင်းတယ်!

သို့သော် ယခုမူ... S မြို့ကြီး အခြေစိုက်စခန်းမှ လူများသည် နားလည်လွဲမှားမှုကို ဖြေရှင်းရန်သာ မျှော်လင့်ပြီး နောက်ပိုင်းတွင် ဇွန်ဘီများကို ကူညီသတ်ပေးရန် ယန်ကျင်းဇီကို တောင်းဆိုမည်။

S မြို့ကြီး အခြေစိုက်စခန်းသည် လူဦးရေအလွန်များပြားသော နိုင်ငံတကာမြို့ကြီးတစ်ခု ဖြစ်သည်။ ကမ္ဘာပျက်ပြီးခါစ၌ပင် ဇွန်ဘီများ ဆယ်သန်းကျော် ရှိခဲ့သည်။

လွန်ခဲ့သည့်တစ်နှစ်အတွင်း ဇွန်ဘီအများအပြားကို သတ်နိုင်ခဲ့သော်ငြား လူအများအပြားသည်လည်း ဇွန်ဘီများ ဖြစ်လာခဲ့ကြသည်။ S မြို့ကြီး အခြေစိုက်စခန်းတွင် ဇွန်ဘီများ သန်းပေါင်းများစွာ ရှိနေသေးသည်။

အစပိုင်းတွင် ဤဇွန်ဘီများသည် သာမန်ဇွန်ဘီများ ဖြစ်ပြီး နေရာမျိုးစုံတွင် ပြန့်ကြဲနေသည်။ ဇွန်ဘီများ ရှိရာတွင် အသက်ရှင်ကျန်သူများ မကြာခဏ ရှိတတ်ပြီး သူတို့တွင် လက်နက်အလုံအလောက် မရှိပေ... ထို့ကြောင့် S မြို့ကြီး အခြေစိုက်စခန်းသည် နှေးကွေးသော သန့်ရှင်းရေးနည်းလမ်းကို ကျင့်သုံးခဲ့ပြီး ဇွန်ဘီများ ရှိရာ ဧရိယာများကို ဗုံးကြဲရန် အပူလက်နက်များအား အသုံးမပြုခဲ့ကြချေ။

သို့သော် ကမ္ဘာပျက်ကပ် တစ်နှစ်ကြာပြီးနောက် သူတို့သည် အပူလက်နက်များ တစ်သုတ်ကို ရရှိခဲ့ပြီး S မြို့ကြီးရှိ အသက်ရှင်ကျန်သူအားလုံးနီးပါးကို ကယ်တင်နိုင်ပြီးဖြစ်သည်... သူတို့သည် အပူလက်နက်များနှင့် ဇွန်ဘီများကို စတင်ဗုံးကြဲတော့သည်။

အပူလက်နက်များဖြင့် ဇွန်ဘီများကို သတ်ခြင်း၏ အကျိုးရလဒ်မှာ အလွန်ကောင်းမွန်သည်။ သူတို့သည် ဇွန်ဘီများကို စုစည်းပြီး ဗုံးပစ်လိုက်လျှင် ဇွန်ဘီအများအပြား လဲကျသွားသည်။

သို့ရာတွင် အကြိမ်ပေါင်းများစွာ ပြုလုပ်ပြီးနောက် သူတို့သည် တစ်ခုခုမှားနေကြောင်း ရုတ်တရက် တွေ့ရှိလိုက်ရသည်။

ပေါက်ကွဲမှုကနေ လွတ်မြောက်သွားတဲ့ ဇွန်ဘီတွေက တကယ်ကြီး ပိုမိုသန်မာလာခဲ့တယ်!

S မြို့ကြီး အခြေစိုက်စခန်းအနားမှ သာမန်ဇွန်ဘီ သန်းပေါင်းများစွာမှာ ဗုံးကြဲခြင်းကြောင့် သန်းအနည်းငယ်သာ ရှိတော့သည်။ ဒါပေမယ့် အလယ်အလတ်နဲ့ အဆင့်မြင့်ဇွန်ဘီတွေလည်း ထပ်ပြီး ပိုများလာတယ်!

ပိုကြောက်စရာကောင်းသည်မှာ ဤဇွန်ဘီများက အန္တရာယ်ကို နားလည်သဘောပေါက်နိုင်ပြီး S မြို့ကြီး အခြေစိုက်စခန်းမှ အမှန်တကယ် ထွက်ခွာသွားကာ ပတ်ဝန်းကျင်မြို့များသို့ လျှောက်သွားကြသည်...

ကမ္ဘာပျက်ကပ် ကျရောက်လာသောအခါ ကမ္ဘာမြေကြီး၏ သံလိုက်စက်ကွင်းလည်း တစ်ချိန်တည်းတွင် ပြဿနာ ရှိလာကြသည်။ ကမ္ဘာ့ဓာတ်အားလိုင်း ပြတ်တောက်သွားပြီး ဆက်သွယ်ရေး ရပ်ဆိုင်းသွားသည်။ အနည်းဆုံးတော့ ကမ္ဘာ့လူဦးရေ သုံးပုံတစ်ပုံဟာ ချက်ချင်းဆိုသလိုပင် ဇွန်ဘီများ ဖြစ်သွားကြပြီး သူတို့၏ မိသားစုဝင်များကို ကိုက်ခဲ့ကြသည်... ပြည်နယ်အာဏာများအားလုံး ချက်ချင်း ရပ်ဆိုင်းသွားပြီး စစ်တပ်လည်း အကြီးအကျယ် နစ်နာခဲ့ရသည်။

ထို့အပြင် သံလိုက်စက်ကွင်းပြဿနာကြောင့် လေယာဉ်များ အသုံးမဝင်တော့ဘဲ သွားလာနေသော ရထားသည် ထိုအချိန်တွင် ပြဿနာတစ်ခု ဖြစ်ပွားပြီး လမ်းပေါ်တွင် တိုက်မိကာ အသုံးပြုနေကျလမ်းကြောင်း ပျက်စီးသွားသည်...

ထိုအချိန်၌ လူတော်တော်များများ ကြောက်လန့်ပြီး အသက်ရှင်ရေးအတွက် ‌ထွက်ပြေးခဲ့ကြသည်။ ထို့ကြောင့် ကားတိုက်မှုနှင့် တခြားကိစ္စများမှာ မထူးဆန်းတော့ဘဲ ကားပျက်များကြောင့် လမ်းပိတ်သွားတော့သည်...

ရက်အနည်းငယ်ကြာ ပရမ်းပတာဖြစ်ပြီးနောက် လူဦးရေ သုံးပုံနှစ်ပုံ လျော့ကျသွားသည်။ ထပ်မံစည်းလုံးချင်လျှင်ပင် မစည်းလုံးနိုင်တော့။

သို့သော် S မြို့ကြီး အခြေစိုက်စခန်းကဲ့သို့ အခြေစိုက်စခန်းများစွာကို တည်ဆောက်ထားပြီး ဤအခြေစိုက်စခန်းကြီးများသည်လည်း ဇွန်ဘီများကို တိုက်ခိုက်ပြိး လူသားအားလုံးကို ကယ်တင်ရန် ရည်ရွယ်ထားကြသည်။

ယခုအခါ S မြို့ကြီး အခြေစိုက်စခန်းမှ ဇွန်ဘီများ ထွက်ပြေးသွားသဖြင့် သူတို့သည် ချက်ချင်း လူလွှတ်ပြီး ဇွန်ဘီများကို သတ်စေသည်။

ကံမကောင်းစွာနဲ့ တိုးတက်ပြောင်းလဲလာတဲ့ ဇွန်ဘီတွေက အရမ်းသန်မာနေတယ်!

အလယ်အလတ်ဇွန်ဘီတွေကို အနိုင်ယူ‌နိုင်သေးပေမယ့် အပူလက်နက်အများစုက အဆင့်မြင့်ဇွန်ဘီတွေအတွက် အသုံးမဝင်ဘူး!

ကျိုးဝမ်ရှိူ့ရဲ့ မီးစွမ်းအားက ဗုံးတစ်ဗုံးလိုမျိုး အားကောင်းတယ်။ အဲ့ဒါက အဆင့်မြင့်ဇွန်ဘီတွေကို သတ်နိုင်လောက်တယ်မလား?

ဒါ့အပြင် ဇွန်ဘီတွေကလည်း ပိုသန်မာလာနိုင်တယ်...

ရှောက်ကွမ်ချွင်နှင့် တခြားသူများသည် ဤနေရာသို့ ရွှေ့ပြောင်းလာသော ဇွန်ဘီများကို သတ်ရန် H မြို့ကြီးရှိ လူများကို လာရောက်ရှာဖွေခြင်းဖြစ်သည်။

" ငါတို့ H မြို့ကြီးကို ရောက်လာတော့ ကောင်းကင်နဂါး အခြေစိုက်စခန်းကို ရောက်သွားတယ်။ ကောင်းကင်နဂါး အခြေစိုက်စခန်းက လူတွေနဲ့ စကားပြောတော့... " ရှောက်ကွမ်ချွင်သည် ချွီယောင်ဖုန်း ပြောသမျှကို ပြန်ပြောပြသည်။

တက္ကသိုလ်မြို့တော် အခြေစိုက်စခန်းမှ လူများ ချက်ချင်း ဒေါသထွက်သွားကြသည် : " ပေါက်တတ်ကရ! "

" မင်းတို့ ကောင်းကင်နဂါး အခြေစိုက်စခန်းကပဲ အမြဲတမ်း လာပြီး အစာငိုတောင်းတာ သိသာနေတာကို! " 

" မင်းတို့က သာမန်လူတွေအပေါ် ကောင်းနေသေးတာကို ဥက္ကဌက ကြည့်ပြီး ရိက္ခာ‌ထောက်ပံ့ခဲ့တာတောင် မင်းတို့က မကျေနပ်နိုင်ဘူးပဲ! "

" အမှန်ပဲ! မင်းတို့က ကျားဝမ်ဟန်နဲ့တောင် ပေါင်းပြီး ဥက္ကာခဲကို လုယူဖို့ ကြိုးစားလိုက်သေးတယ်! "

" မင်း ယန်ကျင်းဇီကိုတောင် ပြန်ပေးဆွဲခဲ့တယ်! "

တက္ကသိုလ်မြို့တော် အခြေစိုက်စခန်းမှ ယခင်အကြောင်းများကို ပြောသောအခါ ချွီယောင်ဖုန်းက ဘာမှမပြောခဲ့သော်လည်း နောက်ဆုံးစကားကို ကြားသောအခါ ခွန်းတုံ့ပြန်ခဲ့သည် : " ဘယ်မှာ ပြန်ပေးဆွဲလို့လဲ! ငါတို့မှာ သူ့ကို ပြန်ပေးဆွဲနိုင်စွမ်း မရှိဘူး! သူက ငါ့ညီမကို ကြိုက်လို့ စိတ်လိုလက်ရ လိုက်လာတာ! "

စကားပြောပြီးနောက် ချွီယောင်ဖုန်းသည် သူ့လက်ထဲမှ စာရွက်အနည်းငယ်ကို ထုတ်လိုက်သည် : " ငါ့မှာ သူတို့ ဆက်သွယ်ထားတဲ့ သက်သေတွေ ရှိတယ်! "

ကျိုးဝမ်ရှိူ့ ယန်ကျင်းဇီကို လာရောက်ကယ်တင်သောအခါ ချွီဝမ်ဝမ်သည် စကားပြောခွင့်မရခင် သတိလစ်သွားသဖြင့် သက်သေထွက်လာရန် အခွင့်အရေးမရှိခဲ့ချေ။

ဒါပေမယ့် အခု ချွီယောင်ဖုန်းက ထုတ်လာပြီ!

သို့သော် မူလက သူသည် ဤဟာနှင့် ကျိုးဝမ်ရှိူ့ကို လှောင်ပြောင်ရန် ရည်ရွယ်ထားခဲ့သည်။ ယခုအခါတွင်... ချွီယောင်ဖုန်းက ဆိုသည် : " ယန်ကျင်းဇီ၊ ငါ့ညီမက မင်းအပေါ် စိတ်ရင်းမှန်တယ်! မင်း ငါ့ယောက်ဖ ဖြစ်ချင်လား? " 

တခြားတစ်ဖက်ရှိ ယန်ကျင်းဇီခမျာ ဆွံ့အသွားလေသည်။

ကျိုးဝမ်ရှိူ့၏မျက်နှာမှာ မည်းမှောင်သွားသည် : " မင်း မဟုတ်တာ မပြောနဲ့! "

ဤအခိုက်အတန့်တွင် ချွီယောင်ဖုန်းသည် ကျိုးဝမ်ရှိူ့ကို ဂရုမစိုက်ဘဲ ယန်ကျင်းဇီကိုသာ ကြည့်နေသည် : " ယန်ကျင်းဇီ၊ မင်း အစကတည်းက ငါ့ညီမနဲ့ စိတ်လိုလက်ရ လိုက်လာခဲ့တာမလား? "

လွန်ခဲ့သော ရက်အနည်းငယ်က ကျားဝမ်ဟန် ဤစကားကို ပြောခဲ့သော်လည်း ဘယ်သူမှ မယုံကြည်ခဲ့ကြ။ ယခုအခါ ချွီယောင်ဖုန်းက ထပ်ပြောပြီး သက်သေလည်း ယူလာသည်...

ယန်ကျင်းဇီသည် ချွီယောင်ဖုန်းကို ကြည့်လိုက်သည် : " အဲ့တုန်းက ငါ တကယ်ပဲ ဆန္ဒအလျောက် ထွက်သွားခဲ့တယ်။ "

တက္ကသိုလ်မြို့တော် အခြေစိုက်စခန်းမှ လူများအားလုံး ထိတ်လန့်သွားကြပြီး ကျိုးဝမ်ရှိူ့က ယန်ကျင်းဇီကို ရုတ်တရက် လှည့်ကြည့်လာသည်။

ယန်ကျင်းဇီက ထပ်ပြောသည် : " အဲ့တုန်းက ချွီဝမ်ဝမ်က ငါ့ကို ဆက်တိုက်ချဉ်းကပ်ပြီး ကျိုးဝမ်ရှိူ့အကြောင်း မေးနေတာ ကောင်းမွန်တဲ့ ရည်ရွယ်ချက် မရှိမှန်း သိသာတယ်။ သိချင်လို့ ငါလည်း လိုက်လျောညီထွေနေခဲ့ပေမယ့် ကံမကောင်းစွာနဲ့ သူက တော်တော်လေး သတိထားတယ်။ ငါ ဘာသတင်းမှ မရခဲ့ဘူး။ နောက်ပိုင်း တစ်ခုခုဖြစ်ပြီးတော့ ပြဿနာက ကျားဝမ်ဟန်မှန်း ရှာတွေ့ခဲ့တယ်။ "

ယန်ကျင်းဇီသည် တိတ်တဆိတ် သူ့ကိုယ်သူ ချီးကျူးလိုက်သည်။

အောင်အောင်မြင်မြင်နဲ့ ဖြူစင်သွားအောင် ဆေးကြောပြီးပြီ!

ဤသို့စဉ်းစားရင်း ယန်ကျင်းဇီသည် ကျိုးဝမ်ရှိူ့ကို ထပ်ကြည့်လိုက်သည် : " ဝမ်ရှိူ့၊ ငါ မင်းကိုပဲ ကြိုက်တယ်။ "

ကျိုးဝမ်ရှိူ့ အနည်းငယ် ချောင်းဆိုးသွားသည်။

ချွီယောင်ဖုန်း : " ... " ဒါဆို သူ့ညီမက လူတွေကို လှည့်စားချင်နေရင်းနဲ့ အဆုံးမှာ လှည့်စားခံလိုက်ရတာ‌လား?

တက္ကသိုလ်မြို့တော် အခြေစိုက်စခန်းမှ လူများ : ဒီလိုကိုး!

S မြို့ကြီး အခြေစိုက်စခန်းမှ လူများ : " ... " မင်းက အရမ်းသန်မာတယ်။ မင်း အဲ့လိုလုပ်ဖို့ လိုသေးလို့လား?

သို့သော် ဤအင်အားကြီးသည့် အမျိုးသားက ကျိုးဝမ်ရှိူ့နှင့် ကလေးတစ်ယောက်သဖွယ် ပြုမူနေဆဲဖြစ်သည်... သူ့တွင် ထူးဆန်းသော အလေ့အထတချို့ ရှိသည်ကို သူတို့ နားလည်နိုင်သည်။

တကယ်တော့ သူတို့သည် ဤကိစ္စများကို ဂရုစိုက်ရန် ပျင်းရိလွန်းပြီး ယခုအချိန်တွင် ယန်ကျင်းဇီကို ဇွန်ဘီသတ်ပေးရန်သာ တောင်းဆိုချင်သည် : " ယန်သခင်လေး၊ ကျိုးဥက္ကဌ၊ ကိစ္စတွေ ရှင်းလင်းသွားပြီ။ ငါတို့ မင်းတို့ကို အထင်လွဲမိတယ်။ ငါတို့ လေးလေးနက်နက် တောင်းပန်ပါတယ်။ ပြီးတော့ ငါတို့မှာ မင်းတို့အကူအညီကို တောင်းရမယ့် အရမ်းအရေးကြီးတဲ့ကိစ္စ ရှိနေတယ်။ "

" ဘာလဲ? " ယန်ကျင်းဇီက မေးသည်။

" S မြို့ကြီးကနေ အဆင့်မြင့်ဇွန်ဘီ အများအပြား H မြို့ကြီကို လာနေကြပြီ။ ငါတို့ အမြန်ဆုံး သတ်ပစ်ရမယ်။ မဟုတ်ရင် စခန်းငယ်လေးတွေက လူတွေ အသက်ရှင်ဖို့ ခက်ခဲလိမ့်မယ်! ပြီးတော့ H မြို့ကြီးက အဆင့်မြင့်ဇွန်ဘီတွေကိုလည်း အမြန်ဆုံး သတ်ပစ်သင့်တယ်။ မင်းတို့ H မြို့ကြီးက ဇွန်ဘီတွေ သတ်ပစ်ဖို့ကို အရင်ဆုံး

ငါတို့ ကူညီနိုင်ပါတယ်။ " ရှောက်ကွမ်ချွင်က ပြောသည်။

ယန်ကျင်းဇီ : " မလိုတော့ဘူး... H မြို့ကြီးဘက်က အဆင့်မြင့်ဇွန်ဘီတွေ အကုန်လုံးကို ငါတို့ သတ်ပြီးလောက်ပြီ။ "

ရှောက်ကွမ်ချွင်နှင့် တခြားသူများ : " ??? "