အပိုင်း ၉၃ ( Little White Face 21 )

ရှောက်ကွမ်ချွင်နှင့် တခြားသူတို့သည် တက္ကသိုလ်မြို့တော် အခြေစိုက်စခန်းမှ လူများနှင့် စကားဖလှယ်ပြောဆိုပြီးနောက် သူတို့သည် တက္ကသိုလ်မြို့တော် အခြေစိုက်စခန်းက ဇွန်ဘီဝိုင်းရံခြင်းကို ကြုံတွေ့ခဲ့ရကြောင်း သိသွားကြသည်။

မြို့ကြီးကို ဝိုင်းရံထားသော ဇွန်ဘီများကြားတွင် အလယ်အလတ်အဆင့်နှင့် အဆင့်မြင့်ဇွန်ဘီများ ထောင်ပေါင်များစွာ ရှိနေသည်ဟု ပြောကြ၏။ ဒါပေမယ့် ယန်ကျင်းဇီက အကုန်လုံးကို သတ်ပစ်လိုက်တယ်!

ဤသတင်းကို ကြားသိရပြီးနောက် ရှောက်ကွမ်ချွင်သည် ယန်ကျင်းဇီကို တောက်လောင်နေသော အကြည့်များဖြင့် ကြည့်လာပြီး သူက ယန်ကျင်းဇီကို စိတ်ဝင်စားနေသည်ဟုပင် တခြားလူများကို သံသယဖြစ်လာစေသည်။

ကျိုးဝမ်ရှိူ့ အနည်းငယ် သတိရှိလာသည်။

ယန်ကျင်းဇီက ကြည့်ကောင်းသည်။ ယခင်ကတည်းက သူသည် ဤအကြောင်းကို စိတ်ပူခဲ့ရလေရာ ယခုဆိုလျှင် ပိုဆိုးသွားသည်။ ဤသည်က သူ့အား မသိမသာ စိုးရွံ့စေပြီး ယန်ကျင်းဇီကို လုယူခံရမည်အား ကြောက်ရွံ့မိသည်။

ဤအခိုက်အတန့်တွင် သူသည် ရှောက်ကွမ်ချွင်နှင့် ယန်ကျင်းဇီတို့ကို အရမ်းရင်းမနှီးစေချင်ပေ။

ကျိုးဝမ်ရှိူ့ ပြောလိုက်သည် : " ချန်ရှုရှင်း၊ မင်း သူတို့ကို စားသောက်ဖို့ ကန်တင်းကို ခေါ်သွားလိုက်ပါ။ ကျင်းဇီနဲ့ ငါ အရင်အိမ်ပြန်နှင့်မယ်။ နေ့လယ်ကျရင် ငါတို့ ဒီကိစ္စကို ဆက်ဆွေးနွေးကြမယ်။ " ကျိုးဝမ်ရှိူ့က 'သူတို့' ဟု ပြောခဲ့သည်။ သေချာသည်မှာ ၎င်းသည် S မြို့ကြီး အခြေစိုက်စခန်းမှ လူများကို ရည်ညွှန်းခြင်းဖြစ်သည်။ ကောင်းကင်နဂါး အခြေစိုက်စခန်းမှ လူများကမူ... ကိစ္စကို ဖြေရှင်းပြီးနောက် သူတို့ကို ထိန်းသိမ်းပြီးပြီဖြစ်သည်။

ကျိုးဝမ်ရှိူ့သည် အမိန့်ပေးပြီး ယန်ကျင်းဇီနှင့် အတူထွက်သွားသည်။ သူတို့သည် တချို့ကိစ္စများကို သီးသန့်ဆွေးနွေးရပေမည်။

ယခင်အတိတ်၌ ယန်ကျင်းဇီသည် သူ စားချင်သမျှ၏ ပါဝင်ပစ္စည်းများကို လဲလှယ်ရန် ကန်တင်းသို့ သွားခဲ့ရသော်ငြား ယခု သူ သွားစရာမလိုတော့ပေ။

အစောက ယန်ကျင်းဇီ ကျိုးဝမ်ရှိူ့နှင့် စကားပြောနေစဉ် ချန်ရှုရှင်းသည် သူ လိုချင်သမျှ ပစ္စည်းအားလုံးကို မှတ်ထားခဲ့သည်။ သူတို့ အိမ်ပြန်ရောက်သောအခါ ပါဝင်ပစ္စည်းများကို အိမ်ရောက်နေပြီဖြစ်သည်။

ကျိုးဝမ်ရှိူ့သည် ပါဝင်ပစ္စည်း လက်တစ်ဆုပ်စာကို ဆွဲယူလိုက်သည် : " ငါ ချက်မယ်။ မင်း အနားယူလိုက်ပါ... မင်း ခုနက S မြို့ကြီး အခြေစိုက်စခန်းက လူတွေ လာတုန်း လှုပ်ရှားလိုက်သေးတယ်။ အဆင်မပြေဖြစ်နေ‌လား? " 

" အဲ့အားအဆင့်လောက်က ငါ့အပေါ်မှာ သက်ရောက်မှုမရှိပါဘူး။ " ယန်ကျင်းဇီက ပြောသည်။ အစောက သူ လှုပ်ရှားသည်နှင့်တပြိုင်နက် သူသည် ရှောက်ကွမ်ချွင်နှင့် တခြားသူများအပေါ်တွင်သာ အစွမ်းထုတ်သုံးခဲ့ပြီး တကယ် မတိုက်ခိုက်ခဲ့သဖြင့် ရိုးရှင်းစွာဖြင့် သူ့ခန္ဓာကိုယ်ကို မသက်ရောက်ချေ။

သို့သော် ကျိုးဝမ်ရှိူ့က အနည်းငယ် စိုးရိမ်နေသေးသည် : " မင်း ခဏနားသင့်တယ်။ ငါ ချက်လိုက်မယ်။ "

" ငါ မင်းအတွက် ချက်ပြုတ်ရတာ ကြိုက်တယ်။ " ယန်ကျင်းဇီက ဆိုသည်။ ကျိုးဝမ်ရှိူ့က သူ့ကို ငြိမ်ငြိမ်နေစေချင်သည်။ ဤသည်က လွန်လွန်း၏။

" ဒါဆို အတူတူလုပ်ကြရင်ရော? " ကျိုးဝမ်ရှိူ့က မေးပြီးနောက် ဟင်းသီးဟင်းရွက် ဆေးကြောလှီးဖြတ်ခြင်း အလုပ်အားလုံးတို့ကို အမြန်လုပ်ဆောင်လိုက်သည်။

ယန်ကျင်းဇီသည် ပါဝင်ပစ္စည်းများကို အိုးထဲသို့ ပစ်ထည့်ပြီး ချက်ပြုတ်ရန် တာဝန်ရှိသည်။

ယန်ကျင်းဇီသည် အေးအေးလူလူဖြင့် ပါဝင်ပစ္စည်းများကို အိုးထဲသို့ ထည့်သွင်းလိုက်သော်လည်း ချက်ပြုတ်ပြီးသော ဟင်းလျာသည် အရသာရှိနေဆဲပင်... ကျိုးဝမ်ရှိူ့သည် ဤသို့သာ ဆက်စားနေလျှင် သူ ဝလာတော့မည်ဟု အမြဲခံစားရသည်။

ကောင်းပြီ၊ သူ အတွေးလွန်သွားသည်။ ဤသည်က ကမ္ဘာ့ပျက်ကပ် ဖြစ်ပြီး ရုပ်ပိုင်းဆိုင်ရာ ပင်ပန်းနွမ်းလျမှုကြောင့် သူ မဝနိုင်ပေ...

" ကျင်းဇီ၊ ဇွန်ဘီတွေကို သတ်တာက မင်းရဲ့ ကျန်းမာရေးအတွက် မကောင်းဘူး ဆို‌တော့ မသွားပါနဲ့။ " ကျိုးဝမ်ရှိူ့က ထမင်းစားနေစဉ် ပြောလာသည်။

သူသည် ဇွန်ဘီများကို သတ်ချင်သော်လည်း ယန်ကျင်းဇီ... သူ ယန်ကျင်းဇီကို မသွားစေချင်။

" ငါ မသွားဘူးဆိုရင် မင်း ဇွန်ဘီတွေအများကြီးနဲ့ ရင်ဆိုင်နိုင်မှာ မဟုတ်ဘူး။ " ယန်ကျင်းဇီက ပေါ့ပေါ့‌ပါးပါး ပြောလိုက်သည်။ ရှောက်ကွမ်ချင် ပြောသည့်အတိုင်း ဇွန်ဘီများ အလွန်များပြားစွာ ရှိနေလျှင်... ယန်ကျင်းဇီ သံသယဖြစ်မိသည်။ သူ့အရင်ဘဝတုန်းက ကျားဝမ်ဟန် တက္ကသိုလ်မြို့တော် အခြေစိုက်စခန်းကို လုယူပြီးတော့ လျင်လျင်မြန်မြန်နဲ့ပဲ ဒီဇွန်ဘီအုပ်စုစီက အသတ်ခံလိုက်ရမယ်လို့!

ထိုနေ့က ကျားဝမ်ဟန်အနားရှိ စွမ်းအားရှင် ထိန်းချုပ်နိုင်သော ဇွန်ဘီအရေအတွက်မှာ သူ၏ ကန့်သတ်ချက်နီးပါး ဖြစ်ပြီး ထိုထက်အနည်းငယ်ပိုသွားလျှင် ထိန်းချုပ်ရန် လုံးဝ ခက်ခဲသွားပြီဖြစ်သည်။ ဇွန်ဘီများသည် သက်ရှိကို တွေ့လျှင် ‌ကိုက်ချင်လိမ့်မည်မှာ သေချာသည်။

ယင်းကား သတင်းကောင်း မဟုတ်... ဤသည်က မှန်ကန်လျှင် အခြေစိုက်စခန်းရှိ သာမန်လူများလည်း သေသွားလိမ့်မည်။

ယခု ဤအန္တရာယ်ကို ရင်ဆိုင်နေရသူမှာ သူတို့ ဖြစ်သည်။

ယန်ကျင်းဇီသည် အမှန်တကယ်ပင် အတော်လေး ပျင်းရိတတ်ပြီး ကိုယ်ကျိုးစွန့်စိတ်ဓာတ် မရှိသော်လည်း ဤကမ္ဘာကြီးသည်... သူ တစ်ခုခုမလုပ်လျှင် ဇွန်ဘီများက လူသားမျိုးနွယ်ကို ဖျက်ဆီးလိမ့်မည်။ ကမ္ဘာတစ်ခုလုံးတွင် အမှောင်စွမ်းအင်များနှင့် ပြည့်နှက်နေသည်... အသက်ရှင်နေတာ ဘာအကျိုးရှိတော့မှာလဲ?

စိတ်ထဲရှိ ဤအတွေးနှင့် ယန်ကျင်းဇီသည် ပြတင်းပေါက်အပြင်ကို လှမ်းကြည့်လိုက်သည်။

ဇွန်ဘီများ မြို့ကို ဝိုင်းရံသည့်နေ့၌ ကျိုးဝမ်ရှိူ့နှင့် တခြားသူများသည် သာမန်ဇွန်ဘီများကို ကြီးမားသော အတိုင်းအတာဖြင့် သတ်ခဲ့ပြီး လေထုထဲရှိ အမှောင်စွမ်းအင်မှာ အချိန်တစ်ခုအထိ အလွန်ထူထပ်သွားသည်။ နောက်ပိုင်း သူသည် အမှောင်စွမ်းအင်ကို စုစည်းပြီး အနက်ရောင်ဥက္ကာခဲတစ်ခုအဖြစ် သိပ်သည်းစေလိုက်သောအခါမှသာ ပိုမိုကောင်းမွန်လာသည်။

သို့သော်လည်း မကြာသေးမီကပင် ကမ္ဘာကြီးတစ်ခုလုံးသည် အနည်းငယ် ပိုမိုမှောင်လာခဲ့သည်။

အခြေစိုက်စခန်းတွင် စိုက်ပျိုးထားသော အစားအစာများနှင့် ပစ္စည်းများတွင်လည်း အမှောင်စွမ်းအင် ပိုမိုများလာသည်။ 

ယခု ဘာမှမမြင်ရတော့ပေ။ ရေရှည်ဆိုလျှင်... စွမ်းရည်မနိုးကြားသေးသူများသည် ဇွန်ဘီများ အကိုက်မခံရလျှင်ပင် ပိုမိုများပြားလာသော အမှောင်စွမ်းအင်နှင့် ထိတွေ့မှုကြောင့်ဖြင့်ပင် ဇွန်ဘီများ ဖြစ်လာနိုင်သည်။

" ကျင်းဇီ၊ မင်း အမြဲတမ်း ဘေးကင်းနေဖို့ ငါ မျှော်လင့်တယ်... " ကျိုးဝမ်ရှိူ့ကို ကြည့်ရသည်မှာ စိတ်ရှုပ်နေပုံပေါ်သည်။

" ဒါဆို မင်း ငါ့ကို ကာကွယ်ရမယ်။ " ယန်ကျင်းဇီ ရယ်လိုက်သည်။

ကျိုးဝမ်ရှိူ့သည် လေးလေးနက်နက် ခေါင်းညိတ်လိုက်၏။ ဘာပဲဖြစ်ပါစေ သူသည် သေချာပေါက် ယန်ကျင်းဇီထက်အရင် သေဆုံးလိမ့်မည်။

နေ့လယ်ခင်းတွင် ကျိုးဝမ်ရှိူ့သည် ဇွန်ဘီများကို သတ်ရန်အကြောင်း ရှောက်ကွမ်ချင်နှင့် ဆွေးနွေးခဲ့သည်။

S မြို့ကြီး အခြေစိုက်စခန်းမှ လူတစ်ဦးသည် ဇွန်ဘီအုပ်စုနောက်သို့ လိုက်နေပြီး တချို့တလေကို သတ်ရန် အခွင့်အရေးယူလိမ့်မည် ဖြစ်သော်ငြား ထိုဇွန်ဘီများက ပိုပိုသန်မာ‌လာနေသောကြောင့် ဤသည်က ဇွန်ဘီများ၏ အင်အားကို အားနည်းစေနိုင်ခြင်း မရှိချေ။

ဤကိစ္စနှင့်ပတ်သက်လာလျှင် ရှောက်ကွမ်ချင်သည် အနည်းငယ် ဝေဝါးသွားသည်။

" ဒါက ပုံမှန်ပါပဲ။ ဇွန်ဘီအသေတွေထဲက အမှောင်စွမ်းအင်ကို ကျန်တဲ့ဇွန်ဘီတွေက စုပ်ယူလိုက်တော့ ကျန်တဲ့ဇွန်ဘီတွေ ပိုမိုသန်မာလာတယ်။ " ယန်ကျင်းဇီ ပြောလိုက်သည်။

" ဘာအမှောင်စွမ်းအင်လဲ? " ရှောက်ကွမ်ချင်က မေးသည်။

" မင်းတို့ အဲ့ဒါကို သုတေသနမလုပ်ရသေးဘူးလား? " ယန်ကျင်းဇီက ပြုံးလျက် မေးပြီးနောက် သူ့ကိုယ်ပိုင် မှန်းဆချက်ကို ပြောပြလိုက်သည်။

ရှောက်ကွမ်ချင်သည် တခဏမျှ အေးခဲသွားပြီး အနားရှိ လေစွမ်းအားရှင်ကို ရုတ်တရက် လှည့်ကြည့်လိုက်သည်။ " မင်း ဒီသတင်းကို ချက်ချင်း သွားပြန်ပို့ရမယ်! " 

S မြို့ကြီး အခြေစိုက်စခန်းသည် ဇွန်ဘီများကို လေ့လာနေသည်မှာ တစ်နှစ်ကျော်ပြီဖြစ်ပြီး စွမ်းအားရှင်များကိုလည်း စစ်ဆေးမှုများစွာ လုပ်ဆောင်ခဲ့သည်။ သို့သော် ကံမကောင်းစွာဖြင့် ဘာမှရှာမတွေ့ခဲ့ချေ။

ယခု ယန်ကျင်းဇီ ဤသို့ပြောလာသောအခါ ရှောက်ကွမ်ချင်သည် ရုတ်တရက် သဘောပေါက်သွားသည် – ဒီလိုမျိုး ရှိနေတာကိုး!

" ဒါက ငါ ပြုစုထားတဲ့ အချက်အလက်ပါ။ " ယန်ကျင်းဇီသည် သူ ရေးထားသော စာအုပ်ငယ်ကို တစ်ဖက်လူထံသို့ တိုက်ရိုက်ပေးလိုက်သည်။

လေစွမ်းအားရှင်သည် ယန်ကျင်းဇီဘက်သို့ ခေါင်းညိတ်ပြပြီး ဆိုင်ကယ်တစ်စီး တောင်းကာ ထွက်ခွာသွားသည်။

ယနေ့ခေတ်တွင် လမ်းအများအပြားက မချောမွေ့တော့သဖြင့် ကားမောင်းခြင်းမှာ ဆိုင်ကယ်မောင်းခြင်းလောက် မမြန်တော့သည်မှာ သေချာသည်။

လေစွမ်းအားရှင်က စာပို့သူဖြစ်ရခြင်းအတွက်မူ... လမ်းတွင် အတားအဆီး ရှိလျှင် လေစွမ်းအားရှင်သည် ဆိုင်ကယ်ကို ကျောပေါ်တွင် သယ်၍ လေစွမ်းရည်အကူအညီနှင့် ထွက်ပြေးနိုင်သည်။

အဆင့်မြင့်ဇွန်ဘီ အုပ်စုကြီးတစ်စုနှင့် ‌ကြုံတွေ့ရလျှင်ပင်... သူ့ကဲ့သို့ အားကောင်းသော လေစွမ်းအားရှင်တစ်ဦးသည် ဇွန်ဘီများထက် ပိုမိုမြန်ဆန်စွာ ပြေးနိုင်ပေသည်။

အချက်အလက် ထုတ်ပေးပြီးနောက် ယန်ကျင်းဇီသည် ရှောက်ကွမ်ချင်ကို ကြည့်လိုက်သည် : " ငါတို့ မနက်ဖြန် ထွက်ကြမယ်။ "

" ကောင်းပြီ။ ကျေးဇူးတင်ပါတယ်! " ရှောက်ကွမ်ချင်သည် ယန်ကျင်းဇီအား ကျေးဇူးတင်စွာဖြင့် ကြည့်သည်။

" ငါ့ကို ကျေးဇူးမတင်ပါနဲ့။ လိုအပ်တဲ့အချိန်မှာ ငါနဲ့ ဝမ်ရှိူ့ကို ကာကွယ်ပေးရင် ရပြီ။ " ယန်ကျင်းဇီက ပြောသည်။

ရှောက်ကွမ်ချင် : " ??? " သူတို့က အလွန်သန်မာသည်။ အကာအကွယ် လိုနေသေးတာလား?

ယန်ကျင်းဇီက ဆက်ပြောသည် : " ငါပဲဖြစ်ဖြစ်၊ ဝမ်ရှိူ့ပဲဖြစ်ဖြစ် ငါတို့ ဒဏ်ရာရရင် ဇွန်ဘီတွေကို သတ်ဖို့ မကူညီတော့ဘူး။ "

ရှောက်ကွမ်ချင်သည် ယန်ကျင်းဇီ၏ ဆိုလိုရင်းကို နားမလည်နိုင်ပေ။ ယန်ကျင်းဇီက အလွန်သန်မာကြောင်း သူ သိသည်။ ဒါပေမယ့် လူတိုင်းက ဇွန်ဘီသတ်နေတာကို ဘာလို့ သူတို့က ယန်ကျင်းဇီနဲ့ ကျိုးဝမ်ရှိူ့ကို အထူးတလည် ကာကွယ်ရမှာလဲ?

ဒါက မလိုအပ်သင့်ဘူးမလား?

ရှောက်ကွမ်ချင်သည် ယန်ကျင်းဇီ မလှုပ်ရှားခင်အထိ နားလည်ဖို့ ခက်ခဲနေခဲ့သည်...

S မြို့ကြီးနှင့် H မြို့ကြီးကြားရှိ မြို့ငယ်လေး တစ်မြို့တွင် လူတစ်စုသည် ရှေ့မှ ထွက်ပြေးနေကြပြီး မရေမတွက်နိုင်သော ဇွန်ဘီများက နောက်မှလိုက်နေကြသည်။

S မြို့ကြီးဘက်တွင် စွမ်းအားရှင် အများအပြားကို စုစည်း၍ ပြောင်းရွှေ့နေသော ဇွန်ဘီအုပ်စုနောက်သို့ လိုက်ပါပြီး နှောင့်ယှက်ရန် အကောင်းဆုံး ကြိုးစားလျက် ရှေ့ဆက်သွားရာလမ်းတွင် ဇွန်ဘီများ ကြုံတွေ့နိုင်သော လူသားများကို ကယ်ထုတ်ရန် နည်းလမ်းများ ရှာဖွေကြသည်။

သို့ရာတွင် ကိစ္စများက သိပ်အဆင်မပြေချေ။

နိုင်ငံတစ်ဝှမ်းတွင် လုံခြုံရေးစခန်းငယ်များ အများအပြားရှိပြီး ဤလုံခြုံရေးစခန်းငယ်အများစုကို အင်အားကြီးစွမ်းအားရှင်တချို့က တည်ဆောက်ထားသည်။

ကမ္ဘာပျက်ပြီးနောက် ခေတ်ကာလတွင် သူတို့က အမာခံနေရာကောင်းတစ်ခုကို ရှာတွေ့ပြီး ရိက္ခာများကို စုဆောင်းကာ အကြာကြီးနေရန် စီစဉ်ထားကြသည်။ ရုတ်တရက် သူတို့ကို ထွက်ခွာရန် တောင်းဆိုခံရသောအခါ ဘယ်လိုလုပ် သူတို့ ဆန္ဒရှိပါ့မလဲ?

အပြင်က နေရာတိုင်းမှာ ဇွန်ဘီတွေ ရှိတယ်!

၎င်းကို ‌ထားလိုက်ဦး။ S မြို့ကြီး အခြေစိုက်စခန်းမှ လူများသည် ရွံရှာဖွယ်ကောင်းသော အခြေစိုက်စခန်းငယ် တချို့နှင့် မကြာမကြာ ကြုံတွေ့ရတတ်သည် – ပြဿနာရှိတဲ့ အပြုအမူများ ရှိသော အယူသီးသည့် စရိုက်ရှိသူတချို့က အဆုံးသတ်နေ့ရက်တွေမှာ သာမန်လူတွေ စိတ်ကူးမယဉ်နိုင်တဲ့ ရွံစရာကိစ္စတွေ အများကြီးကို လုပ်ခဲ့ကြတယ်!

တစ်ခါတစ်ရံတွင် ဇွန်ဘီများ ရောက်လာသည်ကို မစောင့်ဘဲ S မြို့ကြီး အခြေစိုက်စခန်းမှ စွမ်းအားရှင်များသည် သူတို့ကို အရင်သတ်ပစ်လိုက်ကြလိမ့်မည် ဖြစ်သည်။

သို့သော် အလွန်လိုက်နာသော လူတချို့လည်း ရှိသည်။

မနေ့က အခြေစိုက်စခန်းငယ်တခုမှ လူများသည် သူတို့၏ ဖျောင်းဖျမှုကြောင့် စုပေါင်းပြောင်းရွှေ့နေထိုင်မှုကို ဆောင်ရွက်ခဲ့ပြီး သူတို့လည်း ကူညီခဲ့သည်။

ရလဒ်ကမူ ရွှေ့ပြောင်းနေထိုင်စဉ် မတော်တဆမှုတစ်ခု ဖြစ်ပွားခဲ့သည်။

ဇွန်ဘီများသည် အချိန်စောရောက်လာပြီး သူတို့နောက်ပင် ပြေးလိုက်လာကြ၏။

S မြို့ကြီး အခြေစိုက်စခန်းသည် စွမ်းအားရှင်များ၏ အင်အားကို မြှင့်တင်ရန် နည်းလမ်းအစုံအလင်ကို သုတေသနပြုလုပ်ခဲ့သည်။ စွမ်းရည်အမျိုးမျိုး၏ ဥက္ကာခဲများကိုလည်း ရရှိနိုင်သဖြင့် ယေဘုယျအားဖြင့် စွမ်းအားရှင်များသည် အလွန်သန်မာကြသည်။

ဇွန်ဘီများကို ခြေရာခံလိုက်ခြင်းအတွက် တာဝန်ရှိသော စွမ်းအားရှင်များ အုပ်စုတွင် ရှောက်ကွမ်ချင်နှင့် တခြားသူများအတိုင်း အင်အားတူညီသော စွမ်းအားရှင် ဆယ်ဦးခန့် ရှိသည်။ ထို့အပြင် အနည်းငယ် ပိုမိုအားနည်းသော စွမ်းအားရှင်များ ရာချီရှိသေးသည်။

ထို့အပြင် ဤစွမ်းအားရှင်အုပ်စုတွင် နေရာလပ်အမျိုးအစား စွမ်းအားရှင်များလည်း ရှိပြီး ထိုကဲ့သို့ ရှားပါးသော နေရာလပ်အမျိုးအစား စွမ်းအားရှင်များ၏ နေရာလပ်များကို အပူလက်နက်များနှင့် အပြည့်ဖြည့်ထားသည်။

သူတို့ ဇွန်ဘီများကို ရပ်တန့်နိုင်သည်မှာလည်း ဤအပူလက်နက်များကြောင့်လည်း ပါသည်။

သို့သော် ယခုမူ သူတို့ မလုပ်ဆောင်နိုင်သေး။

သူတို့၏ရှေ့တွင် ထောင်သောင်းချီသော ဇွန်ဘီများ ရှိပြီး သူတို့၏ နောက်ဘက်တွင် ထွက်ပြေးနေကြသော အခြေစိုက်စခန်းငယ်မှ လူများ ရှိသည်...

S မြို့ကြီး အခြေစိုက်စခန်းမှ လူများသည် အံကြိတ်၍ တောင့်ခံထားကြသည်။

" ဒီဇွန်ဘီတွေက ပိုပိုပြီး အားကောင်းလာတယ်။ သူတို့ လွတ်ပါ့မလား? " စစ်သားငယ်က မျက်ရည်ဝဲကာ မေးသည်။

" သူတို့ လွတ်မြောက်နိုင်သည်ဖြစ်စေ မလွတ်မြောက်နိုင်သည်ဖြစ်စေ ငါတို့ အစွမ်းကုန် လုပ်ရမယ်! " အဖွဲ့ကို ဦးဆောင်နေသော အမျိုးသားက ပြောသည်။

စစ်သားလေးသည် မျက်ရည်စက်လက်ဖြင့် ခေါင်းညိတ်ကာ ဆက်လက်တောင့်ခံနေသည်။

သို့ရာတွင် အဖွဲ့ကို ဦးဆောင်သူသည် မနေနိုင်ဘဲ မျက်နှာသုတ်လိုက်ပြီး သူ့မျက်နှာပေါ်မှ ရေစက်များကို ဖယ်ရှားပစ်လိုက်သည်။ ၎င်းက ချွေးလား၊ မျက်ရည်လား သူ မသိ။

သူတို့ ထပ်မံတောင့်ခံနိုင်တော့မည် မဟုတ်ဘဲ နောက်မှလူများသည်လည်း... လွတ်မြောက်နိုင်စွမ်း မရှိလောက်တော့။

ဒါပေမယ့် သူတို့ ဘာလုပ်နိုင်သေးလို့လဲ?

ထွက်ပြေးလို့တော့ မဖြစ်ဘူးလေ၊ ဟုတ်တယ်မလား?

" ငါတို့ရဲ့ မစ်ရှင်က ဇွန်ဘီတွေကို သတ်ဖို့ပဲ! မင်း တတ်နိုင်သလောက် တစ်ကောင်ပိုသတ်ရမယ်! " ထိုလူက မျက်နှာသုတ်ပြီးနောက် အော်လိုက်သည်။

တိုက်ခိုက်နေသူများ၏ စိတ်ဓာတ်များမှာ ဆွဲလှုပ်ခံလိုက်ရသည်... သူတို့ထဲမှ တစ်ဦးကို ဇွန်ဘီများ ဆွဲသွားကြသည်။

ထိုသူသည် မလွတ်မြောက်နိုင်တော့ကြောင်း သဘောပေါက်သွားပြီး သူ့ကိုယ်သူ ဖောက်ခွဲပစ်လိုက်သည်...

S မြို့ကြီး အခြေစိုက်စခန်းမှ စစ်သားများသည် မျှော်လင့်ချက်ကုန်ဆုံးနေပြီဖြစ်ပြီး သူတို့ရှေ့မှ ထွက်ပြေးသွားသူများလည်း သာလွန်ခြင်းမရှိပေ။

အများစုမှာ သာမန်လူများ ဖြစ်ပြီး အမြန်မပြေးနိုင်ချေ။

သူတို့မှာ နောက်ကလိုက်နေတဲ့ ဇွန်ဘီတွေ မရှိပေမယ့် ရှေ့က ဇွန်ဘီတွေကိုလည်း ဆွဲဆောင်မိတယ်!

ပြေးနိုင်သမျှ ပြေးနေကြသော်ငြား သူတို့၏ ကားတချို့မှာ ပျက်နေသည့်အပြင် လမ်းက ပိတ်ဆို့နေသည်... အများစုက ခြေနှစ်ချောင်းဖြင့်သာ ပြေးလွှားနိုင်သည်။

သူတို့ကို ပြင်းပြင်းထန်ထန် ကာကွယ်နေသော အနောက်မှ စစ်သားများနှင့် အခြားလူများ၏ အနစ်နာခံမှုကို မဖြုန်းတီးသင့်ဟု သူတို့ ခံစားရသောကြောင့်သာမဟုတ်လျှင်... တချို့လူများက ဆက်မပြေးတော့ဘဲ နေလိုက်မည်မှာ ကြာပြီဖြစ်သည်။

သူတို့ အရမ်းပင်ပန်းနေပြီ!

ဤအချိန်တွင် သူတို့ထံသို့ ဦးတည်မောင်းနှင်လာသော ဆိုင်ကယ်များစွာကို သူတို့ ရုတ်တရက် တွေ့လိုက်ရသည်။

သူတို့သည် ပင်ပန်းလွန်းသောကြောင့် အသက်ရှူရန် ခက်ခဲပြီး လည်ချောင်းများ နာကျင်ပူလောင်နေသော်လည်း ဤလူများကို တွေ့သောအခါ သူတို့သည် အော်ဟစ်နေဆဲဖြစ်သည်။ " ရပ်လိုက်! အဲ့မှာ ဇွန်ဘီတွေ ရှိနေတယ်! "

ဤလူများတွင် မော်တော်ဆိုင်ကယ်များ ရှိပြီး လွတ်မြောက်နိုင်သေးသည်... ဇွန်ဘီတွေစီကို ပြေးဝင်မသွားနဲ့!

ဒါပေမယ့် အဲလူတွေက မရပ်ဘူး!

ထွက်ပြေးလာသူများသည် မသိလိုက်ဘဲ နောက်သို့ပြန်လှည့်ကြည့်မိကြပြီး အနောက်ဘက်မှ ဇွန်ဘီများသည် နီးသထက် နီးလာကာ ၎င်းတို့ကို မြင်တွေ့နိုင်နေပြီဖြစ်သည်... သူတို့ မြင်နိုင်ပြီး ဆိုင်ကယ်စီးသူများလည်း သေချာပေါက် မြင်တွေ့နိုင်သော်ငြား ဇွန်ဘီများထံသို့ အမြန်သွားရောက်နေဆဲပင်။

ဤလူများသည်လည်း သူတို့ကို ကယ်တင်ရန် ရောက်လာကြသော်လည်း ကံမကောင်းစွာဖြင့် ဇွန်ဘီများ အလွန်များပြားနေရာ ဤလူများသည် ကျားပါးစပ်ထဲသို့ ဝင်ရောက်သွားသော သိုးများ ဖြစ်သွားလိမ့်မည်ကို သူတို့ စိုးရိမ်မိသည်။

လူတချို့က မငိုဘဲ မနေနိုင်ကြတော့။

ဤအချိန်တွင် မော်တော်ဆိုင်ကယ်ဖြင့် ရှေ့မှ သွားနေသော ရှောက်ကွမ်ချင်၏ မျက်ဝန်းများထဲတွင် ဇွန်ဘီများကို မုန်းတီးမှုများဖြင့် ပြည့်နေသည်။

ဇွန်ဘီတွေနဲ့ အသေအကြေ တိုက်ခိုက်နေတဲ့ သူ့ရဲ့ ရဲဘော်ရဲဘက်တွေကို သူ တွေ့ခဲ့ရပြီး အခု သူ လူသွားကယ်ချင်တယ်!

ဤအကြိမ် ထွက်လာသောအခါ ယန်ကျင်းဇီနှင့် ကျိုးဝမ်ရှိူ့တို့သည် တက္ကသိုလ်မြို့တော် အခြေစိုက်စခန်းမှ စွမ်းအားရှင်များအားလုံးနှင့် ကောင်းကင်နဂါး အခြေစိုက်စခန်းမှ လူများကို ခေါ်လာခဲ့သည်... စုစုပေါင်း လူထောင်ချီရှိသည်။

သို့သော်လည်း လူစုကြီးသည် ဖြည်းညှင်းစွာ ရွေ့လျားနေပြီး ယခုအခါ ဆိုင်ကယ်များဖြင့် ရှေ့သို့ အပြေးအလွှား သွားနေကြသူများမှာ ဒါဇင်အနည်းငယ်သာ ဖြစ်သည်။

ကျိုးဝမ်ရှိူ့သည် အသင်း၏အလယ်တွင် ဆိုင်ကယ်မောင်းသည်။ သူ ဇွန်ဘီအုပ်စု၏ ရှေ့သို့ ရောက်သောအခါ ရှောက်ကွမ်ချင်နှင့် တခြားသူများသည် ဇွန်ဘီများကို တိုက်ခိုက်နေကြပြီဖြစ်သည်။

" ယန်သခင်လေး၊ ကျေးဇူးပြုပြီး ကူညီပါ! " ရှောက်ကွမ်ချင်က အော်လိုက်သည်။

ယန်ကျင်းဇီသည် တစ်သင်းလုံးတွင် အသန်မာဆုံး ဖြစ်သင့်သော်လည်း ဤတစ်လျှောက်လုံး သူက လှုပ်ရှားမှုတစ်ခုပင် မပြုလုပ်ခဲ့ပေ။

ရှောက်ကွမ်ချင်တွင် ရှိ‌သည့် အင်အားကြောင့် ယန်ကျင်းဇီကို လေးစားမှုအားလုံး လျော့ပါးသွားသည်။

ကံကောင်းထောက်မစွာဖြင့် ဤအချိန်တွင် ယန်ကျင်းဇီကဖြေလာသည်။ " အင်း။ "

ကျိုးဝမ်ရှိူ့သည် ဆိုင်ကယ်ကို ရပ်လိုက်သော်လည်း သူနှင့် ယန်ကျင်းဇီတို့က မလှုပ်ရှားပေ။ သူတို့က ဆိုင်ကယ်ပေါ်တွင် ထိုင်ပြီး ဇွန်ဘီအုပ်စုကို ငြိမ်သက်စွာ ကြည့်နေကြသည်။

ထားလိုက်ဦး။ ခဏတာ ငြိမ်သက်ပြီးနောက် ကျိုးဝမ်ရှိူ့က ဆိုင်ကယ်နှိုးပြီး လှည့်ပြေးသည်။

ရှောက်ကွမ်ချင် : " ... " ဒါက ဘာကိုဆိုလိုတာလဲ? ဒီလူနှစ်ယောက် ထွက်ပြေးသွားတာလား?

တကယ် ထွက်ပြေးသွားကြပြီလား?

ရှောက်ကွမ်ချင်သည် စိတ်ရှုပ်သွားသော်လည်း သူ့အနားရှိ မောပန်းနွမ်းနယ်နေသော စစ်သားတစ်ဦးက မေးသည်။ " ငါ လျှောက်မြင်နေတာလား? ဘယ်လိုလုပ် ဒီဇွန်ဘီတွေ လဲကျကုန်တာလဲ? "

ရှောက်ကွမ်ချင်သည် ခေါင်းလှည့်ကြည့်လိုက်ပြီး သူ လိုက်နေသော ဇွန်ဘီအများအပြားထဲရှိ အများစုမှာ ရုတ်တရက် လဲကျသွားပြီး သာမန်အလောင်းများ ဖြစ်သွားကြသည်ကို တွေ့လိုက်ရသည်။

ထို့အပြင် ကျန်ဇွန်ဘီများလည်း အလွန်အမင်း ထိခိုက်လွယ်လာသည်။

ဒါတွေအကုန်လုံးက မှော်ဆန်လွန်းတယ်

... ယန်ကျင်းဇီနဲ့ သက်ဆိုင်နေတာလား?

ရှောက်ကွမ်ချင်တွင် ထိတ်လန့်ဖွယ်ကောင်းသော ခန့်မှန်းမှုတစ်ခု ရှိလာသော်လည်း ထပ်တွေးရန် အချိန်မရှိတော့ပေ – ဒီလိုအချိန်မျိုးမှာ သူ လုပ်နိုင်တဲ့ တစ်ခုတည်းသော ကိစ္စကတော့ ဇွန်ဘီတွေကို ပိုသတ်ဖို့ပဲ!