MM Story Teller

Chapter 35

Viewers 3k

🦊Chapter 35

Arc 3 - ဖျော်ဖြေရေးလောက၏ လရောင်ဖြူလေး

3.10 အခုချိန်မှာတော့ ညီငယ်လေးလို့ပဲ သတ်မှတ်ထားလိုက်မယ်

ပိုင်ယွဲ့၏ ပထမဆုံး ရုပ်ရှင်ကားကို "ဝါးမြင်းရုပ်" ဟု နာမည်ပေးထားလေသည်။ ၎င်းက ရုပ်ရှင်ကား၏ အကြောင်းအရာနှင့် မသက်ဆိုင်သော နာမည်ပင်။ ရုပ်ရှင်က အချိန်စာရင်းအတိုင်း ပြီးဆုံးသွားပြီး စိစစ်ရေးဘုတ်အဖွဲ့ကို ဖြတ်သန်းပြီးနောက် နိုင်ငံခြားရုပ်ရှင်ပွဲတော်သို့ ဝင်နိုင်သွားလေသည်။ သူတို့က ၎င်းရုပ်ရှင် တရုတ်တွင် မထုတ်လွှင့်သေးမီ ဆုအတွက် လျာထားခံရသည်ဟူသော သတင်းကို ရရှိရေး စောင့်နေကြလေသည်။

ထိုအရာပြီးမှ ၎င်းရုပ်ရှင်ကို လူထုကို ချပြမည်ပင်။

ထိုကား၏ ဒါရိုက်တာ မည်သူမှန်း မသိရဘဲ ယခုလက်ရှိကျော်ကြားနေသော စွန်းကျန့်အန်းမှအပ မည်သည့် နာမည်ကြီး သရုပ်ဆောင်များမှလည်း မပါဝင်ပေ။ သူတို့က ပရိုမိုးရှင်းအတွက် များစွာ အကုန်မခံခဲ့ဘဲ အင်တာနက်ပေါ်တွင်သာ ထိုရုပ်ရှင်အကြောင်း လူတိုင်းသိစေရန် အဓိက တွန်းအားပေးကာ တင်ခဲ့လေသည်။

ထိုအချိန်တွင် ရွှယ်လင်ပါဝင်သော ရှိုးစီးရီး စတင် ထုတ်လွှင့်ပြသနေပြီ ဖြစ်ရာ အပိုင်းနှစ်ပိုင်းပင် ထုတ်လွှင့်ပြီးနောက် ကြည့်ရှုနှုန်းနှင့် အဆင့်သတ်မှတ်ချက် မြင့်တက်လာပြီဖြစ်သည်။ ထို့အပြင် ရွှယ်လင်က သူ၏ သရုပ်ဆောင်မှုဖြင့် လူအများ၏ အာရုံကို ဆွဲဆောင်နိုင်ခဲ့ပြီ ဖြစ်သည်။

သို့သော် သူ၏ ပရိတ်သတ်အများစုသာ ထိုရှိုးစီးရီးကို လိုက်ပါကြည့်ရှုလေသည်။ ပရိုဂရမ်ထဲတွင် တိုတောင်းသော ဖော်ပြချက်အပြင် လူအနည်းစုသာ သူ၏ သတင်းအချက်အလက်များကို အသေးစိတ်ရှာဖွေကြည့်လေသည်။ သို့သော် ပရိုမိုးရှင်း စတင်လိုက်သည်နှင့် လူအများစုက သူသည် ပရိုဂရမ်တွင် ဧည့်သည်တော်ဖြစ်ကြောင်း သိလိုက်ရလေသည်။

လုံးဝ မကျော်ကြားသေးသည့်ရွှယ်လင်က ရှိုးတွင် အမြဲတမ်းဧည့်သည်အဖြစ် ပါဝင်လာမှုကို အစပိုင်းတွင် မေးခွန်းထုတ်ကြလေသည်။ သူ ဦးဆောင်သည့် အပိုင်းတွင် သူ၏ ရမှတ်သာ မကောင်းခဲ့ပါက ပထမဆုံးအပိုင်းတွင် ဥာဏ်ကောင်းသော နောက်ဆက်တွဲ သရုပ်ဆောင်မှုများကြောင့်သာ မဟုတ်ခဲ့ပါက လူတိုင်းကို မရင့်ကျက်သော ဇာတ်လမ်းများဖြင့် လှည့်စားကာ လူသတ်သမားအနေဖြင့် မလွတ်မြောက်နိုင်ခဲ့ပါက ပရိတ်သတ်အများအပြားက သူတို့၏ မကျေနပ်ချက်များကို ထုတ်ပြောမည်မှာ ကြာလှပြီပင်။

ထို့သို့ဖြင့် သူနှင့် စွန်းကျန့်အန်း သရုပ်ဆောင်ခဲ့သော အပိုင်းသည်ပင် ထိုအချိန်တွင် ထုတ်လွှင့်နေပြီဖြစ်သည်။

သူတို့က တစ်နည်းနည်းဖြင့် ရုပ်ပိုင်းဆိုင်ရာအရ အနည်းငယ် ဆင်တူသည်။ စွန်းကျန့်အန်း၏ ပင်ကိုပုံစက နူးညံ့ညင်သာကာ ချဥ်းကပ်ရလွယ်သော မင်းသားလေးသဖွယ် ဖြစ်နေသည်။ သူတို့အတူတူ ဘေးချင်းယှဥ်ရပ်နေချိန်တွင် တစ်စုံတစ်ယောက်က သူတို့ကို နှိုင်းယှဥ်ကြည့်မည်မှာ မလွဲဧကန်ပင်။ စွန်းကျန့်အန်း၏ ပရိတ်သတ်အများစုက သူတို့ အိုင်ဒေါ၏ မဟာဆန်သောစတိုင်ကို ကိုယ်ရည်သွေးကာ ကြွားဝါရသည်ကို နှစ်သက်သော်လည်း ယခုချိန်တွင်တော့ သူတို့ အတော်လေး တိတ်ဆိတ်နေတော့သည်။

အဘယ့်ကြောင့်ဆိုသော် သူတို့နှစ်ယောက်ယှဥ်ရပ်နေချိန်တွင် စွန်းကျန့်အန်းက ထိုသူကို မည်သည့်ရှုထောင့်ကမျှ အနိုင်မယူနိုင်သည်ကို မျက်လုံးရှိသူတိုင်း တွေ့နေရသောကြောင့်ပင်။ ပင်ကိုစရိုက်ပင်ဖြစ်စေ ရုပ်ရည်ပင်ဖြစ်စေ ရွှယ်လင်က သူ့ထက်ပိုသာနေသည်။ အထူးသဖြင့် သူက သွေးနှောကပြား ဖြစ်နေသည့်အတွက် သူ၏ မျက်လုံးများနှင့် ဆံပင်မျးက အထူးသဖြင့် မိန်းကလေးငယ်လေးများအတွက် စိတ်ကူးယဥ်ဖွယ် ဖြစ်နေသည်။ နောက်ဆုံးတွင် သူက အတွေးအခေါ်ပိုင်းနှင့် နည်းလမ်းကျကျစဉ်းစားနိုင်မှုအပိုင်းတွင်လည်း ရွှယ်လင်ကို မယှဥ်နိုင် ဖြစ်နေသည်။ သူ၏ ရယ်မောနေပုံမှာ လူတိုင်း၏ အရှိန်အဟုန်ဖြင့် မကိုက်ညီသောကြောင့် ဖိအားပေးနေသလိုပင်။

ပရိုဂရမ်တွင် အပျော်သဘော ပါဝင်သော ယှဥ်ပြိုင်နိုင်မှုစွမ်းအား ချို့တဲ့နေသည့် မိန်းကလေး တစ်ယောက်ရှိ၏။ စွန်းကျန့်အန်းက ဥာဏ်ကောင်းမှုနှင့် ရယ်စရာဖြစ်မှုကြားတွင် တစ်နေလေသည်။ ၎င်းကြောင့် အခြားသူများက သူနှင့် ဆက်သွယ်ရန်အတွက် ခက်ခဲစေသည်။

ထိုအပိုင်းက ရွှယ်လင်ကို ပရိတ်သတ် အများအပြားရနိုင်စေရန် ကူညီပေးခဲ့သည်။ မူလက စွန်းကျန့်အန်းကို လာအားပေးနေသည့် ပရိတ်များကိုလည်း သူ ခိုးယူနိုင်ခဲ့လေသည်။ သူတို့နှစ်ယောက် ရုပ်ရှင်တွင် တူတူပါဝင်ထားသည်ကို ကြားသောအခါ လူအများက သွားကြည့်မည်ဟု ပြောနေကြလေသည်။

ယခုနှစ်တွင် ထူးခြားကျော်ကြားလာသော သရုပ်ဆောင်များ ပေါ်မလာသေးသည့်အတွက် ငယ်ရွယ်မှုကို နောက်ခံထားသော ရုပ်ရှင်မျိုးကို တွန်းအားပေးရန် မဖြစ်နိုင်သော်လည်း ရွှယ်လင်တွင် နောက်ခံအင်အားရှိလေသည်။ ပိုင်ကွမ်းအင်တာတိမ်းမန့်တွင် သူ၏ ကိုယ်ပိုင်ရုပ်ရှင်ရုံအများအပြားက တစ်နိုင်ငံလုံးအနှံတွင် ရှိလေသည်။ ရုပ်သံလိုင်းတွင် ထုတ်လွှင့်ရန် စီစဥ်မှုကို ပိုင်ဟောက်၏ စကားတစ်ခွန်းဖြင့်ပင် လုပ်နိုင်သည်။

တစ်ချိန်တည်းတွင် နိုင်ငံခြားမှ ဇာ့ခီရယ် ရုပ်ရှင်ပွဲတော်ကလည်း စတင်နေပြီ ဖြစ်သည်။

၎င်းက အော်စကာပွဲတော်ခန့် မကြီးမားသော်လည်း ၎င်း၏ ရုပ်ရှင်ရွေးချယ်နိုင်မှု အရည်အချင်းကြောင့် နာမည်ကြီးလေသည်။ ထိုရုပ်ရှင်ပွဲတော်က ရွှယ်လင်၏ တက္ကသိုလ်နှင့် ပူးပေါင်းထားသည်ပြီး ဒါရိုက်တာအသစ်များကို ပြုစုပျိုးထောင်ပေးနေသည်မှာ နှစ်ပေါင်းများစွာ ကြာနေပြီပင်။ ထိုပွဲတော်တွင် ဆုအတွက် ပါဝင်သော ရုပ်ရှင်များက နည်းပညာအမြင်တွင် အတွေ့အကြုံ မရှိိိနိုင်သော်လည်း ၎င်းတို့၏ အဓိကဗဟိုချက်က တစ်ခါတစ်ရံတွင် ရုပ်ရှင် ဝေဖန်သူများ၏ အားပေးမှုကို ရရှိလေသည်။

အတိတ်ဘဝ၌ ထိုပွဲပေါ်တွင် ၎င်းရုပ်ရှင်က ဆုအများအပြားရရှိခဲ့သည့်အတွက် စွန်းကျန့်အန်းက ကြေငြာမှုအများအပြားကို ထုတ်ပြန်ခဲ့ပြီး အဖွဲ့နှင့်အတူလိုက်ပါခဲ့သည်။ သူ၏ အေးဂျင့်က သူမည်သည့်အရာများတွေးနေသည်ကို မသိနိုင်သော်လည်း ရွှေရောင် လက်မှတ်များအပြည့်ဖြင့် ထောက်ပံ့ခံထားရသော စွန်းကျန့်အန်း တောင်းဆိုသမျှ လုပ်ပေးရန်သာ တတ်နိုင်လေသည်။

ဆုပေးပွဲ အခမ်းအနားတွင် သရုပ်ဆောင်များက ကောဇောနီပေါ်တွင် စမတ်ကျကျလမ်းလျှောက်လာလေသည်။

သတင်းမီဒီယာများက သူတို့ကို အာရုံမစိုက်သော်လည်း သူတို့က ခေါင်းများကိုမော့ကာ ဝင်သွားကြလေသည်၊

အကူစနစ်လေး၏ ကျေးဇူးကြောင့် ရွှယ်လင်က ထိုရုပ်ရှင်က ဆန်ခါတင်စာရင်းမည်မျှရရှိကာ ဆုအများအပြားကို ရရှိမည်ကို ကြိုသိခဲ့လေသည်။ သူက လုံးဝစိတ်လှုပ်ရှားမနေဘဲ တည်ငြိမ်နေကာ ကျီလွေ့ရှစ်၏ မြှောက်ပင့်မှုကိုပင် အပြုံးလေးဖြင့်သာ တုံ့ပြန်လိုက်သည်။

ပိုင်ဟောက်က သူ၏ ညီငယ်လေးနှင့် ခရီးတွင်တူတူ လိုက်ပါခဲ့ရသည်။ သူက ယခုတလောတွင် "ညီငယ်လေးနှင့် အတူမရှိနိုင်ပါက သေဆုံးရမည်" ဟူသောရောဂါကို ခံစားနေရပြီး သူ၏ ညီငယ်လေးနှင့်တူညီသော ကောင်းကင်အောက်မှလေကို ရှူရန်လိုအပ်ပေသည်။ ထို့ကြောင့် သူ၏ နေ့ရက်များကို သူ့ညီငယ်လေးဖြင့် ပူးကပ်နေရင်း အချိန်ကုန်ဆုံးစေခဲ့သည်။ သူ ရုပ်ရှင်ပွဲတော်သို့ လာခဲ့သော်လည်း တောင်လိုပုံနေသော အလုပ်များကြောင့် အခမ်းအနားကိုမူ မတက်ရောက်နိုင်ခဲ့ပေ။ အမှန်တွင် မတက်ရသည့် အဓိကအကြောင်းအရင်းမှာ ရွှယ်လင်က ဆုကို ဝယ်ယူခဲ့သည်ဟူသော မဟုတ်မှန် ကောလဟာလများကို ဖြစ်စေမည်ကို ကြောက်သောကြောင့် ပိုင်ဟောက်ကို တက်ရောက်ခွင့် မပေးခဲ့ခြင်းပင်။ ထိုကဲ့သို့ ကောလဟာလများက ကြောင်တောင်တောင် နိုင်သော်လည်း သူ့ဘက်က ပြဿနာကို ရှောင်နိုင်သမျှ ရှောင်မည်ပင်။

ပိုင်ဟောက်၏ နောက်ပိုင်းလုပ်ဆောင်မှုများက ပို၍ ရဲတင်းလာလေသည်။ တစ်ခါတစ်ရံတွင် ရွှယ်လင် အိပ်ခန်းတံခါးကို ပိတ်ရန်မေ့သွားခဲ့ချိန်များတွင် ပိုင်ဟောက်က သူ့အိပ်ယာထဲသို့ ခိုးင်းဝင်တတ်သည်။ ညနက်ပိုင်းတွင် နိုးတတ်သော အကူစနစ်လေးမှာ သူ့ကြောင့် သေလောက်အောင် လန့်သွားတတ်လေသည်။ ၎င်းတွင် သတိပေးသော လုပ်ဆောင်ချက်များရှိသော်လည်း ပိုင်ဟောက်နှင့် ဆိုလျှင် အသုံးမဝင်တော့ပေ။ သူက ပထမကမ္ဘာမှ ဗိုလ်ချုပ်ကြီးကဲ့သို့ဟု အကူစနစ်လေးကို သတိပေးနေသကဲ့သို့ပင်။ ပိုင်ဟောက်က အနည်းငယ် ပို၍ ထူးဆန်းနေသည်ဟု သူ ခံစားနေရသည်။

ရွှယ်လင်က သူ့အစ်ကို၏ သူ့အားသိမ်းပိုက်ချင်နေသော ရူးနှမ်းမှုနှင့် ဆန္ဒများကို လျစ်လျူရှုကာ ညီအစ်ကိုများ သာမန်အတိုင်းသင့်မြတ်နေသကဲ့သို့ ဆက်လက်၍ တုံးအဟန်ဆောင်နေသောကြောင့် အကူစနစ်လေးက စကားမပြောနိုင်လောက်အောင် အံ့အားသင့်နေသည်။ သူ၏ ထူးဆန်းနေသော စိတ်အခြေအနေကို မည်သို့ ထုတ်ပြရမည်ပင် မသိတော့ပေ။

"ဝါးမြင်းရုပ်"က အကောင်းဆုံး ဇာတ်ညွှန်း၊ အကောင်းဆုံး ဇာတ်ပို့ဆု ၊ အကောင်းဆုံး လူသစ်ဆု၊ အကောင်းဆုံး တည်းဖြတ်ဆု၊ အကောင်းဆုံး အမျိုးသားသရုပ်ဆောင်ဆု၊ အကောင်းဆုံး ရုပ်ပြဆုတို့ဖြင့် ဆန်ခါတင်စာရင်း ဝင်ထားလေသည်။ အတွေ့အကြုံမရှိသေးသော သူ၏ ဇာတ်ကားအနေဖြင့် ၎င်းအောင်မြင်မှုတို့က တော်တော်လေး အံ့အားသင့်ဖွယ် ကောင်းနေပြီပင်။ ရွှယ်လင်က အကောင်းဆုံး ရုပ်ပြဆုကို ရနိုင်မည်ဟု မမျှော်လင့်ထားသည်မှာ အတွေ့အကြုံရင့်နေသော ဒါရိုက်တာကြီးများကို ယှဥ်ရန် ခက်ခဲသောကြောင့်ပင်။ သို့သော် သူက အကောင်းဆုံး အမျိုးသား သရုပ်ဆောင်ဆုနှင့် အကောင်းဆုံး လူသစ်ဆုတို့ကို ရအောင် စွမ်းဆောင်နိုင်ခဲ့သည်။ အကောင်းဆုံးသရုပ်ဆောင် ဆုကိုမူမရခဲ့သည်မှာ သူ၏ ညံ့ဖျင်းသော ကိုယ်ရေးရာဇဝင်ကြောင့် ဖြစ်လိမ့်မည်။

စွန်းကျန့်အန်းသည်လည်း သူ၏ သရုပ်ဆောင်စွမ်းရည်ကို အခိုင်အမာ ရပ်တည်စေနိုင်မည့် ဆန်ခါတင်စာရင်းတွင် နှစ်ဆုဝင်လေသည်။ ရွှယ်လင်းထံမှ ဖိအားပေးခံခဲ့ရသော်လည်း သူ၏ သရုပ်ဆောင်သည်မှုက ငယ်ရွယ်သူသရုပ်ဆောင်တစ်ယောက်အနေဖြင့် အတော်လေး ကောင်းမွန်ပေသည်။ ယေဘုယျပြောရလျှင် သူ၏ အသက်အရွယ်ဖြင့် ထိုမျှလောက် နားလည်သဘောပေါက်နိုင်စွမ်း မရှိသင့်သေးပေ။ သူက အကောင်းဆုံးဇာတ်ပို့ဆုနှင့် အကောင်းဆုံး လူသစ်ဆုတို့ဖြင့် ဆန်ခါတင်စာရင်း ဝင်နိုင်ပြီး အကောင်းဆုံးဇာတ်ပို့ဆုကို ရရှိခဲ့လေသည်။

သို့သော် ရုပ်ရှင်တွင် ဆုရခဲ့ခြင်းက သူ့အတွက် တော်တော်လေး ကံကောင်းနေပြီဖြစ်သည်။ ရုပ်ရှင်ထဲတွင် သူ၏ သရုပ်ဆောင်စွမ်းရည်က တခြားသူများထက် ရှင်းလင်းစွာ နိမ့်ကျနေသော်လည်း အကောင်းဆုံး ဇာတ်ပို့ဆုကို ရရှိခဲ့သောကြောင့် အခြားသူများသည်လည်း သူတို့၏ ကိုယ်ရေးရာဇဝင်သာ ကောင်းနေပါက အကောင်းဆုံး သရုပ်ဆောင်ဆုကို ဆွတ်ခူးနိုင်မည်ကို ပြသနေသည်။

ဒါရိုက်တာ အသစ်အနေနှင့် ရွှယ်လင်က ဆန်ခါတင်စာရင်းတွင် ခြောက်ဆုဝင်ခဲ့ပြီး သုံးဆုရရှိခဲ့သည်။ ၎င်းကြောင့် သူတို့ကို ယခင်ကမသိသော မီဒီယာများကို အသက်ရှူရပ်မတတ် ဖြစ်စေခဲ့သည်။ ထို့အပြင် သူက ကိုယ်တိုင်ဇာတ်ညွှန်းရေးကာ ကိုယ်တိုင်ဒါရိုက်တာလုပ်ခဲ့ပြီး သူကိုယ်တိုင်သရုပ်ဆောင်လုပ်၍ အကောင်းဆုံးလူသစ်ဆုနှင့် အကောင်းဆုံး ဇာတ်ညွှန်းရေးဆုတို့ကို ရခဲ့လေသည်။ ယခုတွင် လူတိုင်းက သတင်းကို သိလိုက်ရသည်နှင့် အုံးအုံးကြွကြွ ဖြစ်သွားကြသည်။ ပိုင်ယွဲ့ဟူသော နာမည်က ညတွင်းချင်း နာမည်ကြီးလာပြီး ရှာဖွေမှုစာရင်းတွင် နာမည်ကြီးလာလေသည်။

ယခုရုပ်ရှင်က သူ၏ အတိတ်ဘဝမှထက် ပို၍နာမည်ကြီးလာရခြင်းမှာ ရင်းနှီးမြှုပ်နှံသူ မတူညီခြင်းနှင့် အဖွဲ့မတူခြင်းတို့ကြောင်ပင်။ ၎င်းတို့ကြောင့် ရုပ်ရှင်က ပို၍ အောင်မြင်လာခဲ့သည်။ စွန်းကျန့်အန်းက ဆုများစွာရခဲ့သော်လည်း မျက်နှာဖြတ်ရိုက် ခံလိုက်ရသကဲ့သို့ ခံစားနေရပြီး အလွန်မကျေမနပ် ဖြစ်ကာ တစ်စုံတစ်ယောက်ပေါ်တွင် စုပုံချချင်နေလေသည်။

သူ ပျော်သည်ဖြစ်စေ ဆန္ဒမရှိသည် ဖြစ်စေ မည်သို့ဖြစ်နေပါစေ နိုင်ငံတွင်းသတင်းမီဒီယာများက ချက်ချင်း ပေါက်ကွဲပျံ့နှံ့သွားပြီး သူတို့က နက်နက်ရှိုင်းရှိုင်း တူးဖော်လာကြကာ ပိုင်ယွဲ့၏ သတင်းအချက်အလက်များကို မြန်မြန်ဆန်ဆန်ပင် ရှာတွေ့သွားကြပြီး နေရာတိုင်းတွင် ထုတ်လွှင့်ပြသနေလေသည်။

၎င်းက ပြီးပြည့်စုံသော ကိုယ်ရေးရာဇဝင်အဖြစ် သတ်မှတ်နိုင်လေသည်။ သူက ပိုင်မိသားစု၏ ဒုတိယသခင်ငယ်လေး ဖြစ်ပြီး ငယ်စဥ်တည်းက နိုင်ငံခြားသို့သွားကာ နာမည်ကြီးတက္ကသိုလ်တွင် ဒါရိုက်တာသင်ကြားဌာန၌ သင်ယူလေ့လာခဲ့ပြီး တရုတ်သို့ပြန်လာကာ ရုပ်ရှင်ရိုက်ခဲ့ပြီး ဆုများစွာကို ဆွတ်ခူးနိုင်ခဲ့လေသည်။ သူ၏ ကိုယ်ရေးရာဇဝင်က ရိုးရှင်းနေပုံပေါ်သော်လည်း မည်သူမျှ မယှဥ်နိုင်ချေ။ ၎င်းတို့အားလုံး၏ထိပ်ဆုံးတွင် သူ၏ နတ်သားတမျှ ချောမောသော မျက်နှာလေးဖြင့် ကင်မရာသို့ ခွပ်ဖွဖွ ပြုံးပြလိုက်ရုံဖြင့်ပင် သူ၏ ရိုးသားဖြူစင်သော ပုံစံက လူတိုင်းကို လှည့်စားရန် လုံလောက်နေလေပြီ။

မီဒီယာများက သူ၏ ယခင်ရှိုးမှပုံကို ရှာတွေ့ပြီး သူကသရုပ်ဆောင်မှုကို နည်းစနစ်ကျကျတွေးနိုင်သူ လူတော်တစ်ယောက်ဖြစ်သည့်အပြင် သူပြုံးလိုက်ချိန်၌ နတ်သားလေးနှင့်တူပြီး သူ၏ မျက်လုံးများက လူများကို မတော်တဆနှလုံးခုန်မြန်စေသည်ဟု ချီးကျူးပြောနေကြလေသည်။

weiboပေါ်တွင် သူ ရှိုးထဲတွင် ပါဝင်ခဲ့စဉ်က စနောက်ကာ မျက်လုံးကိုပေကလပ် ပေကလပ်လုပ်ပုံ၊ မတော်တဆ နှုတ်ခမ်းကို လျှာဖြင့် သပ်လိုက်ပုံ၊ တွေးနေချိန်တွင် မျက်လုံးမှေးထားပုံ၊ မျက်ရည်ခံမှည့်လေးဖြင့် မျက်လုံးတစ်ဖက် မှိတ်ပြပုံ အစရှိသည်တို့ကို meme စီးရီးအဖြစ် လုပ်ကြလေသည်။ အတိုချုပ်ပြောရလျှင် သူ၏ ပြီးပြည့်စုံသော မျက်နှာလေးက weibo ပေါ်တွင် လွှမ်းမိုးထားလေသည်။

ဆုရသည့် သတင်းများ ပြန့်နှံ့ပြီးနောက်တစ်နေ့တွင် ပွဲဦးထွက် တင်ဆက်ခြင်း စတင်လေသည်။ ပိုင်ကွမ်းအင်တာတိမ်းမန့်က ယခုတစ်ကြိမ်တွင် ငွေအမြောက်အများ သုံးစွဲခဲ့ပြီး ရုပ်ရှင်လောကမှ ရုပ်ရှင်ဝေဖန်သူများ၊ weibo နှင့် weixin ပေါ်မှ အကြံပြုသူ ခေါင်းဆောင်များကိုလည်း ဖိတ်ခဲ့လေသည်။ ယမန်နေ့က သတင်းကြောင့် လူအများအပြားက ပွဲဦးထွက် တင်ဆက်ပွဲကို တက်ရောက် ကြလေသည်။

ထို့မှသာ လူများက ဒါရိုက်တာတစ်ယောက်တည်းသာမက တစ်ဖွဲ့လုံးက နတ်ဘုရားအဆင့်များ ဖြစ်နေကြသည်ကို နားလည်လိုက်ကြသည်။ လက်ထောက်ဒါရိုက်တာ၊ ဝတ်စုံပိုင်း၊ သီချင်းပိုင်း ၎င်းတို့အားလုံးက ပိုင်ကွမ်း အင်တာတိမ်းမန့်မှ ထိပ်တန်းအဆင့် လူများဖြစ်ကြ၍ ၎င်းရုပ်ရှင်က ဆုပေါင်းများစွာကို သိမ်းပိုက်နိုင်သည်မှာ အံ့ဩစရာ မရှိတော့ပေ။ ထိုကဲ့သို့ ကောင်းမွန်သော အဖွဲ့ဖြင့်သာဆိုပါက ဒါရိုက်တာက လူသစ်ဖြစ်သော်လည်း တခြားသူများနတ်ဘုရားများပင်။ ထို့အပြင် ဒါရိုက်တာသည်လည်း ထူးချွန်ထက်မြက်လေသည်။

ရွှယ်လင် အိမ်သို့ ပြန်သောအခါ ပရိတ်သတ်အများစုက လေယာဥ်ကွင်းတွင် သူ့ကို နှုတ်ဆက်ရန် စောင့်နေကြသောကြောင့် ပိုင်ဟောက်ကို ဝမ်းနည်းစေသည်။ သူ၏ အစ်ကိုကို နှစ်သိမ့်ရန်အတွက် ရွှယ်လင်က အပြင်ထွက်ကာ ပရိတ်သတ်များနှင့် မတွေ့ဘဲ VIP ချန်နယ်ကို တိုက်ရိုက်သွားလေသည်။

သူ့ကိုစောင့်နေသော ပရိတ်သတ်များအတွက် ကျီလွေ့ရှစ်ကို လက်ဆောင်အချို့ ဝယ်ခိုင်းလိုက်ပြီး သူတို့ တစ်ယောက်ချင်းစီအတွက် လက်မှတ်ထိုးထားသော ဓါတ်ပုံများပေးကာ တောင်းပန်ခိုင်းလိုက်လေသည်။

ပရိတ်သတ်များက ညည်းညူနေကြပြီး သိသိသာသာပင် မပျော်တော့ချေ။ ကျီလွေ့ရှစ်သည်လည်း သခင်ငယ်လေးက မိန်းကလေးများကို ဆွဲဆောင်နိုင်စွမ်းရှိသည်ဟုသောအချက်ကြောင့် သက်ပြင်းချရုံသာ တတ်နိုင်လေသည်။ သူတို့နှင့်သာ သူတိုက်ရိုက်တွေ့ပါက အားလုံးပြီးပြီပင်။

ထိုနေ့ညတွင် ရှိုးစီးရီး၏ တတိယအပိုင်းကို တိုက်ရိုက် ပြသခဲ့ပြီး တိုက်ရိုက်ကြည့်ရှုသူနှုန်းက စံချိန်မီ ချိုးဖြတ်နိုင်ခဲ့လေသည်။ ဒါရိုက်တာမျာက ဒုတိယသခင်ငယ်လေးကို ချီးကျူးနေကြပြီး ယခင်က သခင်ငယ်လေးကို ရှိုးအား ဝင်ခွင့်ပေးခဲ့ခြင်းကြောင့် သူတို့ကို အကျိုးဖြစ်ထွန်းစေသည်ဟု ပြောနေကြလေသည်။

ရွှယ်လင်၏ ကျော်ကြားမှက စွန်းကျန့်အန်း၏ သတင်းတိုင်းကို ဖုံးလွှမ်းစေခဲ့သောကြောင့် စွန်ကျန့်အန်းက သွားများပင် ယားလာသည်အထိ ဒေါသထွက်စေခဲ့သည်။ အိမ်ပြန်ရောက်ချိန်တွင် လင်းရိက ပိုင်ယွဲ့အတွက် ကျင်းပပေးသည့် အခမ်းအနားကို သွားသည်ဟု သိလိုက်ရသောအခါ ပိုဆိုးသွားလေသည်။ ထို့ကြောင့် သူက အခန်းထဲရှိ ပစ္စည်းများကို ကိုင်ပေါက်လွှင့်ပစ်ခဲ့လေသည်။ သူ၏ ပစ္စည်းများက ဖန်ဖြင့် လုပ်ထားခြင်း မဟုတ်သောကြောင့် သူ ၎င်းတို့ကို ပြန်ကောက်ကာ ဆက်သုံးရမည်ဖြစ်သည်။

စွန်းကျန့်အန်းက ပိုင်ယွဲ့၏ ကျော်ကြားမှုကိ မကြည့်နေနိုင်ပေ။ ရုပ်ရှင်ထွက်လာပြီးသည်ကို ကြည့်ပြီးပြီ ဖြစ်သော အကြံပြုခေါင်းဆောင်များ သုံးသပ်ရာတွင် ပြဿနာဖြစ်စေရန် မည်သို့ ပြုလုပ်ရမည်ကိုသာ တွေးနေလေသည်။

ယခင်နှစ်များတွင် လူအများစုက ရုပ်ရှင်ကို မကြည့်ဘဲ သုံးသပ်အကြံပြုချက်များကိုသာ ဖတ်ခဲ့လေသည်။ ထို့ကြောင့် ရုပ်ရှင်၏ သုံးသပ်ချက်များကို ဖြန့်ဝေရာတွင် အရေးကြီးသည်။ ပွဲဦးထွက်တင်ဆက်မှုညမှ သုံးသပ်ချက်များက ကောင်းလေသည်။ အဆုံးတွင် ၎င်းက ဆုများကိုပင် ဆွတ်ခူးနိုင်ခဲ့သောကြောင့် ၎င်းတွင် နည်းပညာပိုင်းဆိုင်ရာ ရှုထောင့်မှ လွဲ၍ အပြစ်ပြောစရာ မရှိပေ။ ထို့အပြင် ရုပ်ရှင်၏ မှေးမှိန်ကာ မသဲမကွဲ ဖြစ်နေသော အကြောင်းအား ဆွေးနွေးမှုကြီးကို စတင်ပေးလိုက်လေသည်။

လူငယ်လေး နှစ်ယောက်ကြားက ဆက်ဆံရေးက ကလေးဘဝက ဝါးမြင်းရုပ်လေးလိုပဲ ဖြူစင်တာလား...ဒါမှမဟုတ် တစ်ခုခု ရှိနေတာလား...

လူထု၏ အာရုံက ရွှယ်လင်ထံမှ အလွှဲခံလိုက်ရပြီး ရုပ်ရှင်ကို စတင်ဆွေးနွေးကြလေသည်။ နောက်ကွယ်မှ ထိုသို့ အာရုံလွှဲနေသည့် လက်သည်ဖြစ်သော ပိုင်ဟောက်က နက်ရှိုင်းစွာ ပြုံးလိုက်လေသည်။

ရွှယ်လင်က သူ့အစ်ကိုကြီး၏ အပြုံးကိုကြည့်ပြီး အင်တာနက်ပေါ်တွင်နာမည်ကြီးနေသည်ကို ကြည့်လိုက်ကာ ထိုချုပ်တည်းမျိုသိပ်ထားရသော လူ ဘာလုပ်လိုက်သည်ကို ခန့်မှန်းမိလိုက်လေသည်။ သို့သော် သူဘာမှ မပြောခဲ့ပေ။ ၎င်းက ပိုင်ဟောက် သူ၏နောက်ကွယ်တွင် ယခုကဲ့သို့ လှုပ်ရှားမှု လုပ်သည်မှာ ပထမအကြိမ်လည်း မဟုတ် ဒုတိယအကြိမ်လည်း မဟုတ်တော့ပေ။ သူက ထိုသူ ပြဿနာ မရှာခင်အထိ လိုအပ်သော ငွေပမာဏကို စုဆောင်းရန်သာ လိုအပ်လေသည်။

ထိုလူ မည်မျှကြာသည်အထိတိုင်အောင် မျိုသိပ်ထားမည်ကို သူစောင့်ကြည့်ချင်သည်။

ရွှယ်လင် အိမ်ပြန်ရောက်သောအခါ လင်းရိက သူ့အတွက် အောင်ပွဲခံပါတီကို ပြင်ဆင်ထားကြောင်းနှင့် သူ၏ အဖွဲ့နှင့် သူ့ကိုပါဖိတ်ကြောင်း ဖုန်းဆက်ပြောလေသည်။

တစ်စုံတစ်ယောက်က ပိုက်ဆံကုန်ခံပြီးသားကို မသွားပါက ရူးနေ၍ဖြစ်မည် ဟူသောအတွေးကို တွေးလိုက်ရင်း သဘောတူလိုက်လေသည်။ စွန်းကျန့်အန်းက သူ၏ အိမ်တွင် ပစ္စည်းများကို ကိုင်ပေါက်လွှင့်ပစ်ခဲ့သည်ဟု အကူစနစ်လေး ပြောသည်ကို ကြားသောအခါ သူ ပို၍ ပျော်လာပြီး အပြင်ထွက်ရန် အင်္ကျီများကို တက်တက်ကြွကြွရွေးနေလိုက်သည်။ သို့သော် အိမ်ရှေ့ပေါက်ဝတွင် ပိုင်ဟောက်က သူ့ကို တားဆီးလိုက်သည်။

"အစ်ကိုကြီး..."

သူ ပြုံးနေသည်မှာ မျက်လုံးများသည်ပင် ကြယ်လေးများကဲ့သို့ တောက်ပနေသောကြောင့် ပိုင်ဟောက်က သူ့နှလုံးသား ရူးသွပ်စွာ ခုန်နေသည်ကို ခံစားလိုက်ရသည်။

"မင်း ဘယ်သွားမလို့လဲ..."

ပိုင်ဟောက်၏ အသံက အက်ရှနေကာ သူ့ကို ခေါင်းငုံ့ကြည့်လိုက်လေသည်။ သူ၏ မျက်လုံးထဲတွင် အမည်ဖော်မရသော အရာတစ်ခု ဖျတ်ခနဲ လင်းသွားသည်။ သူ့ညီငယ်လေး၏ မေးစေ့ကို မော့ကာ ယခုချက်ချင်း နမ်းပစ်ချင်စိတ်ကို ကိုယ့်ကိုယ်ကို မည်မျှထိန်းချုပ်နေရကြောင်း ဘုရားသာ သိလိမ့်မည်။

"အောင်ပွဲခံ ပါတီကိုပါ..."

ရွှယ်လင်က သူ့လက်ထဲမှ ဖုန်းကို လှုပ်ပြလိုက်ပြီး ပြောလိုက်သည်။

" အစ်ကိုကြီးမှာ အရေးကြီးတဲ့ အစည်းအဝေး ရှိသေးတယ်မလား... မြန်မြန်သွားလေ စိတ်မပူပါနဲ့ ကျွန်တော် အရက် မသောက်ဘူး... သောက်ဖြစ်ရင်တောင် တစ်ယောက်ယောက်ကို လာခေါ်ဖို့ ဖုန်းဆက်ခေါ်လိုက်မယ်..."

ပိုင်ဟောက်က ငြင်းဆိုသည့်စကားကို မပြောရသေးမီ ရွှယ်လင်က သူ့ကို ဖြတ်လျှောက်သွားသည်။ သူ လက်လှမ်းကာ ပြန်ဆွဲလိုက်ချင်သော်လည်း သူ့ညီလေးကို ဝမ်းနည်းစေမည်ကို စိုးရိမ်သွားလေသည်။ သူ့ဘဝကို အလွန်ထိန်းချုပ်နေသည်ဟု သူ့ညီငယ်လေး ထင်သွားမည်ကိုလည်း စိုးရိမ်မိသည်။

တစ်ခါတစ်ရံတွင် ညီအစ်ကိုဟုသော သတ်မှတ်ချက်က သူ့ကို အလွန်အထောက်အကူပြုလေသည်။ သူ့ညီငယ်လေး၏ တို့ဟူးကို စားနိုင်ရန်အတွက် အကြောင်းပြချက် အမျိုးမျိုးကို ရှာနိုင်လေသည်။ သို့သော် တစ်ခါတစ်ရံတွင် သူက ထိုသတ်မှတ်ချက်ကို မုန်းတီးလေသည်။ ထိုသို့သော သတ်မှတ်ချက်ကြောင့် သူ ရွှယ်လင်ကို ဘာမျှ မပြောနိုင်ပေ။ တစ်ခါတစ်ရံ သူ၏ ပိုင်ဆိုင်လိုစိတ်ကြီးသော လုပ်ဆောင်မှုများကို ညီငယ်လေးအား ကာကွယ်လိုစိတ်ကြီးသော လုပ်ဆောင်မှုများအဖြစ် လူအများက ထင်မြင်ကြလေသည်။

သူက ကာကွယ်လိုစိတ်ကြီးလေသည်။ သို့သော် ထိုလူက သူ၏ညီငယ်လေး ဖြစ်နေသောကြောင့် ကာကွယ်လိုခြင်း မဟုတ်ပေ။

သူက ထိုလူသားအား သူ၏ညီငယ်လေးအဖြစ် လုံးဝ မတွေးပေ။

သို့သော် သူ၏ ညီငယ်လေးဟူသော ကန့်သတ်ချက်ကြောင့် သူတို့နှစ်ယောက်က အိမ်ထောင်စုစာရင်း တစ်ခုတည်းတွင် ရှိနိုင်ပြီး ၎င်းအချက်ကြောင့် ထိုသတ်မှတ်ချက်ကို ယခုအချိန်တွင်မူ ဆက်လက်ထိန်းသိမ်းထားဦးမည်ပင်။

🦊🦊🦊

Prev Next