MM Story Teller

Chapter 36

Viewers 8k

🦊Chapter 36

Arc 3 - ဖျော်ဖြေရေးလောက၏ လရောင်ဖြူလေး

3.11 - သူအချစ်ဆုံးလူက ပိုင်ယွဲ့ဆိုတာ ရှင်းလင်းနေတာပဲလေ

လင်းရိက မှန်ကန်သောအရာများကို မည်သို့ လုပ်ရမည်ကို ကောင်းကောင်းမွန်မွန် သိလေသည်။ သူက ရုပ်ရှင်လောကမှ လူအများကို သူ၏ ကိုယ်ပိုင်နာမည်နှင့် အာဏာအောက်တွင် တက်ရောက်ရန် ဖိတ်ခေါ်ခဲ့လေသည်။ ရွှယ်လင် ရောက်သောအခါ ပို၍ ကောင်းမွန်သည့် အလုပ်များကို စုဆောင်းမိစေရန်အတွက် လူကြီးများနှင့် တွေ့ဆုံရန် သူ့ကို ခေါ်သွားလေသည်။ ရွှယ်လင်၏ စိတ်ဝင်စားမှုဖြင့်ဆိုလျှင် သူ့ဘာသာလုပ်နိုင်ခဲ့မည်မှာ ထင်ရှားသော်လည်း ထိုနေရာတွင် အနည်းငယ် အပိုလုပ်နေခြင်းများရှိနေလေသည်။

ရွှယ်လင်က ပိုင်ကွမ်းဖျော်ဖြေရေးကုမ္ပဏိီနှင့် စာချုပ်ချုပ်ဆိုထားခြင်းဖြစ်ပြီး သူ အလိုရှိပါက ထိုလူများနှင့် တွေ့ဆုံရန် အခွင်အလမ်းများစွာ ရှိလေသည်။ အခြားနည်းလမ်းဖြင့် ပြောရလျှင် သူ့ကို စိတ်ဝင်စားပါက ထိုလူများ၏ ဆက်သွယ်ရေး လိပ်စာများက်ို သူ့ရှေ့တွင် လာထားရမည်ဖြစ်ပြီး သူ လှည့်ကြည့်ချင်မှပင် ကြည့်လိမ့်မည်ပင်။ ထိုလူများကို သူ့အား စိတ်ကျေနပ်စေရန်အတွက် ဖိတ်ခေါ်ထားခြင်းက ရိုးရှင်းစွာပင် သူ့ကို အထင်သေးနေခြင်း ဖြစ်သည်။

သို့သော် ရွှယ်လင်က လင်းရိနှင့် ဝေးဝေးနေရန် အကြောင်းပြချက်ရှာပြီး ရုပ်ရှင်အဖွဲ့ဆီသို့ မသွားမီ ထိုလူများကို သူ့အား နှုတ်ဆက်ကာ ရင်းနှီးခွင့်ပေးရန် လှည့်ပတ်မှုများ ပြုလုပ်ခဲ့သည်။

လက်ထောက်ဒါရိုက်တာက ရုပ်ရှင်လောကတွင် နာမည်ကြီးပြီး သူ၏ ကိုယ်ပိုင်အခွင့်အလမ်းများနှင့် အတွေ့အကြုံရှိသော သခင်ကြီးတစ်ဦးဖြစ်သည်။ အစပိုင်းတွင် သူက ရွှယ်လင်ကို ထောက်ပြညွှန်ကြားခဲ့ပြီး အတော်လေး ကူညီခဲ့သည်။ သူက လင်းရိ၏ သဘောထားကို မြင်သောကြောင့် ဖန်ခွက်ကိုကိုင်ထားရင်း ယခုကဲ့သို့ လုပ်ပေးမှု အသေးစားလေးကြောင့် ထောင်ချောက်ထဲသို့ အလွယ်မကျစေရန် သတိပေးရန် ရွှယ်လင်နားသို့ ရည်ရွယ်ချက်ရှိရှိ ချဥ်းကပ်လာလေသည်။

ရွှယ်လင်၏ ရယ်သံက အနည်းငယ် ထူးဆန်းနေသည်။

" အန်းသော် ကျွန်တော်က အရင်းအနှီးတွေ လိုအပ်နေတဲ့ပုံပေါက်လို့ သူ့ဆီက မိတ်ဆက်ပေးခံရတာတွေကို စိတ်လှုပ်ရှားသွားရမှာလား..."

ဒါရိုက်တာအန်းသည် သူ့ကို အတော်ကြာကြည့်နေပြီးနောက် လင်းရိဖက်မှ တစ်ဖက်သတ် လုပ်ပေးနေသည်ကို နားလည်လိုက်လေသည်။

" မင်း သူ့ကို သဘောမကျရင် သူနဲ့ ဝေးဝေးနေလေ...သူ့ဘေးမှာ စွန်းကျန့်အန်းလည်းရှိတယ်မလား..."

စွန်းကျန့်အန်းနောက်ကွယ်တွင် တစ်စုံတစ်ယောက် ရှိကြောင်းက သရုပ်ဆောင် လောကတွင် လျှို့ဝှက်ချက် မဟုတ်ပေ။ သူက လင်းရိအား တစ်ခါတစ်ရံမှသာ အဆက်အသွယ်များရစေရန် တောင်းဆိုခဲ့သော်လည်း ရည်ရွယ်ချက်ရှိရှိဖြင့် သရုပ်ဆောင် လောကထဲမှ လူများကို သူ့တို့ကြားရှိ ပတ်သတ်မှုကို သိစေကာ လင်းရိ၏ အဆက်အသွယ်များမှတဆင့် အရင်းအမြစ်များကို ရလိုက်လေသည်။

၎င်းက စွန်းကျန့်အန်း သတ်မှတ်ထားသော " အမှီအခိုကင်းကာ ကိုယ့်အားကိုယ်ကိုးခြင်း" ဖြစ်လောက်သည်။အရင်းအမြစ်များရရှိရန် လင်းရိကို တိုက်ရိုက် အနှောင့်အယှက်ပေးရန် မလိုပေ။ ထို့ကြောင့် လင်းရိ၏ အမြင်တွင် သူထိမ်းသိမ်းစောင့်ရှောက်ထားသော ကြယ်ပွင့်လေးက အလွန်ရိုးစင်းကာ ခံစားချက်များကို ဖုံးကွယ်မထားတတ်ဟု ထင်လေသည်။ ၎င်းကြောင့် လင်းရိက သူ၏ ယောင်္ကျားပီသမှုများကို အပြင်းအထန် ခံစားစေနိုင်သည်။ စွန်းကျန့်အန်း၏ ရှေ့တွင် သူက လွှမ်းမိုးခြယ်လှယ်တတ်သော ဥက္ကဌပုံစံကို ထိန်းသိမ်းထားနိုင်လေသည်။ သူက စွန်းကျန့်အန်း လိုချင်သမျှကို ပိုက်ဆံမကြည့်ဘဲ ဝယ်ပေးလေသည်။ သို့သော် စွန်းကျန့်အန်းက သူ့ကို မည်သည့်အခါကမျှ အများအပြား မတောင်းဆိုခဲ့ပေ။ ထိုသို့ဖြင့် လင်းရိက ထိုသူသည် သူ့ကို သူ့ပိုက်ဆံများထက် လိုချင်ခြင်း ဖြစ်သည်ဟူသော ထူးဆန်းသော အမြင်ရှိလာကာ ကိုယ့်ကိုယ်ကို ဂုဏ်ယူမှုကိုလည်း ခံစားနိုင်လေသည်။

သူ ပိုင်ယွဲ့ရှေ့တွင် မည်မျှပင် အောက်ကျို့ခံကာ ပြောဆိုနေပါစေ ၎င်းက စွန်းကျန့်အန်းရှေ့တွင်မူ ပြောင်းပြန် အချိုးကျကာ အဆင့်မြင့်၍ အလွန်အင်အားကြီးသည့်ပုံသည့် ပုံစံဖြစ်နေလေသည်။ ထိုအပြုအမူနှစ်ခုက သူ၏ လက်ရှိ ငြိတွယ်နေသည့် အရင်းအမြစ်များလည်း ဖြစ်လေသည်။ သူက ပိုင်ယွဲ့ကို အလွန်သဘောကျ၍ ရှေ့တွင် သူ့အဆင့်ကို လိုလိုလားလား နှိမ့်ချနေသော်လည်း ၎င်းက ပိုင်ယွဲ့ထံမှ သူ့ခံစားချက်ကို စောင့်မျှော်နေသည်ဟူသော အကြောင်းပြချက်ဖြစ်နေလေသည်။ သို့သော် လက်ရှိအခြေအနေတွင် သူ့ကို နတ်ဘုရားတစ်ပါးသဖွယ် မျှော်ကြည့်နေသော စွန်းကျန့်အန်းကို စွန့်လွှတ်ခိုင်းပါက သူသည် စွန့်လွှတ်ရန် အနည်းငယ်တော့ မလိုလားသည်ပင်။

ရွှယ်လင် ခြေတစ်လှမ်းတိုးလိုက်ပြီး အန်းသော်ကို တိုးတိုးလေး ကပ်ပြောလိုက်လေသည်။

" စွန်းကျန့်အန်းနဲ့ ကျွန်တော်က တူတယ်လို့ ခင်ဗျား မထင်ဘူးလား..."

အန်းသော်က သူတို့နှစ်ယောက်နှင့် လအတော်ကြာ အတူရှိနေခဲ့ပြီး တစ်ခါတစ်ရံ ရိုက်ကူးရင်း သူတို့ကို ကြည့်မိလေသည်။ သူတို့နှစ်ယောက်က အထူးသဖြင့် မျက်လုံးတဝိုက်တွင် ဆင်တူသည်ဟု ခံစားခဲ့ရပြီး ယခုတွင် သူတို့၏ စကားမစပ်ပြောခဲ့သော စကားဝိုင်း၏အဓိက အကြောင်းအရာကြောင့် စွန်းကျန့်အန်း၏ တည်ရှိမှုက တနည်းနည်းဖြင့် ကသိကအောက် ဖြစ်စေသည်။

ဒါရိုက်တာက နားလည်သည်ကို သိလိုက်သောကြောင့် ရွှယ်လင် ဆက်ပြောလေသည်။

" စွန်းကျန့်အန်း ဘာလို့ မလာသေးတာလို့ ခင်ဗျားထင်လဲ... သူ အိမ်မှာ စိတ်ကောက်နေလောက်လား..."

အန်းသော်က သဘောမကျစွာဖြင့် မျက်မှောင်ကြုတ်လိုက်သည်။

" မင်းမှာ အဲ့လိုစိတ်မရှိရင် သူ့တို့နှစ်ယောက်ကြားထဲ ဝင်မပတ်သက်နဲ့... ရေထဲဆွဲချမခံချင်ရင် အဲ့လိုမျိုးတွေကနေ ကိုယ့်ကိုယ်ကိုကယ်လေ... သရုပ်ဆောင်လောကရဲ့ ရေက အရမ်းနက်တယ် မင်းရဲ့နောက်ကွယ်မှာ အင်အားတောင့်တဲ့လူရှိတယ်ဆိုရင်တောင် မင်းရဲ့ အစ်ကိုကြီးကတော့ ဒီလို မိုက်ရူးရဲဆန်တာတွေ လုပ်ဖို့ ခွင့်ပြုမှာ မဟုတ်ဘူး..."

ရွှယ်လင် နှုတ်ခမ်းစူလိုက်လေသည်။

" ဘယ်သူကရော သူတို့နဲ့ ရှုပ်ချင်နေလို့လဲ... စွန်းကျန့်အန်းကို ကြည့်ရုံနဲ့တင် စိတ်မသက်မသာဖြစ်နေရတာကို... သူ့ကိုယ်သူ ဘယ်သူထင်နေလို့ ကျွန်တော့်ကို အတုခိုးနေရတာလဲ ဟက်..."

အန်းသော်က သူ့ကို အသံလျော့ရန် ပြောလိုက်လေသည်။

" အဲ့လို အတွေးမျိုးတွေကို စိတ်ထဲမှာပဲ ထားလေ ဘာလို့ အကျယ်ကြီး ပြောရတာလဲ...တစ်ယောက်ယောက် ကြားသွားရင် ဘယ်လိုလုပ်မလဲ..."

ရွှယ်လင်က သူ့အမြှီးကို ခြေထောက်ကြားတွင် ဝှက်ထားပြီး လင်းရိ၏ နောက်ကျောကို ကြည့်လိုက်ကာ သူ၏ ပန်းတိုင် အောင်မြင်သွားသည်ကို သိလိုက်ရသည်။ သူ၏ လက်များကို နာခံစွာ မြှောက်လိုက်ပြီးနောက် ထိုအကြောင်းကို ထပ်မပြောတော့ဟူသော ပုံစံကို လုပ်ပြလိုက်လေသည်။

အန်းသော်ကလည်း စကားလမ်းကြောင်း လွှဲလိုက်သည်။

" မင်း ဘာဆက်လုပ်ဖို့ အစီအစဥ်ရှိလဲ..."

"ကျွန်တော့်လက်ထဲမှာ ဇာတ်ညွှန်းရှိပေမဲ့ ပိုကောင်းအောင် နည်းနည်းလောက် ထပ်ပြင်ချင်သေးတယ်... ကျွန်တော် ရသစုံရှိုးမှာ ဆက်ပါဖြစ်ဦးမယ် နောက်ပြီးရင်တော့ ရုပ်ရှင်တစ်ခုခုထဲဖြစ်ဖြစ် သရုပ်ဆောင် ဖြစ်မယ်ထင်တယ်...

"သူ၏ မေးစေ့ကို ပွတ်ကာ မေးလိုက်သည်။

" အန်းသော်မှာ အကြုံပြုချင်တာ တစ်ခုခု ရှိလား..."

အန်းသော်က သူ့ကို အပေါ်အောက် ကြည့်လိုက်ကာ ခေါင်းညိတ်ပြရင်း ပြောလိုက်လေသည်။

" အကြံပြုစရာတော့ရှိတယ် ဒါပေမဲ့ မင်း အဲ့လူရဲ့ စိတ်ဝင်စားမှုကို ရနိုင်ပါ့မလားဆိုတာတော့ မသိဘူး..."

" မကြိုးစားဘဲ ဘယ်လိုလုပ် သိနိုင်မှာလဲ..."

အန်းသော်က ရွှယ်လင်၏ သရုပ်ဆောင်စွမ်းရည်ကို ရှင်းရှင်းလင်းလင်း သိလေသည်။ သူက သိုသိုသိပ်သိပ်နေတတ်သော်လည်း ထက်မြက်မှုများကို ချိုးနှိမ်ထားရန် မဖြစ်နိုင်ချေ။ သူ သရုပ်ဆောင်ချိန်တွင် အပြုအမူများက ခန့်ညားထည်ဝါသွားပြီး လှုပ်ရှားမှုများသည် ပြီးပြည့်စုံသွားသည်ပင်။

" အန်းသော်မှာ ဘာအကြံပေးစရာရှိလို့လဲ..."

"ငါ့ဆရာမှာ သူနှစ်ပေါင်းများစွာ ကြာအောင် လုပ်နေတဲ့ သမိုင်းနောက်ခံပုံစံလိုမျိုး ရုပ်ရှင်တစ်ခု ရှိတယ်... အဲ့ဒါက တားမြစ်ချက်တချို့ပါတော့ အချိန်ကျရင် တရုတ်က လက်ခံပါ့မလား မသိဘူး..."

ရွှယ်လင် ရုတ်တရက် ချက်ချင်း နားလည်လိုက်လေသည်။ အန်းသော်၏ ဆရာက တရုတ်နိုင်ငံ၏နာမည်ကျော်ဒါရိုက်တာဖြစ်ပြီး လွန်ခဲ့သောငါးနှစ်က ပျောက်ကွယ်သွားခဲ့သည်။ သို့သော် သူက ရုပ်ရှင် တစ်ကားအတွက် ပြင်ဆင်နေခြင်းဖြစ်သည်။ ဤဝတ္ထုထဲမှ စွန်းကျန့်အန်း၏ အကောင်းဆုံး ရွှေလက်ချောင်းကြီးက ထိုရုပ်ရှင်ပင် ဖြစ်သည်။ သူက ထိုဒါရိုက်တာနှင့် အပြင်ထွက်ရင်း တွေ့ဆုံခဲ့ခြင်းဖြစ်ပြီး သူ၏ပုံစံက ဒါရိုက်တာအိုကြီး ရှာနေခဲ့သည်နှင့် တစ်ထပ်တည်း ကျခဲ့လေသည်။ ထို့ကြောင့် သူ ထိုရုပ်ရှင်တွင် သရုပ်ဆောင်နိုင်ခဲ့ပြီး တစ်ချက်တည်းဖြင့် နိုင်ငံတကာ ရုပ်ရှင်လောကတွင် ရုပ်ရှင်ဧကရာဇ်နှင့် နှင်းဆီပန်းလေးဟု နာမည်တွင်သွားခဲ့လေသည်။

စွန်းကျန့်အန်းက ပိုင်ယွဲ့၏ အသွင်အပြင်ကို အတုခိုးခဲ့လေသည်။ အကယ်၍ ပိုင်ယွဲ့သာ ထိုရုပ်ရှင်တွင် ခေါင်းဆောင်နေရာတွင် ပါဝင်ခဲ့ပါက ပို၍ အံ့အားသင့်ဖွယ် ကောင်းသွားလောက်သည်။

ရွှယ်လင်က စွန်းကျန့်အန်း၏လမ်းကို ဖြောင့်ဖြူးစေနိုင်သည့် မည်သည့်အရာကိုမဆို လုယူရန် ပျော်ပျော်ရွှင်ရွှင် ဆန္ဒ ရှိလေသည်။ ထို့အပြင် ထိုရုပ်ရှင်သည်လည်း အလွန်ကောင်းမွန်သော ရုပ်ရှင်တစ်ကားလည်း ဖြစ်သည်။

ထိုရုပ်ရှင်ကားကို "အမျိုးသား ကြင်ယာတော်" ဟု နာမည် ပေးထားပြီး အမျိုးသားကြင်ယာတော်ထို့ပါးရှို့၏ ဘဝအကြောင်း ဇာတ်လမ်းဖြစ်လေသည်။ ထိုရုပ်ရှင်က သူ၏ ကလေးဘဝ ရန်သူနိုင်ငံ မင်းသားလေးအဖြစ်မှ စတင်ကာ တိုင်းပြည်မှ စစ်သည်တော်များနှင့် သိုင်းပညာရှင်များကြားတွင် နာမည်ရစေရန်အတွက် တိုင်းပြည်မှ ထွက်ခွာခဲ့ရပြီး မင်းသား၏ အကြံပေးပုဂ္ဂိုလ် အဖြစ် ဧကရာဇ်မင်းထံမှ ခန့်အပ်ခြင်း ခံလိုက်ရပြီး နောက်ဆုံးတွင် ပြိုင်ဘက်ကင်းသော အမျိုးသားကြင်ရာတော် ဖြစ်လာလေသည်။

သို့သော် သမိုင်းမှတ်တမ်းများတွင် ထိုအမျိုးသားကြင်ယာတော်၏ ထူးချွန်ထက်မြက်မှု၊ ကျက်သရေနှင့်ပြည့်စုံသော ကြည်လင်သည့် ပုံစံဖြင့် မွေးဖွားလာမှု၊ သူ၏ အပြုအမူတို့ကို ပိုးလိုဥထားသည့်သဖွယ် ဖြစ်နေမှုတို့ကိုသာ ဖော်ပြထားသည်။ ပိုင်ယွဲ့က သွေးနှော ဖြစ်သော်လည်း ရှေးခေတ်ဝတ်စုံကို ဝတ်ဆင်ရမည်ဆိုပါက သူ၏ အသွင်အပြင် အမူအရာများက စွန်းကျန့်အန်းပင် အတုမခိုးနိုင်လောက်သော အဆင့်တွင် ရှိမည်ပင်။ ဒါရိုက်တာအန်းက သူ့ကို ယုံကြည်စိတ်ချကာ သူ့ဆရာကိုပင် ပိုင်ယွဲ့အကြောင်း ပြောပြဖူးသည်မှာ ကြာပြီပင်။ သူက ယခုတွင် သခင်ငယ်လေး၏ အကြံကို မေးမြန်းခြင်းသာ ဖြစ်သောကြောင့် အသေးစိတ်ကျကျ မပြောခဲ့ပေ။

"အဲ့ဒါက ရုပ်ရှင်ကောင်း ဖြစ်နေသ၍တော့ ကျွန်တော့်ဘက်က လုပ်ဖို့ ဆန္ဒရှိပါတယ်..."

ရွှယ်လင်က သူ့ခွက်ကို ဒါရိုက်တာအန်း၏ ခွက်ဖြင့်တိုက်လိုက်ပြီး ပြောလိုက်သည်။

" ကျွန်တော်က ဒီသရုပ်ဆောင်လောကထဲကို ဝင်လာတယ် ဆိုတာ ပိုက်ဆံရော ကျော်ကြားမှုကြောင့်ရော မဟုတ်ဘူး ဆိုတာ ခင်ဗျားသိမှာပါ... ကျွန်တော်ကိုယ်တိုင်က ဝါသနာ ပါပြီး ကြိုးကြိုးစားစား လုပ်ချင်လို့ ... ဒါဆို အဆင်ပြေပြီနော် ကျွန်တော့်ကို ထောက်ခံချက်ပေးဖို့ ခင်ဗျားကို အကူအညီ တောင်းပါရစေ..."

" မင်းပြောတာ သဘာဝကျပါတယ်..."

ဒါရိုက်တာအန်း ရယ်လိုက်လေသည်။ သူ၏ သားက ရွှယ်လင်ထက် အသက်ကြီးသော်လည်း ထိန်းမနိုင်သိမ်းမရသောင်းကျန်းတတ်သည်ပင်။ ရွှယ်လင်က သူ့ထက်အများကြီးပို၍လိမ္မာ၍ ထိုသခင်ငယ်လေးအား သူ့ကလေးအဖြစ် မသိစိတ်မှ မှတ်ယူထားလေသည်။

အကယ်၍ သူ့သားတွင်သာ ထိုသို့ ချောမောသော ရုပ်ရည်ရှိပြီး အလားအလာကောင်းများ ရှိပါက သူ အိမ်မက်မက်ပြီး နိုးထလာချိန်တွင်ပင် ရယ်နေလောက်သည်။

ရွှယ်လင် ဝိုင် အများကြီးမသောက်ဘဲ ထွက်မလာမီ သူပြန်ပြီဖြစ်ကြောင်း လင်းရိကို အသိပေးခဲ့သည်။ လင်းရိက အစောပိုင်းမှ သူ့စကားများကို ကြားခဲ့ရသောကြောင့် သူ့ကိုပင် မကြည့်နိုင်တော့ပေ။ သူက ရွှယ်လင်ကို ကြာကြာနေရန် မတောင်းဆိုဘဲ ရိုးရှင်းစွာပင် ထွက်သွားခွင့် ပြုခဲ့လေသည်။ ရွှယ်လင် ဟိုတယ်မှ ထွက်လိုက်သောအခါ သူမျှော်လင့်ထားသလိုပင် ပိုင်ဟောက်၏ကားက သူ့ကို စောင့်ကြိုနေလေသည်။ သူ ဒါရိုက်ဘာကို အပြုံးဖြင့် နှုတ်ဆက်လိုက်ပြီး နောက်ဘက်မှ ခုံတွင် အေးဆေးတည်ငြိမ်စွာ ဝင်ထိုင်လိုက်သည်။

" အစ်ကိုကြီး အစည်းအဝေးက အစောကြီးပြီးတာလား..."

"အင်း..."

ရွှယ်လင့်ကိုလာကြိုရန်အတွက် သူ့အစည်းအဝေးကို ပုံမှန်ထက် စောပြီးအောင် ဆွေးနွေးခဲ့ခြင်းဖြစ်သည်။ အစည်းအ ဝေးပြီးသွားချိန်တွင် ရာထူးမြင့်သော မန်နေဂျာများက စိတ်ရှုပ်ထွေးနေပြီး ပိုင်ဟောက်၏ အလုပ်လုပ်နိုင်စွမ်းက အဘယ့်ကြောင့် ရုတ်တရက် မြန်ဆန်သွားသည်ကို မသိကြပေ။

ရွှယ်လင်က သူ၏အလိမ်အညာကို ဖော်ထုတ်ရန် မကြိုးစားခဲ့ပေ။ သူ ပျင်းကြောဆန့်လိုက်ပြီး ထိုင်ခုံတွင် ပျော့ခွေစွာ ထိုင်လိုက်ကာ ပိုင်ဟောက်အား ဒါရိုက်တာအန်း ပြောခဲ့သည်များကို ပြန်ပြောလိုက်လေသည်။

"ကျွန်တော်သာ အောင်မြင်လာရင် ရုပ်ရှင်မြို့တော်ကို သွားမှာ..."

ရုပ်ရှင်မြို့တော်က သူတို့မြို့ထဲတွင် မဟုတ်သောကြောင့် သူ့အိမ်ကို ထားခဲ့ရမည်ပင်။ ရွှယ်လင်က ပိုင်ဟောက်ကို စနောက်ရန်အတွက် ပြောခဲ့ခြင်းဖြစ်ပြီး နောက်ထပ် နှစ်ခွန်းပင် ထပ်ပြောလိုက်သည်။

" အိမ်က အိမ်အကူတွေ ချက်တဲ့ဟင်းကို ကျွန်တော်အရမ်း ကြိုက်တာ... ဘုရားရေ ကျွန်တော်သာ ရုပ်ရှင်အဖွဲ့ကို ဝင်လိုက်ရင် တခြားလူတွေနဲ့အတူ နေ့လည်စာထမင်းဘူးတွေပဲ စားရတော့မှာ..."

ပိုင်ဟောက် သူ၏ လက်ကို ဝှေ့ယမ်းပြလိုက်ပြီး အမူအရာက မူလကဲ့သို့ပင် မပြောင်းဘဲ ပြောလိုက်သည်။

" တကယ်လို့ မင်းကြိုက်တယ် ဆိုရင် အစ်ကိုကြီး အဲ့အိမ်အကူတွေကို မင်းနောက်ထည့်ပေးလိုက်မယ်..."

" မထည့်ပေးပါနဲ့... ကျွန်တော်က အလိုလိုက်ခံရလို့ ဆိုးနေတဲ့ ကောင်လေး မဟုတ်ပါဘူးနော်..."

ရွှယ်လင် ကားအမိုးကို မော့ကြည့်လိုက်ကာ ထပ်ပြောလိုက်သည်။

" အဖိုး ဒေါသထွက်သွားမှာပေါ့... သူလည်း အိမ်အကူတွေ ပြင်ပေးတာတွေကို ကြိုက်တာ အစ်ကို သိသင့်တယ်လေ..."

ပိုင်ဟောက် အတော်ကြာသည်အထိ တိတ်ဆိတ်သွား၍ သူ့အတွေးများကို မခန်းမှန်းနိုင်ပေ။ သူ ရွှယ်လင်ကို အကြည့်တစ်ချက်သာ ပေးလိုက်ပြီးနောက် အကြည့်လွှဲလိုက်သည်။

သူသာ စကားပြန်မပြောပါက ရွှယ်လင်သည်လည်း သူပြောမည်ကို နားထောင်ရန် စောင့်နေမည် မဟုတ်ချေ။ ရွှယ်လင် သူ့ဖုန်းကိုထုတ်ကာ သူ၏ သတင်းများကို အင်တာနက်ပေါ်တွင် ရှာကြည့်နေလိုက်လေသည်။

🦊🦊🦊

Prev Next