MM Story Teller

Chapter 42

Viewers 3k

🦊Chapter 42

Arc 3 - ဖျော်ဖြေရေးလောက၏ လရောင်ဖြူလေး

3.17

ယခင်ဘဝ၌ လင်းရိထံ 'မရည်ရွယ်ဘဲ' သူ့ကိုယ်သူ ရောင်းစားသည်ဖြစ်စေ၊ ဤဘဝ၌ သူ့ကိုယ်သူ 'ရည်ရွယ်ချက်ရှိရှိ' ရောင်းစားသည်ဖြစ်စေ ကွာခြားမှု အနည်းငယ်သာရှိသည်။ သူက အမြင့်ဆုံးဈေးပေးသူကို စောင့်ဆိုင်းကာ 'အချစ်စစ်' ဟူသော ခေါင်းစဥ်အောက်တွင် သူ့ကိုယ်သူ လင်းရိထံ ရောင်းချခဲ့သည်။ အခြားသူများ သူ့ကို လှောင်ရယ်နေကြသည်မှာ အံ့သြစရာမဟုတ်ပေ။

စွန်းကျန့်အန်း မည်သည်ကို တွေးနေမှန်း မသိသော်လည်း ထိုအဖြစ်အပျက်နောက်ပိုင်းတွင် သူ့အမူအရာက အမြဲတမ်း မှုန်ကုပ်ကုပ်နှင့် စိတ်ဓာတ်ကျနေခဲ့သည်။

"အမျိုးသားကြင်ယာတော်" ရိုက်ကူးမှုက အလွန်ချောချောမွေ့မွေ့ဖြစ်ခဲ့ပြီး ရွှယ်လင်ကလည်း နှစ်လအတွင်း သရုပ်ဆောင်ရမည့်ဇာတ်ကွက်အားလုံးကို အောင်မြင်စွာ သရုပ်ဆောင်နိုင်ခဲ့သည်။ သူက ရိုက်ကူးရေးအဖွဲ့သားများထံမှ လက်ဆောင်များစွာကို ထုပ်ပိုးပြီး ပင်ပန်းနွမ်းနယ်စွာ အိမ်ပြန်လာခဲ့သည်။

ထိုကာလအတွင်း ပိုင်ဟောက်က သူ့ထံ တစ်ကြိမ်လာရောက်လည်ပတ်ခဲ့ပြီး သူတို့ တစ်ညတာ အတူတူအချိန်ဖြုန်းခဲ့ကြပြီး နောက်တစ်နေ့တွင် ခွင့်တိုင်ကာ သူတို့ ထပ်မံမခွဲခွာမီ ပျော်ရွှင်စွာ အချိန်ကုန်ဆုံးခဲ့ကြသည်။

သူ့မိသားစုအခြေအနေက ယခင်အတိုင်းပင်။ အဘိုးပိုင် က သူ့မြေးငယ်လေးကို စကားစမြည်ခေါ်ပြောပြီး လင်းရိ၏အရေးကိစ္စနှင့်ပတ်သက်၍ ပိုင်ဟောက်က အရာအားလုံးကို ဖြေရှင်းပေးလိမ့်မည်ဖြစ်ကြောင်းနှင့် စိတ်မပူရန်ပြောကာ နှစ်သိမ့်ပေးခဲ့သည်။ ရွှယ်လင် ဘာမှစိတ်ပူစရာမလိုဘဲ သူ့ဇာတ်ကားများကို ရိုက်ကူးပြီး ထိုဇာတ်ကားများတွင် သရုပ်ဆောင်နေရုံပင်။

ဤသို့သောစိုးရိမ်မှုမျိုးက လွန်စွာအကျိုးရှိကြောင်း ရွှယ်လင် အမြဲလိုလိုတွေ့မြင်ခဲ့ရပြီး ပြုံးလျက်လက်ခံလိုက်သည်။ ထို့နောက် သခင်ကြီးပိုင်ကို နှစ်သိမ့်ပေးကာ ရယ်မောစေရန် အချိန်အနည်းငယ်ပေးကာ စကားပြောပေးခဲ့ပြီး ရေချိုးရန် သူ့အခန်းထဲသို့မဝင်မီ ယူလာခဲ့သော ရှေးဟောင်းစာအုပ်တစ်အုပ်ကို လက်ဆောင်ပေးခဲ့သည်။

ပိုင်ဟောက်က ညစာစားချိန်၌ ပြန်လာခဲ့သည်။ သူ့ညီလေးကို တွေ့ရန် အလုပ်ကို ပစ်ထားခဲ့ချင်သော်လည်း အဘိုးပိုင်က အိမ်တွင်ရှိနေဆဲဖြစ်သောကြောင့် နှစ်ယောက်သား ခွင့်မပြုသည့်အရာများကို လုပ်နိုင်ကြလိမ့်မည်မဟုတ်ပေ။ စားပွဲအောက်မှ သူ့ကိုလာစနေသော ခြေထောက်သေးသေးလေးလေးကို ပြန်လည်ဖိထားစဥ် ရွှယ်လင်နှင့် အကြည့်ချင်း ဖလှယ်ရုံသာတတ်နိုင်သည်။ ညစာစားပြီးသောအခါ အဘိုးပိုင်အား ရင်းနှီးမြုပ်နှံမှုအကြောင်း ဆွေးနွေးရန်ဟူသော ဆင်ခြေကိုပေးကာ သူတို့နှစ်ဦး ပိုင်ဟောက်၏အခန်းထဲသို့ ဝင်လာခဲ့ကြသည်။ နှစ်ယောက်သား တံခါးကို သော့ခတ်ပြီးနောက် အတူတကွပူးကပ်လူးလှိမ့်လိုက်ကြသည်။

သူတို့နှစ်ယောက်စလုံး ငယ်ရွယ်သန်စွမ်းသည့်အပြင် အချိန်အတော်ကြာ ခွဲခွာနေခဲ့ရသောကြောင့် စိတ်အားထက်သန်နေကြသည်။ ရွှယ်လင်က ပိုင်ဟောက်၏ရင်ခွင်ထဲနေတွင် ပျင်းရိစွာ မမေးလိုက်မီအထိ အိပ်ရာပေါ်တွင် မရပ်မနား လူးလှိမ့်နေခဲ့ရသည်။

"အဖိုးကို ဘယ်လို ရှင်းပြဖို့ စီစဉ်ထားလဲ..."

ပိုင်ဟောက် သူ့ခေါင်းကို ပွတ်လိုက်ပြီးပြောလာသည်။

"မင်းသွားနေတဲ့အချိန်တုန်းက ကိုယ် အဖိုးကို ဝန်ခံပြီးသွားပြီ..."

ညစာစားရန် တစ်စုံတစ်ယောက်ကို ခေါ်သကဲ့သို့ ပိုင်ဟောက်က ဘာမှမဖြစ်သလို ပြောလာသည်။

ရွှယ်လင် သူ့ကို အံ့သြစွာ မော့ကြည့်လိုက်သည့်အခါ ပိုင်ဟောက်က သူ့မျက်ခွံများကို နမ်းလာသည်။ ပိုင်ဟောက် ရယ်မောကာ ပြောလိုက်သည်။

"အဖိုးက မအံ့သြပါဘူး... အနည်းဆုံးတော့ ကိုယ်တစ်ယောက်တည်း နေလာတာ နှစ်အတော်ကြာပြီ... လိင်စိတ်မရှိတာမဟုတ်သရွေ့ အဆင်ပြေတယ်လို့ ပြောတယ်... ကိုယ် သူ့အတွက် မြစ်ကလေး ခေါ်လာပေးသရွေ့ ကိုယ်ယောက်ျားတွေကိုကြိုက်လား မိန်းမတွေကိုကြိုက်လားဆိုတာ သူ ဂရုမစိုက်ဘူးတဲ့..."

ရွှယ်လင် သူ့လည်ပင်းကို ညှစ်ပစ်ရန် လက်မလှမ်းမီ မျက်စောင်းထိုးကြည့်လိုက်သည်။

"မြစ်ကလေးတစ်ယောက်ရှိဖို့ မိန်းမတစ်ယောက်ကို ရှာရဲရှာကြည့် အစ်ကိုကြီးကို ကျွန်တော် သတ်ပစ်မယ်..."

'အစ်ကိုကြီး ကျွန်တော့်ကို သစ္စာဖောက်ရင် သတ်ပစ်မယ်' ဟူသော သူ၏ကြောင်းကျိုးမဆက်စပ်သောဆန္ဒကို ပိုင်ဟောက် သဘောကျသည်။ သူ ခေါင်းကိုငုံ့ကာ ရွှယ်လင်ကို ထပ်မံနမ်းပြန်သည်။

"ကိုယ်တို့ အငှားကိုယ်ဝန်ဆောင် ရှာသင့်လား... မင်း မကြိုက်ဘူးဆိုရင်လည်း မြို့တော်မှာရှိတဲ့ မိသားစုထဲက ကလေးတစ်ယောက်ကို ကိုယ်တို့ မွေးစားလို့ရတယ်..."

ရွှယ်လင် သူ့လက်ကို ဆုပ်ကိုင်ထားကာ ကစားနေသည်။ ပိုင်ဟောက်လည်း သူ့ကို စဉ်းစားခွင့်ပေးထားပြီး စကားမပြောခဲ့ပေ။ အချိန်အတော်ကြာပြီးနောက် ရွှယ်လင်၏အသံကို ကြားလိုက်ရသည်။

"ကျွန်တော်က အမွှာလိုချင်တာ အစ်ကိုကြိီးအတွက်တစ်ယောက်ပြီးတော့ ကျွန်တော့်အတွက်တစ်ယောက်..."

ပိုင်ဟောက် မျက်တောင်ခတ်လိုက်ပြီး ထိုအဆိုပြုချက်ကို ပရိယာယ်ကြွယ်ဝစွာ ပယ်ချလိုက်သည်။

"မိသားစုထဲကနေ မွေးစားဖို့ကိုပဲ စောင့်ရအောင်... ဘယ်မိန်းမမှ မင်းအတွက် မွေးပေးမှာကို ကိုယ် လုံးဝ မမြင်ချင်ဘူး..."

ရွှယ်လင် နှုတ်ခမ်းစူလိုက်ကာ ပိုင်ဟောက်လည်း သူ့ကဲ့သို့ မနှစ်မြို့ဖွယ်ခံစားနေရကြောင်း သူ့စိတ်ထဲတွင် တွေးတောမိသည်။ နောက်ဆုံး ရွှယ်လင် ညည်းညူကာ ပြောလိုက်သည်။

"အမေတို့ တားဆေးသုံးနေတာ ရပ်လိုက်တော့လို့ ကျွန်တော် ပြောလိုက်မယ်... မဟုတ်ရင် ကျွန်တော်တို့ မိဘမဲ့ဂေဟာကိုသွားပြီး ကလေးမွေးစားနေရမယ်... တခြားသူတွေရဲ့ ကလေးကို မွေးစားတာက ကျွန်တော့်အတွက် နည်းနည်းထူးဆန်းတယ်..."

အရာအားလုံး သူ့အပေါ်တွင်မူတည်နေ၍ ကန့်ကွက်ခြင်းမရှိကြောင်း ပိုင်ဟောက် ဖော်ပြလိုက်သည်။

ကလေး၏မျိုးရိုးအမည်က ပိုင်ဖြစ်နေသရွေ့ ဆွေမျိုးတော်စပ်ပုံနှင့် ပတ်သက်ပြီး အလွန်အမင်း တောင်းဆိုစရာမရှိပေ။ မိသားစုတစ်ခု ရေရှည်တည်တံ့နိုင်စေရန်အတွက် သွေးသားတော်စပ်ပုံ တစ်ခုတည်း၌သာအခြေခံခြင်း မဟုတ်ရုံသာမက ပိုင်မိသားစု၏ စည်းစနစ်ကျသော နည်းလမ်းများအပေါ်တွင်လည်း မှီခိုခဲ့သည်။ သူတို့ ကလေးတစ်ယောက်ကို ပိုင်ဟောက်ကဲ့သို့ ကောင်းကောင်း ပျိုးထောင်ပေးနိုင်စွမ်းမရှိလျှင်ပင် စီးပွားရေးလုပ်ငန်းများကို တည်ငြိမ်စွာထိန်းထားနိုင်စွမ်းရှိရမည်။

နောက်တစ်နေ့ စွန်းကျန့်အန်းထံမှ စာတစ်စောင်ကို လက်ခံရရှိချိန်အထိ ရွှယ်လင် အိပ်ယာမှ မထသေးပေ။

စွန်းကျန့်အန်း၏စာက အလွန်ရိုးရှင်းသည်။ သူ ရွှယ်လင်နှင့် တွေ့ဆုံပြီး စကားပြောချင်ရုံသာဖြစ်သည်။

စွန်းကျန့်အန်း အဘယ်ကြောင့် သူ့ကို အပြင်သို့ဖိတ်ခေါ်ခဲ့ကြောင်း နားလည်အောင်ကြိုးစားရန် ဇာတ်ကွက်နှင့်စပ်လျဉ်းသည့် ယခုလက်ရှိအချိန်ကို ရွှယ်လင် စဥ်းစားကြည့်လိုက်မိသည်။ ထို့နောက် သူတို့ တွေ့ဆုံရမည့်နေရာဖြစ်သည့် ဘား၏လိပ်စာကို ကြည့်လိုက်ပြီး သူ့အမူအရာကအေးခဲသွားသည်။

အာ...

ရွှယ်လင်က စွန်းကျန့်အန်းအား ခွင့်ပြုနိုင်သောအတိုင်းအတာအထိ တမင်တကာ ချန်ထားပေးခဲ့သည်။ သို့သော် စွန်းကျန့်အန်း၏ မလိုမုန်းတီးမှုက ပို၍နက်ရှိုင်းလာလိမ့်မည်ဟု သူ မထင်ထားခဲ့ပေ။

အကူစနစ်လေးက host၏မျက်နှာကို ကြည့်ကာ စွန်းကျန့်အန်းအတွက် တိတ်တိတ်လေး ဖယောင်းတိုင်တစ်တိုင် ထွန်းညှိပေးလိုက်သည်။

ထိုဘားက မူရင်းဇာတ်ကွက်တွင် ပိုင်ယွဲ့ မူးယစ်ဆေးစွဲလာသည့်နေရာဖြစ်သည်။ ဤတစ်ကြိမ်တွင် နေရာလည်းအတူတူ၊ စွန်းကျန့်အန်းလည်း အတူတူပင်၊ သို့သော် ပိုင်ယွဲ့က ယခင်ပိုင်ယွဲ့နှင့် မတူတော့ပေ။

စွန်းကျန့်အန်း၏ ရည်ရွယ်ချက်များကို မြင်တွေ့လိုက်ရသောအခါ ရွှယ်လင် သူ့ကို သွားမတွေ့ချင်တော့ပေ။ တစ်ကမ္ဘာလုံးက သူ့ကို အကြွေးတင်နေပုံရသည့် ထိုမျက်နှာကို သွားတွေ့ရန်ဟု စဥ်းစားလိုက်ရုံနှင့်ပင် ရွှယ်လင် အစာစားချင်စိတ်များ ပျောက်သွားသည်။

ရွှယ်လင် ပိုင်ဟောက်ကို ခေါ်ပြီး သူ့အစား လူတစ်ချို့ကို စေလွှတ်ပေးရန် တောင်းဆိုခဲ့သည်။ စွန်းကျန့်အန်း သူ့အပေါ်လုပ်ချင်နေသည့်အရာက သူတို့ စွန်းကျန့်အန်းအပေါ် ပြန်လုပ်ပေးမည့်အရာပင်။ စွန်းကျန့်အန်းကို လွှတ်မပေးမီ မူးယစ်ဆေးစွဲနေသည်ဟု သေချာအောင်ပြုလုပ်ပြီး ကြိုးချည်ထားလိုက်လျှင် အကောင်းဆုံးပင်။

ပိုင်ဟောက် ချက်ချင်းသဘောတူလိုက်ပြီး သူ့ညီလေး ဤသို့လုပ်ခြင်းက မှားနေသည်ဟု မခံစားရပေ။ ထိုနည်းလမ်းက စွန်းကျန့်အန်းကို အလွယ်တကူ လွှတ်ပေးလိုက်သည်ဟုပင် သူ ထင်ခဲ့သည်။

ထို့ကြောင့် ပိုင်ဟောက် စွန်းကျန့်အန်းအတွက် အပိုတစ်ခုခု ပြင်ဆင်ပေးရန် သူ့လူများကို လှည့်ကာ အမိန့်ပေးလိုက်သည်။

လင်းရိတွင် ပိုင်ယွဲ့ သို့မဟုတ် စွန်းကျန့်အန်းတို့နှင့် ဖြေရှင်းရန် အချိန်မရှိပေ။ မုန်တိုင်းဒဏ်ကို ကြံ့ကြံ့ခံနိုင်သော နည်းလမ်းမရှိသဖြင့် လင်းမိသားစုက ဒေဝါလီခံရတော့မည်ဖြစ်သည်။ သူ အရာရှိများထံ ပစ္စည်းအနည်းငယ်ကို ပေးပို့ခဲ့သော်လည်း ၎င်းကို ရှာဖွေတွေ့ရှိသွားခဲ့ပြီး အရာအားလုံး ပိုမိုဆိုးရွားသွားစေခဲ့သည်။

ရွှယ်လင် တစ်နေ့လုံး လုပ်စရာမရှိဘဲဖြစ်နေပြီး လင်းမိသားစု၏သတင်းအကြောင်း သိရရန် TV ဖွင့်လိုက်သည်။

အဆိုပါအုပ်စုက လိမ်လည်မှုကိစ္စတွင် ပါဝင်ပတ်သက်နေပြီး လူအများအပြားကို ငွေအမြောက်အမြား လိမ်ညာခဲ့ကြောင်း ပြောဆိုခဲ့သည်။ ဒါရိုက်တာ တော်တော်များများနှင့် ဥက္ကဌသည်လည်း ပြစ်မှုအားလုံးတွင် ပါဝင်ပတ်သက်နေကြောင်း ဖော်ပြထားသည်။ ထို့နောက် လင်းမိသားစု မကြာသေးမီက ဆောက်လုပ်ခဲ့သော အိမ်များတွင် တစ်စုံတစ်ရာ မှားယွင်းနေကြောင်း တွေ့ရှိခဲ့ရပြီး ၎င်းတို့ကို ဝယ်ယူထားသူများလည်း ဆူညံပွက်လောရိုက်သွားခဲ့သည်။ ထိုကိစ္စက လူပြောများလာပြီး မြို့တွင်းရှိလူတိုင်းမှာ ထိုအကြောင်းကို အချိန်အတော်ကြာအောင် ပြောဆိုခဲ့ကြသည်။

ထို့နောက် လင်းရိက သူ့ကိုယ်သူ အပြစ်ဝန်ခံခဲ့ပြီး လင်းမိသားစုလည်း ပြိုလဲသွားခဲ့သည်။ အဖေလင်း၏ တစ်သက်တာ ရုန်းကန်မှုအားလုံးက ထိုနည်းအတိုင်းပင် ပြီးဆုံးသွားကာ တစ်မြို့လုံးအား လှုပ်ကိုင်နိုင်သော မိသားစုတစ်ခု အဆုံးသတ်သွားခဲ့သည်။ အချိန်ကြာလာသည်နှင့်အမျှ ဤအရာများက တဖြည်းဖြည်း ပျောက်ကွယ်သွားကာ ယခုတွင် လူအနည်းငယ်စုကသာ လင်းမိသားစုကို မှတ်မိကြတော့သည်။ စွန်းကျန့်အန်း၏ အဆုံးသတ်သတင်း သူ့နားထဲသို့ရောက်လာချိန်တွင် ပိုင်ယွဲ့ ချန်ထားခဲ့သော နောက်ဆုံးဇာတ်ညွှန်းကို စတင်ရိုက်ကူးရန် ရွှယ်လင် ပြင်ဆင်နေပြီဖြစ်သည်။

စွန်းကျန့်အန်းကို အတားအဆီးမရှိ မူးယစ်ဆေးဝါးသုံးစွဲသည့် လိင်ဖျော်ဖြေရေးပါတီတစ်ခုတွင် ရဲများနှင့် သတင်းထောက်များက လက်ပူးလက်ကြပ် ဖမ်းဆီးရရှိခဲ့ရသည်။ သူ အရှက်ခွဲခံရပြီး သတင်းများကို မီဒီယာများက ဖော်ပြခဲ့သည်။

ဤသည်မှာ အတိတ်ဘဝက သူငယ်ချင်းကောင်းအတွက် သူပြင်ဆင်ခဲ့သော နိဂုံးချုပ်ဟု ထင်ရသော်လည်း ၎င်းက သူ့ကိုယ်ပိုင်အဆုံးသတ် ဖြစ်လာခဲ့သည်။ နောက်ကွယ်မှတာဝန်ရှိသူတစ်ဦးအနေဖြင့် ရွှယ်လင် မည်သည့်အမူအရာမှမပြဘဲ အချို့သောလူများ၏မနာလိုမုန်းတီးမှုများက အလွန်နက်ရှိုင်းပြီး နောက်ဆုံးတွင် သူတို့ကိုယ်သူတို့ ဘေးဥပဒ်ဖြစ်စေသည်ဟုသာ စိတ်မကောင်းဖြစ်ခဲ့ရသည်။

နောက်ဆုံးတွင် သူတို့နှစ်ဦး ထောင်ထဲတွင် ပြန်လည်ပေါင်းစည်းသွားခဲ့သည်။ သူ့တာဝန်ပြီးမြောက်မှုအပေါ် ထိခိုက်ခြင်းမှ ကာကွယ်ရန်အတွက် ရွှယ်လင် သူတို့အား မတူညီသောအကျဉ်းထောင်များသို့ ပို့ဆောင်ပေးရန် ပိုင်ဟောက်အား အထူးတောင်းဆိုခဲ့ပြီး သူတို့နှစ်ဦးကို သီးခြားစီသွားတွေ့ခဲ့သည်။

ပိုင်ဟောက် သူ့ကို ဖျက်ဆီးခဲ့သော်လည်း မမျှော်လင့်ထားစွာပင် လင်းရိက ရွှယ်လင်ကို မမုန်းခဲ့ပေ။ လင်းရိ သူ့ကိုသာ စိုက်ကြည့်နေပြီး ရွှယ်လင့်ကိုထားခဲ့ကာ အိမ်ပြန်ရန် မရွေးချယ်ခဲ့လျှင် သူတို့ အတူတူရှိနေနိုင်ပါမည်လားဟု မေးခဲ့သည်။

ရွှယ်လင်က သူ မသိကြောင်း ခေါင်းယမ်းကာ ဖော်ပြလိုက်သည်။

သူက မူလပိုင်ယွဲ့ မဟုတ်သလို မူလပိုင်ရှင် မည်ကဲ့သို့ခံစားရမည့်အကြောင်း သူ မသိပေ။

လင်းရိ စွန်းကျန့်အန်း၏ကံကြမ္မာကို ကြားသောအခါ ရယ်ရုံသာရယ်နေခဲ့သည်။ သူက များစွာသိနေပုံရပြီး သူ မည်သည့်အရာများ တွေးနေမှန်းမသိနိုင်ပေ။

စွန်းကျန့်အန်း ရွှယ်လင်ကို မြင်သောအခါ ရူးသွားသကဲ့သို့ပင် အဆုံးမရှိ ရယ်မောနေခဲ့သည်။ ပိုင်ယွဲ့က သူ့ထက် ပိုကောင်းသော နောက်ခံအသိုင်းအဝိုင်းနှင့် မွေးဖွားမလာခဲ့လျှင် မည်သူနိုင်သည်၊ မည်သူရှုံးသည်က သေချာလိမ့်မည်မဟုတ်ကြောင်း အခိုင်အမာ ပြောနေဆဲပင်။

ရွှယ်လင်က သူ့ကို အချိန်အတော်ကြာ စိုက်ကြည့်နေပြီး ပြုံး၍ အဓိပ္ပါယ်ရှိစွာ ပြန်ဖြေလိုက်သည်။

"တကယ်လို့ မင်းမှာ နောက်ထပ် ဘဝတွေအများကြီးရှိခဲ့ရင်တောင် အဆုံးသတ်က ဒီအတိုင်းပဲ ရှိနေမှာပဲ..."

အကျဉ်းခန်းဆီသို့ ပြန်ခေါ်မသွားမီအထိ စွန်းကျန့်အန်း အချိန်အတော်ကြာ မှင်တက်နေခဲ့သည်။

သူ အမှန်တကယ် ရူးသွပ်သွားသည်လား သို့မဟုတ် အခြားအရာတစ်ခုဖြစ်ခဲ့သည်လား မသေချာသော်လည်း နောက်ပိုင်းတွင် စွန်းကျန့်အန်းက အရူးတစ်ယောက်သဖွယ် စတင်ပြုမူလာခဲ့သည်။ ရွှယ်လင်က စွန်းကျန့်အန်း၏ ကံကောင်းမှုများ မရှိတော့ပြီဖြစ်ကြောင်း သိလိုက်ပြီးနောက် သူ့အကြောင်း မေးမြန်းခြင်းကို ရပ်လိုက်ပြီး သူ၏အဆုံးသတ်ကို ဂရုမစိုက်တော့ပေ။

🦊🦊🦊

Prev Next