MM Story Teller

Chapter 56

Viewers 3k

🦊Chapter 56

Arc 4 - စွန့်ပစ်ခံ မင်းသမီးလေး

4.13 - ဖျက်ဆီးပစ်လိုက်... အရှေ့ကလူကို ဖျက်ဆီးပစ်လိုက်...

သို့သော် ၎င်းက တခဏတာမျှပင်။ လူသာ လျှင်မြန်စွာ တည်ငြိမ်သွားလေသည်။ အက်ရှလေ ငယ်စဥ်ထဲက ကြီးပြင်းလာသည်အထိ မစောင့်ကြည့်ခဲ့ရသော်လည်း သူ အက်ရှလေကို နားလည်သည်။

သူက ဒီလို အခြေအနေဖြစ်အောင် စီစဥ်ခဲ့တယ်ဆိုတော့ တစ်ခုခုကို သိသွားပြီးတော့ စော်ကားမော်ကားပြောပြီး အရင်မေးမလို့များလား...

သူ့ပါးစပ်ကိုဟတော့မည့်အချိန်တွင် လူငယ်လေးက သူ၏့နောက်ဘက်တွင် မတ်တတ်ရပ်နေသော ရပ်စဲလ်ကို စောင်းကြည့်နေသည်ကို တွေ့လိုက်ရသည်။

လူသာ သူ့လက်များကို ဆန့်ထုတ်ကာ ရပ်စဲလ်ကို ကာကွယ်လိုက်သည်။ သူ ရွှယ်လင်ကို ကြည့်လိုက်ချိန်တွင် သူ၏ မျက်နှာက သတိအပြည့် ဖြစ်နေသည်။

ရွှယ်လင် သူ၏ နှုတ်ခမ်းများကို တွန့်ကွေးကာ ပြောလိုက်သည်။

" အရှင်မင်းသား မစိုးရိမ်ပါနဲ့ အရှင့်နောက်က လူကို ကျွန်တော် ဘာမှ မလုပ်ပါဘူး..."

ထိုကဲ့သို့ တည်ငြိမ်နေသော အသွင်အပြင်က လူသာကို ပိုမို ခက်ခဲစေသည်။ အက်ရှလေက ဘုရင်မဆိုသော ခေါင်းစဥ်အောက်တွင် မည်မျှ ရင်းနှီးမြှုပ်နှံထားသည်ကို သူ ရှင်းလင်းစွာ သိလေသည်။ သာမန်အားဖြင့် သူ တစ်ခုခုကို သိသည်ဆိုလျှင်ပင် တော်ဝင်မိသားစု မျက်နှာကြောင့် ဤနေရာတွင် ရည်ရွယ်ချက်ရှိရှိ ထုတ်ဖော်ပြောဆိုလိမ့်မည် မဟုတ်ပေ။

အမှန်တွင် ရွှယ်လင်က တော်ဝင်မိသားစု၏ မျက်နှာကို လုံးဝ ဂရုမစိုက်ပေ။ သူ ဂရုစိုက်သည်မှာ တစ်ဖက်လူက သူ၏ လက်ရှိရာထူးကို လက်ဝါးကြီးအုပ်ရန် ဆက်လက် ပြုလုပ်နေပါက သူ၏ချစ်သူကို ခေါင်းစဥ်ပေးနိုင်တော့မည် မဟုတ်ပေ။ အော်ဂတ်စတင်း တစ်ယောက်တည်းသာ ဇွဲကောင်းခြင်း မဟုတ်ဘဲ ရွှယ်လင်သည်လည်း ဇွဲကောင်းသည်ပင်။

သို့သော်လည်း သူ့တွင် ကိုယ်ပိုင်ထုံးစံမူများ ရှိလေသည်။ သူက မင်းသားကို လူသန်းပေါင်းများစွာထံမှ ဝေဖန်ခံရသည့် ခံစားချက်ကို သိစေချင်လေသည်။

၎င်းက မူလတည်းက အက်ရှလေ ပြုလုပ်ရန် ကြံစည်ထားသော အရာပင်။

ချီးကျူးအော်ဟစ်နေသော လူများ၏ အသံများက တဖြည်းဖြည်း မှေးမှိန်လာလေသည်။ သူတို့က မူလက မတော်တဆမှုကြောင့် မင်္ဂလာဆောင်ပြီးတည်းက ကွဲကွာနေသော ငယ်ရွယ်သည့် တော်ဝင်စုံတွဲအတွက် အဆက်မပြတ် အော်ဟစ်နေခြင်းပင်။ သို့သော် မမျှော်လင့်ထားဘဲ ထိုမြင်ကွင်းတွင် တင်းမာမှုများ ရှိနေပုံပေါ်သည်။

အတိအကျ ပြောရပါက မင်းသားက သူ၏ ဓါးကို ကိုင်ဆွဲထားပုံပေါ်သည်။

" ခင်ဗျားနောက်မှာ ကာကွယ်ပေးနေတဲ့လူက ရပ်စဲလ်ဂျွန်ဆန်လား..."

ရွှယ်လင်က ရပ်စဲလ်ကို လက်ပြလိုက်လေသည်။ မကြီးပြင်းသေးသော အဓိကဇာတ်လိုက် shouက အနည်းငယ် တုံးအပုံပေါ်သည်။ ရွှယ်လင်၏ အပြုံးကို ရင်ဆိုင်လိုက်ရသောအခါ မထိန်းချုပ်နိုင်ဘဲ ကြောင်တောင်တောင်နိုင်သော အပြုံးကိုပင် ပြုံးပြလိုက်သေးသည်။

ရွှယ်လင်၏ စိတ်ထဲတွင် သရော်လိုက်သည်။

ယခုတွင် သူက ရိုးရှင်းကာ ဖြူစင်နေသော်လည်း မကြာမိီတွင် မြို့တော်ကြယ်ကြောင့် အနက်ရောင်အဆိုးခံရတော့မည်ပင်။ ယခင်က အခြားသူများကို သူ့အား မဒိန်းကျင့်စေပြီး ကွာရှင်းစေရန်အတွက် ၎င်းကို ရိုက်ကူးသော အကြံအစည်က ရပ်စဲလ်၏ အကြံပင်ဖြစ်သည်။ မင်းသားကလည်း မူလက မင်းသမီးကို ရုတ်တရက် သေသွားစေချင်ခဲ့သည်။

"မင်း ဘာလုပ်ဖို့ ကြိုးစားနေတာလဲ..."

လူသာ၏ အကြည့်များက အနည်းငယ် အန္တရာယ် ရှိနေသည်။

"ကျွန်တော် ဘာမှမလုပ်ပါဘူး... ကျွန်တော်က ခင်ဗျား ဒီလူကို နန်းတော်ထဲ ခေါ်မလာခင် ကွာရှင်းချင်ရုံလေးပါ..."

ရွှယ်လင်၏ မျက်နှာပေါ်မှအပြုံးက ပျောက်ကွယ်သွားလေသည်။ သူ နာနိုကွန်ပျူတာကို ဖွင့်လိုက်ပြီး သတင်းအချက်အလက်များကို လူသာဆီသို့ ပို့လိုက်လေသည်။

" နောက်ပြီး ခင်ဗျားနဲ့ ခင်ဗျားချစ်သူ လိုချင်တဲ့ ပန်းတိုင်ကို ရောက်အောင် ကူညီပေးချင်လို့ပါ..."

ထိုမြင်ကွင်းကြောင့် ပို၍ ရုတ်ရုတ်သဲသဲ ဖြစ်သွားလေသည်။

ယနေ့ မတိုင်ခင်ကအထိ မင်းသမီး၏ မင်းသားအပေါ်မဆုတ်မနစ်သော ယုံကြည်မှုကို ကြယ်များအားလုံးမှ လူများက ချီးကျူးနေခဲ့ကြသည်။ သို့သော် ယခုတွင် ထိုကဲ့သို့လူက လူအများရှေ့တွင် မင်းသား ပြန်ရောက်ရောက်ချင်း ကွာရှင်းခွင့် တောင်းနေလေသည်။

သူ ဘာပြောလိုက်တယ်...

အရှင်မင်းသားရဲ့ချစ်သူတဲ့လား...

ရွှယ်လင်က လူသာ၏ မျက်နှာပေါ်မှ ဆိုးဝါးနေသော အမူအရာကို လျစ်လျူရှုလိုက်ရင်း ပေါ့ပါးစွာ ပြောလိုက်သည်။

"လူသာ ခင်ဗျား မင်္ဂလာဦးညမှာ ကျွန်တော့်ကို တွေ့တောင် မတွေ့ဘဲ မြို့တော်ကြယ်ကနေ ရှေ့တန်းကို ထွက်သွားတုန်းကလည်း သန်မာတဲ့ပုံစံ ဟန်ဆောင်နိုင်သေးတယ်... အဲ့သတင်းကို ပြည်သူတွေရဲ့ စိတ်တည်ငြိမ်ဖို့ ရက်အနည်းငယ်ကြာမှ ထုတ်လွှင့်ခဲ့တာလည်း ရသေးတယ်... ခင်ဗျားရှေ့တန်းမှာ ပျောက်သွားတုန်းက စက်ရုပ်တွေကို ထိန်းချုပ်တာကို လဝက်လောက်သင်ပြီး ခင်ဗျားအစား ဇာ့ခ်တွေကို တိုက်ခိုက်ခဲ့ရတယ်... ကျွန်တော် ဇာ့ခ်တွေကို ထောင်ချီပြီး မညည်းမညူ တိုက်ခိုက်ခဲ့ရတယ်... ဒါပေမဲ့ လူသာ ဒါတွေက ကျွန်တော်က ခင်ဗျားရဲ့မင်းသမီး၊ ခင်ဗျားရဲ့ အမည်ခံ ဇနီး၊ ခင်ဗျားဘဝရဲ့ တစ်ဦးတည်းသော လက်တွဲဖော် ဆိုတဲ့ အကြောင်းအရင်းတွေကြောင့်ပဲ..."

" ရယ်စရာကောင်းတာက ခင်ဗျားက နှစ်လနီးပါး ပျောက်သွားပြီးတော့ အိုမီဂါ တစ်ယောက်ကို အမှတ်အသား ပေးပြီး ခေါ်လာခဲ့တယ်..."

ရွှယ်လင်၏မျက်နှာက အေးစက်သွားပြီး သူ၏ အပြုံးများလည်း ပျောက်ကွယ်သွားလေသည်။ လူသာနှင့် ရပ်စဲလ်ကို ကြည့်လိုက်သည့် သူ့အကြည့်များက ထိုနှစ်ယောက်ကို အမုန်းများဖြင့် ပြည့်နေကာ အဆိပ်ရှိနေသလိုပင် ကြည့်နေသည်။

မင်းသား၏ ပြန်လည်ရောက်ရှိလာခြင်းကို ကြယ်တာရာကွန်ရက်တွင် တိုက်ရိုက်ထုတ်လွှင့်နေလေသည်။ ထို တိုက်ရိုက်ထုတ်လွှင့်မှုကို ကြည့်နေသော လူအရေအတွက်က ချက်ချင်း ထိုးတက်သွားလေသည်။ သူတို့နှစ်သက်စေရလောက်သည်အထိ ထိုလူငယ်လေးသည် တောက်ပနေခဲ့ကာ သူ၏ခင်ပွန်းသည် ပြန်လာမည်ကို ကျိန်းသေယုံကြည်သော မင်းသမီးက ဂရုမစိုက်သော ပုံစံကို ပြသနေသော်လည်း သူ၏မျက်လုံးများထဲတွင် ပါးလွှာသော မျက်ရည်လွှာလေး တလဲ့လဲ့တောက်နေသည်ကို သူတို့အားလုံး ရှင်းရှင်းလင်းလင်း တွေ့နိုင်လေသည်။

သူ့စကားများက အထေ့အငေါ့များဖြင့် ပြည့်နေသော်လည်း သူ့မျက်ဝန်းမျာထဲမှ မရပ်တန့်နိုင်သော ဝမ်းနည်းမှုများကို လူတိုင်းတွေ့နိုင်လေသည်။

တချို့လူများသညက သူနှင့်အတူ သူတို့၏ နှလုံးသားများ လစ်ဟာသွားသည်ကို ခံစားလိုက်ရလေသည်။ ထို့နောက် သူတို့က မင်းသားနှင့် သူ့ဘေးတွင် ရပ်နေသော လူငယ် ထံသို့ အကြည့်ရောက်သွားချိန်တွင် သူတို့၏ အကြည့်များက မခံမရပ်နိုင်လောက်သောဒေါသများ၊ စိတ်တိုမှုများဖြင့်သာ ပြည့်နှက်သွားလေသည်။

" ကျွန်တော် အက်ရှလေက ရိုင်းန်မိသားစုရဲ့ ဂုဏ်ကျက်သရေဆောင်ပါ... ကျွန်တော် အရှင်နဲ့ တိုက်ခိုက်မှာ မဟုတ်ဘူး အဲ့တော့ ကွာရှင်းရအောင်..."

လူသာ သူ၏ မျက်လုံးများကို မှေးကျဥ်းလိုက်လေသည်။

" မင်း ဘာပြောနေတယ်ဆိုတာရော မင်းသိရဲ့လား..."

" ကျွန်တော် သိတယ်..."

ရွှယ်လင် သူ၏ လက်ကို မြှောက်ကာ ပြောလိုက်သည်။

" သူ ဘယ်လို heatဖြစ်တယ်ဆိုတာရော ခင်ဗျား သူတို့ကို ဘယ်လို အမှတ်အသား ပေးလိုက်တယ်ဆိုတာရော... အဲဒါတွေအကုန်လုံး မှတ်တမ်း ဗီဒီယိုတွေ ရှိတယ် လူတိုင်းရှေ့ကို ယူလာပြီး ပြစေချင်လား..."

လူသာ၏ နှလုံးခုန်နှုန်းက တစ်ခဏမျှ ရပ်တန့်သွားလေသည်။ ယခု အခြေအနေတွင် သူ မကိုင်ဆွဲနိုင်သော တစ်စုံတစ်ရာ ရှိနေသည်ကို ခံစားလိုက်ရသည်။ သူ ဘေးနားရှိ ရပ်စဲလ်ကို ကြည့်လိုက်ပြီး သူ့စိတ်ထဲတွင် သံသယများ ပေါက်ဖွားလာလေသည်။

" ဘယ်လိုကြင်နာတတ်တဲ့ လူက မဖုံးကွယ်ထားဘဲ ဒါတွေလာပေးတယ်ဆိုတာတော့ မသိဘူး ဒါပေမဲ့ အဲ့အချိန်တုန်းက ကျွန်တော်လည်း ခမည်းတော် ဘုရင်ကြီး ဘေးနားမှာဆိုတော့ သူလည်း မြင်သွားတယ်..."

ရွှယ်လင် သရော်လိုက်သည်။

"လူသာ ကွာရှင်းရအောင်... ခင်ဗျားမှာ အိုမီဂါတစ်ယောက်ရှိတယ် ဆိုတော့ ကျွန်တော် အဲ့လူရဲ့ နေရာကို ဆက်နေလို့ မကောင်းတော့ဘူး... အခု ကျွန်တော် ခင်ဗျားကို အဲ့နေရာ ပြန်ပေးမယ်..."

"..."

ယခု အခြေအနေက မရေမရာ ဖြစ်နေပြီး ရောက်ရှိနေသော လူများကလည်း မည်သည့်ကိစ္စအတွက် ရောက်လာရသည်ကိုပင် မသိတော့ချေ။ မင်းသားက သူ၏ သီးသန့်အစောင့် ခေါင်းဆောင်ကို စိတ်ကသိကအောက် ဖြစ်စွာ ကြည့်လိုက်သည်။ ယခင်က သူ လက်တလော အခြေအနေ သတင်းများကို မေးခဲ့ချိန်တွင် အစောင့်က ယခု အက်ရှလေ ပြောနေသော အကြောင်းများကို လုံးဝမပြောခဲ့ပေ။

လူသာ လူတိုင်းထံမှ ကစားခံနေရသလို ခံစားလိုက်ရသည်။ ရပ်စဲလ် မည်သည့်နေရာက ရောက်လာသည်ကိုပင် သူ စတင် သိချင်လာလေသည်။

ရပ်စဲလ်က ငါ ဘယ်သူဆိုတာကို မသိဘဲ ဒီတိုင်း ငါ့ကို ဂရုစိုက်ချင်ခဲ့တာ ဟုတ်ရဲ့လား...

ထိုအတွေးက သူ့စိတ်ထဲတွင် တစ်ခဏမျှသာ ဖြစ်ပေါ်လာပြီးနောက် ချက်ချင်း ပြတ်ပြတ်သားသား ထုတ်ပစ်လိုက်လေသည်။ သူ ရပ်စဲလ်နှင့် အတူရှိနေသည်မှာ အချိန်အတော်ကြာနေပြီဖြစ်ပြီး သူ့ကို ယုံကြည်နေဆဲပင်။ ယခု ဖြစ်နေသော အရာများကို အက်ရှလေ လုပ်ထားသည်များသာ ဖြစ်နိုင်လေသည်။

ထိုအကြောင်းကို တွေးလိုက်သောအခါ လူသာ၏ လူသတ်ချင်နေသော အရောင်အဝါက ပို၍ မြင့်တက်လာလေသည်။ " အခြေအနေတွေကို အရင် နားမလည်ဘဲ ကွာရှင်းဖို့ကို ငါ အလျင်စလိုလုပ်မှာ မဟုတ်ဘူး..."

ရွှယ်လင်က သူ၏ အကျင့်စရိုက်ကို သိလေသည်။ မင်းသားက သူ၏ အစီအစဉ်မဟုတ်သော အရာများကို လုံးဝဖြစ်ခွင့်ပြုမည် မဟုတ်ပေ။ ထို့ကြောင့် သူ များစွာမပြောတော့ပေ။ သူက ပြည်သူများကို သူတို့၏ မင်းသားသည် ပြန်လာပြီဖြစ်ပြီး အိုမီဂါတစ်ယောက်ကို အမှတ်အသားပေးပြီး ခေါ်လာကြောင်းကို သိစေချင်သည်။ ယခု လူတိုင်းက ရပ်စဲလ်၏မျက်နှာကို မှတ်မိသွားပြီ ဖြစ်ပြီး သူက မြို့တော်ကြယ်ထဲတွင် ကောင်းမွန်စွာ ရောနှောနေနိုင်တော့မည် မဟုတ်ပေ။

သူ၏ နှုတ်ခမ်းများကို တင်းတင်းစေ့လိုက်ပြီး လူသာကို နက်နက်ရှိုင်းရှိုင်းကြည့်ကာ လှည့်ထွက်သွားလေသည်။

ထိုအချိန်တွင် သူ ယခင်ကပင် မမြင်ဖူးသော လူများက အက်ရှလေ နောက်သို့ လိုက်သွားသည်ကို တွေ့လိုက်ရသည်။ သူတို့က ရိုင်းန်မိသားစုမှလူများ မဟုတ်နိုင်ပေ။ တော်ဝင်မိသားစုမှ လူများလည်း ပို၍ပင် မဟုတ်နိုင်ပေ။

သူတို့ အနီးတဝိုက်ရှိ လူများထံမှ ထိုအငြင်းပွားဖွယ် သတင်းအကြောင်းကို ဆွေးနွေးသံများ စတင် ထွက်ပေါ်လာလေသည်။ လူသာ ရပ်စဲလ်ကို အဖော်ပြုပေးရင်း လေဆိပ်မှ ခပ်မြန်မြန် ထွက်လာလိုက်သည်။ ထိုမြင်ကွင်း အားလုံးကို ကြယ်တာရာကွန်ရက်တွင် တိုက်ရိုက် ထုတ်လွှင့်နေလေသည်။ ရွှယ်လင် နန်းတော်သို့ ပြန်မရောက်မီမှာပင် အရှင်မင်းသား၏ ဖောက်ပြန်သည့်ကိစ္စအား သတင်း ခေါင်းစဥ်များပင် ပြုလုပ်နေကြလေသည်။

ကွန်ရက်တွင် ပြည်သူများ၏ ဝေဖန်မှုများဖြင့် ပြည့်နှက်နေပြီး လူသာ၏ ဂုဏ်သိက္ခာကက အံ့ဖွယ်ကောင်းလောက်အောင် ထိုးကျသွားလေသည်။

အဆုံးတွင် သူက နှစ်လထက်မနည်း ပျောက်ကွယ်သွားသော သူပင်။ ထိုအချိန်အတောအတွင်းတွင် ချစ်ကြည်မှုများကို ရရှိထားသော ရွှယ်လင်နှင့် နှိုင်းယှဥ်ပါက အဓိက အရေးပါသော လူအများအပြားက ရွှယ်လင်၏ဘက်၌ပင် ရှိကြသည်။

မင်းသမီးပြောသည်ကို ကြားရသလောက်ဆိုလျှင် မင်းသားက မင်္ဂလာဦးညတွင် မင်းသမီးကို ထားခဲ့ပုံပေါ်သည်။ မင်းသမီးက အသက်မပြည့်သေးသောကြောင့် သူတို့ကြားတွင် မည်သည်မျှ မဖြစ်နိုင်သည်မှာ သိသာပေသည်။ သို့သော် ယခုတွင် မင်းသားက မည်သည့်နေရာက ထွက်လာမှန်းမသိသည့် အိုမီဂါတစ်ယောက်ကို အမှတ်အသား ပြုခဲ့လေသည်။ ၎င်းကို ဖောက်ပြန်သည်ဟု ဆိုနိုင်သည်။

အရှင်မင်းသမီး ကွာရှင်းချင်တာ မမှားဘူး ...

လူတိုင်းက မင်းသားကို အရှင်မင်းသားဟုပင် မခေါ်တော့ပေ။ သူတို့က သူ့အကြောင်းပြောတိုင်း သူ့ကို ဆန်ကုန်မြေလေးယောင်္ကျားဟု ခေါ်ဆိုကြတော့သည်။

ရွှယ်လင် comments အားလုံးကို ဆွဲကြည့်ကာ ဖတ်ရင်း ဖျော်ဖြေမှုပေါင်းစုံကို ခံစားလိုက်ရသည်။ ထိုအချိန်တွင် အော်ဂတ်စတင်းက မျက်မှောင်ကြုတ်ကြည့်လိုက်လေသည်။

" သူက မကွာရှင်းချင်ဘူးတဲ့လား..."

ရွှယ်လင် လက်ယမ်းပြလိုက်သည်။

" သူ ဆန္ဒရှိတာ မရှိတာက အရေးမကြီးတော့ဘူး... ကွာရှင်းဖို့ကို အတည်ပြုလိုက်ပြီ... နောက်ပြီး သူ့ရဲ့ မင်းသားဆိုတဲ့ရာထူးကို သူ ဆက်ထိန်းထားနိုင်မှာ မဟုတ်တော့ဘူး ခင်ဗျား အဆင်သင့်ပြင်ထားတော့.. သိပ်မကြာခင် ခင်ဗျားက စကြာဝဠာတစ်ခုလုံးရှေ့ကို တရားဝင် ရုပ်လုံးထွက်ပြရတော့မှာ..."

"အိုး..."

အော်ဂတ်စတင်း မျက်လုံးမှေးကာ မေးလိုက်သည်။

" ဘယ်လို အမည်တပ်ပြီးတော့လဲ..."

ရွှယ်လင်က သူ့ကို ကြည့်လိုက်ပြီး မထီမဲ့မြင်ပြုကာ ပြောလိုက်သည်။

" ဘယ်လို အမည်တပ်ခံချင်လို့လဲ..."

အော်ဂတ်စတင်းက ခပ်တိုးတိုး ရပ်လိုက်သည်။

" ကောင်းပြီ မင်းသမီးရဲ့ လက်ရှိကောင်လေး ဆိုရင်ရော..."

ရွှယ်လင် သူ့ကို ကန်လိုက်ကာ ပြောလာသည်။

" သွားစမ်းပါ ခင်ဗျားက ဧကရာဇ်မဟုတ်ရင် ကျွန်တော်က ခင်ဗျားကို လက်ထပ်ဖို့ သဘောတူမယ် မထင်နဲ့..."

လက်ထပ်ရမည်ဆိုသော အကြံက အနည်းငယ် ထိတ်လန့်ဖွယ်ကောင်းသော်လည်း အကယ်၍ ဤလူနှင့်သာ ဆိုပါက ရွှယ်လင်က စိတ်မရှိကြောင်း မမျှော်လင့်ဘဲ သိလိုက်ရလေသည်။

အော်ဂတ်စတင်း၏ပုံက အနည်းငယ် ထူးဆန်းနေလေသည်။ သူ ရွှယ်လင်၏ လက်ကို ကိုင်လိုက်ရင်း နူးနူးညံ့ညံ့လေး တိုးဖွစွာ ပြောလိုက်သည်။

" ကိုယ်က ဧကရာဇ် မဟုတ်ရင် မင်း ကိုယ့်ကို လက်မထပ်တော့ဘူးလား..."

ရွှယ်လင် သူ၏ အမူအရာကို မြင်သောအခါ ဂုဏ်ယူစွာဖြင့် ခေါင်းမော့ကာ စနောက်သလို ပြောလိုက်သည်။

" ခင်ဗျားသိသင့်တယ် ကျွန်တော်က ဧကရီဖြစ်ဖို့ မွေးဖွားလာတာလေ~"

အော်ဂတ်စတင်း သူ၏ အကြည့်များကို တွေ့သောအခါ သူ၏ နှလုံးသားထဲမှ မြင့်တက်လာသော ကြမ်းကြုတ်မှုများက ရုတ်တရက် ဖိနှိပ်ခံလိုက်ရလေသည်။

အက်ရှလေက ဧကရီဖြစ်ချင်လို့ ငါ့အနားမှာ ရှိနေတယ်ဆိုရင်ရော ဘာဖြစ်လဲ... သူ့နှလုံးသားတင် မကဘူး... အဲ့လူ ငါ့အပိုင်ပဲ

ငါ လိုချင်တဲ့လူက ခန္ဓာကိုယ်ရော နှလုံးသားရော သူ့အပိုင်ပဲ ဖြစ်မှာ... အတွင်းရောအပြင်ရော အားလုံးက ငါ့အပိုင်ဖြစ်ရမှာ...

သူ အနည်းငယ် မဆင်မခြင် ရယ်လိုက်လေသည်။

" ဒါဆို ပြည့်စုံတယ်လေ ကိုယ်ကလည်း ဧကရာဇ်ဖြစ်ဖို့ မွေးဖွားလာတာ..."

ရွှယ်လင် သူ့၏ အရှက်မရှိမှုကို ရှုံ့ချသည့်အနေဖြင့် သူ့ကို ထပ် ကန်လိုက်ပြန်သည်။ ထို့နောက်တွင် သူ ထိုအကြောင်းကို ထပ်တွေးလိုက်သည်။

ဒီကမ္ဘာက လူတိုင်းရဲ့ ဆက်တင်တွေက လူငယ်ဆန်တဲ့ပုံပေါ်တယ်...

ထိုအမျိုးသား၏ အလယ်တန်းကျောင်းသားရောဂါကို အမြစ်ဖြတ် ကုသမရလောက်သည့် အခြေအနေအထိ ပို၍ မလေးနက်လာစေချင်ပင်။

ထိုအဖြစ်အပျက်များပြီးနောက် မင်းသားက မြို့တော်ကြယ်သို့ ပြန်ရောက်ရောက်ချင်း နန်းတော်သို့ တန်းမသွားဘဲ ရပ်စဲလ်အတွက် နေထိုင်ရာအခန်းကို ပြင်ဆင်ပေးခဲ့သည်။ သူ့အတွက် အစောင့်များကိုပါ ပြင်ဆင်ပေးခဲ့ပြီး ရင်းရင်းနှီးနှီး ပွေ့ဖက်ကာ အကြံပေးစကားအချို့ကို ပြောဆိုခဲ့ပြီးနောက် နန်းတော်ကို ပြန်ရန် ပြင်ဆင်လေသည်။

ထိုအချိန်တွင် အပြင်ဘက်၌ မှောင်နေလေပြီ။ မင်းသား ပြန်လာသည့်အတွက် ကျင်းပရမည်ဖြစ်သော ညစာစားပွဲကို မင်းသမီး၏ မကျေနပ်ချက်တို့ကြောင့် ဖျက်သိမ်းလိုက်ရသည်ပင်။

ရွှယ်လင်က အခန်းထဲတွင် မြောက်များစွာသော ဖုန်းခေါ်ဆိုမှုများကို ဖြေဆိုနေရကာ အနှောင့်ယှက်ခံနေရလေသည်။ ဝါရန်၊ သူ၏ မိဘများ၊ သူ၏ အဖိုးအဖွားများပင် သူ့ကို ခေါ်ဆိုကာ အကြံဥာဏ်များ ပေးခဲ့ကြပြီး သူ 'မင်းသားကို မကြိုက်ပါဘူး'ဟု မရေတွက်နိုင်အောင် ပြောမှသာ နန်းတော်တွင် နေခွင့်ရပြီး ရိုင်းန်မိသားစုထံသို့ ပြန်လာရန် အမိန့်ပေးမခံရတော့ပေ။

နန်းတော်က မင်းသား ထွက်သွားစဥ်ကနှင့် လာလားမျှ မဆိုင်တော့ပေ။ အရေးပါသောနေရာများတွင် အော်ဂတ်စတင်း၏ လူများဖြင့် အဖြည့်ခံထားရလေသည်။ သူတို့ကနန်းတော်ကို တည်ထောင်ခဲ့သူများ ဖြစ်ကြပြီး အခြားသူတို့ ရှာမတွေ့ခဲ့သော လုပ်ဆောင်ချက်များကို အသက်သွင်းပြီးပြီဖြစ်သည်။ ကာကွယ်ခုခံနိုင်သည့် အဆင့်သာမက လျှို့ဝှက်လမ်းများကိုလည်း အသုံးပြုနေကြလေသည်။

ရွှယ်လင် ရေချိုးပြီးသည်နှင့် မင်းသားရောက်လာကြောင်း သတင်းပို့ခံလိုက်ရသည်။

သူ၏ ရေချိုးဝတ်ရုံကို ကြိုးချည်လိုက်ပြီး မျက်လုံးများကို မှေးကျဥ်းလိုက်လေသည်။

" သူ ဘာလိုချင်လို့တဲ့လဲ..."

" ကျွန်တော် သူ့ကို ပြန်လွှတ်လိုက်ရမလား..."

ရွှယ်လင်၏ အစေခံများကို အော်ဂတ်စတင်း၏ လူများဖြင့် အစားထိုးခံထားရသောကြောင့် ထိုလူက သူပြောသလို မင်းသားကို အပြင်သို့ နှင်ထုတ်နိုင်လေသည်။ အဆုံးတွင် နန်းတော်က သူတို့၏ ပိုင်နက်ဖြစ်လေသည်။

"မလိုပါဘူး..."

ထိုလူ အဘယ့်ကြောင့် နောက်ကျနေမှ သူ့နန်းတော်သို့ ရောက်လာသည်ကို သိချင်နေလေသည်။ ထိုသူ၏ ထိုးထွင်းဥာဏ်အရ နန်းတော်က သူ၏ လက်အောက်တွင် မရှိတော့ကြောင်းကို သိသွားလောက်ပြီပင်။

" သူ့ကို စောင့်ခိုင်းလိုက်ပါ...အဝတ်အစားလဲပြီး သူ့ကို ထွက်တွေ့မယ်..."

သူ့ရဲ့ ထိန်းချုပ်မှုအောက်မှာ မရှိတော့တဲ့ နန်းဆောင်ကို ဝင်လာတယ်ဆိုတည်းက လူသာက သူ့ကိုယ်သူ အရမ်းယုံကြည်မှုရှိနေတာလား... ဒါမှမဟုတ် သူ့ရဲ့ တွေးခေါ်နိုင်စွမ်းက သူ့ရဲ့မှတ်ဥာဏ်ပျောက်တာနဲ့ ရောပြီး လေထဲပျောက်သွားလို့လား...

ဒါမှမဟုတ် သူ အခု ရင်ဆိုင်နေရတဲ့ ရန်သူ ဘယ်သူလဲဆိုတာတောင် မသိတာလား...

သူ၏ နောက်ဆုံးခန့်မှန်းချက်က မှန်လောက်သည်။ သူသသာမန်ဝတ်စုံကို ဖြည်းဖြည်းချင်းလဲလိုက်ပြီး လူသာကို သွားတွေ့လေသည်။ ကံကောင်းစွာဖြင့် လူသာက နောက်ကျမှ ရောက်လာ၍ အော်ဂတ်စတင်းက နန်းတော် မြေအောက်တိုက်သို့ အိပ်ရန် ဆင်းသွားလေသည်။ မဟုတ်ပါက မည်သို့ ပြဿနာ ဖြစ်လာမည် မသိနိုင်ပေ။

လူသာက အပြင်ဘက်ခန်းမတွင် မှောင်မိုက်နေသော အမူအရာဖြင့် ထိုင်နေပြီး အက်ရှလေ၏ သတ္တိများက ကောင်းကင်ကိုပင် ဖုံးလွှမ်းနေပြီဟု တွေးလိုက်သည်။ ဤ နန်းတော်က ရှင်းလင်းစွာပင် သူ၏ အပိုင်ဖြစ်သော်လည်း အက်ရှလေက သူ့ကို စောင့်ရရန် လုပ်လေသည်။

ဟားဟား... သူက အခုချိန်ထိ မင်းသမီးနေရာကို ကစားနေသေးတာပဲ... သူ အရမ်း လွန်နေပြီ...

ရွှယ်လင်က သူ့ကို ကြာမြင့်စွာမစောင့်စေဘဲ မကြာမီ ထွက်လာလေသည်။

မင်းသားက ပုံမှန်အဝတ်အစားများကို ဝတ်ဆင်ထားသည်ကို တွေ့သောအခါ အက်ရှလေ မျက်ခုံးပင့်ကာ ရယ်လိုက်လေသည်။

" အရှင့်ရဲ့ နန်းတော်ကနေ ကျွန်တော့်ကို မောင်းထုတ်ဖို့ ဒီလောက် နောက်ကျနေတဲ့ အချိန်ကျမှ လာတာလား..."

လူသာက အေးစက်စွာ လှမ်းကြည့်လိုက်သည်။ သို့သော် နတ်ဘုရားကဲ့သို့ တောက်ပချောမောသည့် လူငယ်လေးတစ်ယောက်ကိုသာ တွေ့လိုက်ရလေသည်။

နေ့အချိန်အတောအတွင်း ထိုလူ စစ်တပ်ဝတ်စုံကို ဝတ်ဆင်ထားချိန်တွင် လူသာက သတိအပြည့် နိုးနိုးကြားကြားရှိနေခဲ့သည်။ ယခုတွင် သူက သာမန်အဆန်ဆုံး ရိုးရိုးရှင်းရှင်း သက်တောင့်သက်သာရှိသော အဝတ်အစားများကို ဝတ်ဆင်ထားလေသည်။ မကြာသေးမီကမှ ရေချိုးလာသောကြောင့် သူ့မျက်နှာက အနည်းငယ် နီရဲနေပြီး ရယ်လိုက်ချိန်တွင် ထူးခြားသော ဆွဲဆောင်မှုတစ်ခု ရှိနေလေသည်။

သူ ထိုလူကို အချိန်ကြာမြင့်စွာ ရွံမုန်းနေသောကြောင့် သူ၏ မင်းသမီးက စကြာဝဠာ တစ်ခုလုံးတွင် အလှဆုံးလူ ဖြစ်သည်ကို မေ့နေခဲ့သည်။

ထိုမျှသာမက မကြာမီတွင် သူ၏heatကာလ ရောက်လာတော့မည်ပင်။

ထိုကဲ့သို့သောလူက သူ၏အပိုင် ဖြစ်သင့်သည်။

သို့သော် သူ ထိုလူကို မလိုချင်ပေ။

သူ မလိုချင်သောအရာကို အခြားသူများအား ပေးခွင့်လည်း မရှိပေ။

သူ၏ ရှေ့မှလူကိုကြည့်ရင်း လူသာ၏ စိတ်ထဲတွင် ရူးသွပ်နေသောအသံကို ကြားလိုက်ရသည်။

ဖျက်ဆီးပစ်လိုက်... ငါ့ရှေ့က လူကို ဖျက်ဆီးပစ်လိုက် ...

🦊🦊🦊

Prev Next