Chapter 60 (Arc 4-End)

🦊Chapter 60

Arc 4 - စွန့်ပစ်ခံ မင်းသမီးလေး

4.17 – (ခေါင်းစဉ်ကို တမင်သက်သက် ဝှက်ထားပြီး အောက်ခြေမှတ်စုမှာ ဖော်ပြထားသည်။)

ဇာ့ခ်များကို သုတ်သင်ရှင်းလင်းခြင်းဆိုသည်မှာ ပြောရန် လွယ်ကူသော်လည်း လက်တွေ့၌ လိုအပ်မည့် ခက်ခဲမှုအဆင့်ကို မည်သူမျှ လျစ်လျူရှုမထားနိုင်ကြပေ။

လက်ရှိအင်ပါယာက လွန်ခဲ့သောနှစ်ပေါင်း ခုနစ်ရာခန့်က တိုးတက်ထွန်းကားခဲ့သည့် အင်ပါယာနှင့် မတူတော့ပေ။ အင်ပါယာ၏ အာဏာအပြည့်အ၀ကို ပိုင်ဆိုင်ရရှိနိုင်ရန် အော်ဂတ်စတင်း အချိန်အနည်းငယ်ပေးခဲ့ပြီး သူ့နာမည်က ကြယ်တာရာများအားလုံးကြား တစ်ဖန်ပျံ့နှံ့သွားပြီး ထိုသို့ပျံ့နှံ့သွားရန်လည်း လိုအပ်သည်။

မူလက ဤကမ္ဘာပေါ်တွင် လိင်အမျိုးအစား အများအပြားမရှိခဲ့ပေ။ လွန်ခဲ့သောနှစ်ပေါင်း ခုနစ်ရာခန့် ဇာ့ခ်များ ပေါ်ပေါက်လာပြီး လူသားမျိုးနွယ်အား တမင်သက်သက် သုတ်သင်ရှင်းလင်းခဲ့သည့်အချိန်မှသာ လူသားမျိုးနွယ်အတွက် ခြိမ်းခြောက်မှုအန္တရာယ်ကို ဖြစ်ပေါ်လာစေသည်။ ထို့ကြောင့် သိပ္ပံပညာရှင်လူတစ်စုက လူသားများ ဆင့်ကဲပြောင်းလဲခြင်းနည်းလမ်းသစ်ကို တီထွင်ခဲ့ကြသည်။ ကလေး အများအပြားကို ဓာတ်ခွဲခန်းထဲသို့ ခေါ်ဆောင်ကာ ပြင်ပကမ္ဘာမှ ခွဲထုတ်ထားပြီး မရေမတွက်နိုင်သော သေဆုံးမှုများနှင့် ထပ်ခါတလဲလဲ စမ်းသပ်မှုများကြောင့် သိပ္ပံပညာရှင်များနှင့် လူသားမျိုးနွယ်များရှေ့တွင် လူသားအမျိုးအစားသစ်တစ်ရပ် ဖြစ်ပေါ်လာခဲ့သည်။

ကနဦးတွင် လူသားများက သူတို့ကို လက်နက်အဖြစ်သာ အသုံးပြုခဲ့သော်လည်း မကြာမီတွင် အဆိုပါလူသားမျိုးစိတ်အသစ်များက ဖွံ့ဖြိုးတိုးတက်မှု မြန်ဆန်လွန်းသောကြောင့် ထိတ်လန့်စပြုလာသည်။ ၎င်းတို့က မူလတွင် အရည်အသွေးနိမ့်သော ထုတ်ကုန်များအဖြစ် တံဆိပ်ကပ်ခံခဲ့ရပြီး သူတို့တွင် ကိုယ်ပိုင်အတွေးအမြင်များ ရှိသောကြောင့် ဓာတ်ခွဲခန်းရှိ သုတေသီများ၏ မျက်လုံးထဲတွင် ပြီးပြည်စုံမှုမရှိသည့် တည်ရှိမှုများကဲ့သို့ ဖြစ်လာခဲ့ကြသည်။ တကယ်တမ်း၌ သူတို့၏တွေးခေါ်နိုင်စွမ်းက သူတို့ကိုလေ့လာခဲ့သည့် သိပ္ပံပညာရှင်များထက်ပင် ပိုကောင်းနေပေသည်။

နောက်ဆုံးတွင် အရည်အသွေးညံ့ဖျင်းသည်ဟု ယူဆရသော ထုတ်ကုန်များက သိပ္ပံသုတေသနအဖွဲ့အစည်းကို ဖြုတ်ချပြီး မြို့တော်ကြယ်ကို ဖျက်စီးခဲ့ကြသည်။ ထိုအချိန်မှစ၍ သူတို့၏အမည်က ကြယ်တာရာအစုအဝေးတစ်ခွင်သို့ ပျံ့နှံ့သွားပြီး အင်ပါယာကို တည်ထောင်ခဲ့ကြသည်။

အော်ဂတ်စတင်းက ဤအရည်အသွေးနိမ့် ထုတ်ကုန်အုပ်စု၏ခေါင်းဆောင်ဖြစ်သည်။ သူ၏မျိုးရိုးဗီဇက အင်အားကြီးပြီး တွန်းလှန်နိုင်စွမ်းမရှိသည့်အပြင် သူ၏စွမ်းအားများက အလွန်ပြင်းထန်သောကြောင့် ထိုခေတ်တွင် မည်သူမျှ သူနှင့်မယှဉ်နိုင်ပေ။ သို့သော် အတိအကျပြောရရင် သူက သားသမီးများ မရနိုင်ပေ။

အဘယ်ကြောင့်ဆိုသော် မည်သူတစ်ဦးတစ်ယောက်၏ဗီဇကမှ သူနှင့် သဟဇာတမဖြစ်သောကြောင့်ပင်။ မည်သူပင်ဖြစ်စေကာမူ သူနှင့်တွေ့သမျှကာလပတ်လုံး သူ့ဗီဇက သူတို့အားလုံးကို ဝါးမျိုသွားလိမ့်မည်ဖြစ်သည်။ အယ်လ်ဖာများပင် ခြွင်းချက်မရှိပေ။

အင်ပါယာက မကျရှုံးနိုင်သော အင်အားကြီးအင်ပါယာဖြစ်လာပြီးနောက် မရေမတွက်နိုင်သော သိပ္ပံပညာရှင်များက သူတို့ဧကရာဇ်၏ သားသမီးမရှိခြင်း ပြဿနာအပေါ် စိုးရိမ်ပူပန်ခဲ့ကြသည်။

သို့သော် ဧကရာဇ်က ဂရုစိုက်သည့်ပုံမပေါ်ပေ။ တစ်နေ့တွင် သူ အိပ်ရာမှ နိုးလာပြီး သူ့လူများထံ သူ့တွင် ချစ်သူရှိကြောင်း ပြောခဲ့သည်။ ထို့နောက် အားလုံး စိတ်လှုပ်ရှားကာ အခမ်းအနားကျင်းပရန် အဆင်သင့်ဖြစ်နေချိန်၌ သူ့ချစ်သူက နောင်နှစ်ပေါင်း ခုနစ်ရာတွင် ပေါ်ပေါက်လာမည်ဖြစ်သောကြောင့် သူ အနှစ်ခုနစ်ရာတိုင် အိပ်ရမည်ဖြစ်ကြောင်း မိန့်တော်မူခဲ့ပြန်သည်။

ထိုသတင်းကိုနားထောင်ပြီး ထိုအချိန်က သိပ္ပံအကယ်ဒမီ၏ သိပ္ပံပညာရှင်အကြီးအကဲက သူ၏ဓာတ်ခွဲခန်းအင်္ကျီအဖြူကို ဆွဲချွတ်လုနီးပါးဖြစ်ခဲ့ကာ နေရာမှာပင် နှုတ်ထွက်ချင်ခဲ့သည်။

သို့သော် သူတို့လုပ်နိုင်သည့်အရာ ဘာမှမရှိပေ။ ထိုသူက သူတို့၏ဧကရာဇ်ဖြစ်နေပြီး သူ အလိုရှိသမျှအရာတိုင်းကို သူတို့ ပြီးပြည့်စုံအောင် ပြုလုပ်ပေးရမည်။ ထို့ကြောင့် အော်ဂတ်စတင်း၌ သားသမီးများမရှိသော်လည်း သိပ္ပံပညာရှင်များက သူတို့ကို ထုတ်လုပ်ခဲ့သည့် မူလဓာတ်ခွဲခန်းမှ မျိုးဗီဇနမူနာကို ပြုပြင်ခဲ့သည်။ သူတို့က ဧကရာဇ်မင်းမြတ်၏ ပထမဗီဇထဲမှ လူတစ်ဦး**ကို ဖန်တီးခဲ့ပြီး အထောက်အထားအသစ်တစ်ခုကို ပေးကာ ရာဇပလ္လင်ပေါ်သို့ တွန်းတင်ခဲ့သည်။

သူတို့၏တွက်ချက်မှုများအရ ဤ**လူသည် သူတို့၏ဧကရာဇ်မင်း ပြန်လာချိန်အထိ အနှစ်ခုနစ်ရာကြာအောင် တော်ဝင်မိသားစုအတွက် လုံလောက်သည့် မျိုးရိုးဗီဇရှိပေလိမ့်မည်။

ထို့ကြောင့် တော်ဝင်မိသားစုက မျိုးဆက်တစ်ခုစီတွင် အားနည်းလာပြီး နောက်ကလေးမွေးပြီးသည်နှင့် ဘုရင်၏တိုက်ရည်ခိုက်ရည်သည်လည်း အမြန်ကျဆင်းသွားပေလိမ့်မည်။

လွန်ခဲ့သောနှစ်ပေါင်း ခုနစ်ရာခန့်က အင်ပါယာ၏ တောက်ပနေမှုက အောဂတ်စတင်း၏တည်ရှိမှုနှင့် ခွဲခြား၍မရပေ။ အစောပိုင်းမျိုးဆက် အယ်လ်ဖာတစ်ယောက်အနေနှင့် သူ့တွင် အံ့ဩဖွယ်ကောင်းသည့် စွမ်းရည်တစ်ခုရှိသည်။ သူ၏ဦးဆောင်မှုအောက်တွင် ရှိနေသရွေ့ အယ်လ်ဖာနှင့် ဘီတာများ၏ စွမ်းအားနှင့် ခန္ဓာကိုယ်ဖွဲ့စည်းဖွံ့ဖြိုးမှုတို့က သိသိသာသာ တိုးလာလိမ့်မည်။ ထိုလူ၏တည်ရှိမှုကြောင့် လွန်ခဲ့သောနှစ်ပေါင်း ခုနစ်ရာခန့်က အင်ပါယာကို ရွှေခေတ်ဟု ခေါ်တွင်ခဲ့သည်။ သူ အိပ်ပျော်သွားပြီးနောက် အင်ပါယာ၏ အယ်လ်ဖာများက သူ့စွမ်းရည်မှ မည်သည့်အကျိုးသက်ရောက်မှုကိုမှ မရရှိတော့ဘဲ မျိုးရိုးအဆက်ဆက် အားနည်းလာခဲ့သည်။

ထိုအရာများ၏ အကြောင်းရင်းနှင့် အကျိုးဆက်များကို နားထောင်ပြီးနောက် ရွှယ်လင် သူ့လူကို တစ်ဖန်ပြန်ကြည့်လိုက်ချိန်တွင် တကိုယ်လုံး တောက်ပနေသကဲ့သို့ ခံစားရပြီး 'လျှပ်စစ်နှင့်ဆက်သွယ်ထားသော ပစ္စည်းကြီး' ဟူသော စကားလုံးကို သူ့မျက်နှာအနှံ့ ရေးထိုးထားသကဲ့သို့ အေးစက်တောက်ပနေသည်။

သူ၏ခန္ဓာကိုယ်ဖွံ့ဖြိုးမှု အဘယ်ကြောင့် တိုးတက်သွားရကြောင်းကိုလည်း ယခုအခါ နားလည်လာခဲ့သည်။

သူ အောဂတ်စတင်းကို သွားတွေ့ခဲ့သည့်အတွက် ထိုညက အဖျားတက်ကာ သူ့ခန္ဓာကိုယ်လည်း ပိုမိုကောင်းမွန်လာခဲ့သည်။

ဒီလူရဲ့စွမ်းရည်တွေက အရမ်းကိုမနာလိုချင်စရာကောင်းမနေဘူးလား...

သူ ကလေးမရတာ အံ့သြစရာမရှိပါဘူး... ဒီလိုလူမျိုးမှာသာ သားသမီးရှိရင် ကမ္ဘာကြီးက သူတို့ရဲ့ ထိန်းချုပ်မှုအောက်မှာပဲ အမြဲရှိနေလိမ့်မယ်...

မှန်ပေသည်။ သိပ္ပံအကယ်ဒမီ၏ နောက်ဆက်တွဲစစ်ဆေးမှုအရ သူတို့ဧကရီနှင့် ဧကရာဇ်က မကြုံစဖူး ၁၀၀% မျိုးရိုးဗီဇကိုက်ညီမှုရှိခဲ့သော်လည်း သူတို့နှစ်ဦးစလုံး ကလေးရနိုင်စွမ်း မရှိကြပေ။

သတင်းကြားသောအခါ ရွှယ်လင် ခဏတာ စိတ်ရှုပ်သွားသော်လည်း ထိုလူ သူ့ကို နှစ်သိမ့်ပေးရန် ကြိုးစားသောအခါ အဝေးသို့ ကန်ထုတ်ပစ်ခဲ့သည်။

"ကိုယ် မင်းကို ကလေးမွေးပေးစေချင်တယ်လို့ ဘယ်သူပြောလဲ..."

ထိုစကားများက နန်းတော်တစ်ခွင်လုံး မြည်ဟိန်းသွားပြီး ကြားရသူတိုင်း ခေါင်းငုံ့နှုတ်ဆိတ်ကာ နားမကြားဟန်ဆောင်နေကြသည်။

ထိုလူက အမြဲတမ်း သားသမီး ရှိမရှိကို ဂရုမစိုက်ဘဲ ရွှယ်လင်လည်း ဤကိစ္စကို အထူးငြင်းဆန်နေသောကြောင့် သိပ္ပံအကယ်ဒမီ၏ သုတေသနကို ရပ်တန့်ကာ ကုသမှုကို လုံးဝစွန့်လွှတ်လိုက်သည်။

အကူစနစ်လေး၏ရှင်းပြချက်မှာ ရွှယ်လင်နှင့် သူ့လူက ဤကမ္ဘာမှ မူလဇာတ်ကောင်များမဟုတ်သောကြောင့် ကလေးမွေးခြင်းကဲ့သို့သော ကိစ္စရပ်ကို စဉ်းစားရန်မဖြစ်နိုင်တော့ပေ။ သူတို့ သဘာဝအတိုင်း သေဆုံးသည်အထိ ကမ္ဘာကြီးတွင် နေထိုင်နိုင်ကြသော်လည်း ကမ္ဘာကြီးကို အလွန်အမင်း ကြားဝင်နှောင့်ယှက်၍ မရနိုင်သေးပေ။

ဤရှင်းပြချက်က ရွှယ်လင်ကိုလည်း စိတ်သက်သာရာရစေသည်။

မြေခွေးအထီးအနေနှင့် မိန်းမနှင့် ပိုပြီးတူနေလျှင်ပင် အထီးဖြစ်နေဆဲပင်။ မြေခွေးသေးသေးလေးများ မွေးပေးရန်မှာ သူ့အတွက် လုံးဝမဖြစ်နိုင်ပေ။

အကူစနစ်လေး : "..." 

သူက ကလေးမွေးပေးရမယ့်သူဆိုတဲ့ ကိစ္စကို host က လက်ခံလိုက်တဲ့ပုံပဲ...

အောဂတ်စတင်းဟုခေါ်သော လျှပ်စစ်နှင့် ချိတ်ဆက်ထားသော ပစ္စည်းကြီးရှိနေသောကြောင့် ရွှယ်လင် သူ့ပခုံးပေါ်ရှိ ဝန်ထုပ်ဝန်ပိုးအားလုံးကို လွှတ်ချထားခဲ့ပြီး ကြယ်တာရာကမ္ဘာမှ အသိပညာမျိုးစုံကို အရူးအမူး စတင်စွဲမှတ်သင်ယူပြီး နောက်လာမည့်ကမ္ဘာများတွင် သူ့အတွက် အသုံးဝင်လာနိုင်သည့် အရာအချို့ကို လေ့လာခဲ့သည်။

သူကိုယ်တိုင် စက်ရုပ်တစ်ခုကို ဖန်တီးနိုင်ချိန်တွင် အော်ဂတ်စတင်းက စစ်တပ်တစ်ခုကိုစုစည်းပြီး ဇာ့ခ်များ၏ အခြေစိုက်စခန်းသို့ စတင်တိုက်ခိုက်ခဲ့သည်။

ကြယ်တာရာအစုအဝေး၏သမိုင်းတွင် အခမ်းနားဆုံးနှင့် စိတ်လှုပ်ရှားစရာအကောင်းဆုံးကာလက ဤနေရာမှ စတင်ခဲ့သည်။

၎င်းက လူသားမျိုးနွယ်အောင်ပွဲ၏အစဖြစ်ပြီး ကြယ်တာရာအစုအဝေး၏ ထိပ်ဆုံးတွင် ရပ်တည်နိုင်ခြင်း၏အစဖြစ်သည်။ ဧကရာဇ် ဓားညွှန်သည့်နေရာတိုင်း ဇာ့ခ်များ ပျောက်ကွယ်သွားခဲ့သည်။

မရေမတွက်နိုင်သော သူရဲကောင်းများနှင့် ပုံပြင်များက စစ်မြေပြင်တွင် ပေါ်ပေါက်ပျံ့နှံ့လာပြီး မရေမတွက်နိုင်သော ဒဏ္ဍာရီများနှင့် အံ့ဖွယ်များက ကြယ်များအကြားတွင် တောက်ပလာသည်။

စစ်ပွဲက ခြောက်နှစ်ခန့်ကြာခဲ့သည်။ ခြောက်နှစ်မြောက်နှစ်သစ်ကူးတွင် ဇာ့ခ်များ၏အသိုက်ကို လုံးဝဖျက်ဆီးရန် ဧကရာဇ်နှင့်ဧကရီတို့ ပူးပေါင်းလုပ်ဆောင်ခဲ့ပြီး ဇာ့ခ်ဘုရင်မများအားလုံးကို သတ်ကာ ထိုမျိုးနွယ်စုကိုသမိုင်းမှဖယ်ရှားပစ်ခဲ့သည်။

ထို့နောက် စစ်သူရဲအပေါင်းရှေ့တွင် အင်အားကြီးမားသော ဧကရာဇ်က သူတို့၏ဧကရီထံ လက်ထပ်ခွင့်တောင်းခဲ့ပြီး တစ်ဘဝလုံးစာ ကတိသစ္စာပြုခဲ့ကြသည်။

၎င်းက ကြယ်တာရာများအားလုံးတွင် စိတ်ကူးယဥ်အဆန်ဆုံး လက်ထပ်ခွင့်တောင်းခြင်းဖြစ်နိုင်သည်။ ထို့နောက် ကြယ်တာရာအစုအဝေး၏ အကြီးမားဆုံးမင်္ဂလာပွဲကို မြို့တော်ကြယ်တွင် ကျင်းပခဲ့သည်။ မဟာမိတ်အဖွဲ့က အင်ပါယာသို့ ပြန်လည်ပေါင်းစည်းပြီး ၎င်း၏လက်အောက်ခံအဖြစ် ခံယူခဲ့သည်။ ထို့နောက် လူသားမျိုးနွယ်က ခေတ်သစ်တစ်ခုဆီသို့ ဝင်ရောက်လာခဲ့သည်။

စကြဝဠာကြီးအား လူသားမျိုးနွယ်များ ကြီးစိုးသည့်ခေတ်၊ သူတို့တွင် ပြိုင်ဘက်များနှင့် သဘာဝရန်သူများ မရှိတော့သည့်ခေတ်ပင်။

အနှစ်ခုနစ်ရာကြာပြီးနောက် ဧကရာဇ် နိုးလာရသည့်အကြောင်းက တော်ဝင်မိသားစု၏ လျှို့ဝှက်ချက်ဖြစ်သော်လည်း အကျယ်တဝံ့အရှိဆုံးနှင့် ယုံကြည်နိုင်လောက်ဖွယ် ဒဏ္ဍာရီက အချစ်ဇာတ်လမ်းတစ်ပုဒ်ပင်ဖြစ်သည်။

ဧကရာဇ်က ထိုခေတ်တွင် ဧကရီအတွက် နိုးထလာခဲ့သည်။ ဧကရီအပေါ်ထားသည့် ဧကရာဇ်၏ချစ်ခြင်းမေတ္တာသည် အချိန်ကာလအရှည်ကြီးကို ဖြတ်ကျော်ခဲ့ပြီး သူတို့ မည်မျှပင် ဝေးကွာနေပါစေ ဧကရီကို ရှာတွေ့ကာ ချစ်မိသွားခဲ့သည်။

ဤသမိုင်းကာလသည်လည်း နောက်ပိုင်းမျိုးဆက်များတွင် အငြင်းပွားဖွယ်ရာဖြစ်ခဲ့သည်။ သို့သော်လည်း တစ်စုံတစ်ဦးမှ မဆီလျော်သော အချစ်တစ်ခုအဖြစ် အပြစ်ရှာဝေဖန်လိုက်သည့်အချိန်တိုင်း ဧကရာဇ်မင်းမြတ်၏ တော်ဝင်အတ္ထုပ္ပတ္တိကို ဆွဲထုတ်ကာ တစ်ဖက်လူကို သွေးဆောင်ရန် အမှန်တရားတစ်ခုပြီးတစ်ခု ချပြတတ်သူလည်း ရှိစမြဲပင်။

ဧကရာဇ်က ဧကရီကို ရူးရူးမူးမူး ချစ်မြတ်နိုးခဲ့ပြီး သူ၏ဘဝတစ်ခုလုံးကို ဧကရီအတွက်သာ အပ်နှံထားပုံရသည်။ ဇာ့ခ်များကို သုတ်သင်ရှင်းလင်းခြင်းနှင့် အင်ပါယာကို ပြန်လည်ရှင်သန် ခိုင်မြဲစေရန် နောက်ဆက်တွဲ လုပ်ဆောင်ချက်များ အားလုံးက ဧကရီနှင့် တစ်နည်းတစ်ဖုံ သက်ဆိုင်ပေသည်။

နောက်ဆုံးတွင် အလုံးစုံသောတန်ခိုးရှင်ဧကရာဇ်က သူချစ်ရသောသူ မရှိတော့သောကြောင့် ကမ္ဘာမှထွက်ခွာရန်ရွေးချယ်ခဲ့သည်။ ကမ္ဘာပေါ်တွင် သူမြတ်နိုးစွာ ကာကွယ်စောင့်ရှောက်ရမည့်အရာ မရှိတော့သောကြောင့် ဧကရီနောက်သို့လိုက်ကာ ကမ္ဘာမှ ထွက်သွားလေတော့သည်။

ရွှယ်လင်က နေရာလွတ်နယ်ပယ်အတွင်း ထိုင်ကာ သမိုင်းမှတ်တမ်းများကို လှန်ကြည့်ပြီး ဗိုက်နာသည်အထိ ရယ်မောနေခဲ့သည်။

သူ ထိုကမ္ဘာတွင် နှစ်ပေါင်းတစ်ရာကျော်နေထိုင်ခဲ့သည်။ ဇာတ်ဆောင်များ၏ ကံကြမ္မာကို ပြောင်းလဲပစ်ခြင်းဖြစ်စေ ၊ ဇာ့ခ်များကို သတ်ခြင်းဖြစ်စေ ၎င်းတို့အားလုံး အောင်မြင်စွာ ပြီးမြောက်သွားသော်လည်း သူ ရရှိခဲ့သည့်ကံကြမ္မာက သူ၏အသစ်စက်စက် ပြန်ကောင်းလာသော အမြီးများကို မထိန်းချုပ်နိုင်သေးပေ။ သမိုင်းစာအုပ်များဖတ်ခြင်းတွင် သူ့ကိုယ်သူ ဈာန်ဝင်သွားသောကြောင့် အကူစနစ်လေးက သူ့အတွက် ထိုအမြီးကို ထိန်းချုပ်ထားရန် အရူးအမူး ကြိုးစားလာသည်။

ရွှယ်လင် ထိုကြယ်တာရာကမ္ဘာမှ သူ့အမြီးနှစ်ချောင်းကို ပြန်လည်ရရှိခဲ့သည်။ အမြီးနှစ်ချောင်း အဘယ်ကြောင့် ပူးကပ်လျက်ရှိနေသည်ကို သူ မသိသော်လည်း ထိုအမြီးနှစ်ချောင်းကို ပြန်လည်ရရှိချိန်တွင် ရွှယ်လင် အဆင်သင့်မဖြစ်သေးပေ။ သူ၏လက်ရှိ ဝိညာဉ်စွမ်းအားနှင့် ရုပ်ပိုင်းဆိုင်ရာခန္ဓာကိုယ် လိုအပ်နေသည့်အပေါ် အခြေခံပြီး အမြီးနှစ်ချောင်း၏ စွမ်းအားကို လုံးဝချိုးနှိမ်ထားရန် နည်းလမ်းမရှိပေ။ အကူစနစ်လေးက သူ့အတွက် အမြီးနှစ်ချောင်းကို အချိန်အကြာကြီး ကူထိန်းထားပေးခဲ့သော်လည်း သူတို့ကို ထိန်းချုပ်ထားရန် အပြည့်အဝ အကူအညီ မပေးနိုင်ခဲ့ပေ။ ထို့ကြောင့် သူတို့အတွက် အကောင်းဆုံးရွေးချယ်မှုက နောက်ကမ္ဘာကို ဆက်သွားရန်ပင်။

"Host နောက်လာမယ့်ကမ္ဘာမှာရှိတဲ့ အလုပ်က အတော်လေး သက်သာလိမ့်မယ်... အနားယူဖို့ ဒီအချိန်ကို ကောင်းကောင်း အသုံးချသင့်တယ်... ပြီးတော့ ကံကောင်းခြင်းတွေကို ပိုပြီးသိမ်းပိုက်နိုင်ဖို့ တတ်နိုင်သမျှ အကျယ်ပြန့်ဆုံးအဆင့်ထိ ဇာတ်ကွက်ကို ဖျက်စီးဖို့ ကြိုးစားကြည့်၊ ဒါဆိုရင် ဒီထက်ပိုပြီး host ရဲ့စိတ်ဝိညာဉ်ခွန်အားကို ပိုပြီးခိုင်မာလာနိုင်တယ်... နောက်ပြီး ဒီ မတည်ငြိမ်တဲ့စွမ်းအားကိုလည်း ဖိနှိပ်ထားနိုင်လိမ့်မယ်..."

ရွှယ်လင်၏အမြီးများကြောင့် အကူစနစ်လေး အနည်းငယ် မောပန်းလာခဲ့သည်။ 

"နောက်ထပ်အမြီးကို ရှာတွေ့တဲ့အခါ ဒီလိုခက်ခဲတဲ့အနေအထားမျိုး မဖြစ်ရအောင် host ရဲ့ခန္ဓာကိုယ်ကို ပြန်လည်တည်ထောင်ဖို့ တတ်နိုင်သမျှ အမြန်ဆုံးကျင့်ကြံဖို့လိုတယ်..."

ရွှယ်လင် ခေါင်းညိတ်ကာ တုန့်ပြန်လိုက်သည်။ သူ နောက်ကမ္ဘာ၌ မည်သို့မည်ပုံဖြစ်မည်၊ ထိုလူလည်း မည်သို့သော အခန်းကဏ္ဍမှ ပါဝင်မည်ကို သိရရန် ပို၍မျှော်လင့်နေမိသည်။

သူ့နောက်ကွယ်ရှိ အဆုံးသတ်မရှိ အမှောင်ထုထဲမှ ထွက်ပေါ်လာသော တိုးဖွဖွရယ်သံကို သတိမမူမိဘဲ ရွှယ်လင် အမှောင်ထုထဲသို့ တိုးဝင်သွားသည်။

ရယ်မောနေသူက ရှိုးပွဲကောင်းတစ်ခုကို ကြည့်နေသည့် တစ်စုံတစ်ယောက်ကဲ့သို့ မရေရာသောအဓိပ္ပါယ်အချို့ကို အရိပ်အမြွက်ဖော်ပြနေသည်။

အကူစနစ်လေးက ထိုရယ်သံကို ကြားလိုက်သော်လည်း ရွှယ်လင်၏နောက်သို့ လိုက်သွားပြီဖြစ်သောကြောင့် နောက်ပြန်လှည့်ကြည့်ရန်အခွင့်အရေးမရှိခဲ့ပေ။

ပြတင်းပေါက်အပြင်ဘက်မှ—သို့မဟုတ် ထိုထက်ဝေးသောနေရာမှ— အခမ်းအနားများကျင်းပနေသည့် ပျော်ရွှင်ဖွယ်အသံများ ထွက်ပေါ်လာသည်။ အသံများက အဆုံးမရှိပေါက်ကွဲထွက်လာပြီး အလွန်အကျူးပျော်ရွှင်နေသူများသည် မည်သို့သောအခါမှ မပင်ပန်းကြသည့်ပုံပင်။ ရွှယ်လင် သူ့မျက်လုံးများကို ဖွင့်ကြည့်လိုက်သည့်အချိန်တွင် သူ့အသိစိတ်က အနည်းငယ်မှုန်ဝါးနေဆဲပင်။

သူ့မျက်လုံးရှေ့တွင် ပုတီးစေ့များချိတ်ဆွဲထားပြီး အနီရောင်ခေါင်းဆောင်းက သူ့မြင်ကွင်းကို ဖုံးအုပ်ထားသည်။

ရွှယ်လင် အကူစနစ်လေးကို ထွက်လာရန် ခေါ်လိုက်တော့မည့်အချိန်တွင် ယောက်ျားတစ်ယောက်၏ အေးစက်သော နှာမှုတ်သံကို ကြားလိုက်ရသည်။

ရွှယ်လင် အနည်းငယ်အံ့သြသွားဟန်ဖြင့် မျက်ခုံးများကို ကြုတ်လိုက်သည်။ သူ့ဘေးပတ်ဝန်းကျင်တွင် တခြားသူများရှိသည့် အနေအထားနှင့် နိုးလာခြင်းဆိုသည်မှာ ရှားရှားပါးပါးဖြစ်ပြီး ယခုအချိန်တွင် သူလိုအပ်နေသည့် အချက်အလက်များကို ရယူရန်အဆင်မပြသောကြောင့် ယခုလောလောဆယ် အရာအားလုံးကို တစ်ဆင့်ပြီးတစ်ဆင့် လုပ်ဆောင်သွားရုံသာတတ်နိုင်သည်။

ဒီ...နေရာမှာပဲ...

ဒါက ဘယ်လိုအခြေအနေကြီးလဲ...

ထိုလူက သူ့အိပ်ရာနှင့် ဝေးဝေးတွင် ရပ်နေပြီး စားပွဲဘေးတွင် ရှိနေလောက်သည်။ ထိုလူက ထိုနေရာ၌ပင် မလှုပ်မယှက် ရပ်နေပြီး သူ၏ ပထမဆုံး နှာမှုတ်သံက ရွှယ်လင်၏ အာရုံကို ဖမ်းစားနိုင်ခြင်းမရှိသောကြောင့် မကျေမနပ်ဖြစ်ကာ ထပ်မံ နှာမှုတ်လိုက်သည်။

ရွှယ်လင်၏ခေါင်း လှုပ်ရှားသွားပြီး သူ့ဘက်သို့ လှည့်ကြည့်လိုက်သည်။

နောက်ဆုံး၌ သူ စကားပြောလာပြီး အသံက အေးစက်ကာ စောင်းချိတ်ထေ့ငေါ့လျက်ရှိသည်။

"ဘုရင်မင်းမြတ်က မင်းသမီးရဲ့ဉာဏ်ပညာ ထက်မြက်မှုအတွက် အမြဲတမ်း ချီးမြှောက်ပြောဆိုခဲ့တယ်... ဒီမင်္ဂလာပွဲရဲ့ နောက်ကွယ်က အဓိပ္ပါယ်ကို တော်ဝင်မင်းသမီးက ကျွန်တော့်ထက် ပိုပြီး ရှင်းရှင်းလင်းလင်းသိလိမ့်မယ်လို့ ထင်ပါတယ်..."

ရွှယ်လင်၏မျက်နှာပေါ်ရှိ တည်ငြိမ်နေသော မျက်နှာဖုံးက ကွဲအက်လုမတတ်ဖြစ်သွားသည်။

တော်ဝင်မင်းသမီးလား... နောက်ဆုံးဘဝတုန်းက ငါကိုယ်ဝန်ဆောင်နိုင်တယ်ဆိုတာ ကိစ္စမရှိဘူး... အနည်းဆုံးတော့ ငါ ယောက်ျားတစ်ယောက်ဖြစ်ခဲ့သေးတယ်... ဒီတစ်ကြိမ်မှာ ငါက မူလ လိင်အမျိုးအစားတောင် မဟုတ်တော့ဘူးလား...

4.17 – သူ့မူလ လိင်အမျိုးအစားတောင် မဟုတ်တော့ဘူးလား

( အပေါ်မှာချန်ထားခဲ့တဲ့ ခေါင်းစဉ်ပါ )

Arc 4 End. 🦊