MM Story Teller

Chapter 61 (Arc 5)

Viewers 3k

🦊Chapter 61

Arc 5 - တော်ဝင်မင်းသမီးကို မှားယွင်းလက်ထပ်မိခြင်း

5.1 – သူ့မှာ သူသဘောကျရတဲ့ တစ်စုံတစ်ယောက် ရှိပြီးသားလား

သူမက မွေးဖွားလာစဥ်တည်းက အလွန်လှပပေသည်။ သူမ၏မျက်ခုံးများ အနည်းငယ်ကျုံ့သွားပြီး မျက်လုံးများကို ပင့်ကာ သူ့အား တည်ငြိမ်စွာ ကြည့်လိုက်သည်။ သူမ၏ရဲရဲနီနေသော နှုတ်ခမ်းလေးများက ပွင့်ဟလာသည်။

"ပြောလို့ပြီးပြီဆိုရင် ထွက်သွားတော့..."

ကျန့်ရှောက်ရှီး အစပိုင်းတွင် ရှုပ်ထွေးသွားသော်လည်း နောက်ပိုင်း သူ့အမူအရာက အရုပ်ဆိုးသွားခဲ့သည်။

သူ၏မင်္ဂလာဦးညတွင် အသစ်စက်စက်ဇနီးလေးက သူ့ကို ထွက်သွားရန်သာ ပြောနေသည်။ ဂုဏ်သတင်းကျော်ကြားသည့် တော်ဝင်မင်းသမီးဖြစ်နေလျှင်ပင် ကျန့်ရှောက်ရှီး သူ့မကို အလွယ်တကူ လွှတ်ပေးလိမ့်မည်မဟုတ်ပေ။

"ဒီမင်းသမီးက ရှင့်ကို လက်ထပ်ခဲ့တာက အာဏာကို အလွဲသုံးစားလုပ်ပြီး ပုန်ကန်မှာကို စောင့်ကြည့်ပြီး ထိန်းညှိပေးဖို့ဆိုတာ ရှင်လည်း သိပါတယ်... ဒါကြောင့် ဒီမင်းသမီး ဘယ်လိုပြုမူရမယ်ဆိုတာ ရှင် သင်ပေးစရာမလိုတဲ့ကြောင်းကိုလည်း သိထားသင့်တယ်... ဒါကြောင့် ပြောပြီးသွားရင် ဝေးဝေးသွားတော့..."

သူမ သူ့ကို အေးစက်စွာ ကြည့်လိုက်ပြီး နောက်တစ်ကြိမ် ထပ်ပြောလိုက်သည်။

ကျန့်ရှောက်ရှီး လှောင်ရယ်ကာ အရှင်မင်းသမီးက ရယ်စရာကောင်းသည်ဟု ထင်သွားခဲ့သည်။

"အရှင်မင်းသမီးက မင်္ဂလာဦးညမှာ မင်္ဂလာအခန်းထဲကနေ ကျွန်တော်မျိုးကို ထွက်သွားခိုင်းနေတာလား..."

မင်းသမီးက သူ့ကို ဂရုမစိုက်သည့် အမူအရာနှင့် ကြည့်နေဆဲပင်။ စက္ကန့်အနည်းငယ်ကြာအောင် သူ့ကို စိုက်ကြည့်ပြီးနောက် ဖြည်းညှင်းစွာ ထလာသည်။

"ရှင် မသွားရင် ကျွန်မ သွားမယ်..."

သူမက အနီရောင်တောက်တောက် မင်္ဂလာဝတ်စုံကို ၀တ်ဆင်ထားပြီး ထူးချွန်သော ပန်းချီဆရာတစ်ဦးပင် သူမ၏အလှကို ယခုအချိန်တွင် ဖမ်းစားရေးခြယ်နိုင်စွမ်း ရှိလိမ့်မည်မဟုတ်ပေ။ သူမက ဦးခေါင်းအဆင်တန်ဆာကို မြေပြင်ပေါ်သို့ ပစ်ချကာ ကမ္ဘာကြီးနှင့် လိုက်လျောညီထွေမရှိပုံရသည့် ထိုမျက်လုံးများက ကျန့်ရှောက်ရှီး၏ကိုယ်ပေါ်သို့ ကျရောက်သွားသည်။

သို့သော်လည်း ကျန့်ရှောင်ရှီး၏နှလုံးသားထဲတွင် မကြုံစဖူး အေးခဲမှုကိုသာ ခံစားခဲ့ရသည်။ သူ မင်းသမီး၏ အခန်းအပြင်သို့ ထွက်ရာလမ်းကို ပိတ်ဆို့ထားသော်လည်း အကြည့်တစ်ချက်နှင့်အတူ အေးခဲသွားသလို ခံစားလိုက်ရပြီး တစ်ဖက်လူ ဖြတ်လျှောက်သွားစဉ် မသိစိတ်မှနေပြီး လမ်းဖယ်ပေးခဲ့သည်။

ရွှယ်လင် တံခါးဖွင့်လိုက်သည်။ အစောင့်များနှင့် အစေခံများက မင်္ဂလာဆောင်ဝတ်စုံနှင့် ထွက်လာသည့် သူ့ကို မြင်လိုက်ရပြီးနောက် သူ၏သာယာနာပျော်ဖွယ်ကောင်းပြီး အေးစက်ပြတ်သားသည့်အသံကို ကြားလိုက်ရချိန်တွင် အံ့အားသင့်သည့်ပုံစံများကို စတင်ဖော်ပြလာကြသည်။

"ဒီကနေ အဝေးဆုံးခြံဝင်းကို ရှင်းခိုင်းလိုက်... ငါ အဲဒီမှာ သွားနေမယ်..."

အစောင့်များနှင့် အစေခံများက တစ်ယောက်ကိုတစ်ယောက် စိုက်ကြည့်နေကြသည်။ စစ်သူကြီး၏ အမိန့်မပါဘဲ သူတို့ လုံးဝမလှုပ်ရှားဝံ့ကြပေ။

ထို့နောက် မင်းသမီး၏အနောက်မှ မည်းမှောင်သောအမူအရာဖြင့် ပေါ်ပေါက်လာသော စစ်သူကြီးကို တွေ့လိုက်ရသည်။ သူ ပြောလိုက်သည့် လေသံက အစောင့်များနှင့် အစေခံများကို မသိစိတ်မှ တုန်လှုပ်သွားစေသော်လည်း သူ့ရှေ့ရှိ မင်းသမီးတစ်ဦးတည်း အပေါ်၌ လုံး၀ အကျိုးသက်ရောက်မှုမရှိပေ။

"မင်း ပြန်ဝင်သွားလိုက် ငါ ထွက်သွားလိုက်မယ်..."

ရွှယ်လင် သူ့အား ယဉ်ကျေးမနေတော့ပေ။ မည်သို့ပင်ဆိုစေကာမူ ယနေ့ညတွင် လူတစ်ယောက်တည်းသာ ဤအခန်းတွင်နေနိုင်ပြီး ယခုအခါ သူ့စိတ်အခြေအနေသည်လည်း ကောင်းမနေပေ။ ထို့ကြောင့် တစ်ဖက်လှည့်ကာ ယောက်ျား၏အဝတ်များကို လက်တစ်ဖက်ဖြင့် ဆွဲလိုက်သည်။ စစ်သူကြီး၏ စိတ်ရှုပ်ထွေးနေသော အကြည့်အောက်တွင် ရွှယ်လင် သူ့ကို တံခါးဆီသို့ တွန်းထုတ်လိုက်ပြီး ခြေထောက်မြှောက်ကာ စစ်သူကြီးကို ကန်ထုတ်ပစ်လိုက်သည်။

'ဘမ်း' ဟူသော အသံနှင့်အတူ တံခါး ပိတ်သွားပြီး အတွင်းမှ ဂျက်ချထားလိုက်လေသည်။

ဖြစ်စဥ်တစ်ခုလုံးကို မျက်မြင်တွေ့လိုက်ရသော အစေခံများ အလွန်ထိတ်လန့်သွားပြီး အသံမထွက်ရဲကြပေ။ ကြမ်းပြင်ပေါ်မှ ဖြည်းညှင်းစွာ ထလာသော စစ်သူကြီးကို တွေ့လိုက်ရချိန်တွင် ခေါင်းကိုအမြန်ငုံ့ကာ ဒူးထောက်လိုက်ကြသည်။ စစ်သူကြီး၏ အကျည်းတန်လှသော အမူအရာကို မကြည့်ဝံ့ကြပေ။

"ဒီည အဖြစ်အပျက်တွေကို ဘယ်သူမှ မြင်လိမ့်မှာမဟုတ်ဘူးလို့ မျှော်လင့်တယ်..."

စစ်သူကြီးက သူ့တစ်ကိုယ်လုံးမှ အေးစက်သော အငွေ့အသက်များ ထုတ်လွှတ်နေပြီး လူတိုင်း စကားတစ်ခွန်းမှ မပြောနိုင်ဘဲ နားလည်ကြောင်းဖော်ပြရန် အလျင်အမြန် ခေါင်းညိတ်ရုံသာတတ်နိုင်ခဲ့သည်။

ကျန့်ရှောက်ရှီး တံခါးဝတွင် ရပ်ကာ အခန်းကို ကြာမြင့်စွာ စိုက်ကြည့်နေခဲ့သည်။ မီးအလင်းရောင်များ မှိတ်သွားသည့်အချိန်မှသာ အေးစက်စက် လှောင်ရယ်လိုက်ပြီး အဝေးသို့ လှည့်ထွက်သွားသည်။

ရွှယ်လင် သူ့စိတ်အခြေအနေနှင့် ပတ်သတ်ပြီး ဂရုမစိုက်နိုင်ပေ။ တံခါးပိတ်ပြီးနောက် သူ ပထမဆုံးလုပ်ခဲ့သည့်အရာက အောက်သို့လက်ဆန့်ထုတ်ကာ သူ့လိင်အမျိုးအစားကို အတည်ပြုခြင်းပင်။ သူ ယောက်ျားတစ်ယောက် ဖြစ်နေသေးကြောင်း အတည်ပြုပြီးနောက်တွင် အသက်ပြင်းပြင်းရှူကာ ခေါင်းပေါ်ရှိ အဆင်တန်ဆာရတနာများကို ဆွဲချွတ်လိုက်သည်။

( အပေါ်ပိုင်းမှာ ရှင်နဲ့ ဒီမင်းသမီးလို့ နာမ်စားသုံးထားတာက ဇာတ်ကြောင်းကို သေချာမပြောသေးတဲ့အပြင် သူ မင်းသမီးလို နေနေရတာကို စစ်သူကြီးကလည်း သိလား မသိလား မပါသေးလို့ပါ နောက်ပိုင်းမှာ နာမ်စားကို ဇာတ်လမ်းနဲ့လိုက်ပြီး အဆင်ပြေအောင် ‌သုံးပေးပါ့မယ် )

မည်မျှနာကျင်ရသည်ကို သူ ဂရုမစိုက်ပေ။ သူ အလွန်ဒေါသထွက်နေပြီး စိတ်အခြေအနေက အလွန်ဆိုးဝါးနေသည်။

နောက်ဆုံးတွင် အကူစနစ်လေးက သူ၏အသွင်အပြင်ကို ဖော်ပြကာ စားပွဲ၏ခြေရင်း၌ ပုန်းနေခဲ့ပြီး ဒေါသထွက်နေသော host ကိုကြည့်ကာ စကားတစ်ခွန်းမှ မပြောဝံ့ပေ။

ရွှယ်လင် လက်ဝတ်ရတနာများကို တစ်ဖက်သို့ လွှင့်ပစ်လိုက်ကာ ကြီးမားလှသော မင်္ဂလာဝတ်စုံကို ချွတ်လိုက်ပြီးနောက် ချက်ချင်းပင် ပေါ့ပါးသွားသလို ခံစားလိုက်ရသည်။ ထို့နောက် ကုတင်ပေါ်မှ ခုန်ဆင်းကာ ဤဒုက္ခတွင်းကို ကျော်ဖြတ်ရန်နှင့် အရာအားလုံးကို ရှင်းရှင်းလင်းလင်း ပြောပြရန် အကူစနစ်လေးကို အမိန့်ပေးလိုက်သည်။

အကူစနစ်လေးက ကြောက်ရွံ့တွန့်ဆုတ်နေပြီး မျက်တောင်များခတ်ကာ ချစ်စရာကောင်းအောင် ပြုမူပြီး ရွှယ်လင်ထံမှ စာနာစိတ်ရရှိစေရန် ကြိုးစားခဲ့သည်။ သူ၏ hostက သူ့အမွေးများကို လှမ်းဆွဲလိုက်မှသာ အကူစနစ်လေးက ရွှယ်လင်အား ခါးသီးစွာ အော်ဟစ်ငိုယိုကာ ပြောဆိုခဲ့သည်။

"Host ဆိုးရွားတဲ့အခြေအနေမျိုးမှာ နိုးလာတာနဲ့ ပတ်သက်ပြီး ကျင့်သားရနေဖို့လိုတယ်...အချိန်တိုင်းမှာ လုံးဝဘေးကင်းတဲ့ အချိန်တစ်ခုဆီ ကူးပြောင်းသွားနိုင်တာမျိုး မဟုတ်ဘူး..."

ရွှယ်လင် အေးစက်စွာ တစ်ချက်ကြည့်လိုက်သည်။ သူ အမှန်တကယ် ဂရုစိုက်သည့်အရာက အကူစနစ်လေး သူ့အတွက် သွေးများပေကျံနေသော အလောင်းများကို ကောက်ပေးနေခြင်းဖြစ်သည့်အကြောင်းကိုမူ လုံး၀ မပြောပြခဲ့ပေ။

သူ့ကိုယ်သူ တိုးတိုးလေး ပြောလိုက်သည်။

ဒါက ဘာကြီးလဲ... မိန်းမလို ဝတ်စားထားတဲ့ ယောက်ျားတစ်ယောက်... ထပ်ပေါင်းပြောရရင် တော်ဝင်မင်းသမီးတစ်ယောက်လား... နောက်ပြီး လက်ထပ်ပြီးသားကြီးလား... သူတို့ ဘယ်သူ့ကို ကစားဖို့ ကြိုးစားနေတာလဲ...

"ငါ့ကို ဇာတ်ကွက်ပေး..."

သူ ယခုလေးတင် ကန်ထုတ်ပစ်လိုက်သည့် စစ်သူကြီးက သူကို ပြန်ပြီးလာသတ်လိမ့်မည်လားဆိုသည်ကို သူ မသိပေ။ ထို့ကြောင့် ဇာတ်ကြောင်းကို ဦးစွာလေ့လာထားခြင်းက ပိုကောင်းပေသည်။ တစ်ဖက်လူ ပြောခဲ့သည့်စကားများကို အခြေခံပြီး သူ့လုပ်ရပ်များ မှန်ကန်ခြင်း ရှိ၊ မရှိကို သူလည်း မသေချာပေ။ အကူစနစ်လေး၏ ဆိုးရွားသော ပြုပြင်မှုများကြောင့် သူ့ကိုယ်သူ ရူးကြောင်ကြောင်ကိစ္စများ ပြုလုပ်နေခြင်း မဟုတ်ရန် မျှော်လင့်သည်။

အကူစန‌စ်လေးက အခြားမည်သည်ကိုမှ မပြောဝံ့ပေ။ သူ့အမြီးပေါ်ရှိ အမွေးများ နောက်တစ်ကြိမ်ထပ်ပြီး ထိခိုက်လာမည်ကို ကြောက်ရွံ့နေကာ သူ့ host ပို၍ဒေါသကြီးလာပြီး သူ့အပေါ် ဒေါသပုံချလာလျှင်ဆိုပြီး ထိုယောက်ျားအကြောင်းနှင့်ပတ်သက်ပြီး မည်သည့်အရာကိုမှ ပြောပြရန် သတ္တိမရှိတော့ပေ။ ရွှယ်လင် ဇာတ်ကွက်ကိုသာ လိုချင်ကြောင်းကြားပြီး အလျင်အမြန်ပင် ပေးလိုက်သည်။

အချက်အလက်များစွာကို တစ်ချိန်တည်း စွဲမြဲမှတ်သားရသည်ကို ရွှယ်လင် ကျင့်သားရနေပြီဖြစ်သော်လည်း ယခုတစ်ကြိမ် ဇာတ်ကွကက ရွှယ်လင်အား တစ်စုံတစ်ယောက်ကို ချက်ချင်းသတ်ပစ်ချင်လာသည်အထိ ဖြစ်စေခဲ့သည်။

ဒီကမ္ဘာမှာ ငါ အနားယူပြီး ကျင့်ကြံနိုင်တယ်လို့ အကူစနစ် က ပြောခဲ့တယ် မဟုတ်ဘူးလား... ဒီကမ္ဘာကြီးရဲ့ ဆိုးရွားတဲ့ပုံစံတွေနဲ့ဆိုရင် ကမ္ဘာအနှံ့ သူ အမျိုးသမီးဇာတ်ဆောင်နောက်ကို ပြေးမလိုက်ရရင်တောင် တော်တော်ကောင်းနေပြီ... ကျင့်ကြံရမယ်ပေါ့... ဟားဟား...

ဤသည်မှာ အချစ်ဇာတ်လမ်းအဖြစ် အမျိုးအစားခွဲခြားနိုင်ပြီး လက်တွေ့မကျသောကမ္ဘာတစ်ခုဖြစ်သည်။ စုစုပေါင်း အမျိုးသားခုနစ်ဦးနှင့် အမျိုးသမီးတစ်ဦးတို့ ပါဝင်သည်။

မှန်ပေသည်။ စနိုးဝှိုက်တ်(Snow White)နှင့် လူပုလေး ခုနစ်ယောက် မဟုတ်ပေ။ ဤကမ္ဘာ၏ အမျိုးသမီး ဇာတ်ဆောင်က ယောက်ျားခုနစ်ယောက်နှင့် အမှန်တကယ် တွဲနေသည်။ ဤလူများ၏ စရိုက်လက္ခဏာများက တစ်ယောက်ထက်တစ်ယောက် ပိုသန်မာကြသော်လည်း သူတို့ထဲမှ တစ်ယောက်ချင်းစီတိုင်းက အမျိုးသမီး အဓိကဇာတ်လိုက်ကို လုံးဝချစ်မြတ်နိုးပြီး သူမကို တခြားသူများနှင့် သာတူညီမျှ မျှဝေလိုစိတ်ရှိကြသည်။

အမျိုးသမီးဇာတ်လိုက်က ဤကမ္ဘာသို့ ကူးပြောင်းလာခဲ့ပြီး သူမ၏ယခင်ဘဝတွင် လုပ်ကြံသတ်ဖြတ်ရေးသမား ဖြစ်ခဲ့သည်။

ရွှယ်လင် မေးစေ့ကို ပွတ်သပ်ပြီး ထိုကဲ့သို့သော အချစ်ဇာတ်လမ်းမျိုးကို သဘောကျကြောင်း ဖော်ပြလိုက်သည်။

ကူးပြောင်းပြီးနောက် သူမက ကုန်းချင်မင်းသား၏ နန်းဆောင်မှ မင်းသမီးမင်ယွဲ့ ဖြစ်လာပြီး သူမ၏အမည်က ဝမ်ရမ်ယင်းယွဲ့ဖြစ်သည်။ ဤသည်မှာ အလွန်ကောင်းမွန်သော အခြေအနေဖြစ်သင့်သော်လည်း အမှန်တကယ်တွင် မြို့တော်ရှိ မည်သည့်အင်ပါယာနန်းဆောင်၏ အခြေအနေပင်ဖြစ်စေ အလွန်ဆိုးရွားပေသည်။ နန်းဆောင်၏ အကြီးအကဲဖြစ်သည့် မင်းသားက ထိုနေရာ၌ မရှိတော့ဘဲ မင်းသား၏ နန်းဆောင်က သူ့မိန်းမ၏ဆွေမျိုးများနှင့် ပြည့်နှက်နေသည်။ သူမ၏ဘွဲ့က ပိုမြင့်လျှင် သို့မဟုတ် ပိုကြီးသည်ဆိုလျှင်ပင် အသုံးမဝင်သေးပေ။ ဤဝမ်ရမ်ယင်းယွဲ့က အမျိုးသမီးအိမ်အကူ၏ ရေနှစ်သတ်ခြင်းကို ခံခဲ့ရပြီး ဤမင်းသမီး၏ အဆင့်အတန်းက နိမ့်ကျသွားခဲ့သည်။

ဧကရာဇ် သက်လတ်ပိုင်းအရွယ်ရောက်လာချိန်တွင် သွေးစပ်၍ ဆွေမျိုးတော်စပ်ခြင်းနှင့် မိသားစုချင်း ချစ်ခင်မြတ်နိုးမှုကို စတင်စဉ်းစားလာခဲ့သည်။ သို့သော် တစ်ယောက်မှ အသက်မငယ်ကြတော့ပေ။ သူ ထီးနန်းကို ပြန်သိမ်းပိုက်ပြီးချိန်တွင် တော်ဝင်မိသားစုက ဆိုးရွားသည့်သေဆုံးမှုများနှင့် ဒဏ်ရာများ ရရှိခဲ့ကြသည်။ ဧကရာဇ်မင်းကို တော်လှန်တိုက်ခိုက်ခဲ့သော မင်းသားတစ်ဦးမျှ မကျန်ရစ်ခဲ့ပေ။ ကုန်းချင်မင်းသား၏နန်ဆောင်မှ မင်းသားကုန်းချင်သည်လည်း သူတို့ထဲမှ တစ်ဦးဖြစ်ခဲ့ပြီး လွန်ခဲ့သော ဆယ်နှစ်ကျော်ခန့်က သေဆုံးသွားခဲ့ပြီးဖြစ်သည်။ ဝမ်ရမ်ယင်းယွဲ့က သူ၏ ပထမဆုံးနှင့် တစ်ဦးတည်းသော သမီးတော်ဖြစ်သည်။

ကုန်းချင်မင်းသား၏ အခြေအနေက အတော်လေး ကောင်းမွန်သည်ဟု ယူဆနိုင်သည်။ သမီးတော်ပင် မရှိခဲ့သော အင်ပါယာနန်းဆောင်အချို့ပင်ရှိပြီး ကြင်ယာတော်မင်းသမီးတစ်ပါးသာ ကျန်ရှိတော့သည်။ ထိုအရာများက ပျောက်ကွယ်လုနီးပါးအခြေအနေအထိ ပျက်စီးနေပေပြီ။

ဧကရာဇ်မင်းမြတ်ရာထူးအတွက် အင်ပါယာမိသားစု အချင်းချင်း တိုက်ခိုက်ကြဖြစ်ခြင်းက အဆန်းမဟုတ်ပေ။ ရာဇပလ္လင်ကို သိမ်းပိုက်ရန် နောက်ဆုံးတိုက်ပွဲပြီးဆုံးခဲ့သည်မှာ အချိန်အတော်ကြာခဲ့ပြီဖြစ်ပြီး ယခုအချိန်က ဧကရာဇ်၏သားတော်များ ပြန်လည်တိုက်ခိုက်ရမည့်အချိန်ဖြစ်သည်။

ဇာတ်ဆောင်မင်းသမီး ရောက်ရှိလာချိန်တွင် မြို့တော်ထဲသို့ မုန်တိုင်း ဝင်ရောက်တိုက်ခတ်လာမည့် အချိန်ဖြစ်သည်။ သူမ ရောက်ရှိလာခြင်းက ရွှံ့ရေများကို ပို၍ပင် နောက်ကျိသွားစေခဲ့ပြီး လေနှင့် မိုးတိမ်များလည်း ပြောင်းလဲသွားကာသူမ မွေးစကတည်းက ကြိုတင်နိမိတ်ထုတ်ထားသည့် ကံကြမ္မာအတိုင်း ဖြစ်လာခဲ့သည်။ သူမက သုံးနိုင်ငံကို ဘေးဥပဒ်ဖြစ်စေနိုင်သည်ဟု ကြိုတင်ဟောကိန်းထုတ်ခြင်း ခံခဲ့ရသည်။

ရွှယ်လင် ရရှိထားသော ခန္ဓာကိုယ်က မင်းသမီးနှင့်များစွာ ပတ်သက်မှုမရှိပေ။ သူက ဇာတ်လိုက်မင်းသမီး ပေါ်ထွက်လာသည့် လမ်းကြောင်းပေါ်ရှိ အမြောက်စာငယ်လေးမျှသာဖြစ်ပြီး ခလုတ်တိုက်လဲနိုင်လောက်သည်အထိပင် အရည်အချင်း မပြည့်မီခဲ့ပေ။ ရေထဲပစ်ချလျှင်ပင် လှိုင်းဂယက်များ ဖြစ်ပေါ်လာမည် မဟုတ်ပေ။

ဝမ်ရမ်ဟုန်က ဧကရာဇ်ဟောင်းနှင့် သွေးချင်းတော်စပ်နေပြီး ဧကရာဇ်မင်းမြတ်၏ အချစ်တော် တော်ဝင်မင်းသမီးဖြစ်သည်။ သူက အကြီးဆုံးမင်းသမီးထက် နှစ်အနည်းငယ်ငယ်သော်လည်း ဧကရာဇ်မင်းမြတ်၏ ညီမငယ်အဖြစ် မွေးဖွားလာကာ ယခင်ဧကရီထက်ပင် မြင့်မြတ်သည့်တည်ရှိမှု ဖြစ်လာခဲ့သည်။

သူ့ကို ဖွားမြင်သောနှစ်က ဧကရာဇ်မင်းမြတ် ထီးနန်းအတွက် တိုက်ပွဲဝင်သောနှစ်ဖြစ်သည်။ နောက်ပိုင်းနှစ်များတွင် သူ ဧကရာဇ်ဟောင်း ဖြစ်သွားသည့်အခါ သူ့(ဝမ်ရမ်ဟုန်)ကို မွေးဖွားလာခဲ့ပြီး တော်ဝင်မျိုးနွယ်ဝင် သူ့မိခင်၏ဝမ်းဗိုက်အတွင်း၌ရှိစဉ်ကပင် ဧကရာဇ်မင်းမြတ်၏ ချစ်ခြင်းမေတ္တာကို ရရှိခဲ့သည်။ သူ့လိင်အမျိုးအစားကို ဖော်ထုတ်ပြောဆိုခဲ့လျှင် သူ ထိုအင်ပါယာမင်းသားများ၏ ဓားဖြင့်ခုတ်သတ်ခြင်းကို မလွဲမသွေခံရလိမ့်မည်ဖြစ်သောကြောင့် သူ့အမေက အမှန်တရားကို သိသည့်လူအားလုံးကို သတ်ကာ သူ့လိင်အမျိုးအစားကို ဖုံးကွယ်ထားခဲ့သည်။

နောက်ပိုင်း အာဏာရလာသည့်သူက သူ့၏အစ်ကိုအရင်းဖြစ်သော်လည်း မယ်တော်ကြီးက ထိုအကြောင်းကို မည်သူ့ကိုမှ မပြောပြရသေးပေ။ သူ့သားအငယ်ဆုံးအတွက် လျှို့ဝှက်ချက်ကို သိမ်းဆည်းထားခဲ့ကာ သေဆုံးသွားသည်အထိ လျှို့ဝှက်ထားခဲ့သည်။

ဝမ်ရမ်ဟုန်မှာ မွေးကတည်းက မင်းသမီးတစ်ပါးအဖြစ် ကြီးပြင်းလာခဲ့ရသည်။ ဧကရာဇ်မင်းမြတ်၏ တစ်ဦးတည်းသောညီမဖြစ်သောကြောင့် အမြဲတမ်း အလိုလိုက်ခံရသော်လည်း သူ၏ စိတ်နေသဘောထားက အလွန်ပင် ပုံမှန်ဆန်လွန်းလှသည်။ သူ၏လျှို့ဝှက်ချက်ကို ထိန်းထားရန်အတွက် အခြားသူများနှင့် အနည်းအကျဥ်းမျှသာ ထိတွေ့ဆက်ဆံပြီး ရံဖန်ရံခါ၌သာ စကားပြောခဲ့သည်။ သူ၏တိတ်ဆိတ်ငြိမ်သက်သော အကျင့်စရိုက်ကို ဧကရာဇ်က အလွန်ချစ်မြတ်နိုးပြီး ကြီးကျယ်မြင့်မြတ်သော အမျိုးသမီးတစ်ဦးအဖြစ် အမြဲတမ်း ချီးကျူးခဲ့သည်။ သူ အသက်ဆယ့်ငါးနှစ်ရောက်သည့်အချိန်တွင် ဧကရာဇ်က တော်ဝင်မင်းသမီးအား ကျန့်ကော်စစ်သူကြီးအိမ်တော်၏ စစ်သူကြီးကျန့်ရှောက်ရှီးထံ ပေးအပ်ရန် ကတိပေးခဲ့သည်။

ကျန့်ရှောက်ရှီးက ရွှယ်လင်နှင့် ယခုမှတွေ့ဖူးသူဖြစ်သည်။

ဤကမ္ဘာတွင် လူတစ်ယောက်က အရပ်ရှည်ပြီး ရုပ်ရည်ချောမောနေလျှင် အဓိကဇာတ်လိုက်ဖြစ်မည်မှာ သေချာပေသည်။ ဆိုလိုသည်မှာ ဤကျန့်ရှောက်ရှီးလည်း အဓိကဇာတ်လိုက်များထဲမှ တစ်ယောက်ဖြစ်ပေသည်။ သူ ကြိုက်သည့်လူရှိနေပြီဟု သူပြောခဲ့သည့်စကားကို တွေးကြည့်လိုက်လျှင် ထိုလူလည်း မကြာသေးမီကမှ ကူးပြောင်းလာခဲ့သည့် အမျိုးသမီး ဇာတ်လိုက်ကို ကြိုက်နှစ်သက်ခြင်းဖြစ်ပြီး လက်ရှိအချိန်တွင် ကုန်းချင်မင်းသား၏နန်းတော်တွင် စားဝတ်နေရေးအတွက် ရုန်းကန်နေရသည့်သူဖြစ်သည်။

ဇာတ်လမ်းအရ ကျန့်ရှောက်ရှီးက ဤဇာတ်လမ်းတွင် တတိယမြောက်အမျိုးသားဇာတ်လိုက်ဖြစ်ပြီး အမျိုးသမီးဇာတ်လိုက်အတွက် နယ်မြေချဲ့ထွင်ရန်နှင့် သူတို့အတွက် တိုက်ပွဲဝင်ရန် စစ်သားများကို ဦးဆောင်သည့် အခန်းကဏ္ဍကို တာဝန်ယူခဲ့သည်။

ရွှယ်လင် ဇာတ်ကြောင်းကို နောက်တစ်ကြိမ်ပြန်လှန်ကြည့်လိုက်ရာ ဝမ်ရမ်ဟုန်၏သေဆုံးမှုက ကျန့်ရှောက်ရှီးနှင့် ပတ်သက်မှုတစ်ခုခုရှိနေကြောင်း တွေ့ရှိခဲ့သည်။

ဝမ်ရမ်ဟုန်က ယောက်ျားတစ်ယောက်ဖြစ်ပြီး ကျန့်ရှောက်ရှီးနှင့် အိပ်ခန်းထဲရှိ လှုပ်ရှားမှုများတွင် လုံးဝပါဝင်နိုင်ခြင်းမရှိပေ။ မင်္ဂလာဦးညတွင် ကျန့်ရှောက်ရှီး သူ့အား ပြောခဲ့သော စကားများက သူ့အတွေးနှင့် ကိုက်ညီသောကြောင့် သူ၏ဖြစ်တည်မှုကို တိတ်တဆိတ် နှိမ့်ချထားလိုက်ပြီး သူ့ကိုယ်သူ မရှိသလို ဟန်ဆောင်ထားလိုက်သည်။ တစ်နေ့တွင် စစ်သူကြီး၏အိမ်တော်နှင့် ဧကရာဇ်မိသားစုကို စွန့်ပစ်ပြီးနောက် တိုင်းပြည်မှ ထွက်ခွာကာ တောရိုင်းငှက်များ သို့မဟုတ် လွင့်မျောနေသောတိမ်တိုက်များကဲ့သို့ နေထိုင်ပြီး ဆန္ဒရှိရာသို့ သွားကာ သူလိုချင်သည့် ဘဝကို ဖြတ်သန်းနေထိုင်နိုင်လိမ့်မည်ဟု မျှော်လင့်ခဲ့သည်။

၎င်းက ရိုးရှင်းသောဆန္ဒတစ်ခု ဖြစ်သော်လည်း မည်သို့သောအခါမှ အကောင်အထည် မဖော်နိုင်ခဲ့ပေ။

စစ်သူကြီးအိမ်တော်တွင် နာနာခံခံ ဘာမှမလုပ်ဘဲနေသရွေ့ သူ့တွင် မည်သည်အရာမျှ ဖြစ်လာမည်မဟုတ်ဟု ထင်ခဲ့သော်လည်း 'အိမ်မှာ ဘာမှမလုပ်ဘဲ နေရင်တောင် ဘေးအန္တရာယ်ဆိုးကြီးက ကောင်းကင်ဘုံမှ ရိုက်ခတ်လာစမြဲ' ဟူသည့် စကားစုက မည်သူ့ကိုမှ လိမ်ညာလှည့်စားပြောဆိုခဲ့ခြင်း မဟုတ်ပေ။ ဝမ်ရမ်ယင်းယွဲ့ ကိုယ်တိုင်က ယောက်ျားများကို ဘယ်တစ်ဖက် ညာတစ်ဖက်စီ ပွေ့ဖက်ထားသော်လည်း မည်သည့်ယောက်ျားကိုမှ အခြားမိန်းမတစ်ယောက် ထားရှိခြင်းကို ခွင့်မပြုခဲ့ပေ။ တစ်ခါမျှ မထိတွေ့ဖူးဘဲ အလှပြဇနီးတစ်ယောက်အဖြစ် အိမ်၌ ထားထားသည်ကိုပင် လက်မခံနိုင်ခဲ့ပေ။

ထို့ကြောင့် ကြီးကျယ်မြင့်မြတ်သောမင်းသမီးက ဝမ်ရမ်ဟုန်ကို အကြိမ်ပေါင်းများစွာ ရည်ရွယ်ချက်ရှိရှိ ဒုက္ခပေးခဲ့သော်ငြား တစ်ဖက်ကမူ အားလုံးကို ဘာမှမဖြစ်သလို တည်တည်ငြိမ်ငြိမ်ဖြင့် လျစ်လျူရှုခဲ့သည်။

အခက်အခဲပြဿနာများကို ခံစားခဲ့ရပြီးနောက် ဝမ်ရမ်ယင်းယွဲ့ သူမ၏မကျေနပ်မှုများကို သဘာဝအတိုင်း လက်ခံပြီး ကျန့်ရှောက်ရှီးကို အပြစ်တင်ခဲ့သည်။ ကျန့်ရှောက်ရှီးကအခြားရည်းစားများနှင့် နှိုင်းယှဉ်လိုက်သည့်အချိန်တိုင်း သူ့၌ဇနီးမယားရှိခြင်းက အားနည်းချက်ဟု ခံစားနေရပြီး သူ ချစ်ရသူ၏ ဆဲဆိုကြိမ်းမောင်းမှုကို ခံရချိန်တွင် တစ်စုံတစ်ဦးအပေါ် သူ့ဒေါသများကို ပုံချချင်နေခဲ့သည်။ ဝမ်ရမ်ဟုန်၏ အခန်းထဲသို့ ဒေါသတကြီး ဇွတ်အတင်းဝင်သွားပြီးနောက် တော်ဝင်မင်းသမီးက ယောက်ျားတစ်ယောက်ဖြစ်ကြောင်း မမျှော်လင့်ဘဲ တွေ့ရှိသွားခဲ့သည်။

ထို့နောက်တွင် ဖြစ်ပေါ်လာသည့် အရာအားလုံးကမယုံနိုင်စရာပင်။

ဝမ်ရမ်ဟုန်က သူနှင့်အတူ ပူးပေါင်းပြီး သေချင်ယောင်ဆောင်ကာ ထွက်သွားခွင့်ပြုရန်အတွက် သင့်လျော်သော ဆွေးနွေးမှုတစ်ခု ကြိုးစားပြောဆိုကြည့်ချင်ခဲ့သည်။သို့သော် ကျန့်ရှောက်ရှီး အရက်အမူးလွန်နေချိန်တွင် ထိုအကြောင်းကို ဇာတ်လိုက်မင်းသမီးအား ပြောပြလိမ့်မည်ဟု သူ မထင်ထားခဲ့မိပေ။ အိမ်ရှေ့မင်းသားက နန်းတက်ရန် မစောင့်ချင်တော့သည်အတွက် အချိန်အခါကလည်း ပြီးပြည့်စုံလှပေသည်။ သူက ဧကရာဇ်မင်းအား လှုံ့ဆော်ရာ၌ ထိရောက်စေရန် လိုအပ်သောဆေးကို ပေးခဲ့သည်။ ၎င်းသည် အခွင့်အရေးကောင်းတစ်ခုဖြစ်ပြီး ဇာတ်လိုက်မင်းသမီးကလည်း ထိုကိစ္စကို ထုတ်ဖော်ခဲ့သည်။

သူ ထောင်သို့ အပို့မခံရခင် ဝမ်ရမ်ဟုန်တွင် မည်သည်ကိုမှ လုပ်စရာ အချိန်မရှိခဲ့ပေ။ ဧကရာဇ် အလွန်ဒေါသထွက်သောကြောင့် သွေးအန်ကာ ဒဏ်ရာအပြင်းအထန်ရပြီး မေ့မြောသွားခဲ့သည်။ ၎င်းက အိမ်ရှေ့မင်းသားအတွက် အာဏာရယူရန် အခွင့်အရေးတစ်ရပ် ဖြစ်ခဲ့ပြီး လိမ်လည်သည့်ရာဇ၀တ်မှုဖြင့် သူ့အား သေဒဏ် ချမှတ်ခဲ့သည်။ ဧကရာဇ် နိုးလာသည့်အချိန် ထိုသတင်းကို ကြားလိုက်ရပြီး သွေးအန်ကာ နတ်ရွာစံသွားလေသည်။

ဤအချက်ကြောင့် ထိုဇာတ်ကြောင်းကို မည်ကဲ့သို့ဝေဖန်ရမည်မှန်း ရွှယ်လင် မသိတော့ပေ။

သူ မျက်ဆံများကို လှန်လိုက်ပြီး ထိုရွံစရာဇာတ်ကြောင်းကို ဘေးဖယ်ထားလိုက်သည်။ ထို့နောက် သူ၏မေးစေ့ကို ထိကာ အကူစနစ်လေးအား စိုက်ကြည့်နေသည်။

"ဒါဆို အခု ငါက အသက်မပြည့်သေးဘူးလား... ပြီးတော့ လက်ထပ်ပြီးသွားပြီလား..."

ငါ ဘာလို့ မင်္ဂလာဦးညတွေမှာပဲ အမြဲပေါ်လာရတာလဲ... နောက်ဆုံးအကြိမ်တုန်းကလည်း အိပ်ယာပေါ်ကို မရောက်ခင်တည်းက မင်းသားက ထွက်သွားခဲ့တယ်... ဒီတစ်ခါလည်း ငါ့'ယောက်ျား'ကို ကန်ထုတ်ခဲ့တယ်...

ရှေးခေတ်အမျိုးသမီးများက အသက်ဆယ့်ငါးနှစ်အရွယ်တွင် လက်ထပ်နိုင်သည်။ အရွယ်ရောက်လုနီးပါးဖြစ်သော သူ၏ယခင်ခန္ဓာကိုယ်နှင့် နှိုင်းယှဉ်ပါက ယခုအချိန်တွင် သူက အနည်းငယ် ငယ်ရွယ်သူတစ်ယောက်ဖြစ်နေသည်။ အခန်းထဲတွင် ကြေးမုံတစ်ချပ်ကို တွေ့လိုက်ရပြီး ကြေးမုံထဲတွင် ထင်ဟပ်နေသော လှပသည့်လူကို ကြည့်လိုက်ချိန်တွင် ခဏတာ တိတ်ဆိတ်သွားသည်။

"အရမ်းငယ်ရွယ်နုပျိုလွန်းတယ်... ကျန့်ရှောက်ရှီးသာ တကယ် လုပ်ရဲတဲ့သတ္တိရှိရင် ငါ သူ့ကို သတ်ပစ်မယ်..."

အကူစနစ်လေး မသိမသာတုန်လှုပ်သွားပြီး သူ့အမြီးလေးကို တိတ်တိတ်လေး ဖက်ထားလိုက်သည်။

"အမျိုးသမီးဇာတ်လိုက်က ကောင်းကင်ဘုံဆီ တည့်တည့်မတ်မတ်သွားဖို့ ပြင်ဆင်နေပြီ... သူ့ကို တားဖို့ မင်း ငါ့ကို ဘယ်လိုလုပ်စေချင်လဲ..."

ဤခန္ဓာကိုယ်၏ အခြေအနေများကို ဖြစ်နိုင်သမျှ အကောင်းဆုံးအခြေအနေများနှင့် ချိန်ညှိထားလျှင်ပင် သူ အသုံးချနိုင်သည့် တစ်ဦးတစ်ယောက်မှ ရှိမနေဘဲ တစ်ယောက်တည်းဖြစ်နေဆဲပင်။ သူ၏ အသွင်အပြင်ကို ဖုံးကွယ်ထားပြီး 'စစ်သူကြီး၏ ဇနီးမယား' အဖြစ် ဟန်ဆောင်ရန်သာ လိုအပ်သည်။

ကျန့်ရှောက်ရှီး သူ့ကိုထိရန်မှာ မဖြစ်နိုင်ဟူသည့် ဇာတ်ကွက်ကြောင့်သာ မဟုတ်လျှင် သူ ဓားတစ်ချောင်းကို ကောက်ယူကာ သူ့ခင်ပွန်းဟုခေါ်သော လူကို ထက်ပိုင်းပြတ်သွားအောင် ခုတ်ပစ်ရန် ပြေးသွားပေလိမ့်မည်။

" အမျိုးသမီးဇာတ်လိုက်က အခုလေးတင် ကူးပြောင်းသွားပြီ..."

အကူစနစ်လေးက ထောင့်တစ်နေရာတွင် သနားစရာကောင်းစွာ ကျုံ့ကျုံ့လေးရှိနေပြီး ကောင်းမွန်သည့်အချိန်၌ ရောက်လာခဲ့ခြင်းဖြစ်ကြောင်း ထောက်ပြရန် ကြိုးစားခဲ့သည်။

"သူက အိမ်ရှေ့စံမင်းသားနဲ့ စစ်သူကြီးကို တွေ့ဖူးပြီးပြီ... သူက သူတို့တွေအပေါ် အံ့သြစရာကောင်းတဲ့ ဩဇာသက်ရောက်မှုတွေကို ချန်ထားခဲ့ပေမယ့် သူတို့ရဲ့ ဆက်ဆံရေးက ချစ်သူတွေအဆင့်အထိ မရောက်သေးဘူး... ၄ ယောက်မြောက် အမျိုးသားဇာတ်လိုက်နဲ့ မတွေ့သေးဘူး.... ဒုတိယတစ်ယောက်ကတော့ သူ့ကို သိတောင်မသိသေးဘူး... host သူ့ယောက်ျားတွေအားလုံးကို လုယူဖို့ ဒီအခွင့်အရေးကို အသုံးချသင့်တယ်..."

ရွှယ်လင် လှောင်ပြောင်ကာ အကူစနစ်အား မေးလိုက်သည်။

"မင်း ဘာပြောလိုက်တာလဲ..."

အကူစနစ် ခေါင်းယမ်းလိုက်သည်။

"ဘာမှ မပြောပါဘူး၊ host ပျားရည်ထောင်ချောက်(honey trap)ကို စမ်းသုံးသင့်တယ်လို့ လုံးဝ မပြောပါဘူး..."

ရွှယ်လင် အေးစက်စွာ နှာမှုတ်လိုက်သည်။ သူ ထိုသို့ပြောလိုက်သော်လည်း အမျိုးသမီးဇာတ်လိုက်ကို ဖြုတ်ချရန်နည်းလမ်းမရှိ၍ အကူစနစ်လေး ပြောသည့်အတိုင်းပင်။ သူမ၏ မည်သည့်ယောက်ျားမှ အမျိုးသမီးဇာတ်လိုက်၏ ဆွဲဆောင်ဖြားယောင်းမှုကို မခံရသေးဘဲ လူများ သူမကို ဝန်းရံလာကြမည့် နောက်ပိုင်းအချိန်နှင့် နှိုင်းယှဉ်လျှင် ယခုအချိန်က သူမကို ကိုင်တွယ်ဖြေရှင်းရန်မှာ ရိုးရှင်းနေဆဲဖြစ်သည်။

ဇာတ်လိုက်များစွာရှိသောကြောင့် ဤကမ္ဘာတွင် ဖိအားအနည်းငယ်ခံစားရပြီး သူတို့၏ကံကြမ္မာကိုပြောင်းလဲရန်အတွက် အမျိုးသမီးဇာတ်လိုက်က သူတို့ထဲရှိမည်သူနှင့်မှ ချစ်မိမသွားစေရန် သေချာအောင်ပြုလုပ်ရန် လိုအပ်သည်။

ဒါပေမဲ့ စစ်သူကြီးရဲ့အိမ်တော်ကတောင် ထွက်မရနိုင်တဲ့ ငါ့ရဲ့ လက်ရှိအနေအထားနဲ့ အမျိုးသမီးဇာတ်လိုက်ရဲ့နောက်ကို ဘယ်လိုလုပ် အနီးကပ်လိုက်နိုင်မှာလဲ...

ဒါမှမဟုတ် သေချင်ယောင်ဆောင်ပြီး ငါ့ရဲ့အထောက်အထားကို အရင်ပြောင်းလဲသင့်သလား...

"ဒါနဲ့ စကားမစပ် host..."

အကူစနစ်လေးက အချို့အရာများကို တတ်နိုင်သမျှ အမြန်ဆုံး ရှင်းလင်းထားသင့်သည်ဟု ယူဆထားသည်။ ထို့ကြောင့် host ထိုအကြောင်းကို နောက်ပိုင်း သိရှိသွားလျှင်ပက် သူ့ host ၏ အစီအစဉ်များ လုံးလုံးလျားလျား ပျက်စီးမသွားလိမ့်မည်မဟုတ်ပေ။ ထို့နောက် သူ့အမွေးအားလုံးလည်း ဆွဲနုတ်ခြင်းခံရပေလိမ့်မည်။ QAQ

"အင်း..."

"Host ရဲ့လူနဲ့ ပတ်သက်တဲ့ သတင်းတွေလည်း ရှိတယ်..."

ရွှယ်လင် မျက်ခုံးပင့်လိုက်သည်။ ဤကမ္ဘာပေါ်တွင် အမျိုးသားဇာတ်ဆောင်များစွာရှိ၍ သူ့လူက ၎င်းတို့ထဲတွင် ပါဝင်လိမ့်မည်ဟု သူ ခံစားမိသော်လည်း မည်သူမည်ဝါဖြစ်သည်ကို သူ မသိပေ။ ယခုတွင် အကူစနစ်လေးက ဤကဲ့သို့ ပြောဆိုလာပေသည်။

အခု ဒါက သူ့ကို ရှာနိုင်တဲ့စွမ်းရည် ရသွားပြီလို့ ဆိုလိုတာမလား...

မဟုတ်ဘူး သူနဲ့တွေ့တဲ့အချိန်တိုင်းကို အကူစနစ်လေးက ဖုံးကွယ်ချင်ရုံပဲ...

"ဒီကမ္ဘာမှာ သူက host ရဲ့ယောက်ျား..."

မြေခွေးလေးက သူ့လည်ပင်းကို ကျုံ့ကာ သူ့ host ကြီး၏ မျက်နှာ တဖြည်းဖြည်း မှောင်မည်းလာသည်ကို စောင့်ကြည့်နေသည်။ သူ တုန်လှုပ်သွားပြီး ထပ်ဖြည့်ပြောလိုက်သည်။

"ကျန့်ကော်စစ်သူကြီး ကျန့်ရှောက်ရှီးပါ..."

ဘာမှမရှိသောအခန်းက အချိန်အတော်ကြာ တိတ်ဆိတ်နေပြီးနောက် အကူစနစ်လေးက သူ့ host ကြီး၏ ရယ်သံကို ကြားလိုက်ရ၍ ဘောလုံးသေးသေးလေးအဖြစ်သို့ ပြောင်းလဲလုနီးပါးပင်။

"အိုး ကောင်းပြီ... သူ့မှာ သဘောကျရတဲ့ တစ်ယောက်ယောက်ရှိပြီးသားလား..."

ခေါင်းငုံ့ထားသည့် လူငယ်လေးက သူ့မျက်နှာပေါ်တွင် လှပသော အပြုံးတစ်ခုကို ချိတ်ဆွဲထားပြီး သူ့အသံက အလွန်နားထောင်လကောင်းသော်လည်း ၎င်းက အကူစနစ်လေးအား လုံးဝကြောက်လန့်သွားစေသည်။

ဝူးဝူးဝူး သူ့ host အရမ်းကိုစိတ်ဆိုးနေတာလား...

🦊🦊🦊

Prev Next