Chapter 62

🦊Chapter 62

Arc 5 - တော်ဝင်မင်းသမီးကို မှားယွင်းလက်ထပ်မိခြင်း

5.2 – စစ်သူကြီးက 'ယောက်ျား' လို့ ခေါ်တာကို ခံနိုင်ရည်ရှိမယ် မထင်ဘူး

မနက်စောစောတွင်မူ ယမန်နေ့က မင်္ဂလာပွဲကြီးကျင်းပခဲ့သည့် စစ်သူကြီး၏အိမ်တော်က စည်ကားစပြုလာသည်။ လူများ ဝင်ထွက်သွားလာနေကြသော်လည်း စစ်သူကြီး၏ မင်္ဂလာအခန်းက တိတ်ဆိတ်နေပေသည်။

ယမန်နေ့ညက အရုပ်ဆိုးလှသော အမူအရာဖြင့် ထွက်သွားသည့် စစ်သူကြီးက ထိုတူညီသောအမူအရာနှင့် ပြန်လာသည်ကို တွေ့လိုက်ရချိန်တွင် အစေခံများက တံခါးခေါက်ကာ သခင်မဖြစ်သူ နိုး မနိုး မေးရန် အငြင်းပွားနေကြသည်။

အံ့အားသင့်စရာ အရိပ်အယောင်တစ်ခုက လူတိုင်း၏မျက်လုံးထဲတွင် ပျံ့လွင့်သွားသည်။ မင်္ဂလာဦးညတွင် သူတို့၏သခင်က မင်္ဂလာခန်းထဲမှ အသစ်စက်စက်ဇနီးလေး၏ ကန်ထုတ်ခြင်းကိုခံခဲ့ရသည်။ ၎င်းအဖြစ်အပျက်က အခြားသူများအတွက် ရယ်စရာကောင်းသည့်ဖြစ်ရပ်ပင်။ အကယ်၍ သူတို့၏သခင်သာ သူ့ဇနီးအပေါ် အထင်အမြင်သေးမှုကို ဖော်ပြခဲ့လျှင် စစ်သူကြီးနှင့် သူ၏ဇနီးသစ်ကြားဆက်ဆံရေးက မကောင်းမွန်ကြောင်း သူတို့ ခန့်မှန်းမိကြပေမည်။

သို့သော် စစ်သူကြီးမှာ ယမန်နေ့ညက တံခါးဝတွင် တစ်ညလုံးနီးပါး ရပ်နေခဲ့ပြီး မီးရောင်များ မှိတ်သွားသည်အထိ ထွက်မသွားခဲ့ပေ။ နောက်ဆုံး အနီးရှိ အခန်းတစ်ခန်းထဲသို့ အိပ်ရန် ဝင်သွားခဲ့ကြောင်းကိုလည်း သူတို့ တွေ့ခဲ့သည်။ ထို့ကြောင့် စစ်သူကြီး မည်သည်ကိုတွေးနေမှန်း မသိကြပေ။ ခေါင်းငုံ့ပြီး ကိုယ့်နှာခေါင်းကို ပြန်ကြည့်ကာ မည်သည်ကိုမျှ မတွေးခြင်းက သူတို့အတွက် အကောင်းဆုံးနည်းလမ်းဖြစ်သည်။

ကျန့်ရှောက်ရှီး တံခါးဝတွင် ရပ်လိုက်ပြီး ခဏမျှ တုံ့ဆိုင်းသွားသည်။ ယမန်နေ့ညက နှင်ထုတ်ခံရသည့် မှတ်ဉာဏ်က အလွန်ရှင်းလင်းလှသော်လည်း ထိုအမျိုးသမီး၏ လှပသောမျက်နှာက ရှက်ဖွယ်ကောင်းသောမှတ်ဉာဏ်ထက် သူ့အပေါ် နက်ရှိုင်းသော အမှတ်အသားတစ်ရပ်ကို ချန်ထားခဲ့သည်။

သူ တော်ဝင်မိသားစုမှလူများကို သဘောမကျပေ။ မူလတည်းက လက်ထပ်ရန် ဧကရာဇ်မင်းက အမိန့်ချထားခဲ့သော တော်ဝင်မင်းသမီးအပေါ် အထင်အမြင်သေးခဲ့သည်။ သို့သော် အမိန့်ကိုလိုက်နာရန် မငြင်းဆန်နိုင်သောကြောင့် သူမအား လက်ထပ်ရန် စီစဉ်ခဲ့ပြီး အလှပြဇနီးမယားအဖြစ်ထားကာ သူမအား ခြိမ်းခြောက်ပြီး တစ်ဦးတည်း ထားခဲ့ပေလိမ့်မည်။ ယမန်နေ့ညက သူကြိုက်သည့်လူရှိနေပြီဖြစ်ကြောင်း သူမကို ပြောခဲ့စဥ်အချိန်က သူမ စိတ်ကူးယဉ်ခြင်းမျိုးများ မပြုလုပ်မိစေရန် သေချာအောင် ထိုသို့ပြောခဲ့ခြင်းဖြစ်သည်။

သို့သော် သူပြောခဲ့သည့် ထိုစကားများက တစ်ညလုံး သူ့ကို စိတ်ပူသွားစေခဲ့သည်။

အမှန်စင်စစ်တွင် အိမ်ထောင်ကျခါစ စစ်သူကြီးက သူ့မင်္ဂလာခန်းထဲမှ ကန်ထုတ်ခံရရုံသာမက သူကိုယ်တိုင် သူ့မိန်းမအား ခြိမ်းခြောက်ခဲ့မှုများကြောင့် တစ်ညလုံး အိပ်မပျော်ခဲ့ပေ။ ၎င်းက သူ့ကို အလွန်စိတ်အနှောင့်အယှက်ဖြစ်စေခဲ့သည်။

တံခါး၌ အချိန်ကြာကမြင့်စွာ ရပ်နေပြီးနောက် ကျန့်ရှောက်ရှီး တံခါးခေါက်ရန် ရည်ရွယ်ချက်မရှိခဲ့ပေ။ သူလှည့်ထွက်သွားတော့မည့်အချိန်တွင် အတွင်းမှ တံခါးပွင့်လာသည်။

ထိုလူက တစ်ခေါင်းလုံး ဆံပင်များရှုပ်ပွနေပြီး အမူအရာက မကောင်းလှပေ။ ထို့အပြင် ယမန်နေ့ညက မင်္ဂလာဝတ်စုံကို ဝတ်ထားဆဲပင်။ တံခါးနားတွင် ဆွံ့အစွာရပ်နေသော စစ်သူကြီးကို သူမ တစ်ချက်သာကြည့်လိုက်ပြီး သူမအကြည့်များက သူ့ဘေးတွင် ရပ်နေသော အစေခံဆီ ရောက်သွားသည်။

" ရေချိုးတာကို ကူညီပေးဖို့နဲ့ အဝတ်အစားကူလဲပေးဖို့ လူတွေကို ဝင်လာခိုင်းလိုက်ပါ..."

အစေခံများ ခေါင်းငုံ့ကာ အမိန့်များကို လိုက်နာရန် အလုပ်ရှုပ်သွားကြသည်။

တော်ဝင်အရှင်မင်းသမီးက သူ့လျှို့ဝှက်ချက်များကို နှစ်ပေါင်းများစွာ ဖုံးကွယ်ထားနိုင်ခြင်းက လူအများကို ဘယ်တော့မှ သူ့အနားကပ်ခွင့်မပြုခဲ့သောကြောင့်ဖြစ်သည်။ သူ့အား အနီးကပ်စောင့်ရှောက်ပေးမည့် အစေခံများကိုပင် မထားရှိခဲ့ပေ။ သူ့ဘေးနားရှိ အစေခံများက မင်္ဂလာပွဲအတွက် သူနှင့်အတူ လိုက်ပါလာကြသော်လည်း စစ်သူကြီးက တော်ဝင်မိသားစုကို သဘောမကျသောကြောင့် မင်္ဂလာခန်းအနီးသို့ လာခွင့်မပြုပေ။ ထိုအချိန် တံခါးနားတွင် ရပ်နေသောသူများအားလုံးက စစ်သူကြီး၏လူများပင်။

ရွှယ်လင်က ထိုအရာများကို ဂရုမစိုက်ပေ။ ယခင်ကလည်း အမျိုးသမီးအဝတ်အစားများကို တစ်ခါမှမဝတ်ဖူးသော‌ကြောင့် မည်ကဲ့သို့ဝတ်ဆင်ကာ ဆံပင်ကို မည်သို့ပြင်ဆင်ရမည်မှန်း မသိသောကြောင့်သာမဟုတ်လျှင် သူ့ကို အလုပ်အကျွေးပြုပေးရန် လူများကို အပြင်ထွက်ပြီး တောင်းဆိုလိမ့်မည် မဟုတ်ပေ။

သူ ပြောပြီးသည်နှင့် အစေခံအချို့ကို လက်ညှိုးထိုးကာ အခန်းထဲသို့ ဝင်လာခိုင်းလိုက်သည်။ တံခါးဝ၌ ရပ်နေသော စစ်သူကြီးကို တစ်ချက်လေးပင် မကြည့်ဘဲ တံခါးကို ပိတ်ပစ်လိုက်သည်။

ကျန့်ရှောက်ရှီး သူ့အပြုအမူကြောင့် ချက်ချင်း ဒေါသထွက်သွားသည်။

ဤသူက သူကိုယ်တိုင် လူသိရှင်ကြား တရားဝင်လက်ထပ်ခဲ့သော သူ၏ဇနီးဖြစ်သည်။ မင်္ဂလာဦးညတွင် သူ့ကို မင်္ဂလာခန်းမှ နှင်ထုတ်ခဲ့သည်ကိုပင် စိတ်အနှောင့်အယှက်မဖြစ်ဘဲ နောက်နေ့တွင် သူ့ကို အရှက်ရအောင် ပြုလုပ်နေဆဲပင်။ သူမ တော်ဝင်မင်းသမီးဖြစ်ခဲ့လျှင်ပင် ထိုလုပ်ရပ်က အလွန်ရိုင်းပျလွန်းပေသည်။

သူ့မိန်းမနှင့် ပိုရင်းရင်းနှီးနှီးနေရမည်လား၊ မနေရမည်လား တုံ့ဆိုင်းနေသော စစ်သူကြီးက ဒေါသထွက်သွားပြီး အေးစက်စွာ နှာမှုတ်ကာ လှည့်ထွက်သွားလေသည်။ သူ့အပြုအမူများက လူများ ငြင်းပယ်ခံရခြင်းနှင့် ရင်ဆိုင်ရချိန်၌ သူတို့၏ဂုဏ်သိက္ခာကို ထိန်းသိမ်းရန်ကြိုးစားနေသူတစ်ယောက်နှင့် တူနေသည်ကို မသိခဲ့ပေ။ မင်္ဂလာအခန်းအပြင်ဘက်ရှိ အစောင့်များက သူ ထွက်ခွာသွားချိန်တွင် ကရုဏာသက်ဖွယ်အကြည့်များနှင့် ကြည့်လာကြသည်။

ကြီးမြတ်လှသော စစ်သူကြီးက အိမ်ထောင်ကျပြီး ပထမဆုံးနေ့မှာပင် ဇနီးဖြစ်သူ၏ အေးစက်စွာ ကျောခိုင်းထားခြင်းကိုခံရပြီး ဇနီးဖြစ်သူကို စကားမပြောရဲပေ။ 

အရာအားလုံးက အရမ်းအထီးကျန်ဆန်နေတာလား...

မနက်စောစောတွင် အစေခံများက စစ်သူကြီး၏ဇနီး ရေချိုးရန် ရေနွေးပြင်ဆင်ပေးခဲ့သည်။ ရေချိုးပြီးနောက် သူ့တစ်ကိုယ်လုံး မွှေးပျံ့နေစေရန် ပန်းပွင့်ချပ်အမျိုးမျိုးကို ပက်ဖြန်းပေးထားကြသည်။ ထို့နောက် အစေခံများအား သူ၏အပြင်အဝတ်အစားများကို ကူညီပြီးချွတ်ခိုင်းခဲ့သည်။အတွင်းအဝတ်အစားသာ ကျန်ရှိတော့သည့်အချိန်တွင် ရွှယ်လင် အစေခံအားလုံးကို ထွက်သွားခိုင်းလိုက်သည်။ အစေခံများအားလုံး စကားတစ်လုံးမျှ မပြောရဲကြပေ။

ပြောရလျှင် တော်ဝင်အရှင်မင်းသမီးက ဘဲဥပုံမျက်နှာ၊ မြေခွေးမျက်ဝန်းတစ်စုံနှင့် အမှန်တကယ်ကို လှပေသည်။ နဂိုက မှော်ဆန်သောမျက်နှာက သူမ၏မျက်ခုံးကြားရှိ အေးစက်မှုများကြောင့် ပိုမြင့်မြတ်ပြီး လှပလာခဲ့သည်။ အခြားသူများက သူမမျက်နှာကို တိုက်ရိုက်ကြည့်နိုင်စွမ်းမရှိဘဲ သူမရှေ့တွင် ခေါင်းကိုသာ ငုံ့ထားနိုင်သည့် မမြင်နိုင်သောတွန်းအားကို ပေးစွမ်းနိုင်သည်။

စစ်သူကြီး၏ဇနီးက ကြီးမားသောရည်ရွယ်ချက်များရှိရမည်ဟု အစေခံများ ခံစားခဲ့ကြပြီး သခင်မအသစ်အပေါ် လေးစားမှု ပိုတိုးလာခဲ့သည်။

အကူစနစ်လေး လွှဲပြောင်းပေးလိုက်သော ဇာတ်ကွက်၏သတင်းကြောင့် ရွှယ်လင် သေလုမြောပါး ဒေါသထွက်ခဲ့ရသည်။ သူ ထိုလူကို တစ်ချိန်လုံး အသိအမှတ်မပြုချင်ပေ။ သူ့ယောက်ျားက အမျိုးသမီးဇာတ်လိုက်ကို အမှန်တကယ်ချစ်မိသွားလျှင် သူဘာလုပ်မည်ဆိုသည်ကို အလေးအနက်ပင် အချိန်ပေးကာစဉ်းစားခဲ့သည်။ သူ၏နောက်ဆုံး ဆုံးဖြတ်ချက်က ထိုလူကို ကြိုးနှင့်ချည်ကာ ပြန်ခေါ်လာပြီး၊ သင်းကွပ်ကာ သေသည်အထိ ညှဉ်းပန်းနှိပ်စက်ပစ်မည်။

ထိုလူက သူ့ကို နှစ်ပေါင်းများစွာ အလိုလိုက်ထားခဲ့ပြီး သူ့ဒေါသကို အမြဲထိန်းချုပ်ထားသော်လည်း ထိုလူ သူ့အပေါ် သစ္စာဖောက်သည်ကို သည်းခံနိုင်လိမ့်မည်ဟု မဆိုလိုပေ။ ထိုသို့ဖြစ်လာလျှင် ဤကမ္ဘာရှိ တာဝန်များကို လုံးဝ စွန့်လွှတ်ကာ သူတို့ နှစ်ယောက်လုံးကို သတ်ပစ်ပြီး နောက်ကမ္ဘာ၌ ပြန်လည်စတင်ရန် ဆန္ဒရှိပေသည်။ အမြဲတစေ ပင်ကိုယ်စရိုက်နှစ်မျိုးရှိသော နတ်ဆိုးတစ်ကောင်အနေဖြင့် ရွှယ်လင်ထံတွင် နှလုံးသားရေးရာနှင့်ပတ်သက်သည့် သူ့ကိုယ်ပိုင်မူများ ပုံမှန်အတိုင်း ရှိနေခဲ့သည်။

အံကြိတ်ကာ လှောင်ရယ်လိုက်သည့် သူ၏ပုံစံကြောင့် အကူစနစ်လေး ထိတ်လန့်သွားပြီး သူ့ host အား ပြောပြရန် စိတ်ကိုတင်းလိုက်သည်။ 

"ဇာတ်ကြောင်းကို အဲဒီနည်းအတိုင်း ချမှတ်ထားပေမဲ့ ကျန့်ရှောက်ရှီးရဲ့ဝိညာဉ်က တူညီနေတာတော့မဟုတ်ဘူး... ဒါကြောင့် သူ ဘယ်တော့မှ အမျိုးသမီးဇာတ်လိုက်ကို ချစ်မိသွားမှာမဟုတ်ဘူး..."

ရွှယ်လင်က အကူစနစ်လေးအား အေးစက်စွာ ကြည့်လိုက်သည်။

အကူစနစ်လေးက သူ၏လက်သည်းများကိုထုတ်ကာ ထိုလူ့အတွက် ကူပြောပေးရန် ကြိုးစားလိုက်သည်။

" Host မေ့သွားပြီလား... ကမ္ဘာတစ်ခုစီတိုင်းမှာ သူ့မှတ်ဥာဏ်တွေ ဆုံးရှုံးသွားလိမ့်မယ်... သူ host နဲ့မတွေ့ဆုံခဲ့ဘူးဆိုရင် hostကို ပုံမှန်အတိုင်း ချစ်မိမှာမဟုတ်ဘူး သူက မနေ့ညကမှ တော်ဝင်မင်းသမီးနဲ့ ပထမဆုံးတွေ့ဖူးပြီး သူ့မှာလည်း သူ့ကိုယ်ပိုင် စိတ်သောကတွေရှိတယ်ဆိုတော့ ဒီစကားတွေ ပြောဖြစ်မှာပဲ... ဒါပေမဲ့ သူနဲ့ hostက ကမ္ဘာပေါင်းများစွာ အတူရှိလာခဲ့ပြီး ကောင်းမွန်တဲ့ ခံစားချက်တွေ များပြားစုပုံလာတာကတော့ ဟာသမဟုတ်ပါဘူးဆိုတာ host ယုံကြည်ထားလို့ရတယ်... မနေ့ညက host ရဲ့ အပြုအမူကြောင့် သူ ဒေါသထွက်သွားပေမဲ့ အခန်းကိုတော့ မဖျက်စီးခဲ့ဘူး အဲဒါက host ကို သူ ဂရုစိုက်စပြုနေပြီဆိုတဲ့ အဓိပ္ပါယ်ပဲ..."

ရွှယ်လင်က အေးစက်စွာ လှောင်ပြောင်ရယ်မောလိုက်သည်။ အကယ်၍ ထိုလူ အခန်းကို ဖျက်စီးရဲပါက ယမန်နေ့ညက သူ့ဒေါသအခံနှင့်ဆိုလျှင် ထသွားပြီး တိုက်ရိုက် တိုက်ခိုက်မိပေလိမ့်မည်။

သို့သော် ၎င်းက ဤကမ္ဘာကြီးအတွက် ဖန်တီးထားသော ဇာတ်ကွက်ဖြစ်ကြောင်း ရွှယ်လင်လည်း နားလည်ပေသည်။ ဤသို့ အစုတ်အပြတ်ဇာတ်ကွက်မျိုးသာ မဖြစ်ခဲ့လျှင် လူများကို ရိုက်ချင်နေသည်အထိ သူ ဒေါသထွက်နေလိမ့်မည် မဟုတ်ပေ။ သူ အေးအေးဆေးဆေး ပြန်စဉ်းစားလိုက်သည်။ သူ့အတွက် အကူစနစ်လေး ရွေးပေးလိုက်သည့် အချိန်က အမှန်တကယ်ကို သင့်လျော်ပေသည်။ အကယ်၍ သူတို့ နန်းတော်၌ရှိနေစဉ် ဤကမ္ဘာထဲသို့ ဝင်ရောက်လာပါက သူ၏သရုပ်မှန် ပေါ်ပေါက်သွားနိုင်ပေလိမ့်မည်။ ယခုအချိန်က အမျိုးသမီးဇာတ်လိုက်အား သူမ၏ချစ်သူများနှင့် ခွဲထုတ်ရန် ရွှယ်လင်အတွက် အချိန်မနှောင်းသေးပေ။ နောက်ဆုံး သူနဲ့လက်ထပ်ထားသည့်သူသည်လည်း ထိုလူပင်ဖြစ်သည်။ ဤကမ္ဘာ၌ သူ အနားယူနိုင်သည်ဟု ပြောကတည်းက အကူစနစ်လေးက အရာအားလုံးကို အမှန်တကယ် စဉ်းစားထားပြီးဖြစ်လိမ့်မည်။ သူ့အတွက် ခင်ပွန်းတစ်ယောက်ကိုပင် စီစဉ်ထားသေးသည်။ 

ဘယ်လိုတောင် တွေးခေါ်တတ်ရတာလဲ...

ထိုသို့ဆိုလျှင်ပင် သူ့နေရာသူ သိရန် အေးစက်စွာ သတိပေးခဲ့သည့် လူတစ်ယောက်ကို ရွှယ်လင် လွယ်လွယ်ကူကူ ခွင့်လွှတ်လိုစိတ်မရှိပေ။ အကယ်၍ သူ့အား လိမ်ညာခဲ့ခြင်း မဟုတ်လျှင် သူ၏စိတ်ဆန္ဒကို လှုံ့ဆော်ပြီး ဤတစ်ကြိမ် အောင်မြင်ရန် သူ့အား ရည်ရွယ်ချက်ရှိရှိ အခက်တွေ့အောင် ပြုလုပ်ပစ်မည်။ ထို့နောက် သူ့အမည်ကို နောက်ပြန်ချရေးပစ်မည်။

အတော်အတန် တည်ငြိမ်သွားပြီးနောက် ရွှယ်လင် ရေချိုးကန်မှထကာ သူ့ကိုယ်သူ ခြောက်အောင်သုတ်ပြီး အတွင်းဝတ် အဝတ်အစားအသစ်များကို လဲလိုက်သည်။ ထို့နောက် အပြင်ဘက်တွင် စောင့်ဆိုင်းနေသော အစေခံများကို ဝင်လာရန် ပြောလိုက်သည်။

အစေခံများက သူ ဝတ်လေ့ရှိသည့် ၀တ်ရုံရှည်ပုံစံကို မသိသောကြောင့် ဝတ်ရုံအများအပြားကို ယူလာခဲ့ကြသည်။ ရိုးရိုးရှင်းရှင်းနှင့် ကျက်သရေရှိသောပုံစံကို ရွှယ်လင် ကျပန်းရွေးချယ်လိုက်ပြီး ၎င်းတို့ကို ပြောင်းလဲဝတ်ဆင်ခဲ့သည်။ အိမ်အကူများ သူ့ကို မိတ်ကပ်လိမ်းရန် ကူညီပေးချင်သည့်အချိန်၌ လုံးဝ ငြင်းဆိုလိုက်ပြီး ဆံပင်ကို ရိုးရိုးရှင်းရှင်း loose bun ပုံစံ ပြင်ပေးရန် တောင်းဆိုခဲ့သည်။ အလွန်အမင်း ပုံကြီးချဲ့ထားခြင်းမရှိသော အဆင်တန်ဆာနှစ်ခုကို ကောက်ယူခဲ့ပြီး ထကာ ပြင်ဆင်ပေးထားသော မနက်စာကို စားခဲ့သည်။

ရှေးယခင်က ထုံးတမ်းစဉ်လာများအရ တော်ဝင်မင်းသမီးက သုံးရက်မြောက်သောနေ့တွင် ကျေးဇူးတရားကို ချီးကျူးဖော်ပြရန်အတွက် နန်းတော်သို့ ပြန်သွားရပေမည်။ ရွှယ်လင်က အလျင်စလိုမဟုတ်ပေ။ မနက်ခင်း သူ့ယောက္ခမများထံ သွားကာ လက်ဖက်ရည်သောက်ရန် လိုအပ်နေလျှင်ပင် သူ့ခြေလှမ်းများက ပျင်းရိကာ အေးအေးဆေးဆေးဖြစ်နေဆဲပင်။

သူ့ယောက္ခထီးနှင့် ယောက္ခမက သေသွားသည်မှာ ကြာပြီဖြစ်သည်။ စစ်သူကြီးက သူတို့ကိုတွေ့ရန် သူ့ကို ခေါ်သွားချင်သည့် ရည်ရွယ်ချက်မရှိလျှင် သူတို့အတွက် လက်ဖက်ရည်တည်ခင်းရန် လုံးဝ မလိုအပ်ပေ။ ယမန်နေ့ညက သူ ထိုလူကို ကန်ထုတ်ပစ်ခဲ့သည့် အချက်ကိုကြည့်လျှင် ထိုလူ ယနေ့ သူ့ကို လာရှာလိမ့်မည် မဟုတ်ကြောင်း ရွှယ်လင် ခံစားမိသည်။

ဤမနက်တွင် တံခါးဝ၌ ရူးကြောင်ကြောင် ရပ်နေသည့်ထိုလူကို သူ လုံးဝ မမြင်ချင်ဟန်ဆောင်ခဲ့ပေသည်။

တော်ဝင်မင်းသမီး၏ ၀တ်စားဆင်ယင်မှုက အနည်းငယ်ရိုးရှင်းလွန်းသည်ဟု အိမ်အကူများက ယူဆကြသည်။ 

အရှင်မင်းသမီးက အိမ်ထောင်ကျပြီး ဒုတိယနေ့မှာ ရိုးရိုးရှင်းရှင်း ၀တ်စားဆင်ယင်ပြီး စစ်သူကြီးရဲ့ နှလုံးသားကို လုံးဝ မဖမ်းစားချင်တာလား... 

သို့သော် သေသေချာချာကြည့်ရှုပြီးနောက် အရှင်မင်းသမီး၏ အသားအရေက နူးညံ့သိမ်မွေ့သော ကျောက်စိမ်းဖြူလေးကဲ့သို့ အလွန်ကောင်းမွန်လှသည်။ ထိတွေ့ကြည့်ပြီးလျှင် ချောမွေ့ပြီး အလွန်ချီးကျူးဖွယ်ကောင်းကြောင်း သူတို့ သိရှိသွားခဲ့ကြသည်။ သူမ၏ မျက်ခုံးမွှေးများကို ပြီးပြည့်စုံစွာ ပုံဖော်ထားခြင်းခံရပြီး အလွန် မျက်စိပသာဒဖြစ်ဖွယ်ကောင်းလှသည်။ မိတ်ကပ်မလိမ်းလျှင်ပင် ကောင်းကင်အောက်ရှိ အရာအားလုံးကို သူမ၏အလှတရားနှင့် လွှမ်းမိုးထားနိုင်သည်။ ထိုကဲ့သို့ ရိုးရိုးရှင်းရှင်း ၀တ်စုံဖြင့်ပင် အရှင်မင်းသမီးက အံ့အားသင့်ဖွယ်ကောင်းလှသည်။ အကယ်၍ သူမသာ မိတ်ကပ်လိမ်းထားလျှင် တစ်ကမ္ဘာလုံးပင် မှင်တက်သွားနိုင်သည်။

စိတ်ထဲရှိ ထိုအတွေးနှင့်အတူ အရှင်မင်းသမီး၏ရိုးရှင်းသည့် ဝတ်စားဆင်ယင်မှုက အလွန်ကောင်းမွန်သည်ဟု သူတို့ တစ်ဖန် ခံစားမိပြန်သည်။ သူမက ယခုအိမ်ထောင်သည် အမျိုးသမီး ဖြစ်နေပြီ ဖြစ်သောကြောင့် ထင်ထင်ပေါ်ပေါ် မနေခြင်းသည်လည်း ကောင်းပေသည်။

သူတို့ မည်သည့်အရာများတွေးနေကြောင်း ရွှယ်လင် မသိပေ။ သူ့ကဲ့သို့ ယောက်ျားတစ်ယောက်ကို အမျိုးသမီးအဝတ်အစားများ ဝတ်ခိုင်းခြင်းကပင် သူ၏သည်းခံနိုင်သော အတိုင်းအတာကို ရောက်နေပြီဖြစ်သည်။ 

မိတ်ကပ်လိမ်းပြီး ငါ့ကိုယ်ငါ လက်ဝတ်ရတနာတွေနဲ့ လှလှပပ ပြင်ဆင်ခြယ်သရမယ်ပေါ့လေ...

ဟား ဟား...

နံနက်စာစားပြီးနောက် ရွှယ်လင်က စစ်သူကြီး၏အဆောင်သို့ လျှောက်ကြည့်ပြီး စူးစမ်းလေ့လာရန် စီစဥ်ခဲ့သည်။ အိပ်ဆောင်ထဲတွင် သူ တစ်ချိန်လုံးမနေနိုင်၍ ခိုးထွက်ရန် အခွင့်အလမ်းကိုရှာရန် လိုပေသည်။ သို့သော် သူ ခြံဝင်းတံခါးဝသို့ ရောက်သောအခါ သူ့အားရှာဖွေရန် ရောက်လာသော မျက်နှာကြောတင်းတင်းနှင့် အမျိုးသားတစ်ဦးကို တွေ့လိုက်ရသည်။

ရွှယ်လင် ပျင်းရိစွာဖြင့် မျက်ခုံးပင့်လိုက်သည်။ ထိုသူက ရိုးရိုးရှင်းရှင်း ၀တ်ဆင်ထားသော်လည်း သူ၏အရှိန်အဝါက ရှိနေဆဲဖြစ်ပြီး လူ နီးကပ်လာသည်နှင့် တစ်ပြိုင်နက် သူ၏နှလုံးခုန်နှုန်း မြန်လာသည်ကို ခံစားမိသည်။ သူ့တွင် ကောင်းမွန်မွန် စကားပြောလိုစိတ် မရှိပေ။ ထို့ကြောင့် သူ တတ်နိုင်သလောက် သူ၏အေးစက်စက် အမူအရာကို ထိန်းထားလိုက်သည်။

"စစ်သူကြီး တစ်ခုခုလိုအပ်တာရှိလို့လား..."

 ရွှယ်လင် ဖြည်းညှင်းစွာ မေးလိုက်သည်။ ထိုယောက်ျားကို တံခါးဝမှ ကန်ထုတ်ခဲ့သည့် ယမန်နေ့ညက အဖြစ်အပျက်ကို ရွှယ်လင် မေ့သွားပုံပေါ်ပြီး ဈေးကြီးလှသော ခန်းဝင်ပစ္စည်းများ ယူဆောင်လာကာ ယမန်နေ့က ထိုယောက်ျားနှင့် လက်ထပ်ရန် အနီရောင် မင်္ဂလာဝတ်စုံဝတ်ထားသည်ကိုလည်း မေ့သွားသည်မှာ ပို၍ပင်သိသာထင်ရှားပေသည်။ သူ့မျက်နှာက အမူအရာမဲ့နေပြီး အလွန်စိမ်းကားနေပုံပေါ်သည်။

ကျန့်ရှောက်ရှီး၏နှလုံးသားထဲ တင်းကျပ်သွားသည်။ သူက အဆုံးမရှိသော စိတ်ခံစားမှု အတက်အကျများကို တစ်ညလုံး ကြုံတွေ့ခဲ့ရသော်လည်း ယခုထိ တောင်းပန်ရန် မစွမ်းဆောင်နိုင်သေးပေ။ သူ့အပေါ် တစ်ဖက်သား၏ ထိုကဲ့သို့ အပြုအမူကို မြင်လိုက်ရပြီး အမှန်တကယ်ကို စိတ်မသက်မသာ ခံစားခဲ့ရသည်။

"မင်း ငါ့ကို 'စစ်သူကြီး' လို့ ခေါ်နေတုန်းလား..."

သူ့စိတ်ထဲတွင် သောကရောက်နေသော်လည်း ထိုလူက ထုတ်မပြခဲ့ပေ။ သူ့ခန္ဓာကိုယ်မှ ထုတ်လွှတ်သော အေးစက်မှုကသာ သူ့ရှေ့ရှိလူကို ဖိအားပေးချင်သကဲ့သို့ ပို၍အားကောင်းလာသည်။

ထိုအေးစက်မှုကို ရွှယ်လင်၏နောက်မှလိုက်လာသော အစေခံများ ခံစားရသော်လည်း ရွှယ်လင်အပေါ် သက်ရောက်မှုရှိသည့်ပုံမပေါ်ပေ။

"စစ်သူကြီး လို့ မခေါ်ရင် ဘယ်လိုခေါ်ရမှာလဲ..."

ရွှယ်လင်က အေးစက်စွာ ရယ်မောလိုက်သည်။

"ယောက်ျား လို့ ခေါ်တာကိုတော့ စစ်သူကြီး ခံနိုင်ရည်ရှိမယ် မထင်ဘူး... ဒါကြောင့် စစ်သူကြီး ရှက်မသွားအောင် ကျွန်မ မခေါ်တာ... ဘာပဲဖြစ်ဖြစ် ကျွန်မက ကိုယ့်နေရာကိုယ် သိပါတယ်..."

ကျန့်ရှောက်ရှီး မူလက အဆင်ပြေနေသေးသော်လည်း ရွှယ်လင်၏စကားကြောင့် ဆို့နင့်လာကာ သူ့နှလုံးသားက မသက်မသာ ပိတ်ဆို့နေသလို ခံစားရသည်။ သူ့ကိုယ်တိုင်ပြောခဲ့ဖူးသည့် စကားများကို အခုမှ ပြန်ရုတ်သိမ်းလို့ မရနိုင်တော့ပေ၍ အေးစက်စွာ ချောင်းဟန့်လိုက်သည်။

"အခု မင်းနေရာကို မင်းသိသွားပြီဆိုတော့... တော်ဝင်မင်းသမီး ကျွန်တော်နဲ့လိုက်ခဲ့ပေးလို့ရမလား..."

ရွှယ်လင် မျက်မှောင်ကြုတ်ကာ အံ့ဩသွားသည်။

 "ဘယ်သွားမလို့လဲ..."

"ဘိုးဘေးတွေကို ကန်တော့ဖို့..."

တစ်ဖက်လူ၏အဖြေကို မစောင့်ဘဲ ကျန့်ရှောက်ရှီး ရှေ့ကို တိုးလာပြီး သူ့လက်ကောက်ဝတ်ကို ဆုပ်ကိုင်လိုက်သည်။

ရွှယ်လင်က အားနှင့် အဆွဲခံလိုက်ရသောကြောင့် သူ့ခြေလှမ်းများ အနည်းငယ် ယိမ်းယိုင်သွားသည်။ သူ့ကို နောက်ကျောပေးထားသော ကျန့်ရှောက်ရှီးကို စူးစူးရဲရဲ စိုက်ကြည့်လိုက်ပြီး အံကြိတ်ကာ ထိုသူ့ကို လျစ်လျူရှုရမည့် အချိန်ကာလတစ်ရပ်ကို အများကြီးတိုးမြှင့်ပေးလိုက်သည်။

အကူစနစ်လေးက သူ့သခင် host နောက်မှ ခြေလှမ်းမှန်မှန်နှင့် ပြေးလိုက်လာသည်။ မထင်မှတ်ထားစွာပင် သူ့ host၏ သဘောထား သေးသိမ်မှုအပေါ် မှတ်ချက်မပေးခဲ့ပေ။

ထိုလူ့အပေါ် သူ့ဒေါသကို ပုံချလျှင် အကောင်းဆုံးပင်။ 

ဒေါသထွက်တိုင်း ငါ့ဘက်လှည့်လာပြီး အမြီးပေါ်က အမွေးတွေကို လာမဆွဲနဲ့တော့... ငါက တကယ့်မြေခွေးမဟုတ်ပေမယ့် နာကျင်တာကို ခံစားရသေးတယ်လေ ဝူးဝူး...

ကျန့်ရှောက်ရှီးက တော်ဝင်အရှင်မင်းသမီးအား နောက်ပြန်လှည့်မကြည့်သော်လည်း သူ့နှလုံးသားက အလွန်စိတ်လှုပ်ရှားနေသည်။ တစ်ဖက်လူ၏ လက်ကောက်ဝတ်က ယမန်နေ့ညက သူမြင်ခဲ့သည့်အတိုင်း ပိန်ပါးကာသေးသွယ်ပြီး ၎င်းကို တင်းတင်းကျပ်ကျပ် ဆုပ်ကိုင်ထားနိုင်ရန်အတွက် သူ့လက်က လက်သီးဆုပ်လုနီးပါးပင် ဖြစ်နေသည်။ သူမ၏အသားအရည်က အလွန်ချောမွေ့နေပြီး လက်သည်လည်း အနည်းငယ် အေးစက်နေသည်။ သူ ၎င်းကို ထိလိုက်ရုံသာရှိသေးသော်လည်း သူ့နှလုံးသားက မတည်ငြိမ်သည့် အခြေအနေသို့ ရောက်ရှိနေပြီဖြစ်ပြီး တစ်ဖက်သား၏ လျင်မြန်သော ခြေလှမ်းများနှင့်အတူ မြန်ဆန်လာသောသူ့နှလုံးခုန်သံကို ကြားနေရသည်။ သူ့လက်ချောင်းထိပ်များကို သုံးပြီး တစ်ဖက်သား၏ လက်ကောက်ဝတ်ကို အကြိမ်အနည်းငယ်ထိမကြည့်ဘဲ မနေနိုင်ပေ။

ရွှယ်လင် ထိုသူ့ဆီမှ ခေါ်ဆောင်သွားခြင်းခံရပြီး သူ့ခြေလှမ်းများကို အမှီလိုက်နေရသည်။ တစ်ဖက်လူက ဂရုတစိုက်ဖြင့် အနည်းငယ် အသားယူနေပြီဖြစ်ကြောင်း ရွှယ်လင် လုံးဝ မသိခဲ့ပေ။ ထိုအစား သူ့ကိုယ်သူ စိတ်ထဲမှ မှတ်ချက်တစ်ခုကိုပင် ပေးနေသေးသည်။ တစ်ဖက်လူက သူ့ထက် အရပ်ပိုမြင့်သောကြောင့် နောက်ကမ္ဘာ၌ အရပ်ပိုမြင့်သည့်ခန္ဓာကိုယ်တစ်ခုကို သူ့အတွက် အကူစနစ်လေးကအား သေချာပေါက် ရွေးချယ်ခိုင်းရမည်။

တကယ်လို့ အခြားစိတ်ရှုပ်ဖို့ကောင်းပြီး အရွယ်မရောက်သေးတဲ့ ခန္ဓာကိုယ်ကို ထပ်ပြီးပေးလာရင် အကူစနစ်ရဲ့ကိုယ်ပေါ်မှာရှိတဲ့ အမွေးအားလုံးကို ဆွဲနှုတ်ပစ်မယ်...

🦊🦊🦊