MM Story Teller

Chapter 64

Viewers 3k

🦊Chapter 64

Arc 5 - တော်ဝင်မင်းသမီးကို မှားယွင်းလက်ထပ်မိခြင်း

5.4 – ချစ်ခင်မှုကို ဖော်ပြနိုင်သည့်စွမ်းရည်အဖြစ် ပြောင်းလဲသွားသည်။

မင်္ဂလာဆောင်ပြီး သုံးရက်မြောက်နေ့တွင် ကောင်းကင်ယံ၌ ရောင်နီမသန်းမီကတည်းက ကျန့်ရှောက်ရှီး ရွှယ်လင်၏ခြံအပြင်ဘက်တွင် ရောက်နှင့်နေပြီးဖြစ်သည်။ သူမ အဆင်သင့်ဖြစ်နေပြီဖြစ်ကြောင်း သိလိုက်ရပြီးနောက် အံ့သြစွာ မျက်မှောင်ကြုတ်လိုက်မိသည်။

ယနေ့က တော်ဝင်မင်းသမီး၏ကျေးဇူးတရားကို ချီးကျူးဖော်ပြရန် အိမ်သို့ ပြန်ရမည့်နေ့ဖြစ်သည်။ ရွှယ်လင်အပေါ် ကျန့်ရှောက်ရှီး၏ နားလည်မှုအရ သူမအား စောစောထရန် တောင်းဆိုခြင်းက သူ့အသက်ကိုပေးရန် တောင်းဆိုခြင်းနှင့် အလားသဏ္ဍာန်တူပေသည်။ ထို့ကြောင့် ကျန့်ရှောက်ရှီး ယနေ့ သူမ၏အခန်းထဲသို့ ဝင်ဖို့ကြိုးစားရန် ကြံစည်ခဲ့သည်။ တစ်ဖက်သား ဒေါသထွက်လျှင်ပင်မှ တော်ဝင်နန်းတော်ကို အချိန်မှားပြီး မပြန်နိုင်မည်စိုးသောကြောင့် သူမအကျိုးအတွက်ဟုဆိုပြီး သတ်မှတ်၍ရသည်။

သို့သော် သူ ကောင်းကောင်းစီစဉ်ထားသော်လည်း ရွှယ်လင်က စောစောနိုးလာသည်။ ယနေ့က သူ့မိသားစုထံ အလည်အပတ် ပြန်ရသည့်နေ့ဖြစ်သောကြောင့် ပြီးခဲ့သည့်ရက်အနည်းငယ်ကကဲ့သို့ ရိုးရိုးရှင်းရှင်း ၀တ်စား၍မရပေ။ ထို့ကြောင့် အဆင်သင့်ဖြစ်ရန်အတွက် နံနက်စောစောထရန် အကူစနစ်လေးက သူ့အား ထပ်တလဲလဲ ဒုက္ခပေးနေခဲ့သောကြောင့် ယခုအချိန်တွင် ပြီးလုနီးပါးဖြစ်နေပေပြီ။

သူ ဧကရာဇ်မင်းအား တွေ့ရန်အတွက် နံနက်ခင်းညီလာခံ ပြီးဆုံးမည့်အချိန်အထိ စောင့်ဆိုင်းရပေမည်။ ထို့ကြောင့် ရွှယ်လင် နန်းတော်သို့မဝင်မီ ညီလာခံပြီးသည်အထိ စောင့်ဆိုင်းရန် ရွေးချယ်ခဲ့သော်လည်း စစ်သူကြီးက သဘောမတူဘဲ အတူတူသွားကြရန် တောင်းဆိုခဲ့သည်။ သူ၏အကြောင်းပြချက်မှာ အိမ်တွင် သူတို့ မည်သို့နေထိုင်သည်ဖြစ်စေ အိမ်အပြင်ထွက်သည့်အခါ အတွင်းစိတ် သဘောထားကွဲလွဲမှုများ ရှိနေကြောင်း ရိပ်မိခံ၍မရသောကြောင့်ဖြစ်သည်။

ရွှယ်လင် ခေါင်းညိတ်ကာ သဘောမတူမီ သူ့မျက်နှာအမူအရာအား ဆက်လက်ထိန်းမထားနိုင်တော့သည်အထိ ကျန့်ရှောက်ရှီးအား အချိန်ကြာမြင့်စွာ စိုက်ကြည့်နေလိုက်သည်။

သူက ငါနဲ့အတူတူ ရှိနေချင်တာမဟုတ်လား...

သူ့အတွက် ထိုဆန္ဒကို ဖြည့်ဆည်းပေးနိုင်ပေသည်။

ရွှယ်လင် သူ့မျက်လုံးများကို မှေးကျဥ်းလိုက်သည်။ သူတို့ကြားရှိ သဘောထားကွဲလွဲမှုများနှင့်ပတ်သက်၍ နေအိမ်အတွင်း၌ မည်သူမျှ ဘာမှမပြောခဲ့လျှင်ပင် သတင်းလျှောက်ဖြန့်နေသော အခြားသူများလည်း ရှိနေသေးသည်။ လွန်ခဲ့သော နှစ်ရက်အတွင်း ရွှယ်လင် စေလွှတ်လိုက်သော လူများ၏ စူးစမ်းရှာဖွေရရှိခဲ့သည့် အရာများအရ အမျိုးသမီးဇာတ်လိုက်က မတောက်ပသလို သမာသမတ်လည်းမရှိပေ။ ထို့အပြင် မူရင်းဇာတ်ညွှန်း ပုံဖော်ထားသည့်အတိုင်း မည်သည့်အခါမှ လျှို့ဝှက်စွာ လှုပ်ရှားလိုစိတ်မရှိပေ။

အမျိုးသမီးတစ်ဦးက တစ်စုံတစ်ဦးကို အနိုင်ယူရန် ရည်ရွယ်ချက်ရှိသောအခါ သူမကိုယ်တိုင် တွန်းအားအချို့ကို အမြဲတမ်း ဖန်တီးနိုင်သည်။

နံနက်စောစောတွင် ကျန့်ကော်စစ်သူကြီး၏ရထားလုံးက ကျုံးတံတားကို ဖြေးဖြေးမှန်မှန် ကျော်ဖြတ်လာခဲ့သည်။ စစ်သူကြီးက ယနေ့တွင် သူ၏မြင့်မားသန်မာသောမြင်းကို စွန့်ပစ်ထားခဲ့ကာ ရထားအတွင်းရှိ တော်ဝင်မင်းသမီးဘေးနားတွင် ထိုင်နေခဲ့သည်။ ခွဲခွာရမည့်အချိန်မှသာ ရထားလုံးပေါ်မှ တုံ့ဆိုင်းစွာ ဆင်းလာခဲ့သည်။

ထိုမြင်ကွင်းကို ညီလာခံရှိ အထင်ကရ ပုဂ္ဂိုလ်များစွာက မြင်တွေ့ခဲ့ကြသည်။ သူတို့ထဲမှအချို့သူများက ပါးစပ်ကို အုပ်ကာ ရယ်မောခဲ့ကြပြီး ယခင်က စစ်သူကြီး၏ မာကြောခက်ထန်မှုမှာ သူ့ဇနီးဖြစ်သူ၏ နူးညံ့သိမ်မွေ့သော ပွေ့ဖက်မှုကြောင့် ပျောက်ကွယ်သွားသည်ဟု ထင်မြင်ကြသည်။ ထိုကဲ့သို့ချစ်ခင်ကြင်နာပြမှုက အခြားသူများ၏မျက်လုံးများကို မှောင်မိုက်သွားစေသော်လည်း သူတို့ မည်သည့်အရာများတွေးနေမှန်း မသိရပေ။ မည်သို့ပင်ဆိုစေကာမူ ကောင်းသောအရာများဖြစ်မည်မဟုတ်ပေ။

စစ်သူကြီး၏ တွန့်ဆုတ်နေသော အမူအရာက ရိုးသားသောလုပ်ရပ်တစ်ခုဖြစ်ကြောင်း မည်သူထံတွင်မျှ သဲလွန်စမရှိခဲ့ပေ။ အမှန်တွင် သူက ရထားလုံးပေါ်ရှိလူ၏ မောင်းထုတ်ခြင်းကို ခံခဲ့ရသော်လည်း သူမကို အချိန်ပိုကြာအောင် ကြည့်နေချင်သောကြောင့် အမှန်ပင် တုံ့ဆိုင်းနေခဲ့သည်။ ကံမကောင်းစွာပင် တစ်ဖက်လူက သဘောမတူဘဲ သူ့ကို အပြုသဘောဆောင်သည့် ဖော်ပြမှုမျိုး တစ်ခါမှမပေးခဲ့ပေ။

သူတို့မင်္ဂလာဆောင်သည့်နေ့ကတည်းက သူမ၏အသွင်အပြင်ကြောင့် သူ အံ့အားသင့်ခဲ့ရဖူးသော်လည်း ထိုအချိန်က အခြေအနေက အမှန်ပင် ထူးဆန်းနေပြီး သူ၏စိတ်ခံစားချက်များသည်လည်း နေရာအနှံ့ ပျံ့နှံ့နေခြင်းကြောင့် ထိုအချိန်က သူမအလှကို အသိအမှတ်ပြု၍မရပေ။ သာမာန်နေ့များတွင် သူမ၏ကြော့ရှင်းပြီး ရိုးရှင်းသောအသွင်အပြင်က အလွန်ကြည့်ကောင်းကြောင်း ကျန့်ရှောက်ရှီးလည်း ခံစားမိခဲ့သည်။ ယခုအခါ အလွန်အမင်းလှပသောမိတ်ကပ်ကို လိမ်းခြယ်ထားသည့် ရွှယ်လင်ကို တစ်ဖန်ပြန်မြင်ရသောအခါ သူ့နှလုံးသားက သူ့အပိုင်မဟုတ်တော့ကြောင်း ပိုပို၍ ခံစားလာရသည်။ မင်းမျိုးမင်းနွယ်များအား မယုံကြည်ဘဲ သူတို့နှင့် မပတ်သက်ချင်သည့် ယခင်နှစ်များမှ သူ၏အတွေးများအားလုံးက တစ်နေရာရာတွင် ပစ်ချထားခံရပြီး ခွေးများအား အကျွေးခံလိုက်ရသည်။ သူ့နှလုံးသားတစ်ခုလုံးတွင် သူမအား ဝမ်းမြောက်ပျော်ရွှင်စေချင်သည့် ဆန္ဒများနှင့် ပြည့်နှက်နေသည်။

သို့သော် သူ ပါးစပ်ဟလိုက်သည့်အချိန်တိုင်း သို့မဟုတ် တစ်ခုခုလှုပ်ရှားလိုက်တိုင်း တစ်ဖက်လူက သူ့အား ဂရုမစိုက်သလို အကြည့်ဖြင့် အမြဲတမ်းကြည့်လေ့ရှိသည်။ မင်္ဂလာဦးညတွင် သူပြောခဲ့သည့်စကားကို ချက်ချင်းပြန်သတိရသွားပြီးနောက် သူ့တစ်ကိုယ်လုံး ထိန်းချုပ်မရစွာဖြင့် လှုပ်ရှား၍မရတော့ပေ။

သူ့စကားများကို ပိုတွေးမိလေလေ၊ စိုးရိမ်စိတ်နှင့် အပြစ်ရှိသလို ပို‌ခံစားရလေလေပင်။ တော်ဝင်မင်းသမီးကို ကြည့်လိုက်သည့်အချိန်တွင် သူ့ဂုဏ်သိက္ခာကို ဘေးဖယ်ထားပြီး ထိုစကားများကို တစ်ခါမှ မပြောဖူးသလို ဟန်ဆောင်ပေးရန် ပိုပြီးခက်ခဲလာသည်။

ထိုသို့ပြောလျှင်ပင် တစ်ဖက်လူက ဂရုမစိုက်လိမ့်မည် မဟုတ်ပေ။

မည်သို့ပင်ဆိုစေကာမူ သူ့ကို သူမဘက်က လုံးဝ စိတ်မဝင်စားပေ။

အနောက်နန်းဆောင်သို့ ဖြည်းညှင်းစွာ သွားနေသော သူ့ကိုယ်ပိုင်ရထားလုံးကို ကျန့်ရှောက်ရှီး ကူကယ်ရာမဲ့စွာ ကြည့်နေသည်။ ထို့နောက် မြေပြင်ပေါ်သို့ သူ့အကြည့်ကို လွှဲလိုက်ကာ ခံစားချက်များကို အဝေးသို့ ဖယ်ထားလိုက်သည်။ သူ လှည့်လိုက်သောအခါ စစ်တပ်မိသားစုမှ မွေးဖွားလာပြီး အံ့သြဖွယ်ရာ အရှိန်အဝါရှိသော ကျန့်ကော်စစ်သူကြီးအဖြစ်သို့ ပြန်လည်ရောက်ရှိသွားသည်။

ရွှယ်လင် ရထားလုံးပေါ်တွင် မေးထောက်ကာ ထိုင်နေသည်။ ရထားလုံးက လှုပ်ယိမ်းနေသောကြောင့် ခေါင်းပေါ်တွင် အလှဆင်ထားသည့် တွဲလောင်းကျနေသော ကြိုးများက ဘယ်ညာယိမ်းနွဲ့ကာ ကခုန်နေကြသည်။ ဧကရာဇ်မင်းနှင့် ဧကရီတို့အား မည်သို့ဆက်ဆံရမည်ကို ရွှယ်လင် တွေးမိသည်။ ဤကိုယ်ခန္ဓာ၏ မူလပိုင်ရှင်က စကားများများစားစား ပြောဆိုရသည်ကို မကြိုက်ဘဲ ပုံမှန်အားဖြင့် အကျင့်စာရိတ္တကောင်းမွန်ကာ ဉာဏ်ပညာထက်မြက်ပြီး အချိန်ကြာမြင့်သည်အထိ ငြိမ်သက်စွာ ထိုင်နိုင်သူဖြစ်သည်။ ၎င်းကို ပြုလုပ်ရန် မခက်ခဲသော်လည်း တစ်မနက်ခင်းလုံးထိုင်နေပြီးနောက် ရွှယ်လင် စိတ်မရှည်တော့သလို ခံစားလာရသည်။

ဧကရီက သူတို့အား နေ့လယ်စာစားရန် ဖိတ်ခေါ်မည်ကို သူတို့ လုံးဝခွင့်မပြုနိုင်ပေ။ ရွှယ်လင် အစာမကြေသည့် ဝေဒနာကို ခံစားသွားရနိုင်သည်။

သူက အလွန်တစ်ကိုယ်ကောင်းဆန်ပြီး မာနကြီးသူဖြစ်၍ သူ မကြိုက်ဆုံးအရာက အခြားသူများအား အရှုံးပေးလိုက်ရခြင်းပင်ဖြစ်သည်။ ရာဇပလ္လင်ကို သိမ်းပိုက်ရန် အလွန်မခက်ခဲလျှင် ဧကရာဇ်မင်းမြတ်၏ ရာထူးကို အတင်းအဓမ္မသိမ်းပိုက်ကာ အမျိုးသမီးဇာတ်လိုက်ကို လက်ထပ်ပြီးနောက် သူမအား တစ်သက်လုံး အထီးကျန်မှုကို ခံစားရစေရန် နန်းတော်ထဲတွင် ထောင်ချမည်ဖြစ်သည်။

ကြည့်လိုက်စမ်းပါဦး ဘယ်လောက်တောင် ရိုးရှင်း၊ ရက်စက်ပြီး ထိရောက်မှုရှိလဲ...

ကံမကောင်းစွာပင် အကူစနစ်လေးက အမြဲတမ်း ဤစိတ်ရှုပ်ဖွယ် အားနည်းသည့်ခန္ဓာကိုယ်များကို ရွေးချယ်ခဲ့ပြီး သူ ထိုကဲ့သို့လုပ်လျှင် OOC ဟု သတ်မှတ်ခံရမည်မှာ သေချာပေသည်။ နောက်တစ်စက္ကန့်အတွင်းမှာပင် သူ့ကို ကမ္ဘာ့အသိစိတ်က ရှာဖွေတွေ့ရှိသွားပြီး ဤကမ္ဘာကြီးမှ တိုက်ရိုက်ထုတ်ပယ်ပစ်ပေလိမ့်မည်။

နန်းတော်သို့ဝင်လာပြီးနောက် တော်ဝင်မင်းသမီးတစ်ယောက်အနေနှင့် ဧကရီထံ သွားရောက်တွေ့ဆုံခဲ့သည်။ ဧကရီက အရုဏ်မတက်မီတည်းက နိုးနေပြီး သူရောက်သောအခါ ဖုန်လုံနန်းဆောင်က ဖွင့်နေပြီဖြစ်သည်။ ရွှယ်လင် သူရောက်ရှိကြောင်း အသိပေးရန် လူများကိုစေလွှတ်ပြီးနောက် နန်းဆောင်တံခါးရှေ့တွင် ရပ်ကာ ခြေဖဝါးအောက်ရှိ ကြမ်းခင်းကြွေပြားပုံစံများကို ငုံ့ကြည့်နေသည်။ ထို့နောက် အလွန်သာယာသော မေးမြန်းသံကို ကြားလိုက်ရသည်။

"မင်ယွဲ့ တော်ဝင်မင်းသမီးကို နှုတ်ခွန်းဆက်ပါတယ်..."

ထိုလူက သူ့ရှေ့တွင် ဒူးကိုကွေးညွှတ်ကာ နှုတ်ဆက်လိုက်သည်။ သူမက ရှီနိုင်ငံမှ အမျိုးသမီးတစ်ယောက်ကဲ့သို့ ဟန်ဆောင်မှုတစ်စုံတစ်ရာမရှိဘဲ ထိုအစား နူးညံ့သိမ်မွေ့မှုနှင့်အတူ ဟန်ချက်ညီသော ရဲရင့်သည့်စိတ်ဓာတ်လည်းရှိသည်။ သူမ၏နန်းတွင်းဝတ်စားဆင်ယင်မှုက ထူးထူးခြားခြားမဟုတ်သော်လည်း သူမမျက်နှာက အလွန်ကြည့်ကောင်းနေသည်။ ထို့ကြောင့် ၎င်းက ရိုးရှင်းသော အဆင်တန်ဆာတစ်ခု သို့မဟုတ် နှစ်ခုနှင့်လိုက်ဖက်သည့် ၀တ်စုံတစ်ခုသာဖြစ်သော်လည်း သူမက ထူးထူးခြားခြား လှပနေဆဲဟု သတ်မှတ်၍ရသည်။

သူမကိုမြင်သောအခါ လူအများကို သဘောကျလာအောင် ပြုလုပ်နိုင်သည့် အမျိုးသမီးတစ်ဦးဖြစ်ပြီး လူအများ၏စိတ်ဝိညာဥ်ကို အကြည့်တစ်ချက်ဖြင့် ခိုးယူနိုင်သူ ဖြစ်ကြောင်း သိလိုက်သည်။ သူမက သူ့ထက် အရပ်ပိုမြင့်နေသောကြောင့် ရွှယ်လင် အနည်းငယ် မကျေမနပ်ဖြစ်ကာ မျက်ခုံးပင့်လိုက်ပြီး ခေါင်းကိုမော့ကာ ဂရုမစိုက်သလို ပေါ့ပေါ့ပါးပါးပြောလိုက်သည်။

"ဒါက မင်းသမီးမင်ယွဲ့ပေါ့..."

သူ့အသံက ဤမျှအတိုင်းအတာအထိ လျစ်လျူရှုနေလိမ့်မည်ဟု မမျှော်လင့်ထားသောကြောင့် ဝမ်ရမ်ယင်းယွဲ့ မျက်မှောင် အနည်းငယ် ကြုတ်သွားပြီး တစ်ခုခုပြောချင်သော်လည်း ခေါင်းကို ငုံ့ထားလိုက်သည်။ သို့သော် သူ့မျက်နှာကို ကြည့်လိုက်ချိန်တွင် သူမ၏အမူအရာသည် ပြောင်းလဲသွားသည်။

ဤသည်မှာ သူမ ဤကမ္ဘာသို့ ကူးပြောင်းလာပြီးနောက် ဝမ်ရမ်ဟုန်နှင့် ပထမဆုံးအကြိမ် တွေ့ဆုံခြင်းဖြစ်သည်။ တော်ဝင်အရှင်မင်းသမီးက ထောင်လွှားတတ်သည့် အကျင့်စရိုက်မရှိဘဲ နူးညံ့သိမ့်မွေ့ပြီး ကိုယ်ကျင့်သိက္ခာကောင်းမွန်သည့်အပြင် စကားလည်းမများဘဲ အမြဲတမ်း ခေါင်းငုံ့ထားလေ့ရှိကြောင်း ယခင်က သူမကြားခဲ့ဖူးသည်။ သူမက နူးညံ့သိမ်မွေ့ပြီး ကြောက်မက်ဖွယ်ကောင်းသော အကျင့်စရိုက်မျိုး လုံးဝမရှိပေ။ သို့သော် ယခု သူမ လူအစစ်ကို မြင်လိုက်ရချိန်တွင် ဝမ်ရမ်ယင်းယွဲ့၏ အသက်ရှူသံများ အနည်းငယ် မြန်လာသည်ကို ခံစားလိုက်ရသည်။

သူမက အမှန်ပင် တိတ်ဆိတ်ငြိမ်သက်သော်လည်း ထိုလူများပြောသလို နူးညံ့သိမ်မွေ့မှုနှင့် မတူပေ။ ၎င်းက အစွန်းများကို ဖုံးအုပ်မထားသည့် ဓားတစ်လက်ဖြစ်သည်မှာ ထင်ရှားပေသည်။ စကားမပြောဘဲ ထိုနေရာတွင်ရပ်နေရုံမျှဖြင့် ထိုအရှိန်အဝါက အတိတ်ဘဝတွင် လူသတ်သမားဖြစ်ခဲ့သော ဝမ်ရမ်ယင်းယွဲ့ကို တုန်လှုပ်သွားစေခဲ့သည်။ ထိုမျက်နှာက အလွန်လှပပြီး အပေါ်သို့ အနည်းငယ် ကွေးနေသော မြေခွေးမျက်လုံးများက တစ်ချက်ကြည့်လိုက်ရုံဖြင့် အသက်ရှူမှားစေနိုင်သည်။ ထိုမျက်ဝန်းတစ်စုံက အမှန်တကယ်ကို အလွန့်အလွန်လှပလွန်းသည်။ သူ့မျက်လုံးဖြင့် လူတစ်ယောက်ကို ကြည့်လိုက်လျှင် ထိုလူက ကမ္ဘာပေါ်တွင် ကံအကောင်းဆုံးဖြစ်မည်မှာ သေချာပေသည်။

မူလက ဝမ်ရမ်ယင်းယွဲ့မှာ စစ်သူကြီးကျန့်၏ ဇနီးအသစ်နှင့် တွေ့ဆုံလိုသော်လည်း အကြောင်းတစ်စုံတစ်ရာကြောင့် ယခုအခါ သူမ စစ်သူကြီးကျန့်ကို အနည်းငယ် မနာလိုဖြစ်မိသည်။

( ဂေးကုန်ပြီ🤣)

သူမ၏အကြည့်ကို ပြန်ရုတ်သိမ်းလိုက်ပြီး နောက်သို့ ခြေတစ်လှမ်းဆုတ်လိုက်သည်။

"ဒီနေ့ မယ်တော်နဲ့အတူ ဧကရီဆီ အလည်လာခဲ့တာပါ တော်ဝင်မင်းသမီးကို ဒီမှာတွေ့လိမ့်မယ်လို့ မျှော်လင့်မထားဘူး..."

မင်းသမီးလင်းဟုန်က ဧကရာဇ်မင်းမြတ်၏အမြတ်နိုးဆုံး မင်းသမီးဖြစ်ပြီး သူမ၏ဘွဲ့အမည်မှာ 'မိုးရွာပြီးနောက် နေရောင်ခြည်'ဖြစ်သည်။

အဘယ်ကြောင့်ဆိုသော် ဧကရာဇ် အောင်မြင်စွာ နန်းတက်ပြီး သူ့ညီမတော် မွေးဖွားလာခြင်းကြောင့် သူ့ညီမတော်ကို သူ၏ကံကောင်းခြင်းကြယ်ပွင့်လေးဟု အမြဲတွေးထားပေသည်။ ထို့ကြောင့် ဧကရာဇ်ဘုရင်က သူ့ညီမတော်ကို သူ့သမီးတော်ထက် မျက်နှာသာပေးခဲ့သည်။

ဝမ်ရမ်ဟုန်က ပုံမှန်အရ အားနည်းပြီး ရှက်တတ်ကာ ဧကရာဇ် သူ့ကိုချစ်မြတ်နိုးလျှင်ပင် သူ၏သဘောထားသက အမြဲတမ်း နွေးထွေးနေခဲ့သည်။ ဝမ်ရမ်ဟုန်၏စိတ်ထဲတွင် ဧကရာဇ်မင်းမြတ်ကို ထိတ်လန့်နေပြီး ယောက်ျားတစ်ယောက်ဖြစ်နေသောကြောင့် ရင်းရင်းနှီးနှီး နီးနီးကပ်ကပ်နေရန် ကြောက်ရွံ့နေခဲ့သည်။ သူ့ညီမတော် ငယ်စဥ်ကပိုင်ဆိုင်ခဲ့သည့် ခံစားချက်များကို ရှာတွေ့နိုင်လိမ့်မည်ဟူသော မျှော်လင့်ချက်ဖြင့် သူမ အသက်ဆယ့်ငါးနှစ်ရောက်သည်နှင့် ဧကရာဇ်မင်းက သူ့ညီမတော်ကို အခြားတစ်ဦးထံ လွှဲပြောင်းပေးခဲ့သည်။ ကျန့်ကော်စစ်သူကြီးအိမ်တော်အား အာဏာကို ထိန်းချုပ်စစ်ဆေးရန် ရည်ရွယ်ချက်ရှိခဲ့သည်မှာ အမှန်ပင်ဖြစ်သော်လည်း ဧကရာဇ်မင်းမြတ် ပို၍လိုချင်သောအရာက သူ့ညီမတော် လူအများနှင့် ခံစားချက်များတိုးတက်လာစေရန်ဖြစ်ပြီး အမြဲတမ်းအေးစက်ကာ လျစ်လျူရှုမထားစေချင်သောကြောင့်ဖြစ်သည်။

ရွှယ်လင် ခေါင်းညိတ်လိုက်ပြီး ပြန်ဖြေရန် ဆန္ဒမရှိပေ။

ဝမ်ရမ်ယင်းယွဲ့ ကသိကအောက်ဖြစ်ဖွယ် စိတ်ရှုပ်ထွေးမှု အနည်းငယ်ကို ခံစားလိုက်ရသည်။

ဒီလောက်လှတဲ့လူက စကားပြောရတာကို မကြိုက်တာ ဖြစ်နိုင်မလား...

ထို့ကြောင့် သူမ နောက်ထပ်အကြောင်းအရာတစ်ခုကို ရှာဖွေကာပြောလိုက်သည်။

"ဒီနေ့က တော်ဝင်မင်းသမီး မိသားစုဆီ အလည်အပတ် ပြန်လာရတဲ့နေ့ပဲဆိုတော့ စစ်သူကြီးကရော ဘယ်မှာများလဲ..."

ရွှယ်လင် သူမကို တစ်ချက်ကြည့်လိုက်ပြီး သူမ အတွေးကို သူ မသိပ၍ နှုတ်ခမ်းရဲရဲလေးများကို ဟကာ ပြန်ဖြေလိုက်သည်။

"မနက်ခင်း ညီလာခံမှာပါ..."

ဝမ်ရမ်ယင်းယွဲ့၏ မျက်နှာအမူအရာက တောင့်တင်းလုနီးပါးဖြစ်သွားပြီး စကားဆက်ပြောနိုင်စွမ်း မရှိသည့်အတွက် သူမကိုယ်သူမ စိတ်ထဲတွင် ပြစ်တင်ကြိမ်းမောင်းလိုက်သည်။

ငါ ရွေးလိုက်တဲ့ စကားတွေက ရည်ရွယ်ချက်ရှိရှိ ပြဿနာဖြစ်စေတဲ့ စကားလုံးတွေ မလား...

သူမ စိတ်ပျက်စွာ ခေါင်းငုံ့လိုက်ပြီး စကားမပြောတော့ပေ။

ရွှယ်လင် သူ့စိတ်ထဲရှိ အကူစနစ်လေးအား မေးလိုက်သည်။

"အမျိုးသမီးဇာတ်လိုက်က ဘာဖြစ်နေတာလဲ..."

အကူစနစ်က သူ၏အမြီးလေးကို ခါယမ်းကာ သူ့ကိုယ်သူ ကျေနပ်နေပုံရပြီး ပြောလိုက်သည်။

"သူရဲ့ခေါင်းပေါ်မှာ လူအများအပြားကို ဆွဲဆောင်နိုင်တဲ့ အရှိန်အဝါရှိတယ်... ဇာတ်လမ်းထဲက ဇာတ်ကောင်ဖြစ်သရွေ့ အားလုံးက သူ့ကို ချစ်ကြလိမ့်မယ်..."

"ဒါဆို ငါက သူ့ကို သဘောကျကြောင်း မဖော်ပြတဲ့အတွက် သူက ငါ့ကို အဲဒီလိုအကြည့်နဲ့ ကြည့်နေတာလား..."

"အိုး... လုံးဝ မဟုတ်ဘူး..."

အကူစနစ်လေးက အနည်းငယ် ကူကယ်ရာမဲ့စွာ ပြောဆိုလိုက်သည်။

"သူ့အပေါ် ကျွန်တော့်ရဲ့ စိတ်ပိုင်းဆိုင်ရာ ခွဲခြမ်းစိတ်ဖြာချက်အရ သူ အခု တွေးနေတာက... ဟုတ်တယ် သူက Hostကို သိမ်းသွင်းဖြားယောင်းချင်နေတာ... ဒါပေမယ့် ပြောစရာစကား ရှာမတွေ့ဘူးဖြစ်နေတယ်..."

ရွှယ်လင်: "... ဒီကမ္ဘာရဲ့ ဇာတ်လိုက်အမျိုးသမီးက အဆိပ်ပြင်းလား..."

အကူစနစ်လေး နှစ်ကြိမ်မျှချောင်းဆိုးလိုက်သည်။ မည်သို့ပင်ဆိုစေကာမူ သူမက ခေတ်မီလူ့အဖွဲ့အစည်းမှ ကူးပြောင်းလာသူတစ်ဦးဖြစ်၍ သူတို့၏ တွေးခေါ်ပုံနည်းလမ်းများက အမြဲတမ်း အနည်းငယ်ပို၍ ပြောင်းလဲလွယ်သည်။ ထို့အပြင် သူမက အမျိုးသမီး လုပ်ကြံသတ်ဖြတ်သူလည်း ဖြစ်သည်။ အမျိုးသမီးတိုင်းကို အထင်ကြီးပြီး ချောမောလှပသည့် မိန်းကလေးများကို သဘောကျခြင်းက ဆိုးရွားသည့်အရာမဟုတ်ပေ။

ရွှယ်လင် အလွန်အမင်းစက်ဆုပ်ဖွယ်ကောင်းစွာ ရယ်မောလိုက်သည်။

"ဘာလဲ..."

အကူစနစ်လေးက ပါးစပ်ပိတ်ရန် ရွေးချယ်ကာ အွန်လိုင်းမဟုတ်တော့ဟန်ဆောင်လိုက်သည်။

သူတို့နှစ်ယောက်က ဧကရီ သူတို့အား အထဲသို့ ဆင့်ခေါ်လာသည့်အချိန်အထိ စောင့်နေခဲ့ကြသည်။ ဝမ်ရမ်ယင်းယွဲ့၏အဆင့်အတန်းက မမြင့်မားသောကြောင့် ရွှယ်လင်အား အတွင်းထဲမှ တိုက်ရိုက်ကြိုဆိုနေဧည့်ခံနေချိန်တွင် အပြင်တွင် သူမ အချိန်အတော်ကြာအောင် စောင့်ဆိုင်းနေခဲ့ရသည်။ ရွှယ်လင် ထွက်မသွားမီအထိ သူမ၏အမူအရာက တွန့်ဆုတ်မှုများနှင့် ပြည့်နေကာ သူ့နောက်သို့ စိုက်ကြည့်နေသော ထိုအမျိုးသမီး၏အကြည့်များကို သူ ခံစားမိသည်။

ရွှယ်လင်၏ ပါးစပ်ထောင့်က ရုတ်တရက် တွန့်ကွေးသွားပြီး အကူစနစ်အား မေးလိုက်သည်။

"သူ့ရဲ့ခေါင်းပေါ်မှာရှိတဲ့ အများအပြား ဆွဲဆောင်နိုင်တဲ့ အရှိန်အဝါကို မင်း ဖယ်ပစ်နိုင်လား..."

အကူစနစ်လေး ခေါင်းညိတ်ပြီး ပြောလိုက်သည်။

"host ရဲ့ လက်ရှိ စွမ်းရည်ပေါ် မူတည်ပြီး ဘာပြဿနာမှ မရှိဘူး...ဒါပေမယ့် အဲဒါကို host ဘာလုပ်ပစ်ချင်လဲ...host ကိုယ်တိုင် သုံးချင်လား..."

ရွှယ်လင် လှောင်ပြောင်ရယ်မောလိုက်သည်။

"မင်း နောက်နေတာလား... ငါက မြေခွေးဝိညာဉ်လေ။ မြေခွေးတစ်ကောင်က လှည့်စားနိုင်တဲ့ အရည်အချင်းရှိတယ်ဆိုတဲ့ အဓိပ္ပါယ်ကိုရော မင်း နားလည်လား..."

အကူစနစ်: "အာ..."

"ရှေးခေတ်ကတည်းက မြေခွေးဝိညာဥ်ကို ဘယ်သူကမှ သဘောမကျခဲ့ကြဘူး..."

ဆွဲဆောင်မှုရှိခြင်းက သူတို့၏ အရိုးများထဲတွင် အမြစ်တွယ်နေကာ သူတို့၏ ရိုးတွင်းခြင်ဆီထဲအထိ နက်ရှိုင်းသော အရာတစ်ခုဖြစ်သည်။ သူတို့ အသုံးမပြုလျှင်ပင် သူတို့၏လှုပ်ရှားမှုတိုင်းတွင် ထိုဆွဲဆောင်မှုက ပေါ်လွင်နေမည်ဖြစ်သည်။ ယခင်ကမ္ဘာများတွင် ရွှယ်လင်၏ စိတ်ဝိညာဉ်က မတည်မငြိမ်ဖြစ်နေပြီး ပုံဖော်ရန်ပင် ခက်ခဲသောကြောင့် သူ၏ဆွဲဆောင်မှုက ပြဇာတ်တွင် မပါဝင်နိုင်ခဲ့ပေ။ ယခု သူ အမြီးနှစ်ချောင်းကို ပြန်ယူနိုင်ခဲ့ပြီး ဤအမြီးနှစ်ချောင်းအပေါ် သူ၏ထိန်းချုပ်မှုက မသန်မာကြောင်း ထည့်သွင်းစဉ်းစားကြည့်လျှင် သူ၏လှုပ်ရှားမှုတိုင်းနှင့် လုပ်ဆောင်ချက်တိုင်းတွင် ဆွဲဆောင်မှုအနည်းငယ် ပေါ်ထွက်လာမည်မှာ မလွဲမသွေပင်။

၎င်းက အများအပြား ဆွဲဆောင်နိုင်သည့် အရှိန်အဝါထက် များစွာထိရောက်ပြီး အသုံးဝင်ပေသည်။

ဧကရီက ရွှယ်လင်ကို အလွန်နှစ်သက်သည်။ သူမ ရွှယ်လင်ကို တွေ့သောအခါ ရွှယ်လင့်အတွက် မုန့်မျိုးစုံပြင်ဆင်ပေးရန် လူများကိုမတောင်းဆိုမီ သူမ ဘယ်လိုနေကြောင်းနှင့် ပတ်သက်၍ မေးခွန်းများစွာကို ဦးစွာမေးမြန်းလာခဲ့သည်။ ထို့နောက် သူမနှင့် ကျန့်ရှောက်ရှီး၏ ဆက်ဆံရေးအကြောင်း မေးကာ စိတ်မသက်မသာခံစားရလျှင် အိပ်ယာပေါ်၌ ငြင်းဆိုရန်သင်ယူသင့်ကြောင်း ရွှယ်လင်၏မျက်နှာပေါ်တွင် ရှက်သွေးဖြာလာသည်အထိ အကြံပြုပြောဆိုခဲ့ပြီး နောက်ဆုံးတွင် သူမအား သွားခွင့်ပြုခဲ့သည်။

နံနက်ခင်းညီလာခံအပြီးတွင် ဧကရာဇ်မင်းက ရွှယ်လင်အား ဆင့်ခေါ်ခဲ့သည်။ ထိုအချိန်၌ ရွှယ်လင် အစာစားရာမှ ဗိုက်တစ်ဝက်ပြည့်နေပြီဖြစ်ပြီး ကောင်းကင်ယံသည်လည်း တောက်ပနေပြီဖြစ်သည်။ ရွှယ်လင် ဧကရီနောက်သို့လိုက်သွားပြီး ဧကရာဇ်စာကြည့်ခန်းထဲသို့ ဝင်သွားသည်။ ထို့နောက် မူလကိုယ်ခန္ဓာပိုင်ရှင်၏ အလေ့အထများအတိုင်း အရိုအသေပေးလိုက်သည်။

ဧကရီက ဧကရာဇ်မင်းအား - အိမ်ထောင်ပြုပြီးနောက် သူ့ညီမတော်၏ စိတ်နေစိတ်ထား တိုးတက်လာကြောင်း၊ ခေါင်းငုံ့ထားရသည်ကို မကြိုက်တော့ဘဲ ပို၍ပင် လှပလာကြောင်း ရယ်မောကာပြောဆိုခဲ့သည်။

ဧကရာဇ်သက သူတို့ရှေ့တွင် ဟန်မဆောင်ဘဲ ကျန့်ရှောက်ရှီးအား သဘောတူညီမှု၏ ကောင်းမွန်သောအဆုံးသတ်ကို အမှန်တကယ်ရပြီဖြစ်ကြောင်း ရယ်မောကာ ဆူပူကြိမ်းမောင်းခဲ့သည်။ ကျန့်ရှောက်ရှီးက ရူးကြောင်ကြောင်ဖြင့် မချိသွားဖြဲပြပြီး ပြန်ဖြေလိုက်သည့်အခါ ရွှယ်လင် သူ့ကို တည့်တည့်မကြည့်ဘဲမနေနိုင်ပေ။

ဤကမ္ဘာရှိလူတိုင်းက ပုံမှန်ကဲ့သို့ ကိုယ့်ကိုယ်ကိုယ် ဖိနှိပ်ထားရသည်ကို နှစ်သက်ဆဲဖြစ်သော်လည်း ချစ်ခင်နှစ်သက်ကြောင်း ဖော်ပြသည့်စွမ်းရည်အဖြစ် နားမလည်နိုင်စွာ ပြောင်းလဲသွားခဲ့သည်။ ရွှယ်လင် သူနှင့် ပူးပေါင်းဆောင်ရွက်ခြင်းမရှိသော်လည်း ၎င်းကို အခြားသူများရှေ့တွင် အမြဲတစေပြသနိုင်ခဲ့သည်။

သူတို့ နန်းတော်ထဲတွင် တစ်မနက်လုံး နေခဲ့ကြပြီး နေ့လည်စာမစားမီ ထွက်လာခဲ့ကြသည်။ ရွှယ်လင် စိတ်သက်သာရာရစွာ သက်ပြင်းချလိုက်ပြီး အကူစနစ်လေးပြောသည်က မှန်ကန်ကြောင်း ခံစားလိုက်ရသည်။ ဧကရာဇ်မင်းထံ ပြန်လာရသောအခါ အလုံးစုံ ကိုယ့်ကိုယ်ကို ထိန်းချုပ်ထားရသည့် နန်းတော်ကဲ့သို့ ပတ်ဝန်းကျင်က သူ့အတွက် အမှန်တကယ်ပင် မသင့်လျော်ပေ။

ငါက ငါ့ပိုင်နက်နယ်မြေထဲမှာပဲ နေချင်ခဲ့တာ...

ဘုရင်အဖြစ်နဲ့ပေါ့...

🦊🦊🦊

Prev Next