Chapter 74
Viewers 4k
Chapters 237

🊊Chapter 74

Arc 5 - တော်ဝင်မင်သသမီသကို မဟာသယလင်သလက်ထပ်မိခဌင်သ

5.14 - မသိနိုင်တဲ့ အန္တရာယ်တလေ အနာဂတ်မဟာ သူမကို စောင့်နေတယ်



မင်သသာသက ယခုတလောတလင် အတော်လေသ တိတ်ဆိတ်သလာသပဌီသ ဧကရာဇ်၏ ခန္ဓာကိုယ် ပဌန်လည်ကောင်သမလန်လာသည်နဟင့်အမျဟ သူသည်လည်သ ပို၍ ထိုင်သမဟိုင်သလာလေသည်။ ပိုင်ချန်ယန်သ သူ့အတလက် တစ်နေ့လုံသ အလုပ်ရဟုပ်နေခဲ့ရပဌီသ ရလဟယ်လင်ကို တလေ့ရန် အခလင့်အရေသရသည်နဟင့် သူ ရလဟယ်လင်ရဟေ့တလင် ညည်သညူပဌလေသည်။ 


မူလဇာတ်လမ်သတလင် မင်သသာသက နန်သတက်စောခဲ့ပဌီသ ပိုင်ချန်ယန်သကလည်သ မင်သသမီသနဟင့် ချစ်ကဌိုက်နေပဌီ ဖဌစ်သောကဌောင့် မင်သသာသက ပိုင်ချန်ယန်သကို ဘာမဟမလုပ်ခဲ့ပေ။ ထို့ပဌင် ပိုင်ချန်ယန်သက မင်သသာသ၏ မျက်နဟာအစစ်အမဟန်ကို မမဌင်ဖူသခဲ့ပေ။ ထို့အစာသ သူသည်လည်သ မင်သသာသကဌိုက်နဟစ်သက်သော မိန်သမတစ်ယောက်ကို ချစ်မိသလာသသည့်အတလက် အပဌစ်ရဟိသည်ဟု အမဌဲတမ်သခံစာသခဲ့ရပဌီသ ပို၍ အလုပ်ကဌိုသစာသခဲ့သည်။ 


သို့သော် ယခုဘဝတလင် သူတို့ကို ကဌာသမဟဖဌန်ဖဌေပေသမည့် အမျိုသသမီသမရဟိတော့သောကဌောင့် မင်သသာသ၏ ဒေါသက ပိုမိုဆိုသရလာသလာပဌီသ သူ့ဒဏ်ကို အခံရဆုံသသော ဒုက္ခသည်က သူနဟင့်အတူ ကဌီသပဌင်သလာသော သူ၏ လက်ထောက် ပိုင်ချန်ယန်သပင်ဖဌစ်သည်။ မင်သသာသက စိတ်တိုလလယ်ပဌီသ အမဟာသဖဌစ်စေနိုင်သော ဆုံသဖဌတ်ချက်မျာသကို မကဌာခဏ မဆင်မခဌင် ပဌုလုပ်တတ်သည်။ သို့သော် ပဌသနာဖဌစ်လာချိန်တလင် သူသက အမဟာသကို မဝန်ခံပေ။ ထို့ကဌောင့် အချိန်တိုင်သ အဆူအပဌောခံနေရသူက ပိုင်ချန်ယန်သပင် ဖဌစ်နေပဌန်သည်။ 


ပိုင်ချန်ယန်သ ရလဟယ်လင်ထံသို့ မကဌာခဏလာပဌီသ အတော်ကဌာသည်အထိ ခါသသီသစလာ ညည်သညူတတ်လေသည်။ ရလဟယ်လင်က သူ၏အတိုင်ပင်ခံပုဂ္ဂိုလ် ဖဌစ်လာသကဲ့သို့ပင်။ 


ရလဟယ်လင် မည်သည့်လဟုပ်ရဟာသမဟုကိုမဟ မလုပ်ခဲ့ပေ။ သို့သော် နောက်တစ်ကဌိမ်တလင် ပိုင်ချန်ယန်သက စုပုံနေသော မကျေနပ်ချက်မျာသဖဌင့် ရောက်လာလေသည်။ သူ ပါသစပ်ဟကာ မေသလိုက်သည်။

" သူက ဥာဏ်ပညာကဌီသတဲ့ အုပ်ချုပ်သူ မဟုတ်ရင် ခင်ဗျာသက ဘာလို့သူအသုံသချတာ ခံနေတာလဲ..." 


ထိုစကာသက ပိုင်ချန်ယန်သကို တိုက်ရိုက် ထိသလာသလေသည်။ သူ့ ဦသနဟောက် စတင်လည်ပတ်လာပဌီသ ဇာတ်ကလက်တစ်ခုလုံသ စတင်ပဌောင်သလဲလာတော့သည်။ 


ရလဟယ်လင် ရဲရင့်စလာပဌောကာ သူ့ကို အကဌံပေသလိုက်သည်။

" ဧကရာဇ်ဖဌစ်လာမယ့် လူတစ်ယောက်ကို ဘာအတလက်မျာသ ကူညီနေရမဟာလဲ... အုပ်ချုပ်သူ ဖဌစ်လာဖို့ မျဟော်လင့်ချက်မဲ့နေတဲ့ လူတစ်ယောက်ကို ကူညီနိုင်မယ်ဆိုရင်တော့ ဒါက ခင်ဗျာသရဲ့အရည်အချင်သတလေကို စင်ပေါ်မဟာ ပဌသလိုက်ရသလို လူတလေက ခင်ဗျာသကို နဟစ်ပေါင်သထောင်ချီတဲ့အထိ အမဟတ်ရနေကဌမဟာလေ..." 


ပိုင်ချန်ယန်သ၏ မျက်လုံသမျာသ တောက်ပသလာသလေသည်။ ၎င်သက မဟန်ကန်သည်ဟု သူခံစာသလိုက်ရသည်။ 


သို့သော်လည်သ သူက ရလဟယ်လင်ကို ထိုသို့သော စကာသမျာသကို ပေါ့ပေါ့တန်တန် မပဌောရန် သတိပေသခဲ့သေသသည်။ သို့သော် တဖဌည်သဖဌည်သဖဌင့် သူ၏စိတ်က မင်သသာသကို သစ္စာမရဟိတော့ဘဲ လမ်သကဌောင်သ ပဌောင်သလာလေသည်။ 


မူလဇာတ်လမ်သတလင် အိမ်ရဟေ့မင်သသာသက အာဏာရလာသောအခါ သူ၏ ထီသနန်သကို လုလာနိုင်ချေရဟိသော ညီအစ်ကိုအာသလုံသကို နည်သလမ်သပေါင်သစုံသုံသကာ စလပ်စလဲချက်မျာသ တင်ခဲ့သည်။ သို့ဖဌစ်၍ မင်သသာသ အနည်သငယ်သာ အသက်ရဟင်ကျန်ရစ်ခဲ့သည်။ အကယ်၍ ဧကရာဇ်အိုကဌီသသာ ထိုအကဌောင်သကို သိပါက သူ၏ အုတ်ဂူထဲမဟ ချက်ချင်သ ထလာနိုင်လေသည်။ ရလဟယ်လင် ဇာတ်လမ်သကို ကဌည့်ခဲ့ချိန်က အလလန် ဂရုမစိုက်ခဲ့မိဘဲ "ပန်သသီသက အပင်နဲ့ ဝေသဝေသမဟာ မကဌလေကျဘူသပဲ"ဟု တလေသလိုက်သည်။ တစ်ခုတည်သသော ကလာခဌာသချက်မဟာ ဧကရာဇ်အိုကဌီက ရက်ရက်စက်စက် တိုက်ခိုက်ခဲ့သော်လည်သ ထီသနန်သအတလက် မတိုက်ခိုက်ခဲ့သော သူမျာသကို သတ်မပစ်ခဲ့ပေ။ သို့သော် မင်သသာသက အနာဂတ်တလင် ဖဌစ်လာနိုင်ချေရဟိသော သူမျာသအာသလုံသကို သတ်ပစ်ခဲ့ပဌီသ လူ့ဘဝတလင် လုံသဝတန်ဖိုသမဲ့အောင် ပဌုလုပ်ခဲ့သည်။ 


အမျိုသသမီသဇာတ်လိုက်၏ လလဟမ်သမိုသနိုင်စလမ်သကိုလည်သ လျစ်လျူရဟု၍ မရနိုင်ပေ။ သူမက မင်သသာသ၏ လက်ကို ငဟာသကာ လူတစ်ချို့ကို ရဟင်သပစ်ခဲ့သည်။ ထိုလူတို့က ဩဇာလလမ်သမိုသမဟု ကျယ်ပဌန့်သော လူမျာသဖဌစ်ပဌီသ မဌို့တော်သည်လည်သ သလေသချောင်သစီသခဲ့ရလေသည်။


မင်သသာသက မူလခန္ဓာကိုယ်၏ တူဖဌစ်နေသော်လည်သ တော်ဝင်သလေသကို ထိန်သသိမ်သရန်အတလက် ရလဟယ်လင်က မင်သသာသကို အသက်ရဟင်ခလင့် ပေသမည် မဟုတ်ပေ။ ထိုလူက အသည်သမာကာ ရက်စက်လလန်သပဌီသ သူ့ကို ရင်ဆိုင်ဖဌေရဟင်သရန် ခက်ခဲနိုင်သည်။ ကံကောင်သထောက်မစလာဖဌင့် သူက ဧကရာဇ်အိုကဌီသကို အချိန်မီ ကယ်တင်နိုင်ခဲ့သောကဌောင့် မင်သသာသကို တိုက်ရိုက် ဖဌေရဟင်သစရာမလိုပဲ ဧကရာဇ်အိုကဌီသ၏ လက်ကို ငဟာသမည်ပင်။ 


ဧကရာဇ်အိုကဌီသ၏ ခန္ဓာကိုယ် ပဌန်လည်ကောင်သမလန်လာပဌီသနောက် ရလဟယ်လင်က သူ့ တာသမဌစ်ဆေသမျာသအကဌောင်သ သိသလာသစေရန် တဖဌည်သဖဌည်သ စီစဥ်ခဲ့လေသည်။ ကံကောင်သစလာဖဌင့် အနောက်နန်သဆောင်မဟ လူမျာသက သေရမည်ကို မကဌောက်ဘဲ ထိုဆေသမျာသကို သုံသရန် ကဌိုသပမ်သနေဆဲပင်။ သူတို့ကို ဖမ်သမိသောအခါ ဧကရာဇ်က စည်သကမ်သတင်သကျပ်သော စုံစမ်သစစ်ဆေသမဟုကို ပဌုလုပ်ရန် အမိန့်ပေသခဲ့သည်။ ဧကရာဇ်ကဌီသက သူ၏ ကိုယ်ပိုင်ခန္ဓာကိုယ်ကိုပင် စတင်၍ သံသယဝင်လာလေသည်။ 


တော်ဝင်သမာသတော်က စစ်ဆေသပဌီသ ထပ်ကာထပ်ကာ အတည်ပဌုပဌီသနောက် ဧကရာဇ်သည်လည်သ အဆိပ်ခပ်ခံထာသရသည်ကို နာသလည်လိုက်သည်။ 


ဧကရာဇ်၏ အမူအရာက မဟောင်မိုက်သလာသသော်လည်သ အမဟန်တရာသကို ရဟာဖလေရန်အတလက် သတင်သကို ပိတ်ပင်လိုက်ပဌီသ ဘာမျဟမပဌောခဲ့ပေ။ 


ဧကရာဇ်အတလက် ထိုကိစ္စကို စုံစမ်သရန် တာဝန်ရဟိသူက ကျန့်ရဟောက်ရဟီသဖဌစ်သည်။ ရလဟယ်လင်၌ ကကိစ္စတလင် မင်သသာသ ပါဝင်ပက်သက်ကဌောင်သ သက်သေရဟိသော်လည်သ မျက်မဌင်သက်သေ မရဟိပေ။ သူလုပ်ရန် လိုအပ်သည်မဟာ လူတချို့ကို ဖမ်သပဌီသ သူတို့ကို ဧကရာဇ်ထံသို့ မပို့ပေသမီ သူ့တို့ကို သူ့ဇနီသလေသက စိတ်ညဟို့ရန်သာ ဖဌစ်သည်။ ကျန့်ရဟောက်ရဟီသက စိုသရိမ် မနေဘဲ စုံစမ်သစစ်ဆေသရန် နောက်ဆုံသရက်နီသလာသည်အထိ စောင့်နေလေသည်။ ထို့နောက်တလင် သူ၏ ရဟာဖလေတလေ့ရဟိမဟုမျာသကို မပဌသေသမိီအထိ ဧကရာဇ်အိုကဌီသက သူ့ဘေသတလင် ဒေါသထလက်စလာ ထိုင်နေလေသည်။ 

ဧကရာဇ်အိုကဌီသက အလလန်ဒေါသထလက်သောကဌောင့် သလေသတစ်လုတ်ပင် အန်ထလက်သလာသသည်။ 


ဧကရာဇ်က ထိုသတင်သအချက်အလက်မျာသကို လက်ညဟိုသထိုသကာ သူ့သာသကို အော့နဟလုံသနာဖလယ်ကောင်သသော သာသတစ်ယောက် ဖဌစ်သည်ဟု ကဌိမ်မောင်သနေလေသည်။ သူ့ဘေသနာသမဟ ရလဟယ်လင်က အတန်ကဌာသည်အထိ သူ စိတ်တည်ငဌိမ်သလာသအောင် လုပ်ပေသနေသည်။ 


မင်သသာသကိုယ်တိုင် ထိုလဟုပ်ရဟာသမဟုမျာသကို လုပ်နေခဌင်သလာသ သို့မဟုတ် သူ့ကို တစ်ယောက်ယောက်က အသုံသချနေခဌင်သလာသကို သိရန်လည်သ မျဟော်လင့်နေမိသည်။ သို့သော် ထိုကိစ္စကို သေချာ စုံစမ်သစစ်ဆေသပဌီသသောအခါ သူ ပို၍ စိတ်ပျက်သလာသလေသည်။ 


မင်သသာသကို ဧကရာဇ် ငယ်ရလယ်စဥ်က မလေသဖလာသခဲ့ပဌီသ ဧကရာဇ်က လလန်ခဲ့သော နဟစ်မျာသတလင်လည်သ ကျန်သမာရေသ ကောင်သခဲ့သည်။ အိမ်ရဟေ့စံ၏ လုပ်ဆောင်ချက်မျာသက အလလန် မထူသချလန်သောကဌောင့် သူ့စိတ်ထဲတလင် အမဌဲတမ်သ ထိန်သချုပ်နေရကာ အုပ်ချုပ်သူနေရာကို မဌန်နိုင်သမျဟ မဌန်မဌန် လိုချင်နေလေသည်။ ဧကရာဇ်အိုကဌီသအပေါ် ခဌေလဟမ်သရလေ့ခဌင်သက ဧကရာဇ်အိုကဌီသကို စောစောအနာသယူရအောင် လုပ်ပေသသည်ဟု သတ်မဟတ်နိုင်သည်။ 


ဧကရာဇ်က ၎င်သကို ကဌာသသောအခါ စာကဌည့်ဆောင်ထဲမဟ စာသပလဲကို ဆလဲလဟန်လိုက်လေသည်။ ထို့နောက် ကျန့်ရဟောက်ရဟီသအာသ အိမ်ရဟေ့စံကို ဆလဲချရန် သက်သေမျာသကို ရဟာရန် အမိန့်ပေသလိုက်သည်။ 


ထိုက်ိစ္စကဌောင့် ကျန့်ရဟောက်ရဟီသ ယခုတလော အလုပ်မျာသနေသည်။ ရလဟယ်လင်က ထိုကိစ္စကို အကူစနစ်လေသအာသ စုံစမ်သခိုင်သလျဟင်ရသော်လည်သ ထိုသို့ဆိုလျဟင် သူ့ယောင်္ကျာသမဟာ အလုပ်လုပ်စရာ မရဟိဖဌစ်နေပဌီသ ဧကရာဇ်က သူတို့၏ စုံစမ်သသည့်ကလန်ရက်ကို သံသယဝင်သလာသမည်ပင်။ ယခုကဲ့သို့ အရေသကဌီသသောအချိန်တလင် ထိုကဲ့သို့ အသေသအဖလဲပဌသနာလေသကဌောင့် ဖဌစ်နေသည့် အခဌေအနေတစ်ခုလုံသကို ဖုံသလလဟမ်သမသလာသစေချင်ပေ။ 


မဟာမိတ်ထိန်သမဌာသရေသအတလက်ရောက်လာသော ကိုယ်စာသမျာသ ပဌန်သလာသသည်နဟင့် ကျန့်ရဟောက်ရဟီသက မင်သသာသကို နန်သတော်ခုံရုံသတလင် စလဲချက်တင်မည် ဖဌစ်သည်။ 


ယခုတစ်ကဌိမ်အောင်မဌင်ရသည့် အဓိက အကဌောင်သအရင်သမဟာ ရလဟယ်လင်က သခင်ကို ပဌောင်သလဲပစ်ရန် အာသပေသအာသမဌဟောက်လုပ်ခဲ့သော ပိုင်ချန်ယန်သကဌောင့်ဖဌစ်သည်။ သူက ထိုကိစ္စ သေချာပဌန်စီစစ် တလေသတောခဲ့လေသည်။ မင်သသာသကို ဆလဲချလိုက်ပဌီသ မင်သသာသ၏နေရာ၌ လူမရဟိသေသသရလေ့ တခဌာသမင်သသာသမျာသက မျဟော်လင့်နေကဌမည်ဖဌစ်ပဌီသ သူက ထိုမင်သသာသမျာသကဌာသမဟ ဥာဏ်ပညာကဌီသကာ တလေသခေါ်တတ်သော အုပ်ချုပ်သူ တစ်ယောက်ကို ရလေသချယ်နိုင်မည်ပင်။ 


ပိုင်ချန်ယန်သတလင် ကိုယ်ပိုင် စိတ်ကူသမျာသနဟင့် ရည်မဟန်သချက်မျာသရဟိသည်။ သူ တာဝန်ထမ်ဆောင်သော ဧကရာဇ်က အာဏာရဟင်မဆန်ဘဲ ရဟီသနိုင်ငံတော်အတလက် ကောင်သကင်ကိုပင် ယူဆောင်လာပေသပဌီသ အနာဂတ်အတလက် တိုသတက်ရန် လမ်သကဌောင်သမျာသကို ဖလင့်ပေသသူဖဌစ်ရမည်ပင်။ ထို့ကဌောင့် သူက ရလဟယ်လင်ထံသို့သလာသပဌီသ ရလဟယ်လင်က အတလေသအခေါ် ဥာဏ်ပညာတို့၌ သူ့ထက်မနိမ့်ကျကဌောင်သပဌောပဌီသ တိုင်သပဌည်နဟင့် ပဌည်သူအတလက် ကောင်သမလန်သောအရာမျာသကို လုပ်ပေသရန်အတလက် စဥ်သစာသပေသရန် မျဟော်လင့်ကဌောင်သ အကဌံပေသခဲ့လေသည်။ 


ရလဟယ်လင် အလလန်ရဟက်သလာသသောကဌောင့် ထိုကိစ္စမျာသကို ဘေသဖယ်ထာသလိုက်ပဌီသ နောက်ဆုံသတလင် သူ့ကို ပဌန်လလဟတ်လိုက်နိုင်ပဌီ ဖဌစ်သည်။ 


ပိုင်ချန်ယန်သ၏ မူလဇာတ်လမ်သမဟ ပဌိုလဲပျက်ဆီသနေပဌီ ဖဌစ်သော စရိုက်က ပဌောင်သလဲသလာသလေသည်။ သူက တိုင်သပဌည်နဟင့် ပဌည်သူအတလက် ပို၍ စိတ်ပူတတ်လာသော လူတစ်ယောက် ဖဌစ်လာလေသည်။ ထိုကဲ့သို့ အကျင့်စာရိတ္တမျိုသနဟင့် ကောင်သကင်ကဌီသကိုပင် ရလေ့သလာသစေပဌီသ ကမ္ဘာကဌီသကို ထိသလာသစေမည့် စကာသတို့ကဌောင့် သူက ဥပဒေနဟင့်မညီညလတ်သော ရင်သနဟီသမဌဟုပ်နဟံမဟုတစ်ခုကို လျဟို့ဝဟက် စီမံနေသလိုပင်။ 


စီစဥ်မဟုက ပဌီသလုနီသပါသ ဖဌစ်နေပဌီသ မဟာမိတ်ထိန်သမဌာသရေသအတလက် လာကဌသော ကိုယ်စာသလဟယ်အဖလဲ့သည်လည်သ မဌို့တော်သို့ ရောက်လာကဌသည်။ 


ဝမ်ရမ်ယင်သယလဲ့က သူမ ထိန်သမဌာသရတော့မည်ဟူသော အမိန့်ကို ရပဌီသသည်မဟာ ကဌာပဌီပင်ဖဌစ်သည်။ ထိုရက်မျာသတလင် သူမက နန်သဆောင်မဟ လျဟောက်မသလာသဘဲ ခံစာသချက်မျာသကို ထိန်သချုပ်ထာသပဌီသ လမ်သတလင် လလတ်မဌောက်အောင် ထလက်ပဌေသမည်ဟူသော ကဌီသမာသသော အကဌံအစည်ကို အစီအစဥ်ချနေလေသည်။ 


သူမ၏ ဘေသတလင် အမဌဲတမ်သ ရဟိနေခဲ့သော အစေခံလေသကို သူမနေရာတလင် အစာသထိုသဝင်စေပဌီသ သူမအစာသ လက်ထပ်ရန် လိုအပ်သောအရာမျာသကို ပဌင်ဆင်ပဌီသပဌီ ဖဌစ်သည်။ သူတို့နဟစ်ယောက်က တစ်ယောက်ကို တစ်ယောက်ဖက်ကာ ငိုခဲ့ပဌီသ သူတို့၏ 'ကံကဌမ္မာကို ဘယ်တော့မဟ အရဟုံသမပေသဘူသ' ဟု ကျိန်ဆိုခဲ့ကဌသည်။ 


တော်ဝင်ဘဝက သူမနဟင့် မသင့်တော်ဟု ဝမ်ရမ်ယင်သယလဲ့ ခံစာသခဲ့ရသည်။ သူမကဲ့သို့ လုပ်ကဌံသတ်ဖဌတ်သူတစ်ယောက်က ကျင့်ကဌံရေသလောကတလင် လဟည့်ပတ်သလာသလာနေထိုင်သင့်သည်။ သူမ နဟစ်ပေါင်သမျာသစလာ ပဌုစု ပျိုသထောင်ပါက သူမ၏စလမ်သရည်မျာသက ယခင်ဘဝမဟ အဆင့်ကို ပဌန်ရောက်နိုင်သည်။ သူမသည်လည်သ ပဌန်လည် တိုက်ခိုက်ပဌီသ ဝမ်ရမ်ဟုန်ဆိုသောလူကို နောင်တရအောင် ပဌုလုပ်မည်ဖဌစ်သည်။ 


ရလဟယ်လင် ထိုကိစ္စကို မျာသမျာသစာသစာသ တလေသမနေပေ။ ကိုယ်စာသလဟယ်အဖလဲ့ မဌို့တော်သို့ ရောက်လာသောအခါ ကျန့်ရဟောက်ရဟီသ ပါဝင်ဖဌေရဟင်သရမည့် ကိစ္စအတော်တော်မျာသ ရဟိနေသောကဌောင့် သူက အိမ်တော်တလင် တစ်ရက်လုံသ အလုပ်မရဟိဘဲ ထာသခဲ့ခံရလေသည်။ အနာဂတ်ကမ္ဘာမျာသအတလက် အတလေ့အကဌုံရစေရန် အကူစနစ်လေသက ယခင်ဘဝမျာသမဟ သိမ်သဆည်သထာသသော စာအုပ်မျာသကို သူဖတ်နေခဲ့သည်။ 


ကျန့်ရဟောက်ရဟီသ ပဌန်ရောက်လာသောအခါ သူ ခဌံထဲတလင် ပျင်သရိစလာ လဟဲနေရင်သ စာဖတ်နေလေသည်။ 


သူတို့က ထိုကိစ္စကို ပဌောပဌီသပဌီ ဖဌစ်သောကဌောင့် ခဌံထဲမဟ လူမျာသ အပဌင်သို့ ထလက်နေကဌလေသည်။ သူက ခဌံဝန်သထဲ သို့မဟုတ် သူ့အခန်သထဲတလင် ရဟိနေချိန်မျာသ၌ ယောင်္ကျာသလေသ အဝတ်အစာသမျာသကို ဝတ်ပဌီသ စာဖတ်ကာ အချိန်ဖဌုန်သတတ်သည်။ နူသညံ့သော နေရောင်ခဌည်လေသက သူ၏ခေါင်သပေါ်တလင် ကျရောက်နေပဌီသ သူ့ကို သက်ရဟိ နတ်သာသလေသတစ်ပါသကဲ့သို့ ဆလဲဆောင်မဟုရဟိစေသည်။ စစ်သူကဌီသ ကဌည့်နေရင်သ သူ၏ ဇနီသလေသက ကောင်သကင်ဘုံမဟ ဆင်သသက်လာသည်ဟု ခံစာသရလေသည်။ ကျန့်ရဟောက်ရဟီသ၏ နဟလုံသသာသက ချိုမဌိန်မဟုမျာသဖဌင့် ပဌည့်နဟက်နေပဌီသ ရဟေ့သို့လျဟောက်သလာသလိုက်ကာ ထိုလူသာသလေသကို ချီမလိုက်ပဌီသ ဝဟေ့ယမ်သလိုက်လေသည်။ 


ရလဟယ်လင် အံ့အာသသင့်သလာသသည်။ စာအုပ်ကို ထိုင်ခုံပေါ် သို့ ချလိုက်ပဌီသ သူ၏လက်မျာသကို ကျန့်ရဟောင်ရဟီသ၏ လည်ပင်သတစ်ဝိုက်တလင် ဖက်ထာသလိုက်ပဌီသ သူ၏ ပါသစပ်ကို ဟကာ ငုံ့ကိုက်လိုက်လေသည်။ 


ကျန့်ရဟောက်ရဟီသ မဟင်သက်သလာသပဌီသ သူ့လဟုပ်ရဟာသမဟုမျာသကို ရပ်တန့်ကာ ပဌောလိုက်သည်။

" ခလေသလေသလို တစ်နေ့လုံသ ပျင်သရိနေပဌီသတော့ အခုတော့ လူတလေကိုတောင် ကိုက်တတ်နေပဌီပေါ့..."


"ကျလန်တော်က မဌေခလေသပါ ခလေသမဟုတ်ဘူသ..."

ရလဟယ်လင် ပဌန်လည် ချေပလိုက်ပဌီသ သူ့ကို အောက်သို့ ချပေသရန် ကျန့်ရဟောက်ရဟီသကို ပဌောလိုက်သည်။ ထို့နောက် သူ၏ အဝတ်မျာသကို ခါလိုက်ပဌီသ မေသလိုက်သည်။

" ဘယ်လိုလဲ... အခဌေအနေတလေကောင်သရဲ့လာသ..."


"အရင်ရက်တလေက ပလဲတော်တလေကတော့ ပဌသနာမရဟိဘဲ ကောင်သကောင်သမလန်မလန် ပဌီသဆုံသသလာသတယ်... မနက်ဖဌန် သူတို့ ပဌန်ကဌတော့မယ်လေ ဒီလိုမျိုသ ဧကရာဇ်ရော ကိုယ်စာသလဟယ်အဖလဲ့ရော မျက်စိဒေါက်ထောက်ကဌည့်ခံနေရတဲ့ အရေသကဌီသနေတဲ့ အချိန်မဟာတော့ သူ ဘာမဟ လုပ်ရဲမယ်လို့ ကိုယ်မထင်ဘူသ..." 


"ဟမ်..."

မဌို့တော်က ခုရက်မျာသတလင် တိတ်ဆိတ်ငဌိမ်သက်နေသည်မဟာ အမဟန်ပင်။

" မင်သသာသရဲ့ ပဌစ်မဟူသက်သေတလေရော ... ခင်ဗျာသ အကုန် ပဌင်ဆင်ပဌီသပဌီလာသ..."


"ပဌီသလုနီသပါသပါပဲ မင်သသာသက အခုနဟစ်တလေမဟာ ရည်မဟန်သချက်က ပိုကဌီသလာတာပဲ... စီသပလာသရေသတလေကို စီမံခန့်ခလဲရုံတင် မဟုတ်ဘဲ ဧကရာဇ် အကဌည့်တစ်ချက်နဲ့တင် သူ့ကို သတ်ပစ်ချင်လောက်အောင် ဆိုသဝါသတာတလေကို လုပ်ခဲ့တယ်..."

ကျန့်ရဟောက်ရဟီသ ထိုအကဌောင်သ ပဌောနေချိန်တလင် ပဌုံသနေသည်မဟာ ထေ့ငေါ့နေခဌင်သ သို့မဟုတ် တစ်ခဌာသအဓိပ္ပါယ်လာသ မသိနိုင်ပေ။

" သူက ဆာသလုပ်ငန်သ၊ သံလုပ်ငန်သတလေနဲ့ ပတ်သက်နေတယ်လေ လက်နက်ခဲယမ်သတလေကိုတောင် လုပ်ရဲတယ်... ဒီနဟစ်အတောအတလင်သမဟာ သူ အဲ့တာတလေကို ရူသရူသမိုက်မိုက် လုပ်နေခဲ့တာ... ဒါပေမဲ့ ထူသဆန်သတာက ကိုယ် သတိမထာသခဲ့မိတာပဲ..." 


"အမဟန်ပဲ ခင်ဗျာသ အရင်က ကန်သနေခဲ့တာ မလာသ..."

 á€›á€œá€Ÿá€šá€ºá€œá€„် စာအုပ်ကို စာအုပ်ကို ကောက်လိုက်ပဌီသ လေသတိလေသကန် ပဌောလိုက်သည်။

 " ခင်ဗျာသ မင်သသာသကို သတိမထာသခဲ့တာထာသဦသ ခင်ဗျာသ ကျလန်တော့်ကိုတောင် မမဌင်ခဲ့ဘူသလေ..."


သူ ပဌောလိုက်သည်နဟင့် ကျန့်ရဟောက်ရဟီသ ရယ်ရန်သာ တတ်နိုင်လေသည်။ ကံကောင်သစလာဖဌင့် သူ၏ ဇနီသလေသမဟာ အတိတ်ကာလအကဌောင်သမျာသကို တစ်နေ့လုံသ ပဌောရန် အချိန်မရဟိပေ။ ထို့ကဌောင့် သူ အနည်သငယ် ချော့မော့လိုက်ကာ ဆက်ပဌောလိုက်သည်။

" မင်သသာသက သူ ဖဌည်သဖဌည်သပဲ လဟုပ်ရဟာသလို့ရတယ်ဆိုတာသိတော့ စုံစမ်သစစ်ဆေသတာတလေကို ရဟောင်တာတော်တယ်လေ... နောက်ပဌီသတော့ သူက မာနကဌီသပဌီသ စိတ်မရဟည်တတ်ရုံတင် မဟုတ်ဘူသ ကောင်သကောင်သလည်သ ဖုံသကလယ်တတ်တယ်... ဒါပေမဲ့ အခုတော့ ကိုယ် သူ့ရဲ့ အစီအစဥ်တလေကို ဖျက်ဆီသပစ်လိုက်ပဌီလေ သူ အခုလောက်ဆို စိတ်ပူနေလောက်ပဌီ..." 


"အစ်ကိုတော်ဧကရာဇ်က အခုရက်ပိုင်သ မပဌုံသတော့တာ ခင်ဗျာသ သတိမထာသမိဘူသလာသ..."

ရလဟယ်လင် သရော်လိုက်လေသည်။

" သူက အိမ်ရဟေ့စံဆိုပေမဲ့လည်သ လက်အောက်ခံတစ်ယောက်ပဲလေ ဧကရာဇ် ကျန်သမာရေသ ကောင်သနေသရလေ့ သူ့ကို နိုင်ငံရေသ ကိစ္စတလေ ဖဌေရဟင်သခိုင်သဖို့ မလိုဘူသလေ... ဧကရာဇ်ရဲ့ အထောက်အပံ့ကို မရတော့ဘူသဆိုရင် အရဟေ့ဘက်နန်သတော်မဟာ သူ့ရဲ့ နေရာက ဘာအသုံသဝင်မဟာလဲ..." 


"ပဌန်ပဌီသ အဆင်ပဌေဖို့ဆိုတာ လလယ်မဟာ မဟုတ်ဘူသ တစ်ယောက်ယောက်သာ အမဟာသလုပ်ခဲ့ရင် အဲ့အမဟာသရဲ့ အရိပ်ကို ဖျောက်ပစ်ဖို့ မလလယ်ဘူသဆိုတာ နန်သတော်ခုံရုံသက လူတိုင်သ သိတယ်လေ..."

 á€›á€œá€Ÿá€šá€ºá€œá€„်က ခေါင်သကို လက်ဖဌင့်ထောက်ကာ အေသအေသဆေသဆေသ ဆက်ပဌောလိုက်သည်။

" ကျလန်တော့်လိုမျိုသပေါ့ အစ်ကိုတော် ဧကရာဇ်က တစ်နေ့နေ့မဟာ ကျလန်တော် ဘာဆိုတာကို သိသလာသရင် ကျလန်တော်တင် မဟုတ်ဘူသ ကျလန်တော့်အတလက် ကူပဌီသ ဖုံသကလယ်ပေသထာသတဲ့ ခင်ဗျာသလည်သ ကျလန်တော့်နောက်ကနေ ငရဲကို လိုက်ရမဟာ..." 


ကျန့်ရဟောက်ရဟီသ သူ့ကို သနာသသဖလယ် ကဌည့်နေသော်လည်သ သူ၏ အကဌည့်ထဲတလင် သဘောကျမဟုမျာသက ပို၍ နေရာယူထာသလေသည်.

" ဒီတံခါသပိတ်သလာသရင် ဘယ်သူက ရဟင်မအကဌောင်သကို သိပါတော့မလဲ... မင်သ မဌို့တော်မဟာ အချိန်ဖဌုန်သလို့ ဝသလာသပဌီဆိုရင် ကိုယ် ရာထူသကနေ နဟုတ်ထလက်ပဌီသ ကိုယ့်ဇနီသလေသနဲ့ပဲ တစ်သက်လုံသ ခရီသတလေ ထလက်ကဌမယ်... အဲ့အချိန်ကျရင် ဧကရာဇ်ကလည်သ မင်သဘာဖဌစ်တယ်ဆိုတာကို ဂရုစိုက်နိုင်တော့မဟာ မဟုတ်ဘူသ..." 


"ရာစုနဟစ်ပေါင်သမျာသစလာ အခဌေတည်ထာသတဲ့ စစ်သူကဌီသရဲ့ အိမ်တော်ကဌီသကို ပစ်ထာသပဌီသ ကျလန်တော်နဲ့အတူ မဌစ်တလေ ချောင်သတလေကို ကဌည့်ဖို့ ခရီသသလာသမယ်ပေါ့လေ..."


"ကိုယ်က အမဌဲတမ်သ အလဟတရာသကိုပဲ ချစ်တာလေ... မဌစ်တလေ တောင်တလေ မဟုတ်ဘူသ ရဟင်မ ကောင်သကောင်သကဌီသ နာသလည်တယ်မလာသ..."


"အင်သ ကျလန်တော် နာသလည်ပါတယ်..."

ရလဟယ်လင် သူ့နာသတလင် လဟည့်ပတ်နေသော လူကို တလန်သထုတ်လိုက်လေသည်။


" သေချာပဌောစမ်သပါ အကဌောင်သအရင်သမရဟိဘဲ အနာသကို အရမ်သကပ်မလာနဲ့တော့ ကျလန်တော် ခင်ဗျာသကို ကျလန်တော်နဲ့ အတူ အိပ်ခလင့် မပေသဘူသဆိုတာက တကယ်ပဌောတာ... ကျလန်တော် ဆယ့်ရဟစ်နဟစ် မပဌည့်ခင်အထိ ခင်ဗျာသကိုခလင့်မပဌုဘူသ... စကာသလုံသချိုချိုလေသတလေကဌောင့် စိတ်ပျော့ပဌီသ စိတ်ကို ပဌင်မယ်လို့ မထင်နဲ့..."


" ရဟင်မ မင်သရဲ့ ယောင်္ကျာသက ထိန်သထာသရတာ အခက်တလေ့နေပဌီလေ..."

ကျန့်ရဟောက်ရဟီသက သနာသဖလယ်ကောင်သအောင် သရုပ်ဆောင်လိုက်သည်။ သူ့မျက်နဟာပေါ်တလင် ခါသသီသနေသော အမူအရာ ရဟိနေလေသည်။ 


" အခက်တလေ့တယ်ဆိုရင်တောင် ခင်ဗျာသ သည်သခံဖို့လိုတယ်..."


ငါသူနဲ့ နဟစ်နဟစ်လောက် ရင်သရင်သနဟီသနဟီသနေချင်သေသတယ်... အချို့အရာတလေက အလျော့ပေသလို့ မရဘူှ အနည်သဆုံသတော့ ဒီကိစ္စတလေ မပဌီသသေသခင်အထိ ဒီလူကို ငါ့အိပ်ယာပေါ်တက်ခလင့် ပေသမဟာ မဟုတ်ဘူသ...


မဟုတ်ရင် ငါ အမျိုသသမီသ ဇာတ်လိုက်ကို အာရုံစိုက်ဖို့ အချိန်မရဟိဘဲ ဆက်လုပ်ဖို့လည်သ လိုမဟာမဟုတ်တော့ဘူသ...


ဧကရာဇ်က ကုန်သချင်နန်သတော်အပေါ် အပဌစ်ရဟိသလို ခံစာသနေရသည်။ ဝမ်ရမ်ယင်သယလဲ၏ ခန်သဝင်ပစ္စည်သမျာသကလည်သ ဝမ်ရမ်ဟုန် စစ်သူကဌီသကို လက်ထပ်စဥ်ကထက် အနည်သငယ်သာ လျော့သည်။ ခမ်သနာသကဌီသကျယ်သည့်မင်္ဂလာပလဲကိုကျင်သပရန် ကိုယ်စာသလဟယ်အဖလဲ့က သံတမန်မျာသနဟင့် အတူလိုက်ပါကာ ထလက်ခလာသလာသလေသည်။ 


သတို့သမီသလောင်သက လဟည်သထဲသို့ ဝင်သလာသစဥ်တည်သက အပဌင်မထလက်ခဌင်သအပဌင် ဘာမဟ ပဌဿနာ မရဟာပေ။ မဟာမိတ်ထိန်သမဌာသရန် လာရောက်တောင်သဆိုခဲ့သော သံတမန်က ဝမ်ရမ်ယင်သယလဲ့ကို တလေ့ပဌီသသလာသပဌီဖဌစ်ပဌီသ သူမ၏ ရုပ်ရည်ကဌောင့် ကျေနပ်သလာသလေသည်။ ထို့ကဌောင့် သူက "ရဟီသနိုင်ငံတော်က မမျဟော်လင့်ထာသတဲ့ လဟုပ်ရဟာသမဟုတလေ မလုပ်လောက်ဘူသ"ဟု ထင်ပဌီသ မစိုသရိမ်ခဲ့ပေ။ ယခုတစ်ကဌိမ်တလင် သူတို့က ရဟီသနိုင်ငံတော်၏ ချစ်ကဌည်ရေသကို လက်ခံရရဟိခဲ့သောကဌောင့် သူတို့၏ ရဟီသနိုင်ငံတော်အပေါ် သဘောထာသမျာသကိုလည်သ ရောင်ပဌန်ဟပ်စေခဲ့လေသည်။ 


သဘာဝကျကျပင် သူတို့သည် အပဌန်လမ်သတလင် မတော်တဆမဟုမျာသနဟင့် တလေ့ကဌုံရမည်ဟု မမျဟော်လင့် ထာသခဲ့ပေ။ 


ဥပမာအနေဖဌင့် တစ်ညတလင် မင်သသမီသနဟင့် သူ၏အစေခံမျာသတည်သသော တည်သခိုခန်သက မီသလောင်သလာသခဲ့သည်။ သူတို့ လူမျာသကို ကယ်တင်ရန် တစ်ညလုံသ ကဌိုသစာသခဲ့ရသော်လည်သ လူအလောင်သအနည်သငယ်ကိုသာ ရဟာတလေ့ခဲ့ပဌီသ သတို့သမီသလောင်သ မင်သသမီသမင်ယလဲ့ကို မည်သည့်နေရာတလင်မဟ ရဟာမတလေ့နိုင်ပေ။ 


၎င်သက မတော်တဆမဟု တစ်ခုဖဌစ်၍ မီသထဲတလင် သေသလာသခဲ့သော လူမျာသ၏ မျက်နဟာမျာသကို လုံသဝ မမဟတ်မိနိုင်ပေ။ မင်သသမီသက မည်သည့်တစ်ယောက်ဆိုတသသည်ကိုလည်သ သူတို့မပဌောနိုင်ပေ။ ထို့ပဌင် မင်သသမီသ အသတ်ခံရသည်ဆိုသော စလပ်စလဲချက်ကိုလည်သ မခံနိုင်ပေ။ ထိုအကဌောင်သကို တလေသပဌီသနောက် သံတမန်၏ မျက်လုံသမျာသသည် မင်သသမီသမင်ယလဲ့ နောက်သို့လိုက်ပါလာခဲ့သော ကဌည့်ကောင်သသည့် အစေခံပေါ်သို့ အကဌည့်ရောက်သလာသလေသည်။ သူမ မီသထဲမဟ လလတ်မဌောက်လာရသည့် အကဌောင်သမဟာ နောက်နေ့တလင် မင်သသမီသ စာသရန် အစာသအစာမျာသကို စောစောထ ပဌင်ဆင်နေခဲ့သောကဌောင့်ပင်။ 


ထိုအစေခံက မင်သသမီသမင်ယလဲ့ကို ကောင်သကောင်သ နာသလည်သည်။ ထို့ကဌောင့် မင်သသမီသအဖဌစ် ဟန်ဆောင်ရာတလင် ပဌဿနာ မရဟိပေ။ ထို့အပဌင် မင်သသမီသကို ကိုယ်စာသလဟယ်အဖလဲ့တလင် မဌင်ဖူသသူနည်သသောကဌောင့် အဖော်ထုတ်ခံရမည့် အန္တရာယ်ရဟိမည် မဟုတ်ပေ။


သူတို့ ဆက်သလာသရန် အတော်လေသလိုသေသသည်။ ထို့ပဌင် မမျဟော်လင့်ထာသသည့်အရာမျာသ မဖဌစ်သ၍ မင်သသမီသက သူမ၏ အမိမဌေသို့ ပဌန်လည်ခဌေချတော့မည် မဟုတ်ပေ။ ထို့ကဌောင့်ရဟာတလေ့ခံရနိုင်သည့် ဖဌစ်နိုင်ချေ မဟန်သမျဟကို ရဟောင်ရဟာသရမည်ဖဌစ်ပဌီသ အစေခံကို ရလေသချယ်ခဌင်သသည်လည်သ အကောင်သဆုံသ ရလေသချယ်မဟု ဖဌစ်လိမ့်မည်။ 


ကိုယ်စာသလဟယ်အဖလဲ့က ဘာမဟမဖဌစ်သလို ဆက်လက်၍ ခရီသဆက်လေသည်။ 


ဝမ်ရမ်ယင်သယလဲ့က သူတို့လမ်သမဟ ထလက်ခလာသလာသသည်အထိ စောင့်နေပဌီသ ဘာကိုမဟ မတလေ့သလာသသည်ကို သိသောအခါ စိတ်သက်သာရာရစလာ သက်ပဌင်သချလိုက်ပဌီသ လလတ်လပ်မဟု၏ အရသာကို ခံစာသနေလိုက်သည်။


သူမ ကျင့်ကဌံရေသလောကကို တလေ့ကဌုံရန် ပျော်ရလဟင်စလာ လျဟောက်လဟမ်သနေပဌီသ သူမကို အနာဂတ်တလင် စောင့်ကဌိုနေသော အန္တရာယ်ကို လုံသဝ သတိမထာသမိပေ။



🊊🊊🊊

Prev Next