Chapter 93

🦊Arc 7 - ကြက်ခြေခတ်ငါးလေး၏ဘဝ

Chapter 93

7.2 – သူ၏ အနုံအဆုံး၊ အရိုးရှင်းဆုံးနှင့် အပြစ်အကင်းဆုံး အပြုံးပင်

ရွှယ်လင် ဇာတ်ကြောင်းကို လေ့လာဖတ်ရှုပြီးနောက် သက်ပြင်းချလိုက်သည်။

"ဒီရေသူကလေးလေးမှာ မဖြည့်စည်းလိုက်ရတဲ့ ဆန္ဒတွေရှိလား"

 ရွှယ်လင် အကူစနစ်ကို မေးလိုက်သည်။ အချက်အလက်ကိုဖတ်ပြီးနောက် ဤအခြေအနေနှင့်ပတ်သက်ပြီး အကျိုးကျေးဇူးများရှိကြောင်း သူလက်ခံရပေမည်။ ပထမဦးစွာ ဤစိတ်အနှောက်အယှက်ဖြစ်စေသော ငါးအမြီးကို ခြေထောက်တစ်စုံအဖြစ်သို့ သူ ပြောင်းလဲနိုင်သည်။ ဒုတိယအနေဖြင့် ဤဝိသေသလက္ခဏာသည် ပင်လယ်ရေနက်ပိုင်း ရေသူများ၏ တော်ဝင်မိသားစု၏ မျိုးဆက်ဖြစ်နိုင်သည်။ သူ၏ကိုယ်ခန္ဓာသည် အကြီးမားဆုံးသော ဝှက်ဖဲဖြစ်သောကြောင့် အောင်မြင်သူဖြစ်လာရန် မိနစ်ပိုင်းမျှသာလိုသည်။ ပင်လယ်ရေနက်ပိုင်း ရေသူများနှင့် သဘာဝအတိုင်းရေသူများတွင် လုံးဝခြားနားသော ခန္ဓာကိုယ်ဖွဲ့စည်းပုံရှိသည့်အချက်ကို ဆက်စပ်တွေးကြည့်လျှင် သူ့ခန္ဓာကိုယ်သည် ကြည့်ရသလောက် အားနည်းကာ အထိခိုက်မခံသည် မဟုတ်ပေ။ ၎င်းသည် သူ့အတွက် ကိစ္စများကို ကိုင်တွယ်ရာ၌ ပိုမိုလွယ်ကူစေလိမ့်မည်။

"သူ အရမ်းနာကျင်စွာ သေဆုံးသွားခဲ့တာ။ ထပ်ခါထပ်ခါ နှိပ်စက်ခံခဲ့ရတယ်။ အသက်ရှင်ဖို့လည်း မတောင်းဆိုနိုင်သလို သေဆုံးသွားဖို့ကိုလည်း ခွင့်ပြုမပေးခဲ့ဘူး။ သူက ရေသူဓာတ်ခွဲခန်းကို လုံးလုံးလျားလျား ဖျက်ဆီးပစ်ချင်ခဲ့တာ"

ရွှယ်လင် မျက်ခုံးပင့်လိုက်သည်။ ၎င်းသည် အနည်းငယ်ပို၍ စိတ်ဝင်စားစရာကောင်းပြီး ဇာတ်ဆောင်များ၏ ကံကြမ္မာကို ပြောင်းလဲရန်ဟူသော သူ့တာဝန်နှင့် တူညီသည့် ဇာတ်ဆောင်များထံမှ ဇာတ်ကြောင်းကို လုယူရန်ပင် ဖြစ်သည်။

 "သူ လော့ချန်နဲ့ အတူရှိနေပြီး အတူတူ အသက်ကြီးမလာချင်ဘူးလား"

"သူက လော့ချန်ကို စံပြပုဂ္ဂိုလ်တစ်ယောက်လိုမျိုး ကိုးကွယ်ထားတာ။ host ရဲ့ နာနိုကွန်ပြူတာကို ဖွင့်ပြီး စစ်ဆေးကြည့်လို့ရတယ် - လော့ချန်က ရေသူမကွန်ရက်ပေါ်မှာ ပရိသတ်တွေ အများကြီးရှိတယ်၊ ပြီးတော့ သူ့ကိုလည်း ဦးနှောက်ချို့ယွင်းနေတဲ့ ပရိသတ်တွေထဲက တစ်ဦးအဖြစ် သတ်မှတ်လို့ရတယ်။ သူ မသေခင်မှာ လော့ချန်က သူ့ကို လာကယ်ပေးမယ်လို့ အမြဲမျှော်လင့်ထားခဲ့ပေမယ့် ဓာတ်ခွဲခန်းက လူတွေက ဇာတ်လိုက်ရှို့နဲ့ လော့ချန်တို့ရဲ့ စေ့စပ်ကြောင်းသတင်းကို ပြပေးခဲ့ပြီးတဲ့နောက်မှာတော့ သူ လုံးဝ မျှော်လင့်ချက် မဲ့သွားခဲ့တယ်။ အဲဒါကလည်း သူ့ကိုယ်သူ သတ်သေရတဲ့ အကြောင်းရင်းတွေထဲက တစ်ခုလည်းဖြစ်နိုင်တယ်"

"သူ့ရဲ့ခင်ပွန်းလောင်းက သူ ပျောက်ဆုံးသွားပြီး နှစ်လမပြည့်ခင်မှာ တခြားအမျိုးသားနဲ့ စေ့စပ်ကြောင်းလမ်းကြောင်း ကြေညာခဲ့ပြီး အဲဒီလူကလည်း မြို့စားအိမ်တော်ရဲ့ သားအရင်းပဲ။ ကလေးဘဝကနေ အရွယ်ရောက်ပြီးတဲ့အထိ သူရရှိခဲ့တဲ့ အချက်အလက်အားလုံးက လုံးဝကို ဇောက်ထိုးမိုးမျှော် ဖြစ်သွားတယ်။ ရှင်သန်ဖို့ သူ့** ကို ရုတ်တရက် ဆုံးရှုံးလိုက်ရပြီး သုတေသန အဖွဲ့အစည်းအတွက် သူ့ရဲ့ အပြင်းထန်ဆုံး အမုန်းတရားတွေဘဲ ကျန်ခဲ့တာကတော့ ပုံမှန်ပါပဲ"

ရွှယ်လင် သူ့မေးစေ့ကို ပွတ်လိုက်ပြီး သူ့နှုတ်ခမ်းပေါ်တွင် နှေးကွေးသော အပြုံးတစ်ခု ထွက်ပေါ်လာပြီး အကြည့်များကို အောက်သို့ လွှဲလိုက်သည်။

လော့ချန် နိုးမလာခင် ဘယ်လောက်ကြာမလဲဆိုတာကို သူသိသည်။ သူနိုးလာပြီးနောက် လုံးဝ စိတ်ဝင်စားစရာကောင်းသည့် အင်ပါယာ၏တစ်ခုတည်းသော SSS အဆင့်ရှိ စွမ်းအားရှင်ဖြစ်လာလိမ့်မည်။

သို့သော် ၎င်းသည် ရွှယ်လင်နှင့် ဘာမှမဆိုင်ပေ။ မည်သို့ပင်ဆိုစေကာမူ သူ နိုးလာသောအခါ ရွှယ်လင်သည် သူတို့၏ စေ့စပ်ကြောင်းလမ်းမှုကို ဖျက်သိမ်းပြီးဖြစ်ကြောင်းကို တွေ့ရှိသွားလိမ့်မည်၊ ထို့နောက် မဒမ်လော့သည် လော့ချန်၏ရှေ့တွင် သူ့ကို တမင်တကာ ဆဲဆိုနေမည်မှာ တွေးနေစရာပင် မလိုအပ်ပေ။

 ထိုအချိန်တွင် လော့ချန်နှင့် သူ၏ဆက်ဆံရေးသည် အထူးတလည် အဆင်မပြေဖြစ်လာလိမ့်မည်။ ထို့နောက် ဇာတ်လိုက်ရှို့သည် ဒီရေကဲ့သို့ စင်မြင့်ပေါ်သို့ တက်လာပြီး လော့ချန်နှင့် ချစ်ကြည်ရေးတည်ဆောက်လိမ့်မည်ဖြစ်သည်။

သူ ပြုလုပ်ခဲ့သည့်အရာများအပေါ် ရွှယ်လင် ဘယ်သောအခါမျှ နောင်တနှင့် နောက်ပြန်လှည့်မကြည့်တတ်ပေ။ သူ့စကားများကို ပြန်ရုတ်သိမ်းပြီး ပျက်စီးသွားသော စေ့စပ်ပွဲကို ပြန်လည်ပြုလုပ်ရန် ရည်ရွယ်ချက်မရှိပေ။ သို့သော် စေ့စပ်ပွဲကို ဖျက်သိမ်းလိုက်ခြင်းသည် ဇာတ်ဆောင်ရှို့အတွက် လမ်းဖွင့်ပေးလိုက်ခြင်းဟု မဆိုလိုပေ။

ဇာတ်ဆောင်ရှို့သည် ပင်လယ်ပြင်တွင် ကြီးပြင်းလာခဲ့သည်။ အသက်မွေးဝမ်းကြောင်းအတွက် ငါးဖမ်းနေသော တောင်သူတစ်ဦး၏ မွေးစားခြင်းကိုခံခဲ့ရပြီး နေ့တိုင်း ပင်လယ်ပြင်၌သာ ရှိနေခဲ့သည်။ သူ ပင်လယ်ရေနက် ရေသူမတစ်ဦးနှင့် တွေ့ဆုံခဲ့သည်။ ၎င်းသည် ဇာတ်ကြောင်းနောက်ပိုင်း၌ ပင်လယ်ရေနက် ရေသူမများနှင့် လူသားများအတွက် ကြားဝင်ဖြန်ဖြေခွင့် ရရှိလာခဲ့သည်။

ယခုနှစ်သည် ဇာတ်ဆောင်ရှို့၏ ဆယ့်ရှစ်နှစ်မြောက်မွေးနေ့ဖြစ်ပြီး ရေသူမများအားလုံးတွင် ရှိရန်လိုအပ်သည့် စွမ်းရည်များကိုလေ့လာသင်ယူရန် အင်ပါယာ၏မြို့တော်သို့ စေလွှတ်ခြင်းခံခဲ့ရသည်။ သူသည် လယ်သမားမိသားစုမှ ဆင်းသက်လာသော်လည်း သူ့တွင် ဇာတ်ဆောင်၏ အရောင်အဝါလည်းရှိပြီး ဇာတ်ဆောင်ရှို့၏ အပြုအမူဆက်ဆံပုံတို့သည် မင်းမျိုးမင်းနွယ်များနှင့် အတူတူပင်ဖြစ်သည်။

သဘာဝအတိုင်း ရေသူမတစ်ယောက်အနေဖြင့် သူ့ဘဝနှင့် အနာဂတ်အတွက် စိုးရိမ်စရာ ဘာမှမရှိပေ။ သူ၏ဒီဇိုင်းစွမ်းရည်သည် ထူးချွန်ပြီး ရေသူမကျောင်းရှိ ဆရာမတစ်ဦးနှင့် သူငယ်ချင်းကောင်းများ ဖြစ်လာခဲ့သည်။ ဆရာမမှတစ်ဆင့် မဒမ်လော့နှင့် အဆက်အသွယ်ရခဲ့ပြီး သူမအတွက် အထူးပြုလုပ်ထားသော ၀တ်စုံများနှင့် ငါးမြီးစကတ်များကို ဒီဇိုင်းဆွဲပေးခဲ့သည်။ မဒမ်လော့သည် သူ့ကို အလွန်ချစ်မြတ်နိုးပြီး ထိုကဲ့သို့ချစ်စရာကောင်းသောကလေးကို သူ့သားနှင့်မိတ်ဆက်ပေးချင်ခဲ့သည်။

သို့သော် ယန်ချီဝမ်သည် သူတို့ကြားတွင် ဝင်ရှုပ်နေခဲ့သည်။ သို့သော် သူ့သားသည် ယန်ချီဝမ်ကို စိတ်မဝင်စားကြောင်းသိ၍ သားဖြစ်သူမေ့မြောနေချိန်တွင် အိမ်ထောင်ရေးစာချုပ်ကို အဆုံးသတ်ရန် သတ္တိရှိရှိ တောင်းဆိုခဲ့ပြီး ယန်ချီဝမ်၏ ငယ်ရွယ်ပြီး မသိနားမလည်သည့်အချက်ကို အသုံးချခဲ့သည်။

ဇာတ်လမ်း၏ဦးတည်ချက်ကို အနီးစပ်ဆုံးစဉ်းစားပြီးနောက် ရန်သူ့ဘက်သို့ ဦးစွာထိုးဖောက်ဝင်ရောက်ကာ ဇာတ်ကောင်ရှို့နှင့် ကောင်းမွန်သောဆက်ဆံရေးတည်ဆောက်ရန် ရွှယ်လင် ရည်ရွယ်ခဲ့သည်။ သူ ဇာတ်ဆောင်ရှို့အား အသိအမှတ်ပြုခံရအောင် လုပ်ပြီး မြို့စားအိမ်တော်ထဲသို့ ဝင်ခွင့်ရရန် ချက်ချင်းလက်ခံလာအောင် ပြုလုပ်နိုင်လျှင် သူ့အတွက် အကောင်းဆုံးဖြစ်ပေလိမ့်မည်။ ၎င်းသည် အရာအားလုံးကို ရှေ့ဆက်လုပ်ဆောင်ရန် သူ့အတွက် ပိုလို့ပင်အဆင်ပြေစေလိမ့်မည်။

မည်သို့ပင်ဆိုစေကာမူ သူမ၏ အခုလေးတင် ပြန်ရောက်လာသော သားအရင်းအား မွေးစားသားဖြစ်သူထံမှ ငြင်းပယ်ခံထားရသော မေ့မြောနေသူတစ်ဦးနှင့် လက်ထပ်ရန်ကိစ္စကို မြို့စားကတော်သည် ခွင့်ပြုလိမ့်မည် မဟုတ်ကြောင်း ရွှယ်လင် ယုံကြည်ပေသည်။အကယ်၍ SSS အဆင့်ရှိသည့် စွမ်းအားရှင်တစ်ယောက်အဖြစ် လော့ချန် နိုးလာခဲ့လျှင်တောင် မဖြစ်နိုင်ပေ။

🦊

"ပြန်လာပြီလား" မြို့စားကတော်၏အမူအရာသည် ဖျော့တော့နေသည်။သူမသည် ယန်ချီဝမ်ကို ငယ်စဉ်ကတည်းက အလွန်ချစ်ပေးခဲ့သော်ငြားလည်း သူတို့သည် အရမ်းမရင်းနှီးခဲ့ပေ။ အချိန်အများစုတွင် သူတို့ကြားရှိဆက်ဆံရေးက ထူးဆန်းနေသည်။ ဝေးကွာသည်ဟု မဆိုနိုင်သော်လည်း မြို့စားကတော်သည် သူမ၏သားအရင်းကို မမေ့နိုင်ဘူးဟု ဆိုရမည်ပင်။ ယန်ချီဝမ်ကို အလေးအနက် ဂရုစိုက်ချင်သည့်အခါတိုင်း သူမ၏ ပျောက်ဆုံးသွားသည့် ကလေးအကြောင်းကို သတိရမိပြီး စိတ်ထဲတွင် မသက်မသာ ခံစားရလာသည်။

"ဟုတ်ကဲ့" ရွှယ်လင် တည်ငြိမ်စွာ ပြန်ဖြေခဲ့သည်။ လွန်ခဲ့သည့် နာရီဝက်ခန့်က သူ၏စေ့စပ်ကြောင်းလမ်းမှုကို ဖျက်သိမ်းခဲ့သည်ဟူသော အချက်ကို အရိပ်အမြွက်မျှပင် မတွေ့ခဲ့ရပေ။ သူ မငိုသလို ဂျီကျခြင်းမျိုးလည်း မရှိပေ – သူသည် အရင်က ယန်ချီဝမ် မဟုတ်တော့ပေ။

မြို့စားကတော်သည် ထူးဆန်းစွာ ကြည့်လိုက်ပြီး "လော့ချန်အပေါ် သား တကယ် လက်လျှော့လိုက်ပြီလား။ အစတုန်းက သားပဲ သူ့ကို တွယ်ကပ်နေပြီး အဆက်မပြတ် သူ့နောက်ကလိုက်နေခဲ့တာမလား။ နောက်ပြီး သူ့ကို လက်မထပ်ရရင် သတ်သေမယ်လို့ ခြိမ်းခြောက်ခဲ့တယ်လေ။ အခုကျတော့ စေ့စပ်ပွဲကို ဖျက်သိမ်းလိုက်တာလား" သူ့အပေါ် ရင်းနှီးမှုတစ်စုံတစ်ရာကို မဖော်ပြသော်လည်း မြို့စားကတော်သည် ယန်ချီဝမ်နှင့်ပတ်သက်ပြီး အလွန်စိုးရိမ်နေသေးသည်။ ၎င်းသည် ဤနှစ်များအတွင်း ယန်ချီဝမ် သူ့ကိုယ်ပိုင်ဖြစ်တည်မှုနှင့် ပတ်သက်၍ အလွန်အမင်း စိတ်မရှုက်ထွေးရသည့် အကြောင်းရင်းလည်းဖြစ်သည်။

"ကျွန်တော် ရှင်းရှင်းလင်းလင်း တွေးပြီးသွားပြီ" 

ရွှယ်လင် သူ့နှုတ်ခမ်းများကို စေ့ပိတ်လိုက်ပြီးနောက် "ဒီလိုနည်းလမ်းနဲ့ လက်ထပ်စာချုပ်ချုပ်ဖို့ တောင်းဆိုတာက အဓိပ္ပါယ်မရှိဘူး။ မဒမ်လော့ကလည်း ကျွန်တော့်ကို သဘောမကျဘူး။ ဒါကြောင့် လော့ချန်နဲ့ ကျွန်တော့်ရဲ့စေ့စပ်ပွဲကို နှောင့်ယှက်ဖို့ ဖြစ်နိုင်သမျှ နည်းမျိုးစုံနဲ့ ကြိုးစားခဲ့တယ်။ ကျွန်တော် သူတို့မိသားစုနဲ့ လက်ထပ်ခဲ့ရင်တောင် ပျော်ပျော်ရွှင်ရွှင်နေနိုင်မှာ မဟုတ်ဘူး"

 အမှန်ပင်၊ သူပြောသမျှအရာအားလုံးသည် အဓိပ္ပာယ်မရှိပေ။ သူသာ သူတို့မိသားစုနှင့် အမှန်တကယ် လက်ထပ်ခဲ့လျှင် ထိုနေရာအား ပြောင်းပြန်လှန်ပစ်ကာ လော့မိသားစုကို အနားမရအောင် လုပ်ပစ်ပေလိမ့်မည်။ သို့သော် တခြားသူများ၏ မိသားစုအား မထိခိုက်စေခြင်းသည် ပိုကောင်းပေသည်။

မြို့စားကတော်၏ မျက်နှာပေါ်မှ အကြည့်သည် နောက်ဆုံးတွင် ပြေလျော့သွားသည်။ သူမ သက်ပြင်းချလိုက်ပြီး ကူကယ်ရာမဲ့စွာပြောလိုက်သည်။ 

"သား အရာအားလုံးကို သေချာစဥ်းစားနိုင်သွားရင် အကောင်းဆုံးပဲ။ လော့ချန်က အိမ်ထောင်ရေးတာဝန်တွေကို ဂရုမစိုက်ဘူးလို့ အရင်တုန်းက အမေ သားကို ပြောခဲ့ဖူးပါတယ်။ သားအဖေက သူ့ကို ဆွပေးပြီး မကျေမနပ်ဖြစ်အောင် လုပ်ခဲ့တာ။ သား သူ့ကို လက်ထပ်တဲ့အခါ သားအတွက် ဘာမှကောင်းတာတွေ ဖြစ်မလာမှာကို အမေ စိုးရိမ်တယ်" 

ရေသူလေးသည် ဂရုစိုက်ခံ၊ အချစ်ခံရပြီး ရှင်သန်ခဲ့ရသည်။ ယခင်က လော့ချန်အား စေ့စပ်ကြောင်းလမ်းမှုကို လက်ခံလာစေရန် မြို့စားမင်းသည် အထူးနည်းလမ်းအချို့ကို အသုံးပြုခဲ့ပြီး မြို့စားကတော်သည် ၎င်းနှင့်ပတ်သက်ပြီး အမြဲစိတ်မသက်မသာဖြစ်ခဲ့ရသည်။ သို့သော် ယန်ချီဝမ်သည် သူ့ကို သဘောကျနေသည့်အတွက် သူ့ကို ခွင့်ပြုရုံသာတတ်နိုင်ခဲ့သည်။ ယခုအခါ ယန်ချီဝမ် ၎င်းကို အကျိုးအကြောင်း သေသေချာချာ စဥ်းစားခဲ့ပြီးဖြစ်သောကြောင့် သူမ အလွန်ပျော်ရွှင်နေခဲ့သည်။

"စေ့စပ်ပွဲက ပျက်သွားပေမယ့် ဒုဗိုလ်ချုပ်လော့ကို သွားတွေ့ချင်သေးတယ်"

 ရွှယ်လင် မျက်လွှာချကာ ကြည့်လိုက်ပြီး အလွန်လိမ္မာကာ နာခံမှုရှိသည့်ပုံ ပေါက်နေသည်။

 "ကျွန်တော်တို့ စေ့စပ်ပွဲကို ဖျက်သိမ်းလိုက်ပေမဲ့ အဲဒါက သူ သတိမေ့နေတာကြောင့် မဟုတ်ဘူး၊ သူနိုးလာမယ်လို့ ကျွန်တော်ယုံကြည်တယ်... အနည်းဆုံးတော့ နောင်အနာဂတ်မှာ မြို့စားမင်းအိမ်တော်နဲ့ အဖေ့ကို သူ ရန်ပြုမလာအောင် ကျွန်တော် ရှင်းရှင်းလင်းလင်း လုပ်ထားချင်တယ်"

မြို့စားကတော် သူမ၏နားလည်နိုင်စွမ်းကို အချိန်အတော်ကြာ မစုစည်းနိုင်ခဲ့ပေ။ သူ ထိုကဲ့သို့ပြောလာမည်ဟု မမျှော်လင့်ထားသောကြောင့် မြို့စားကတော် သူ့ကို အံ့အားသင့်စွာ ကြည့်လိုက်မိသည်။ သူမလည်း အနည်းငယ် စိတ်လှုပ်ရှားမိသွားသည် - သူမ၊ သူမ၏ခင်ပွန်းနှင့် သူတို့၏သားနှစ်ယောက်သည် ယန်ချီဝမ်အား လွန်ကဲစွာ အလိုလိုက်ထားသောကြောင့် သူမ အမြဲစိုးရိမ်နေခဲ့သည်။ သူသည် နုံအလွန်းပြီး အယုံလွယ်ပေသည်။ တစ်ခါတစ်ရံ အရူးတစ်ယောက်သာသာပင်။ ဤအခြေအနေကို တွေ့ကြုံပြီးနောက် သူသည် တိုးတက်လာပြီး မြို့စားအိမ်တော်၏ရှုထောင့်မှ အရာများကို စဥ်းစားတွေးတောရန် သိလာခဲ့သည်။

မြို့စားကတော် သူမ၏ရင်ဘတ်ကို စိတ်သက်သာရာရစွာ ဖိလိုက်ပြီး "သား ဘယ်တော့မှ ရင့်ကျက်မလာရင်တောင် သားကို ဂရုစိုက်ပေးပြီး စောင့်ရှောက်ပေးမဲ့ တစ်စုံတစ်ယောက်ကို သားအတွက် ရှာပေးတာက အကောင်းဆုံးဖြစ်လိမ့်မယ်လို့ အမေ အမြဲတမ်းတွေးထားခဲ့တာ။ အခုတော့ သားက တစ်ချို့အရာတွေကို တွေးတောတတ်လာပြီး နားလည်လာခဲ့ပြီ။ သားမှာ ကိုယ်ပိုင်စိတ်ကူးတွေ ရှိလာပြီဆိုတော့ အမေ သားကို တနေကုန် အိမ်မှာပဲ မနေခိုင်းတော့ဘူး" 

သူမ ရွှယ်လင် ရှေ့သို့ အကြောင်းကြားစာတစ်စောင်ကို ထားလိုက်သည်။ 

"ဒါက မြင့်မြတ်သော ကဗျာစာပေကျောင်းရဲ့ ရေသူအနုပညာသင်တန်းကျောင်းအတွက် ဝင်ခွင့်အကြောင်းကြားစာပဲ။ သား အဲဒီအရာတွေကို အိမ်မှာ သင်ယူလို့ရနိုင်ပေမဲ့ နောက်ဆုံးမှာ ပြင်ပကမ္ဘာနှင့် ထိတွေ့ပြီး နောက်ထပ်လူများအပြားနဲ့ ထိတွေ့ဆက်ဆံရတာက သားအတွက် ပိုကောင်းလိမ့်မယ်"

"မြင့်မြတ်သောကဗျာစာပေ ရေသူသင်တန်းကျောင်း..." ရွှယ်လင် ထိုအကြောင်းကို ခဏလောက်တွေးပြီး သူ့နှုတ်ခမ်းထောင့်များသည် ရုတ်တရက် အနည်းငယ်လှုပ်ရှားသွားသည်။ "သတို့သမီးသင်တန်းကျောင်းအဖြစ် အမြဲလူသိများတဲ့ ရေသူသင်တန်းကျောင်းလား"

"အဲ့ဒီသတင်းကို သား ဘယ်ကကြားခဲ့တာလဲ" 

မြို့စားကတော် အနည်းငယ် ကူကယ်ရာမဲ့သွားသည်။

 "အဲဒါက တကယ်တော့ သတို့သမီးသင်တန်းကျောင်းမဟုတ်ဘူး၊ အဲဒီမှာ သင်ကြားပေးတဲ့ ဘာသာရပ်တွေအားလုံးက စန္ဒယား၊ စစ်တုရင်၊ လက်ရေးလှနဲ့ ပန်းချီပညာရပ်တွေပဲ ရှိလို့ပါ။ ရေသူတွေက အလုပ်လုပ်ဖို့ မလိုဘူးလေ။ ဒါကြောင့် အဲဒါတွေအစား စိတ်ဝင်စားစရာကောင်းပြီး ပျော်စရာကောင်းတဲ့အရာအချို့ကို သင်ယူကြတယ်။ ဆိုလိုတာက သားလည်း တစ်နေ့လုံး အိမ်မှာ ပျင်းမနေတော့ဘူးပေါ့"

ရွှယ်လင်၏နှုတ်ခမ်းများ ရုတ်တရက် လှုပ်ယမ်းသွားသည်။ ငါးအစုအဝေးထဲတွင် ရှိနေမည်ဟု တွေးလိုက်သည်နှင့် သူ ခေါင်းအရမ်းကိုက်လာသော်လည်း သူ၏လက်ရှိ ဇာတ်ကောင်ပုံစံအရ ငြင်းပိုင်ခွင့်မရှိသလို နောက်ထပ်ပြဿနာတစ်ခု ထပ်မပေါ်ပေါက်ခင် ခေါင်းညိတ်ရုံသာတတ်နိုင်သည်။ 

"အမေ ဒုဗိုလ်ချုပ်လော့ကို သွားတွေ့ဖို့ကိစ္စက..."

"အမေ သိတယ်။ သား ဘယ်နေ့သွားတွေ့ချင်လဲသာ အမေ့ကိုပြောလိုက်၊ အမေ သားအတွက် မဒမ်လော့နဲ့ စကားပြောပေးမယ်။ သားရဲ့စေ့စပ်ပွဲကို ဖျက်သိမ်းပြီးကတည်းက မဒမ်လော့မှာ မြို့စားအိမ်တော်ကို စော်ကားဖို့ အကြောင်းပြချက် မရှိဘူး"

ရွှယ်လင် ပြုံးကာ ခေါင်းညိတ်လိုက်သည်။ လေပေါ်ပျံဝဲနေသော သူ၏ရေသူကုလားထိုင်နှင့် သူ့အခန်းထဲသို့ ပြန်သွားတော့မည့်အချိန်တွင် သူတို့အိမ်တံခါးမကြီးသည် ပြင်းပြင်းထန်ထန် ဆွဲဖွင့်ခံလိုက်ရသည်။

"အမေ! လော့မိသားစုက အငယ်လေးရဲ့လက်ထပ်ပွဲကနေ နှုတ်ထွက်သွားပြီလို့ ကျွန်တော် ကြားလာခဲ့တယ်"

 ထိုအမျိုးသားသည် ဒေါသတကြီး မျက်နှာထားဖြင့် တံခါးကိုဖြတ်ကာ ကမန်းကတန်း ပြေးဝင်လာခဲ့သည်။

 "အခုတော့ ဒီအကြောင်းကို သိတဲ့သူတိုင်းက အငယ်လေးကို ပြောနေကြတယ်။ 'လော့'လို့ခေါ်တဲ့တစ်ယောက် မတော်တဆမှုဖြစ်ဖြစ်ချင်း လက်ထပ်ပွဲကနေ နုတ်ထွက်ချင်တာကြောင့် အငယ်လေးက အရှက်မရှိဘူးလို့ ပြောနေကြတယ်"

ရွှယ်လင် သူ၏ရေသူကုလားထိုင်ပေါ်တွင် ထိုင်နေသည်။ ဤမျှရှည်လျားသော စကားကိုကြားပြီးနောက် ကူကယ်ရာမဲ့စွာ လှည့်ကြည့်လိုက်ပြီး အော်ခေါ်လိုက်သည်။ "ဒုတိယ အစ်ကို"

မြို့စားအိမ်တော်တွင် သခင်ငယ်သုံးယောက်ရှိပြီး သူတို့အနက်နှစ်ဦးသည် မျိုးဆက်ဖြန့်ဝေသူများ ဖြစ်ကြသည်။ ယန်ချူဟွမ်းသည် သားအကြီးဆုံးဖြစ်ပြီး တော်ဝင်နန်းတော်တွင် တာဝန်ထမ်းဆောင်နေသည်။ ယန်ကျိုက်ယန်သည် သားအလတ်ဖြစ်ပြီး စစ်တပ်ထဲတွင် တာဝန်ထမ်းဆောင်နေသည်။ ထိုအချိန်တုန်းက ယန်မိသားစုသည် လော့ချန် သဘောတူညီလာအောင် အတင်းအကြပ် တွန်းအားပေးရန် နည်းလမ်းအချို့ကို အသုံးပြုခဲ့ကြောင်း လူအနည်းငယ်သာသိခဲ့ကြပြီး ဤသတင်းကို ယန်ကျိုက်ယန် မည်ကဲ့သို့ ရှာတွေ့သွားခဲ့သည် မသိပေ၊ မဟုတ်လျှင် လူများ သူတို့၏ညီအငယ်ဆုံးလေးအကြောင်း ပြောနေကြသည်ကို သူ ဘယ်လိုလုပ် သိသွားမည်နည်း။

မြို့စားကတော် သူမ၏ မဆင်မခြင်လုပ်တတ်သော ဒုတိယသားကို အမူအရာမဲ့စွာ ကြည့်လိုက်ပြီး "မင်းပြောစရာရှိရင် ဖြည်းဖြည်းပြော။ မင်း အခု အသက်ဘယ်လောက်ရှိပြီလဲ... ဒါတောင် ကမူးရူးထိုး လုပ်တုန်း။ မင်းရဲ့အပြုအမူက မင်းညီလေးထက်တောင် ပိုဆိုးတယ်"

ယန်ကျိုက်ယန် သူ့အမေ၏ ဆူပူကြိမ်းမောင်းမှုကို ခံလိုက်ရပြီး သူ့ခြေလှမ်းများသည် တုံ့ဆိုင်းသွားသည်။ ထို့နောက် သူ စကားမပြောခင် အရင်ဆုံး ခေါင်းလှည့်ကာ ရွှယ်လင်ထံ ရူးကြောင်ကြောင် ပြုံးပြလိုက်သည်။

 "ကျွန်တော်က သက်သေမရှိဘဲ ဝမ်ဝမ့်အကြောင်း လူတွေပြောနေကြတာကို ဒေါသထွက်တာ၊ ပြောစမ်း ဝမ်ဝမ်၊ လက်ထပ်ပွဲကို ဖျက်သိမ်းဖို့ လော့ချန်ရဲ့အမေက မင်းကို ဖိအားပေးခဲ့တာလား။ သူ တကယ် မင်းကို ခြိမ်းခြောက်ဖို့ သတ္တိရှိရင် မင်းရဲ့ဒုတိယအစ်ကိုက မင်းအတွက် သူမကို ရိုက်ပေးမယ်"

ရွှယ်လင် ကူကယ်ရာမဲ့စွာ ပြောလိုက်သည်။ "ဒုတိယအစ်ကိုက ရေသူမကို ရိုက်ချင်လို့လား" 

မဒမ်လော့ အမှားတစ်ခုခုလုပ်မိခဲ့လျှင်တောင် ရိုက်နှက်ဆုံးမလို့ မရနိုင်ပေ။ မည်သို့ပင်ဖြစ်စေ သူမသည် သိပ္ပံနည်းကျ ရေသူမများအဖြစ် ပြောင်းလဲခဲ့သည့် အမျိုးသမီးအနည်းစုထဲမှ တစ်ဦးဖြစ်သည်မဆိုထားနှင့် သူမသည် ရေသူမတစ်ယောက်ပင်။ ယန်ကျိုက်ယန် သူမကို တကယ်ထိုးလျှင် မဒမ်လော့ အမှန်တကယ်ပင် သေသွားနိုင်သည်။

"အာ..." သူ အလွန်လျင်မြန်စွာ ပြောလိုက်သ

ည်။ ယန်ကျိုက်ယန် ဤမေးခွန်းကို သေသေချာချာ မစဉ်းစားဘဲ သူ့ခေါင်းကို အပြစ်ကင်းစွာ ပြင်းပြင်းထန်ထန် ဆုပ်ထားလိုက်သည်။