Chapter 108 (Arc 7 -End)

🦊Arc 7 - ကြက်ခြေခတ်ငါးလေး၏ဘဝ [END]

Chapter 108

7.17 – သူ ဒီနေရာမှာ ရူးကြောင်ကြောင်နဲ့ ဘာရပ်လုပ်နေတာလဲ

သုတေသနစမ်းသပ်ခန်းဖျက်ဆီးခံရမှုကြောင့် ဖြစ်ပေါ်လာသော ကြီးမားသည့်ဆူပူလှုပ်ရှားမှုသည် အင်ပါယာတစ်ခုလုံးကို တုန်လှုပ်သွားစေခဲ့သည်။

အင်ပါယာ စတင်ပြသပေးတော့မည့် ခေတ်သစ်ကို လူများစွာသည် ရှင်းရှင်းလင်းလင်း မြင်နေရပြီး အားလုံးမပြီးဆုံးမီ သူတို့လည်း ရှင်းလင်းခံရမည်ကို စိုးရိမ်သောကြောင့် တစ်ယောက်ပြီးတစ်ယောက် ဖွဲ့စည်းပုံတွင် စီတန်းနေရာယူလာကြသည်။

ကံကောင်းထောက်မစွာဖြင့် မင်းသားသည် လူသတ်သမားမဟုတ်ပေ။ သူသည် ပုပ်ပွနေပြီး အတွင်းမှပြိုလဲတော့မည့် ဧကရာဇ်အင်ပါယာ နိုင်ငံတော်ကြီးကို ရှင်းပစ်ရန်သာ လိုလားခဲ့သည်။ သူ၏လုပ်ဆောင်ချက်များသည် အချိန်နှင့်တပြေးညီ ထိရောက်ကြောင်း သက်သေပြနိုင်ခဲ့သည်။ ဧကရာဇ်သည် မင်းသား၏ လုပ်ရပ်ကို အလွန်ကျေနပ်သဖြင့် ကိုင်တွယ်ဖြေရှင်းရန်ကိစ္စများကို မင်းသားထံ တဖြည်းဖြည်း လွှဲပြောင်းပေးလာသည်။

သိပ်မကြာခင်မှာပင် အရှင်မင်းသားသည် မြို့စားအိမ်တော်၏သခင်လေးနှင့် စေ့စပ်ခဲ့သည်။

မြို့စားအိမ်တော်က သူတို့၏ 'အစစ်အမှန်' သခင်လေးအား လူသိရှင်ကြား မိတ်ဆက်သည့်ညနေတွင် မင်းသားသည် ထိုနေရာ၌ပင် လက်ထပ်ခွင့်တောင်းခဲ့ပြီး နူးညံ့သိမ်မွေ့သော သခင်လေးသည်လည်း ချက်ချင်း သဘောတူခဲ့သည်။ စေ့စပ်ပွဲအခမ်းအနားသည် ခမ်းနားကြီးကျယ်ပြီး အင်ပါယာရှိ ပြည်သူများအကြားတွင် ရေပန်းအစားဆုံး ဆွေးနွေးမှု ခေါင်းစဉ်တစ်ရပ် ဖြစ်လာခဲ့သည်။

မင်းသားသည် ယန်ချင်ကျွင်းကိုလက်ထပ်ပြီး ဧကရီရာထူးပေးလိုသောကြောင့် နန်းတက်ပြီးနောက် မင်္ဂလာပွဲကို ကျင်းပရန်စီစဉ်ထားသည်။ သူ ယန်ချင်ကျွင်းကို လေးလေးနက်နက် ချစ်ပုံရသည်။

ဗိုလ်ချုပ်ကြီးလော့သည်တော့ အနည်းငယ်အထီးကျန်နေရသည်။ မင်းသားလေး၏ စေ့စပ်ကြောင်းလမ်းမှု အမြန်နိဂုံးချုပ်သွားသည်နှင့် ယှဉ်လျှင် သူနှင့်ရွှယ်လင်တို့သည် အချိန်ကြာကြာ အတူရှိခဲ့ကြကြောင်း ထင်ရှားသော်လည်း သူတို့နှစ်ယောက်စေ့စပ်ရန် ရွှယ်လင်က လုံးဝ ငြင်းဆန်ခဲ့သည်။

လော့ချန်သည် ထင်ရှားသောဂိုဏ်းခွဲများကို ရှင်းထုတ်ရာတွင် မင်းသားအား ကူညီပေးခဲ့သည့် သူ၏အခန်းကဏ္ဍကြောင့် စစ်ဦးစီးချုပ်ရာထူးသို့ တိုးမြှင့်ခြင်းခံခဲ့ရသည်။ ယခု သူသည် ကြီးမားသောစစ်တပ်ကြီးကို ထိန်းချုပ်နေရပြီး ရွှယ်လင်ကို တွေ့ရန် အချိန်နည်းပါးသွားရသည်။ ထို့အပြင် စစ်တပ်တစ်ခုလုံး သူတို့၏အထက်လူကြီး ပေးစွမ်းလာသော အေးစက်မှုဒဏ်ကြောင့် တုန်လှုပ်ခြောက်ခြားနေရသည်။ လူတစ်စုလုံးသည် သူတို့၏သေးငယ်လှသောအသက်များကို ဥခွံပေါ်တွင်တင်၍ ကြောက်ရွံစွာ နေထိုင်နေရသည်။

ရွှယ်လင်သည် ပင်လယ်ရေနက်ရေသူတို့၏ ဧကရာဇ်ဘုရင်အဖြစ် သူ၏နေ့ရက်များကို အသိဥာဏ်မဲ့ နုံအစွာဖြင့် ပေါ့ပေါ့ဆဆ မကုန်ဆုံးနိုင်ပေ။ ပင်လယ်ရေနက် ရေသူများ၏ နေထိုင်မှုပတ်ဝန်းကျင်ကို မြှင့်တင်ရန်အတွက် လူသားများနှင့် ပင်လယ်ရေနက် ရေသူများကြား ငြိမ်းချမ်းရေး တိုးတက်စေရန် သူ လန်နှင့်အတူ လုပ်ဆောင်ခဲ့သည်။ ထို့မှသာ ပင်လယ်ရေနက် ရေသူအများအပြားသည် သူတို့၏အာဃာတများကို လျှော့ချလိမ့်မည်ဖြစ်ပြီး ကုန်းပေါ်သို့ လာရောက်နေထိုင်ပေလိမ့်မည်။

ဤနေရာတွင် သူတို့အတွက် ရွေးချယ်စရာများ ပိုများလာမည်ဖြစ်ပြီး ယင်းသည် ပင်လယ်ရေနက် ရေသူများ၏ရေသူဦးရေ ဆက်လက်တည်ရှိနေစေရေးအတွက် အထောက်အကူဖြစ်စေလိမ့်မည်။

သူတို့မျိုးနွယ်စု၏ အစာရေစာရှားပါးလာခြင်းကြောင့် မျိုးနွယ်ဝင်အသစ်များ မွေးဖွားလာခြင်း မရှိသည်မှာ နှစ်ပေါင်းများစွာ ကြာခဲ့ပြီဖြစ်သည်။ ရွှယ်လင်သည် အငယ်ဆုံးဖြစ်ပြီး ကျန်သူများသည် မျိုးမပွားနိုင်ပေ။ သူတို့ကို မျိုးဆက်ဖြန့်ဝေသူများ ရှာရာတွင် အကူအညီပေးရန် ရွှယ်လင် ကတိပေးထားသည်။ အဘယ်ကြောင့်ဆိုသော် ပင်လယ်ရေနက် ရေသူများနှင့် မျိုးဆက်ဖြန့်ဝေသူများ အတူရှိခြင်းသည် ပင်လယ်ရေနက် ရေသူအသစ်များကို ဖန်တီးနိုင်မည်ဆိုသည့် တိကျသေချာသော ဖြစ်နိုင်ခြေတစ်ရပ်ရှိသောကြောင့်ပင်။

ဤသည်မှာ မျိုးနွယ်စုမှ အမွေဆက်ခံရရှိခဲ့သော အရေးကြီးသည့်ကိစ္စတစ်ရပ်ဖြစ်သောကြောင့် ရွှယ်လင် လန်အား သူ၏အစ်ကိုကြီးဖြစ်သူနှင့် လက်ထပ်ရန် အဆက်မပြတ် တိုက်တွန်းနေခဲ့သည်။

ဤအကြောင်းအရာကြောင့် လန် သူ့အိမ်မှ ထွက်ပြေးသွားပြီဖြစ်၏။

အမှန်တကယ်ပင်။ 

ရွှယ်လင် သူတို့၏ဧကရာဇ်ဖြစ်လျှင်ပင် တစ်နေ့လုံး ကလေးမွေးရန် တိုက်တွန်းနိုင်မည် မဟုတ်ပေ။

သူနဲ့ယန်ချူဟွမ်းက အတူရှိမနေရသေးချေ... ဧကရာဇ်က အဘယ်ကြောင့် သူ့ကို ယောင်းမဟုပင် ခေါ်နေရသည်လဲ...

နှစ်နှစ်အကြာ ဧကရာဇ်မင်းမြတ်အသစ် နန်းတက်သည့်နေ့တွင် ဧကရီနှင့် လက်ထပ်ခဲ့သည်။ အင်ပါယာ၏ အမြင့်ဆုံးဘုန်းကျက်သရေကို ကိုယ်စားပြုသည့် ဧကရာဇ်နှင့် ဧကရီရာထူးများနှင့် သူတို့အတူတကွ နန်းတက်ခဲ့ကြသည်။တစ်ချိန်တည်း၌ မြို့စားအိမ်တော်တွင်လည်း လက်ထပ်ထိမ်းမြားရန် တရားဝင်ဥပဒေအမိန့် ကျရောက်လာခဲ့သည်။

နောက်ဆုံးတွင် စစ်ဦးစီးချုပ်လော့သည် သူ၏ယခင် စေ့စပ်ကြောင်းလမ်းမှုကို နှစ်နှစ်အကြာတွင် အသစ်တစ်ဖန်ပြုလုပ်နိုင်ခဲ့သည်။ မဒမ်လော့သည် သူမက သားဖြစ်သူ၏ပျော်ရွှင်မှုကို လုံးလုံးလျားလျား မဖျက်ဆီးသွားစေမိသောကြောင့် နောက်ဆုံးတွင် စိတ်သက်သာရာရစွာ သက်ပြင်းချနိုင်ခဲ့သည်။

နောက်တစ်နှစ်အကြာတွင် ဧကရီသည် နဂါးနှင့် ဖီးနစ်အမြွှာတစ်စုံကို ဖွားမြင်ခဲ့သည်။ တစ်ယောက်သည် ချစ်စရာကောင်းသော မျိုးဆက်ဖြန့်ဝေသူဖြစ်ပြီး နောက်တစ်ယောက်သည် ရေသူဥတစ်လုံးဖြစ်ကာ တစ်နိုင်ငံလုံး အောင်ပွဲခံခဲ့ကြသည်။

ပင်လယ်ရေနက် ရေသူအများအပြား ကမ်းပေါ်သို့ ရောက်လာသောကြောင့် ယခုအခါ အင်ပါယာတစ်ခုလုံးသည် ချိုမြိန်သော ချစ်ခြင်းမေတ္တာ သမုဒ္ဒရာထဲတွင် ပိတ်မိနေခဲ့ကြပြီဖြစ်သည်။ လမ်းမများပေါ်တွင် စုံတွဲများနှင့် ပြည့်နှက်နေပြီး စိတ်ကူးယဥ်ဆန်မှုနှင့် အချစ်၏ ချဉ်စူးစူးရနံ့များသည် အင်ပါယာ၏ နေရာတိုင်းကို လွှမ်းခြုံထားသောကြောင့်နယ်စပ်မှပြန်လာသော ယန်ကျိုက်ယန်သည် နာကျင်မှုကို ရှောင်လွှဲရန် နည်းလမ်းမရှိခဲ့ပေ...

သူ ထွက်သွားခဲ့သည်မှာ သုံးနှစ်သာ ရှိသေးသော်လည်း မြို့တော်သို့ ပြန်ရောက်လာသည့်အခါ နေရာတစ်ခုလုံးသည် အကြီးအကျယ် ပြောင်းလဲသွားသည်ဟု ခံစားလိုက်ရသည်။ ရည်စားမရှိသူများ ဆက်လက်နေထိုင်ရန် ခွင့်မပြုသည့်နေရာတစ်ခုကဲ့သို့ပင်။

ယန်ကျိုက်ယန် ပြန်ရောက်လာပြီးနောက် ဒုတိယလတွင် လော့ချန်နှင့် ရွှယ်လင်တို့၏ လက်ထပ်ပွဲကြီးကို ကျင်းပခဲ့သည်။လူများများစားစားကို မဖိတ်ကြားခဲ့ပေ။ သို့သော် သူတို့ဧကရာဇ်မင်းမြတ်၏မင်္ဂလာပွဲဖြစ်သောကြောင့် ပင်လယ်ရေနက် ရေသူအားလုံး တက်ရောက်ခဲ့ကြပြီး ငယ်ရွယ်သည့် မျိုးဆက်ဖြန့်ဝေသူများကိုပါ ခေါ်ဆောင်လာခဲ့ကြသည်။ မင်္ဂလာပွဲသည် စုံတွဲများဖြင့် ပြည့်နေပြီး ယန်ကျိုက်ယန်၏ နှလုံးသားလေးသည် နောက်ထပ်တစ်ကြိမ် နာကျင်သွားရပြန်သည်။

လောကကြီးသည် ရည်းစားမရှိသည့် တစ်ကိုယ်ရေသမားများအပေါ် မနာလိုမှုများနှင့် ပြည့်နှက်နေပေသည်။ ညီငယ်နှစ်ယောက်စလုံး အိမ်ထောင်ကျပြီးဖြစ်ကာ အစ်ကိုဖြစ်သူသည်လည်း လအနည်းငယ်အကြာတွင် လက်ထပ်တော့မည်ဖြစ်သည်။ သူ့အတွက်တော့ လက်တွဲဖော်ပင် မရှိသေးပေ...

အိုး၊ နယ်စပ်မှ သူ့နောက်လိုက်လာသော စိတ်ဝေဒနာရှင် မျိုးဆက်ဖြန့်ဝေသူတစ်ယောက်သာ သူ့တွင် ရှိသည်။အဘယ်ကြောင့် သူ့တွင် ရေသူလေးတစ်ယောက်ပင် မရှိနိုင်ရသည်လဲ...

ဤကမ္ဘာတွင် ရှားပါးသော မိသားစုနွေးထွေးမှုမေတ္တာကို ရွှယ်လင် ခံစားခဲ့ရသည်။ သူ ယန်ချင်ကျွင်းနှင့် ကောင်းမွန်သောဆက်ဆံရေးကို အမြဲတမ်း ထိန်းသိမ်းထားခဲ့သည်။ သူနှင့်လော့ချန်တွင် သားသမီးမရှိသောကြောင့် ယန်ချင်ကျွင်းသည် သူ့ကို သူ့သားသမီးများထဲမှ တစ်ယောက်အား မွေးစားစေချင်ခဲ့သည်။

၎င်းသည် သူ့သားသမီးများကို မချစ်သောကြောင့် မဟုတ်ပေ။ သို့သော် ယန်ချင်ကျွင်းနှင့် ဧကရာဇ်သည် အလွန်ကြောက်စရာကောင်းလောက်အောင် လိုက်ဖက်ညီလွန်းသောကြောင့် သူတို့ မည်သည်ကိုမှ ဂရုမစိုက်ဘဲ အကာအကွယ်မပါဘဲ လုပ်မိလျှင် ကိုယ်ဝန်ရသွားလိမ့်ပေမည်။ အခု သူတို့တွင် မင်းသားငယ် လေးယောက် သို့မဟုတ် ငါးယောက်နှင့် ရေသူကလေး သုံးယောက်ရှိနေပြီဖြစ်သည်...

ကိုယ်ပိုင်ဘောလုံးအသင်းကို ဖန်တီးနိုင်စွမ်းရှိခြင်းသည် အိပ်မက်တစ်ခုသာသာမျှ မဟုတ်ပေ။ ရွှယ်လင်အား တစ်ယောက်မွေးစားခွင့်ပေးခြင်းသည် လုံးဝပြဿနာမဟုတ်နေချေ။

သို့သော် ရွှယ်လင်နှင့် လော့ချန်နှစ်ယောက်စလုံးသည် သူတို့နှစ်ယောက်ကြားတွင် ကလေးမရှိနေ‌စေချင်သောကြောင့် ငြင်းဆိုခဲ့ကြသည်။

ဤကမ္ဘာတွင် လော့ချန်သည် ရွှယ်လင်ထက် တစ်ကြိမ်ခြေတစ်လှမ်းစော၍ ထွက်ခွာသွားခဲ့သည်။ သူ၏အထောက်အထားကြောင့် လော့ချန် အသက်ကြီးလာချိန်တွင် ရွှယ်လင်သည် ယခင်ကအတိုင်း အမြဲတမ်း နုပျိုနေသေးသည်။ လော့ချန် သူ့ရှေ့တွင် မျက်၀န်းများပိတ်၍ သေဆုံးသွားသည်ကို ရွှယ်လင် ပထမဦးဆုံးအကြိမ်အဖြစ် ကြုံဖူးခြင်းဖြစ်သည်။ ထို့နောက် ရွှယ်လင် လက်ဆန့်ထုတ်ကာ သူ့လက်ကို တိတ်တဆိတ် ဆုပ်ကိုင်ထားလိုက်သည်။

သူ လော့ချန်၏ခန္ဓာကိုယ်နှင့်အတူ အင်ပါယာမှ ထွက်ခွာလာခဲ့ပြီး သမုဒ္ဒရာ၏ အနက်ရှိုင်းဆုံးနေရာထဲသို့ ဝင်ရောက်သွားခဲ့သည်။

သမုဒ္ဒရာ၏နက်ရှိုင်းဆုံးနေရာသည် သူ၏အမြီးတစ်ချောင်းကို ဖိနှိပ်ထားသည့်နေရာဖြစ်သည်။ ထိုအချိန်တွင် သူ၏အမြီးနှင့် ၎င်းစွမ်းအား၏လွှမ်းမိုးမှုကြောင့် ပင်လယ်ရေနက်ရေသူများ၏ ဘိုးဘေးများသည် သမုဒ္ဒရာအား ထိန်းချုပ်နိုင်သည့်စွမ်းရည်ကို ရရှိခဲ့ခြင်းဖြစ်သည်။ ယခု သူ အမြီးကို ပြန်ယူလိုက်သောအခါ ပင်လယ်ရေနက် ရေသူများ၏ 'ဧကရာဇ်' သည် သမုဒ္ဒရာကို ထိန်းချုပ်နိုင်စွမ်း ဆုံးရှုံးသွားပြီး သူ၏သေဆုံးမှုသည် သမုဒ္ဒရာ၏ ပြင်းထန်သော တုံ့ပြန်မှုကို မဖြစ်စေဘဲ ကမ္ဘာကြီးကိုလည်း မပြိုလဲသွားစေခဲ့ပေ။

မည်သို့ပင်ဆိုစေကာမူ သူသည် ပင်လယ်ရေနက်ရေသူ တော်ဝင်မျိုးနွယ်၏ နောက်ဆုံးမျိုးဆက်ဖြစ်ခဲ့သည်။ သူ သေဆုံးသွားလျှင် အမွေဆက်ခံမည့်မျိုးရိုးလည်း ပျက်ဆီးသွားပေလိမ့်မည်။

ရွှယ်လင်သည် နောက်သို့ တစ်ချက်လေးမျှပင် လှည့်မကြည့်ဘဲ ထွက်သွားခဲ့သည်။ သူ သေဆုံးသွားပြီးနောက် ဇာတ်ဆောင်များ၏ကံကြမ္မာ ပျက်ပျယ်သွားပြီး ကမ္ဘာအရပ်ရပ်သို့ အညီအမျှ ဖြန့်ကျက်သွားတော့သည်။

မူလက အပြောင်းအလဲမရှိသော ကမ္ဘာကြီးသည် ဤအခိုက်အတန့်တွင် ရုတ်တရက် အမှန်တကယ် အသက်ဝင်လာပုံရသည်။ ယခုအချိန်မှစ၍ ကမ္ဘာကြီးသည် သူ့ဘာသာသူ အရှိန်အဟုန်ဖြင့် ဖွံ့ဖြိုးတိုးတက်လာမည်ဖြစ်ပြီး ဇာတ်ကြောင်းကြောင့် တူညီသောလုပ်ငန်းစဉ်ကို ထပ်ခါထပ်ခါ ထပ်ခါတလဲလဲ ဆက်လက် ဖြစ်ပွားတော့မည်မဟုတ်ပေ။

ဤဇာတ်ကွက်များနှင့် ဇာတ်ဆောင်များသည် ကမ္ဘာကြီးကို ပုံမှန်လုပ်ရိုးလုပ်စဉ်အဖြစ် ပိတ်လှောင်ထားသည်။ သူတို့ ၎င်းကို မဖျက်ဆီးဘဲ ဇာတ်ဆောင်များ၏ဘဝကို လုံးဝ မပြောင်းလဲလျှင် ကမ္ဘာကြီးသည် တည်မြဲနေပေလိမ့်မည်။

ရွှယ်လင် သူ၏တတိယအမြီးကို ပြန်ယူလိုက်ပြီး နောက်ကမ္ဘာသည် ပို၍အန္တရာယ်များမည်ဟု အကူစနစ် သတိပေးလာသည့်အခါ သူ၏ခွန်အားကို အတူတကွပေါင်းစပ်လိုက်သည်။

ဇာတ်ဆောင်၏ကံကြမ္မာကို ပြောင်းလဲခြင်းအပြင် အခြားလူအချို့နှင့်လည်း ဆန့်ကျင်ဘက် ဖြစ်နေလိမ့်မည်။

"အခြားသူတွေလား" ကမ္ဘာများစွာကိုဖြတ်သန်းပြီးနောက် ဤအယူအဆကို ရွှယ်လင် ပထမဦးဆုံးအကြိမ်တွေ့ရှိရခြင်းဖြစ်သည်။

"ကောင်းပြီ၊ host သိတဲ့အတိုင်းပဲ အရပ်ဆယ်မျက်နှာကမ္ဘာက ကမ္ဘာတစ်ခုစီကို သူ့ရဲ့ကိုယ်ပိုင်သက်ဝင်လှုပ်ရှားနိုင်စွမ်းကို ပေးဆောင်ဖို့နဲ့ သူ့ကိုယ်သူ စွမ်းအားတွေ တိုးပွားလာဖို့အတွက် ကမ္ဘာပေါ်မှာ ကျန်ခဲ့တဲ့စွမ်းအင်တွေကို ပြန်လည်ရယူဖို့ အမြဲတမ်း ရည်ရွယ်ထားခဲ့တာ"

"တကယ်တော့ ဒီဟာက စည်းမဲ့ကမ်းမဲ့ ယှဥ်ပြိုင်ခြင်းနဲ့တူတယ်လို့ အမြဲတွေးနေခဲ့တာ။ အရပ်ဆယ်မျက်နှာကမ္ဘာက ကမ္ဘာရဲ့ကံကောင်းမှုကို လုယက်နေတာပဲ"

အကူစနစ် ချောင်းဟန့်လိုက်ပြီး "host ဒီလိုပြောနိုင်ပေမယ့် အဲဒါက host လုပ်နေတဲ့အရာတွေပဲလေ၊ ကျွန်တော်တို့ကို လူဆိုးတွေလို့ ပြောလို့မရဘူး" အကူစနစ်သည် အမြီးကို ဝှေ့ယမ်း၍ ရွှယ်လင်အား ရှင်းပြလိုက်သည်။ 

"အဲဒီကမ္ဘာတွေ ပြိုကွဲမသွားဘဲ အသစ်ပြန်လည်တည်ဆောက်နိုင်ရင်တောင် အဆုံးမဲ့သေဆုံးခြင်း သံသရာထဲမှာ ပိတ်မိနေပြီး နောက်ဆုံး လုံးလုံးတစစီဖြစ်သွားလိမ့်မယ်။ သတ်မှတ်ထားတဲ့ပုံစံအတိုင်း လည်ပတ်နေမှာဖြစ်ပြီး ဘယ်တော့မှ လွတ်မြောက်နိုင်မှာ မဟုတ်ဘူး"

"အို့ ဟမ်"

"ကျွန်တော်တို့က ဇာတ်ကွက်ကို ဖျက်ဆီးနေတာလေ ဒါပေမယ့် ကျွန်တော်တို့နဲ့ ဆန့်ကျင်ဘက်ဖြစ်နေတဲ့ ဇာတ်ကွက်ရဲ့တည်ရှိမှုကို ထိန်းသိမ်းဖို့ လုပ်ဆောင်နေတဲ့ တခြားသူတွေလည်း ရှိတယ်"

ရွှယ်လင် အဓိပ္ပါယ်မရှိသည့် ဇာတ်ကွက်များကို ပြန်လည်တွေးတောလိုက်ပြီး ထူးဆန်းမှုကို တွေ့လိုက်ရသည်။ "အဲဒီအရည်အချင်းမရှိတဲ့သူတွေနဲ့ အရှုပ်အထွေးတွေကို အကာအကွယ်ပေးဖို့ ကြိုးစားနေတဲ့သူတွေရှိတယ်လား"

"တကယ်တော့ သူတို့က ကျွန်တော်တို့နဲ့ တူညီတဲ့လမ်းကြောင်းပေါ်မှာ ရှိနေပေမယ့် ဇာတ်ဆောင်တွေရဲ့ ကံကြမ္မာကို လုယက်ဖို့ သူတို့မှာ အစွမ်းအစမရှိဘူး။ ဒါကြောင့် သူတို့က ဇာတ်ကွက်ကို ထိန်းသိမ်းဖို့ကိုပဲ ရွေးချယ်နိုင်ပြီး ရေရှည်ကပ်ပါးကောင်တွေ ဖြစ်လာကြတယ်။ ကမ္ဘာကြီးကို သူ့ရဲ့သံသရာကို အထပ်ထပ်အခါခါ ဖြတ်သန်းစေလိမ့်မယ်။ ဇာတ်ကွက်ကို လမ်းကြောင်းမှန်ပေါ်ရောက်အောင် သေချာလုပ်ပြီး သူတို့ရဲ့ကံကောင်းမှုနဲ့ ခွန်အားကို ခွဲဝေရယူဖို့ ဇာတ်ဆောင်တွေဘက်မှာ ရပ်တည်လိမ့်မယ်။ ဒါပေမဲ့ host စိတ်မပူပါနဲ့၊ သူတို့အားလုံးက အရပ်ဆယ်မျက်နှာကမ္ဘာလောက် မသန်မာတဲ့ အရှုံးသမားတွေပဲ၊ နောက်ပြီး သူတို့ကိုယ်တိုင် ပိုသန်မာလာစေဖို့အတွက် ဒီသေးငယ်တဲ့ ကံကြမ္မာအစိတ်အပိုင်းလေးတွေလောက်ကိုသာ အားကိုးနိုင်တယ်။ ကျွန်တော်တို့ သူတို့ကို တွေ့ရင် host သူတို့ကို သတ်ပစ်မှာ သေချာတယ်"

အကူစနစ်ရှင်းပြလာခြင်းနှင့် မရှင်းပြခြင်းကြားတွင် ကွာခြားမှုမရှိကြောင်း ရွှယ်လင် ခံစားရသည်။ မည်သို့ပင်ဆိုစေကာမူ သူလုပ်ရမည့်အရာများသည် ယခင်အတိုင်းပင်။

"host မှာ မေးခွန်းတွေ ဒါမှမဟုတ် စိုးရိမ်စရာတွေမရှိရင်၊ ကျွန်တော်တို့ နောက်ကမ္ဘာကို ချက်ချင်းဝင်ရောက်မယ်။ ရင်းရင်းနှီးနှီး အကြံပေးရရင် host အွန်လိုင်းပေါ်ရောက်တာနဲ့ တိုက်ပွဲဖြစ်နိုင်တယ်။ host ပိုပြီးပြင်ဆင်ထားရင် အကောင်းဆုံးဖြစ်လိမ့်မယ်"

ဤသို့ဖြင့် နောက်ဆုံးတွင် ရွှယ်လင် စိတ်အားထက်သန်လာသည်။

အမြီးသုံးချောင်းကို ပြန်လည်ရရှိပြီးနောက် သူ၏ခွန်အားသည် အနည်းငယ် ပြန်လည်သက်သာလာပြီး ကမ္ဘာများ၏ဇာတ်ကြောင်းတွင် သူ့ကိုယ်ပိုင်စွမ်းအားကို အနည်းနှင့်အများ အသုံးချနိုင်ပေလိမ့်မည်။ အကယ်၍ ၎င်းသည် ရိုးရှင်းသောကမ္ဘာမဟုတ်ဘဲ စည်းမဲ့ကမ်းမဲ့ ဖရိုဖရဲဖြစ်နေလျှင် ၎င်းသည် သူ၏စွမ်းအားများနှင့် ရင်းနှီးကျွမ်းဝင်မှုကို ပြန်လည်လေ့ကျင့်ရန် သူ့အတွက် ပြီးပြည့်စုံသော အခွင့်အရေးတစ်ခုပင်ဖြစ်သည်။

"စကားမစပ်… ဒီတစ်ခါ host ရဲ့ အထောက်အထားက တော်တော်ထူးခြားတယ်။ ရွံမုန်းစရာကောင်းတဲ့အရာတွေ ရှိကောင်းရှိနိုင်ပေမယ့် OOCမဖြစ်စေဘဲ နောက်ဆုံးကမ္ဘာကလို ဇာတ်ကောင်စရိုက်အတိုင်းဖြစ်ဖို့ host ကြိုးစားနိုင်မယ်လို့ မျှော်လင့်ပါတယ်" 

နှစ်ကြိမ်တိုင်တိုင် အကူစနစ် တွန်းအားပေးလာခြင်းသည် ရှားပါးပြီး ၎င်းသည် ရွှယ်လင်အား သူနှင့်နောက်ထပ်ထိတွေ့ရမည့် ကမ္ဘာအကြောင်းကို ပိုမိုစိတ်ဝင်စားသွားစေသည်။

သူ့မျက်၀န်းများကို နောက်တစ်ကြိမ် ပြန်ဖွင့်လိုက်ပြီးနောက် ဤစိတ်ဝင်စားမှုသည် အထွတ်အထိပ်သို့ ရောက်ရှိသွားသည်။

ယခုလေးတင် မျက်လုံးဖွင့်လိုက်သောသူသည် လက်ရှိတွင် ရုပ်ဖျက်ထားသော SUV ကားပေါ်တွင် မတ်တပ်ရပ်နေသည်။ သူ့မြင်ကွင်းမှကြည့်လျှင် ပြိုပျက်နေသောမြို့ကို မြင်နိုင်သည်။ အိမ်များသည် မီးခိုးများထွက်နေဆဲဖြစ်ပြီး အလောင်းကောင်များသည် ရွေ့လျားနေကာ မြေပြင်တစ်ခုလုံး သွေးများစွန်းထင်းနေသည်ကို မြင်နေရသည်။

အကူစနစ်ပြောသည့် တိုက်ခိုက်ခြင်း၏ဆိုလိုရင်းကို ရွှယ်လင် ချက်ခြင်းနားလည်သွားရသည်။

သူ၏လျှင်မြန်သော ဉာဏ်ရည်ဥာဏ်သွေးကို ဆွဲယူလိုက်ပြီးနောက် အတိအကျ ဘာတွေဖြစ်နေလဲဆိုသည်ကို လှမ်းကြည့်လိုက်တော့မည့်အချိန်တွင် ကားအောက်မှအော်သံများ ထွက်လာပြီး သူ့အား စိတ်ရှုပ်ထွေးသွားစေသည်။

တစ်စုံတစ်ယောက်သည် ကြမ်းတမ်းစွာ အော်ဟစ်နေပြီး "အစ်ကိုဟန်!!! အစ်ကို အဆင်သင့်ဖြစ်ပြီလား!!! ကျွန်တော်တို့ မထိန်းထားနိုင်တော့ဘူး"

ရွှယ်လင် ဘာတွေဖြစ်နေမှန်း မသိပေ။ သူ့မှတ်ဥာဏ်များသည် လွှဲပြောင်း၍မပြီးသေးပေ။ ထို့အပြင် သူ ဤနေရာတွင် ရူးကြောင်ကြောင် ဘာရပ်လုပ်နေသည်ဆိုသည်ကိုလည်း သူ မသိပေ။

အခြေအနေသည် အနည်းငယ် တင်းမာနေသော်လည်း ရွှယ်လင် ပတ်ဝန်းကျင်ကို အေးဆေးတည်ငြိမ်စွာ ကြည့်လိုက်သည်။ သူ့ပတ်ဝန်းကျင်တွင် ဖုတ်ကောင်များ ပို,ပို၍များလာနေပြီး ဘာမှမလုပ်လျှင် သူတို့အဖွဲ့ ဤနေရာမှာပင် အဆုံးသတ်သွားနိုင်သည်။

အမ်... သူ ကြီးကြီးမားမား တစ်ခုခုလုပ်ဖို့ ဒီနေရာမှာ မတ်တပ်ရပ်နေပြီး သူတို့အားလုံးကို တစ်စစီ ဖျက်ဆီးပစ်ဖို့များလား...

ဒါဆို သူ သူတို့ကို ဖျက်ဆီးပစ်မယ်...

မူရင်းဇာတ်ကောင်တွင် မည်ကဲ့သို့သော အရည်အချင်းများရှိလဲဆိုသည်ကို သူ ရှင်းရှင်းလင်းလင်း မသိသော်လည်း သူ့ကိုယ်ပိုင်အစွမ်းနှင့် ထိုအရည်အချင်းများကဲ့သို့ အရာများကို တုပနိုင်ပေသည်။

ရွှယ်လင် နှုတ်ခမ်းကို ကွေးညွတ်ကာ ခေါင်းကို ငုံ့လိုက်ပြီး တစ်မြို့လုံးကို အေးခဲသွားစေချင်သကဲ့သို့ ရေခဲပြင်အကျယ်ကြီးကို ဖြန့်ကျက်လိုက်တော့သည်။ ထိုရေခဲပြင်သည် ခိုင်ခံ့ပြီး အေးစက်လွန်းလှသည်။

🦊Arc 7 - ကြက်ခြေခတ်ငါးလေး၏ဘဝ END.