MM Story Teller

Chapter 113

Viewers 3k

🦊Arc 8 - အမှားယွင်းဆုံး အမျိုးသားဇာတ်ဆောင်

Chapter 113

8.5 - ဘယ်သူ့ကိုစိန်ခေါ်ချင်လဲ

ရွှယ်လင် ဒုတိယမြောက်စွမ်းရည်ရသွားသည့်သတင်း ပျံ့သွားရန် သုံးရက်သာကြာမြင့်လိုက်သည်။ ယန်ရှန်းအခြေစိုက်စခန်းက မကြီးမားပေ။ သတင်းကအမြန်ပျံ့သွားခဲ့ပြီး မကြာခင်မှာပင် လူတိုင်းစေ့သိသွားကြလေတော့သည်။

တချိန်တည်းမှာပင် ချုးဟန်၏အသင်းက ၎င်းတို့၏အသင်းအမည်ကို 'နှင်းမြေခွေးကြေးစားတပ်'

ဟူ၍ပြောင်းလဲလိုက်ပြီး အသင်းသားအသစ်များ အချိန်ကိုက်ဝင်လာစေရန် ဆွဲဆောင်လိုက်သည်။ ရုတ်ချည်းပင် ယန်ရှန်းအခြေစိုက်စခန်းတခုလုံး အလုပ်ရှုပ်သွားကြတော့၏။ တကွဲတပြားဖြစ်နေသည့်လူတိုင်း အချိန်တိုအတွင်းမှာပင် ၎င်းတို့၏သဘောထားကို ထုတ်ပြလာကြကာ ဝင်ခွင့်ဖြေရန်အတွက် ဝင်ရောက်စာရင်းသွင်းလာကြသည်။

အဖွဲ့ဝင်အသစ်စုဆောင်းရေးအတွက် အချက်အလက်အသေးစိတ်ကို ရွှယ်လင်က ဦးစီးခဲ့သည်။ အဖွဲ့ဝင်ဖြစ်ရရေးအတွက် ထိုသူတို့က သူ့အား အမွှေးတိုင်ထွန်းကာ ပူဇော်ရန်မလိုအပ်သည့်တိုင် အခြေခံအချက်အရ ကြေးစားတပ်ကို နာမည်ဆိုးထွက်အောင် လုပ်ခွင့်မပေးနိုင်ပေ။ ဇာတ်လိုက်အနားတွင် လူထူးဆန်းအချို့ ပေါ်လာတတ်လေ့ရှိပြီး ဇာတ်လိုက်အနားမှအဖွဲ့ကို အကျပ်အတည်းတွေ့စေမည့် ထူးထူးဆန်းဆန်းကိစ္စများ လုပ်လာကြလေ့ရှိသည်။ ဤတခေါက်တွင် ရွှယ်လင်သည် ဇာတ်လိုက်နေရာကို ပထမဆုံးရလာခဲ့ပြီး ဇာတ်ကြောင်းထဲမှ သူ့ပုံစံကလည်း အမြှောက်စာကောင်နှင့်သာပို၍ဆင်တူသောကြောင့် အနည်းငယ်မျှ ပိုပြီးဂရုစိုက်ရလိမ့်မည်ပင်။

သူသည် သူ့အားဒုက္ခပေးလာမည့် မည်သူ့ကိုမှ သည်းခံနေမည်မဟုတ်။ ၎င်းကြောင့် သူ လူသတ်ချင်လာလိမ့်မည်။ သူ့ဘက်ကသာ လက်တဖက်တည်းနှင့် အပြတ်ရှင်းပစ်လိုက်လျှင် အချိန်ကုန်ခံပြီး ရှင်းပြနေသည်ထက် ပိုကောင်းလိမ့်မည်သာ။

"Host ကဘာလို့ ဇာတ်လိုက်ကို တခါတည်းမောင်းထုတ်ပစ်လိုက်တာလဲ..." စနစ်သည်ကား ရွှယ်လင်၏လုပ်ရပ်ကို နားမလည်နိုင်ဖြစ်နေဆဲ။

"သူ့ကို စောင့်ကြည့်ရလွယ်တဲ့နေရာမှာထားလိုက်တာ ပိုမကောင်းဘူးလား..ငါတို့ဘေးမှာရှိနေရင်တောင် ဘာမှဖြစ်မှာမဟုတ်ဘူးလေ..ဟုတ်တယ်မလား..."

"ရာနှုန်းပြည့်မမှန်နိုင်ဘူး..." ရွှယ်လင် ယန်ရှန်းအခြေစိုက်စခန်းမှ ပင်မအင်အားစုများပါနေသော အချက်အလက်ဖိုင်တွဲများကို လှန်လှောနေရင်း ပေါ့ပေါ့ပါးပါးပြောလိုက်သည်။ "ဇာတ်လိုက်ဆိုကတည်းက ပြဿနာဖြစ်နေပြီ...ပြီးတော့...အဲဒီဇာတ်လိုက် shou ရဲ့ဦးနှောက်က သိပ်ကောင်းပုံမရဘူး... ငါသာ သူ့ကိုတကယ်သဘောကျလို့ ဘေးမှာထားပြီး တလောကလုံးကကိစ္စတွေကို သူ့ကိုပြောပြလိမ့်မယ်လို့ ယုံကြည်နေတာဆိုရင်တော့ တကယ်ကိုအံ့ဩစရာကြီးဖြစ်မှာ..."

"....."

"သူ့ဇာတ်ကောင်က ဒေါသကြီးပြီး ပိုင်ဆိုင်ချင်စိတ်များတယ်...ငါတို့သာ မှန်အောင်ခန့်မှန်းရရင်...ငါက သူ့အပေါ်မှာ ခံစားချက်ရှိနေသေးတယ်လို့ ထင်နေအုံးမှာပဲ...ဒီတခါ သူ့ကို တခါတည်းနှင်ထုတ်လိုက်တာက ငါက ငါ့အဖွဲ့ဘက်မှာပဲ ရပ်တည်မယ်လို့ပြောလိုက်တာ..." သူ မေးစေ့ကိုကိုင်ပြီး အဓိပ္ပါယ်တမျိုးဖြင့် ရယ်လိုက်သည်။

"ငါ သူ့ကိုစွန့်ပစ်လိုက်တာကလည်း ကိစ္စကြီးမဟုတ်ပါဘူး...သူ ပြန်လာမှာသေချာနေတာပဲဟာ...သူက ဇွန်ဘီဘုရင်နဲ့တိုက်ရဖို့ ငါ့ကို စာရင်းထဲထည့်ထားတာကိုလည်း မေ့မနေနဲ့ဦး..."

"Hostဆိုလိုချင်တာက..အဖွဲ့ဝင်အသစ်တွေခေါ်နေတဲ့အချိန်မှာ သူပြန်လာမယ်လို့ပြောချင်တာလား..."

"စောင့်ကြည့်နေ...သူတစ်ယောက်တည်းတင်မကဘဲ ယုတ္တိရှိအောင်ပါလုပ်လာဦးမှာ..."

သည်အချိန်မှာပင် ဟယ့်ယန်ခမျာ နှင်းမြေခွေးကြေးစားတပ်၏ မနက်ဖြန် လူသစ်ရွေးချယ်မည့်နေရာကိုသွားနိုင်ရန်နှင့် ကျောချမ်းစရာဇွန်ဘီခေါင်းဆောင်ထံမှ လွတ်အောင်ထွက်ပြေးနိုင်မည့်နည်းလမ်းအား စဥ်းစားနေရရှာသည်။

မြို့တွင်းသို့ဝင်လိုက်သည်နှင့် ဇွန်ဘီခေါင်းဆောင်သည် လမ်းကိုမှတ်မိနေသည့်အတိုင်း အိမ်ရှိရာသို့မောင်းလာခဲ့သည်။ ထို့နောက် အဆိုပါနေရာတွင်ပင် အလွန်အမင်းသဘာဝကျစွာ အခြေချနေထိုင်ခဲ့သည်။ ဟယ့်ယန်မှာ သူ့အနောက်သို့ တလမ်းလုံးလိုက်လာရပြီး မယုံကြည်နိုင်ဖြစ်သွားရလေ၏။ ဘယ်အချိန်တည်းက ဇွန်ဘီတွေ ဒီလိုမျိုး စိတ်လွတ်ကိုယ်လွတ်သွားလာနိုင်နေတာလဲ? ပြီးတော့ ကိုယ်ပိုင်အိမ်တောင်ရှိလိုက်သေးတယ်... ယန်ရှန်းအခြေစိုက်စခန်းရဲ့လုံခြုံရေးစနစ်က ဇွန်ဘီတွေဒီလိုမျိုး ဘယ်သူမှမသိဘဲ တံခါးမရှိဓားမရှိသွားလာနေရလောက်အောင် အားနည်းနေတာလား..

အချို့သောဆန်းကြယ်သည့်အကြောင်းပြချက်များအရ ဇွန်ဘီခေါင်းဆောင်သည် ဟယ့်ယန်ကို သူ့အိမ်တွင် နေခွင့်ပေးခဲ့သည်။ သုံးရက်အတောအတွင်း အမျိုးမျိုးသောခန့်မှန်းတွက်ဆချက်များက သူ့ခေါင်းထဲတွင် မွှေနှောက်နေခဲ့၏။သူ ယနေ့ အပြင်ထွက်လာပြီး ချုးဟန်က သူ့ကို သူ(ချုးဟန်)နှင့်ပြန်သင့်မြတ်ရန် ယန်ရှန်းအခြေစိုက်စခန်းသို့ ပြန်ခေါ်နေကြောင်း မသိခင်အထိပင်...

သုံးရက်တာအတွင်း ဇွန်ဘီခေါင်းဆောင်သည် အချိန်မှန်အပြင်ထွက်လေ့ရှိသည်။ ဟယ့်ယန် တဖက်လူနောက်သို့ နောက်ယောင်ခံလိုက်ရန် ကြိုးစားသေးသော်လည်း မည်သို့ပင်ဖြစ်စေ အမိခံရနိုင်သည်ပင်။ ဟယ့်ယန်၏စနစ်က ၎င်းတို့၏ လက်ရှိစွမ်းအားက တဖက်လူကိုမမီနိုင်ကြောင်း သတိပေးနေခဲ့သည်။ အနှီသူကို ရန်သွားမစခြင်းကပိုကောင်းပြီး ဟယ့်ယန်မှာ တဖက်လူကို မြို့ထဲမဝင်နိုင်အောင်လုပ်မည့်အစီအစဥ်အား လက်လျှော့လိုက်ရတော့သည်။

သည်မနက်တွင် သူသည် ချုးဟန်၏နှင်းမြေခွေးကြေးစားတပ်သို့သွားရန် ပြင်ဆင်နေရသည်။ သို့ထိတိုင် ဇွန်ဘီခေါင်းဆောင်ကို မည်သို့ရှင်းပြရမှန်းမသိ၍ အထပ်ထပ်အခါခါစဥ်းစားနေရသေး၏။ မရေမတွက်နိုင်သည့် ပြကွက်ဟောင်းလေးများက သူ့ဦးနှောက်ထဲတွင် ပြေးလွှားနေကြပြီး နောက်ဆုံး၌မူ သူအပြင်မထွက်ခင်အထိ ထိုလူကို မည်သည့်စကားမျှ မပြောထွက်ခဲ့ပါချေ။

၎င်းက အဓိပ္ပါယ်ရှိပါသည်။ အပြန်အလှန်ဆက်ဆံခဲ့ကြသည့် သုံးရက်ကျော်အတွင်း ထိုသူကို မြို့ထဲမဝင်အောင်တားသည့် ပထမဆုံးရက်တွင်သာ သူတို့စကားပြောခဲ့ဖူးကြသည်။

🦊

ရွှယ်လင်သည် ပိုကြီးမားအောင်လုပ်ချင်သည့်စိတ်ဖြင့် တကြိမ်တည်းနှင့်ပင် ၎င်းတို့၏ဘဏ္ဍာငွေများကို သုံးပစ်ခဲ့သည်။ အနီးနားရှိနယ်မြေများကို သိမ်းပစ်ရုံမက အနာဂတ်တွင် နေထိုင်နိုင်မည့်အိမ်ရာများအဖြစ်ပါ ပြောင်းလဲပစ်လိုက်သည်။ ၎င်းတို့၏ငွေများကို ရိက္ခာများဝယ်ယူရန်အတွက် သုံးစွဲခဲ့သည်။ ဤနည်းလမ်းဖြင့် ကလေးများကို ကြောက်အောင်မခြောက်မိတော့ပေ။ ဝံပုလွေများကို ထောင်ချောက်ဆင်ရန်နှင့် ပိုက်ဆံမသုံးဘဲ အဖွဲ့ဝင်အသစ်များကိုစုဆောင်းရန်က မဖြစ်နိုင်ပါချေ။ လက်အောက်ငယ်သားကောင်းကောင်းရရန် ၎င်းတို့ကို အနည်းငယ် ခြောက်လှန့်ထားရန်လိုသည်။

"ဒီနေ့ကစပြီး သုံးရက်အတွင်း စမ်းသပ်ချက်အောင်မြင်တဲ့သူတွေကို ငါတို့အတူခေါ်သွားမယ်...ရှင်းယွဲ့တောင်နဲ့ပတ်သက်သမျှ ကြေးစားတာဝန်တွေကို ငါအားလုံးလက်ခံတယ်..တာဝန်က မပျက်မကွက်ထမ်းဆောင်ရမယ်...ဒီခရီးစဥ်ပြီးရင် နေရမယ့်သူတွေရွေးချယ်ပေးမယ်..."

ရွှယ်လင်က ကြေညာချက်တွင်ပါရမည့်စကားမှန်သမျှ ချရေးနေသော တုစစ်နီကိုကြည့်လိုက်သည်။ ရွှယ်လင် ခေါင်းညိတ်ပြီးဆက်ပြောလိုက်၏။

"ဒီလောက်ပဲ...အပြင်မှာကြေညာလိုက်...ဒီနေ့ ဒီကြေညာချက်ကိုလာကြည့်တဲ့သူဘယ်သူမဆို...လိုက်ချင်တဲ့သူဘယ်သူမဆို လိုက်လို့ရတယ်...ငါကတော့ သူတို့နဲ့အချိန်မရွေး အတူရှိနေပေးနိုင်တယ်..."

တုစစ်နီသည် အတွင်းရေးမှူးအလုပ်ကို လုပ်ကိုင်လာသည်မှာကြာမြင့်ခဲ့ပြီဖြစ်၍ သည်အလုပ်နှင့် အဆင်ပြေသလိုခံစားရသည်။ ရွှယ်လင်၏သည်နှစ်ရက်အတွင်း လုပ်ဆောင်ချက်များက မဆိုးလှပေ။ သူတို့၏ဘော့စ်က ပိုပြီးဉာဏ်ကောင်းလာရင်း အစွမ်းအစရှိလာသည်ဟု သူမ တွေးမိသည်။ ယခုမူ ချူးဟန်၏စကားကို စုံလုံးကန်းတော့မည်အထိ နားထောင်လာလေသည်။

ချုးဟန်၏ရုပ်ရည်က ချောသည်ဟုမဆိုသာပေ။ သူ နှုတ်ခမ်းများကိုဖိလိုက်သည့်အချိန်တိုင်း အေးစက်သည့်အသွင်ပေါ်လာစေပြီး ကမ္ဘာပျက်ကပ်မတိုင်ခင်ကဆိုလျှင် အာဏာရှင်ဆန်သည့်ပုံစံဟု ဆိုနိုင်သည်။ အနှီသူသည် အရပ်ရှည်ပြီး ပေါင်မုန့်ခြောက်လုံးရှိသည်။ ပိုက်ဆံရှိပြီး ရုပ်ရည်က ကြည့်ကောင်းပြေပြစ်သည်။

ထို့နောက် ကမ္ဘာပျက်ကပ်ဖြစ်ပျက်ခဲ့သည်။ ယခု ရွှယ်လင်က အနှီအခွံကို ဖယ်ချွတ်ပစ်လိုက်ပြီး သူ၏ပုံစံမှာလည်း ရုတ်တရက်ပြောင်းလဲသွားခဲ့သည်။မပြောင်းမလဲကျန်ရစ်ခဲ့သည့် တခုတည်းသောအရာမှာ မျက်လုံးထောင့်မှ မျက်ရည်ခံမှဲ့လေးသာဖြစ်ပြီး စူးရှသောမျက်ဝန်းတစုံကလည်း ခံစားချက်ကင်းမဲ့ပြီး ညို့ငင်အားပြင်းသည့် မြေခွေးမျက်ဝန်းတစုံအဖြစ် ပြောင်းလဲသွားခဲ့၏။ ရက်စက်ကြမ်းတမ်းစွာဖြင့် သတ်ဖြတ်တတ်ပုံက များစွာမပြောင်းလဲသွားခဲ့ပေ။ မည်သူကမှ ထိုမျက်နှာကိုကြည့်ရန် သတ္တိမရှိကြ။ လူနည်းစုလေးက ၎င်းတို့၏အစ်ကိုကြီးက အကြည့်လေးတချက်တည်းနှင့်ပင် လူများကိုမိန်းမောစေပြီး အနှီသူခြေဖျားတွင် ဒူးထောက်ချင်လာသည်အထိ ကြည့်ကောင်းလာမှန်း သတိမထားမိကြဘဲ မနေနိုင်ကြချေ။

နှင်းမြေခွေးကြေးစားတပ်၏ လူသစ်စုဆောင်းမှုက

စိန်ခေါ်တိုက်ခိုက်သည့်စနစ်ကို အခြေခံထားသည်။ နေ့ဘက်အချိန်တွင် မည်သူမဆိုသွားပြိုင်နိုင်ပြီး အတော်လေးစည်ကားသောကြောင့်ဖြစ်နိုင်သည်။ပွဲကျင်းပနေသည့်နေ့ဘက်တွင် လူအမြောက်အများက သွားအားပေးတတ်ကြသည်။

ရွှယ်လင်က အေးအေးလူလူပင် ပွဲကျင်းပသည့်နေရာသို့သွားကာ စိတ်လွတ်လက်လွတ်ယှဥ်ပြိုင်နိုင်သည့်ပွဲအဖြစ် ပြောင်းလိုက်သည်။ သူက ထိုင်ခုံကိုရွှေ့ထိုင်ကာ မေးထောက်ထားရင်း ဘော့ပင်တချောင်းကို လှည့်ကစားနေသည်။ သူ့ပုံစံက အနည်းငယ်ပျင်းရိနေပုံဖြစ်လင့်ကစားမည်သူကမှသူ့အား မဝေဖန်ရဲကြပေ။

မည်သူပင်ဖြစ်စေ သူ့အားတချက်ကြည့်လိုက်ကြသည်နှင့်၎င်းတို့ကိုယ်ပေါ်သို့ ရေခဲတလွှာဖုံးအုပ်လိုက်သလို ခံစားရလိမ့်မည်။ အဝေးသို့အကြည့်လွှဲလိုက်သည့်အခါ အဆိုပါရေခဲလွှာက မယုံနိုင်ဖွယ်ကောင်းလောက်အောင် ပျက်ပြယ်သွားလိမ့်မည်ပင်။ ဤအခြေအနေမျိုးတွင် သူ့အားရန်စရန်ကြိုးစားလာသူတိုင်းက သေမင်းတမန်ကိုလိုက်ရှာနေသည်နှင့် တူလိမ့်မည်ဖြစ်သည်။ စွမ်းရည်အသုံးပြုသူတိုင်းက ဤအခြေအနေကို ထိန်းချုပ်ရန်သိကြပြီး မည်သူကမှလည်း သေမင်းကိုလိုက်မရှာချင်ကြ။

ကွင်းထဲရှိပြိုင်ပွဲက ချောချောမွေ့မွေ့ဖြင့် ဆက်လက်ကျင်းပနေဆဲ။ ရွှယ်လင်က လက်ခံ၍ရလောက်သည့်လူများ၏ အမည်ကို ချရေးနေပြီး တုစစ်နီက သူတို့နှင့်ဆက်သွယ်ရန်လုပ်နေသည်။

အဆိုပါ ငြိမ်သက်နေသောအခြေအနေက ဟယ့်ယန်ပေါ်မလာခင်အထိသာ ကြာရှည်ခံခဲ့သည်။

ရွှယ်လင်သည် အနှီကမ္ဘာမှ ဇာတ်လိုက် shou ၏ဦးနှောက်အလုပ်လုပ်ပုံကို သိချင်စိတ်ဖြစ်နေခဲ့သည်။ ဇာတ်လိုက် gong ၏ တည်ဆောက်ပုံက လယ်ဗယ်မြင့်အမြှောက်စာကောင်နှင့် ဆင်တူ၏။ ဇာတ်လိုက် shou ကို ကြံရာပါအနေဖြင့်ပုံဖော်ထားလျှင် ၎င်းကို အိုင်ကျုနိမ့်သည့်လူအနေဖြင့် ဖန်တီးထားသင့်ပေမည်။ စာရေးဆရာက နှစ်ဖက်လုံးကို ကျိန်းသေမုချရန်တိုက်ထားခြင်းပင်။

ရွှယ်လင်သည် ဟယ့်ယန်နှင့်ချုးဟန်တို့နှစ်ယောက်ကြားမှကိစ္စကို လက်တုံ့ပြန်ရန် ရည်ရွယ်ချက်မရှိသည့်အပြင် သူ၏ပင်ကိုယ်ခွန်အားကို တိုးတက်စေရန်မှာ အချိန်အတိုင်းအတာတစ်ခုအထိ လိုအပ်သည်။ သူ အနှီသူကိုမသတ်နိုင်လောက်အောင် ဟယ့်ယန်နှင့်ဆက်ဆံရန် ပျင်းရိလွန်းနေသောကြောင့် ထိုသူကို နှင်ထုတ်ရန်သာတတ်နိုင်ခဲ့သည်။ ထိုသို့လုပ်လိုက်ရသည့်အတွက်ကြောင့်လည်း ဟယ့်ယန်က သူ့ကိုယ်သူအတွက် သေလမ်းလာရှာမည်မဟုတ်ချေ။

ဟယ့်ယန်က အမြန်ပြေးဝင်လာပြီး ရွှယ်လင်ကိုတွေ့သည်နှင့် သူ၏အပြုံးမှာ ငွားငွားစွင့်စွင့် ပွင့်ဖူးလာသောပန်းလေးတစ်ပွင့်နှယ်။

"အစ်ကိုကြီးဟန်!"

လူတိုင်းက သူ့အသံကြောင့် အာရုံစိုက်လာကြသည်၊ အများစုက သူ့အားမြင်လိုက်သည်နှင့် နားလည်သွားကြ၏။ ချုးဟန်နှင့်ဟယ့်ယန်သည် ယန်ရှန်းအခြေစိုက်စခန်းတွင် လူသိမများကြပေ၊ သို့ထိတိုင် ၎င်းတို့က တနှစ်နီးပါးခန့် မျက်မှန်းတန်းမိသည်အထိ နေထိုင်ခဲ့ကြပြီးနောက် ပတ်ဝန်းကျင်ရှိလူတိုင်းကလည်း သူတို့အားရင်းနှီးလာကြသည်။ ၎င်းတို့၏ဆက်ဆံရေးသည်ကား ပုံမှန်အရ ဖုံးကွယ်ထားစရာမဟုတ်ပေ။

ရွှယ်လင်သည် ပြန်ရောက်လာပြီးနောက်ပိုင်း ထိုနေ့ညတည်းက အနှီဇာတ်လိုက် shou ကောင် ယန်ရှန်းအခြေစိုက်စခန်းကို ပြန်မလာနိုင်လျှင်အကောင်းဆုံးဟုပင်တွေးထားခဲ့သည်။ ထို့နောက် အပြင်ဘက်မှ ဇွန်ဘီသားရဲများ၏အကိုက်ခံရပြီး သေသွားလိမ့်မည်။ ၎င်းကိစ္စတစ်ခုတည်းကသာ သူ့စိတ်ထဲ လေးလံနေခဲ့သည်ပင်။ သို့တစေ ဟယ့်ယန်က သူဖြစ်ချင်သည့်အရာနှင့် ပြောင်းပြန်ဖြစ်သွားခဲ့သည်။ သူသာ အနှီပြဿနာကောင်ကို ပြန်သယ်လာခဲ့သူကိုသိရလျှင် ၎င်းကိုဖမ်းပြီး မျက်ခွက်တည့်တည့်ကို ထိုးကြိတ်ပစ်လိုက်မည်ဖြစ်သည်။

ရွှယ်လင် နှုတ်ခမ်းကိုဖိ၍ သူ့အမူအရာက အေးစက်သွားရပြီး စကားပင် ကောင်းကောင်းမပြောနိုင်တော့ပေ။ "မင်းက ဒီကိုဘာလာလုပ်တာလဲ..."

ဟယ့်ယန်က နားလည်ရခက်စွာရယ်လိုက်ပြီး သူ့အပြုံးက တဖက်လူကိုပင် ဦးညွတ်လာစေသည်။

"ကျွန်တော် နှင်းမြေခွေးဖြူကြေးစားတပ်ကို လာပြန်ဝင်တာလေ...အစ်ကိုကြီးကိုယ့်လမ်းကိုယ်သွားရမယ်လို့ပြောတုန်းက ကျွန်တော်မယုံကြည်ခဲ့ဘူး...ကျွန်တော်မတော်တဆဖြစ်သွားတာကြောင့် အစ်ကိုကြီးကို စိတ်ပဲဆိုးနေမိတာ...ပြီးတော့ ကျွန်တော်ကြိုးစားရင် အစ်ကိုကြီးဟန်က ပြန်ခွင့်လွှတ်မှာမလား!"

ရွှယ်လင်က သူ့ကိုပျင်းရိပျင်းတွဲဖြင့် တချက်ကြည့်သည်။ "မင်းက မင်းကိုယ်မင်း ရို့မန့်တစ်ဒရမ်မာထဲက ဇာတ်လိုက်မင်းသားလို့ ထင်နေတာလား..."

ဟယ့်ယန်: "...."

"မင်းက အကောင်းဆုံးဖြစ်အောင်ကြိုးစားပြီး ဘာမှမဖြစ်ခဲ့သလိုမျိုး အစကပြန်စမလို့ တွေးနေတာလား.." ရွှယ်လင် နှာမှုတ်လိုက်သည်။

"ဟယ့်ယန်..နိုးထလိုက်ပါတော့ကွာ..ဒါက အမှန်တရားပဲ....ဘယ်သူကမှ မင်းကိုသဘောမကျကြဘူး... ဘယ်သူကမှလည်း မင်းကိုခွင့်မလွှတ်ဘူး..."

ဟယ့်ယန်က ထပ်မံတောင့်တင်းသွားပြီး ခဏတွင်းချင်းပင် သူ့မျက်၀န်းများက နီရဲလာပြန်တော့သည်။ သူ၏လက်ရှိပုံစံကြောင့် အကြောင်းမသိသူဆိုလျှင် ရွှယ်လင်က သူ့ကိုတခုခုလုပ်လိုက်သလိုပင် ထင်ကြဦးမည်။ "ဘာလို့လဲ..တကယ်ပဲ...ကျွန်တော်က ဘာလုပ်လိုက်မိလို့လဲ..."

"မင်း တသက်လုံးနားလည်မှာမဟုတ်ဘူး... ပြီးတော့...မင်းဖြည်းဖြည်းချင်းနားလည်သွားတဲ့အထိလည်း ငါစောင့်မနေနိုင်ဘူး.."

ရွှယ်လင်က တည့်တိုးသာပြောလိုက်သည်။

"ဒီနေ့..ငါ မင်းကို ခပ်ရှင်းရှင်းပဲပြောလိုက်မယ် - နှင်းမြေခွေးကြေးစားတပ်မှာ ဒီတစ်သက် မင်းအတွက်နေရာမရှိဘူး...နောက်ဘဝလည်းမရှိဘူး...မင်း ထပ်ရောက်လာပြီး ဒုက္ခမပေးနဲ့တော့...မင်းနဲ့နောက်ထပ်လူတစ်ယောက်ခေါ်လာလည်း အသုံးမဝင်ဘူး..."

ရွှယ်လင်က အသံကိုမြှင့်လိုက်ခြင်းကြောင့် အနားတွင်ရှိနေသူတိုင်းက သူ့စကားကိုကြားလိုက်ရသည်။

"ဒီနေ့...ယန်ရှန်းအခြေစိုက်စခန်းက စွမ်းရည်အသုံးပြုသူတိုင်း သည်နေရာမှာရှိနေကြတယ်...ဒါကြောင့် ငါက ဒီစကားကို လူတိုင်းကြားအောင်ပြောလိုက်မယ်.. ငါတို့နှင်းမြေခွေးကြေးစားတပ်နဲ့ ဟယ့်ယန်တို့ကြားမှာ ဘယ်လိုဆက်ဆံရေးမှမရှိတော့ဘူး...ဒါကြောင့်... ဟယ့်ယန်နဲ့ပတ်သတ်သမျှတိုင်းက ငါချုးဟန်နဲ့ မသက်ဆိုင်ဘူး..."

ထိုသို့ရက်စက်သည့်စကားများက ဟယ့်ယန်၏ ကြာပန်းဖြူအသွင်ဆောင်ထားသော ဖြူစင်အပြစ်ကင်းသည့်မျက်နှာကို အေးခဲသွားစေခဲ့သည်။ သူသည် ချုးဟန်က သူ့အား လူတွေသံသယဝင်စေမည့်စကားတို့ကို အလွန်တရာမှရက်စက်ကြမ်းတမ်းစွာဖြင့် လူသိရှင်ကြားထုတ်ပြောရန်အချိန်ကောင်းမှ လာမိသလိုပင်။ ချုးဟန်က သူနှင့်ဆန့်ကျင်ဘက်လုပ်လိမ့်မည်ဟု မထင်ထားမိခဲ့ပေ။ ယနေ့မှစ၍ ဟယ့်ယန်က သူ့အားအရှက်ရစေခဲ့လျှင် ဤယန်ရှန်းအခြေစိုက်စခန်းတဝိုက် အနားသီခွင့်ပင် ပေးတော့မည်မဟုတ်။

"ကျွန်တော်တို့ ဒီအခြေအနေအထိရောက်ဖို့ လိုအပ်လို့လား..အစ်ကိုကြီးဟန်..." သူ ထိုမေးခွန်းကိုမေးလိုက်သည့် နောက်ဆုံးအကြိမ်တွင် သူ့အသံကတုန်ယင်နေခဲ့သည်။

ရွှယ်လင်က သူ့ကိုအေးစက်စက်ဖြင့် တချက်သာကြည့်လာသည်။

"ငါတို့အရင်ကတော့ တခါမှဒီလိုမဖြစ်ခဲ့ကြပါဘူး...နောက်လည်းဖြစ်တော့မှာမဟုတ်ဘူး...နောက်တခါ ငါမင်းကိုတွေ့ရင် ယဥ်ကျေးနေမှာမဟုတ်တော့ဘူး...သခင်လေးဟယ့်ကပဲ လေးစားမှုလေးနည်းနည်းပြပေးဖို့ မျှော်လင့်ပါတယ်..."

ဟယ့်ယန်အံကြိတ်ပြီး ခြေဆောင့်နင်း၍ စိတ်ဆိုးမာန်ဆိုးဖြင့်ပြောလိုက်မိ၏။ "ဒီလိုဆိုတော့လည်းရတယ်လေ...ဒီကိစ္စနဲ့ပဲ ကျွန်တော်တို့အကုန်လုံးကို အဆုံးသတ်လိုက်ကြတာပေါ့...နောက်ကျရင်..ခင်ဗျားကျွန်တော့်ကို ဒူးထောက်တောင်းပန်လာစေရမယ်... အဲ့ဒီအချိန်ကျရင် ကျွန်တော်ကလည်း ခင်ဗျားကို

လျစ်လျုရှုထားမှာပဲ...!"

"မင်းသဘောပါ..."

ဟယ့်ယန် စိတ်ဆိုးလွန်း၍ မျက်နှာပင်နီလာသည်။ အားလုံး၏ သူ့အပေါ်သနားနေသည့်အကြည့်ကို ခံစားမိသည်။ အချို့သူများက သူ့အားကြည့်ပြီး နှာခေါင်းရှုံ့သွားကြ၏။ သူသည် နှစ်ဘဝလုံးနေထိုင်လာခဲ့ပြီးသော်လည်း ယခုကဲ့သို့ တခါပင် အနှိမ်မခံခဲ့ရဖူးချေ။ သူ၏ တောက်ပလှသည့်အနာဂတ်ကြောင့်သာမဟုတ်ပါက အနှီအရှက်ရမှုကို သည်းခံနေမည်မဟုတ်။

"ချုးဟန်...! မင်းကြည့်နေလိုက်စမ်းပါ...!"

ထိုသို့အသံကျယ်ကျယ်ဖြင့် ပြောပြီးသည့်နောက် သူ တဖက်လှည့်၍ထွက်သွားလိုက်တော့၏။ သူထွက်သွားသည့်အခါ လူအများက ခပ်တိုးတိုးပြောနေကြပြီး ၎င်းတို့ပြောဆိုနေသည့်အရာကို မသိနိုင်စေကာမူ သူ့နားထဲသို့ဝင်လာသည့်စကားသံတိုင်းက သူ့အားလှောင်ပြောင်နေခြင်းပင်ဖြစ်ကြောင်း သိနိုင်သေးသည်။

ဟယ့်ယန်၏မျက်၀န်းများက နီမြန်းနေသည်။ စနစ်က သူ့အားစိတ်ပြေအောင် ချော့မောနေကာ ချုးဟန်မရှိလည်းဖြစ်သည့်အကြောင်း၊ သူဆန္ဒမရှိသည့်အရာအတွက် host က တခြားသူအပေါ် စိတ်ဆိုးနေစရာမလိုကြောင်း ပြောနေခဲ့၏။

ဟယ့်ယန်က ဒေါသထွက်ထွက်ဖြင့်ပြန်သွားသည်။ ရွှယ်လင်က ဘာမျှမဖြစ်ခဲ့သလို ကွင်းထဲပြန်ဝင်လာပြီး အော်ပြောလိုက်၏။"ဆက်ပြိုင်ကြ...."

သူ့အသံထွက်လာပြီးနောက် လူအုပ်ထဲရှိတစ်ယောက်က ပွက်လောရိုက်စွာဖြင့် စင်ပေါ်တက်လာလေသည်။

စည်းမျဥ်းအရ ပြိုင်ပွဲမှတယောက်ထွက်သွားသည်နှင့် ယှဥ်ပြိုင်ချင်သည့် မည်သူကိုမဆို ရွေးချယ်ခွင့်ရှိသည် သို့မဟုတ် တခြားလူတစ်ယောက်မှ စိန်ခေါ်ခြင်းကိုလည်းလက်ခံနိုင်သည်။ ယခုလေးတင်ဖြစ်သွားသော မတော်တဆမှုကြောင့် စင်မှာရှင်းလင်းသွားပြီး အနှီသူက ပထမဆုံးတုံ့ပြန်လာသူဖြစ်ကာ စင်ပေါ်တက်လာသူလည်းဖြစ်သည်။

ထိုသူက လူသစ်ဖြစ်ပုံရသည်၊ မည်သည့်စွမ်းရည်အသုံးပြုသူကမှ သူ့အားမသိကြပေ။ ၎င်းတို့က ခေါင်းများငုံ့ထားကြကာ ထိုလူ၏ပုံစံအစစ်အမှန်ကို ဆွေးနွေးငြင်းခုန်နေကြသည်။ ထိုတော်ထက်လွန်းသူအကြောင်းကိုမသိရခြင်းက ၎င်းတို့အတွက် အဓိပ္ပါယ်မရှိဖြစ်နေ၏။

ထိုသူက အတော်လေးဆွဲဆောင်မှုရှိပြီး ရှေးဟောင်းကျမ်းစာများထဲမှ အချောမောဆုံးနတ်ဘုရားတပါးနှယ်။ ၎င်းက ပိုနီတေးအမြင့်စည်းထားပြီး ဆံနွယ်ရှည်တို့က သဘာဝအလျောက်ဖြာကျနေသည်။ ၎င်း၏အဝတ်အစားက သိသိသာသာထူးဆန်းနေလင့်ကစား ခန္ဓာကိုယ်နှင့် မလိုက်ဖက်ခြင်းမျိုးမရှိ။ ထိုလူက မထင်မှတ်လောက်အောင် ချောမောကြည့်ကောင်းနေသည်။ ၎င်းက ကိုယ်အပေါ်ပိုင်းကို အနက်ရောင်ရှပ်အင်္ကျီနှင့် ခြေဖနောင့်အထိဖုံးသော အနက်ရောင်ဘောင်းဘီဝတ်ထားပြီး အဖြူရောင်လေကာကုတ်က ထိုသို့၀တ်ဆင်ထားသည့်ပုံစံနှင့် လိုက်ဖက်ညီနေသည်။ သားရေဖိနပ်သည် တောက်ပြောင်နေကာ လက်ကောက်ဝတ်တွင် နာရီတစ်လုံးရှိနေ၏။

ကမ္ဘာပျက်ကပ်မတိုင်ခင်က ဤပုံစံမျိုးသည် အရေးမကြီးသော်လည်း ကမ္ဘာကြီးအဆုံးသတ်သွားချိန်တွင် ဤအတိုင်းဝတ်ရန် ရွေးချယ်လိုက်ခြင်းက ထိုသူအတော်လေးသန်မာကြောင်းကို ဖော်ပြနေသည်။

ကမ္ဘာပျက်ကပ်ပြီးသည့်နောက် သူ့ဘဝက စိတ်ချရသည်အထိ အလုံအလောက်သန်မာနေပြီး ယခင်ကနှင့်မထူးမခြားနားပင်။

ဒီလိုလူမျိုးက တကယ်ကြီး ကြေးစားတပ်ကိုလာဆက်သွယ်တယ်?

ရွှယ်လင် ဘောပင်လှည့်နေခြင်းကိုရပ်လိုက်ပြီး အရှေ့မှလူကိုကြည့်၍ မျက်ခုံးပင့်လိုက်၏။ ထို့နောက် သူမေးလိုက်မိသည်။

"ခင်ဗျား ဘယ်သူ့ကိုစိန်ခေါ်ချင်တာလဲ..."

"မင်းကို..." ထိုသူ့အသံက အင်မတန် အေးစက်တောင့်တင်းလှသည်။ ထိုသူသည် စကားကို ရွှေလိုသဘောထားပြီး တည်ငြိမ်နေသည့်သူ၏အသွင်ကပင် ရေခဲများဖြင့် ဖုံးအုပ်ထားသည့်နှယ်။

"အိုး..." ရွှယ်လင်၏တုံ့ပြန်မှုက အဓိပ္ပါယ်တမျိုးပါ၀င်နေသည်။

................

ရှင်း၏မှတ်စု

ရွှယ်လင်က ပျင်းရိပျင်းတွဲဖြင့် တချက်ကြည့်လိုက်သည် : မင်းက မင်းကိုယ်မင်း ရိုမန့်တစ်ဒရမ်မာတွေထဲက ဇာတ်လိုက်မင်းသားလို့ထင်နေတာလား

ဟယ့်ယန်: "....." ဟုတ်တယ်၊ ကမ္ဘာကြီးကိုကယ်တင်မယ့်ဟီးရိုးလေ၊ မင်း ဘာလို့ ဒီလောက်တောင်သဘောမပေါက်ရတာလဲ!

Prev Next