Chapter 118

🦊Arc 8 - အမှားယွင်းဆုံး အမျိုးသားဇာတ်ဆောင်

Chapter 118

8.10 - မင်းတို့ အဓိကတရားခံနှစ်ယောက် ဒီမှာ ဘယ်လောက်ကြာအောင် ပုန်းမယ်လို့ စိတ်ကူးထားလဲ?

တစ်လခွဲလုံးလုံး ရွှယ်လင်နှင့်ရွှင်ယွိက တောထဲသို့ဝင်သော အသင်းလေးများကို ညွှန်ပြပေးနေခဲ့သည်။ များသောအားဖြင့် သူတို့ နှစ်ယောက်က တူတူထွက်သွားပြီး တူတူ ပြန်လာတတ်သည်။ သူတို့၏ အခြေစိုက်စခန်းကို စောင့်ကြပ်ကြည့်ရှုရန် တာဝန်ကျသောအသင်းက သူတို့တူတူသွားလာနေသည်ကို မြင်ရသည်မှာ ကျင့်သားရနေပြီပင်။ သို့သော် အံ့အားသင့်စရာက မည်သူမျှ ထိုအကြောင်းကို အရမ်းတွေးမနေပေ။ 

ရွှင်ယွိက မကြိုးစားသောကြောင့်မဟုတ်ပေ။ ရွှယ်လင်က အလွန်မှန်ကန်သယောင် ပြုမူနေသောကြောင့်ပင်။ သူ၏ လေးနက်ပြီး သတိရှိသောမျက်နှာကြောင့် လူများက သူတို့နှစ်ယောက်ကြား ဘာဖြစ်နေသည်ကို ခန့်မှန်းရန်ပင် ရှက်ရွံ့သလို ခံစားရသည်။ရွှင်ယွိ မွန်းကြပ်သလို ခံစားလိုက်ရသည်။ ထို့ကြောင့် ထိုကာလအတောအတွင်း သူ့မျက်နှာအမူအရာမှာ မကောင်းနေတော့ပေ။ 

သူ့မျက်နှာအမူအရာမကောင်းခြင်းက လုံလောက်အောင် ဆိုးဝါးနေပြီဖြစ်သည်။ ရွှယ်လင်က သူ ဘာကြောင့် မပျော်မရွှင် ဖြစ်နေရသည်ကို ထုတ်မေးသွားရလောက်အောင်ပင် သူ့အမူအရာက ဆိုးဝါးလွန်းသည်။ အစားအသောက်က မကောင်းလို့လား... ဒါမှမဟုတ် သူ ဂရုစိုက်တာက လုံလောက်အောင် မကောင်းလို့လား...။

ရွှင်ယွိ မည်သို့ပြန်ဖြေနိုင်ပါ့မည်လဲ... သူ၏မပြည့်ဝသေးသည့် ဆန္ဒများကြောင့်လို့ ပြောသင့်လား...။

ရွှယ်လင်က သူနှင့် ဆက်ဆံရေးအားလုံးကို ဖြတ်တောက်လိုက်ပြီး နှင်းမြေခွေးကြေးစားအဖွဲ့မှ ကန်ထုတ်လိုက်မည်ကို သူ စိုးရိမ်နေသည်။ ထိုသို့ဖြစ်သွားပါက သူ့ချစ်သူကို ပိုးပမ်းတာ ကျရှုံးရုံတင်မဟုတ်ဘဲ သူတို့ကြား ရန်ပွဲပင် ဖြစ်သွားနိုင်လေသည်...။

သူ့ကို ပို၍စိတ်ရှုပ်စေသည်မှာ သူဘယ်သူ ဖြစ်သည်ဆိုသော အထောက်အထားကြောင့်ပင်။ ရွှင်ယွိသည် ဇွန်ဘီတစ်ယောက်ဖြစ်ရသည့်အတွက် ဘယ်တုန်းကမှ စိတ်အနှောက်အယှက် မဖြစ်ခဲ့ပေ။ သူသည် ကမ္ဘာပျက်ကပ်ပြီးတည်းက အသိစိတ်ကိုပြန်ရခဲ့သူ ဖြစ်ပြီး ယခင်က သူ ဘာဖြစ်ခဲ့သည်များကို မှတ်မိ၏။ သူ သေပြီး ပြန်နိုးထလာသည်နှင့် ချက်ချင်း သူ၏ ခွန်အားများကို ရခဲ့သည်။ 

ရွှင်ယွိက ထိုအရာများကို သူ့ကိုယ်သူ ထောက်ပံ့ရန်ယူလိုက်သည်။ သူ့မျိုးစိတ်က ပြောင်းလဲသွားလျှင်ပင် သူ အသက်ရှင်ရန် လိုအပ်သည်များကို လုပ်ရမည်ပင်။ ထို့ကြောင့် သူက စွမ်းရည်သုံးစွဲသူများနှင့် ဇွန်ဘီများကြား ခြားနားချက်ကြောင့် စိတ်ရှုပ်မှုလည်း မဖြစ်သလို ပျောက်ဆုံးသလိုလည်း မခံစားရပေ။ သူက ဇွန်ဘီအားလုံးကို ထိန်းချုပ်ခဲ့ပြီး လူသားတို့၏ ပိုင်နက်ကို တဖြည်းဖြည်း ရှာတွေ့ခဲ့သည်။ ထို့ပြင် သူတို့က မသေမျိုး မဟုတ်သည်ကို ရှာတွေ့ခဲ့ရသည်။ သူတို့က ပိုးကူးစက်ပြီး သေဆုံးသွားပုံပေါ်သော်လည်း အမှန်တကယ် သူတို့သည်လည်း လူသားများကဲ့သို့ ရုပ်ပိုင်းဆိုင်ရာလုပ်ဆောင်ချက်တစ်ချို့ကို ပြုလုပ်နိုင်သည်။ 

သူတို့က အစားစားရန်မလိုသလို အသက်ရှူရန်လည်း မလိုပေ။ ထို့ပြင် ခန္ဓာကိုယ်ကအပူချိန်လည်း မရှိပေ။ သို့သော် သူတို့တွင် ရုပ်ပိုင်းဆိုင်ရာ လိုအပ်ချက်များ ရှိသည်။ ထို့ပြင် သွေးများက သူတို့ သွေးကြောများတွင် စီးဆင်းနေသေးသည်။ နှလုံးခုန်ရပ်သွားသော်လည်း သူတို့၏နျူကလိယက နှလုံးသား၏အစားထိုး ဖြစ်လာခဲ့သည်။ သူတို့က ရုပ်ရှင်ကားများထဲမှ ဇွန်ဘီများလောက် ကြောက်ဖို့ မကောင်းပေ။ သူတို့က တစ်ခါတစ်ရံတွင်သာ ဖြူဖျော့ဖျော့ ဖြစ်နေတတ်သည်။ သာမန်အချိန်များတွင် စွမ်းရည်သုံးစွဲသူများနှင် အရမ်းမကွာပေ။ 

ထိုသို့ပြောင်းလဲမှုများနှင့် ပတ်သက်ပြီး မည်သည့်အရာကမျှ မှားနေသည်ဟု ရွှင်ယွိမခံစားရပေ။ ကမ္ဘာကြီး ပြောင်းလဲသွားတည်းက တခြားအရာများ ပြောင်းလဲသွားခြင်းကလည်း ဘာမျှမှားမနေပေ။ ၎င်းက အတော်ကြာသည်အထိ တည်ရှိနေခဲ့သည်။ ရွှင်ယွိ၏လက်အောက်မှ သိပ္ပံပညာရှင်တစ်ဦးက ကမ္ဘာကြီးတွင် ဇွန်ဘီများသာ ကျန်နေခဲ့ပါက သူတို့က အနှေးနှင့်အမြန် မျိုးတုန်း ပျောက်ကွယ်သွားမည်ဟု ပြောပြခဲ့သည်။ 

အဘယ့်ကြောင့်ဆိုသော် သူတို့က ဝတ္ထုများထဲတွင် ရေးထားသော အသက်ရှည်သောဇွန်ဘီများနှင့် မတူသောကြောင့်ပင်။ အကယ်၍ သူတို့ သေဆုံးနိုင်လျှင် မျိုးပွားမှုကလည်း သိပ္ပံပညာရှင်များ ဖြေရှင်းရန်လိုအပ်သည့် ပြသနာ တစ်ခု ဖြစ်လာသည်။ ဇွန်ဘီနှစ်ကောင်က မျိုးမပွားနိုင်ဘဲ မရှင်သန်နိုင်သည်ကို သူတို့ သိလိုက်ရသည်။ မျိုးစိတ်များမျိုးသုန်းခြင်းနှင့် သက်ဆိုင်သော အရေးကြီးကိစ္စများ ဖြစ်သည့်အတွက် သူတို့က ရွှင်ယွိကို ချက်ချင်း သတင်းပို့ခဲ့ကြသည်။ 

ရွှင်ယွိ ချက်ချင်း ဆုံးဖြတ်ချက်တစ်ခုကို ချခဲ့သည်။ ကမ္ဘာကြီးတွင် ဇွန်ဘီများသာ ရှိခြင်းမဟုတ်ပေ။ အကယ်၍ ဇွန်ဘီများက သူတို့ကိုယ်တိုင် မျိုးမပွားနိုင်ပါက သူတို့သည် စွမ်းရည်သုံးစွဲသူများကို ဆွဲသွင်းပြီး စမ်းကြည့်ကြမည်ပင်။ သူ ရွှယ်လင်ကို မတွေ့ရခင်တုန်းက ယန်ရှန်း အခြေစိုက်စခန်းသို့သွား၍ စွမ်းရည်သုံးစွဲသူတစ်ချို့ကို ဖမ်းဆီးရန် ဆုံးဖြတ်ချက်ဖြင့် သွားခဲ့ခြင်းပင်။ အကယ်၍ မျိုးပွားရန်နည်းလမ်းကို တွေ့ပါက စွမ်းရည်သုံးစွဲသူများနှင့် မည်သို့ပူးပေါင်းရမည်ကို ရွှင်ယွိစတွေးမည်ဖြစ်သည်။ 

ကံဆိုးစွာဖြင့် ရွှယ်လင်က မြို့တစ်ဝက်လောက်ကို အေးခဲပစ်လိုက်ချိန်တွင် ၎င်းတို့ အားလုံးက ပြောင်းလဲသွားရသည်။ ထိုအချိန်တုန်းက ရွှင်ယွိသည် သူတို့ကို မည်သည့်လှုပ်ရှားမှုမှ အလျင်စလိုမပြုလုပ်ရန် သတိပေးခဲ့သည်။  

သူကိုယ်တိုင် ထိုသူ့နောက်ကို လိုက်ခဲ့သည်။ ထို့နောက်တွင်တော့ သူက ရိုမန်တစ်ဆန်သော နူးညံ့နွေးထွေးသည့် ရင်ခွင်ထဲသို့ နစ်မြှပ်သွားပြီး ရုန်းမထွက်နိုင် ဖြစ်နေရလေပြီ။

အမှန်တော့ ထိုအရာကို ရိုမန်တစ်ဆန်သော နူးညံ့ညင်သာသည့်ရင်ခွင်ဟု မသတ်မှတ်နိုင်ပေ။ အဆုံးတွင် ရွှယ်လင်က သူ့ကို အခြားစွမ်းရည်သုံးစွဲသူများနှင့် ကွဲပြားခြားနားစွာ မဆက်ဆံပေ။ အများဆုံးမှ ရွှယ်လင်က တခြားသူများနှင့်ထက် သူနှင့်ဆိုလျှင် အနည်းငယ် ပိုရယ်မောတတ်တာသာရှိ၏။ သို့သော် ဤသည်က သူ အမြဲတမ်း ပူးကပ်နေသည့်ကိစ္စနှင့် အနည်းငယ် သက်ဆိုင်နေလောက်မည်။

ရွှင်ယွိ စကားအများကြီး ပြောရလောက်သည်အထိ ဖြစ်သွားလိမ့်မည်ဟု ဘယ်တုန်းကမှ မတွေးမိခဲ့ပေ။ 

ထိုသို့ဆိုလျှင်ပင် ရွှင်ယွိတွင် ဆက်လုပ်ရန် ကိစ္စအများကြီး ကျန်သေးသည်ပင်။ ထို့ပြင် ရွှယ်လင်က သူ့ ချဥ်းကပ်မှုကို လုံးဝဂရုမစိုက်ပေ။ သူနှင့်စကားပြောလျှင် အနည်းငယ် ပို၍ တက်ကြွတတ်သော်လည်း လှုပ်ရှားမှုအားလုံးကို သူငယ်ချင်းဆက်ဆံရေး နယ်ပယ်ထဲတွင် ကန့်သတ်ထားလေသည်။ ရွှင်ယွိ၏အပြုအမူများက လွန်ကဲလာပြီး စည်းကို ဖြတ်လိုက်သည်နှင့် ရွှယ်လင်၏အမူအရာမှာ ထူးဆန်းသည့်ပုံစံသို့ ပြောင်းလဲသွားပြီး အလေးအနက်ဖြစ်သွားကာ သူနှင့် ခပ်ခွာခွာနေတော့သည်။ 

ရွှင်ယွိသည် လွန်ခဲ့သည့်တစ်လခွဲလုံး စိုးရိမ်ပူပန်စွာ နေခဲ့ရပြီး သူ၏ စွမ်းအားအပြင်းဆုံးအရှိန်အဟုန်နှင့်မာနက လုံးဝကို ပျောက်ကွယ်သွားတော့မတတ်ဖြစ်သွားရ၏။

ကံကောင်းစွာဖြင့် အခွင့်အရေးက အကြာကြီးနှောင့်နှေးမနေခဲ့ပေ။ ၎င်းက တစ်နေ့တွင် ရုတ်တရက်ရောက်လာတော့သည်။ 

သို့သော် ရွှင်ယွိကိုယ်တိုင်က ထိုကဲ့သို့ အခွင့်အရေးမျိုးကို လုံးဝလိုချင်မနေပေ။  

တစ်လခွဲဆိုသောအချိန်က ဟယ့်ယန်နှင့် သူ့အကူစနစ်အတွက် ဇွန်ဘီသားရဲဒီရေဖန်တီးရန် လုံလောက်ပေသည်။ ထို့ပြင် ရွှယ်လင်သည် သူ့လက်အောက်ငယ်သားများကို ဇွန်ဘီသားရဲဒီရေ ရောက်လာပါက ဘာလုပ်သင့်သည်ကို သင်ပေးရန်လည်း လုံလောက်သည်ပင်။ 

နှစ်ဖက်လုံးက အဆင်သင့်ဖြစ်နေပြီ ဖြစ်သောကြောင့် စစ်ပွဲခရာသံက ထွက်လာတော့သည်။ 

ဟယ့်ယန်သည် သစ်တောထဲမှ စွမ်းအား အကြီးဆုံးသော ဇွန်ဘီသားရဲများကို အဆွခံရပါက ရူးနှမ်းသွားစေသော အကူစနစ် ထောက်ပံ့ပေးသည့် ဆေးကို တိုက်ခဲ့သည်။ ထို့နောက် သားရဲပေါက်ကို ခိုး၍ သတ်ပစ်ခဲ့လေသည်။ 

မူလက သူ ထိုသားရဲပေါက်ကို ခိုးသာ ခိုးချင်ခဲ့သော်လည်း သူ့အကူစနစ်က ထိုသားရဲပေါက်ကို သတ်ပစ်ပြီး ဇွန်ဘီသားရဲတို့၏ တခြား နယ်မြေတွင်ထားရန် ပြောခဲ့သည်။ ထိုအရာက တောတစ်ခုလုံးကို ထကြွသွားစေလိမ့်မည်ဖြစ်သောကြောင့်ပင်။ သူတို့၏အစီအစဥ်က ထိုနည်းဖြင့် ပို၍ အကျိုးသက်ရောက်နိုင်သည်။ ကောင်းကျိုး ဆိုးကျိုးများကို ချိန်ဆပြီးနောက် ဟယ့်ယန်က အကူစနစ်ပြောသည့်အတိုင်း လုပ်ခဲ့သည်။ 

ရွှယ်လင်က သူ့မိသားစုမြေခွေးအကူစနစ်လေးကို လေးနက်စွာ ပြောလိုက်၏။ " ပြောပါရစေဦး အဲ့အကူစနစ်က ကျိန်းသေကို ဇာတ်ကြောင်းကာကွယ်သူ ကူးပြောင်းလာတာပဲ နောက်ပြီး အစွန်းရောက်အဖွဲ့နဲ့ ကျိန်းသေ သက်ဆိုင်တယ် အခုတော့ သူ ငါ့ကို သတ်ချင်နေပြီ"

အကူစနစ်လေးက စကားမပြောဘဲ သူ့အမြှီးကို လှုပ်ယမ်းနေခဲ့သည်။ သူ့ host က ဥာဏ်ကောင်းပြီး ထက်မြက်တာကိုတော့ ဝန်ခံရမယ်။ သတိမထားမိလောက်မယ့်နေရာမှာ တစ်ခုခု မှားနေတာကိုတောင် အမြဲတမ်း ရှာတွေ့တယ်။

"ကံဆိုးတာက သူတို့က တုံးလွန်းတယ်" ရွှယ်လင် 'ကျစ်'ခနဲ စုတ်သတ်လိုက်ပြီး မတ်တတ်ရပ်လိုက်ကာ လူတိုင်းကို အဆင်သင့်ပြင်ဆင်ခိုင်းလိုက်သည်။ 

"သူက ဒီလိုမျိုး ဖျက်ဆီးရေးမှာကျွမ်းကျင်တဲ့ ဇာတ်ကောင်ကို တွေ့လိမ့်မယ်လို့ မျှော်လင့်မထားလောက်ဘူး..." 

အကူစနစ်က ပခုံးတွန့်ကာ ပြောလိုက်သည်။ 

" ကျွန်တော်တို့လို ဇာတ်လမ်းတိုင်းကို ထောက်ပံ့ပေးတဲ့ role တွေအနေနဲ့ ကမ္ဘာကြီးရဲ့ရှုထောင့်ကနေမြင်ရတယ် ဒါပေမဲ့ သူတို့မြင်ရတဲ့ရှုထောင့်ကတော့ ဇာတ်လိုက်ရဲ့ ရှုထောင့်လေ ဇာတ်လိုက်လုပ်သမျှ မှန်ပြီး မေးခွန်းထုတ်စရာမလိုတဲ့ ရှုထောင့်ပဲ သူတို့က ဇာတ်လမ်းအဆုံးထိ ရှင်သန်သွားရမယ်"

"ကောင်းပြီလေ" ရွှယ်လင် ကားထဲမှထွက်လိုက်ပြီး တုစစ်နီကို လက်ဖြင့် အချက်ပြလိုက်သည်။ 

တုစစ်နီက အတော်ကြာအံ့ဩထိတ်လန့်နေခဲ့သည်။ရွှယ်လင်က သူမကို အစောကြီးတည်းက မျှော်လင့်မထားသည့်အရေးကြီးကိစ္စ ဖြစ်တော့မည်ဟု ပြောလာပြီး တောင်ပေါ်တွင် လေ့ကျင့်နေသော အသင်းသားများကို သတိပေးခိုင်းခဲ့သည်။ဒီလက်နဲ့ အချက်ပြတာက...။

သို့သော် သူမ အသေးစိတ် မမေးမြန်းခင် အရေးပေါ် အချက်ပြသံပြုလိုက်သေးသည်။ 

မီးရှူးမီးပန်းများကို ကောင်းကင်ပေါ်တွင် သတိပေးသည့်အမှတ်အသားအဖြစ် ပစ်လွှတ်လိုက်သည်။ တချိန်တည်းတွင်ပင် ဇွန်ဘီသားရဲက သားပေါက်လေးကို ရှာမတွေ့တော့ဘဲ သွေးနံ့များ ပြင်းထန်နေသည်ကို သတိထားမိလိုက်သည်။ သူ၏သားပေါက်လေး သေသွားပြီဖြစ်ကြောင်း ချက်ချင်း သဘောပေါက်သွားတော့၏။ 

ထိုဇွန်ဘီသားရဲနှစ်ကောင်က S အဆင့် စွမ်းရည် သုံးစွဲသူများဖြစ်ပြီး စွမ်းအားညီမျှသည်။ သူတို့က ရှင်းယွဲ့တောင်ပေါ်တွင် အသန်မာဆုံး ဇွန်ဘီသားရဲများ ဖြစ်လောက်သည်။ သူတို့က သွေးရူးသွေးတမ်း တိုက်ခိုက်နေသောကြောင့် သူတို့၏တိုက်ခိုက်စွမ်းအားများက SS အဆင့်နှင့်ပင် ညီမျှနေသည်။ 

SSS အဆင့်ထက်ကျော်လွန်သော ဇွန်ဘီဘုရင်အတွက် သူတို့နှင့်ရင်ဆိုင်ရန်မှာ ပြသနာ မဟုတ်ပေ။ သူတို့နှစ်ယောက်ကြားက တိုက်ပွဲ ရက်စက်ပြင်းထန်နေသောကြောင့် သူက နည်းလမ်းများကို ပိုအသုံးပြုရရုံသာဖြစ်သည်။

သူ မည်သည့်နည်းလမ်းများကို အသုံးပြုရန် စီစဥ်ထားသည်ကို ရွှယ်လင်ဂရုမစိုက်ပေ။ သူက လှည့်ထွက်သွားသောကြောင့် ထိုအုပ်စုရှေ့မှ ပျောက်ကွယ်သွားခဲ့သည်။ သူတို့၏ပေါင်လုံးများကို ဖက်ရန်လိုက်လာသော ညီငယ်လေးများက သူ ရုတ်တရက် ပျောက်ကွယ်သွားသည်ကို တွေ့လိုက်ရသည်။ သို့သော် မည်သည့် မှားယွင်းမှုကိုမျှ မခံစားရပေ။ သူတို့၏ ခေါင်းဆောင်က အလွန်သန်မာပြီး သူ၏ ဖုံးကွယ်နိုင်စွမ်းက ပထမအဆင့်ဟုပင် ထင်ကြသည်။ 

ထိုသူများက သူ့ကို တစ်လခွဲအတွင်း ယုံကြည်ကိုးကွယ်လာစေရန် လုံးဝ မခက်ခဲခဲ့ပေ။ ရွှယ်လင်အတွက်မူ အလွန် ရိုးရှင်းသည်။ ထိုလူအုပ်စုက သူ လုပ်သည်အရာများအတွက် အံ့အားသင့်မနေဘဲ သူ့ကို ချီးကျူးမည်သာ ဖြစ်သည်။ 

"ဘာတွေ ဖြစ်နေတာလဲ..." ဟယ့်ယန် သူ့အကူစနစ်ကို စိတ်လှုပ်ရှားစွာ မေးလိုက်သည်။ ရွှယ်လင်နှင့် ရွှင်ယွိက သူရှိသောတောင်ပေါ်သို့ ကြေးစားတပ်အဖွဲ့ အုပ်စုလိုက်ကြီးကို ခေါ်လာသည်အား ရှင်းရှင်းလင်းလင်း တွေ့လိုက်ရသည်။ ထို့အပြင် သူတို့ ခေါ်လာသော တပ်ဖွဲ့အုပ်စုကြီးမှာ သူ့အစီအစဥ်ထဲတွင် ရှင်းပစ်ရန် မျှော်လင့်ထားသော လူများပင်။

 " သူတို့အကုန်လုံး ဘာလို့ တက်လာရတာလဲ... နောက်ပြီး သူတို့အကုန်လုံး အဆင်ပြေနေတယ်..." 

သူတို့ကိုယ်ပေါ်မှာ ဒဏ်ရာတောင် မရှိဘူး... ဘယ်လိုလုပ် ဖြစ်နိုင်မှာလဲ... ဇွန်ဘီသားရဲတွေက အသိစိတ်တောင် မရှိတော့ဘူးလေ... နောက်ပြီး သူတို့တွေက ယန်ရှန်း အခြေစိုက်စခန်းစခန်းရဲ့ လူသစ်တွေ... ဘယ်လိုလုပ် ဖြစ်နိုင်ပါ့မလဲ...။

အကူစနစ်က လေးနက်စွာ ပြောလာသည်။ 

" ဇွန်ဘီဘုရင် လုပ်ခဲ့တာများလား..."

ဟယ့်ယန်၏ဦးနှောက်က ဗလာဖြစ်သွားသည်။ ထို့နောက် သူ စိတ်ရှုပ်ထွေးစွာ ပြောလိုက်မိ၏။ 

" အသေအချာပဲ... သူ့ကို ထည့်စဥ်းစားဖို့ မင်းကို ငါ အစောကြီးတည်းက ပြောခဲ့တယ် သူက မမျှော်လင့်ထားတဲ့ အဓိကလူပဲ... လွန်ခဲ့တဲ့ တစ်လကျော်လောက်က သူ ချူးဟန်ကို ဘယ်လို အကြည့်မျိုးနဲ့ကြည့်လဲဆိုတာ မင်း မသိပါဘူး..."

"ငါ့ကို အော်နေလည်း အသုံး မဝင်ဘူး..."

"တကယ်ကို အသုံးမဝင်ဘူး" သူတို့နှစ်ယောက် အငြင်းပွားနေခိုက် အခြားအသံတစ်သံက ရုတ်တရက် ထွက်လာသည်။ 

ဟယ့်ယန်နှင့် သူ၏အကူစနစ်ကြားရှိ စကားဝိုင်းမှာ စိတ်အတွင်းပိုင်းတွင် ဖြစ်သောကြောင့် တခြားသူများကြားရန် မဖြစ်နိုင်ပေ။ ရုတ်တရက် တစ်စုံတစ်ယောက် စကားပြောသည်ကို ကြားလိုက်ရသည့်အခါ ဟယ့်ယန်ရော အကူစနစ်ပါ ထိတ်လန့်သွားရသည်။ ဟယ့်ယန် ခေါင်းမော့ကြည့်လိုက်သောအခါ ချူးဟန် သူ့ကို ပြုံးပြနေသည်ကို မြင်လိုက်ရ၏။

ထိုအပြုံးက မှောင်မိုက်နေပြီး နမိတ်မကောင်းသည့် ပုံစံမျိုးပင်။ ထို့ပြင် အကြည့်တစ်ချက်နှင့်တင် ဟယ့်ယန်၏ခြေထောက်များကို အားနည်းသွားစေသည်။ 

၎င်းက အလွန်ကြောက်ဖို့ကောင်း၏။

ရွှယ်လင်၏မျက်နှာက အပြုံးပန်းဝေနေပြီး ပါးစပ်ဟ၍ မေးလာသည်။ " မင်းတို့ တရားခံနှစ်ယောက် ဒီမှာ ဘယ်လောက်ကြာအောင် ပုန်းဖို့ စိတ်ကူးထားလဲ..."