MM Story Teller

Chapter 13

Viewers 2k

🌱Arc 1 [ ကျောင်းတွင် လယ်စိုက်ခြင်း ]

CH 13

သားကြောဖြတ်ခြင်းပက်ကေ့ချ်အရောင်းဖွင့်ခြင်း

ဟွမ်းဝေ့ဟယ်က ရေဟင်းနုနယ်အမျိုးအစားများအကြောင်း စုံစုံလင်လင်သိထားသော စွေ့ချီချောင်းနှင့်မတူပေ။ သူ့စိတ်ထဲတွင် ရေသွင်းစိုက်ပျိုးရေးနည်းဖြင့် စိုက်ပျိုးထားသော ရေဟင်းနုနယ်နှင့် ခြောက်သွေ့မြေဆီလွှာတွင်စိုက်ပျိုးထားသော ဟင်းနုနယ်တို့မှာ အရသာမတူညီဟု သိထားသည်။ ထို့ပြင် ရေဟင်းနုနနယ်ရွက်က ပေါက်ရောက်ရာနယ်မြေပေါ်မူတည်၍ အမျိုးအစားကွာခြားနိုင်ပေသည်။

သို့သော် ဟွမ်းဝေ့ဟယ်က နိုင်ငံရပ်ခြားတွင်ဖြစ်စေ ပြည်တွင်း၌ဖြစ်စေ ယခုလိုအရသာမျိုးကို တစ်ခါမျှမခံစားဖူးချေ။ ရေဟင်းနုနယ်စိုက်ပျိုးရန် သင့်လျော်လှသော ရာသီဥတုအခြေအနေရှိသည့်ဒေသမျိုးလည်း အပါအဝင်ဖြစ်၏။

ဆာလောင်မှုကြောင်သာမက သူ့ဘေးရှိကျောင်းသားများထံမှ လွှမ်းမိုးခံလိုက်ရခြင်းကြောင့်ပါပေါင်း၍ သူနှင့်ရင်းနှီးသောအတန်းဖော်များကိုပင် မနှုတ်ဆက်အားတော့ဘဲ စားစရာများကို တူနှင့်အပြည့်ညှပ်ယူကာ ပါးစပ်ထဲကိုအပြည့်ထိုးသွပ်လေတော့သည်။

ဤအရသာမှာ သူထင်ထားသည်ထက် ပိုကောင်းမွန်လှသည်။

ယခုကဲ့သို့ သဘာဝဆန်သောအရသာမျိုးကို မြည်းစမ်းနိုင်ခွင့်ရရန်မှာ ကြုံတောင့်ကြုံခဲပင်။ ဟင်းနုနယ်ရိုးမှာ အလွန်ကြွပ်ဆတ်လှပြီး အရွက်များကလည်း နူးညံ့ကာအရသာကြွယ်လှ၏။ တို့ဟူးချဉ်၏အရသာကလည်း အနေတော်ပင်ဖြစ်ပြီး အားလုံးပေါင်းစပ်လိုက်သည့်အရသာမှာ မငန်လွန်းလှပေ။ အသီးအရွက်ဟင်းပွဲလေးတစ်ခုက သူ့အား ဤမျှအထိဆွဲဆောင်နိုင်လိမ့်မည်ဟု လုံးဝမတွေးထားဖူးချေ။ အမှန်တွင် သူက အသားစားရခြင်းကို ပိုခုံမင်သူဖြစ်သည်။

ရေဟင်းနုနယ်ကြော်ချက်နည်းမှာ အလွန်ရိုးရှင်းလှသည်။ သို့သော် အရွက်များကို သေချာကြည့်မိမည်ဆိုပါလျှင် ထိုအရွက်များက စိမ်းဖန့်ဖန့်အရောင်အသွေးကို ဆက်လက်ထိန်းသိမ်းထားနိုင်ကြောင်း သိရပေလိမ့်မည်။ အရွက်များက အရောင်အသွေးကောင်းမွန်လှပြီး ချွဲကျိကျိမဖြစ်ပေ။ ၎င်းမှာ ဤဟင်းလျာမျိုးတွင် မြင်ရခဲသည်။

ပိုရှားပါးသည့်အချက်မှာ ရေဟင်းနုနယ်၏အရသာပင်။ အမှန်တွင် ရိုးရိုးရှင်းရှင်းဟင်းချက်နည်းလေးတစ်ခုက ပါဝင်ပစ္စည်းများ၏ မူလအရသာကို ပိုကောင်းမွန်သွားအောင် အသွင်ပြောင်းပေးနိုင်သည်။ အရသာကို ပိုမိုကောင်းမွန်စေရန်အတွက် အခြားပါဝင်ပစ္စည်းများ ပမာဏအနည်းငယ်သာ သုံးပေးရသည်။ ဟွမ်းဝေ့ဟယ်က မီိဒီယာလုပ်ငန်းတွင် အချိန်အတော်ကြာအလုပ်လုပ်ခဲ့သည့်တိုင် ဤအခိုက်အတန့်လေးမှာ ယခုလိုကောင်းမွန်လှသည့်အရသာမျိုးကို ဖော်ပြနိုင်သည့်စကားလုံးမျိုး ရှာမတွေ့ချေ။

ဟင်းနုနယ်ရွက်ကို သူဝါးလိုက်သည့်အချိန်မှာပင် အရိုး၏ကြွပ်ဆတ်မှု၊ အရွက်၏နူးညံ့မှု၊ တို့ဟူးချဉ်၏ လေးလေးပင်ပင်အရသာနှင့် ကြက်သွန်ဖြူ၏ရနံ့ပြင်းပြင်းတို့ကို တစ်ပြိုင်တည်းခံစားလိုက်ရသည်။ ထိုကဲ့သို့သောအရသာပြည့်ဝခြင်းမျိုးက စားလိုက်ရသူတိုင်းကို တက်ကြွလန်းဆန်းသွားစေသည်။

ဟွမ်းဝေ့ဟယ်က နောက်တစ်လုတ်ကိုလည်း အလုတ်ကြီးကြီးထပ်ထည့်လိုက်ပြန်သည်။ ထိုနည်းအတိုင်း ရေဟင်းနုနယ်များကုန်စင်သွားသည်အထိ အပြတ်ရှင်းပစ်လိုက်ပြီး သူ၏စားချင်စိတ် ပိုတိုးတက်လာချိန်မှာမူ နောက်ဟင်းလျာတစ်မျိုးကိုမြည်းစမ်းရန် အဆင်သင့်ဖြစ်နေချေပြီ။

သူ့အတန်းဖော်များကလည်း ရေဟင်းနုနယ်ရွက်ကိုသာ ဦးစွာစားသောက်နေကြပေသည်။ ထိုဟင်းလျာကို အရသာမြည်းစမ်းကြည့်ပြီးသည်နှင့် တူကို လက်ကမချနိုင်လောက်အောင်ဖြစ်သွားကြ၏။

ရှောင်ဟယ်က ထိုအခြင်းအရာကိုမြင်သောအခါ အနည်းငယ်ပီတိဖြစ်သွားပြီး စကားစလာ၏။

"ကဲ.. တကယ်ပြောင်းလဲသွားတယ်မလား… ဒီရေဟင်းနုနယ်က တောင်ကုန်းအနောက်ဘက်မှာ စိုက်ထားတဲ့ဟာလေ… ပထမကန်တင်းရဲ့ သူဌေးစွေ့ကိုယ်တိုင် ညွှန်ကြားပြီး သူကိုယ်တိုင်လည်း ဝင်စိုက်ထားတာ… ငါကြားထားတာကတော့ သူ နိုင်ငံခြားမှာ စီးပွားရေးအကြောင်းသင်တုန်းက ထိပ်တန်းကျောင်းသားဖြစ်ခဲ့တယ်ဆိုပဲ..."

ထိုအခိုက်အတန့်လေးတွင် လူတိုင်းမှာ အံ့သြမှင်တက်သွားရချေသည်။

"အဲ့နှစ်ခုက ဆိုင်လို့လား..."

"မဆိုင်လောက်ဘူး..."

ရှောင်ဟယ်က ခေါင်းတကုတ်ကုတ်လုပ်နေမိသည်။

"ငါက ကန်တင်းကလူတွေ ပြောတာကို ကြားထားရုံလေးပါ… ဆိုလိုချင်တဲ့အဓိပ္ပါယ်က သူက အရာအားလုံးကို အလေးအနက်ထားပြီးလုပ်တယ်လို့ ပြောချင်တာဖြစ်မယ်… ငါထပ်ကြားထားတာက အခြေအနေတွေကို အကဲခတ်ပြီးတဲ့နောက်မှာ သူက သီးနှံပင်တွေကိုလောင်းပေးရမဲ့ ရေပမာဏကိုလည်း သတ်မှတ်ပေးခဲ့တယ်တဲ့..."

" ဒီဟင်းကို ဘယ်လိုတောင် ဂရုတစိုက်စိုက်ထားလို့များ ဒီလောက်တောင် အရသာရှိနေလဲဆိုတာကို မင်း အဲ့လိုပြောမှပဲ ငါရုတ်တရက်နားလည်လိုက်ပြီ..."

ထို့ပြင် ၎င်းမှာ ကြွားလုံးထုတ်ခြင်းမျိုး လုံးဝမဟုတ်ပေ။ အသီးအရွက်များကို ဂရုတစိုက်စိုက်ပျိုးခြင်းက ထိုအရွက်များ၏အရသာအပေါ် သက်ရောက်မှုရှိလေသည်။

ဟွမ်းဝေ့ဟယ်က အခြားဟင်းလျာများကိုလည်း မြည်းစမ်းကြည့်လိုက်သေးသည်။ ငရုတ်သီးစိမ်းရောထားသည့် အသားမွှေကြော်နှင့် ကြက်ဥမွှေကြော်ကိုလည်း သူ စားကြည့်လိုက်သည်။ ထိုဟင်းလျာများမှာ အလွန်ပင်အရသာရှိလှသည်။ သူ့ရှေ့ရှိဟင်းလျာများထဲမှ တစ်မျိုးကိုသာ သူစားရသေးသော်လည်း ပထမကန်တင်းကို လာရောက်ခဲ့သည့်ဆုံးဖြတ်ချက်အတွက် သူအံ့အားသင့်နေရဆဲပင်။ သို့သော် ရေဟင်းနုနယ်နှင့် ယှဉ်လိုက်လျှင် အခြားဟင်းလျာများတွင် အားနည်းချက်ကိုယ်စီရှိကြသည်။

ရှောင်ဟယ်၏စကားသာ မှန်ပါက ဥက္ကဋ္ဌစွေ့၏တူက အမှန်တကယ်ပင် ကျွမ်းကျင်သူတစ်ယောက်ဖြစ်၏။ ထိုဟင်းလျာများကြားရှိ ခြားနားချက်မှာ ပါဝင်ပစ္စည်းကုန်ကြမ်းများ၏ အရည်အသွေးပင်ဖြစ်၏။ ဟင်းလျာများကို ကျွမ်းကျင်အဆင့်ဖြင့် တစ်ပြေးညီတည်းချက်ပြုတ်ထားသည့်တိုင် ရေဟင်းနုနယ်ရွက်ကမူ အရည်အသွေးကောင်းမွန်လှသောပါဝင်ပစ္စည်းများကြောင့် အောင်မြင်မှုတစ်ခု ရရှိသွားပေသည်။

အစကမူ လူတိုင်းက ကန်တင်းအနီးတစ်ဝိုက်ရှိဧရိယာများတွင် အပင်များစိုက်ပျိုးထားခြင်းမှာ တစ်စုံတစ်ယောက်က အပျော်သက်သက်လုပ်နေခြင်းဟုသာ ထင်ခဲ့ကြသည်။ သို့သော် ယခုမူ အရာအားလုံးပြောင်းလဲသွားချေပြီ။ အကယ်၍ စိုက်ပျိုးထားသောထိုအပင်များက ဤမျှအရည်အသွေးကောင်းမွန်နေပါလျှင် ပထမတန်းအဆင့်စားသောက်ဆိုင်များကိုပင် တင်သွင်းနိုင်နေပြီဖြစ်၏။

၎င်းကို ဟွမ်းဝေ့ဟယ်ကိုယ်တိုင် အာမခံနိုင်လေသည်။

သူ့အနေနှင့် စျေးနှုန်းကို ဂရုမစိုက်လှသော်လည်း ကန်တင်းရှိ အသီးအရွက်ဟင်းလျာများမှာ တစ်ယွမ်နှစ်ယွမ်မျှသာ ကျသင့်ပေသည်။ အများဆုံးရှိလှ သုံးယွမ်အထိသာ။ ယောက်ချိုတစ်ဇွန်းလုံးစာအတွက် ထိုမျှသာကျသင့်ခြင်းဖြစ်၏။ ပန်းကန်လုံးကြီးတစ်လုံးစာရှိသောဟင်းရွက်အတွက် ကုန်ကျစရိတ်က မများလှပေ။ အဆင့်မြင့်စားသောက်ဆိုင်များတွင်ဆိုလျှင် ထိုပမာဏကို ယွမ်တစ်ရာမှ ယွမ်နှစ်ရာဝန်းကျင်အထိ ကျသင့်မည်ဖြစ်၏။ ထိုကျသင့်ငွေ၌ ကုန်ကြမ်းပစ္စည်းအတွက်လည်း ထည့်တွက်ရဦးမည်ဖြစ်ပြီး ကိုယ်တိုင်စိုက်ပျိုးခြင်း၊ အပင်များကိုနေ့စဉ်ရေလောင်းပေါင်းသင်ခြင်းနှင့် အပင်ကိုဖြန်းပေးရသည့် ပိုးသတ်ဆေးအဖိုးအခများကိုပါ ထည့်ပေါင်းရလိမ့်မည်ဖြစ်၏။

ဥက္ကဋ္ဌစွေ့ရဲ့တူက တကယ်ကြီးအပျော်ရှာဖို့ ဒီနေရာကိုရောက်လာတာများလား...

ဟွမ်းဝေ့ဟယ်မှာ အလွန်အံ့အားသင့်သွားပြီး ရေဟင်းနုနယ်နောက်တစ်ပန်းကန်ထပ်မှာပေးရန် ရှောင်ဟယ်အား ပြောလိုက်လေသည်။ သူ့ ဆာလောင်လွန်းလှသဖြင့် ဓာတ်ပုံရိုက်ရန်ပင် မေ့လျော့သွားရသည်။ ထို့ပြင် ဥက္ကဋ္ဌစွေ့၏တူက အပျော်ရှာခြင်းကို မည်သည့်အချိန်၌ ရပ်ပစ်လိုက်မည်ကို မည်သူမျှမသိနိုင်ချေ။

အဲ့အချိန်သာ ရောက်လာခဲ့ရင် ဒီလောက်အရသာရှိတဲ့အစားအသောက်မျိုးကို ဘယ်ကိုများ သွားရှာရပါ့မလဲ…

စားသောက်ပြီးစီး၍ ဗိုက်ပြည့်သွားသည့်နောက် ထိုအတွေးကို ထပ်မတွေးမိတော့ပေ။

ထိုညနေခင်းတွင် သူတို့ ဆရာများနှင့် ညစာစားသောက်နေကြစဉ်အတွင်း ကျောင်းကန်တင်းအကြောင်း စိတ်ထဲစွဲနေကြသဖြင့် ထိုအကြောင်းကို မပြောဘဲမနေနိုင်ကြပေ။

"ကျွန်တော်တို့ နေ့လယ်စာကို ပထမကန်တင်းမှာ သွားစားခဲ့ကြသေးတယ်… ကျွန်တော်တို့ကြားတာတော့ အဲ့ဒါ ဥက္ကဋ္ဌစွေ့ရဲ့တူ ဖွင့်ထားတာဆို..."

ပါမောက္ခကြီးအမြောက်အများကလည်း ထိုဆွေးနွေးပွဲတွင် ချက်ချင်းဝင်ပါလာကြသည်။

"မဟုတ်ဘူး… ငါကြားထားတဲ့သတင်းအရတော့ ရှောင်စွေ့က နိုင်ငံခြားမှာပညာသင်နေတုန်း ဖိအားဒဏ်တွေအများကြီးခံခဲ့ရတော့ သူ့မှာ စိတ်ပိုင်းဆိုင်ရာပြဿနာတချို့ ရှိနေတာဆိုပဲ… အဲဒါကြောင့် ဒီကျောင်းမှာ အနားယူဖို့ရောက်လာတာတဲ့..."

"သူအလုပ်လုပ်ရင် တကယ်လေးလေးနက်နက်နဲ့ စေ့စေ့စပ်စပ်လုပ်တာ… သူလည်းရောက်လာရော ကန်တင်းက အစားအသောက်တွေ လက်ရာတက်လာတော့တာပဲလေ… စီးပွားရေးအခြေအနေကလည်း ကောင်းမှကောင်း… အဲဒါကြောင့်ပဲ တခြားကန်တင်းတွေကိုလည်း လက်ရာတက်လာအောင်လုပ်ဖို့ တွန်းအားပေးနိုင်ခဲ့တာပေါ့..."

"ငါ့ရဲ့လုပ်ဖော်ကိုင်ဘက်ဆိုရင် ပထမကန်တင်းကပေးတဲ့ငရုတ်ဆီကို ညတိုင်းသယ်လာတာ… အဲ့ဒါကလေ စားသောက်ချင်စိတ်ကို လှုံ့ဆော်ပေးတယ်ကွ..."

"ဒီနေ့ မနက်အစောပိုင်းတုန်းက ငါ့သမီးက ငါ့ကတ်ကိုယူပြီးသွားစားတာ… နေ့လယ်စာကို ရေဟင်းနုနယ်ကြော်စားပြီး ပါဆယ်ပါထုပ်လာပေးတယ်လေ… ဘယ်လောက်တောင် အရသာရှိလဲမမေးနဲ့..."

ပါမောက္ခက စားပွဲပေါ်ရှိရေဟင်းနုနယ်ဟင်းပွဲကို လက်ညှိုးညွှန်ပြရင်း ပြောလေသည်။

" ဒီဟင်းက ပထမကန်တင်းကဟင်းနဲ့ယှဉ်ရင် သိပ်မကောင်းသလိုပဲ…ငါထင်တာတော့ ဒီဟာက အနံ့သိပ်မကောင်းဘူး..."

ဤကဲ့သို့သော ဟင်းလျာများကို စားသည့်အခါ ပုံမှန်ဆိုလျှင် ဘာမှသတိမထားမိပေ။ သို့သော် နှိုင်းယှဉ်မှုများပြုလိုက်သည့်အခါ ဟင်းလျာကို စားသုံးနေကြသူများက ထိုကိစ္စကိုအချိန်ယူစဉ်းစားကြည့်ပြီး ထိုစကားက မှန်ကောင်းမှန်နိုင်ကြောင်း သဘောပေါက်သွားလေသည်။ သာမန်အရွက်ကြော်နှင့် ပထမ ကန်တင်းရှိ အရွက်ကြော်တို့အကြား အဆင့်အတန်း အလွန်ကွာခြားလှသည်။

ဟွမ်းဝေ့ဟယ်က ရယ်သည်။

"ဒါကြောင့် ဆရာတွေအကုန်လုံး ဒီလောက်တောင် ကြိုက်နေကြတာကိုး… စောစောကတည်းကသာသိရင် ပထမကန်တင်းမှာပဲ ညစာစားဖို့ ချိန်းလိုက်မှာပေါ့..."

"ဟားဟားဟားဟား..."

ပါမောက္ခက ထိုအကြောင်း လေးလေးနက်နက် စဉ်းစားကြည့်လိုက်သည်။

"ငါတို့ ဒီအချိန်ကြီးကျမှ အဲဒီကိုသွားမယ်ဆိုလို့ကတော့ ဟင်းတွေအကုန် ရောင်းကုန်နေလောက်ပြီ..."

ပါမောက္ခ၏စကားအဆုံးတွင် အဖွဲ့ကြီးက ထိုအဖြစ်မှာ သနားဖို့ကောင်းလှသလို ခံစားလိုက်ရသဖြင့် နှစ်စက္ကန့်ခန့် တိတ်ဆိတ်သွားချေသည်။

အိမ်ကိုပြန်ရောက်သောအခါ ဟွမ်းဝေ့ဟယ်က သူ့ကွန်ပျူတာကိုဖွင့်ပြီး Wechat တွင် သူ့ဆရာများကိုတွေ့ရန် မိခင်ကျောင်းတော်ကြီးဆီကို အလည်သွားခဲ့ကြောင်း ပို့စ်အရှည်ကြီးရေးကာ တင်လိုက်သည်။ သူ ပထမ ကန်တင်းအကြောင်းကိုလည်း မိတ်ဆက်ပေးခဲ့ပြီး အတိတ်က ထိုတန်တင်း၏အကြောင်းများကိုပါ ပြောပြပြီး ကြွားဝါလေတော့သည်။

ယနေ့ခေတ်တွင် ဆောင်းပါးတစ်စောင်ကို ကိုယ်တိုင်ရေးစရာမလိုပေ။ ယနေ့တွင် သူ့ထံ စိတ်ကူးဉာဏ်ကွန်မြူးစရာတစ်ခု ရထားသည်။ တို့ဟူးချဉ်နှင့် ရေဟင်းနုနယ်၏ အရသာကို သူ အသေးစိတ်ဖော်ပြခဲ့ပြီး ညနေက သူစားခဲ့သော ရေဟင်းနုနယ်ရွက်နှင့် နှိုင်းယှဉ်ပြခဲ့သည်။ သူက ကိုယ်တိုင်စိုက်ပျိုးထားသော ဟင်းနုနယ်ရွက်များမှာ အရသာရှိလှကြောင်း၊ ထိုကဲ့သို့အရသာရှိရခြင်းမှာလည်း သူဌေးဖြစ်သူက အလွန်အရည်အချင်းရှိပြီး ထိုအပင်များကို ကောင်းစွာ စောင့်ရှောက်ပေးထားခြင်းကြောင့်နှင့် ဤကဲ့သို့ချီးကျူးခြင်းမှာ အပိုလုပ်ပြောခြင်း မဟုတ်ကြောင်းတို့ကို ဖော်ပြခဲ့သည်။

ဟွမ်းဝေ့ဟယ်က Cတက္ကသိုလ်မှ ဘွဲ့ရခဲ့ပြီး WE မီဒီယာတွင် အလုပ်ဝင်ခဲ့သည်မှာ ကြာလှပြီဖြစ်၏။ သူ့အရေးအသားက အလွန်ကောင်းလှသည်ဟု ဆိုနိုင်သည်။ သူ့တွင် ပရိသတ် အမြောက်အများလည်းရှိပြီး သူ့အကောင့်ကို အနီးကပ် စောင့်ကြည့်နေကြသော လုပ်ဖော်ကိုင်ဘက်များလည်း ရှိသည်။ ညလယ်ခေါင်ကြီးတွင် ဤပို့စ်ကို ဖတ်မိကြသော လူများမှာ တသောသောရယ်မောကြလေတော့သည်။ သို့သော် အဆုံးထိဖတ်ပြီးသွားသည့်နောက်မှာမူ သူတို့ ဗိုက်ဆာသွားရသည်။

"ဘာလို့ ဒီလောက်အသေးစိတ်ကြီးရေးထားတာလဲ..."

"ဒါ သက်သက် အကျယ်ချဲ့နေတာလား… ငါ ရုတ်တရက်ကြီး နန်ဟိုင်မြို့ကိုသွားပြီး အကောင်းဆုံးဆိုတဲ့ ဟင်းနုနယ်ရွက်ကို စားချင်သွားပြီ..."

"ငါတို့ သွားလို့မရဘူးဟ… ကန်တင်းမှာ စားစရာဝယ်ဖို့ စားသောက်ခွင့်ကတ်နဲ့ အရင်ဖြတ်ရမယ်လို့ ဆရာဟွမ်းပြောထားတာကို မဖတ်လိုက်ရဘူးလား..."

"အဲဒါက ငါတို့ရှီဟယ်မြို့က ဟင်းနုနယ်ထက် ပိုကောင်းလို့လား… ငါတို့ရဲ့ကြက်သွန်ဖြူနဲ့ ဟင်းနုနယ်ကို အစားအသောက်ရှိုးတွေ အများကြီးကတောင် ရိုက်ပြထားတာနော်..."

"ဗိုက်ဆာတယ်… ဒါကိုဖတ်ပြီး တအားဗိုက်ဆာလာတယ်… အဲ့ဒီနှစ်တုန်းက ဆရာဟွမ်း CU ကန်တင်းအကြောင်းတင်လိုက်တဲ့ပို့စ်ကြောင့် ငါ သူ့ကို Follow လုပ်ခဲ့တာ… ဆိုးဝါးလွန်းတဲ့ အဲဒီအစားအသောက်တွေက ဒီလောက်ကြီးကြီးမားမား ပြောင်းလဲသွားလိမ့်မယ်လို့ ထင်မထားဘူး… ကမ္ဘာကြီး ဇောက်ထိုးမိုးမျှော်ဖြစ်တော့မှာ များလား..."

"ဆရာဟွမ်းရဲ့အရသာခံစားမူက လုံးဝစိတ်ချရတယ်။ ငါလည်း နန်ဟိုင်မြို့နားမှာနေတာပဲ… တစ်ရက်လောက်တော့ သွားစားကြည့်ရမယ်..."

"အဲ့ဒါ တကယ်ကို ပထမကန်တင်းဖြစ်နေတာပဲ… ငါ့အတန်းဖော်ကတောင် ငါ့ကို ဗီဒီယိုတစ်ခုပို့သေးတယ်… ပထမကန်တင်းမှာ တန်းစီနေတဲ့လူတန်းကြီးက ရသာရုံတောအုပ်လေးထက်တောင် ပိုများသေးတယ်… အဲ့ဒီတုန်းကတော့ ငါအမှတ်မှားတယ်ထင်နေတာ… အဲ့ဒါကြောင့် အဲဒီပထမကန်တင်းတော့ လုံးဝမဟုတ်လောက်ဘူးလို့ ထင်ခဲ့တာ..."

ဟွမ်းဝေ့ဟယ်၏ ကြွားလုံးထုတ်ထားသောပို့စ်မှာ ဆူပူမှုများ မဖြစ်စေခဲ့ပေ။ သူရေးထားသည့်အကြောင်းအရာများမှာ အလွန်ရှင်းလင်းပြတ်သားလှသည့်အတွက် သူ့ Follower များထံမှ အခိုင်အမာတုံ့ပြန်မှုတစ်ခုကို ရရှိခဲ့သည်။ လူအများစုကမူ ကျောင်းကန်တင်းတစ်ခုမှ ဟင်းအရသာက ထင်သလောက်လည်း မကောင်းနိုင်ဘဲ မီဒီယာများ ချဲ့ကားထားခြင်းသက်သက်ဖြစ်သည်ဟု ထင်နေကြသည်။

သို့သော် အစားအသောက်ရေးရာအကြောင်းအရာများကို ဖန်တီးလေ့ရှိသော ဟွမ်းဝေ့ဟယ်၏ လုပ်ဖော်ကိုင်ဘက်များကမူ အနည်းငယ် သိချင်စိတ်ဖြစ်သွားကြသည်။ အမှန်တွင် သူတို့က ဟွမ်းဝေ့ဟယ်၏ အရေးအသားပုံစံနှင့် ရင်းနှီးပြီးသားပင်။

ယနေ့ညတွင်ရေးသားလိုက်သော ဤဆောင်းပါးမှာ ပထမကန်တင်း၏အနာဂတ်အတွက် အောင်မြင်ရေးလမ်းကြောင်းတစ်ခု ခင်းကျင်းပေးလိုက်ခြင်းပင် ဖြစ်၏။

......

စွေ့ချီချောင်း လသာဆောင်တွင် မတ်တတ်ရပ်ကာ သူစိုက်ပျိုးထားသော ငရုတ်ပင်၊ ကြက်သွန်နီနှင့် ကြက်သွန်ဖြူပင်များကို ရေလောင်းနေသည်။ ရေလောင်း၍ ပြီးစီးသွားသည့်အခါ သူ့ကြောင်လေးကို ခေါ်လိုက်သည်။

"ရှောင်ပိုင်..."

ခဏမျှစောင့်ဆိုင်းပြီးသည်အထိ တုံ့ပြန်မှုတစ်စုံတစ်ရာ မရသဖြင့် ထပ်ခေါ်လိုက်၏။

"ရှောင်ပိုင်..."

ဤတစ်ကြိမ်တွင်မူ သူ့လေသံထဲတွင် ခြိမ်းခြောက်လိုဟန် အရိပ်အယောင်အနည်းငယ် ပါဝင်နေချေသည်။

သုံးစက္ကန့်အကြာတွင် ရှောင်ပိုင်က အိမ်၏တစ်ဖက်ခြမ်းမှ ပြေးထွက်လာပြီး စွေ့ချီချောင်းရှေ့တွင် ဆောင့်ကြောင့်ထိုင်ချလိုက်သည်။

"ရေဖြန်းဘူးကိုယူသွား..."

စွေ့ချီချောင်းက ရှောင်ပိုင်ကို ရေဖြန်းဘူးလှမ်းပေးလိုက်သည်။ ရှောင်ပိုင်ကလည်း ပါးစပ်ကိုဟ၍ ရေဖြန်းဘူးကို ကိုက်ထားရင်း မျက်လုံးလေးများက ညှိုးငယ်နေပြီး စိတ်ဓာတ်ကျနေဟန် ပေါက်၏။ ကြောင်လေးခမျာ ရေဖြန်းဘူးကို မူလနေရာတွင်ပြန်ထားရန် အပြေးသွားလေတော့သည်။

ထိုအလုပ်ကို စွေ့ချီချောင်းကိုယ်တိုင်လည်း လုပ်နိုင်သည်။ သူက ရှောင်ပိုင်ကို လေ့ကျင့်ပေးချင်ရုံသက်သက်သာဖြစ်၏။ အကြောင်းပြချက်မှာကား ...

"သိုးထိန်းကြောင်တွေက အပြန်အလှန်တုံ့ပြန်မှုတွေရှိတာကို ကြိုက်တာမဟုတ်ဘူးလား… ငါ ရှောင်ပိုင်ကို အလုပ်မခိုင်းဘဲ ပစ်ထားလိုက်လို့ သူစိတ်ထိခိုက်သွားရင် ဘယ်လိုလုပ်မလဲ..."

ရှောင်ပိုင်က ချော‌မောပြီး အေးတိအေးစက်နိုင်လှသော စွေ့ချီချောင်း၏မျက်နှာကို ကြည့်လိုက်သည်။ ထို့နောက် စိတ်ဖိစီးမှုများနှင့်အတူ "မြောင်" ဟု အသံပေးလိုက်သည်။

စွေ့ချီချောင်း ဆိုဖာပေါ်တွင် ထိုင်ချလိုက်၏။ ရေဖြန်းဘူးကို သူ့နေရာသူပြန်ထားပြီးသွားသော ရှောင်ပိုင်ကလည်း အနားကိုလျှောက်လာပြီး စားပွဲပုလေးပေါ်တင်ထားသော စတော်ဘယ်ရီသီးများကို အနံ့ခံရန် ဦးမော့လာလေသည်။ စတော်ဘယ်ရီအများစုမှာ အလုံးကြီးပြီး ချိုလည်းချိုသည်။ စွေ့ချီချောင်းက အသီးများကို ကောက်ကိုင်လိုက်သည့်အခါ ကြောင်ဖြူလေး၏ မျက်ဝန်းများမှာ လက်ခနဲဖြစ်သွားပြီး သွားရည်ယိုနေသည့်အလား လျှာတသပ်သပ်လုပ်နေချေသည်။

"စတော်ဘယ်ရီစားချင်ရင် မင်း ဘာလုပ်ရမလဲ..."

စွေ့ချီချောင်းက အေးတိအေးစက် မေးလိုက်သည်။

ရှောင်ပိုင်က အရှက်ခွဲခံရခြင်းကို ကြိတ်မှိတ်သည်းခံပြီးနောက် အောက်ကိုထိုင်ချလိုက်ပြီး သူ့လက်လေးနှစ်ဖက်ကို တင်းတင်းကျပ်ကျပ် ပူးဆုပ်ထားလိုက်လေသည်။

"တော်လိုက်တဲ့ကြောင်လေး... မင်းကို တစ်ခုဆုချမယ်..."

စွေ့ချီချောင်းက ရှောင်ပိုင့်အား စတော်ဘယ်ရီတစ်လုံးကျွေးလိုက်သည်။ ရှောင်ပိုင်က အနည်းငယ် မာနကြီးသဖြင့် အသီးကို ကြမ်းပြင်ပေါ်၌စားရန် ဆန္ဒမရှိချေ။ သူက ‌စွေ့ချီချောင်း၏လက်ကို အထောက်အပံ့အဖြစ်သဘောထား၍ စတော်ဘယ်ရီကို တစ်တိတိကိုက်ဝါးနေလိုက်၍ အသီးထဲမှအရည်များ သူ့လက်တစ်ခုလုံးကို ပေကျံသွားစေတော့သည်။

စွေ့ချီချောင်းက ရှောင်ပိုင့်အား အကြည့်တစ်ချက်ပစ်သွင်းလိုက်သော်လည်း ဘာမှမပြောလိုက်ပေ။ ပေကျံနေသောသူ့လက်ကို တစ်ရှူးဖြင့်သုတ်လိုက်သည်။

ရှောင်ပိုင်က စားသောက်၍ပြီးစီးသောအခါ တစ်ဖက်ကိုရွှေ့သွားလေသည်။ အကယ်၍သာ စွေ့ချီချောင်းအနား ဆက်နေပါက စွေ့ချီချောင်းက သူ့ကို ပေါက်ပေါက်ရှာရှာစိတ်ကူးများဖြင့် ထပ်လေ့ကျင့်ပေးတော့မည်ကို သူသိသည်။

ထိုအခိုက်မှာပင် ပုံမှန်အချိန်၌ တိတ်ဆိတ်နေတတ်သော စွေ့ချီချောင်း၏ဖုန်းက အသံမြည်လာလေသည်။ ပြီးခဲ့သည့်တစ်ခေါက် သူတို့သွားခဲ့သော တိမွေးကုဆေးရုံမှ မက်ဆေ့ခ်ျတစ်စောင်ဝင်လာခြင်းဖြစ်၏။ သူ ထုတ်ကြည့်လိုက်ပြီး အသံထွက်ဖတ်လိုက်သည်။

"မင်္ဂလာပါ… ဒါက ကျွန်တော်တို့ဆေးရုံရဲ့ နှစ်၂၀ပြည့် အထိမ်းအမှတ်ပွဲပါ… မကြာသေးခင်ကပဲ ကျွန်တော်တို့ ဒစ်စကောင့်တချို့ချထားတာလည်းရှိပြီး အစီအစဉ်တချို့လည်းရှိပါတယ်… ဒစ်စကောင့်နဲ့ဆိုရင် ကြောင်လေးတွေကို သားကြောဖြတ်တဲ့ ပက်ကေ့ချ်က XXX (အထီး ) / XXX (အမ) ___RMB ပဲ ကျသင့်မှာပါ… သင့်ကိုတော့ တော်ဝင်လည်ပတ်လေးတစ်ခု လက်ဆောင်အဖြစ် ပေးမှာဖြစ်ပါတယ်… ဒီလို ပရိုမိုးရှင်း အကြီးကြီးပေးတာ ဒါ ပထမဆုံးပဲမို့ တစ်နှစ်စာအတွက် သက်ရောက်မှုရှိပါတယ်… မိဘတွေအနေနဲ့ ပါဝင်ဆင်နွှဲဖို့ သေချာစဉ်းစားဆုံးဖြတ်စေချင်ပါတယ်..."

အဓိပ္ပာယ်ဖော်မရသော အပြုံးတစ်ခုက စွေ့ချီချောင်း၏မျက်နှာထက် ပေါ်ပေါက်လာလေသည်။

"ဒီဒစ်စကောင့်က တော်တော်လေးအရာရောက်သားပဲ… ငါတို့ စမ်းကြည့်ကြမလား..."

🌱🌱🌱

Prev Next