Chapter 25

🌱Arc 1 [ ကျောင်းတွင် လယ်စိုက်ခြင်း ]

Ch 25

နာမည်ကြီးလာခြင်း (အပိုင်းသုံး)

သတင်းအချက်အလက်ဆက်သွယ်ရေး တိုးတက်လာသည်နှင့်အမျှ CU၏ ကျောင်းသားအသစ်များသာမက အဟောင်းများပါ တက္ကသိုလ်ကန်တင်း၏ ကိစ္စရပ်အဖြာဖြာကို သတိထားမိလာကြသည်။

Dနိုင်ငံဇာတိဖြစ်သော ဟန်က မကြာသေးမီက တက္ကသိုလ်ဝင်စာမေးပွဲဖြေဆိုခဲ့သော CUဘွဲ့ကြိုကျောင်းသားတစ်ဦးဖြစ်သည်။ ဟန်က နိုင်ငံရပ်ခြားသို့ ပညာသင်ကြားရန်မရွေးချယ်မီ တရုတ်နိုင်ငံသို့ အကြိမ်ပေါင်းများစွာ လာရောက်ခဲ့ဖူးပြီး ဤနိုင်ငံအပေါ် ကောင်းမွန်သောအမြင်တစ်ခုရှိထားသည်။ တရုတ်အစားအစာများအပေါ် အပြုသဘောဆောင်သော အမြင်လည်းရှိသည်။

သူက တရုတ်တက္ကသိုလ်ကျောင်းသားတစ်ယောက်အဖြစ် နေ့စဉ်ဘဝကို အလွယ်တကူညှိယူနေထိုင်ခဲ့ပြီး တရုတ်ပြောင်းဖူးကို အရယူရန်အတွက် သူ့အခန်းဖော်များနှင့်အတူ ကန်တင်းကို စိတ်အားထက်သန်စွာ ထွက်လာခဲ့ကြသည်။

အမှန်တွင် ဟန်က ကန်တင်းကို ပထမဆုံးအကြိမ်ရောက်လာဖူးခြင်းဖြစ်သော်လည်း စနိုးစနောင့်ဖြစ်နေခြင်းမျိုးမရှိချေ။ ကန်တင်းတွင် လူကြိတ်ကြိတ်တိုးနေသောကြောင့် အနည်းငယ်ရှက်နေမိရုံသာ။ ထမင်းစားချိန်တွင် မည်သည့်ကန်တင်းကိုသွားသွား ကန်တင်းတိုင်းက အမြဲတမ်းပြည့်ကျပ်နေတတ်သည်။ ကန်တင်းတွင် လူများလွန်းသောကြောင့် သူ အပြင်ထွက်စားချင်ခဲ့သည်။

ကံကောင်းထောက်မစွာဖြင့် သူ့အခန်းဖော်က ဟန်ကို တားလိုက်သည်။ ထို့ကြောင့် ဟန်က သူ့ဆုံးဖြတ်ချက်ကို နောင်တရနေရမည့်ကိစ္စမျိုး ရှိမလာတော့ချေ။

အခန်းဖော်၏အကူအညီဖြင့် ဟန်က ကန်တင်းတွင် သူ၏ပထမဆုံးနေ့လယ်စာကို မှာယူရန် ပြတင်းပေါက်နားသို့ လျှောက်သွားလိုက်သည်။ အခန်းဖော်၏အကြံပြုချက်အတိုင်း ခြင်္သေ့ခေါင်းစွပ်ပြုတ်၊ ကြက်သွန်ဖြူအရသာရှိသောနံရိုးနှင့် ဂေါ်ဖီထုပ်ကြော်တို့ကို မှာယူခဲ့သည်။

" ကျွန်တော်ခရီးသွားတုန်းကလည်း ဒါကိုစားဖူးတယ်…"

ညစာစားသောက်၍ ပြီးစီးသွားသောဟန်က ဟင်းလျာများထဲကတစ်ခုကို လက်ညှိုးထိုးပြပြီးပြောသည်။

"အဲ့ဒါက အရသာသိပ်ရှိတာ ကျွန်‌တော်ကြိုက်တယ်…"

ဟင်းပွဲလိုက်ချပေးရသည့်အဒေါ်ကြီးက ခေါင်းကို ဘယ်ညာယိမ်းလိုက်ပြီးမေး၏။

"ဘယ်တစ်ခုလဲ…"

ဟန်က ခဏမျှစဉ်းစားလိုက်သော်လည်း ထိုအရာကို မန်ဒရင်းစကားဖြင့် မည်သို့ပြောရမည်ကို မမှတ်မိပေ။

"ဟိုဟာ..အဲ့ဒါက အဲဒီကြက်ဥကြမ်းလေ…"

တစ်ချက်မျှကြည့်လိုက်လေရာ ဟင်းပွဲလိုက်ချပေးရသည့်အဒေါ်ကြီးက ထိုဟင်းပွဲကိုတွေ့သွားသည်။

အိုး... အဲ့ဒါက ကျားအရေခွံဥပဲ...

ကံကောင်းစွာဖြင့် သူမက နိုင်ငံ့အချက်အချာတက္ကသိုလ်တွင် အလုပ်လုပ်ကိုင်နေသူဖြစ်သောကြောင့် အင်္ဂလိပ်စကားပြောတတ်လေသည်။

သူမက နန်ဟိုင်လေသံဖြင့် အင်္ဂလိပ်စကားပြောလိုက်သည်။

"အဲ့ဒါက ဆီပူထဲမှာ ထည့်ကြော်ထားတဲ့ကြက်ဥပြုတ်လေ… ကျား အရေခွံ ဥလို့ခေါ်တယ်…"

ကံကောင်းထောက်မ၍ ဟန်၏အခန်းဖော်က သူမ ပြောနေသည်ကို နားလည်သွားသည်။

 (ချွေးပြန်) အာ.. အဲ့ဒါ ကျားအရေခွံဥပဲ....

"ဟုတ်တယ် ကျားအရေခွံဥ…"

ဟန်က မန်ဒရင်းစကားလုံးကို နားလည်ရုံမျှသာ။

"ကျွန်တော် နှစ်ခုလောက်လိုချင်တယ်…"

အဒေါ်ကြီးသည် ကျားအရေခွံဥနှစ်လုံးကို သူ့အတွက် သွားယူပေးလိုက်သည်။

ကျားအရေခွံဥပေါ်တွင် လှီးဖြတ်ရာတချို့ရှိနေပြီး ထိုဥကို ရွှေရောင်မပြောင်းမချင်း ကြော်ထားခြင်းဖြစ်၏။

အပေါ်ယံလွှာက နူးညံ့နေပြီး ပဲငံပြာရည်များလူးထားကာ ဥတစ်ခုလုံး ရွှေရောင်သမ်းနေချေသည်။ ၎င်းကို ကြက်သွန်မြိတ်အနည်းငယ်ဖြင့် အလှဆင်ထားသည်။

"ဒီဥက အကြီးကြီးပဲ…"

ဟန်က ပါးစပ်ထဲအပြည့်ထိုးသွပ်လိုက်ပြီး ကျားအရေခွံဥ၏တစ်ဝက်နီးပါးကို စားလိုက်လေသည်။ ကျားအရေခွံဥ၏ အပေါ်ယံအလွှာကို သူ့သွားများဖြင့် ကိုက်ဖြဲလိုက်သည်။ ဥတစ်ဝက်က အဖြူရောင်ဥအကာများဖြစ်သောကြောင့် တင်းတင်းရင်းရင်းရှိပြီး နူးညံ့လှသည်။ အနှစ်ကလည်း အရသာရှိလှပြီး ကောင်းမွန်သောအသွင်အပြင်ရှိကာ ပဲငံပြာရည်ကို အနည်းငယ်သာသုံးထားသည်။ ပဲငံပြာရည်ကို ဟင်းလျာ၏အရောင်အဆင်း လှပစေရုံမျှသာ အသုံးပြုထားသည်။

ဤကျားအရေခွံဥက ဟန် ယခင်ကစားခဲ့ဖူးသောဥများထက် ဆယ်ဆပိုကောင်းလေသည်။ ဥနှင့် ပဲငံပြာရည်၏အရသာအပြင် ကြက်သွန်မြိတ်ကြော်များ၊ ကြွပ်ရွသောအရေခွံနှင့် နူးညံ့သောအတွင်းအူတိုင်များက သူ့ကို ဤဟင်းလျာအပေါ် အပြုသဘောဆောင်သောအမြင်တစ်မျိုးချန်ရစ်ခဲ့သည်။ သူ ထိုဥကိုတစ်ဝက်ခန့် စားမိသွားသဖြင့် စိတ်ပျက်သွားရသည်။ ယခုမူ သူ့မှာ ဥတစ်လုံးခွဲသာကျန်တော့သည်။

ဟန်၏အခန်းဖော်က ဤအချိန်တွင် တစ်စုံတစ်ခုမူမမှန်ကြောင်း သဘောပေါက်လိုက်သည်။ 

"သေစမ်း…ဒီကျားအရေခွံဥက အကြီးကြီးပဲ…"

သူက ခေါင်းကိုချာခနဲလှည့်လိုက်ပြီး မေးလေ၏။

"ပန်းကန်ထဲမှာ ဘဲဥတွေရှိတယ်လို့တော့ မပြောနဲ့နော်…"

သူ့အတန်းဖော်က ခေါင်းညိတ်လျက်ဆိုလာလေ၏။

 "မင်းထင်နေတာအမှန်ပဲ… အဲဒါ ဘဲဥလေ…"

"အိုး...ဟန်ရေ ငါ့ကို ကျားအရေခွံဥပေးပါဦး…" 

သူ့အခန်းဖော်က ထိုသို့ပြောရင်း သူ့တူကို ဆန့်ထုတ်လိုက်သည်။ ကန်တင်းထဲကဘဲများ ဥဥနေကြောင်း သိလိုက်ရသော်လည်း သူတို့အားလုံး ဥဥသည့်အရွယ်ကိုရောက်လာပြီဆိုသည်ကို မထင်ထားပေ။

"ဟင့်အင်း…မရဘူး ငါ မင်းကို တစ်ဝက်ပဲပေးနိုင်မှာ…"

ဟန်က ထိုအရသာကို ပြန်ပြောင်းအောက်မေ့နေဆဲဖြစ်လေရာ သူ့အခန်းဖော်ကိုပေးရန် သဘောမတူနိုင်ပေ။

"အင်း... ဒါဆိုလည်း တစ်ဝက်ပဲပေး…" 

သူ့အခန်းဖော်သည် ကျားအရေခွံဘဲဥတစ်ဝက်ကို ဝါးရင်း လောဘတကြီး သွားရည်ယိုနေချေသည်။ ရှောင်ပိုင်၏ဘဲများမှဥထားသောဘဲဥများက အလွန်အရသာရှိကြောင်းသာ သူပြောနိုင်တော့သည်။

သူတို့ ယခုထက်ပို၍ ခပ်များများမှာယူရန်အတွက် ပြတင်းပေါက်ဆီသို့ အပြေးသွားသော်လည်း နောက်ကျသွားပြီဖြစ်၏။ ဘဲများက ဥများကို အကန့်အသတ်ဖြင့်သာဥလေသည်။ တစ်ဝက်ကို ကျားအရေခွံဥအဖြစ် ပြုလုပ်ထားပြီး ကျန်တစ်ဝက်ကို ဘဲဥဆားနယ်အဖြစ် ပြုလုပ်ထားပြီးဖြစ်သည်။

သူ့အခန်းဖော်က လူတစ်ယောက်က ဆားနယ်ထားသောဘဲဥများ ယူလာသည်ကို တွေ့လိုက်ရသည်။ ထိုကောင်လေးက ထိုဥများကိုခွဲလိုက်သည့်အခါ အတွင်းရှိအနှစ်က နီရဲကာဝင်းလက်နေပြီး အဆီရွှဲနေသည်ကို မြင်လိုက်ရသည်။ ရနံ့ကလည်း အခန်း၏အဝေးဆုံးထောင့်နားအထိ ပျံ့နှံ့သွားပြီး သွားရည်ယိုလာစေသည်။ ထိုဥအကြောင်း သတင်းမရထားသည့်အတွက် မအီမသာဖြစ်သွားရသည်။ သူ ကြိုသိခဲ့လျှင် ကျားအရေခွံဥနှင့် ဘဲဥဆားနယ်ကိုရရန် ချက်ချင်းအပြေးသွားခဲ့မိမှာပင်။

ကံကောင်းထောက်မစွာဖြင့် ဘဲများက ယခုအခါတွင် ဥများပိုမိုဥလာလေ့ရှိပြီး အရေအတွက်ကန့်သတ်မှုရှိသော ပြောင်းဖူးနှင့်ယှဉ်လျှင် ဘဲဥအရေအတွက်က ပိုများပြားလေသည်။

ဟန်က ကျန်ရှိနေသေးသောကျားအရေခွံဥကို လက်စသတ်လိုက်ပြီး အခြားဟင်းလျာများကို ဆက်လက်မြည်းစမ်းကြည့်သည်။ ဂေါ်ဖီထုပ်ကြော်ကြောင့် သူ့မှာ အံ့သြသွားရပြန်သည်။ ထိုဟင်းမှာ အဆီမများပေ။ အမှန်တွင် ဟင်းလျာတိုင်းက အဆီမများလှချေ။

သူက တရုတ်အစားအစာကို နှစ်သက်သော်လည်း တရုတ်အစားအစာအများစုမှာ မွှေကြော်ထားသောကြောင့် တရုတ်ဟင်းချက်နည်းများက သူ့အိမ်တွင် ချက်ပြုတ်သည့်နည်းလမ်းများနှင့် ကွဲပြားကြောင်းကိုမူ ဝန်ခံရပေလိမ့်မည်။ ကြော်ထားသောဟင်းလျာအများစုမှာ နိုင်ငံခြားသားအများစုအတွက် ဆီများလွန်းလေသည်။ သို့သော် ဆီပမာဏမှန်မှန်ကန်ကန်ထည့်ထားသော ဤမွှေကြော်ဟင်းလျာများကမူ အလွန်လတ်ဆတ်လှသည်။ ဟန်အနေနှင့် ဤသည်မှာ တရုတ်အစားအစာချက်ပြုတ်ရာတွင် အတိကျဆုံးနည်းလမ်းဖြစ်သည်ဟု ယုံကြည်မိသည်။

"ငါ့ကောင်ရေ...ငါ မြို့တော်တော်များများကို ရောက်ဖူးပါတယ်…ကန်တုံဟင်းလျာ၊ စီချွမ်ဟင်းလျာ၊ ရှီကျန်းဟင်းလျာတွေအကုန် စားဖူးတယ်…ဒါပေမဲ့ ဒီနေ့ငါတို့စားခဲ့တာ ဘာများလဲ…"

ဟန်က သူ့အခန်းဖော်ကို မမေးဘဲမနေနိုင်တော့ချေ။

သူက ကျားအရေခွံဥကိုသာ ခွဲခြားသိနိုင်ခဲ့သော်လည်း အခြားဟင်းလျာများအကြောင်းကိုမူ သေချာမသိပေ။

ထိုစကားကို နားထောင်ပြီးနောက် သူ့အခန်းဖော်ကလည်း တွေးတွေးဆဆဖြင့်ပြောလာလေသည်။

"ဟေး... ဒါက ကန်တင်းဟင်းလျာပဲ…" 

"ဒါက ကန်တင်းဟင်းလျာလို့ခေါ်တာ ဖြစ်နိုင်လို့လား… ဘာလို့ ငါ အရင်ကမကြားဖူးတာလဲ… ဒါက တရုတ်ရိုးရာအစားအစာရှစ်မျိုးထဲမှာပါတာလား… ဒါမှမဟုတ် အဲ့ဒီရှစ်မျိုးထဲကတစ်မျိုးမျိုးကို နောက်တစ်မျိုးပြောင်းခေါ်တဲ့နာမည်လား…"

တရုတ်ယဉ်ကျေးမှုနှင့်ပတ်သက်ပြီး သူသိနားလည်ထားသည့်အရာများမှာ မလုံလောက်သေးဟု ဟန်သိထားလေသည်။ တရုတ်ဘာသာစကားတွင် မည်သည့်အရာကိုမဆိုထုတ်ဖော်ပြသရာ၌ ဒေသိယစကားများအပါအဝင် နည်းလမ်းများစွာရှိကြောင်း သူကောင်းစွာသိရှိထားသည်။

"မဟုတ်ဘူး မဟုတ်ဘူး…ဒါက ကိုးခုမြောက်တရုတ်ရိုးရာအစားအစာလေ… ဒါကို မင်း ကန်တင်းမှာပဲမြည်းကြည့်လို့ရတာ…"

သူ့အခန်းဖော်ကလည်း အတည်ပေါက်ကြီးပြောလာလေသည်။

"ဟုတ်လား…" 

ဟန်က ခေါင်းတညိတ်ညိတ်လုပ်နေလေသည်။ ထိုအရာကို သူလေ့လာရန် ကျန်သွားပုံရသည်။ ကိုးခုမြောက်တရုတ်ရိုးရာဟင်းလျာတစ်မျိုး ရှိနေခဲ့သည်ပင်။

နှစ်ရက်အကြာတွင် သူ့အခန်းဖော်မှာ 'သေသာသေလိုက်ချင်တော့သည်'ဟူသောအမူအရာဖြင့် အိပ်ဆောင်ကိုပြန်ရောက်လာသောဟန်ကို တွေ့လိုက်ရသည်။  

"အိုး...ဟန် မင်းဘာဖြစ်လာတာလဲ… ဘာလို့ ကားကိုနေ့တစ်ဝက်လောက်ဆွဲလာရသလို အမူအရာမျိုးဖြစ်နေတာလဲ… မင်း ညစာစားဖို့ ထွက်သွားတာမဟုတ်ဘူးလား။ ဘာဖြစ်လို့လဲ… ကန်တင်းမှာ လူပြည့်နေလို့လား…"

"..." 

ဟန်က သူ့ကို ခါးသီးစွာစိုက်ကြည့်နေလေသည်။

အခန်းဖော်ကလည်း ဘာဖြစ်၍ဖြစ်နေမှန်း မသိချေ။

"ဘာကိစ္စရှိလို့လဲ… မသိရင် ငါကပဲ မင်းခြေထောက်ကိုနင်းထားတဲ့ပုံစံနဲ့…"

ဟန်က ယခုရက်များတွင် ကန်တင်း၏အစားအသောက်အားလုံးကို စမ်းသပ်စားသောက်ခဲ့သော်လည်း လုံလောက်မှုမရှိသေးဟု ခံစားရသည်။ သူ့အခန်းဖော်ပြောပြဖူးသောဟင်းလျာအကြောင်းကို သူ သတိရမိလိုက်သောအခါ ဝမ်းသာကြည်နူးသွားရသည်။

သူတို့က တက္ကသိုလ်မြို့တော်မှာ နေထိုင်နေခြင်းဖြစ်၍ သူတို့ပတ်ဝန်းကျင်တွင် ကျောင်းကန်တင်းများစွာရှိလေသည်။ သူ့အတွက် အရသာပိုရှိတဲ့ တခြားအစားအသောက်တွေ စောင့်ကြိုနေမယ်မလား…

ဤသို့ဖြင့် ဟန်က အခြားကျောင်းရှိကန်တင်းကိုသွားပြီး ထိုနေရာရှိ အိုးကြီးချက်ဟင်းလျာများကို သွားရောက်မြည်းစမ်းတော့သည်။

သို့သော် ဟန်က နန်ဟိုင်နည်းပညာတက္ကသိုလ်သို့သွားခဲ့၏။

အခြားနည်းဖြင့်ပြောရလျှင် နန်ဟိုင်နည်းပညာတက္ကသိုလ်၏ကန်တင်းက တက္ကသိုလ်မြို့တော်ထဲတွင် CUကန်တင်းနှင့် ဆင်တူသောအစဉ်အလာမျိုးရှိသည့် တစ်ခုတည်းသောတက္ကသိုလ်ဖြစ်သည်။ ထို့အပြင် ပထမကန်တင်း၏ မူလသူဌေးဖြစ်သူက ပထမကန်တင်းကို လေလံဆွဲရာတွင်ရှုံးနိမ့်ခဲ့ပြီးနောက် ထိုနေရာရှိ ထိုနေရာရှိချက်ပြုတ်ရေးနည်းနာများကြောင့် နန်ဟိုင်နည်းပညာတက္ကသိုလ်သို့ရောက်သွားကြောင်း ကျောင်းသားများသိထားကြသည်။

ဟန် : "မင်း လူလိမ်…"

သူ့အခန်းဖော်က ငါးစက္ကန့်မျှအံ့အားသင့်သွားပြီးမှ ဟားတိုက်ရယ်မောမိလေတော့သည်။

"ငါလူး... ဟားဟားဟား…"

ပထမကန်တင်းကို ပြုပြင်ပြောင်းလဲလိုက်ပြီးနောက် ရေပန်းအစားဆုံးရှာဖွေမှုစာရင်းထဲ ပါလာခဲ့သည်မှာ အချိန်အတော်ကြာခဲ့ပြီဖြစ်၏။ CUကျောင်းသားများအတွက် ဆိုးဝါးလှသောဟင်းလျာများကို မြည်းစမ်းခွင့်ရခဲ့ခြင်းကပင် ရှားပါးသောအတွေ့အကြုံတစ်ခု ဖြစ်လာလေသည်။

ဤနိုင်ငံခြားသားမှာ နန်ကျင်းနည်းပညာတက္ကသိုလ်ရှိ အခြားကန်တင်းများဆီသို့ စိတ်အားထက်သန်စွာ မျှော်လင့်ချက်ကြီးကြီးထားလျက် သွားခဲ့သည်ကို သိလိုက်ရသောအခါတွင် သူသည် ဗိုက်အောင့်မတတ်ရယ်မောမိလေတော့သည်။ ထိုနေရာတွင် တန်းစီသူများမရှိသည့်အတွက်ပင် သူက ဝမ်းသာနေခဲ့သေးသည်။

တစ်ဖက်တွင် မတ်တတ်ရပ်နေသောဟန် : "..."

သူက ရယ်ရင်းမောရင်းဖြင့် ဟန်တစ်ယောက်ဖြစ်ပျက်နေသောအမူအရာကို ဓာတ်ပုံရိုက်ပို့ပြီး သူ့သူငယ်ချင်းများဆီကိုပို့လိုက်သည်။

[ရိုးသားလွန်းတဲ့ငါ့အခန်းဖော်လေးက ကန်တင်းမှာရောင်းတဲ့အစားအသောက်တွေက ကန်တင်းရိုးရာဟင်းလျာဖြစ်တယ်ဆိုတဲ့အကြောင်းကြားပြီး တခြားကန်တင်းကဟင်းတွေကိုမြည်းကြည့်ဖို့ နန်ဟိုင်နည်းပညာတက္ကသိုလ်အထိသွားခဲ့တယ်တဲ့… ဒါက အခု သူဖြစ်ပျက်နေတဲ့အမူအရာပဲ…]

အိပ်ဆောင်ကို ပထမဆုံးရောက်လာစဉ်က ဟန်နှင့် သူ့အခန်းဖော်တို့တွဲရိုက်ထားသော အဖွဲ့လိုက်ဓာတ်ပုံတစ်ပုံလည်းပါသည်။ သူတို့က တောက်ပစွာပြုံးနေကြပြီး လက်ရှိအခြေအနေနှင့် လုံးဝဆန့်ကျင်ဘက်ဖြစ်နေသည်။

သူ့အခန်းဖော်က "ဟားဟား"ရီအက်များစွာကိုရရှိခဲ့ပြီး ဟန်သည်လည်း ကျောင်းဝင်းအတွင်း နာမည်ကြီးသွားလေသည်။ အစားအသောက်များကိုမြည်းစမ်းရန် အပြင်ထွက်သွားသည့် နိုင်ငံခြားသားဘွဲ့လွန်ကျောင်းသားတစ်ယောက်နှင့်ပတ်သက်သည့် ကြောက်စရာကောင်းလှသည့်ဖြစ်ရပ်အကြောင်းကို လူတိုင်းသတိပြုမိသွားကြသည်။

နန်ကျင်းနည်းပညာတက္ကသိုလ်၏ အိမ်နီးချင်းကျောင်းသားများလည်း ထိုအကြောင်းကိုကြားပြီး သေမတတ်အူတက်သွားကြရသည်။ ဤဖြစ်ရပ်မဖြစ်ပွားခင်အထိ သူတို့က CUကျောင်းသားများကို မနာလိုရန်အခွင့်အရေးပင် မရခဲ့ပေ။ 

အဲ့ဒီနိုင်ငံခြားသားက ဘယ်လိုတောင်ကံဆိုးရတာလဲ...

ကန်တင်းဟင်းလျာများကို လှည့်ပတ်စားသောက်ခြင်းက ကောင်းသည်။ 

ဒါပေမဲ့ တက္ကသိုလ်မြို့တော်မှာ ကန်တင်းအများကြီးရှိတဲ့ကြားက သူတို့၏နန်ကျင်းနည်းပညာတက္ကသိုလ်ကိုမှ ရောက်လာတယ်တဲ့လား…

ဤကိစ္စက ရယ်စရာကောင်းလွန်းလှသောကြောင့် CUတွင် တစ်လတာအတွက် အမိုက်မဲဆုံးဖြစ်ရပ်သုံးခုထဲမှ တစ်ခုအဖြစ် အဆင့်သတ်မှတ်ခံခဲ့ရသည်။

သူဌေးစွေ့က အလုပ်သိပ်ကြိုးစားတာကိုတောင် CUကျောင်းသားတစ်ယောက်အနေနဲ့ မင်းက တကယ်ပဲ အစားကောင်းမစားရဘူးလားဟ...

……

LJJကုမ္ပဏီ၌...

လင်းလင်း၏လက်အောက်ခံအဖွဲ့သက စွေ့ချီချောင်း၏ တက္ကသိုလ်နေ့စဉ်ဘဝ အစီအစဉ်၏အပိုင်းသစ်ကို မည်သို့တည်းဖြတ်ရမည် ဆိုသည့်အချက်နှင့်ပတ်သက်ပြီး သဘောတူညီချက်မရရှိသေးချေ။

စွေ့ချီချောင်း၏ "ရည်းစားမလိုချင်ဘူး"ဟူသောစကားက အဓိကဝိရောဓိကြီးဖြစ်သည်။ ထုတ်လုပ်ရေးအဖွဲ့သားများ ဤစာသားကို မြင်လိုက်ရသောအခါ နှလုံးဖောက်သွားခဲ့ရသည်။ ထိုစာကြောင်းကို ဖြတ်ထုတ်သင့်သလား၊ မဖြတ်ထုတ်သင့်လားဆိုသည်ကိုလည်း ဝေခွဲမရဖြစ်နေချေသည်။

ထိုဒိုင်ယာလော့ကိုထည့်လိုက်လျှင်လည်း ပရိသတ်များကို စိတ်အနှောင့်အယှက် ဖြစ်စေလိမ့်မည်။

လင်းလင်းက ထိုကိစ္စနှင့်ပတ်သက်ပြီး အသင်းသားအားလုံးငြင်းခုံနေကြသည်ကို သတိပြုမိသဖြင့် ဆုံးဖြတ်ချက်ချလိုက်သည်။

"ဒီစာကြောင်းကို ဖြတ်မထုတ်နဲ့..." 

အမှန်တွင် လင်းလင်းလည်း အနည်းငယ်တုန်လှုပ်သွားခဲ့ရသည်။ ထိုစကားကိုကြားလိုက်ရစဉ်က သူမ သွေးအန်လုမတတ်ပင်။

ပုံရိပ်ယောင်ကမ္ဘာရှိ စွေ့ချီချောင်းကမူ လင်းလင်းတစ်ယောက် ပရိသတ်များ၏ စူးစမ်းလိုစိတ်ကို ဖမ်းစားရန်အတွက် ထုတ်လွှင့်မှုဝက်ဘ်ဆိုက်ပေါ်တွင် ပဟေဠိဖြစ်ဖွယ်ရာတစ်ခုကို တင်လိုက်ကြောင်း မသိခဲ့ရှာပေ။ အကြောင်းအရာကမူ "စွေ့ချီချောင်း ဘယ်တော့မှများချစ်မိမလဲ"ဟူ၍ပင်။

ကောမန့်ကဏ္ဍထဲ၌ လက်ရှိတွင် သူချစ်ကျွမ်းဝင်ရမည့်အချိန်အပါအဝင် အကြောင်းအရာမျိုးစုံကို ဆွေးနွေးနေခဲ့ကြသည်။

သို့သော် သေချာဂရုတစိုက်စဉ်းစားပြီးနောက် လင်းလင်းက 'ကြောက်လျှင်လွဲ၊ ရဲလျှင်မင်းဖြစ်'ဟူသည့်စကားကိုလက်ကိုင်ထားရင်း ထိုဒိုင်ယာလော့ကို အစီအစဉ်ထဲတွင်ထည့်သွင်းရန် ဆုံးဖြတ်ခဲ့သည်။ ရိုက်ချက်မှာမူကား "ရည်းစားမလိုချင်ဘူး"ဟု ရေရွတ်ပြောဆိုနေသော စွေ့ချီချောင်း၏အနီးကပ်ရိုက်ချက်ပင်။ ထို့နောက် ထိုစကားကိုကြားပြီး ကြက်သေသေသွားသော ကြောင်လေး၏အမူအရာကိုပါ ပူးတွဲပြသခဲ့သည်။

ထိုအပိုင်းကို ထုတ်လွှင့်လိုက်ပြီးနောက်တွင် မှတ်ချက်ပေးသည့်ဧရိယာကြီးတစ်ခုလုံး ပေါက်ကွဲသွားလေတော့သည်။

[... မင်းကတကယ်ချစ်ကျွမ်းမဝင်ချင်တာပဲ… အား.. ငါ အစောကတည်းကသိခဲ့သင့်တာ…]

[သြော် ငါသိတာကြာလှပြီ… သူ ဒီလိုပဲလုပ်မှာသေချာတယ်…]

[မကြားချင်ဘူး မကြားချင်ဘူး မကြားချင်ဘူး… အဲဒါကို မကြားချင်ဘူး… မင်းရဲ့စကားတွေကို အမြန်ပြန်ရုပ်သိမ်းလိုက်…]

[စွေ့ချီချောင်း...မင်းက လူမဟုတ်ဘူး…]

[ငါ့အမူအရာက ရှောင်ပိုင်နဲ့အတူတူပဲ… ငါ့မှာတော့သေမတတ်လန့်သွားလိုက်ရတာ… မင်းကတော့ မချစ်နိုင်ဘူးလို့ပြောလိုက်တာတဲ့လား…]

[သေမတတ်လန့်တယ်တဲ့လား… ငါကတော့ အခု ထမင်းစားဖို့ အင်္ကျီလက်ကို လှန်တင်ရုံပဲတတ်နိုင်တော့တယ်...]

[သေလောက်အောင် ငိုချင်နေပါပြီနော်… သူချစ်မိဖို့ အခွင့်အရေးလုံးဝမရှိရင် ကျောင်းဝင်းGenreအဖြစ် အမျိုးအစားတပ်ထားတာက အလကားဖြစ်သွားတော့မှာပေါ့…]

ထို့ကြောင့် ကြည့်ရှုသူများမှာ အဆက်မပြတ်မျက်စိလှန်ပြရုံသာတတ်နိုင်ကြလေသည်။ တစ်ခဏအတွင်းမှာပင် သူတို့က ထိုအစီအစဉ်ကို သူတို့သူငယ်ချင်းများအား ကြည့်ကြရန် အကြံပြုကြလေတော့သည်။ ပျော်ရွှင်မှုကိုမမျှဝေပါက တစ်စုံတစ်ယောက်နှင့် နီးစပ်သောသူငယ်ချင်းဆက်ဆံရေးကို တည်ဆောက်ရန် ခက်ခဲပေလိမ့်မည်။

🌱🌱🌱