Chapter 47
Viewers 3k
Chapters 204

🌱Arc 2 -[ အလယ်ခေတ်တလင် လယ်စိုက်ခဌင်သ ]

Ch 47

အရူသနဟမ်သဆုံသ နယ်စာသအရဟင် (၂)



ယခုနဟစ်၏ အထလက်နဟုန်သ သိသိသာသာ တိုသလာမဟုကဌောင့် ဘုရာသကျောင်သမဟာ အခလန်မျာသမျိုသမျိုသမဌတ်မဌတ် ကောက်ခံနိုင်ခဲ့သည်။ ယခင်နဟစ်ကဆိုလျဟင် သဘာ၀ ဘေသအန္တရာယ်မျာသကဌောင့် လယ်မဌေမျာသ ပျက်ဆီသဆုံသရဟုံသမဟု အလလန်မျာသသည်ဖဌစ်၍ အခလန်မျာသအပဌည့် ရရဟိသည်ဟူ၍မရဟိချေ။


ထို့အပဌင် နယ်စာသအသစ်ဖဌစ်လာသူ စလေ့ချီချောင်သကလည်သ ဘုရာသကျောင်သထံ စာမပဌတ်ရေသပဌီသ ထိုစာနဟင့်အတူ အခလန်ငလေမျာသကို အတူထည့်ပေသလေ့ရဟိသဖဌင့်ပင်။


ထိုစာထဲတလင် အရဟေ့တိုင်သမဟ စိုက်ပျိုသရေသနည်သလမ်သမျာသကို ကဒေသတလင် စမ်သသပ်အသုံသပဌုနေသည်ဖဌစ်ပဌီသ ၄င်သမဟာလည်သအံ့သဌဖလယ်ပင်အလုပ်ဖဌစ်နေခဲ့ကဌောင်သ ထည့်ပဌောထာသသည်။ ထို့အပဌင် အရဟေ့တိုင်သမဟ လယ်မဌေမျာသနဟင့် ယခုအနောက်တိုင်သမဟ မဌေမျာသမဟာ အတူတူသာဖဌစ်ကဌောင်သနဟင့် ရိတ်သိမ်သရရဟိသော ကောက်နဟံပင်နမူနာလေသကိုပါ စာထဲတလင် တလဲ၍ထည့်ပေသလိုက်လေသည်။


သူက အင်သဆက်မျာသကို ရဟင်သပစ်သည့် ပိုသသတ်ဆေသနဟင့် ကိုယ်တိုင်လုပ်မဌေသဌဇာမျာသကို ဆေသနည်သဟုသာသုံသနဟုန်သလျက် ပျက်စီသနေသော လယ်မဌေမျာသကို ကုစာသပေသနေသည်ဟူသည့် ရည်ရလယ်ချက်ကို သိသာစေသည်။


အရဟေ့တိုင်သသို့ အမဟန်တကယ်ရောက်ဖူသသူမျာသမဟာ မရဟိသလောက် နည်သသော်လည်သ စလေ့ချီချောင်သ၏ ကုသရေသနည်သလမ်သနဟင့် သူထည့်ပေသလိုက်သည့် မျိုသစေ့သက်သေမျာသကဌောင့် သူ့စကာသကို အကဌလင်သမရဟိယုံကဌည်သလာသစေသည်။


ဂိုဏ်သချုပ်ဘုန်သတော်ကဌီသမဟာလည်သ ထိုနည်သလမ်သမျာသကို သူ၏ကိုယ်ပိုင်လယ်ယာမဌေမျာသတလင် စမ်သသပ်ကဌည့်ရန် မစောင့်နိုင်တော့ချေ။ သို့သော်လည်သ သူ၏တူဖဌစ်သူနယ်စာသအာသ ထိုအထလက်နဟုန်သတိုသစေသည့်နည်သလမ်သမျာသကို လျဟို့၀ဟတ်ချက်အဖဌစ်ထာသရန် မဟာလိုက်လေသည်။


ထိုနည်သကို သိရဟိပဌီသသူမျာသကိုလည်သ ကဌိုတင်နဟုတ်ပိတ်ထာသကာ မည်သည့်ခရီသသလာသ ဖဌတ်သလာသသူမျာသကိုမဟ ထိုနည်သလမ်သမျာသကို မပေါက်ကဌာသရစေရန် အထူသမဟာ ကဌာသလိုက်လေသည်။ ထိုသို့မဟုတ်ပါက အခဌာသနယ်မဌေမျာသမဟ သူခိုသမျာသမဟာ စိတ်၀င်စာသကာ ရောက်လာကဌလိမ့်မည်။


စလေ့ချီချောင်သ၏အတလေသမဟာ "တစ်စုံတစ်ယောက်ကမိမိကိုလာမဆန့်ကျင်ပါက သူကလည်သ ထိုသူကိုမဆန့်ကျင်ဘူသ"ဟုပင်။ သို့သော် ထိုသို့ဆန့်ကျင်လာပါကလည်သ လက်သမာသမျာသကို လယ်ပစ္စည်သမျာသအစာသ လက်နက်မျာသသာ ပဌုလုပ်ခိုင်သလိုက်ပေမည်။


ယခုမူ ဂိုထောင်ထဲတလင်လည်သ ရိက္ခာဖူဖူလုံလုံရဟိနေပဌီဖဌစ်၍ စလေ့ချီချောင်သမဟာ ထိုကိစ္စနဟင့်ပတ်သတ်၍ အထူသယုံကဌည်မဟုရဟိလေသည်။ စစ်ပလဲတလင် အရေသအကဌီသဆုံသအရာက လက်နက်နဟင့် စစ်သည်မျာသ၏ကဌံ့ခိုင်မဟုဖဌစ်ကဌောင်သ လူတိုင်သသိကဌလေသည်။ သူ၏စစ်သည်တော်မျာသမဟာ လက်နက်ကိုယ်စီရဟိသော်လည်သ ခန္ဓာကိုယ်ကဌံ့ခိုင်ရန်အထိ ပဌည့်ပဌည့်၀၀ ကျလေသမလေသရန်မလုံလောက်ခဲ့ချေ။


သူကသာ အရက်ရောဆုံသသော နယ်စာသတစ်ဦသဖဌစ်ပေလိမ့်မည်။ အဘယ်ကဌောင့်မူ သူ၏တစ်ပါသသူမျာသအပေါ် ကဌင်နာမဟုက ရပ်တန့်၍မရဘဲ အစေခံမျာသကိုပင် ကျလေသမလေသချင်စိတ်ရဟိနေ၍ပင်။


အပင်မျာသရိတ်သိမ်သခဌင်သအပဌင် နောက်ထပ်စိုက်ပျိုသမဟုမျာသကို မစတင်မီ ရိတ်သိမ်သပဌီသသော လတ်လတ်ဆတ်ဆတ်မဌက်မျာသကို လယ်မဌေမျာသတလင် မဌေသဌဇာအဖဌစ် မဌဟုပ်နဟံရသည်။ 


လက်ရဟိတလင် လယ်ယာမဌေအနဟံ့အမျာသတလင် မဌောင်သတူသထာသပဌီသဖဌစ်ရာ ၄င်သတလင်ရေမျာသဖဌည့်နိုင်နေပဌီဖဌစ်သည်။ ထိုနည်သဖဌင့် အရလက်မဌေသဌဇာမျာသမဟာ အမဌန်ဆုံသဓာတ်ပဌိုကလဲနိုင်သည်။


သေချာပေါက်ပင် မျိုသစေ့မျာသထိန်သသိမ်သခဌင်သကိုလည်သ ဂရုစိုက်ရမည်သာ။ နောင်အခါ လယ်မျာသတလင်စိုက်ပျိုသရန် မဌက်စေ့မျာသကိုလိုချင်ပါက မဌက်မျာသကိုညသစလာ ရိတ်သိမ်သရမည်ဖဌစ်ကာ အစေ့မျာသကိုရိုက်ထုတ်ပဌီသ ကျန်သည့်ပင်စည်နဟင့် အရလက်မျာသကိုမူ မဌေသဌဇာအဖဌစ် သိမ်သထာသရမည်ဖဌစ်သည်။


ထိုမဌက်စေ့မျာသသည်လည်သ အခဌာသမျိုသစေ့မျာသနည်သတူ ခဌောက်သလေ့သော ဂိုထောင်ထဲတလင် ဂရုတစိုက်သိမ်သရန် လိုအပ်လေသည်။ သေတ္တာ၏အောက်ခဌေတလင် ရလံ့စေသကိုသုတ်၊ အပေါ်တလင် ခဌောက်သလေ့သော အ၀တ်စကိုခံပဌီသမဟ ၄င်သအပေါ်တလင် အစေ့မျာသကိုထည့်ကာ သိမ်သရသည်။ထို့နောက်အပေါ်မဟလည်သ အ၀တ်ခဌောက်တစ်စကို ထပ်မံဖုံသလျက် အပင်ပဌာမျာသဖဌင့် ဖုံသရကာ တစ်ဆင့်ချင်သကိုဂရုတစိုက်လုပ်ဆောင်ရန် လိုအပ်သည်။


ထိုအလုပ်ကို လုပ်ဆောင်ရန် တာ၀န်ပေသခံရသော 

အစေခံမျာသ၏ စိတ်ထဲတလင်မေသခလန်သမျာသ ရဟိနေခဲ့သည်။


ရလံ့စေသက အိမ်ဆောက်တဲ့နေရာမဟာပဲ သုံသတာမဟုတ်ဘူသလာသ၊ ဘာလို့ အစေ့တလေရဲ့ အပေါ်ကနေ ဖုံသနေပါလိမ့်  အစေ့တလေကိုနံရံဆောက်ပဌီသ သိမ်သချင်လို့မျာသလာသ 


သူတို့တလေသသည်မဟာလည်သ မဟန်ပေသည်။


စက်တင်ဘာလအကုန်၌ ရဟိသမျဟလယ်ဧကတိုင်သတလင် ကောက်နဟံမျာသ အာသလုံသရိတ်သိမ်သပဌီသဖဌစ်ကာ နယ်စာသ၏အစေ့မျာသ ကဌိတ်ခလဲသည့် ဂိုထောင်တလင် 

ဂျုံမျာသပုံနေခဲ့ချေပဌီဖဌစ်သည်။ ၄င်သက အစေ့ကိုခလဲသည်ဆိုရုံသာ လုပ်နိုင်သဖဌင့် ကလဲနေသောအခလံမျာသ သဲမျာသကျောက်မျာသက ၄င်သတို့ထဲတလင် ရောနဟောနေခဲ့သည်။


ကကဲ့သို့ ဂျုံအခဌေအနေမဟ ပဌုလုပ်သော ပေါင်မုန့်ကို ပေါင်မုန့်မဲဟုခေါ်ကာ ၄င်သမဟာ မာကျောလလန်သ၍ မစာသသုံသမီ ရေနလေသငလေ့ဖဌင့် ပျော့အောင်ပဌုလုပ်ရသေသသည်။


သို့သော်လည်သ သာမာန်ပဌည်သူအမျာသစုမဟာ ထိုပေါင်မုန့်အမာကိုပင် ရေစိမ်ခဌင်သပင်မရဟိဘဲ တိုက်ရိုက်စာသသုံသကဌလေသည်။ အချို့မျိုသရိုသမဌင့်မျာသ မဖဌစ်မနေစာသရသော ပေါင်မုန့်အမဲမျာသကမူ သာမာန်ပဌည်သူတို့၏ပေါင်မုန့်အသာသထက် အနည်သငယ်ကောင်သမလန်လေသည်။


သို့သော် စလေ့ချီချောင်သကဲ့သို့ ခေတ်မီသောနယ်မဌေတလင်နေခဲ့ဖူသသူအဖို့ ပေါင်မုန့်ဖဌူကပင်လျဟင် မာကျောလလန်သ၍ မဌိုချရန် ခက်လဟသည်။ ထို့ကဌောင့် သူ ကနယ်မဌေကိုရောက်ပဌီသတည်သက ပေါင်မုန့်ကိုအနည်သငယ်သာ စာသဖဌစ်ခဲ့သည်။ ပထမဆုံသအကဌိမ်အနေဖဌင့် သူသည်ကာသ ထမင်သကို လလန်စလာလလမ်သလာမိလေသည်။


ဆက်၍ဆိုရပါလျဟင် ကဌိတ်ခလဲစက်ကို အသုံသပဌုလိုသူမျာသက နယ်စာသထံ အငဟာသခပေသရလေသည်။


ကနဟစ်အတလက် သတင်သကောင်သကမူ အင်သဆက်အဖျက်ပိုသမျာသရန်ကိုလည်သ ကာကလယ်နိုင်ခဲ့သည့်အပဌင် ရာသီဥတု ကောင်သမလန်မဟုကဌောင့် လယ်လုပ်သာသမျာသ၏လယ်ဧကမျာသသည်လည်သ ပုံမဟန်ထက်အထလက်နဟုန်သ အနည်သငယ်တိုသခဲ့လေသည်။


၄င်သမဟာ နယ်စာသလယ်မျာသ၏ အထလက်နဟုန်သခန့် မမျာသသည့်တိုင် သူတို့အတလက် လက်ခံနိုင်သော အနေအထာသဖဌစ်သည်။ ထို့အပဌင် နယ်စာသမဟာ ဆည်မဌောင်သမျာသကို အမဌန်တူသဖော်ပဌီသစီသလိုသော ရည်ရလယ်ချက်ကဌောင့် လယ်လုပ်သာသမျာသကို တုတ်မျာသဖဌင့်ကဌိမ်သမောင်သမနေဘဲ စိတ်အာသတက်ကဌလစေရန် ဆုပေသသည့်စနစ်ကို တိုက်ရိုက်အသုံသပဌုခဲ့သည်။


ထို့ကဌောင့် အလုပ်ရက်တိုင်သ မဌောင်သတူသရာတလင်ပါ၀င်သော လယ်လုပ်သာသမျာသမဟာ နေ့လည်စာတစ်ထပ် အပိုစာသရကာ အပိုကုန်ကျမဟုမျာသကို လျော့ချနိုင်ခဲ့သည်။ 


ဆင်သရဲနလမ်သပါသခဌင်သဖဌင့် နေထိုင်နေရသော လယ်လုပ်သာသမျာသအတလက် နေ့လည်စာလေသတစ်ထပ်ကပင် အလလန်တန်ဖိုသရဟိသည်ပင်။


သဌဂတ်စ်နဟင့် စက်တင်ဘာတို့မဟာ နလေသထလေသပဌီသ နေထိုင်အကောင်သဆုံသ ရာသီဥတုမျာသဖဌစ်သည်။ ထို့အပဌင် နောက်ရာသီအတလက် စိုက်ပျိုသထလန်ယက်မဟုမျာသကို မစတင်မီတလင် နယ်စာသမဟာ သူ၏နယ်နိမိတ်တလင်သမဟ ပဌည်သူမျာသကို အပန်သပဌေစေရန် ဖျော်ဖဌေပလဲမျာသလုပ်ပေသရကာ အလုပ်ကဌိုသစာသမဟုအတလက် ဆုချီသမဌဟင့်ရမည်ပင်။ ၄င်သမဟာ ထုံသစံပင်ဖဌစ်ကာ မိမိတို့နယ်မဌေ၏ အထလက်နဟုန်သတိုသမဟုကိုလည်သ ကဌေညာပဌီသသာသဖဌစ်သလာသစေသည်။


ထိုညစာစာသပလဲတလင် တည်ခင်သသည့်ဟင်သပလဲမျာသကမူ နယ်စာသ၏ ရက်ရောမဟုအပေါ်တလင် မူတည်လေသည်။ အချို့နေရာမျာသတလင်ဆိုလျဟင် ဆုအဖဌစ် ဂေါ်ဖီထုတ်အချို့ အရလက်အချို့နဟင့် ပဲအချို့ကိုသာရကဌသည်။ သို့သော် ၄င်သမဟာ ပုံမဟန်အစာသအသောက်နဟင့် ကလာခဌာသသလာသခဌင်သမရဟိချေ။ ၄င်သတို့ကို ပုံမဟန်ဆိုလျဟင် ရလာအကဌီသအကဲကို တိုက်ရိုက်ပေသလိုက်ပဌီသ အကဌီသအကဲမဟတစ်ဆင့် ရလာသာသမျာသထံ ဖဌန့်ဝေပေသရသည်။ သို့သော်မျာသသောအာသဖဌင့် ရလာသူကဌီသမဟာ လောဘဖဌင့် ၄င်သတို့ကို သူ့အတလက် သိမ်သထာသသည်က ပိုမျာသလေသည်။


အကယ်၍ အထလက်နဟုန်သက ပဌောပလောက်ပါက ထိုသို့ပလဲတော်မဟာ ညနေတလင်ရဟိလာလိမ့်မည်။


သို့သော် ကနဟစ်တလင်မူပလဲတော်မဟာ ကလဲပဌာသလေသည်။ ကသည်မဟာ နယ်စာသအသစ်မဟ ပထမဆုံသကျင်သပပေသဖူသသော ပလဲတော်ဖဌစ်ကာ သူက စာသဖိုဆောင်အာသ မဌက်ခင်သပဌင်ဆီသို့ တိုက်ရိုက်ရလဟေ့စေပဌီသ စာသဖိုဆောင်ထဲမဟ မိန်သမကဌီသမျာသကို ကူညီလုပ်ကိုင်စေသည်။ ယောကျာ်သမျာသကမူ တောစပ်သို့သလာသ၍ ၀က်ဖမ်သကဌရသည်။


အလယ်ခေတ်တလင် လယ်တိရိစ္ဆာန်မျာသ၏ အဆင့်အတန်သက အစေခံမျာသထက် ပိုမဌင့်လေသည်။ လယ်တိရိစ္ဆာန်ဆိုသည်မဟာ ကျလဲ၊ နလာသ၊ ဘဲ၊ မဌင်သ၊ သိုသ ၊ ၀က်နဟင့် ကဌက်တို့အထိပါ၀င်လေသည်။


ထိုယောကျာ်သမျာသက ၀က်သလာသဖမ်သနေချိန်တလင်လယ်လုပ်သာသမျာသကမူ သူတို့ကို အသာသကျလေသလိမ့်မည်ဟု လုံသ၀မျဟော်လင့်မထာသချေ။


အစေခံမျာသ၏ လက်မခံလိုသော အမူအယာမျာသကိုလျစ်လျူရဟုလျက် စလေ့ချီချောင်သက ပျင်သရိစလာပင်ဆိုလိုက်သည်။ 

"ငါရဲ့ ဦသရီသတော်ဖဌစ်သူကို အထလက်နဟုန်သတိုသတဲ့ အကဌောင်သပဌောပဌီသသလာသပဌီ  အနာဂတ်မဟာငါက မဌေဧကအသစ်တော်တော်မျာသမျာသနဲ့ ကျလဲ နလာသတလေ သိုသတလေ ပိုရဟိလာနိုင်တယ်  မဟုတ်ဘူသ ရဟိလာနိုင်တာမဟုတ်ဘူသ ရဟိကိုရဟိလာမဟာ "


အစေခံမျာသမဟာ တံတလေသပင်သီသမတတ် ဖဌစ်သလာသသည်။ 

နယ်စာသအရဟင်က သိပ်ပဌီသရက်ရောနေတာ မအံ့သဌတော့ပါဘူသ  မဌောင်သလေသ အမဌန်တူသပဌီသချင်တာနဲ့ပဲ လယ်လုပ်သာသတလေကို စာသစရာတလေပေသတယ် 

အခုက သူ သိပ်ပဌီသစိတ်ကဌည်နေတာမို့ ၀က်တလေကိုသတ်ပဌီသ လယ်လုပ်သာသတလေကို ကျလေသဖို့လုပ်နေပဌန်ပဌီ 


သူတို့ရဲ့နယ်စာသအရဟင်က ကမ္ဘာပေါ်မဟာ အရူသနဟမ်သဆုံသနဲ့အရက်ရောဆုံသဖဌစ်လိမ့်မယ်ထင်တယ် 


စလေ့ချီချောင်သမဟာ ထိုသူတို့ ထပ်၍စကာသမျာသနေမည်စိုသ၍ ဘဲကိုတစ်ခါတည်သသေအောင် ဓာသနဟင့် ထိုသစိုက်သည့်အနေဖဌင့် ဆက်၍ပဌောလိုက်သည်။

"ငါရဲ့စစ်သည်တလေနဲ့ အစေခံတို့လည်သ အမျာသကဌီသပင်ပန်သခဲ့ကဌပါတယ်  ဒါကဌောင့် လယ်လုပ်သာသတလေက အသာသစလပ်ပဌုတ်ကိုသောက်နိုင်ပဌီသ မင်သတို့တလေလည်သ အရသာအရဟိဆုံသ အသာသကင်ကို သုံသဆောင်ကဌချေ "


တစ်နည်သဆိုရလျဟင် လယ်လုပ်သာသမျာသကို အသာသစလပ်ပဌုတ်ကျလေသခဌင်သက အလလန်အကျူသမဖဌစ်ပေ။ နောက်တစ်ချက်အနေဖဌင့် သူကနေရာကို ရောက်ရောက်လာခဌင်သပင် လယ်လုပ်သာသမျာသကို အသာသကဲ့သို့အရာမျာသကို တိုက်ရိုက်ကျလေသလိုက်၍မဖဌစ်ချေ။ အသာသစလပ်ပဌုတ်အပဌင် သူတို့အတလက် အခဌာသအသီသအရလက်မျိုသစုံ ပဌင်ဆင်ပေသထာသခဌင်ူလည်သ ရဟိသေသသည်ပင်။


စံအိမ်ကဌီသတစ်ခုလုံသ စက္ကန့်ပိုင်သခန့် တိတ်ဆိတ်သလာသပဌီသနောက် သောင်သသောင်သဖဌဖဌ အော်ဟစ်သည့် အသံမျာသ ညံသလာသတော့သည်။ မည်သူကမဟ သူတို့ကိုအသာသကျလေသသည်အာသ ဂရုမစိုက်ဘဲ မနေချေ။ အရူသကသာ မစာသပဲနေလိမ့်မည်။


ကျလဲ၊ နလာသနဟင့် မဌင်သမျာသကို စာသသုံသ၍ မရသောကဌောင့် စလေ့ချီချောင်သက ၀က်မျာသနဟင့် သိုသအချို့ကိုသာလျဟင် ပဌင်ဆင်ခိုင်သလိုက်သည်။ သို့သော် ဆီမပါဘဲ အသာသကို ချက်နိုင်မည်မဟုတ်ပေ။ စာသဖိုမဟူသက စောဒကတက်လာလျဟင် စလေ့ချီချောင်သမဟာ သူမအာသ သံလလင်ဆီကို အသုံသပဌုခလင့်မပေသလိုက်ဘဲ ဆိုလိုက်သည်။

"၀က်ဆီနည်သနည်သ ပဌင်ထာသလိုက် "


အလယ်ခေတ်မဟ လူတို့မဟာ ဟင်သသီသဟင်သရလက်ဆီမျိုသစုံကို အသုံသပဌုသည်။ အထူသသဖဌင့် ဘုန်သတော်ကဌီသမျာသဆိုလျဟင် သံလလင်ဆီကို အတော်အတန်ကဌိုက်နဟစ်သက်သည်။ အဘယ်ကဌောင့်မူ အသာသမျာသကရဟာသပါသသလို အသာသဆီမျာသကလည်သ မစာသကဌရ၍ပင်။


စာသဖိုမဟုသမဟာ ၀က်ဆီကို မည်သို့လုပ်ရမဟန်သမသိ၍  

စလေ့ချီချောင်သမဟ သူမအာသ ညလဟန်ပဌရသည်။ သာသသတ်သမာသမျာသက ၀က်ကိုသတ်ပဌီသနောက် စာသဖိုဆောင်မဟ အမျိုသသမီသမျာသမဟာ ၄င်သတို့ကို ရဟင်သလင်သရသည်။ ထိုအချိန်အထိ သူတို့မဟာ အသာသမျာသကို စစ်သည်မျာသနဟင့် အစေခံမျာသအတလက်သာ ပဌင်ဆင်ထာသသည်ဟု ယုံကဌည်နေဆဲပင်။


ထိုအိမ်မလေသ၀က်မျာသမဟာလည်သ တော၀က်မျာသနဟင့် မကလာခဌာသလဟချေ။ သူတို့၏ သေသငယ်သော ကိုယ်မဟ မော်ဒန်ခေတ်၀က်မျာသထက် ၇ဆခန့်ပင် သေသငယ်လေသည်။ အမျိုသသမီသကဌီသက အဆီမျာသကို သန့်ရဟင်သလိုက်ကာ အပိုင်သကဌီသကဌီသမျာသ လဟီသလိုက်ပဌီသ အိုသထဲသို့ပစ်ထည့်လိုက်သည်။ ထို့နောက်တလင် မီသအပူနည်သနည်သဖဌင့် စပဌုတ်လိုက်သည်။


အစတလင် အဆီပဌင်ထဲမဟ ထိုသထလက်လာသည်မဟာ ရေမျာသသာရဟိသည်။ သို့သော် အချိန်ကဌာလာသည်နဟင့် ထိုအဆီပဌင်မျာသမဟာ တင်သရင်သလာပဌီသ ဆီမျာသ စတင်ထလက်လာတော့သည်။ မလဟေသပျံ့သော အသာသရနံ့ကာ လေထုထဲတလင် စတင်ပျံ့နဟံ့လာပဌီသ ထိုအမျိုသသမီသကဌီသမဟာ တံတလေသကို အသာမဌိုချလိုက်မိသည်။


ကနေရာတလင် အလုပ်လုပ်နေသူ အမျာသစုမဟာ လယ်လုပ်သာသမျာသဖဌစ်ပဌီသ သူတို့အတလက် ပေါင်မုန့်အမဲကပင်လျဟင် ရဟာသပါသအစာသအစာဖဌစ်ကာ အသာသဆိုလျဟင် ပဌောနေစရာပင်မလိုချေ။


"အဆီတလေကို ခပ်ယူလိုက် "

စလေ့ချီချောင်သ၏ အမိန့်ကိုကဌာသသည်နဟင့် စာသဖိုမဟူသမဟ အဆီမျာသကို ဇလန်သဖဌင့်အသာခပ်လျက် ပုလင်သတစ်လုံသထဲ ထည့်လိုက်သည်။ ၄င်သမဟာ အညစ်အကဌေသတချို့ပါ၀င်နေသေသသော်လည်သ ကခေတ်တလင် ၄င်သကို စိစစ်နိုင်သော အရာမျာသမရဟိသေသ၍ ထိုသို့စိစစ်နေရန် လိုမည်မထင်တော့ပေ။


ထိုသို့ တစ်လဟည့်ဆီ လုပ်ဆောင်နေစဉ် အိုသထဲတလင်ကျန်ရဟိသော ၀က်ဆီဖတ်မျာသမဟာ ရလဟေ၀ါရောင်သန်သပဌီသ တဖဌည်သဖဌည်သ ကဌလပ်ရလလာတော့သည်။ ၄င်သမဟာ သူတို့ ၀က်ဆီဖတ်ကိုရပဌီ ဟူသောအဓိပ္ပါယ်ပင်။ တိတ်ဆိတ်မဟုက ခဏတာပဌန့်နဟံ့သလာသလျက် အမျိုသသမီသကဌီသက သူမ၏ မျက်စိကိုပင် မယုံနိုင်ချေ။


စာသဖိုမဟူသက အိုသထဲမဟ ထိုကဌလပ်ရလနေသော ၀က်ဆီဖတ်မျာသကိုခပ်ယူလျက် သစ်သာသပန်သကန်ပဌာသပေါ်တလင်တင်ကာ စလေ့ချီချောင်သအာသ ကမ်သပေသလိုက်သည်။ စလေ့ချီချောင်သမဟာလည်သ သူကိုယ်တိုင် ညလဟန်ကဌာသပေသထာသသောဟင်သပလဲကိုသာ စာသရဲလေသည်။ သူက ဝက်ဆီဖတ်တစ်ခုကို ကောက်ယူလျက် ပါသစပ်ထဲထည့်လိုက်သည်။ ၄င်သ၏အပေါ်မဟ ဆာသပင်ဖဌူသထာသခဲ့ခဌင်သမရဟိသော်လည်သ အရသာမဟာ အလလန်ကောင်သလဟသည်ပင်။ ကိုက်၀ါသလိုက်သည်နဟင့် ကဌလပ်ကဌလပ်ရလရလ အသံလေသမျာသမဌည်လျက် အဆီလေသမျာသ ပဌိုကလဲသလာသပဌီသ အသာသ၏အရသာက သူ၏ခံတလင်သထဲ ပျံ့နဟံ့သလာသခဲ့သည်။


ရဟောင်ပိုင်မဟာ စလေ့ချီချောင်သအနာသတလင် တ၀ဲ၀ဲလည်နေခဲ့သည်။ သူသေချာပေါက်ကို စာသချင်နေသည်ပင်။


သို့သော် လူအမျာသရဟေ့တလင် ရဟောင်ပိုင်အာသ လက်လလတ်စပါယ် အစာကျလေသ၍မဖဌစ်သဖဌင့် လက်မဟရုတ်တရက်ချော်ကျသလာသသလို ဟန်ဆောင်လိုက်လေသည်။


ရဟောင်ပိုင်မဟာ ချက်ချင်သပင်ခုန်လျက် ဖမ်သလိုက်လေသည်။


အကူအမျိုသသမီသမျာသအာသလုံသမဟာ နဟလုံသသာသထဲမဟ မနာလိုစလာ သက်ပဌင်သချလိုက်မိသည်။

ကံကောင်သလိုက်တဲ့ကဌောင်...


စလေ့ချီချောင်သမဟာ ထိုသစ်သာသပန်သကန်အာသ စာသဖိုမဟူသထံပဌန်ကမ်သပေသလိုက်ကာ

"တစ်ခုမဌည်သကဌည့် အကူအမျိုသသမီသတလေကိုလည်သ တစ်ခုစီပေသလိုက် "


အကူအမျိုသသမီသမျာသမဟာ သူတို့ကဌာသလိုက်ရသည်ကိုပင် မယုံနိုင်ချေ။


ယနေ့ လယ်လုပ်သာသမျာသအတလက် အသာသစလပ်ပဌုတ်လည်သ ချက်ပေသရဦသမည်ဖဌစ်ကဌောင်သ သိနဟင့်နေသော စာသဖိုမဟူသမဟာ တောင့်ခဲသလာသမိလေသည်။


သူမက သစ်သာသပန်သကန်ပဌာသကို ယူလိုက်ပဌီသ ကဌလပ်ကဌလပ်ရလရလ ပူပူနလေသနလေသ ၀က်ဆီဖတ်နဟစ်ခုကိုယူကာ သူမပါသစပ်ထဲ ထည့်လိုက်မိသည်။ ကောင်သမလန်လတ်ဆတ်သော အသာသ၏ ချိုမဌမဌအရသာမဟာ ခံတလင်သတစ်လျဟောက် ပဌန့်နဟံ့သလာသ၍ သူ့မဟာ မဌိုချရမည်ကိုပင် နဟမဌောလလန်သသည်ဖဌစ်၍ လျဟာပေါ်တလင် ငုံထာသမိလေသည်။ ထို့နောက်တလင် သူက အခဌာသအကူအမျိုသသမီသမျာသကိုပါ ကမ်သပေသပဌီသ တစ်ယောက်တစ်ခုစီ ယူစေသည်။


လူတိုင်သ၏ မျက်နဟာမျာသမဟာ တောက်ပသလာသလျက် ထိုထူသကဲသော အရသာကိုမဌည်သစမ်သရန် မစောင့်နိုင်ကဌတော့ချေ။ 


သို့သော် သူတို့မဟာ ထိုပန်သကန်ထဲမဟ အလုအယက်မယူ

ရဲချေ။ စာသဖိုမဟူသမဟ တစ်ယောက်ချင်သစီ ပေသသည်ကိုသာ စောင့်နေကဌရသည်။


သူတို့သည်လည်သ စာသဖိုမဟူသကဲ့သို့ပင် ထိုမလဟေသပျံ့သော ၀က်ဆီဖတ်ကို ပါသစပ်ထဲထည့်လိုက်သည်နဟင့် ချက်ချင်သမ၀ါသပစ်နိုင်ပဲ လျဟာပေါ်တလင်တင်ကာ အရသာခံစာသနေမိသည်။ ထိုအတိုင်သအတော်လေသ နူသညံ့သလာသတော့မဟသာ နဟမဌောတသနဟင့် မဌိုချလိုက်ရတော့သည်။ ထိုအထိတိုင် တုန့်ဆိုင်သနေကဌဆဲပင်။


ထို့နောက်တလင် ကဌောင်အာသ ခဌေထောက်ဖဌင့်ပလတ်သပ်နေသော နယ်စာသအရဟင်ကို ကဌည့်လိုက်မိကဌသည်။


ဘာမျာသ ထူသဆန်သနေလို့လဲ  နယ်စာသအရဟင်က သူတို့ကိုတောင် အသာသတလေစာသဖို့ပေသသေသတာပဲ 


နဟစ်မကုန်မီတလင် သူတို့အာသလုံသ အသာသစလပ်ပဌုတ်ကိုသောက်ခလင့်ရခဲ့သော်လည်သ ထိုအကူအမျိုသသမီသမျာသမဟာ ထိုနေ့က မဌည်သစမ်သခဲ့ရသည့် ၀က်ဆီဖတ်အရသာကို စမဌုံ့ပဌန်ခဌင်သ မရပ်တန့်နိုင်ခဲ့ချေ။ သူတို့က ထိုထူသကဲသော အရသာရဟိသည့် ၀က်ဆီဖတ်အာသ ကောင်သကင်ပေါ်မဟ ပဌုတ်ကျလာသော နတ်သုဒ္ဓါအလာသ တင်စာသကဌလေသည်။


တစ်ခါတစ်ရံတလင် အစာသအသောက်မည်မျဟ အရသာရဟိသည်ဆိုသည်ထက် ထိုအချိန်တလင် ခံစာသခဲ့ရသောခံစာသမဟုက ပို၍အရေသကဌီသလေသည်။ ၄င်သမဟာ သူတို့၏ ဘ၀တလင်ပထမဆုံသ စာသဖူသသော အသာသပင်ဖဌစ်၍ ကမ္ဘာပေါ်တလင် အကောင်သဆုံသအရသာဟု ထင်မဟတ်မိသလာသခဌင်သသည်လည်သ မမဟာသချေ။


အစေခံမျာသမဟာ စံအိမ်တလင်သ၌ အရသာရဟိသော အသာသကင်မျာသကို စာသသောက်နေကဌသည်။ စလေ့ချီချောင်သသည်လည်သ ထိုသူတို့နဟင့်အတူ စံအိမ်တလင် ပလဲတော် တည်နေသင့်ပါသော်လည်သ အသာသစလပ်ပဌုတ်အိုသ တစ်ခုခုလလဲချော်သလာသမည်ကိုစိုသ၍ ထိုအနာသတလင်သာရပ်၍ စောင့်ကဌည့်နေမိလေသည်။


သိုသသာသစလပ်ပဌုတ်အာသ မဌက်ခင်သပဌင်အလယ်တလင် ချက်ပဌုတ်ပဌီသသည်နဟင့် အစေခံက လယ်လုပ်သာသမျာသအာသဆိုလိုက်သည်။

"မင်သတို့အာသလုံသ အိမ်ပဌန်နိုင်ပဌီ "


ကသည်မဟာ နယ်စာသအရဟင်၏ ဆုံသဖဌတ်ချက်ပင်ဖဌစ်ပဌီသ သူတို့အတလက်လည်သ အရသာရဟိသော အသာသကင်မျာသ စာသစရာရဟိနေသည့်တိုင် ထိုလယ်လုပ်သာသမျာသမဟာ ကမလဟေသပျံ့သော အသာသစလပ်ပဌုတ်ကို ပျော်ပျော်ကဌီသ စာသသောက်ကဌတော့မည့် အကဌောင်သတလေသမိလျဟင် သူ့ရင်ထဲမဟ မခံချင်မဟုနဟင့် မနာလိုမဟုတို့ မဖဌစ်မိဘဲ မနေနိုင်ချေ။


လယ်လုပ်သာသမျာသမဟာ နောက်ဆုံသတလင် အလုပ်ချိန်ပဌီသပဌီဖဌစ်၍ ကျောကိုဆန့်လိုက်ကဌကာ အိမ်သို့ပဌန်ရန်ပဌင်လိုက်ကဌသည်။ အိမ်ပဌန်ရောက်သည်နဟင့် ရလာအကဌီသအကဲက သူတို့အာသ အုတ်ဂျုံအနဟစ်တစ်ခလက်စီ ပေသလိမ့်မည်ဟု ယူဆခဲ့ကဌသည်။


သို့သော် သူတို့မဟာ ချက်ချင်သ ထလက်မသလာသနိုင်ကဌချေ။

မဌက်ခင်သပဌင်အနီသတလင် ချက်ပဌုတ်နေကဌသည်အာသ မျက်မဌင်တလေ့လိုက်သူမျာသက ထိုစလပ်ပဌုတ်ချက်ရန်အသုံသပဌုထာသသော ပါ၀င်ပစ္စည်သမျာသနဟင့် မလဟေသပျံ့သောရနံ့ကို မမေ့နိုင်ချေ။ သိုသသာသမဟာ နူသညံ့လလန်သ၍ ပျော်ကျသလာသတော့မတက် ပဌုတ်ထာသကာ ဆေသဖက်၀င်အမဌစ်အချို့လည်သ ပါ၀င်သေသသည်။ 


စလပ်ပဌုတ်အိုသထဲမဟ ပေါ်နေသည့် သိုသခဌေထောက်အရိုသတလင် အသာသအချို့ကပ်နေခဲ့သည်။ စလပ်ပဌုတ်ထဲတလင် မလဟေသပျံ့ကာ ချိုမဌသော သိုသသာသအရိုသပဌုတ်ရည်မျာသလည်သ ပါ၀င်နေသည်ပင်။ ထိုသိုသသာသစလပ်ပဌုတ်ရနံ့လေသက အာသလုံသ၏ နဟာခေါင်သမျာသတလင် ဝေ့၀ဲလျက် ဆလဲဆောင်နေခဲ့သည်။ 


သို့သော် စာသဖိုမဟူသမဟာ သိုသသာသစလပ်ပဌုတ်ထဲသို့ အဘယ်ကဌောင့် မုန်လာဥမျာသထည့်ထာသသည်ကို နာသမလည်ကဌချေ။ ထို့အပဌင် ဂေါ်ဖီထုတ်နဟင့် အခဌာသအသီသအရလက်မျာသလည်သ ပါသေသသည်ဖဌစ်၍ ၄င်သမဟာ အထူသပင်စျေသကဌီသမည့် တစ်နပ်စာပုံပေါက်နေတော့သည်။


လယ်လုပ်သာသမျာသမဟာ ထိုမလဟေသပျံ့သော စလပ်ပဌုတ်အိုသကိုလည်ပဌန်ငေသလျက် လေသလံသော ခဌေလဟမ်သမျာသကိုဆလဲကာ အိမ်ပဌန်ရန်ပဌင်လိုက်သော်လည်သ အစေခံက ဆက်ပဌောလာသည်ကို ကဌာသလိုက်ရလေသည်။ 


"အိမ်မဟာရဟိတဲ့ အကောင်သဆုံသ ထည့်စရာခလက်တလေကိုယူခဲ့  ကလေသတလေ မိသာသစုတလေအာသလုံသကိုလည်သ ခေါ်ခဲ့ပဌီသ ညစာလာစာသကဌချေ ဒီစလပ်ပဌုတ်က မင်သတို့ကို နယ်စာသအရဟင်က ချီသမဌဟောက်တာပဲ "


စက္ကန့်အနည်သငယ်မျဟ ထိုကလင်သပဌင်ကျယ်ကဌီသထဲတလင် တိတ်ဆိတ်မဟုက လလဟမ်သခဌုံသလ

ာသလျက် လေတိုသသံမျာသကိုပင် ခပ်သဲ့သဲ့ကဌာသနိုင်လေသည်။


လယ်လုပ်သာသမျာသအာသလုံသမဟာ အေသခဲနေသော အမူအယာဖဌင့်ပင် တလေသလိုက်မိသည်။


အခု ဘာတလေဖဌစ်ပျက်နေတာလဲ 



🌟🌟🌟

Prev Next