MM Story Teller

Chapter 126

Viewers 4k

🦊Arc 9 - ကျင့်ကြံရေးဇာတ်လမ်း၏ အဖြည့်ခံ

Chapter 126

9.2 - ခင်ဗျား ကျွန်တော့်ကို အမြစ်ကလှန်ရဲရင် ကျွန်တော်တို့နှစ်ယောက်လုံး ကိစ္စချောသွားစေရမယ်!

ကျင့်ကြံရေးလမ်းစဥ်က ကျယ်ပြန့်လွန်းသည် - နေ့တိုင်း၊ လတိုင်း၊ ရက်တိုင်း မရေတွက်နိုင်သော ကိစ္စရပ်ပေါင်းများစွာဖြစ်ပျက်နေပြီး အားလုံးကိုခြုံငုံသုံးသပ်နိုင်ရန်မှာလည်း ခက်ခဲလွန်းသည်။ သို့ရာတွင် ကျင့်ကြံရေးလောကအတွင်း နာမည်ကြီးနေသော ကိစ္စတစ်ရပ်ကို ပြောရမည်ဆိုပါက နန်ခိုင် လျို့ဝှက်နယ်မြေပြန်လည်ပွင့်လာခြင်းနှင့် မြင့်မြတ်သောမီးတောက်က မိသားစုတစ်စုကို ဝါးမြိုသွားခဲ့သည့်ကိစ္စပင်ဖြစ်သည်။

လောကကြီး၏ 'နောက်တကြိမ်' ဟု အချက်ပြမှုသည် ပထမဆုံးအကြိမ်မဟုတ်တော့ချေ။

ထိုသတင်းကိုကြားရသူတိုင်း သက်မချရုံမှလွဲပြီး ဘာမျှမတတ်နိုင်ကြဘဲ အရူးက နောက်တကြိမ်ထကြွလာပြီဟုသာ ပြောကြလေသည်။ သူတို့ကိုယ်တိုင်လည်း ဘာမှမတတ်နိုင်ကြပေ။

ဤကမ္ဘာ၏ကျင့်ကြံရေးစနစ်က နည်းလမ်းဟောင်းများအတိုင်းသာဖြစ်ပြီး အဆင့်ကိုးဆင့်ရှိသည်: ကျုးကျိ၊ ရှင်းထုံ၊ ကျင်းတန်း၊ ယွမ်ယင်၊ ချုးချောင်၊ ဖန်းရှန်း၊ သုန်းရွှီ၊ သာ့ချန်းနှင့် ကျုးကျဲတို့ဖြစ်သည်။

ကျုးကျိအဆင့်မရောက်ခင် ချီစွမ်းအင်တို့ကို ပြန်လည်ပြုပြင်ရသည့်အချိန်ကာလအား ဖြတ်သန်းရသည်။ ဤကမ္ဘာတွင် နည်းလမ်းဟောင်းများနှင့်မတူသည့်အချက်က ရွှေရောင်သက်တမ်းရောက်သည်နှင့် ပုံမှန်အတိုင်း အစားထိုးနိုင်ပြီး နေရာတိုင်းတွင် ဝိညာဥ်စွမ်းအင်များ ပြည့်နှက်စေရလိမ့်မည်ပင်။ လူတိုင်း မသေမျိုးလမ်းကြောင်းပေါ်လျှောက်ရန်မှာ မခက်ခဲပေ၊ ထို့ကြောင့်လည်း ကျင့်ကြံသူများက တစ်ယောက်ပြီးတစ်ယောက်ပေါ်လာခြင်းဖြစ်သည်။

ပင်မဂိုဏ်းကြီးငါးဂိုဏ်းနှင့် ဂိုဏ်းငယ်ခုနစ်ဂိုဏ်းတို့မှာ ရှီခုန်းနယ်မြေ၏ အဓိကထောက်တိုင်များဖြစ်သည်။ ထိုဒေသတိုင်းမှ အရင်းအမြစ်များကို ၎င်းတို့ကထိန်းချုပ်ထားပြီး ၎င်းတို့လက်ချောင်းများအကြားမှ အခါအားလျော်စွာ လျှောထွက်လာတတ်သည့် ဝိညာဥ်စွမ်းအင်အနည်းငယ်လောက်နှင့်ပင် ထိုဂိုဏ်းငယ်လေးများကို နှစ်ပေါင်းထောင်ချီကြာအထိ အပူအပင်မရှိရှင်သန်အောင် လုပ်ပေးနိုင်သည်။

ပင်မဂိုဏ်းကြီးငါးဂိုဏ်းကို ကောင်းကင်ဓားဂိုဏ်းက ကျင့်ကြံသူများကဦးဆောင်သည်၊ ၎င်းတို့သည် ကျင့်ကြံရာတွင်သာ စိတ်ရှိကြပြီး အခြားကိစ္စများအပေါ်စိတ်မဝင်စားကြပေ။ နှစ်ပေါင်းတစ်ရာတွင်တစ်ခါ၊ ၎င်းတို့က စီရင်စုအတွင်းရှိ တက်သစ်စကျင့်ကြံသူများကို စုစည်းလေ့ရှိပြီး အဆိုပါပူးပေါင်းသူများနှင့် အမတခရီးကို ဆက်လျှောက်ကြသည်။ ဇာတ်လိုက်သည်လည်း ကောင်းကင်ဓားဂိုဏ်းထဲသို့ ဝင်ရောက်ခဲ့သည်။ အနှီသူသည် ကျင့်ကြံသူပေါက်စလေးဖြစ်သော်လည်း စောစီးစွာဖြင့် ကိုယ်ပိုင်ဓားကိုသွန်းလုပ်နိုင်ခဲ့သည်။ ကံဆိုးသည်မှာ ထိုသူသည်

မျက်နှာကြောတင်းပြီး ကလန်ကဆန်လုပ်တတ်သည်၊ သည့်အပြင် အသုံးမကျသည့်ဆရာသခင်နှင့် အသည်းနှလုံးမရှိသော အမှိုက်သရိုက်အုပ်စုနှင့် တွေ့ရသောကြောင့် ကံမကောင်းလှပေ။ သူ့ဂိုဏ်းကိုပြန်ရောက်သွားပြီးနောက်ပိုင်း

သူ့လမ်းသူဆက်လျှောက်သွားရင်း သူကြုံတွေ့ခဲ့ရသည့်အရာများကို မသိနိုင်သော်လည်း ထိုသူတွင် အလွန်ခက်ခဲသည့်အချိန်များ ရှိခဲ့လိမ့်မည်ဖြစ်သည်။

၎င်းတို့နာမည်ကို ကျင့်ကြံသူပေါင်းမြောက်များစွာဖြင့် မိသားစုအသွယ်သွယ်ရှိသော ပင်မဂိုဏ်းခုနှစ်ဂိုဏ်းတို့ သွေးစည်းမှုဖြင့် ညွှန်းဆိုနိုင်သည်။ ဂိုဏ်းတစ်ခုစီတိုင်းတွင် ကိုယ်ပိုင် ကျင့်ကြံရေးနည်းလမ်းများနှင့် ခွန်အားများရှိကြသည်။ ၎င်းတို့သည် ပင်ကိုယ်အရည်အချင်းတစ်ခုတည်းဖြင့် ကျင့်ကြံကြခြင်းမဟုတ်။ ၎င်းတို့တွင် ကောင်းမွန်သည့်ကျင့်ကြံမှုရှိသရွေ့ အနှီသူတို့ကို အရင်းအမြစ်များပေးကာကူညီရန် ဆန္ဒရှိနေမည်ဖြစ်ကာ ယင်းမှာ ကောင်းမွန်သည့်ဆက်ဆံရေးတည်ထောင်ရန်နှင့် ကံကြွေးကျေစေရန်ပင်ဖြစ်သည်။

ထိုအရာများနှင့်ထပ်ပေါင်းလိုက်ပါက ရှစ်ခုန်းစီရင်စုတွင် လက်ချိုးရေ၍မနိုင်သည့် ဂိုဏ်းကြီးဂိုဏ်းငယ်များရှိပြီး တက်သစ်စကျင့်ကြံသူအရေအတွက်မှာလည်း ရေတွက်၍ပင်ကုန်မည်မဟုတ်ချေ။

သို့သော် 'မြင့်မြတ်သောမီးတောက်' အမည်ထွက်ပေါ်လာသည့်အခါ လူတိုင်းမှတ်မိရုံမက ကြောက်ရွံ့စိတ်များတဖွားဖွား ပေါ်လာကြတော့၏။

ရှန်းတုချီဂိုဏ်းမှ တတိယမြောက်သားသည် မြင့်မြတ်သောမီးတောက်အဖြစ် ထွက်ပေါ်လာကြောင်း မမြင်တွေ့ခဲ့သူမရှိချေ။ အနှီအစ်ကိုကြီးသည်ကား တာ့ချန်းအဆင့် ကျင့်ကြံသူကို မြင်တွေ့ရန် အခွင့်အရေးရှားပါးခဲ့ရသည်။ သူ၏ကျင့်ကြံဆင့်ကမြင့်ပြီး ဒေါသလည်းကြီးသည်၊ နည်းနည်းလေးဆွပေးလိုက်ရုံဖြင့် စိတ်တိုလာတတ်သည်။ ယခင်ကရော ယခုအချိန်အထိ ထိုသူသည်ကား အေးတိအေးစက်ပင်။

အနှီသူသည် မီးစွမ်းအင်နှင့်လျှပ်စီးဝိညာဥ်ကြောင့် အမည်ကျော်ကြားသည်။ ပင်ကိုယ်အရည်အချင်းနှစ်ခုက ယှက်နွယ်နေပြီး သူ၏ကျင့်ကြံဆင့်အပေါ်တွင် အကျိုးသက်ရောက်မှုမရှိပေ၊ သို့ထိတိုင် မျိုးဆက်တူသောကျင့်ကြံသူများက ယွမ်ယင်အဆင့်၊ အလွန်ဆုံး ချုးချောင်အဆင့်မှာပင်ရှိနေသေးသည့်အချိန် ထိုသူက သာ့ချန်းအဆင့်သို့ရောက်အောင်ကြိုးစားနေဆဲပင်။ ယခုမူ ထိုသူသည် ချီဂိုဏ်းမှ ဘိုးဘေးများနှင့်ပင် ကျင့်ကြံဆင့်တူနေလေပြီ။

ကံဆိုးစွာဖြင့် တတိယသားလေးသည် သူ့မိသားစုနှင့်အစေးမကပ်ပေ။ အနှီသူက ချီဂိုဏ်း၏လူတစ်ယောက်ဖြစ်နေသော်လည်း ထိုနေရာတွင်မနေဘဲ ကောင်းကင်ဓားဂိုဏ်းမှ တောင်ထွတ်သခင်အနေဖြင့် ရှိနေခဲ့သည်။ တတောင်လုံးကို သူကိုယ်တိုင်အုပ်ချုပ်လင့်ကစား တပည့်တပန်းမရှိဘဲ ယခင်ရောယခုပါ တောင်ကို ပြာသာကျစေခဲ့သည်။ သူ့အမည်ကိုကြားလိုက်ရသည့် မည်သည့်အကြီးအကဲမဆို အချိန်အတန်ကြာအောင် ခေါင်းကိုက်ရတတ်၏။

အဆိုပါ ပြဿနာကောင်တွင် ထူးဆန်းသည့်ဝါသနာတစ်ခုရှိသေးသည် - သူသည် နယ်မြေတခွင်တွင် လူမှုရေးသတိရှိတတ်ပြီး မျှတကြောင်းဖော်ပြရသည်ကို နှစ်သက်တတ်သည်။ တစုံတယောက်က လူမှုပတ်ဝန်းကျင်ကို ခြိမ်းခြောက်နေကြောင်း သူ့နားထဲသို့ သတင်းရောက်လာသည်နှင့် ထိုသူတို့သည်ကား အိမ်ပြန်ပြီး သေမည့်အချိန်ကိုထိုင်စောင့်နေရုံပင်၊ အကြောင်းမှာ ဧကရာဇ်ပင် ၎င်းနှင့်၎င်းတို့မိသားစုကို မကယ်တင်ပေးနိုင်သောကြောင့်ပင်။

သူ၏ဝိညာဥ်အရင်းအမြစ်နှင့် ဆက်နွယ်နေသည့်အကြောင်းပြချက်များကြောင့် မြင့်မြတ်သောမီးတောက်၏ဒေါသက မရေရာဘဲ သူနှင့်အတူယှဥ်တွဲရှိနေရန်လည်း ခက်ခဲသည်။ သူ၏ကျင့်ကြံရေးလမ်းကြောင်းတွင် မထင်မှတ်ထားသောပိတ်ဆို့မှုကို ကြုံရသည်နှင့် အေးတိအေးစက်ပုံစံက စတင်လာလိမ့်မည်။ မြင့်မြတ်သောမီးတောက်ကြောင့်ဖြစ်ရသည့် နာမကျန်းမှုက ဆေးလုံးဆေးပြားများနှင့် ကုသမရပေ၊ သူ၏ဆင်ခြင်တုံတရားကို ထိန်းသိမ်းထားနိုင်သည့် တခုတည်းသောအရာက သွေးတစ်ခုသာ.....

သွေးအမြောက်အများနှင့်လူပမာဏအများအပြား....

ထိုအချိန်အရောက်တွင် သူ၏စိတ်ထဲမှစာအုပ်လေးက စတင်အလုပ်လုပ်လာလိမ့်မည်၊ သူတို့အမည်ကိုမှတ်မိသွားသည်နှင့် အကြောင်းရှာမရဘဲ ရူးသွပ်နေသော သာ့ချန်းအဆင့်ကျင့်ကြံသူသည် ရုတ်တရက် ၎င်းတို့နှင့် ထိပ်တိုက်လာတွေ့လိမ့်မည်၊ ထို့ကြောင့် အဆိုပါအရှင်သခင်ကြီးက

မိသားစုတစ်စုကို အပြတ်ရှင်းလိုက်ပြီဟုကြားတိုင်း လူတိုင်း ရင်တမမ ဖြစ်ကြရတတ်သည်။

ထိုအရှင်သခင်ကြီးက နောက်တခါရူးသွပ်သွားပြန်ပြီ။

ယင်းသည်ကား တခါမှသတင်းကောင်းမဟုတ်ချေ။ မကြာသေးခင်က အပြစ်လုပ်ထားသူတိုင်း အထုပ်အပိုးပြင်ပြီး တတ်နိုင်သမျှဝေးဝေးပြေးခြင်းက ပိုကောင်းလိမ့်မည်။ အကောင်းဆုံးက လျို့ဝှက်နယ်မြေထဲတွင် ပုန်းနေခြင်းပင်ဖြစ်ပြီး နှစ်ထောင်ချီကြာပြီးနောက်မှ ပြန်ထွက်လာသင့်သည်။

ဆန့်ကျင်သူမရှိသလို အသုံးလည်းမဝင်ပေ။ တုကျဲအဆင့်ကျင့်ကြံသူများက လောကကြီး၏အရေးများတွင် ဝင်မပါတတ်ကြဘဲ မသေမျိုးဖြစ်လာရန် မိုးကြိုးသွားအတိဒုက္ခကိုသာ တည်ငြိမ်စွာစောင့်ဆိုင်းကြသည်။ သာ့ချန်းအဆင့်ကျင့်ကြံသူများအကြားတွင် မြင့်မြတ်သောမီးတောက်နှင့် တိုက်ခိုက်နိုင်သူ မရှိချေ။

ချီဂိုဏ်းက ၎င်း၏ မြင့်မြတ်သောဝိညာဥ်အရင်းအမြစ်ကို ထိန်းသိမ်းနိုင်မည့်အရာကို လိုက်ရှာခဲ့ကြဖူးလင့်ကစား အချည်းနှီးသာဖြစ်ပြီး လူတိုင်းမျှော်လင့်ချက်ပျောက်ခဲ့ကြရသည်။

တတိယသား၏ လက်ရှိကြံခိုင်မှုအရ စိတ်အတွင်းပိုင်းဝေဒနာကို မဖြေရှင်းနိုင်ပါက တုကျဲအဆင့်သို့ တက်လှမ်းနိုင်မည်မဟုတ်ဘဲ သာမန်မသေမျိုးသာ ဖြစ်လာလိမ့်မည်ပင်။ ဖြေရှင်းမရလျှင်ပင် ထိုအတိုင်း ကမူးရှူးထိုးဖြင့် လျှောက်လုပ်နေခွင့်မပေးနိုင်ပေ။ လူရာချီသတ်ဖြတ်နေတိုင်း အရာအားလုံးက ပြေလည်မသွားနိုင်။

🦊

နန်ခိုင်လျို့ဝှက်နယ်မြေက မကျယ်သော်လည်း နာမည်ကြီးသည်။ နှစ်ငါးရာတွင်တစ်ခါပွင့်ပြီး နှစ်ငါးရာတိုင်း တခါပိတ်တတ်သည်။ တခါဝင်သွားတိုင်း ကွဲပြားနေတတ်သောကြောင့် လျို့ဝှက်နယ်မြေက အမည်ကျော်ကြားသည်။ တခါဝင်သွားသည်နှင့်တတ်နိုင်သမျှ ရှင်းလင်းရပြီး နောက်တကြိမ်ဝင်လျှင် မတူညီတော့သည့်အရာများက ၎င်းတို့ကိုစောင့်ကြိုနေလိမ့်မည်၊ မကုန်ခမ်းနိုင်သော အထောက်အပံ့တစ်ခုရှိနေသလိုမျိုး။ ကျင့်ကြံခြင်းလောကမှ လူတိုင်းကလည်း ထိုအရာများကိုနှစ်သက်၍ သွားကြခြင်းဖြစ်သည်။

နန်ခိုင်ကျင့်ကြံရေးလျို့ဝှက်နယ်မြေတွင် ကျင့်ကြံဆင့်ကန့်သတ်ထားသည်။ ယွမ်ယင်အဆင့်အထက်ဆိုပါက ဝင်ခွင့်မရနိင်သောကြောင့် ကျင့်ကြံသည်မှာမကြာသေးသော လူငယ်လေးများ၏ဘဝတွင် တိုက်ပွဲကြီးက အမြဲရှိနေခဲ့လေ၏။

စည်းမျဥ်းများရှိလင့်ကစား တစုံတယောက်ကသွားချင်နေပါက ရှေးဟောင်းစွမ်းအားများဖြင့် ချမှတ်ထားသော စည်းကမ်းချက်များပင် ထိုသူကို တားနိုင်မည်မဟုတ်ပေ။

ချီလီသည် သူမ၏အစ်ကိုသုံးထံမှ သတင်းကြားရသည့်အခါ ရယ်စရာပင်မပြောနိုင်သေးခင် လက်ဖက်ရည်ခွက်ကို လေမှုတ်နေရင်းမှ ရပ်သွားပြီး သူမအစ်ကိုကြီးကို လှမ်းကြည့်မိသည်။

သူတို့၏မျိုးဆက်များအတွက် အခြေအနေမှာ ပါးစပ်မှထုတ်ပြောရန်ပင် ရှက်စရာကောင်းနေလေ၏။ သူတို့၏အဖေက ဂိုဏ်းခေါင်းဆောင်ဖြစ်ပြီး သူတို့နှစ်ယောက်က ဂိုဏ်း၏မျိုးဆက်ငယ်လေးများဟု ယူဆနိုင်သည်၊ သို့သော်လည်း ၎င်းတို့၏ပုံမှန်မဟုတ်သော စွမ်းအားကြီးညီအစ်ကိုကြောင့် သူတို့၏ဂုဏ်သတင်းက

ကို့ရို့ကားယားနိုင်လာခဲ့သည်။ ကံကောင်း၍ ၎င်းတို့နှစ်ယောက်က လိမ္မာယဥ်ကျေးကြပြီး သူတို့၏ ညီငယ်သုံးအပေါ်တွင်လည်း နားလည်ပေးနိုင်ကြသည်၊ ယင်းက မောင်နှမသုံးယောက်ကြားမှ အက်ကွဲကြောင်းကို တားဆီးပေးထားနိုင်ခဲ့၏။ သူတို့သုံးယောက်ကို ဂိုဏ်းထဲတွင် အရည်အချင်းရှိသည်ဟု သတ်မှတ်ထားကြသည်။ ၎င်းတို့ညီအစ်ကိုသုံး၏အဆင့်တက်မှုက အင်မတန်မြန်ဆန်ပြီး အစ်ကိုကြီးနှစ်ယောက်က လေ့ကျင့်ရေးတွင် နှေးကွေးပုံပေါ်သည်။ သူတို့၏အရည်အချင်းက ယခုထက်ပိုသာနေခဲလျှင်ပင်

၎င်းတို့၏ဂုဏ်သတင်းမှာ ငုပ်လျိုးနေဦးမည်သာ။

သူတို့က မြင့်မြတ်သောမီးတောက်ချီလန်နှင့် အမေတူကြသည်။ ချီလန်က သူတို့၏အငယ်ဆုံးမွေးချင်းဖြစ်သော်လည်း အချို့အကြောင်းအရင်းများကြောင့် တတ်သိနားလည်မှုအပိုင်းတွင် သူတို့ထက်ပိုစောခဲ့သည်။ သူ၏စိတ်ဝိညာဥ်အရင်းအမြစ်ကြောင့်သာမဟုတ်လျှင် သူတို့၏အငယ်ဆုံးညီငယ်လေးက အရူးဟု ခေါင်းစဥ်တပ်ခံရမည်မဟုတ်။ ထိုသူမှာ သူ၏ဒေါသနှင့်အကျင့်တို့ကိုပြင်ရန် လမ်းမရှိတော့သောကြောင့် အိမ်မပြန်လာတော့ခြင်းဖြစ်သည်။

ချီလန်သည် နားလည်ရခက်ပြီး ခန့်မှန်းရန်မလွယ်ပေ၊ တစ်နှစ်ပတ်လုံးလျှောက်သွားနေပြီး ကောင်းကင်ဓားဂိုဏ်းတွင်နေရန် ရွေးချယ်ခဲ့သည်။ ထိုသူသည် နန်ခိုင်လျို့ဝှက်နယ်မြေ သို့မဟုတ် တနေရာကိုသွားရန်စီစဥ်ထားကြောင်း

အကြောင်းပြန်ခဲ့၏၊ ချီလီ ဘယ်လောက်ပင်ကြည့်ပါစေ ထူးဆန်းနေမှန်းသိသည်။ သူမ စာကိုယူလာပြီး အစ်ကိုအကြီးဆုံးကိုတွေ့သည့်အခါ သူမပြန်ကြားလိုက်ရသည်က: "သူအထဲဝင်သွားနိုင်ရင် လွှတ်ပေးလိုက်..."

"ဒါပေမဲ့...အစ်ကိုကြီးရယ်..."

"ညီမနှစ်...ညီငယ်မှာ သူ့အကြောင်းပြချက်ရှိပါတယ်...သူ နန်ခိုင်လျို့ဝှက်နယ်မြေကိုဝင်ဖို့လုပ်ထားပြီးရင်..မင်းသူ့ကိုသွားဆွဲထုတ်လို့ရမှာမဟုတ်ဘူး..."

ချီလီမှာ တခဏမျှကြက်သေသေသွားခဲ့ပြီး ရုတ်တရက် သူမဝင်ပါ၍ မရနိုင်တော့မှန်း နားလည်သွားခဲ့သည်၊ သူမ၏ကျင့်ကြံဆင့်က အရမ်းမြင့်လွန်းနေသည်လေ....

"ဒါပေမဲ့...."

"ညီမနှစ်...သူ့မှာလည်း သူ့ကိစ္စနဲ့သူရှိပါတယ်..."

ချီလီ သူတို့အစ်ကိုကြီးဆုံးစကားကြောင့် ချက်ချင်းနောက်ဆုတ်လိုက်သည်။

အမှန်ပင်။ ချီလန်က သူ့နေရာသူသိနေမည်ပင်။

အပြင်တွင် သူသည်ကား စိတ်မငြိမ်ကြောင်း ကောလဟလများပျံ့နေစေကာမူ အနည်းငယ်မျှဆွပေးလိုက်သည်နှင် ပေါက်ကွဲတတ်ပြီး မလုပ်ခင်စဥ်းစားခြင်းမျိုးလည်း တစ်ခါမှမရှိ၊ 'ခုရှုပ်မှနောက်ရှင်း' ဆိုသောစကားအတိုင်း နေထိုင်လာခဲ့သည်၊ မိသားစုထဲတွင် မည်သူကမှ ချီလန်လောက် ဉာဏ်မပြေးကြပေ။ ထိုသူသည် အရာအားလုံးကို အလွယ်တကူနားလည်နိုင်ပြီး နဂိုအကျင့်ကလည်း မကြမ်းတမ်းပေ။ သူ၏စိတ်ဝိညာဥ်အရင်းအမြစ်နှင့် စရိုက်ကြောင့်သာ အလွယ်တကူ ဒေါသထွက်လာတတ်ခြင်းဖြစ်သည်။

ကျင့်ကြံဆင့်မြင့်လာသည်နှင့် သူ၏မီးနှင့်လျှပ်စီးစွမ်းအင်အရင်းအမြစ်ဖြင့် တိုက်ခိုက်နိုင်မှုနှုန်းက ပိုထင်ရှားလာသည်။ သူခေါင်းကြည်နေသည့်အချိန်က အင်မတန်နည်းပါးလွန်းသည်မှာ နှမြောစရာကောင်းသောကြောင့် ချီလန်မှာ အိမ်မှထွက်၍ ကောင်းကင်ဓားဂိုဏ်းတွင် သွားနေရရှာသည်။

"ညီငယ်လေးက သူ့ကို လုံခြုံအောင်လုပ်ပေးနိုင်တဲ့အရာတစ်ခုကို ရှာတွေ့သွားတာဖြစ်မယ်..." ချီဂိုဏ်း၏အကြီးဆုံးအစ်ကိုက အားရကျေနပ်စွာဖြင့် ပြုံးကာဆိုပေ၏။

ချီလီ၏မျက်နှာထားက ထူးဆန်းသွားသည်။ ထိုသို့ဖြစ်နိုင်ချေက အလွန်နည်းနေသလိုပင်။

သူတို့က ထိုသို့သောပစ္စည်းမျိုးကို နှစ်များစွာလိုက်ရှာခဲ့ကြလင့်ကစား တခါမှသတင်းမရပေ။ လျို့ဝှက်နယ်မြေအတွင်း ဖွင့်ချိန်နှင့်ပိတ်ချိန်က အတိအကျရှိနေလေရာ မည်သို့များဖြစ်နိုင်ပါမည်နည်း။

နန်ခိုင်လျို့ဝှက်နယ်မြေက မဆိုးလှပေ၊ ၎င်းကိုစိတ်ဝင်စားသည့်ကျင့်ကြံသူများက အကန့်အသတ်နှင့်ရှိသည်။ အလွန်အားကောင်းသည့်အမြုတေနှင့် ဂိုဏ်းကြီးမှဂိုဏ်းသားများက နယ်မြေထဲဝင်ရန် ဝန်လေးနေမည်မဟုတ်ကြပေ။ ၎င်းတို့ရထားသည့်အရာများကို နန်ခိုင်လျို့ဝှက်နယ်မြေခရီးစဥ်တွင် ရလာမည့်အရာများနှင့်နှိုင်းယှဥ်ပါက မပြောပလောက်ခြင်းကြောင့်ပင်။

ထိုခရီးစဥ်တွင် အဖိုးအတန်ဆုံးမှာ နန်ခိုင်လျို့ဝှက်နယ်မြေထဲတွင် လုံခြုံစွာကြီးထွားလာနေသော ဗောဓိပင်ဖြစ်၏။

တကယ်တမ်းတွင် နန်ခိုင်လျို့ဝှက်နယ်မြေတစ်ခုလုံးကို ဗောဓိပင်က ဖန်တီးပေးထားခြင်းဖြစ်သည်။ အချို့သောရတနာများက သူတို့ကိုယ်သူတို့ ကာကွယ်ရမည့်နည်းလမ်းကို သိကြ၏၊ နန်ခိုင်လျို့ဝှက်နယ်မြေကသာ ဗောဓိပင်ကြီးထွားလာရန် အသင့်တော်ဆုံးနေရာပင်။ နှစ်ပေါင်းငါးရာကြာမှ တခါပွင့်၍ သူ၏ထူးခြားမှုကို မည်သူကမှသိနိုင်မည်မဟုတ်။ အထဲတွင် ဆေးပင်များပေါများပြီး လျို့ဝှက်နယ်မြေပိတ်သွားသည့်အခါ ထိုအပင်များက ဗောဓိပင်၏ချီစွမ်းအင်အတွက် အာဟာရဖြစ်လာပြီး ၎င်းက မြန်ဆန်စွာကြီးထွားလာလိမ့်မည်။ နောက်ထပ်နှစ်ပေါင်းငါးရာအကြာတွင် လျို့ဝှက်နယ်မြေပွင့်လာသည့်နောက် အတွင်းထဲမှအရာများကို နောက်တကြိမ်ပြန်လည်ရရှိလိမ့်မည်။ ဤသို့သောလျို့ဝှက်နယ်မြေမျိုးက လူတိုင်းမမြင်နိုင်၍ ဗောဓိပင်ကို ရှာတွေ့သူက အင်မတန်နည်းပါးတတ်သည်။

ရွှယ်လင်: "....တော်တော်နည်းလား.."

စနစ်: ".....တကယ်တော့... လွန်ခဲ့တဲ့နှစ်ပေါင်းတစ်သောင်းအတွင်း တစ်ယောက်မှမတွေ့သေးဘူး...."

ရွှယ်လင်: "ဒါဆိုလည်း သူဘာတွေဖြစ်နေတာလဲဆိုတာ ငါ့ကိုရှင်းပြဦး..."

စနစ်: "ဒါတော့ မင်းငါ့ကိုအပြစ်တင်လို့မရဘူးလေ...အဲဒါက host ရဲ့အမှား..."

ရွှယ်လင်: "...." ဟုတ်ပါပြီ...နောက်ဆုံးတော့လည်းငါ့အမှားပဲပေါ့...

ကောင်းစွာဖုံးကွယ်ထားနိုင်သော ဗောဓိပင်အနေဖြင့် သူ၏စိတ်ဝိညာဥ်လေးကိုပင်ဖြစ်စေ၊ လျို့ဝှက်နယ်မြေပွင့်သွားပြီးနောက် သစ်ရွက်များလှုပ်သွားရန်ဖြစ်စေ ဆုမတောင်းခဲ့ပေ၊ ရွှယ်လင်မှာ အနာအဆာရှိနေသလိုမခံစားရ။ သူသည် ဂူထဲမှအခြားသစ်ပင်များနှင့် အတူတူပင်ဖြစ်ပြီး နေရာတိုင်းမှ တောက်ဓမ္မ သဲလွန်စများက အခြားအရာများထက် ကိစ္စမရှိချေ။

သို့ထိတိုင် အနှီယောကျ်ားပျိုက နေ့နှင့်ညအနည်းငယ်ခန့် သူ့ကို ဗလာသက်သက်စိုက်ကြည့်နေခဲ့သည်။

ရွှယ်လင်မှာ ထိုသူက ဘာဖြစ်ချင်နေမှန်းမသိပေ၊ သူပထမဆုံးရောက်လာသည့်နေ့က ထိုသူ၏မျက်လုံးများမှာ နီရဲနေပြီး အသိစိတ်ကပ်ပုံလည်းမရ။ အနှီသူသည် သူ့ကို သုံးရက်သုံးညခန့် အူကြောင်ကြောင်ဖြင့် ကြည့်နေပြီးနောက် အနည်းငယ် အသိပြန်ဝင်လာပုံရ၏။

စနစ်က သစ်ပင်ထိပ်ပိုင်းတွင် ထိုင်နေပြီး မြေခွေးကိုယ်လေးက တုန်လှုပ်နေသည်။ ၎င်းက ထိုလူကို လုံးဝမကြောက်နေသော်လည်း ဖိနှိပ်ခံထားရသူတစ်ယောက်အနေဖြင့် မတတ်သာပေ။ ၎င်းသည် သနားစရာကောင်းစွာဖြင့် host ထံ ဆိုလိုက်မိ၏။

"host! ကိုယ့်လူကိုယ်ထိန်းထားနော်...ငါ့ကို အဲဒီလိုမခြောက်နဲ့လို့..."

ရွှယ်လင်က သူ့ချစ်သူကိုသိနေသော်လည်း ပြဿနာမှာ အခုအချိန်တွင် သူသည်လူတစ်ယောက်မဟုတ်။ သူက သစ်ပင်တစ်ပင်သာ၊ သူဘာလုပ်၍ရမည်နည်း။ သူဘာမျှမလုပ်နိုင်ပေ၊ သူ သုံးရက်လုံးလုံးစဥ်းစားနေမိသည်မှာ အနှီသူက မည်သို့များ သစ်ပင်တစ်ပင်ကို မြင်မြင်ချင်းချစ်မိသွားသလဲဆိုသည့်အကြောင်းပင်၊ သူရယ်ချင်လွန်း၍ စိတ်မထိန်းနိုင်ပေ။

ကောင်းပြီ...သူ့အကြိုက်က ကမ္ဘာပြောင်းတိုင်း ပိုဆိုးလာတော့တာပဲ...

ရွှယ်လင်သည် သစ်ပင်တစ်ပင်ကို သည်းကြီးမည်းကြီးစိုက်ကြည့်နေသည့်လူအား သုံးရက်လုံးဥပေက္ခာပြုထားလိုက်သည်။ လေးရက်မြောက်တွင် ထိုလူသည် စိတ်ပိုင်းဖြတ်လိုက်သည့်ပုံဖြင့် တခုခုလုပ်ရန်စီစဥ်တော့၏။

ရွှယ်လင်က သူဘာလုပ်မလဲဟူ၍ ပျင်းတွဲတွဲဖြင့် ကြည့်နေလိုက်သည်။

ထိုသူမတ်တပ်ရပ်လိုက်သည့်အခါ သူ့လက်ထဲတွင် ဓားတစ်ချောင်းပါလာသည်။

ထိုဓားက မီးတောက်နေပြီး လျှပ်စီးအလင်းတို့ ယှက်သန်းနေလေ၏။

ဓားသည် အကာအရံအောက်မှထွက်လာသည်နှင့် ဓားစွမ်းအင်ကြောင့် နန်ခိုင်လျို့ဝှက်နယ်မြေထဲမှ အပြာရောင်ကောင်းကင်မှာ တခဏမျှ မှောင်မိုက်သွားခဲ့သည်။ နေရာတိုင်းတွင် မိုးချုန်းသံတို့ ပွက်ပွက်ညံနေကာ ရွှယ်လင်မှာ ထိုသူဓားအတွင်းသို့ စုစည်းလိုက်သောစွမ်းအားကိုပင် ခံစားမိသည်။

လျှပ်စီးတဖြာလက်သွားပြီး မီးအလင်းရောင်တောက်ပသွားသည့်အကြား ရောင်ခြည်တန်းများကြောင့် ရုတ်တရက်မူးနောက်သွားရကာ လွန်ခဲ့သည့်သုံးရက်က

ထိုလူဝေခွဲရခက်နေခဲ့သည့်အခြေအနေကို နားလည်သွားတော့သည်။

အနှီသေနာလေးက သူ့ကိုခုတ်ပစ်ရန် ကြံစည်နေသည်ပင်!

စနစ်: "ကြည့်ရတာ တကယ်ကို နက်နက်ရှိုင်းရှိုင်းနဲ့ အပီချစ်ကြတော့မယ်ထင်တယ်..."

ရွှယ်လင်မှာ စနစ်ကို ပါးစပ်ပိတ်ထားဟုပင် အော်ရန်အချိန်မရှိတော့။ သူအခုမှမလှုပ်လျှင် ခဏနေ ခုတ်ပြီးသားသစ်များ ဖြစ်သွားလိမ့်မည်။ သူ့ကိုယ်ထဲတွင် တောက်စွမ်းအင်များ သောင်းချီရှိသည်။ ရွှယ်လင်ဆိုလိုချင်သည်မှာ သူသည် အကြောင်းမရှိဘဲပြန်တိုက်ခိုက်မည့် အလျင်လူမဟုတ်ပေ။

လျို့ဝှက်နယ်မြေ၏ကောင်းကင်သည် ခဏတာခန့်အမှောင်ဖုံးနေခဲ့ပြီး တိမ်များမှာ အချင်းချင်းတွန်းတိုက်နေကြသယောင်။ ကျင့်ကြံသူအငယ်လေးများမှာ ဖြစ်ပျက်နေသမျှကို နားမလည်နိုင်ကြသည့်တိုင် ၎င်းတို့၏မသိစိတ်က အန္တရာယ်ကိုခံစားမိကြသည်။

လျို့ဝှက်နယ်မြေတစ်ခုလုံးက ဖုံးကွယ်နေပြီး ဆန်းကြယ်သည့်အားတစ်ခုက ကာရံထားသည်၊ သို့ဖြစ်၍ ထိုအခိုက်အတန့်လေးအတွင်း ထိုလူမျက်နှာမှာ စိမ်းဖန့်လာလေတော့၏။

အကိုင်းအခက်နှင့်အရွက်လေးများက အလျင်အမြန်ခက်ဖြာလာသည်။ ၎င်းကမီးတောက်များနှင့် ဓားသွားပေါ်တွင် ကခုန်နေသော အလင်းစက်လေးများကို ဝါးမြိုပစ်ပြီး လေပြည်လေးတလျှောက် ယိမ်းနွဲ့နေ၏။

အပင်လေးများပေါက်လာသည့်တလျှောက် ထိုသူသည် လှိုဏ်ဂူထဲမှ အပင်များကိုကြည့်နေပြီး သူခုတ်ပစ်မည့်အပင်တွင် အကြည့်ရပ်တန့်သွားသည်။

ဤအချိန်လေးအတွင်း အပင်သည် ယခင် သာမညောင်ညအခြေအနေမှ လုံးဝကွဲပြားသွားခဲ့သည်။ ၎င်းသည် မြစိမ်းရောင်တောက်ပလာပြီး အပင်ရှေ့တွင် ကျောက်စိမ်းဖြူရောင်အလင်းတန်းလေး စုစည်းလာခဲ့သည်။

အကြောင်းအရင်းမသိဘဲ ထိုအခိုက်အတန့်မှာပင် ချီလန်၏စိတ်ထဲ၌ ရုတ်တရက် ကြိုတင်မျှော်လင့်ထားသည့်အတိုင်း ဖြစ်လာသလိုခံစားရသည်။

ထို့နောက် သူသည် အစိမ်းရောင်ခါးစည်းကြိုးလေးနှင့် ကျောက်စိမ်းဖြူရောင် အလင်းတန်းများစုဝေးထားသည့် ချစ်စရာကောင်လေး၏ပုံရိပ်လေးကို ကြည့်နေမိ၏။

မြင့်မြတ်သောမီးတောက်မှာ လှည့်စားခံလိုက်ရသလိုပင်: "...."

ရုတ်တရက် သူ့နှလုံးသားက နာကျင်လာခဲ့သည်....

ကောင်လေးက အလွန်အမင်းလှပလွန်းသည်။ မျက်နှာက ကလေးလေးတစ်ယောက်အတိုင်း လုံးဝန်းနေကာ အပြည့်အဝ အရွယ်မရောက်သေးသောကြောင့် မြေခွေးမျက်ဝန်းတစ်စုံက ဘယ်ညာကြည့်လိုက်တိုင်း အပြစ်ကင်းဖြူစင်နေဟန် ပေါ်လွင်တတ်သည်။ ၎င်း၏မျက်လုံးထောင့် အောက်ဘက်နားမှ မျက်ရည်ခံမှဲ့လေးသည် ၎င်းကို အေးစက်နေဟန်ပေါ်စေလင့်ကစား နှုတ်ခမ်းတို့ကိုဖိပြီး ချီလန်ကိုငေးကြည့်လာသည့်အခါ သူ့နှလုံးက အရူးအမူးခုန်လှုပ်လာတတ်သည်။

သူ့ထံတွင် ရှည်လျားသောဆံနွယ်များရှိ၏၊ အဆုံးတွင် အစိမ်းဖျော့ရောင်ဖဲကြိုးနှင့် ချည်နှောင်ထားသည်။ အကျီနှင့်အရောင်တူ ခေါင်းစည်းကြိုးက တကိုယ်လုံးကိုဖုံးလွှမ်းထားပြီး ထိုနေရာတွင်သာရပ်နေသည့်တိုင် ချီလန်မှာ သူ၏ပရမ်းပတာဖြစ်နေသည့်စိတ်က အပြီးတိုင်ငြိမ်သက်သွားသည်ကို ခံစားမိခဲ့သည်။

ထို့ကြောင့်ပင် သူ သည်နေရာ၌ သုံးရက်တိုင်နေခဲ့ရခြင်းဖြစ်၏။ ဤသစ်ပင်က သူ့အတွက်အဓိပ္ပါယ်ရှိပြီး အသိပြန်လည်လာစေကာ သူ၏စိတ်ဝိညာဥ်အရင်းအမြစ်၏

ထပ်မံခြယ်လှယ်လွှမ်းမိုးမှုကို မခံရတော့ပေ။

အပင်ပျိုလေးသည် စိတ်ကူးပေါက်သလို ခုတ်ဖြတ်တတ်သည့်သူ့အကျင့်အား ရွံရှာနေသလို သူ့ကိုစိုက်ကြည့်နေခဲ့၏။ ထိုသူ စိတ်ဆိုးလာသည်တွင် ပါးပြင်လေးနှစ်ဖက်က ဖောင်းကားနေပြီး ချစ်စရာကောင်းသည်ထက်ပင် ပိုနေခဲ့သည်။ အပင်ပျိုလေးက သူ့အား ယခုလိုခြိမ်းခြောက်လာ၏:

"ခင်ဗျား ကျွန်တော့်ကို အမြစ်ကလှန်ရဲရင်...ကျွန်တော်တို့နှစ်ယောက်လုံးကိစ္စချောပြီပဲ..."

Prev Next