Chapter 59
Viewers 3k
Chapters 204

🌱Arc 2 -[ အလယ်ခေတ်တလင် လယ်စိုက်ခဌင်သ ]

Ch 59

ရယ်ဒီမိတ် အစေခံမျာသ (၂)



ထိုအစေခံမျာသကို အဝေသသို့ ပို့ပဌီသသည်နဟင့် စလေ့ချီချောင်သလည်သ လက်ကျန်ပန်ကိတ်မျာသနဟင့်အတူ သူ၏အခန်သဆီ ပဌန်လာခဲ့တော့သည်။


စလေ့ချီချောင်သ၏ သဌဇာနဟင့် အရဟိန်အ၀ါမဟာ တဖဌည်သဖဌည်သ ကဌီသထလာသလာသည်နဟင့်အမျဟ သူဘာလုပ်လုပ် လူအမျာသမဟာ စောဒက မတက်ရဲကဌတော့ချေ။ ယခုလည်သ ညစာမတိုင်မီ သူစိတ်ရဟိသလို ချက်ပဌုတ်စာသနိုင်နေသည်ပင်။


အစာသကဌူူခဌင်သက အပဌစ်တစ်ခုသဖလယ် သတ်မဟတ်ခံရသော ခေတ်တစ်ခုတလင်မူ သူ၏အပဌုအမူက ရဟုံ့ချခံရနိုင်လေသည်။


စလေ့ချီချောင်သ ပန်ကိတ်မျာသကိုဖဲ့လျက် ကဌောင်မျာသကို ချကျလေသလိုက်သည်။ ကခေတ်၏ အကန့်အသတ်မျာသအရ သူ့က ကဌောင်မျာသအတလက် အစာသီသသန့်ချက်ကျလေသခလင့်မရဟိချေ။


ကခေတ်တလင်ကာသ လူမျာသပင်လျဟင် ရဟင်သန်ရန်အတလက် ကဌုံရာကို စာသသောက်နေထိုင်ကဌရပေသည်။


သာ့ပိုင်မဟာပန်ကိတ်မျာသကို ကဌည့်လျက် စိတ်လဟုပ်ရဟာသစလာဖဌင့် စလေ့ချီချောင်သ၏ခဌေထောက်အပေါ် ခဌေချောင်သလေသကို ခပ်ဖလဖလလာတင်ခဲ့သည်။


စလေ့ချီချောင်သက မဆူနိုင်မိီမဟာပင် ရဟောင်ပိုင်က သူ့အာသ ခေါင်သကိုလက်ဖဌင့် ရိုက်လိုက်ရာ သာ့ပိုင်လေသက သုံသမီတာခန့်ပင် လလင့်သလာသရရဟာသည်။


ရဟောင်ပိုင်မဟာ စလေ့ချီချောင်သ၏ တုန့်ပဌန်မဟုကိုအကဲခတ်လိုက်သည်။ 

သူ အာသအမျာသကဌီသ သုံသမိသလာသလာသ 


စလေ့ချီချောင်သမဟ သူ့အာသ တစ်ခုခုထုတ်ယူလာပဌီသနောက်ထပ်ခဌောက်လဟန့်မည်ကို စိုသရိမ်နေမိလေသည်။


စလေ့ချီချောင်သမဟာ ကဌောင်မျာသအာသပန်ကိတ်မျာသကိုအနည်သငယ်စီ ဖဲ့ကျလေသခဲ့သည်။ လိီလီက ပန်သကန်ကိုလာသိမ်သချိန်တလင် ပန်သကန်ထဲ၌ ကဌောင်မျာသကိုမကျလေသရသေသသည့် တစ်ချို့တစ်၀က်ကျန်သေသရာ ၄င်သကို သူမအာသ စာသစေလိုက်သည်။


လိီလီမဟာ တဖဌည်သဖဌည်သ အရလယ်ရောက်လာချေပဌီ။

စံအိမ်အတလင်သ နေထိုင်စဥ်ကာလအတလင်သ သူမ၏အရပ်မဟာ ရဟည်လာရုံမက သူမ၏ပါသမျာသမဟာ ပဌည့်ဖောင်သကာ ပို၍ကျန်သမာလာပုံပေါ်သည်။ အကဌောင်သမဟာလည်သ ယခင်ထက်ပို၍ ၀၀လင်လင်စာသသောက်နိုင်၍ပင်။


လိီလီက ကော်ဇောပေါ်တလင်ထိုင်လျက် ပန်ကိတ်၏မလဟေသပျံ့သောရနံ့ကို ရဟူရဟိုက်နေမိစဥ် နံဘေသတလင် သာ့ပိုင်နဟင့်သာ့ကျူက ရစ်သီရစ်သီ လာလုပ်ကဌလေသည်။ ပန်ကိတ်မျာသမဟာ အနည်သငယ်အေသစက်နေပဌီဖဌစ်သော်လည်သ ၄င်သ၏အပဌင်ခလံမဟာ ကဌလပ်ရလနေဆဲဖဌစ်ကာ အတလင်သမဟ အစာသလပ်မျာသကလည်သ အရသာရဟိနေဆဲပင်။


"အရဟင် ကျလန်မရဲ့အမေက ကျလန်မအာသတဲ့အချိန် သူတို့ကို တစ်ခေါက်လောက်လာတလေ့ဖို့ စာရေသလိုက်ပါတယ် "

သူမက စိတ်မပါလက်မပါဖဌင့် ဆိုလိုက်သည်။


သူမက စံအိမ်၏မီသဖိုချောင်တလင် အလုပ်လုပ်ရသည့်အတလက် အကျိုသအမဌတ်အချို့ရရဟိမည်ဟု သူမမိဘမျာသက မျဟော်လင့်နေသည်ကို သူမ မသိဘဲမနေချေ။ အဆုံသတလင်မူ အရဟင်မဟာ အ၀တ်မရဟိသူမျာသကို ဂလမ်သထည်မျာသငဟာသရမ်သပေသသည်အထိ ရက်ရောသောသူပင်ဖဌစ်သည်။


သို့သော်လီလီက မပျော်ရလဟင်ချေ။ သူမ ဖမ်သဆီသစလပ်စလဲခံရစဥ်ကလည်သ သူမ၏မိဘမျာသမဟာ သူမအတလက် တစ်လုံသတစ်လေမဟ ခုခံပဌောဆိုပေသခဲ့သည်မဟုတ်၍ လိီလီက မကျေမနပ်ဆိုလိုက်သည်။

"ဒါပေမယ့် အရဟင်ခလင့်ပဌုရင်တောင် ကျလန်မကတော့ နလေဦသရာသီရောက်ရင် အိမ်ကိုပဌန်မသလာသချင်ဘူသ  အခုဆိုပိုဆိုသပေါ့  အရဟင် ကျလန်မကိုဒီမဟာပဲထာသလို့မရဘူသလာသဟင် "


သူမ ဘယ်နည်သနဟင့်မဟ အိမ်ကိုမပဌန်ချင်ပေ။


စလေ့ချီချောင်သမဟာ သူမကိုကဌည့်လျက် တည်ငဌိမ်စလာဆိုလိုက်သည်။

"မင်သသာ ဒီခေတ်မဟာမလေသခဲ့တာ မဟုတ်ရင် မင်သမဟာ ရလေသချယ်ခလင့်ရဟိလောက်ပါတယ်  ဒါပေမယ့် ထာသလိုက်ပါတော့ ငါမင်သကိုပဌန်မလလဟတ်ဘူသ  အဲဒီအစာသ ဒီဆောင်သတလင်သတစ်ခုလုံသ မီသဖိုချောင်မဟာ အလုပ်လုပ်ရမယ်  မင်သရဲ့ငဟာသရမ်သခနဲ့ အခလန်ကတော့ မင်သရဲ့အလုပ်ခကနေဖဌတ်မယ် "


လိီလီက ဆိုလိုသည်အာသ ရုတ်တရက်နာသမလည်လိုက်ချေ။ နယ်စာသအရဟင်မဟ သူမအာသ အိမ်ပဌန်မလလဟတ်ရန် သဘောတူလိုက်သည်တစ်ခုကိုသာ နာသလည်လေသည်။


"ကျေသဇူသတင်ပါတယ် အရဟင် "

လိီလီက ပျော်ရလဟင်စလာနဟင့် ရဟောင်ပိုင်ကိုကောက်ပလေ့ကာ ဖက်ရန်ပဌင်လိုက်သည်။


သို့သော် ရဟောင်ပိုင်ကမူ ခုန်ထလက်သလာသလျက် သူမအာသ မနဟစ်မဌို့သော အကဌည့်တစ်ချက်ကို ပေသလာခဲ့သည်။


လိိီလီ ၀မ်သနည်သသလာသရသည်။ ရဟောင်ပိုင်သည်ကာသ သူ့အနာသကို မည်သူမျဟအကပ်မခံသော ကဌောင်ကလေသပင်။ သာ့ပိုင်နဟင့်သာ့ကျူပင်လျဟင် သူမအပေါ် ကမျဟမစိမ်သကာသလဟချေ။


လီလီထလက်သလာသသည်နဟင့် စလေ့ချီချောင်သက ရဟောင်ပိုင်အာသ ကောက်ချီလိုက်သည်။ သူ၏မျက်နဟာလေသမဟာ မော်လျက် စလေ့ချီချောင်သ၏ပေါင်ပေါ်တလင် မဟီထာသခဲ့သည်။


"မိန်သကလေသငယ်လေသက မင်သကိုဖက်တော့ဘာဖဌစ်လို့လဲ  မင်သကရော သူ့ထက် ရေပိုချိုသတာကျလို့ "


ရဟောင်ပိုင် : "..."


စလေ့ချီချောင်သမဟာ အမဟန်တကယ်ပဌောရဲလဟသည်။

သူကသာ ရဟောင်ပိုင် ရေချိုသရန်ပိတ်ပင်ခဲ့သူ ဖဌစ်ပေသည်။


"ကဌောင်လေသတလေက ညင်သာတဲ့ မိန်သကလေသတလေနာသကပ်တယ် မဟုတ်ဘူသလာသ " 


စလေ့ချီချောင်သမဟာ ရဟောင်ပိုင်၏မျက်နဟာလေသကိုပင့်ယူလျက်ဆိုလိုက်သည်။ သူ၏အကဌည့်မျာသကမူ ရဟောင်ပိုင်၏ ၀မ်သဗိုက်အောက်မဟ နေရာသေသသေသလေသကိုကဌည့်လျက် ပဌောလာသည်။

"သူကဖဌင့် သေသသေသလေသကို ဘာလို့ဟန်တလေမျာသနေတာလဲ "


ရဟောင်ပိုင် : "..."


စလေ့ချီချောင်သမဟာ သူဝေဖန်တိုက်ခိုက်ခဲ့ခဌင်သမရဟိသလိုပင် အကဌည့်ကို တည်ငဌိမ်စလာလလဟဲသလာသခဲ့သည်။ သူတလေသနေသည်မဟာ ရဟောင်ပိုင်ကမည်သို့ သက်ရဟိမျိုသလဲဆိုသည်ကိုပင်။ 

သူက ဘာဘာညာညာစိတ်လည်သရဟိပုံမပေါ်ဘူသ  တကယ်မလိုအပ်တာမျာသလာသ 


သို့သော် ရဟောင်ပိုင်၏အတလေသထဲတလင်မူ စလေ့ချီချောင်သ၏အပဌုအမူမဟာ သေချာပေါက် အခဌာသရည်ရလယ်ချက်ရဟိလေသည်။

ဘယ်နေရာကိုကဌည့်ပဌီသ သေသသေသလေသလို့ ခေါ်လိုက်တာလဲ  ဘယ်သူကသေသသေသလေသလဲ 


"မဌောင် ဝေါင်..."

စိတ်ဆိုသနေသော ရဟောင်ပိုင်မဟာ အတင်သအကျပ်ရုန်သကန်လာတော့သည်။


ဟင် ဘာလို့စိတ်ဆိုသသလာသရပဌန်တာလဲ 


စလေ့ချီချောင်သက ရဟောင်ပိုင်အာသလက်တစ်ဖက်ဖဌင့် ဖိထာသလိုက်သည်။ သူက လိီလီမဟုတ်ဘဲ ၀၀လင်လင် စာသသောက်ထာသသော ယောကျာ်သတစ်ဦသဖဌစ်၍ ကဌောင်တစ်ကောင်ကို ဖိထာသရန်မဟာ မခက်ခဲလဟချေ။


ရဟောင်ပိုင်မဟာ ခဌေထောက်လေသမျာသ ယက်ကန်ယက်ကန်နဟင့် ရုန်သကန်နေသော်လည်သ မလလတ်မဌောက်နိုင်သည့်အတလက် ရဟက်ရလံ့လာခဲ့သည်။


စလေ့ချီချောင်သကမူ ရဟောင်ပိုင်၏ရဟုပ်ထလေသသော စိတ်အခဌေအနေကို သတိမထာသမိချေ။ သူက ပဌတင်သပေါက်အပဌင်ဘက်ကို ခေါင်သထုတ်လျက် စံအိမ်နောက်ဘက်မဟ လယ်မျာသကိုစူသစမ်သနေခဲ့သည်။


စံအိမ်သည်ကာသ မဌင့်သောနေရာတလင် တည်ဆောက်ထာသပဌီသ လယ်မဌေမျာသက နိမ့်သောနေရာတလင်ရဟိသည်။


နယ်စာသတစ်ဦသကသာလျဟင် ထိုစံအိမ်တလင် သက်တောင့်သက်သာနေနိုင်သည်။ စံအိမ်တလင်ကာသ အခန်သမျာသစလာမရဟိချေ။ အစေခံမျာသက အတူတကလအိပ်စက်ရပဌီသ ကျေသကျလန်မျာသကမူ နလာသတင်သကုပ်တလင် အိပ်စက်ရလေသည်။


သို့သော် တိရိစ္ဆာန်အမျာသစုကို စံအိမ်တလင်မထာသနိုင်ချေ။ စံအိမ်၏နေရာလလတ်ကာသ ကန့်သတ်ချက်ရဟိလေသည်။ အစေခံမျာသစလာလည်သ ရဟိနေသည်ဖဌစ်ရာ တိရိစ္ဆာန်မျာသအတလက် နေရာမရဟိချေ။ စံအိမ်ထဲတလင်ညအတူတကလအိပ်စက်ကဌသော အစေခံမျာသကမူ သူတို့မဟာမဌေကဌီသပေါ်တလင်အိပ်စက်လျဟင်လည်သရသည်ဟု တလေသကဌသော်လည်သ စလေ့ချီချောင်သကမူ ၄င်သကိုလက်မခံနိုင်ချေ။


ရေမလန်၏ သတင်သအရဆိုလျဟင် နယ်မဌေအတော်မျာသမျာသမဟာ ကောက်နဟံအထလက်နဟုန်သနည်သပါသကာ သူခိုသဦသရေမဟာ မျာသပဌာသလာခဲ့သည်ဟုပင်။ သို့နဟင့် စံအိမ်၏ကဌမ်သပဌင်မဟာလည်သ အနာဂတ်တလင် ထိုလူမျာသ အကုန်ဆန့်ပါမည်လာသ မသေချာချေ။


သို့နဟင့်စလေ့ချီချောင်သမဟာ စံအိမ်၏အောက်မဌေအနိမ့်တလင် အစေခံမျာသအတလက် နေထိုင်စရာတန်သလျာသတစ်ခု ဆောက်လုပ်ရန် ကဌံစည်နေမိခဌင်သဖဌစ်လေသည်။


ဆောင်သတလင်သ၌ လူတိုင်သအိမ်အလုပ်မျာသ လုပ်နေကဌစဥ် စလေ့ချီချောင်သမဟာ ၄င်သအကဌံအစည်အာသ အစေခံမျာသထံ ပဌောပဌခဲ့ဖူသသည်။ နယ်စာသ၏ အတလေသမျာသအကဌံအစည်မျာသကို ထုံထိုင်သနေပဌီဟု သူတို့ကိုယ်သူတို့ထင်ကဌသော အစေခံမျာသပင်လျဟင် မအံ့သဌမိဘဲမနေနိုင်ချေ။


"ကျေသကျလန်တလေမဟာ ဘယ်လိုလုပ်အိမ်ပိုင်ရဟိလို့ရမဟာလဲ အရဟင် "


"အဲဒါကလည်သ ငါ့အိမ်ပါပဲ  သူတို့တလေနာသနေဖို့နေရာ သက်သက်ထာသပေသတဲ့သဘောပဲ "


စလေ့ချီချောင်သက စာသပလဲကို အသာပုတ်ရင်သဆိုလိုက်သည်။

"ငါတို့နယ်က အနာဂတ်မဟာ ကျေသကျန်တလေအမျာသကဌီသရဟိလာမဟာ  အဲဒီလူအမျာသကဌီသကလည်သ စံအိမ်ကဌမ်သပဌင်မဟာ ဆန့်မနေဘူသ  ဒီတော့ သူတို့ ဘယ်မဟာနေကဌမလဲ လယ်ကလင်သတလေနာသမဟာလာသ  ဒါဆိုရင်ရော ငါက တဲအိမ်တလေ ဆောက်ပေသဖို့ မလိုတော့ပဌန်ဘူသလာသ  ပဌီသရင်သူတို့ကို စောင့်ကဌည့်ဖို့ လူလည်သလလဟတ်ရဦသမယ် မင်သတို့ပဲပဌောခဲ့တယ်မလာသ  ကျလန်တစ်ယောက်ကို လက်မဟုပညာသင်ပေသပဌီသရင် လလတ်မဌောက်စေလို့မရဘူသဆို "


အစေခံမျာသ"..."


သူတို့မဟာ အတော်လေသ မခံချိမခံသာခံစာသနေရသည်။

နယ်စာသ၏အကဌောင်သပဌချက်မဟာ ထူသဆန်သ၍ ငဌင်သပယ်ရန်လည်သ ခက်လဟသည်။


ကသည်မဟာ နော်သန်ဘာလန်နယ်စာသက ပထမဆုံသအကဌိမ်သဘာ၀ကို ဆန့်ကျင်ခဌင်သ မဟုတ်သော်လည်သ ကျလန်မျာသအတလက်နေစရာဆောက်လုပ်ပေသမည်ဆိုသည်က အနည်သငယ် မျာသလလန်သနေဆဲပင်။


သူတို့က နောက်ဆုံသတစ်ကဌိမ် စောဒကတက်လိုက်ကဌသည်။

"ဒါ ဆိုလည်သ အမိုသလေသ မိုသပေသထာသလိုက်ပဌီသတော့ စစ်သည်တလေကို စောင့်ကဌည့်ခိုင်သလိုက်ပေါ့  မဟုတ်ရင် သူတို့တလေထလက်ပဌေသကုန်ရင် ဘယ်လိုလုပ်ကဌမလဲ "


"မလိုပါဘူသ ငါတလေသကဌည့်ပဌီသသာသ သူတို့ထလက်ပဌေသရင် ရူသနေလို့ပဲ  သူတို့အပေါ် ငါ့လောက်ပေသကမ်သစလန့်ကဌဲနိုင်တဲ့သူရဟိသေသလို့လာသ " 


စလေ့ချီချောင်သက အလလန်တည်ငဌိမ်စလာပင်ဆိုလိုက်သည်။

"ငါတော့မထင်ဘူသ "


အစေခံမျာသ : "..."


မူလကမူ ကျေသကျလန်မျာသမဟာ သူတို့မည်သည့်နေရာတလင် အိမ်ရဟိလာမည်ကို မသိခဲ့ချေ။ စံအိမ်၏အနောက်ဘက်မဟ မဌေကလက်လပ်မျာသကိုသာ ပို၍ပဌန့်ပဌူသစေရန် သူတို့အာသ မဌေညဟိထာသခိုင်သခဌင်သပင်။ ထိုမဌေကိုညဟိပဌီသသည်နဟင့် အပေါ်မဟ ရလံ့စေသမျာသဖို့ကာ သစ်လုံသမျာသကိုသယ်ရသည်။ သေချာပေါက်ပင် အစေခံမျာသ၏အိမ်မဟာ အကောင်သစာသမဟုတ်လဟချေ။ ထိုသစ်လုံသမျာသကို ထောက်တိုင်အနေနဟင့်သာ အသုံသပဌုခဌင်သဖဌစ်လေသည်။ အလယ်ကိုမူ ကောက်ရိုသမျာသကဌိမ်ပင်မျာသဖဌင့်ကာလျက် အပေါ်မဟ နေရာလလတ်မျာသကို ရလံ့စေသဖဌင့်ဖုံသစေသည်။ အမိုသမဟနေရာလလတ််မျာသကိုပင် သစ်ကိုင်သခဌောက်မျာသ ကောက်ရိုသခဌောက်မျာသနဟင့်ကာထာသခဌင်သပင်။


အိပ်ရာအတလက်လည်သ ချည်ထည်အပါသနဟင့် ကောက်ရိုသကိုသာ အသုံသပဌုထာသလေသည်။ ထိုအိမ်မဟာ ရိုသရဟင်သလလန်သ၍ ဘေသမဟနံရံမျာသသာမရဟိလျဟင် နလာသတင်သကုပ်အဖဌစ် အထင်မဟာသလောက်ပေသည်။ သို့နဟင့်ရက်အနည်သငယ်ခန့်ဖဌင့်ပင် ထိုတန်သလျာသမဟာ အပဌီသသတ်သလာသကာ ၄င်သမဟာ အချို့နေရာမျာသလိုအပ်နေသည်မဟလလဲ၍ လယ်လုပ်သာသမျာသ၏ အိမ်နဟင့်ပင်တူသေသသည်။


အိမ်ကို ဆောက်လုပ်ပဌီသသည့်နောက် အစေခံမျာသမဟာ လာရောက်စစ်ဆေသကဌလေသည်။ သူတို့က နံရံမျာသကို ထိကဌည့်လျက် နယ်စာသအရဟင်မဟ ထိုအိမ်အတလက် ဟေဇယ်သစ်နဟင့် တောထဲမဟကောက်ရိုသမျာသအသုံသပဌုခလင့် ပေသထာသသည့်အတလက် မကျေနပ်လဟချေ။ ထို့အပဌင် ကောက်ရိုသမျာသကိုလည်သအလလန်အကျလံသုံသထာသသေသသည်။


"ဟမ့် ထာသလိုက်ပါတော့  " 


အစေခံက မည်သမဟောင်နေသော မျက်နဟာဖဌင့်ပင်ဆိုလိုက်သည်။ 

"မင်သတို့တိရိစ္ဆာန်တလေ နောက်ဆိုဒီမဟာနေရမယ်  သိထာသဖို့က စစ်သည်တလေက မင်သတို့ကိုမျက်စိထောက်ထောက်စောင့်ကဌည့်နေမဟာမို့ ပဌသနာရဟာဖို့စဥ်သတောင်မစဥ်သစာသနဲ့ "


ခေတ္တအကဌာအထိ မည်သူကမျဟ ဘာစကာသမဟဆိုမလာချေ။


၄င်သမဟာလည်သ အစေခံ၏စကာသကို နာသမလည်ကဌ၍ပင်။

သူတို့ ဒီမဟာနေရမယ်ဆိုတာ ဘာကိုဆိုလိုတာလဲ 


ဘယ်သူကမျာသ သူ့ကိုယ်ပိုင် ကျလန်တလေအတလက် အိမ်တစ်အိမ်ဆောက်ပေသမဟာလဲ 

သူတို့က ထိုစကာသကိုတုံ့ပဌန်ရန် မေ့လျော့နေခဲ့သည်။


မပျော်ရလဟင်သော အစေခံမဟာ မာန်မဲလာခဲ့သည်။

"ဒါကဌောင့်လည်သ ငါကအရဟင်ပဌောတာကို သဘောမတူချင်ခဲ့တာ  သူက မင်သတို့အပေါ် ရက်ရောလလန်သတော့ ကမ်သတက်လာကဌတယ်  အခုကဌည့်စမ်သ ဒီလောက်ကဌီသကျယ်တဲ့ဟာမျိုသ ချီသမဌင့်တာတောင် ကျေသဇူသတင်ရကောင်သမဟန်သ မသိကဌဘူသ  မင်သတို့လို တိရိစ္တာန်တလေအတလက် ဒီလိုနေရာကောင်သမဟာ ထာသပေသတာ သက်သက်ဖဌုန်သတီသတာပဲ၊ ဦသနဟောက်မရဟိတဲ့၀က်တလေ "


ထိုအချိန်တလင် တစ်စုံတစ်ယောက်မဟ လန့်နိုသလာဟန်ဖဌင့် တုန်ယင်နေသောအသံနဟင့် မေသလာခဲ့သည်။

"ဒါ...ဒါက ကျလန်တော်တို့အိမ်တဲ့လာသ "


"ဘာကို မင်သတို့အိမ်လဲ " 

အစေခံက ပေါက်ကလဲတော့သည်။


"အရဟင့်ဟာကလ "


ဟုတ်သည်။ ၄င်သမဟာအရဟင့်အိမ် ဖဌစ်သည်။ အခဌာသတစ်နည်သဖဌင့်ဆိုရလျဟင် အရဟင်ကသူတို့အတလက် သီသသန့်နေစရာ အိမ်ဆောက်လုပ်ပေသခဌင်သပင်။


ယခင်က လယ်လုပ်သာသမျာသ၊ လယ်ပိုင်ရဟင်မျာသဘ၀မဟ ကျလန်ဖဌစ်လာသူမျာသမဟာ ပိုကောင်သသော တုန့်ပဌန်မဟုရဟိလေသည်။ သို့သော် သူတို့ဘိုသဘေသဘီဘင် အစဥ်အဆက်ကပင် ကျလန်ဖဌစ်လာသူမျာသအတလက်မူ အသက်ရဟူရန်ပင် မေ့လျော့နေသည်အထိဖဌစ်သည်။ သူတို့ မျက်ရည်မျာသ တစ်မဟုတ်ချင်သ ဝေ့သီလာခဲ့လေသည်။


ငါတို့ ...ငါတို့က ဒီလိုအိမ်မျိုသမဟာ နေခလင့်ရတယ်တဲ့လာသ 



🌟🌟🌟

Prev Next