MM Story Teller

Chapter 60

Viewers 3k

🌱Arc 2 -[ အလယ်ခေတ်တွင် လယ်စိုက်ခြင်း ]

Ch 60

အောင်မြင်မှုသို့ ပထမဆုံးခြေလှမ်း (၁)

ကျေးကျွန်များမှာ တစ်ဦးကိုတစ်ဦးမှီလျက် ၀မ်းသာလွန်း၍ ငိုကြွေးနေသည်ကို မြင်သောအခါ အစေခံ၏ အမူအယာက ပို၍ကောင်းမွန်လာခဲ့သည်။ နယ်စားမှာအဆုံးရှုံးခံကာ လုပ်ပေးလိုက်ရပြီးပြီဖြစ်၍ အနည်းဆုံး ဤ၀က်နှယ် ကျေးကျွန်များက ကျေးဇူးသိတတ်မှုလေးတော့ ပြသသင့်ပေသည်။

ဤအစေခံ၏ မကျေနပ်မှုကို မဆိုထားနှင့် အခြားအဆင့်နိမ့်အစေခံများပင်လျှင် ထိုသူတို့အား မကျေနပ်ချေ။ သူတို့နေရသောနေရာကား လျှောက်လမ်းတစ်ခုသာခြားလျက် သူတို့တွင်မူ ကိုယ်ပိုင်အခန်းပင် မပါရှိချေ။

ကျေးကျွန်များမှာမူ ကိုယ်ပိုင်အခန်းလည်းရှိကာ

ထိုသူတို့မှာ စံအိမ်ထဲတွင်မနေရသော်လည်း ဤသည်မှာအရှင်မှ သူတို့အားအပြင်ဘက်၌ နေရာစီစဥ်ပေးလိုက်ခြင်းဖြစ်၍ မနာလိုဖြစ်ရန် လုံလောက်နေဆဲပင်။

ထိုနေရာမှာ မိမိတို့နေထိုင်ရမည့်နေရာဖြစ်ကြောင်း သိလျှင် ကျေးကျွန်များမှာ ဆောက်လုပ်ရာ၌ပို၍ပင် ဂရုတစိုက် လုပ်လာကြသည်။ ဤနေရာက သူတို့ ယခင်နေထိုင်ခဲ့ရသောနေရာကဲ့သို့ မဟုတ်ပေ။ ယခင်ကမူ အားလုံးအတူတူ စုပြုံထိုးအိပ်ရကာ ကိုယ်ရေးကိုယ်တာ လျှို့၀ှက်ချက်ဆိုသည်လည်း မရှိပေ။ နေရာတိုင်းတွင် အမှိုက်များကလည်းရှိသေးသည်။

သို့နှင့်သူတို့မှာ သူတို့၏ ကိုယ်ပိုင်တန်းလျားလေးအား စိတ်ပါလက်ပါ ဂရုတစိုက်နှင့် ဆောက်လုပ်ခဲ့ပြီး အပြင်က ရွှံ့နှင့်မံသောအခါတွင်လည်း လေအေးများ မ၀င်လာနိုင်စေရန် တင်းတင်းကြပ်ကြပ်ပင် မွန်းမံကြလေသည်။ ရွှံ့စေးများ ကျစ်လစ်လာစေရန် ပို၍ဖိနင်းပြီး အစိုဓာတ်ကို စုပ်ယူနိုင်ရန်အတွက် တောထဲမှ မြက်ရိုင်းအများအပြားကိုလည်း ခူးခဲ့ကြသည်။ ခြောက်သွေ့နေသော ကောက်ရိုးများက နေရောင်ခြည်၏ရနံ့မျိုးရလျက် အားလုံးအတွက် သက်တောင့်သက်သာရှိသော အိပ်ယာတစ်ခုဖြစ်လာခဲ့သည်။

ထိုကဲ့သို့တန်းလျားတွင် အတူနေထိုင်ကြသော ကျေးကျွန်များမှာ တစ်ဦးနှင့်တစ်ဦး ပို၍ရင်းနှီးလာခဲ့ကြပြီးကိုယ်စီကိုယ်စီလည်း အစုအဖွဲ့လေးများရှိလာကြလေသည်။ စွေ့ချီချောင်းလည်း ထိုသတင်းကိုကြားခဲ့သည်။ ၄င်းမှာ အစုအဖွဲ့ကိုယ်စီဖြင့် မည်သည့်အဖွဲ့က နွားချေးမြေသြဇာမွှေရမည်၊ မည်သူကမြောင်းတူးရမည်ဟူ၍ ခွဲခြားခြင်းပင်။

ကောင်းသည့်အရာက ထိုကျေးကျွန်များမှာ တန်းလျားကို သူတို့၏အိမ်ဟု သဘောထားခြင်းပင်။ ထိုနေရာတွင် နေထိုင်ရင်းပင် တစ်နေ့၌ လွတ်လပ်သော ကိုယ်ပိုင်အိမ်လေးနှင့် နေထိုင်ရဖို့မျှော်လင့်ချက်များလည်း ရှိလာခဲ့သည်။

တစ်ချိန်ကမူ နော်သန်ဘာလန်မှ ကျေးကျွန်များမှာ မည်သည့်မျှော်လင့်ချက်မှ မရှိခဲ့ချေ။ ယခုတွင်မူ သူတို့မမျှော်လင့်ထားသောအရာက အမှန်တကယ်ဖြစ်လာခဲ့လေသည်။

လယ်ထဲမှ လယ်လုပ်သားအချို့လည်း ထိုသတင်းကိုကြားလေသည်။ ၄င်းမှာ ဆောင်းတွင်း၌ အိမ်ထဲတွင် တရေးတမောနားနေချိန်များ၌ လယ်သမားအချင်းချင်း ဆွေးနွေးစရာသတင်းတစ်ခု ဖြစ်လာခဲ့လေသည်။

"ဟို လူအိုကြီးမိုက်ကို မှတ်မိတယ်မလား… အဲဒီသူခိုးလေ၊ သူတို့မိသားစုက ကျွန်တွေဖြစ်သွားတာ အခုတော့ ကိုယ်ပိုင်တန်းလျားမှာ နေနေရပြီ…"

"ဘာ သူက သေမလိုတောင် ကံကောင်းနေရတာလား…

ကျွန်တွေသူခိုးတွေက အခုတော့ ကိုယ်ပိုင်အိမ်နဲ့ နေနေရပြီပေါ့လေ…"

"ငါ့အိမ်ဆောက်တုန်းကဆို နယ်စားစီက ခွင့်ပြုချက်ရဖို့နဲ့ တောထဲကသစ်နည်းနည်းလောက် ရဖို့အတွက် အများကြီးပေးခဲ့ရတာ…"

"ဟုတ်ပါ့ အဲဒီတန်းလျားက ဘာတွေပါပြီး ဘာသစ်တွေနဲ့ ဆောက်ထားလဲမသိဘူး…"

လယ်လုပ်သားများက အဆင့်အတန်းကွာခြားမှုအပေါ် အထူးဂရုထားတတ်ကြသည်။ အရာရှိအရာခံများနှင့် သာမာန်လူများမှာ ကွာခြားသလို၊ လယ်လုပ်သားများနှင့် ကျေးကျွန်များမှာလည်း တူညီသောအဆင့်အတန်းမျိုး မရှိချေ။ ၄င်းတို့က သူတို့ထက် များစွာပိုနိမ့်ကျသည်ပင်။

ထို့ကြောင့် ကျေးကျွန်များမှာ ကိုယ်ပိုင်တန်းလျားနှင့်နေခွင့်ရတော့မည်ဟု ကြားလျှင် သူတို့ မနာလိုမဖြစ်မိဘဲ မနေနိုင်ကြချေ။

ကံမကောင်းသည်မှာ ထိုအဆင့်အတန်း ကွာခြားမှုကြောင့်ပင် နယ်စား၏အမိန့်အား သူတို့ မကျေမနပ်ဖြစ်ပိုင်ခွင့်မရှိချေ။ သူတို့က ထိုကျွန်များ၏ကံကောင်းမှုကို တိတ်တဆိတ်သာ ပြောဆိုနိုင်ကြသည်။ သူတို့မှာအနွေးထည်များ ရခဲ့သော်လည်း ကျွန်များကတော့ နေထိုင်စရာအိမ်များရခဲ့ပေသည်။

......

နော်သန်ဘာလန်၏ ကုန်ဖလှယ်အဖွဲ့မှာ အစားအသောက်လက်ကျန်များနှင့် ရှေ့ဆက်သွားလျက် အက်ဘရုဇ်ဘာ့သို့ ရောက်လာခဲ့လေသည်။ ၄င်းမှာလည်း နယ်စားအုပ်ချုပ်သော မြို့တစ်မြို့ဖြစ်ကာ နယ်နိမိတ်မှာ နော်သန်ဘာလန်ခန့်ပင် မကျယ်၀န်းလှ။ ထို့အပြင် သူတို့တွင်ရှိသော စစ်သည်အရေအတွက်မှာလည်း နော်သန်ဘာလန်ခန့် မများချေ။

ဤနှစ်တွင် အက်ဘရုဇ်ဘာ့၌လည်း သီးနှံအထွက်နှုန်းကျဆင်းကာ အရာရှိများပင်လျှင် ပေါင်မုန့်ကိုနပ်မှန်အောင်မစားနိုင်ချေ။ စစ်သည်တော်များမှာလည်း

တာ၀န်ကို စိတ်ပါလက်ပါ ထမ်းဆောင်ချင်စိတ်မရှိကြတော့ချေ။

နော်သန်ဘာလန်၏ ကုန်ဖလှယ်အဖွဲ့ကို မြင်သောအခါ အခြားနယ်မှ ကျူးကျော်သူများဟုပင် ထင်လိုက်ကြသည်။ သူတို့ ပြတင်းပေါက်နောက်တွင် ပုန်းနေကြလျက် ထွက်မလာကြချေ။

ကျူးကျော်သူများမှာ စောင့်ရသည်ကို စိတ်မရှည်လျှင် သူ့အလိုလိုပြန်ထွက်သွားလိမ့်မည်။ စံအိမ်ထဲမှလူများသည်လည်း ပုန်းခိုနေရင်း အစာရေစာပြတ်လပ်က သေသွားသည်လည်း ဖြစ်နိုင်လေသည်။

ကုန်ဖလှယ်အဖွဲ့မှ လယ်တောထဲမှ အစောင့်တစ်ယောက်ကိုဖမ်းမိလျက် သူ့အားသတင်းပို့စေလေသည်။ သူတို့မှာ ကျူးကျော်ရန် လာခြင်းမဟုတ်ဘဲ မျိုးစေ့ဖလှယ်ရန် လာခြင်းဖြစ်ကြောင်းပင်။

ရေမွန်မှာ ဂျုံစေ့တချို့ကို ထိုအစောင့်အားပြသလျက် သူ၏စကားများမှာ အမှန်ဖြစ်ကြောင်းသက်သေပြလိုက်သည်။

ထိုမျိုးစေ့၏အရည်အသွေးကို ကြည့်ခြင်းအရ ၄င်းမှာ ကျူးကျော်သူများ ဆောင်လာတတ်သော အစာခြောက်များနှင့် မတူချေ။ သူတို့တွင် ထိုမျှ လတ်လတ်ဆတ်ဆတ် ဂျုံစေ့အများအပြားရှိနေပါက သူတစ်ပါးထံမှလုယက်ရန် လိုအပ်မည်မဟုတ်ပေ။

အစောင့်မှာ စံအိမ်ဆီသို့ပြေးလျက် ပြတင်းပေါက်နောက်မှသူများအား သူမြင်ခဲ့သည်တို့ကို အော်ပြောလိုက်သည်။ အက်ဘရုဇ်ဘာ့၏ နယ်စားမှာ ငကြောက်ဖြစ်၍ တစ်ဦးဦးက ရေမွန်နှင့် ဆွေးနွေးနိုင်မည်လားဟု မေးလာလျှင် စစ်သည်များကမူ အသက်မရှိသည့်နှယ် တိတ်ဆိတ်နေခဲ့သည်။

နယ်စားမှာ ရွေးချယ်စရာမရှိတော့ပေ။

"ဒါဆို အစောင့်ကပဲ ဆက်ဆွေးနွေးပြီးတော့ သူတို့ကိုရေမြောင်းနားကို လာခိုင်းလိုက်…"

အစောင့်မှာလည်း ရွေးချယ်စရာမရှ်ိချေ။ သူက လာရာလမ်းအတိုင်းပြန်လျက် သတင်းပို့ရန်သာ တတ်နိုင်လေသည်။

ရေမွန်မှာ သူ၏အဖွဲ့ကိုဦးဆောင်လျက် စံအိမ်နားသို့ ချည်းကပ်လိုက်သည်။ မြှားများဖြင့် ရုတ်တရက်ခြုံခိုတိုက်ခိုက်မှုကို ကာကွယ်ရန် သူတို့တစ်ကိုယ်လုံးဒိုင်းကာများ အပြည့်၀တ်ဆင်ထားကြသည်။ ထိုကဲ့သို့ ကာကွယ်မှုအပြည့်အ၀ လုပ်ပြီးသည်နှင့် ရေမွန်က စံအိမ်အတွင်းဘက်အထိ ကြားရစေရန် အသံမြင့်မြင့်ဖြင့် အော်ပြောလိုက်သည်။

"ကျွန်တော်တို့တွေက နော်သန်ဘာလန်ကပါ… ဒီမှာ သုံးမြှောင့်သီးပင်တွေ စိုက်တယ်လို့ကြားတဲ့အတွက် ကျွန်တော်တို့ရဲ့နယ်စားက သုံးမြှောင့်သီးကိုအရမ်းကြိုက်တာကြောင့် ဂျုံစေ့တစ်ချို့နဲ့ လာပြီးလဲခိုင်းခဲ့တာပါ…"

ထို့နောက်ရေမွန်က ဂျုံစေ့များကို ထုတ်ပြလိုက်သည်။ ထိုနယ်စားက မျက်စိကောင်းလျှင် သူတို့လိမ်ညာနေခြင်းမဟုတ်ကြောင်း မြင်ရလိမ့်မည်။

"စိတ်၀င်စားရင် ကျွန်တော်တို့ဆွေးနွေးလို့ရပါတယ်…"

ထိုအရည်အသွေးကောင်းမွန်သော ဂျုံစေ့များကိုကြည့်ရုံဖြင့်ပင် ဤလဲလှယ်မှုတွင် အက်ဘရုဇ်ဘာ့မှ နယ်စားမှာ အကျိုးအမြတ်ရမည်ဖြစ်ကြောင်း သံသယ၀င်စရာပင် မလိုချေ။ သူတို့က ထိုကုန်ဖလှယ်သည့်အဖွဲ့ကို အခွင့်ကောင်းယူလိုက်လျှင်လည်း ရသလို၊ ထိုဂျုံစေ့များကို သုံးမြှောင့်သီးအနည်းငယ်နှင့်သာ လဲလိုက်လျှင်လည်း ရသေးသည်။ ဂျုံများမှာ ပေါင်မုန့်ပြုလုပ်ရန် အကောင်းဆုံးကုန်ကြမ်းလည်း ဖြစ်သည်။ သို့သော် သူတို့၏ မြေအနေအထားမှာ နော်သန်ဘာလန်ထက် များစွာပို၍ ဆိုးရွားလေသည်။

နယ်စားမှာ စိတ်လှုပ်ရှားလွန်း၍ လူအချို့အား ဂိုထောင်ထဲမှ သုံးမြောင့်သီးစေ့များကို ထုတ်ယူစေကာ ရေမွန်ကိုလည်း ဖိတ်ခေါ်လိုက်လေသည်။ ထို့နောက်တွင် သူ၏စစ်သည်များအားလုံးကို ရေမွန်တို့နှင့် ကုန်ဖလှယ်ခြင်းပြုလုပ်ရန် ခိုင်းလိုက်သည်။

အက်ဘရုဇ်ဘာ့မှ စစ်သည်အရေအတွက်မှ လက်ရှိတွင် သူတို့ထက်များသော်လည်း ရေမွန်တို့၏ နေ့စဥ်စားသောက်နိုင်သော အာဟာရတန်ဖိုးနှင့် အက်ရုဇ်ဘာ့မှစစ်သည်များသည်ကား မယှဉ်နိုင်ချေ။ စွေ့ချီချောင်း၏ အထူးအမိန့်ကြောင့်သာမဟုတ်လျှင် ရေမွန်မှာ ဤလူများထံမှ ထိုသုံးမြှောင့်သီးစေ့များကို လွယ်လွယ်ကူကူပင် လုယက်၍ရလေသည်။

နယ်စားအများအပြားနှင့် လူအများအပြားက သူတို့၏ဂျုံစေ့များကို လောဘတက်လျက် လုယက်လိုခဲ့ကြသော်လည်း သူတို့မှာအသာအယာပင် နှိမ်နင်းနိုင်ခဲ့ပေသည်။

သို့နှင့် နော်သန်ဘာလန်၏ ကုန်ဖလှယ်အဖွဲ့မှာ အက်ဘရုဇ်ဘာ့မှ သုံးမြှောင့်သီးစေ့များကိုယူလျက် နောက်ထပ်ပင်လယ်ကမ်းအနီးရှိ မြို့တစ်မြို့ထံမှ သကြားမုန်လာစေ့များကို ရခဲ့သည်။ ဂျိုးဆက်ပေးသောသတင်းအရ ထိုအပြင်ဘက်နယ်မြေများမှာ လတ်လတ်ဆတ်ဆတ် ဂျုံစေ့များနှင့် ၄င်းတို့၏ကောက်နှံပင်များကို လဲလှယ်လိုသော ဆန္ဒရှိကြကြောင်း သိလေသည်။

ပို၍အံ့အားသင့်စရာကောင်းသည်မှာ နော်သန်ဘာလန်၏ နယ်နိမိတ်အနီးမှာပင် ဂွမ်းပင်၏မျိုးစေ့များကို ရခဲ့ခြင်းပင်။ ၄င်းမှာ နယ်စားအရှင်မှာလိုက်သည်ထဲတွင် မပါ၀င်သော်လည်း နယ်စားအရှင်က ၄င်းတို့ကိုနှစ်သက်မည်မှာ သံသယ၀င်စရာပင် မလိုချေ။

ထိုအချိန်တွင်စွေ့ချီချောင်းမှာ ကျန်ခဲ့သည့်စစ်သည်များအား လယ်လုပ်သားများကို လေ့ကျင့်ပေးစေသည်။

ကုန်ဖလှယ်အဖွဲ့အားလွှတ်လိုက်စဥ်က သူ၏စစ်သည်တို့အား မည်သည့်နေရာမှလာကြောင်းဖုံးကွယ်ရန် မမှာကြားလိုက်ချေ။ သို့နှင့် အနာဂတ်တွင် အချို့နယ်များ၏ ပစ်မှတ်ထားခြင်းကိုလည်း ခံရလာနိုင်သည်ပင်။ သို့နှင့်သူက ကြိုတင်ပြင်ဆင်မှုအချို့ကိုပြုလုပ်ကာ လယ်လုပ်သားများအား လေ့ကျင့်စေခြင်းပင်။ ဤခေတ်၏ စစ်ပွဲဖြစ်ပွားနှုန်းကို တွက်ဆကြည့်ပါက လယ်လုပ်သားများကသာ တိုက်ခိုက်နိုင်စွမ်းရှိခဲ့လျှင် အနာဂတ်တွင် လာရောက်ကျူးကျော်မှုများကို စိတ်ပူနေစရာလိုတော့မည် မဟုတ်ချေ။

ဤလူများထဲမှ အချို့မှာ သူခိုးများဖြစ်ခဲ့ကြဖူးသည်။

အဓိပ္ပါယ်မှာ သူတို့ကလေ့ကျင့်ရေးတွင်ပို၍ ရလဒ်ကောင်းတွေ ရှိသင့်လေသည်။ သို့သော် အစေခံများမှာ ထိုကျွန်အသစ်များကို စိုးရိမ်နေကြဆဲပင်။ စွေ့ချီချောင်းသည်လည်း ထိုလူများအပေါ်လုံး၀ယုံကြည်မှု မထားသင့်သေးဟု တွေးလိုက်မိလေသည်။

လယ်လုပ်သားများ အကြားတွင်မူ စွေ့ချီချောင်းက နာမည်ကြီးလေသည်။ လူတိုင်းက သူ့ကို လေးစားကြပြီး အကောင်းဆုံးသော နယ်စားအရှင်ဖြစ်ကြောင်း အမွှန်းတင်ကြသည်။ သူတို့က နယ်စားထံမှ သေးသေးမွှားမွှား ရံဖန်ရံခါ ချီးမြှောက်ခြင်း ခံရတတ်သည့် ကျေးကျွန်များကိုလည်း မနာလိုကြကာ သူတို့၏ သစ္စာစောင့်သိမှုကိုလည်း နယ်စားမင်းထံပြသရန် အလွန်ပင် ကြိုးစားနေကြတော့သည်။

ထိုကဲ့သို့ စစ်ရေး လေ့ကျင့်မှုမျိုးက တစ်နယ်နှင့်တစ်နယ် မတူညီကြချေ။ အများစုမှာ လွတ်လပ်သော လယ်သမားများကို ရွေးချယ်တတ်ကြပြီး ၄င်းတို့မှာ လယ်လုပ်သားများထက်ပို၍ ကောင်းမွန်သောဘ၀တွင် နေရကာ ပို၍ကြံ့ခိုင်သည်ဟု ထင်၍ပင်။

လူတိုင်းအတွက် လက်နက်ချပေးရန် မလုံလောက်သဖြင့် သစ်သားတုတ်များ၊ လယ်ပစ္စည်းများကိုသာအသုံးပြု၍ လေ့ကျင့်ရသည်။ ဤခေတ်တွင် သံရှား၍ အ၀တ်သားဒိုင်းကာပင်လျှင် မရှိချေ။

စွေ့ချီချောင်းမှာ တရုတ်ပြည်၏ ရှေးစစ်ပွဲသမိုင်းများအရ ကြိမ်ဒိုင်းကာများကို အသုံးပြုသင့်ကြောင်း တွေးနေမိလေသည်။ သူက တောထဲမှ သင့်လျော်သော နွယ်ပင်တုတ်တုတ်များကို ရှာစေလျက် ဒိုင်းအဖြစ် ယက်လုပ်စေသည်။ ထိုလက်လုပ်ကြိမ်ဒိုင်းကာများမှာ ပုံမှန်မြှားနှင့်ဓားတို့၏ တိုက်ခိုက်မှုကိုကာကွယ်နိုင်သလို ကုန်ကျစရိတ်မှာလည်း သံဒိုင်းကာတို့ထက် နည်းပါးလွန်းသည်။

စစ်သည်တော်များပင်လျှင် ထိုကြိမ်ပင်ဒိုင်းကာများကိုစိတ်၀င်စားလေသည်။ သူတို့မှာ ဒိုင်းကာတစ်ခုဆုံးရှုံးလိုက်ရတိုင်း အသဲကွဲသွားသည့်နှယ် ခံစားရတတ်သဖြင့် ထိုကြိမ်ဒိုင်းကာများမှာ ပုံစံက မသားနားလှသော်လည်း လေ့ကျင့်ရာတွင်သုံးရန် သင့်တော်လှသည်။

သူတို့၏လေးလံသော ဒိုင်းကာများထက်စာလျှင် ၄င်းတို့ကပိုမိုပေါ့ပါးကာ လေ့ကျင့်ရေး၏အရှိန်ကိုလည်း တိုးမြှင့်နိုင်လေသည်။

လယ်လုပ်သားများကို မဆိုထားနှင့် စစ်သည်တော်များပင်လျှင် စစ်ရေးပြမှုကို ကျကျနနမလုပ်နိုင်ချေ။ စွေ့ချီချောင်းမှာ ဘေးတွင်ထိုင်လျက် အခြေခံအကျဆုံးပုံစံအား သူတို့အတူတကွ လှုပ်ရှားကာလေ့ကျင့်နေကြသည်အား ကြည့်နေမိသည်။

အစေခံတစ်ယောက်ကမူ ရှားရှားပါးပါး ခေါင်းညိတ်လျက်ချီးကျူးလာလေသည်။

"အဲဒီကြိမ်ဒိုင်းကာတွေကိုသုံးပြီး သူတို့ရဲ့လှုပ်ရှားမှုတွေ သွက်လက်လာပြီး ညီညာနေလိုက်တာ… တကယ်ကို ခွန်အားပြည့်၀လှပါပေတယ်…"

ညီညာတယ်၊ ခွန်အားပြည့်၀တယ် ဟုတ်လား…

စွေ့ချီချောင်းကမူ ထိုအစေခံက သူ့အား လာနောက်နေသည်ဟုပင် ထင်မိသည် ။ ထိုညီညာလှပါသည်ဟူသော လှုပ်ရှားမှုများသည်ကား မူကြိုကလေးများ ရေဒီယို လေ့ကျင့်ခန်းလုပ်ခြင်းလောက် ပုံစံကျမနေချေ။

🌾🌾🌾

Prev Next