MM Story Teller

Chapter 11

Viewers 6k

Chapters 99

🧝Chapter 11

ရန်သာ့လန်ကသူမအားကတိပေးထားသော

ငွေတွဲများကိုသတိရလိုက်လျှင် သူမ၏ရင်ထဲမှနေသာသွားလျက် အတွေးတို့မျက်လုံးတွင်မပေါ်မိစေရန် မျက်လွှာချလိုက်သည်။

ဘာပဲဖြစ်ဖြစ်သည်မိသားစုကိုပေးသိ၍မဖြစ်ပေ။

ထိုအချိန်တွင်အိမ်ကိုပြန်ရောက်လာသောမြောင်ဟယ်ကတော့သူ့ကိုယ်သူအားမလိုအားမရဖြစ်နေမိသည်။

ထိုကောင်းကင်ပေါ်ပျံသွားတော့မည့်ငွေခြောက်တွဲအတွက်သူ့မှာတာ၀န်အပြည့်ရှိသည်ပင်၊

သူ၏လက်ထဲတွင် မှော်ဆန်သောမြေဆီသြဇာရှိနေသော်လည်း သုံးစရာငွေတွဲတော့မရှိချေ။ ထို့အပြင်သူစိုက်ပျိုးထားသောအသီးအရွက်များကိုရောင်းရန်မှာလည်း လ၀က်ခန့်အချိန်ယူရပေလိမ့်မည်၊

သူနောက်မှကောငယ်၏မျက်နှာမှာ ညှိုးငယ်နေသည်ကိုမြင်သောအခါ သူကအိပ်ခန်းထဲသို့တိုက်ရိုက်၀င်လိုက်ပြီး မြေအိုးကိုလှမ်းယူလိုက်သည်၊ ထိုမြေအိုးကိုလှန်လိုက်တော့ အထဲမှကြေးပြားအနည်းငယ်ထွက်လာခဲ့လေသည်၊

"ကိုယ့်လက်ထဲမှာလည်းပိုက်ဆံရှိပါသေးတယ်"

သူက တော၀က်ရောင်း၍ရလာသော ငွေကိုဆွဲထုတ်လာခဲ့သည်။

မနေ့ကဖမ်းမိလာသော တော၀က်ကလေးမှာ ဒဏ်ရာကြီးကြီးမားမားမရှိသလောက်နည်းကာ ရှားပါးသော သားကောင်လည်းဖြစ်သည်မို့ သူက သားကောင်များကို အသင့်တော်ဆုံးစျေးဖြင့်ရောင်း၀ယ်လေ့ရှိသည့်

မြို့၏မြောက်ဘက်ပိုင်းကိုသွားရောင်းခဲ့လေသည်။

သို့နှင့် ကြက်နှစ်ကောင်နှင့် ရန်သာ့လန်၀ယ်လာခဲ့သည့် ဂျုံမှုန့်တစ်ထုပ်ဖိုးကိုဖယ်လိုက်လျှင်ပင် တော၀က်ကလေးမှာ ငွေနှစ်တွဲခန့်ဖြင့်ရောင်းချနိုင်ခဲ့သည်မှာအသိသာပင်။

သို့နှင့်စုစုပေါင်းလိုက်ပါက ရန်သာ့လန်လစဥ်ရှာဖွေနိုင်စွမ်းမှာ ငွေနှစ်တွဲမှသုံးတွဲအထိရှိလေသည်၊ သို့ဆိုပါလျှင်ဤလအတွက်လျော်ကြေးငွေတစ်တွဲကိုပေးချေနိုင်လိမ့်မည်၊

သို့သော် ၄င်းကမြောင်ဟယ်အားစိတ်သက်သာရအောင်မလုပ်ပေးနိုင်ချေ၊အဆုံးမှာတော့သူကရန်သာ့လန်ကြိုးစားရှာဖွေမှုများကို ဂုတ်သွေးစုပ်နေသော မျှော့တစ်ကောင်သာလျှင်ဖြစ်နေသေးကာ အကြွေးများလည်းတင်နေသေးသည်။

သို့သော်တကယ်တမ်းတွင် ရန်သာ့လန်၏၀င်ငွေမှာ ထိုမျှမဆိုးရွားခဲ့ပါချေ။ ယခင်ကသူ၏မိခင်နာမကျန်းမှုကိုကုသရန်ငွေများစွာကုန်ခဲ့သည်၊ သူအမဲလိုက်ခြင်းတစ်ခုဖြင့်ပင်အကြွေးများကိုပေးနိုင်ခဲ့သေးသည်၊ သို့သော် ဆောင်းရာသီကရောက်လာခဲ့ကာ

နှင်းများထူထပ်စွာကျဆင်းမှုကြောင့် သူလည်းတောင်ပေါ်သို့မသွားရဲခဲ့ပေ၊ သို့နှင့် အခြေအနေကပို၍ဆိုးသွားကာ ထိုတောအတွင်း ရှင်သန်နိုင်ရန် ငွေပြားတချို့ချေးယူ၍နေထိုင်ခဲ့ရလေသည်၊

ယခုတော့နွေဦးရာသီကိုရောက်လာချေပြီ၊

တောကောင်ငယ်များမှစ၍ အကောင်းကြီးများအထိ ပုံမှန်ပြန်လည်တွေ့ရှိရတော့မည်၊ ရန်သာ့လန်သည် တောင်ပေါ်သို့ အကြိမ်အနည်းငယ် ကြိုးကြိုးစားစားတက်၍သားကောင်ရှာဖွေသင့်ကြောင်း တွေးနေခဲ့သည်။

"တောင်ပေါ်ကို အမဲလိုက်ထွက်ဖို့မဟုတ်ပဲ ၊ ဆေးဖက်၀င်ပင်တွေသွားရှာမလို့စီစဥ်နေရုံပါ၊ အရေးမကြီးပါဘူး"

ဆေးဖက်၀င်အပင်တွေ..

မြောင်ဟယ်၏ခေါင်းကဆတ်ခနဲမော့လာခဲ့သည်။

"ခင်များဆေးဖက်၀င်အပင်တွေကိုခွဲခြားနိုင်တယ်ပေါ့"

"ဦးလေးလင်းက အမဲလိုက်ထွက်တိုင်း ကိုယ့်ကိုအမြဲမှာနေကျမို့ ဆေးပင်တွေနဲ့ရင်းနှီးပါတယ်"

"ဒါဆို ကျွန်တော်လည်းလိုက်ခဲ့မယ်၊ အတူသွားရှာကြတာပေါ့" ဒီလိုဆိုလျှင် ဆေးဖက်၀င်အပင်များကိုလည်း တူးယူလာပြီး အထူးမြေဆီလွှာတွင်စိုက်ပျိုးနိုင်လောက်သည်။သူပြန်ရောက်လာပြီး ထိုအပင်များကို လစ်ရင်လစ်သလိုဂရုတစိုက်စိုက်ပျိုးပြီးနောက် ရန်သာ့လန်မသိအောင် ခိုးပြီးလည်းရောင်းထုတ်နိုင်မှာပင်

ရန်သာ့လန်မှာ ခွင့်မပြုလိုသဖြင့်မျက်မှောင်ကျုံ့မိသော်လည်း ကောငယ်လေး၏ တောက်ပနေသော မျက်၀န်းများကိုမြင်လျှင် ပြောမထွက်တော့ပြန်ချေ။

သို့နှင့်ခေါင်းကိုသာငြိမ့်လိုက်ရလေသည်။

"ရက်နည်းနည်းပဲစောင့် ခေါ်သွားပေးမယ်"

ကျေနပ်သွားသော မြောင်ဟယ်၏မျက်၀န်းများမှာ

လခြမ်းကွေးလေးများအဖြစ် ကွေးတက်သွားသည်အထိ ချိုမြိန်စွာပြုံးလျက်ပင်၊ ညစာကိုပြင်ဆင်ရန်မီးဖိုချောင်ထဲသို့ပျော်ပျော်ရွှင်ရှင်ဖြင့်၀င်သွားတော့သည်။

၄င်းကြောင့်ပင်နောက်ဖေးကွက်လပ်မှာလည်း အနည်းငယ်ပြောင်းလဲသွားလျက် ကြက်ခြံကလေးပါရှိလာခဲ့သည်။ လောလောဆယ်တော့ ထိုကြက်ခြံထဲတွင် ကြက်မသုံးကောင်နှင့် အထီးနှစ်ကောင်သာလျှင်ရှိသေးလေသည်။မြောင်ဟယ်မှာ ယခုချိန်အထိတော့ထိုခြံထဲမှကြက်ဥတစ်လုံးမှမကောက်နိုင်သေးသော်လည်း သိပ်မကြာခင်တော့ရလိမ့်မည်ဟုယုံကြည်နေခဲ့သည်။သူစိုက်ပျိုးသောအရွက်တချို့ကို ထိုကြက်များကိုလည်းကျွေးမွေးသည့်အပြင် သာ့ပိုင်သည်လည်းထိုအရွက်များကို အတော်ကြိုက်နှစ်သက်လေသည်။

ရက်တချို့ကြာပြီးနောက် အထူးမြေဆီသြဇာကိုအခြေခံလျက် မြောင်ဟယ်က အပင်မျိုးစိတ်အသစ်များစိုက်ပျိုးရန်လုပ်ခဲ့သည်၊ ရန်သာ့လန်ကတော့ မြောင်ဟယ်အတွက် အလုပ်ပို၍ကြိုးစားနေပုံပင်၊

ရက်အနည်းငယ်ခန့်က ရန်သာ့လန်နှင့်အတူ တစ်ခြားမုဆိုးအများကြီးအမဲလိုက်ထွက်သွားကြသေးသည်၊

တောအရမ်းမနက်သော်လည်း ကံကောင်းစွာသားကောင်တချို့ကိုတော့မိလာခဲ့ကြသည်။သို့သော် တော၀က်လိုမျိုးအရမ်းစျေးကောင်းရသော အကောင်မျိုးတွေတော့မပါခဲ့ချေ။ တောကြက်ဖများနှင့် တောယုန်ကြီးတချို့သာလျှင်မိခဲ့သည်။

သာ့ပိုင်မှာလည်းယခုဆိုလျှင် သူ၏လက်ဖ၀ါးထက်ပင်ကြီးလာပြီဖြစ်ကာ လမ်းအနည်းငယ်စလျှောက်လာသည်နှင့် မြောင်ဟယ်ကိုသာတချိန်လုံးကပ်တွယ်နေတော့သည်။တောင်ပေါ်သို့သွားမည့်နေ့တွင်မြောင်ဟယ်ကအရွက်နုများနှင့် ရေများကိုပြင်ဆင်ထားခဲ့သည်၊၄င်းတို့ကို ခြင်းတောင်းထဲတွင်ထည့်လျက် သာ့လန်နှင့်အတူထွက်ခွာလာကြတော့သည်။

လမ်းခရီးတွင် ရန်သာ့လန်ကမူခြင်းတောင်းအကြီးတစ်လုံးကိုလွယ်ထားခဲ့ကာ၊ မြောင်ဟယ်ကတော့အသေးတစ်လုံးကိုဆွဲထားခဲ့သည်၊ သို့သော်တောင်ပေါ်သို့၀င်ခါနီးတွင် မြောင်အာနှင့်မတော်တဆဆုံကြလေသည်။

မြောင်အာကမည်သူဖြစ်မည်နည်း

သူကအလုပ်ကိုလက်ကြောတင်းအောင်မလုပ်ပဲ လူတကာ၏အတင်းအဖျင်းပြောရသည်ကိုနှစ်သက်ကာ ပြောလျှင်လည်း သူတစ်ပါး၏ဒဏ်ရာနှင့် အားနည်းချက်ကိုမှဖိပြောတတ်သောပါးစပ်မျိုးရှိသူပင်

"ဟေး ဒါကသာ့လန်မလား၊ ၀ါး. ..ရှားရှားပါးပါးပဲ မြောင်ဟယ်လည်းပါတယ်ပေါ့ တောင်ပေါ်သွားကြမလို့လား"

ရန်သာ့လန်က တုန့်ပြန်သံတိုးတိုးသာပြုလျက်ပြန်ဖြေလိုက်သည်။

မြောင်အာမှာ နိမ့်ကျပြီး သွားပုတ်လေလွင့်ပြောတတ်သော ပါးစပ်တစ်ခုရှိလေသည်၊

"အရင်ကတည်းကဒီလိုဖြစ်ရမှာ၊ မဟုတ်ရင်လူတွေက ကောင်လေးက ခြံထဲမှာရှိသေးလား ထွက်ပြေးသွားပြီလား ဘယ်ပြေးသွားပြီလဲ သို့လောသို့လောဖြစ်နေရတယ်လေ၊ အခုလိုအတူလိုက်လာတော့ကူဖော်လောင်ဖက်လည်းရတာပေါ့ မဟုတ်လား"

ရန်သာ့လန်ကအချေအတင်မဖြစ်လို၍ နှုတ်ဆိတ်နေရန်သာရွေးချယ်ခဲ့ပါသော်လည်း မြောင်အာကမူသူ၏မြင်းပါးစပ်ကိုဆက်လက် ဖွင့်နေခဲ့သည်။

"မင်းရောပဲ အစ်ကိုဟယ် မင်းဘေးကဒီလူကမင်းသိထားတာနဲ့အတော်လေးကွဲတယ်၊ မင်းသူ့ကိုရင်ထဲအရမ်းကြီးသွားမထည့်ထားနဲ့ဦး၊ ငါပြောတာသိလား"

မြောင်အာပြောပြီးသည်နှင့် ရန်သာ့လန်မှာခြင်းတောင်းထဲမှ ထက်မြနေအောင်သွေးထားသော တံစဥ်ကိုဆွဲထုတ်လာခဲ့သည်၊ ၄င်းကိုမြင်သည်နှင့် မြောင်အာမှာ ကြောက်ရွံ့မှုကြောင့်ထခုန်မိတော့မတက်ပင်၊

"မင်း..အဲဒီဓါးကဘာလုပ်မလို့လဲ"

"လမ်းခရီးမှာပေါင်းပင်တွေတအားများနေရင်ရှင်းရအောင်လို့"

မြောင်အာကခြောက်ကပ်ကပ်ရယ်မောလျက်ပင်"ဒါဆိုမင်းဂရုစိုက်မှရမယ်၊ အဲဒီလိုနဲ့တခြားလူကိုထိခိုက်မိစေရင်၊ ရွာအကြီးအကဲဆီမှာရှင်းပြရခက်နေဦးမယ်" ရွာသူကြီးကိုစကားထဲထည့်ပြောလာသည်မို့ သူကအတော်လေးကြောက်နေသည့်ပုံပင်၊

ဂရုစိုက်ပုံပင်မပေါ်ပဲ ရန်သာ့လန်ကပြန်ဖြေလာသည်၊

"ကျွန်တော်သိပါတယ်၊ သတိပေးလို့ကျေးဇူးတင်ပါတယ်"

မြောင်ဟယ်ကမူတချိန်လုံးတိတ်ဆိတ်နေခဲ့သည်။

ရွာသားများကရန်သာ့လန်အားဤကဲ့သို့စကားများမကြာခဏပြောခဲ့ဖူးကြလိမ့်မည်ဖြစ်ကြောင်းသူတွေးမိနေခဲ့သည်၊သူကိုယ်တိုင်ကတော့ အိမ်နံရံကြားတွင်ပုန်းအောင်လျက်ဤကဲ့သို့ပြင်းထန်သော ေ၀ဖန်စကားများကိုမခံစားခဲ့ရဘဲ အပြင်၌ဘာတွေဖြစ်နေမှန်းမသိခဲ့ချေ။ မြောင်ဟယ်၏ရင်ထဲမှ အပြစ်ရှိစိတ်တို့လှိုက်တက်လာခဲ့သည်။

သို့ပေမယ့်လည်းဒါကြောင့်နှင့်တော့ မချစ်မနှစ်သက်သူနှင့်သူ၏ဘ၀ကိုချည်နှောင်မခံရသင့်ပေ။

ထို့ကြောင့်အနာဂါတ်တွင်သူတို့အတွက်လွယ်ကူစေရန်သူနည်းလမ်းတစ်ခုစဥ်းစားပေးသင့်သည်။

မြောင်ဟယ်ကပါးစပ်ကိုဟလျက် ဆိုလာသည်၊

"ဦးလေးမြောင်ပြောသလိုပဲ လူငယ်တွေကဘ၀မှာ ဆုံးဖြတ်ချက်မှားတာကြောင့်အမှားတွေလုပ်မိတတ်ကြတယ်၊ဒါပေမယ့်နောက်ဆုံးမှာ အမှားကိုပြင်ပြီးအမှန်တကယ်ပြောင်းလဲသွားခြင်းကသာ အရေးကြီးတာမလား"

မြောင်အာမှာသူ့ကိုယ်သူပြောနေသည်ဟုထင်လျက် မရေမရာဆိုလာသည်၊ " ဒါပေါ့"

မြောင်ဟယ်ကနာနာခံခံဖြင့်ပင်ခေါင်းငြိမ့်လိုက်လျက်

"ဒါဆို နားလည်ပေးလို့ဦးလေးမြောင်ကိုကျေးဇူးတင်ပါတယ်၊ သွားကြစို့သာ့လန်၊ အပင်တွေအကုန်ရှာဖို့အချိန်မမီပဲနေဦးမယ်"

ပြောပြီးနောက်သူကတံစဥ်ကိုင်ထားသောရန်သာ့လန်၏လက်ကိုလှမ်းဆွဲကာကိုင်ထားလိုက်လေသည်။

ထိုအပြုအမူက ရန်သာ့လန်ကိုခတ္တမျှအေးခဲသွားစေသော်လည်း သူ့ကိုယ်သူတည်ငြိမ်အောင်ထိန်းချုပ်လ်ုက်မိသည် ၊ မြောင်အာထံခေါင်းတစ်ချက်ငြိမ့်ပြပြီးသည့်နောက်တွင် မြောင်ဟယ်ဆွဲခေါ်ရာနောက်တောင့်တောင့်ကြီးသာပါသွားတော့သည်။

မြောင်အာမှာခေါင်းကိုဖိကိုင်လျက်နောက်တွင်ကျန်နေရစ်လေသည်

"နားလည်တယ်ဟုတ်လား ဘာကိုနားလည်တာလဲ၊ ဖြစ်နိုင်တာက မြောင်ဟယ် ငြင်းဆန်ရတာကိုလက်လျော့လိုက်ပြီး ရန်သာ့လန်နဲ့အတူရှိဖို့ဆုံးဖြတ်လိုက်ပြီလား၊ ဒါမှမဟုတ်လှည့်ကွက်အသစ်တွေထပ်သုံးနေတာလား"

မြောင်အာထံမှထွက်ခွာလာပြီးနောက် တစ်နာရီခန့်အကြာတွင် တောင်ပေါ်သို့စတင်တက်ကြတော့သည်

တောင်ကတဖြည်းဖြည်းပို၍မတ်လာကာ အပေါ်သို့တရွေ့ရွေ့တက်နေရင်း ခဏခဏရပ်ကာ မနားရပဲမနေနိုင်ချေ။ မြောင်ဟယ်မှာ သူလိုက်လာခြင်းကရန်သာ့လန်အတွက် ၀န်ထုပ်၀န်ပိုးသာဖြစ်လိမ့်မည်ဟုကြိုတော့သိထားခဲ့သည်၊သို့နှင့်သူတို့ထွက်လာကတည်းက ရန်သာ့လန်အားတောင်ပေါ်၌ ဆေးဖက်၀င်အပင်များနှင့် သစ်သီးများကိုသာရှာဖွေစုဆောင်းမည်ဟုကြိုပြောထားခဲ့သည်။တောင်ပေါ်တွင် အသီးအရွက်များထက်ပိုတန်ဖိုးရှိသော အပင်မျိုးစိတ်များရှိနေမည်လား ရှာဖွေကြည့်ချင်၍ပင်၊

ရန်သာ့လန်မှာ ကောငယ်လေး၏ယုံကြည်မှူများကိုမဖျက်ဆီးလိုက်ချင်ပေ။ ထိုကဲ့သို့ ပြန်စိုက်၍ရနေပါကကျန်လူများသည်လည်းအရင်ကတည်းကစိုက်ပျိုးနေခဲ့လောက်ပြီဖြစ်သည်၊ထိုသို့သာဆိုလျှင်ဤခရီးကိုလာစရာလည်းမလိုချေ၊ သို့သော်လည်းဤခရီးမှာ အိမ်မှာသာအမြဲနေရသောကောငယ်လေးကိုလည်းအပျင်းပြေစေသေးသည်။

သူသာရွာထဲလမ်းထွက်လျှောက်လျှင် ရွာမှလူများက သူမကြားလိုသောစကားများလာပြောသည်ကိုလည်းခံနေရဦးမည်၊ ယခုကဲ့သို့တောင်ပေါ်သို့လမ်းလျှောက်ထွက်ရသည်ကရွေးချယ်မှုကောင်းပင်၊

ကောငယ်လေးကမြောင်အာ၏ရှေ့တွင်ပြောရဲမည်ဟုမထင်ထားခဲ့ရုံသာဖြစ်သည်။

ဒဏ်ရာကြီးကြီးမားမားရပြီးကတည်းက ကောငယ်လေး၏ ပြုမူပုံနှင့် သဘောထားများမှာ ရုတ်ချည်းပြောင်းလဲသွားပုံပင်၊

မြောင်ဟယ်၏ခေါင်းထဲမှအတွေးများကိုမူလကရန်သာ့လန်သိပ်စိတ်မ၀င်စားခဲ့ချေ၊သူကဤလူအားစောင့်ရှောက်ပေးနေခဲ့သည်မှာလည်းအကြောင်းရှိ၍သာ၊သို့သော် သူတို့၏ဆက်ဆံရေးကတဖြည်းဖြည်းတိုးတက်လာခဲ့သောအခါတွင်တော့ ကောငယ်လေးရုတ်တရက်စိတ်ပြောင်းသွားသည်ကို သူစိတ်မပူပဲ အဘယ်မှာနေနိုင်လိမ့်မည်နည်း။

သူ၏ရင်ထဲမှမီးတောက်များမှာ ကောငယ်လေး၏ချိုမြိန်သောအသံလေးအောက်တွင်ငြိမ်းသတ်ခံလိုက်ရသည်၊

" အဲဒီအသီးကစားလို့ရလား"

ရန်သာ့လန်မှာ မြောင်ဟယ်ညွှန်ပြသောနေရာကို အလျင်အမြန်လှည့်ကြည့်လိုက်လေသည်။

၄င်းမှာ ခြုံပက်များကြားမှာ အစက်လေးများပါရှိသည့်အနီရောင်အသီးများဖြစ်သည်။ ရန်သာ့လန်ကခေါင်းခါလိုက်သည်။

"ဒါက မြွေဘယ်ရီသီး၊ အားရှိစေတဲ့ဟာ၊

မင်းစားလို့မရဘူး"

"ဆေးဖက်၀င်တယ်လား" မြောင်ဟယ်သည်လည်း

အပင်နားကိုလျှောက်သွားလျက် စတင် တူးဖော်လိုက်တော့သည်၊

"စျေးရောကြီးလား"

"တောင်ပေါ်မှာအများကြီးရှိတာမို့ စျေးတော့မကြီးဘူး"

"ကိစ္စမရှိပါဘူး နည်းနည်းပဲတူးမှာပါ"

မြောင်ဟယ်မှာ မြေကြီးကိုနက်နက်တူး၍အမြစ်ကနေဂရုတစိုက်ဆွဲနှုတ်လိုက်သည်၊ ဤနည်းဖြင့် အစေ့ကြွေသည်အထိစောင့်စရာမလိုပဲ တိုက်ရိုက်စိုက်ပျိုးနိုင်လေသည်။

သူ့အားတားမြစ်ခြင်းမရှိပဲ ရန်သာ့လန်မှာ ပတ်၀န်းကျင်ကိုတချက်စူးစမ်းလိုက်ကာရုတ်တရက်သူကလက်ကိုမြှောက်လျက်ညွှန်ပြလိုက်သည်။

"အဲလိုအသီးတွေကစားလို့ရတယ်၊ ချိုတယ်"

သြော် ရက်စ်ဘယ်ရီတွေပဲ ..

နေပါဦး

"ဒီအသီးတွေကိုရက်စ်ဘယ်ရီလို့ခေါ်တယ်၊ ဆေးဆိုင်တွေကလည်း၀ယ်ကြတယ်" ရန်သာ့လန်မှာ မြောင်ဟယ်၏နည်းလမ်းအတိုင်းအမြစ်ကနေတူးထုတ်လိုက်သည်။ ကောငယ်လေးက အပင်များကိုအိမ်သို့သယ်ကာစိုက်ပျိုးချင်ခဲ့ကြောင်းမမေ့ပေ၊

တစ်စုံတစ်ခုကိုတွေးမိလျက် မြောင်ဟယ်၏နှုတ်ခမ်းတို့တွန့်ကွေးသွားခဲ့ရသည်။

"ကျွန်တော်သိတယ်၊ မြုံနေတဲ့သူတွေကိုကုဖို့သုံးတာမလား"

တချိန်ကလည်း ရက်စ်ဘယ်ရီအကြောင်းထိုသို့သတင်းများ အင်တာနက်ပေါ်တွင်ပျံ့နှံ့နေခဲ့ဖူးသည်။

မှန်မမှန်ကတော့ သူကိုယ်တိုင်လည်းမကြုံဖူးတော့မသိချေ။

ရန်သာ့လန်မှာ ခတ္တမျှတန့်သွားခဲ့သော်လည်း မည်သည်မျှမဆိုခဲ့ချေ။

"အိမ်ပြန်ရောက်ရင် စိုက်ထားလိုက်မယ်၊ ခင်များစားချင်စားလို့ရတာပေါ့" မြောင်ဟယ်ကရယ်မောလျက်ဆိုလိုက်သည်။

၀န်ခံရပါလျှင် သည်လိုပြောခဲ့သည်မှာ ဟာသသဘောဖြင့်သာဖြစ်သည်။ယောကျာ်းလေးများအတူရှိချိန်တွင်ဤကဲ့သို့ဟာသမျိုးမပြောပဲနေရန်မဖြစ်နိုင်ချေ။ သို့သော် မြောင်ဟယ်မေ့သွားသည်က သူကကောတစ်ယောက်ဖြစ်နေပြီဆိုတာကိုပင်၊

၄င်းကိုကြားတော့ ရန်သာ့လန်၏စိတ်အစဥ်မှာတင်းကြပ်သွားခဲ့သည်။

၄င်းကိုသတိမထားမိသော မြောင်ဟယ်မှာတော့ မြွေဘယ်ရီနှင့်ရက်စ်ဘယ်ရီပင်များကိုတူးထုတ်ကာအလုပ်များနေပြီး၊ ရန်သာ့လန်ကိုပင်အမြန်လုပ်ရန်

ဆော်သြလိုက်သေးသည်။

တောင်ပေါ်ရှိရာသီဥတုမှာ မြေပြန့်ပေါ်တွင်ရှိနေစဥ်ကထက် အေးစိမ့်နေပြီး သစ်ပင်တို့နှင့်ရောနှောနေသော မြေသင်းရနံ့များကကောင်းမွန်လှသည်။ နေရောင်ခြည်က ထူထဲသော သစ်ကိုင်းများကြားမှဖြာကျနေပြီး ရွှေရောင်အလင်းတန်းများနှယ်တောက်ပနေကာ တောအုပ်တစ်ခုလုံးကိုနွေးထွေးစွာ လွှမ်းခြုံထားခဲ့သည်။

မော်ဒန်ခေတ်ကမ္ဘာမှယောကျာ်းတစ်ဦးဖြစ်သူမြောင်ဟယ်ကတော့လွန်စွာတက်ကြွနေလျက် မြင်မြင်သမျှကိုလက်ညှိုးထိုးကာတူးထုတ်ယူငင်နေတော့သည်။

နေ့လည်ခင်းရောက်သော် မြောင်ဟယ်မှာ အိမ်မှပြင်ဆင်လာခဲ့သော မုန့်များကို ထုတ်ယူလိုက်သည်။ ရန်သာ့လန်အားတချို့တ၀က်ကိုကမ်းပေးလိုက်လျက်သူကိုယ်တိုင်လည်းအမောပြေစေရန် ရေအေးကိုမော့သောက်လိုက်သည်။စားသောက်ပြီးသည့်နောက် ရန်သာ့လန်ကသူ့အား တောင်ပေါ်စမ်းချောင်းလေးထံခေါ်သွားပေးခဲ့သည်။

မြောင်ဟယ်မှာ ဤကမ္ဘာကသာလျှင်အစစ်အမှန်ရတနာဟုပင်ခံစားလိုက်ရသည်၊ လူတို့ထိခိုက်ဖျက်ဆီးခြင်းမရှိသေးသည့် သဘာ၀၏အလှအပများမှာ ရင်သပ်ရှုမောဖွယ်ပင်၊အသက်ရှူရသော လေထုပင်လျှင်ပို၍ သင်းပျံ့ကာ အစွမ်းများပြည့်၀နေသည့်နှယ်

အနားယူနေစဥ်အတွင် မြောင်ဟယ်မှာ တူးလာသောအပင်တို့ကိုစစ်ဆေးလိုက်သည်။ သူတို့မှာ ရက်စ်ဘယ်ရီ၊ မြွေဘယ်ရီ၊ ထို့နောက်အသစ်ထပ်တွေ့သော မူးလ်ဘယ်ရီတိုအပါအ၀င် စုစုပေါင်းအပင်မျိုး တစ်ဒါဇင်ကျော်ခန့်ထိရှာတွေ့လာခဲ့ပြီဖြစ်သည်၊

၄င်းအပြင်ကို အသီးမသီးသေးသော စပျစ်နွယ်များနှင့် သလဲသီးပင်များကိုလည်း တူးထုတ်လာနိုင်ခဲ့သည်။ထို့အပြင် ထန်းသီး၊ တည်သီး၊ နှင်းဆီရိုင်း၊သစ်တော်ပင်၊ မက်မွန်ပင်နှင့် အခွံမာသီးတချို့ကိုလည်းရှာတွေ့

ခဲ့ကြသေးသည်။

သို့သော် ယခုမှနွေဦးရာသီစတင်ခါစပေမို့ ပန်းများပွင့်ချိန်တော့မတန်သေးချေ။အသီးများမှာလည်း ရင့်မှည့်ခြင်းမရှိသေးသည်မို့ မြောင်ဟယ်မှာ သည်အတိုင်းကြည့်နေရုံသာတတ်နိုင်ခဲ့သည်။

Prev Next