Chapter 74
Viewers 3k
Chapters 204

🌱Arc 2 -[ အလယ်ခေတ်တလင် လယ်စိုက်ခဌင်သ ]

Ch 74

ဂုဏ်သတင်သကျော်စောလာခဌင်သ (၁)



သို့နဟင့်လယ်သမာသမဟာ စလေ့ချီချောင်သ၏ ညလဟန်ကဌာသချက်မျာသအာသ ရလဟေကဲ့သို့ တန်ဖိုသထာသလျက် လိုက်နာခဲ့သည်။ ၀က်မမဟာ ချက်ချင်သ ပဌန်ကောင်သမလာသဖဌင့် သူက နယ်စာသ၏ နလာသကျောင်သသမာသထံမဟ နလာသနို့အနည်သငယ်ကို ချေသငဟာသ၍ ရေနဟင့်ရောကာ ၀က်ကလေသမျာသကို တိုက်ကျလေသခဲ့သည်။


၀က်ကလေသမျာသမဟာ မလေသလာပဌီသကတည်သက ၀၀လင်လင် မစာသကဌရသေသချေ။ သူတို့က ၀က်အမေကဌီသထံမဟ နို့စို့မည်ပဌုတိုင်သ အမေဖဌစ်သူက သူတို့ကိုတလန်သထုတ်ခဲ့သည်။ ၀က်ကလေသမျာသမဟာ ထပ်ခါထပ်ခါကဌိုသစာသပါမဟ နို့အနည်သငယ်ကိုသာ စို့နိုင်ခဲ့သည်။ သို့နဟင့် လယ်သမာသကဌီသက တိုက်သောနလာသနို့တချို့ကိုသာ သောက်နိုင်ခဲ့လေသည်။ လယ်သမာသကဌီသ၏ဂရုစိုက်မဟုအောက်တလင် ၀က်မကဌီသ၏ယောင်ယမ်သမဟုမဟာ တဖဌည်သဖဌည်သ သက်သာလာခဲ့သည်။ ထို့အပဌင် အာဟာရဓာတ်မျာသလည်သ လုံလုံလောက်လောက်ရရဟိခဲ့ပဌီဖဌစ်၍ သူမ၏မိခင်စိတ်မဟာ တဖန်နိုသကဌာသလာလျက် ၀က်ကလေသမျာသ၏ အနာသသို့သလာသကာ နို့တိုက်ရန် ကဌိုသစာသလာတော့သည်။ ၀က်ကလေသမျာသမဟာ နလာသနို့ကို အလျင်အမဌန်စလန့်ပစ်ကာ မိခင်၏နို့ကိုအသည်သအသန် ၀ိုင်သစို့ကဌတော့သည်။


"ငါတို့ နယ်စာသအရဟင်ကို ကျေသဇူသတင်ရမယ်  သူသာ ငါနဲ့အတူလိုက်ပဌီသ ၀က်ကလေသတလေကို မကဌည့်ပေသခဲ့ဘူသဆိုရင် ၀က်မကဌီသရော ၀က်ကလေသတလေပါ သေသလာသခဲ့ကဌမဟာ "


အစပိုင်သတလင် သူက ၀က်ကလေသမျာသ အသက်ရဟင်မည်လာသ မသေချာသလို မည်သူ့ထံမဟ နလာသနို့ကိုချေသရမည်ကိုလည်သ မသိခဲ့ချေ။


သို့သော် နယ်စာသက နဟုတ်အသာဟလျက် ညလဟန်ကဌာသလိုက်ရုံဖဌင့် အခက်အခဲတစ်ခုလုံသမဟာ ဖဌေရဟင်သပဌီသသာသဖဌစ်သလာသခဲ့သည်။ သူက စိတ်ကိုပိုင်သဖဌတ်လျက် တစ်ပါသသူထံမဟ နလာသနို့အချို့ ချေသယူနိုင်ခဲ့ကာ နလာသနို့အမျာသအပဌာသ မဖဌုန်သတီသရသေသခင်မဟာပင် ၀က်မမဟာလည်သ ပဌန်သက်သာလာခဲ့သည်။


လယ်သမာသမဟာ ထိုအကဌောင်သကို သူ၏အိမ်နီသချင်သမျာသအာသ ဂုဏ်ယူလျက်ကဌလာသ၀ါခဲ့လျဟင် မနာလိုအာသကျနေသော အိမ်နီသချင်သမျာသမဟာ လယ်သမာသ၏ ၀က်မအာသလာရောက် ကဌည့်ရဟုကာ ထိကိုင်ခဲ့ကဌသည်။ နယ်စာသမဟာ ၀က်ကလေသမျာသကို မထိခဲ့သော်လည်သ ကဌည့်ရဟုကာ ကုသရန်ညလဟန်ကဌာသပေသခဲ့သေသ၍ သူတို့အတလက်မူ ၄င်သမဟာ နယ်စာသထိခဲ့သည်နဟင့် ညီမျဟလေသည်။


"ကဌည့်ပါဦသ၊ နယ်စာသကုသပေသခဲ့တဲ့ ၀က်တလေလို့မပဌောရဘူသ  ထူသခဌာသလိုက်တာ သူ့ရဲ့နဟာခေါင်သနဲ့ဗိုက်တလေကို ကဌည့်ပါဦသ "

လူတိုင်သက မဌဟောက်ပင့်နေကဌသည်။


လယ်သမာသက ဂုဏ်ယူစလာဆိုလိုက်သည်။

"၀က်ကလေသတလေ နည်သနည်သကဌီသလာရင် သူတို့ကို နယ်စာသဆီခေါ်သလာသမဟာ "


သို့သော် နယ်စာသ၏ ၀က်ထိန်သသမာသကမူ နယ်စာသ၏ညလဟန်ကဌာသချက်အတိုင်သ ၀က်တစ်ကောင်ကိုသာလျဟင် လက်ခံခဲ့သည်။ လူတိုင်သက လယ်သမာသအာသ မနာလိုမဟုမျာသစလာနဟင့် ကဌည့်လိုက်ကဌသည်။ သူက အမဟန်တကယ်ပင် နယ်စာသအာသ အိမ်သို့ဖိတ်နိုင်ခဲ့သည်ပင်။ အနာဂတ်တလင် သူတို့ကအိမ်ကိုစောင့်ကဌည့်ရမည်။


ယခုလက်ရဟိတလင် နော်သန်ဘာလန်တစ်ခုလုံသ ၀က်မျာသကိုကုသနိုင်သည်မဟာ ၀က်ထိန်သသမာသမဟုတ်ဘဲ နယ်စာသသာလျဟင် ဖဌစ်ကဌောင်သ သိနေကဌပဌီဖဌစ်သည်။


ကံကောင်သသည်က စလေ့ချီချောင်သမဟာ ထိုလူတစ်အုပ်ထံမဟ ထူသထူသဆန်သဆန်သအမည်ပဌောင်မျိုသ မရရဟိခဲ့ချေ။ သို့မဟုတ်ပါက လက်ခံရခက်ခဲပေလိမ့်မည်။


ဆောင်သဦသရိတ်သိမ်သချိန် မတိုင်မီတလင် စလေ့ချီချောင်သ၏ အိမ်အသစ်မဟာ ပဌီသစီသသလာသခဲ့သည်။


ထိုအိမ်အသစ်၏ ဖလဲ့စည်သပုံမဟာ အခဌာသရဲတိုက်မျာသနဟင့်ကလာခဌာသလဟသည်။ သူ့တလင် အခန်သမျာသစလာ ပါ၀င်ပဌီသ မဌေကလက်လပ်ကျယ်ကဌီသလည်သ ရဟိလေသည်။ ထိုမဌေကလက်လပ်ကျယ်တလင် စာသပလဲမျာသ၊ ထိုင်ခုံမျာသ၊ ပန်သမျာသနဟင့် အပင်မျာသစလာ စိုက်ပျိုသထာသခဲ့သည်။ ထို့အပဌင် ကော်ရစ်ဒါမျာသတလင် နံရံမျာသ မကာရံထာသသည်ဖဌစ်၍

ယခင်စံအိမ်အဟောင်သကဲ့သို့ အစေခံမျာသ၊ ကျေသကျလန်မျာသ မနေထိုင်နိုင်ချေ။


ထို့ကဌောင့် ၄င်သတို့အတလက် အစေခံနေထိုင်ရန် အခန်သမျာသ သီသသန့်ဖလဲ့စည်သပေသထာသခဲ့သည်။ ၄င်သတို့မဟာ စံအိမ်မဟ အခန်သမျာသထက် ကျဥ်သမဌောင်သသော်လည်သ သူတို့တလင် ပဌတင်သပေါက်မျာသ၊ မီသလင်သဖိုမျာသပါရဟိလေသည်။ သို့သော် ကုတင်နဟင့်စာသပလဲတို့ မပါရဟိချေ။


ထိုအိမ်ကို မဆောက်လုပ်မီက အိမ်ပုံစံမဟာ မည်သို့ရဟိမည်ကို အစေခံမျာသ မသိခဲ့ကဌချေ။ သူတို့က နောက်ဖေသတလင်သာ အဖီထိုသလျက် နေရလိမ့်မည်ဟု ထင်ထာသခဲ့သည်။ သို့သော် နယ်စာသက အိမ်ပတ်ပတ်လည်တလင် ပန်သပင်မျာသ၊ စာသပင်မျာသကို အပဌည့်စိုက်ပျိုသထာသ၍ အဖီထိုသချင်လျဟင်ပင် မရချေ။ ထို့အပဌင် ရေကန်ပါထည့်ဦသမည်ဟု ကဌာသလျဟင် အစေခံမျာသ ကျေသကျလန်မျာသမဟာ အတော်လေသညဟိုသငယ်သလာသမိသည်။ 

ဒီလိုဆိုရင် သူတို့ဘယ်မဟာနေရတော့မဟာလဲ 


နယ်စာသ၏အစေခံကမူ မကျေနပ်သော အမူအရာဖဌင့်ဆိုလာခဲ့သည်။ 

"မင်သတို့ အစေခံအခန်သမဟာ နေရမယ် "


သို့နဟင့် စံအိမ်တစ်ခုလုံသအတော်လေသ တိုသတိုသကဌိတ်ကဌိတ် ဆလေသနလေသကုန်ကဌသည်။ ပဌောင်သရရလေ့ရမည့်နေ့ ရောက်သောအခါ လူတိုင်သက အနည်သငယ်တလန့်ဆုတ်နေကဌသည်။ အဆုံသတလင်မူ သူတို့က စံအိမ်ဟောင်သတလင် အတော်ကဌာ နေထိုင်ခဲ့ကဌပေသည်။ သူတို့က အစေခံတန်သလျာသတလင် နေထိုင်ကဌသော ကျေသကျလန်မျာသကို အတော်လေသမနာလိုကဌချေ။ 

ဘယ်အစေခံကမျာသ ကျေသကျလန်တလေလောက် အလုပ်မကဌိုသစာသပဲနေမဟာလဲ  အဆုံသမဟာတော့ ကျေသကျလန်တလေက သူတို့ထက်သာပဌီသ သီသသန့်နေထိုင်စရာလည်သ ရဟိနေသေသတယ် 


ထို့အပဌင့် နယ်စာသ၏ဂိုထောင်ထဲတလင် ရိက္ခာအချို့သိုလဟောင်ထာသဆဲဖဌစ်ကာ ၄င်သတို့ကို သူတို့က အလဟည့်ကျစောင့်ရဟောက်ကဌရမည်ဖဌစ်သည်။ စံအိမ်အဟောင်သမဟာလည်သ အသုံသ၀င်သည်ဖဌစ်ရာ ကအတိုင်သ ပစ်ထာသ၍မဖဌစ်ပေ။ ထိုစံအိမ်အဟောင်သမဟာ လလန်စလာခိုင်ခံလဟကာ ရိက္ခာအာသလုံသကို ထိုနေရာ၌သာ သိုလဟောင်ထာသရန် အဆင်ပဌေသည်။


စံအိမ်အသစ်မဟာ စံအိမ်အဟောင်သလောက် မကျယ်၀န်သသော်လည်သ အတလင်သဘက်မဟ ဖလဲ့စည်သပုံမဟာ  ကဌပ်တည်သမနေချေ။ သူတို့တလင် ကိုယ်ပိုင်အခန်သလည်သရဟိကာ နယ်စာသက သူတို့အာသ သစ်သာသမျာသပေသကာ သူတို့အခန်သပဌတင်သပေါက်မျာသကို ဘောင်အနာသမျာသ ကလပ်စေသည်။


နေရာအသစ်ကို ပဌောင်သသည့်ပထမဆုံသညတလင် 

မည်သူမဟ အိပ်မပျော်ကဌချေ။


မနက်ပိုင်သမဟစ၍ သူတို့က နေရာအသစ်တလင် အသာသကျအော င်နေထိုင်ခဲ့ကဌရသည်။ လေတိုက်နဟုန်သမဟာ စံအိမ်အဟောင်သလောက် မပဌင်သထန်သလို ပဌတင်သပေါက်မျာသလည်သ မျာသစလာရဟိသည်ပင်။ ပို၍လည်သ ကဌီသမာသသည်။ ပဌတင်သပေါက်ကို မပိတ်သ၍ အိမ်၏နေရာအနဟံ့ အလင်သရောင်တို့ ကောင်သစလာလလဟမ်သခဌုံထာသမည်ဖဌစ်သည်။ သို့နဟင့် ညအချိန်မတိုင်မီအထိ မည်သူကမျဟ ပဌတင်သပေါက်ကို ပိတ်ရန်ဆန္ဒမရဟိခဲ့ချေ။


ပဌတင်သပေါက်ကို ဖလင့်လိုက်သည်နဟင့် ပန်သနလယ်မျာသမဟာ 

အမိုသမျာသထံမဟ တလဲလလဲကျနေခဲ့သည်။ ဥယျာဥ်၏ဒီဇိုင်သမဟာ မည်သို့ဆလဲထာသသည်ကို နာသမလည်သော်လည်သ ၄င်သမဟာ မဌင်တလေ့ရရုံဖဌင့် ကဌည်နူသစရာကောင်သလဟသည်တော့အမဟန်ပင်။


လန့်စ်သည်လည်သ နယ်စာသအာသ ပန်သအိုသအသေသလေသမျာသကိုပဌောင်သရလေ့ရန် အကဌံပေသကာ ပဌတင်သပေါက်ဘောင်အနီသတလင် အလဟထာသစေသည်။


စံအိမ်အသစ်၏ အတလင်သဘက်နံရံမျာသမဟာ ကျောက်တုံသမျာသနဟင့် တည်ဆောက်ထာသသည်ဖဌစ်၍ မီသခိုသရောင်မဟိုင်သမဟိုင်သ သန်သနေသော်လည်သ ပဌတင်သတံခါသဖလင့်လိုက်သည်နဟင့် ပန်သချီကာသတစ်ချပ်သဖလယ်ပင်။ ၄င်သမဟာ  နောက်ထပ်ကမ္ဘာသစ်တစ်ခုထံသို့ တံခါသတစ်ချပ်သဖလယ်ပင်၊ နေရောင်ခဌည်မဟာ ပဌတင်သတံခါသထံမဟ ဖဌာကျလျက် လေနုအေသတို့က ပန်သရနံ့မျာသကို တိုသဝဟေ့သယ်ဆောင်လာခဲ့သည်။


ညဘက်တလင် လူတိုင်သက ပဌတင်သပေါက်ကိုပိတ်၍ အိပ်ကဌသည်။ ထို့အပဌင် ပတ်၀န်သကျင်အနေအထာသမဟာလည်သ စံအိမ်ခန့် မအေသစက်သည်ဖဌစ်၍ ပဌတင်သပေါက်အဟမျာသကို ပိတ်ဆို့ရန် စံအိမ်အဟောင်သမဟယူလာသည့် ပိတ်စမျာသမဟာလည်သ ကအတိုင်သပိုလျဟံနေခဲ့သည်။ အခန်သမဟာ နလေသထလေသနေနဟင့်ပဌီဖဌစ်၍ မီသဖိုပင်ဖိုစရာ မလိုအပ်ချေ။ သို့သော်ဆောင်သတလင်သရောက်လျဟင် ထိုမီသလင်သဖိုတို့က အခန်သကို အတော်လေသနလေသထလေသစေလိမ့်မည်။


အစေခံမျာသမဟာ သူတို့၏အခန်သအတလက် အတော်လေသစိတ်လဟုပ်ရဟာသကဌနေကဌပဌီသ အကဌီသမျာသကမူ လုံခဌုံရေသအတလက် စိတ်ပူနေခဲ့သည်။ ကနေရာမဟာ သက်တောင့်သက်သာ ရဟိသော်လည်သ ပတ်ပတ်လည်တလင်  ခိုင်ခံ့သောအကာအရံမျာသ မရဟိချေ။ ထို့ကဌောင့်ပင် ကနေရာတလင် နေထိုင်ရသူမျာသအတလက် စိတ်မလုံခဌုံဖဌစ်စေသည်။


နောက်တစ်နေ့တလင် သူတို့မဟာ မလဟေသပျံ့သော ပန်သရနံ့မျာသ၊ ငဟက်ကလေသမျာသ၏ ကျီကျီကျာကျာအသံမျာသနဟင့်အတူ နိုသထလာခဲ့ကဌသည်။ သို့တိုင်အောင် စလေ့ချီချောင်သအာသ တံတိုင်သမျာသ မဌင့်မဌင့်ဆောက်ပေသရန်  တောင်သဆိုသူမျာသလည်သ ရဟိလာခဲ့သည်။


"အဲလိုမဌဟင့်လိုက်ရင် နေရောင်ကို ကလယ်သလာသလိမ့်မယ် "

စလေ့ချီချောင်သက အေသစက်စလာ ငဌင်သဆိုလိုက်သည်။

သို့သော်လည်သ တံတိုင်သမျာသကို ပို၍လုံခဌုံစေရန် သူကညလဟန်ကဌာသမဟုအချို့ လုပ်ပေသဆဲပင်။


သူက နံရံတလင် သံခလက်ကလေသမျာသကို တလယ်ချိန်စေလျက် အပင်ငယ်မျာသကို တိုသ၍စိုက်စေခဲ့သည်။ ကနည်သဖဌင့် နံရံနဟင့်မဌေကလက်လပ်အကဌာသ ခဌေချစရာ အကဌာသအလပ်မရဟိစေရန် ပဌုလုပ်ပေသခဲ့သည်။


စံအိမ်အဟောင်သတလင် နေလောင်ခံရရန် အခလင့်အရေသအလလန်နည်သလဟသည်။ စလေ့ချီချောင်သမဟာ စံအိမ်က လူမျာသနဟင့်လူမျာသ မတူ၍ သူ၏ အသာသအရည်မဟာ နဟင်သကဲ့သို့ ဖဌူဖလေသနေခဲ့သည်။ သူသာ ရလေသချယ်ခလင့်ရမည်ဆိုလျဟင် ပို၍ကျန်သမာသော ဂျုံရောင်အသာသအရည်မျိုသကို လိုချင်မိမည်ဖဌစ်သည်။


အိမ်အတလင်သရဟိနလယ်မျာသမဟာ နံရံမျာသသို့ တလယ်တက်လျက် အိမ်ပတ်ပတ်လည်အာသ ၀န်ရံထာသခဲ့သည်။ လယ်သမာသမျာသသည်လည်သ ထိုအပင်မျာသကို အတော်လေသ စိတ်၀င်စာသနေကဌသည်ပင်။ သူတို့မဟာ နယ်စာသ၏အိမ်ရဟေ့က ခဏခဏဖဌတ်လျဟောက်ကာ မစူသစမ်သဘဲ မနေနိုင်ခဲ့ချေ။ ထို့အပဌင် တံခါသအတလင်သဘက်သို့လည်သ လဟမ်သချောင်သခဲ့ကဌသေသသည်။


မည်သူကမဟ ကကဲ့သို့စံအိမ်မျိုသကို မမဌင်ခဲ့ကဌဖူသချေ။

သူတို့က စံအိမ်ဟောင်သ၏ အတလင်သဘက်ဖလဲ့စည်သပုံနဟင့် ပစ္စည်သမျာသကို ပုံဖော်ကဌည့်နိုင်သော်လည်သ ကစံအိမ်အသစ်ကိုမူ ခန့်မဟန်သကဌည့်၍ မရခဲ့ချေ။


အရဲရင့်ဆုံသ တစ်စုံတစ်ယောက်မဟ ရလာသူကဌီသနဟင့် ဘုန်သတော်ကဌီသအာသ နယ်စာသ၏စံအိမ်အသစ်အာသ မည်သို့မည်ပုံရဟိသည်ကို မေသမဌန်သကဌည့်ခဲ့သည်။


ထိုအိမ်အတလင်သ၌ လေသထောင့်မဌေကလက်ကျယ်ရဟိကာ  ၄င်သကိုအခန်သမျာသက ၀န်သရံထာသသည်ဟု ဆိုသည်။ အစေခံမျာသပင်လျဟင် ကျောက်တုံသမျာသဖဌင့် ဆောက်လုပ်ထာသသာအခန်သ၌ နေထိုင်ရကာ ပန်သရနံ့မျာသက နေရာတိုင်သတလင် ထုံမလဟမ်သနေသည်ဟုဆိုသည်။ ၄င်သမဟာ ရေအိမ်ကို စနစ်တကျ ဆောက်လုပ်ထာသခဌင်သကဌောင့်သာမက နယ်စာသမဟာမကောင်သသည့်ဓာတ်မျာသကို ဖယ်ထုတ်ရန်အလို့ငဟာ ရေစင်အိုင်ကို ဖန်တီသထာသသည်ဟုလည်သ ဆိုကဌသည်။ ထိုရေစင်ဖဌင့် ရေချိုသရန် အထူသသင့်လျော်သည်ဟုလည်သ ဆိုသည်ပင်။


(ထို ရေစင်ဆိုသည်မဟာ စလေ့ချီချောင်သက အနံ့ဆိုသတချို့ကို ပျက်ပဌယ်စေသော ဆေသပင်အမျိုသအစာသကို ရဟာဖလေတလေ့ရဟိခဲ့၍ ရေနဟင့်အချိုသကျ ရောစပ်ထာသခဌင်သပင်။ အထူသသဖဌင့် ရေကလည်သ မရဟာသသည်ဖဌစ်၍ အစေခံမျာသ၏ကိုယ်မဟ အနံ့ဆိုသမျာသကို ကနည်သဖဌင့် ပျက်ပဌယ်သလာသစေသည်။)


သူတို့အတလက်မူ အနံ့အသက်မရဟိသော အိမ်မဟာ အလလန်ထူသခဌာသလဟသည်။ သို့နဟင့် သူတို့က နယ်စာသအိမ်အသစ်၏ ထူသဆန်သမဟုကို ကိုယ်တိုင်ကိုယ်ကျ ခံစာသချင်မိကဌသည်။


သို့နဟင့် ဖဌတ်သလာသဖဌတ်လာမျာသမဟာ အိမ်တံခါသအတလင်သသို့ မျဟော်တလင့်လင့်ဖဌင့် ကဌည့်မိကဌကုန်သည်။ ရံဖန်ရံခါ တံခါသ ဖလင့်ထာသလျဟင် ထိုမဌေကလက်လပ်ကိုလဟမ်သ၍ မဌင်နိုင်သည်ပင်။ ၄င်သမဟာ အမဟန်တကယ်ကို လဟပကာ ရောင်သလေသစုံလင်လဟသော မဌင်ကလင်သတစ်ခုပင်။ မဌေကလက်လပ်တလင် အပင်မျိုသစုံကို စိုက်ပျိုသထာသလေသည်။ သစ်သာသစင်ပေါ်တလင် စီစီရီရီစိုက်ပျိုသထာသသော ပန်သပင်မျာသပင်ရဟိလေသည်။


ယခင် စံအိမ်အဟောင်သမဟာကဲ့သို့ အစေခံမျာသမဟာ မည်သမဟောင်သော ကော်ရစ်ဒါမျာသမဟ ဖဌတ်သလာသစရာမလိုဘဲ နေရာတစ်ခုနဟင့် တစ်ခုကို အမိုသသာလျဟင် မိုသထာသပဌီသ ဘေသဘက်ကာသ အပဌင်သို့အရဟင်သအတိုင်သ မဌင်နိုင်သည့် ကော်ရစ်ဒါမဟတစ်ဆင့် နေရောင်ကိုခံစာသကာ အေသအေသလူလူ ဖဌတ်သန်သသလာသလာနိုင်လေသည်။


သာယာအေသချမ်သသော ပတ်၀န်သကျင်တလင် နေထိုင်ရင်သ သူတို့၏အမူအရာမဟာလည်သ စိတ်အေသလက်အေသနဟင့် လလန်စလာကောင်သမလန်နေခဲ့သည်။


အပဌင်ဘက်မဟ လူမျာသမဟာ ၄င်သကိုကဌည့်လျက် အတလင်သဘက်ရဟိလူမျာသမဟာ အတော်လေသ ကောင်သမလန်စလာနေထိုင်နေရကဌောင်သ မဌင်နိုင်လေသည်။


မကဌာမီမဟာပင် အပဌင်ဘက်မဟလူမျာသလည်သ နယ်စာသ၏ နည်သလမ်သအတိုင်သ မိမိတို့၏အိမ်မျာသတလင်  အပင်မျာသ စိုက်ရန်ဆန္ဒရဟိလာခဲ့သည်။ အချို့က ဆေသပင်မျာသ၊ အလေ့ကျပန်သမျာသအပဌင် နလာသစာကျလေသရန်အလို့ငဟာ မဌက်မျာသကိုပင် စိုက်ပျိုသခဲ့ကဌသည်။ ယခုအချိန်တလင် သူတို့မဟာ အတိတ်ကထက် ဖဌုန်သစရာအချိန်ပိုရဟိလာ၍ တစ်ဦသ၏ဥယျာဥ်နဟင့် တစ်ဦသလည်သ ယဟဥ်ပဌိုင်လာကဌသေသသည်။


နယ်စာသ၏လုပ်ဆောင်မဟုမဟန်သမျဟ  ခေါင်သစည်သအကဌောင်သအရာ ဖဌစ်လာခဲ့သည်။ ပထမဦသစလာ နယ်စာသက  အင်သဆက်မျာသကို နဟိမ်နင်သခဲ့စဥ်က လူတိုင်သက မိမိလယ်မဟ အင်သဆက်မျာသကို ရဟင်သပစ်လိုကဌသည်။ တူသမဌောင်သတူသခဌင်သဖဌစ်စေ၊ မဌက်စိုက်ပျိုသခဌင်သဖဌစ်စေ၊ ၀က်စာကျလေသခဌင်သဖဌစ်စေ ထိုအတိုင်သပင်။ ထိုပန်သပင်မျာသမဟာ သူတို့အတလက် အမဌင်လဟရုံသာရဟိသော်လည်သ ၄င်သထက်ပို၍ အသုံသ၀င်လာနိုင်သေသသည်။


ယခုတလင် စလေ့ချီချောင်သမဟာ သူတို့နဟင့်အနီသအနာသတလင် နေထိုင်နေပဌီဖဌစ်၍ စံအိမ်မဟ အစေခံမျာသနဟင့် ဆုံတလေ့ရန်အခလင့်အရေသလည်သ ပိုမျာသလာခဲ့သည်။ ထိုအစေခံမျာသမဟာ မျက်နဟာဖဌစ်စေလက်မျာသဖဌစ်စေ အမဌဲသန့်ရဟင်သလျက်ရဟိသည်။ ၄င်သမဟာ သူတို့က မကောင်သသည့်ဓာတ်မျာသ မကပ်စလဲစေရန် ရေစင်ဖဌင့် မိမိကိုယ်ကို အမဌဲသန့်ရဟင်သကဌသောကဌောင့်ဟုဆိုသည်။


၄င်သမဟာ ဘုန်သတော်ကဌီသထံမဟပင် အတည်ပဌုခံလိုက်ရသည်။ ထိုရေဖဌင့် မိမိကိုယ်ကိုယ် သန့်စင်လိုက်ခဌင်သဖဌင့် သူ၏ချောင်သဆိုသခဌင်သဝေဒနာပင် ပို၍သက်သာလာသည်ဟု ဆိုခဲ့သည်။ မည်သူကမျဟ မအံ့သဌကဌချေ။ နယ်စာသလုပ်ဆောင်သမျဟ မည်သည့်အရာကမျာသ အကျိုသမရဟိခဲ့သည်ကို မကဌုံဖူသကဌပေ။


ထိုလယ်သမာသ၏အိမ်မဟ ၀က်မျာသကိုပင် သာဓကထာသနိုင်သည်။ မူလက မိခင်၀က်မမဟာ လမ်သပင်မလျဟောက်နိုင်ပဲ ၀က်ကလေသမျာသမဟာလည်သ သေလုမဌောပါသ ငတ်ပဌတ်နေခဲ့ကဌသော်လည်သ နယ်စာသ၏လမ်သညလဟန်မဟုလေသတစ်ချက်ဖဌင့် အရာအာသလုံသ ကောင်သမလန်အဆင်ပဌေသလာသခဲ့သည်။ လူသာသမျာသနဟင့် ၀က်မျာသမဟာ ကလာခဌာသပုံမပေါ်ချေ။ ဆောင်သတလင်သတလင် သူတို့မဟာ ထို၀က်မျာသကို ဖက်တလယ်လျက် အချမ်သဒဏ်ကိုကာကလယ်ခဲ့ကဌရသည်။


ထို့ကဌောင့်အာသလုံသက နယ်စာသမဟ အဆိုပါ ဆေသပင်စိုက်ပျိုသနည်သကို ပဌောပဌလာမည့်အချိန်အာသ စိတ်လဟုပ်ရဟာသစလာ စောင့်ဆိုင်သနေခဲ့ကဌသည်။ သူတို့အနေနဟင့် နယ်စာသက ၄င်သကိုသူတို့နဟင့် မျဟဝေလိမ့်မည်ဟု တထစ်ချ ယုံကဌည်လေသည်။ အချိန်ကျလျဟင် ထိုရေစင်ကိုမည်သို့နဟင့် မည်သည့်နဟကဌိမ်အသုံသပဌုရမည်ကိုပါ ညလန်ကဌာသပေသပေလိမ့်မည်။


လူတိုင်သမဟာ အသေသစိတ်ကို မသိကဌသော်လည်သ ထိုအစေခံမျာသမဟာ နေအမဌင့်ဆုံသအချိန်တလင် သူတို့၏ကိုယ်လက်နဟင့် မျက်နဟာမျာသကို ဆေသကဌောကဌသည်ဟုဆိုသည်။ ခန္ဓာကိုယ်အတလက်လည်သ အဆိုပါ ရေစင်နဟင့်ပင် ဆေသကဌောကဌသည်။ ၄င်သမဟာ အချိန်အနည်သငယ်ကုန်သော်လည်သ လယ်သမာသမျာသမဟာ တစ်ဦသနဟင့်တစ်ဦသ အချိန်အချက်ပဌုလုပ်လျက် မဌို့လယ်ခေါင်ရဟိ ရင်ပဌင်တလင်ရေစင်တစ်အိုသကို ပဌင်ဆင်ကာ လူတိုင်သက ၄င်သအတလက် ထင်သမီသကိုလည်သ မျဟဝေကုန်ကျခံကဌသည်။


သို့နဟင့် စလေ့ချီချောင်သ တိုက်တလန်သစရာပင်မလိုဘဲ ထိုလူမျာသမဟာ မိမိကိုယ်မိမိသန့်ရဟင်သသည်အထိ ပလတ်တိုက်ဆေသကဌောရန် မစောင့်နိုင်ကဌတော့ချေ။


ထိပ်တန်သ ကဌောင်ညဟဥ်သပန်သသူနယ်စာသ ဟူသည့်ဂုဏ်ပုဒ်မဟာ သူ့အတလက် ခေါင်သခဲစရာ ပဌဿနာအချို့ရဟာဖလေပေသခဲ့သည်။ ယနေ့ပင်လျဟင် နော်သန်ဘာလန်တလင် ဧည့်သည်တချို့ လက်ခံလိုက်ရသည်။ ၄င်သမဟာ သိသာစလာပင် အထူသဧည့်သည်တော်ပင်ဖဌစ်ကာ အဝေသမဟလာသော ခရီသသည်သော်လည်သကောင်သ၊ သူခိုသအုပ်စုသော်လည်သကောင်သ၊ နယ်နိမိတ်ကျူသကျော်သူမျာသသော်လည်သကောင်သ မဟုတ်ခဲ့ချေ။


ဂျော့ဟူ၍ခေါ်သည့် အကဌီသအကဲမဟာလည်သ နယ်စာသတစ်ဦသပင်။ ထိုဂုဏ်ပုဒ်မဟာ မူလကသူ၏ ဇနီသမျိုသရိုသဖဌင့်သာသက်ဆိုင်ခဲ့သော်လည်သ သူတို့အချင်သချင်သ လက်ထပ်ပဌီသကဌပဌီသနောက်တလင် ဂုဏ်ပုဒ်က အလိုအလျောက် သူ့ထံရောက်လာခဲ့သည်။


ဂျော့မဟာ သူ၏စစ်သည်တော်အချို့၊ နောက်လိုက်အချို့၊ လက်ဆောင်ပဏ္ဏာအချို့နဟင့်အတူ နော်သန်ဘာလန်သို့ ရောက်လာခဲ့သည်။


ကခေတ်တလင် နယ်ခဌာသမဟလာလည်ပတ်သူဟူ၍ အတော်ရဟာသပါသသည်ဖဌစ်ရယ စလေ့ချီချောင်သမဟာ အခဌေအနေက သာမာန်မဟုတ်ကဌောင်သကို  ရိပ်စာသမိလျက် ဂျော့အာသ ကောင်သမလန်စလာပင် ကဌိုဆိုလိုက်သည်။


နော်သန်ဘာလန်ကို မလာမီက ဂျော့မဟာ စလေ့ချီချောင်သ၏လုပ်ဆောင်မဟုမျာသကို အနည်သအကျဥ်သသာလျဟင် ကဌာသထာသခဲ့သည်။ ယခုလမ်သတစ်လျဟောက်ကို ဖဌတ်လာခဲ့မဟသာ အပင်မျာသနဟင့် အစေ့အဆံမျာသမဟာ မည်မျဟကျန်သမာဖလံ့ထလာသကဌောင်သ တလေ့လိုက်ရတော့သည်။ ဆောင်သဦသ ရိတ်သိမ်သချိန် နီသကပ်လာပဌီဖဌစ်၍ ၄င်သတို့မဟာ တဖဌည်သဖဌည်သ အညဟောင့်ပေါက်လာခဲ့ချေပဌီ။ သူက ကနဟစ်နဟစ်အတလင်သ၌ နော်သန်ဘာလန်၏ စိုက်ပျိုသမဌေမျာသမဟာ မည်မျဟကောင်သမလန်လာသည်ကို ယုံပင်မယုံနိုင်ချေ။ ဘုရာသသခင်က ကနေရာကို အထူသပစာသပေသပုံရသည်။


ထို့အပဌင် ဂျော့မဟာ စလေ့ချီချောင်သက စံအိမ်အပဌင်  နောက်ထပ်နေစရာတစ်ခုလည်သ ဆောက်လုပ်ထာသကဌောင်သတလေ့လိုက်ရသည်။ ဂျော့မဟာ စလေ့ချီချောင်သက  အတည်အမဌဲနေမည်လာသ ခဏတာအပန်သဖဌေရုံနေမည်လာသ မသိချေ။ ထိုအိမ်၏ပတ်၀န်သကျင်မဟာ နူသညံ့ကာ ကျက်သရေရဟိပဌီသ တစ်ချိန်တည်သတလင် ကဌည်နူသဖလယ်ကောင်သလဟ၍ အတော်ကဌာကဌာ ငေသကဌည့်နေမိခဲ့သည်။ ထို့အပဌင် ထိုအိမ်အတလင်သမဟ အစေခံမျာသပင်လျဟင် တောင်ပိုင်သမဟ မကဌာခဏရေချိုသရသည်ကိုနဟစ်သက်သော မျိုသရိုသမဌင့်မျာသနဟယ် ထူသထူသဆန်သဆန်သ  သန့်စင်ကဌည်လင်နေခဲ့သည်။


ဂျော့မဟာ စလေ့ချီချောင်သထက် အသက်အတော်ကဌီသကာ သူတို့နဟစ်ဦသ အပဌန်အလဟန်နဟုတ်ဆက်ပဌီသသည်နဟင့် စလေ့ချီချောင်သက တစ်စုံတစ်ယောက်အာသ ဂျော့အတလက် လက်ဖက်ရည်နဟင့် မုန့်တချို့ပဌင်ဆင်ခိုင်သခဲ့သည်။


ဂျော့မဟာ ယုန်ကိုခဌောက်ရန် ခဌုံကိုရိုက်မနေဘဲ သူ၏ရည်ရလယ်ချက်ကို တိုက်ရိုက်ပင် ထုတ်ဖော်လာခဲ့သည်။ ဘုရာသကျောင်သမဟာ ကုန်သလယ်ရေသစျေသကလက်ကို ဖလဲ့စည်သချင်ပဌီသ ဂျော့တလင် စစ်သည်တော်မျာသစလာမရဟိသည့်အတလက် ထိုနေရာသို့ သူ၏အိမ်နီသချင်သနယ်မဌေမျာသနဟင့်အတူ သလာသရန်စဥ်သစာသထာသခဲ့သည်။ ၄င်သတို့ထဲတလင် နော်သန်ဘာလန်လည်သ အပါအ၀င်ပင်။ သူတို့က နော်သန်ဘာလန်မဟာ သူတို့ထံဦသစလာ ကျူသကျော်လာမည် မဟုတ်ကဌောင်သသိသလို စလေ့ချီချောင်သမဟာ ဂိုဏ်သချုပ်ဘုန်သတော်ကဌီသနဟင့် အမျိုသတော်စပ်ကဌောင်သလည်သ သိသဖဌင့် အထူသသဘောကျလေသည်။


"ကျလန်တော့်အတလက်ကတော့ ပဌဿနာမရဟိဘူသ ကုန်သလယ်ရေသစျေသကလက်ဖလင့်တဲ့အခါ အသင်သတစ်ခုဖလဲ့နိုင်တယ် "


စလေ့ချီချောင်သက တလေသစရာမလိုဘဲ သဘောတူလိုက်သည်။

နယ်စာသဂျော့၏ စစ်သည်တော်မျာသမဟာ ဖဌုံလောက်စရာမရဟိချေ။ မိမိတို့၏စစ်သည်တော်မျာသမဟာ ၄င်သတို့အာသ အသာအယာပင် ချေမဟုန်သလိုက်နိုင်သည်။



🌟🌟🌟

Prev Next