MM Story Teller

Chapter 93

Viewers 3k

Chapters 204

🌱 Arc 3 - [ကြယ်တာရာခေတ် ABOကမ္ဘာတွင် လယ်စိုက်ခြင်း ]

Ch 93

တရုတ်သွေးစစ်စစ် (၂)

စွေ့ချီချောင်း ပြန်လာသောအခါ စွေ့ဟူက အာကာသ အမှိုက်ပုံတစ်ခုရှေ့တွင် ငေးမောကာ ထိုင်နေသည်။

"ဝမ်းကွဲအစ်ကို... မင်း အပါးခိုနေတာလား..."

စွေ့ချီချောင်းက သူ့ကိုမေးလိုက်သည်။ သူက အပြင်မထွက်မီ အသီးအနှံများကို မြေဩဇာထည့်ရန် စွေ့ဟူကို သတိပေးခဲ့၏။

စွေ့ဟူက အလျင်စလို အသက်ရှုကာ စွေ့ချီချောင်းကို မေးလိုက်သည်။

"မင်းရူးနေလား... အဲ့ဒါတွေကို ဘယ်လိုလုပ်ပြီး ရလာတာလဲ...."

သူက သူ့လည်ပင်းရှိ အရာကြောင့် ထွက်မပြေးဝံ့သော်လည်း သူတစ်ယောက်တည်း ရှိသည်နှင့် ပတ်ဝန်းကျင်ကိုလေ့လာကာ ထွက်သွားရန် အခွင့်အရေးတစ်ခုရှာနေလေသည်။

သူက ဦးစွာ သူ့လည်ပင်မှ ဗုံးအသေးစားလေးကို ဖယ်ရှားရန်ကြိုးစားသော်လည်း ၄င်းက အလုပ်မဖြစ်ပေ။ ထို့နောက် သူက အခန်းထဲတွင် ရှာဖွေပြီး ပုံစံအမျိုးမျိုးနှင့် ထုတ်လုပ်သည့် ခေတ်အမျိုးမျိုးတို့မှ လက်နက် အမျိုးမျိုးကိုတွေ့သောအခါ စိတ်ဓာတ်ကျလာ၏။ ၄င်းတို့မှာ သူ့ဝမ်းကွဲညီလေး ကောက်လာခြင်းဖြစ်နိုင်သည်။

သို့သော် ၄င်းက ဘာမှမဟုတ်သေးချေ။ ကြောက်စရာကောင်းသည်မှာ သူက သီးနှံများကို မြေဩဇာထည့်နေစဉ်တွင် အာကာသအမှိုက်ပုံတစ်ပုံကို ခေတ္တမျှ မွှေနှောက်ရှာဖွေလိုက်ရာ ထိုအပုံထဲတွင် အချို့သော ပစ္စည်းအထူးအဆန်းများတွေ့ခဲ့ပြီး ၄င်းတို့က အချို့ အဆောက်အဦး သို့မဟုတ် လေယာဉ်တို့၏ လက်နက်အထူးပြုစနစ်တစ်ခုနှင့် တူနေ၏။ သူက အကြိမ်အနည်းငယ် သေချာကြည့်လိုက်ပြီးနောက် ခြေထောက်များ ပျော့ခွေသွားတော့သည်။ အဘယ့်ကြောင့်ဆိုသော် ၄င်းတို့က အမှန်တကယ်ပင် အလွန်အန္တရာယ်များသည့် K921 စီးရီးမှ လက်နက်ခဲယမ်းများ ဖြစ်နေခြင်းကို တွေ့လိုက်သောကြောင့်ပင်။

ပုံစံအမျိုးမျိုးရှိသော လက်နက်တစ်စုံလုံးမှာ အလွန်အန္တရာယ်များလှ၏။ ဥပမာအနေဖြင့် စွေ့ဟူ၏ လေယာဉ်က ထိုကဲ့သို့ ကျည်ဆန် ၃ကျော့ကို ကာနိုင်မည် မဟုတ်ချေ။ ၄င်းတို့နှင့်ပတ်သတ်၍ အန္တရာယ်အများဆုံးအရာမှာ ၄င်းတို့က ပေါက်ကွဲပြီးနောက် အယ်လ်ဖာနှင့် အိုမီဂါများ၏ စိတ်ကျန်းမာရေးနှင့် ဂလင်းများကို ပျက်စီးစေခြင်းပင်။ တိတိကျကျဆိုရသော် ၄င်းတို့မှာ အယ်လ်ဖာများကို အဓိက ပစ်မှတ်ထားခြင်းဖြစ်သည်။ အဘယ့်ကြောင့်ဆိုသော် ကျွမ်းကျင် စစ်မြေပြင်ရှိ တိုက်ခိုက်သူများက အခြေခံအားဖြင့် အယ်လ်ဖာများ ဖြစ်နေခြင်းကြောင့်ပင်။

သို့ဖြစ်၍ K921စီးရီး ထုတ်ကုန်များ၏ သွင်ပြင်က တစ်ခုနှင့်တစ်ခုမတူသော်လည်း အခြားယမ်းမှုန့်များနှင့် နှိုင်းယှဉ်ပါက ၄င်းတို့၏ တမူထူးလှသော ယမ်းမှုန့်ဖော်မြူလာမှာ အယ်လ်ဖာနှင့် အိုမီဂါများသာ အနံ့ခံနိုင်သော ထူးထူးခြားခြား အနံတစ်ခုကို ထုတ်လွှတ်ပေးသည်။ သူသိသလောက်ဆိုလျှင် ထိုဖော်မြူလာမှာ လက်ရှိတွင် မပြုပြင်ရသေးချေ။ စွေ့ဟူသည်လည်း ၄င်းကို ယခင်က အနံ့ခံဖူး၍ တစ်ခါတည်းနှင့် မှတ်မိနိုင်သည်။

လက်ရှိတွင် ဂလင်းစနစ်ကို အနေအထားတစ်ခုအထိ ထိထိရောက်ရောက် ကာကွယ်နိုင်ပြီး K921ယမ်းမှုန့်အား ကာကွယ်နိုင်သော ကိရိယာ ရှိနေပြီးဖြစ်သည်။ သို့သော် သာမန်အခြေအနေများအောက်တွင် ထိုစီးရီး၏ ယမ်းမှုန့်များကိုလည်း မည်သူမှမရရှိနိုင်ပေ။ ဤကဲ့သို့ အရာများက ထုတ်လုပ်ရန် အတန်ပင်ခက်ခဲသည့်ပုံရသောကြောင့် မှောင်ခိုဈေးကွက်ထဲတွင်ပင် ရှာရန်ခက်ခဲ၏။ သို့ဖြစ်၍ တစ်ကြိမ်တွင် ရရှိနိုင်သော ထောက်ပံ့မှုက အလွန်နည်းပါးလေသည်။

မျှော်လင့်ထားသည့်အတိုင်းပင် စွေ့ဟူက သူ့လေယာဉ်ကို အနံ့ရသောအခါ ကြောင်အသွားသည်။ သူက အလွန်ကြောက်လန့် ရူးသွပ်နေ၍ သူ့ခြေထောက်များက လက်ရှိတွင် မတ်တပ်ရပ်ရန်အလွန်ပျော့ခွေနေလေသည်...

ထိုအရာများကို မတော်တဆ ဖောက်ခွဲမိပါက သူတို့အတွက် အလွန် အန္တရာယ်များပေသည်။ ကံကောင်း၍ သေဆုံးခြင်းမှ လွတ်မြောက်နိုင်လျှင်ပင် ဂလင်းပျက်စီးမှုက ပြန်ကောင်းနိုင်မည် မဟုတ်ပေ။ ထိုလူ၏ ဖယ်ရိုမုန်းများက ပေါက်ထွက်လာပြီး ဖရိုဖရဲနှင့် မတည်မငြိမ်ဖြစ်လာကာ အပြင်းအထန် ထိခိုက်ဒဏ်ရရပေလိမ့်မည်။

"ငါ ကောက်လာတာ..."

စွေ့ချီချောင်းက ပြန်ဖြေလိုက်သည်။

စွေ့ဟူက လုံးဝ မယုံကြည်ပေ။

"အဓိပ္ပာယ်မရှိတာတွေ... ဘယ်သူက K921 ယမ်းတွေကို လွင့်ပစ်ပြီး မင်းကို ကောက်ခွင့်ပြုမှာလဲ... အဲ့အစား မြေအောက်ခန်းတစ်ခန်း ကောက်ရတယ်လို့ ဘာလို့မပြောတာလဲ..."

သို့သော် စွေ့ချီချောင်းက အမှန်ပင် ၄င်းတို့ကို ကောက်လာခြင်းဖြစ်၏။ မြေအောက် လက်နက်ကိုင်အဖွဲ့များက ဤလူသူမဲ့ ဂြိုလ်ပေါ်တွင် K921 ဓာတုပစ္စည်းများ ပါဝင်နေသော လက်နက်အချို့ထားခဲ့လေသည်။ စွေ့ချီချောင်းသည်လည်း ဤဂြိုလ်ပေါ်ရှိ တစ်ယောက်ယောက်က ထိုလက်နက်များကို သီးသန့် လေလာနေသည်လား မသေချာပေ။ ထို့အပြင် သူက ထိုလက်နက်များကို ပေါ့ပေါ့ပါးပါး တည်ဆောက်ထားခြင်းသာဖြစ်သည်။ သူကိုယ်တိုင် လုပ်ထားခြင်းဖြစ်ရာ အန္တရာယ်များမှုက တိကျမှုမြင့်မြင့်နှင့် ထုတ်လုပ်ထားသော သာမန် ခဲယမ်းများလောက် ကောင်းမည်မဟုတ်ဟု မျှော်လင့်ထား၏။

စွေ့ချီချောင်းက စွေ့ဟူကို ထူပေးလိုက်သည်။

"မင်းအလုပ်ဘယ်လောက် ပြီးပြီလဲ..."

စွေ့ချီချောင်းက စကားလမ်းကြောင်းလွှဲနေဆဲဖြစ်သည်ကို ကြားပြီးနောက် စွေ့ဟူက ဝမ်းနည်းဒေါသထွက်မှုများဖြင့် ပြည့်လာပြီး သူအတန်ကြာအောင် မျိုးသိပ်ထားရသော စကားများက ပေါက်ထွက်လာလေသည်။

"ငါ တစ်ဧက ရေလောင်းပြီးပြီး... အဲ့ဟာတွေက အရမ်း အန္တရာယ်များတယ်... မင်း တခြားနေရာမှာ ထားလို့ရမလား... ဒီမှာ မထားပါနဲ့..."

စွေ့ချီချောင်းက တစ်မိနစ်ခန့် တွေးတောလိုက်ပြီး ဆိုလိုက်သည်။

"အဲ့ဒါဆို ဘယ်နားမှာ ထားသင့်လဲ ဝမ်းကွဲအစ်ကို..."

စွေ့ဟူက ချောင်းဟန့်လိုက်သည်။ ဤနေရာတွင် နေရာလပ်တစ်ခုတည်း ရှိကာ အတွင်းပိုင်းနေရာလပ်က အကန့်အသတ်ရှိနေသည်မှာ အမှန်ပင်။ စွေ့ဟူသည်ပင် စားပွဲများထပ်ကာ အိပ်ရန် အိပ်ရာလုပ်ထားရ၏။

အဲ့ဒါက သူတို့က ဒီလက်နက်တွေကို အာကာသ စခန်းထဲမှာ ဆက်ပြီး သိမ်းထားရမယ်လို့ ဆိုလိုတာလား... အဲ့ဒါပိုကြောက်စရာကောင်းတယ်လေ...

"ဒါမှမဟုတ် မင်းလည်း အဲ့ဒါတွေကို ဖျက်ပစ်လိုက်လို့ရတာပဲ.... ဟုတ်တယ်မလား... အဲ့ဒါတွေကို ဖျက်ပစ်လိုက်စမ်းပါ... အဲ့ဟာတွေကို ငါ့ဘေးမှာထားပြီး ငါ ညမအိပ်ရဲဘူး... အဲ့ဒါတွေ မတော်တဆပေါက်ကွဲသွားရင် ဘယ်လိုလုပ်မလဲ... အဲ့အချိန်ကျရင် ငါတို့က ထွက်ပြေးဖို့အချိန် ရှိမှာတောင် မဟုတ်ဘူး...."

စွေ့ဟူက ချွေးစေးများ ပြန်လာတော့သည်။

သူက ထိုလက်နက်များ ရှိနေသည်ကို မသိသေးသည့်အချိန်က ဤနေရာတွင် သက်သောင့်သက်သာ နေနိုင်၏။ သို့သော် ယခုတွင် ၄င်းတို့ကို သိသွားရာ ဤကိစ္စကို မည်သို့တွေးတွေး ကြောက်လန့်သည်ဟု ခံစားရသည်။ သူ့ဝမ်းကွဲညီလေးက အမှန်တကယ်ပင် ရူးနေလေပြီ။

သူ ဒီလိုနေရာမျိုးမှာ ဘယ်လိုလုပ်ပြီး အပူအပင်ကင်းကင်း နေနိုင်တာလဲ... မဟုတ်သေးဘူး... သူက ဘယ်လိုလုပ်ပြီး ဒီလောက် အန္တရာယ်များတဲ့လက်နက်တွေကို သူ့တံခါးအပြင်မှာထားပြီး အဲ့လက်နက်တွေဘေးမှာ နေ့တိုင်း အိပ်ပြီး လယ်စိုက်နိုင်တာလဲ...

ထို့အပြင် သူနားလည်ထားသော စိတ်ဓာတ်ကျစရာ ကိစ္စတစ်ခုလည်း ရှိသေး၏။ ထိုလက်နက်ခဲယမ်းများကို တွေ့ရှိပြီးနောက် သူ့စိတ်ထဲတွင် သူ့မိသားစုက သူ့ကို ဤဂြိုလ်ပေါ်မှ အောင်အောင်မြင်မြင် ကယ်တင်နိုင်ပါ့မလားဆိုသည့် မေးခွန်းအကြီးကြီးတစ်ခုလည်း ပေါ်လာပေသည်။

"အဲ့ဒါတွေက ဘယ်လိုလုပ်ပြီး ပေါက်ကွဲနိုင်မှာလဲ.... ဘာမှ မဖြစ်ရင် ငါက လက်နက်တွေကို ထိမှာတောင် မဟုတ်ဘူး..."

စွေ့ချီချောင်း အသုံးပြုနေသော လေသံမှာ ချက်ပြုတ်ရေး စက်က မပေါက်ကွဲသည်ကို စွေ့ဟူအား နှစ်သိမ့်ပေးနေသကဲ့သို့ပင်။ သူ့လေသံက အလွန် နိမ့်ပြီး ထို့နောက်တွင် စွေ့ဟူကို အလုပ်လုပ်ရန် ခေါ်သွားလိုက်သည်။ ယခုတွင် စွေ့ဟူက သူ့လက်ကို အသုံးပြုမည့်အစား လေယာဉ်ကို အရှေ့အနောက်မောင်းနှင်ပြီး လေထဲတွင် လယ်စိုက်ခြင်းကို ပြုလုပ်နိုင်ပြီဖြစ်သည်။

စွေ့ဟူက အလွန်ဒေါသထွက်နေ၍ စွေ့ချီချောင်းက သူ့လေယာဉ်ကို မြေဩဇာများဖြင့် ဖြည့်ထားသည်ကိုပင် ဂရုမစိုက်နိုင်တော့ချေ။ ယခုက အားလုံး ပြီးဆုံးသွားပြီဖြစ်ကာ သူ့ဝမ်းကွဲညီလေးမှာ သူ့ကို ထာဝရ ဖမ်းဆီးထားတော့မည် ဖြစ်သည်။

လေယာဉ်၏ အလုပ်လုပ်နိုင်စွမ်းက လူသားခန္ဓာကိုယ်ထက် များစွာမြင့်မား၏။ ၂၀မူကျော်ကျော်မှာ မြေဩဇာကို ရေရောရသည့် အချိန်အပါအဝင် ၁၀မိနစ်အတွင်းပင် ပြင်ဆင်ပြီးသွားလေသည်။

စွေ့ချီချောင်းက အရေးပေါ်နှင့် ရှည်ကြာလှသော ဆောင်းရာသီတို့အတွက် အချိန်အကြာကြီးသိမ်းထားနိုင်သည့် စည်သွပ်ဘူးများနှင့် အာဟာရအရည်များ ကဲ့သို့ သူလဲလှယ်ခဲ့သော ပစ္စည်းများ အားလုံးကို အအေးခံထားလိုက်သည်။ ဤလူသူမဲ့ ဂြိုလ်ပေါ်ရှိ ရာသီဥတုမှာ အခြေခံအားဖြင့် ရာသီဥတု ၃ခု ပိုင်းခြားထားသည်။ နွေဦးနှင့် နွေရာသီတို့က အနည်းငယ် ပိုကြာသော်လည်း နှစ်ဝက်ကျော်ကျော်ခန့်သာဖြစ်သည်။ ၄င်းတို့က စုစုပေါင်း ၈လခန့်ကြာပြီး ကျန်အချိန်များက ဆောင်းရာသီ ဖြစ်၏။

လီဆာက စွေ့ချီချောင်းအား ဆားနှင့် သကြားအချို့လည်း ပေးခဲ့သည်။ ပမာဏက အလွန်မများကာ သူမ ပေးခဲ့သော သကြားမှာ အထုတ်သေးလေး တစ်ထုတ်ထဲတွင်သာဖြစ်သည်။ ၄င်းကို ဖန်ဘူးအသေးလေးတစ်ခုထဲတွင် သိမ်းထားလိုက်သည်။ စွေ့ချီချောင်းက ဖန်ဘူးကို မဖွင့်မီ အလေးချိန်ချိန်ကြည့်လိုက်ပြီး သူ့လက်ချောင်းပေါ်တွင် ဆားအနည်းငယ်တို့ကာ မြည်းကြည့်လိုက်သည်။ ထို့နောက် သူက ရုတ်တရက် ထရယ်တော့သည်။

စွေ့ဟူက တုန်ယင်သွားပြီး စွေ့ချီချောင်း၏ လက်ရှိ သွင်ပြင်မှာ သူ့မျက်လုံးထဲတွင် အရူးတစ်ယောက်နှင့် သိပ်မခြားပေ။

" မင်းဘာရယ်နေတာလဲ..."

"ဒီ လူသူမဲ့ဂြိုလ်ပေါ်မှာ ဆားရှိတဲ့ပုံပဲ..."

စွေ့ချီချောင်းက ဖန်ဘူးကို အဖုံးပိတ်ကာ ဆိုလိုက်သည်။

၄င်းက ဆာလဖိတ်ဖြစ်စေ၊ ကလိုရိုက်ဖြစ်စေ၊ ပါကလိုရိတ်ဖြစ်စေ ပင်လယ်ရေပင်ဖြစ်စေ ဤနေရာတွင် သေချာပေါက် ဆားဟူသော ဒြပ်တစ်ခုက ပုံစံတစ်ခုနှင့် ရှိနေပေ၏။

"မင်းက ဘယ်လိုလုပ်သိတာလဲ..."

စွေ့ဟူက နားမလည်ချေ။

"ဒီဆားကို ကိုယ့်ဘာသာ လုပ်ထားတာ သေချာတယ်... သူတို့မှာရှိတဲ့ တခြားအစားအသောက်တွေက သေချာထုတ်ပိုးထားပြီး သူတို့ပေးတဲ့ သကြားကလည်း ရောင်းတန်း သကြား... ဒါပေမဲ့ ဒီဆားက အရမ်း အကြမ်းဆန်တယ်... ငါခုဏကတင် မြည်းကြည့်လိုက်တာ... အဲ့ဒါက ပထမအဆင့် သန့်စင်ထားတာပဲ ရှိသေးတာ...."

စွေ့ချီချောင်းက ဆိုလိုက်သည်။

ဤဂြိုလ်ပေါ်တွင် ဆားရှိပြီး လူမနေ၍ အခြားသူများက သဘာဝအတိုင်းဖြစ်ပေါ်နေသည့် ဆားများကို ရှာပြီး စားနိုင်သည့် ဆားအဖြစ် ပြောင်းနိုင်ပါက သူလည်း လုပ်နိုင်မည်ဖြစ်သည်။ သူက လီဆာကိုရှာပြီး ဆားမည်သည့်နေရာက ရလာသည်ကို မေးရန်ပင် မလိုချေ။ ဤနေရာတွင် ဆားများစွာရှိသော နေရာက တစ်နေရာတည်း မဖြစ်နိုင်ပေ။

ဆားနှင့် သကြား လုံလုံလောက်လောက်ရှိပါက ဆောင်းတွင်းအတွက် အစားအသောက် ထိန်းသိမ်းရန်မှာ များစွာပိုလွယ်သွားနိုင်၏။ အသီးများကို ယိုထိုး၍ရပြီး အသားများကို ဆားရည်စိမ်ထား၍ ရပေသည်။

စွေ့ချီချောင်းမှာ ပြောင်းနှံစားပင် ရရှိခဲ့၍ သာမန်ထက် စိတ်အခြေအနေကောင်းနေရာ အပြင်ထွက်ပြီး ဆားရှာရန် ဆုံးဖြတ်လိုက်သည်။

သူက ဦးစွာ ပြောင်းနှံစားပင်များအားလုံးကို ထုတ်ကာ ပိုကောင်းသည့် အမျိုးအစားများကို ရွေးချယ်လိုက်သည်။ ထို့နောက် သူ့ လက်ထဲတွင် ပြောင်းနှံစားပင် ၄ကီလိုဂရမ်ကျော်ကျော် ရှိနေပြီး ၄င်းတို့ကို စိုက်ပါက မြေ ၂ဧကမှ ၃ဧကအထိ လိုပေလိမ့်မည်။

စွေ့ချီချောင်းက ပြောင်းနှံစားစေ့ မည်မျှကို စိုက်နိုင်သည်ကို မသိသော်လည်း ၁မူလျှင် အနည်းဆုံး ကီလိုဂရမ် ရာကျော် ရိတ်သိမ်းနိုင်မည်ဟု တွက်ဆမိသည်။ ၄င်းက ၄လအနည်းငယ်ကျော်လျှင် ရင့်လာမည်ဖြစ်၍ ဆောင်းရာသီမရောက်မီ ရိတ်သိမ်းနိုင်သည်ဟု အာမခံနိုင်ပေသည်။

၄င်းတို့ ရိတ်သိမ်းရန် အဆင်သင့် ဖြစ်သည့်အခါ လီဆာနှင့် အခြားသူများ ဤဂြိုလ်ပေါ်တွင် ရှိနေဆဲဆိုလျှင် စွေ့ချီချောင်းက သူတို့ကို အနည်းငယ် ရောင်းနိုင်ပေမည်။ နွေဦးရှိ ပြောင်းနှံစားပင် ၄ကီလိုဂရမ်က ဆောင်းရာသီတွင် ၄၀ ကီလိုဂရမ်ဖြစ်လာပေမည်။

စိတ်ဝင်စားစရာကောင်းလိုက်တာ....

သူတို့က ဤနေရာရှိ စိုက်ပျိုးနယ်မြေကို အသုံးပြုနိုင်သည်။ ပြောင်းနှံစားပင်က ကြီးထွားစဉ်အတွင်း မိုးခေါင်ရေရှားမှုကို ခံနိုင်ရည်ရှိပြီး ရေအများအပြားမလိုအပ်သော်လည်း သူက လုံလောက်သော အစိုဓာတ်ကို သေချာအောင်ပြုလုပ်ရပေမည်။ အဓိကမှာ မြေဆီလွှာ အစိုဓာတ်ပင်။

စွေ့ချီချောင်း၏ ရေလှောင်ကန်ထဲမှ ရေက သိသိသာသာပင် မလုံလောက်၍ သူက အပူချိန်ပြောင်းလဲမှုကို ခံနိုင်ရန် ရေကန်မှ ရေများကို စွေ့ဟူ၏ လေယာဉ်ကိုသုံးကာ သယ်ပို့ရန်လိုပေသည်။ ဤအချိန်အတွင်း သူက မြေဩဇာလည်းထည့်ပြီး ရေများကို စိမ်ကာ အညှောင့်ပေါက်ရန် တွန်းအားပေးပြီး အပင်ပေါက် ထွက်နှုန်းကို တိုးပွားစေနိုင်သည်။ နောက်ဆုံးတွင် ၄င်းတို့ကို ပျိုးကြဲလိုက်မည် ဖြစ်သည်။

ပြောင်းနှံစားပင်က မြေဩဇာမထည့်ထားသည့် မြေကြီးကို ဆန့်ကျင်သော်လည်း အထွက်တိုးလိုလျှင် သူအသုံးပြုသော မြေဩဇာ ပမာဏကို ချွေတာ၍မရပေ။ စွေ့ချီချောင်းက မြေဩဇာအလုံအလောက် မရှိသလောက်ဖြစ်နေ၏။

အရည်အသွေးနိမ့် အစေ့များကို အခွံခွာကာ ကြိတ်ပြီးနောက် တိုက်ရိုက်စားသုံးနိုင်သည်။ ထိုအချိန်တွင် ကျန်သည့် ပြောင်းနှံစားစေ့များကို မြေ၂မူပေါ်တွင် စိုက်ထားလိုက်သည်။

စွေ့ဟူက စွေ့ချီချောင်းနှင့် အတူ အလုပ်လုပ်ပြီး ထိုလက်နက်များကို တွေ့သောအခါ ပို၍ ကြောက်လာ၏။ သူက သူ့ဝမ်းကွဲညီလေးမှာ အတန်ပင် ရူးသွပ်သည်ဟု အမြဲလိုလို ခံစားနေရ၏။ တစ်နေ့နေ့တွင် သူ့ဝမ်းကွဲညီလေးက လူတိုင်းကို အထိတ်တလန့်ဖြစ်စေပေမည်။ သို့သော် သူက သူ့အသက်ကို တစ်ရက်ခန့်ပို၍ ထိန်းသိမ်းထားနိုင်လျှင်ပင် သူ မညည်းတွားနိုင်ချေ။ စွေ့ချီချောင်း သူ့ကို လုပ်ခိုင်းသမျှ သူလုပ်မည်ဖြစ်သည်။ သူ့လက်ရှိအခြေအနေမှာ အဓိပ္ပာယ်မဲ့သော ဘဝတစ်ခု၏ စံနမူနာဖြစ်သည်။

ဤသည်က စွေ့ဟူ၏ ပထမဆုံးအကြိမ် ပျိုးကြဲခြင်းလည်းဖြစ်သည်။ ဤအလုပ်မှာ ဆလပ်ရွက် ခူးခြင်းထက် များစွာခက်ခဲသည်ဟု ပြော၍ ရပေသည်။ ပျိုးကြဲသည့်အချိန်တွင် တစ်ချို့သော စံနှုန်းများကို လိုက်နာရပေသည်။

စွေ့ချီချောင်းက ဆိုလိုက်သည်။

"မဟုတ်ဘူး... မဟုတ်ဘူး... ပျိုးကြဲတဲ့ အနက်က မြေကြီးထဲကို ၁.၆၃၇ စင်တီမီတာ ရှိရမှာ... မင်းစိုက်လိုက်တဲ့ တချို့ အစေ့တွေက ၃ စင်တီမီတာ ကျော်နေတယ်... အရမ်းကြီး နက်နက် ပျိုးစေ့ပိုကြဲလိုက်ရင် အပင်ပေါက်တာ နှေးပြီး အစေ့တွေက အာဟာရတွေ အလကား ကုန်သွားလိမ့်မယ်... ပြောင်းနှံစားပင်ပေါက်တွေက သေးလို့ မြေကြီးထဲက ထွက်မလာနိုင်ဘူးဆိုတာ ပြောစရာတောင်မလိုဘူး..."

စွေ့ဟူ - "..."

စွေ့ဟူ - "ငါ့ဆီမှာ တက်မကျင် မရှိဘူးလေ... ဘယ်လိုလုပ်ပြီး အစေ့တွေကို ၁.၆၃၇ စင်တီမီတာ အတိအကျ စိုက်ရမှာလဲ..."

( တက်မကျင်ဟူသည်မှာ စိုက်ပျိုးရန် အသုံးပြုနိုင်သည့် ပျော့ပျောင်းသော၊ ကျစ်လျစ်သော မြေဆီလွှာကို ဖြိုခွင်းရန် ဒီဇိုင်းထုတ်ထားသော ဥယျာဉ်ထွန်စက်အမျိုးအစား တစ်မျိုးဖြစ်သည် )

စွေ့ချီချောင်းက မျက်မှောင်ကြုတ်လိုက်သည်။

"ထားလိုက်တော့... သွားပြီး နားနေတော့..."

သူ့တွင် ပြောင်းနှံစားပင် ပမာဏ အကန့်အသတ်နှင့် ရှိနေရာ စွေ့ဟူအား အပင်ပေါက်နှုန်းကို သက်ရောက်ခွင့် မပြုနိုင်ချေ။

"......."

စွေ့ဟူမှာ သူ့ဘဝတွင် ပထမဆုံးအကြိမ်အဖြစ် အားငယ်သွာသည်။ သူက ဒေါသတကြီး ဆိုလိုက်သည်။

"အဓိပ္ပာယ်မရှိတာ... ငါထင်တာတော့ မင်းစိုက်တာ မြေကြီးထဲကို ၂စင်တီမီတာလောက် ရှိတယ်... ငါက မင်းပြောတဲ့အတိုင်း စိုက်နေတာပဲ..."

စွေ့ချီချောင်းက သူ့အား ၁.၆၃၇ စင်တင်မီတာ အနက် စိုက်သင့်သည်ဟု ပထမဆုံး ပြောစဉ်က သူက စွေ့ချီချောင်းကို လှောင်ပြောင်လိုက်သည်။ စွေ့ချီချောင်းက ပျိုးစေ့များကို မတိုင်းတာဘဲ စိုက်သည့်အခါ စွေ့ဟူက သူ့နောက်လိုက်ပြီး သူမည်မျှ နက်နက် စိုက်နေသည်ကို လေ့လာလိုက်သည်။ မသိသောလူများက စွေ့ချီချောင်းက စွေ့ဟူနှင့် ပြိုင်နေသည်ဟု ထင်ကြပေမည်။

စွေ့ချီချောင်းက စွေ့ဟူကို ဂရုမစိုက်ဘဲ အစေ့များကို ဆက်လက် စိုက်ပျိုးနေသည်။ ရှောင်ပိုင်က အစေ့အိတ်တစ်အိတ်ကိုကိုင်ပြီး သူ့နောက်မှ လိုက်လာသည်။

"မင်း ငါ့ကို မစိုက်စေချင်ရင် ငါက ပိုတောင် ပျော်သေးတယ်..."

စွေ့ဟူက တစ်ကိုယ်တည်း ဆိုလိုက်သည်။ ကုန်းရိုးပေါ်တွင် အတန်ကြာအောင်ထိုင်ပြီးနောက် စွေ့ချီချောင်း သူ့အား မှတ်ချက်ပေးခဲ့သည်နှင့် ပတ်သတ်၍ ပိုပြီးမကျေမနပ်ဖြစ်လာလေသည်။ သူက သစ်ကိုင်းတစ်ခုကို တိတ်တဆိတ်ယူကာ စွေ့ချီချောင်းမြှုပ်ထားသော အစေ့များပါဝင်သည့် မြေကြီးထဲကို ထိုးထည့်ကာ ထပ်မံတိုင်းကြည့်လိုက်သည်။

ပြသသော အချက်အလက် - ၁.၆၃၇ စင်တီမီတာ... ၁စင်တီမီတာပင် မနည်း…

စွေ့ဟူ - "ငလူး..."

မဟုတ်ဘူး... မယုံဘူး...

စွေ့ဟူက နောက်လှည့်ကာ စွေ့ချီချောင်းဆီသို့ ပြေးသွားလိုက်သည်။

"မင်းသွားလေရာ ဘယ်လောက်နက်နက် စိုက်သလဲဆိုတာ တိုင်းလို့ရတဲ့ ကိရိယာတစ်ခု ယူလာတယ်မလား.... မင်းမှာ ပျိုးကြဲတဲ့ စက်အသေးလေး ရှိနေတာတော့ မဟုတ်ဘူး မဟုတ်လား... မင်းလက်ကို ငါ ကြည့်ကြည့်မယ်..."

ကြောင်က မကျေနပ်ဟန်ဖြင့် စွေ့ဟူကို နှာမှုတ်ကာ စွေ့ဟူ၏ ခြေထောက်ကို ပတ်နေလေသည်။

စွေ့ဟူ - "...."

ဒီကြောင်က ငါ့ကို ပစ်မှတ်ထားနေသလို ခံစားရတယ်...

🍀🍀🍀

Prev Next