MM Story Teller

Chapter 115

Viewers 6k

🌱 Arc 3 - [ကြယ်တာရာခေတ် ABOကမ္ဘာတွင် လယ်စိုက်ခြင်း ]

Ch 115

တိုင်းတစ်ပါးဂြိုလ်များထံ ကုန်ပစ္စည်းတင်ပို့ခြင်း(၂)

အေးဂျင့်က အပြင်တွင် ခဏမျှမတ်တပ်ရပ်နေပြီးနောက် ထူးဆန်းသည့်မျက်နှာထားဖြင့် ပြန်ဝင်လာလေသည်။ ထိုသူက မပြောမီ စကားလုံးများကို ပြန်စီစဥ်လိုက်၏။ "ကျွန်တော်မေးပါရစေ...ဆလပ်ရွက်ကို မြည်းကြည့်လို့ရမလား...တစ်ကီလိုကို ဘယ်လောက်ကျလဲ...လိုသလောက်ဝယ်လို့ရလား..."

ယခုလေးတင် သူက တစ်ဖက်အလုပ်ရှင်ကိုဖုန်းခေါ်ခဲ့ပြီး တစ်ဖက်မှလည်း လက်နက်မရောင်းသည့်အကြောင်း ပြန်ပြောခဲ့သည်။ ထိုအစား ဆလပ်ရွက်ဝယ်ရန် စိတ်ဝင်စားခြင်းရှိမရှိသာ မေးခဲ့သည့်အကြောင်း ပြောပြလိုက်သည်။

အလုပ်ရှင်က စိတ်ရှုပ်လာပြီး သူ့အား နှစ်ကြိမ်ပင်ဆဲဆိုသွားခဲ့သည်။ အေးဂျင့်က သူစိတ်မဝင်စားလျှင် နောက်တစ်ယောက်ရှာလိုက်မည့်အကြောင်းပြောလိုက်သည့်အခါ အလုပ်ရှင်က သူ့ကိုတားကာ ပြောလိုက်သည်။

"နေဦး...ငါသိချင်နေလို့ပါ...အန္တရာယ်ရှိတဲ့ကြေးစားအဖွဲ့က ဘယ်လို အသီးအရွက်တွေစိုက်နေတာလဲ...XX ကဝယ်လာတဲ့အရည်အသွေးမြင့်အသီးအရွက်တွေနဲ့ ကွာလား...သူတို့ရဲ့နောက်ဆုံးပေါ်နည်းပညာကရော ဘယ်လိုလဲ..."

အေးဂျင့်က အသိစိတ်လွတ်နေသည့်ပုံစံဖြင့် ပြန်ဝင်လာသည်။ အလုပ်ရှင်လိုအပ်သည့်စာရင်းများကို အသေးစိတ်စီစဥ်ပေးရန်မတောင်းဆိုမီအထိ သူ ဝဲလ်နှင့်စကားပြောရာတွင် စိတ်နှင့်ကိုယ်မကပ်ခဲ့ပေ။ သူ၏အလုပ်ရှင်က လက်နက်ဝယ်ချင်နေရာမှ ချက်ချင်းပင် ဆလပ်ရွက်များဘက်သို့စိတ်ပြောင်းသွားရသည့် အကြောင်းအရင်းကိုလည်းမသိရှာပေ။

စွေ့ချီချောင်းက ထွက်လာရန်မသင့်တော်၍ ဝဲလ်ကသာ အေးဂျင့်ကို အစားအသောက်နှင့် ဧည့်ခံလိုက်ရသည်။ စွေ့မိသားစုကြောင့် သူ၏ဓာတ်ပုံကိုမူ နေရာမရွေးတွေ့နိုင်၏။ စွေ့ချီချောင်းအား ရည်ရွယ်ချက်ဖြင့်ရှာဖွေချင်သူရှိခဲ့လျှင် သူတို့၏ဆက်နွယ်မှုကိုစစ်ဆေးပြီးမှ သိနားလည်နိုင်လိမ့်မည်။ သို့ဖြစ်၍ ပထမဆုံးအကြိမ်အဖြစ် ဝဲလ်က သဘာဝကျပြီးချောမွေ့စွာဖြင့် သူ၏စံပြပုဂ္ဂိုလ်ဖြစ်လာခဲ့သည်။

သူ့နေရာတွင် ဆလပ်ရွက်သုမက ကန်စွန်းဥများကိုလည်းစိုက်ပျိုးထားသည်၊ ကြက်သွန်မြိတ်နှင့် အခြား ကိုယ်တိုင်ကြီးထွားနိုင်သော အသီးအရွက်များအပြင် ပြောင်းဆန်များလည်းပါသေး၏။ သို့ထိတိုင် ဆလပ်ရွက်က ကြီးထွားမြန်သောကြောင့် အဆိုပါဆလပ်ရွက်က အကြီးဆုံးထုတ်ကုန်ဖြစ်နေရသည်။ သို့ဖြစ်ရာ သူတို့မှာ အချိန်တစ်ခုအထိ ဆလပ်ရွက်ရောင်းဝယ်ရေးတစ်ခုတည်းကိုသာ ဆွေးနွေးနိုင်လေသည်။ တစ်ဖက်သူထံ အခြားသောအသီးအရွက်များနှင့် ဆန်များကိုရောင်းချရန်အခွင့်အရေးလည်းရှိ၏။ သို့ထိတိုင် ယခု ဆလပ်ရွက်အနည်းငယ်ကို အေးဂျင့်ထံပေးပို့ရန် ဆုံးဖြတ်လိုက်သောကြောင့် ထိုသူက မြည်းစမ်းကြည့်ခွင့်ရပေမည်။

အေးဂျင့်က ဆလပ်ရွက်၏အာဟာရတန်ဖိုးကို စမ်းသပ်ကြည့်ပြီးနောက် စိတ်ကျေနပ်စွာဖြင့် ခေါင်းညိတ်ပြပြီး အလုပ်ရှင်ထံ စာပို့လိုက်၏။

"အိုကေ...ငါတို့ဈေးနဲ့ပမာဏကို ဆွေးနွေးလို့ရပြီ..."

ဝဲလ်၏မျက်လုံးများမှာ ကြယ်ရောင်များသဖွယ် မှိတ်တုတ်မှိတ်တုတ် ဖြစ်သွားလေ၏။

"အဲဒီအကြီးအကဲက ပိုက်ဆံနဲ့ရောင်းဝယ်မှာ မဟုတ်ဘူး..."

အေးဂျင့်ကလည်း ဝဲလ်၏စကားကိုနားလည်သည်။ အဖွဲ့က ကုန်ဖလှယ်ရာတွင် ငွေကြေးကို အသုံးမပြုသောကြောင့် သူတို့က အတွေ့အကြုံရှိသော ကုန်သည်များဟု သွယ်ဝိုက်ညွှန်းဆိုနေသည်။ သူ၏ဖောက်သည်များကလည်း အနုပညာပစ္စည်းများ၊ အဖိုးတန်ရှားပါးသတ္တု စသဖြင့်သုံးကာ ကုန်သွယ်တတ်ကြသည်။

စွေ့ချီချောင်း ပထမဆုံးထွန်ယက်စိုက်ပျိုးထားသော ဆလပ်ရွက်များက ကောင်းမွန်ပြီး ထုတ်ကုန်အရည်အသွေးကလည်း စံချိန်ပြည့်မီသည်။ သူ၏ ဂရုတစိုက်စောင့်ရှောက်မှုနှင့် လယ်ဧကတစ်မုကို ကီလိုဂရမ်သုံးထောင်အထိ စိုက်ပျိုးနိုင်ခဲ့သည်။ အေးဂျင့်ကမူ ကီလိုဂရမ်တစ်သိန်းကို ဦးဆုံးဝယ်ယူခဲ့၏။ ဤသည်မှာ မုသုံးဆယ်စာ ထုတ်ကုန်ပမာဏပင်။

စွေ့ချီချောင်းက ဆောင်းရာသီရောက်မှ ရိတ်သိမ်းမည့်စက်များကိုတည်ဆောက်တတ်သည်။ စက်များနှင့်သာဆိုပါက အသီးအနှံပင်အများစုကို မပင်ပန်းဘဲ ရိတ်သိမ်းနိုင်ပေမည်။ စက်များအသုံးပြုကာ ရိတ်သိမ်းနေချိန်တွင် သူက ဆလပ်ရွက်များကို စုစည်းနိုင်လိမ့်မည်။

လယ်ယာစိုက်ပျိုးရေးစက်က လယ်ကွင်းထဲတွင် အလုပ်အများဆုံးပင်။ စက်ရုပ်များက ဆလပ်ရွက်များကိုသယ်ရန် လေယာဥ်များအဖြစ်ပြောင်းလဲထားပြီး ကတုံးများက ဝဲလ်၏အခြေစိုက်စခန်းသို့ရောက်သည်အထိ ကုန်စည်များကိုပို့ဆောင်ရာတွင် လိုက်ပါစောင့်ကြပ်ပေးကြသည်။

အေးဂျင့်သည်လည်း သူ၏လူများနှင့် လေယာဥ်စီးကာ အချိန်မီရောက်လာလေ၏။ အေးဂျင့်မှာ လေယာဥ်က မြေပေါ်သို့ အဆင်ပြေချောမောစွာ ဆင်းသက်လာချိန်တွင် အလေးအနက်ထားသည့်အမူအရာ ဖြစ်နေလေသည်။ ထို့နောက် သန်မာသည့်လူအမြောက်အများက မြေပြင်ထက်သို့ ခုန်ဆင်းလာကြ၏။ အေးဂျင့်အနောက်တွင်မူ ဘော်ဒီဂတ်ဟုထင်ရသော လူသုံးယောက်ပါလာသည်။ သူတို့၏မျက်နှာများမှာလည်း သံတုံးများပမာ တင်းမာနေလေ၏။

ယနေ့တွင်အနည်းငယ် လေထန်နေသည်။ လေက လူတိုင်း၏အဝတ်များအပေါ်မှ တိုက်ခတ်သွားပြီး အဝတ်အစားများက တလူလူလွင့်နေလေတော့သည်။ အေးဂျင့်က အရှေ့ဆုံးမှတက်လာပြီး ကတုံးခေါင်းဆောင်ကိုခေါင်းညိတ်ပြလိုက်သည်။

"မင်းတို့ဘော့စ်နဲ့မတွေ့နိုင်တာ စိတ်မကောင်းစရာပဲ..."

ကတုံးက ခံစားချက်မဲ့သည့်မျက်နှာဖြင့် ပြန်ဖြေလာသည်။ "ကျွန်တော်တို့ဘော့စ်က ဘယ်သူနဲ့မှမတွေ့တတ်ပါဘူး..."

"ဒီလူကြီးမင်းက အရမ်းဂရုစိုက်တတ်တာပဲနော်...ဒါပေမဲ့ တစ်ခါတစ်လေတော့ သူပရိုဖက်ရှင်နယ်ကျကျ ယုံကြည်မှုရှိသင့်တယ်..."

အေးဂျင့်က သူ့ကိုယ်သူအကြောင်းပြောနေချိန်တွင် ယုံကြည်မှုအပြည့်ဖြင့်ပြုံးနေလေ၏၊ ထိုသူမှာ အနှီစကားခေါင်းစဥ်မှလွဲပြီး ထပ်မပြောဘဲ လိုရင်းကိုအမြန်ပြောလိုက်သည်။

"ငါ့ရဲ့ပစ္စည်းတွေကို စစ်ကြည့်လို့ရမလား..."

"ကြွပါ..."

မကတုံးက လုပ်နေကျအတိုင်းဆက်လုပ်သွားခဲ့သည်။ သူလက်ဆန့်လိုက်သည်နှင့် အနောက်မှတံခါးက ပွင့်လာပြီး အထဲမှကုန်ပစ္စည်းများ ပေါ်လာခဲ့သည်။ သူက တစ်ဖက်လူကိုအနီးကပ်ကြည့်စေပြီး သူတို့၏လှုပ်ရှားပုံကိုကြည့်ကာ ရှင်းပြလိုက်သည်။

"ဒါတွေက လတ်ဆတ်ပြီးနူးညံ့တဲ့ကုန်ပစ္စည်းတွေပါ... ကြည့်ချင်သလောက် စစ်ဆေးကြည့်လို့ရပါတယ်..."

အေးဂျင့်က လက်အိတ်ဝတ်ပြီး ကုန်ပစ္စည်းများကိုအလျဥ်းသင့်သလိုစစ်ဆေးလိုက်သည်။ ဦးဆုံး ပစ္စည်းအနေအထားကိုစစ်ဆေးသည်။ ထို့နောက် အပိုင်းတစ်ပိုင်းဖဲ့ကာ ပါးစပ်ထဲထည့်ကြည့်ပြီးနောက် လျှာဖြင့် လျက်လိုက်သည်။ နောက်ဆုံးတွင် စိတ်ကျေနပ်သွားပုံဖြင့် ခေါင်းညိတ်ပြလေသည်။

"အားလုံးအဆင်ပြေပါတယ်..."

"စစ်ဆေးပြီးပါပြီလား..."

ထိုကတုံးမှာ ကြေးစားဖြစ်ခဲ့စဥ်က ဝယ်သူများကိုလိုက်ပါစောင့်ရှောက်ပေးသည့်အတွေ့အကြုံကြောင့် အဖွဲ့ကိုဦးဆောင်လာခဲ့ခြင်းဖြစ်သည်။ သူက အေးဂျင့်အား တောက်ပနေသည့်မျက်လုံးများဖြင့်ကြည့်ကာ ပြောလိုက်၏။

"ကျွန်တော့်လက်ထဲကနေ လူကြီးမင်းလက်ထဲကိုရောက်ပါပြီ...လွှဲပြောင်းတာအောင်မြင်ပါတယ်... နောက်တစ်ကြိမ်တွေ့တဲ့အခါ ကျွန်တော်တို့ မသိသလိုနေကြရအောင်..."

အေးဂျင့်ကလည်း တိုးလျစွာတုံ့ပြန်လိုက်၏။

"ဒါပေါ့..ဒီစည်းမျဥ်းနဲ့ပတ်သတ်ပြီး ငါ့ကိုသတိပေးစရာမလိုပါဘူး..."

ကတုံးက အံကြိတ်လိုက်သည်။

"အခုတော့ ကျွန်တော်တို့ဘက်ကစစ်ဆေးရမယ့်အလှည့်ပါ..."

အေးဂျင့်က ပေးချေရန်အတွက် ထုတ်လိုက်၏။ သူလက်တစ်ချက်ယမ်းပြလိုက်သည့်အခါ သူ၏လူများက ကြီးမားသည့်သေတ္တာအများအပြားကို သယ်လာကြလေသည်။

ကတုံးတို့က လက်အိတ်များဝတ်ပြီး ချက်ချင်းရှေ့တိုးလာကြကာ သေတ္တာများအား ဖွင့်လိုက်ကြသည်။ တစ်ဝက်ကမျိုးစေ့များဖြစ်ပြီး ကျန်တစ်ဝက်က ကိရိယာတန်ဆာပလာပစ္စည်းများဖြစ်သည်။ သူက ကျော်ကြားသည့်အေးဂျင့်ဖြစ်ထိုက်ပါပေ၏။ အင်မတန်ရှားပါးလှသော မျိုးစေ့များကိုယူလာခဲ့သည်။

ကတုံးတို့က ကိုယ်တိုင်မစစ်ဆေးနိုင်သော်လည်း အလိုအလျောက် မျက်နှာပြင်ဖတ်ကာ ဓာတ်ပုံရိုက်ကူးပေးသည့်မိုက်ခရိုကင်မရာများပါလာ၍ စစ်ဆေးမှုရလဒ်များက စွေ့ချီချောင်းထံ တိုက်ရိုက်ရောက်ရှိပေမည်။ သူနှင့်အတည်ပြုချက်ရယူပြီးမှ ကတုံးခေါင်းဆောင်က နဖူးမှချွေးများကိုသုတ်လိုက်နိုင်သည်။

" ပြီးသွားပါပြီ.."

"နောက်တစ်ခေါက် ပူးပေါင်းလုပ်ဆောင်ဖို့ အခွင့်အရေးရလိမ့်မယ်လို့မျှော်လင့်ပါတယ်..."

ထို့နောက် အေးဂျင့်က ချောင်းဟန့်လိုက်သည့်အခါ သူ၏လူများက တစ်မဟုတ်ချင်းပင် ပစ္စည်းများကို လေယာဥ်ပေါ်သို့သယ်ရန် စက်ရုပ်များကိုလှုပ်ရှားစေလိုက်သည်။

ကတုံးများသည်လည်း ကုန်သွယ်ထားသည့်ပစ္စည်းများကို လေယာဥ်ပေါ်သို့သယ်ကြ၏။

နံဘေးတွင်ရပ်ကြည့်နေသော ဝဲလ်တို့အုပ်စု: "....."

သေလိုက်ပါတော့... ငါ့မှာ ဆလပ်ရွက်တွေ အလွှဲအပြောင်းလုပ်တာဟုတ်ပါ့မလားလို့ သံသယဝင်လိုက်ရတာ… ပရိုဖက်ရှင်နယ်တွေ ကုန်သွယ်ရင် ဒီလောက်တောင်ကွာခြားတာလား…

ဆလပ်ရွက်များအား သယ်သွားကြသည်ကိုကြည့်ပြီးသည့်နောက် ကတုံးက တစ်စက္ကန့်လေးပင် ဆက်မနေတော့ပေ။ သူက ဝဲလ်ကိုခေါင်းညိတ်ပြလိုက်ပြီးနောက် ယဥ်ကျေးသည့်အပြုအမူဖြင့် နောက်ပြန်ခုန်ကာ လေယာဥ်ကိုစက်နှိုးပြီး ထွက်ခွာကြ၏။

ကုန်ပစ္စည်းလွှဲပြောင်းခြင်းက ပြီးဆုံးသွားခဲ့သည်။ အေးဂျင့်မှာ စိတ်အေးသွား၍ သက်ပြင်းချလိုက်ပြီး ဝဲလ်ကိုပြုံးပြကာ အနည်းငယ်စိတ်လှုပ်ရှားနေသလို ဆိုလာသည်။

"ဒါက ကျွန်တော့်အလုပ်မှာ ပထမဆုံးအောင်မြင်တဲ့ ကုန်ဖလှယ်မှုပဲ..."

တကယ်တမ်း သူ့စိတ်ထဲတွင် အကြမ်းဖျင်းမျှစီစဥ်ထားခဲ့ပြီး အမည်မသိအဖွဲ့အစည်းနှင့် ဆက်သွယ်နိုင်ရန် ဤအခွင့်အရေးကို အသုံးချခဲ့သည်။ မဟုတ်ပါက သူ၏ဂုဏ်သိက္ခာကိုမငဲ့ဘဲ အနှီဆလပ်ရွက်များကို မှောင်ခိုသွင်းပြီး လူများအားဖြန့်ပေးနေမည် မဟုတ်ပေ။

ဆလပ်ရွက်များကို ပျက်စီးနေသောဂြိုလ်ပေါ်တွင် ခွင့်ပြုချက်မရဘဲ စိုက်ပျိုးခဲ့ပြီးတည်းက အလုပ်ရှင်များထံပေးပို့ရာတွင် အခွန်ငွေပေးဆောင်ရန် သို့မဟုတ် လက်ဆောင်ပေးရန်မလိုအပ်တော့ပေ။ ထို့ကြောင့် ယင်းကိုမှောင်ခိုသွင်းသည်ဟု သဘောထားနိုင်ပေသည်။

ကတုံးများက မျိုးစေ့များနှင့်ပစ္စည်းများကို ပြန်သယ်လာပြီးနောက် စွေ့ချီချောင်းက အဆင့်သင့်စောင့်နေပြီးချီးကျုးလိုက်လေသည်။

"တော်တယ်..."

ကတုံးတို့မှာ ခဏတွင်းချင်း စိတ်လှုပ်ရှားသွားကြကာ သက်ပြင်းချလိုက်မိကြလေသည်။

သူတို့က အေးဂျင့်၏နာမည်ကြီးပုံကို ကြားသိထားခဲ့ကြ၏။ ထိုလူက ဘော့စ်မျိုးစုံအတွက် အရေးပါအရာရောက်သူတစ်ယောက်အဖြစ် ဟန်ဆောင်ရာတွင်တော်ပြီး သူလုပ်ပေးခဲ့သည့်ကုန်သွယ်မှုများအကြောင်းကိုလည်း သိသူမရှိကြပေ။ သူတို့မှာ အဆိုပါအေးဂျင့်နှင့် အလုပ်တွဲလုပ်ရချိန်တွင် အနည်းငယ်ခန့် စိတ်လှုပ်ရှားနေခဲ့ကြ၏။ ထိုအေးဂျင့်က သူတို့ကဲ့သို့ သူငယ်နှပ်စားလေးများကို စိတ်မဝင်စားမည်အား စိုးရိမ်နေကြသော်လည်း အေးဂျင့်က သူတို့ပုံစံကိုကြည့်ပြီး သုံ့ပမ်းများဖြစ်ကြောင်း သိသွားခဲ့သည်။

အလုပ်က မျှော်လင့်ထားခဲ့သည်ထက် အဆင်ပြေပြေဖြင့်ပြီးမြောက်သွားခဲ့သည်။ တစ်ဖက်မှလည်း သေစေနိုင်လောက်သည့်လက်နက်များဖြစ်ခဲ့လျှင်ပင် ကုန်ပစ္စည်းဖလှယ်ရာတွင် အလေးအနက်ထားမည့် သဘောထားရှိခဲ့သည်။

မျိုးစေ့များကို စွေ့ချီချောင်းကိုယ်တိုင် စစ်ဆေးခဲ့သည်။ ၎င်းတို့က အရည်အသွေးကောင်းလှ၏။ အေးဂျင့်၏နာမည်ဂုဏ်သတင်းက အင်မတန်ကျော်ကြားနေခြင်းမှာ အံ့အားသင့်စရာမဟုတ်တော့ပေ။ မျိုးစေ့များက အတော်လေးကောင်းမွန်နေခဲ့သည်။

ပစ္စည်းများလည်း အတူတူပင်။ တစ်ဖက်က သူထိုပစ္စည်းများကိုလိုချင်နေရသည်မှာ ဇီဝလက်နက်တစ်မျိုးထုတ်လုပ်ရန်ဖြစ်မည်ဟုပင် ထင်သွားလောက်သည်။ လက်တွေ့တွင်မူ ယင်းက သူ့ရည်ရွယ်ချက်မဟုတ်ပေ။ သူသည်ကား ၎င်းတို့ကို အပင်ရောဂါကာကွယ်ဆေးအနေနှင့်သာ အသုံးပြုလိုခဲ့သည်။ သို့သော်လည်း ယနေ့ခေတ်၌ ယခုကဲ့သို့ အပြောင်မြောက်ဆုံးသောပစ္စည်းများကိုရရှိလိုက်ရ၍ တစ်ဖက်ကိုကျေးဇူးတင်သင့်လေသည်။

"လာကြ...ငါတို့အခြားဂြိုလ်ကို ကုန်ပစ္စည်းတွေတင်ပို့နိုင်ခဲ့လို့ လက်ခုပ်တီးပြီးဂုဏ်ပြုလိုက်ရအောင်..."

စွေ့ဟူထွက်သွားပြီဖြစ်၍ စွေ့ထင်ကတာဝန်ယူပြီး ရှေ့ဆုံးမှဦးဆောင်ကာလက်ခုပ်တီးပေးလိုက်သည်။

ဖြောင်း...ဖြောင်း..ဖြောင်း...

လက်ခုပ်သံများက သောသောညံသွားခဲ့၏။

စွေ့ရှောင်ကျန်းက အခြားသူများထက်သာအောင်မလုပ်တတ်ပေ။

"ဒီနေ့ကစပြီး...ငါတို့ပိုသတိထားရတော့မယ်..ဈေးကွက်ထဲရောက်ပြီဆိုတော့ အော်ဒါတွေက တလှိမ့်လှ်မ့်နဲ့ဝင်လာတော့မှာ...ငါတို့စိုက်ပျိုးမြေအသစ်တွေ ထပ်ချဲ့ရတော့မယ်..ညီလေး ငါစမ်းသပ်ကြည့်ပြီးပြီ... တောအုပ်ထဲက လိုတာတွေကိုလည်း စာရင်းကောက်ကြည့်ပြီးသွားပြီ... အသီးအရွက်တွေနဲ့ ဂြိုလ်ပေါ်က တခြားအဖွဲ့အစည်းတွေရဲ့လုပ်ကိုင်ပုံတွေကိုကြည့်ပြီး ငါစိုက်ပျိုးမြေအတွက် သင့်တော်တဲ့နေရာတွေကို ရှာထားတယ်... ပုံအကြမ်းတွေလည်းငှားလာတယ်...အချို့နေရာတွေက ဂေါ်ဖီအစအနတွေနဲ့ ပြည့်နေပြီ...အချို့နေရာတွေက မှိုတွေပေါက်ပြီး ဆားပေါက်မြေတွေဖြစ်နေပြီ... ငါတို့ပြန်ပြင်ဖို့လိုတယ်... ဒါပေမဲ့ အဲဒါတွေက နောက်မှလုပ်လည်းရပါတယ်...ငါတို့ရဲ့မြေကြီးတွေကိုပဲ အရင်ဖော်ကြရအောင်..."

ချက်ချင်းပင် စွေ့ချီချောင်းက သူ့အားလေးစားသလိုကြည့်လာသည်။ သူ ဘာမှမပြောရသေးမီ စွေ့ရှောင်ကျန်းက ကိုယ်တိုင်စဥ်းစားပြီး ကြိုပြင်ထားခဲ့သည်။ အနှီသူက သူတို့အဖွဲ့အတွက် တွေးပေးတတ်သည်မှာ အသေအချာပင်။

အယ်လ်ဖာများက သန်မာပြီး ပြိုင်ဆိုင်စိတ်ရှိသည်ဟု သူကပြောခဲ့သည်။ စွေ့ချီချောင်းကမူ သူတို့ကအစားကြီးပြီး သူတို့၏ heatကာလကြောင့် ဒုက္ခဖြစ်စေသည်ဟုထင်ခဲ့သော်လည်း သူတို့၏ကြိုးစားအားထုတ်မှုကိုမူ အသိအမှတ်ပြုပေးခဲ့၏။

သူတို့သည်ကား အစပိုင်းတွင် အမှားများစွာလုပ်ခဲ့ကြစေကာမူ ယခုမူ အလေ့အကျင့်ရသွားကြပြီဖြစ်သည်။

စွေ့ထင်မှာ ထိုအချင်းအရာကိုမြင်ပြီး ဒေါသထွက်သွားခဲ့သည်။ သူတို့က မောင်နှမများဖြစ်သည့်တိုင် ထိုကဲ့သို့သောအလုပ်မျိုးကို သူမအား မခိုင်းခဲ့ပေ။

နှစ်ယောက်လုံး အပြန်အလှန်ကြည့်လိုက်ပြီးနောက် ကိုယ်စီပင်မျက်လုံးလှိမ့်လိုက်ကြလေ၏။

ပရိုဖက်ရှင်နယ်ကျသောပစ္စည်းများဖြင့် စွေ့ချီချောင်းမှာ ကျားကိုအတောင်ပံ တပ်ပေးလိုက်သလိုပင်။ သူလေ့လာခဲ့သောရောဂါကာကွယ်ဆေးအများစုမှာ အပင်နှင့်သတ္တုရိုင်းများသာဖြစ်သည်။

သူက အေးဂျင့်အား ကမ္ဘာမြေ၏ သန့်စင်သောပြောင်းဖူးနှင့် အချို့သော ဂြိုလ်သားသီးနှံပင်တို့ မျိုးစပ်ထားသော ခရမ်းရောင်အမျိုးအစားပြောင်းဖူးကို ရှာဖွေပေးရန် တောင်းဆိုခဲ့၏။ ၎င်းက အထွက်နှုန်း အလွန်မြင့်မားသည်။ မြေဩဇာမကျွေးလျှင်ပင် တစ်မုကို တန်ပေါင်းများစွာထုတ်ပေးပြီး အမျိုးမျိုးသော ကြမ်းတမ်းသည့်ပတ်ဝန်းကျင်တွင် ဖြစ်ထွန်းနိုင်သည်။ အင်းဆက်နှင့်ပိုးမွှားများကို အလွယ်တကူဆွဲဆောင်ပေးသည့် သက်ရောက်မှုတစ်ခုသာရှိ၏။

ကြက်သွန်ဖြူကသာ အဆိုပါအင်းဆက်နှင့် ပိုးမွှားများရန်မှ ကာကွယ်ပေးနိုင်သည်။ ကံကောင်းစွာဖြင့် စွေ့ချီချောင်းက ကိရိယာများ၏အကူအညီဖြင့် ဤဂြိုလ်ပေါ်ရှိအပင်များထံမှ အထူးအသီးအရွက်အက်ဆစ်ကို ရှာဖွေရန်စီစဥ်ထားခဲ့သည်။

အဆိုပါ အပင်အက်ဆစ်တွင် အယ်လ်ကိုဟော၊ ပီနောနှင့် အခြားအော်ဂဲနစ်ပစ္စည်းများ ပါဝင်သည်။ ၎င်းက ကြွက်များကို မျိုးသုဥ်းသည်အထိ သတ်ပစ်နိုင်ပြီး ပေါင်းပင်ကိုလည်းသေစေကာ အပင်ကြီးထွားနှုန်း မြန်စေနိုင်သည်။

အပိုပါဝင်ပစ္စည်းများအပြင် အပင်အက်ဆစ်သုံးဆယ်ရာခိုင်နှုန်းကို ရေတွင်အဆတစ်ရာ ပျော်ဝင်စေသည်။ ထို့နောက် ထိုအရည်ကို စိုက်ပျိုးရေးဒရုန်းတွင်ထည့်ပေးလိုက်ပြီး ၎င်းက သီးနှံပင်များအပေါ်သို့ဖြန်းပေးလေ၏။ ထိုအပင်ရွက်ဖြန်းဆေး၏ ဓာတုပါဝင်နှုန်းက မမြင့်မားပေ။ လူသားများနှင့်တိုက်ရိုက်ထိတွေ့မိလျှင်ပင် ဘေးအန္တရာယ်မရှိချေ။

ဤဂြိုလ်မှ အပင်များ၏အက်ဆစ်ဓာတ်နှင့်စာလျှင် ၎င်းတို့တွင် အဏုမြူသက်ရှိအပင်ရွက်ဖြန်းဆေးများလည်းရှိသည်။ အဆိုပါ အဏုမြူသက်ရှိများကမူ လူသားခန္ဓာကိုယ်ကို အဆိပ်အတောက်ဖြစ်စေလေရာ စွေ့ချီချောင်းက ၎င်းကိုသတိထားကာအသုံးပြုနေရလေ၏။

မည်သို့ပင်ဖြစ်စေ စွေ့ချီချောင်းက လူတစ်ယောက်နှင့်ကုန်ဖလှယ်ခဲ့သည့်သတင်းမှာ ပျက်စီးနေသောဂြိုလ်ပေါ်တွင်ပျံ့နှံ့သွားခဲ့သည်။ အေးဂျင့်က မည်သူကိုမှမပြောခဲ့သော်လည်း ယခုလိုနေရာတွင် သတင်းအစလေးကိုမထိန်းသိမ်းနိုင်သူများက ရှိနေတတ်သည်ပင်။

အစပိုင်း၌ အသေအချာ မစုံစမ်းနိုင်ခဲ့သော အချို့လူများမှာ အမည်မသိအဖွဲ့အစည်းကို လက်နက်ရောင်းဝယ်သူများဟု ထင်ခဲ့ကြသည်။ သူတို့အားလုံးမှာ စိတ်လှုပ်ရှားနေခဲ့ကြ၏။

သို့သော် အသေအချာစုံစမ်းထားကြသူများကမူ သူတို့က ဆလပ်ရွက်ကို မှောင်ခိုကူးသူများဖြစ်ကြောင်း ပြောလာကြတော့သည်။

နေစမ်းပါဦး...ဆလပ်ရွက်လား…

လူတိုင်း၏ ကနဦးတုံ့ပြန်မှုမှာ အေးဂျင့်အတိုင်းပင်။ သူတို့အားလုံးမှာ စိတ်ရှုပ်ထွေးသွားကြသည်။

ဒါက ဘယ်လိုသောက်အဓိပ္ပါယ်မရှိတာလဲ… ငါကတော့ လက်နက်ကြီးတွေ လဲချင်တာကို မင်းတို့က ငါတို့ကို ဆလပ်ရွက်ရောင်းမယ်တဲ့လား…

သို့သော်လည်း ၎င်းကပင် လူတစ်ယောက်က အမှန်တကယ်ပင် ဆလပ်ရွက်ကီလိုဂရမ်တစ်သိန်းကို ပိုက်ဆံပေးပြီးဝယ်ယူခဲ့ကြောင်း ပြောပြလာ၏။ ကုန်ဖလှယ်ရသည့် အကြောင်းအရင်းက မရိုးရှင်းသော်လည်း ဆလပ်ရွက်ကိုထုတ်လုပ်သူများက အမည်မသိအဖွဲ့အစည်းပင်ဖြစ်သည်။

ကောလဟာလက မည်ကဲ့သို့ပျံ့သွားခဲ့မှန်း မည်သူမှမသိပေ။ သို့ထိတိုင် ဆလပ်ရွက်များကိုရောင်းဝယ်ခြင်းမှာ အပေါ်ယံသာဖြစ်သည်ဟူသော ကောလဟာလများက ပျံနှံ့လာပြန်သည်။ လိုအပ်နေသည့်ပမာဏမှာ အမည်မသိအဖွဲ့အစည်းအတွက် အနည်းငယ်သာဖြစ်သည်။ ပိုက်ဆံကိုအလုံအလောက်သုံးလိုက်မှ အဖွဲ့အစည်းက သင့်ကိုအစစ်အမှန်အတိုင်းဖော်ပြလိမ့်မည်။

ရိုးရိုးတန်းတန်းသာတွေးလိုက်လျှင် သင့်အနေနှင့် လက်နက်များကို ဝယ်ရန် ဆလပ်ရွက်အား ဦးစွာဝယ်ရမည်။ သူတို့ကို ပိုက်ဆံအလုံအလောက်ပေးပြီး ပမာဏအနည်းငယ်ဖြင့်ရနိုင်ပေသည်။

အဆိုပါအကြောင်းပြချက်က အဖွဲ့အစည်း၏နေ့စဥ်လုပ်ငန်းဆောင်တာများက လယ်ယာစိုက်ပျိုးရေးနှင့်တောထွက်ပစ္စည်းများဖြင့် သက်ဆိုင်သည်ဟု ပြောလိုက်ခြင်းထက် ပိုနက်နဲသည်။

ပင်မအဖွဲ့အစည်း၏ခေါင်းဆောင်များက အခြားသူများအဖွဲ့ထဲသို့ဝင်လာပြီး မကြာမီ တစ်ယောက်နှင့်တစ်ယောက်ဆက်သွယ်ကြသည်။ သူတို့ ဘာလုပ်ရမည်ကို မသိကြပေ။

အသီးအရွက်အိုး တစ်သောင်းလောက်ကို အစုံလိုက်ဝယ်ထားလိုက်ရင် ကောင်းမလား...

🍀🍀🍀

Prev Next