အပိုင်း ၁၁၁ ( The President 11 )

ယန်ကျင်းဇီသည်လည်း ကျန်းယွင်ရှိူ့က ခေတ်ကာလများနှင့် အဆက်အသွယ်ပြတ်နေကြောင်း သတိထားမိသည်။

ဥပမာအားဖြင့် သူသည် စမတ်ဖုန်းများ၊ Weibo စသည်တို့ကို အသုံးပြုလေ့မရှိပေ။ သတိပေးမခံရလျှင် သူက ဖွင့်ကြည့်ရန် သတိရခြင်းမှာ မဖြစ်နိုင်ချေ။

ဤသည်က သူ၏ ဂီတကို စွဲလမ်းမှုနှင့်လည်း သက်ဆိုင်သည်။

သာမန်လူများတွင် လူမှုဆက်ဆံရေး ကြောက်ရွံ့မှု ရှိပြီး လူများနှင့် ဆက်သွယ်ထိတွေ့ရသည်ကို မနှစ်သက်လျှင်တောင်မှ ၎င်းက သူတို့၏ အင်တာနက် အသုံးပြုခြင်းကို မတားဆီးနိုင်ချေ။ ကျန်းယွင်ရှိူ့ကတော့ ကွဲပြားသည်။ သူသည် အင်တာနက် အသုံးပြုရခြင်းကို မကြိုက်ဘဲ သူ့အချိန်အများစုကို ဂီတတီးခတ်၍ ကုန်ဆုံးလေ့ရှိသည်။ တခြားသူများက သူ့ကို ဂီတနှင့်ပတ်သက်၍ ပြောလျှင် သူက အဆုံးမဲ့ စကားပြောနိုင်ပေသည်။ သူ့ကို လတ်တလော ရေပန်းစားလျက်ရှိသော ဂိမ်း သို့မဟုတ် တစ်စုံတစ်ခုနှင့်ပတ်သက်၍ ပြောလျှင် သူက လုံးဝ စိတ်ရှုပ်ထွေးသွားလိမ့်မည်ဖြစ်သည်။

သူ၏ အပြင်ထွက်ရခြင်း မနှစ်သက်မှု‌ကို လောင်ချိုက် သိသွားသည်။ လောင်ချိုက်က သူ့ကို ဘယ်ဂိမ်းကို ဆော့ရတာ ကြိုက်သလဲဟု မေးသောအခါ သူက ဂိမ်းမကြိုက်ကြောင်း ပြောပြီးနောက် သတိကြီးစွာဖြင့် ဆိုသည် : “ ငါ Plants vs. Zombies ဆော့ဖူးတယ်။ အကြိမ်တိုင်း ငါ ဇွန်ဘီတွေ အစားခံရလို့ ဆက်မဆော့တော့ဘူး။ ဒါပေမယ့် ငါ ဦးနှောက်အစားခံရတာနဲ့ ပတ်သက်ပြီး horror ဂီတတစ်ပုဒ် ရေးဖြစ်ခဲ့တယ်။ ”

လောင်ချိုက် : “ ... ”

လောင်ချိုက်သည် စကားပြောဆိုနိုင်မည့် နောက်ထပ်အကြောင်းအရာတစ်ခုကို ရုတ်တရက် တွေးမိလိုက်သည် : “ ငါ သိတာ မင်းနဲ့ ကျင်းဇီတို့က အလယ်တန်းကျောင်း အတန်းဖော်တွေဆို? ငါ သူ့ကို အထက်တန်းကျောင်းမှာမှ တွေ့ဖူးတယ်။ သူ အရင်က ဘယ်လိုလဲ ဆိုတာ ငါ သိတောင် မသိဘူး။ ”

“ အရင်က... အခုလောက် သူက ကြည့်မကောင်းခဲ့ဘူး။ အခုလက်ရှိထက်လည်း သူက သတ္တိပိုနည်းခဲ့တယ်။ ” ကျန်းယွင်ရှိူ့က ဤအကြောင်းအရာကို နှစ်သက်ပြီး တမ်းတလွမ်းဆွတ်သော အကြည့်ကို ပြသလာသည် : “ သူ အနိုင်ကျင့်ခံရမှာကို ငါ အမြဲစိုးရိမ်နေခဲ့ရတယ်။ သူ ရုတ်တရက် ကျောင်းထွက်သွားတုန်းက ငါ တော်တော်စိတ်ပူခဲ့တယ်။ ကံမကောင်းတာက ငါ သူ့ကို နောက်ပိုင်း မရှာနိုင်ခဲ့တာပဲ။ ”

“ လောင်ချိုက်၊ မင်း စားလို့ပြီးပြီမလား? ပြန်ဖို့အချိန်ရောက်ပြီ။ ” ယန်ကျင်းဇီက မတ်တပ်ရပ်ပြီး လောင်ချိုက်ကို ဆွဲမကာ အပြင်ထွက်သည်။

“ ယန်ကျင်းဇီ၊ မင်း လူရော ဟုတ်ရဲ့လား? ငါက မင်းရဲ့ သူငယ်ချင်း။ မင်း ငါ့ကို မောင်းထုတ်နေတယ်! ” လောင်ချိုက်သည် စိတ်ဆိုးသော်လည်း ယန်ကျင်းဇီ၏ ဆွဲထုတ်ခြင်းကို ခံနေရဆဲဖြစ်သည်။

“ လောင်ချိုက်... အလှလေးကို ပြန်ရဖို့ ငါ့အတွက် ခက်ခဲခဲ့တယ်။ ဒါကြောင့်မို့ မင်း မီးသီးတစ်လုံး မလုပ်စမ်းပါနဲ့။ ” ယန်ကျင်းဇီက ဆိုသည်။

ဗီလာတံခါးက လောင်ချိုက်၏ရှေ့တွင် ပိတ်သွားသည်။

လောင်ချိုက်သည် သူ့နှာခေါင်းကို ထိပြီး သူ့ကားထဲသို့ ဝင်ကာ ဖုန်းထုတ်၍ ဖုန်းခေါ်လိုက်သည် : “ ဟေး လောင်ရှင်း၊ မင်းညီမနဲ့ ယောက်ဖက ဂီတပညာရှင်တွေမလား? ကျန်းယွင်ရှိူ့အကြောင်း ငါ့ကို ကူရှာပေးစမ်းပါဦးဟ! ”

သူတို့ကဲ့သို့ တူညီသော လောကမှ လူများကို မေးမြန်း၍ လူစုံစမ်းခြင်းက အတော်‌လေး လွယ်ကူသည်။

သိပ်မကြာခင်တွင်ပင် လောင်ချိုက်သည် လောင်ရှင်း၏ ညီမနှင့် ယောက်ဖတို့ထံမှ ကျန်းယွင်ရှိူ့နှင့်ပတ်သက်သော ကိစ္စတချို့ကို သိလိုက်ရသည်။

သူသည် ကျန်းယွင်ရှိူ့အကြောင်းကို ယခင်က စုံစမ်းဖူးသော်လည်း လောင်ရှင်းကို မရှာခဲ့ချေ။ သူသည် ကြုံရာလူကိုသာ မေးမြန်းခဲ့သည်။ ထိုအချိန်တွင် သူသည် ကျန်းယွင်ရှိူ့နှင့် ပတ်သက်၍ မကောင်းသတင်းအချို့ကိုသာ သိလိုက်ရသည်။ ယခုမူ...

ရှင်းမိသားစု၏ သမီးအကြီးဆုံးနှင့် သူ(မ)၏ ခင်ပွန်းတို့သည် ငွေကြေးနှင့် မိသားစုကုမ္ပဏီ၏ ရှယ်ယာများ ရှိပြီး ဂီတတီးခတ်ခြင်းမှာ ဝါသနာတစ်ခုသာ ဖြစ်သည်။ ထို့ကြောင့် သူတို့တွင် လူများကို ပို၍ မှန်ကန်သော အကဲဖြတ်မှု ရှိကြသည် : “ ကျန်းယွင်ရှိူ့လား? သူက ပေါင်းသင်းဖို့ သိပ်မလွယ်ဘူး။ သူက လူတွေနဲ့ မရောနှောနိုင်ဘူးလို့ ငါ ထင်မိတယ်။ သူက အပြင်လောကကိုလည်း ကောင်းကောင်းနားမလည်ဘူး။ သူက အဆက်အသွယ် အရမ်းပြတ်‌လွန်းနေတာကြောင့်လေ။ အရင်က ငါတို့ ဒီမှာ ပါတီပွဲ လုပ်ဖူးတယ်။ သူ့ကို ပါတီလာဖို့ ခေါ်တာကို သူက အပြင်ထွက်မလာခဲ့ဘူး။ အသိုင်းအဝိုင်းထဲက လူတော်တော်များများက သူ့ကို အမြင်မကြည်ကြဘူး။ သူက လူတွေကို အထင်သေးတယ်လို့ သူတို့က ထင်နေကြတာ… အင်တာနက်ပေါ်က အခု‌တလော ဓာတ်ပုံတွေကို မေးတာလား? ကျန်းယွင်ရှိူ့ သူများတွေစီက ဆေးအခတ်မခံရသရွေ့ သူ့စိတ်နဲ့ဆို သူ အဲ့လိုကိစ္စတွေကို လုပ်မှာ မဟုတ်ဘူး။ ”

ထို့နောက် လောင်ချိုက်သည် သူ့နောက်လိုက်၍ အပျော်ရှာကြသော ညီအစ်ကိုအနည်းငယ်ကို သုံ့ချင်းလင်အကြောင်း စုံစမ်းခိုင်းလိုက်သည်။ သူ့မိသားစုလောက် မချမ်းသာကြသော ညီငယ်လေးများသည် သုံ့ချင်းလင်အကြောင်း သွားရောက်စုံစမ်းကြသည်။

ယန်ကျင်းဇီ၏ သူငယ်ချင်းများသည် သုံ့ချင်းလင်ကို သဘောကျကြသည်မှာ သုံ့ချင်းလင်က ယန်ကျင်းဇီကို အလွန်ဂရုစိုက်သောကြောင့် ဖြစ်သည်။ ရလဒ်ကမူ သူ ထိုညီငယ်လေးများကို မေးလိုက်ချိန်တွင်...

“ ဟန်ကော၊ သုံ့ချင်းလင်က ယန်သခင်လေးနဲ့ လမ်းခွဲပြီးတော့ ကောင်းပေါ်ဟောင်နဲ့ တွဲနေတယ်! ”

“ သူက ‌တော်တော်အရည်အချင်းရှိတယ်။ သူက ယန်သခင်လေးနဲ့ လမ်းမခွဲခင်ကတည်းက ကောင်းပေါ်ဟောင်နဲ့ ဆက်ဆံရေး ရှိနေပြီ။ ”

“ အခု‌တလောတော့ သူ့ကြည့်ရတာ အနုပညာလောကထဲ ဝင်ချင်တဲ့ပုံပဲ။ ”

… ...

လောင်ချိုက်သည် “ချိုက်ကော” ဟု အခေါ်ခံရခြင်းကို သဘောမကျသောကြောင့် သူ့ညီများက သူ့ကို “ဟန်ကော” ဟု ခေါ်ကြသည်။ ဤလူများတွင် သုံ့ချင်းလင်အတွက် ကောင်းမွန်သော ခံစားချက်များ မရှိကြပေ။ ဘယ်လိုလုပ် သုံ့ချင်းလင်က ချိုက်ဟန်ရဲ့ အသိုင်းအဝိုင်းထဲကို အလွယ်တကူ ဝင်နိုင်မှာလဲ?

ချိုက်ဟန် : “ ... ”

သူ အရင်က အမှားလုပ်မိခဲ့ပြီထင်တယ်!

ယန်ကျင်းဇီသည် ချိုက်ဟန်ကို “မောင်းထုတ်”ပြီး ဆက်စားရန် ပြန်သွားသည်။ စားပြီးနောက်... အမှန်ပင်၊ သူသည် ရေချိုးပြီး အဝတ်အစားလဲရပေမည်။

သူ့ကို မဆိုထားနှင့်၊ ကျန်းယွင်ရှိူ့သည်ပင် ရေသွားထပ်ချိုးပြီး အဝတ်အစားလဲလိုက်ပြန်သည်။ ရေသွားမချိုးခင် ကျန်းယွင်ရှိူ့က ယန်ကျင်းဇီကိုလည်း ပြောသွားသည် : “ ကျင်းဇီ၊ ငါ့ကို စောင့်။ ငါ ရေချိုးပြီးရင် မင်းအတွက် စန္ဒရားတီးပြမယ်။ ”

“ အိုကေ။ ” ယန်ကျင်းဇီက သဘောတူသည်။

သူက ရေအမြန်ချိုးလိုက်သည်။ ရေချိုးပြီးနောက် သူသ ည် ခဏတွေးကာ ကျန်းယွင်ရှိူ့၏ အခန်းထဲသို့ ဝင်သွားသည်။

ရလဒ်ကမူ...

ကျန်းယွင်ရှိူ့၏ အခန်းထဲမှ လက်ရာမြောက်သော အလှဆင်ပစ္စည်း အမျိုးမျိုးမှာ အိပ်ခန်းနှင့် ချိတ်ဆက်ထားသော စာကြည့်ခန်းငယ်လေးထဲတွင် အံ့ဩစရာကောင်းလှစွာ အားလုံးကို ထည့်သွင်းထားသည်။

ဤဈေးကြီးသော ပစ္စည်းလေးများမှာ ကျန်းယွင်ရှိူ့၏ အကြိုက်မဟုတ်ကြောင်း ထင်ရှားသည်။ ယခု ကျန်းယွင်ရှိူ့၏ အိပ်ခန်းတွင် ရှင်းပြောင်နေပြီး ပစ္စည်းများကလည်း အလွန်နည်းပါးသည်။

ယန်ကျင်းဇီသည် ရေချိုးခန်းထဲမှ ကျန်းယွင်ရှိူ့ ထွက်လာသည်ကို စောင့်ဆိုင်းပြီးနောက် ပြောသည်။ “ အပြင်က မင်း မလိုတဲ့ ပစ္စည်းတွေကို မနက်ဖြန် ကိုယ် လူခေါ်ပြီး ရွှေ့ခိုင်းလိုက်ရမလား? ”

ရေချိုးခန်းထဲမှ ထွက်လာခါစဖြစ်သော ကျန်းယွင်ရှိူ့၏ မျက်နှာမှာ နီနေသည် : “ ဟင့်အင်း၊ ဘယ်မှာထားရမလဲ ငါ့ကို ပြောပြပါ။ ငါ့ဘာသာငါ လုပ်လိုက်မယ်... ငါ့အခန်းထဲကို လူဝင်တာ ငါ မကြိုက်ဘူး။ ”

ယန်ကျင်းဇီက မေးသည် : “ ကိုယ်ရော? ” သူသည် ကျန်းယွင်ရှိူ့၏အခန်းထဲသို့ ဝင်လာပြီးဖြစ်သည်။

“ မင်းက တခြားလူ မဟုတ်ဘူး။ ” ကျန်းယွင်ရှိူ့က ယန်ကျင်းဇီကို လေးလေးနက်နက် ကြည့်သည်။

ယန်ကျင်းဇီသည် သူ့ဘယ်ဘက်ပါးကို နမ်းလိုက်ပြီး ‌အသေအချာပင် သူ့ညာဘက်ပါးကိုလည်း နမ်းလိမ့်မည်ဖြစ်သည်။

နမ်းပြီးနောက် ကျန်းယွင်ရှိူ့က မေးသည် : “ ဘာလို့ မင်းက အကြိမ်တိုင်း ငါ့ဘယ်ဘက်ပါးကိုပဲ အရင်နမ်းတာလဲ? ”

ယန်ကျင်းဇီသည် တကယ်ပင် ဤအချက်ကို ဂရုမစိုက်ခဲ့ပေ : “ ဒါဆို နောက်တစ်ခါကျရင် ကိုယ် မင်းညာဘက်ပါးကို အရင်နမ်းရမလား? ”

“ ကောင်းတယ်။ ” ကျန်းယွင်ရှိူ့ ခေါင်းညိတ်လိုက်သည်။

“ ကိုယ် အခု နမ်းမယ်။ ” ယန်ကျင်းဇီသည် ဤအကြိမ်တွင် သူ၏ ညာဘက်ပါးကို အရင်နမ်းပြီးမှ သူ့ဘယ်ဘက်ပါးကို နမ်းသည်။

အမှန်ဆိုလျှင် သူသည် ကျန်းယွင်ရှိူ့၏ နှုတ်ခမ်းများကိုလည်း နမ်းချင်သည်။ သို့သော် ၎င်းက အရမ်းမြန်လွန်းပြီး ကျန်းယွင်ရှိူ့ကို ခြောက်လန့်မိမည်ကို သူ စိုးရိမ်မိသည်။

သူတို့ ပြန်တွေ့ကြသည်မှာ နှစ်ရက်သာ ရှိသေးသည်။

တတိယထပ်ရှိ ဂီတတူရိယာ အမျိုးမျိုးကိုလည်း ကျန်းယွင်ရှိူ့ ပြန်လည်နေရာချပြီးပြီဖြစ်သည်။

မူလပိုင်ရှင်က ထိုနေရာတွင် ဂီတတူရိယာများကို ထားပြီးနောက် သိပ်ဂရုမစိုက်ဘဲ သန့်ရှင်းရေးလုပ်သူများကလည်း ၎င်းတို့ကို နေရာမရွှေ့ချေ။ ထို့ကြောင့် အနည်းနှင့်အများ ဖုန်တက်နေလေ့ရှိသော်လည်း ယခုအခါ ထိုဖုန်မှုန့်များ မရှိတော့ပေ။

သို့ရာတွင် ကျန်းယွင်ရှိူ့၏ အကြိုက်ဆုံးဟာ စန္ဒရား ဖြစ်ကြောင်း သံသယဖြစ်စရာပင်မလို။ သူက စန္ဒရားရှေ့တွင် လျင်မြန်စွာ ထိုင်ချလိုက်သည်။ “ ငါ မင်းကို မင်းအတွက် ရေးထားတဲ့ သီချင်း တီးပြမယ်။ ”

“ အင်း။ ” ယန်ကျင်းဇီက ဘေးတွင် ဝင်ထိုင်၍ ကျန်းယွင်ရှိူ့ကို ပြုံးလျက် ကြည့်သည်။

ကျန်းယွင်ရှိူ့က သူ့ကို တစ်ချက်ကြည့်လိုက်ပြီး အနည်းငယ် ရှက်သွားကာ စန္ဒရားဘက်သို့ ပြန်လှည့်၍ စတင်တီးခတ်သည်။

သူသည် အလွန်အာရုံစူးစိုက်လျက် စန္ဒရားကို တီးခတ်နေပြီး သာယာငြိမ့်ညောင်းသော စန္ဒရားသံများက သူ့လက်ချောင်းများအောက်မှ ထွက်ကျလာသည်။ ထိုသံစဉ်များဟာ အလွန်ရွှင်ပျပြီး အသက်ဝင်လျက်ရှိကာ ရှက်ရွံ့မှုလေးလည်း ပါဝင်နေသည်။ ၎င်းကား နွေဦးပေါက်ရာသီရောက်ချိန်နှင့် အပြင်လောကကြီး၏ မူလအတိုင်း ပြန်လည်ကောင်းမွန်လာခြင်းတို့ ဖြစ်သည်။ စမ်းချောင်းလေးက တောင်ကုန်းတစ်လျှောက် လျင်လျင်မြန်မြန် စီးဆင်းနေသည်။ ၎င်းကား ဆောင်းဦးရာသီရောက်ချိန်လည်း ဖြစ်သည်။ အထွက်နှုန်းလည်း ကောင်းမွန်၏။ အကိုင်းအခက်များပေါ်တွင် ငှက်ကျားလေးများက တီးတိုးပြောနေကြသည်။ မိန်းမပျိုလေးတစ်ဦးက ခေါင်းမော့ကြည့်ပြီး သူ(မ) တိတ်တခိုး သဘောကျနေသော ယောက်ျားလေးက စာသင်ခန်းထဲတွင် ထိုင်နေလျက် သူ(မ)နှင့် သိုဝှက်သော အကြည့်တစ်ချက်ကို ဖလှယ်လာသည်။

ယန်ကျင်းဇီသည် တေးဂီတကို နားမလည်သော်လည်း စိတ်ထဲတွင် အကြွင်းမဲ့ ပျော်ရွှင်နေသည်။

စန္ဒရားသံဟာ တဖြည်းဖြည်း တိုးညင်းလာပြီး နောက်ဆုံးတွင် ရပ်သွားသည်။ သူသည် စန္ဒရားတီးခတ်နေသော ကျန်းယွင်ရှိူ့ကို ကြည့်လိုက်ပြီး လေထဲတွင် ချိုမြိန်မှုများနှင့် ပြည့်နှက်နေသည်ဟု ခံစားလိုက်ရသည်။

“ မင်း ဒီသီချင်းကို ကြိုက်လား? ” ကျန်းယွင်ရှိူ့က မေးသည်။

“ ကိုယ် ကြိုက်တယ်။ ” ယန်ကျင်းဇီက ပြောသည် : “ ဒါကို မင်း အခုမှ ရေးပြီးတာလား? ”

“ ဟုတ်တယ်။ ” ကျန်းယွင်ရှိူ့ ခေါင်းညိတ်လိုက်ပြီးနောက် တစ်ခုခုတွေးမိသွားသည် : “ ငါ ဒီသီချင်းကို နောက်ထုတ်မယ့် တစ်ကိုယ်တော်အခွေထဲ ထည့်ချင်တယ်။ ”

“ မင်း တစ်ကိုယ်တော်အခွေ ထုတ်တော့မှာလား? ” ယန်ကျင်းဇီက မေးသည်။

ကျန်းယွင်ရှိူ့ : “ အရင်က ငါ ‘Lights’ ကို အခွေထုတ်ထားတယ်။ ပြီးတော့ နောက်အခွေ ‘Waning’ ကို ထုတ်ရမယ်။ ဒါက ကုမ္ပဏီနဲ့ စာချုပ်ပါ။ ”

ယန်ကျင်းဇီ၏ နှလုံးသား “ဒုတ်ခနဲ” မြည်သွားသည်။

မူလဇာတ်ကြောင်းတွင် ‘ကမ္ဘာမြေပေါ်မှ ကောင်းကင်ဘုံ’ မှ ကိစ္စများနှင့် မဖွယ်မရာ ဓာတ်ပုံများ၊ ကျန်းယွင်ရှိူ့၏ ဆိုက်ဘာအကြမ်းဖက်ခံရမှုနှင့် သတင်းထောက်များထံမှ အမြဲလိုက်ဖမ်းခံရမှုတို့ဆိုလျှင်တောင်မှ ၎င်းတို့က ကျန်းယွင်ရှိူ့အတွက် သေစေနိုင်သော ထိုးနှက်မှု မဟုတ်ခဲ့ချေ။

ကျန်းယွင်ရှိူ့၏ စိတ်ဝိညာဉ်ကို လွှမ်းမိုးသွားသည့် ကိစ္စမှာ မူလပိုင်ရှင်၏ သူ့ကို စော်ကားမှု ဖြစ်ပြီး ကျန်းယွင်ရှိူ့ကို အနုပညာလောကတစ်ခုလုံး ငြင်းပယ်ခြင်းကမူ ကျန်းယွင်ရှိူ့ ခိုးကူးကြခြင်းကြောင့်ဖြစ်သည်။

ကျန်းယွင်ရှိူ့သည် အနုပညာလောကနှင့် မသက်ဆိုင်ပေ။ သူသည် နာမည်ကျော်ကြားရန် ပရိသတ်များအပေါ်တွင် မှီခိုခြင်းမရှိဘဲ မဖွယ်မရာ ဓာတ်ပုံများဟာလည်း ခွဲခြမ်းစိတ်ဖြာကြည့်လျှင် ကိုယ်ရေးကိုယ်တာ သီးသန့်တည်ရှိမှု ဖြစ်သည်... နောက်ပိုင်းတွင် အမျိုးမျိုးသော ပလက်ဖောင်းများက မြင်မကောင်းသော ဓာတ်ပုံများကို ဖျက်ပစ်ပြီးနောက် တဖြည်းဖြည်း ဤကိစ္စက ရပ်တန့်သွားသည်။

ကျန်းယွင်ရှိူ့၏ တေးဂီတကို နှစ်သက်သူတချို့က ကျန်းယွင်ရှိူ့တွင် ထူးခြားသော ဝါသနာ ရှိလျှင်ပင် ကိစ္စမရှိဟု ထင်ကြသည်။ သူတို့က တေးဂီတကို နှစ်သက်ခြင်းဖြစ်ပြီး သူ့ကို သဘောကျခြင်းမဟုတ်ချေ။

ထိုအချိန်တွင် ကျန်းယွင်ရှိူ့၏ ဒုတိယမြောက် တစ်ကိုယ်တော်အခွေ ‘Waning’ ထွက်လာသည်။

ကျန်းယွင်ရှိူ့တွင် နာမည်ဆိုး ရှိနေပြီး ‘Waning’ ထွက်ရှိမှုသည် အကျဉ်းရုံးဖြစ်ကာ ခပ်လျှိုလျှိုပင်။ ကုမ္ပဏီ၏ သူဌေးကသာ ကျန်းယွင်ရှိူ့၏ ဂီတကို တကယ် မကြိုက်လျှင် ဤအခွေကို ထုတ်နိုင်လောက်မည်မဟုတ်ချေ။

ရလဒ်ကမူ ‘Waning’ မထွက်မီ တစ်ရက်အလိုတွင် ကျန်းယွင်ရှိူ့၏ သီချင်းက နိုင်ငံခြားမှ တစ်စုံတစ်ဦးကို ကော်ပီကူးထားသည်ဟု အင်တာနက်ပေါ်တွင် လူတစ်ဦးက သတင်းထုတ်လာသည်။

လူများသည် ဤလူ၏ ညွှန်ကြားချက်ကို လိုက်နာပြီး နိုင်ငံခြားမှ အလွန်ခြောက်သွေ့နေသော Twitter ကို တွေ့ရှိခဲ့ကြသည်။ ဤ Twitter ၏ ပိုင်ရှင်သည် ‘Lights’ မထွက်ရှိမီ သုံးလအလိုတွင် ‘Lights’ မှ များစွာသော စန္ဒရားသီချင်းများကို တင်ထားသည်။ လွန်ခဲ့သော လအနည်းငယ်အတွင်း သူက စန္ဒရားသီချင်းများစွာကို တစ်ပုဒ်ပြီးတစ်ပုဒ် တင်ထားသေးပြီး ၎င်းတို့အားလုံးက အလွန်ကောင်းမွန်သည်။

ကြောက်စရာအကောင်းဆုံးကိစ္စမှာ အနုပညာလောကထဲမှ လူတချို့သည် သီချင်းများစွာဟာ ကျန်းယွင်ရှိူ့၏ ထွက်ရှိတော့မည့် တစ်ကိုယ်တော်အခွေ ‘Waning’ မှ သီချင်းများနှင့် 70% မှ 80% ထိ ဆင်တူကြောင်း ပြောကြခြင်းဖြစ်သည်။

နောက်တစ်နေ့တွင် ‘Waning’ ကို ရောင်းချပြီး တစ်နေ့တည်းတွင်ပင် ထိုနိုင်ငံခြားအကောင့်သည် ကျန်းယွင်ရှိူ့ဟာ သူ့ကို ကော်ပီထားကြောင်း ပို့စ်တင်ပြောသည်။

နောက်နှစ်နှစ်အတွင်း အဖြစ်အပျက်များ၏ အသေးစိတ်အချက်အလက်များမှာ မရေရာသော်လည်း မူလပိုင်ရှင်သည် ကျန်းယွင်ရှိူ့နှင့် ပတ်သက်သည့် ကိစ္စများကို ပိုမိုရှင်းလင်းစွာ မှတ်မိနေဆဲဖြစ်သည်။

ကျန်းယွင်ရှိူ့၏ ‘Waning’ အခွေတွင် စန္ဒရားသီချင်း ဆယ်ပုဒ် ပါဝင်သည်။ လေးပုဒ်မှာ ထိုလူ တင်သည့် သီချင်းများနှင့် အခြေခံအားဖြင့် တူညီပြီး နှစ်ပုဒ်မှာ ဆင်တူကာ ကျန်လေးပုဒ်မှာ လုံးဝ ကွဲပြားသော်လည်း ထိုလေးပုဒ်ကလည်း ကျန်းယွင်ရှိူ့၏ မူလပုံစံနှင့် ကွဲပြားပြီး စိတ်ပျက်လက်ပျက် ငိုကြွေးနေသံနှင့် တူသည်...

ကျန်းယွင်ရှိူ့ကို ကူးချမှုနှင့် သံသယရှိသည်။ မူလပိုင်ရှင်က Weibo တွင် သူ့ကို မထင်မဲ့မြင်ပြုပြီး သူ၏ နာမည်အရင်းကို အသုံးပြု၍ ကျန်းယွင်ရှိူ့ကို အပြစ်တင်ပြောဆိုသည်။ ကျန်းယွင်ရှိူ့က ရှေ့နေရှာချင်ခဲ့သော်လည်း မူလပိုင်ရှင်က သူ့ကို ဟန့်တားခဲ့သည်။

နိုင်ငံခြားမှ ထိုလူထံမှ သတင်းမရသော်လည်း ‘Waning’ ထုတ်ဝေသော ကုမ္ပဏီက ကျန်းယွင်ရှိူ့ထံမှ လျော်ကြေးငွေ တောင်းဆိုသည်။ ကျန်းယွင်ရှိူ့၏ တေးဂီတကြောင့် ကျန်းယွင်ရှိူ့နှင့် ခင်မင်ရင်းနှီးသူများသည်လည်း ကျန်းယွင်ရှိူ့ကို အလွန်စိတ်ပျက်သွားကြသည်... ထိုအချိန်တွင် ကျန်းယွင်ရှိူ့က သေကြောင်းကြံစည်ခဲ့ပြီး ကံကောင်းစွာဖြင့် ယွီယဲ့က သူ့ကို အချိန်စော၍ ရှာတွေ့ကာ သူ့ကို ကယ်တင်နိုင်လိုက်သည်။

“ မင်းရဲ့ အခွေအသစ်က သီချင်းတွေကို တီးခတ်ဖို့ အဆင်သင့်ဖြစ်ပြီလား? ” ယန်ကျင်းဇီက မေးသည်။

“ သီချင်းတချို့ကတော့ အဆင်သင့်ဖြစ်ပြီ။ ဒီတလော နောက်ထပ်နည်းနည်း ထပ်ရေးဖို့ ငါ စီစဉ်ထားတယ်။ ” ကျန်းယွင်ရှိူ့က ပြုံးသည်။

“ မင်း ကိုယ့်ကို တီးပြပေးနိုင်မလား? ” ယန်ကျင်းဇီက မေး၏။

ကျန်းယွင်ရှိူ့က မဆိုင်းမတွ သဘောတူပြီး ယန်ကျင်းဇီကို တစ်ချက်လှမ်းကြည့်ကာ စတင်တီးခတ်သည်။

လှပသော စန္ဒရားသံဟာ ထပ်မံထွက်ပေါ်လာပြန်သည်။ ဤတစ်ကြိမ်တွင် ၎င်းက အလွန်ပျော်ရွှင်မနေတော့သော်လည်း ကောင်းမွန်နေဆဲဖြစ်သည်။ ထိုအသံများဟာ မခွဲမခွာရက်စွာ စွဲကျန်နေပြီး ကောင်မလေးတစ်ယောက်က တိတ်တဆိတ် ချစ်ကျွမ်းဝင်နေသကဲ့သို့၊ မိန်းမပျိုတစ်ဦးက တမ်းတလွမ်းဆွတ်နေသကဲ့သို့၊ အဘွားအိုတစ်ဦးက သူ(မ) ငယ်ရွယ်နေစဉ် သူ(မ)၏ ခင်ပွန်းဖြစ်သူ သူ(မ)အတွက် ရေးပေးခဲ့သော ရည်းစားစာများကို ကိုင်ဆောင်လျက် ချိုမြိန်စွာ၊ ဝမ်းနည်းတောင့်တစွာဖြင့် ထပ်တလဲလဲ ပြန်လည်ခံစားနေသကဲ့သို့ ဖြစ်ချေသည်။

သီချင်းအဆုံးတွင် ယန်ကျင်းဇီက မေးသည် : “ အရမ်းကောင်းတယ်။ ဒီသီချင်းက ဘာကိုဆိုလိုတာလဲ? ”

ကျန်းယွင်ရှိူ့ : “ အဲ့ဒါက ငါ မင်းအကြောင်း တွေးနေတာ! ”

ယန်ကျင်းဇီ အံ့အားသင့်သွားသည်။

ကျန်းယွင်ရှိူ့ : “ သီချင်းနာမည်ကို ‘Remembrance’ လို့ ခေါ်တယ်။ ငါ မင်းအကြောင်း တွေးနေခဲ့တာ... တခြားသီချင်းတွေလည်း ရှိသေးတယ်။ မင်း နားထောင်ချင်လား? ”

ယန်ကျင်းဇီသည် သူ့နှာခေါင်း အနည်းငယ် ပိတ်ဆို့နေသကဲ့သို့ ခံစားလိုက်ရပြီး တိတ်တဆိတ် ခေါင်းညိတ်လိုက်သည်။

ကျန်းယွင်ရှိူ့သည် ထပ်မံ၍ စတင်တီးခတ်ပြီး တီးခတ်ခြင်းပြီးဆုံးသောအခါ သူက ပြုံးကာ ယန်ကျင်းဇီကို ကြည့်သည် : “ ဒီသီချင်းကို ‘Seek’ လို့ ခေါ်တယ်။ ငါ မင်းကို အရင်က တစ်ခါမှ ရှာမတွေ့ခဲ့ဘူး။ ”

သူက နောက်တစ်ပုဒ်ကို တီးခတ်ပြန်သည် : “ ဒီသီချင်းကို ‘Lonely’ လို့ ခေါ်တယ်... နာမည်ထပ်ပြောင်းလို့ရမယ်လို့ ငါ ထင်မိတယ်... ”

“ ဒီသီချင်းကိုတော့ ‘Waking from a Dream’ လို့ ခေါ်တယ်... ဒါက နည်းနည်းဝမ်းနည်းစရာကောင်းတယ်... ငါ အခု အရမ်းပျော်နေတော့ ငါ ကောင်းကောင်းမတီးနိုင်တော့ဘူး။ ”

…

ယန်ကျင်းဇီသည် သီချင်း ခုနစ်ပုဒ်၊ ရှစ်ပုဒ်ကို ဆက်တိုက်နားထောင်လိုက်သည်။

ဤသည်ကား တိတ်တခိုး နှစ်သက်သဘောကျသူ၏ အသံ ဖြစ်၏။

စကားထပ်ပြောသောအခါ ယန်ကျင်းဇီ၏ အသံမှာ အနည်းငယ် ပြောင်းလဲသွားသည် : “ ဘာလို့ သီချင်းတွေအကုန်လုံးက ကိုယ့်အတွက် ဖြစ်နေတာလဲ? ”

ကျန်းယွင်ရှိူ့က သဘာဝကျကျ မထူးဆန်းစွာ ဆိုသည် : “ သီချင်းကောင်းတစ်ပုဒ်မှာ ခံစားချက်တွေ ရှိရမယ်လို့ ဆရာက ပြောတယ်။ ငါ မင်းကို ကြိုက်တယ်။ ငါ မင်းကို အရမ်းအရမ်း သဘောကျတယ်။ ဒါကြောင့် ငါ မင်းအတွက် သီချင်းရေးတယ်။ မင်းက ငါ့ကို အကြံဉာဏ်တွေ အများကြီး ပေးခဲ့တယ်။ ငါ မင်းကို တွေ့တုန်းက မီးရှူးမီးပန်းတွေ အစုလိုက် ရှိနေသလို ခံစားရတယ်။ အကုန်လုံးက ငါ့ရင်ထဲမှာ ပေါက်ကွဲသွားပြီးတော့ နောက်ပိုင်း ငါ မင်းအကြောင်းကိုပဲ တွေးမိတိုင်း ကမ္ဘာတစ်ခုလုံးကို တွေးနေရသလိုမျိုး ဖြစ်လာတယ်။ ”

ကျန်းယွင်ရှိူ့၏ ချစ်ခြင်းမေတ္တာ စကားများသည် အလွန်ကောင်းမွန်ပြီး သူ့အသံသည် အလွန် ရိုးသားစစ်မှန်သည်။

ယန်ကျင်းဇီ မျက်တောင်ခတ်လိုက်သည် : “ မင်း ဘာလို့ မိသားစုမေတ္တာအကြောင်း မရေးတာလဲ? ”

ကျန်းယွင်ရှိူ့က နှုတ်ဆိတ်သွားပြီး ခဏကြာမှ ဆိုသည် : “ သူတို့က ငါ့ကို မကြိုက်ဘူး။ ”

ယန်ကျင်းဇီက သူ့ကို ပွေ့ဖက်လိုက်သည် : “ ကိုယ် တောင်းပန်ပါတယ်... ”

“ မင်း ဘာလို့ ထပ်ပြီး တောင်းပန်နေတာလဲ? ” ကျန်းယွင်ရှိူ့က မေးသည်။ ယန်ကျင်းဇီ စကားမပြောသည်ကို တွေ့သောအခါ သူက ယန်ကျင်းဇီ၏ နှုတ်ခမ်းများကို ရုတ်တရက် နမ်းလိုက်သည် : “ ဝမ်းမနည်းပါနဲ့... ငါ မင်းကို နမ်းပေးမယ်။ မင်း ငါ့ကို နမ်းတဲ့အချိန်တိုင်း ငါ ပျော်တယ်။ ”

ယန်ကျင်းဇီ မရယ်ဘဲ မနေနိုင်တော့ : “ ဟုတ်တယ်၊ မင်း ကိုယ့်ကို နမ်းရင် ကိုယ် ပျော်သွားလိမ့်မယ်။ ”

ကျန်းယွင်ရှိူ့ ယန်ကျင်းဇီကို ဖက်လိုက်သည် : “ ငါ ကဗျာတစ်ပုဒ်ကို ကြိုက်တယ်။ လူတွေက သူ့ကို အကြိမ်ပေါင်းထောင်ချီ ရှာဖွေနေကြပြီး ရုတ်တရက် ပြန်လှည့်ကြည့်ကြတယ်။ ဒါပေမယ့် အဲ့လူက မှိန်ပျပျ အလင်းရောင်နေရာမှာ ရှိနေတယ်။ ငါ မင်းကို ရှာတွေ့ပြီ။ ကဗျာလေးက ဘယ်လောက်ကောင်းလိုက်သလဲ? ”

“ ဟုတ်တယ်၊ ကဗျာလေးက ကောင်းတယ်... မင်း ကိုယ့်အတွက် လူတွေကို ပျော်ရွှင်စေတဲ့ နောက်ထပ်သီချင်း နည်းနည်းလောက် ထပ်ရေးပေးနိုင်မလား? ကိုယ် မှတ်မိတယ်၊ ‘Lights’ ထဲက သီချင်းတွေက ရှာဖွေတာ၊ တိတ်တခိုးအချစ်နဲ့ အလားတူတွေပဲ... ‘Waning’ မှာ ပျော်စရာကောင်းတဲ့ ပြန်လည်တွေ့ဆုံခြင်း သီချင်းတွေ ကိုယ်တို့ ထည့်ကြမလား? ” ယန်ကျင်းဇီ အကြံပြုလိုက်၏။

ကျန်းယွင်ရှိူ့၏ ဤသီချင်းများသည် ပေါက်ကြားသွားလောက်ပြီဖြစ်သည်။

သူသည် ဘာဖြစ်နေမှန်း အတိအကျ မသိသော်ငြား အတတ်နိုင်ဆုံး ‘Waning’ အခွေမှ သီချင်းများကို ပြောင်းလဲပစ်လိုက်လျှင် အကောင်းဆုံး ဖြစ်၏။

မူလပိုင်ရှင်၏ မှတ်ဉာဏ်တွင် သီချင်းတင်သည့် နိုင်ငံခြား Twitter account ၏ နာမည်အတိအကျ မရှိချေ။ ကောက်ရိုးပုံထဲတွင် အပ်ရှာနေသကဲ့သို့ ဖြစ်နေမည်မှာ သံသယဖြစ်ဖွယ်မရှိ။ တစ်ဖက်လူကလည်း ကျန်းယွင်ရှိူ့ကို ပြင်းပြင်းထန်ထန် ထိုးနှက်ချက် မပေးမီတွင် ရှာအတွေ့မခံခြင်းသည်မှာ သိသာထင်ရှားသည်။ 

ထိုသို့ဆိုလျှင် သူက ထိုလူကို ဆွဲထုတ်ပေမည်။

သူသည် ထိုလူကို အလွတ်ပေးမည်မဟုတ်။

ယန်ကျင်းဇီသည် ဂီတကို နားမလည်သောကြောင့် သီချင်းရေးဖွဲ့ခြင်းက အလွန်ရိုးရှင်းလွယ်ကူသကဲ့သို့ ပြောမိသော်လည်း ကျန်းယွင်ရှိူ့က အမှန်တကယ် သဘောတူခဲ့သည် : “ အင်း! အခုတလော ငါ ရေးချင်တဲ့ သီချင်းတွေ အများကြီး ရှိတယ်။ ငါ နေ့တိုင်း အရမ်းပျော်ရွှင်တယ်! ငါ နောက်ထပ်သီချင်းတွေ အများကြီး ရေးနိုင်မယ်လို့ ငါ ထင်မိတယ်... ဒါပေမယ့် အဲ့လိုဆိုရင် ဒီအခွေကို ‘Waning’ လို့ ခေါ်လို့ရပါ့မလား? Waning ရဲ့ အဓိပ္ပာယ်က ဆိုးရွားလွန်းတယ်! ”

“ ‘Love’ လို့ နာမည်ပေးလို့ရတယ်လေ။ ” ယန်ကျင်းဇီသည် စကားပြောပြီးနောက် ကျန်းယွင်ရှိူ့၏ ညာဘက်ပါးကို နမ်းလိုက်ကာ သူ၏ ဘယ်ဘက်ပါး၊ သူ၏ နဖူးနှင့် နောက်ဆုံးတွင် သူ၏ နှုတ်ခမ်းတို့ကို နမ်းလိုက်သည်။

ကျန်းယွင်ရှိူ့၏မျက်နှာမှာ ချက်ချင်း နီမြန်းသွားသည်။

ခဏအကြာမှ သူက စကားပြောလာသည် : “ နောက်လည်း မင်း ငါ့ကို ဒီလိုမျိုး အမြဲနမ်းလို့ရတယ်။ ”

ညမှောင်နေပြီဖြစ်သော်ငြား စန္ဒရားခန်းဟာ တောက်ပစွာ မီးလင်းနေပြီး မည်သည့်မှေးမှိန်ခြင်းကိုမျှ မမြင်တွေ့နိုင်ချေ။

____

‘Lights’ - အလင်းများ။

‘Waning’ - မှေးမှိန်ခြင်း။

‘Remembrance’ - အမှတ်တရ။

‘Seek’ - ရှာဖွေခြင်း။

‘Lonely’ - အဖော်မဲ့ခြင်း။

‘Waking from a Dream’ - အိပ်မက်မှနိုးထခြင်း။

နာမည်တွေကို မြန်မာလိုရေးချင်ပေမယ့် အဆင်မပြေဖြစ်မှာစိုးလို့ မူရင်းအတိုင်းပဲ ထားလိုက်ပါတယ် TT

ကဗျာကတော့ အချစ် ဒါမှမဟုတ် right person ကို လူတွေ ရှာဖွေကြတဲ့အကြောင်း ရေးထားတာပါတဲ့။

____