အပိုင်း ၁၁၃ ( The President 13 )

ယန်ကျင်းဇီ ပြန်ရောက်သောအခါ ကျန်းယွင်ရှိူ့သည် ဟင်းလျာများကို ခွဲဝေပြင်ဆင်နေလေသည်။

မနေ့က ဧည့်သည်တစ်ဦးသည် သူတို့နှင့် ထမင်းအတူစားနေစဉ် ရှက်ရွံ့ခဲ့ရသည်။ မူလက သူသည် သူ့ရှေ့မှ စားစရာနည်းနည်းကိုသာ ယူစားချင်သော်လည်း ယန်ကျင်းဇီက သူ့အတွက် နောက်ထပ်စားစရာများကို အထူးတလည် ခပ်ထည့်ပေးခဲ့သည်...

ကျန်းယွင်ရှိူ့သည် ဤဖြစ်ရပ်ကို သတိရသွားပြီး စိတ်အခြေအနေ ကောင်းမွန်စွာဖြင့် နှုတ်ခမ်းပိတ်လျက် တေးညည်းကာ စားပွဲပေါ်မှ ဟင်းလျာများကို လူသုံးယောက်အတွက် ဝေစုခွဲနေသည်။

ယန်ကျင်းဇီက သူ့အပေါ် တကယ် ကောင်းသည်... သူ့စိတ်ထဲမှာ တေးသွားအသစ် ရှိလာပြီ!

ထို့နောက် ယန်ကျင်းဇီသည် မျက်နှာပေါ်တွင် ပျော်ရွှင်မှုများနှင့် ပြည့်နှက်နေသော ကျန်းယွင်ရှိူ့က... သူ့ပန်းကန်လုံးကို တူဖြင့် တီးခတ်နေသည်ကို တွေ့လိုက်ရသည်။

အသံတစ်သံပြီးလျှင် နောက်တစ်သံ၊ တေးသံတိုင်းက အတော်လေး နားထောင်ရကောင်းသည်။

ကောင်းမွန်နေပြီးဖြစ်သော ယန်ကျင်းဇီ၏ စိတ်အခြေအနေသည် ယခုအခါတွင် ပိုမိုကောင်းမွန်လာပေသည်။

ကျန်းယွင်ရှိူ့ ချက်ပြုတ်သော အစားအစာများသည် သာမန်အိမ်ချက်စားစရာများ ဖြစ်သော်လည်း ယန်ကျင်းဇီသည် အလွန်အရသာရှိသည်ဟု ခံစားရသည်။ သို့သော် သူသည် ကျန်းယွင်ရှိူ့အတွက်လည်း စိတ်မချမ်းမသာဖြစ်မိသည် – သန့်ရှင်းသပ်ရပ်မှု အစွဲအလမ်းရှိသူ ကျန်းယွင်ရှိူ့က စားစရာချက်ပြုတ်သည်၊ သူ ဘယ်လောက်ကြာကြာ လက်ဆေးနေရမလဲ မသိနိုင် : “ ယွင်ရှိူ့၊ မင်း ကိုယ် ချက်ကျွေးတာ စားချင်လား? နောက်ပိုင်း ကိုယ် အိမ်မှာ ဟင်းချက်ရမလား? ”

“ ဒါပေမယ့် မင်း အလုပ်လုပ်ရဦးမယ်။ ”

“ အဆင်ပြေတယ်။ ကိုယ် ရုံးထဲမှာ ထိုင်နေစရာမလိုဘူး။ တစ်နေ့ကို နှစ်နာရီ၊ သုံးနာရီလောက် သွားဖို့ပဲလိုတယ်။ ” ယန်ကျင်းဇီ ပြောလိုက်သည်။ ယနေ့တွင် သူသည် သူ့ကုမ္ပဏီ၏ အချက်အလက်များ အားလုံးကို ဖတ်ပြီး မူလပိုင်ရှင်၏ မှတ်ဉာဏ်များနှင့် ပေါင်းစည်းခဲ့သည်။ အရာရာကို နေရာတကျဖြစ်သွားစေသည်။ အနာဂတ်တွင် သူသည် တစ်ရက်တာ အလုပ်ကို အပြီးသတ်ရန် နာရီအနည်းငယ်သာ အချိန်ကုန်ပေတော့မည်။

သူ့အလုပ်များ ပြီးသောအခါ သူသည် ကျန်ရှိချိန်များကို ကျန်းယွင်ရှိူ့နှင့် အတူကုန်ဆုံးနိုင်မည်ဖြစ်သည်။ ယင်းကား ပြီးပြည့်စုံလှ၏။

“ ဒီလိုလုပ်ဖို့ဖြစ်ရဲ့လား? ” ကျန်းယွင်ရှိူ့ အနည်းငယ် အံ့ဩသွားသည်။

“ ဒါပေါ့၊ ဖြစ်တယ်။ ” ယန်ကျင်းဇီက ပြန်ဖြေသည်။ သူသည် အကုန်လုံးကို ထာဝရ မှတ်မိနိုင်တဲ့ ဉာဏ်ကြီးရှင်ပဲ!

ယွီယဲ့ : “ ...... ” ဥက္ကဌက အလုပ်များနေရမှာ မဟုတ်ဘူးလား? သူသည် သူဌေးကြီးများ ရေးသားသော ကိုယ်ရေးအတ္ထုပ္ပတ္တိနှင့် အလားတူများကို ဖတ်ဖူးသည်။ တစ်နေ့လျှင် ဆယ်နာရီကျော် အလုပ်လုပ်ရသည်ဟု သူတို့အားလုံးက ဆိုသည်။ ယန်ကျင်းဇီက တစ်နေ့ကို နှစ်နာရီ၊ သုံးနာရီသာ အလုပ်လုပ်သည်။ နည်းနည်းလေး ကျင့်ဝတ်ပျက်ပြားမနေဘူးလား?

ဒါဆို ယန်ကျင်းဇီက အချစ်ကို ဦးစားပေးပြီး အလုပ်မလုပ်တဲ့ ဥက္ကဌအချစ်ဝတ္ထုတွေထဲက ဥက္ကဌတွေစီက သင်ယူဖို့ ကြိုးစားနေတာလား?

ဒါပေမယ့် သူတို့က အလုပ်မလုပ်ရင်တောင် ပိုက်ဆံတွေ အများကြီး ရှိသေးတယ်။

ယွီယဲ့သည် သူ၏ ဆင်းရဲနွမ်းပါးသော စုဆောင်းငွေကို သတိရပြီး တိတ်တိတ်ဆိတ်ဆိတ် စားသောက်လိုက်သည်။

ထမင်းစားပြီးနောက် ယွီယဲ့သည် အိမ်ပြောင်းရွှေ့ရန် အဆိုပြုပြီး စကားဆိုသည် : “ ယွင်ရှိူ့က အသန့်ကြိုက်တယ်။ ငါ ထွက်သွားရင် သူ ပိုပြီး သက်တောင့်သက်သာ ရှိနိုင်တယ်။ ” 

သေချာတာပေါ့၊ ယန်ကျင်းဇီက မဆိုင်းမတွ သဘောတူသည်။ အိမ်မှာ မီးသီးအကြီးကြီးတစ်လုံး ရှိတာ ဘယ်သူက ကြိုက်မှာလဲ?

သို့သော် မူလပိုင်ရှင်၏ မှတ်ဉာဏ်ထဲတွင် ဤယွီယဲ့က ကျန်းယွင်ရှိူ့အပေါ် အလွန်ကောင်းပေးနေပေသည်... ယန်ကျင်းဇီသည် စိုးရိမ်စွာဖြင့် သူ၏ နောက်ထပ်အစီအစဉ်ကို မေးမြန်းလိုက်သည်။

ယွီယဲ့သည် ကျန်းယွင်ရှိူ့၏ အေးဂျင့်အဖြစ် အလုပ်လုပ်နေသော်လည်း သူသည် စန္ဒရားကို နှစ်ပေါင်းများစွာ လေ့လာခဲ့ပြီး ကျော်ကြားသော နိုင်ငံခြားကျောင်းမှ ဒီပလိုမာကို ရရှိထားသည်။ သူသည် ကျန်းယွင်ရှိူ့အတွက် အေးဂျင့်နှင့် လက်ထောက်အဖြစ် အလုပ်ဆက်လုပ်နေစဉ် သက်ဆိုင်ရာ အချိန်ပိုင်းအလုပ်တချို့ကို ရှာဖွေရန် အစီအစဉ်ရှိသည်။

အခြားအလုပ်များထဲတွင် သူသည် သူ၏ ကိုယ်ရေးအကျဉ်းကို ယူ၍ လူအများကို စန္ဒရားတီးသင်ပေးလျှင်ပင် တစ်နာရီကို ဒေါ်လာရာဂဏန်းခန့် ပြဿနာမရှိဘဲ ရရှိနိုင်လိမ့်မည်။

ယန်ကျင်းဇီက သူ့အစီအစဉ်ကို နားထောင်ပြီးနောက် ချက်ချင်းပြောသည် : “ ကောင်းတယ်... ဒါနဲ့ မင်းက ယွင်ရှိူ့ရဲ့ အေးဂျင့် ဖြစ်မှာဆိုတော့ ငါ မင်းကို အခြေခံလစာ တစ်လကို ယွမ် ၁၀,၀၀၀ ပေးမယ်။ ယွင်ရှိူ့ အလုပ်ရရင် ကော်မရှင်ခကို သက်သက်ခွဲတွက်ပေးဦးမယ်။ ”

ယွီယဲ့ အံ့ဩသွားသည် : “ အခြေခံလစာက... အရမ်းများမနေဘူးလား? ” ကျန်းယွင်ရှိူ့က အိမ်တွင်းပုန်းလွန်းပြီး အလုပ်သိပ်မလုပ်ချေ။ ဒီလိုဆို အခြေခံလစာ ၁၀,၀၀၀ က အလဟဿငွေကုန်တာပဲ!

“ မများဘူး။ ယွင်ရှိူ့က အနာဂတ်မှာ မင်းကို အများကြီး အနှောင့်အယှက်ပေးရဦးမှာ။ ” ယန်ကျင်းဇီက ဆိုသည်။ စကားပြောပြီးနောက် သူသည် အတွင်းရေးမှူးကျိုးကို ဖုန်းခေါ်ကာ အေးဂျင့်စာချုပ်တစ်ခုကို မနက်ဖြန်တွင် ယူလာရန်နှင့် ယွီယဲ့၏ ပြောင်းရွှေ့ရေးကို ကူညီရန် ခိုင်းလိုက်သည်။

ဟီးဟီး၊ ယွီယဲ့ ထွက်သွားမှာကို သူ မစောင့်နိုင်တော့ဘူး။

ယွီယဲ့အကြောင်း ပြောပြီးနောက် ယန်ကျင်းဇီသည် အပေါ်ထပ်သို့ ကျန်းယွင်ရှိူ့ကို အဖော်ပြု၍ လိုက်ပါသွားပြီး ဆက်လက်အသံသွင်းကာ စန္ဒရားတီးပညာရှင်များအသင်း၏ အတွင်းပိုင်းဝက်ဘ်ဆိုက်တွင် သီချင်းတင်သည်။

ဤနေရာတွင် သူတို့သည် အမည်ရင်းစနစ်ကို အသုံးပြုပြီး မှတ်ပုံတင်ထားသော စန္ဒရားတီးပညာရှင်များ အားလုံးသည် နာမည်ကျော်များ ဖြစ်ကြသည်။ ထို့အပြင် ကျန်းယွင်ရှိူ့သည် အစောပိုင်းနှစ်များအတွင်း နိုင်ငံရပ်ခြားမှ ပြိုင်ပွဲများစွာကို ဝင်ရောက်ယှဉ်ပြိုင်ဖူးပြီး ဖျော်ဖြေပွဲများလည်း ကျင်းပဖူးသည်။ သူ့ဂုဏ်သတင်းက မနည်းချေ... လူတိုင်းက ကျန်းယွင်ရှိူ့ကို ကောင်းကောင်းမွန်မွန် အကဲဖြတ်ပေးကြသည်။

အစပိုင်းတွင် ကျန်းယွင်ရှိူ့သည် တခြားလူများနှင့် ဆက်သွယ်နည်းကို အနည်းငယ် မသဲကွဲသော်လည်း အင်တာနက်အသုံးပြုခြင်းဖြင့် ဆက်သွယ်ရခြင်းက သူ၏စိုးရိမ်ပူပန်မှုကို လျော့နည်းစေသည့်အပြင် လူတိုင်းက သူ ရင်းနှီးကျွမ်းဝင်သော တေးဂီတအကြောင်း ပြောနေကြသည်...

ကျန်းယွင်ရှိူ့သည် သူ၏ စိတ်ကူးစိတ်သန်း အရင်းအမြစ်အကြောင်းကို သူတို့ကို စတင်ပြောပြခဲ့ပြီး သူ၏ ထိုသီချင်းကို ဖန်တီးချင်ရသော အကြောင်းအရင်းကို ပြောပြနေခဲ့ကာ သူတို့၏ အကြံပြုချက်များအရ သူ တင်ထားသော သီချင်းတွင် ပြောင်းလဲမှုတချို့ ပြုလုပ်ခဲ့သည်။

သူသည် ယခင်က လူများနှင့် များများစားစား ပြောဆိုဆက်ဆံခြင်း မရှိခဲ့သော်လည်း ယခုတွင် ထိုသို့သော ဖလှယ်မှုများမှ များစွာ သင်ယူလိုက်ရသည်။

သို့ရာတွင် ညဆယ်နာရီ၌ ယန်ကျင်းဇီက သူ့ကို အိပ်ရာဝင်ခိုင်းသည် : “ မနက်ဖြန် မင်း သူတို့နဲ့ စကားဆက်ပြောလို့ရတယ်လေ။ ”

“ ကောင်းပါပြီ... ” ကျန်းယွင်ရှိူ့က ဝမ်းနည်းစွာဖြင့် ကွန်ပျူတာကို ပိတ်လိုက်ပြီး ယန်ကျင်းဇီကို ရုတ်တရက် ကြည့်လိုက်သည် : “ မင်း ခေါင်းငုံ့ပေး။ ”

ယန်ကျင်းဇီက မရေမရာဖြစ်စွာဖြင့် ခေါင်းငုံ့ပေးလာသည်။

ထို့နောက် ကျန်းယွင်ရှိူ့သည် ယန်ကျင်းဇီ၏ မျက်နှာနှစ်ဖက်အပြင် နဖူးနှင့် နှုတ်ခမ်းတို့ကိုလည်း နမ်းလိုက်သည် : “ ကောင်းသောညပါ။ ”

ယန်ကျင်းဇီ : “ ... ” ယောက်ျားတစ်ဦးသည် ယဉ်ကျေးရည်မွန်ပြီး အတုံ့အပြန်ပြုမူတတ်ရမည်။ ရေတစ်စက်ကို စမ်းရေတစ်ကန်ဖြင့် ပြန်ပေးဆပ်ရမည်ဖြစ်သည်... ကျန်းယွင်ရှိူ့ ထွက်မပြေးခင်သည့်အထိ သူသည် ကျန်းယွင်ရှိူ့ကို ဆယ့်ခြောက်ကြိမ် နမ်းလိုက်သည်။

ယန်ကျင်းဇီသည် နောက်နေ့နံနက်တွင် စောစောထ၍ နံနက်စာပြုလုပ်သည်။ ချက်ပြုတ်နေသည့်အချိန်တွင် သူသည် ကျန်းယွင်ရှိူ့ ဟင်းချက်စဉ် ဝတ်ဆင်ခဲ့သော တစ်ခါသုံး ရေချိုးဦးစွပ်ကိုလည်း ဝတ်ဆင်ထားသည်။

ယွီယဲ့ကို လာခေါ်သော အတွင်းရေးမှူးကျိုး : “ ... ” မစ္စတာယန်က တကယ်ချက်တတ်တာလား?! ပြီးတော့ ဒီဝတ်စုံက ဘာလဲ?

အစားထိုးနှင့် နတ်ဘုရားက တကယ့်ကို မယှဉ်နိုင်... ယခင်က သုံ့ချင်းလင်သည် မစ္စတာယန်အတွက် ချက်ပြုတ်ပေးပြီး မစ္စတာယန်က သိပ်မစားခဲ့ဘဲ ယခုမူ မစ္စတာယန်က သူ့ဘာသာသူ ချက်ပြုတ်နေသည်။

ယွီယဲ့သည် အိပ်ရာနိုးလာပြီး ၎င်းကို မြင်လိုက်ရကာ ထိတ်လန့်သွားသည်။ ထို့နောက် သူသည် ယန်ကျင်းဇီ၏ စကားပြောသံကို ကြားလိုက်ရသည် : “ ယွီယဲ့၊ ငါ အရင်က တစ်ခါမှ မချက်ဖူးလို့ မင်းဝေစုကို ထည့်မချက်လိုက်ဘူး... ငါ အတွင်းရေးမှူးကျိုးကို မင်းအတွက် မနက်စာယူလာခိုင်းထားတယ်။ မင်း အတွင်းရေးမှူးကျိုး ယူလာတာကို စားလို့ရတယ်။ ”

စကားပြောပြီးနောက် ယန်ကျင်းဇီသည် သူ၏ လတ်လတ်ဆတ်ဆတ် ကြော်ထားသော အသားကင်နှင့် ပေါင်မုန့်တို့နှင့်အတူ ထွက်ခွာသွားသည် — သူသည် သူ၏ အိပ်ပျော်နေသော အလှလေးကို သွားနှိုးပြီး သူ လုပ်ထားသော နှစ်သက်ဖွယ် နံနက်စာကို မြည်းစမ်းခိုင်းတော့မည်ဖြစ်သည်။

ယွီယဲ့ : “ ... ” မင်း ကောင်းကောင်းမချက်တတ်လို့ မင်း ငါ့အတွက် မချက်ပေးတာ မဟုတ်ပါဘူး။ မင်း ငါ့အတွက် မလုပ်ပေးချင်တာပါ၊ ဟုတ်တယ်မလား? ဒါပေမယ့် သူ နိုင်ငံခြားမှာ စားရလို့ ငြီး‌ငွေ့နေတဲ့ အသားကင်တွေထက်စာရင် အလှပဂေး အစ်မကြီး ဝယ်လာတဲ့ ပေါက်စီတွေက ပိုအရသာရှိတယ်...

ယွီယဲ့သည် မုန့်စားပြီး စာချုပ်တွင် လက်မှတ်ထိုးကာ အတွင်းရေးမှူးကျိုးနှင့်အတူ သူ့ကိုယ်ပိုင်ပစ္စည်းများကို ထုပ်ပိုး၍ ဇိမ်ခံဗီလာကြီးမှ ပျော်ရွှင်စွာ ထွက်ခွာသွားသည်။

သူ ကျန်းယွင်ရှိူ့ကို အရမ်းသဘောကျပေမယ့် ကျန်းယွင်ရှိူ့နဲ့ နေတာထက် တစ်ယောက်တည်း နေရတာက ပိုအဆင်ပြေတယ်!

သနားစရာပင် – ကျန်းယွင်ရှိူ့သည် အသန့်ကြိုက်မှု ပြဿနာကြောင့် ဤနေရာတွင် အိမ်တော်ထိန်းနှင့် နာနီများ၏ ဂရုစိုက်မှုကို မခံစားရပေ။

အတွင်းရေးမှူးကျိုးသည် ယွီယဲ့ကို လာကြိုပြီးနောက် မကြာမီတွင် ပြန်လာခဲ့သည်။

ယန်ကျင်းဇီ ကမ်းလှမ်းသည့် ယွမ်တစ်သန်း ဈေးနှုန်းက မြင့်မားလွန်းသဖြင့် ကျန်းယွင်ရှိူ့နှင့် ရုပ်တူသူကို ရှာတွေ့ပြီဖြစ်သည်။

ဤလူက သူ့ဘာသာသူ တံခါးဝသို့ ရောက်လာခြင်းဖြစ်၏ – သူသည် ပိုက်ဆံတစ်သန်းဟာ များပြားလွန်းပြီး တခြားသူများကို မပေးသင့်ဟု ခံစားရသောကြောင့် သူကိုယ်တိုင် ယူချင်ခဲ့သည်။ 

မတော်တရော် ဓာတ်ပုံများ ပျံ့နှံ့နေလျက်ရှိသော်လည်း သူက စိတ်ပူစိုးရိမ်ခြင်းမရှိဘဲ ရှေ့ထွက်လာရဲပြီး ဓာတ်ပုံများထဲမှ လူသည် သူ ဖြစ်ကြောင်း ဝန်ခံရန်ပင် ဆန္ဒရှိနေသော အကြောင်းအရင်းမှာ ရိုက်ကူးထားသော မဖွယ်မရာ ဓာတ်ပုံများက သူ့အလုပ် ဖြစ်သောကြောင့်ပင်။

ဤလူသည် ချမ်းသာသော အမျိုးသမီးများကို ပြုစုခြင်းဖြင့် ငွေရှာသည်။ သူက အမျိုးသမီးများကို ဝန်ဆောင်မှုပေးခြင်းတွင် အထူးပြုသည့် ကလပ်တစ်ခုမှ cowboy ( host ) ဖြစ်သည်။

“ အစကတော့ ငါက ကျန်းယွင်ရှိူ့နဲ့ ၅၀-၆၀% လောက်ပဲ တူတာ။ ဒါပေမယ့် ငါ ကျန်းယွင်ရှိူ့ကို အရမ်းကြိုက်တဲ့ ဖောက်သည်တစ်ယောက်နဲ့ တွေ့ခဲ့တော့ ငါ့ကို အမြဲတမ်း တောင်းဆိုနေရင်းကနေ နောက်ကျတော့ ငါ့ကို ပလတ်စတစ်ဆာဂျရီ လုပ်ဖို့ နိုင်ငံခြားပို့လိုက်တယ်။ အခု ငါ့မှာ ကျန်းယွင်ရှိူ့နဲ့ ၈၀% တူညီမှု ရှိတယ်... ဒီပုံတွေကို ငါနဲ့အတူနေတဲ့ အခန်းဖော်က ရိုက်ထားတာ။ သူ(မ)က ငါ့ပုံတွေကို ရိုက်ပြီး ပိုက်ဆံနဲ့ရောင်းစားတယ်။ အင်တာနက်ပေါ်က ကိစ္စတွေက ကြီးလွန်းတော့ ကျန်းယွင်ရှိူ့ ငါ့ကို ပြဿနာလာရှာမှာ ငါ ကြောက်လို့ ငါ ထွက်မလာရဲခဲ့ဘူး။ အခု မင်းက တစ်သန်းပေးမယ်လို့ ကြေညာတော့ အဲ့ကောင်မက ပိုက်ဆံရအောင် ငါ့ကို ရောင်းစားချင်နေပြီ။ အဲ့ဒါကြောင့် ငါ အရင်ရောက်အောင် လာခဲ့တယ်... ” ဤလူကလည်း ရိုးသားပွင့်လင်းသည်။

လွန်ခဲ့သော ရက်အနည်းငယ်က သူနှင့် သူ့ဧည့်သည်များ၏ ဓာတ်ပုံများသည် အင်တာနက်ပေါ်တွင် ‌တက်လာခဲ့ပြီး ကလပ်သူဌေးက သူ့ကို ဆူခဲ့ကာ ဧည့်သည်များက သူ့စီလာရမည်ကို ကြောက်သွားကြသည်။ သူ့ဘဝက ရုတ်တရက်ကြီး သနားစရာကောင်းသွားသည်။

ထို့အပြင် သူ့ကို ကျန်းယွင်ရှိူ့ဟု အထင်မှားနေကြပြီး ကျန်းယွင်ရှိူ့က ထိုသို့အင်အားကြီးမားသော လူတစ်ယောက် ဖြစ်နေသေးသည်... ကျန်းယွင်ရှိူ့ သူ့ကို ဒုက္ခပေးမည်ကို သူ ကြောက်မိသဖြင့် သဘာဝကျစွာပင် သူသည် လက်ဦးမှုမရယူရဲခဲ့ချေ။

ကလပ်က လူတွေက သူမှန်း သိပေမယ့် ဘယ်သူကမှ ထုတ်ပြောဖို့ ဦးနှောက်မရှိကြဘူး — ဘယ်လိုလုပ် သူတို့က သူတို့ ဒီလိုစီးပွားရေးမျိုး လုပ်ကိုင်နေတယ် ဆိုတာ လူသိခံနိုင်ပါ့မလဲ?

ယန်ကျင်းဇီ၏ ဆုငွေတစ်သန်း ပေါ်မလာခင်အထိ။

တစ်သောင်း၊ နှစ်သောင်း မဟုတ်ဘူး။ တစ်သန်း!

သူတို့သည် အများအားဖြင့် ပိုက်ဆံအများကြီး ရှာဖြစ်ကြသော်လည်း ပြတ်တောင်းပြတ်တောင်း ရရှိခြင်းဖြစ်သည်။ သူတို့ဟာ ငွေအများအပြား သုံးလေ့ရှိ‌ကြသောကြောင့် မစုဆောင်းနိုင်ကြချေ။ တစ်သန်းဆိုလျှင်ပင် ကွဲပြားသည်။ သူတို့က ဇာတိမြို့ကို ပြန်ပြီး ပိုက်ဆံအပြည့်နှင့် အိမ်ဝယ်နိုင်သည်။ အနာဂတ်တွင် ဤအလုပ်မျိုး လုပ်စရာမလိုတော့ဘဲ ထွက်ပေါက်တစ်ခုကို ရရှိလာနိုင်သည်။

ကလပ်မှ လူတော်တော်များများဟာ လှုပ်ရှားဖို့ အဆင်သင့်ဖြစ်နေကြပြီး သူ့ဓာတ်ပုံများကို တိတ်တဆိတ် ရိုက်ကူးရောင်းစားသော သူပင် လှုပ်ရှားချင်နေသည်... ထို့ကြောင့် ရိုးရှင်းစွာပင် သူ့ဘာသာ တံခါးဝသို့ သွားလိုက်သည်။

ဤလူက စကားအများကြီး ပြောသော်လည်း အမှန်အတိုင်း ပြောနေခြင်းဖြစ်ပြီး မလှည့်စားချေ။

သို့သော် သူ့အခန်းဖော်နှင့် ပြိုင်ဘက်တို့က သူ့အခန်းထဲတွင် ကင်မရာတပ်ဆင်ပြီး သူ့ကို လျှို့ဝှက်စွာ ဓာတ်ပုံရိုက်ကြသော်ငြား ရောင်းချရန် မရည်ရွယ်ထားသကဲ့သို့ ကျန်းယွင်ရှိူ့ကို ဒုက္ခပေးရန်လည်း စိတ်ကူးမရှိခဲ့ကြပေ။

သူတို့ကလပ်တွင် ဓာတ်ပုံခိုးရိုက်ခွင့် မရှိချေ။ တကယ်တော့ သူ့အခန်းဖော်သည် သူ့ကို ဧည့်သည်များအား ဓာတ်ပုံခိုးရိုက်ခြင်းဖြင့် စွပ်စွဲပြီး မောင်းထုတ်ချင်ခဲ့သည်။

တစ်စုံတစ်ယောက်က အစပြု၍ သူ့အခန်းဖော်ကို ဓာတ်ပုံဝယ်ရန် လာရှာခြင်းဖြစ်သည်။ ထို့ကြောင့် သူလည်း ထိုလူက ဘယ်သူမှန်း မသိ...

ယန်ကျင်းဇီသည် ထိုကလပ်ကို အဆုံးသတ်ရန် ရဲကို တိုက်ရိုက်ဖုန်းဆက်လိုက်သည်။ သူသည် ဓာတ်ပုံဝယ်သူကိုလည်း စစ်ဆေးရန် လူရှာခဲ့သည်။

အမှန်ပင်၊ ဓာတ်ပုံများ၏ အဓိကဇာတ်လိုက်က ထွက်လာရန် အစပြုပြီး စစ်ဆေးခံရန် ဆန္ဒရှိသည်။ ယန်ကျင်းဇီသည် သူ့ကို ဘာမှမလုပ်ပေ။ သူ့ကို တစ်သန်းပေးပြီးနောက် ယန်ကျင်းဇီသည် သူ့ကို အထုပ်သိမ်းပြီး နိုင်ငံခြားပို့ကာ သူ၏ ယခင် ပလတ်စတစ်ဆာဂျရီ ဆေးရုံသို့ ပို့လိုက်သည်။

နီးနီးကပ်ကပ် ကြည့်လျှင် ဤလူနှင့် ကျန်းယွင်ရှိူ့က တကယ့်ကို အလွန်ကွဲပြားသည်။ ဒါပေမယ့် ယန်ကျင်းဇီက ကျန်းယွင်ရှိူ့နဲ့ မျက်နှာချင်းဆင်တဲ့ ဒီလူကို သည်းမခံနိုင်ဘူး!

ကျန်းယွင်ရှိူ့၏ ကိစ္စဟာ လုံးဝဥဿုံ ရှင်းလင်းသွားသည်။

အထူးသဖြင့် ယန်ကျင်းဇီက ရဲများကို ဖုန်းဆက်ပြီး ရဲများက Weibo ပေါ်တွင် ဤသို့သော ပလတ်စတစ်ဆာဂျရီမျိုးကို ပြင်းပြင်းထန်ထန် ရှုတ်ချပြစ်တင်ကြောင်း ဤဖြစ်ရပ်ကို ပို့စ်တင်ခဲ့သောကြောင့် ဖြစ်သည်။ ယခုအခါတွင် တစ်စုံတစ်ယောက်က ကျန်းယွင်ရှိူ့အပေါ်သို့ ရေညစ်များ လောင်းချင်လျှင်ပင် သူတို့ မလုပ်နိုင်တော့ချေ။

အင်တာနက်ပေါ်မှ မရေမတွက်နိုင်သော လူများက ကျန်းယွင်ရှိူ့ကို သနားကြသည် — ကျန်းယွင်ရှိူ့က တကယ် သနားစရာကောင်းတယ်!

“ ငါ့ယွင်ရှိူ့က သနားစရာကောင်းလွန်းတယ်! ”

“ ဒီအပြုအမူက ရွံစရာကြီး! ”

“ ရွံစရာအကောင်းဆုံးက ဓာတ်ပုံဝယ်တဲ့လူပဲ။ ယွင်ရှိူ့ မဟုတ်မှန်း သိတာတောင် ဓာတ်ပုံတွေကို သုံးပြီး ယွင်ရှိူ့ကို ဒုက္ခပေးတယ်! ”

“ ကံကောင်းတာကတော့ မစ္စတာယန်က မယုံဘူး! မစ္စတာယန်က အရမ်းကောင်းတယ်! ”

“ ယန်သခင်လေးက ချောလိုက်တာ! ” 

… ...

ကျန်းယွင်ရှိူ့နှင့် ယန်ကျင်းဇီတို့သည် ထိုသို့ဖြင့် နောက်ထပ်ပရိသတ်တစ်လှိုင်း ရရှိလိုက်ပြီး သူတို့အတွဲပရိသတ်များလည်း နေ့ချင်းညချင်း ပိုမိုများပြားလာသည်။

ခြယ်လှယ်တတ်တဲ့ ဥက္ကဌနဲ့ အရမ်းအေးစက်တဲ့ ဂီတပညာရှင်တို့က တကယ်ပဲ အရမ်းလိုက်ဖက်တယ်!

ကျန်းယွင်ရှိူ့သည် အင်တာနက်ပေါ်မှ ဤကိစ္စများကို သိသော်လည်း ဂရုမစိုက်ပေ။

သူ သိတာကတော့ အခုတလော သူ အရမ်းအရမ်း ပျော််တယ်လို့ ခံစားနေရတာပဲ!

ယန်ကျင်းဇီသည်လည်း အလွန်ပျော်ရွှင်နေသည်။ သူ အိမ်ပြန်ရောက်ရင် ရေချိုးပြီး အဝတ်အစားလဲဖို့ပဲ လိုတယ်၊ ပြီးရင် သူ ကျန်းယွင်ရှိူ့ကို ဖက်လို့ရပြီ!

ကျန်းယွင်ရှိူ့တွင် သန့်ရှင်းသပ်ရပ်မှု အစွဲအလမ်း ရှိသော်လည်း အဓိကသည်းမခံနိုင်သည်မှာ အပြင်ဘက်မှ အညစ်အကြေးများ ဖြစ်ကြောင်း သူ ရှာတွေ့ထားသည်။

အိမ်ရှိ တစ်နေရာရာ သို့မဟုတ် လှေကားထစ်များတွင် ဖုန်ရှိနေလျှင်... ကျန်းယွင်ရှိူ့က လျစ်လျူရှုထားနိုင်သည်။

‌ဂီတတူရိယာများနှင့် ကိုယ်ပိုင်အခန်းကိုတော့ သူက သန့်ရှင်းရေးလုပ်လိမ့်မည်ဖြစ်ကြောင်း သေချာပေသည်။

ထိုသို့သော ကျန်းယွင်ရှိူ့က အတော်ချစ်စရာကောင်းသည်။

မျက်စိတစ်မှိတ်အတွင်း တစ်လကုန်သွားသည်။ ဤလတွင် ယန်ကျင်းဇီသည် မနက်ခင်း၌ တစ်နေ့တာအတွက် သုံးနာရီသာ အလုပ်လုပ်ပြီး တခြားအချိန်များတွင် ကျန်းယွင်ရှိူ့နှင့် နေနေရာ ကျန်းယွင်ရှိူ့ကို နေ့စဉ်နေ့တိုင်း အလွန်ပျော်ရွှင်စေသည်။

ဤလအတွင်းတွင် သူသည် ယခင်က ရေးစပ်ထားသော မထုတ်ဝေရသေးသည့် သီချင်းများကိုလည်း ထိုဝက်ဘ်ဆိုက်ပေါ်တွင် တစ်ပုဒ်ပြီးတစ်ပုဒ် တင်ကာ တခြားသူများနှင့် ဆက်သွယ်ခဲ့သည်။

၎င်းတို့ထဲတွင် Plants vs. Zombies ဆော့ပြီးနောက် ရေးထားသော *“My Brain Was Eaten” ဟု အမည်ရသည့် ကြောက်လန့်စရာ သီချင်းတိုလေးပင် ပါဝင်သေးသည်။

ထိုဝက်ဘ်ဆိုက်တွင် သူ့သီချင်းများမှာ အလွန်ချီးကျူးခံရပြီး အထူးသဖြင့် ‘Waning’ ထဲတွင် ထည့်သွင်းရန် မူလက စီစဉ်ထားသော သီချင်းများ ဖြစ်သည်။

ကျန်းယွင်ရှိူ့ကို လာရှာပြီး သီချင်းအချို့၏ မူပိုင်ခွင့်ကို ဝယ်လိုသော ဂီတပညာရှင်တစ်ဦးပင် ရှိလေသည် : “ ဒီသီချင်းက တကယ်ကောင်းတယ်။ ငါ တီးတုန်းက ငါ့ရဲ့ ငယ်ငယ်တုန်းက ချစ်သူကို ငါ တွေးမိတယ်... မကြာသေးခင်က ငါ့သူငယ်ချင်းက ရုပ်ရှင်တစ်ကား ရိုက်ထားတယ်။ သူ ဒီလိုသီချင်းတွေ လိုနေတယ်။ ဒီသီချင်းတွေ သူ ယူသုံးလို့ရနိုင်မလား? မူပိုင်ခွင့်ကြေး‌ကို ညှိနှိုင်းနိုင်ပါတယ်။ ”

ကျန်းယွင်ရှိူ့သည် လတ်တလောတွင် ငွေရှာရန်သာ တွေးတောနေသည်။ မူပိုင်ခွင့်ကြေး ရှိကြောင်း ကြားသောအခါ သူက မဆိုင်းမတွ သဘောတူလိုက်သည်။

မူလက ယန်ကျင်းဇီသည် ခိုးကူးမှုကိစ္စကြောင့် စာချုပ်ကို ထိခိုက်မည်အား စိုးရိမ်ခဲ့သော်လည်း သူသည် ကျန်းယွင်ရှိူ့နှင့် ထိုလူများကြား စကားဖလှယ်မှုကို လောလောလတ်လတ် နားထောင်လျက်ရှိသည်။ ထို့အပြင် ကျန်းယွင်ရှိူ့က ဤသီချင်းတချို့ကို သူ့ဆရာရှေ့တွင် တီးခတ်ခဲ့ကြောင်းကိုလည်း သူ သိလိုက်ရကာ ရုတ်တရက်ကြီး ထပ်ပြီး စိတ်မပူမိတော့ချေ။

ဤသီချင်းများ၏ ၁၀၀% ကို ကျန်းယွင်ရှိူ့ ရေးသားထားသည်။ အဲ့လူက ကျန်းယွင်ရှိူ့ ခိုးကူးတယ်လို့ ပြောတယ်၊ သူ့မှာ အရည်အချင်းရှိရင် ရှေ့ထွက်ပြီး လာရင်ဆိုင်စမ်းပါ!

မူလဇာတ်ကြောင်းတွင် Twitter ပေါ်မှ ပြစ်တင်ရှုတ်ချခြင်းမှလွဲ၍ ထိုလူက ထိပ်တိုက်ရင်ဆိုင်ရန် ထွက်မလာခဲ့ချေ။ ထိုလူ ထွက်မလာရဲသည်မှာ သိသာပြီး ယခု သူတို့ ကြောက်စရာမလိုတော့ပေ။

ကျန်းယွင်ရှိူ့၏ သီချင်းတချို့ကို ထိုရုပ်ရှင်ဇာတ်ကားအတွက် ဇာတ်ဝင်သီချင်းနှင့် နောက်ခံတေးဂီတအဖြစ် အသုံးပြုခဲ့ကြပြီး ကျန်းယွင်ရှိူ့သည် စုစုပေါင်း US$ 150,000 ရရှိလိုက်သည်။

ယန်ကျင်းဇီအတွက် ငွေက သိပ်မများသော်လည်း ကျန်းယွင်ရှိူ့က တစ်ချိန်လုံး စဉ်းစားနေပြီး ငွေရောက်လာမည့်နေ့ကို စောင့်‌ဆိုင်းလျက် အထူးပျော်ရွှင်နေကာ သူ့လက်ချောင်းများက စားပွဲပေါ်တွင် ပျော်ရွှင်စွာ ကခုန်နေလေသည်။

“ အရမ်းပျော်လား? ” ယန်ကျင်းဇီက မေးသည်။

“ အင်း! ” ကျန်းယွင်ရှိူ့က ခေါင်းညိတ်သည် : “ ပိုက်ဆံအများကြီးပဲ! ”

သူသာ ဂီတတူရိယာ မဝယ်ဘူးဆိုရင် ဒီပိုက်ဆံပမာဏကို နှစ်ပေါင်းများစွာ သုံးစွဲနိုင်တယ်!

ယခုမူ.... ကျန်းယွင်ရှိူ့ ယန်ကျင်းဇီကို ကြည့်လိုက်သည် : “ ကျင်းဇီ၊ မင်းရဲ့ ဘဏ်အကောင့်နံပါတ်က ဘာလဲ? ”

“ မင်း ဘာလို့‌ နံပါတ်တောင်းတာလဲ? ” ယန်ကျင်းဇီ အနည်းငယ် ထူးဆန်းသွားသည်။

“ မင်းစီကို ပိုက်ဆံလွှဲဖို့။ ” ကျန်းယွင်ရှိူ့က ဖြေသည်။

“ မင်း ကိုယ့်ကို ပိုက်ဆံပေးချင်တာလား? ” ယန်ကျင်းဇီ အံ့အားသင့်သွားသည်။

“ ဟုတ်တယ်၊ ငါလည်း မိသားစုကို ထောက်ပံ့မယ်။ ” ကျန်းယွင်ရှိူ့က လေးလေးနက်နက် ခေါင်းညိတ်ပြလာသည်။

“ ကိုယ့်ယွင်ရှိူ့က အရမ်းမိုက်တယ်! ” ယန်ကျင်းဇီသည် သူ့ကို လေးကြိမ်နမ်းလိုက်သည်။ ထို့နောက် သူသည် မူလပိုင်ရှင်ထံမှ အမြဲတမ်း ပိုက်ဆံယူလေ့သာရှိသော သုံ့ချင်းလင်ကို ရုတ်တရက် တွေးမိသွားသည်။

သုံ့ချင်းလင်နှင့် ပတ်သက်သော ကိစ္စကို သူသည် အမြဲတမ်း ဝန်ခံချင်ခဲ့သည်...