အပိုင်း ၁၁၅ ( The President 15 )

ကျန်းယွင်ရှိူ့သည် သုံ့ချင်းလင်၏ စိတ်ပိုင်းဆိုင်ရာ ပြဿနာ ဖြစ်လာသည်။

သူသည် သူ့ယခင်ဘဝတွင် ကျန်းယွင်ရှိူ့၏ အရိပ်ထဲ၌ လေးနှစ်ကြာ နေထိုင်ခဲ့သည်။ မည်သို့ပင်ဖြစ်စေ သူသည် ကျန်းယွင်ရှိူ့ကို အနိုင်မရချေ။ ကျန်းယွင်ရှိူ့၏နာမည်ကို ကြားလိုက်ရသည်နှင့်တပြိုင်နက် သူသည် ညဘက်တွင် အိပ်မပျော်နိုင်တော့ပေ။

ပြန်လည်မွေးဖွားခြင်း အ‌ခွင့်အရေးနှင့်အတူ သူသည် ဘုရားသခင်က သူ့ကို နောက်ဆုံးတွင် ဂရုစိုက်လာပြီဟု တွေးခဲ့ပြီး နောက်ပိုင်းတွင် ဖြစ်ပျက်ခဲ့သမျှ အရာအားလုံးဟာ ၎င်းကို အတည်ပြုပုံပေါ်လာသည်။

အရက်မူးနေစဉ် သူသည် ယန်ကျင်းဇီထက် မဆိုးသော ကောင်းပေါ်ဟောင်နှင့် တွေ့သည်။

ယန်ကျင်းဇီနှင့် ဆက်ဆံရေးဖြတ်တောက်ရန် ဆုံးဖြတ်ပြီးနောက် ယန်ကျင်းဇီ၏ သူ့အပေါ် သဘောထားက သိသိသာသာ ပြောင်းလဲသွားသည်။

နောက်ထပ်နှစ်နှစ်အတွင်း သို့မဟုတ် အနာဂတ် မှတ်ဉာဏ်များ ရှိခြင်းနှင့် နောက်ထပ်နှစ်နှစ်တိတိ စန္ဒရားတီးကျင့်ခဲ့ရခြင်းတို့ကလည်း သူ့ကို ကျောင်းမှ ဆရာများ၏ ချီးမြှောက်ခြင်း ခံရစေပြီး တန်ဖိုးထားထိုက်သော လူများနှင့် နောက်တစ်ကြိမ် တွေ့ဆုံခွင့်‌ရစေသည်။

ကျန်းယွင်ရှိူ့ပင်လျှင် အရှုပ်တော်ပုံများနှင့် ရင်ဆိုင်နေရသည်။

သူသည် အရမ်းကျေနပ်ဂုဏ်ယူမိသည်။ ကမ္ဘာကြီးက သူ့အနားတွင် လှည့်ပတ်နေလိမ့်မည်ဟု သူသည် အမြဲခံစားနေရသော်လည်း ဤအရာအားလုံးက ရုတ်တရက် ပြောင်းလဲသွားသည်။

မနေ့ညကအထိ သူ့ကို လိုက်ချော့နေဆဲဖြစ်သော ယန်ကျင်းဇီက ရုတ်တရက်ကြီး သူ့ကို ထားခဲ့ပြီး ကျန်းယွင်ရှိူ့နဲ့ တွဲလိုက်သည်။

သူ့ကို နှစ်သိမ့်နေကြသော ယန်ကျင်းဇီ၏ သူငယ်ချင်းများကလည်း ရုတ်တရက်ကြီး သူ့ကို blacklist သွင်းလိုက်ကြသည်။

ကျန်းယွင်ရှိူ့ပင်လျှင် အလွယ်တကူ ဆေးကြောပြီးပြီဖြစ်သည်။

သူသည် ကိစ္စများက ဤကဲ့သို့မဖြစ်သင့်ဟု အမြဲခံစားရပြီး ၎င်းကြောင့် ကျန်းယွင်ရှိူ့စီကို သူ ရောက်လာခြင်းဖြစ်၏။

သို့သော် ကျန်းယွင်ရှိူ့ကို မြင်လိုက်ရသောအခါ သူ့ရင်တွင်းရှိ ရန်ငြိုးကို မထိန်းချုပ်နိုင်တော့။

ဘာလို့ ကျန်းယွင်ရှိူ့က အမြဲတမ်း သူ နောက်ဆုံးမှ ရလာတဲ့ အရာရာတိုင်းကို အလွယ်တကူ ဖျက်ဆီးနိုင်နေတာလဲ? ယခင်ဘဝတွင် သူသည် ယန်ကျင်းဇီကို လေးနှစ်တာ ချစ်ခဲ့ပြီး ယန်ကျင်းဇီအတွက် အရာရာကို ပေးရန် ဆန္ဒရှိခဲ့သော်လည်း ကျန်းယွင်ရှိူ့က လက်ချောင်းများကို လှုပ်လိုက်သောအခါတွင် ယန်ကျင်းဇီက သူ့ကို အလွယ်တကူ စွန့်ပစ်သွားသည်။

ဒီဘဝ...

ကောင်းပေါ်ဟောင်က သူ့ကို ချစ်ပြီး ကောင်းမွန်စွာ ဆက်ဆံပြီး သူ့ကို မြတ်နိုးသည်ဟု ခံစားမိသော်ငြား ကျန်းယွင်ရှိူ့ကြောင့် သူတို့သည် အကြိမ်ပေါင်းများစွာ ရန်ဖြစ်ပြီးကြပြီဖြစ်သည်။

စစချင်းတွင် သူသည် မဖွယ်မရာ ဓာတ်ပုံများထဲမှ လူဟာ ကျန်းယွင်ရှိူ့ဟု အခိုင်အမာ ပြောသော်လည်း ကောင်းပေါ်ဟောင်က ထိုသို့မတွေးသောကြောင့် နှစ်ယောက်သား ရန်ဖြစ်ကြသည်။ ရန်ဖြစ်ပြီးနောက် ကျန်းယွင်ရှိူ့က ကိစ္စကို ရှင်းလင်းလိုက်မည်ဟုတော့ မမျှော်လင့်ထားမိပေ။ 

ထို့နောက် သူ၏ ကျန်းယွင်ရှိူ့ကို မကျေနပ်မှုကို ထုတ်ဖော်ပြသသည့်အကြိမ်တိုင်း ကောင်းပေါ်ဟောင်က သူ့ကို တားပြီး ဘာမှမပြောခိုင်းချေ။ သဘာဝကျစွာပင် သူ့စိတ်ထဲရှိ ဒေါသက ပိုပိုပြီး သန်မာတိုးပွားလာသည်။

ကျန်းယွင်ရှိူ့က သူ့ကို ခံစားရစေသောကြောင့် သူသည် ကျန်းယွင်ရှိူ့ကို ကောင်းကောင်းမွန်မွန် ခံစားခွင့်မပြုနိုင်။

သူ့ယခင်ဘဝတွင် သူနှင့် ယန်ကျင်းဇီတို့၏ ဆက်ဆံရေးအကြောင်းကို ကျန်းယွင်ရှိူ့အား ပြောပြသောအခါ ကျန်းယွင်ရှိူ့က နာကျင်နေသကဲ့သို့ ပြုမူခဲ့ကြောင်းကို သူသည် မှတ်မိသည်။

သုံ့ချင်းလင်သည် ကျန်းယွင်ရှိူ့ကို ကြည့်ကာ ကျန်းယွင်ရှိူ့၏ မျက်နှာ ပြောင်းလဲသွားသည်ကို တွေ့မြင်ရန် မျှော်လင့်နေသည်။

သို့ရာတွင် ကျန်းယွင်ရှိူ့က လုံးဝ တုံ့ပြန်ခြင်းမရှိချေ။ သူ့ကို တိတ်တဆိတ် ကြည့်နေလျက်ဖြင့် ယွီယဲ့သည် အနည်းငယ် ပဟေဠိဖြစ်နေသည် : “ ယန်ကျင်းဇီက မင်းနဲ့ နှစ်နှစ်တောင် အတူရှိခဲ့တာလား? မင်းက သူ့ရဲ့ ရည်းစားဟောင်းလား? ”

“ မင်း အဲ့လိုပြောလို့ရတယ်။ ” သုံ့ချင်းလင်က လှောင်ရယ်ရယ်ပြီး ရေတစ်ငုံ သောက်လိုက်သည်။ “ သူက ငါ့ကို ရည်းစားကောင်လေးလို မမြင်ဘဲ ကျန်းယွင်ရှိူ့ရဲ့ အစားထိုးအဖြစ်ပဲ မြင်တာ ဖြစ်လောက်တယ်။ သူက ငါ့ကို ကျန်းယွင်ရှိူ့ သဘောကျတဲ့ အဝတ်အစားတွေ ဝတ်ခိုင်းတယ်၊ ကျန်းယွင်ရှိူ့ တီးတဲ့ စန္ဒရားဂီတတွေ တီးခိုင်းတယ်၊ ပြီးတော့ ငါ စကားပြောတဲ့အချိန်မှာတောင် သူက ငါ့ကို ကျန်းယွင်ရှိူ့လို အတုယူပြီး ပြောစေချင်တယ်။ ”

ယန်ကျင်းဇီသည် အသက်နှစ်ဆယ့်ရှစ်နှစ် ရှိပြီဖြစ်ပြီး ဆယ်နှစ်ကျော် အရွယ်ရောက်ခဲ့ပြီးဖြစ်သည်။ သူ့တွင် ရည်းစားဟောင်းကောင်လေး ရှိလျှင်ပင် ယွီယဲ့သည် ဘာမှမခံစားရချေ။

ဒါပေမယ့် ယန်ကျင်းဇီက အစားထိုး ရှာတယ် ဆိုရင်တောင် သိပ်မကောင်းတော့ဘူး!

ယန်ကျင်းဇီ ဒီလိုလုပ်တာက တခြားသူတွေရဲ့ ခံစားချက်ကို လှည့်စားတာမလား? ကျန်းယွင်ရှိူ့ကို စော်ကားမှုလည်း ဖြစ်တယ်။

“ သူက တကယ် အဲ့လိုလုပ်ခဲ့တာလား? ” ယွီယဲ့သည် ဒေါသထွက်လွန်းသဖြင့် စားပွဲကို ရိုက်လိုက်ပြီး ကျန်းယွင်ရှိူ့ကို ကြည့်လိုက်သောအခါ ကျန်းယွင်ရှိူ့က စားပွဲကို သူ့လက်သည်းများဖြင့် ကုတ်ခြစ်နေသည်အား တွေ့လိုက်ရသည်။

အများအားဖြင့် ကျန်းယွင်ရှိူ့ ဤသို့ပြုမူသည်မှာ အနည်းငယ် စိတ်တိုနေသောကြောင့် ဖြစ်သည်။

ယွီယဲ့သည် သူ့အတွက် စိတ်မကောင်းဖြစ်မိသည်။ ယန်ကျင်းဇီ၏ ရည်းစားဟောင်းက ရုတ်တရက် တံခါးဝသို့ ရောက်လာသည်။ ကျန်းယွင်ရှိူ့သည် မည်သို့ဖြေရှင်းရမည်ကို မသိလောက်ဘဲ အလွန်ဝမ်းနည်းနေမည်ဖြစ်သည်။

သို့သော် သူလည်း ဤကိစ္စကို ဘာလုပ်ရမလဲ မသိချေ။

ယွီယဲ့ အတွေးများနေစဉ် ကျန်းယွင်ရှိူ့က သုံ့ချင်းလင်ကို ရုတ်တရက် မေးသည် : “ မင်းနဲ့ ယန်ကျင်းဇီက လမ်းခွဲပြီးပြီမလား? ” 

“ မင်းနဲ့ ယန်ကျင်းဇီ come out လုပ်တဲ့ မနက်က ယန်ကျင်းဇီ ငါ့ကို ကန်ထုတ်လိုက်တယ်။ ” သုံ့ချင်းလင်သည် ယန်ကျင်းဇီက သူ့ကို ဤအိမ်မှ မောင်းထုတ်ခဲ့သကဲ့သို့ ကျန်းယွင်ရှိူ့ ဓာတ်ပုံများဖြင့် ပြည့်နေသော ဤဗီလာကို ငေါ့တော့တော့ မျက်နှာဖြင့် ကြည့်သည် : “ အပေါ်ထပ်က စန္ဒရားခန်းက လှတယ် မဟုတ်လား? ”

“ မင်းက အစကတည်းက အစားထိုး ဖြစ်မယ် ဆိုတာ သိထားပြီး သူ မင်းကို လခပေးခဲ့တယ်လို့ ယန်ကျင်းဇီက ပြော‌တယ်။ ” ကျန်းယွင်ရှိူ့က ထပ်ပြောသည်။

သုံ့ချင်းလင်၏ အသက်ရှူသံသည် ရပ်တန့်သွားပြီး အနည်းငယ် ရှက်သွားကာ ရုတ်တရက် ပြောသည် : “ ဟုတ်တယ်။ ငါက မင်းရဲ့ အစားထိုး ဆိုတာ အစကတည်းက သိထားတယ်။ ဒါပေမယ့် ငါ သူ့ကို ချစ်တယ်။ ငါ နေ့တိုင်း သူ့အတွက် ချက်ပြုတ်ပြီး သူ့ကို စန္ဒရားတီးပြတယ်။ ငါ သူနဲ့ တစ်ချိန်လုံး အတူရှိနေခဲ့တယ်... ဘာလို့ သူက ငါ့ကို အရမ်းစာနာမှုကင်းမဲ့နိုင်ရတာလဲ? ”

ကျန်းယွင်ရှိူ့၏ လက်သည်းများသည် စားပွဲပေါ်တွင် ကုတ်ခြစ်နေလေသည်။

ယွီယဲ့က ပိုထူပူသွားပြီး ဆတ်ခနဲ ထရပ်သည် : “ ယန်ကျင်းဇီက ဒီလိုမျိုးလား? ” ဤလူ၏စကားအရ ယန်ကျင်းဇီက ထိုနေ့တွင် ယွင်ရှိူ့ကို လာမကြိုမီတွင်မှ ဤလူကို မောင်းထုတ်လိုက်ခြင်းဖြစ်သည်... ရွံစရာကောင်းတဲ့ လုပ်ရပ်ပဲ!

ကျန်းယွင်ရှိူ့သည် ထိုင်နေဆဲဖြစ်ပြီး သူ့လက်က စားပွဲ၏ ခြေထောက်ကို စိတ်အနှောင့်အယှက်ဖြစ်စွာ ကုတ်ခြစ်နေသော်လည်း သူ့အမူအရာက အလွန်တည်ငြိမ်နေသည် : “ မင်းက ပိုက်ဆံရတဲ့အကြောင်းကို မပြောဘဲ ရှောင်သွားတော့ ယန်ကျင်းဇီဆီက မင်း ပိုက်ဆံရခဲ့တာ အမှန်ပဲ။ အပေါ်ထပ်က စန္ဒရားက တစ်ခါမှ အထိမခံဖူးဘူး။ မင်း ဒီမှာ လုံးဝ မနေခဲ့ဘူး! မင်းက ငါ့ကို တမင်တကာ လိမ်ပြီး ငါနဲ့ ယန်ကျင်းဇီရဲ့ ဆက်ဆံရေးကို ဖျက်ဆီးဖို့ ကြိုးစားနေတယ်။ ငါ မင်းနဲ့ စကားမပြောချင်တော့ဘူး။ ကျေးဇူးပြုပြီး ထွက်သွားပါတော့! ”

ကျန်းယွင်ရှိူ့သည် အတော်သေချာသည်။ ယန်ကျင်းဇီက အပေါ်ထပ် စန္ဒရားခန်းမှ ပစ္စည်းများကို တစ်ခါမှ အသုံးမပြုဖူးသော်ငြား ဤလူက သူ အသုံးပြုဖူးသည်ဟု အရိပ်အမြွက် လာပြောနေသည်... ဒီလူက သူ့ကို လိမ်နေပြီ!

သုံ့ချင်းလင်၏ မျက်နှာက အမူအရာပြောင်းလဲသွားသည်။

သူ၏ယခင်ဘဝတွင် ကျန်းယွင်ရှိူ့ကို သူနှင့် ယန်ကျင်းဇီတို့အကြောင်း သူ ပြော‌ပြသည့်အချိန်၌ ကျန်းယွင်ရှိူ့၏ တုံ့ပြန်ပုံက ယနေ့နှင့် လုံးဝ ကွဲပြားသည်။ ထိုနေ့က ယန်ကျင်းဇီ၏ တုံ့ပြန်မှုကို ကြည့်ပြီးနောက် သူသည် ကျန်းယွင်ရှိူ့က ယန်ကျင်းဇီနှင့် ရန်ဖြစ်ခဲ့ပြီး ယန်ကျင်းဇီကို ငြင်းပင်ငြင်းလွှတ်နိုင်လောက်ကြောင်း သိသည်။

အနည်းဆုံးတော့ သူ့ယခင်ဘဝတွင် သူ မသေဆုံးခင်အထိ ကျန်းယွင်ရှိူ့က ဤအိမ်သို့ မပြောင်းရွှေ့ခဲ့ချေ။

ဆန့်ကျင်ဘက်အားဖြင့် သူကသာ ဤနေရာတွင် ခဏတဖြုတ် နေထိုင်ခဲ့ဖူးသည်။

ဘယ်လိုလုပ် ကျန်းယွင်ရှိူ့ရဲ့ သဘောထားက အခု ပြောင်းလဲသွားတာလဲ?

သုံ့ချင်းလင်သည် လက်ရှိအဖြစ်အပျက်များကို နားမလည်သော်ငြား အမှန်တရားက တကယ့်ကို အလွန်ရိုးရှင်းသည်။

သူ့ယခင်ဘဝ၌ သူနှင့် ယန်ကျင်းဇီတို့၏ ပတ်သက်မှုသည် ဤဘဝထက် များစွာနက်နဲသည်။ သူ့ယခင်ဘဝ၏ ကျန်းယွင်ရှိူ့ကို သွားရှာသည့်အချိန်တွင် ကျန်းယွင်ရှိူ့က တတိယမြောက်လူ ဖြစ်ကြောင်းနှင့် တခြားကိစ္စများကိုပါ သူက တိုက်ရိုက်ပြောခဲ့သည်... သဘာဝကျစွာပင် ကျန်းယွင်ရှိူ့က ယန်ကျင်းဇီကို စိတ်အေးချမ်းသာစွာဖြင့် လက်ခံနိုင်တော့မည်မဟုတ်ချေ။

“ ယွီယဲ့၊ သူ့ကို ပြန်ခိုင်းလိုက်တော့။ ” ကျန်းယွင်ရှိူ့က ထပ်ပြောသည်။

ယွီယဲ့သည် ဤအခိုက်အတန့်တွင် အသေးစိတ်များကို အနည်းငယ် ရှုပ်ထွေးနေသေးသော်ငြား သူသည် ကျန်းယွင်ရှိူ့၏ စကားကို နားထောင်ပြီး သုံ့ချင်းလင်ကို ချက်ချင်း ကြည့်လိုက်သည် : “ ကျေးဇူးပြုပြီး ထွက်သွားပေးပါ! ”

ဤအချိန်တွင် ဗီလာတံခါး ပွင့်လာပြီး ယန်ကျင်းဇီက ဝင်လာသည် : “ အချစ်ရေ၊ ကိုယ် ပြန်လာပြီ! ” ယနေ့တွင် ကျန်းယွင်ရှိူ့က အပြင်ထွက်၍ အလုပ်လုပ်သောကြောင့် ယန်ကျင်းဇီသည် အိမ်စောစောမပြန်ဘဲ သူ့သူငယ်ချင်းများကို သွားတွေ့ပြီး သူတို့နှင့် ထမင်းအတူစားကာ သူနှင့် ကျန်းယွင်ရှိူ့တို့၏ အချစ်အကြောင်းကိုလည်း ထုတ်ဖော်ပြောဆိုခဲ့သည်။

ထို့နောက် ကျန်းယွင်ရှိူ့၏အလုပ် ပြီးသွားပြီဖြစ်ကြောင်း ယွီယဲ့ထံမှ သိရပြီး သူသည် ချက်ချင်း အိမ်ပြန်လာခဲ့၏။

သို့သော်ငြား ယန်ကျင်းဇီသည် အိမ်ပြန်ရောက်ပြီးနောက် သုံ့ချင်းလင်ကို တွေ့ရလိမ့်မည်ဟု မထင်ထားပေ။

“ မင်း ဘာလို့ ဒီကို ရောက်နေတာလဲ? ” ယန်ကျင်းဇီ မျက်မှောင်ကြုံ့လိုက်သည်။ သူ့တွင် သုံ့ချင်းလင်နှင့် ဘာကိစ္စမှမရှိ။ သုံ့ချင်းလင် ဒီမှာ ဘာလာလုပ်နေတာလဲ?

ကျန်းယွင်ရှိူ့နှင့် ယွီယဲ့တို့၏ ပုံစံအရ သူတို့သည် အလွန်ဒေါသထွက်နေပုံရသည်။ သုံ့ချင်းလင် ဘာလုပ်ခဲ့သလဲ?

“ ငါ... ” သုံ့ချင်းလင်သည် ဒေါသထွက်ချင်သော်လည်း ယန်ကျင်းဇီ၏ ဒေါသအကြည့်က သူ့ကို ကြောက်ရွံ့စေသည်။ သူသည် သူ့ယခင်ဘဝတွင် ယန်ကျင်းဇီကို ဤကဲ့သို့တွေ့မြင်ရသည့်အကြိမ်တိုင်း အရှုံးပေးလိုက်မည်ဖြစ်ကာ ဤအချိန်တွင်လည်း သူက အလိုအလျောက် အရှုံးပေးလိုက်သည် : “ ငါ ဘာမှမလုပ်ခဲ့ဘူး။ ငါက ဒီတိုင်း... ဒီတိုင်း ငါက မင်းကို လာတွေ့ချင်ရုံပဲ။ ”

“ ငါတို့ အဆင်ပြေတယ်။ မင်း ငါ့ကို လာတွေ့စရာမလိုဘူး။ ” ယန်ကျင်းဇီက ချက်ချင်း ပြန်ပြောသည်။

သုံ့ချင်းလင်သည် စာချုပ်တွင် လက်မှတ်ထိုးပြီးကတည်းက ယန်ကျင်းဇီကို ထပ်မတွေ့ရတော့သော်လည်း ထိုနေ့မတိုင်ခင်က ယန်ကျင်းဇီ၏ သူ့အပေါ် သဘောထားမှာ ပြောင်းလဲသွားသည်။

သူသည် ဤတစ်ကြိမ် ရောက်လာသည့်အခိုက်တွင် ယန်ကျင်းဇီ၏ သူ့အပေါ် သဘောထားကို အမှန်တကယ် တွေ့မြင်ချင်ခဲ့သည်။

ယန်ကျင်းဇီက သူ့အပေါ် တကယ် အေးစက်နေသည်။

သုံ့ချင်းလင်သည် သူ့သေဆုံးခြင်းကို တွေးမိပြီး ရုတ်တရက် ပြန်လည်အေးစက်သွားသည် : “ မင်းတို့ ငါ့ကို မောင်းထုတ်စရာ မလိုဘူး။ ငါ့ဘာသာငါ သွားမယ်။ ”

ထိုသို့ပြောပြီးနောက် သူသည် အပြင်သို့ပြေးထွက်သွားသည်။

ကျန်လူသုံးယောက်က သူ့ကို လုံးဝ ဂရုမစိုက်ဘဲ ဤအချိန်တွင် ယန်ကျင်းဇီသည် ကျန်းယွင်ရှိူ့ကို သတိထား၍ ကြည့်နေလေသည် : “ ယွင်ရှိူ့၊ ငါ သူနဲ့ တကယ်ကြီး ဘာမှမဆိုင်ပါဘူး။ ”

ကျန်းယွင်ရှိူ့သည် အသက်ပြင်းပြင်း ရှူပြီး စားပွဲတစ်ဖက်ခြမ်းပေါ်ရှိ သုံ့ချင်းလင် အသုံးပြုသွားသော ခွက်ကို လက်ညိုးထိုးပြကာ ဆိုသည် : “ အဲ့ခွက်ကို လွှင့်ပစ်လိုက်! ”

ယန်ကျင်းဇီသည် ခွက်ကို အမှိုက်ပုံးထဲသို့ ချက်ချင်း ပစ်ထည့်လိုက်သည်။

ဤသည်ကို မြင်ပြီးနောက် ကျန်းယွင်ရှိူ့က ယန်ကျင်းဇီကို စိုက်ကြည့်ပြီး အပေါ်ထပ်သို့ တက်ပြေးသွားသည်။

“ ယွင်ရှိူ့၊ မင်း ဘာလုပ်မှာလဲ? ” ယန်ကျင်းဇီက အမြန်မေးသည်။

“ ရေချိုးမယ်! ” ကျန်းယွင်ရှိူ့က စကားပြောပြီးနောက် လှေကားထောင့်ကွေးကို တက်ပြီး ပျောက်သွားသည်။

ကျန်းယွင်ရှိူ့ ဒေါသထွက်နေသည်မှာ သံသယဖြစ်ဖွယ်မရှိ။

ယန်ကျင်းဇီက ယွီယဲ့ကို ကြည့်သည် : “ သုံ့ချင်းလင်က ဘာလာလုပ်တာလဲ? သူ ဘာပြောသွားလဲ? "

ယွီယဲ့သည် ယန်ကျင်းဇီကို ခဏတဖြုတ် စိုက်ကြည့်လိုက်သည်။

စောစောက ကျန်းယွင်ရှိူ့သာ ဘာမှမပြောဘူးဆိုရင်၊ သုံ့ချင်းလင်ရဲ့ စကားတွေကိုပဲ သူ ကြားလိုက်မယ်ဆိုရင် ယန်ကျင်းဇီက သေချာပေါက် ဆန်ကုန်မြေလေးတစ်‌ယောက် ဖြစ်လိမ့်မယ်! ဒါပေမယ့် နောက်ပိုင်း ကျန်းယွင်ရှိူ့ ပြောတာတော့... အဲ့သုံ့ချင်းလင်က လိမ်နေတာလား?

ယွီယဲ့သည် သုံ့ချင်းလင် ပြောသမျှကို ယန်ကျင်းဇီအား ပြောပြလိုက်သည်။

ယန်ကျင်းဇီ : “ ... ” ဒီလိုလုပ်ရတဲ့အထိ သုံ့ချင်းလင်က သူ့ကို ဘယ်လောက်တောင် မုန်းနေတာလဲ!

မူလဇာတ်ကြောင်းတွင် သုံ့ချင်းလင်က မူလပိုင်ရှင်ကို အလွန်ဆိုးရွားစွာ ဆက်ဆံပြီး မူလပိုင်ရှင်က တကောက်ကောက် နောက်မှလိုက်နေသောကြောင့် ကောင်းပေါ်ဟောင်နှင့် ပူးပေါင်း၍ မူလပိုင်ရှင်၏ ကုမ္ပဏီကို ဖျက်ဆီးလိုက်သည်။ သူသည် သုံ့ချင်းလင်နှင့် ဝေးဝေးနေလျှင် သူတို့နှစ်ယောက် လမ်းမဆုံရတော့ဟု အမြဲတွေးခဲ့သည်။ ဒါပေမယ့် သုံ့ချင်းလင်က သူ့အိမ်တံခါးဝကို ရောက်လာပြီး သူ့ကို ဒုက္ခပေးသွားတယ်လေ!

ဒီလူ ရူးနေတာလား?

ယန်ကျင်းဇီသည် အစကတည်းက သုံ့ချင်းလင်ကို သဘောမကျခဲ့သော်လည်း သုံ့ချင်းလင်ကို ဖြေရှင်းရန် ဘယ်သောအခါမှ မစဉ်းစားခဲ့ချေ။

သို့သော် ယနေ့ သုံ့ချင်းလင်က ကျန်းယွင်ရှိူ့ရှေ့တွင် ပေါက်ကရများ ပြောဆိုပြီး ကျန်းယွင်ရှိူ့နှင့် သူ၏ ဆက်ဆံရေးကို ဖျက်ဆီးလေရာ သူ့ဒေါသကို မထိန်းချုပ်နိုင်တော့ပေ။

ထို့ကြောင့် ယန်ကျင်းဇီသည် ကောင်းပေါ်ဟောင်၏ ဖုန်းနံပါတ်ကို တောင်းပြီး ဖုန်းခေါ်လိုက်သည်။

ကောင်းပေါ်ဟောင်က ဖုန်းပြန်ဖြေသောအခါ ယန်ကျင်းဇီက ပြောသည် : “ ကောင်းပေါ်ဟောင်၊ ငါ့ကို email တစ်ခုပေး။ ငါ့မှာ မင်းအတွက် ကိစ္စတစ်ခု ရှိတယ်! ”

“ မင်းက ဘယ်သူလဲ? ” ကောင်းပေါ်ဟောင်က မေးသည်။

“ ငါက ယန်ကျင်းဇီ။ ” ယန်ကျင်းဇီက ဖြေသည်။

“ မင်း ငါ့ကို ဘာပေးမှာလဲ? ” ကောင်းပေါ်ဟောင်က အနည်းငယ် သတိထားနေသည်။

“ မင်းရည်းစားရဲ့ ပစ္စည်း။ ” ယန်ကျင်းဇီက ဆိုသည်။

“ မင်း ချင်းလင်းကို ဘာလုပ်လိုက်တာလဲ? ” ကောင်းပေါ်ဟောင်သည် စိုးရိမ်သွားပြီး ယန်ကျင်းဇီ ပေးမည့်အရာဟာ သုံ့ချင်းလင်၏ မကောင်းသော တစ်စုံတစ်ခုဟု တွေးနေသည်။

“ မင်းရဲ့ email! ” ယန်ကျင်းဇီသည် သူနှင့် စကားမပြောချင်ပေ။

ကောင်းပေါ်ဟောင်သည် email လိပ်စာတစ်ခုကို ပြောခဲ့ပြီး ယန်ကျင်းဇီတွင် အံ့ဩဖွယ် မှတ်ဉာဏ် ရှိရာ နားထောင်ပြီးသည်နှင့် သူက မှတ်မိကာ ချက်ချင်း ဖုန်းချလိုက်သည်။

သူ့ဧည့်ခန်းနဲ့ ထမင်းစားခန်းမှာ ကင်မရာတွေ တပ်ဆင်ထားတယ်!

သုံ့ချင်းလင်သည် သူနှင့် လိုက်လျောညီထွေ မနေနိုင်ဘဲ သူနှင့် ကျန်းယွင်ရှိူ့၏ ဆက်ဆံရေးကို ဖျက်ဆီးသည်။ သူသည် တစ်ထေရာတည်း ပြန်လုပ်ရန် စိတ်ရှိသည်။

သူသည် ကောင်းပေါ်ဟောင်ထံသို့ ယနေ့ စောင့်ကြည့်ရေးကင်မရာက ဖမ်းမိထားသည့် သုံ့ချင်းလင်၏ ရန်လာစသော ဗီဒီယိုအပြင် လွန်ခဲ့သော နှစ်နှစ်အတွင်း သူ သုံ့ချင်းလင်ကို ပို့ခဲ့သော ငွေလွှဲမှတ်တမ်းများနှင့် သွေးနီရောင်စာတန်းတို့ကို အတူတကွ ပို့လိုက်သည် : “ ကောင်းပေါ်ဟောင် မင်းရည်းစားကို ထိန်းထား။ ငါ့ကို အနှောင့်အယှက် လာ‌မပေးမိစေနဲ့! သူက ကျန်းယွင်ရှိူ့နဲ့ တူတယ်လို့ ငါ တွေးမိတာကြောင့် ငါ စိတ်ပျော်အောင် သူ့ကို ငွေပေးပြီး ကျန်းယွင်ရှိူ့အဖြစ် ဟန်ဆောင်ခိုင်းခဲ့တယ်။ ငါ့မှာ သူနဲ့ ရင်းနှီးတဲ့ ဆက်ဆံရေး လုံးဝ မရှိခဲ့ဘူး! ”

ဤအရာများကို ပို့ပြီးနောက် ယန်ကျင်းဇီသည် ချက်ချင်း စိတ်သက်သာရာရသွားသည်။

ယွီယဲ့လည်း ထွက်သွားပြီဖြစ်သည်။ ကျန်းယွင်ရှိူ့ကို သူ သွားချော့ရန် အချိန်ကျပြီ... ယန်ကျင်းဇီသည် အပေါ်ထပ်သို့ တက်သွားသော်လည်း ကျန်းယွင်ရှိူ့ကို ရှာမတွေ့ပေ။

ကျန်းယွင်ရှိူ့က စန္ဒရားခန်းထဲတွင် ရှိနေလိမ့်မည်ဟု သူသည် အစက တွေးမိသော်ငြား ကျန်းယွင်ရှိူ့က ထိုနေရာတွင် လုံးဝ မရှိ။

သူသည် ကျန်းယွင်ရှိူ့၏ အိပ်ခန်းတွင်လည်း သွားရှာခဲ့ပြီး ထိုနေရာတွင် ဘယ်သူမှမရှိဘဲ ကျန်းယွင်ရှိူ့၏အိပ်ခန်းရှိ ရေချိုးခန်းထဲတွင်ပင် အသုံးပြုထားသော အရိပ်အယောင် လုံးဝ မရှိချေ။

ကျန်းယွင်ရှိူ့ ဘယ်မှာလဲ? ယန်ကျင်းဇီ စိတ်ရှုပ်သွားသည်။

ကံကောင်းစွာဖြင့် ဤအချိန်၌ သူသည် သူ့အိပ်ခန်းထဲမှ အသံတစ်ခုကို ကြားလိုက်ရသည်။ 

ယန်ကျင်းဇီသည် တံခါးကို အမြန်ဖွင့်ပြီး ဝင်လိုက်သည်။ ထို့နောက် သူသည် ကြောင်အသွားလေသည်။

သူ့ခုတင်ပေါ်ရှိ အိပ်ရာခင်းများနှင့် စောင်များသည် ကျန်းယွင်ရှိူ့ ဝယ်ယူလျှော်ဖွပ်ထားသော အဖြူရောင်လေးစုံအခင်းများဖြင့် လဲလှယ်ခံလိုက်ရပြီဖြစ်သည်။

ပြီးတော့ ကျန်းယွင်ရှိူ့က... ခုတင်ပေါ်မှာ လှဲနေတယ်!

“ မင်း အောက်ထပ်

မှာ ဘာတွေလုပ်နေတာလဲ? မင်း ဘာလို့ အပေါ်တက်လာဖို့ အရမ်းကြာနေတာလဲ? မင်း... အခုထိ ရေမချိုးရသေးဘူး! ” တင်းတင်းကြပ်ကြပ် စောင်ခြုံထားသည့် ကျန်းယွင်ရှိူ့ဟာ ဒေါသတကြီးဖြင့် ယန်ကျင်းဇီကို ကြည့်နေပေသည်။