Chapter 71

Volume 4 : ဗိသုကာဌာန

Chapter 71 (ဆောက်လုပ်ရေးဆိုက်၏ပဟေဠိ ၁၁)

ကျောက်တရုန်တွင် အသည်းကင်ဆာရောဂါရှိ၊မရှိကို ယွဲ့ရှင်းဝမ်နှင့် လျှိုကျောက်ချင်းတို့က သူ၏တူဖြစ်သူ ကျောက်လျန်ထံ တိုက်ရိုက်သွားရောက်မေးမြန်းခဲ့သည်။

"မင်းရဲ့ဦးလေးက မကြာသေးမီက နေမကောင်းဖြစ်ခဲ့လား? ဥပမာ- အစာစားချင်စိတ်မရှိတာ၊ မအီမသာဖြစ်တာ၊ အန်တာ၊ ဝမ်းလျှောတာ စတာတွေပေါ့…"

ကျောက်လျန်က ခဏတာ အံ့အားသင့်သွားပြီး လျှိုကျောက်ချင်းကို သံသယဖြင့်ကြည့်ကာ မေးသည်။

"အစ်ကိုဘယ်လိုသိတာလဲ?"

ယွဲ့ရှင်းဝမ်: "သူ့မှာ ဒီလိုအခြေအနေရှိခဲ့တာလား?"

ကျောက်လျန်က ခေါင်းငြိမ့်ပြသည်။

"သူ မကြာသေးမီက မကြာခဏ ဝမ်းလျှောတယ်… ဘာဖြစ်တာလဲလို့မေးတော့ သူဗိုက်မကောင်းတာတဲ့… ဆောက်လုပ်ရေးဆိုက်က အစားအသောက်တွေ သူမစားဘဲ ရက်အနည်းကြာတော့ သက်သာသွားတယ်…"

အော့အန်ခြင်း၊ ဝမ်းလျှောခြင်းက အစာအိမ်နှင့် အူလမ်းကြောင်းဆိုင်ရာ လက္ခဏာများဖြစ်ပြီး အသည်းကင်ဆာ၏ အဖြစ်များသော လက္ခဏာများဖြစ်သည်။ လျှိုကျောက်ချင်းက ထပ်မေးသည်။

"သူ မကြာသေးခင်က ဆေးရုံတက်ခဲ့တာ မင်းသိလား?"

"ကျွန်တော် မသိဘူး… တက္ကသိုလ်ဝင်ခွင့်ဖြေပြီးတော့ ကျွန်တော်က ဇာတိမြို့မှာပဲနေခဲ့ပြီး သူ့ကို လအတော်ကြာအောင် မတွေ့ခဲ့ရဘူး… ပြီးခဲ့တဲ့လကမှ အိမ်ကို ရုတ်တရက် ဖုန်းဆက်လာပြီး ဆောက်လုပ်ရေးဆိုက်မှာ လုပ်ကူရင်း၊ သင်ယူရင်း လာလုပ်ဖို့ ပြောခဲ့တာကြောင့် ကျွန်တော် ဒီကိုကားနဲ့လာခဲ့တာ…"

ထိုအချိန်တွင် ကျောက်လျန်က ဝမ်းနည်းစွာ ခေါင်းငုံ့လိုက်သည်။

"ဒါတွေအားလုံးက ကျွန်တော့်အမှားပဲ… ကျွန်တော် အရင်က သူ့ကို ဂရုမစိုက်ခဲ့ဘူး… သူ ကျွန်တော့်အတွက် ပို့လိုက်တဲ့ပိုက်ဆံတွေကို ဂိမ်းဆော့ဖို့ပဲ သုံးခဲ့တယ်… ဦးလေးက မရှိတော့ဘူး… အနာဂတ်မှာ ကျွန်တော် ဘာလုပ်ရမလဲ မသိတော့ဘူး…"

လျှိုကျောက်ချင်းက ကောင်လေး၏ပခုံးကိုပုတ်ကာ ပြောသည်။

"မင်းက အသက် 18 နှစ်ပဲ ရှိပါသေးတယ်… ဆောက်လုပ်ရေးအဖွဲ့က မင်းကို လျော်ကြေးအများကြီးမပေးဘူးလား? အဲဒီပိုက်ဆံကို ကောင်းကောင်းအသုံးပြုပြီး ကျွမ်းကျင်မှုတချို့ကို သင်ယူလိုက်…"

ကျောက်လျန်က တိုးတိုးပြောသည်။

"ကျွန်တော်သိပါတယ်… ဒီပိုက်ဆံတွေကို ကျွန်တော် လက်လွတ်စပယ်မသုံးပါဘူး…"

အပြန်လမ်းတွင် လျှိုကျောက်ချင်းက အသံတိုးတိုးဖြင့် မေးသည်။

"ရှင်းဝမ်၊ ကျောက်လျန်က ဘာမှမသိဘူးလို့ မင်းထင်လား?"

ယွဲ့ရှင်းဝမ်သည် အခင်းဖြစ်ပွားပြီးနောက် ကျောက်လျန်၏ အပြုအမူကို ဂရုတစိုက် ပြန်လည်ပုံဖော်ကြည့်သည်။ သူ့ဦးလေး၏ ကြေကွဲဖွယ်သေဆုံးမှုကို မြင်လိုက်ရတော့ အားရပါးရငိုကြွေးကာ ရဲများခေါ်ဆောင်သွားချိန်တွင် အပြစ်ကင်းသောအကြည့်ဖြင့် သူ့ဦးလေးအကြောင်းပြောသောအခါ စိတ်ပျက်နေသောအကြည့်တို့က ဟန်ဆောင်နေခြင်းမဟုတ်ပေ။ ယွဲ့ရှင်းဝမ်က သက်ပြင်းချကာ ပြောသည်။

"ဖြစ်နိုင်တယ်… ကျောက်တရုန်က သူ့တူကို ကာကွယ်ဖို့အတွက် သူ့အစီအစဉ်ကို မပြောခဲ့ဘူး…"

လျှိုကျောက်ချင်း: "ဒီလိုဆိုရင်တော့ ကျောက်တရုန်က သူ့တူအပေါ် တကယ်စေတနာကောင်းတာပဲ…"

ယွဲ့ရှင်းဝမ်သည် အိပ်ဆောင်သို့ပြန်လာပြီးနောက် သူနှင့် ကျန်းဖျင်စစ်တို့က ကျောက်တရုန်၏ အခန်းဖော်ကျောက်အန်းမင်ထံ သွားရောက်ခဲ့ပြီး မကြာသေးမီက ကျောက်တရုန် ဆေးရုံတက်ခဲ့ခြင်းရှိ၊မရှိကို သိရှိရန် သွားမေးခဲ့သည်။

ကျောက်အန်းမင်က တိတ်တဆိတ် ပြောခဲ့သည်။

"တရုန်ရဲ့အံဆွဲထဲမှာ စမ်းသပ်မှုရလဒ်စာရွက်ကို ငါတွေ့ခဲ့တယ်… ဒါပေမယ့် ငါနားမလည်ဘူး… ဘာပဲဖြစ်ဖြစ် အင်ဇိုင်းတွေရဲ့ ပုံမှန်မဟုတ်တဲ့ အချက်အလက်တွေ အများကြီးရှိတယ်… သူက စမ်းသပ်မှုရလဒ်စာရွက်ကို တိတ်တဆိတ် စုတ်ဖြဲပြီး လွှင့်ပစ်လိုက်တယ်…"

ပုံမှန်မဟုတ်သော စမ်းသပ်မှုရလဒ်အချက်အလက်များနှင့် ကာလရှည်ဝမ်းလျှောခြင်းကြောင့် ကျောက်တရုန်၏ အသည်းကင်ဆာရောဂါရှာဖွေခြင်း၏ ကောက်ချက်က မှန်ကန်ပုံရသည်။ ဒီကိစ္စကို သိသောသူတွေ အများကြီး မရှိနိုင်ပေ။ အခန်းဖော်တစ်ယောက်အနေဖြင့် ကျောက်အန်းမင်သည် ကျောက်တရုန်ကို ချဉ်းကပ်ပြီး အမှန်တရားကိုသိရန် အလွယ်ကူဆုံးလူဖြစ်သည်။

သူက ရည်ရွယ်ချက်ရှိရှိ အပြစ်မဲ့ဟန်ဆောင်နေတာလား၊ ဒါမှမဟုတ် သူတကယ်ပဲမသိတာလား?

ကျန်းဖျင်စစ်က မေးသည်။

"မနေ့နေ့လယ်က အပြင်ထွက်သွားသေးလား?"

"မထွက်ဘူး… မနေ့က ကျောက်ချန်နဲ့ အခြားသူတွေနဲ့ စကားစမြည်ပြောနေတာ… ကျောက်ချန်က နှစ်သစ်ကူးမှာ အိမ်ပြန်တဲ့အခါ ရွှယ်မေ့နဲ့ မင်္ဂလာဆောင်မှာဖြစ်ပြီး သတို့သမီးတင်တောင်းတာအတွက် ကူညီပေးဖို့ ငါ့ကိုတောင်းဆိုခဲ့တာကြောင့် သဘောတူလိုက်တယ်…"

ကျောက်အန်းမင်က ပြုံးကာ ခေါင်းကုတ်လိုက်သည်။

"ရွှယ်မေ့နဲ့ တရုန်က ချစ်သူတွေလို့ ငါအရင်ကထင်ခဲ့တာ… တရုန်က သူမဆီ ပစ္စည်းတွေ မကြာခဏ ပို့ပေးပေမယ့် သူမနဲ့ အားချန်က ချစ်သူတွေဖြစ်နေမယ်လို့ ငါမထင်ထားခဲ့ဘူး…"

ကျန်းဖျင်စစ်က ယွဲ့ရှင်းဝမ်ကို ကြည့်လိုက်ကာ ယွဲ့ရှင်းဝမ်သည် ကျောက်အန်းမင်နှင့် စကားအနည်းငယ်ပြောပြီး အိပ်ဆောင်မှ ထွက်လာခဲ့သည်။

ကျောက်အန်းမင်သည် သေဆုံးသွားသော ကျောက်တရုန်နှင့် အခန်းဖော်များဖြစ်ပြီး အချင်းချင်း ချဉ်းကပ်ရန် အဆင်ပြေသည်။ တစ်ဖက်လူက ကင်ဆာရောဂါခံစားနေရကြောင်းကို သူသိရှိခဲ့ပြီး ဥက္ကဋ္ဌကျန်းကို မြားခေါ်ရန် တည်ကြက်အဖြစ် မိမိကိုယ်ကို သတ်သေရန် ဆွဲဆောင်ခဲ့သည်။ သို့ပေမယ့် မနေ့က ဥက္ကဋ္ဌကျန်း ပျောက်သွားသောအခါ ကျောက်အန်းမင်က ဆောက်လုပ်ရေးဆိုက်ထဲကနေ ထွက်မသွားခဲ့ပေ။

ဆောက်လုပ်ရေးဆိုက်ထဲကနေ မထွက်ဘဲ ဥက္ကဋ္ဌကျန်းကို ဘယ်လိုသတ်မှာလဲ?

ယွဲ့ရှင်းဝမ်: "သူ မနေ့နေ့လယ်က ဆောက်လုပ်ရေးဆိုက်မှာ လူတွေနဲ့ စကားစမြည်ပြောနေခဲ့တယ်… သူက အတင်းအဖျင်းပြောရတာကြိုက်တဲ့ ကျောက်ရွာရဲ့ အတွင်းလူတစ်ယောက်ပဲလား? ဥက္ကဋ္ဌကျန်း ပျောက်ဆုံးနေတာက သူနဲ့ဘာမှမဆိုင်ဘူးလား?"

ကျန်းဖျင်စစ်: "သူ လိမ်နေတာလားဆိုတာ အခြားသူတွေကို မေးကြည့်တာပေါ့…"

ယွဲ့ရှင်းဝမ်က သုတေသနအဖွဲ့ chat channel တွင် စာတစ်ကြောင်းရေစလိုက်ပြီး အလုပ်သမားများကို သီးခြားစီသွားရောက် ကြည့်ရှုခိုင်းပြီး မနေ့နေ့လယ်က ဆောက်လုပ်ရေးဆိုက်မှ ဘယ်သူတွေထွက်ခွာသွားသလဲဆိုတာကို မေးမြန်းခိုင်းခဲ့သည်။ သို့သော် စုံစမ်းစစ်ဆေးမှု၏ရလဒ်များက လူတိုင်းကို စိတ်ရှုပ်သွားစေခဲ့သည်——

မနေ့နေ့လယ်က ဆောက်လုပ်ရေးဆိုက်ထဲကနေ ဘယ်သူမှ မထွက်သွားခဲ့ပေ။

ကျောက်ရွှယ်မေ့၊ ကျောက်ချန်နှင့် ကျောက်အန်းမင်တို့သည် “ကျောက်ရွာ၏သံသယရှိသူများ”ဖြစ်ပြီး သူတို့အားလုံးက ဆောက်လုပ်ရေးဆိုက်တွင်နေကာ နှစ်သစ်ကူးကျရင် အိမ်ပြန်ပြီး မင်္ဂလာဆောင်ရန်အကြောင်းကို ပြောဆိုနေခဲ့သည်။ ထိုအချိန်တွင် လူအများကလည်း စကားစမြည်ပြောဆိုနေကြဆဲဖြစ်ပြီး အမျိုးသမီးအလုပ်သမား အများအပြားက မင်္ဂလာပွဲအတွက် ပြင်ဆင်ရန် လိုအပ်သည်များကို ရွှယ်မေ့အား ပြောပြခဲ့သည်။

လူတော်တော်များများက သူတို့သည် ဆောက်လုပ်ရေးဆိုက်တွင် တစ်နေကုန်ရှိနေတယ်ဆိုတာ သက်သေပြနိုင်သည်။ သူတို့က ဥက္ကဋ္ဌကျန်းကိုသတ်ရန် ဘယ်လိုလုပ်သတ်နိုင်မှာလဲ?

ယွဲ့ရှင်းဝမ်က စဉ်းစားမရဖြစ်ကာ ပြောသည်။

"ဥက္ကဋ္ဌကျန်းက ကားနဲ့ထွက်သွားတာကို ငါတို့မျက်စိနဲ့ တပ်အပ်မြင်ခဲ့တယ်မလား? အဲဒီလူက ဥက္ကဋ္ဌကျန်းကို သတ်ချင်တယ်ဆိုရင် ဆောက်လုပ်ရေးဆိုက်ကနေ ထွက်သွားရမယ်… ဥက္ကဋ္ဌကျန်းက ပြန်လာတာမဟုတ်ရင်ပေါ့…"

ကျန်းဖျင်စစ်: "လက်ထောက်ရဲ့အဆိုအရ ကျန်းသယ်ရှင်းက ရုတ်တရက် ဖြေရှင်းရမယ့်ကိုယ်ရေးကိုယ်တာကိစ္စရှိလို့ဆိုပြီး လမ်းတစ်ဝက်မှာ ကားထဲကနေ ဆင်းသွားတယ်… သူဘယ်သွားသလဲဆိုတာ ဘယ်သူမှမသိဘူး… သူက ဆောက်လုပ်ရေးဆိုကိကို ပြန်ရောက်လာပြီး မြေအောက်ကားပါကင်ဆီ သွားလိုက်ရတာပဲမလား?"

ယွဲ့ရှင်းဝမ်က ခဏလောက်စဉ်းစားပြီး ခေါင်းငြိမ့်သဘောတူလိုက်သည်။

"ဒါက အဓိပ္ပါယ်ရှိတယ်… သူက ချင်းရွှိန်ပင်လယ်အော်ပရောဂျက်နဲ့ပတ်သက်တဲ့ အမှန်တရားနဲ့ လူသတ်သမားက ခြိမ်းခြောက်နေတဲ့စာကို သူရခဲ့တာဖြစ်နိုင်တယ်… ဥက္ကဋ္ဌကျန်းက လိပ်ပြာမလုံတာကြောင့် သူက လူသတ်သမားကို သေချာပေါက်တွေ့လိမ့်မယ်… တစ်ဖက်လူက သူ့ဆီကနေ ပိုက်ဆံတောင်းနေတယ်လို့ ထင်ခဲ့ပြီး သူ့ကို ချက်ချင်းသတ်ပစ်မယ်လို့ မထင်ခဲ့တာဖြစ်နိုင်တယ်…"

ရွှီယိရှန်းက မေးသည်။

"လူသတ်သမားက သူ့ကို ဆောက်လုပ်ရေးဆိုက်ဆီ တိုက်ရိုက်ခေါ်လိုက်ပြီး မြေအောက်ကားပါကင်ကိုလာခိုင်းရင် လိမ္မာပါးနပ်တဲ့ စီးပွားရေးသမားဥက္ကဋ္ဌကျန်းက တစ်စုံတစ်ယောက်နဲ့ ညှိနှိုင်းဖို့ မြေအောက်ကားပါကင်ကို တုံးအစွာ တစ်ယောက်တည်းသွားမှာလား? အန္တရာယ်ကိုမကြောက်ဘူးလား?"

ယွဲ့ရှင်းဝမ်က သေချာစဉ်းစားပြီး ပြောသည်။

"ဖြစ်နိုင်ခြေနှစ်ခုရှိတယ်… ပထမတစ်ခု၊ လူသတ်သမားက ကျန်းသယ်ရှင်းကို ဆောက်လုပ်ရေးဆိုက်အနီးဆီလာဖို့ အကြောင်းတစ်ခုခုနဲ့ ခြိမ်းခြောက်လိုက်ပြီးတော့ မြေအောက်ကားပါကင်ဆီလာခိုင်းပြီး ဥက္ကဋ္ဌကျန်း အာရုံမစိုက်မိချိန်မှာ သတိလစ်အောင်ရိုက်လိုက်ပြီး သူ့ကိုဆောက်လုပ်ရေးဆိုက်ဆီ ခေါ်လာပြီးတော့ သတ်ပြီး အလောင်းကို ဖွက်ထားခဲ့တယ်… ဒုတိယတစ်ခု၊ လူသတ်သမားက သံသယရှိသူတွေထဲမှာမပါတာကြောင့် မနေ့နေ့လယ်က သူအပြင်ထွက်ပြီး ဥက္ကဋ္ဌကျန်းကိုသတ်ပြီးတော့ အလောင်းကိုဖွက်လိုက်တယ်…"

ကျန်းရှောင်နျန်က ညင်သာစွာ ပြောသည်။

"ကျွန်တော်တို့က ဆောက်လုပ်ရေးဆိုက်ထဲကနေ အပြင်ထွက်လို့မှ မရတာ… လူသတ်သမားက အလောင်းကို အပြင်မှာ ဖွက်ထားရင် အဲဒါကို လုံးဝစုံစမ်းစစ်ဆေးနိုင်မှာ မဟုတ်ဘူးမလား? ဒီလိုဆိုတော့ ဥက္ကဋ္ဌကျန်းရဲ့ အလောင်းကို ဆောက်လုပ်ရေးဆိုက်ထဲမှာ ဖွက်ထားတယ်လို့တော့ ကျွန်တော်ပိုပြီးယုံကြည်မိတယ်…"

လူတိုင်း: "..."

ဒီအတွေးအခေါ်က မှန်ကန်သည်။ သူတို့သည် ဆောက်လုပ်ရေးဆိုက်ထဲမှ ထွက်သွားလို့မရဘဲ စုံစမ်းစစ်ဆေးရန် မြို့တစ်မြို့လုံးသို့ သွားရောက်လည်ပတ်ခြင်းမပြုလုပ်နိုင်တာကြောင့် ကျန်းသယ်ရှင်း အမှန်တကယ် သေဆုံးသွားပါက သည်ကိစ္စက ဆောက်လုပ်ရေးဆိုက်နှင့် ဆက်စပ်မှုရှိနိုင်သည်။

ယွဲ့ရှင်းဝမ်: "မြေအောက်ကားပါကင်ကို သွားရှာကြည့်ရအောင်…"

အားလုံးသည် အစကတည်းက ခယ်ရှောင်ပင်း ပုံဖော်ထားခဲ့သော ပုံတူလမ်းအတိုင်း ချက်ချင်းဆိုသလို လိုက်သွားပြီး လူကူးလမ်းတစ်ဖက်မှာရှိသော လူဆင်းပေါက်ကနေ အောက်ကိုဆင်းပြီး မြေအောက်ကားပါကင်ကို ပိုက်စိတ်တိုက်ရှာဖွေရန် စတင်လိုက်ကြသည်။

ကားပါကင်၏ တည်ဆောက်ခြင်း တိုးတက်မှုမှာ အစောပိုင်းအဆင့်တွင် ရှိနေဆဲဖြစ်ပြီး လျှပ်စစ်မီးများပင် မတပ်ဆင်ရသေးပေ။ ရှင်းယန်က အလင်းရောင်ရရန် အရက်မီးခွက်ကို အသုံးပြုခဲ့သည်။ လူတိုင်းသည် ခယ်ရှောင်ပင်း၏ လက်ပ်တော့မြေပုံကို ဖွင့်ပြီး ဘယ်ဘက်အောက်ထောင့်မှ စတင်၍ မြေအောက်ကားပါကင်၏ အထပ်နှစ်ထပ်လုံးကို ဂရုတစိုက်ရှာဖွေခဲ့ကြသည်။ သွေးအစွန်းအထင်းတွေ မတွေ့ခဲ့ရသလို အလောင်း၏ အနံ့အသက်လည်း မတွေ့ရပေ။

လျှိုကျောက်ချင်းက စဉ်းစားမရဖြစ်ကာ ပြောသည်။

"ဒီရက်ပိုင်းရဲ့ ပျမ်းမျှအပူချိန်က 30 ဒီဂရီလောက်ရှိတယ်… အလောင်းကို ရေခဲသေတ္တာထဲမှာ အကြာကြီးမအေးခဲထားသ၍တော့ အနံ့အသက်ထွက်မှာ သေချာတယ်… မြေအောက်ကားပါကင်ထဲမှာ ထူးဆန်းတဲ့အနံ့နဲ့ သွေးတွေ မရှိဘူး... လူသတ်သမားက အလောင်းကို ဘယ်လိုများဖျောက်လိုက်တာလဲ?"

ရှင်းယန်၏ အရက်မီးခွက်သည် လေထဲတွင် ပြန့်နှံ့သွားသဖြင့် ယွဲ့ရှင်းဝမ်သည် နွေးထွေးသောအလင်းရောင်နဲ့ ပတ်ဝန်းကျင်ကို လျင်မြန်စွာ လှမ်းကြည့်လိုက်သည်။

မြေအောက်ကားပါကင်တစ်ခုလုံး မှောင်မိုက်ပြီး အေးစက်နေကာ အမြင်အာရုံထဲတွင် အဆုံးသတ်ခြင်းမရှိပေ။ မြေပြင်ကို ဘိလပ်မြေနှင့် မတိုက်ရသေးဘဲ ပတ်၀န်းကျင်ရှိ နံရံများနှင့် ကျောက်တိုင်များသည် ၎င်းတို့၏ ရှေးအကျဆုံး အခြေအနေတွင် ရှိနေသည်။ အလောင်းကို တခြားဘယ်မှာ ဝှက်ထားနိုင်သေးသလဲ?

ယခင်က တည်းခိုးခန်းမှာ တွေ့ခဲ့သော လျှို့ဝှက်ခန်းကို စဉ်းစားရင်း ယွဲ့ရှင်းဝမ်က ပြောသည်။

"လျှို့ဝှက်ခန်းများရှိနေမလား?"

ကျန်းရှောင်နျန်: "မဖြစ်နိုင်ဘူး… စာမေးပွဲခန်းထဲရောက်တဲ့ ပထမဆုံးနေ့မှာ ဆောက်လုပ်ရေးပုံစံပြာတွေကို ဒေါင်းလုဒ်ဆွဲပြီး အချက်အလက်အားလုံးကို သေသေချာချာ စစ်ဆေးခဲ့တယ်… တည်းခိုခန်းလို အချက်အလက်တွေကြားက ကွဲလွဲမှုမျိုး ပြဿနာမရှိဘူး… အလျား၊ အနံ့၊ ကားပါကင်ရဲ့အမြင့်ကို အဲဒီနေ့မှာ theodolite နဲ့ တိုင်းတာခဲ့ပြီး အချက်အလက်တွေက ပုံစံပြာနဲ့ အတိအကျတူညီတာကြောင့် လျှို့ဝှက်ခန်းရှိမှာမဟုတ်ဘူး…"

ကျန်းဖျင်စစ်က အကြံပြုသည်။

"မြေအောက်မှာမရှိဘူးဆိုရင် အဆောက်အဦးထဲ သွားရှာကြည့်တာပေါ့… ရှင်းယွဲ့အဆောက်အဦးက မြေအောက်ကားပါကင်နဲ့ ချိတ်ဆက်ထားတာကြောင့် လူသတ်သမားက အလောင်းကို အပေါ်ထပ်ရွှေ့လိုက်တာဖြစ်နိုင်တယ်…"

အားလုံးသည် ရှင်းယွဲ့ပလာဇာအောက်က နေရာကို ရောက်လာကြပြီး ယွဲ့ရှင်းဝမ်က ပြောလိုက်သည်။

"လူခွဲပြီးရှာရအောင်… စီနီယာအစ်ကိုကျိုနဲ့ စီနီယာအစ်ကိုရွှီနဲ့ စီနီယာအစ်မလင်းတို့က ဧရိယာ A ကို သွားလိုက်… ချင်လု၊ ချင်မြောင်၊ ရှောင်ခယ်နဲ့ ရှင်းယန်တို့က ဧရိယာ B ကို သွားလိုက်… ငါရယ်၊ ဖျင်စစ်၊ စီနီယာအစ်ကိုလျှိုနဲ့ ရှောင်နျန်တို့က ဧရိယာ C ဆီ သွားမယ်… အတည်ပြုနိုင်ဖို့အတွက် သုတေသနအဖွဲ့ Chat Channel ကို အချိန်မရွေး စာပို့လိုက်ရတယ်…"

ယွဲ့ရှင်းဝမ်၏ အစီအစဉ်အရ အားလုံးက အဖွဲ့သုံးဖွဲ့ခွဲကာ ပထမထပ်မှစတင်ပြီး ခုနစ်ထပ်မြောက်အထိ တစ်ထပ်ပြီးတစ်ထပ် ရှာဖွေခဲ့ကြသည်။ 

သုတေသနအဖွဲ့ chat channel ထဲတွင် လူတိုင်းထံမှ စာများ အဆက်မပြတ်ထွက်ပေါ်လာသည်။

"ဧရိယာ A ရဲ့ ပထမထပ်မှာ မူမမှန်တာ တစ်ခုမှ မတွေ့ဘူး…"

"ဧရိယာ B ရဲ့ ဒုတိယထပ်ကို ရှာဖွေပြီး ထူးခြားမှုမရှိဘူး…"

ယွဲ့ရှင်းဝမ်တို့လေးယောက်က ဧရိယာ C ကိုလာပြီး ပထမထပ်ကို ရှာခဲ့သည်။

အဆောက်အဦးကို အခမ်းအနားကျင်းပထားတာဆဲဖြစ်ပြီး လက်ရှိတွင် အတွင်းပိုင်းကို ဆောက်လုပ်ဆဲဖြစ်သည်။ နံရံများတွင် ဘိလပ်မြေပြုပြင်မှု သဲလွန်စများရှိသည်။ အဆောက်အဦတစ်ခုလုံးသည် လူတစ်ဦးတစ်ယောက် သို့မဟုတ် သွေးတစ်စက်မျှမရှိဘဲ အလွန်ဗလာဖြစ်နေသည်။

သူတို့သည် ပထမထပ်မှ ခြောက်ထပ်အထိ တစ်လမ်းလုံးရှာခဲ့သည်။

အရှေ့ဘက်ထောင့်မှာ ကျန်းဖျင်စစ်က ရုတ်တရက် ရပ်လိုက်ပြီး သူ့ဘေးက နံရံကို လှည့်ကြည့်လိုက်သည်။

ယွဲ့ရှင်းဝမ်က သူ့အကြည့်ကို လိုက်၍ နံရံပေါ်တွင် ဘိလပ်မြေအလွှာတစ်ခု ရှိနေတာကို တွေ့လိုက်ရသည်။ မကြာသေးမီက ဆေးသုတ်ခဲ့တာဖြစ်ပြီး လုံးဝမခြောက်သေးပေ။ ဆောက်လုပ်ရေးဆိုက်မှာ ဒီလိုဘိလပ်မြေမျိုးတွေ ပေါ်လာတာ ပုံမှန်ပဲဖြစ်သည်။ သူတို့တွေ အပေါ်ထပ်ကိုတက်လာရင်း တစ်လမ်းလုံး နံရံတော်တော်များများကို ဘိလပ်မြေနဲ့ သုတ်ထားတာတွေ့ခဲ့ရသည်။

သို့သော်လည်း ကျန်းဖျင်စစ်က နံရံဆီသို့ အလျင်အမြန်လျှောက်သွားခဲ့သည်။

ယွဲ့ရှင်းဝမ်က ချက်ချင်း သူ့နောက်ကို လိုက်သွားပြီး 

"ဘာဖြစ်တာလဲ? ဒီနေရာမှာ ပြဿနာရှိလို့လား?"

ကျန်းဖျင်စစ်က အသံတိုးတိုးဖြင့် ပြောလိုက်သည်။

"ဒီနေရာမှာ အစတုန်းက အပေါက်တစ်ပေါက်ရှိတယ်…"

သူသည် နံရံဆီသို့ လျှောက်သွားပြီး လက်ချောင်းများကို ကွေးကာ ပေါ့ပေါ့ပါးပါး ခေါက်လိုက်သော်လည်း အခေါင်းပေါက် ပဲ့တင်သံကို မကြားရပေ။

ကျန်းဖျင်စစ်က မျက်လုံးများကိုမှိတ်ပြီး ခဏလောက် ပြန်လည်စဉ်းစားကြည့်သည်။

"ငါ သေသေချာချာမှတ်မိတယ်… ခြောက်ထပ်မြောက်ရဲ့ အရှေ့ဘက်ထောင့်မှာ ဒီအခန်းနဲ့ ဘေးကအခန်းက အစတုန်းက အပြန်အလှန်ဆက်စပ်နေတယ်… အခန်းနှစ်ခန်းကြားမှာ အပေါက်တစ်ပေါက်ရှိပြီး လူတွေဖြတ်သွားနိုင်တယ်… အဲဒီအချိန်တုန်းက ကျောက်လျန်ကို ငါအဆောက်အဦးထဲမှာ ရှာတွေ့ပြီး သူက ဒီနံရံရဲ့အပေါက်ထဲကနေ ထွက်ပြေးသွားခဲ့တာ…"

ကျန်းရှောင်နျန်: "ဆောက်လုပ်ရေးဆိုက်ရဲ့ ဧရိယာအသီးသီးမှာ အလုပ်သမားတွေ အပြန်ပြန်အလှန်လှန် သွားလာရ အဆင်ပြေစေဖို့အတွက် နံရံတွေမှာ လူတွေ ဖြတ်သွားနိုင်တဲ့ အပေါက်တချို့ရှိတယ်… အတွင်းပိုင်း တည်ဆောက်မှု ပြီးသွားရင်တော့ အဲဒီအပေါက်တွေကို ပိတ်လိုက်မှာ…"

ယွဲ့ရှင်းဝမ်က ခေါင်းငြိမ့်ပြသည်။

"ဖျင်စစ်ရဲ့မှတ်ဉာဏ်က မမှားဘူးဆိုတာ ငါယုံကြည်တယ်… ဒီမှာအပေါက်တစ်ခု ရှိခဲ့ပေမယ့် အခုမရှိတော့ဘဲ နံရံမှာ ဘိလပ်မြေပြုပြင်မှု သဲလွန်စတွေရှိနေတာဆိုတော့ ဒီနံရံက တစ်ခုခုမှားယွင်းနေလိမ့်မယ်…"

လျှိုကျောက်ချင်းက သူတို့နှစ်ယောက်၏ ဆိုလိုရင်းကို သဘောပေါက်ပြီး ရုတ်တရက် သူ့ဦးရေပြားထုံကျဉ်လာသည်။

"အလောင်းကို နံရံထဲမှာ ဖွက်ထားတာများလား?!"

ကျန်းဖျင်စစ်က အေးစက်စွာပြောလာသည်။

"တူးကြည့်လိုက်…"

ကျန်းရှောင်နျန်က မြေတူးစက်ကို ဆင့်ခေါ်ပြီး သူ့ရှေ့က နံရံကို စိုးရိမ်တကြီးကြည့်ကာ ပြောသည်။

"ဒီနံရံကို အရင်က ဝင်ပေါက်အဖြစ် အသုံးပြုတာဆိုတော့ ဒီနံရံက အလေးချိန်ခံနိုင်တဲ့နံရံတော့ မဖြစ်နိုင်ဘူး… ကျွန်တော် ဒီလိုတူးလိုက်ရင် အဆောက်အဦးကတော့ မပြိုကျနိုင်ဘူးမလား?"

ကျန်းဖျင်စစ်: "ယုံကြည်မှုရှိရှိ တူးလိုက်ပါ … ဒီနံရံမှာ အပေါက်ကြီးတစ်ပေါက်ရှိတယ်ဆိုတာ ငါရှင်းရှင်းလင်းလင်း မှတ်မိတယ်…"

ကျန်းရှောင်နျန်က ခေါင်းငြိမ့်ပြပြီး ဘိလပ်မြေဖြင့် အလုံပိတ်ထားသည့် နေရာကို ညွှန်ပြကာ အနီးနားပတ်ဝန်းကျင်မှ အက်ကွဲကြောင်းကို ညင်သာစွာ တူးဖော်လိုက်သည်။ တူးဖော်မှုကို လျင်မြန်စွာ လုပ်ဆောင်လာသည်နှင့်အမျှ အလုံပိတ်နံရံက လူတိုင်းရှေ့တွင် တဖြည်းဖြည်း ကွဲအက်သွားသည်—

ယွဲ့ရှင်းဝမ်တို့လေးယောက်က တစ်ချိန်တည်းတွင် အေးခဲသွားသည်။

Suit ဝတ်ထားသော သူဌေးကျန်းသယ်ရှင်းကို တွေ့လိုက်ရပြီး သူ့မျက်လုံးများက ပြူးကျယ်နေကာ သူ့လက်နှင့် ခြေများကို ကြိုးများဖြင့် တင်းတင်းကြပ်ကြပ် ချည်နှောင်ထားပြီး လူတစ်ကိုယ်လုံးကို နံရံ၏ ဘိလပ်မြေထဲတွင် မတ်တပ်ရပ်အနေအထားဖြင့်ပိတ်လှောင်ထားခဲ့သည်။

သူ့ခန္ဓာကိုယ်မှာ သွေးစွန်းထင်းစရာ ဒဏ်ရာတွေ မရှိခဲ့ပေ။

သူသည် ဘိလပ်မြေနံရံထဲတွင် အသက်ရှင်လျက် အလုံပိတ်ခံရပြီး အသက်ရှုကြပ်ကာ သေဆုံးခဲ့သည်။

#TK