Chapter 160

Volume 7 : ဥပဒေဌာန

Chapter 160 (ပြစ်မှုမရှိကြောင်းချေပချက် ၁၄)

နောက်တစ်နေ့နံနက် 10 နာရီတွင် လျှိုကျားကျား၏ ကမ်းခြေအဆိပ်သင့်ခြင်းအမှုကို ပေရှန်းမြို့ပြည်သူ့တရားရုံးတွင်လူသိရှင်ကြားကြားနာခဲ့သည်။

ယွဲ့ရှင်းဝမ်နှင့် သူ၏အဖွဲ့ဝင်များက မနက်စောစော တရားရုံးကို သွားကြသည်။ လျှိုကျားကျား၏အမှုတွင် ကျူးရှောင်ထင်က တရားခံမဟုတ်ဘဲ သက်သေဖြစ်သည်။ သူတို့သည် ကျူးရှောင်ထက်ကို ခုခံချေပရန်အတွက် တရားရုံးတွင်လာရောက်ရန်မလိုအပ်ဘဲ ခန်းမထဲတွင်ထိုင်ကာ နားထောင်နေရုံသာဖြစ်သည်။

တရားခွင်ကို စောင့်ကြည့်လေ့လာရန် စာကြည့်တိုက်က သူတို့ကို တရားရုံးနှင့် ကြိုတင်ရင်းနှီးကျွမ်းဝင်စေဖို့ အခွင့်အရေးပေးတာဖြစ်လိမ့်မည်။

ယွဲ့ရှင်းဝမ်နှင့် သူတို့၏တက္ကသိုလ်ကျောင်းသားအုပ်စုသည် တရားရုံးကို ပထမဆုံးအကြိမ် လာရောက်ခဲ့ကြသည်။ ခမ်းနားထည်ဝါသော တရားရုံးပတ်ဝန်းကျင်ကို ကြည့်လိုက်တော့ လူတိုင်းက အနည်းငယ် ထိတ်လန့်သွားကြသည်။ သူမဆရာနဲ့ တရားရုံးကို အကြိမ်များစွာရောက်ဖူးသော လန်ယာရုန်ပင် မတည်ငြိမ်နိုင်ခဲ့ဘူး။ အမှုကို သီးခြားကိုယ်စားပြုတာက သူမအတွက် ပထမဆုံးအကြိမ်ဖြစ်သည်။ ယခင်က သူမသည် သူမဆရာနောက်ကလိုက်၍ အကူအညီပေးဖို့ပဲလိုသည်။

မနက် 10 နာရီတွင် လျှိုကျားကျား၏အမှု တရားရုံးကို စတင်ခဲ့သည်။

အစိုးရရှေ့နေရုံးမှ ခန့်အပ်တာဝန်ပေးသူဟာ ငယ်ရွယ်ပြီး အရည်အချင်းရှိသော အမျိုးသမီးတစ်ဦးဖြစ်သည်။ သူမသည် လျှိုကျားကျား၏အမှုဖြစ်စဉ် တစ်ခုလုံးကို မိတ်ဆက်ပေးခဲ့ပြီး သက်သေအတွဲလိုက်ကို ပေါင်းစပ်ဖော်ပြခဲ့သည်။

ရဲတပ်ဖွဲ့မှ တွေ့ရှိသော သက်သေများသည် ယွဲ့ရှင်းဝမ်နှင့် အခြားသူများထက် ပိုများသည်။

"လျှိုကျားကျားရဲ့ခန္ဓာကိုယ်မှာ အရမ်းအဆိပ်ပြင်းတဲ့ potassium cyanide ကို တွေ့ရှိခဲ့ပါတယ်… လျှိုကျားကျား သေဆုံးရတဲ့အကြောင်းရင်းမှာ potassium cyanide အဆိပ်သင့်ခြင်းဖြစ်ကြောင်း အတည်ပြုခဲ့ပါတယ်… အောက်ပါတို့က လျှိုကျားကျားသေဆုံးရတဲ့ အကြောင်းအရင်း သက်သေခံ လက်မှတ်ဖြစ်ပါတယ်… potassium cyanide ရဲ့ အရင်းအမြစ်က ပေရှန်းတက္ကသိုလ်ရဲ့ ဓာတုဗေဒဓာတ်ခွဲခန်းက ဖြစ်ပါတယ်… နောက်ထပ်တော့ ဓာတုဗေဒဌာနမှ ပရော်ဖက်ဆာလင်ဖျင်ရဲ့ သက်သေခံချက် ဗီဒီယိုကိုပြသပါမယ်"

ဓာတ်ခွဲခန်းတွင် သိမ်းဆည်းထားသော potassium cyanide စုစုပေါင်းဆုံးရှုံးမှုမှာ 10 ဂရမ်ဖြစ်ကြောင်း ပရော်ဖက်ဆာလင်က ပြောခဲ့သည်။ အဘယ်ကြောင့်ဆိုသော် သူသည် အောက်တိုဘာ 17 ရက်က ဆေးဗီရိုကို စစ်ဆေးပြီး ထိန်းချုပ်ထားသော ဆေးဝါးများကို ပြန်လည်ချိန်တွယ်စစ်ဆေးကာ ဆေးဗီရိုကို သော့ခတ်ထားသောကြောင့် potassium cyanide သည် အောက်တိုဘာ 17 ရက်မှ အောက်တိုဘာ 25 ရက်ကြားတွင် (အခင်းမဖြစ်ခင်တစ်ရက်လို) ပျောက်ဆုံးသွားခဲ့ကြောင်း သိရသည်။

"အောက်တိုဘာ 17 ရက်မှ အောက်တိုဘာ 25 ရက်အထိ လက်တွေ့စမ်းသပ်ခဲ့တဲ့ ဓာတုဗေဒဌာနမှ အတန်းစာရင်းကို ကျွန်မတို့ ပြန်လည်ရယူခဲ့ပါတယ်… အသုံးချဓာတုဗေဒအတန်း 1 နဲ့ 2 ကသာ အဲဒီအပတ်မှာ စမ်းသပ်မှုအချိန်ဇယားရှိခဲ့ပါတယ်… အတန်းသားတွေကို မေးကြည့်ပြီးနောက် ကျွန်မတို့ရဲ့သုံးသပ်ချက်အရ—— အောက်တိုဘာလ 20 ရက်နေ့မှာ စမ်းသပ်မှုပြီးနောက် ချန်ခိုင်မင်နဲ့ လင်ရွှယ်ဖေးတို့က သန့်ရှင်းရေးလုပ်ဖို့ နေခဲ့ကြပြီး သူတို့နှစ်ယောက်က စုံတွဲတွေပါ… သူ့ကောင်မလေး လင်ရွှယ်ဖေးက တာဝန်ကျနေစဉ် သော့ပျောက်သွားတာကြောင့် သော့လုပ်ဖို့အတွက် ကျောင်းပြင်ကိုထွက်သွားတယ်လို့ ချန်ခိုင်မင်က ပြောခဲ့ပါတယ်… အဲဒီအချိန် ဓာတ်ခွဲခန်းထဲမှာ လင်ရွှယ်ဖေးတစ်ယောက်တည်း ကျန်ခဲ့ပါတယ်"

"လင်ရွှယ်ဖေးကို စစ်ဆေးမေးမြန်းပြီးနောက် potassium cyanide ခိုးပြီး ပြစ်မှုကျူးလွန်ခဲ့ကြောင်း ဝန်ခံခဲ့ပါတယ်"

ဤရလဒ်ကိုလည်း ယွဲ့ရှင်းဝမ် မျှော်လင့်ထားသည့်အတိုင်း ဖြစ်ခဲ့သည်။ 

ကမ်းခြေအမှုသည် အဆိပ်၏ အရင်းအမြစ်ကို ရဲများက တွေ့ရှိခဲ့သည်။ ချန်ခိုင်သည် ထိုအဖြစ်အပျက်ကို သိရှိပြီးနောက်တွင် သူသည် သူ့ကောင်မလေးအတွက် ဖုံးကွယ်ထားခြင်းမရှိဘဲ ဓာတ်ခွဲခန်းထဲတွင် သူမတစ်ယောက်တည်း ကျန်ခဲ့သည်ဆိုသောအချက်ကို တိုက်ရိုက်ဝန်ခံခဲ့သည်။ လင်ရွှယ်ဖေးသည် ဆင်ခြေမပြနိုင်ဘဲ ရဲစစ်ဆေးမေးမြန်းမှုအောက်တွင် ရိုးရှင်းစွာဝန်ခံခဲ့သည်။

တရားသူကြီးသည် တရားခံလင်ရွှယ်ဖေးအား ပြစ်မှု၏ အဖြစ်မှန်ကို ထွက်ဆိုချန်ပေးရန် တောင်းဆိုခဲ့သည်။

လင်ရွှယ်ဖေးသည် တရားခွင်တွင် ဆို့နင်ကာ ငိုယိုပြီး တရားသူကြီးအား အကြောင်းပြချက်ကို ရှင်းပြခဲ့သည်။

ချန်ခိုင်မင်သည် လျှိုကျားကျားကို နှစ်အတော်ကြာ တစ်ဖက်သတ်ချစ်ကြိုက်ခဲ့ပြီး လျှိုကျားကျားကို နတ်ဘုရားမအဖြစ် အမြဲမှတ်ယူခဲ့သည်။ လင်ရွှယ်ဖေးနှင့် အတူရှိပြီးနောက် သူသည် လျှိုကျားကျားကို လက်မလွှတ်နိုင်သေးဘဲ သူ့ကောင်မလေးနဲ့ တွဲနေသောအခါ လျှိုကျားကျား၏ နာမည်ကိုတောင် မတော်တဆ ခေါ်ဝေါ်ခဲ့သည်။ လင်ရွှယ်ဖေးသည် ချန်ခိုင်မင်ကို နှစ်အတော်ကြာ ချစ်ကြိုက်ခဲ့ပြီး ချန်ခိုင်မင်၏နှလုံးသားထဲတွင် လရောင်ဖြူပဲ ရှိနေခဲ့ကာ သူမသည် သူမထက်သာပြီး ပိုလှပသော ထိုလရောင်ဖြူအား မုန်းလာခဲ့သည်။ ထိုအကြောင်းပြချက်အတွက် ချန်ခိုင်မင်နှင့် သူမ ရန်ဖြစ်ပြီးနောက် လျှိုကျားကျားကို သတ်ပစ်ခဲ့သည်။

သို့သော် လျှိုကျားကျားကတော့ ဒီအရာအားလုံးကို မသိခဲ့ဘူး။

လျှိုကျားကျား၏ အချစ်ဆုံးသူငယ်ချင်းဖြစ်သော ကျူးရှောင်ထင်သည် အမှန်တရားကိုကြားသောအခါတွင် မျက်လုံးများနီရဲလာသည်။ သူမသည် အလွန်စိတ်လှုပ်ရှားသွားပြီး လက်သီးများကို တင်းတင်းဆုပ်ထားသည်။ သူမလက်ကိုသာ လက်ထိပ်ခတ်မထားရင် သူမသည် ဒေါသထွက်နေသောအကြည့်ဖြင့် မျက်ရည်များနဲ့ လင်ရွှယ်ဖေး၏ မျက်နှာကို ရိုက်လိမ့်မည်။

လင်ရွှယ်ဖေးကို ရည်ရွယ်ချက်ရှိရှိ လူသတ်မှုဖြင့် တရားသူကြီးက သေဒဏ်ချမှတ်ခဲ့သည်။

တရားရုံးမှ ထွက်လာပြီးနောက် ကျူးရှောင်ထင်၏ မျက်နှာက ရုပ်ဆိုးသွားသည်။

လန်ယာရုန်နှင့် ယွဲ့ရှင်းဝမ်တို့သည် တစ်ယောက်ကိုတစ်ယောက် တစ်ချက်ကြည့်လိုက်ပြီး သူမနှင့်တွေ့ဆုံပြီး သူမ၏စိတ်ခံစားချက်ကို သက်သာစေရန် နည်းလမ်းတစ်ခုကို ချက်ချင်းရှာတွေ့ခဲ့သည်။

"နင့်ရဲ့စိတ်ကို အခု ရှင်းထားပြီး လျှိူကျားကျားရဲ့ကိစ္စကို မတွေးနဲ့ဦး… ကျားကျားကိုသတ်တဲ့ လူသတ်သမားကို အပြစ်ပေးလိုက်ပြီ… နေ့လယ်မှာ အရေးကြီးတဲ့အမှုရှိပြီး ငါတို့က နင့်ရဲ့နာမည်ကို ရှင်းပေးရမယ်… လူသတ်မှုနဲ့ ပြစ်ဒဏ်ချမှတ်ခံရရင် နင် သေဒဏ်ချမှတ်ခံရလိမ့်မယ်"

သေဒဏ်ချမှတ်ခံရပြီး လမ်းမလျှောက်နိုင်လုနီးပါးဖြစ်နေခဲ့သော လင်ရွှယ်ဖေး၏ ပြိုလဲနေသောအမူအရာကို တွေးတောရင်း ကျူးရှောင်ထင်က တုန်လှုပ်ခြောက်ခြားကာ ချက်ချင်း ခေါင်းငြိမ့်လိုက်သည်။

"ကျွန်မ နားလည်ပါပြီ… ကျွန်မ ကျားကျားအကြောင်း မတွေးတော့ဘူး… ကျွန်မအတွက် ကိုယ်တိုင် ပြင်ဆင်ရမယ်"

ယွဲ့ရှင်းဝမ်က သတိပေးခဲ့သည်။

"တရားရုံးမစခင် ငါတို့ မင်းကိုပေးခဲ့တဲ့စာမူကို ထပ်ဖတ်ထားပါ… မင်း စိတ်လှုပ်ရှားပြီး စကားတွေမေ့သွားတယ်ရင် မျက်လုံးကိုမှိတ်ထားပြီး အဲဒီနေ့က မင်းကြုံတွေ့ခဲ့တာတွေကို သေချာပြန်စဉ်းစားပြီး ဖြစ်စဉ်ကို တတ်နိုင်သမျှ အမှန်အတိုင်းပြောပြပါ"

ကျူးရှောင်ထင်က အသက်ပြင်းပြင်းရှူပြီး သူတို့နှစ်ယောက်စလုံးကို လေးလေးနက်နက် ပြောလိုက်သည်။

"ရှင်တို့ရဲ့ အလုပ်ကြိုးစားမှုအတွက် ကျေးဇူးတင်ပါတယ်"

ကျူးရှောင်ထင်ကို ခေါ်ဆောင်သွားပြီးနောက် ယွဲ့ရှင်းဝမ်နှင့် သူ့အဖွဲ့သည် အနီးနားရှိ အမြန်အစားအစာကို အမြန်မှာယူလိုက်ကြပြီး တရားရုံး၏ ခုခံချေပရေးလုပ်ငန်းစဉ်ကို စစ်ဆေးရန် အချိန်ယူကာ မေးခွန်းများပြင်ဆင်ပြီး သက်သေများရောက်ရှိကြောင်း အတည်ပြုခဲ့သည်။

အချိန်သည် တစ်မိနစ်ပြီးတစ်နစ် ကုန်ဆုံးသွားကာ နေ့လယ် နှစ်နာရီထိုးလုနီးပါး ဖြစ်နေပြီဖြစ်သည်။

ယွဲ့ရှင်းဝမ်၊ လန်ယာရုန်နှင့် လင်းမန့်လော်တို့က စာရွက်စာတမ်းများကို ထုပ်ပိုးပြီး တရားရုံးခန်းထဲသို့ လျှောက်သွားကြသည်။

အခြားအဖွဲ့ဝင်များသည် ခန်းမထဲတွင် အချိန်မီထိုင်ကြသည်။ ခုခံချေပရေးတွင် တိုက်ရိုက်မပါဝင်နိုင်သော်လည်း ယနေ့အတွက် လူတိုင်းသည် အထူးသဖြင့် ကျန်းဖျင်စစ်၊ ခယ်ရှောင်ပင်းနှင့် ရှင်းယန်တို့က အကောင်းဆုံးလုပ်ဆောင်ခဲ့သည်။ ယောင်္ကျားလေးအိပ်ဆောင်၏ ဆက်စပ်သောသက်သေများကို စုစည်းရင်း သူတို့သည် တစ်ညလုံးမအိပ်ခဲ့ကြပေ။

လူတိုင်း၏စိတ်က အလွန်ပြင်းထန်နေသည်။ 

ယွဲ့ရှင်းဝမ်သည် စိတ်အေးလက်အေးကြည့်နေပေမဲ့ သူ့ရင်ထဲမှာတော့ ဒရမ်တီးနေခဲ့သည်။

တစ်နေ့တွင် သူသည် မည်သူ့ကိုမျှ မသတ်ခဲ့ဖူးသော မိန်းကလေးတစ်ဦးအား တရားခွင်တွင် ခုခံချေပပေးရမည်ဟု အိပ်မက်မမက်ခဲ့ဖူးပေ။ ကျောင်းသားတစ်စု၏ ပခုံးပေါ်၌ ဤမျှလေးလံသော ဝန်ထုပ်ဝန်ပိုးကို ချပေးရန် စာကြည့်တိုက်က ရူးနေတာဖြစ်လိမ့်မည်။

လန်ယာရုန်သည် ယွဲ့ရှင်းဝမ်၏ လေးနက်သောမျက်နှာကို ကြည့်ပြီး မေးလိုက်သည်။

"နင် နည်းနည်းစိတ်မလှုပ်ရှားဘူးလား"

ယွဲ့ရှင်းဝမ်က ပေါ့ပါးစွာ ချောင်းဟန့်လိုက်သည်။

"နည်းနည်းပါ"

လန်ယာရုန်: "မနှစ်က တက္ကသိုလ်စကားရည်လုပြိုင်ပွဲကို ငါလည်း သွားကြည့်ခဲ့တယ်… နင့်ရဲ့စကားပြောပုံက အံ့ဩစရာကောင်းပြီး လူထောင်နဲ့ချီတဲ့ကြားမှာ နင်က စင်ပေါ်ကနေ ကြောက်လန့်ခြင်းမရှိဘူး… ငါ နင့်ကိုတောင် လက်ခုပ်ဩဘာပေးမိသေးတယ်… ဒါကိုလည်း စကားရည်လုပြိုင်ပွဲလို့ တွေးလိုက်ပါ"

သူမက ခပ်ရေးရေးပြုံးပြီး ယွဲ့ရှင်းဝမ်ကို အားပေးလိုက်သည်။

"နင့်ကိုယ်နင် ယုံပါ… ပြီးတော့ ငါတို့အဖွဲ့ကို ယုံပါ"

စီနီယာအစ်မ၏ နူးညံ့သိမ်မွေ့သောအကြည့်ကို ကြည့်ရင်း ယွဲ့ရှင်းဝမ်၏စိတ်အခြေအနေက ရုတ်တရက် ငြိမ်သက်သွားသည်။

"ဟုတ်တယ်… ရှေ့နေခုံမှာ ကျွန်တော်တို့အနည်းစုပဲ ထိုင်နိုင်ပေမဲ့ ကျွန်တော်တို့နောက်မှာ အဖွဲ့ဝင်တွေရှိတယ်… အဲဒါက အားလုံးအတူတူကြိုးစားမှုရဲ့ရလဒ်ပဲ"

လန်ယာရုန်က ခေါင်းငြိမ့်လိုက်သည်။

"အဲဒါကြောင့် ငါတို့က လူတိုင်းကို စိတ်ပျက်အောင်လုပ်လို့မဖြစ်ဘူး"

လင်းမန့်လော်က သူမကို ဆန့်ထုတ်လိုက်သည်။

"Fighting…"

ယွဲ့ရှင်းဝမ်နှင့် လန်ယာရုန်တို့သည် အတူတူလက်ဆန့်ထုတ်ပြီး သုံးယောက်သား တစ်ယောက်ကိုတစ်ယောက် အားပေးကြသည်။

တရားခွင်မစမီ နောက်ဆုံးမိနစ်အနည်းငယ်သာကျန်တော့သဖြင့် သူတို့သုံးယောက်က လည်ချောင်းကို စိုစွတ်စေရန် ရေအနည်းငယ်သောက်ကြသည်။ တရားဝင် တရားရုံးကြားနာမှု မကြေညာခင် သူတို့သည် တရားရုံးထဲသို့ အတူတူဝင်သွားပြီး တရားခံဘက်က ရှေ့နေထိုင်ခုံမှာ အတူထိုင်နေခဲ့ကြသည်။

စကားပြောနိုင်သော တရားခံရှေ့နေနှစ်ဦးသာ ရှိသည်။ လန်ယာရုန်သည် ဘယ်ဘက်တွင်ထိုင်နေပြီး ယွဲ့ရှင်းဝမ်က ညာဘက်တွင်ရှိကာ လင်းမန့်လော်က စာရွက်စာတမ်းများစီစဉ်ရန် လက်ထောက်အဖြစ် ပထမတန်းတွင်ထိုင်နေသည်။

တရားရုံးစာရေးက ပြောလာသည်။

"တရားသူကြီးနဲ့ တရားရုံးအဖွဲ့ဝင်တွေကို တရားခွင်ထဲဝင်ဖို့ ဖိတ်ခေါ်ပါတယ်"

လူတစ်စုသည် တရားရုံးထဲသို့ လျှောက်သွားကာ အမြင့်ဆုံးခုံများပေါ်တွင် နေရာယူကြသည်။

အလယ်မှာထိုင်နေသော တရားသူကြီးသည် ဆံပင်ဖြူနေသည့် အသက် 50 အရွယ် အမျိုးသမီးတစ်ဦးဖြစ်ပေမဲ့ အားမညန်အပြည့်ရှိသည်။ သူမ၏ ငြိမ်သက်နေသော မျက်လုံးများက ပရိသတ်ကို လှည့်ပတ်ကြည့်ကာ တည်ငြိမ်စွာ တိုးတိုးလေးပြောလိုက်သည်။ "တိတ်တိတ်နေ"

သူမ၏အသံကြောင့် ပရိသတ်များက ချက်ချင်း တိတ်ဆိတ်သွားကြသည်။

တရားသူကြီးက ပြောသည်။

"703 အိပ်ဆောင်လူသတ်မှုအမှုကို တရားဝင်ဖွင့်လှစ်ပြီး တရားခံကျူးရှောင်ထင်ကို ရုံးထုတ်ဖို့ ဆင့်ခေါ်ပါတယ်"

ကျူးရှောင်ထင်ကို တရားရုံးသို့ ခေါ်ဆောင်လာပြီး တရားခံနေရာတွင် ရပ်နေခဲ့သည်။ သူမသည် ယွဲ့ရှင်းဝမ်နှင့် လန်ယာရုန်တို့၏နေရာကို တစ်ချက်ကြည့်လိုက်ပြီး သတ္တိအနည်းငယ်ရှိပုံရကာ တရားခံနေရာတွင် မတ်တတ်ရပ်လိုက်သည်။

တရားသူကြီးက မေးသည်။

"တရားခံကျူးရှောင်ထင်… အမျိုးသမီး… အသက် 22 နှစ်… ပေရှန်းတက္ကသိုလ်ရဲ့ ဘာသာပြန်ဌာနက စီနီယာကျောင်းသူ… လက်ရှိ သူမက ပေရှန်းတက္ကသိုလ်ရဲ့ မိန်းကလေးအိပ်ဆောင်၊ အဆောက်အဦး 6၊ အခန်း 703 မှာ နေထိုင်တယ်… အထက်ပါအချက်တွေက မှန်ပါသလား"

ကျူးရှောင်ထင်က ခေါင်းငြိမ့်လိုက်သည်။

"မှန်ပါတယ်"

"ဒီတရားရုံးရဲ့ တရားခွင်အဖွဲ့ဝင်စာရင်းကို ဆက်လက်ကြေညာပေးပါ့မယ်..." တရားသူကြီးက အမည်များကို ဆက်တိုက်ဖတ်ပြပြီးနောက် ကျူးရှောင်ထင်ကိုကြည့်ကာ "တရားခံက အစုအဖွဲ့၊ အစိုးရရှေ့နေနဲ့ အကဲဖြတ်သူတွေဆီက ပြန်လည်သက်သာခွင့် လျှောက်ထားပိုင်ခွင့်ရှိပါတယ်… ပြန်လည်သက်သာခွင့် လျှောက်ထားရန် လိုအပ်ပါသလား"

စက္ကန့်အနည်းငယ်မျှ တုံ့ဆိုင်းသွားပြီးနောက် ကျူးရှောင်ထင်က လေးလေးနက်နက် ပြောကြားခဲ့သည်။ "မလိုပါဘူး"

ပြန်လည်သက်သာခွင့်အတွက် လျှောက်ထားမှုသည် ယေဘုယျအားဖြင့် တရားခံ၊ တရားခံ၏ ဆွေမျိုးများ သို့မဟုတ် အခြားဆက်နွယ်မှုများသည် အမှု၏မှန်ကန်သော ကိုင်တွယ်ဖြေရှင်းမှုအပေါ် သက်ရောက်မှုရှိနိုင်သောအခါတွင် တရားခွင်အဖွဲ့ဝင်တစ်ဦးအား တရားခွင်မှ ရုပ်သိမ်းပေးရန် တောင်းဆိုမှုဖြစ်သည်။

ဤတရားရုံး၏တရားခွင်အဖွဲ့ဝင်များသည် အဆင်ပြေကြပြီး တရားသူကြီးသည် ပုံမှန်စုံစမ်းမေးမြန်းမှုများသာ ပြုလုပ်ခဲ့သည်။

တရားသူကြီးက ဆက်လက်၍ "ကျူးရှောင်ထင်… တရားခံတစ်ယောက်အနေနဲ့ ခုခံချေပရေးနဲ့ တရားစီရင်ရေးလိုမျိုး နိုင်ငံသားတွေရဲ့ တရားဝင်အခွင့်အရေးနဲ့ အကျိုးစီးပွားတွေကို ခံစားနေရတုန်းပါပဲ… ရှင်းပါလား"

ကျူးရှောင်ထင်က ခေါင်းငြိမ့်လိုက်သည်။

တရားသူကြီးက ပြောလိုက်သည်။

"ဆက်လက်ပြီး အစိုးရရှေ့နေကို စွဲချက်တင်ဖို့ ဖိတ်ခေါ်ပါတယ်"

ယခုတစ်ကြိမ် ပြည်သူ့ရှေ့နေရုံးမှ စေလွတ်လိုက်သော အစိုးရရှေ့နေသည် မျက်မှန်တပ်ထားသော လူငယ်တစ်ဦး ဖြစ်သည်။ သူက သူ့အမှုကို တရားမျှတသောသဘောဖြင့် ပြောနေသကဲ့သို့ လေသံမျိုးနဲ့ တင်ပြခဲ့သည်။

သူသည် ကျူးရှောင်ထင်၏ အခြေခံအချက်အလက်များကို ဦးစွာ ပြီးအောင်ဖတ်ပြီးနောက် အမှု၏အရင်းအမြစ်ကို စတင်ဖတ်ရှုခဲ့သည်——

"တရားခံကျူးရှောင်ထင်ကို ပေရှန်းမြို့ ပင်းကျန်းခရိုင်ပြည်သူ့လုံခြုံရေးဗျူရိုက စုံစမ်းစစ်ဆေးခဲ့ပြီး ပေရှန်းမြို့ရဲ့ ပင်းကျန်းခရိုင်ရှေ့နေချုပ်က ပြည်သူ့တရားရုံးမှာ တရားစွဲဆိုခဲ့ပါတယ်"

"2021 ခုနစ် အောက်တိုဘာလ 26 ရက်နေ့ မနက် 4:30 မှာ ကျူးရှောင်ထင်က Didi တက္ကစီကို ပင်းကျန်းကမ်းခြေမှ ပေရှန်းတက္ကသိုလ်သို့ ‌ပို့ဆောင်ပေးရန် ငှားခဲ့ပြီး မနက် 5:10 မှာ ကျောင်းတံခါးကို ရောက်ရှိလာပြီး မနက် 5:20 မှာ အဆောက်အဦး 6 က အိပ်ဆောင် 703 ကို ဓာတ်လှေကားနဲ့ တက်ခဲ့ပါတယ်… သူမက သူမရဲ့အခန်းဖော် ရှဲ့ရှန်းချင်နဲ့ အငြင်းပွားပြီး ကျောင်းစူပါမားကတ်မှာဝယ်တဲ့ သစ်သီးဓားကို ကောက်ကိုင်လိုက်ပြီး ရှဲ့ရှန်းချင်ရဲ့ နှလုံးသွေးကြောကျဉ်းကို ဓားနဲ့ထိုးလိုက်တာကြောင့် ရှဲ့ရှန်းချင်က သွေးထွက်လွန်ပြီး သေဆုံးခဲ့ပါတယ်"

"တရားခံကျူးရှောင်ထင်က ရှဲ့ရှန်းချင်ရဲ့ကောင်လေးဖြစ်တဲ့ ဘာသာပြန်ဌာနမှ တတိယနှစ်ကျောင်းသား ကျိုးယိကျားကို တစ်ဖက်သတ်ချစ်နေခဲ့ပါတယ်… ဒါ့အပြင် ကျူးရှောင်ထင်နဲ့ ရှဲ့ရှန်းချင်တို့က ကာလကြာရှည်စွာ သဘောထားကွဲလွဲခဲ့ကြပြီး သူတို့ကြားမှာ အငြင်းပွားစရာကိစ္စတွေရှိခဲ့တာကြောင့် လူသတ်ဖို့အတွက် ရှင်းလင်းတဲ့ ရည်ရွယ်ချက်တွေ ရှိပါတယ်"

"လူသတ်လက်နက်ကို အများပြည်သူလုံခြုံရေးတပ်ဖွဲ့က အခင်းဖြစ်တဲ့နေရာမှာ သိမ်းဆည်းရမိခဲ့ပါတယ်… ဖော်ထုတ်ပြီးနောက်မှာတော့ လူသတ်လက်နက်မှာ ကျူးရှောင်ထင်ရဲ့ လက်ဗွေရာတွေသာ တွေ့ရှိခဲ့ပါတယ်… အခင်းဖြစ်ပွားရာနေရာကို စုံစမ်းပြီးနောက် အဲဒီနေ့က အိပ်ဆောင်မှာ ကျူးရှောင်ထင်နဲ့ ရှဲ့ရှန်းချင်တို့ရဲ့ ခြေရာတွေသာ ကျန်ရှိနေတာကို တွေ့ရှိခဲ့ပြီး တတိယလူရှိနေတာမျိုး မတွေ့ခဲ့ရပါဘူး… အခန်းဖော်မောင်ယွဲ့က အိပ်ဆောင်ကို ပြန်လာပြီး လူသတ်လက်နက်ကို ကိုင်ဆောင်ထားတဲ့ ကျူးရှောင်ထင်ရဲ့မြင်ကွင်းကို မြင်လိုက်ရတယ်"

တစ်ခုပြီးတစ်ခုဖော်ပြထားသော သက်သေများက ကျူးရှောင်ထင်၏မျက်နှာကို ဖြူဖျော့သွားစေခဲ့သည်။ အထူးသဖြင့် ခြေရာများကို သူမ နားမလည်နိုင်ဘူး။ အဲဒီတုန်းက မြေပြင်မှာ သွေးတွေ အများကြီးထွက်နေခဲ့သည်။ လူသတ်သမားက လက်ဗွေနှင့် ခြေရာများကို ဘယ်လိုလုပ် မချန်ထားခဲ့တာလဲ။

"တရားခံကျူးရှောင်ထင်က ပြစ်မှုကျူးလွန်ဖို့ ရှင်းလင်းတဲ့ရည်ရွယ်ချက်ရှိပြီး မျက်မြင်သက်သေနဲ့ ပစ္စည်းသက်သေတွေရှိတာကြောင့် သက်သေအထောက်အထားတွေက ခိုင်လုံပြီး ပြစ်မှုရဲ့အချက်အလက်တွေကို ဆုံးဖြတ်ဖို့ လုံလောက်ပါတယ်… ကျူးရှောင်ထင်က ဓားနဲ့ လူသတ်မှုဟာ အရမ်းဆိုးရွားတဲ့ လူမှုရေးဆိုင်ရာ အကျိုးသက်ရောက်မှုကို ဖြစ်စေတယ်လို့ တရားရုံးက ယုံကြည်ပြီး တရုတ်ပြည်သူ့သမ္မတနိုင်ငံ ပြစ်မှုဆိုင်ရာဥပဒေ ပုဒ်မ 230 ဖောက်ဖျက်ကျူးလွန်ကြောင်း ရည်ရွယ်ချက်ရှိရှိ လူသတ်မှုနဲ့ တရားရုံးက ဥပဒေနဲ့အညီ ပြင်းထန်တဲ့ပြစ်ဒဏ်တွေကို ချမှတ်ပေးဖို့ တောင်းဆိုပါတယ်"

ပရိသတ်က အသံတိတ်သွားသည်။

အစိုးရရှေ့နေ၏ ပြင်းပြင်းထန်ထန် ပြစ်တင်မှုသည် တရားခွင်တစ်ခုလုံး ပဲ့တင်ထပ်သွားသည်။ အသံသည် သူမနားထဲတွင် မိုးခြိမ်းသံကဲ့သို့ ထွက်ပေါ်လာသည်။ ကျူးရှောင်ထင်၏ မျက်နှာသည် သွေးမဲ့နေပြီး သူမသည် ဒီအခြေအနေကြောင့် ထိတ်လန့်နေပုံရသည်။

#TK