MM Story Teller

Chapter 11

Viewers 4k

👻Chapter 11:

ဝိဥာဥ်လက်ထပ်ပွဲ (10)

လော့ဇီယန်က အပြေးအလွှား ဝင်လာချိန် ယင်းရှောင်ဖုန်း၏ မင်္ဂလာဝတ်စုံပေါ်မှ အနီရောင်အလင်းတန်းက ချက်ချင်း မှေးမှိန်သွားလေသည်။

လော့ဇီယန်က အထဲတွင် ဖြစ်ပျက်နေသည်ကို သတိထားမိသွားသည်နှင့် သူက ထိတ်လန့်လာရသည်။ သူက အမြန်သွားပြီး ယင်းရှောင်ဖုန်း၏ ခြေလက်များကို ဖိထားလိုက်သည်။

ဝမ်ရွှယ်က အကြိမ်အနည်းငယ် ရုန်းကန်နေရာမှ ဖြူဖျော့သွားလေသည်။ မျှော်လင့်ချက်မဲ့နေသည့် လော့ဇီယန်ကလည်း မေ့လဲမတတ် ဖြစ်သွားရသည်။

ချူဟွိုက်ကလည်း ကိုင်ထားသည့် ဝမ်ရွှယ့်ဆံပင်များကို လွှတ်ပေးလိုက်ရင်း စိတ်အေးသွားသလို အသက်ပြင်းပြင်းရှူမိသည်။

အမျိုးသမီးများကြား ရန်ပွဲတွင် တစ်ဖက်လူကို ဆံပင်ဆွဲရန် မကြိုးစားလာသည့်သူ မရှိပေ။

“သူမ...သူမက သရဲ မဖြစ်နိုင်ဘူး မို့လား" လော့ဇီယန်က ခက်ခက်ခဲခဲ တံတွေးတို့ မြိုချလိုက်ရသည်။

“သူမက အားနည်းတဲ့ ကြက်ကလေးလို့ ရှင်ထင်နေတာလား" ချူဟွိုက်က မျက်နှာသေနှင့် ပြောလာသည်။

လော့ဇီယန်က ရှက်သွားသလို နှာခေါင်းပွတ်လိုပ်သည်။

ချူဟွိုက်က ရှင်းပြလာသည်

" အဲ့ဒီနေ့က ဝမ်ရွှယ်က ရေအိမ်ထဲမှာ သရဲနဲ့ ဆုံခဲ့တယ်။ အစ်ကိုကျင်းနဲ့ ကျွန်မတို့ ဝင်သွားတာနဲ့ ကိစ္စက ဖြစ်သွားခဲ့တယ်။ နောက်တော့ ကျွန်မ ပုံဖော်ကြည့်မိတာ...အဲ့ဒါက သဲလွန်စ ဖြစ်နေတယ်လေ"

“ဘာသဲလွန်စလဲ" လော့ဇီယန်က အံ့သြသွားရသည်။

"လိင်အမျိုးအစားပဲ" ချူဟွိုက်က စကားရပ်သွားသည်

" နောက်ဆုံးတစ်ခေါက်က ဝမ်ရွှယ်ကို ကယ်ခဲ့တဲ့သူက ကျွန်မ မဟုတ်ဘူး။ အစ်ကိုကျင်းပဲ။ သူက အမျိုးသား ဖြစ်ပြီး ဝမ်ရွှယ်က အမျိုးသမီး ဖြစ်နေလို့ အမျိုးသားနဲ့ အမျိုးသမီး အတူတူရှိနေတာကြောင့် ဘေးကင်းနေတာ"

ထိုကြောင့်လည်း စောစောက သူက ဝမ်ရွှယ်ကို ရန်စရဲခြင်း ဖြစ်သည်။ လော့ဇီယန် ရှိနေ၍ ဝမ်ရွှယ်က သူ့ကို ဘာမှလုပ်မလာနိုင်ချေ။

လော့ဇီယန်က ယင်းက အကျိုးကြောင်းသင့်သည်ဟု တွေးမိ၍ သူက လွှတ်ခနဲ ထွက်မိသွားသည် " ဒါကြောင့် အဲ့ဒီတုန်းက လီပင်း အထဲဝင်သွားရင် ဝမ်ရွှယ်ကလည်း ဘေးကင်းမှာ မဟုတ်တော့ဘူး"

“အမှန်ပဲ" ချူဟွိုက်က သက်ပြင်းချလိုက်သည်။

"ဘော့စ်က မင်းကို တစ်ယောက်တည်း ချန်မထားခဲ့ခိုင်းတာ အံ့သြစရာမရှိပါဘူး" ထိုအခိိုက် လော့ဇီယန်က နားလည်သွားလေသည်။

ချူဟွိုက်က ခေါင်းညိမ့်ပြလာသည်။

သူက ကျင်းထျန်းယိ ဘယ်အချိန် အဖြေရှာနိုင်သွားမှန်း မသိသော်လည်း သူ့ထက်တော့ စောနိုင်သည်။

သူက ကျင်းထျန်းယိနှင့် ညတိုင်း အတူတူအိပ်ခဲ့၍ အလုံခြုံဆုံးသူ ဖြစ်လာရသည်။ ဤရက်အတွင်း သူက အဖေယင်းနှင့်သာ တွေ့ခဲ့ရပြီး သရဲနှင့် မတွေ့ခဲ့ရချေ။

သူက ကျင်းထျန်းယိကို ချန်ထားခဲ့ပြီး အမေမာ၏ အိမ်ကို ဝမ်ရွှယ်နှင့်အတူ သွားခဲ့သည့်နေ့တွင် ဝမ်ရွှယ်က သူမကို တိုက်ခိုက်ချင်လာသော်လည်း ချူဟွိုက်က သတိထားမိသွား၍ပင်။ ထို့ကြောင့် အစီအစဥ်က နှောင့်နှေးသွားခြင်း ဖြစ်မည်။

ဤကမ္ဘာတွင် သရဲများအတွက် ကန့်သတ်ချက်များ ရှိလေသည်။ 'ဝမ်ရွှယ်' က လူသတ်ရန် အခွင့်အရေးရရန်အတွက် လူအုပ်ထဲ ပုန်းနေဖို့ လိုအပ်ပြီး အဝတ်စကို ဝတ်ထားဖို့လည်း လိုအပ်ပေသည်။ ကျင်းထျန်းယိက နောက်ဆုံးတစ်ကြိမ်က ပြောခဲ့သည့်အတိုင်း အဝတ်စက လက်ခံသူ ဖြစ်ပြီး ပါဝင်သူများ အဝတ်ကို ဝတ်ရန် နည်းလမ်းအချို့ သုံးလိုက်သည်နှင့် လူသတ်၍ ရသွားသည်။

အစကတည်းက 'လုံခြုံသည့်နေရာ' မရှိချေ။ သူနှင့် လီပင်းတွင် မတူညီသော ထင်မြင်ချက်များရှိ၍ ဝမ်ရွှယ်က နေခဲ့ရန် ရွေးလိုက်ခြင်း ဖြစ်မည်။ ထို့ကြောင့် ယင်းမိသားစုက အန္တရာယ်များသည့် နေရာတစ်ခု ဖြစ်လာပြီး ဝမ်ရွှယ်ကသာ သူတို့နှင့်အတူ ပြန်လိုက်ခဲ့ရန် ဆုံးဖြတ်လိုက်ပါက ချောင်အိမ်တော်က အန္တရာယ်ရှိသည့် နေရာ ဖြစ်လာလိမ့်မည်။

သို့သော်လည်း ဤအဆင့်ထိသာ စဥ်းစားမိခြင်း ဖြစ်သည်။ သူက နောက်ဆုံးတစ်ကြိမ် တဲထဲတွင် ဖြစ်သွားသည့် ကိစ္စနောက်တွင် သရဲရှိနေသည် ဆိုသည့် ထင်မြင်ချက်က မှန်သွားလေသည်။ ထိုအချိန်က မာကျစ်ချိန်က တစ်ယောက်ကိုမှ အဝတ်မခြုံလိုက်ရ၍ မည်သူ့ကိုမှ မသတ်နိုင် ဖြစ်သွားရသည်။ ထို့ကြောင့် သူက ဝမ်ရွှယ်ကို ခြောက်လန့်ရုံသာ တတ်နိုင်သွားသည်။

ဤသို့လုပ်ရသည့် အကြောင်းရင်းက...

ချူဟွိုက်က မာကျစ်ချိန်၏ လှုပ်ရှားမှုအကြောင်း စဥ်းစားကြည့်ရုံနှင့် တွန့်လိမ်ပြီး ကြောက်လန့်သွားရသည်။ မာကျစ်ချိန်က ဝမ်ရွှယ့်ကို နာကျည်းသွားစေရန် တွန်းအားပေးပြီး ယင်းရှောင်ဖုန်း၏ သတို့သမီးဝတ်စုံကို ဝတ်စေသည်။

ဝမ်ရွှယ်က ယင်းရှောင်ဖုန်း၏ သတို့သမီးဝတ်စုံကို ဘယ်လိုတွေ့သွားသည် ဆိုသည်က...

ဤအချက်က အရေးမကြီးပေ...။

ပရလောကက သူတို့ကို ကောင်းကောင်းသိပုံရပြီး သူတို့၏ အားနည်းချက်ကိုလည်း အခွင့်ကောင်းယူလိုက်ဟန် ရှိသည်။ ကြည့်ရသည်က ထိုအချိန်က လီပင်း မည်သို့ ဆုံးဖြတ်မလဲ ဆိုသည်ကို သရဲက ကြိုသိနေပုံရသည်။

ဒါပေမယ့် သူက ဘယ်လိုသိသွားတာလဲ။

ပရလောကက လူတိုင်းရဲ့ 'ပြစ်မှု'ကို သရဲဆီ ပြထားတာမျိုးတော့ မဟုတ်ဘူးမို့လား။

“သဲလွန်စက ဒီလိုမျိုး ဖြစ်နေတယ် ဆိုတာ မင်း ဘယ်လိုသိခဲ့တာလဲ" လော့ဇီယန်က သူ့ကို လေးစားသည့် အကြည့်နှင့် ကြည့်လာသည်။

ချူဟွိုက်က အသိပြန်ဝင်လာ၍ နှုတ်ခမ်း တစ်ဖက်တွန့်မိသွားသည်။

သူက လော့ဇီယန်ကို သူ အဖြေရှာနိုင်သည့် အကြောင်းရင်းက အမျိုးသားတစ်ယောက် ဖြစ်နေသည့်အတွက်ကြောင့်ဟု မပြောပြနိုင်ချေ။

သူ၏ လိင်အမျိုးအစားက မစ်ရှင်စကတည်းက သေချာသည့် လျှို့ဝှက်အပိုင်းတစ်ခု ဖြစ်ပြီးနေပြီဖြစ်သည်။

စစချင်းတွင် သူက ပရလောက ညီမျှရန်အတွက် လုပ်ထားသည်ဟု ထင်ခဲ့မိသည်။ ထို့ကြောင့်လည်း သူက အမျိုးသမီး အဝတ်အစား ဝတ်ထားသည့် အမျိုးသား တစ်ယောက်အဖြစ် ပြောင်းသွားခြင်း ဖြစ်မည်။ ဤသို့ဖြင့် သူက ချက်ချင်း နားလည်သွားရသည်။

ဘာလို့ အမျိုးသား သုံးယောက်နဲ့ အမျိုးသမီး သုံးယောက် ရှိနေရတာလဲ။ စုံတွဲသုံးတွဲမျိုး လုပ်ဖို့အတွက် ပရလောကက သူ့ကို အမျိုးသမီးအဝတ်အစား ဝတ်ထားသည့် အမျိုးသားအဖြစ် ချက်ချင်း ပြောင်းပစ်လိုက်ခြင်း ဖြစ်မည်။ ဒီသဲလွန်စက သိသိသာသာကို လုံလောက်တယ် မဟုတ်လား။

မဟုတ်ရင် ဘာလို့ ဝမ်ရွှယ်နဲ့ လီပင်းက ချစ်သူတွေ ဖြစ်နေမှာလဲ။

အမှန်တွင်ဖြင့် ဖြစ်ရပ်၏ အဓိကဇာတ်လမ်းကြီး တစ်ခုလုံးက ဝိဥာဥ်လက်ထပ်ပွဲ ဖြစ်သည်။

လူသုံးယောက်က လက်ထပ်လို့ ရလို့လား။

ရှေးခတ်မှာ ယောကျ်ား ယောကျ်ားချင်း မိန်းမ မိန်းမချင်း လက်ထပ်လို့ရော ရလို့လား။

ဤဖြစ်ရပ်တွင် လောကကြီးက သူ့ကို အမျိုးသမီးတစ်ယောက်အဖြစ် သတ်မှတ်ထားလေသည်။

ထို့ကြောင့် သူက အဖြေရှာနိုင်လျှင် အသက်ရှင်နိုင်မည့် နည်းလမ်းကလည်း ပေါ်လာမည်။

ရုတ်တရက် လော့ဇီယန်က ထိတ်လန့်သွားသလို မျက်လုံးများနှင့် ပါးစပ် အုပ်လိုက်သည်။

"ကျောက်ရှင်း...သူမကို ဝမ်ရွှယ်က သတ်လိုက်တာလား" သူက ဝမ်ရွှယ့်ဘက်ကို လက်ညှိုးထိုးပြလာသည်။

“…သဘောပေါက်သွားတာကလည်း ကြာလိုက်တာ"

သရဲက အခြားသူက အဝတ်ကို ဝတ်လိုက်မှသာ သတ်၍ရနိုင်ခြင်း ဖြစ်သည်။ ကျောက်ရှင်းနှင့် ဝမ်ရွှယ်က တစ်ခန်းထဲတွင် အတူတူ အိပ်ခဲ့ကြသည်။ သူမက ဝမ်ရွှယ် ကုတ်အင်္ကျီချွတ်လိုက်ချိန် အခြေအနေကို နားလည်သွားခြင်း ဖြစ်နိုင်သည်။

“အဖေယင်းနဲ့ အမေယင်းကိုလည်း သူသတ်တာပေါ့။ ခြေရာကျန်ခဲ့လားလို့ မင်းမေးခဲ့တာ အံ့သြစရာမရှိပါဘူး"

လော့ဇီယမ်က သူ့နာဖူး သူရိုက်လိုက်ပြီး ပြောလာသည် " ငါ အရမ်း တုံးတာပဲ"

သူက ချူကျောင်းက တုံးအသည်ဟု တွေးမိသည့်အချိန်ကို ပြန်စဥ်းစားရင်း ရှက်မိသွားလေသည်။

“အဲ့ဒီညက သူမက ကျောက်ရှင်းနဲ့ အတူတူ အိပ်တဲ့အချိန် ကျောက်ရှင်းကို အရင်ဆုံး သတ်ခဲ့တယ်...။ အချိန်ကျလာတော့ ကျွန်မတို့ လမ်းလွဲသွားအောင် စူးစူးဝါးဝါး အော်လိုက်တယ်"

ချူဟွိုက်က ခေါင်းညိမ့်ပြလာသည်

" ကျောက်ရှင်းလျှာ အဖြတ်ခံရတဲ့ အကြောင်းရင်းကတော့ သူမက ယင်းရှောင်ဖုန်း မကောင်းကြောင်း ပြောခဲ့လို့ပဲ"

လော့ဇီယန်က သရဲက သူတို့နှင့်အတူ အကြာကြီး ရှိနေသည် ဆိုသည့် အကြောင်း စဥ်းစားကြည့်ရုံနှင့် ဦးရေပြားတို့ ထုံကျင်လာရသည်။

“သူမက အမြဲတမ်း ကုတ်အင်္ကျီကြီး ဝတ်ထားတာ မဆန်းတော့ပါဘူး" လော့ဇီယန်က ရေရွတ်လိုက်သည်။

ချူဟွိုက်က အကုန်လုံးနီးပါးကို ရှင်းပြပြီးပြီဖြစ်၍ သူက ထရပ်လိုက်သည်

" အစ်ကိုလော့...သူမရဲ့ သတို့သမီးဝတ်စုံကို အမြန် ချွတ်ရအောင်"

“ဘာလို့လဲ။ အသုံးဝင်သေးလို့လား။ ခဏနေရင် သူမ နိုးလာဦးမှာလား" လော့ဇီယန်က သိချင်လာသည်။

ထိုခဏ ချူဟွိုက်က အကုန်လုံးကို ပြတ်ပြတ်သားသား ရှင်းမပြနိုင်သေး၍ ဝမ်ရွှယ့်လက်ကို ကိုင်ပြီး အင်္ကျီ စချွတ်လိုက်ရုံသာ တတ်နိုင်သည်။

လော့ဇီယန်က ချက်ချင်း ထပြီး ကူညီပေးလာသည်။

သူတို့က လမ်းတစ်ဝက်လောက် ရောက်နေချိန် ရုတ်တရက် အမျိုးသမီးတစ်ယောက်၏ အော်သံကို အပြင်ဘက်မှ ကြားလိုက်ရသည်။

ချူဟွိုက်၏ လှုပ်ရှားမှုများ ရပ်တန့်သွားသည်။

"ချောင်သခင်မကြီး" နှစ်ယောက်သား တစ်ယောက်နှင့်တစ်ယောက် ကြည့်လိုက်ကြသည်။

ယင်းရှောင်ဖုန်း၏ အဝတ်က သူတို့နှင့်အတူ ရှိနေပြီဖြစ်၍ အခု ထိုအရာကို လုပ်နိုင်မည့်သူက မာကျစ်ချိန်သာ ရှိသည်။

ထို့ပြင် မာကျစ်ချိန်၏ အဝတ်ကလည်း...

ချူဟွိုက်က တစ်ခဏမျှ အောက်စိုက်ကြည့်နေရင်း လော့ဇီယန်ဆီ ခေါင်းလှည့်လာသည် " အစ်ကိုလော့။ ကျွန်မ အပြင်ထွက်ပြီး တစ်ချက် ကြည့်လိုက်ဦးမယ်။ ကျွန်မကို သတို့သမီးဝတ်စုံ ပေးလိုက်"

ထိုခဏ ဝမ်ရွှယ်၏ အဝတ်အစားများက အကုန် ချွတ်ပြီးသွားပြီဖြစ်၍ သူမ၏ ခရမ်းပုပ်ရောင် အသားရေက ပေါ်လာသည်။

ချူဟွိုက်က လော့ဇီယန် ကမ်းပေးလာသည့် သတို့သမီးဝတ်စုံကို ယူလိုက်ရင်း အပြင်ထွက်သွားသည်။

"ချူကျောင်း...မင်း အဲ့ဒါကြီး ကိုင်သွားလို့ အဆင်ပြေပါ့မလား" လော့ဇီယန်က စိုးရိမ်တကြီး မေးလာသည်။

စောစောက ဝမ်ရွှယ်တွင် ဖြစ်သွားသည့် ကိစ္စကြောင့် သူ၏ စိုးရိမ်မှုက အတော်လေး သင့်လျော်သည်ဟု သတ်မှတ်ရပေမည်။

ချူဟွိုက်က ခေါင်းယမ်းပြလာသည်

" ရပါတယ်။ ကျွန်မရင်ထဲမှာ နာကျည်းချက် မရှိတာမို့လို့ ကျွန်မခန္ဓာကိုယ်ကို ထိန်းချုပ်လို့မရပါဘူး"

“ချူကျောင်း...မင်းက တကယ်ပဲ အသစ်ဝင်လာတဲ့သူလား" လော့ဇီယန်က တစ်ခဏမျှ တွန့်ဆုတ်နေရာမှ သိချင်နေသည့် မေးခွန်းကို မေးလာသည်။

“ဟုတ်ပါတယ်" ချူဟွိုက်က သူကို ဖြူဖြူစင်စင် အပြုံးလေးနှင့် ကြည့်လာပြီး စကပ်အနားစကို ဝှေ့ယမ်းလိုက်ရာ လေညင်းလေးက တိုးတိုက်သွားသည်။

"မင်း..." လော့ဇီယန်က တွန့်ဆုတ်ဆုတ် မေးလာသည်

" မင်းမှာ အမြီးဘယ်နှစ်ချောင်း ရှိလဲ"

ချူဟွိုက်က မျက်ခုံးပင့်လိုက်ပြီး မေးလာသည် " ရှင့်မှာရော ဘယ်လောက်ရှိလဲ"

လော့ဇီယန်က အသံတိတ်သွားရင်း အံတင်းတင်းကြိတ်ပြီး ပြောလာသည် " ခုနစ်ခု...မင်းရော"

ချူဟွိုက်က ပုခုံးတွန့်၍လက်ဖြန့်လာပြီး ရှက်ဝဲဝဲပြုံးလိုက်ရာ လှပသော ကျားပေါက်လို သွားသေးသေးလေး ပေါ်လာလေ၏။

" ရှင်နဲ့ သတင်းအချက်အလက်ချင်း အလှဲအလှယ်လုပ်မယ်လို့ ကျွန်မ ပြောခဲ့လို့လား။ ရှင် မှန်းကြည့်ပေါ့...."

လော့ဇီယန်:"....."

သို့သော်လည်း ချူကျောင်းက ပွင့်လင်းပြီး တည့်တိုးပြောတတ်သူ ဖြစ်၍ ယခုကဲ့သို့ ပုံစံက သူမက တစ်ခုခုကို ဖုံးကွယ်ထားမှန်း ဝန်ခံနေခြင်း ဖြစ်သည်။

"ဘော့စ်က မင်းနဲ့အတူ အိပ်တဲ့အချိန်ကျရင် ငါ သူ့ကို မေးလိုက်မှာ" လော့ဇီယန်က ပျာယာခတ်စွာနှင့် ဒေါသထွက်အောင် လုပ်လိုက်သည်။

ချူဟွိုက်က သူ့ကို အပြုံးမမည်သော အပြုံးလေးနှင့် လှည့်ကြည့်လာရင်း တစ်ဖက်လူ ဘာပြောပြော ဂရုမစိုက်ဟန် ပြလာသည်။

ကျင်းထျန်းယိက သူနဲ့အတူတူ အိပ်တာလား။

ဒါ ဘယ်လိုဖြစ်နိုင်မှာလဲ။

တစ်ခဏအကြာ ချူဟွိုက်က တံခါးဖွင့်ရန် ပြင်လိုက်စဥ် တံခါးက အပြင်ဘက်မှ ရုတ်တရက် ပွင့်လာပြီး ကျင်းထျန်းယိက သူ့ရှေ့ ပေါ်လာသည်။

ချူဟွိုက်က လန့်သွားရသည်။

ကျင်းထျန်းယိက သူ့ကို နားလည်ရ ခက်ခဲသည့် ရောနှောနေသော ခံစားချက်များ ပါဝင်သည့် အကြည့်နှင့် စိုက်ကြည့်လာသည်။

ကျင်းထျန်းယိ၏ မျက်လုံးများက လှပကာ တောက်ပသည်။

သူ၏ မျက်လုံးများသာ ခရမ်းရောင် ဖြစ်နေပါက 'ကယ်လီယိုပထရာ'ထဲရှိ မင်းသား အယ်လီဇဘတ်တေလာနှင့် တူသွားလိမ့်မည်။

ချူဟွိုက်က ထူးဆန်းသည့် အတွေးများကို ခေါင်းယမ်းရင်း ခါထုတ်ပစ်ကာ ကျင်းထျန်းယိ၏ လက်မောင်းထဲ ခိုဝင်လာသည်။

“အစ်ကိုကျင်း" ချူဟွိုက်က ကျင်းထျန်းယိ၏ မေးအောက်ကို နာဖူးနှင့် ပွတ်သပ်လိုက်သည်။ သူက ကျင်းထျန်းယိပုခုံးပေါ် လက်တင်ထားရင်း ကုတင်ဘက်ကို ကြည့်လိုက်သည်

"အစ်ကိုကျင်း။ဝမ်ရွှယ်က သရဲဖြစ်နေတာ။ ကျွန်မ အရမ်း ကြောက်တာပဲ။ ကံကောင်းလို့ အစ်ကိုလော့က ကျွန်မကို ကာကွယ်ပေးဖို့ ရောက်လာလို့"

လော့ဇီယန်:"......" ကောင်းပါပြီ...နောက်ဆုံးတော့ ကောင်လေးဆီက အာရုံစိုက်မှု လိုချင်တယ် ဆိုတဲ့ အဓိပ္ပါယ်ကို နားလည်သွားပါပြီ။ ချူကျောင်းက နူးညံ့ပြီး အားနည်းသည်ဟု တွေးမိသည့် သူ့ကိုယ်တိုင်က အလွန် တုံးအနေခြင်းပင်။

ကျင်းထျန်းယိက မျက်ခုံးအစုံ တွန့်ချိုးသွားသည်။ သူက ပါးစပ်ဖွင့်လိုက်ပြီး စကားဆိုရန်ပြင်လိုက်သည်။

သို့သော်လည်း ချုဟွိုက်က သူ့အတွေးတို့ကို မြင်နေသည့်အလား အရင် စကားစလာပြီး သူ့ကိုယ်သူ အပြစ်တင်နေသလို ပြောလာသည်

" ကျွန်မ မှားသွားပါတယ်။ ကျွန်မ လျှောက်ပြေးနေပြီးတော့ ရှင့်ကို စိတ်ပူရအောင် မလုပ်ခဲ့သင့်ဘူး။ ကျွန်မ ရှင့်စကားနားထောင်ခဲ့သင့်တယ်"

သူ၏ လေသံက တိုးတိုးလေးနှင့် နူးညံ့နေသည် " ဒါကြောင့် စိတ်မဆိုးပါနဲ့တော့နော်...။ ကျွန်မ အခု အဆင်ပြေသွားပါပြီ"

ချူဟွိုက်က ကျင်းထျန်းယိက ဘယ်လိုမိန်းကလေးမျိုးကို သဘောကျလဲ မသိချေ။ ထို့ကြောင့် သူက သူ့ပုံစံလေးအတိုင်း သရုပ်ဆောင်ရန်သာ တတ်နိုင်သည်။ သူ့အကြိုက်က အမြဲတစေ....လေးလံသည်။ သို့သော်လည်း သူနှင့်ကျင်းထျန်းယိက အကြိုက်တူပုံရသည်။

“ကြည့်ရတာ ကိုယ် မင်းကို ဘာမှမလုပ်ပေးလိုက်ရဘူးနဲ့ တူတယ်" ကျင်းထျန်းယိက သက်ပြင်းဖွဖွ ချလာပြီး သူ့ကို ပြန်ဖက်လာသည်။

ချူဟွိုက်က တိတ်တဆိတ် ပြုံးလိုက်သည်။

လော့ဇီယန်က ထိုမြင်ကွင်းကြောင့် မျက်လုံးအစုံ မြောက်တက်သွားပြီး သူ့အမှားကို ဝန်ခံလိုက်သည်

" ဘော့စ်။ ကျွန်တော်လည်း မှားသွားပါတယ်။ ကျွန်တော်က ဘော့စ်စကားကို နားထောင်ပြီး ချူကျောင်းကို ချန်မထားသင့်...."

"ကောင်းပြီ" ကျင်းထျန်းယိက သူ့ကို ပေါ့ပေါ့ပါးပါး ကြည့်လာသည်။

“ဒါဖြင့် မင်းကို ဒီဖြစ်ရပ်ကို ကျော်နိုင်ပြီး အသက်ရှည်ရှည်နေသွားဖို့ ဆုတောင်းပေးတယ်"

လော့ဇီယန်:"!!!" မင်းမေကြီး....ဘာလို့ နောက်ဆုံးတစ်ခေါက်က ဆက်ဆံတာနဲ့ လက်ရှိဆက်ဆံပုံက အရမ်း ကွာခြားနေရတာလဲ။

“ဘော့စ်" လော့ဇီယန်က ကျေနပ်နေသည့် အပြုံးကြီးနှင့် ပြောလာသည်

" ကျွန်တော်သာ ဘော့စ်လက်မောင်းထဲ ပစ်ဝင်လိုက်ရင် ဘော့စ်က' ကြည့်ရတာ ကိုယ် မင်းကို ဘာမှမလုပ်ပေးလိုက်ရဘူးနဲ့ တူတယ်' လို့ ပြောမှာလား။ ပြီးတော့ ကျွန်တော့်ကို ကာကွယ်ပေးမှာလား"

သူက ဖြစ်နိုင်မလား စဥ်းစားနေသည့် ပုံစံ ခပ်တည်တည် မျက်နှာထားနှင့် မေးထောက်လာသည်။

ချူဟွိုက်က မေ့လဲမတတ်ဖြစ်သွားရသည်။

ကျင်းထျန်းယိက လော့ဇီယန်ကို အပြုံးမမည်သော အပြုံးနှင့် ပြုံးပြလာသည်။

တစ်ဖက်တွင်လည်း လော့ဇီယန်က မုန်တိုင်းကို ဆွဲခေါ်မိမှန်း နားမလည်လိုက်၍ ပြုံးရွှင်နေသည့် မျက်နှာနှင့် ထပ်ပြောလာပြန်သည်

" မိန်းမအဝတ်အစားတွေဝတ်ပြီး တုပ်တုပ်မလှုပ်ပဲ ဆန့်ဆန့်ကြီး လှဲရင်း ကိုယ့်ကိုယ်ကို ရောင်းစားလိုက်ရလည်း ကျွန်တော့်အတွက် အဆင်ပြေပါတယ်"

“ကျွန်တော်က အရင်ဆုံး ဘော့စ်ကို ကျွန်တော့်သခင်အဖြစ် သတ်မှတ်လိုက်ရင်ရော ဘယ်လိုလဲ" သူက အတည်ပေါက်ကြီး တောင်းဆိုလာသည်။ [သခင်နဲ့ အစေခံ ဆက်ဆံရေးလိုမျိုး ပြောချင်တာပါ]

ကျင်းထျန်းယိရင်ခွင်ထဲက ချူဟွိုက်က မျက်လုံးပြူးသွားရပြီး သက်ပြင်းချမိသည်။

အရမ်း ရှက်ဖို့ကောင်းတယ်။ အရမ်း ရှက်ဖို့ကောင်းတယ်။

ချူဟွိုက်က စကားတစ်လုံးမှ ဝင်မပြောပဲ ကျင်းထျန်းယိကို တင်းတင်းဖက်ထားလိုက်သည်။ သူက ဤသို့ ရုတ်တရက်ဆန်သည့် ပြိုင်ပွဲတစ်ခုမှ သူ့အကြိုက်ဖြစ်စေရန် ဘယ်လိုစွမ်းရည်မျိုး အသုံးပြုရမလဲ စဥ်းစားနေရင်း ပထမဆုံးအကြိမ် ဘေးကျပ်နံကျပ် ဖြစ်နေသလို ခံစားရသည်။

“ဒါ ကျွန်တော့်ရဲ့ ပထမဆုံးအကြိမ်ပဲ" လော့ဇီယန်က အရှက်ပြေ ရယ်မောလိုက်သည်။

သူက အဓိပ္ပါယ်မရှိသည့်အရာများကို ပေါက်ပေါက်ဖောက်သလို ပြောနေသော်လည်း သူ့ပါးစပ်ကို မထိန်းနိုင်သေးပေ။

ကျင်းထျန်းယိက လော့ဇီယန်ကို ဖွဖွပြုံးပြလိုက်ရင်း လော့ဇီယန်ခေါင်းပေါ် အဝတ်မည်းစကို လွှင့်ပစ်လိုက်သည်။

ချူဟွိုက်:"....."

“အား...."လော့ဇီယန်က စူးစူးရှရှ အော်ဟစ်လိုက်ပြီး ပြေးထွက်သွားသည်။

" ငါ့ကို သရဲက ထိန်းချုပ်တော့မယ်...။ သွားပါပြီ။ သွားပါပြီ"

“အမ်..." သူက နောက်ဆုံး ခေါင်းပေါ်က အဝတ်စကို ချွတ်ချလိုက်သည် " ငါ ဘာမှမဖြစ်ဘူးလား"

ဝမ်ရွှယ်၏ အလောင်း:"...." ကြည့်ရတာ နင်တို့တွေ အလောင်းကို ဘေးနားထားပြီး တကယ် ပျော်နေကြတဲ့ပုံပဲ။

အဝတ်စကို ကျင်းထျန်းယိက ပြန်ယူသွားသည်။ ချူဟွိုက်က အနည်းငယ် ဝေခွဲမရဖြစ်သွားသလို တစ်ဖက်တွင်လည်း စိတ်အေးသွားရသည်။

သူက အသက်ရှင်နိုင်မည့် နည်းလမ်းကို ရှာတွေ့ခဲ့ပြီး အဝတ်နှစ်ခုလုံးကလည်း သူတို့လက်ထဲ ရှိနေပြီဖြစ်၍ လက်ရှိအချိန်တွင် လူသတ်နိုင်သည့် သရဲများ ပေါ်လာတော့မည် မဟုတ်ပေ။ သို့သော်လည်း ကိစ္စတိုင်းက ဤသို့ ချောမွေ့နိုင်ပါ့မလား။

👻

Prev Next