MM Story Teller

Chapter 165

Viewers 12k

🌱Arc 4 - [ကျင့်ကြံရေးလောကတွင် လယ်စိုက်ခြင်း ]

Ch 165

ရှားပါးဖြစ်တည်မှုအဆင့် ကျင့်ကြံသူတွေအတွက် ၁၀၀ရာခိုင်နှုန်း ဆွဲဆောင်မှု (၁)

စွေ့ချီချောင်းက ရှေ့ပြေးတော်ယင်းကျန်း၏ နတ်ဆိုးခန္ဓာကိုယ် အစစ်အမှန်ကို မြင်လိုက်သည်နှင့် သတိထားမိလေသည်။ သို့မဟုတ် အခြားတစ်နည်းဖြင့်ဆိုရသော် စွေ့ချီချောင်းမှာ ရှားပါးဖြစ်တည်မှုအဆင့် နတ်ဆိုးက တံခါးပိတ်ကျင့်ကြံခြင်းမှ ထွက်လာပြီး နယ်မြေနှစ်ခုကြားတွင် ငြိမ်ချမ်းမှုရယူရန်အတွက် လူသားနယ်မြေသို့ ခရီးထွက်ရန် တောင်းဆိုလာသည်ဟု ကြားသောအခါ သံသယ ဝင်ခဲ့လေသည်။

ရှေ့ပြေးတော်ယင်းကျန်း၏ မျက်လုံးများထဲမှ အကြည့်၊ သူ၏ပြေးလွှားသည့် ကိုယ်နေဟန်ထား၊ သူက စွေ့ချီချောင်း၏ ခေါင်းနှင့် မျက်နှာကို မည်သို့ လျက်လာသည်တို့အားလုံးမှာ သူ့၏ သရုပ်မှန်ကို ဖော်ပြနေသည့် စရိုက်များဖြစ်လေသည်။ သူက ရှောင်ပိုင်၏ အခြားသော ရုပ်သေးရုပ် သရုပ်မှန်တစ်ခုဖြစ်လေသည်။

ရှောင်ပိုင်က သူ့မျက်နှာကို သွားရည်များနှင့် စိုလာသည်အထိ အများအပြားလျက်လာခြင်းကြောင့် သူက ရှောင်ပိုင်ကို ဆူပူသင့်သော်လည်း ရှောင်ပိုင်၏ ခန္ဓာကိုယ်က အလွန်ကြီးနေပေသည်။

ရှောင်ပိုင်က သူ့အပြုအမူတွေ မသင့်လျော်ဘူးဆိုတာ သဘောမပေါက်ဘူးလား...

စွေ့ချီချောင်းက လက်ကိုင်ပုဝါတစ်ထည်လည်း ယူမလာမိချေ။ သူက သူ့မျက်နှာကို အင်္ကျီလက်ဖြင့် သာမန်ကာလျှံကာ သုတ်ကာ ရှောင်ပိုင်၏ ခေါင်းကို တွန်းထုတ်လိုက်သည်။ အခြားသူများ၏ မျက်လုံးထဲတွင် စွေ့ချီချောင်းမှာ ရှေ့ပြေးတော်ယင်းကျန်းကို ဆန့်ကျင်နေခြင်းပင်။

ဂိုဏ်းချုပ်ယန်က သွေးအန်လုနီးပါးဖြစ်ကာ သူမ၏ စိတ်ခံစားချက်သည်လည်း ရှင်းမပြတတ်အောင် ရှုပ်ထွေးလာပေသည်။

စွေ့ချီချောင်းက "မုဆိုးဖို"ဖြစ်လာသည်မှာ တစ်လခန့်ပင် ရှိသေးကာ အမတထန်ဝေ့၏ သေဆုံးခြင်းမှာ ကျင့်ကြံသူများအတွက် ဆွေးနွေးရန် အချက်တစ်ခုဖြစ်နေဆဲ ဖြစ်လေသည်။

ဘာလို့ နတ်ဆိုးနယ်မြေရဲ့ ရုပ်ခန္ဓာကို ကျော်လွန်ခြင်းအဆင့် ရှေ့ပြေးတော်တစ်ယောက်က စွေ့ချီချောင်းအပေါ်ကို ဒီလိုမျိုး နားမလည်နိုင်တဲ့ ရင်းနှီးမှုတစ်ခုပြနေတာလဲ...

မဟုတ်သေးပါဘူး... အဆင့်မြင့်တဲ့ ကျင့်ကြံသူတွေ အကုန်လုံးက စွေ့ချီချောင်းကို ကြိုက်တာလား... ငါတို့က စွေ့ချီချောင်းနဲ့ မကြိုက်လို့ ရှားပါးဖြစ်တည်မှုအဆင့်အထိ မကျင့်ကြံနိုင်တာလား...

အမှန်တွင် ဂိုဏ်းချုပ်ယန်က သူမကိုယ်ထဲရှိ ဒေါသများ ဖောင်းပွလာသည်ဟု ခံစားလိုက်ရသည်။ ရှစ်ရှု့၏ အလောင်းသည်ပင် မအေးသေးချေ။

ရှစ်တိကို နတ်ဆိုးတစ်ကောင်က စော်ကားနေတာကို ငါ ဘယ်လိုလုပ်ပြီး ခွင့်ပြုထားနိုင်မှာလဲ...

ဂိုဏ်းချုပ်ယန်မှာ ရှေ့ပြေးတော်ယင်းကျန်းကို တားမြစ်လုဆဲဆဲတွင် ရှေ့ပြေးတော်ယင်းကျန်းက စွေ့ချီချောင်း၏ အင်္ကျီများကိုကိုက်ကာ ခေါ်လာသည်ကို တွေ့လိုက်သည်။ ထို့နောက် သူက စွေ့ချီချောင်းကို သူ့ကျောပေါ်သို့ တင်ကာ ရွှေရောင်ခန်းမဆီသို့ ပြန်ပြေးလာလေသည်။ သူက ကြောင်ပါးစပ်ကိုဟကာ လူသားဘာသာစကားကို အသုံးပြုပြီး နောက်ထပ်စကားလုံးများကို ထုတ်ပြောလိုက်သည်။

"ဒါက ယွီလင်းဂိုဏ်းရဲ့ အစွမ်းအထက်ဆုံး ကျင့်ကြံသူ အမတထန်ဝေ့ရဲ့ တပည့်မလား... သူ့ကို မြင်မြင်ချင်းမှာပဲ မိတ်ဆွေဟောင်းတစ်ယောက်လိုမျိုး ခံစားရစေတယ်... ငါတို့ရဲ့ ညှိနှိုင်းမှုအတွက် သူ့ကို နတ်ဆိုးနယ်မြေကို ခေါ်သွားချင်တယ်..."

ယင်းကျန်းက ဆိုလိုက်သည်။

လူတိုင်း - "..."

စွေ့ချီချောင်း၏ မျက်နှာကိုလျက်ခြင်းက ရှေ့ပြေးတော် ယင်းကျန်း၏ ခံစားချက်များကို သက်သေပြရန် မလုံလောက်သည့် အထောက်အထားဖြစ်ခဲ့လျှင် ဤစကားမှာ လုံလောက်သော သက်သေဖြစ်သင့်ပေသည်။

ဂိုဏ်းချုပ်ယန်၏ မျက်နှာမှာ ရဲရဲတောက်သွားလေသည်။ ရှေပြေးတော်ယင်းကျန်းက သူ့ရှစ်တိ၏ သရုပ်မှန်ကို ရှင်းရှင်းလင်းလင်း သိထားပေသည်။

သူက ရှစ်ရှု့နဲ့ ကျင့်ကြံရေးလောကတစ်ခုလုံးကို အရှက်ခွဲဖို့ ကြိုးစားနေတာပဲ....

သူက စွေ့ချီချောင်းကို နတ်ဆိုးနယ်မြေထဲကို ဧည့်သည်တစ်ယောက်အနေနဲ့ ဘာလို့ ဖိတ်မှာလဲ... အပြင်လူတွေက ဒီရှေ့ပြေးတော်ယင်းကျန်က ရှစ်ရှု့ရဲ့ မုဆိုးဖိုကို သူ့အိမ်ကနေ ခိုးသွားတယ်လို့ ထင်ကြမှာပဲ မဟုတ်ဘူးလား... ငါက ရှေ့ပြေးတော်ယင်းကျန်းကို တကယ်ပဲ ခွင့်ပြုလိုက်ရင် ယွီလင်းဂိုဏ်းရဲ့ ဘိုးဘေးတွေကို ဘယ်လိုလုပ်ပြီး ရဲရဲဝင့်ဝင့် မျက်နှာချင်းဆိုင်ရတော့မှာလဲ...

ဂိုဏ်းချုပ်ယန်က သူ့ကို ဆဲရေးလိုစိတ်ကို ခုခံလိုက်ပြီး သူမကိုယ်သူမ အကျိုးသင့်အကြောင်းသင့် နေထိုင်ရန် ဖိအားပေးကာ ဖော်ပြလိုက်သည်။

"ရှင် သူနဲ့ မိတ်ဆွေဟောင်းတစ်ယောက်လိုပဲ တကယ်ခံစားရရင် ကျွန်မတို့ဂိုဏ်းမှာပဲ ရက်နည်းနည်း ထပ်နေလို့ရပါတယ်..."

ပြီးတော့ ရှင် ကျွန်မကို ကျောခိုင်းသွားတာနဲ့ သေအောင် ခုတ်သတ်ပစ်မယ်...

ရှောင်ပိုင်၏ကျောပေါ်သို့ ပစ်တင်ခံထားရသည့် စွေ့ချီချောင်းမှာ သူ၏အမွေးနုနုများထဲတွင် နစ်မြုပ်နေပေသည်။ သူက ရှောင်ပိုင်၏ ခန္ဓာကိုယ်ပေါ်ရှိ တအိအိလှုပ်နေသော ကြွက်သားများကို ခံစားရပြီး ရှောင်ပိုင်၏ လည်ပင်းရှိ အမွေးများကို ဂရုတစိုက် ကိုင်ထားလိုက်သည်။ သူ ထရပ်လိုက်သည့်အခါ မြူနှင်းဝေလငါးလေးက သူ့နောက်မှ စိတ်မအေးစွာဖြင့် လိုက်လာသည်ကို တွေ့လိုက်ပေသည်။ ၄င်းက ရှောင်ပိုင်၏အနောက်တွင် ရေကူးနေသော်လည်း ရှောင်ပိုင်၏ နူးညံ့နေဟန်ရသည့် အမြီးတစ်ခုက ဟိုဟိုဒီဒီ လှုပ်ယမ်းနေရာ အနားမကပ်ရဲပေ။ အမြီးမှာ အဟန့်အတားတစ်ခုဖြစ်နေဟန်ရပြီး လူတိုင်းကို နီးကပ်လာခြင်းမှ တားမြစ်ထားလေသည်။

စွေ့ချီချောင်းက ရှေ့သို့ ထပ်မံကြည့်လိုက်ရာ ဂိုဏ်းချုပ်ယန်နှင့် အခြားသူများ၏ မျက်လုံးများထဲမှ ရှုပ်ထွေးနေသော အကြည့်ကို မြင်လိုက်သည်။

ဂိုဏ်းချုပ်ယန်က အမှန်ပင် စိတ်ပူနေခြင်းဖြစ်သည်။ စွေ့ချီချောင်း ထရပ်လိုက်သည်ကိုမြင်ရာ ရှောင်ပိုင်၏ ကျောပေါ်မှဆင်းရန် သူမက သူ့ကို အချက်ပြလိုက်သည်။

စွေ့ချီချောင်းမှာ အာကာသယာဉ်များမောင်းကာ မြင်းများ၊ ကျွဲများ၊ ဝေလငါးများ စီးဖူးပေသည်။ သူက ဂြိုလ်သား တိရိစ္ဆာန်အများစုကိုပင် စီးခဲ့ဖူးသော်လည်း ကြောင်တစ်ကောင်ကိုစီးရန် မည်သည့်အခါမှ မကြိုးစားခဲ့ဖူးပေ။ အတန်ကြာအောင် စဉ်းစားပြီးနောက် သူက ရှေ့သို့အနည်းငယ်တိုးကာ ရှောင်ပိုင်၏ လည်ပင်းကိုဖက်ပြီး ဆင်းလာလိုက်သည်။

ရှောင်ပိုင်က အနည်းငယ် ခါးကိုင်းပေးလိုက်သည်။ စွေ့ချီချောင်း၏ ခြေထောက်က မြေပြင်နှင့် ထိသောအခါ သူက တာအိုခန္ဓာကိုယ်သို့ ထပ်မံပြောင်းလဲလိုက်သည်။ သူ့ခန္ဓာကိုယ်က အလွန်ရှည်လျားကာ သာမန် လူသားများနှင့် ယှဉ်ပါက များစွာပိုရှည်ပေသည်။

စွေ့ချီချောင်းက အသက်ပြင်းပြင်းရှုကာ ဆိုလိုက်သည်။

"ဂိုဏ်းချုပ်ပြောတာ မှန်ပါတယ်... အကြီးအကဲယင်းကျန်းကို ကျွန်တော်တို့ဂိုဏ်းမှာ ကြိုဆိုဖို့အတွက် အရင်ဆုံးထွက်သွားမှာ မဟုတ်ပါဘူး..."

ဂိုဏ်းချုပ်ယန်မှာ မျက်နှာထက်တွင် မကြည်လင်သော အမူအရာတစ်ခု ရှိနေပေသည်။ ရှေ့ပြေးတော်ယင်းကျန်းမှာ သူ့ရှစ်တိကို စူးစူးစိုက်စိုက် စိုက်ကြည့်နေသည်ကိုမြင်ရာ ဒေါသများနှင့် လောင်ကျွမ်းနေပေသည်။

ဒီလောက်ကျင့်ကြံခြင်းအဆင့်အထိ ရောက်နေပြီး စိတ်ဓာတ်ညစ်ညမ်းတဲ့ ကျွမ်းကျင်သူတစ်ယောက်ကို ငါ တစ်ခါမှကို မတွေ့ဖူးဘူး...

သူမက မည်သို့ပင်ကြည့်ကြည့် ရှေ့ပြေးတော်ယင်းကျန်းကို နှာဘူးတစ်ယောက်ဟု ခံစားလိုက်ရပေသည်။ သို့ဖြစ်၍ သူမက စွေ့ချီချောင်းရှေ့တွင် ရပ်လိုက်လေသည်။ ရှေ့ပြေးတော်ယင်းကျန်းက သူ့မျက်လုံးများထဲတွင် မကျေမနပ်အကြည့်တစ်ခုကို ပြသလိုက်သော်လည်း သူမက သူ့အမူအရာကို သတိမပြုမိသကဲ့သို့ ဟန်ဆောင်လိုက်သည်။

အခြားသော ခေါင်းဆောင်များသည်လည်း သူတို့စိတ်ထဲတွင် သက်ပြင်းချလိုက်ကြပေသည်။ နတ်ဆိုးများနှင့် လူသားတို့၏ ဓလေ့များကြားတွင် ခြားနားချက် အလွန်များပေသည်။ လူသားနယ်မြေထဲတွင် ဤကဲ့သို့ စိတ်ဓာတ်ညစ်ညမ်းသည့် ကျင့်ကြံသူ တစ်ဦးမှမရှိချေ။ ရှေ့ပြေးတော်ယင်းကျန်းမှာ လူမြင်ကွင်းတွင် မည်သည့်အချိန်၌မဆို "စွေ့ချီချောင်းနှင့် ဆော့ကစား"မည်သဖွယ်ဖြင့် ရန်စသည့် အကြည့်တစ်ခုဖြင့် ကြည့်လိုက်ပေသည်။

ဤနေရာတွင် လူသားကျင့်ကြံသူအားလုံး ရပ်နေဆဲဖြစ်သည်။ သို့ထိတိုင် ရှေ့ပြေးတော်ယင်းကျန်းက သူတို့ကို လေသဖွယ် ဆက်ဆံနေပေသည်။

ဒေါသထွက်စရာ ဘယ်လောက်ကောင်းလဲ...

ဤသည်မှာ တစ်စုံတစ်ဦးက လုံလောက်သော ခွန်အားဖြင့် အဘယ့်ကြောင့် မင်းပြုနိုင်သည်ဟူခြင်းပင်။ သူတို့က ကျင်ကြံရေးလောကတွင် အစွမ်းထက်ဂုဏ်ကြီးသူများဖြစ်သော်လည်း သူတို့ရှေ့မှ နတ်ဆိုးရှေ့ပြေးတော်တစ်ဦးကို ကြည့်နေရသည့် ဤအခြေအနေကို သည်းခံရန်သာ တွန်းအားပေးခံလိုက်ရပေသည်။

ဂိုဏ်းချုပ်ယန် ဘယ်လောက်တောင် စိတ်ဆိုးနေသလဲ ကြည့်ပါဦး... ဟင်း... ငါတို့ အခုဆို ဂိုဏ်းချုပ်ယန်ကိုပဲ အားကိုးရတော့မယ်...

အခြားသော ဂုဏ်ကြီးသူများက အမတဖန့်ချွန်း လွန်ခဲ့သည့် နှစ်ပေါင်းများစွာက ဒီဇိုင်းဆွဲထားသည့် အစီအရင်မှာ ရှေ့ပြေးတော် ယင်းကျန်းကို ထိန်းချုပ်နိုင်ရန်သာ မျှော်လင့်နိုင်ပေသည်။

......

စွေ့ချီချောင်းမှာ ဂိုဏ်းချုပ်ယန် စီစဉ်နေသည်ကို သတိထားမိပေသည်။ ရှောင်ပိုင်၏ ရုပ်သေးရုပ်က အမတထန်ဝေ့မှ ရှေ့ပြေးတော်ယင်းကျန်းသို့ မည်သို့ ပြောင်းသွားသည်ကို သူ မသိသော်လည်း ရှောင်ပိုင်က ဘေးကင်းကင်း ရှိနေသည်ဖြစ်ရာ နတ်ဆိုးနယ်မြေ၏ ဂေဟစနစ်ကို မဖျက်စီးသင့်ဘဲ ဂိုဏ်းချုပ်ယန်ကိုလည်း ရှောင်ပိုင်အားသတ်ရန် ခွင့်မပြုသင့်ဟု ခံစားရပေသည်။

အမှန်တကယ်တွင် အစီအရင်မှာလည်း ဂိုဏ်ချုပ်ယန်၏ နောက်ဆုံး ဝှက်ဖဲဖြစ်သည်ကို စွေ့ချီချောင်းက သိထား၏။ သူက ရွှေရောင်ခန်းမ၏ တံခါးအတွင်းသို့ ဝင်လိုက်သည်နှင့် သူ့ပါးစပ်ကို ဦးဆုံးဟကာ ရှောင်ပိုင်ကို သဲလွန်စပေးလိုက်သည်။

"အကြီးအကဲယင်းကျန်းက လူသားနယ်မြေကို ညှိနှိုင်းဖို့ လာတယ်လို့ ကျွန်တော်ကြားတယ်... ဒါပေမဲ့ ကျွန်တော်တို့နဲ့ ဘာကိစ္စမှာ ညှိနှိုင်းချင်တာလဲ ကျွန်တော်အခုထိ သေချာမသိသေးဘူး... လောလောဆယ်မှာ နယ်မြေနှစ်ခုကြားက အရေးအကြီးဆုံး ပြဿနာက ကျွန်တော်တို့ကြားက စစ်ပွဲပဲ..."

ညှိနှိုင်းမယ်တဲ့လား....

ရှောင်ပိုင်က လူသားနယ်မြေကို လာခဲ့သည့် တစ်ခုတည်းသော အကြောင်းပြချက်မှာ စွေ့ချီချောင်းကို တွေ့ရန် ဖြစ်သည်။ စွေ့ချီချောင်းပြောသည်ကို ကြားပြီးနောက် သူက ချက်ချင်းတုံ့ပြန်ကာ ဆိုလိုက်သည်။

"ဟုတ်တယ်... အဲဒါပဲ..."

ဂိုဏ်းချုပ်မှလွဲ၍ ရှိနေသော လူများက လေထုမှာ အနည်းငယ် ဖရိုဖရဲဖြစ်လာသည်ဟု ခံစားလိုက်ရသည်။ ဤသည်မှာ စွေ့ချီချောင်းနှင့် အနည်းငယ်သာ ထိတွေ့မှုရှိသူများအတွက် ပို၍ ခံစားရပေသည်။ အဆင့်မြင့် ကျင့်ကြံသူအများအပြားရှေ့တွင် စွေ့ချီချောင်းမှာ အိမ်၏ သခင်နှင့် တူနေပေသည်။ သူက အလွန်တည်ငြိမ်ကာ စတင်၍ပင် ညှိနှိုင်းနေသည်။

စွေ့ချီချောင်းမှာ နာမည်ကျော် ပုဂ္ဂိုလ် တစ်ဦးဖြစ်နေသည်မှာ အံ့ဩစရာ မရှိချေ။ သူက အတန်ပင် လုပ်နိုင်စွမ်းရှိသည့်ပုံပေါက်၏။

ဂိုဏ်းချုပ်ယန်က သူမ၏ နှလုံးသားမှာ လည်ပင်းအထိ မြင့်တက်လာသည်ဟု ခံစားလိုက်ရပေသည်။

ရှေ့ပြေးတော်ယင်းကျန်က ငါတို့နဲ့ စစ်ပွဲအကြောင်း တကယ်ကြီး ဆွေးနွေးချင်တာလား... သူ့ရဲ့ အသက်မပါတဲ့ စိတ်ထားနဲ့ဆိုရင် ရှေ့ပြေးတော်ယင်းကျန်းက ငြိမ်းချမ်းရေးကို ထောက်ခံမှာ မဟုတ်ဘူးမလား...

ရှောင်ပိုင်က စိတ်ပျော်နေပြီး ခြေထောက်ချိတ်ထိုင်ကာ ဆိုလိုက်သည်။

"ငါက နတ်ဆိုးတွေကို စစ်ပွဲကိုရပ်ဖို့ အမိန့်ပေးမလို့ပဲ... ဒါပေမဲ့ ငါ လူသားနယ်မြေရဲ့ ပူးပေါင်းမှုလိုတယ်... မင်းတို့ မြင်တဲ့အတိုင်းပဲ မင်းတို့လည်း ငါနဲ့အတူ စစ်ပွဲကို ရပ်ဖို့ ဆန္ဒရှိတယ် ဟုတ်တယ်မလား..."

ဆန္ဒရှိတယ်... ဒါပေါ့ ငါတို့က ဆန္ဒရှိတာပေါ့...

အံ့အားသင့်စွာပင် ကတ်သီးသတ်သတ်နိုင်လှသော နတ်ဆိုးတစ်ယောက်က ဤသည်ကို အကြံပြုလာ၏။ ဂိုဏ်းချုပ်ယန်၏ စိတ်ဓာတ်များက မြင့်တက်သွားပြီး သူမက ခေါင်းညိတ်ပြလိုက်သည်။

"အဲဒါက ရှင်းရှင်းလေးပါ..."

ရှောင်ပိုင်က ဆိုလိုက်သည်။

"စစ်ပွဲထဲမှာ နတ်ဆိုးတစ်ကောင်စီက သူတို့ကိုယ်သူတို့ပဲ ကိုယ်စားပြုတာ... မျိုးနွယ်စုကို ကိုယ်စားပြုတာ မဟုတ်ဘူး... အဲ့တော့ သူတို့ကို ဆွဲဆောင်ဖို့က လွယ်မှာပါ... နောက်ထပ် ဆန့်ကျင်နေတဲ့ နတ်ဆိုးတွေ ရှိနေသေးရင် ငါကိုင်တွယ်လိုက်မယ်... ဒါပေမဲ့လည်း ပြဿနာတစ်ခုတော့ ကျန်သေးတယ်..."

သူက စကားပြောနေစဉ် သူ့မျက်လုံးမှာ လူအုပ်ထဲသို့လှမ်းကြည့်လိုက်သည်။ သူ့အကြည့်က လူတိုင်း၏ နှလုံးကို အခုန်မြန်အောင် လုပ်လိုက်ပြီး မကောင်းသောအရာ တစ်ခုခုဖြစ်မည်ဟု ခံစားလိုက်ရသည်။

"ငါက မင်းနဲ့အတူ လူသားနယ်မြေနဲ့ နတ်ဆိုးနယ်မြေကို ခွဲခြားပေးတဲ့ ရုပ်သေးတစ်ရုပ် လုပ်လို့ရတယ်... ဒါပေမဲ့ သူကတော့ ငါနဲ့အတူ နတ်ဆိုးလောကထဲကို ပြန်လိုက်လာရမယ်..."

ရှောင်ပိုင်က စွေ့ချီချောင်းကို ထပ်မံညွှန်ပြလိုက်ပြီး လိုရင်းကို တည့်တိုးဆိုလာသည်။

ဂိုဏ်းချုပ်ယန်က သူမ၏ ဒေါသကို မချိုးနှိမ်နိုင်ဘဲ စားပွဲကို လက်ဖြင့်ရိုက်လိုက်ကာ ဆိုလိုက်သည်။

"နင်က ငါတို့ ယွီလင်းဂိုဏ်းကို ဘယ်လိုနေရာလိုမျိုး ပြုမူနေတာလဲ..."

"ဂိုဏ်းချုပ်..."

ဂိုဏ်းချုပ်ယန်က ထရပ်ပြီးနောက် စွေ့ချီချောင်းသည်လည်း ထရပ်လိုက်သည်။ သူက ဂိုဏ်းချုပ်ယန်၏ ပခုံးပေါ်တွင် လက်တစ်ဖက်တင်ကာ ညင်သာသော အသံဖြင့် ဆိုလိုက်သည်။

"ဆရာတူအစ်မ... စိတ်လျော့ပါဦး... ငြိမ်းချမ်းရေးက အရေးကြီးပါတယ်... သူနဲ့ ကိစ္စတွေကို ဖြည်းဖြည်းချင်းပဲ ဆွေးနွေးရအောင်..."

ရှောင်ပိုင်က စက်ဆုပ်ဖွယ် ပြုမူကာ "အပေးအယူက ပြီးပြီ... ငါသူ့ကို ပြန်ခေါ်သွားချင်တယ်"ဟု ပြောလိုသော်လည်း စွေ့ချီချောင်းက သူ့အား သတိပေးသည့် အကြည့်တစ်ခု ပေးနေသည်ကို မြင်ရာ ပါးစပ်ပိတ်ထားလိုက်သည်။

ဂိုဏ်းချုပ်ယန်က စွေ့ချီချောင်း သူ့အား "ဆရာတူအစ်မ"ဟု ခေါ်သည်ကို ကြားပြီးနောက် သူမ၏ အေးဆေးတည်ငြိမ်မှုကို ပြန်ရပြီး အေးစက်စက်မျက်နှာဖြင့် ပြန်ထိုင်လိုက်သည်။ စွေ့ချီချောင်းက သူမအား ထိုသို့ ခေါ်ခဲပေသည်။

"ကျွန်တော်တို့ အသေးစိတ်ကို အရင်ပြောကြည့်လို့ရပါတယ်..."

စွေ့ချီချောင်းက မသိမသာဖြင့် စကားဝိုင်း၏ စည်းချက်ကို ထိန်းချုပ်လိုက်သည်။

"အကြီးအကဲက နတ်ဆိုး ဘယ်နှယောက်ကို ဖယ်ရှားပြီးပြီလဲ..."

နတ်ဆိုးများကို မျိုးနွယ်စု အမျိုးမျိုး ခွဲခြားထားသော်လည်း အချို့သော နတ်ဆိုးမျိုးနွယ်များက မျိုးနွယ်စု အခွဲများနှင့် သူတို့နှင့် နီးစပ်သော မျိုးနွယ်စုများ ရှိသည်မှာ သေချာပေသည်။ လက်ရှိတွင် ရှေ့ပြေးတော်ယင်းကျန်းမှာ နတ်ဆိုးနယ်မြေထဲတွင် တစ်ဦးတည်းသော ရုပ်ခန္ဓာကို ကျော်လွန်ခြင်းအဆင့်ဖြစ်ရာ သူ့စကားများက များစွာ အရေးပါနိုင်ပေသည်။

ရှောင်ပိုင်က သူ့မျိုးနွယ်နှင့် ဆက်စပ်သည့် မျိုးနွယ်စုများစွာကို အသေးစိတ် ရေတွက်လိုက်သည်။ သူက ရေတွက်နေစဉ်တွင် မနေနိုင်ဘဲ ဆိုလိုက်သည်။

"ဟေး... မင်းရဲ့ ဆရာက အိတ်ဆောင်အရွယ်လှိုဏ်ဂူတွေကို ချိတ်ပိတ်သွားတယ်မလား... အဲဒါတွေ ထုတ်လိုက်... ငါမင်းအတွက် ဖွင့်ပေးမယ်..."

ဂိုဏ်းအမျိုးမျိုးမှ ဂိုဏ်းချုပ်များက ထုံထိုင်းသွားသည်ဟု ခံစားလိုက်ရသည်။

ဒီနတ်ဆိုးက သူတို့ရဲ့ ပြဿနာကို တကယ်ကို နားလည်တာပဲ...

ဂိုဏ်းချုပ်ယန်က ကြမ်းတမ်းသောအမူအရာဖြင့် ဖြတ်ပြောလိုက်သည်။

"မလုပ်နဲ့ ရှစ်တိ..."

"မလုပ်နဲ့ရှစ်တိ ဟုတ်လား... နင်ရော ဖွင့်နိုင်လို့လား... နင်အဲ့ဒါတွေကို ဖွင့်နိုင်ဖို့ဆို နှစ်ရာချီ ကြာမှာ မဟုတ်လား..."

ရှောင်ပိုင်က မယဉ်မကျေး ပြန်ဆိုလိုက်သည်။

"ငါ့ကျင့်ကြံဆင့်က သူ့ထက်မြင့်တယ်... အမှတ်တံဆိပ်က ခဏလေးအတွင်း ပျက်သွားမှာ..."

ဂိုဏ်းချုပ်ယန်က ပြောစရာမဲ့နေကာ ပြန်လည် မငြင်းဆိုနိုင်ပေ။

အမှန်တွင် မကြာသေးမီက လူတိုင်းတွင် သူတို့၏ နှလုံးသားထဲ၌ အမတထန်ဝေ့ ကျဆုံးပြီးသည့်အချိန်မှစ၍ အနည်းအများ သိချင်နေကြသော ထူးထူးခြားခြား မေးခွန်းတစ်ခု ရှိနေပေသည်။ လူတိုင်းက စွေ့ချီချောင်း ကွယ်ရာတွင် ဤအကြောင်းကို ဆွေးနွေးနေကြသည်။ သူတို့က စွေ့ချီချောင်းမှာ အနာဂတ်တွင် တာအိုလက်တွဲဖော်တစ်ယောက်ရှာရန် သို့မဟုတ် နောက်ထပ် ဆရာတစ်ယောက်ကို ခစားရန် ခက်ခဲမည်ဟု တွေးထားကြသည်။ သူ့၏ လက်တွဲဖော်ဖြစ်ရန် သို့မဟုတ် ဆရာဖြစ်ရန် သဘောတူသူက အမတထန်ဝေ့နှင့် နှိုင်းယှဉ်ခံရပေမည်။ ထိုသူက အမတ ထန်ဝေ့ကဲ့သို့ အစွမ်းထက်နိုင်သည်ဟု မည်သူကမှ မယုံကြည်ကြပေ။

အခုတော့...

စွေ့ချီချောင်းက တည်ငြိမ်နေကာ တိတ်တဆိတ် ဆိုလိုက်သည်။

"အဲ့ဒါဆိုရင်တော့ ကျွန်တော်က အကြီးအကဲကို ဒုက္ခပေးရဦးမှာပေါ့..."

ဤသည်က အံ့ဩစရာမဟုတ်ပေ။ ဂိုဏ်းချုပ်ယန်က သူ့ရှစ်တိမှာ ထိုအိတ်ဆောင်အရွယ် လှိုဏ်ဂူများအပေါ် အလွန်အရေးစိုက်သည်ကို သိထားပေသည်။

အဲဒါအပြင်....

သူမက အနည်းငယ် စိတ်အေးအေးထားပြီးနောက် ချောင်းဟန့်ကာ အပြုံးတစ်ခုနှင့် ဆိုလိုက်သည်။

"ဟုတ်တယ်... အိတ်ဆောင်အရွယ် လှိုဏ်ဂူတွေထဲမှာ အကျဉ်းကျနေတဲ့ နတ်ဆိုးတွေ ရာချီရှိတယ်... အကြီးအကဲက သူတို့ကို စိတ်ပူတာ သာမန်ပါပဲ... အထဲမှာ ရှင့်မိသားစုက မျိုးဆက်သစ်တွေ ပါနေမလားတောင် မသိဘူး..."

ရှောင်ပိုင်က သူမအား မကြားချင်ယောင် ဆောင်နေ၍ သူမကို ပြန်မဖြေလိုက်ချေ။ သို့သော် ရှောင်ပိုင်က ဂိုဏ်းချုပ်ယန်မှာ စွေ့ချီချောင်းကို အိတ်ဆောင်အရွယ်လှိုဏ်ဂူများဆီသို့ ဝင်ကာ ၄င်းကို အတည်ပြုရန် သတိပေးမည်ကို မလိုလားချေ။ မည်သို့ပင်ဆိုစေ အမှန်တရားမှာ ယန်ချွန်းချိုး မှန်းဆထားသည်နှင့် ကွဲပြားနေပေသည်။ အတွင်းထဲရှိ နတ်ဆိုးများထဲတွင် ကြောင်နတ်ဆိုးလုံးဝ ရှိမည်မဟုတ်ပေ။

သူတို့က အဓိကခေါင်းစဉ်နှင့် အကြိမ်ကြိမ် လမ်းလွဲသွားပြီး အသေးအဖွဲကိစ္စများကို ပြောဆိုလိုက်သည်။ ဤသို့ဖြင့် နေ့တစ်ဝက်ခန့် ကုန်သွားလေသည်။ ဤမတိုးသာ မဆုတ်သာအခြေအနေကို မြင်ကာ စွေ့ချီချောင်းက အကြံပြုလိုက်သည်။

"လောလောဆယ် ကျွန်တော်တို့ ဆွေးနွေးတာ ရပ်လိုက်ရင် ပိုကောင်းမယ်... အကြီးအကဲက လူသားနယ်မြေထိတောင် လာခဲ့ရတာ... သူအခု နားသင့်နေပြီ..."

ကျန်သည့် ဂုဏ်သရေရှိလူကြီးများက နားစရာမလိုပေ။ သို့သော် ငြိမ်သက်ခြင်းအဆင့်ရှိ စွေ့ချီချောင်းက အနားယူရန်လိုပေသည်။

"ရှစ်တိ ပြောတဲ့အတိုင်း လုပ်ကြတာပေါ့..."

ဂိုဏ်းချုပ်ယန်က ရှေ့ပြေးတော်ယင်းကျန်း၏ သဘောထားကို မေးရန် အလွန်ပျင်းရိနေပေသည်။ သူမက ရှေ့ပြေးတော်ယင်းကျန်းကို စိတ်ဒုက္ခပေးရန် မတတ်နိုင်သည်ကို သိသော်လည်း ဤနတ်ဆိုးက အလွန် မုန်းစရာကောင်းသည်ဟု ခံစားရပေသည်။

လူသားကျင့်ကြံသူများသည်လည်း ဆွေးနွေးရန်အချိန်အနည်းငယ် လိုအပ်ခြင်းကြောင့် ဖြစ်သည်။

ရှောင်ပိုင်က သဘောမတူဘဲ မနေချေ။ သူက လွင့်မျောဥယျာဉ်ဆီသို့ သွားနိုင်သည်ဟု ပြောလိုသော်လည်း စွေ့ချီချောင်းက သူ့ကို ကြားဖြတ်လိုက်သည်။ LJJက သူ့ကို တစ်ကြိမ် ဖမ်းမိပြီးနောက် သူက ပိုပို၍ ထောင်လွှားလာပေသည်။

သူတို့က ရွှေရောင်ခန်းမထဲမှ ထွက်လာသည်နှင့် ဖေးကွမ်းသည်လည်း အပြင်ဘက်တွင်ရပ်ကာ လည်ဆန့်ပြီး လှည့်ကြည့်နေသည်ကို တွေ့လိုက်သည်။ သူတို့ထွက်လာသည်ကို သူမြင်သောအခါ လက်များကိုဘေးချကာ ထရပ်လိုက်သည်။

စွေ့ချီချောင်းမှာ ဂိုဏ်းက ထွက်ခွာသင့်သည်မှာ ကြာပြီဖြစ်၏။ ဖေးကွမ်းမှာ စွေ့ချီချောင်းကို စောင့်ရှောက်ရန် အမိန့်ပေးခံထားရသော်လည်း စွေ့ချီချောင်းကို ဂိုဏ်းအပြင်တွင် မတွေ့မိချေ။ သို့ဖြစ်၍ သူက သဲလွန်စများနောက်သို့လိုက်ကာ စွေ့ချီချောင်းကို ဤနေရာတွင် တွေ့လိုက်ပေသည်။ မြူနှင်းဝေလငါးလေးသည်လည်း အပြင်ဘက်တွင် စောင့်နေပေသည်။ သူတို့၂ယောက်စလုံးက နေ့တစ်ဝက်ခန့် စောင့်နေရပေသည်။

ဂိုဏ်းချုပ်ယန်က သူ့တပည့် ဤနေရာသို့ လာသည်က မှန်သည်ဟု ခံစားရပြီး ဆိုလိုက်သည်။

"ဖေးကွမ်း... ဒီနတ်ဆိုးအကြီးအကဲကို မြင့်မားတောင်ထိပ်ကို ခေါ်သွားလိုက်... သူ အဲ့မှာ နေလိမ့်မယ်..."

ဖေးကွမ်းက သူ့ကိုယ်ပေါ်တွင် ချွေးများ တတောက်တောက် ကျလာသည်ဟု ခံစားရသော်လည်း သူ့မျက်နှာက သူ့ခံစားချက်များကို ထုတ်မပြချေ။

"ကြွပါ... အကြီးအကဲ..."

သူက တစ်ကိုယ်တည်းတွေးလိုက်သည်။

"ရှေ့ပြေးတော်ယင်းကျန်းက ဂိုဏ်းနဲ့ မရင်းနှီးလို့ မြင့်မားတောင်ထိပ်က ဘယ်လိုနေရာလဲဆိုတာ မသိတာ ကံကောင်းတာဘဲ..."

မြင့်မားတောင်ထိပ်မှာ လက်တိုလက်တောင် အလုပ်သမားများ အားလုံးနေထိုင်ကာ အလုပ်လုပ်သော နေရာဖြစ်သည်။ ဥပမာဆိုရသော် စကျင်ကျောက် ပုလဲစေ့ ဖာထေးရေး အဆောက်အအုံနှင့် လိုတရ မြေကွက်များသည်လည်း မြင့်မားတောင်ထိပ်ပေါ်တွင် ရှိကြသည်။ ဂိုဏ်းချုပ်ယန်က ဤနတ်ဆိုးကို အလွန်အမြင်မကြည်ဟု ခံစားရ၍ မြင့်မားတောင်ထပ်သို့ ပို့လိုက်လေသည်။ လက်တိုလက်တောင်း အလုပ်သမားများသည်လည်း ရွှေ့ပြောင်းသွားပြီဖြစ်ရာ ခြံဝန်းက ဗလာကျင်းနေသည့်အချိန်တွင် သူတို့က အချိန်ကိုက်ရောက်လာခဲ့ပေသည်။

🌳🌳🌳

Prev Next