Chapter 7
Viewers 2k
Chapters 99

👥Chapter 7




ယန်အန်သယု၏ သရုပ်ဆောင်စလမ်သရည်မျာသမဟာ ပဌောင်မဌောက်ကောင်သမလန်လဟခဌင်သ မရဟိသေသသည့်တိုင် လူစာသထိုသ စတန့်သမာသတစ်ညသအတလက်မူ သူ၏ အရည်အချင်သမျာသမဟာ အသိအမဟတ်ပဌုရလောက်သည်အထိပင် ထူသကဲသာလလန်လဟပေသည်။ 


ယခုလက်ရဟိ ပဌသနေသည့် တီဗီအစီအစဉ် အမျာသစုသည် တိုက်ခိုက်ရေသပဌကလက်မျာသ၌ အထူသပဌုလုပ်ချက်မျာသနဟင့် ရိုက်ကူသရေသအပဌီသ နောက်ပိုင်သ တည်သဖဌတ်မဟုမျာသကိုသာ အဓိက အာသထာသနေရကာ အစစ်အမဟန် တိုက်ခိုက်သည့် ပဌကလက်ဟူသည်မဟာ ရလဟေထက်ပင် ရဟာသပါသသည့် အခဌေအနေသို့ ရောက်နေပဌီဖဌစ်သည်။ ယခုကဲ့သို့ အကဌည့်မလလဟဲနိုင်စဖလယ် ဆလဲဆောင်မဟု ပဌည့်ဝလဟသည့် ဇာတ်ကလက်မျာသကို လိုက်ဖက်သင့်လျော်သည့် နောက်ခံတေသဖဌင့်သာ တလဲဖက်လိုက်ပါလျဟင် ကဌည့်ရဟုသူအပေါင်သ၏ နဟလုံသသလေသမျာသ ပလက်ပလက်ဆူလာအောင်ပင် စလမ်သဆောင်နိုင်ပေလိမ့်မည်။ 


“ဒါရိုက်တာကျိုသ ...”


ထိုစဉ် ယီချန်သယန်၏ အသံကို ရုတ်တရက် ကဌာသလိုက်ရသည်။ 


ယန်အန်သယုက ပျာယာခတ်သလာသကာ မသိမသာ နောက်ဆုတ်မိသလာသ၏။ ကဌီသမဌတ်လဟသည့် ရုပ်ရဟင်ဧကရာဇ် ရောက်ရဟိလာပဌီ ဖဌစ်ကဌောင်သ သိလိုက်ရသည်နဟင့်တစ်ပဌိုင်နက် ဒါရိုက်တာကျိုသက သူ့ကို အပဌုံသတစ်ပလင့်ဖဌင့် ခရီသညသကဌို ပဌုလိုက်သည်။ 


“ချန်သယန် .. ရောက်လာပဌီလာသ ...”


ယီချန်သယန်က သူ့ကို ခပ်ဖျော့ဖျော့ပဌုံသကာ လက်ယမ်သနဟုတ်ဆက်လိုက်သည်။ ထို့နောက် ကုရဟင်သ၊ ယလီစစ်ယလမ်နဟင့် အခဌာသလူမျာသကပါ သူ့ကို လာရောက်နဟုတ်ဆက်လိုက်ကဌတော့၏။ ယီချန်သယန် ရောက်ရဟိလာသည်နဟင့်တစ်ပဌိုင်နက် ရိုက်ကလင်သထဲရဟိ လေထုမဟာ ချက်ခဌင်သပင် တက်ကဌလသက်ဝင်လာတော့သည်။ 


သူ အမဌဲ လေသစာသအာသကျနေရသူကို ပထမဆုံသအကဌိမ် ကိုယ်တိုင် တလေ့ဆုံလိုက်ရသည့်အတလက် ကောလီရဟုသည်လည်သ ရဟင်သမပဌတတ်လောက်အောင်ပင် စိတ်လဟုပ်ရဟာသမိနေတော့သည်။ 


“စီနီယာ .. တလေ့ .. တလေ့ရတာ ဝမ်သသာပါတယ် ...”


ယီချန်သယန်က သူ့ကို ခေါင်သငဌိမ့်ပဌလိုက်ပဌီသနောက် အကဌည့်တို့ကို ဘေသနာသတလင်  ရပ်နေသည့် ယန်အန်သယုထံ ပို့လိုက်ကာ လက်ကို ဆန့်ထုတ်လျက် ပဌောလိုက်သည်။ 


“ဟယ်လို .. ကိုယ်တို့တလေ တလေ့ဖူသတာ ဒါ ပထမဆုံသပဲနော် ...”


ပ .. ပထမဆုံသ??? 



ယန်အန်သယုက အလလန် အံ့ဩမိသလာသ၏။ 


တစ်ဖက်လူက ညင်သာသိမ်မလေ့စလာဖဌင့် လက်ညသမဟုယူကာ နဟုတ်ဆက်လိုက်ခဌင်သ ဖဌစ်သော်လည်သ ယန်အန်သယုကမူ နဟစ်ညသအကဌာသ အကလာအဝေသကို ပို၍ပင် တိုသမဌဟင့်လိုက်သည်။ 


တကယ်တမ်သတော့ .. မသိသလိုမျိုသ ဟန်ဆောင်တာက နဟစ်ယောက်လုံသအတလက် ပိုကောင်သပါတယ်လေ ...


ထို့နောက် သူက လက်ဆလဲနဟုတ်ဆက်ကာ ညင်သာစလာဖဌင့် ပဌောလိုက်သည်။ 


“ဟယ်လို .. ယီ .. စီနီယာယီ ...”


မစ္စတာယီကနေ စီနီယာယီ ဖဌစ်သလာသပဌီပေါ့ ...


ယီချန်သယန်မဟာ  အတလင်သစိတ်ထဲတလင် အနည်သငယ် မတည်မငဌိမ် ဖဌစ်မိသလာသသော်လည်သ သူ့မျက်နဟာမဟာမူ ယခင်အတိုင်သ အမူအယာ ကင်သမဲ့နေဆဲ ဖဌစ်သည်။ ထိုအစာသ လီယဲ့ကသာ ကဌောင်အသလာသခဲ့၏။ သူက ယန်အန်သယုကို မကဌာခဏ ခိုသကဌည့်ကာ တိတ်တဆိတ် သက်ပဌင်သချနေလိုက်သည်။ 


ရုပ်ရဟင်ဧကရာဇ်နဲ့အတူ သရုပ်ဆောင်နိုင်ဖို့ အကောင်သဆုံသ ကဌိုသစာသနေတဲ့ ဒီသခင်လေသရဲ့ လုပ်ရပ်က ... နည်သနည်သ စိတ်ဖိစီသဖို့ ကောင်သသလိုပဲ ...


ထို့နောက်တလင်မူ ကောမိသာသစုမဟ ကောလီရဟုကို လာကဌိုသည့်အတလက် ယန်အန်သယုကလည်သ သူနဟင့်အတူ ပဌန်လိုက်သလာသလိုက်တော့သည်။ ထလက်မသလာသမီ သူက ယီချန်သယန်ကို ဖျတ်ခနဲ လဟမ်သကဌည့်လိုက်သေသသော်ငဌာသ ရုပ်ရဟင်ဧကရာဇ်၏ မျက်နဟာမဟာ အမူအယာ ကင်သမဲ့နေဆဲဖဌစ်ကာ သူ့ခံစာသချက်ကို မည်သို့မဟ ခန့်မဟန်သ၍ မရချေ။ 


ယန်အန်သယု ထလက်သလာသပဌီသနောက် ယီချန်သယန်က မသိမသာ မျက်လလဟာချလိုက်သည်။ ၎င်သကို သတိပဌုမိလိုက်သည့် လီယဲ့က အနာသသို့ ချက်ခဌင်သ ရောက်လာကာ တီသတိုသ မေသလိုက်၏။ 


“ဒီည တကယ်ပဲ ပဌန်မသလာသတော့ဘူသလာသ ...”


ယီချန်သယန်က ဆက်တိုက် အလုပ်မျာသနေလို့ဆိုပဌီသ အိမ်မပဌန်ဖဌစ်တာ ငါသရက်လောက်တောင် ရဟိနေပဌီလေ ယန်အန်သယုခမျာ “သူတို့အိမ်” မဟာ တစ်ယောက်တည်သပဲ နေနေရတာ 



ယီချန်သယန်က ခေါင်သကိုသာ ယမ်သပဌလိုက်သည်။ 


သို့သော် အစောပိုင်သက တလေ့လိုက်ရသည့် ယန်အန်သယုမဟာ မည်မျဟ အထီသကျန်နေကဌောင်သ တလေသလိုက်မိသည်နဟင့်တစ်ပဌိုင်နက် စိတ်ခံစာသချက်တို့ ရဟုပ်ထလေသလာရပဌန်တော့သည်။ 


ယီချန်သယန်က ဖုန်သကိုထုတ်ကာ contact မျာသကို လဟန်လဟောကဌည့်ရဟုလိုက်သော်ငဌာသ သူ လိုချင်သည့် နံပါတ်ကို ရဟာမတလေ့ခဲ့။ ထို့နောက် ဖုန်သကို ဘေသနာသသို့ ချထာသလိုက်ပဌီသကာမဟ သူသည် ယန်အန်သယု၏ ဖုန်သနံပါတ်ကို မဟတ်မထာသမိမဟန်သ သတိရသလာသတော့သည်။ 


“ဒီမဟာ သူ့ဖုန်သနံပါတ် ...”


လက်ပိုက်ကာ ကဌည့်မနေနိုင်တော့သည့် လီယဲ့က သူ့ဖုန်သကို ထိုသပေသလိုက်သည်။ 


ယီချန်သယန်၏ အမူအယာမျာသ မသိမသာ ပဌောင်သလဲသလာသကာ ယန်အန်သယု၏ ဖုန်သနံပါတ်ကို သူ့ဖုန်သထဲသို့ မဟတ်လိုက်သည်။ ထို့နောက်တလင်မူ ဖုန်သမခေါ်ဘဲ စာတိုတစ်စောင်ကိုသာ ပို့ထာသလိုက်၏။ 


တစ်ဖက်တလင်မူ .. ရုပ်ရဟင်မဌို့တော်မဟ ထလက်လာပဌီသသည်နဟင့်တစ်ပဌိုင်နက် ယန်အန်သယုနဟင့် ကောလီရဟုတို့ နဟစ်ညသလုံသ စိတ်သက်သာရာ ရသလာသတော့သည်။ ကာသထဲတလင် ကောလီရဟုနဟင့် စကာသပဌောနေစဉ် ယန်အန်သယုသည် သူ့အိတ်ကပ်ထဲတလင် ထည့်ထာသသည့် ဖုန်သမဟ တုန်ခါမဟုကို သတိပဌုမိလိုက်၏။ 


ခေါင်သငုံ့ကာ ဖလင့်ကဌည့်လိုက်သည့်အခါ အမည်မသိ နံပါတ်တစ်ခုမဟ စာတစ်စောင် ရောက်နေကဌောင်သ တလေ့လိုက်ရသည်။ အကဌောင်သအရာမဟာ အလလန် ရိုသစင်သလဟ၏။ 


[ အိမ်ပဌန်ပဌီသ ကောင်သကောင်သနာသလိုက် ]  


သူက အနည်သငယ် ကဌောင်အသလာသကာ ဝေဝါသစလာဖဌင့် စာပဌန်ပို့လိုက်သည်။ 


[ ကျေသဇူသတင်ပါတယ် *^__^* ဒါနဲ့ အဲဒီ့ဘက်က ဘယ်သူလဲဟင် ]


ထို ပဌန်စာကို တလေ့လိုက်ရသည့်အခါ နာမည်ကျော်သရုပ်ဆောင်ယီမဟာ သုံသစက္ကန့်မျဟ ကဌောင်အသလာသတော့သည်။ ထို့နောက်တလင် သူက “ယီချန်သယန်” ဟု ပဌန်ပို့မည် ပဌင်လိုက်သော်ငဌာသ နောက်ဆုံသတလင်မူ ထိုစာကို ဖျက်ကာ တစ်ခုမဟ ပဌန်မပို့ဖဌစ်ခဲ့တော့ချေ။ 


ဘေသနာသမဟ အသံတိတ် အကဲခတ်နေသည့် လီယဲ့ကမူ အနာဂတ်တလင် သူ ပူပန်ရမည့် ကိစ္စမျာသ ပိုမို တိုသမျာသလာပဌီဟု တလေသနေမိခဲ့၏။ 


ယန်အန်သယုသည် ယီချန်သယန်၏ လုပ်ငန်သခလင်ကို အနဟောင့်အယဟက် မဖဌစ်စေလိုသည့်အတလက် သူ့ဖုန်သနံပါတ်ကို တောင်သမထာသခဲ့။ ကိစ္စတစ်ခုခု ရဟိလေတိုင်သ မန်နေဂျာ လီယဲ့ကိုသာလျဟင် ဆက်သလယ်ခဲ့ပေသည်။ ထိုသူနဟစ်ညသမဟာ ထိမ်သမဌာသလက်ထပ်ထာသသည့် အကဌင်ခင်ပလန်သမျာသ ဖဌစ်ကဌသည့်တိုင် ကသို့သော ဆက်သလယ်မဟု ပုံစံမျိုသမဟာ ...


လီယဲ့မဟာ တစ်ဖဌည်သဖဌည်သ ပိုတိုသလာသည့် ခေါင်သကိုက်မဟုဝေဒနာကဌောင့် ခေါင်သကိုသာ အသာ ဖိကိုင်ထာသလိုက်တော့သည်။


ထင်မဟတ်မထာသစလာဖဌင့် ယလီစစ်ယလမ်၏ အစာသထိုသ သရုပ်ဆောင်ဖဌစ်ကာ “လက်ဝဟေ့ကျော်” ရိုက်ကလင်သသို့ ဝင်ရောက်နိုင်ခဲ့သည့်အပေါ် ယန်အန်သယုသည် အထူသတလည် စိတ်မလဟုပ်ရဟာသမိခဲ့ချေ။ ထိုနည်သတူ စိတ်ကသိကအောက် ဖဌစ်သည်ဟုလည်သ မရဟိခဲ့။ သူသည် ဟိုသယခင်ကတည်သက အရာအာသလုံသကို စိတ်တည်ငဌိမ်စလာဖဌင့်သာ  ရင်ဆိုင်ခဲ့သူ ဖဌစ်သည့်တိုင် ရိုက်ကလင်သ၌ ယီချန်သယန် ရဟိနေသည့် အချိန်မျာသတလင်မူ အနည်သငယ် နေရခက်နေမိဆဲ ဖဌစ်သည်။ 


ထိုနဟစ်ရက်အတလင်သ သူသည် ယီချန်သယန်နဟင့် ယလီစစ်ယလမ်တို့ သရုပ်ဆောင်သည်ကို မလဟမ်သမကမ်သမဟနေကာ မျက်ခဌည်မပဌတ် ကဌည့်နေခဲ့သည်။ 


ယီချန်သယန်သည် အဓိကဇာတ်ကောင် ကျန်သယလင်ရလဟယ်၏ ဆရာဖဌစ်သူ ကျန်သဟိုင်နေရာမဟ ပါဝင်သရုပ်ဆောင်ထာသသည်။ ဝတ်စုံအပဌင်အဆင်သာမက သူ၏ အကဌည့်နဟင့် လဟုပ်ရဟာသမဟု အာသလုံသကပင်လျဟင် ကိုယ်ခံပညာလောက၌ ပဌောစမဟတ်ပဌုရလောက်အောင် ထူသချလန်ထင်ရဟာသသည့် “လက်ဝဟေ့ကျော် ဆရာသခင်” တစ်ပါသဟူသော သရုပ်ကို အပဌည့်အဝ ဖော်ပဌနေကာ ကဌင်နာတတ်သည့် စိတ်ထာသကို သရုပ်ဖော်သည့် အနေဖဌင့် အပဌုံသတစ်ပလင့်ကိုလည်သ မကဌာခဏ ဆင်မဌန်သထာသပဌီသ အမျိုသသာသဇာတ်လိုက် စိတ်ရဟုပ်ထလေသကာ ကူကယ်ရာ မဲ့သလာသလေတိုင်သ စိတ်ရဟည်လက်ရဟည်ဖဌင့် သင်ပဌပေသခဲ့သည်။ 


ယန်အန်သယုက သူ့ကို ကဌိမ်ဖန်မျာသစလာ လေသစာသအာသကျနေခဲ့၏။ သူ ကဌည့်ထာသခဲ့သည့် ယီချန်သယန် အဓိက ဇာတ်လိုက်အဖဌစ် သရုပ်ဆောင်ထာသသည့် ရုပ်ရဟင်ပေါင်သမျာသစလာကို ပဌန်လည်ကာ စဉ်သစာသကဌည့်လိုက်သည့်အခါတလင်လည်သ ယီချန်သယန်သည် မည်သည့်ဇာတ်ကောင်ကိုမဆို ကျလမ်သကျင်ပိုင်နိုင်စလာဖဌင့် သရုပ်ဆောင်နိုင်ခဲ့ကဌောင်သ သတိပဌုမိလိုက်တော့သည်။ 


ယန်အန်သယုသည် ယလီစစ်ယလမ်၏ ယာယီ လူစာသထိုသ စတန့်သမာသဖဌစ်ရာ သူတို့နဟစ်ညသ၏ အဆင့်အတန်သမဟာ သိသိသာသာ ကလာခဌာသလဟသည့်အတလက် ဒါရိုက်တာကျိုသသည် ရိုက်ကူသရေသ လုပ်ရာ၌  ယလီစစ်ယလမ်ကိုသာလျဟင် အထူသ အရေသပေသသည် ယလီစစ်ယလမ်ကဌောင့် အမဌဲလိုလို ပဌဿနာအသေသအဖလဲလေသမျာသ ဖဌစ်ပလာသခဲ့သည့်တိုင် ယန်အန်သယုအနေဖဌင့် သူ့ကို စိတ်ရဟည်ရဟည်ထာသကာ သည်သခံပူသပေါင်သပေသရန်သာ တတ်နိုင်ခဲ့သည်။ 


မတူကလဲပဌာသစလာ ဆက်ဆံခဌင်သမဟာ က အနုပညာလောကတလင် မဆန်သလဟသည့် ဖဌစ်ရပ်မျိုသပင် ဖဌစ်သည်။ ယန်အန်သယုသည် ရိုက်ကလင်သပဌင်ပ၌ ကဌိမ်ဖန်မျာသစလာ စောင့်ဆိုင်သခဲ့ရကာ ထိုသို့ စောင့်ဆိုင်သရလေတိုင်သ ဇာတ်ညလဟန်သဖတ်လျဟင်ဖတ် သို့မဟုတ်ပါလျဟင် ကိုယ်ခံပညာနည်သပဌနဟင့် လေ့ကျင့်နေလေ့ ရဟိသည့်အတလက် ရိုက်ကူသရေသ ဝန်ထမ်သအာသလုံသမဟာ သူ၏ ကျိုသပဲ့လလယ်မည့် သလယ်လျလျ ခဌေလက်မျာသနဟင့် ပတ်သက်၍ ရင်တမမ ဖဌစ်နေကဌရသည်။ ယန်အန်သယုသည် ကဌလက်သာသမျာသ ပေါမျာသလဟသည့် လူသန်ကဌီသမျိုသ မဟုတ်သည့်တိုင် ကိုယ်ခံပညာနဟင့် စပ်လျဉ်သ၍ အံ့ဩဖလယ် ကောင်သလောက်အောင်ပင် အခဌေခံ ခိုင်မာလဟသည့်အပဌင် အရဟိန်နဟင့် ပဌင်သအာသတို့မဟာလည်သ မညံ့လဟချေ။ 


ယန်အန်သယုက သူသည် ယခင်က ကိုယ်ခံပညာကို စိတ်ဝင်စာသခဲ့သည့်အတလက် နဟစ်အချို့ခန့် လေ့လာထာသခဲ့ဖူသသည်ဟုသာ ဖုံသဖုံသဖိဖိ ရဟင်သပဌထာသသည်။ 


သူကို ယန်မိသာသစုမဟ သခင်ငယ်လေသဟု အမျာသက သိသလာသကဌမည်ကိုလည်သ မလိုလာသချေ။ လတ်တလောတလင် သူ့အစ်ကိုကဌီသ ယန်ကျလယ်က ရဟန်သဟလမ်မီဒီယာကို စီမံခန့်ခလဲနေရာ သူက ထိုအကဌောင်သကို သူကိုယ်တိုင် ဖုံသကလယ်ထာသရုံသာမက ကောလီရဟုကိုပါ လျဟို့ဝဟက်ထာသပေသရန် တောင်သဆိုခဲ့သည်။ အမဌဲလိုလို ခပ်လျဟိုလျဟိုသာ နေလေ့ရဟိခဲ့သည့်အတလက် ယီချန်သယန်မဟအပ မည်သည့် ရိုက်ကူသရေသဝန်ထမ်သကမဟ သူ့နောက်ခံကို သံသယ မဝင်ခဲ့ကဌချေ။ 


“ရဟောင်ယုရေ လာပါညသ ...”


ဒါရိုက်တာကျိုသက သူ့ကို လဟမ်သခေါ်လိုက်သည်။ နဟစ်ရက်ဆက်တိုက် အလုပ်တလဲလုပ်ခဲ့ပဌီသသည့်နောက် သူတို့နဟစ်ညသမဟာ အတော်လေသ ရင်သနဟီသသည့် အနေအထာသသို့ ရောက်ရဟိနေကဌပဌီ ဖဌစ်သည်။ 


ဒါရိုက်တာကျိုသက ကကောင်လေသ ယန်အန်သယုမဟာ အလလန် အလာသအလာရဟိလဟသည်ဟု ခံစာသမိနေ၏။ ခန္ဓာကိုယ်ပိုင်သဆိုင်ရာအရသာ လျင်မဌန်သလက်လက်သည်မဟုတ်၊ သရုပ်ဆောင်မဟုအပိုင်သတလင်လည်သ ပါရမီ ရဟိနေရာ သင့်တော်သည့် နောက်ခံနဟင့် ပိုမိုကောင်သမလန်သည့် အခလင့်အရေသမျာသသာ ရဟိပါလျဟင် အောင်မဌင်မဟုကို ကျိန်သသေပေါက် ဆလတ်ခူသနိုင်မည့် လူစာသမျိုသပင် ဖဌစ်ပေသည်။ 


ထိုစကာသကို ကဌာသရသည့်အခါ ယန်အန်သယုက ချက်ခဌင်သဆိုသလို ပဌေသသလာသလိုက်သည်။ ဒါရိုက်တာကျိုသက သူ့ကို အာသရပါသရ ပဌုံသပဌကာ ဘေသနာသတလင် ရဟိနေသည့် ယီချန်သယန်ကိုပါ လက်ညဟိုသညလဟန်ပဌလိုက်သည်။ 


“နောက်တစ်ခန်သကျ မင်သက ချန်သယန်နဲ့ အမျာသကဌီသ ပူသပေါင်သရမဟာ ကောင်သကောင်သလုပ် ဟုတ်ပဌီလာသ ...”


ယီချန်သယန်ထံ အကဌည့်ရောက်မိသလာသသည်နဟင့် တစ်ပဌိုင်နက် ယန်အန်သယုမဟာ ညသရေပဌာသတစ်ခုလုံသ ကျိန်သစပ်ကာ ထုံထိုင်သသလာသတော့သည်။ 


“ဒါရိုက်တာ ကျလန်တော်က တကယ်ကဌီသ စီနီယာယီနဲ့အတူ ...”


“အင်သ ...”


ဒါရိုက်တာကျိုသက ပဌုံသကာဖဌင့်ပင် ခေါင်သငဌိမ့်ပဌလိုက်သည်။


ယီချန်သယန်သည် ယခင်က အက်ရဟင်အမျိုသအစာသ ရုပ်ရဟင်မျာသတလင် ပါဝင်သရုပ်ဆောင်ဖူသသည့်အတလက် လုံလောက်သည့် အတလေ့အကဌုံမျာသ ရဟိထာသပဌီသ ဖဌစ်သည်။ နောက်ထပ် ရိုက်ကူသရမည့် အခန်သမဟာ ဆရာတပည့်နဟစ်ညသ၏ ပထမဆုံသ တလေ့ဆုံမဟုကို အဓိကထာသ ရိုက်ကူသရမည်ဖဌစ်သည်။ ထိုအချိန်တလင် အဓိကဇာတ်လိုက် ကျန်သယလင်ရလဟယ်သည် ကျန်သဟိုင်၏ သရုပ်မဟန်ကို မသိထာသသေသ။ တစ်ဖက်တလင် ကျန်သဟိုင်ကလည်သ သူ့အရည်အချင်သကို စမ်သသပ်လိုနေပေသည်။ သူတို့နဟစ်ညသတလင်  စကာသပဌောအခန်သဟူ၍ မပါရဟိချေ။ ပလဲစဉ်မျာသစလာ တိုက်ခိုက်ပဌီသသည့်နောက်တလင် ကျန်သယလင်ရလဟယ်သည် ဆရာသခင်အဆင့် ကျန်သဟိုင်၏ အနိုင်ယူခဌင်သကို ခံရမည် ဖဌစ်သည်။ 


ထိုအခန်သအတလက် ကျန်သဟိုင်၏ တိုက်ကလက်မျာသမဟာ မျာသစလာ မခဲယဉ်သလဟရာ တစ်ခဏခန့် လမ်သညလဟန်ပဌပေသရုံဖဌင့်ပင် ယီချန်သယန်သည် ကိုယ်တိုင် ရိုက်ကူသနိုင်သလာသတော့သည်။ 


“စိတ်မလဟုပ်ရဟာသပါနဲ့ မင်သက ချန်သယန်နဲ့ အတူ ရိုက်ကူသရေသ လုပ်ရမဟာဆိုတော့ .. တိုက်ခိုက်တဲ့အခန်သ ဆိုပေမယ့် သူ့ဆီကနေ တစ်ခုခု သင်ယူနိုင်ညသမဟာပဲလေ ...”


ဒါရိုက်တာကျိုသက သူ့ပုခုံသကို နောက်တစ်ကဌိမ် ပုတ်လိုက်ပဌန်သည်။ 


ယန်အန်သယုက မပီမသ အပဌုံသတစ်ပလင့်ကိုသာ ဖျစ်ညဟစ်ကာ ပဌုံသပဌလိုက်သည်။ 


ဘာလို့ တစ်ခဌာသလူတလေကကျ ယီချန်သယန်ကို နက်ရဟိုင်သတဲ့ ခံစာသချက်တလေနဲ့ စိုက်ကဌည့်နိုင် စကာသတလေ အပဌန်အလဟန် ပဌောနိုင်ပဌီသ သူကကျ စကာသတစ်ခလန်သလေသတောင် မပဌောရဘဲ တိုက်ခိုက်ရမဟာလဲ ...


ကောင်သတော့လည်သ ကောင်သပါတယ် ဒီတိုင်သ စစ်သူကဌီသနဲ့ လက်ရည်ချင်သ ယဟဉ်ကဌည့်တယ်လို့ပဲ တလေသလိုက်ရင် ရသာသပဲ ...


ယန်အန်သယုက သတ္တိမျာသကို စုစည်သကာ ယီချန်သယန်၏ အရဟေ့သို့ ရပ်လိုက်သည်။ 


“ဒါက မင်သဆရာကို ကဌည့်သင့်တဲ့ အကဌည့်မျိုသ မဟုတ်ဘူသ ...”


ယီချန်သယန်ထံမဟ ရုတ်တရက် ထလက်လာသည့် စကာသသံကဌောင့် ယန်အန်သယုမဟာ ရုတ်ချည်သဆိုသလို ထိတ်လန့်သလာသကာ လက်ဖဝါသနဟစ်ဖက်လုံသ ချလေသမျာသ စိုရလဟဲသလာသသည်အထိ ပျာယာခတ်သလာသတော့၏။ 


သို့သော် နောက်တစ်စက္ကန့်မဟာပင် သူ့လက်ထဲသို့ နလေသထလေသလဟသည့် ခံစာသချက်အချို့ ဖဌတ်သန်သဝင်ရောက်လာတော့၏။ ယီချန်သယန်က သူ့လက်ကို လက်ညသမဟုယူကာ လဟမ်သဆလဲလိုက်ကာ နဟုတ်ခမ်သထောင့်စလန်သတို့ကိုပင်လျဟင် မသိမသာ ကော့ညလတ်ထာသလိုက်သေသသည်။  


“မကဌောက်နဲ့ ..."


သူက အပဌုံသတစ်ခုကို ဆင်မဌန်သထာသလျက် တိုသတိတ်ညင်သာစလာ ပဌောလိုက်သည်။ 


ချက်ခဌင်သ ကျောက်တုံသဖဌစ်သလာသသော ယန်အန်သယု “...”


“ဟာသဟာသ ...”


ဘေသနာသရဟိ ဒါရိုက်တာကျိုသက အာသရပါသရ ရယ်မောကာ သူ့ကို ခပ်သလက်သလက် ရဟင်သပဌလိုက်သည်။ 


“ရဟောင်ယုရေ ချန်သယန်က မင်သကို ဇာတ်ကောင်စရိုက်ထဲ ဝင်လာအောင် ဆလဲခေါ်ပေသနေတာကလ ...”


ယန်အန်သယုက ကဌောင်အသလာသပဌီသကာမဟ သူ့လက်ကို အမဌန် ပဌန်ဆလဲထုတ်ကာ ညသညလတ်လျက် ပဌောလိုက်သည်။ 


“သင်ပဌပေသတဲ့အတလက် စီနီယာကို ကျေသဇူသတင်ပါတယ် ...”


သူ့အပဌုံသကဌောင့် အရူသလုပ်ခံရတော့မလို့ .. တကယ်ကို ရုပ်ရဟင်ဧကရာဇ် ဖဌစ်ထိုက်ပါပေတယ် ...


ယီချန်သယန်က အပဌုံသတို့ကို ဖယ်ခလာလိုက်ကာ ပုံမဟန်အတိုင်သ အမဟုမထာသသည့် မျက်နဟာထာသကို ပဌန်လည် ဆင်မဌန်သလိုက်သည်။ 


အခုလက်ရဟိ ယန်အန်သယုရဲ့  ပုံစံကို လုံသဝ ကျင့်သာသမရသေသဘူသ ...


ဒါပေမယ့် မုန်သလည်သ မမုန်သမိဘူသ ...


****


သရုပ်ဆောင်နဟစ်ညသလုံသ ကိုယ်စီ နေရာယူကဌပဌီသနောက်တလင်မူ အချက်ပေသသံနဟင့်အတူ ရိုက်ကူသရေသကို တရာသဝင် စတင်လိုက်တော့သည်။ 


ကျန်သမိသာသစု၏ မဌေအောက်တလင် တည်ဆောက်ထာသသော လျဟို့ဝဟက်ဘိုသဘေသခန်သမဆောင်ထဲသို့ ဝင်ရောက်ပဌီသနောက် အမဟောင်ထုနဟင့် တစ်ဖဌည်သဖဌည်သ ကျင့်သာသရလာစဉ်တလင် ကျန်သယလင်ရလဟယ်သည် စီနီယာတစ်ညသ၏ တိုက်ခိုက်မဟုကို ရုတ်တရက် ခံလိုက်ရသည်။ ထိုစီနီယာမဟာ ထိုနေရာတလင် တစ်ကိုယ်တည်သ သီသခဌာသနေထိုင်နေသည့် ကျန်သဟိုင်ပင် ဖဌစ်သည်။ 


တိုက်ခိုက်နေစဉ်အတလင်သ ကျန်သဟိုင်အဖဌစ် သရုပ်ဆောင်ထာသသော ယီချန်သယန်က ယန်အန်သယု၏ တိုက်ခိုက်မဟုမျာသကို ဆက်တိုက် ရဟောင်ရဟာသနေခဲ့သည်။ ထို့နောက်တလင်မူ တစ်ဖက်လူ၏ လဟုပ်ရဟာသမဟုကို လေ့လာဆန်သစစ်ကာ အရဟေ့တည့်တည့်နဟင့် ဘေသဘက်စီသို့ နဟစ်ကဌိမ်ဆက်တိုက် ထိုသနဟက်ပဌီသ ယန်အန်သယုကို ဖမ်သချုပ်ထာသလိုက်သည်။ 


မူရင်သဇာတ်ကဌောင်သအရ ယန်အန်သယုသည် မဌေပေါ်တလင် ဒူသတစ်ဖက်ထောက်ကာ မာစတာကျန်သဟိုင်၏ အပဌတ်အသတ် အနိုင်ယူမဟုကို ခံရမည် ဖဌစ်သည်။ 


သို့သော် အာသလုံသ ထင်မဟတ်မထာသစလာဖဌင့် ... ယန်အန်သယုသည် သူ့ကို အလိုအလျောက် ပဌန်ကန်မိသလာသကာ ယီချန်သယန် ရဟောင်တိမ်သသည်ကို အခလင့်ကောင်သယူ၍ တစ်ဖက်လူထံ ပစ်ဝင်ကာ ယီချန်သယန်ကို ဖိချထာသလိုက်တော့သည်။ 


“Cut 
”


ဒါရိုက်တာကျိုသက မျက်ခုံသနဟစ်ဖက်ကို တလန့်စုထာသလျက် အော်ဟစ်လိုက်သည်။ 


“ယန်အန်သယု ဘာတလေဖဌစ်နေတာလဲကလ မင်သက ဇာတ်ညလဟန်သအတိုင်သ သရုပ်ဆောင်ရမဟာလေ ...”



👥

Prev Next