Chapter 26

👥️Chapter 26

"ချန်းယန်ရေ မင်းရဲ့ သရုပ်ဆောင်ချက်တွေကတော့ တကယ်ကို အမိုက်စားပဲ ..." 

စကားတစ်ခွန်းမှ မပြောရသေးသည့် အဓိကဇာတ်လိုက် ယွမ်ကျစ်မင်၏ ‌ဇာတ်ကောင်ကို သရုပ်ဆောင်ရခြင်းမှာ အနည်းငယ် အခက်တွေ့ဖွယ်ရာပင်။ သို့သော် ယီချန်းယန်ကမူ လှုပ်ရှားမှုတစ်ခု၊ အကြည့်တစ်ချက်တည်းဖြင့်ပင်လျှင် ထိုဇာတ်ကောင်၏ အတွင်းစိတ်ထဲရှိ ဒွိဟလွန်ဆွဲမှုအားလုံးကို မျက်ဝါးထင်ထင်ဖြစ်လာအောင် ပြတ်ပြတ်သားသား ဖော်ပြသွားနိုင်ခဲ့သည်။ 

ဘေးနားတွင် ရပ်ကြည့်နေကြသူများမှာလည်း ယီချန်းယန်၏ သရုပ်ဆောင် ကောင်းမွန်မှုကြောင့် ဇာတ်လမ်းထဲသို့ စီးမြောပါဝင်သွားခြင်းမှ ပြန်လည်ကာ ရုန်းထွက်မလာနိုင်ကြသေးချေ။ 

ကုရှင်း၏ ဘေးနားတွင် ရပ်နေသည့် ယဲ့လင်းက သူမ၏ အကြည့်များ ပို၍ပင် တောက်ပလာသည်ကို သတိပြုမိလိုက်သည်။ သူမ၏ အာရုံတည်ရှိမှုမှာ သူတို့နှင့် လားလားမျှပင် တူညီမနေချေ။ 

ယီချန်းယန်၏ သရုပ်ဆောင်စွမ်းရည်ကို နဖူးတွေ့ဒူးတွေ့  ကြုံတွေ့လိုက်ရသည့် ယန်အန်းယုမှာ ထိုစွမ်းရည်၏ သက်ရောက်မှုကို အခြားသူများထက် ပိုမိုကာ ခံစားခဲ့ရသည်။ သူကိုယ်တိုင်ပင် မသိလိုက်ပါဘဲ တစ်ဖက်လူ၏ ဦးဆောင်မှုဖြင့် ဇာတ်ကောင်စရိုက်ထဲသို့ အလိုလို ဝင်ရောက်သွားခဲ့သည်။ ယီချန်းယန်၏ စွမ်းဆောင်ရည်မှာ အံ့ဩချီးကျူးဖွယ်ပင်။ 

ယီချန်းယန်သည် အဓိကဇာတ်လိုက် ဖြစ်သည့်အလျောက် သူ ရိုက်ကူးရမည့် အခန်းများမှာ အလွန် များပြားသည့်အပြင် အားလုံးနီးပါးမှာ အရေးပါသည့် ဇာတ်ကွက်များသာ ဖြစ်ပေသည်။ သို့သော် သူသည် အချို့သော တိုက်ခိုက်ရေးဇာတ်ကွက်အချို့မှအပ မည်သည့်အခန်းကိုမှ နှစ်ကြိမ်ပြန်ကာ ရိုက်ကူးရခြင်း မရှိသလို NG ဖြစ်သည့် အခန်းဟူ၍လည်း များများစားစား မရှိချေ။ ရုပ်ရှင်ဧကရာဇ်ဟူသည့် ဂုဏ်ပုဒ်နှင့် အမှန်တကယ်ပင် ထိုက်တန်လှပေသည်။ 

ယီချန်းယန်နှင့်အတူ မရိုက်ကူးရသေးခင်တွင် ယန်အန်းယုသည် အလွန် စိတ်ဖိစီးနေခဲ့ရသည်။ သူတို့နှစ်ဦးအကြားရှိ သရုပ်ဆောင်စွမ်းရည် ကွာဟချက်မှာ အင်မတန် ကြီးမားလှရာ သူ၏ အမှားတစ်ခုကြောင့် အတူတူ ရိုက်ကူးရမည့် ရုပ်ရှင်ဧကရာဇ်ကိုပါ ဆွဲချမိသွားမည်ကို တွေးကာ ကြောက်ရွံ့နေခဲ့၏။ 

သို့သော် အမှန်တကယ် ရိုက်ကူးသည့်အခါ အခြေအနေမှာ သူ ထင်ထားသလောက် မဆိုးရွားလှချေ။ 

သူတို့နှစ်ဦး နေထိုင်ရာ ဟော်တယ်များမှာ တစ်ခုနှင့်တစ်ခု လွန်စွာ နီးကပ်သည့်အပြင် ပြီးခဲ့သည့်ရက်ပိုင်းအတွင်း  ယီချန်းယန်သည် သရုပ်ဆောင် လေ့ကျင့်ရန်အတွက် သူ့ကို ညတိုင်း လာရှာခဲ့သည်။ သူ့ကို ညွှန်ပြသင်ကြားပေးသည့် ထိုစီနီယာအမျိုးသား၏ နည်းလမ်းများမှာ နည်းပြတစ်‌ဦးကဲ့သို့ပင် အကျိုးသက်ရောက်မှု ရှိပေသည်။ 

ယနေ့ညတွင် ... ယီချန်းယန်သည် အချိန်ကြာမြင့်စွာ တလူးလူးတလှိမ့်လှိမ့် ဖြစ်နေသည့်တိုင် အိပ်၍ မပျော်သေး၊ အိပ်မပျော်သည့် ရောဂါကို ခံစားနေရသူတစ်ဦး အလားပင်။ 

ယနေ့ ရိုက်ကူးရေး လုပ်နေစဉ်အတွင်း ယန်အန်းယုအပေါ် သူ၏ ထူးထူးခြားခြား ခံစားချက်တို့မှာ ရုတ်ချည်းဆိုသလို တိုးများလာသဖြင့် သူ့ကိုယ်သူ အထိန်းအကွပ် မဲ့သွားလုမတတ် ဖြစ်ခဲ့သေးသည်။ 

လက်ရှိ ယန်အန်းယုမှာ အတိတ်က ယန်အန်းယုနှင့် အလွန့်အလွန် ကွဲပြားခြားနားလှပေသည်။ 

သို့မဟုတ် .. ထိုသူမှာ ယန်အန်းယု မဟုတ်ဟုပင် ဆိုရသင့်လား မတွေးတတ်တော့ချေ။ 

ထိုသို့ဖြင့် နေ့ရက်တစ်ရက် ကုန်ဆုံးသွားခဲ့သည်။ 

ယန်အန်းယု၏ ယခင် သရုပ်ဆောင်ချက်များမှာ ပြောင်မြောက်ထူးချွန်လှသည်ဟု ဆို၍ မရသည့်တိုင် ဆိုးရွားသည့် အထဲတွင်လည်း မပါဝင်ချေ။ လူသစ်တစ်ဦး ဖြစ်သည့်အလျောက် သူ၏ သရုပ်ဆောင်ချက်အပေါ် ဒါရိုက်တာရှု၏ လိုအပ်ချက်များမှာလည်း များစွာ မတင်းကြပ်လှချေ။ ရုပ်ရှင်များ၏ အဓိက ဦးစားပေးရိုက်ချက်များမှာ တစ်ခုနှင့်တစ်ခု မတူညီကြချေ။ "နှလုံးသား၌ ထုဆစ်လေသော" သည် အက်ရှင်အမျိုးအစား ရုပ်ရှင်တစ်ခု ဖြစ်ပေရာ ယန်အန်းယုအနေဖြင့် သူ၏ တိုက်ခိုက်ရေးအခန်းများကို ကောင်းမွန်ပြည့်စုံအောင် သရုပ်ဆောင်နိုင်လျှင်ပင် အဆင်ပြေနေပြီ ဖြစ်သည်။ 

သို့သော် ယနေ့ ရိုက်ကူးရသည့် အခန်းများအနက် ယန်အန်းယု ငိုကြွေးရမည့် ဇာတ်ဝင်ခန်းမှာမူ စိတ်တိုင်းမကျနိုင်ဖွယ်ရာပင်။ သူသည် NG များလည်း အခေါက်ပေါင်း မရေမတွက်နိုင်အောင် ရရှိခဲ့သည်။ 

ဒါရိုက်တာရှုက အားခန်းသည် မူးယစ်ဆေးများ သုံးစွဲမှုကြောင့် တစ်ဖြည်းဖြည်း ပိန်ချုံးချိနဲ့ကာ အရိုးပေါ် အရေတင်သည်အထိ ပိန်လှီသွားခဲ့သည်ဟု တိတိကျကျ ဖော်ပြခဲ့သည်။ 

သူ ကြီးပြင်းလာခဲ့သည့် ပတ်ဝန်းကျင် အခြေအနေကြောင့် အားခန်းသည် ဟိုးယခင် အစပိုင်းကတည်းက အလွန်အမင်း ခေါင်းမာကာ ပုန်ကန်လိုစိတ် ပြင်းပြသည့် သဘောထားကို ပိုင်ဆိုင်ထားခဲ့သည်။ သူ့ကို သွေးဆောင်ဖျောင်းဖျ၍လည်း မရသလို အတင်းအကြပ် ဖိအားပေး၍လည်း မရခဲ့ချေ။ ထို့ကြောင့် လက်မရွံ့ လေ့ကျင့်ရေးစခန်း၏ ကြီးကြပ်သူများက သူ့ကို နာခံမှု ရှ်ိလာစေရန် အလိုငှာ မူးယစ်ဆေးများကို အတင်း ထိုးသွင်းခဲ့ကြသည်။ 

ထိုသို့ဖြင့် အချိန်ကြာ‌လာလေ မူးယစ်ဆေး သုံးစွဲရခြင်းကို စွဲလမ်းလာလေ ဖြစ်ကာ သူ့အနေဖြင့် ထိုအရာကို စွန့်ပစ်ရန် ခဲယဉ်းလာတော့သည်။

အမျိုးသားဇာတ်လိုက် ယွမ်ကျစ်မင်က သူ၏ သရုပ်မှန်အကြောင်းကို အားခန်းအား ပြောပြလာသည့် အခါတွင်မူ ... ငယ်ဘဝမှတ်ဉာဏ်များကို တစ်ဖြည်းဖြည်း ပြန်လည်ကာ မှတ်မိလာခဲ့သည့် အားခန်းသည် အံ့အားသင့်မှုနှင့် နာကျင်ဝမ်းနည်းမှုကို တစ်ပြိုင်တည်း ခံစားလိုက်ရတော့သည်။ သူ့အစ်ကိုကြီးမှာ ထူးချွန်ထက်မြက်လှသည့် လျှို့ဝှက်ထောက်လှမ်းရေးတစ်ဦး ဖြစ်သော်ငြား သူကမူ လက်တွင် သွေးများ စွန်းထင်းလျက် ပေရေမဲမှောင်သည့် ဘဝတွင် နေထိုင်ခဲ့ရသည်။ ထိုကဲ့သို့သော နှိုင်းယှဉ်ချက်များနှင့်အတူ အားခန်း၏ အတွင်းစိတ်မှာ သည်းမခံနိုင်လောက်အောင် နာကျင်လာရတော့သည်။ 

ဤအခန်းတွင် အားခန်းသည် ယင်းထနေသည့်တိုင် ဤစွဲလမ်းမှုကို တစ်ကြိမ်တည်းဖြင့် အမြစ်ပြတ်သွားအောင် ဆွဲထုတ်လိုသည့်စိတ်ကြောင့် ဆေးထိုးအပ်များကို လွှင့်ပစ်ကာ အံကို တင်းတင်းကြိတ်ထားလျက် ခန္ဓာကိုယ်၏ တောင်းဆိုချက်များကို အတင်း ခုခံခဲ့၏။  

သူ့အခန်းထဲရှိ ကြမ်းပြင်ထက်တွင် လူးလှိမ့်နေရင်း နာကျင်မှုတို့ ရောစွက်နေသည့် ညည်းသံများကို ခပ်သဲ့သဲ့ ထုတ်လွှတ်နေသော အားခန်းအနီးသို့ သာ့ခဲက ‌အပြေးရောက်လာကာ သခင်ဖြစ်သူ၏ မျက်နှာကို လျာဖြင့် စိုးရိမ်တကြီး လျက်ပေးလိုက်သည်။ အားခန်းက ခွေးပေါက်လေးကို ပွေ့ဖက်ရင်း ထိန်းမထားနိုင်တော့ဟန်ဖြင့် ရှိုက်ငိုလိုက်သည်။ ပြင်းရှမောဟိုက်သွားလိုက် တိုးသဲ့သဲ့ ညဉ်းသံများသဖွယ် ဖြစ်သွားလိုက်နှင့် ဆက်တိုက် ပြောင်းလဲနေသည့် ရှိုက်သံမှာ ဝမ်းနည်းမှုကို အတင်း ဖိနှိပ်ထားခြင်း၏ ပြယုဂ်အလားပင်။ 

ခွေးပေါက်လေးနှင့် အတူ ရှိရသည့် နေစဉ်ဘဝအကြောင်း ရိုက်ကူးရာ၌ ယန်အန်းယုသည် အခက် မကြုံခဲ့ရချေ။ သို့သော် ဤ .. ဝမ်းနည်းပက်လက် ပူဆွေးချက်များကို အတင်း ဖိနှိပ်ထားကာ တစ်ချက်တစ်ချက်တွင်မှ ရှိုက်သံ တိုးတိုးလေး ထွက်လာရမည့် အခန်းမှာမူ ... ဝါရင့်သရုပ်ဆောင်များသည်ပင်လျှင် NG အနည်းငယ်ခန့်ကို ကျော်ဖြတ်ပြီးကာမှ အောင်မြင်နိုင်သည် ဖြစ်သည့်အတွက် သူကဲ့သို့သော လူသစ်လေးအဖို့ ပီပြင်အောင် ပုံဖော်နိုင်ရန်မှာ ပို၍ပင် ခဲယဉ်းလှပေသည်။ 

ယန်အန်းယု အနေဖြင့် ယီချန်းယန်, ယဲ့လင်း သို့မဟုတ် အခြား အဓိကသရုပ်ဆောင်တစ်ဦးဦး၏ လမ်းညွှန်ချက် မပါဝင်ဘဲ ထိုခံစားချက်ကို သူတစ်ဦးတည်း၏ အစွမ်းအစဖြင့် သက်ဝင်ခံစားကာ သရုပ်ဖော်ပြနိုင်ရန်မှာ ခက်ခဲလွန်းလှ‌ပေသည်။ အမူအယာအားဖြင့် မှန်ကန်မှု မရှိသည့်အပြင် ခံစားချက်များလည်း ချို့ယွင်းနေခဲ့၏။ တစ်ခါတစ်ရံတွင် ခံစားချက်များမှာ လိုအပ်သည်ထက် ပိုမိုလွန်ကဲလွန်းနေခဲ့သည်။ 

ဒါရိုက်တာရှုက ခေါင်းကို အဆက်မပြတ် ခါယမ်းကာ ထိုအခန်းကို ထပ်ကာတလဲလဲ ပြန်လည်ရိုက်ကူးစေခဲ့သည်။ ထိုအခန်းတစ်ခုတည်းကို ထပ်ကာထပ်ကာ ရိုက်ကူးနေရသည်မှာ အကြိမ် ၂၀ ခန့်ပင် ရှိနေပြီ ဖြစ်သည်။ 

ယန်အန်းယုထံ၌ စိတ်ခံစားချက်ကို ဖော်ပြသရုပ်ဆောင်ရသည့် ဇာတ်ကွက်များ အများအပြား မပါရှိချေ။ ဒါရိုက်တာကလည်း သူ၏ သရုပ်ဆောင်မှုကို အခြား သရုပ်ဆောင်များနှင့် နှိုင်းယှဉ်ကာ ဝေဖန်ခြင်းလည်း မရှိ။ သို့သော် သူသည် ယန်အန်းယု၏ အရေးကြီး ဇာတ်ဝင်ခန်းများကို အကောင်းဆုံးဖြစ်အောင် အတတ်နိုင်ဆုံး ကြိုးစားလိုသည့် ဆန္ဒများတော့ ရှိနေပေသည်။ 

"ရှောင်ယု မင်း အတိတ်မှာတုန်းက ကြုံခဲ့ဖူးတဲ့ ဝမ်းနည်းစရာ ကိစ္စတစ်ခုခုကို စဉ်းစားကြည့်လိုက် မင်း ကြုံခဲ့ရသမျှထဲမှာ ဘယ်ဟာက ရင်နာဖို့ အကောင်းဆုံးလဲ အဲဒါကို ပြန်တွေးကြည့်ပြီး အခု မင်း သရုပ်ဆောင်ရမယ့် အခြေအနေထဲကို ဆွဲခေါ်ကြည့်လိုက် ..." 

ရိုက်ကူးရေးမှာ မချောမွေ့သည့်တိုင် ဒါရိုက်တာရှုသည် ယန်အန်းယုကို စိတ်ရှည်ရှည်ထားကာ ပြောဆိုသင်ပြနေဆဲပင်။ 

ယန်အန်းယုက သူ့အတိတ်ကို ပြန်ပြောင်းစဉ်းစားကြည့်လိုက်သည်။ ရှင်သန်လာခဲ့သည့် ဘဝသက်တမ်းတစ်လျှောက် သူသည် အမျိုးမျိုးသော စိတ်ပျက်ဝမ်းနည်းဖွယ် ဖြစ်ရပ်များစွာကို ကြုံတွေ့ခံစားခဲ့ရဖူးသည့်တိုင် ..  အကောင်းမြင်စိတ်ရှိသူတစ်ဦး ဖြစ်သည့်အလျောက် ထိုဖြစ်ရပ်အားလုံးကို အလျင်အမြန် မေ့ဖျောက်နိုင်ခဲ့သည်။ မိဘများမှာလည်း သူ လူမှန်းသိတတ်စ အရွယ်ကတည်းက ကွယ်လွန်သွားနှင့်ကြပြီးဖြစ်ကာ သူနှင့် အရင်းနှီး‌ဆုံးလူဟူ၍လည်း စစ်သူကြီးချုပ် တစ်ဦးတည်းသာ ရှိခဲ့သည်။ 

အနာကျင်ရဆုံးဖြစ်ရပ်? သူရဲ့ သေဆုံးမှုလို့များ ပြောရမလားပဲ ... 

စစ်မြေပြင်ထက်တွင် သေဆုံးခဲ့ရချိန်က သူသည် အသက် ၁၆ ၁၇ အရွယ်သာ ရှိသေးသည်။ စောစောစီးစီး သေဆုံးခဲ့ရမှုကြောင့် စစ်သူကြီး အိမ်ထောင်ကျကာ သားသမီးများ ထွန်းကားသည်ကို မမြင်တွေ့နိုင်ခဲ့၊ စစ်သူကြီး သေဆုံးသည်အထိ ကာကွယ်ပေးခွင့်လည်း မရခဲ့ချေ။ 

ထိုအကြောင်းကို တွေးလိုက်မိသည်နှင့်တစ်ပြိုင်နက် သူ့မျက်ဝန်းထဲရှိ အရိပ်အယောင်တို့ ရုတ်ချည်း ပြောင်းလဲသွားကာ မလှမ်းမကမ်းတွင် ရှိနေသည့် ယီချန်းယန်ကို လှမ်းကြည့်မိသွားတော့သည်။ 

တစ်ဖက်လူက မတုန်မလှုပ် ရပ်နေသော်ငြား အတွင်းစိတ်ထဲတွင်မူ ပြောင်းလဲမှုတစ်ရပ် ရုတ်ချည်း ထွက်ပေါ်လာ၏။ 

ဒီလို စိတ်နဲ့လူနဲ့ မကပ်တဲ့ အကြည့်မျိုးနဲ့ ... ယန်အန်းယုက ဘယ်သူ့ကို ကြည့်နေတာလဲ သူကနေတစ်ဆင့် ဘယ်သူ့ကို လှမ်းကြည့်နေတာလဲ ...

သို့သော် ထို့နောက်တွင် ယန်အန်းယု၏ နှုတ်ခမ်းတို့ ကွေးညွတ်ကာ ကော့တက်လာခဲ့၏။ အတိတ်ဘဝတွင် ဖြစ်ခဲ့ရသည်များအပေါ် သူသည် ဝမ်းနည်းမိသည့်တိုင် နောင်တ မရခဲ့ချေ။ သူ့တွင် ထိုကဲ့သို့ ဖြစ်ရမယ့် ကံကြမ္မာ ရှိနေသောကြောင့်သာ ဤ သူနှင့် စိမ်းသက်လှသည့် ကမ္ဘာတစ်ခုသို့ ရောက်ရှိလာကာ ရုပ်ရှင်ဧကရာဇ် "ယီချန်းယန်" နှင့် ဆုံတွေ့ရခြင်း ဖြစ်ပေလိမ့်မည်။ 

"ရှောင်ယု မင်းကို ဘဝမှာ အနာကျင်ရဆုံး အဖြစ်အကြောင်း စဉ်းစားခိုင်းတာလေ ဘာလို့ ချန်းယန်ကို ငေးကြည့်ပြီး အရူးတစ်ယောက်လို ပြုံးနေရတာလဲ ..." 

ဘေးနားရှိ ဒါရိုက်တာရှု၏ ဒေါသစိတ်များမှာ ရယ်မောလိုမှုအဖြစ်သို့ ကူးပြောင်းသွားရရှာတော့သည်။ 

"ဟမ် ..." 

အသိစိတ် ပြန်ကပ်သွားသည့် ယန်အန်းယုက  ရယ်သွေးသွမ်းလိုက်သည်။ 

"ကျွန်တော် ... ကျွန်တော့်အမှားပါ ဒါရိုက်တာကြီး ..." 

သို့သော် ထို့နောက်ပိုင်းတွင်လည်း ရိုက်ကူးရေးမှာ ချောမွေ့မှု မရှိသေးသည့်အတွက် ဒါရိုက်တာရှုသည် ရိုက်ကူးရေးကို ဆိုင်းငံ့ထားလိုက်ရတော့သည်။ လက်ထောက်ဒါရိုက်တာနှင့် ဆွေးနွေးကာ ရိုက်ကူးရေး အချိန်စာရင်းကို ပြန်လည် ချိန်ညှိပြီးနောက် သူတို့သည် အခြား သရုပ်ဆောင်များ၏ အခန်းအား ဦးစွာ ရိုက်ကူးရန် ဆုံးဖြတ်လိုက်ကြတော့သည်။ 

ထိုညတွင် .. ရေချိုးပြီးကာစ ယန်အန်းယုသည် .. ရေချိုးခန်းသုံး ဝတ်ရုံရှည်ကိုသာ လျော့တိလျော့ရဲ ဝတ်ဆင်ထားလျက်  အိပ်ယာထဲသို့ ပစ်လှဲကာ ခြေထောက်ကို လွှဲယမ်းလျက် ကောလီရှုကို ဖုန်းခေါ်လိုက်သည်။ 

"ဟေး လီရှု ငါ "မနက်ဖြန်များ၏အသံ" ရဲ့ ရှေ့အပတ်က အပိုင်းတွေကို အကုန် ကြည့်ပြီးသွားပြီ မင်းရော နွော်ရှီရော ဖျော်ဖြေသွားတာ မိုက်ချက်ပဲ ထိပ်ဆုံးဆယ်ယောက်ထဲ ပါသွားတာ ဂုဏ်ပြုပါတယ်ကွာ ..." 

"ဟားဟား ... ဒါက ပမွှားလေးပါ..." 

ကောလီရှုက ရှက်ရွံ့စွာဖြင့် ရယ်မောလိုက်သည်။ ထို့နောက် အခြားအကြောင်းအရာတစ်ခုကို ရုတ်တရင် စကားစလိုက်၏။ 

"လူတိုင်းက အကုန် အရည်အချင်းအပြည့်နဲ့ဆိုတော့လေ ငါဖြင့် ဖိုင်နယ်တောင် ရောက်နိုင်ပါ့မလား ကြောက်ရတယ် ကြားတာတော့ winner ကို အတွင်းပိုင်းက လူတွေက ဆုံးဖြတ်ထားပြီးသားတဲ့ ..." 

"ဘယ်သူလဲ ထန်းရှောင်လား ..." 

"ကွက်တိပဲ ရှောင်ယု မင်း တန်းသဘောပေါက်လိမ့်မယ်လို့ ငါ ထင်ကို ထင်မထားဘူး သူက အရမ်းကို ကောင်းကောင်းကြီး ဖုံးကွယ်ထားခဲ့တာပဲ ..." 

ကောလီရှုက အနည်းငယ် အံ့အားသင့်နေဟန်ဖြင့် ပြောလိုက်သည်။ 

"အိုး ငါလည်း သေချာသိလို့ရယ်တော့ မဟုတ်ပါဘူး ..." 

ယန်အန်းယုက တွေးဆဆဖြင့် ပြောလိုက်သည်။ 

"သူက ဆိုတာရော ကတာရော ပျမ်းမျှလောက်ပဲလေ အဲဒါတောင် ကျန်းကျီချမ်က သူ့ကို ဝေဖန်တယ်ဆိုတာ ခပ်ရှားရှားပဲ မဟုတ်လား တစ်ခြားဒိုင်တွေရဲ့ မှတ်ချက်ကလည်း လိုရင်း မရောက်ဘူးလေ ပြီးတော့ ထန်းရှောင်ရဲ့ ကာရိုက်တာက အရမ်းကို ကောင်းလွန်းတယ် ဘာပြစ်ချက်မှကို မရှိဘူး သူက အရမ်းကို ပြည့်စုံနေလို့ပဲ ငါ့စိတ်ထဲမှာ အညှီနံ့ တစ်ခုခု ခံစားမိနေတာလား မသိပါဘူး ..." 

"ဟုတ်တယ် အဲဒီ့အတိုင်းပဲ ..." 

ကောလီရှုက သူ၏ ဝေဖန်ပိုင်းခြားမှုကို အလွန် ထောက်ခံမိသည့်ဟန်ပင်။ သူက ဒေါသတကြီး ပြောလိုက်သည်။ 

"ရှန်သုန်းဟောင့်ကလည်း တအားကြီး ကောင်းနေတာတော့ မဟုတ်ပါဘူး ဒါပေမယ့် အနည်းဆုံးတော့ သူက တဲ့တိုးသမား လက်သည်းဖွက်ထားတာတွေ မရှိဘူးကွာ ချစ်တာရော မုန်းတာရော အကုန် သူ့မျက်နှာပေါ်မှာ ဒီတိုင်းကို မြင်နေရတာ အဲဒီ့ ထန်းရှောင်ကတော့ အရမ်း အရမ်းကို သန့်စင်မြင့်မြတ်တဲ့ ပုံစံမျိုး ဖမ်းပြီး လူတိုင်းကို ယဉ်ကျေးကြင်နာပြနေတာလေ ငါ့စိတ်ထဲမှာ သူ့မှာ မကောင်းတဲ့အကြံ ရှိနေလို့ဆိုပြီးပဲ မြင်တယ် သူက တကယ်ကို ဟန်ဆောင်ကောင်းတာပဲ ..." 

"ကြားတာတော့ သူ့နောက်မှာ ကော်ပိုရေးရှင်း အကြီးကြီးတစ်ခုရဲ့ သူဌေးကြီးတစ်ယောက် ရှိနေတယ်တဲ့ ပြီးတော့ ပရိုဂရမ်အဖွဲ့ရဲ့ ထိပ်သီးပိုင်းတွေနဲ့လည်း ရင်းနှီးသေးတယ်ဆိုပဲ ..  ကြည့်ရတာ အကုန်လုံးက သူ့ကို ဒီနယ်ပယ်ထဲ မရောက်ရောက်အောင်ကို လမ်းဖောက်ပေးကြမယ့်သဘော ထင်တယ် ..." 

ယန်အန်းယုက ကူကယ်ရာမဲ့စွာဖြင့် သက်ပြင်းချလိုက်သည်။ ဤသို့သော ကိစ္စမျိုးမှာ အနုပညာလောကတွင် ဖြစ်ရိုးဖြစ်စဉ်မျှသာပင်။ သို့သော် နောက်ပိုင်း ထန်းရှောင်၏ အနုပညာခရီးလမ်း မည်သို့ ဖြစ်လာမည်ကိုမူ ... မည်သူမှ သိနိုင်လိမ့်မည် မဟုတ်ချေ။ 

ကောလီရှုထံမှ ရှန်သုန်းဟောင့်၏ နာမည်ကို ကြားလိုက်ရသည့်အခါ သူသည် အခြားသူငယ်ချင်းတစ်ဦးကိုပါ သတိရမိသွားတော့သည်။ 

"နွော်ရှီရော အခုတလော ဘယ်လိုနေလဲ ငါ သူ့ကို ဖုန်းဆက်တိုင်း ဘာမှကို အစ်အောက်ပြီး မေးမရလို့ ..." 

"သူက အရည်အချင်းလည်းရှိ တော်တော်လေးလည်း လူကြိုက်များတယ်လေ အဲဒါဆိုတော့ ပြိုင်ပွဲမှာ ငါ့ထက်တော့ ပိုပြီး ကြာကြာ နေနိုင်မှာပဲ ဒါပေမယ့် နွော်ရှီကလေ အမြဲတမ်း ချောင်ထဲမှာပဲ တစ်ယောက်တည်း ထိုင်ပြီး ငေးမှိုင်နေတာ သူ ဘာတွေ အတွေးလွန်နေလဲတော့ ငါလည်း မပြောတတ်ဘူး ..." 

"အိုး ..." 

ယန်အန်းယုက ချင်နွော်ရှီအပေါ် ထားရှိသည့် ယန်ကျွယ့်၏ သဘောထားအရဆိုလျှင် မည်သည့်ကိစ္စများပင် ဖြစ်လာပါစေ သူသည် ထိပ်ဆုံးသုံးယောက်ထဲသို့ ကျိန်းသေ ရောက်သွားလိမ့်မည်ဟု ခံစားနေမိသည်။ ထို့အပြင် ကောလီရှု ပြောသွားသကဲ့သို့ပင် ချင်နွော်ရှီသည် ထူးချွန်လှသည့် ပါရမီရှင်လည်း ဖြစ်ပေသည်။

"အိုက်ယား စိတ်ညစ်စရာတွေ ပြောမနေနဲ့တော့ မင်းရော ဘယ်လိုနေလဲ ရိုက်ကွင်းမှာ ဒါရိုက်တာ ဆူတာ ခံရသေးလား ..." 

ကောလီရှုက စကားလမ်းကြောင်းပြောင်းကာ သိလိုစိတ်အပြည့်ဖြင့် မေးလိုက်သည်။ 

"ငါ ... " 

တစ်ရက်အတွင်းမှာပင် NG ပေါင်း မရေမတွက်နိုင်အောင် ရရှိခဲ့သည့် သူ၏ အဖြစ်ကို ပြန်တွေးကာ ယန်အန်းယုသည် ခါးသီးစွာဖြင့် ရယ်မောလိုက်သည်။ 

"ငါက .. ခံစားချက်ကို ဖော်ပြရတဲ့ အခန်းတွေမှာ တကယ် မတော်ဘူး ထင်တယ် ..." 

"သိသားပဲ သရုပ်ဆောင်အတန်းတုန်းက ဆရာ ပြောဖူးတယ်လေ မင်း ငိုတာကြီးက ဆိုးဝါးချက်ပဲလို့ ..." 

ကောလီရှုက ထိုကဲ့သို့သော အခြေအနေမျိုး ဖြစ်လာလိမ့်မည်ဟု ဟိုးယခင်ကတည်းက ခန့်မှန်းမိနေသည့်ဟန်ပင်။ 

"သရုပ်ဆောင်တာလို ခံစားချက်ကို ကျိုးကြောင်းဆီလျော်မှု ရှိရှိနဲ့ မြှင့်တက်လာအောင် လုပ်ပေးရတဲ့ အလုပ်မျိုးက အချိန်တွေ အများကြီး လိုအပ်တယ်လေ လူတိုင်းက စီနီယာယီလို ထူးချွန်နေကြတာမှ မဟုတ်တာ ငါ့အထင်တော့ မင်းက တအား အကောင်းမြင်စိတ် များနေတဲ့အပြင် စိတ်ထဲမှာ ဒဏ်ရာလည်း ရှိနေတဲ့ပုံပဲ အဲဒါကြောင့် ငိုရတဲ့ အခန်းတွေကို သရုပ်မဆောင်နိုင်တာနေမှာ ..." 

ယန်အန်းယု "..." 

ဖုန်းခေါ်ဆိုမှု အပြီးတွင် ယန်အန်းယုသည် ကုတင်ခေါင်းရင်းကို မှီထိုင်ကာ ဇာတ်ညွှန်းကို တစ်ခဏမျှ ဖတ်နေလိုက်သည်။ ထို့နောက် ipad ကို ထုတ်ကာ ယီချန်းယန် ပါဝင်သရုပ်ဆောင်ထားသည့် ဇာတ်ကားများကို ရှာဖွေပြီး တစ်ဖက်လူ၏ အငိုခန်းများမှတစ်ဆင့် သင်ယူရန် ကြိုးစားလိုက်တော့သည်။ 

ကြည့်လေလေ ရင်ထဲ ထိရှသွားရလေပင်။ 

အမြဲတမ်း မျက်နှာသေနဲ့ နေတတ်တဲ့ ယောကျာ်းတစ်ယောက်က သရုပ်ဆောင်တဲ့အချိန်မှာ ဒီလောက်အထိတောင် အမူအယာမျိုးစုံကို သဘာဝကျကျ သရုပ်ဆောင်သွားနိုင်တယ်ပေါ့ ... တကယ်ကို ထင်မထားစရာပဲ ... 

ရုပ်ရှင်ထဲရှိ ယီချန်းယန်သည် သူ၏ ပူဆွေးမှုများကို အတင်း ဖိနှိပ်ထားကာ မျက်ဝန်းထောင့်စွန်း၌ မျက်ရည်စတို့ တွဲလွဲခိုနေသည့်တိုင် အချိန်ကြာမြင့်သည်အထိ အောက်သို့ စီးကျမလာ။ ယန်အန်းယု၏ လက်ချောင်းများက စခရင်ကို သွားထိမိသွားတော့သည်။ သူ့စိတ်ထဲတွင် ထိုစခရင်ကိုဖြတ်ကာ ယီချန်းယန်၏ မျက်ရည်စက်များကို သုတ်ပေးလိုစိတ်များ တဖွားဖွား ဖြစ်ပေါ်နေတော့သည်။ 

👥️