MM Story Teller

Chapter 22

Viewers 2k

🌍Chapter 22

ဖက်ထီးလေးကခေါင်းငြိမ့်လိုက်သည်။

"ဟုတ်တယ်၊ ရှန်းရှန်းက ကျွန်တော့်ကို ခွဲဖို့ပြောတာ၊ သူပြောတာက မြေပေါ်မှ ဖန်ကွဲစတွေရှိနေတော့ တစ်ယောက်ယောက် ရောက်လာရင် အသံကြားရမှာပဲတဲ့၊

ကျွန်တော်က တရား၀င်ကစားသမားဖြစ်လာကတည်းက နားအရမ်းပါးတယ်လေ။ တစ်ယောက်ယောက်က ဖန်ကွဲစတွေပေါ်နင်းလိုက်တာနဲ့ ကျွန်တော် ကြားမှာပဲ"

"မင်းရဲ့စွမ်းရည်က ဘာလဲ"

"နေရာလွတ်ကိုရွေ့တာနဲ့ တူတယ်ပြောရမလား၊ ကျွန်တော်လည်း မပြောတတ်ဘူးရယ်၊ ကျွန်တော်က မီတာတစ်ရာအတွင်းပဲ ပစ္စည်းတွေကို ရွေ့နိုင်တာ၊ ဒါပေမယ့် ကျွန်တော့်ရဲ့ စွမ်းရည်က သိပ်မသန်မာပါဘူး။ လေးတာတွေဆို သိပ်မရွေ့နိုင်ဘူးလေ၊ အကယ်၍ ဓါးတစ်ချောင်းကိုသာ ရွေ့ရမယ်ဆို ကျွန်တော် မြန်မြန်မရွေ့နိုင်ဘူးရယ်"

ထန်မော့က ဓါးတစ်ချောင်းက မြေကြီးပေါ်မှ မြောက်တက်လာပြီး သူ၏အနားသို့ရောက်လာသည်ကို မြင်လျှင် သူက၄င်းကိုဖမ်းယူလိုက်သည်။

ကျောက်ကျန်းက နီမြမ်းနေသော မျက်နှာဖြင့်

"ဒီလိုမျိုးလေ၊ အရှိန်ကနှေးလွန်းလို့ တိုက်ခိုက်လို့တောင် မရဘူးရယ်၊ ဒါပေမယ့် သံချောင်းတို့ အပ်တို့ကကျ သေးသေးလေးနဲ့ မြန်သလားမမေးနဲ့"

၀ှစ်...

လက်မအရွယ်ခန့်ရှိသော သေးငယ်သော အပ်တစ်ချောင်းက ထန်မော့၏ ရှေ့တွင်ပေါ်လာခဲ့သည်။ သူကခေါင်းကိုအမြန်လွှဲလိုက်သော်လည်း ၄င်းမှာ သူ၏ရှေ့တည့်တည့်တွင် တန့်နေတာ ရွေ့လျားမသွားချေ။ သူသာသတိမထားလိုက်ပါက ဤအပ်၏တိုက်ခိုက်မှုမှ လွတ်ရန်မလွယ်ကူပေ။

ကျောက်ကျန်းမှာ ထန်မော့၏ လျင်မြန်သော တုန့်ပြန်မှုကိုမြင်လျှင် အံ့အားသင့်သွားလျက်

"ခင်များရဲ့ တုန့်ပြန်မှုကမြန်ချက်ပဲဗျာ၊ ကျွန်တော်နဲ့ ဖေးဖေးထက်တောင် မြန်သေး"

ထန်မော့လက်ကိုဆန့်လျက် ထိုအပ်ကို ဖမ်းယူလိုက်သည်။

"မင်းက လူတွေကိုတိုက်ဖို့ သံချောင်းတွေ အပ်တွေကို သုံးနေခဲ့တာလား"

ကျောက်ကျန်းကခေါင်းငြိမ့်လိုက်သည်။

ထန်မော့မှာ ဤကောင်လေး၏ စွမ်းရည်ကို နားလည်ပြီးချေပြီ။

၎င်းမှာ အမှန်တကယ် ခပ်ကြမ်းကြမ်းစွမ်းရည်တစ်မျိုးဖြစ်သည်၊ သေးငယ်သောအရာများကိုသာ သုံးနိုင်သည်က နှမြောစရာပင်။ အလျင်မှာ မြန်သော်လည်း ထန်မော့ကတော့ရှောင်ရှားနိုင်ဆဲပင်။

အကယ်၍ ဓါးထက်ထက်တစ်ချောင်းက်ုသာ ထိုအလျင်နှင့် ရွေ့နိုင်ခဲ့လျှင် ထိုခိုး၀င်သူများ အတော်လေးပေးဆပ်ရမှာ ဖြစ်သည်။

ထန်မော့က အပ်ကိုကိုင်ထားလျက် ထိုဖက်တီးလေးအား ကြည့်လိုက်သည်။

"တခြားဘယ်သူ့ကိုမှ မင်းရဲ့ စွမ်းရည်အကြောင်းမပြောနဲ့"

ကျောက်ကျန်းက ရှူပ်ထွေးသော အမူအယာမျိုး ပြုလုပ်လာခဲ့သည်။

"အို့..."

"မင်းရဲ့ လှည့်ကွက်တွေကိုလူမသိအောင် ၀ှက်ထားသင့်တယ်"

ကျောက်ကျန်း"..."

ထန်မော့ပဲ သူ့ကိုမေးခဲ့လို့ ပြောပြမိတာမဟုတ်ဘူးလား...

ဖက်တီးလေးမှာ လှည့်ဖျားခံလိုက်ရသဖြင့် စိတ်ဓါတ်ကျစွာ ထွက်သွားတော့သည်။

လီ၀မ်က ကူကယ်ရာမဲ့စွာဆိုလိုက်သည်။

"ထန်မော့ မင်းကလေးကို အနိုင်ကျင့်နေတာလား"

ထန်မော့၏ အမူအယာကတော့ ပြောင်းလဲမသွားခဲ့ချေ။

"ငါသူ့ကို ရင့်ကျက်လာအောင် သင်ပေးနေတာ"

လီ၀မ်မှာ ၄င်းကကျိုးကြောင်းဆီလျော်သည်ဟု ခံစားရကာ လက်ခံလိုက်လေသည်။

နေ့လည်ခင်းတွင် ထန်မော့နှင့် အခြားသူများမှာ ကျောင်းဂိတ်၀အတွင်း ထောင်ချောက်များစွာကို ပြင်ဆင်ထားလိုက်သည်။ ထိုထောင်ချောက်များမှာ ဖက်တီးလေး၏ စွမ်းရည်ကြောင့် အတော်လေးအလုပ်ဖြစ်လေသည်။ ချန်ရှန်းရှန်းသည်လည်း ထန်မော့အား ကျန်ရှိသော ခိုး၀င်သူသုံးယောက်၏ စွမ်းရည်အကြောင်း အသေးစိတ်ပြောပြခဲ့သည်။

"သေသွားတဲ့ ခိုး၀င်သူနှစ်ယောက် အကြောင်းတော့မပြောတော့ဘူး၊ သူတို့နှစ်ယောက်လုံးရဲ့ စွမ်းရည်က သိပ်မကောင်းတော့ ကျွန်မတို့မြန်မြန်ပဲ သတ်လိုက်နိုင်တယ်လေ။ အခုသုံးယောက်ကျန်သေးတယ်၊ သူတို့ထဲက နှစ်ယောက်ကတကယ် အန္တာရယ်များတဲ့ စွမ်းရည်တွေရှိကြတယ်၊ ကျန်တဲ့တစ်ယောက်ကတော့ သိပ်မသေချာဘူး။ အဲဒီတစ်ယောက်အကြောင်းကို ပြောရမယ်ဆို သူ့ရဲ့ စွမ်းရည်က သူလျှောက်သွားတဲ့နေရာတစ်လျှောက် ပန်းတွေပွင့်စေတာလိုမျိုးလိုပဲ ၊ ဆရာလီမြင်လိုက်တာတော့ သူသွားတဲ့ နေရာတစ်လျှောက် ပန်းတွေပွင့်လာတာပဲ။ အဲဒါက ရိုးရိုးနှင်းဆီတွေနဲ့တူတယ်၊ ကျွန်မတို့တောင် နှစ်ကြိမ်လောက်ချိုးပစ်လိုက်သေးတယ်၊ သူ့ကိုကြည့်ရတာ အရမ်းထူးထူးခြားခြားစွမ်းရည်မျိုး ရှိပုံတော့မပေါ်ပါဘူး၊ ဒါပေမယ့် သူကအရမ်းမြန်ပြီးတော့ တိုက်ခိုက်စွမ်းရည်တွေတော့ရှိသလိုပဲ၊ သူက လက်တစ်ဖက်မရှိတော့ပဲနဲ့ ၀မ်ချောင်ရဲ့ မီးခြစ်ဆံကို လိုချင်ခဲ့တဲ့တစ်ယောက်ပဲ"

ထန်မော့မှာ စွမ်းရည်အမျိုးစုံကို မြင်ဖူးခဲ့ချေပြီ။ သူ၏ကိုယ်ပိုင်စာအုပ်ကပင်လျှင် အလွန်ထူးဆန်းသည်။ ပန်းများပွင့်စေသည့်စွမ်းရည်ကိုတော့ သူဘာမှတ်ချက်မှ မပေးလိုသော်လည်း ပေါ့ပေါ့လေးတော့ မတွေးရဲချေ။

ချန်ရှန်းရှန်းကဆက်ပြောလာခဲ့သည်။

"ပြီးတော့ စွမ်းရည်သန်မာတဲ့ နှစ်ယောက်ရှိသေးတယ်၊ တအားအန္တာရယ်များတယ်၊ တစ်ယောက်က ပါးစပ်ကနေ မီးကိုမှုတ်ထုတ်နိုင်တာလေ"

"မီးမှုတ်ထုတ်နိုင်တာဟုတ်လား"

ဤသည်မှာ ထန်မော့ပထမဆုံးအကြိမ်ကြားဖူးသော ကျိုးကြောင်းဆီလျော်သည့် စွမ်းရည်တစ်မျိုးပင်။

တီဗီ ဇာတ်လမ်းတွဲများထဲတွင် စွမ်းရည်ရှိသော သူများမှား မီးသို့မဟုတ် ရေများကို ထုတ်နိုင်ကြသည်။ သူ စာကြည့်တိုက်တွင် ပျင်းရိနေစဥ်က ၀တ္တုတချို့ကို ဖတ်ဖူးခဲ့သည်။ ၀တ္တုအများစုထဲမှ စွမ်းရည်များမှာ သတ္တု၊ မီး၊ ရေ၊ လေ၊ သစ်သား ဟူ၍ဓါတ်ကြီးငါးပါးအဖြစ် အမျိုးအစားခွဲခြားနိုင်သည်။ အနက်ရောင်မျှော်စင်ကဲ့သို့အရာမျိုးက ထုတ်လုပ်ပေးမည့် စွမ်းရည်များက ပို၍ ထူးဆန်းနေသည်မှာ အသေးအမွှားသာ။

"ဟုတ်တယ်၊ သူကမီးကိုမှုတ်ထုတ်နိုင်တာ၊ မီးကသူ့ပါးစပ်ထဲကနေ ထွက်လာတာ၊ ကျွန်မနောက်ဆုံး ကောက်ချက်ချနိုင်သွားတာကတော့ သူက သုံးမိနစ်ကိုတစ်ကြိမ် မီးမှုတ်ထုတ်နိုင်တယ် ဆိုတာပဲ။ မီးရဲ့အပူချိန်ကလည်း အရမ်းမြင့်တယ်၊ ကျောက်ပြားတွေကိုတောင် အရည်ဖျော်နိုင်တယ်၊ ဒါပေမယ့် စတီးကိုတော့မရဘူး။ အဲတုန်းကတအားမှောင်နေတာဆိုတော့ ရှင် ရှီပေ့အလယ်တန်းကျောင်းဆိုတဲ့ ဆိုင်းဘုတ်ကို မမြင်ခဲ့လောက်ဘူး။ စာလုံးတွေက သူ့ရဲ့မီးကြောင့်အရည်ပျော်သွားတာ၊ စတီးရဲ့ အရည်ပျော်တဲ့ အပူချိန်က ၁၅၀၀ စင်တီဂရိတ်လောက်ရှိတယ်လေ၊ ဒီတော့ သူ့ရဲ့မီးက ၁၀၀၀စင်တီဂရိတ်လောက်တော့ရှိမယ်ထင်တယ်"

ဤသည်မှာ တကယ်အန္တာရယ်များသော စွမ်းရည်ဖြစ်သည်။

"ပြီးတော့ ကျန်တဲ့တစ်ယောက်ကရော"

"နောက်ဆုံးတစ်ယောက်က သေနတ်တစ်လက်ရှိတယ်"

"သေနတ် ဟုတ်လား"

ထန်မော့၏ အမူအရာမှာ အေးခဲသွားခဲ့သည်။

တရုတ်ပြည်မှာ လက်နက်များကို တားမြစ်ထားတာ သာမာန်လူများမှာ သေနတ်ကိုကိုင်ခွင့်မရှိချေ။ သို့သော်လည်း ရဲများ တပ်ဖွဲ့၀င်များကဲသို့ ခြွင်းချက်များလည်းရှိသေးသည်။တရုတ်ပြည်တွင် ပစ်ခတ်မှုများလည်း မကြာခဏဖြစ်ပေါ်တတ်သည်ပင်။ လွန်ခဲ့သော နှစ်အနည်းငယ်ကဆိုလျှင် သေနတ်တစ်လတ်ဖြစ် လူများကို လိုက်ပစ်သတ်သော ကွင်းဆက် လူသတ်မှုတောင်ရှိခဲ့ဖူးသည်။

ခိုး၀င်သူများမှာ လူသတ်ဖူးသည်မှာ ပြောနေစရာတောင်မလိုချေ။ သို့သော် လူတစ်ယောက်ကိုသတ်ခြင်းနှင့် သေနတ်ဖြင့်တစ်ယောက်ယောက်ကို ပစ်ခြင်းမှာ မတူညီသောကိစ္စနှစ်ခုပင်။ ထိုသို့သေနတ်ကို ကိုင်နိုင်သော အကြမ်းဖက်သမားများမှာ အလွန်ဥာဏ်နီဥာဏ်နက်များလိမ့်မည်။ သူတို့မှာ သာမာန်လူသတ်သမားများမဟုတ်ပဲ သေနတ်တစ်လက်ကို ပိုင်ဖို့လည်း လွယ်လွယ်လေးပင်။

ချန်ရှန်းရှန်းခေါင်းကိုခါလိုက်ကာ

"ဟင့်အင်း အဲလောက်လည်း ကြောက်စရာမကောင်းပါဘူး။ ကျောက်ကျန်းလည်း ရှင်သန်ရာဂိမ်းတွေဆော့ဖူးတော့ သူလည်း သေနတ်တွေဘာတွေနဲ့ရင်းနှီးတာပဲ၊ သူပြောတာကအဲဒီသေနတ်က ရဲတွေကိုင်တဲ့ သေနတ်တဲ့၊ သူ့အထင်တော့ အဲဒီခိုး၀င်သူက ဂိမ်းတွေစတော့ ရဲစခန်းကနေခိုးလာခဲ့တာဖြစ်မယ်တဲ့၊ ဒါပေမယ့် သေနတ်ကအဲလောက် စိတ်ပူစရာမဟုတ်ဘူး၊ စိတ်ပူရမှာက သူ့ရဲ့စွမ်းရည်က သေနတ်နဲ့ပတ်သက်နေတာပဲ၊ သူ့မှာက အကန့်အသတ်မဲ့တဲ့ ကျည်ဆန်တွေရှိနေတာ"

ထန်မော့၏ နှလုံးသားမှာ တင်းကြပ်သွားခဲ့သည်။

ရိုးရိုး ရဲသေနတ်တစ်လက်က ကျည်ဆန်ရှစ်ခုခန့်သာပါသည်ဟု ကျောက်ကျန်းကဆိုခဲ့သည်။ သိူ့သော် ထိုခိုး၀င်သူက ကျည်ဆန် ၃၀ခန့်ကို ပစ်ခဲ့သည်။ သူကသေနတ်ကို မလဲခဲ့သလို သေနတ်ထဲမှ ကျည်ကတ်ကိုလည်း မလဲခဲ့ချေ။ ထိုခိုး၀င်သူက ကျည်ဆန်ဘယ်လောက်များများ ပစ်နိုင်သလဲပင် အတိအကျမသိနိုင်၊ ထိုသူမှာ အကန့်အသတ်မဲ့သော ကျည်ဆန်များ ပိုင်ဆိုင်သည်ဟုသာဆိုနိုင်သည်။

ထန်မော့မျက်ခုံးပင့်လိုက်မိသည်။

"တရား၀င်ကစားသမားတွေရဲ့ ခွန်အားကသန်မာတယ်၊ ပြီးအရည်ပြားကလည်းသံလို မာကြောသေးတယ်၊ ကျွန်မတို့က သာမာန်ဓါးတစ်လက်ကိုတော့ အေးဆေးရင်ဆိုင်နိုင်တယ်။ ဒါပေမယ့် သေနတ်ကိုကျတော့ ဘယ်လိုခုခံရမလဲ မသိသေးဘူး။ အဲဒီသေနတ်သာမရှိတော့ရင် အဲဒီ ခိုး၀င်သူသုံးယောက်ကို ရင်ဆိုင်ရတာ ပိုလွယ်သွားမှာ၊ သူ့မှာတခြား သေနတ်အပိုလည်းရှိမယ်မထင်ဘူး"

"အင်း "

ထန်မော့ ခတ္တမျှတွေးတောနေပြီးနောက် ဆိုလာခဲ့သည်။

"မင်းငါ့ကို မီးခြစ်ဆံကြီးခဏငှားပေးလို့ရမလား"

သူ့စကားကိုကြားသည်နှင့် ဖက်တီးလေးမှာ မီးခြစ်ဆံကို ကိုင်လျက် ပြေးလာခဲ့သည်။

"ခင်များပြောမှာကိုစောင့်နေတာ၊ ခင်များက ကျွန်တော်တို့တွေထဲ အသန်မာဆုံးပဲ၊ ကျွန်တော့်ထက်လည်းမြင့်မယ်လို့ခံစားရတယ်၊ ရှန်းရှန်းပြောတာ ဒီဟာကို ခင်များသုံးတာက အသင့်တော်ဆုံးပဲတဲ့"

ထန်မော့မှာ တန့်သွားလျက် ချန်ရှန်းရှန်းအား ကြည့်လိုက်မိသည်။

ဆံပင်တိုတိုနှင့် ကလေးမလေးမှာ လူကြီးတစ်ယောက်၏အမူအယာဖြင့်

"ဒီဟာက အရမ်းစွမ်းအားကြီးလောက်တယ်"

ထန်မော့ကပြုံးလိုက်သည်။

"ငါ့လက်ထဲမှာ စွမ်းအားကြီးလာမှာပါ"

ပြောပြီးနောက် ထန်မောမှာ မီးခြစ်ဆံကြီးအား သူ၏လက်ကောက်၀တ်ထံ ဖိလိုက်လျှင် ဖြတ်ခနဲပျောက်ကွယ်သွားခဲ့ပြီး ထိုနေရာတွင် မီးခြစ်ဆံပုံသဏ္ဍာန် တက်တူးလေးပေါ်လာခဲ့သည်။

ချန်ရှန်းရှန်းနှင့် ဖက်တီးလေးမှာ အံ့သြသွားခဲ့သည်။

ထန်မော့ကရှင်းပြလိုက်သည်။

"ဒါက ငါ့စွမ်းရည်လေ"

ဖက်တီးလေးကချက်ချင်းနားလည်သွားခဲ့သည်။

"ဒါက လျှို့၀ှက်လက်နက်ပုန်းလိုမျိုးပေါ့၊ ကောင်းတယ် ကောင်းတယ်"

အချိန်များကုန်လွန်သွားခဲ့ပြီး နေလုံးကြီးမှာလည်း အနောက် အရပ်သို့၀င်သွားခဲ့သည်။ နေ့အချိန်အတွင် လူတိုင်းမှာ စိတ်အေးလက်အေးဖြစ်နေခဲ့ကြသည်။ သို့သော် အလင်းရောင်တဖြည်းဖြည်းပျောက်ကွယ်လာသည်နှင့်အမျှ လူတိုင်း၏ ရင်ထဲတွင် မသက်မသာခံစားချက်မျိုး ဆိုး၀င်လာခဲ့ပြန်သည်။

ထန်မော့မှာ ရှောင်ဖေးဖေးဟုခေါ်သော မိန်းကလေး အနီးသို့လျှောက်သွားလိုက်သည်။ နူးညံ့ကာ အားနည်းပုံပေါ်သော အလယ်တန်းကျောင်းသူလေး၏ကျောတွင် စားဖိုဆောင်မှတွေ့သော သားခုတ်ဓါးကြီးကိုလွယ်ထားပြီး တုတ်ရှည်ရှည်ကိုလည်း အတူတကွတွဲချည်ထားခဲ့သည်။ သူမမှာ မိန်းကလေးတစ်ဦးဖြစ်သည့်တိုင် တရား၀င်ကစားသမားတစ်ဦးဖြစ်သည်။ သူမကဆရာလီထက်ပို၍ သန်မာလေသည်။

"မင်းအဲဒီတုတ်ကိုမလိုပါဘူး၊ ဓါးနဲ့တင်လုံလောက်ပြီ၊ အဲဒီတုတ်ချောင်းကိုသုံးဖို့အထိ မင်းရဲ့အရပ်နဲ့ ကိုယ်နဲ့က သိပ်မသန်မာဘူး၊ အဲဒီအစား ပေါ့ပေါ့ပါးပါး လက်နက်မျိုးကိုပဲ သုံးသင့်တယ်၊ အဲဒီတုတ်ကို ငါ့ကိုပေးလိုက်"

ရှောင်ဖေးဖေး တုတ်ကိုကြည့်လိုက်သည်။ ထို့နောက်တွင် သူမက၄င်းကို ထန်မော့ထံပေးလိုက်သည်။

"ကောင်းပြီ"

ထန်မော့ကတုတ်ကိုကိုင်လိုက်ချိန်တွင် ထူးဆန်းသော စွမ်းမားတစ်မျိုးကိုခံစားလိုက်ရပြီး ထောင့်ချိုးတစ်ခုကိုသွားလျက် သူ၏စွမ်းရည်စာအုပ်ကို ဆွဲထုတ်လိုက်သည်။

[စွမ်းရည်: သူငယ်ချင်းတစ်ယောက်ကိုရှာကြည့်ရအောင်]

[ပိုင်ရှင်:ရှောင်ဖေးဖေး(တရား၀င်ကစားသမား)]

[အမျိုးအစား: အထူးအမျိုးအစား]

[လုပ်ဆောင်ချက်: ကစားသမား၏ သရုပ်မှန်ကိုခွဲခြားရန်]

[အဆင့်: 1]

[ကန့်သတ်ချက်: တစ်နေ့တွင် ကစားသမားငါးယောက်ကိုသာ သရုပ်ခွဲနိုင်၊ ကစားသမား၏ စွမ်းရည်ကမြင့်လေ၊ သရုပ်ခွဲဖို့ခက်ခဲလေပဲ]

[မှတ်ချက်: ကြက်ကြော်အစပ်လိုပဲဟ၊ တို့ကတော့ သိပ်ထွေထွေထူးထူး မှတ်ချက်မပေးချင်ပါဘူး]

ရှောင်ဖေးဖေးမှာ သူ့ကိုမထိခင်အထိ သူ၏သရုပ်ကိုမနိုင်သည်မှာ သူ၏စွမ်းရည်က ပိုမြင့်၍ပေလား"

ထန်မော့ တဖန်ဖတ်ကြည့်လိုက်မိပြန်သည်။

[ထန်မော့ဗားရှင်း အသုံးပြုရန်အညွှန်း: တစ်နေ့မှာ ကစားသမားတစ်ယောက်ကို သရုပ်ခွဲနိုင်တယ်၊ ဒီစွမ်းရည်က ကြက်ကြော်အစပ်လိုပဲ၊ ထန်မော့ကဒီအတွက် ပိုက်ဆံမပေးပြန်ဘူး၊ ငါတော့ပြောစရာစကားကို မရှိတော့ဘူး]

ထန်မော့မှာ ရှောင်ဖေးဖေး၏စွမ်းရည်အား ရည်ရွယ်ချက်ရှိရှိ ရယူခဲ့ခြင်းပင်။ မနေ့က လီပင်း၏ စွမ်းရည်ကိုရရှိခဲ့ပြီးနောက် သူ၏ခွန်အားမှာပို၍ တိုးတက်လာခဲ့သလို ခံစားရသည်။ သူ၏အမြင်အာရုံမှာ ပိုကောင်းလာပြီး သူ၏တုန့်ပြန်နှုန်းကလည်းပို၍ လျင်မြန်လာသလို ခွန်အားလည်းပိုသန်မာလာခဲ့သည်။

လီပင်း၏ စွမ်းရည်ကို မရရှိခင်ကဆိုလျှင် ထန်မော့မှာ ကျောက်ကျန်း၏ သံချောင်းကို ရှောင်နိုင်ခဲ့ပါ့မလား မသေချာပေ။ သူ့၏စွမ်းရည်အမှန်တကယ် တိုးတက်နိုင်စွမ်းရှိမရှိ တခြားသူများထံမှ စွမ်းရည်များကို ရယူ၍သာ စမ်းသပ်ကြည့်လိုခဲ့သည်။

ရလဒ်မှာ သူမျှော်မှန်းထားသည့်အတိုင်းပင်။

ထန်မော့သည်လက်ထဲမှ တုတ်ချောင်းကိုဖြစ်ညစ်လိုက်လျှင် ထိုတုတ်ချောင်းပေါ်တွင် လက်ငါးချောင်း၏ ချိုင့်ရာထင်သွားခဲ့သည်။

အကယ်၍ တခြားလူများ၏ စွမ်းရည်ကို ရယူခြင်းက သူ၏တိုက်ခိုက်စွမ်းရည်ကို မြှင့်တင်ပေးနိုင်ခဲ့လျှင်

ထန်မော့သည် ဖက်တီးလေးနားသို့လျှောက်သွားလျက်

"ငါဗိုက်ဆာတယ်၊ မင်းရဲ့ပေါင်မုန့်ကိုပေးလို့ရလား"

ကျောက်ကျန်းမှာ တိုက်ပွဲကိုရင်ဆိုင်ရန်အတွက် သူ၏အင်အားကိုဖြည့်တင်းရန် တစ်ခုခုကိုစားနေခဲ့ခြင်းဖြစ်သည်။ သူကပလုတ်ပလောင်းဖြင့်ဆိုလာသည်။

"ဟိုမှာအများကြီးပဲ၊ ခင်များကြိုက်တာစား"

ထန်မော့မှာ အရေထူလေသည်။

"ငါကဒီအရသာလိုချင်တာ၊ ဒါကနောက်ဆုံးတစ်ခုပဲ"

ဖက်တီးလေးမှာ စိတ်ဓါတ်ကျနေသော အမူအယာဖြင့် ထန်မော့ထံ ပေါင်မုန့်ကိုပေးလိုက်သည်။

လီ၀မ်ကဆိုလာသည်။

"ဟေး ထန်မော့ မင်းအခုတော့ ကလေးဆီကတောင် လုနေပြီလား"

ထန်မော့မှာ ပြန်မဖြေသော်လည်း သူ၏အမူအယာမှာတော့အနည်းငယ် ဆိုးရွားနေခဲ့သည်။

သူကဖက်တီးလေးထံမှ စွမ်းရည်အား အလကားတောင်းယူခဲ့သည်။ သို့သော်လည်း အဘယ်ကြောင့်

အခုထိ ဖက်တီးလေး၏ စွမ်းရည်ကို မရရှိသေးပါသနည်း။

ဘာတွေဖြစ်နေတာလဲ...

ထန်မော့ လက်မလျော့ခဲ့ချေ။ ဖက်တီးလေး၏စွမ်းရည်ကမြင့်သည်။ သူသာရရှိခဲ့ပါက အလွန်အကျိုးရှိလိမ့်မည်။ ထန်မော့မှာ ဖက်တီးလေးထံမှ ဘီစကစ်တချို့နှင့် နို့ကိုပါ ထပ်၍တောင်းလိုက်သည်။ သူကတခြားလူများ၏ အစားအသောက်ကို မတောင်းဆိုပဲ ဖက်တီးလေးဆီကသာ တောင်းခြင်းဖြစ်သည်။ ဖက်တီးလေး၏မျက်နှာမှာတော့ ငိုချတော့မည့်နှယ် စိမ်းဖန့်နေခဲ့သည်။

"ခင်များ ဘာလို့ကျွန်တော့်ဆီကပဲတောင်းနေတာလဲ"

ထန်မော့၏မျက်နှာမှာ ပို၍ပင်စိမ်းဖန့်နေခဲ့သညိ။

"နောက်တစ်ခုထပ်ပေးဦး"

ဘီစကစ်နှစ်ဘူးခန့် ၊ ပေါင်မုန့်တစ်လုံးနှင့် နို့တစ်ဘူးအထိသောက်ပြီးသည့်တိုင် သူကအခုချိန်အထိ ဖက်တီးလေး၏ စွမ်းရည်ကို မရရှိနိုင်သေးချေ။

ကျန်လူများမှာကို သူတို့နှစ်ဦးကို ကြည့်လျက် ရယ်မောလာကြသည်။ သို့သော် ချန်ရှန်းရှန်းကတော့ ထန်မော့အား အတွေးတချို့ဖြင့်ကြည့်နေခဲ့သည်။ ထန်မော့လက်လျော့ကာ ထွက်သွားသည်နှင့် သူမမှာ ဘီစကစ်တစ်ဘူးကိုကိုင်လျက် သူ့နောက်သို့ ပြေးလိုက်သွားခဲ့သည်။

ဆံပင်တိုတိုနှင့် ကလေးမလေး၏ အမူအရာမှာ သိပ်ကြည့်မကောင်းလှ သို့သော် သူမ၏အကြည့်များမှာတော့ သန်မာလှသည်။ သူမကထန်မော့ကို ကြည့်လျက်

"ရှင် တစ်ယောက်ယောက်ဆီက တစ်ခုခုရဖို့ကြိုးစားနေတာလား၊ အဲဒါကရှင့်ရဲ့ စွမ်းရည်နဲ့ဆိုင်တာလား၊ ကျွန်မရှင့်ကိုတစ်ခုခုပေးရင် ရှင်ကပိုသန်မာလာမှာလား"

ထန်မော့မှာ တန့်သွားမိသည်။

သူမမှာ အဘယ်ကြောင့်ဤမျှ ထက်မြက်ရပါသနည်း။ ဤသည်မှာ ထင်ကြေးသက်သက်သာမဟုတ်ပေလော။

ချန်ရှန်းရှန်းတွင် စွမ်းရည်မရှိသည်မို့ ထန်မော့ သူမထံမှ မည်သည့် အကျိုးရလဒ်မှ မရယူနိုင်ချေ။ သိူ့သော် ကလေးမလေးမှာ လက်ထဲတွင် ဘီစကစ်တစ်ဘူးကို ကိုင်လျက် သူ့အား ပြင်းပြင်းထန်ထန်စိုက်ကြည့်နေခဲ့သည်။ သူမကအံကိုကြိတ်လျက်

"ကျွန်မဒါကို ရှင့်ကိုပေးမယ်၊ ဒါပေမယ့် ရှင်သူတို့ကို သတ်ပေးရမယ်၊ အဲဒါကဘာပဲဖြစ်ဖြစ် ရှင်သာသူတို့ကို သတ်ပေးမယ်ဆို ကျွန်မပေးနိုင်တယ်"

ထန်မော့မှာ ငြင်းဆန်လိုခဲ့သည်။ သို့သော်ထိုစကားများကို ကြားပြီးနောက်တွင် နှုတ်ခမ်းကိုပြန်ပိတ်လိုက်လျက် ထိုဘီစကစ်အား လက်ခံယူလိုက်လေသည်။ ဘီစကစ်ဘူးအား ထိလိုက်ချိန်တွင် ထန်မော့၏ မျက်လုံးများမှာ ပြူးကျယ်လာခဲ့သည်။

သူထုတ်ယူထားသောစာအုပ်အား လေထဲပြန်မ၀ှက်ရသေးချေ။ ထိုအစား ကျောပိုးအိတ်ထဲတွင်ထည့်ထားခဲ့သည်။ သူကထိုစာအုပ်ကိုထုတ်ယူ၍ ဖွင့်ကြည့်လိုက်သည်။

[စွမ်းရည်: ဥာဏ်ကြီးရှင်ရဲ့ တွေးခေါ်နိုင်စွမ်း]

[ပိုင်ရှင်: ချန်ရှန်းရှန်း (အရံကစားသမား)]

[အမျိုးအစား : လက်တွေ့အသုံးချ]

[လုပ်ဆောင်ချက်: မင်းဦးနှောက်က မျက်စိနဲ့မြင်ရတဲ့ အလျင်နီးပါးနဲ့ကြီးလာမှာဖြစ်ပြီး မင်းရဲ့ တွေးခေါ်နိုင်စွမ်းနဲ့ ခန့်မှန်းနိုင်စွမ်း အကျိုးနဲ တိုးလာလိမ့်မယ်]

[အဆင့်: ၃]

[ကန့်သတ်ချက်: ခန့်မှန်းချက်မှန်ကန်နိုင်စွမ်းက ၅၀ရာခိုင်နှုန်း၊ ခွန်အားတိုးလာနိုင်စွမ်းကတော့ သုညရာခိုင်နှုန်း]

[မှတ်ချက်: ငါမှန်းလိုက်တိုင်း ဘာလို့မှန်လဲသိချင်လား၊ နတ်ငါးပါးစပ်လို့ခေါ်ရမယ်ဟုတ် ဘာလို့ဆို ငါကမင်းထက် ဥာဏ်ကောင်းလို့လေ ဟား ဟား ဟား]

[ထန်မော့ ဗားရှင်းအသုံးပြုရန်အညွှန်း: ခန့်မှန်းချက် မှန်နိုင်ချေ ၁၀ရာခိုင်နှုန်း၊ ထန်မော့ကတော့ ကံကောင်းလွန်းလို့ဒီရတနာလေးကို တွေ့သွားတာပဲ၊ ဒါပေမယ့်လည်း ပိုက်ဆံမပေးပြန်ဘူး]

"ဘာမှားလို့လဲ"

ချန်ရှန်းရှန်းကမေးလိုက်သည်။

ထန်မော့မှာ ထိုကလေးမလေးကို ငုံ့ကြည့်လိုက်သည်။

ပွေးကြီးပြောခဲ့သလိုပင် တရား၀င်ကစားသမားများနှင့် ခိုး၀င်သူများမှာ စွမ်းရည်ကိုယ်စီရှိကြသည်။ အရံကစားသမားများတွင်တော့ စွမ်းရည်ရရှိနိုင်ချေ နည်းပါးလှပေသည်။

သူမ အလွန်ဥာဏ်ကောင်းနေခြင်းမှာ မထူးဆန်းတော့ပေ။

"ငါသူတို့ကို သေချာပေါက်သတ်ပေးမယ်"

ချန်ရှန်းရှန်းကခေါင်းငြိမ့်လိုက်သည်။

"အင်း သူတို့ကိုသတ်ပြီး လက်စားချေမယ်"

ဘန်း...

ကျယ်လောင်သော သေနတ်သံက တိတ်ဆိတ်သောညကို ဖြိုခွင်းလိုက်သည်။ ထန်မော့မှာ နံဘေးမှ ဆရာလီကို လှည့်ကြည့်လိုက်သည်။ သူ၏အမြင်အာရုံထဲတွင် ငွေရောင် ကျည်ဆန်တစ်ခုက အနှေးပြကွက်တစ်ခုနှယ် ဆရာလီ၏ စခန်းကိုဖြတ်၍ပျံသန်းသွားသည်။ ကျည်ဆန်မှာဘယ်ကိုမှ ထိမသွားချေ။ သို့နှင့် ထန်မော့မှာ ကျည်ဆန်လာရာသို့ အလျင်အမြန်လှည့်ကြည့်လိုက်သည်။

ထန်မော့ကအော်လိုက်သည်။

"ဖက်တီးလေး အားကစားခန်းက မီးကိုဖြတ်လိုက်တော့"

"အိုကေ"

သံချောင်းတစ်ချောင်းက လေဟာနယ်ထဲ လျင်မြန်သော အရှိန်ဖြင့် ဖြတ်သွားလျက် ထိုအားကစားခန်းမှ မီးလုံးကို ခွဲပစ်လိုက်သည်။

ပါတ်၀န်းကျင်တစ်ခုလုံးတမဟုတ်ချင်းမှောင်မည်းသွားခဲ့သည်။

လီ၀မ်မှာ အံအားသင့်လျက်

"ထန်မော့ မင်းဘာတွေလုပ်နေတာလဲ"

ထန်မော့မှာ မြေပြင်ပေါ်ထိုင်ချလျက် သေသပ်လှပသောစက်၀ိုင်းတစ်ခုကို လျင်မြန်စွာဆွဲလိုက်သည်။ အလွန်မှောင်မည်းနေခဲ့၍ ကျန်လူများမှာ သူထိုင်ချလိုက်သည်ကိုသာမြင်လိုက်လျက် ဘာလုပ်နေသလဲတော့ မတွေ့လိုက်ကြချေ။ ထန်မော့က ပေါ့ပါးစွာဆိုလိုက်သည်။

"စက်၀ိုင်းဆွဲပြီး ကျိန်စာတိုက်နေတာလေ"

ပြဇာတ်ငယ်...

ထန်ထန် : ဒီညတော့ အဲဒီကြက်တွေကိုသတ်ပြီပဲ

ဖူ၀မ်သော် : #သေးငယ်သောပြဇာတ်ရုံလေးထဲသာနေနေရ#

🪩

Prev Next