MM Story Teller

Chapter 26

Viewers 4k

🌍Chapter 26

ထန်မော့မှာ အာရုံစိုက်၍နားထောင်နေခဲ့ပြီး သူ၏နားထဲတွင် တိုးညှင်းသော တဂျစ်ဂျစ်အသံများကို ကြားနေခဲ့ရသည်။

အသံမှာ တိုးလွန်း၍ သတိမထားမိလုနီးပါးပင်။ သို့သော် ၄င်းကထူးဆန်းလှသည်။ ၄င်းက လေတိုးသံလည်းမဟုတ်သလို သစ်ရွက်များအချင်းချင်း ပွတ်တိုက်မိသံလည်း မဟုတ်ခဲ့ချေ။ ၄င်းမှာ ထန်မော့ငယ်ငယ်ကကြားဖူးသော အဖြူအနက် ရုပ်မြင်သံကြားစက်အဟောင်းများမှ လိုင်းမမိလျှင် ထွက်လာတတ်သော တစ်ဂျစ်ဂျစ်အသံများနှင့်တူလှသည်။

ထန်မော့မှာ ၄င်းက အိုဟောင်းနေသော ရုပ်မြင်သံကြားစက် တစ်ခုခု၏အသံဖြစ်ကြောင်း ၈၀ရာခိုင်နှုန်းခန့်သေချာနေခဲ့သည်၊

"အသံက မင်းရဲ့ခေါင်းထဲကနေကြားနေရတာလား"

အဖြေတိုက်ရိုက်ပေးရမည့်အစား တဖက်လူက သူ့အား ပြန်လည်မေးခွန်းထုတ်လာခဲ့သည်။ ထန်မော့က အေးဆေးစွာပြန်ဖြေလိုက်သည်။

"အင်း"

"ကြည့်ရတာ ပထမအကြိမ်တုန်းကနဲ့ မတူတဲ့နည်းနဲ့ ဆက်သွယ်လိုက်လို့ထင်တယ်"

တဂျစ်ဂျစ်အသံများမှာ ပို၍ကျယ်လောင်လာသလိုခံစားရကာ သတ္တုချင်း ထိခတ်မိသည့် အသံများကိုပါ ကြားနေခဲ့ရသည်။ သို့တိုင်တောင် ထိုအမျိုးသား၏အသံမှာ တည်ငြိမ်နေဆဲပင်။

"ကြက်ဆင်ဥကိုဖွင့်ဖို့ သုံးကြိမ်မခေါက်ခဲ့ဘူး"

ထန်းမော့မှာ ထူးခြားနေသော အချက်ကိုဖမ်းဆုပ်မိလိုက်သည်။

"ဆိုလိုတာက..."

"ကြက်ဆင်ဥကိုအသုံးပြုဖို့လိုအပ်နေလို့ပါ မစ်စတာ မော့ ၊ ငါ လောလောဆယ် ထူးဆန်းတဲ့မျှော်စင်တိုက်ခိုက်တဲ့ ဂိမ်းထဲရောက်နေတယ်၊ အသေးစိတ်ရှင်းပြလို့မရပေမယ့် ဒီဂိမ်းကမလွယ်ကူဘူးလို့ ခံစားမိနေတယ်၊ အဲဒါကြောင့် ဒီပစ္စည်းကို ဖွင့်ပြီးလွတ်လမ်းတစ်ခုလောက် ပြင်ထားချင်တယ်"

ထန်မော့မှာတဖက်လူပြောသည်သည်အား ချက်ချင်းနားလည်လိုက်သည်။ ထန်မော့မျက်လုံးကို မှေးကျဥ်းလျက် တစ်ခုခုပြောရန် ပါးစပ်ကိုမဟနိုင်လိုက်ခင် မှာပင် တစ်ဖက်လူမှ သူ တောင့်တနေခဲ့သည့် သတင်းအချက်အလက်များကို ပေးလာခဲ့သည်။

"ဒီဥကို မော့မော့လို့ခေါ်တယ်။ ဒါကဂိမ်းစမှတ်သိမ်းပေးတဲ့ အိုင်တမ်ပဲ၊ မင်းဂိမ်းတွေဆော့ဖူးရင် စမှတ်သိမ်းတယ်ဆိုတာ ဘာကိုဆိုလိုသလဲ သိမှာပါ"

ထန်မော့သည် ဤခပ်တုံးတုံးဥက ထူးကဲသော လုပ်ဆောင်မှုရှိသည့် ရှားပါးပစ္စည်းဟုမထင်ခဲ့မိချေ။

တစ်ကိုယ်တည်းအသွင်ယူကစားရသော ဂိမ်းအများစုတွင် ဂိမ်းသိမ်းနိုင်သော လုပ်ဆောင်မှုပါရှိကာ ကစားသမားများအား ဂိမ်းကိုမရပ်တန့်မီ ရောက်ရှိနေသောနေရာအထိ သိမ်းပေးနိုင်လေသည်။ ထိုသို့သိမ်းပြီးသည်နှင့် ကစားသမားမှာ ဂိမ်းမှအလွယ်တကူထွက်သွားနိုင်ကာ ပြန်ဆော့ချင်လျှင်လည်း ယခင်ရောက်နေသော နေရာမှဆက်၍တဖန်ပြန်ဆော့နိုင်လေသည်။ အချိန်ဖြုန်းစရာလည်းမလိုအပ်ပေ။ သူတို့သေသွားသည်နှင့် ဂိမ်းမှာ အလိုအလျောက်သိမ်းဆည်းပြီးဖြစ်လျက် သိမ်းမှတ်ဆီမှ ပြန်လည်စတင်ပေးလိမ့်မည်။

ဂိမ်းစမှတ်သိမ်းသည့် ပစ္စည်းမှာ ကြားရသည်က ရိုးရှင်းသည်ဟုထင်ရသော်လည်း အနက်ရောင်မျှော်စင် ဂိမ်းထဲတွင်ကား အဖိုးမဖြတ်နိုင်သော ဂိမ်းကူပစ္စည်းတစ်ခုပင်။

ထန်မော့၏ သွေးခုန်နှုန်းများတိုးလာသလို ခံစားလိုက်ရသည်။ ဤသည်မှာ ဂိမ်းစမှတ်သိမ်းသော ပစ္စည်းမှန်း သိသည့် မည်သူမဆို တည်ငြိမ်နိုင်လိမ့်မည်မဟုတ်ချေ။ ထန်မော့မှာ တိတ်ဆိတ်နေခဲ့ပြီး တဖက်လူမှာလည်း သူပြောလိုက်သည့် စကားများမှာ မည်မျှအရေးပါကြောင်း သိနေခဲ့သည်။ ထန်မော့အား အသားကျရန်အချိန်ပေးထားပြီး အနှောင့်အယှက်မပေးခဲ့ချေ။ တဖက်လူသည်လည်း ဤသည်မှာရှားပါး ဂိမ်းကူပစ္စည်းမှန်း သိခဲ့စဥ်က ထိုသို့ခံစားခဲ့ရခြင်းကြောင့် ဖြစ်ကောင်းဖြစ်နိုင်သည်။

မိနစ်ပိုင်းခန့်အကြာတွင် ထန်မော့ပြန်လည်တည်ငြိမ်လာခဲ့ပြီး မေးလိုက်သည်။

"ကန့်သတ်ချက်တွေကရော"

အနက်ရောင်မျှော်စင်မှာ ကစားသမားများအား အကန့်အသတ်မဲ့ စမှတ်များကို သိမ်းဆည်းခွင့်ပြုမည်မဟုတ်ချေ။ ကန့်သတ်ချက်များမရှိပါက ဤပစ္စည်းမှာ ဂိမ်းကိုမမျှမတဖြစ်စေကာ ပျက်ဆီးစေလိမ့်မည်။

တဖက်မှာတော့ အသင့်ဖြစ်နေခဲ့ဟန်နှင့် ချက်ချင်း ပြန်ဖြေပေးခဲ့သည်။

"ကန့်သတ်ချက် ၃ချက်ရှိတယ်၊ ပထမတစ်ချက်က ဒီဥကို ခုနှစ်ရက် တစ်ကြိမ်ပဲသုံးလို့ရတယ်၊ ဒုတိယတစ်ချက်က ဂိမ်းသိမ်းနိုင်ချိန်က ၁နာရီပဲရှိပြီးတော့ အနက်ရောင်မျှော်စင် ဂိမ်းတွေမှာပဲ သုံးလို့ရမယ်၊ ဂိမ်းစမှတ်သိမ်းပြီး ၁နာရီအတွင်း ဂိမ်းကိုအချိန်မရွေးပြန်စလို့ရတယ်၊ ၁နာရီကျော်သွားရင်တော့ အကျုံးမ၀င်တော့ဘူး။ တတိယအချက်ကတော့ ငါမင်းကို ဘာကြောင့်ခေါ်လိုက်ရသလဲဆိုတဲ့ အကြောင်းပြချက်ပဲ"

ထန်မော့ မျက်မှောင်ကျုံ့လိုက်မိသည်။

"ဘာလို့လဲ"

"ဒီ မော့...ဂိမ်းကူပစ္စည်းကိုသုံးဖို့လေ၊ ပိုင်ရှင်နှစ်ယောက်လုံးက ဖွင့်မှရမယ်၊ ဆိုလိုတာက မင်းရော ငါရော တစ်ယောက်တည်း ဖွင့်လို့မရဘူးဆိုတာပဲ"

ထို့နောက် အသံမှာ ခတ္တမျှ ရပ်တန့်သွားခဲ့ပြီး

"မစ်စတာမော့ ဂိမ်းစမှတ်ကိုသိမ်းနည်းကတော့ ကြက်ဆင်ဥပေါ်မှာ အင်္ဂလိပ်စာလုံး 'S'ကို ဆွဲပေးဖို့ပဲ"

ထန်မော့လည်း ဤလူအဘယ်ကြောင့် သူ့ကိုခေါ်ဆိုလာပြီး ဤလျှို့၀ှက်ချက်များကို ထုတ်ဖော်ခဲ့သည်ကို ချက်ချင်းနားလည်သွားခဲ့သည်၊

သူကထန်မော့အားမဆက်သွယ်ခဲ့လျှင် သူ၏လက်ထဲမှ ကြက်ဆင်ဥမှာ အမှိုက်သာသာဖြစ်နေလိမ့်မည်။

ဤဥမှာ သားဖောက်၍လည်းမရပဲ ချက်လိုက်လျှင်လည်း အရသာရှိမည့်ပုံမပေါ်ချေ။ ကျောပိုးအိတ်ကိုလေးစေရုံသာ အဖတ်တင်လိမ့်မည်။

ထန်မော့တိုက်ရိုက်ပင်မေးလိုက်သည်။

"ခင်များစမှတ်ကို ဘယ်တော့ဖွင့်ချင်လဲ"

အလကားရသည့်နေ့လည်စာဟူ၍မရှိချေ။

သူကိုဤအကြောင်းအရာများ အားလုံးကိုပြောပြရခြင်းမှာ ကြက်ဆင်ဥအား သုံးရန် သူ့ထံမှ အကူအညီလို၍ဖြစ်ကြောင်း သိနေ၍ပင်။ သို့မဟုတ်ပါက ဤလူမှာ ထန်မော့အားဤ ကြက်ဆင်ဥကို ဖွင့်နည်းအကြောင်း ပြောပြခဲ့လိမ့်မည်မဟုတ်။ ယခု သူ ကြက်ဆင်ဥအား အသုံးပြုနည်းကိုလည်း သိပြီးပြီဖြစ်၍ တစ်ဖက်လူအား တစ်ခုခုပြန်လုပ်ပေးရန် လိုလိမ့်မည်။

၄င်းမှာလည်း ထိုလူအတွက် ဂိမ်းစမှတ်ကို သိမ်းပေးရန်ပင်။

ထိုအမျိုးသားက ထန်မော့ ဤမျှမြန်မြန် သဘောတူလိမ့်မည် မျှော်လင့်မထား၍ ခတ္တမျှ တိတ်ဆိတ်သွားခဲ့သည်။ အနည်းငယ်မျှ ကြာပြီးနောက် တစ်ဖက်အမျိုးသားက ခပ်တိုးတိုးဆိုလာခဲ့သည်။

"အခုဖွင့်ပေးပါ၊ ကျေးဇူးပါပဲ"

ထန်မော့သူ၏လက်ထဲမှ ကြက်ဆင်ဥ၏အပေါ်တွင်

လက်ညှိုးဖြင့် 'S' ဟု ရေးဆွဲလိုက်သည်။

ထိုသို့ဆွဲပြီးပြီးချင်းတွင် ကြက်ဆင်ဥအတွင်းထဲမှ အလင်းရောင်ဖျော့ဖျော့လင်းလာပြီး အင်္ဂလိပ်အက္ခရာ S သဏ္ဍာန်က တဖျက်ဖျက်လင်းလာခဲ့သည်မှာ ဂိမ်းသိမ်းမှတ်က ကောင်းကောင်း အလုပ်လုပ်နေကြောင်း အသိပေးနေသည့်နှယ်။

"ဂိမ်းစမှတ်သိမ်းနေတဲ့အချိန်မှာ ပိုင်ရှင်နှစ်ယောက်လုံးက တူညီတဲ့အတွေ့အကြုံကို မျှဝေရမှာ၊တောင်းပန်ပါတယ်။ မင်းငါ့အသံကို နောက်ထပ် တစ်နာရီလုံးလုံး ကြားနေရလိမ့်မယ်"

ထန်မော့၄င်းကို စိတ်မရှိချေ။ ကလေးများအကုန်

အိပ်နေကြပြီဖြစ်ကာ လီ၀မ်သည်လည်း အားကစားရုံထဲပြန်၀င်သွားချေပြီ။

သူ ကျောင်း၀န်းအတွင်း ဖြည်းညင်းစွာ လမ်းလျှောက်နေပြီး ရွက်ကြွေတွေအပေါ်နင်းမိသံ ချိုးချိုးချွတ်ချွတ် ထွက်လာနေသည်။ ထန်မော့အနေနှင့် တဖက်လူ၏ ဂိမ်းအတွေ့အကြုံကို တစ်နာရီခန့်နားထောင်ရသည်မှာ ကိစ္စကြီးမဟုတ်ချေ။

သို့သော်လည်း သူကညစ်ကျယ်ကျယ်ဟန်ဖြင့်ဆိုလိုက်သည်။

"လူကြီးမင်း ဖူ ခင်များဒါကို ကြိုပြီးပြောမထားခဲ့ဘူးနော်"

အစအဆုံးမရှိအောင် ကျယ်ပြောလှသောအဖြူရောင်ကမ္ဘာကြီးထဲတွင် ကောင်းကင်ရော မြေကြီးရော မရှိသည့်နှယ် ပါတ်၀န်းကျင်လေးမျက်နှာလုံး အဖြူရောင်များနှင့်ကာရံထားလေသည်။ ထိုအဖြူရောင်ကမ္ဘာကြီး၌ အိမ်သုံးလျှပ်စစ်ပစ္စည်းအဟောင်းများ အပုံလိုက် တောင်ပူစာနှယ်စုပုံလျက်ရှိသည်။ ထိုအထဲတွင် အ၀တ်လျှောက်စက်အဟောင်းများ၊ အပ်ချုပ်စက်များ၊ ရေဒီယိုများနှင့် မျက်နှာပြင်တွင် တစ်ဂျစ်ဂျစ်လိုင်းများ ထနေသော ရုပ်မြင်သံကြားစက်အဟောင်းများလည်း မရေတွက်နိုင်အောင်ရှိလေသည်။ ထိုပစ္စည်းများအားလုံးမှာ ဤအဖြူရောင်ကမ္ဘာကြီးထဲ အမှိုက်ပုံနှယ် စွန့်ပစ်ခံထားရသည်။

အရပ်မြင့်မြင့်နှင့် ခန့်ညားသည့်လူမှာ ဤအဟောင်းပစ္စည်းပုံများကြား လမ်းလျှောက်နေခဲ့သည်။ သူ၏လက်ထဲတွင် ကြက်ဆင်ဥတစ်ခုအား ကိုင်ထားကာ ၄င်းက 'S' သဏ္ဍာန် လင်းနေခဲ့သည်။ 'ခင်များ ကြိုပြောမထားခဲ့ဘူးနော်'ဟူသော စကားကို ကြက်ဆင်ဥထဲမှ ကြားလိုက်ရချိန် ဖူ၀မ်သော်၏ ခြေလှမ်းတို့နှေးကွေးသွားလျက် မျက်ခုံးတစ်ဖက်ကို ပင့်လိုက်မိသည်။

"...ဂိမ်းသိမ်းမှတ်ကိုဖွင့်လိုက်တော့မှ ဒီကန့်သတ်ချက်အကြောင်းကို သိလိုက်ရတာပါ"

ထန်မော့က ပေါ့ပါးစွာ တုန့်ပြန်လိုက်သည်။

"ဒါပေမယ့် ခင်များအတွက် ကျွန်တော့်အချိန်တွေကို ဖဲ့ပေးနေရတယ်ဗျ"

ဖူ၀မ်သော်ရယ်လိုက်ပြီး ဘာကိုမှ ထပ်၍ဆိုမလာတော့ချေ။ လျှပ်စစ်ပစ္စည်းအဟောင်းများ စွန့်ပစ်ထားသော ကမ္ဘာထဲ သူကရှေ့ဆက် စူးစမ်းနေခဲ့သည်။

ထန်မော့ ကြက်ဆင်ဥအား သူ၏အိတ်ထဲထည့်လိုက်ပြီး ကျောင်း၀န်းအတွင်း လမ်းလျှောက်နေခဲ့သည်။ သူ၏ခေါင်းထဲတွင်တော့ ထူးဆန်းသော အသံများနှင့်ပြည့်နှက်နေခဲ့သည်။ တခါတရံတွင် ၄င်းမှာ အပ်ချုပ်စက်သံများဖြစ်ကာ တခါတရံတွင်တော့ အ၀တ်လျှော်စက်သံများကိုလည်း ကြားရသည်။ သို့သော် လူကြီးမင်း ဖူထံမှတော့ စကားသံတစ်ခုသော်မျှ မကြားရတော့ချေ။

အချိန်ကိုဖဲ့ပေးလိုက်ရသည်ဟူသည့် စကားမှာ အလိမ်ပင်။ သို့သော် ၄င်းမှာ သူကအမည်မသိ လူစိမ်းကို စနောက်ချင်ရုံသက်သက်တော့မဟုတ်ခဲ့ချေ။ ၄င်းမှာ တစ်ဖက်လူအား' ခင်များကျွန်တော့်ကို အကြွေးတစ်ခုတင်နေတယ်နော်' ဟု အသိပေးချင်ရုံသာဖြစ်သည်။

ကြက်ဆင်ဥ၏ပိုင်ရှင်မှာ ထန်မော့က ဂိမ်းသိမ်းမှတ်ကို ဖွင့်ပေးရန် ကြက်ဆင်ဥ၏ အသုံးပြုပုံနှင့် သတင်းအချို့ကိုမျှဝေပေးခဲ့သည်။ ၄င်းပြီးနောက် လူနှစ်ဦးမှာ တစ်ယောက်ကိုတစ်ယောက် အကြွေးတင်မနေကြတော့ချေ။

သို့သော် ယခုတော့ လူကြီးမင်းဖူမှာ ထန်မော့ထံ သီးသန့်အကြွေးတစ်ခုတင်သွားပြီဖြစ်ကာ ၄င်းက အကျိုးအမြတ်နောက်တစ်ခုကိုယူဆောင်ပေးလာလိမ့်မည်။

လူကြီးမင်းဖူက စကားတစ်ခွန်းမှမဆိုခဲ့သလို ထန်မော့မှာလည်းသူ၏ပါးစပ်ကိုမဟခဲ့ချေ။ သူက ကျောင်း၀န်းထဲ မိနစ်၂၀ခန့်လမ်းပါတ်လျှောက်နေခဲ့သည်။ ထို့နောက်တွင်သူက စာကြည့်တိုက်ရှေ့သို့ပြန်သွားလျက် ရေကန်ရှေ့တွင် ထိုင်ကာ လသည်ရေထဲတွင်အရိပ်ထင်နေသည်အား ငေးကြည့်နေခဲ့သည်။

မိနစ်လေးဆယ်ခန့်ကျန်ရှိနေသေးသည်။

ထန်မော့ နောက်ထပ်မိနစ်လေးဆယ်အား မည်သို့အချိန်ဖြုန်းရမည်လဲဟု စတင်တွေးတောနေစဥ် ဖူ၀မ်သော်က သူ့အား နောက်ထပ်စောင့်ရအောင် မလုပ်ခဲ့ချေ။ ငါးမိနစ်ခန့်ကြာပြီးနောက် ပြင်းထန်သော တိုက်ခိုက်သံတချို့ကို ကြားလိုက်ရကာ ထန်မော့ ဂရုတစိုက်နားထောင်နေလိုက်သည်။

သတ္တုအချင်းချင်းထိခတ်မိသံတို့အား ကြားလိုက်ရသည်။ အသံမှာမြန်လွန်းလှသည်။ တိုက်ခိုက်မှုတစ်ချက်ချင်းအကြားတွင် စက္ကန့်၀က်မျှသာ ခြားလေသည်။ ထိုငါးမိနစ်အတွင်း လူကြီးမင်းဖူအား များပြားသော အရာတို့က ၀ိုင်း၍တိုက်ခိုက်နေကြပုံပင်။ လူကြီးမင်း ဖူကတော့ အသံတစ်ချက်မျှမထွက်ခဲ့ချေ။ သို့သော် ဆယ်မိနစ်ဆက်တိုက် တိုက်ခိုက်ပြီးနောက်တွင် တစ်ဖက်မှ အသက်ပြင်းပြင်းရှူသံကို အနည်းငယ်ကြားလိုက်ရသည်။

မရေတွက်နိုင်သော သတ္တုပစ္စည်းများ ပြိုကျသံများကို ကြားရပုံထောက်လျှင် လူကြီးမင်းဖူက ပြိုင်ဘက်အများကြီးအား အနိုင်ယူခဲ့ပြီးဖြစ်ပုံပင်။

သို့သော် တစ်ဖက်မှ တိုက်ခိုက်မှုများကတော့ ရပ်တန့်မသွားခဲ့ချေ။ တိုက်ခိုက်သံများကပိုပို ပြင်းထန်လာပြီး ဓါးနှင့် လေးလံသောအရာ၀တ္တုများ ထိခတ်သံများကို အတိုင်းသားကြားနေခဲ့ရသည်။

ဂိမ်းသိမ်းမှတ်ကို စဖွင့်ပြီးကတည်းက ၅၅မိနစ်ကျော်လွန်သွားခဲ့ချေပြီ။ ထန်မော့ကျောကိုဆန့်တန်းလိုက်လျက် ထိုတိုက်ခိုက်သံများကို ဂရုတစိုက်နားထောင်နေခဲ့သည်။ တစ်ချက်လေးမျှမလွတ်စေရပေ။

တစ်ဖက်လူကမည်သည်တို့ကို ရင်ဆိုင်နေရသလဲ သူမမြင်နိုင်ချေ။ သို့သော် အသံကိုနားထောင်ရရုံဖြင့်ပင် လူကြီးမင်းဖူ၏တိုက်ခိုက်စွမ်းရည်က သန်မာလွန်းကြောင်း ခန့်မှန်းနိုင်သည်။ ဤသည်မှာ မိနစ်သုံးဆယ်ကြာ မနားတမ်းတိုက်ခိုက်မှုမျိုးဖြစ်ကာ ရန်သူများကအဆုံးမဲ့အောင်ရှိနေဆဲဖြစ်သော်လည်း သူကတော့ အလျှော့မပေးပဲ တိုက်ခိုက်နေဆဲပင်။

အမှန်တကယ် သန်မာလွန်းလှသည်။

ဘုန်း...

ကျယ်လောင်သောပေါက်ကွဲသံတစ်ခု...

ထန်မော့ပင်လျှင် ထိတ်လန့်သွားခဲ့သည်။ ထိုပေါက်ကွဲအား ရင်ဆိုင်ခဲ့ရသည့် လူကြီးမင်း ဖူဆိုလျှင် မည်သို့ဖြစ်မည်နည်း။

"ငါ မရတော့ဘူး..."

အက်ကွဲနေသော အသံတစ်ခုကဆိုလာခဲ့သည်။

ထန်မော့ အလျင်အမြန်ဆိုလိုက်သည်။

"ဂိမ်းသိမ်းမှတ်ပြည့်ဖို့ တစ်မိနစ်ကျန်နေတုန်းပဲ၊ အမြန်ဖွင့်လိုက်တော့လေ"

"နောက်ကျသွားပြီ"

ထန်မော့၏ခေါင်းမှ အသံများတိတ်ဆိတ်သွားသည်အထိ ထိုစကား၏အဓိပ္ပါယ်ကို နားမလည်ခဲ့ချေ။ အိတ်ထဲမှ ကြက်ဆင်ဥကိုအလျင်အမြန်ထုတ်ကြည့်လိုက်ရာ 'S' သဏ္ဍာန်မှာ ပျောက်ကွယ်သွားခဲ့ပြီဖြစ်ကာ အပြာရောင်အလင်းလည်း မရှိတော့ချေ။ သို့သော် သူအများကြီးဆက်မတွေးနိုင်ခင် ဥမှာ တဖန်ပြန်လင်းလာခဲ့ပြီး ၄င်းမှာ သုံးချက်ခေါက်၍ ဆက်သွယ်လာသော အလင်းမျိုးဖြစ်လေသည်။

"ဒီဂိမ်းက ရှုံးသွားပြီ၊ စမှတ်ကိုသိမ်းလိုက်ရတယ်"

အရာအားလုံးမှာ ဆယ်စက္ကန့်အတွင်း ဖြစ်ပျက်သွားခဲ့သည်။ လွန်ခဲ့သော ဆယ်စက္ကန့်က တဖက်လူ၏အသံမှာ ဒဏ်ရာပြင်းပြင်းထန်ထန်ရထားသကဲ့သို့ အက်ကွဲနေခဲ့သော်လည်း ယခုမူ လွန်ခဲ့ကတစ်နာရီက အသံအတိုင်း အလွန်တည်ငြိမ်အေးဆေးနေခဲ့သည်။

ထန်မော့ မျက်မှောင်ကျုံ့လိုက်မိသည်။

"လူကြီးမင်းဖူ ခင်များအခုလေးတင်ပဲ စမှတ်ကို သိမ်းဖို့နောက်ကျသွားပြီလို့ပြောခဲ့တာ"

"ဂိမ်းကိုသိမ်းဖို့ကို 'S'ကိုဆွဲရပြီးတော့ စမှတ်ကိုပြန်ဖွင့်မယ်ဆို 'L'လို့ဆွဲရတယ်၊ တစ်ခုက သိမ်းဖို့ တစ်ခုက ပြန်ဖွင့်ဖို့။ ငါအခုအနက်ရောင်မျှော်စင် မွန်းစတားတစ်ကောင်နဲ့တိုက်ခိုက်ခဲ့ရတယ်၊ ဒါပေမယ့် ငါ့ထက်အရမ်း သန်မာလွန်းနေတယ်။ ပြီးတော့ အချိန်က တစ်မိနစ်တောင်မကျန်တော့ဘူး။ အဲဒါပြီးရင် စမှတ်ကို သိမ်းရင်လည်း အလကားဖြစ်သွားလိမ့်မယ်။ ပြီးတော့ 'L'ကိုဆွဲဖို့ အချိန်မရတော့ဘူး"

ခတ္တအကြာတွင် ထန်မော့က တုန့်ပြန်လာခဲ့သည်။

"ခင်များ စမှတ်ကိုပြန်ဖွင့်ဖို့အချိန်မရှိခဲ့ဘူးဆိုရင် ခင်များ ဘယ်လို..."

" စမှတ်ကိုပြန်ဖွင့်ဖို့ နောက်တစ်နည်းရှိသေးတယ်၊ "

အမျိုးသား၏အသံက တည်ငြိမ်စွာဆိုလာခဲ့သည်။

" ဂိမ်းသိမ်းမှတ်ကိုဖွင့်ပြီး တစ်နာရီအတွင်း မင်းသေသွားမယ်ဆိုရင် ဂိမ်းကအလိုအလျောက် သိမ်းပေးပြီး အစကပြန်ဖွင့်ပေးလိမ့်မယ်။ ဒါကြောင့် ငါ့ကိုယ်ငါသေအောင်လုပ်ပြီး အစကပြန်စခဲ့တာ"

ထန်မော့ တိတ်ဆိတ်နေခဲ့သည်။

အရေးကြုံလာလျှင် မိမိကိုယ်ကိုသတ်ဖို့ ၀န်မလေးသူ ၊ ထန်မော့သည်လည်း ထိုသို့လုပ်မိမှာပင်။ သို့သော် ဤလူလောက် ပြတ်သားလိမ့်မည်ဟု မခံစားရချေ။

"ငါ့ကြောင့် တစ်နာရီလောက်အချိန်ကုန်သွားရပြီ၊ မင်းအလုပ်များနေသေးလား၊ တောင်းပန်ပါတယ်"

ထန်မော့မှ ကြယ်နှင့်လများကို တစ်နာရီကြာ စိုက်ကြည့်နေခဲ့တာဖြစ်သည်။

"ရပါတယ်၊ ကိစ္စမရှိပါဘူး"

အနာဂါတ်မှာ အကျိုးရှိလာမှာပဲလေ...

"ငါ အခုပဲ မျှော်စင်ရဲ့ ဒုတိယအထပ်ကို တိုက်ခိုက်နေခဲ့တာ"

ကြားလိုက်ရသည့်လူမှန်သမျှ အသက်ရှူရပ်သွားရမည့် သတင်းကို ပြောဆိုနေခဲ့သည့်တိုင် ထိုလူ၏အသံမှာတော့ ခပ်တိုးတိုးနှင့် တည်ငြိမ်နေခဲ့သည်။

"လူတစ်ယောက်ရဲ့ခွန်အားက အဆင့်တစ်ခုအထိ မြင့်လာရင် အဲဒီလူက မျှော်စင်ကို မဖြစ်မနေတိုက်ခိုက်ရလိမ့်မယ်၊ ရွေးချယ်စရာမရှိဘူး။ အဲဒါက မျှော်စင်တိုက်ခိုက်တဲ့ဂိမ်းကို ဖွင့်နည်းတစ်မျိုးပဲ။ တခြားနည်းတွေလည်းရှိဦးမယ် ထင်ပါတယ်"

ထန်မော့မှာ 'မျှော်စင်၏ဒုတိယထပ်ကို တိုက်ခိုက်နေသည်'ဟူသော စကားကို ကြားကတည်းက အေးခဲနေခဲ့ခြင်းပင်။

သူရုတ်ချည်းဆိုသလို ခန့်မှန်းချက်တစ်ခုအား တွေးမိသွားခဲ့သည်။

သို့ဆိုလျှင် ဤ လူကြီးမင်းဖူမှာ...

တစ်ဖက်အမျိုးသား၏ ခပ်နိမ့်နိမ့်နှင့် ဆွဲဆောင်မှုရှိသော အသံမှာ အပြုံးသဲ့သဲ့ပါ၀င်နေသည့်နှယ် ခံစားရစေသည်။

"ဟယ်လို ထန်မော့၊ ငါက ဖူ၀မ်သော်ပါ"

မော့မော့(ကြက်ဆင်ဥ)၏ ဆက်သွယ်မှု ရပ်တန့်သွားခဲ့သော်လည်း ထန်မော့မှာ အားကစားခန်းမသို့ပြန်သွားရန် အလျင်မလိုခဲ့ချေ။ ရေကန်နံဘေးမှ ကျောက်တုံးတစ်တုံးပေါ်တွင် ထိုင်လျက် လက်ထဲမှ အဖြူရောင်ကြက်ဆင်ဥအား ကြည့်နေခဲ့မိသည်။

🪩

Prev Next