MM Story Teller

Chapter 29

Viewers 2k

🌍Chapter 29

ကျယ်လောင်ပြီး မြူးကြွသော တေးသီချင်းသံနှင့်အတူ မျက်စိကျိန်းဖွယ် အလင်းရောင်ကလည်း တဖြည်းဖြည်း မှိန်ဖျော့ပျောက်ကွယ်သွားခဲ့သည်။

လူအုပ်မှာ မိမိတို့ရှေ့မှမြင်ကွင်းအား ထိုအခါမှ သဲသဲကွဲကွဲမြင်လိုက်ရလေသည်။

ကျယ်၀န်းသောအဖြူရောင်ကမ္ဘာကြီးထဲတွင် အလယ်ဗဟို၌ သေးငယ်သော စက်၀ိုင်းသဏ္ဍာန်စင်မြင့်တစ်ခုရှိနေခဲ့သည်။ ၄င်းပတ်လည်တွင် ရောင်စုံမီးလုံးများ တပ်ဆင်ထားကာ နှစ်မီတာခန့်မြင့်နားသော မာရီယိုကြီးက ထိုစင်မြင့်ပေါ်တွင် ရပ်နေပြီး မီးရောင်တို့ တဖျတ်ဖျတ်လက်သွားခဲ့သည်။ ဂုဏ်ယူနေဟန်ဖြင့် လက်မကြီးအားထောင်ပြနေသည့် ပုံစံကပင် ရယ်ချင်စဖွယ်။

ထိုစင်မြင့်ပေါ်တွင် LEDဆိုင်းဘုတ်တစ်ခုက လေထဲတွင် ချိတ်ဆွဲထားခဲ့သည်။ ထိုဆိုင်းဘုတ်က '၆၄၅၆'ဟူသော ဂဏန်းအစုံလိုက်အား အနီရောင်ဖြင့် ဖော်ပြထားခဲ့သည်။

အဖြူရောင်ဆလိုက်မီးများက စင်၏အလယ်မှတဆင့် ထွန်းလင်းလာပြီး ပတ်၀န်းကျင်မှာလည်း တဖြည်းဖြည်းရုပ်လုံးပေါ်လာခဲ့သည်။

ထန်မော့၏ မျက်လုံးများ ကျဥ်းမြောင်းလိုက်မိသည်။

ကြီးမားသော မိုနိုပိုလီမြေပုံကြီးတစ်ခုက ထိုအဖြူရောင်ကမ္ဘာထဲတွင် ပေါ်လာခဲ့တော့သည်။

မာရီယို၏စင်မြင့်မှာ ထိုမြေပုံ၏ အလယ်တွင် တည်ရှိလေသည်။ ၄င်းတွင် စတုရန်းကွက် ၁၅၀ကွက်ပါရှိကာ ၊ တစ်ကွက်စီက ၁မီတာစီရှိလေသည်။ ထိုအကွက်တို့က တစ်ခုနှင့်တစ်ခုဆက်စပ်နေလျက် စင်ကို ပတ်ပတ်လည်၀ိုင်းထားခဲ့သည်။ စတုရန်းကွက်များမှာ ခြောက်ထောင့်သဏ္ဍာန်ပုံအား ထောင်လိုက်အနေအထားဖြင့် ဆက်သွယ်ထားပြီး မြွေလိမ်မြေကောက်သဏ္ဍာန်ပါတ်သွားခဲ့သည်။ အဆုံးတွင် လူရှစ်ယောက်ကရပ်နေခဲ့ပြီး အကွက်များအတိုင်းရှေ့ဆက်သွားပါကမူ မာရီယို၏ စင်မြင့်ထံ ဦးတည်နေမည်ဖြစ်သည်။

ထန်မော့၏ခြေထောက်အောက်တွင် အနီရောင်အကွက်တစ်ကွက်ရှိက ၄င်းက အခြားအကွက်များနှင့် ကွဲပြားလေသည်။

အကွက်များ၏ ထောင့်စွန်းတစ်ခုစီတိုင်းက အဖြူရောင်လင်းလက်နေပြီး လူရှစ်ယောက်ရပ်နေသည့် အကွက်များကတော့ အနီရောင်လင်းလက်နေခဲ့သည်။ ၄င်းမှာ သွေးကဲ့သို့အနီရောင်ဖြစ်ကာ အလယ်တွင် အင်္ဂလိပ်စာလုံးတချို့ ရေးထားခဲ့သည်။

『START』

"လူတိုင်းပဲ မာရီယိုရဲ့ မိုနိုပိုလီဂိမ်းကနေကြိုဆိုပါတယ်"

ကျယ်လောင်သော ယောကျာ်းသံကြီးက လူတိုင်းအား ထိတ်လန့်မှုကြောင့်ထခုန်မိစေတော့မတက်။

သူတို့မသိလိုက်ခင်မှာပင် မာရီယိုက လက်မကြီးထောင်လျက် ပို့စ်ပေးမနေတော့ချေ။ သူကစင်မြင့်ပေါ်တွင်ခါးထောက်လျက် ရပ်နေခဲ့လေသည်။

"ကဲ့ ချစ်စရာကလေးလေးတွေကို ဦးဦးရဲ့ မိုနိုပိုလီဂိမ်းကနေကြိုဆိုပါတယ်နော်၊ ဦးကတော့ ကလေးတို့ရဲ့အကောင်းဆုံး ငယ်သူငယ်ချင်း မာရီယိုပါ။"

ထန်မော့ ငယ်စဥ်က စူပါမာရီယိုဂိမ်းကို မကြာခဏကစားခဲ့ဖူးသည်။ မှိုလေးများကိုနှစ်သက်သည့် ပိုက်ပြင်သမားလေးမာရီယိုမှာ ကမ္ဘာပေါ်တွင်အကြော်ကြားဆုံးဂိမ်းတစ်ခုဖြစ်ခဲ့သည်ပင်။ သူ အမှန်တကယ်ပင် မာရီယိုအား ရင်းနှီးလေသည်။ ထန်မော့အပါအ၀င် ကျန်လူ၇ယောက်မှာ ကြီးမားသော မာရီယိုကြီးကို ကြည့်လိုက်ကြသည်။ တစ်ယောက်ကမှ သတိမလွတ်ရဲချေ။

မာရီယိုမှာ ၄င်းကိုသတိမထားမိဟန်ဖြင့်

"အိုး... မျက်လုံးလေးတွေကို ကြည့်ပါဦး၊ ချစ်စရာကလေးလေးတွေ မငိုနဲ့နော်၊ ဦးက မင်းတို့ရဲ့ အချစ်ဆုံး မာရီယိုလေ။ ဒါကပျော်ရရွှင်ရမယ့်အချိန်ပါ၊ ကလေးလေးတွေရဲ့ အချစ်ကြောင့် ဦးဦးဟတ်ထိရလွန်းလို့ ညတိုင်း မျက်ရည်ကြမိတယ်ကွယ်။ ကလေးလေးတွေက ဦးဦးကိုသိပ်ချစ်တာမို့လို့ ဦးက ကလေးတို့အတွက် မိုနိုပိုလီဂိမ်းကို ပြင်ဆင်ပေးမယ်။ ကလေးတို့ ဒီဂိမ်းက ဦးဦးမာရီယိုကိုချစ်တဲ့ကလေးတိုင်း အတွက်ပဲ"

ထန်မော့ မာရီယိုအားစေ့စေ့ကြည့်လျက် ဂရုစိုက်နားထောင်နေသည်ဟု ထင်ရသော်လည်း သူ၏အာရုံတို့က ဘေးမှ လူခုနှစ်ယောက်ကိုရော အောက်မှ စတုရန်းကွက်များကိုပါ စူးစမ်းနေခဲ့ခြင်းဖြစ်သည်။

အရာအားလုံးဖြစ်ပျက်သွားပြီးဖြစ်ကာ သူလည်း ထိုလူများနှင့်အတူ ဤဂိမ်းထဲသို့ရောက်လာပြီမို့ သူ့အား ဂိမ်းထဲ ဆွဲခေါ်လာသော ထိုလူများကို အညှိုးထားနေရန် အချိန်မရှိချေ။ ဤဂိမ်းကို မည်သို့နိုင်အောင် ဆော့ရမည်ကိုသာ အဖြေရှာရလိမ့်မည်။

လက်ရှိအန္တရာယ်အများဆုံးမှာ ဤထူးဆန်းသော ဂိမ်းဖြစ်သည်။

လူငယ်ကထရပ်လျက် တုန်ရီနေသော အသံဖြင့် မေးလာခဲ့သည်။

"ဒီ ဒီဂိမ်းက ဘာလဲ"

"သိပ်ကောင်းတဲ့ မေးခွန်းပဲ ကလေးလေးရေ"

မာရီယိုမှာ ညာဘက်လက်ကြီးကိုမြှောက်လျက် လက်မထောင်ပြလာပြန်သည်။

"ဒါကဆုလက်ဆောင်ရမယ့်ဂိမ်းမျိုးပေါ့၊ လိမ္မာပြီး စကားနားထောင်တဲ့ကလေးတွေက ဦးဦးမာရီယိုဆီကနေ အဖိုးတန်ဆုတွေလက်ခံရမှာနော်၊ ကလေးလေးတို့ ဦးဦးနဲ့ဂိမ်းလေးတစ်ခုဆော့ရအောင်ပါ၊ ဒီဆုတွေအကုန်လုံးက ကလေးတို့အတွက်ပါပဲ"

မာရီယိုဘေးသို့ဖယ်လိုက်လျှင် သူ၏နောက်မှ သေးငယ်သော ရွှေရောင် တောင်ပူစာလေးတစ်ခုကို တွေ့လိုက်ရတော့သည်။ မရေမတွက်နိုင်သော ရွှေနှင့်ငွေ လက်၀တ်လက်စားများက စင်မြင့်ပေါ်၌ တောင်ကုန်းလေးတစ်ခုနှယ် ပုံထားခြင်းခံရသည်။ မာရီယိုပြန်ရပ်လိုက်သည်နှယ် ထိုရွှေတောင်ကြီးလည်း ပြန်လည်ပျောက်ကွယ်သွားလေသည်။

"ရွှေတွေအများကြီးပဲ"

"ပြီးတော့ စိန်တွေရော... စိန်တွေအများကြီးပဲ"

မာရီယိုက ကြင်နာသော အပြုံးကိုဆင်မြန်းလျက်

"ဒါတွေအားလုံးက ကလေးတို့အတွက်ပါပဲ"

ထန်မော့ကအေးစက်စွာမေးလိုက်သည်။

"ဂိမ်းရဲ့စည်းမျည်းတွေကရော"

“ဒီအကွက်လေးတွေကိုတွေ့လား၊ ချစ်စရာဦးဦး မာရီယိုက ကလေးတို့နဲ့ မိုနိုပိုလီဂိမ်းကလေးတစ်ခုကို ဆော့ချင်လို့ပါ။ ဒီစင်ကိုအမြန်ဆုံးရောက်နိုင်တဲ့ ကလေးကပဲ ဒီဆုတွေအကုန်လုံးကို ရမှာနော်၊ ကလေးတို့ မိုနိုပိုလီဂိမ်းကို ကစားဖူးကြရဲ့လား"

မိန်းကလေးမှာ ခတ္တမျှတွန့်ဆုတ်နေပြီးနောက် ရှေ့သို့ထွက်လာခဲ့သည်။

"ကျွန်မဆော့ဖူးတယ်၊ မိုနိုပိုလီဂိမ်းအမျိုးမျိုးရှိပေမယ့် အားလုံးကတော့ အံစာတုံးလှိမ့်ရတာချည်းပဲ၊ အံစာတုံးကျတဲ့နံပါတ်အတိုင်း အကွက်ရွေ့ရတာ၊ အကွက်တစ်ခုစီတိုင်း ဆုလည်းပါသလို အပြစ်ဒဏ်လည်းပါပြီးတော့ တခါတလေ နောက်ကိုလည်းပြန်ရွေ့ရတတ်တယ်။ အဲဒါပဲမလား"

"ဟုတ်တယ် ဟုတ်တယ်၊ ငါလည်းဆော့ဖူးတယ်"

လူတစ်ယောက်ကလည်း အော်လိုက်သည်။

မာရီယိုကရယ်လိုက်သည်။

"ဦးရဲ့ကလေးလေးတွေက သိပ်တော်တာပဲ"

အနက်ရောင်မျှော်စင်၏ကာရိုက်တာမှာ ရင်းနှီးနေသည့် မာရီယိုဂိမ်းကာရိုက်တာဖြစ်သည်။ ထိုမာရီယို ကြင်နာစွာ ရယ်ရယ်မောမော ပြောနေသည်ကို ကြားရပြီးနောက် လူအများမှာ အရမ်း သတိထားမနေတော့ပဲ အနည်းငယ်စိတ်အေး လက်အေးဖြစ်လာကြသည်။

ထန်မော့ကမူ မာရီယိုအား လှုပ်ရှားမှုကင်းမဲ့စွာ စိုက်ကြည့်နေတုန်းပင်။

" ဦးမာရီယိုရဲ့ မိုနိုပိုလီဂိမ်းထဲမှာတော့ မှော်အံစာတုံးတစ်ခုရှိတယ်"

မာရီယိုမှာ လက်ကိုဆန့်တန်းလျက် လက်ဖျောက်တီးလိုက်လျှင် ကောင်းကင်ပေါ်မှ အံစာတုံးကြီးတစ်ခု ကစားသမားများရှေ့သို့ ပြုတ်ကျလာခဲ့သည်။

"ဒါက သိပ်ကိုကံကောင်းစေတဲ့ အံစာတုံးပဲ၊ ကလေးတိုင်းက အစဥ်လိုက် အံစာတုံးကို ပစ်ရမယ်၊ ကျတဲ့နံပါတ်အလိုက် အကွက်တွေရှေ့ကိုတိုးတိုးသွားရမယ်၊ ဒီစင်မြင့်ပေါ်ကို အရင်ဆုံးရောက်လာတဲ့သူကသာ ဦးဦးမာရီယို ပြင်ဆင်ပေးထားတဲ့ လက်ဆောင်တွေအားလုံးကို ရမှာနော်"

ထိုမျှရိုးရှင်းပါသည်လော...

ထန်မော့မျက်မှောင်ကျုံ့လျက် ပါးစပ်ကိုဖွင့်ရန်ပြင်လိုက်သည်။ သို့သော် အိုမင်းနေသောအသံတစ်ခုက သူ့ထက်အရင်ဦးသွားခဲ့သည်။

"ဒီအကွက်တွေထဲ အန္တရာယ်ရှိတာရောပါလား ဟင်"

ထန်မော့မှာ ခြေထောက်အဆစ်လွဲဟန်ဆောင်ခဲ့သော အဘိုးကြီးအားလှည့်ကြည့်လိုက်သည်။

မာရီယိုကမူ ပြုံးရွှင်လျက်ဆိုလာခဲ့သည်။

"ကံကောင်းတဲ့ကလေးလေးတွေက ဘယ်လိုလုပ် အန္တရာယ်ကျမှာလိမ့်နော်"

ထန်မော့ကမေးခွန်းကို ပြောင်းလဲလိုက်သည်။

"ဒီအကွက်တွေကဘာတွေလဲ"

မိုနိုပိုလီဂိမ်းထဲတွင် ကစားသမားတစ်ယောက်က အကွက်တစ်ခုစီမှာကျတိုင်း ဆုသို့မဟုတ် ပြစ်ဒဏ်ကို လက်ခံရမည်ပင်။ ရိုးရိုးမိုနိုပိုလီဂိမ်းများတွင်ကား ဆုကြေးများမှာ ရွှေပြားတချို့သော်လည်းကောင်း ရှေ့သို့အကွက်အနည်းငယ်တိုးရန်သော်လည်းကောင်း ဖြစ်တတ်သည်ပင်။ အပြစ်ဒဏ်များမှာတော့

ရွှေပြားများ ဆုံးရှုံးခြင်းနှင့် စမှတ်သို့ ပြန်ရွေ့ရခြင်းတို့သာလျှင်ဖြစ်တတ်သည်။

မာရီယိုကရှင်းပြလာသည်။

"ဒီအကွက် ၁၅၀ထဲမှာ ဦးဦးက ကလေးတို့အတွက် ပြင်ပေးထားတဲ့ လက်ဆောင်တွေမှအများကြီးပဲ။ ကံကောင်းတဲ့ ကလေးတွေက အဲဒီဆုတွေကိုရမယ်။ ဦးဦးကတော့ အဲဒါကို ဆုအကွက်တွေလို့ခေါ်တယ်။ ဒါပေမယ့်လည်း လိမ္မာတဲ့ကလေးတွေရှိသလို ကလေးဆိုးတွေလည်းရှိသေးတယ်မလား။ တခါတလေမှာ ကလေးဆိုးတွေက ဦးဦးမာရီယိုကို ၀မ်းနည်းအောင်လုပ်တတ်တယ်။ ဒါကြောင့် ကလေးဆိုးလေးတွေကို အပြစ်ပေးဖို့ အကွက်တွေလည်းရှိတာပေါ့၊ အဲဒါတွေက ပြစ်ဒဏ်ကွက်တွေလို့ခေါ်တယ်"

'အပြစ်ဒဏ်'ကိုကြားလိုက်ရသည်နှင့် လူတိုင်း၏ရင်ထဲမှ တစ်ချက်ဆောင့်ခုန်သွားခဲ့သည်။

မာရီယိုကြီးမှာ လူတိုင်းအား အနက်ရောင် မျက်လုံးများနှင့်ကြည့်လိုက်ပြီး သူ၏နှုတ်ခမ်းထောင့်မှာ ကော့တက်သွားလျက် ထူးဆန်းသော အပြုံးတစ်ခုကိုဖော်ပြလာခဲ့သည်။

"ကလေးလေးတွေကလိမ္မာလေ ဦးဦးမာရီယိုက ကလေးလေးတို့ကို ဆုကောင်းကောင်းတွေပေးလေပဲ၊

အကွက်ထဲကိုကျသ၍ စိတ်တောင်မကူးနိုင်တဲ့ဆုမျိုးတွေရမှာနော်၊ ဥပမာ စွမ်းရည်တစ်ခုခုပဲဖြစ်ဖြစ်၊ ဂိမ်းကူပစ္စည်းပဲပဲဖြစ်ဖြစ်လေ၊ ဦးဦးကတော့ဒါကို ဘုရင်ကွက်လို့ခေါ်တယ်။"

ထန်မော့ အသက်ရှူနှုန်းများ လေးပင်သွားခဲ့သည်။

စွမ်းရည်...

ဂိမ်းကူပစ္စည်း...

ဤမိုနိုပိုလီဂိမ်းထဲတွင် သူတို့ဤပစ္စည်းများကိုရနိုင်မည်လား...

တခြားလူ၇ယောက်လည်း အေးခဲသွားခဲ့သည်။ သူတို့၏မျက်လုံးများမှာ တလက်လက်တောက်ပနေပြီး ၄င်းတို့ထံမှ လောဘများကို မဖုံးကွယ်နိုင်ခဲ့ချေ။

ထန်မော့ရုတ်ချည်း ငြိမ်ကျသွားခဲ့သည်။ ထိုကဲ့သို့ဆုလာဘ်များရှိလျှင် အပြစ်ဒဏ်များလည်းရှိမှာပင်။

ထိုမျှ ထူးကဲသောဆုများနည်းတူ အပြစ်ဒဏ်များမှာလည်း...

"ဒီမှာ ဦးဦးမာရီယိုက 'ထောင်ကွက်'လို့ခေါ်တဲ့ အကွက်တွေလည်းရှိတယ်၊ မကောင်းတာတွေလုပ်တဲ့ ကလေးဆိုးတွေက ဦးဦးမာရီယိုကို မချစ်တော့ဘူးလေ၊ သူတို့ကရုပ်ဆိုးဆိုးငှက်တွေနဲ့ ထူးထူးဆန်းဆန်း သကြားလုံးတွေကိုပဲ ကြိုက်ကြတော့တာ၊ "

ပြောရင်းနှင့် မာရီယို၏ပုံစံမှာ အလွန်ဒေါသတကြီးဖြစ်လာဟန်ဖြင့် သူ၏နှုတ်ခမ်းများမှာ ပြုံးနေသော်လည်း သူ၏မျက်လုံးများကတော့ အမုန်းတရားများ ကိုဖော်ပြနေခဲ့သည်။

"ဦးဦးမာရီယိုက မင်းတို့ကို ဒီလောက်နှစ်ပေါင်းများစွာ အလိုလိုက်ပေးလာတာကို ဘာလို့ရုပ်ဆိုးဆိုး ငှက်တွေကို ကြိုက်သွားရတာလဲ"

ဘုန်း...

မာရီယိုမှာ ဒေါသတကြီးခြေထောက်ကို ဆောင့်ချလိုက်လျှင် အဖြူရောင်ကမ္ဘာကြီးမှာ ငလျှင်လှုပ်သလို တုန်ခါသွားခဲ့သည်။

"ချစ်စရာကလေးလေးတွေ ဦးဦးကဘာပြောလိုက်မိတာလဲ"

မာရီယို၏အမူအယာမှာ ချက်ချင်းပြောင်းလဲသွားခဲ့သည်။ ထိုငလျင်၏တုန်ခါမှုမှာ ကျန်ရှိနေသေးသည့်တိုင် မာရီယိုကတော့ ချိုမြိန်သော အပြုံးကို ပြန်လည် ဆင်မြန်းလာခဲ့သည်။

"ဦးဦးမာရီယိုက ကလေးလေးတွေ လိမ္မာတယ်ဆိုတာ သိပါတယ်၊ လိမ္မာတဲ့ ကလေးလေးတွေက ဒီဆိုးတဲ့အကွက်တွေကို ကျမှာမဟုတ်ဘူး၊ ကလေးဆိုးတွေပဲ ကျမှာလေ ဦးဦးက အဆော့သန်တဲ့ကလေးလေးတွေအတွက် စိတ်၀င်စားစရာအကွက်တွေကိုပြင်ထားပေးသေးတယ်၊ အဲဒါက အလွတ်ခုန်အကွက်လို့ခေါ်တယ်"

ငလျင်မှာပြန်လည်တည်ငြိမ်သွားခဲ့ပြီဖြစ်သော်လည်း ထန်မော့၏အမူအယာမှာမူ အလွန်ရုပ်ဆိုးနေခဲ့သည်။

မာရီယိုကြီး၏ခွန်အားမှာ သူခန့်မှန်းထားသည်ထက် ပိုလွန်းနေသည်။ ဤကဲ့သို့ပြင်းထန်သော တုန်ခါမှုကို ဖြစ်ပေါ်စေနိုင်သည်မှာ ၄င်းကပွေးကြီးထက်ပင် ပို၍သန်မာကြောင်း သိသာလှသည်။

မာရီယိုမှာ တခြားလူများ၏ မျက်လုံးထဲမှ ကြောက်ရွံ့မှုများကို မမြင်လိုက်မိသည့်အလား။

"တစ်ယောက်ယောက်က အလွတ်ခုန်အကွက်ပေါ်ကျတဲ့အခါ သူကြိုက်တဲ့အကွက်ကို ခုန်သွားလို့ရတယ်။ ရွေးချယ်ခွင့်နှစ်မျိုးရှိမယ်၊ တစ်မျိုးက ရှေ့ကို အကွက် ၃၀ခုန်သွားလို့ရမယ်၊ နောက်တစ်မျိုးက ကြိုက်တဲ့အကွက်ကို နောက်ပြန်ခုန်လို့ရမယ်၊ ကလေးတွေက လွတ်လွတ်လပ်လပ်ခုန်ရတာကြိုက်ကြတယ်မလား၊ ဒါကသိပ်ပျော်စရာကောင်းတဲ့ အကွက်ပဲ သေချာပေါက် ကြိုက်ကြမှာပါ။ "

"နောက်ဆုံးအကွက်ကတော့ ဦးဦးမာရီယိုက ကလေးတို့အတွက် အထူးစပရိုက်ကို ပြင်ဆင်ပေးထားတဲ့ အကွက်ပဲ၊ အဲဒါက ဂိမ်းရှင်းကွက်လို့ခေါ်တယ်၊ ဟုတ်တယ်ဟုတ်တယ်၊ ကလေးတို့ကြားလိုက်တာအမှန်ပဲ၊ ဒီအကွက်ကိုကျလောက်အောင် ကံကောင်းတဲ့ဘယ်သူမဆို ဂိမ်းကို တိုက်ရိုက်ကျော်သွားနိုင်ပြီ။"

မာရီယိုကလက်ကိုဝေ့ယမ်းလျက် စိတ်လှုပ်ရှားစွာဆိုလာခဲ့သည်။

ထို့နောက် သူကခေါင်းကိုငုံ့လျက် လူရှစ်ယောက်ကို ကြည့်လာခဲ့သည်။

"ကလေးတို့ ဂိမ်းကစတော့မယ်နော် ဘယ်လိုလဲ၊ အဆင်သင့်ဖြစ်ပြီလား"

"တင်းတောင်~အုပ်စုဂိမ်းအကြီးစား 'မာရီယိုရဲ့ မိုနိုပိုလီဂိမ်း'ကို တရား၀င်စတင်လိုက်ပါပြီ၊ ဂိမ်းရဲ့စည်းမျဥ်းတွေကတော့..."

"ပထမအချက်၊ အံစာတုံးလှိမ့်တဲ့နံပါတ်ပေါ်မူတည်ပြီးတော့ ဒါမှမဟုတ် အလွတ်ခုန်အကွက်ကျတဲ့အပေါ်မူတည်ပြီးတော့သာ အကွက်အလိုက် ရှေ့တိုးရင်တိုး နောက်ဆုတ်ရင်ဆုတ်လုပ်လို့ရပါတယ်"

"ဒုတိယအချက်၊ ဘုရင်အကွက်ကတော့ အကွက်တွေအားလုံးပေါင်းရဲ့ ၅ရာခိုင်နှုန်းခန့်သာ ပါရှိမှာပါ၊ ဆုလာဘ်တွေကတော့ အနက်ရောင်မျှော်စင်ရဲ့ အသိအမှတ်ပြုမှုရရှိမှာဖြစ်ပြီး ဂိမ်းရဲ့ပြင်ပကို ယူဆောင်သွားလို့ရပါတယ်"

“တတိယအချက်၊ ထောင်ကွက်တွေကလည်း အကွက်တွေအားလုံးရဲ့ ၅ရာခိုင်နှုန်းခန့်ပါရှိမှာဖြစ်ပြီး မျှတမှုအရကျိန်းသေပေါက် သေဒဏ်ကွက်တွေလည်းပါရှိမှာဖြစ်ပါတယ်"

"စတုတ္ထအချက်၊ အလွတ်ခုန်အကွက်တွေကတော့ အကွက်အားလုံးရဲ့ ၂၀ရာခိုင်နှုန်းပါရှိမှာပါ"

“ပဥ္စမအချက်၊ ဆုအကွက်နဲ့ အပြစ်ဒဏ်အကွက်တွေက အကွက်အားလုံးရဲ့ ၂၀ရာခိုင်နှုန်းပါရှိမှာပါ။"

“ဆဌမအချက်၊ ဂိမ်းရှင်းကွက်ကိုနင်းမိတဲ့ ကစားသမားကသာလျှင် ဂိမ်းကိုတိုက်ရိုက် နိုင်မှာဖြစ်ပါတယ်"

“သတ္တမအချက်၊ ကျန်တဲ့အကွက်တွေကတော့ ဗလာကွက်တွေဖြစ်ပါတယ်"

“အဌမအချက်၊ ဂိမ်းထဲမှာသေဆုံးခြင်းဟာ ဂိမ်းပြင်ပမှာ သေဆုံးခြင်းနှင့်အတူတူပဲဖြစ်ပါတယ်"

“ချစ်စရာကောင်းတဲ့ ပိုက်ပြင်သမားဦးဦးက လိမ္မာတဲ့ကလေးတွေကိုအချစ်ဆုံးပါပဲ၊ ဒါပေမယ့် ကလေးဆိုးတွေအပေါ်တော့ သဘောမကောင်းဘူးနော်"

ခပ်စူးစူးကလေးသံက အားလုံး၏နားထဲတွင် ကြားလာရပြီး သူတို့၏အမူအယာမှာပြောင်းလဲသွားခဲ့သည်။

ဆုလာဘ်ကောင်းတွေအတွက် ကြီးမားတဲ့အန္တရာယ်တွေလည်းပါရှိတာပုံမှန်ပင်။ အနက်ရောင်မျှော်စင်က မျှတမှုအတွက် အပြစ်ဒဏ်ကွက်များထဲတွင် သေဒဏ်လည်းပါရှိမည်ဟု ဆိုခဲ့သည်။ ၄င်းမှာ ထိုအကွက်ကိုနင်းမိသူမှန်သမျှ သေမည်ဟုဆိုလိုခြင်းပင်။ သို့သော် ၄င်းအကွက်များမှာ စုစုပေါင်းအကွက်များ၏ ၅ရာခိုင်နှုန်းသာပါရှိမည့်ဖြစ်သည်။ ဘုရင်အကွက်ပေါ်နင်းမိလျှင်ဘာဖြစ်မည်နည်း။ စွမ်းရည်သို့မဟုတ် ရှားပါးဂိမ်းကူပစ္စည်းများ...ရနိုင်မည်လား။ အနက်ရောင်မျှော်စင်က၄င်းတို့ကို ဂိမ်းအပြင်သို့ထုတ်ယူနိုင်လိမ့်မည်ဟု ဆိုထားသည်။

အကယ်၍ သူတို့သာ ဘုရင်အကွက်ကို နင်းမိခဲ့လျှင်

အကယ်၍သာ...

မာရီယိုမှာ စင်အပေါ်မှရပ်လျက် လူရှစ်ယောက်ကို ပြုံးလျက် ကြည့်နေခဲ့သည်။ သူ၏ကြီးမားသောကိုယ်ကြီးမှာ လှုပ်ရှားမှုတစ်ခုစီတိုင်း တစ်ကျွတ်ကျွတ်အသံများကိုပြုလုပ်နေခဲ့သည်။ သူကဆိုခဲ့သည်။

"ကလေးတို့ ဂိမ်းကိုစလိုက်ကြစို့"

မိန်းကလေးမှာ မူလကအံစာတုံးကြီးကို ကိုင်ထားခဲ့သူဖြစ်သည်။ မာရီယိုက ဂိမ်းကိုစတင်ပြီဟုဆိုသည်နှင့် ဘေးမှလူအား တုန်လှုပ်စွာကြည့်လိုက်မိသည်။

"လင်း...လင်းဘန်းချန်း ငါအံစာတုံးမလှိမ့်ချင်ဘူး၊ နင်...နင်အရင်လှိမ့်ပါလား"

"ဘာလို့ငါလဲ"

လူငယ်၏မျက်နှာမှာ ရှုံ့မဲ့သွားလျက်

"ငါကဘာလို့အရင်လှိမ့်ရမှာလဲ"

မိန်းကလေးမှာ ၄င်းကို ကြားလျှင် လက်ထဲမှအံစာတုံးအား ကြမ်းပြင်ပေါ် အမြန်ချထားလိုက်သည်။

ခေါင်းပြောင်နှင့် သတ်လတ်ပိုင်းလူကြီးက တွန့်ဆုတ်စွာ ဆိုလာခဲ့သည်။

"အစဥ်လိုက်ဖြစ်ရမှာပေါ့၊ ငါတို့မှာ လူရှစ်ယောက်ရှိတယ်လေ၊ ငါကတော့ ငါတို့ဂိမ်းစကြေညာတဲ့ လူရဲ့ ပြောင်းပြန်အစဥ်လိုက်အတိုင်း အံစာတုံးလှိမ့်ဖို့အကြံပေးချင်တယ်၊ နောက်ဆုံးနာမည်ခေါ်ခံခဲ့ရတဲ့တစ်ယောက်က အံစာတုံးကိုအရင်ဆုံးလှိမ့်ရမယ်၊ ဘယ်လိုလဲ"

ထိုလူကြီး၏စကားတစ်ခွန်းဖြင့်ပင် အားလုံးက ထန်မော့အားကြည့်လာခဲ့သည်။

ထန်မော့ကထိုသူတို့အား တည်ငြိမ်စွာပြန်ကြည့်လာခဲ့သည်။

"ကျွန်တော်အရင်လှိမ့်ရလို့ ပြဿနာမရှိဘူး၊ ဒါပေမယ့် ကျွန်တော်ကတော့ ခင်များတို့ကိုအချင်းချင်းသိကြမယ်လို့မထင်ဘူး၊ ကျွန်တော်သိချင်တယ်၊ အပြင်မှာတုန်းက ကျွန်တော့်ကိုဂိမ်းထဲရောက်အောင် ဘာလို့အတူလုပ်ကြံခဲ့ကြတာလဲ"

သူတို့က ထန်မော့မှာ အံစာတုံးအားအရင်လှိမ့်ရန် ဆန္ဒရှိသည်ဟုကြားလျှင် စိတ်အေးသွားခဲ့ကြသည်။

ဘီယာဗိုက်နှင့် သက်လတ်ပိုင်းလူကြီးကပြောလာသည်။

" ဒီကညီအစ်ကို မင်းအတွက်ကြောင့်သက်သက်မဟုတ်ပါဘူး၊ မင်းဒီဂိမ်းကဘယ်လောက်ထိ ရွံစရာကောင်းလဲ မသိပါဘူး၊ တို့တွေအဲဒီပန်းခြုံနားက ဖြတ်သွားတော့ အနက်ရောင်မျှော်စင်က ဂိမ်းတစ်ခုကိုဖွင့်မိလိုက်ပြီလို့ကြေညာလာတာပဲ၊ ဒါပေမယ့်ဒီဂိမ်းက လူရှစ်ယောက်ပြည့်ဖို့လိုနေတာ၊ အနက်ရောင်မျှော်စင်ပြောတာက လူရှစ်ယောက်မပြည့်သ၍ တို့တွေဂိမ်းထဲလည်း၀င်မရ ပန်းခြုံအနားက ဆယ်မီတာထက်လည်းပိုသွားမရပဲ တသက်လုံးပိတ်မိနေတော့မှာတဲ့၊ ပြီးတော့ ဂိမ်းထဲ၀င်ချင်ရင် မနက်၆နာရီကနေ ညနေ၆နာရီအတွင်း ပန်းခြုံကိုထိရမှာ၊ ငါ့မှာ လူ၈ယောက်ပြည့်ဖို့ကို တစ်ရက်ကျော်ကျော်လောက် စောင့်လိုက်ရတာ၊"

ထန်မော့ကအတွေးတို့ဖြင့်ခေါင်းငြိမ့်လိုက်သည်။

"ဒီတော့ ခင်များက ၇ယောက်မြောက်လား"

ထန်မော့ လူအိုကြီးကိုကြည့်လျက်မေးလိုက်သည်။

"ငါကဒီလူတွေဆီက လှည့်စားခံလိုက်ရတာလေ၊ "

လူအိုကြီးကအေးစက်စွာဆိုလာခဲ့သည်။

"ငါတို့ကဘာလို့ အံစာတုံးကို အစဥ်လိုက်ပြောင်းပြန်လှိမ့်ရမှာလဲ၊ မင်းကသာငါတို့ကိုအရင် ဂိမ်းထဲဆွဲခေါ်ခဲ့တာ၊ ဂိမ်းကိုအရင်ဆုံးစဖွင့်တဲ့သူက အံစာတုံးကို အရင်လှိမ့်ရမှာပေါ့၊ မင်းကသာအရင်ငါတို့အားလုံးကို အန္တရာယ်များတဲ့ ဂိမ်းထဲကိုဆွဲခေါ်ခဲ့တာကွ"

သက်လတ်ပိုင်းအရွယ်မိန်းမကြီးက ဖြူဖျော့လျက်ဆိုလာခဲ့သည်။

"ကျွန်မလည်းမလုပ်ချင်ပါဘူး။ ကျွန်မကပန်းခြုံနားခဏထိုင်ပြီး နားရုံလေးနားချင်ခဲ့တာ၊ ဒီလိုဖြစ်လာမယ်လို့ ဘယ်သူကကြိုသိမှာလဲ၊ ကျွန်မကတော့အရင်မလှိမ်ချင်ဘူး၊ ပြောင်းပြန်အစဥ်လိုက်ပဲ လှိမ့်ကြ"

လူခုနှစ်ယောက်မှာ စတင်ငြင်းခုံလာခဲ့သည်။

"မင်းသာ ဂိမ်းကိုစမဖွင့်ခဲ့ရင်၊ ငါတို့တွေအကုန်ဒီဂိမ်းထဲ၀င်လာရမယ်များထင်နေလား၊ မင်းကအရင်စရမှာ"

"နင်ကငါးယောက်မြောက်ကို နင်အရင်မလှိမ့်ချင်လို့ ပြောနေတာမလား၊ အစကဖြင့်ငါတို့နဲ့ပေါင်းကြံခဲ့ပြီးတော့ အခုကျ အဲအဘိုးကြီးနဲ့ ကောင်လေးဘက်ကလိုက်ပြောပေးနေတာလား"

“ခင်များ..."

"ရန်မဖြစ်ရဘူး"

မာရီယို၏အသံကြီးကရုတ်တရက်ဟိန်းထွက်လာက လူတိုင်းတန့်သွားမိကြသည်။

"လိမ္မာတဲ့ကလေးလေးတွေကဘယ်တော့မှာ ရန်မဖြစ်ဘူး၊ မင်းတို့က လိမ္မာတဲ့ကလေးလေးတွေ မဟုတ်ဘူးလား"

🪩

Prev Next