MM Story Teller

Chapter 31

Viewers 2k

🌍Chapter 31

မာရီယိုကပြုံးလိုက်သည်။ သူ၏အမည်းရောင်မျက်လုံးများက အကွက်များပေါ်တွင်ရပ်နေသော ကစားသမားရှစ်ယောက်အား ထူးဆန်းသောအကြည့်တို့ဖြင့်ကြည့်နေခဲ့သည်။

"၅ကြိမ်မြောက် အံစာတုံးပစ်တဲ့အလှည့်မှာ တစ်ကွက်ထဲမှာအတူကျတဲ့ ကစားသမားတွေက 'ဘယ်သူက ငါနဲ့ပျော်ရွှင်မှုနဲ့ မျက်ရည်တွေကိုမျှဝေမလဲ'ဆိုတဲ့ သက်ရောက်မှု အသက်၀င်လာလိမ့်မယ်။ ဥပမာ ၁၉ကွက်မြောက်ပေါ့"

မာရီယိုက သက်လတ်ပိုင်းအရွယ်အမျိုးသမီးကြီးထံ ညွှန်ပြလျက်

"မင်း အံစာနံပါတ် ၂ကျရင် ၁၇ကွက်ကနေ ၁၉ကွက်ကိုရောက်သွားလိမ့်မယ်၊ ဒါဆိုအဲဒီအကွက်ကမင်းရဲ့ အကွက်ဖြစ်လာမယ်၊ အဲဒီနောက် ၁၉ကွက်ကိုရောက်လာတဲ့ဘယ်သူမဆို 'ငါ့ရဲ့ပျော်ရွှင်မှုနဲ့ မျက်ရည်တွေကိုဘယ်သူမျှဝေမလဲ'ဆိုတဲ့ သက်ရောက်မှုကို အသက်သွင်းမိလိမ့်မယ်"

မာရီယို၏အပြုံးကပို၍ကြီးမားလာခဲ့သည်။

"အဲဒီသက်ရောက်မှု အသက်၀င်လာတာနဲ့ မူလအကွက်ကဘာအကွက်အပဲ ဖြစ်ပါစေ အဆင့်၇အပြစ်ဒဏ်အကွက်အဖြစ်ချက်ချင်း ပြောင်းသွားလိမ့်မယ်။ အဲဒီအကွက်မှာ ကစားသမားတစ်ယောက်တည်းပဲ ကျန်တော့တဲ့အခါမှ သူ့ရဲ့နဂိုအကွက်ပြန်ဖြစ်သွားမယ်၊ ဘယ်လိုနည်းလမ်းပဲ သုံးသုံး ကစားသမားတစ်ယောက်ပဲ အကွက်ထဲမှာကျန်ရမယ်"

မာရီယိုက ထပ်၍ဆိုလာခဲ့သည်။

"သြော် ဟုတ်သား...မင်းတို့အခု ၁၉ကွက်ကိုသွားရင်လည်း မရတော့ဘူး။ ၅ကြိမ်မြောက် အံစာကိုခေါက်တာနဲ့ မင်းနင်းထားတဲ့အကွက်မှာ ဘယ်သူရောက်လာရောက်လာ အဲဒီသက်ရောက်မှုက အသက်၀င်လာဦးမှာပဲ"

ထန်မော့၏မျက်လုံးများမှာ ပြူးကျယ်လျက် ဆံပင်မွှေးများပင် ထောင်လာသည့်နှယ်။

လူ၇ယောက်မှာ မာရီယို၏စကားကို ချက်ချင်းနားမလည်ခဲ့ကြ။ သို့သော် တဖြည်းဖြည်းချင်း သဘောပေါက်သွားခဲ့ကြသည်။

သက်လတ်ပိုင်းအရွယ် မိန်းမကြီးမှာ ကြောက်လွန်း၍ ကြမ်းပြင်သို့လဲပြိုကျသွားခဲ့သည်။

"ဟင့်အင်း နင်က ငါတို့ကို အချင်းချင်း သတ်ခိုင်းနေတာပဲ"

ထိုအခါမှ ထန်မော့လည်း ထိုလွှမ်းမှိုးနိုင်သောပန်း၏ ရည်ရွယ်ချက်ကိုနားလည်သွားတော့သည်။ သူ၏နောက်မှ အကွက်ကိုနင်းသောသူက ထိုပန်းကိုရတော့မည်မဟုတ်ပဲ ထိုအကွက်မှာ အဆင့်၇ပြစ်ဒဏ်ကွက်အဖြစ် တိုက်ရိုက်ပြောင်းလဲသွားမှာ ဖြစ်သည်၊

အဆင့်သုံးအပြစ်ဒဏ်မှာ လူသားစား အနက်ရောင်မှိုကြီးဖြစ်သည်။

အဆင့်၇အပြစ်ဒဏ်ကွက်သည် အဘယ်နည်း။

လူတိုင်း ကြောက်ရွံ့တုန်လှုပ်နေကြသည်။

ား ထန်မော့ အသက်ကို ပြင်းပြင်းရှူလိုက်ကာ သူ၏ရင်ထဲမှပူပန်မှုကိုဖြေလျော့လိုက်သည်။ ထို့နောက်သူ၏အကြည့်တို့က မာရီယို၏ခေါင်းပေါ်မှ LEDဘုတ်ပြားကြီးထံ ရောက်ရှိသွားခဲ့သည်။ သူကမေးလိုက်သည်။

"အဲဒီဘုတ်ပြားပေါ်က နံပါတ်တွေက ဘာအဓိပ္ပါယ်လဲ"

အဖြူရောင်ကမ္ဘာကြီးထဲတွင် မာရီယိုက စင်ပေါ်တွင်ရပ်နေပြီး သူ၏ခေါင်းပေါ်မှ 6456ဟူသော နံပါတ်များကိုမော့ကြည့်လိုက်သည်။

မာရီယိုကထူးဆန်းစွာပြုံးလျက် ပြန်ဖြေလာခဲ့သည်။

"အာ...ဒါကိုမေးနေတာလား၊ ကလေးလေးကသိပ်ပြီး စပ်စုတတ်တာပဲ၊ ဒီဟာက ဦးဦးနဲ့မိုနိုပိုလီဂိမ်းကို အတူဆော့ခဲ့ဖူးတဲ့ ကလေးတွေရဲ့ အရေအတွက်လေ၊ စိတ်မကောင်းစရာက သူတို့ကစကားနားမထောင်တဲ့ ကလေးဆိုးလေးတွေပဲ၊ သူတို့ကဦးဦးရဲ့ဆုကို မရနိုင်ခဲ့ဘူးပေါ့၊ နံပါတ် 6464မြောက် ကလေးလေးရေ မင်းက ကံကောင်းတဲ့ ကလေးလေးဖြစ်လာမှာလား။"

ဤသည်မှာ "မာရီယိုရဲ့ မိုနိုပိုလီဂိမ်း" ပင်။

ဂိမ်းမှာ စတင်ရုံသာရှိပေသေးသည်။

သက်လတ်ပိုင်းအရွယ် အမျိုးသမီးကြီးမှာ အံစာတုံးကိုကိုင်လျက် တုန်ယင်နေခဲ့သည်။ သူမကကြမ်းပြင်ပေါ်တွင် ထိုင်ချလျက်ပင် စင်ပေါ်မှ မာရီယိုအား ကြည့်နေခဲ့သည်။ သူမမှာ အံစာတုံးကို မလှိမ့်နိုင်သေးချေ။

မာရီယိုကသူမကိုစိတ်ပူဟန်ဖြင့်

"ကလေးလေး ဘာဖြစ်လို့လဲ၊ ဘာလို့အံစာမပစ်သေးတာလဲ"

သက်လတ်ပိုင်းအရွယ်အမျိုးသမီးကြီးက မာရီယိုအားကြောက်ရွံ့စွာ ကြည့်လိုက်လေသည်။

မာရီယို၏အသံမှာ ရုတ်ချည်းအေးစက်သွားခဲ့သည်။

"မင်းက ဦးဦးမာရီယိုနဲ့ ဂိမ်းမကစားစေချင်ဘူးပေါ့"

အမျိုးသမီးကြီးမှာ ကြောက်လန့်စွာ အော်လျက် အံစာတုံးကိုပစ်ချလိုက်တော့သည်။ အံစာတုံးကြီးမှာ ကြမ်းပြင်ပေါ်တွင် သုံးကြိမ်ခန့်လိမ့်သွားပြီးနောက် နံပါတ် ၃တွင် ရပ်တန့်သွားခဲ့သည်။ သက်လတ်ပိုင်းအရွယ် အမျိုးသမီးကြီးက ကြောက်ရွံ့စွာ အော်လိုက်မိပြန်သည်။ သူမမှာ ထန်မော့ရှိနေသော အကွက်၂၀ကို တွားသွားလုနီးပါးပင်။ မာရီယိုမှာ မြေပေါ်တွင် တွားသွားနေသော ထိုအမျိုးသမီးကို ကြည့်လျက် ရယ်မောနေခဲ့သည်။

ထို့နောက်တွင် ကတုံးလူကြီး၏အလှည့်ဖြစ်သည်။

သူ့မှာ အံစာတုံးကို ကောက်ယူလိုက်စဥ် သက်လတ်ပိုင်းအရွယ် အမျိုးသမီးကြီးကို ကြောက်ရွံ့နေခဲ့သည်။

ကတုံးလူကြီးမှာ ၁၉ အကွက်တွင် ရပ်လျက် ငါးကြိမ်မြောက် အံစာတုံးကိုပစ်လိုက်ရတော့သည်။ ယခုလေးတင် သက်လတ်ပိုင်းအရွယ်အမျိုးသမီးကြီးမှာ

ထန်မော့၏ အကွက်၂၀တွင်အတူတကွရပ်နှင့်နေချေပြီ။ သို့သော် ထန်မော့မှာ ငါးကြိမ်မြောက် အံစာကိုမပစ်ရသေးသည်မို့ 'ငါ့ရဲ့ ပျော်ရွှင်မှုနဲ့ မျက်ရည်တွေကို ဘယ်သူမျှဝေမလဲ'ဟူသော သက်ရောက်မှုကို အသက်မ၀င်စေသေးချေ။

သို့သော် ကတုံးလူကြီးသာ ၁ ဂဏန်းကို ပစ်မိလျှင်

အကွက်၂၀ကိုရောက်လာမည်ပင်။ ထန်မော့အတွက်တော့မသက်ရောက်သော်လည်း အမျိုးသမီးကြီးနှင့် ကတုံးလူကြီးအတွက် ပြင်းထန်သော အပြစ်ဒဏ်ကို ခံစားရတော့မည်ပင်။

ကတုံးလူကြီးမှာ စတင်ချွေးပြန်လာခဲ့သည်။ သူလက်ကိုပင့်လျက် ဇောချွေးများကို အသာပွတ်သုတ်လိုက်မိသည်။ လက်ထဲမှ အံစာတုံးကြီးကိုကိုင်လျက်သား ခြေထောက်များကပါ တုန်ယင်နေခဲ့သည်၊ သက်လတ်ပိုင်းအရွယ် အမျိုးသမီးကြီးကမူ မြေပေါိတွင် ထိုင်လျက် ထိုလူ၏လက်ထဲမှ အံစားတုံးအား မျှော်လင့်ချက်အပြည့်ဖြင့် ကြည့်နေခဲ့သည်။

"နံပါတ်၁ မကျပါနဲ့ ကျေးဇူးပြုပြီး"

ကတုံးလူကြီးမှာ အော်ဟစ်လျက် မျက်လုံးကိုစုံမှိတ်ကာ အံစာတုံးကို ပစ်လိုက်တော့သည်။

ဘုန်း...

အံစာတုံးရပ်သွားသည်နှင့် သူကမျက်လုံးကို ဖွင့်ကြည့်လိုက်သည်။

၄င်းမှာ ၃ပင်။

ကတုံးလူကြီးမှာ စိတ်သက်သာရာရလျက် ၂၂ကွက်မြောက်ကို လျှောက်သွားလိုက်သည်။

ဤလူနှစ်ဦးမှာ ကြောက်ရွံ့နေခဲ့သော်လည်းဘီယာဗိုက်နှင့် ယောကျာ်းကြီးကတော့ အံစာကိုပစ်ရန် ယုံကြည်မှု ရှိနေခဲ့သည်။ သူက အံစာတုံးကို ကိုင်လျက် ကြောက်ရွံ့ခြင်းမဲ့စွာ အော်ဟစ်လိုက်သည်။

"ငါ့ရဲ့ကံက အဲလောက်ဆိုးလိမ့်မယ်မထင်ဘူး၊ ၁နဲ့ ၃ကိုဘယ်လို ကျနိုင်မှာလဲ၊ မဖြစ်နိုင်ဘူး"

ထန်မော့မှာ ၁၈ကွက်တွင် ရပ်နေသော ဘီယာဗိုက်နှင့်ယောကျာ်းကြီးကိုကြည့်လိုက်သည်၊ ထိုလူ၏လက်မှာ အလွန်တောင့်တင်းနေပြီး အံစာတုံးကို ကိုင်ထားသည်ဆိုရုံမျှသာ။

ဘီယာဗိုက်နှင့်ယောကျာ်းကြီးက သက်ပြင်းအသာမှုတ်ထုတ်လျက် အံစာတုံးကို ပစ်လိုက်တော့သည်။

အံစာတုံးလည်နေစဥ်မှာပင် သူ၏မျက်တောင်တို့ တစ်ချက်မျှမခတ်ခဲ့ချေ။ ၄င်းရပ်တန့်သွားသည်နှင့် ကောင်းမွန်သော နံပါတ်တစ်ခုကိုဖော်ပြလာခဲ့သည်။ သူက ၂၁ကွက်မြောက်သို့ အမောတကောပြေးသွားလိုက်လေသည်။

လေးယောက်မြောက်နှင့် ငါးယောက်မြောက်လူများက အံစာလှိမ့်ရချိန်တွင် ပို၍ သက်တောင့်သက်သာဖြစ်နေခဲ့ကြသည်။ သူတို့က ၁၄ကွက်နှင့် ၁၅ကွက် ကိုယ်စီတွင်ရပ်လျက် တခြားလူများထံမှာ ဝေးကွာနေဆဲပင်။

လေးယောက်မြောက် သက်လတ်ပိုင်းအရွယ်လူကြီးမှာ စကားအနည်းဆုံးဖြစ်ပြီး ထိုလူက ကျောက်ကောင်းဟုခေါ်သည်ကိုတော့ ထန်မော့မှတ်မိလေသည်။ နာမည်သည်ပင် အလွန်သာမာန်ဖြစ်လွန်းနေခဲ့သည်။ သူကဖြူဖျော့နေသောမျက်နှာဖြင့် အံစာတုံးကိုလှိမ့်လိုက်သည်။ အံစာတုံးပေါ်မှ ၁ဟူသည့် ဂဏန်းကိုတွေ့လျှင် သူကသက်ပြင်းကြီးချလိုက်ပြီး ၁၆ကွက်မြောက်ကိုလျှောက်သွားလိုက်သည်။

၅ယောက်မြောက် အံစာပစ်ရသူက လူရွယ်တစ်ဦးဖြစ်သည်။ သူက ၆ယောက်မြောက်မိန်းကလေးနှင့်ဘစုံတွဲများဖြစ်ကြပုံပင်။ တစ်ဦးမှာ ၁၄ကွက်၏နောက်မှာသာရှိသေးပြီး တစ်ဦးမှာတော့ ၂၂ကွက်ကျော်တွင်ဖြစ်သည်။

ထိုလူရွယ်ကသိပ်ပြီး ဖိအားမရှိလှချေ။ သူက ၂ဂဏန်းကို မကျသ၍ အန္တရာယ်ရှိမည်မဟုတ်။ သူက ၁၈ကွက်မြောက်သို့ရောက်ရှိသွားလျက် သူ၏အတွဲဖြစ်သူ မိန်းကလေးအလှည့်သို့ရောက်ရှိလာခဲ့လေသည်။

အားလုံးထဲတွင် ဤမိန်းကလေးက အပူအပင်အကင်းဆုံးဖြစ်သည်။ သူမကထန်မော့၏ရှေ့မှ အကွက်တွင်ရပ်နေခဲ့သည်။ သူမက အံစာတုံးကြီးကို ကိုင်လျက် တတွတ်တွတ်ရေရွတ်နေခဲ့သည်။

"၆ကျပါစေ ၆ကျပါစေ"

ထန်မော့မျက်ခုံးကိုအသာပင့်လိုက်မိသည်၊

ဘုန်း...

အံစာတုံးမှာ ၅ဂဏန်းကိုဖော်ပြလာခဲ့သည်။

၄င်းမှာ ၆မဟုတ်စေကာမူ မိန်းကလေးမှာ ပျော်ရွင်သွားခဲ့သည်။ သူမကတွန့်ဆုတ်ခြင်းမရှိ ၂၇အကွက်ကို လျှောက်သွားလိုက်သည်။ သို့သော် သူမထိုအကွက်တွင် ရပ်လိုက်သည့် ချက်ချင်း၌ အကွက်၏ အဖြူရောင် အနားသတ်များက အနီရောင်သို့ပြောင်းသွားခဲ့သည်။

"တင်းတောင်~သင်က အဆင့်၄ အပြစ်ဒဏ်အကွက်ကို အသက်သွင်းလိုက်ပါပြီ"

ဘုန်း...

ဧရာမလိပ်ကြီးတစ်ကောင်က ကောင်းကင်ပေါ်မှ ပြုတ်ကျလာခဲ့သည်။ ၄င်း၏ သေးငယ်သော အစိမ်းရောင်မျက်လုံးများက ၂၇ကွက်ထဲမှ မိန်းကလေးအား စိုက်ကြည့်နေပြီးနောက် စတင်တိုက်ခိုက်တော့သည်။ အလွန်လျင်မြန်စွာ ဖြစ်ပျက်သွားမှုကြောင့် မိန်းကလေးမှာ တုန့်ပြန်ချိန်ပင်မရလိုက်ချေ။ အနက်ရောင်လိပ်ကြီးက သူမ၏ပေါင်တံကိုကိုက်ဆွဲလျက် အသားအဖတ်လိုက် ကွာသွားစေသည်။

မိန်းကလေးမှာ နာကျင်စွာ အော်ငိုလျက် သူမ၏ သစ်သီးလှီးဓါးကို ထုတ်ယူလိုက်သည်။ သူမမှာ ထိုဓါးဖြင့် လိပ်ကြီးအားတိုက်ခိုက်ရန် ရုန်းကန်နေခဲ့ရသည်။ သို့သော် လိပ်ကြီးမှာ အလွန်မာကြောလှပြီး ဓါးနှင့်ထိမိသည့်အချက်တိုင်း မီးပွင့်လေးများပင် ထသွားရသည်။

"မေ့မေ့"

လူရွယ်က ပူပန်စွာ အော်ဟစ်လာခဲ့သည်။

လိပ်ကြီး၏ခေါင်းမှာမှာ မိန်းကလေး၏ခါးကို အကြိမ်ကြိမ်၀င်တိုက်နေခဲ့သည်။ မမြင်ရသည့်အကာအရံတစ်ခုက ထို၂၇ကွက်အားကာရံထားခဲ့ကာ မိန်းကလေးမှာ အပြင်သို့လည်း ထွက်ပြေး၍မရချေ။ သူမမှာ သွေးများစိုရွှဲလျက် ပေါင်သား တစ်ဖတ်လည်း ပဲ့ပါသွားခဲ့ချေပြီ။

"မဟုတ်ဘူး၊ ငါ့...အား.. ငါ့ကိုမသတ်ပါနဲ့"

မိန်းကလေးမှာ ဓါးကိုအရူးအမူးလွှဲယမ်းနေခဲ့သည်။

ကျန်သည့် လူ၇ယောက်ထဲတွင် လူရွယ်တစ်ယောက်ကစာလျှင် မျက်လုံးများနီရဲလျက် သူမကိုစိတ်ပူနေခဲ့သည်။ ကျန်လူ၅ယောက်မှာတော့ ကြောက်လန့်စွာ ကြောင်ကြည့်နေကြပြီး သက်လတ်ပိုင်းအရွယ် အမျိုးသမီးကြီးက ရေရွတ်နေခဲ့သည်၊

"၂၇ကွက်ကို ကျလို့မဖြစ်ဘူး။ လုံး၀မဖြစ်ဘူး"

ထန်မော့ အော်ဟစ်လိုက်သည်။

"သူ့ရဲ့အခွံကိုမခုတ်နဲ့ သူ့ရဲ့ ခေါင်းကိုပဲချိန်"

မိန်းကလေးမှာ တစ်စုံတစ်ဦးက သတိပေးလာသည်ကို ကြားလျှင် သတိ၀င်လာသည့်နှယ် ရေရွတ်လိုက်သည်။

"သူ့ခေါင်း ဟုတ်တယ်၊ ခေါင်းကိုခုတ်ပစ်မယ်"

သူမကလိပ်ကြီး၏ခေါင်းကို ခုတ်ရန်ကြိုးစားလိုက်သည်။ သို့သော် လိပ်ကြီးမှာ အလွန်လျှင်မြန်လှသည်။ သူမ၏ဓါးရောက်မလာသေးခင်တွင် ခေါင်းမှာ အခွံထဲ၀င်ပြီးချေပြီ။ မိန်းကလေးမှာ အကြိမ်များစွာ အရူးအမူး ကြိုးစားနေသည့်နိုင် ခေါင်းကို မခုတ်နိုင်သေးချေ။

"မရဘူး ခုတ်လို့မရဘူး"

သူမ ကူကယ်ရာမဲ့စွာ ငိုယိုလိုက်သည်။

ထန်မော့မျက်မှောင်ကျုံ့လိုက်မိသည်။ ထိုစဥ်လိပ်ကြီး၏ခေါင်းမှာ ရုတ်တရက်ထွက်လာခဲ့ပြီး မိန်းကလေး၏ ဘယ်ဘက်လက်မှ အသားတစ်ဖတ်ကို ကွာကျသည်အထိ ကွက်ဆွဲသွားသည်အား တွေ့လိုက်ရပြန်သည်။

ထန်မော့ထပ်၍အော်လိုက်သည်။

"နောက်တစ်ကြိမ် သူမင်းကိုကိုက်တဲ့အချိန် အခွင့်အရေးယူပြီး ခုတ်ချလိုက်"

မိန်းကလေးမှာ ခေါင်းငြိမ့်လိုက်သော်လည်း ပြောသလောက် မလွယ်ကူချေ။ သူမမှာ လိပ်ကြီးထံမှာ နောက်ထပ် အကြိမ်အနည်းငယ် အကိုက်ခံရပြီးတော့မှ ခေါင်းကိုခုတ်ရန် အခွင့်အရေးရခဲ့လေသည်။ လိပ်ကြီး၏ ကိုယ်မှာ မာကျောသော်လည်း ၄င်းခေါင်းမှာတော့ နူးညံ့လှသည်။ ၄င်းကအခုတ်ခံရပြီးသည်နှင့် မြေကြီးပေါ်ပြုတ်ကျသွားကာ ပျောက်ကွယ်သွားတော့သည်။

မိန်းကလေး၏တစ်ကိုလ်လုံးမှာ ဒဏ်ရာများနှင့် ကြမ်းပြင်ပေါ်တွင်လည်း သွေးများ အိုင်ထွန်းနေခဲ့သည်။

ထူးဆန်းသည်မှာ ထိုမိန်းကလေးက ၂၇ကွက်မှ ထွက်၍မရခဲ့သော်လည်း သူမ၏သွေးများကတော့ အပြင်ဘက်သို့တိုင် စီးထွက်လာခဲ့ပြီး လူတိုင်းမှာ မနှစ်မြို့စရာသွေးများအား မနင်းမိစေရန် ဘေးသို့ဖယ်၍ရှောင်လိုက်ရသည်။ မိန်းမငယ်လေးမှာ သွေးအိုင်ထဲ လဲကျသွားလျက် နာကျင်စွာ အသက်ကိုရှိုက်၍ ရှူလိုက်မိသည်။ သူမ၏တစ်ကိုယ်လုံးတွင် လိပ်ကြီးကိုက်ဆွဲခံထားရသော အပေါက်ရာများနှင့် ပြည့်နှက်လျက် ကြည့်ရဆိုးလှသည်။

လူရွယ်မှာ တွန့်ဆုတ်နေပြီးမှာ ခပ်တိုးတိုးဆိုလာခဲ့သည်။

"မေ့မေ့ နားလိုက်ဦးနော်"

မိန်းမငယ်လေးကတော့ ခေါင်းငြိမ့်လာခဲ့သည်။

ကံကောင်းသည်က ကမ္ဘာကြီး အွန်လိုင်းပေါ်တက်လာပြီးနောက် လူတိုင်း၏ ခွန်အားနှင့်ခံနိုင်ရည်က တိုးတက်လာခဲ့သည်။ အရံကစားသမားများသည်ပင် သာမာန်ပရော်ဖက်ရှင်နယ် အားကစားသမားတစ်ဦးထက်ပို၍ သန်မာသည်ပင်။ မိန်းကလေးတွင် ထိုမျှဒဏ်ရာအများကြီးရရှိခဲ့သည့်တိုင် ကုသရန်မလိုအပ်ချေ။ မိနစ်အနည်းငယ်အတွင်း သွေးများကတိတ်သွားပြီး သူမ၏ဒဏ်ရာများမှာ အနာဖေးများတက်ခါခဲ့လေသည်။ သို့သော်သူမမှာ ပြင်းထန်စွာတိုက်ခိုက်ခံခဲ့ရသည်မို့ မလှုပ်ရှားနိုင်ပဲ ကြမ်းပြင်ပေါ်လဲနေဆဲ ဖြစ်သည်။

လုအိုကြီးကအံစာကိုလှိမ့်လိုက်လျက် ၁၈ကွက်မှ ၂၄ကွက်ဆီသို့ လျှောက်သွားခဲ့သည်။

ထို့နောက် အားလုံး၏ အကြည့်များက ထန်မော့ပေါ် ကျရောက်လာတော့သည်။

ထန်မော့ကမူ အမူအယာမဲ့စွာပင် အံစာတုံးကို ကောက်ယူလိုက်သည်။ သူကခေါင်းကိုငုံ့လျက် အံစာတုံးပေါ်မှ နံပါတ်အား ကြည့်လိုက်မိသည်။

သူကအကွက်၂၀တွင် ရပ်နေခြင်းဖြစ်လေသည်။ လောလောဆယ်တွင် ၂၁ကွက် ၂၂ကွက်နှင့် ၂၄ကွက်များမှာ လူအသီးသီး ရှိနှင့်ပြီးသားပင်။ သူသွားနိုင်သော အကွက်များက ၂၃ ၂၅နှင့် ၁၆ကွက်တို့ဖြစ်သည်။ သူက တခြားလူအကွက်များကို ကျရောက်သွားပြီး 'ငါ့ရဲ့ပျော်ရွှင်မှုနဲ့ မျက်ရည်တွေကို ဘယ်သူမျှဝေမလဲ'သက်ရောက်မှုအား အသက်သွင်းမိနိုင်ချေ ၅၀ရာခိုင်နှုန်းရှိသည်ပင်။

ထန်မော့၏အရှေ့မှ ကစားသမားများအားလုံး အသက်တောင် မရှူ၀ံ့သည့်နှယ် သူ့အားကြည့်နေခဲ့ကြသည်။

ထန်မော့မှာ အံစာတုံးအား အမူအယာမဲ့စွာ စိုက်ကြည့်လိုက်သော်လည်း အံစာတုံးအားကိုင်ထားသည့်သူ့လက်တွေကတော့ တင်းတင်းဆုပ်ထားလျက်ပင်။ ထို့နောက် အသက်တစ်ချက်၀၀ရှူလျက် အံစာတုံးအား ပစ်လိုက်တော့သည်။

ဘုန်း...

၄င်းမှာ နံပါတ် ၅ပင်။

ထန်မော့ ၂၅ကွက်အားလျှောက်သွားလိုက်ပြီး အဖြူရောင်အလင်းမှာ အ၀ါရောင်အဖြစ်ပြောင်းလဲသွားလျက် ဗလာကွက်ဟုပြသလာခဲ့သည်။

လူတိုင်း သက်ပြင်းချလိုက်မိသည်။

သို့သော် နောက်တစ်စက္ကန့်တွင် အံစာတုံးကြီးမှာ သက်လတ်ပိုင်းအရွယ် အမျိုးသမီးကြီး၏ လက်ထဲတဖန်ကျရောက်လာပြန်သည်။ အမျိုးသမီးကြီးမှာ အကွက်၂၀၌ ကြောက်ရွံ့စွာ ရပ်နေပြီး အံစာတုံးအား မပစ်ရဲခဲ့ချေ။ သူမ၏ရှေ့မှ လူ၄ယောက်အား အကူအညီမဲ့စွာ ကြည့်နေခဲ့သည်။

ကတုံးနှင့်လူကြီး၊ ဘီယာဗိုက်နှင့်ယောကျာ်း၊ လူအိုကြီးနှင့် ထန်မော့တို့ပင်။

သူတို့က ၂၂ ၂၁ ၂၄ နှင့် ၂၅ကွက်တို့တွင် အစီအစဥ်တကျ ရပ်နေခဲ့သည်။

အမျိုးသမီးကြီးအတွက် ရွေးချယ်စရာ ၂ခုသာ ကျန်ရစ်တော့သည်။

စင်ပေါ်တွင် မာရီယိုက ကျောချမ်းဖွယ်အပြုံးကြီးကို ဆင်မြန်းထားခဲ့သည်။ သူကအောက်မှ လူရှစ်ယောက်အား ပျော်စရာဂိမ်းတစ်ခုနှယ် ကြည့်ရှူနေခဲ့သည်။ ၄င်းမှာ လူအများ အနှစ်၃၀ကျော်ကစားခဲ့သော စူပါမာရီယိုဂိမ်းအား ကြည့်နေသည့်နှယ်။ ဂိမ်းအသစ်တစ်ခုအား ပျော်ရွှင်စွာစောင့်ကြည့်နေခဲ့ကြသော မျက်လုံးများနှင့်အတူတူပင်။

ထိုစဥ် ဂိမ်း၏အပြင်ဘက် အိမ်ယာ၀န်းအတွင်း၌...

လေကာကုတ်အင်္ကျီကို၀တ်ဆင်ထားသော အမျိုးသားက ပန်းခြုံအနီးတွင် ရပ်တန့်သွားခဲ့သည်။

အနောက်အရပ်မှာ လိမ္မော်ရောင် နေရောင်ကဖြာကျလျက် ပန်းခြုံနှင့် သစ်ပင်များအား ရွှေရောင်အလင်းတို့ဖြင့် လွှမ်းခြုံထားသည့်နှယ်။ အိတ်ကြီးတချို့နှင့် ခရီးဆောင်အိတ်၂အိတ်က ပန်းခြုံအနီးတွင်ရှိနေခဲ့သည်။

အမျိုးသားမှာ ဆောင့်ကြောင့်ထိုင်ချလျက် ပန်းခြုံအား စစ်ဆေးကြည့်လိုက်သည်။ အိတ်တိုင်းကိုဖွင့်လျက် အတွင်းမှပစ္စည်းကိုလည်း စစ်ကြည့်လိုက်သည်။ အဆုံးတွင် ထိုအိတ်များမှာ သေဆုံးသွားသူများ၏ပစ္စည်းများဟု ကောက်ချက်ချလိုက်သည်။

နောက်ဆုံးတစ်အိတ်မှာ ထန်မော့၏အိတ်ဖြစ်၏။

အတွင်း၌ဘာမှသိပ်မပါရှိချေ။ ဓါတ်မီး၊ ဓါးတစ်ချောင်း၊ ခေါက်ဆွဲခြောက်တချို့နှင့် ဘီစကစ်နှင့် ရေဘူးများပင်။

အားလုံးကိုစစ်ဆေးပြီးသည့်နောက် သူကမျက်နှာ မသာမယာနှင့် ၀ီစီအားမှုတ်လိုက်သည်။

ငါးမိနစ်ကြာပြီးနောက် မကြာသေးခင်က ၀န်းအတွင်းမှအလောင်း ၆လောင်းကို တွေ့ခဲ့သည့် မိန်းမငယ်လေးနှင့် လူရွယ်တစ်ဦးကရောက်လာခဲ့လေသည်။ သူတို့သည်လည်း ပန်းခြုံအနီးမှ ခရီးဆောင်အိတ်များနှင့် အိတ်များကို တွေ့လိုက်ရလျှင် မျက်နှာပျက်သွားလျက် ထိုအမျိုးသားကဲ့သို့ပင် ထိုအိတ်များကို စစ်ဆေးလိုက်ကြသည်။ စစ်ဆေးပြီးနောက် လူ၃ယောက်မှာ တစ်ယောက်ကိုတစ်ယောက်ကြည့်လိုက်မိကြလေသည်။

" သဲလွန်စတွေအရတော့ ဒုတိမြောက်ဖြစ်စဥ် ဂိမ်းတစ်ခုလိုပဲ"

"ဟုတ်တယ်၊ ဒုတိမြောက်တစ်ခုပဲ"

ပိုနီတေးစီးထားသော မိန်းကလေးက ခရီးဆောင်အိအိတ်များကို ကြည့်လျက်ဆိုလိုက်သည်။

"ဂိမ်းထဲ လူတွေ၀င်သွားပြီလားမသိဘူး၊ ဒီတစ်ခေါက်ရော ဘယ်နှယောက် သေဦးမှာလဲ"

သူမမှာ ထိုအိတ်ပိုင်ရှင်များမှာ သေခြင်း ကံကြမ္မာမှာ မလွတ်မြောက်တော့မည့်နှယ် စိတ်မကောင်းစွာ ကြည့်နေခဲ့သည်။

"ဒီပန်းခြုံရဲ့ မီတာ ၅၀ပတ်လည်ကို စည်းတားလိုက်ပြီး ခရိုင် ၃၁ရဲ့ ဒုတိယမြောက် ဖြစ်စဥ်ဂိမ်းအဖြစ် သတ်မှတ်လိုက်"

"အိုကေ"

🪩

Prev Next