MM Story Teller

Chapter 34

Viewers 2k

🌍Chapter 34

ထက်မြက်သူအချင်းချင်းပြောဆိုရသည်က သိပ်အားစိုက်ထုတ်စရာမလိုချေ။ ထန်မော့က ဖူ၀မ်သော်အား ဂိမ်းသိမ်းမှတ်ဖွင့်ပေးဖို့တောင်းဆိုလိုက်သည်။

၃စက္ကန့်ကြာပြီးနောက် ကြက်ဆင်ဥပေါ်မှ 'S'သဏ္ဍာန်မှာ တဖြတ်ဖြတ်လင်းလာသည်ကို တွေ့လိုက်ရတော့သည်။

သူ၏ခေါင်းထဲတွင် အမျိုးသားတစ်ဦး၏အသံက

တီးတိုးဆိုနေခဲ့သည်။

"ဒါက ၁နာရီကြာလိမ့်မယ်၊ အချ်န်ပြည့်တာနဲ့ သိမ်းမှတ်ကအလိုလိုပျက်သွားလိမ့်မယ်၊ သိမ်းဖို့က အခွင့်အရေးတစ်ခါပဲရှိမယ်"

"အင်း ကျေးဇူးပါပဲ"

ဖူ၀မ်သော်၏စကားများမှာ ရှင်းလင်းပြီး ကြက်ဆင်ဥ၏အသုံးပြုပုံကို အကျဥ်းချုပ်ရှင်းပြပေးခဲ့သည်။ သူ၏အသံကို ထန်မော့သာလျှင်ကြားနိုင်လေသည်။မာရီယိုနှင့် တခြား၂ယောက်၏ မျက်လုံးထဲတွင်တော့ ထန်မော့ရုတ်ချည်းတိတ်ဆိတ်သွားသည်ကိုသာ တွေ့လိုက်ရသည်။ မာရီယိုမှာ စိတ်မရှည်တော့ချေ။

"ကလေး မင်းဒီဂိမ်းကိုမကြိုက်ဘူးလား ၊ ဦးဦးမာရီယိုနဲ့မဆော့ချင်လို့လား၊ ဘာလို့အခုထိ ခုန်မယ့်အကွက်ကို မရွေးသေးတာလဲ"

ထန်မော့ ကြက်ဆင်ဥအားသူ၏အိတ်ထဲတွင် တည်ငြိမ်စွာပြန်ထည့်လိုက်ပြီး မနီးမဝေးမှ ကြီးမားသော မာရီယိုကြီးကိုကြည့်လိုက်သည်။

"ကျွန်တော်စဥ်းစားနေတာ၊ ၆၄၅၆ယောက်ဒီဂိမ်းကိုဆော့ခဲ့ဖူးတယ်၊ အကွက်လည်း ၁၅၀ပဲရှိတာကို ဘယ်သူမှဂိမ်းကိုမရှင်းနိုင်ခဲ့ဘူး။ ဒါကတော့ ပုံမှန်မဖြစ်နိုင်ဘူးလေ"

မာရီယိုက နှေးကွေးစွာ မျက်တောင်ခတ်လိုက်ပြီး

"ချစ်စရာကလေးလေးဘာပြောနေသလဲ ဦးဦးဖြင့်နားမလည်ပါဘူး၊ ခုန်မယ့်အကွက်ကိုပဲ ရွေးလိုက်နော်"

ထန်မော့၏နောက်မှ ဘီယာဗိုက်နှင့်ယောကျာ်းမှာလည်း စိတ်မရှည်စွာနှင့် အော်ဟစ်လာခဲ့သည်။

"အမြန်ရွေးပြီး ခုန်လိုက်တော့လေ။ အချိန်ဆွဲပြီး အဲဒီမိစ္ဆာကြီးကိုရန်သွားစမနေနဲ့၊ စမယ်ဆိုလည်း ငါတို့နဲ့ဝေးဝေးနေ မင်းကိစ္စထဲငါတို့ပါ ရောမသေချင်ဘူး"

အိုမင်းသောအသံကြီးကလည်းဆိုလာခဲ့သည်။

"ဟုတ်တယ်၊ ဒီဟာကြီးကပုံမှန်ဟုတ်မနေဘူး"

ထန်မော့ ၅၅ကွက်တွင်ရပ်နေသော အဘိုးကြီးကို ကြည့်လိုက်မိသည်။

ဂိမ်းမစတင်ခင်က လူ၈ယောက်မှာ စတင်ခြင်းအကွက်တွင် ရပ်နေခဲ့ကြသည်။ ထန်မော့မှာ LED ဘုတ်ပြားပေါ်မှ နံပါတ် ၆၄၅၆ကို သာမာန်ကာလျှံကာ မေးခဲ့မိသေးသည်။

ထိုစဥ်ကတည်းက ထန်မော့က ဤဂိမ်းနှင့်ပတ်သက်၍ တစ်ခုခုက မူမှန်မနေမှန်း သတိထားမိခဲ့ခြင်းပင်။

လူပေါင်း ၆၄၅၆ယောက်ကို ၈ယောက်တစ်အုပ်စုခွဲမည်ဆိုပါက ၈၀၇အုပ်စုရှိရပေမည်။ ထို ၈၀၇အုပ်စုမှာ ကံကောင်းမှုဖြင့်အနိုင်ယူနိုင်သော ဂိမ်းကို နိုင်ခဲ့ရမည့်အစား သေဆုံးသွားခဲ့ရသည်။ ထိုကစားသမား အုပ်စုတိုင်း ကြုံခဲ့ရသော အခြေအနေတစ်ခုရှိမည်ဟုထန်မော့ ပုံဖော်မိခဲ့သည်။

ကစားသမားတစ်ဦးသာ ကျန်ရစ်ပြီး ၄င်းကအကွက်များဆက်ရွေ့ကောင်းရွေ့နေခဲ့လိမ့်မည်။

လူ၂ယောက် တစ်ကွက်တည်းအတူကျသည်နှင့် 'ငါ့ရဲ့ပျော်ရွှင်မှုနဲ့ မျက်ရည်တွေကိုဘယ်သူမျှဝေမလဲ'ဆိုသည့် အဆင့်၇ အပြစ်ဒဏ်ကိုအသက်သွင်းမိချေမည်။ ထန်မော့အနေနှင့် သာမာန်လူများက ထိုအနက်ရောင် မာရီယိုကြီးကို အနိုင်ယူနိုင်လိမ့်မည်မထင်ပါချေ။ ဖူ၀မ်သော်ပင်လျှင် ယှဥ်နိုင်မည်မဟုတ်၊ သို့ဆိုပါက ထိုသက်ရောက်မှုအသက်၀င်သည်နှင့် လူတစ်ဦးမှာ ကျိန်းသေ သေရပေလိမ့်မည်။

ထန်မော့ကဲ့သို့ ကွာခြားချက်ကြီးကြီးနှင့် ၈၃ကွက်သို့ ရောက်နိုင်သော ကစားသမားမျိုးမှာလည်း အလွန်ရှားလောက်မည်ပင်။ အများစုက အချင်းချင်းပြန်သတ်ပြီး နောက်ဆုံးတစ်ယောက်သာကျန်ခြင်းမျိုးဖြစ်လိမ့်မည်။ တစ်ယောက်တည်းကျန်ပြီးနောက်တွင်တော့ 'ငါ့ရဲ့ပျော်ရွှင်မှုနဲ့ မျက်ရည်တွေကို ဘယ်သူမျှဝေမလဲ'သက်ရောက်မှုက အသက်၀င်လာတော့မည်မဟုတ်။ နောက်ဆုံးကျန်ရစ်သူ ကစားသမားမှာ အဆုံးသတ်လိုင်းသို့ မရောက်ခင်အထိ အံစာကို ဆက်တိုက်ပစ်သွားရလိမ့်မည်။

ပြောရသည်မှာ အနည်းငယ်ရက်စက်ပုံပေါ်သော်လည်း ဤဂိမ်းမှာ အမှန်တကယ် ထိုကဲ့သို့ ရလဒ်မျိုးကို လိုအပ်ပုံပင်။

မူလက ထန်မော့တွင်သံသသယတချို့ရှိခဲ့သည်။ အနည်းဆုံးတော့ နောက်ဆုံးကျန်ရစ်သူကစားသမားက ဂိမ်းကိုရှင်းနိုင်လိမ့်မည်ဟု ထင်မိ၍ပင်။ သို့သော် မာရီယိုကဤယူဆချက်ကို ငြင်းလာခဲ့သည်။ နောက်ဆုံးကစားသမားမှာ အထီးကျန်သော ကစားသမားလေးဟု မာရီယိုထံမှ သတ်မှတ်ခံရသည်ပင်။

ထို့ကြောင့်ဤဂိမ်းအား အနိုင်ရနိုင်နှုန်းက ပုံမှန်မဟုတ်ချေ။

၆၄၅၆ဟူသော ဂဏန်းမှာ လုံလောက်သော ဥပမာပင်။ အကွက်ပေါင်း၁၅၀သာရှိပြီး အပြစ်ဒဏ်ကွက်မှာ အကွက် ၃၀ခန့်သာပါရှိပြီး လူပေါင်း ၆၀၀၀ကျော်က အဆုံးသတ်ကိုဘယ်တော့မှ မရောက်နိုင်ခဲ့သည်မှာ မမှန်းဆနိုင်သော အခြေအနေကြီးပင်။

ထန်မော့ အကွက် ၁၂၀မှ ၁၅၀သို့ တိတ်တဆိတ်ကြည့်လိုက်မိသည်။

"ဒီအကွက်သုံးဆယ်မှာ ထောင်ကွက်၆ကွက် ဆက်တိုက်ရှိတယ်"

ထန်မော့၏လေသံမှာ အရေးမကြီးသော အရာကိုပြောဆိုနေသည့်နှယ် တည်ငြိမ်ကာပေါ့ပါးနေခဲ့သည်။

သို့သော် ၄င်းကိုကြားသော ဘီယာဗိုက်နှင့်လူကြီး၏မျက်နှာမှာ ပျက်ယွင်းသွားလျက် လူအိုကြီးမှာလည်း လက်ထဲမှပစ်စတိုကိုတင်းတင်းဆုပ်လိုက်မိလေသည်။

ထန်မော့ မာရီယိုကြီးကို ကြည့်လျက် ဆက်ပြောလိုက်သည်။

"အပြစ်ရှိတဲ့သူကသေရမယ်လို့ အနက်ရောင်မျှော်စင်ကဆိုခဲ့မှတော့ အဲဒီခြောက်ကွက်ကိုနင်းမိတဲ့ဘယ်သူမဆို သေမှာပဲ၊ ထောင်ကွက်ခြောက်ကွက်က ကစားသမားတွေ ရှေ့တိုးလာလို့မရအောင် တားထားလိမ့်မယ်။ ဘယ်နံပါတ်ပဲပစ်ပစ် အဲဒီထောင်ကွက်တွေကိုပဲ နင်းမိတော့မှာလေ"

မာရီယိုကြီး၏ အနက်ရောင်မျက်လုံးများက အနည်းငယ် လှုပ်ခတ်သွားခဲ့သည်။ ချစ်စရာကောင်းပြီး ရင်းနှီးနေသော ဂိမ်းကာရိုက်တာကြီးမှာ တင်ပါးပေါ်လက်ထောက်လျက် ရယ်မောလိုက်သည်။

"ကလေးလေးက ဘာလို့အဲလိုပြောရတာလဲ၊ ဒီဂိမ်းလေးက ဦးဦးမာရီယိုက ကလေးတို့ကို ဆုပေးတဲ့ဂိမ်းလေးပါ၊ ဦးဦးကမင်းတို့ကို ဒီရတနာတွေပေးချင်လို့လေ"

သူ၏လက်အစုံကိုဖြန့်လျက် ထန်မော့ကို ကြည့်ကာဆိုလိုက်သည်။

"ဦးဦးကမင်းကို ဆုလာဘ်တွေရမယ့်အခွင့်အရေးကို မပေးခဲ့လို့လား"

ထန်မော့ပြုံးလိုက်သည်။

"နိုင်မယ့်နည်းလမ်းကရှိပါတယ်၊ ဆုပေးချင်တာမပေးချင်တာကတော့ ခင်များကိစ္စပဲ"

မာရီယို၏အပြုံးကပျောက်ကွယ်သွားခဲ့သည်။

"ကလေးမင်းက ချစ်စရာမကောင်းဘူးပဲ"

ဘီယာဗိုက်နှင့်လူကြီးက အော်ငေါက်လာခဲ့သည်။

"သူ့ကိုရန်သွားမစနဲ့ မင်းရူးနေလား၊ ငါတို့တစ်ယောက်မှ သူ့ကိုမယှဥ်နိုင်ဘူး၊ အဲကောင်ကြီး ဒေါသထွက်လွန်းပြီး အပေါ်ကဆင်းလာခဲ့ရင် ၊ မင်းသေသေရှင်ရှင် ငါနဲ့မဆိုင်ဘူးပဲ၊ ငါ့ကိုလာထိခိုက်လို့ကတော့"

ထန်မော့က ဘီယာဗိုက်နှင့် လူကြီးအားလှည့်ကြည့်လိုက်သည်။

"သူသာဆင်းလာလို့ရရင် အဲဒီအပေါ်မှာ ဒီလောက်အကြာကြီးရပ်နေမယ်ထင်လား"

ဘီယာဗိုက်နှင့်လူကြီး အေးခဲသွားခဲ့သည်။

မာရီယိုကတော့ စကားတစ်ခွန်းမျှမဆိုနိုင်တော့ချေ။

ထန်မော့ကိုလည်း မငြင်းဆန်နိုင်ခဲ့ချေ၊

ထန်မော့အနေနှင့် အနက်ရောင်မျှော်စင်ဂိမ်းများတွင် နိုင်နည်းတစ်နည်းကျိန်းသေရှိရမည်ဟု ယုံကြည်လေသည်။ ဤသည်မှာလည်း'ငါ့စာအုပ်ကိုဘယ်သူခိုးသွားလဲ'ဂိမ်းလိုပါပင်။ စာအုပ်စင်ပေါင်းများစွာက စာအုပ်ထောင်ပေါင်းများစွာထဲမှ စာအုပ်တစ်အုပ်ကို ရှာရသည်မှာ မဖြစ်နိုင်ဟုထင်ရသော်လည်း ဂိမ်းကိုနိုင်ရန်နည်းလည်းရှိနေခဲ့ပြန်သည်။

မာရီယို၏မိုနိုပိုလီဂိမ်းကို ဆော့ကစားချိန်တွင် သူသတိထားရန်လိုအပ်သော အချက်၂ချက်ရှိသည်။

ပထမတစ်ချက်မှာ အလွတ်ခုန်အကွက်အား ကောင်းစွာအသုံးပြုရန်ပင်။

အလွတ်ခုန်အကွက်ကိုအသုံးပြုရန်လည်း နည်းနှစ်နည်းရှိသည်ပင်။ ပထမတစ်ခုမှာ ရှေ့အကွက် ၃၀ထဲမှ ကြိုက်သည့်အကွက်ကို ခုန်ရန်နှင့် နောက်တစ်နည်းမှာ နောက်အကွက် ကြိုက်သည့်အကွက်ကို ပြန်ဆုတ်ရန်ပင်။ ဒုတိယနည်းမှာ မိမိကိုယ်တိုင် ကျဖူးသော အကွက်မှလွဲလျှင် ကြိုက်သည့်အကွက်ကို ပြန်ခုန်ခွင့်ရှိလေသည်။

ဤအလွတ်ခုန်အကွက်က တစ်ခုခုကိုဖော်ပြနေခဲ့သည်။ အကွက်၁၂၀ကျော်သည်နှင့် အလွတ်ခုန်အကွက် ပါရှိတော့မည်မဟုတ်ချေ။ သို့မဟုတ်ပါက ကစားသမားများမှာ အကွက်၁၅၀ကို တိုက်ရိုက် ခုန်လိုက်မှာပင်၊ ၄င်းမှာ မာရီယို၏ဆိုးရွားသော ကာရိုက်တာနှင့်မလိုက်ဖက်။ အလွတ်ခုန်ကွက်သာအမှန်တကယ်ပါရှိပါက လူပေါင်း၆၀၀၀ကျော်ထဲမှ တစ်ယောက်ယောက်ကတော့ ထိုအကွက်၁၂၀ကျော်မှ အလွတ်ခုန်ကွက်ကို ကျခဲ့ပြီး ဂိမ်းကိုနိုင်ခဲ့လိမ့်မည်။

ဒုတိယအနေနှင့် ကစားသမားများ နင်းခဲ့သော အကွက်များကို ဂရုတစိုက်မှတ်သားထားရန်လိုအပ်လေသည်။

တရား၀င်ကစားသမားဖြစ်လာပြီးနောက် ထန်မော့၏ မှတ်ဥာဏ်ကအလွန်ကောင်းလာခဲ့သည်။ သူတို့၈ယောက်လုံးမှာ ပထမ၈၃ကွက်အတွင်း ၆၁ကွက်အထိ ရောက်ရှိခဲ့သည်။ ထိုအထဲတွင် အလွတ်ခုန်အကွက် ၁၆ကွက်၊ အပြစ်ဒဏ်ကွက် ၁၃ကွက်၊ ဆုကွက် ၈ကွက်နှင့် ဗလာကွက် ၁၄ကွက်ရှိလေသည်။

ရှေ့အကွက် ၁၂၀ကွက်ထဲတွင် အလွတ်ခုန်ကွက်က မည်သည့်နေရာတွင်မဆိုပေါ်လာနိုင်သည်။ ၆၁ကွက်အတွင်း အလွတ်ခုန်ကွက် ၁၆ကွက်ရှိခဲ့သည်။ ၄င်းမှာ အလွတ်ခုန်ကွက် ပါ၀င်နှုန်း နည်းပါးသည်ဟုဆိုလိုခြင်းပင်။ နောက်အကွက် ၃၀ထဲတွင်တော့ အလွတ်ခုန်အကွက် လုံး၀ပါရှိတော့မည်မဟုတ်ချေ။

တချိန်တည်းမှာပင် ပထမ ၈၃ကွက်ထဲတွင် ဘုရင်ကွက်ရော ထောင်ကွက်ရောမပါရှိသည်မှာလည်း သေချာလှသည်။

ထန်မော့ရုတ်ချည်း သူ၏အတွေးများကို ဖော်ပြလာခဲ့သည်။

"ဘုရင်ကွက်က ထောင်ကွက်နဲ့ဆက်နေမှာပဲ၊ ဘုရင်ကွက်ဆက်တိုက်လာပြီးရင် ထောင်ကွက်ဆက်တိုက်လာမှာမျိုးပေါ့"

သူ၏လေသံမှာ တိုးညှင်းလွန်း၍ ဘီယာဗိုက်နှင့်ယောကျာ်းနှင့် လူအိုကြီးမှာ မကြားနိုင်ခဲ့ချေ။ သူ၏စကားကို ထောက်ခံသည့်အလား မာရီယိုမှာ မကောင်းဆိုးရွားဆန်ဆန် ပြုံးလာခဲ့သည်။

ရွှေငွေတို့ကဲ့သို့ ရတနာမျိုးမှာ ယနေ့တွင် ဘာအဖိုးတန်ပါတော့မည်နည်း။ ဤမိုနိုပိုလိမ်ဂိမ်းထဲမှ ကစားသမားများက ရွှေများစိန်များကို လိုချင်သည်မဟုတ်၊ ဂိမ်းထဲကိုဆွဲသွင်းခံရခြင်းမှလွဲလျှင် ၅ရာခိုင်နှုန်းမှာ ဘုရင်ကွက်များကြောင့် ဆွဲဆောင်ခံရခြင်းပင်။

အကယ်၍ ဘုရင်ကွက်နှင့်ထောင်ကွက်များကိုသာ ဆက်တိုက်ထားထားပါက ကစားသမားများအတွက် ခက်ခဲမည်ပင်။ သူတို့မှာ သေလုမြောပါးနှင့် အဆုံးသတ်ကို မျှော်ကြည့်နေခဲ့လိမ့်မည်။ ထို့နောက် ဘုရင်ကွက်ကို နင်းမိပြီး အတောမသတ်ပျော်ရွှင်မိလိမ့်မည်ပင်။ ကံကောင်းသော ကစားသမားများမှာ ဂဏန်းငယ်များကို ပစ်မိပြီး ဘုရင်ကွက်များကို ဆက်တိုက် နင်းမိကာ ဆုများရရှိပေလိမ့်မည်။

သို့သော်ဘုရင်ကွက်များ အဆုံးတွင် ထောင်ကွက်များက ၄င်းတို့ကိုစောင့်နေခဲ့သည်၊ အလွတ်ခုန်အကွက်မပါရှိပဲ ထောင်ကွက်၆ကွက်ဆက်တိုက်ထားရှိထားခြင်းမှာ မည်သည့်ကစားသမားအတွက်မှ လွတ်လမ်းမရှိအောင် ပြင်ဆင်ထားခြင်းပင်။

ထန်မော့ အင်္ကျီအိတ်ထဲသို့ လက်ထိုးထည့်လိုက်ပြီး ခေါင်းကိုမော့လိုက်သည်။

"ကျွန်တော် ခုန်ချင်တဲ့အကွက်ကို ဆုံးဖြတ်ပြီးသွားပြီ"

ထန်မော့ အကြာကြီး အချိန်ဆွဲနေပြီးမှ ရုတ်တရက် ခုန်ချင်လာမည်ဟု မာရီယိုက မမျှော်လင့်ထားမိချေ။ မာရီယိုကမေးလိုက်သည်။

"ကလေး မင်းမှာထပ်ပြောစရာမရှိတော့ဘူးပေါ့၊ ခုန်တော့မယ်ပေါ့"

ထန်မော့၏စကားများကို နားထောင်ပြီးသည့်တိုင် မာရီယိုမှာ တောက်ပစွာ ပြုံးနေဆဲပင်။ သူ၏ခေါင်းပေါ်မှ ကတ်ဦးထုပ်အနီလေးကို ပြန်ပြင်ဆောင်းလိုက်ရင်း ဆိုလာသည်။

"ဦးဦးက မင်းလို့ဥာဏ်ကောင်းတဲ့ ကလေးလေးတွေကို အကြိုက်ဆုံးပဲ၊ ကဲအခု ဦးဦးပြင်ပေးထားတဲ့ စပရိုက်တွေအကြောင်းမပြောနဲ့တော့"

ဆက်တိုက်ထောင်ကွက်၆ကွက်မှာ စပရိုက်ပေလော။

ထန်မော့က မာရီယိုအား မော့ကြည့်လိုက်သည်။

"ကျွန်တော်နောက်ပြန်ခုန်ချင်တယ်"

မာရိယိုကြီးက သူ၏လက်ကိုဝေ့ယမ်းလိုက်သည်။

"ဘယ်အကွက်ကို ပြန်ခုန်ချင်တာလဲ"

"ပထမကွက်"

"သြော်...ပထမ.."

မာရီယို၏စကားသံကတ၀က်တပြက်နှင့် ရပ်တန့်သွားခဲ့သည်။ ၄င်းမှာ တစ်စုံတစ်ယောက်က တီဗွီအဟောင်းကြီးကို ရပ်တန့်ခလုတ်နှိပ်လိုက်သည့်နှယ်။ ၂စက္ကန့်ကြာပြီးနောက် သူ၏ခေါင်းကြီးကို ကြောင်တောင်တောင်နိုင်စွာ လှည့်လျက် ထန်မော့အား မည်းမှောင်နေသောမျက်လုံးများနှင့် ကြည့်လာခဲ့သည်။

ဘီယာဗိုက်နှင့် ယောက်ကျာ်းကြီးကမူ ထူးဆန်းသော အမူအယာဖြင့်

"ပထမကွက်ဟုတ်လား၊ ဟုတ်ရောဟုတ်ရဲ့လား"

လူဦးကြီးကတော့ မျက်မှောင်ကျုံ့လျက် အတွေးများနေပုံရကာ ဘာကိုမျှမဆိုလာခဲ့ချေ။

မာရီယိုမှာသူ၏နှုတ်ခမ်းထောင့်ကို ကုတ်ခြစ်လိုက်လျက် ပြုံးဖြဲဖြဲနှင့် မေးလာခဲ့သည်။

"ကလေး ဦးဦးနားကြားများမှားတာလား၊ ပထမကွက်ကိုခုန်ချင်တယ်ဟုတ်လား"

ထန်မော့သူ့အားလျစ်လျူရှုလိုက်လျက် ကောင်းကင်ပေါ်မော့ကြည့်၍ ကျယ်လောင်စွာအော်လိုက်တော့သည်။

"ကျွန်တော့် ပထမအကွက်ကိုပြန်ခုန်မယ်"

"တင်းတောင်~သင်ဟာ ပထမကွက်ကို ပြန်ခုန်ဖို့ရွေးချယ်လိုက်ပါပြီ"

ထန်မော့နောက်သို့လှည့်လျက် ပထမကွက်သို့ တစ်လှမ်းချင်းလျှောက်သွားလိုက်သည်။

မာရီယို၏အသံက ရုတ်ချည်းမြင့်တက်လာခဲ့သည်၊

"မင်းပထမကွက်ကိုပြန်သွားရင် နောက်ဆုံးမှာကျန်ခဲ့မှာနော်၊ မင်းဂိမ်းကို အစကပြန်ကစားရလိမ့်မယ်၊ မင်းရှေ့ကလူနှစ်ယောက် သေသွားရင်တောင် မင်းကနောက်ဆုံးကျန်တဲ့သူဖြစ်လာမှာ၊ ကလေးမင်း အခုလိုကံကောင်းမှုမျိုးနောက်တစ်ကြိမ်မရနိုင်တော့ဘူး၊ မင်း အဆင့်၆အပြစ်ဒဏ်ကွက်ကို အသက်သွင်းမိရင်ဘယ်လိုလုပ်မလဲ"

ထန်မော့ လှည့်မကြည့်ခဲ့ချေ။

"ကျွန်တော်က ၁ကပြန်စပြီး ကိုယ့်ကိုယ် ပြန်စိန်ခေါ်ရတာကြိုက်လို့လေ"

မာရီယိုမှာ ဒေါသများနှင့် ပြာယာခတ်လျက်

"မင်းကချစ်စရာကောင်းတဲ့ ကလေးမဟုတ်ဘူး၊ ကလေးဆိုးပဲ၊ မင်းနောက်တစ်ကြိမ်ကျရင် ဆိုးရွားတဲ့ ပြစ်ဒဏ်ကွက်ကို နင်းမိမှာ"

"ကျွန်တော်ကတော့ ကျွန်တော့်ကိုယ်ကျွန်တော် ချစ်စရာလေးလို့ထင်တာပဲရော်"

မာရီယိုမှာ ထိုမျှအရှက်မဲ့သူကို တစ်ခါမျှမမြင်ခဲ့ဖူးပေ။

"မင်း..."

ခပ်ဟဟရယ်သံတချို့အား သူ၏ခေါင်းထဲတွင် ကြားလိုက်ရပြီး ထန်မော့မှာ ခတ္တတန့်သွားမိသည်။

ဖူ၀မ်သော်ကမေးလာခဲ့သည်။

"ကိုယ်မင်းကို အနှောင့်အယှက်ပေးမိသွားလား"

ထန်မော့သည် ဖူ၀မ်သော်ကမိမိတို့စကား၀ိုင်းကို ကြားနိုင်မှန်းသိသော်လည်း တစ်ပါးသူ၏နားကိုသွားပိတ်ထားလို့လည်း မရပါချေ။ ဂိမ်းသိမ်းရန်အတွက် တဖက်လူကို စိတ်ကြိုက်နားထောင်ခွင့်ပြုထားရန်သာ တတ်နိုင်လေသည်။

"ဟင့်အင်း"

ဝေးကွာသောပေကျင်းတွင် အရပ်မြင့်မြင့်အမျိုးသားမှာ သူ၏ဆံပင်နှင့်ကိုယ်ပေါ်မှာ ဆပ်ပြာမြှုပ်များကို ဆေးကြောပြီးခဲ့ပြီဖြစ်ကာ ကိုယ်အောက်ပိုင်းအား တဘက်တစ်ခုဖြင့် ပတ်ထားခဲ့သည်။

ဖူ၀မ်သော်က ရေဆက်ချိုးရမည့်အစား ဆိုဖာတစ်ခုပေါ်တွင် ထိုင်နေခဲ့သည်၊ စာအုပ်စင်ပေါ်မှ စိတ်ပညာနှင့်ဆိုင်သော စာအုပ်တစ်အုပ်ကိုယူလျက် သာမာန်ကာလျှံကာလှန်ကြည့်နေခဲ့သည်။

ထိုဂိမ်းသိမ်းမှတ်ကိုဖွင့်လိုက်သည်နှင့် တဖက်နှင့်တဖက် ကြားနေရတော့မှာပင်။

သူနှင့်ထန်မော့မှာ အကြိမ်အနည်းငယ်သာ ဆက်သွယ်မိသေးသော်လည်း တဖက်လူက တုံးတုံးအအမဟုတ်ကြောင်း သူခံစားမိသည်။ ထိုဂိမ်းမှာ ဂိမ်းသိမ်းမှတ်ကိုဖွင့်ရန်လိုသည်အထိ အန္တရာယ်များပုံပင်၊ အလွန်ခက်ခဲသောဂိမ်းဖြစ်နိုင်သည်၊

တဖက်လူကထိုကဲ့သို့ အရေးကြီးသောဂိမ်းမျိုးကို ဆော့နေရချိန်တွင် ဖူ၀မ်သော် အေးအေးလူလူရေချိုးမနေနိိုင်ပါချေ။ တဖက်လူကို အနှောင့်အယှက်မဖြစ်စေလို၍ပင်။

ကျိန်းသေပေါက် ထန်မော့အား သူရေချိုးနေသည်ကို မသိစေချင်သည့် တခြားအကြောင်းပြချက်လည်း ရှိနေပေသည်။

သူကကြင်နာတတ်သောသူမဟုတ်သည့်တိုင် တဖက်လူဂိမ်းကစားနေသည်အား အနှောင့်အယှက်ပေးရသည်အထိ ယုတ်မာသူလည်းမဟုတ်သေးပါ။

ဂိမ်းသိမ်းမှတ်မှာ နာရီ၀က်ကြာပွင့်နေပြီးချေပြီ။ သို့နှင့် ဖူ၀မ်သော်မှာ စာအုပ်ဖတ်နေရင်း တဖက်မှကြားနေရသော အသံများမှ တချို့သော အရေးပါသည့်အချက်များကိုတော့ ကြားမိသေးသည်။

မာရီယို၊ အလွတ်ခုန်အကွက်၊ ဘုရင်ကွက်၊ ထောင်ကွက်...

၄င်းမှာ အလွန်စိတ်၀င်စားစရာကောင်းသော ဂိမ်းဖြစ်လောက်သည်။

ကစားသမားများကလည်း စိတ်၀င်စားစရာ ကောင်းလှသည်မဟုတ်ပါလား။

🪩

Prev Next