MM Story Teller

Chapter 35

Viewers 2k

🌍Chapter 35

မာရီယိုမိုနိုပိုလီဂိမ်းထဲတွင်...

ထန်မော့သည် ခါးတွင် တံဘတ်တစ်ခုသာပတ်ထားသော အမျိုးသားမှ ဂိမ်းထဲမှ အသံများကိုနားထောင်နေကြောင်း မသိခဲ့ချေ။ သူ အကွက်၇၀ကိုရောက်လျှင် ဘီယာဗိုက်နှင့်ယောကျာ်းနှင့် ဆုံလေသည်။

ဘီယာဗိုက်နှင့်ယောကျာ်းမှာ ဘေးကိုရွေ့လျက် ထန်မော့အတွက် လမ်းဖယ်ပေးလိုက်သည်။ ထန်မော့ ၆၉ကွက်ကိုရောက်ချိန်တွင် သူကဆိုလာခဲ့သည်။

"ဟေး မင်းတကယ်ကြီးလား၊ တကယ်ကြီး ပထမကွက်ကိုပြန်သွားချင်တာလား"

ဘီယာဗိုက်နှင့်ယောကျာ်းမှာ တခြားသူများကို ဂရုစိုက်သည်ကရှားလှသည်။ ထန်မော့ထိုလူအား စိတ်၀င်စားစွာ ကြည့်လိုက်သည်။

"ခင်များမှာ လေနဲ့ပတ်သက်တဲ့ စွမ်းရည်ရှိတာပေါ့"

ဘီယာဗိုက်နှင့် ယောကျာ်းမှာ စကားများပင် ထစ်အသွားမိသည်။

"မင်း...မင်းဘယ်လိုသိတာလဲ"

ထန်မော့ကပေါ့ပါးစွာဆိုလိုက်သည်။

"ဒီဂိမ်းကထွက်ပြီးတာနဲ့ ကျွန်တော်ခင်များကိုသတ်မှာ"

ဘီယာဗိုက်နှင့် ယောကျာ်း"..."

ခဏကြာပြီးနောက် ထိုလူက တုန်လှုပ်စွာ ဆိုလာခဲ့သည်။

"မင်း...မင်းက ရူးနေတာပဲ"

ထန်မော့ လူအိုကြီး၏အကွက်သို့ရောက်လာလျှင် လူအိုကြီးက ဘာစကားမှမဆိုပဲ ဘေးသို့ဖယ်ပေးလာခဲ့သည်။ သူကထန်မော့အား သိချင်နေသော မျက်လုံးများနှင့်သာ ကြည့်နေခဲ့ခြင်းဖြစ်လေသည်။

ထန်မော့ အဖြူရောင် ဂိမ်းကမ္ဘာကြီးထဲတစ်လှမ်းချင်း လျှောက်သွားနေခဲ့ပြီး လူအိုကြီးနှင့် ဘီယာဗိုက်နှင့်ယောကျာ်းနှင့် မာရီယိုတို့က သူ့ကိုကြည့်နေခဲ့သည်၊ မည်သူကမှ ထန်မော့၏ ရူးသွပ်မှုကို မှတ်ချက်မပေးခဲ့ကြချေ။ ထန်မော့၃ကွက်မြောက်ကို ရောက်လာသည်နှင့် မာရီယိုကရုတ်ချည်းဆိုလာခဲ့သည်။

"အကွက်၁၀၀က ဘုရင်ကွက်ပဲ အဲဒါက အကွက်၁၂၀မတိုင်ခင် တစ်ခုတည်းသော ဘုရင်ကွက်ပဲ ၊ မင်း ၈၃ကွက်ကနေ အကွက်၁၀၀ကိုခုန်လို့ရတယ်၊ ပြန်လှည့်မယ်ဆို နောက်မကျသေးဘူးနော်၊ မင်းအခုက စမှတ်ကိုပြန်သွားနေတာပဲ၊ မင်းကနောက်ဆုံးလူမဖြစ်ခဲ့ရင်တောင် ၈၃ကွက်ကို နောက်တစ်ခါပြန်ကျဖို့ဆိုတာ မဖြစ်နိုင်တော့ဘူးနော်"

ထန်မော့ကခြေလှမ်းကိုရပ်လိုက်လျက် မာရီယိုကြီးကို လှည့်ကြည့်ကာဆိုလိုက်သည်။

"ခင်များဒီလိုတွေပြောနေမှပဲ ကျွန်တော်ပိုပြီး သေချာသွားတော့တယ်"

"မင်း ဆိုးလိုက်တဲ့ကလေး၊ မင်းကလူမဟုတ်ဘူး၊ နတ်ဆိုးပဲ"

ထန်မော့မှာ တည်ငြိမ်စွာပင် ဆိုလိုက်သည်။

"ကျွန်တော်ကနတ်ဆိုးမဟုတ်ပေမယ့် ခင်များကလူမဟုတ်တာတော့ သေချာတယ်ဗျ"

"မင်း..."

မာရီယိုမှာ စင်ပေါ်မှ ခုန်ဆင်းရန် ရုန်းကန်နေခဲ့သည်။ သူကစင်ပေါ်တွင် တဒုန်းဒုန်းနှင့်ဒေါသတကြီးခုန်နေခဲ့ပြီး အဖြူရောင်ကမ္ဘာကြီးတစ်ခုလုံးကို တုန်လှုပ်စေကာ ထန်မော့အား ၀ါးစားပစ်တော့မည့်နှယ် ကြည့်နေခဲ့သည်။ လူအိုကြီးနှင့် ဘီယာဗိုက်နှင့်ယောကျာ်းတို့မှာ ထိုအရာကြီးက ထန်မော့ကိုသတ်ချင်နေကြောင်း သံသယပင်မရှိတော့ချေ။ သို့သော် ထန်မော့ပြောခဲ့သို့ပင် မာရီယိုမှာ စင်ပေါ်တွင်ပိတ်မိနေပြီး ဆင်းလာ၍မရခဲ့။

ထိုကြမ်းတမ်းသောလှုပ်ရှားမှုတို့ကြောင့် စင်ပတ်လည်မှ အပေါစားနီယွန်မီးများကို ပြုတ်ကျလာစေသည်။ သို့သော် မာရီယိုကတော့ဆင်းလာ၍မရပါချေ။ သူကထန်မော့အား မီး၀င်း၀င်းတောက်နေသော မျက်လုံးများဖြင့် ကြည့်နေရုံသာတတ်နိုင်လေသည်။

ထန်မော့လှည့်ကြည့်လိုက်သည်။ သူက၃ကွက်တွင်ရပ်နေပြီး ပထမကွက်နှင့် ဒုတိယကွက်အား ကြည့်နေခဲ့ခြင်းပင်။

ထိုနှစ်ကွက်ကိုကြည့်နေရင်း သူ၏မျက်လုံးများကိုမှေးကျဥ်းလိုက်သည်။ အဆုံးတွင်တော့သူက ဒုတိယကွက်ကို နင်းဖြတ်လျက် ပထမကွက်ကိုလျှောက်သွားလိုက်တော့သည်။ ပထမကွက်ကိုနင်းလိုက်သည်နှင့် သူ၏တင်းကြပ်နေသော စိတ်အစဥ်မှာလည်း ပြေလျော့သွားခဲ့တော့သည်။ သူကခပ်တိုးတိုးဆိုလိုက်သည်။

"ခင်များကဒီလောက်တော့လည်း ရူးသွပ်မနေဘူးပဲ၊ ခုတော့ဂိမ်းသိမ်းမှတ်ကိုအလကား သက်သက်ဖြုန်းတီးလိုက်မိပြီ"

ကျယ်လောင်စူးရှသော ကလေးသံတစ်ခုကို အဖြူရောင်ကမ္ဘာကြီးထဲ ကြားလိုက်ရတော့သည်။

"တင်းတောင်~ဂိမ်းရှင်းကွက်ကိုအသက်သွင်းလိုက်ပါပြီ၊ ၂၀၁၇ နို၀င်ဘာ ၂၂ရက်၊ ၂၂နာရီ ၄၉မိနစ်မှာ ကစားသမားထန်မော့က အုပ်စုဂိမ်းအကြီးစား မာရီယိုရဲ့ မိုနိုပိုလီဂိမ်းကို ရှင်းလင်းလိုက်ပြီးတော့ 'ဦးဦးမာရီယိုရဲ့ ရတနာ'ကို ရရှိသွားပါပြီ"

ဘီယာဗိုက်နှင့်ယောကျာ်းမှာ ထန်မော့အား မယုံနိုင်စွာ ကြည့်လာခဲ့သည်။

လူအိုကြီးမှာမူ ကြောင်အလျက် ရှုပ်ထွေးစွာ ကြည့်နေခဲ့လေသည်။

မာရီယိုမှာ စင်ပေါ်တွင် ဒေါသတကြီး ခြေဆောင့်နေ၏

"မင်းကနတ်ဆိုးပဲ၊ မင်းကနတ်ဆိုး၊ အဲဒါကငါ့ရဲ့ရတနာလေး၊ ဦးဦးမာရီယိုက ပိုက်လိုင်းတွေပြင်ပြီး၂၆နှစ်ကြာအောင် ကြိုးစားရှာထားရတာ၊ မင်းလိုငပျင်းလေးက ဘာမှမလုပ်ပဲ ဦးဦးမာရီယိုရဲ့ ရတနာကို ခိုးချင်နေတာလား၊ မပေးနိုင်ဘူး"

မာရီယိုကြီးက ထိုသို့ဆိုနေသည့်တိုင် ရွှေတောင်ကြီးကတော့ အဖြူရောင်ကမ္ဘာကြီးအတွင်း ပေါ်ထွက်လာခဲ့ချေပြီ။

ရွှေတောင်ကြီးမှာ အားလုံး၏မြင်ကွင်းရှေ့တွင်ပေါ်ထွက်လာခဲ့သည်။ မာရီယိုကြီးမှာ အလန့်တကြားဖြင့် ပြုတ်ကျနေသော ရွှေဒင်္ဂါးများအားလှမ်း၍ ဖမ်းဆွဲနေခဲ့လေသည်၊ သို့သော် ရွှေဒင်္ဂါးတစ်ပြားကိုသာလျှင် ဖမ်းမိချေသည်။ ကြီးမားသော ရွှေတောင်ကြီးမှာ ထန်မော့ထံပျံသန်းလာတော့သည်။

ရေတွက်မရသော စိန်များ ရွှေဒင်္ဂါးပြားများမှာ ထန်မော့၏ရှေ့တွင်စုပုံနေခဲ့သည်။ ဒင်္ဂါးတချို့က လိမ့်လျက် ထန်မော့၏ခြေထောက်နားသို့ ကျလာခဲ့သည်။

သူကငုံ့လျက် ရွှေဒင်္ဂါးပြားကို ကောက်ယူလိုက်သည်။

"ဘာလို့ ပထမကွက်လဲ"

လူအိုကြီးကမေးလာခဲ့သည်။

ထန်မော့ရွှေဒင်္ဂါးထံမှ အကြည့်လွှဲလျက်

"ဒီဟာကဂိမ်းတစ်ခုလေ၊ နိုင်မယ့်နည်း ကျိန်းသေရှိမှာပဲ"

လူအိုကြီးမှာ မျက်မှောင်ကျုံ့လျက် ရေရွက်လာခဲ့သည်။

"ပထမကွက်...ပထမကွက်..."

သူကတတွတ်တွတ်ရေရွတ်ရင်း ထိုပထမကွက်နှင့် ပတ်သက်သော သဲလွန်စကိုရှာလိုခဲ့ပုံပင်။

ထန်မော့ကရှင်းပြလိုက်သည်။

"လူ၆၀၀၀ကျော်က တစ်ယောက်မှ ဂိမ်းကိုမရှင်းနိုင်ခဲ့ဘူး၊ ဒါကပြဿနာ၂ခုထောက်ပြနေတယ်၊ ပထမတစ်ခုက အကွက်၁၂၀ကျော်ရင် အလွတ်ခုန်ကွက်မရှိတော့တာပဲ၊ ဒုတိယတစ်ခုက ၁၂၀ကွက်ကျော်ရင် ထောင်ကွက် ၆ကွက်ဆက်တိုက်ရှိလိမ့်မယ်။ ဒီကောင်ကြီးက ဒီလိုမျိုးယုတ်မာလောက်တယ်လေ"

ထန်မော့ စင်ပေါ်တွင်ငိုနေသော မာရီယိုကြီးအား ကြည့်လိုက်သည်။

"သူကထောင်ကွက် ၆ကွက်ကို တစ်ဆက်တည်းထားထားမှာ ၊ အဲဒီမတိုင်ခင်တော့ ဘုရင်ကွက် ၆ကွက်ပေါ့"

အဆုံးသတ်ကိုရောက်ရှိခဲ့သူက ဘုရင်ကွက် ၆ကွက်ကို ရုတ်ချည်းရရှိမည်ဖြစ်ကာ အနိုင်ရရှိရန်လည်း ၆ကွက်ကိုသာကျော်ဖြတ်ဖို့လိုပေတော့မည်။

သို့သော်လည်း ထိုကစားသမားများမှာ အဆုံးသတ်ကိုမရောက်ခဲ့ရှာပေ။

အစမှအဆုံးအထိ ဤဂိမ်းမှာ ကစားသမားများအနေနှင့် ဂိမ်းရှင်းကွက်ကိုရှာဖွေရန် လိုအပ်ခြင်းပင်။

"အစကတော့ အလွတ်ခုန်ကွက်တွေကများလှချည်လားပေါ့၊ အလွတ်ခုန်ကွက်က ၂၀ရာခိုင်နှုန်း ရှိမှာလေ၊ အစုစုပေါင်းဆိုလည်း အကွက်၂၀ပေါ့၊ အလွတ်ခုန်ကွက်ကိုကျခဲ့သူ အများစုကလည်း ပထမကွက်ကိုပြန်ခုန်ဖို့ ရွေးလိမ့်မှာမဟုတ်ဘူး။ ကစားသမားတွေရဲ့ အရှေ့ကအကွက်တွေကလည်း ဘာမှန်းမသိဘူးလေ၊ အလွန်ဆုံးမှ တခြားကစားသမား လွတ်လွတ်ကင်းကင်း ရပ်နိုင်ခဲ့တဲ့ အကွက်တွေကိုပဲ ပြန်ခုန်ဖို့ရွေးချယ်မိကြမှာပဲ၊ အထူးသဖြင့်'ငါ့ရဲ့ပျော်ရွှင်မှုနဲ့ မျက်ရည်တွေကို ဘယ်သူမျှဝေမလဲ'ဆိုတဲ့ သက်ရောက်မှုကို ရှောင်ရှားဖို့ပေါ့"

လူအိုကြီးလည်းထိုသို့လုပ်ခဲ့သည်။ ပထမဆုံးအကြိမ် အလွတ်ခုန်အကွက်ကိုနင်းမိစဥ်က သူက လွတ်လွတ်ကျွတ်ကျွတ်အကွက်ကို ပြန်ခုန်ရန် ရွေးချယ်ခဲ့သည်။

ဘီယာဗိုက်နှင့်ယောကျာ်းမှာ ယခုထိသဘောမပေါက်သေးချေ။

"ဒါဆို ဘာလို့ ပထမကွက်လဲ"

ထန်မော့ကမေးလိုက်သည်။

"အကယ်၍ အကွက် ၁၅၀ထဲမှာ အလွတ်ခုန်ကွက်သာမရှိရင် ကစားသမားတစ်ယောက် မရောက်ဆုံးအကွက်က ဘယ်အကွက်လဲ"

ဘီယာဗိုက်နှင့်ယောကျာ်းမှာ ခတ္တမျှစဥ်းစားပြီးနောက် အလျင်စလိုအော်ဟစ်လာခဲ့သည်။

"ပထမကွက်၊ အဟုတ်ကို ပထမကွက်ပဲ"

အနည်းဆုံးတော့ထိုသူမှာ ကယ်တင်မရသည်အထိ မတုံးအသေးပေ။

မူလက ထန်မော့ဂိမ်းထဲမှထွက်သည်နှင့် သူ့အား ဂိမ်းထဲသို့ဆွဲခေါ်ခဲ့သူအား ခြေထောက်နှစ်ချောင်းကိုချိုးပစ်မည်ဟုပင်၊ အနည်းဆုံးတော့ ထိုလူကတရား၀င်ကစားသမားဖြစ်သည့်အတွက် နောက်တစ်နေ့ဆိုလျှင်ပင် စိတ်ကြိုက်ပြေးလွှားခုန်ပေါက်နေနိုင်လောက်ချေပြီ။ ယခု ထိုဘီယာဗိုက်နှင့် ယောကျာ်းမှာ ဦးနှောက်အနည်းငယ် အလုပ်လုပ်ပုံမို့ ခြေတစ်ချောင်းကိုသာချိုးရန်ဆုံးဖြတ်လိုက်သည်။

ဘီယာဗိုက်နှင့်လူကြီးက ၄င်းကိုနားလည်ပါက လူအိုကြီးသည်လည်း နားလည်လိမ့်မည်ပင်။

မာရီယို၏မိုနိုပိုလီဂိမ်းမှာ အကွက်ပေါင်း ၁၅၀ရှိသည်။ ၁၄၉နှင့် ၁၅၀ကွက်ကို နင်းခဲ့သူဟူ၍ မရှိခဲ့လောက်ပေ။ သို့သော်လည်း ပထမကွက်ကိုပြန်သွားဖို့က ပို၍ဖြစ်နိုင်ချေနည်းလေသည်။

အကွက်၁၅၀သို့ရောက်ရန် နည်းလမ်းပေါင်းစုံရှိသည်။

သို့သော်အလွတ်ခုန်ကွက်သာမရှိပါက ပထမကွက်ကိုနင်းမိနိုင်မည့်ဖြစ်နိုင်ချေသည်ကား ပထမဆုံးအကြိမ်အံစားအား နံပါတ်၁ကိုပစ်မိမှသာ ရပေမည်။

ဒုတိယကွက်ကိုနင်းရန်မူ အံစာနံပါတ် ၂ကိုပစ်မိခြင်းပင်ဖြစ်စေ ၁ကိုပစ်မိပြီးမှ နောက်တစ်ကြိမ်၁ကိုထပ်ပစ်မိခြင်းဟူ၍ ဖြစ်နိုင်ချေ ၂ခုရှိသည်။

တတိယကွက်ကိုနင်းရန်မူနည်းလမ်း ၄မျိုးရှိလေသည်။ ၃တိုက်ရိုက်ပစ်ခြင်းဖြစ်စေ၊ ၂ကိုပစ်ပြီးမှ ၁ကိုပစ်၍ဖြစ်စေ၊ ၁ကိုပစ်ပြီးမှ ၂ကိုထပ်ပစ်မိခြင်းဖြစ်စေ၊ သို့တည်းမဟုတ် ၁သုံးကြိမ်ဆက်တိုက်ပစ်မိခြင်းဖြစ်စေ ဟူ၍ပင်။

အကွက်များရှေ့ရောက်သည်နှင့်အမျှ ထိုအကွက်ကိုနင်းမိမည့်ဖြစ်နိုင်ချေလည်း ဆပွားတိုးလာမည်ပင်။

အကယ်၍ ကစားသမားတစ်ဦးသာရှိပါက အကွက်၁၅၀သို့ရောက်နိုင်ချေမှာ အင်မတန်နည်းလှသည်။ အကယ်၍ အကွက်၁၀၀သို့ရောက်နိုင်ခဲ့လျှင်တောင် ပြင်းထန်သော ပြစ်ဒဏ်ကွက်ကို နင်းမိဦးမည်သာ။

ထန်မော့မတိုင်ခင်က ကစားသမား ၆၄၅၆ယောက်က ဤဂိမ်းကိုဆော့ကစားခဲ့သည်။ အနည်းဆုံးတော့ ထိုလူ၆၀၀၀ကျော်ထဲမှ တစ်ယောက်စီကတော့ ဤ၁၅၀ကွက်ထဲမှ တစ်ကွက်ချင်းစီကိုနင်းမိခဲ့လောက်ပေသည်။ ၁၄၉ကွက်ကိုတောင် ရောက်ကောင်းရောက်ခဲ့နိုင်သည်။ သို့သော်ထိုအထဲမှ မည်သူကမျှ ဂိမ်းရှင်းကွက်ကို မနင်းမိခဲ့ချေ။

၄င်းအတွက် ဖြစ်နိုင်ချေ ၂ခုသာရှိသည်။

ပထမအနေနှင့် မာရီယိုမှာ ထောင်ကွက်၆ကွက်ကို ဆက်တိုက်ထားထားခြင်းပင်။ ဤနည်းဖြင့်ကစားသမားမှာဂိမ်းရှင်းကွက်သို့ မရောက်နိုင်ခင် သေဆုံးသွားမည်ဖြစ်သည်။

သို့သော်ထိုကဲ့သို့အခြေအနေမျိုးမဟုတ်ခဲ့ပြန်။

ဂိမ်းရှင်းကွက်အား ထောင်ကွက်များနောက်တွင်ထား၍မရချေ။ သို့ဆိုပါလျှင် ဤဂိမ်းမှာ အနိုင်ရနိုင်ချေဟူ၍ ရှိတော့မည်မဟုတ်။ အကယ်၍အနက်ရောင်မျှော်စင်မှာ ကစားသမားများကို အမှန်တကယ်သေစေလိုပါက ဤမျှရှူပ်ထွေးသော ဂိမ်းကိုပြင်ဆင်ထားစရာပင်မလိုချေ။ မာရီယိုကိုယ်တိုင်ပင် ဂိမ်းထဲသို့၀င်ရောက်လာသော ကစားသမားများအား မျက်စိတစ်မှိတ်အတွင်းသတ်ပစ်နိုင်လေသည်။

ထို့ကြောင့် ဂိမ်းအားရှင်းနိုင်သောနည်း ရှိရပေမည်။

ဒုတိယဖြစ်နိုင်ချေမှာ အစကတည်းက ကစားသမားများက ဂိမ်းရှင်းကွက်ကိုနင်းမိရန်မှာ ကံကောင်းခြင်းနှင့်ဆိုင်လောက်ပေသည်။

အကွက်၁၅၀ထဲ ကစားသမားတစ်ဦးက ပထမကွက်ကို နင်းမိနိုင်ရန် ကံကောင်းခြင်းကိုလိုအပ်လေသည်။ သို့သော် တစ်စုံတစ်ယောက်က ကံအကောင်းလွန်ပြီး အစကတည်းက ၁ကိုပစ်မိပါကလည်း ဤဂိမ်းကိုလိုတော့မည်မဟုတ်တော့။

ပထမအကြိမ်တွင် အံစာနံပါတ် ၁ကိုပစ်မိနိုင်ချေမှာ ၆ပုံ၁ပုံသာရှိသည်။ မာရီယိုမှာ ထိုရတနာများကို နှစ်အတော်ကြာ စုဆောင်းခဲ့ရသည်ဟု ဆိုခဲ့သည်။ သူ့အနေနှင့် ကစားသမားအများကြီးကို သူ၏ရတနာများကို ယူဆောင်သွားခွင့်ပေးမည်မဟုတ်ချေ။

ထို့နောက် အနက်ရောင်မျှော်စင်အနေနှင့် ပထမအကြိမ်အံစာပစ်ချိန်တွင် ထိုဖြစ်နိုင်ချေကိုတားဆီးပေးထားကောင်းပေးထားလိမ့်မည်။

ပထမကွက်ကိုရောက်ရှိနိုင်မည့်နည်းလမ်းမှာ အလွတ်ခုန်ကွက်သာလျှင်ရှိချေတော့မည်။ ထန်မော့မှာ အသုံးလည်းသိပ်မ၀င်လှသည့် အဘယ်ကြောင့် အလွတ်ခုန်ကွက်များ အလွန်များရသနည်းဟု နားမလည်ဖြစ်နေခဲ့ရသည်။ သို့သော်ဂိမ်းရှင်းကွက်အကြောင်း သဘောပေါက်သွားချိန်တွင် ထိုအလွတ်ခုန်ကွက်များ၏ ရည်ရွယ်ချက်မှာ သိသာလာတော့သည်။ ၄င်းကပင် ကစားသမား ၈ယောက်လုံးဂိမ်းရှင်းကွက်ကို အောင်အောင်မြင်မြင်သွားနိုင်စေမည့်အခွင့်အရေးပင်။ တချိန်တည်းမှာပင် ထိုအလွတ်ခုန်အကွက်များမှာ ကစားသမားများအား ဂိမ်းရှင်းကွက်ကိုပို့ဆောင်ပေးသည့်နေရာတွင်သာ အသုံး၀င်ကြောင်းဖော်ပြနေခဲ့သည်၊

မာရီယိုမှာ စင်ပေါ်တွင်လှဲချလျက် အသည်းအသန်ငိုနေခဲ့သည်။

ထန်မော့သူ၏အိတ်ထဲမှ ကြက်ဆင်ဥကိုထုတ်ယူလိုက်သည်။

"ဂိမ်းသိမ်းမှတ်ကိုပိတ်လိုက်လို့ရပါပြီ လူကြီးမင်းဖူ၊

အချိန်အကြာကြီး အနှောင့်အယှက်ပေးမိတဲ့အတွက် တောင်းပန်ပါတယ်"

ဖူ၀မ်သော်မှာ ကြက်ဆင်ဥထဲမှ အသံများကို နားထောင်နေစဥ်ကတည်းက ဖတ်လက်စ စာအုပ်ကို ပိတ်လိုက်နှင့်ပြီးဖြစ်သည်။ သူကခပ်တိုးတိုးရယ်လျက်

"ဒီဂိမ်းသိမ်းမှတ်က သိပ်အသုံးမ၀င်သလိုပဲနော်"

ထန်မော့က အကူအညီမဲ့စွာဆိုလိုက်သည်။

"အမှန်ပဲ၊ ကျွန်တော်ဒီတစ်ခေါက်ဖြုန်းတီးမိသွားပြီ၊

ကျွန်တော်က မာရီယိုကဒီထက်ပို ယုတ်မာမယ်ထင်ထားတာ၊ ထောင်ကွက်၅ရာခိုင်နှုန်းပါနေတာက ခန့်မှန်းချေပဲဆိုတော့ ၇ကွက် ၈ကွက်လောက်များပါနေမလားဆိုတာလည်း မသေချာလှဘူးလေ၊ ကျွန်တော်ထင်တာက မာရီယိုက အကွက်၁၂၀မတိုင်ခင် ထောင်ကွက်ကိုထည့်ထားမယ်ပေါ့၊ ၁၀၀နဲ့ ၁၂၀ကြားပေါ့၊ အကွက်၁၀၀က ဘုရင်ကွက်လို့ သူကိုယ်တိုင်ပဲ ပြောခဲ့တာဆိုတော့ ထောင်ကွက်ကလည်း အဲဒီ ၆ကွက်အကွာမှာပဲရှိမှာ၊ သူ့အတွက်ကတော့ ဘုရင်ကွက်ကို နင်းမိခဲ့တဲ့သူက ထောင်ကွက်ကိုလည်း နင်းမိဦးမလားဆိုပြီး စိတ်၀င်စားနေမှာပေါ့ဗျာ"

ဖူ၀မ်သော်ကဆိုလိုက်သည်။

"သူကအတော်ဆိုးတာပဲ"

"သူကပိုပြီးတောင် ယုတ်မာချင်ရင် ပထမအဖြတ်မှာတင် ထောင်ကွက် ၇ကွက် ၈ကွက်ကိုချထားနိုင်တယ်။ဒီလိုဆို ဒုတိယကွက်ကိုသွားဖို့ တစ်နည်းပဲရှိတော့မှာလေ၊ အဲဒါကလည်း ပထမကွက်ကိုရောက်ဖို့ ဖြစ်နိုင်ချေနဲ့ အတူတူပဲ၊ ကျွန်တော်က ပထမကွက်ကိုပိုအလေးသာနေတာ၊ ဒါပေမယ့် အကယ်၍ ပထမကွက်သာ တကယ်ပဲထောင်ကွက်ဖြစ်နေခဲ့ရင် ကျွန်တော် ဂိမ်းကိုသိမ်းလိုက်ပြီး ဒုတိယကွက်ကို ရွေးနိုင်အောင်လို့လေ၊ သူကအဲလောက် ယုတ်မာမနေတာတော့ နှမြောစရာပဲဗျ"

"မင်းကိုကြည့်ရတာ ဂိမ်းကဒီထက်ပိုရက်စက်ဖို့ မျှော်လင့်နေသလိုပဲနော်"

"အခုလည်း သူကအတော်လေး လူမဆန်လှပါဘူး"

ထန်မော့မှာ ရုတ်ချည်းတစ်ခုခုကို သတိရသွားမိကာ အမူအယာမဲ့လျက်ဆိုလိုက်သည်။

"တောင်းပန်ပါတယ်ဗျာ၊ ခင်များဒီဂိမ်းအကြောင်း နားမလည်ဘူးဆိုတာမေ့ပြီး အများကြီးပြောမိသွားတယ်"

ဖူ၀မ်သော်က ခေါင်းကိုညင်ညင်သာသာယမ်းလျက်ဆိုသည်။

"မဟုတ်ပါဘူး၊ ကြားရတာတော့ အတော်စိတ်၀င်စားစရာကောင်းတဲ့ ဂိမ်းပါပဲ"

ထန်မော့မှာ သူ၏လက်ထဲမှ ကြက်ဆင်ဥအား အမူအယာကင်းမဲ့စွာ ကြည့်နေသည့်တိုင် သူ၏ရင်ထဲတွင်တော့ ထူးဆန်းသောခံစားချက်ကြီးတိုး၀င်လာခဲ့သည်။

ဤသည်မှာ တူညီသောစရိုက်နှင့် လူကိုတွေ့မိ၍ ရင်းနှီးသလိုခံစားရခြင်းပေလော...

🪩

Prev Next