MM Story Teller

Chapter 37

Viewers 2k

🌍Chapter 37

လူရွယ်၏အမူအယာမှာ အလွန်ပင် ရိုးသားပုံပေါ်သည်။ သူကအနီးသို့လည်း တိုးကပ်မလာပဲ ထန်မော့နှင့် ၂မီတာခန့်တွင်ရပ်နေပြီး လုံခြုံသော အကွာအဝေးကိုထိန်းသိမ်းထားခဲ့သည်။ ထန်မော့အထင်လွဲသွားမည်ကိုလည်း စိုးရိမ်နေပုံဖြင့် အသည်းအသန် ရှင်းပြလာသည်။

"ကျွန်တော်ပြောချင်တာက ဒီလူလေးယောက်က အချင်းချင်းပြန်သတ်ထားကြသလိုပဲလေ၊ သူတို့ရဲ့သေမှုသေခင်းတွေကိုကြည့်ရတာ ဒုတိယမြောက် ဖြစ်စဥ်ဂိမ်းရဲ့ သဲလွန်စတွေနဲ့ကိုက်နေလို့လေ ၊ ဖြစ်စဥ်ဂိမ်းကဒီနားမှာပဲ ရှိရမှာ၊ ခင်များကလည်း ၀င်ပေါက်မှာရပ်နေတော့ ဂိမ်းထဲကနေ အသက်ရှင်လျက် ထွက်လာတဲ့သူလို့ထင်လို့ပါ"

ထိုသူက မိမိတို့၃ဦးအား အနက်ရောင်မျှော်စင် မွန်းစတားများလားဟု သင်္ကာမကင်းဖြစ်နေပုံပင်။

ထန်မော့ထံမှ ရိုက်နှက်ခြင်းခံထားရသော ဘီယာဗိုက်နှင့် ယောကျာ်းကတော့မြေပြင်ပေါ်တွင် လှဲနေခဲ့ပြီး ဘာတစ်ခုမှဆိုမလာပေ။

လူအိုကြီးကခေါင်းငြိမ့်လျက် ဆိုလာသည်။

"ဟုတ်တယ်လေ၊ ငါတို့တွေအခုပဲ ဂိမ်းထဲကထွက်လာတာ၊ ဒါပေမယ့် ဒုတိယမြောက် ဖြစ်စဥ်ဂိမ်းဆိုတာ ဘာကိုပြောတာလဲ"

ထိုအမျိုးသားကမူ အဖြေမပေးပဲ ဆက်၍မေးလာခဲ့သည်။

"ဒါဆိုဒီလေးယောက်က ဂိမ်းထဲမှာသေသွားပြီးတော့ ခင်များတို့ချည်းပဲ ထွက်လာတာပေါ့"

သူကမြေကြီးပေါ်မှ အလောင်းလေးလောင်းကို ညွှန်ပြလျက်မေးလိုက်ခြင်းပင်။

လူအိုကြီးက ခေါင်းငြိမ့်လျက်

"ဟုတ်တယ်လေ ငါတို့၃ယောက်ပဲ ထွက်လာတာ"

လူရွယ်၏မျက်လုံးမှာ ပြူးကျယ်သွားလျက် သူ၏အိတ်ထဲမှ ငွေရောင် ၀ီစီကိုထုတ်ယူလျက် မှုတ်လိုက်လေတော့သည်။ ၁မိနစ်ခန့်အကြာတွင် မိန်းကလေးတစ်ဦးနှင့် ကောင်လေးတစ်ဦးကလည်း ထိုနေရာသို့ရောက်ရှိလာခဲ့သည်။ မြေကြီးပေါ်မှ အလောင်းလေးလောင်းကိုမြင်လျှင် သူတို့သည်လည်း ပထမဆုံးအမျိုးသားလိုပင် တထပ်တည်းတုန့်ပြန်ခဲ့ကြသည်။ ထို့နောက်တွင် ထိုအလောင်းများဘေးမှာ ထန်မော့တို့၃ဦးအား ကြည့်လာခဲ့သည်။

မိန်းကလေးမှာ ထိတ်လန့်သွားဟန်ဖြင့်

"သူတို့ကမဟုတ်ပါဘူးနော်..."

"ဟုတ်တယ်၊ သူတို့အခုလေးတင်ပဲ ဂိမ်းထဲကထွက်လာတာ၊ ဒုတ်ယမြောက်ဖြစ်စဥ်ဂိမ်းကို သူတို့ရှင်းလိုက်ကြပြီ"

ထိုလူစိမ်းသုံးယောက်မှာ ထန်မော့၊ ဗိုက်ယာဗိုက်ယောကျာ်းနှင့် လူအိုကြီးကိုကြည့်နေခဲ့သည်။

၀ိစီကိုကိုင်ထားသော လူရွယ်ကရှေ့သို့ထွက်လာခဲ့သည်။ ထန်မော့ ထိုသူအားတိတ်တဆိတ်စောင့်ကြည့်နေရင်း သူ၏လက်ကောက်၀တ်မှ မီးခြစ်ဆံတက်တူးကို အသာဖိထားလိုက်သည်။ ထိုစဥ်လူရွယ်ကဆိုလာခဲ့သည်။

"ကျွန်တော်က နျဲ့ဖေးပါ၊ သူတို့တွေကတော့ ကျွန်တော့်ရဲ့ အသင်းဖော်တွေ ထန်ရှောင်းနဲ့ ရဲ့ယွမ်ကျယ်တဲ့။ ကျွန်တော်တို့က ဒီအနီးအနားမှာ အလောင်းတွေပေါ်ပေါ်လာနေတယ်ဆိုပြီး သတင်းရထားတာ၊ ပြီးတော့ ဒုတိယမြောက်ဖြစ်စဥ်ဂိမ်းများ ဒီနားမှာ ပေါ်လာတာလားဆိုပြီး လာစူးစမ်းတာပေါ့"

"ဒုတိယမြောက် ဖြစ်စဥ်ဂိမ်းဆိုတာ ဘာလဲ"

ဘီယာဗိုက်နှင့်ယောကျာ်းက မနေနိုင်ပဲ မေးလာခဲ့သည်။

နျဲ့ဖေးက စိတ်ရှည်လက်ရှည်ရှင်းပြလာသည်။

"ဒါက ခင်များတို့ အခုလေးတင်ထွက်လာတဲ့ ဂိမ်းကို ကျွန်တော်တို့ပေးထားတဲ့ ကုဒ်နာမည်လို့ပဲဆိုရမှာပဲ၊ ကျွန်တော်တို့ ၃ယောက်လုံးက အဖွဲ့အစည်းတစ်ခုထဲကလေ၊ အဖွဲ့အစည်းမှာ လူသိပ်မရှိသေးဘူး။ ကျွန်တော်တို့က ၁၇ယောက်ပဲရှိပြီးတော့ အထူးစွမ်းရည်ရှိတဲ့သူတွေကိုပဲ လက်ခံတာ၊ အနက်ရောင်မျှော်စဥ်ဂိမ်းတွေစတင်ပြီးတဲ့နောက် ကျွန်တော်တို့ ဖြစ်စဥ်ဂိမ်း ၇ခုကိုရှာတွေ့ခဲ့တယ်၊ ခင်များတို့အခုလေးတင်ထွက်လာတဲ့ ဟာက နံပါတ်၂ပေါ့"

မိန်းကလေးကလည်း ခေါင်းတစ်ချက်ငြိမ့်လျက် ဝင်ပြောလာသည်။

"အနက်ရောင်မျှော်စင်ဂိမ်းတွေက လွန်ခဲ့တဲ့ ၄ရက်ကတည်းက တရား၀င်စတင်ခဲ့တာဆိုတော့ ရှင်တို့လည်း သိပြီးလောက်မှာပါ၊ အနက်ရောင်မျှော်စင်က မျှော်စင်တိုက်ခိုက်ခြင်းဂိမ်းတွေပဲ ရှိတာမဟုတ်ဘူး၊ အခု ဒုတိယမြောက်ဖြစ်စဥ်ဂိမ်းနဲ့တူတဲ့ ဂိမ်းတွေအများကြီးရှိသေးတယ်၊ ဂိမ်းကိုအသက်သွင်းတဲ့ နည်းကတော့ တစ်ခုနဲ့တစ်ခုမတူကြဘူး။ ဥပမာ ခုနှစ်ခုမြောက်ဖြစ်စဥ်ဂိမ်းရဲ့ ၀င်ပေါက်က လမ်းဘေးကစတိုးဆိုင်သေးသေးလေးပဲ၊ ဆိုင်ထဲကဘာကိုပဲယူယူ ဂိမ်းကိုအသက်သွင်းပြီးသားဖြစ်သွားမှာ..."

ထန်မော့စတင်တွေးတောလိုက်မိသည်။

သူကအနေနှင့် ဤ၃ယောက်၏နောက်ခံကို သံသယမ၀င်မိသလို လိမ်နေသည်ဟုလည်းမထင်ပါချေ။ သူတို့သည်လည်း အမှန်တကယ်မရှိသော အဖွဲ့အစည်းတစ်ခုကို လုပ်ကြံဖန်တီး၍ လိမ်ညာနေစရာအကြောင်းမရှိချေ။ နှစ်ဦးနှစ်ဖက်မှာ ယခုမှစတင်တွေ့ဆုံဖူးခြင်းဖြစ်ကာ ထန်မော့မှ တဖက်လူများအား

မည်သည်မှမဆိုခဲ့သည်တိုင် တဖက်ကတော့ အချက်အလက်အများကြီးကို ထုတ်ပြောလာခဲ့သည်။

လက်ရှိတွင် ကမ္ဘာကြီးတွင် သတင်းအချက်အလက်များသည်ကား အဖိုးမဖြတ်နိုင်သော အရာများမဟုတ်ပေလော။

ထန်မော့မှာ လူအိုကြီးနှင့် ဘီယာဗိုက်နှင့်ယောကျာ်းတို့နောက်တွင်ရပ်နေခဲ့ပြီး မိမိကိုယ်ကို ထိုလူ၃ယောက်ထံမှ ၃မီတာခန့်အကွာအဝေးတစ်ခု ခြားထားခဲ့သည်။

လူအိုကြီးကမေးလိုက်မိသည်။

"ငါတို့ကိုဘာလို့ ဒါတွေလာပြောပြနေတာလဲ"

လူ၃ဦးမှာ တစ်ဦးကိုတစ်ဦး အပြန်အလှန်ကြည့်လိုက်ပြီးမှ

"ကျွန်တော်တို့က ခင်များတို့ကို ကျွန်တော်ရဲ့ စခန်းကိုလိုက်ပြီး ဒုတိယမြောက်ဖြစ်စဥ်ဂိမ်းရဲ့ အသေးစိတ်အချက်လေးတွေကို ပြောပြပေးစေချင်တာပါ၊ ဒီဂိမ်းရဲ့ ၀င်ပေါက်မှာက အလောင်းတွေအများကြီးပဲ၊ အချင်းချင်းပြန်သတ်ထားတဲ့ပုံနဲ့၊ ဒီဂိမ်းကိုစတွေ့ကတည်းက တွက်ရမယ်ဆို ကျွန်တော်တို့ စုစုပေါင်း

၃၉၁လောင်းတောင်တွေ့ထားတာ၊ ရှင်ကျန်သူလည်းမရှိဘူးလေ၊ ခင်များတို့က ဒုတိယမြောက်ဖြစ်စဥ်ဂိမ်းကို ရှင်းနိုင်ခဲ့တဲ့ တစ်ဦးတည်းသော လူတွေပဲ"

လူအိုကြီးမှာ မျက်မှောင်ကျုံ့လျက်မေးလိုက်သည်။

"မင်းတို့ကိုပြောပြပေးလို့ ဘာရမှာလဲ"

လူအိုကြီးမှာ ထန်မော့ တွေးနေသည််အရာကို ထုတ်မေးလိုက်ခြင်းပင်။ ထန်မော့တွင် ဤကဲ့သို့အရာများအတွက် စိတ်၀င်စားမှုမရှိချေ။ အဖွဲ့အစည်းသို့ ၀င်ရန်လည်းစိတ်ကူးမရှိ၊ ဤကမ္ဘာကြီးတွင် နားလည်သဘောပေါက်လွယ်သော အသင်းဖော်နည်းနည်းနှင့် အသင်းဖွဲ့ခြင်းကသာ အသက်ရှင်နှုန်းကို တိုးမြှင့်ကောင်းမြှင့်ပေးနိုင်လိမ့်မည်။ သို့သော် လူ၁၇ယောက် ပါရှိသော အဖွဲ့အစည်းမှာ အန္တရာယ်များလွန်းပြီး လူအများပစ်မှတ်ထားစရာတစ်ခု ဖြစ်လာလိမ့်မည်။

နျဲ့ဖေးကဆိုလိုက်သည်။

"ခင်များတို့က ဒုတိယမြောက်ဖြစ်စဥ်ဂိမ်းကိုတောင် ရှင်းနိုင်ခဲ့တာဆိုတော့ ထူးခြားတာတစ်ခုခုတော့ရှိကြမှာပဲဗျာ၊ အကယ်၍ ခင်များတို့ ဆန္ဒရှိမယ်ဆိုရင် အဖွဲ့အစည်းကို ၀င်ဖို့လည်း ဖိတ်ခေါ်ပါတယ်"

သို့လျှင် ၄င်းမှာအကျိုးရလဒ် ဖြစ်ပုံပင်။

ထန်မော့က ဘီယာဗိုက်နှင့်ယောကျ်ား၏ ကုတ်အင်္ကျီကို လမ်းဘေးတွင် ပစ်ချလိုက်ပြီး လှည့်ထွက်သွားခဲ့သည်။

နျဲ့ဖေးက ထန်မော့အား ထူးဆန်းစွာကြည့်လိုက်မိသော်လည်း တားတော့မတားလိုက်ချေ။ ထန်မော့တို့အုပ်စုမှ လူ၃ယောက်မှာ ဒုတိယမြောက်ဖြစ်စဥ်ဂိမ်း၏ အခြေအနေကိုသိကြမှာပင်၊ ထိုထဲမှ တစ်ဦးက စခန်းသို့လိုက်လာသ၍ ၁ယောက်ဖြစ်စေ ၂ယောက်ဖြစ်စေ အရေးမကြီးလှပေ။

လူအိုကြီးကဆိုလိုက်သည်။

"ငါက အဲလောက်အစွမ်းမရှိဘူး၊ အဖွဲ့အစည်းကိုမ၀င်တော့ဘူး"

သူ့အတွက်၄င်းမှာ သိပ်ဆွဲဆောင်မှုရှိမနေချေ။

နျဲ့ဖေး အနည်းငယ်တွေးတောလိုက်လျက်ထပ်ပြောလိုက်သည်

"မ၀င်လို့လည်းရပါတယ်၊ ကျွန်တော်တို့က လူတိုင်းကို လက်ခံနေတာမဟုတ်ဘူးရယ်၊ အဲဒီအစား သတင်းဖလှယ်လို့လည်းရတယ်၊ ခင်များသာ ဒီဒုတိယမြောက်ဖြစ်ဥ်ဂိမ်းရဲ့ အချက်အလက်တွေကိုပြောပြမယ်ဆို ကျွန်တော်တို့ကလည်း တန်ဖိုးတူညီတဲ့ သတင်းမျိုးခင်များကို ပြန်ပေးမှာပါ"

ထန်မော့၏ ခြေလှမ်းတို့ ရပ်တန့်သွားခဲ့သည်။ သူက ဖြည်းညင်းစွာပြန်လှည့်လာခဲ့ပြီး ဘီယာဗိုက်နှင့်ယောကျာ်းဘေးတွင် ရပ်လိုက်သည်။

ဘီယာဗိုက်နှင့်ယောကျာ်းမှာ တုန်လှုပ်လျက်

"မင်းအခုပဲ ထွက်သွားတာမဟုတ်လား၊ ဘာလို့ပြန်လာတာလဲ"

ထန်မော့ကသူ့ကို တစ်ချက်သာငုံ့ကြည့်လျက် ပေါ့ပါးစွာမေးလိုက်သည်။

"ကျွန်တော့်ခြေထောက်နဲ့ ကျွန်တော့်ဘာသာ ဘယ်သွားသွားပေါ့၊ မရဘူးလား"

"အိုကေ..."

ဘီယာဗိုက်နှင့် ယောကျာ်းမှာ ဒေါသထွက်နေသည့်တိုင် ဘာမှမဆိုရဲတော့ချေ။

နျဲ့ဖေးတို့၃ယောက် ၄င်းကိုမြင်လျှင် တစ်ခုခုကိုချက်ချင်းသဘောပေါက်သွားလျက် ထန်မော့ကိုကြည့်လိုက်ကြသည်။

ဤလူက ဂိမ်းကိုရှင်းခဲ့သည့် အဓိကလူဖြစ်ပုံပင်။

အဖွဲ့အစည်း၏စခန်းမှာ ပူဒုန်တွင်ဖြစ်သည်။ နာရီ၀က်ခန့်လမ်းလျှောက်လာကြပြီးနောက် ရှော့ပင်းမောတစ်ခုကိုတွေ့လိုက်ကြရသည်။ ဘီယာဗိုက်နှင့်ယောကျာ်း၏ ခြေထောက်မှာ ထန်မော့ကြောင့်ဒဏ်ရာရထားပြီး သူတို့နှင့်အတူ ထော့နဲ့ထော့နဲ့ဖြင့် လိုက်လာခဲ့သည်။ လူအိုကြီးက လမ်းခရီးတွင် ထို၃ယောက်မှ အဖွဲ့အစည်းအကြောင်းမိတ်ဆက်ပေးလာမည်ဟု ထင်ထားသော်လည်း သည်အတိုင်း စခန်းသို့သာတိုက်ရိုက်ခေါ်သွားခြင်းခံလိုက်ရလေသည်။

ထိုမောလ်မှာ အိမ်ယာ၀န်းများ၏ကြားတွင်ရှိပြီး အဆောက်အဦးကြီး ၅ခုကဆက်စပ်နေခဲ့သည်။ အလွန်ကျယ်၀န်းပြီး ထိုရှော့ပင်းမောလ်ကြီးမှာ အဆောက်အဦးကြီးများနှင့် ၀န်ရံခြင်းခံထားရသည်။ ထိုမောလ်ကြီး၏အနီးတွင် လူများစွာက ၀င်လိုက်ထွက်လိုက်ဖြင့် သွားလာနေကြသည်။ လူစိမ်းတစ်စုချည်းကပ်လာသည်ကိုမြင်လျှင် အဆိုပါလူအုပ်မှာ အနည်းငယ်သတိအနေအထားနှင့်ဖြစ်သွားကြသည့်တိုင် နျဲ့ဖေးအား မြင်သည်နှင့် သူတို့၏မျက်လုံးများက ပြူးကျယ်သွားကြသည်။

ကြီးမားသော ရှော့ပင်းမောလ်ကြီးတွင် စူပါမားကတ်၊ အ၀တ်အထည်ဆိုင်များ၊ အိမ်သုံးပစ္စည်းဆိုင်များရှိလေသည်။ ကမ္ဘာကြီးအွန်လိုင်းပေါ်တက်သွားချိန်မှစ၍ လူသားတို့ ကုန်ပစ္စည်းများ ထုတ်လုပ်မှုမှာလည်း ရပ်တန့်သွားခဲ့သည်။ သူတို့နေထိုင်လိုပါက သင့်တော်သောနေရာတစ်ခုကို ရှာရပေလိမ့်မည်။ ရှော့ပင်းမောလ်နှင့် စူပါမားကတ်တို့မှာ ရှင်သန်နေထိုင်ရန်နေရာကောင်းများဖြစ်သည်။ ဤကဲ့သို့နေရာများတွင် ကစားသမားများ အများကြီးရှိလေသည်။

နျဲ့ဖေး၏အဖွဲ့အစည်းမှာ ငါးလွှာမြောက်တွင် တည်ရှိလေသည်။ လမ်းတစ်လျှောက်တွင်မူ ကစားသမားများ ပိုပိုနည်းလာခဲ့သည်။ သူတို့ စူပါမားကတ်အားဖြတ်လျှောက်လာလျှင် အရပ်မြင့်မြင့် သန်သန်မာမာနှင့် နိုင်ငံခြားသားတစ်ဦးက အနီးသို့လျှောက်လာပြီး သူ၏သိပ်မပီသသော တရုတ်လေသံဖြင့် မေးလာသည်။

"နျဲ့ဖေး သူတို့ကဘယ်သူတွေလဲ၊ ဘာလို့စခန်းကိုခေါ်လာတာလဲ"

နျဲ့ဖေးကပြန်ဖြေလိုက်သည်။

"ဂျက် သူတို့က ဒုတိယမြောက် ဖြစ်စဥ်ဂိမ်းကို ရှင်းခဲ့တဲ့သူတွေပဲ"

နိုင်ငံခြားသားကြီးမှာ ရုတ်ချည်းတက်ကြွလာခဲ့သည်။ သူကမျက်လုံးကိုကျယ်ကျယ်ဖွင့်လျက် ထန်မော့အား အပေါ်အောင်သေချာအကဲခတ်ကြည့်လာသည်။ ထန်မော့ကလည်း ထိုလူအား ပြန်ကြည့်နေခဲ့သည်။

ဤနိုင်ငံခြားသားမှာ နှစ်မီတာခန့်မြင့်ပြီး သန်မာသော ကြွက်သားများရှိသည်ပင်။ သူ၏လက်မောင်းမှာ သာမာန်မိန်းကလေးတစ်ဦး၏ ခါးလုံးပါတ်နီးနီးပင် ရှိသည်။

တချို့လူများမှာ ခန့်မှန်းရခက်ပြီး ပုန်းကွယ်နေသော စွမ်းရည်များရှိတတ်ကြသည်။ ဥပမာ ထန်မော့ကဲ့သို့လူမျိုးပင်။ သူမီးခြစ်ဆံကြီးကို မထုတ်ယူသ၍ မည်သူကမျှသူ့တွင် စွမ်းရည်ရှိသည်ဟု မထင်ကြပဲ ဂရုလည်းမစိုက်ကြချေ။ သို့သော် သည်လူကတော့ သူ့ကိုကောက်မလျက် မီတာနှစ်ဆယ်ကျော်အထိ ပစ်လိုက်နိုင်သည်ဟု ထန်မော့တွင် သံသယပင်မရှိချေ။

ဂျက်ဟုခေါ်သော နိုင်ငံခြားသားက နျဲ့ဖေးတို့သုံးယောက်နှင့်ပေါင်းလျက် လိုက်လာခဲ့သည်။ လှေကားတချို့ကိုဆင်းလျက် မြေအောက်ထပ် တစ်ခုထံသို့ခေါ်သွားခဲ့ခြင်းပင်။ သူကဆိုလိုက်သည်။

"နျဲ့ဖေး မင်းငါ့ကို သူတို့ဒုတိယမြောက်ဖြစ်စဥ်ဂိမ်းကို ဘယ်လိုရှင်းခဲ့တယ်ဆိုတာ ပြောမှရမယ်၊ ငါတောင် အဆင့်၃ ဖြစ်စဥ်ဂိမ်းကို မရှင်းနိုင်တာ၊ အဆင့်၂ဖြစ်စဥ်ဂိမ်းကို ရှင်းနိုင်တဲ့သူတွေက သာမာန်လူတွေတော့မဟုတ်လောက်ဘူး"

နျဲ့ဖေးကခေါင်းငြိမ့်လျက်ပြန်ပြောလိုက်၏

"ဒေါက်တာလော့ကိုတွေ့ပြီးရင် ပြောပြမယ်"

"အင်း မမေ့နဲ့နော်၊ ပြောမရဘူးလေ၊ ငါလည်း ဥာဏ်အလင်းပွင့်ပြီးတော့ အဆင့်၃ဖြစ်စဥ်ဂိမ်းကိုရှင်းရင် ရှင်းနိုင်သွားမှာ"

ထိုနိုင်ငံခြားသားမှာ သူတို့အား မြေအောက်ထပ်သို့ပို့ဆောင်ပြီးနောက် ထွက်သွားခဲ့သည်။ ထန်ရှောင်းနှင့် ရဲ့ယွမ်ကျယ်ကလည်း လိုက်ထွက်သွားခဲ့ပြီး နျဲ့ဖေးကသာ ထန်မော့တို့၃ဦးအား မြေအောက်ထပ်သို့ ဦးဆောင်ခေါ်လာခဲ့လေသည်။ ထို့နောက်မီးလင်းနေသော အခန်းတစ်ခုကိုတွန်းဖွင့်၍ ၀င်သွားခဲ့သည်။

"ဒေါက်တာလော့ ကျွန်တော် အဆင့်၂ဖြစ်စဥ်ဂိမ်းကို ရှင်းခဲ့တဲ့သူတွေကို ခေါ်လာတယ်၊ ခင်များသူတို့ဆီက အနက်ရောင်မျှော်စင်နဲ့ပတ်သက်တဲ့ သဲလွန်စတစ်ချို့ရနိုင်မလားပဲ"

တောက်ပသောအလင်းရောင်အောက်တွင် ဓါတ်ခွဲခန်းကုတ်အဖြူရောင်ကို ၀တ်ဆင်ထားသော လူရွယ်က မျက်မှန်ကိုချွတ်လိုက်လျက် ထန်မော့အား ပြုံးပြလာခဲ့သည်။

ထန်မော့ ခတ္တမျှအံ့အားသင့်သွားမိသော်လည်း ခေါင်းတစ်ချက်ငြိမ့်ကာနှုတ်ဆက်လိုက်သည်။

"လော့ဖုန်းချန်း"

နျဲ့ဖေးက အံ့သြလျက်ပင်။

"ခင်များ ဒေါက်တာလော့ကိုသိတာလား"

လော့ဖုန်းချန်း ထိုင်ခုံမှထလျက် ထန်မော့ထံသို့လျှောက်လာခဲ့သည်။ ထို့နောက် သူ၏အဖွဲ့၀င်အား ကြည့်လိုက်သည်။

"ကြည့်ရတာ မင်းကသူ့နာမည်ကိုမမေးရသေးဘူးထင်တယ်၊ နျဲ့ဖေး ဒါကထန်မော့၊ ၁၉ရက်နေ့က အနက်ရောင်မျှော်စင်ပထမထပ်ကို ငါနဲ့အတူရှင်ကျန်ခဲ့တဲ့သူပဲ"

နျဲ့ဖေးကနားလည်သွားခဲ့သည်။

"ခင်များက ထန်မော့ပဲ"

ထန်မော့ဘာမျှမဆိုခဲ့ချေ။

လော့ဖုန်းချန်းက နွေးထွေးစွာလက်ကိုဆန့်ပေးလာခဲ့လျှင် ထန်မော့လည်းပြန်လည်ဖမ်းဆုပ်လိုက်သည်။ လော့ဖုန်းချန်းမှာ မိတ်ဟောင်းဆွေဟောင်းဖြင့် ပြန်ဆုံရသည့်နှယ် တောက်ပစွာ ပြုံးနေခဲ့သည်။ ထန်မော့ကမူ မျက်ခုံးကိုပင့်လျက် တစ်ဖက်လူစကားဆိုသည်အား စောင့်နေခဲ့သည်။

"မှားစရာအကြောင်းမရှိဘူး၊ အဆင့်၂ဖြစ်စဥ်ဂိမ်းကိုရှင်းခဲ့တဲ့သူက မင်းပဲဖြစ်မှာ"

လော့ဖုန်းချန်းက သူ၏လက်ကိုလွှတ်လျက် မှတ်ချက်ပြုလာခဲ့သည်။

"မင်းသာဆိုရင် အဲဒီလောက်ခက်ခဲတဲ့ ဖြစ်စဥ်ဂိမ်းကို ရှင်းတယ်ဆိုတာလည်းဖြစ်နိုင်ပါတယ်၊ ကောင်းပြီ နျဲ့ဖေး ဒီဧည့်သည်နှစ်ယောက်ကို အပြင်ကိုခေါ်သွားလိုက်ပါ၊ အဲဒီမိတ်ဆွေကိုကြည့်ရတာ ဂိမ်းထဲမှာခြေထောက် ဒဏ်ရာရလာပုံပဲ ဒုတိယထပ်က ဆေးခန်းကိုခေါ်သွားပြီး တစ်ခူခုလုပ်ပေးလိုက်ပေါ့"

နျဲ့ဖေးခေါင်းငြိမ့်လိုက်သည်။

ဘီယာဗိုက်နှင့်ယောကျာ်းမှာ ထန်မော့နှင့် လော့ဖုန်းချန်းအား အပြန်ပြန်အလှန်လှန် ကြည့်ပြီးနောက် ထန်မော့ကြောင့်ကျိုးသွားသော ညာခြေထောက်ကို တရွတ်ဆွဲလျက် နျဲ့ဖေးနောက်မှလိုက်သွားရတော့သည်။

အခန်းထဲတွင် ထန်မော့နှင့် လော့ဖုန်းချန်းသာကျန်ရစ်လေသည်။

"မင်း ငါ့ကို အဲသလို ကြည့်နေစရာမလိုပါဘူး"

လော့ဖုန်းချန်းက ထိုင်ခုံတွင် ထိုင်ချလိုက်ပြီး ထန်မော့ကိုလည်း လောကွတ်ပြုလိုက်သည်။

"တို့တွေက သူငယ်ချင်းတွေမဟုတ်ရင်တောင် အသင်းဖော်တွေဖြစ်ဖူးတာပဲလေ"

လော့ဖုန်းချန်းက ထပ်ပေါင်းဆိုလိုက်သည်။

"ငါမင်းကို မလိမ်ပါဘူး၊ စိတ်မပူစမ်းပါနဲ့"

ထန်မော့ခုံကိုဆွဲယူလျက် ထိုင်လိုက်သည်။ သူ၏ကျောပိုးအိတ်အား ကြမ်းပြင်ပေါ်တွင် ချလိုက်ပြီး လော့ဖုန်းချန်းအား ကြည့်လိုက်သည်။

"စွမ်းရည်ရှိတဲ့သူတွေပဲ အဖွဲ့အစည်းကို ၀င်လို့ရတယ် ထင်ထားတာ၊ သူတို့လည်း နိုင်ငံ့သုတေသနပညာရှင်တွေပဲလား"

လော့ဖုန်းချန်းကမေးလာသည်။

"နျဲ့ဖေးနဲ့ ထန်ရှောင်းကိုပြောနေတာလား၊ ဘယ်ဟုတ်မလဲ၊ အနက်ရောင်မျှော်စင်ဂိမ်းတွေစလာတဲ့နောက် ငါကရှန်ဟိုင်းမှာ တစ်ဦးတည်းသောရှင်ကျန်ရစ်တဲ့ အနက်ရောင်မျှော်စင်သုတေသနပညာရှင်ပဲ၊ ခေါင်းဆောင်တွေကတော့ လုံး၀ပျောက်သွားတဲ့အထဲ ပါသွားတာလေ၊ နျဲ့ဖေးကတော့ ကမ္ဘာကြီးအွန်လိုင်းပေါ်မတက်ခင်က စီနီယာကျောင်းသား၊ ထန်ရှောင်းကတော့ အကသင်နေတာ၊ သူတို့မှာ စွမ်းရည်ရှိဖို့မလိုပါဘူး၊ သန်မာပြီးတော့ အဖွဲ့၀င်တွေက လက်ခံသ၍ အဖွဲ့အစည်းကို ၀င်လို့ရပါတယ်၊ ဒါနဲ့မင်း အနက်ရောင်မျှော်စင်ထဲ ဘယ်လို၀င်ရမလဲသိလား"

ထန်မော့လည်း ဖုံးကွယ်မထားခဲ့ချေ။

"ထုတ်ပယ်ခြင်းစတင်တယ်ဆိုတဲ့ သုံးရက်အတွင်း တရား၀င်ကစားသမားတွေက အနက်ရောင်မျှော်စင်ဂိမ်းကို ဆော့ခဲ့ရတာ၊ ခိုး၀င်သူတွေကတော့ တစ်ယောက်ယောက်ကို သတ်ခဲ့တာ၊ အရံကစားသမားတွေကတော့ အပြင်ဂိမ်း၂မျိုးကိုနိုင်ဖို့လိုတယ်"

သူက အကျဥ်းချုံးဆိုလိုက်သည်။

🪩

Prev Next